Yitso 2

Wolo ni Jieɔ Nyɔŋmɔ Nilee Kpo

 1, 2. Mɛni hewɔ wɔ Bɔlɔ lɛ gbɛtsɔɔmɔ he hiaa wɔ lɛ?

SHISHINUMƆ yɛ mli akɛ wɔ Bɔlɔ ni yɔɔ suɔmɔ lɛ kɛ ŋaawoo kɛ gbɛtsɔɔmɔ wolo aaaha adesai. Ni ani okpɛlɛɛɛ nɔ akɛ gbɛtsɔɔmɔ he miihia adesai?

² Nɔ ni fe afii 2,500 ni eho nɛ lɛ, gbalɔ kɛ yinɔsaneŋmalɔ ko ŋma akɛ: “Adesa ni nyiɛ nɛɛ, bɔ ni eeetsɔ ejaje enajifaamɔi eha lɛ, ebɛ edɛŋ.” (Yeremia 10:23) Ŋmɛnɛ, anɔkwale ni nakai wiemɔ lɛ ji lɛ efee faŋŋ fe be fɛɛ. No hewɔ lɛ, Yinɔsaneŋmalɔ William H. McNeill ŋma akɛ: “Adesa niiashikpamɔ yɛ shibɔlemɔ ŋulami nɛɛ nɔ lɛ efee jaramɔ shihilɛi kɛ adesai ashihilɛ mli gbɛjianɔ ni atoɔ amaa shi lɛ mlifolɔmɔ ni yaa nɔ kɛtsaraa nɔ be fɛɛ be.”

 3, 4. (a) Te esa akɛ wɔfee wɔnii yɛ Biblia lɛ kasemɔ he wɔha tɛŋŋ? (b) Mɛɛ gbɛ nɔ wɔbaatsɔ wɔje Biblia lɛ mlipɛimɔ shishi?

³ Biblia lɛ tsuɔ wɔ hiamɔ nii kɛha gbɛtsɔɔmɔ ni nilee yɔɔ mli lɛ fɛɛ he nii. Eji anɔkwale akɛ, mɛi pii ahiɛ feɔ amɛ yaa kɛ amɛpɛi Biblia lɛ mli klɛŋklɛŋ kwraa lɛ. Wolo agbo ni, ni efai komɛi ashishinumɔ bɛ mlɛo. Shi kɛ akɛ mla wolo ko ni tsɔɔ nɔ ni esa akɛ ofee koni onine ashɛ gboshinii ni jara wa ko nɔ ha bo lɛ, ani ofiteŋ be ni okane lɛ jogbaŋŋ? Kɛ ona akɛ ewa akɛ ooonu wolo lɛ fai komɛi ashishi lɛ, ekolɛ obaana yelikɛbuamɔ kɛjɛ mɔ ni le saji ni tamɔ nɛkɛ he nii lɛ dɛŋ. Mɛni hewɔ okwɛɛɛ Biblia lɛ kɛ su ni tamɔ nakai nɔŋŋ? (Bɔfoi lɛ Asaji 17:11) Sane eba nibii pii ahe fe nɔ ni eba heloonaa gboshinii ahe. Taakɛ wɔna yɛ yitso ni tsɔ hiɛ lɛ mli lɛ, Nyɔŋmɔ he nilee lɛ baanyɛ ekɛ mɔ aya naanɔ wala mli.

⁴ Nyɛhaa wɔpɛia wolo ni jieɔ Nyɔŋmɔ he nilee kpo lɛ mli wɔkwɛa. Klɛŋklɛŋ lɛ, wɔkɛ wiemɔ fioo baakpa Biblia lɛ hiɛ. No sɛɛ lɛ wɔbaagba nɔ hewɔ ni mɛi pii ni le emli saji lɛ heɔ yeɔ akɛ eji Nyɔŋmɔ Wiemɔ ni jɛ mumɔŋ lɛ he sane.

NƆ NI YƆƆ BIBLIA LƐ MLI

5. (a) Mɛni yɔɔ Hebri Ŋmalɛi lɛ amli? (b) Mɛni yɔɔ Hela Ŋmalɛi lɛ amli?

⁵ Woji 66 ni aja mli enyɔ, ni afɔɔ amɛ tsɛmɔ akɛ Kpaŋmɔ Momo lɛ kɛ Kpaŋmɔ Hee lɛ yɔɔ Biblia lɛ mli. Aŋmala Biblia mli woji nyɔŋmai etɛ kɛ nɛɛhu yɛ Hebri mli titri, kɛ 27 yɛ Hela mli. Hebri Ŋmalɛi lɛ ni feɔ 1 Mose kɛyashi Maleaki lɛ, wieɔ nibɔɔ he, kɛ adesai ayinɔsane mli klɛŋklɛŋ afii 3,500 lɛ hu he. Be mli ni wɔpɛiɔ Biblia lɛ fa nɛɛ mli lɛ, wɔkaseɔ bɔ ni Nyɔŋmɔ kɛ Israelbii lɛ ye ha lɛ he sane—kɛjɛ amɛ fɔmɔ akɛ maŋ yɛ afii ohai 16 D.Ŋ.B. lɛ mli aahu kɛbote afii ohai 5 D.Ŋ.B. lɛ mli.a Hela Ŋmalɛi lɛ, ni Mateo kɛyashi Kpojiemɔ yɔɔ mli lɛ, kɛ jwɛŋmɔ maa Yesu Kristo kɛ ekaselɔi lɛ atsɔɔmɔi kɛ nitsumɔi yɛ klɛŋklɛŋ afii oha Ŋ.B. lɛ mli lɛ anɔ.

 6. Mɛni hewɔ esa akɛ wɔkase Biblia muu lɛ fɛɛ?

⁶ Mɛi komɛi kɛɔ akɛ “Kpaŋmɔ Momo” lɛ ji Yudafoi lɛ anɔ̃ ni “Kpaŋmɔ Hee” lɛ ji Kristofoi anɔ̃. Shi taakɛ 2 Timoteo 3:16 tsɔɔ lɛ, “Ŋmalɛ fɛɛ Ŋmalɛ ni jɛ Nyɔŋmɔ mumɔ lɛŋ lɛ ehi.” No hewɔ lɛ, esa akɛ akɛ Biblia muu lɛ fɛɛ afata Ŋmalɛi lɛ ni akaseɔ lɛ jogbaŋŋ lɛ he. Yɛ anɔkwale mli lɛ, Biblia lɛ fai enyɔ lɛ eko fɛɛ eko yeɔ buaa ekroko lɛ, ni fɛɛ kpaa gbee kɛwieɔ saneyitso kome he.

 7. Mɛni ji Biblia lɛ saneyitso?

⁷ Ekolɛ otee sɔlemɔ afii pii, ni onu ni akɛ gbee ni wa ekane Biblia lɛ fã ko pɛŋ. Aloo ekolɛ bo diɛŋtsɛ okane emli fai komɛi. Ani ole akɛ Biblia lɛ hiɛ saneyitso kome, kɛjɛ 1 Mose aahu kɛyashi Kpojiemɔ? Hɛɛ, saneyitso ni kɛ ehe kpaa gbee yɔɔ Biblia lɛ fɛɛ mli. Mɛni ji nakai saneyitso lɛ? No ji hegbɛ ni Nyɔŋmɔ yɔɔ akɛ eyeɔ adesai anɔ, kɛ eyiŋtoo ni suɔmɔ yɔɔ mli ni baaba mli kɛtsɔ e-Maŋtsɛyeli lɛ nɔ lɛ bembuu. Sɛɛ mli lɛ, wɔbaana bɔ ni Nyɔŋmɔ baaha eyiŋtoo nɛɛ aba mli.

 8. Mɛni Biblia lɛ jieɔ lɛ kpo yɛ Nyɔŋmɔ su kɛ baŋ he?

⁸ Kɛfata Nyɔŋmɔ yiŋtoo ni etsɔɔ mli lɛ he lɛ, Biblia lɛ jieɔ esu kɛ baŋ kpo. Akɛ nɔkwɛmɔ nɔ lɛ, wɔkaseɔ kɛjɛɔ Biblia lɛ mli akɛ Nyɔŋmɔ yɛ henumɔi, ni ákɛ nibii ni wɔhalaa mli lɛ kɔɔ ehe. (Lala 78:40, 41; Abɛi 27:11; Ezekiel 33:11) Lala 103:8-14 kɛɔ akɛ Nyɔŋmɔ ji “mɔbɔnalɔ kɛ durolɔ . . . , emli fuuu mra, ni emɔbɔnalɛ fa.” Ekɛ wɔ yeɔ yɛ musuŋtsɔlɛ naa, ‘ekaiɔ akɛ sũ kɛkɛ akɛfee wɔ’ ni wɔkuɔ sɛɛ kɛyaa mli yɛ gbele mli. (1 Mose 2:7; 3:19) Mɛɛ sui ni yɔɔ naakpɛɛ ejieɔ lɛ kpo nɛkɛ! Ani jeee Nyɔŋmɔ ni tamɔ nɛkɛ osumɔɔ ni oja lɛ?

 9. Mɛɛ gbɛ nɔ Biblia lɛ haa wɔnaa Nyɔŋmɔ taomɔ nii lɛ yɛ faŋŋ, ni te wɔɔfee tɛŋŋ wɔna nilee ni tamɔ nɛkɛ he sɛɛ?

⁹ Biblia lɛ kɛ Nyɔŋmɔ taomɔ nii ahe jwɛŋmɔ ni yɔɔ faŋŋ haa wɔ. Atsɔɔ enɛɛmɛi amli bei komɛi akɛ mlai. Shi, yɛ bei pii amli lɛ, ajieɔ nomɛi akpo yɛ shishitoo mlai ni atsɔɔ kɛtsɔɔ nibii ni akɛfeɔ he nɔkwɛmɔ nɔ diɛŋtsɛ nɔ. Nyɔŋmɔ ha aŋmala saji komɛi ni ba yɛ blema Israel yinɔsane mli ashwie shi kɛha wɔ sɛɛnamɔ. Nɛkɛ saji ni yɔɔ faŋŋ nɛɛ tsɔɔ nɔ ni baa kɛ́ gbɔmɛi kɛ Nyɔŋmɔ yiŋtoo tsu nii yɛ gbeekpamɔ naa, kɛ awerɛho saji ni jɛɔ mli baa kɛ amɛkɔ amɛ diɛŋtsɛ amɛgbɛ lɛ hu. (1 Maŋtsɛmɛi 5:4; 11:4-6; 2 Kronika 15:8-15) Ŋwanejee ko bɛ he akɛ shihilɛ mli anɔkwa saji ni ba nɛɛ kanemɔ baasa wɔ tsuii ahe. Kɛ wɔbɔ mɔdɛŋ wɔfee saji ni ba ni aŋmala lɛ ahe mfoniri yɛ jwɛŋmɔ mli lɛ, wɔbaanyɛ wɔna akɛ wɔkɛ mɛi ni ekɔɔ amɛhe lɛ yɛ shihilɛ kome too lɛ nɔŋŋ mli. No hewɔ lɛ, wɔbaanyɛ wɔna nɔkwɛmɔ nii kpakpai ahe sɛɛ, ni wɔbaanyɛ wɔkwa osharai ni dũ efɔŋ feelɔi lɛ. Shi, ehe miihia ni aha sanebimɔ ni he hiaa nɛɛ hetoo: Te wɔɔfee tɛŋŋ wɔna nɔmimaa akɛ nɔ ni wɔkaneɔ yɛ Biblia lɛ mli lɛ jɛ Nyɔŋmɔ mumɔ mli lɛlɛŋ?

ANI OBAANYƐ OHE BIBLIA LƐ OYE?

10. (a) Mɛni hewɔ mɛi komɛi nuɔ he akɛ Biblia lɛ be eho lɛ? (b) Mɛni 2 Timoteo 3:16, 17 kɛɔ wɔ yɛ Biblia lɛ he?

¹⁰ Ekolɛ okadi akɛ woji pii ni kɛ ŋaawoo haa lɛ bafeɔ nɔ ni be eho yɛ afii fioo pɛ mli. Ni Biblia lɛ hu? Etsɛ waa, ni kɛjɛ be mli ni aŋmala enaagbee wiemɔi lɛ nɛɛ, aaafee afii 2,000 eho. No hewɔ lɛ mɛi komɛi susuɔ akɛ anyɛŋ akɛtsu nii yɛ wɔ ŋmɛnɛŋmɛnɛ beaŋ. Shi kɛ Biblia lɛ jɛ Nyɔŋmɔ mumɔŋ lɛ, no lɛ esa akɛ emli ŋaawoo lɛ afee nɔ ni yɔɔ ebe naa be fɛɛ be, yɛ bɔ ni etsɛ waa eha lɛ fɛɛ sɛɛ. Esa akɛ Ŋmalɛi lɛ aya nɔ afee nɔ ni “hi ha nitsɔɔmɔ kɛ hiɛkamɔ kɛ mɔ-saamɔ kɛ tsɔsemɔ ni yɔɔ jalɛ mli lɛ, koni Nyɔŋmɔ gbɔmɔ lɛ aye emuu, ni asaa lɛ pɛpɛɛpɛ aha nitsumɔ kpakpa fɛɛ nitsumɔ kpakpa.”—2 Timoteo 3:16, 17.

11-13. Mɛni hewɔ wɔbaanyɛ wɔkɛɛ akɛ abaanyɛ atsu Biblia lɛ he nii yɛ wɔgbii nɛɛ amli lɛ?

¹¹ Saji amlipɛimɔ jogbaŋŋ tsɔɔ akɛ, anyɛɔ akɛ Biblia mli shishitoo mlai tsuɔ nii ŋmɛnɛ, taakɛ amɛji beni aŋmala ashwie shi klɛŋklɛŋ kwraa lɛ pɛpɛɛpɛ. Akɛ nɔkwɛmɔ nɔ lɛ, kɛ eewie adesai asubaŋ he lɛ, Biblia lɛ jieɔ shishinumɔ ni mɔɔ shi ni kɔɔ adesai ayinɔ fɛɛ yinɔ he lɛ kpo. Wɔbaanyɛ wɔna enɛ yɛ Yesu Gɔŋ nɔ Shiɛmɔ, ni yɔɔ Mateo wolo lɛ, yitsei 5 kɛyashi 7 lɛ amli. Shiɛmɔ nɛɛ na India hiɛnyiɛlɔ, Mohandas K. Gandhi ni egbo lɛ nɔ hewalɛ aahu akɛ abɔ amaniɛ akɛ ekɛɛ Ŋleshi amralo ko akɛ: “Beni omaŋ kɛ mimaŋ aaafee ekome yɛ tsɔɔmɔi ni Kristo kɛfɔ shi yɛ Gɔŋ nɔ Shiɛmɔ lɛ mli lɛ naa lɛ, no mli wɔbaana tsabaa, ni jeee kɛha wɔmaji lɛ pɛ, shi kɛha jeŋ muu lɛ fɛɛ.”

¹² Ebɛ naakpɛɛ akɛ Yesu nitsɔɔmɔi lɛ na mɛi anɔ hewalɛ! Etsɔɔ wɔ gbɛ ni kɛ mɔ yaa anɔkwa miishɛɛ mli yɛ Gɔŋ nɔ Shiɛmɔ lɛ mli. Etsɔɔ bɔ ni aaafee asaa béi. Yesu kɛ bɔ ni asɔleɔ he gbɛtsɔɔmɔ ha. Etsɔɔ su ni nilee yɔɔ mli fe fɛɛ ni esa akɛ ana yɛ heloonaa hiamɔ nii ahe, ni ekɛ Mla Kpakpa lɛ ha yɛ wekukpaa kpakpa ni esa akɛ eka mɛi ateŋ lɛ he. Bɔ ni aaafee ayoo jamɔ mli shishiumɔi, kɛ bɔ ni aaafee ana wɔsɛɛ be ni yɔɔ shweshweeshwe hu fata saji otii ni ewie he yɛ shiɛmɔ nɛɛ mli lɛ ahe.

¹³ Yɛ Gɔŋ nɔ Shiɛmɔ lɛ mli, kɛ baafai krokomɛi ni eshwɛ lɛ amli fɛɛ lɛ, Biblia lɛ kɛɔ wɔ nɔ ni esa akɛ wɔfee kɛ nɔ ni esa akɛ wɔkwa yɛ faŋŋ mli, koni wɔshihilɛi aya hiɛ. Bɔ ni anyɛɔ akɛ emli ŋaawoo lɛ tsuɔ nii waa ahaa hewɔ lɛ, etsirɛ tsɔɔlɔ ko ni ekɛɛ akɛ: “Eyɛ mli akɛ nɔtsamɔ skul he ŋaawolɔ ji mi, ni mihiɛ univɛsiti woloŋlee he klɛŋklɛŋ yijiemɔ wolo kɛ nɔ ni ji enyɔ, ni mikane woji sɔrɔtoi babaoo ni kɔɔ jwɛŋmɔŋ hewalɛnamɔ kɛ jwɛŋmɔ he nilee he moŋ, shi mikpa shi mina akɛ, Biblia mli ŋaawoo yɛ nibii tamɔ gbalashihilɛ ni yeɔ omanye, gbekɛbii atoigbele naatsii kɛ bɔ ni aaafee ana nanemɛi ni akɛ amɛ ahi shi daa he lɛ nɔ kwɔ kwraa fe nɔ fɛɛ nɔ ni mikane loo mikase yɛ kɔleji.” Kɛfata bɔ ni anyɛɔ akɛtsuɔ nii, ni eyɔɔ ebe naa pɛpɛɛpɛ hu lɛ he lɛ, anyɛɔ akɛ he fɔɔ Biblia lɛ nɔ.

EJA NI ANYƐƆ AKƐ HE FƆƆ NƆ

14. Mɛni tsɔɔ akɛ Biblia lɛ ja yɛ jeŋ nilee naa?

¹⁴ Eyɛ mli akɛ Biblia lɛ jeee jeŋ nilee he nikasemɔ wolo moŋ, shi eja pɛpɛɛpɛ yɛ jeŋ nilee naa. Akɛ nɔkwɛmɔ nɔ lɛ, yɛ be mli ni mɛi pii he ye akɛ shikpɔŋ lɛ yɛ tɛtrɛɛ lɛ, gbalɔ Yesaia wie he akɛ “kokoroo” (Hebri, chugh, ni ji “kutruku” yɛ biɛ). (Yesaia 40:22, NW) Akpɛlɛɛɛ shikpɔŋ ni yɔɔ kokoroo he jwɛŋmɔ lɛ nɔ yɛ hei pii aahu kɛyashi Yesaia gbii lɛ asɛɛ afii akpei babaoo. Kɛfata he lɛ, Hiob 26:7—ni aŋma nɔ ni fe afii 3,000 ni eho nɛ lɛ—kɛɛ akɛ Nyɔŋmɔ “ŋɔɔ shikpɔŋ lɛ etsotsoroɔ shi ni jeee nɔ ko nɔ.” Biblia he nilelɔ ko kɛɛ: “Bɔ ni Hiob le anɔkwale, ni ŋulamii ahe nikaselɔi etsɔɔ, akɛ shikpɔŋ lɛ tsotsoro shi yɛ ŋwɛiniiaŋ lɛ, ji sanebimɔ ko ni mɛi ni jeɔ mumɔ mli ni Ŋmalɛ Krɔŋkrɔŋ lɛ jɛ lɛ he ŋwane lɛ nyɛɛɛ hetoo aha.”

15. Mɛɛ gbɛ nɔ awajeɔ hekɛnɔfɔɔ yɛ Biblia lɛ mli kɛtsɔ gbɛ ni atsɔ nɔ abɔ emli saji ahe amaniɛ lɛ nɔ?

¹⁵ Gbɛ ni atsɔɔ nɔ abɔɔ saji ahe amaniɛ yɛ Biblia lɛ mli lɛ hu woɔ hekɛnɔfɔɔ ni wɔyɔɔ yɛ wolo ni etsɛ waa nɛɛ mli lɛ mli hewalɛ. Ákɛ nɔ ni tamɔɔɔ adesãi lɛ, saji ni ba ni awie he yɛ Biblia lɛ mli lɛ kɔɔ gbɔmɛi kɛ gbii pɔtɛɛ komɛi ahe. (1 Maŋtsɛmɛi 14:25; Yesaia 36:1; Luka 3:1, 2) Ni yɛ be mli ni etamɔ nɔ ni blema yinɔsaneŋmalɔi woɔ amɛ nɔyelɔi lɛ akunimyelii he saji ahe, ni amɛkɛ amɛnɔ kunim ni aye kɛ tɔmɔi teeɔ lɛ, Biblia ŋmalɔi lɛ yɛ faŋŋ ni amɛyeɔ anɔkwa—yɛ amɛ diɛŋtsɛ amɛhe eshai ni hiɛdɔɔ yɔɔ mli lɛ ahe po.—4 Mose 20:7-13; 2 Samuel 12:7-14; 24:10.

GBALƐ WOLO

16. Mɛni ji odaseyeli ni mli wa fe fɛɛ ni tsɔɔ akɛ Biblia lɛ jɛ Nyɔŋmɔ mumɔ mli?

¹⁶ Gbalɛ ni eba mli lɛ kɛ odaseyeli ni ma shi shiŋŋ haa akɛ Biblia lɛ jɛ Nyɔŋmɔ mumɔ mli. Gbalɛi pii ni eba mli fitsofitso yɛ Biblia lɛ mli. Eka shi faŋŋ akɛ, enɛ nyɛŋ ajɛ adesai foji aŋɔɔ. Belɛ, mɛni hɔ gbalɛi nɛɛ asɛɛ? Biblia lɛ diɛŋtsɛ kɛɔ akɛ “gbalɛ ko bako yɛ gbɔmɔ suɔmɔ naa pɛŋ, shi moŋ mumɔ krɔŋkrɔŋ lɛ tsirɛɔ Nyɔŋmɔ gbɔmɛi krɔŋkrɔŋi lɛ ni amɛwieɔ.” (2 Petro 1:21) Susumɔ nɔkwɛmɔ nii komɛi ahe.

17. Mɛɛ gbalɛi gba Babilon shigbeemɔ he sane efɔ shi, ni mɛɛ gbɛ nɔ amɛba mli yɛ?

¹⁷ Babilon shigbeemɔ lɛ. Yesaia kɛ Yeremia fɛɛ gba Babilon ni gbee shi yɛ Mediabii kɛ Persiabii ahiɛ lɛ he sane amɛfɔ shi. Nɔ ni sa kadimɔ ji, aŋma Yesaia gbalɛ ni kɔɔ sane ni ba nɛɛ he lɛ afɔ shi beni Babilon yeɔ nɔ akɛ jeŋ hewalɛ, aaafee afii 200 dani akpata ehiɛ! Gbalɛ mli saji ni nyiɛ sɛɛ nɛɛ ji yinɔsane ni aŋmala ashwie shi bianɛ: Eufrate Faa lɛ gbimɔ kɛtsɔ emli nui lɛ ni agba awo kpaakpo ni aje gbɛ afee mli lɛ nɔ (Yesaia 44:27; Yeremia 50:38); nibii ahe ni abu jabejabe yɛ Babilon faa lɛ agbói anaa (Yesaia 45:1); kɛ kunim ni nɔyelɔ ko ni atsɛɔ lɛ Koresh ye.—Yesaia 44:28.

18. Mɛɛ gbɛ nɔ Biblia gbalɛ ba mli yɛ “Hela maŋtsɛ lɛ” shitee kɛ eshigbeemɔ he?

¹⁸ “Hela maŋtsɛ lɛ” shitee kɛ eshigbeemɔ. Daniel na ni too kpakpo ko shi too kpakpo agbo ko, ni ekumɔ ekolontoi enyɔ lɛ, yɛ ninaa ko mli. Kɛkɛ ni too agbo lɛ akolonto wulu lɛ ku, ni akolontoi ejwɛ baye enajiaŋ. (Daniel 8:1-8) Atsɔɔ mli aha Daniel akɛ: “Too agbo lɛ ni ona ni ji akolontoi enyɔ-tsɛ lɛ, ji Media kɛ Persia maŋtsɛmɛi lɛ. Ni too kpakpo tsɔi-atsɛ lɛ ji Hela maŋtsɛ lɛ. Ni akolonto wulu lɛ ni yɔɔ ehiŋmɛii ateŋ lɛ ji klɛŋklɛŋ maŋtsɛ lɛ. Agbɛnɛ lɛ bɔ ni no ku ni ejwɛ te shi damɔ shi yɛ enajiaŋ lɛ, maŋtsɛyelii ejwɛ aaajɛ jeŋmaŋ lɛ mli ate shi, shi amɛnaŋ hewalɛ tamɔ lɛ.” (Daniel 8:20-22) Yɛ gbalɛ nɛɛ naa, aaafee afii ohai enyɔ sɛɛ lɛ, “Hela maŋtsɛ,” Alexander Kpeteŋkpele lɛ, butu Medo-Persia Nɔyeli akolontoi enyɔ-tsɛ lɛ. Alexander gbo yɛ 323 D.Ŋ.B., ni yɛ naagbee lɛ etatsɛmɛi ejwɛ baye enajiaŋ. Shi kɛlɛ, maŋtsɛyelii ni ba yɛ esɛɛ lɛ eko kwraa naaa hewalɛ ni tamɔ Alexander maŋtsɛyeli lɛ nɔ̃ lɛ.

19. Mɛɛ gbalɛi ba mli yɛ Yesu Kristo mli?

¹⁹ Yesu Kristo wala shihilɛ. Gbalɛi nyɔŋmai abɔ ni eba mli yɛ Yesu fɔmɔ, esɔɔmɔ nitsumɔ, egbele, kɛ eshitee lɛ he yɛ Hebri Ŋmalɛi lɛ amli. Akɛ nɔkwɛmɔ nɔ lɛ, Mika gba nɔ ni fe afii 700 kɛtsɔ hiɛ akɛ, abaafɔ Mesia lɛ, loo Kristo yɛ Betlehem. (Mika 5:1; Luka 2:4-7) Yesaia, ni hi shi yɛ Mika gbii amli lɛ gba akɛ, abaatswa Mesia lɛ nɔ̃ ni abaatsɛ̃ lajɔ ashwie ehe. (Yesaia 50:6; Mateo 26:67) Zakaria gba, afii ohai enumɔ kɛtsɔ hiɛ akɛ, abaatsɔɔ Mesia lɛ sɛɛ gbɛ ahe jwiɛtɛi kukuji 30. (Zakaria 11:12; Mateo 26:15) David tsɔ hiɛ etsɔɔ nibii ni kɔɔ Yesu ni ji Mesia lɛ gbele he lɛ mli nɔ ni fe afii akpe. (Lala 22:8, 9, 19; Mateo 27:35, 39-43) Ni Daniel gbalɛ lɛ jie be ni Mesia lɛ baapue, kɛ esɔɔmɔ lɛ sɛɛ kɛlɛ, kɛ be ni ebaagbo lɛ kpo aaafee afii ohai enumɔ kɛtsɔ hiɛ. (Daniel 9:24-27) Enɛ ji gbalɛi ni ba mli yɛ Yesu Kristo nɔ lɛ amli fioo ko pɛ. Ebaafee nɔ ni sɛɛnamɔ yɔɔ he akɛ oookane ehe saji babaoo yɛ sɛɛ mli.

20. Esa akɛ Biblia gbalɛ ni eba mli ni tɔmɔ ko bɛ mli lɛ aha wɔna mɛɛ hekɛnɔfɔɔ?

²⁰ Biblia mli gbalɛi krokomɛi ni ajɛ jeeŋmɔ agba lɛ eba mli momo. Obaabi akɛ, ‘Shi, te enɛ saa mishihilɛ he ehaa tɛŋŋ?’ Ojogbaŋŋ, kɛ mɔ ko ewie anɔkwale etsɔɔ bo afii pii lɛ, ani obaaje lɛ ŋwane trukaa kɛ ewie sane hee ko? Dabi! Nyɔŋmɔ ewie anɔkwale be fɛɛ be yɛ Biblia lɛ mli fɛɛ. Ani esaaa akɛ enɛ tswaa hekɛnɔfɔɔ ni oyɔɔ yɛ nɔ ni Biblia lɛ woɔ shi yɛ he lɛ emaa shi, tamɔ egbalɛi ni kɔɔ shikpɔŋ nɔ paradeiso ko ni baa lɛ he lɛ? Yɛ anɔkwale mli lɛ, wɔbaanyɛ wɔna hekɛnɔfɔɔ ni Paulo, Yesu klɛŋklɛŋ afii oha lɛ mli kaselɔi lɛ ateŋ mɔ kome ni ŋma akɛ ‘Nyɔŋmɔ maleee’ lɛ na lɛ nɔŋŋ eko. (Tito 1:2) Kɛfata he lɛ, kɛ wɔkane Ŋmalɛi lɛ ni wɔkɛ emli ŋaawoo tsu nii lɛ, belɛ wɔkɛ nilee ni adesai nyɛŋ ana yɛ amɛ diɛŋtsɛ amɛ nyɛmɔ naa lɛ miitsu nii, ejaakɛ Biblia lɛ ji wolo ni jieɔ Nyɔŋmɔ he nilee ni kɛ mɔ yaa naanɔ wala mli lɛ kpo.

“NYƐSHWEA” NYƆŊMƆ HE NILEE

21. Mɛni esa akɛ ofee kɛ́ nibii komɛi ni okaseɔ kɛjɛɔ Biblia lɛ mli lɛ haa ohiɛ feɔ bo yaa lɛ?

²¹ Beni okaseɔ Biblia lɛ, ekolɛ obaanyɛ okase nibii ni esoro nomɛi yɛ nɔ ni atsɔɔ bo be ko ni eho lɛ he. Ekolɛ obaana akɛ ojamɔ mli kusumii ni onyaa he waa lɛ ekomɛi esaaa Nyɔŋmɔ hiɛ. Obaakase akɛ Nyɔŋmɔ yɛ taomɔ nii kɛha nɔ ni ja kɛ nɔ ni ejaaa ni nɔ kwɔlɔ fe nɔ ni ale yɛ jeŋ ni ŋmɛɔ nɔ fɛɛ nɔ feemɔ gbɛ nɛɛ mli lɛ. Klɛŋklɛŋ lɛ, ekolɛ enɛ baaha ohiɛ afee bo yaa. Na tsui! Taomɔ Ŋmalɛi lɛ amli jogbaŋŋ koni ona Nyɔŋmɔ he nilee. Na bɔ ni eeenyɛ eba akɛ Biblia lɛ mli ŋaawoo baabi ni ofee tsakemɔ yɛ osusumɔ kɛ onifeemɔi amli lɛ he jwɛŋmɔ kpakpa.

22. Mɛni hewɔ okaseɔ Biblia lɛ, ni mɛɛ gbɛ nɔ oootsɔ oye obua mɛi krokomɛi ni amɛnu enɛ shishi?

²² Ekolɛ nanemɛi kɛ wekumɛi ni hiɛ jwɛŋmɔ kpakpa baate shi awo o-Biblia kasemɔ lɛ, shi Yesu kɛɛ: “Hewɔ lɛ mɔ fɛɛ mɔ ni gbaa mli tsiɔ mitã yɛ gbɔmɛi ahiɛ lɛ, mi hu magba mli matsi etã yɛ mi-Tsɛ ni yɔɔ ŋwɛi lɛ hiɛ. Shi mɔ fɛɛ mɔ ni kwaa mi yɛ gbɔmɛi ahiɛ lɛ, mi hu makwa lɛ yɛ mi-Tsɛ ni yɔɔ ŋwɛi lɛ hiɛ.” (Mateo 10:32, 33) Ekolɛ mɛi komɛi baashe gbeyei akɛ okɛ ohe baawo teemɔŋ jamɔ ko mli loo obaatsɔ mɔ ni eye jamɔ he sɛkɛ. Shi, yɛ anɔkwale mli lɛ, oobɔ mɔdɛŋ ni ona Nyɔŋmɔ kɛ enɔkwale lɛ he nilee kɛkɛ. (1 Timoteo 2:3, 4) Bɔni afee ni oye obua mɛi krokomɛi koni amɛnu enɛ shishi lɛ, okɛ sane shishinumɔ atsu nii, kaatee ŋwanejee shi, beni owieɔ nɔ ni okaseɔ lɛ he otsɔɔ amɛ lɛ. (Filipibii 4:5) Kaimɔ akɛ ‘ashiɔ wiemɔ lɛ sɛɛ ni nine shɛɔ’ mɛi pii anɔ kɛ amɛna odaseyeli ni tsɔɔ akɛ Biblia mli nilee he baa sɛɛnamɔ kɛhaa gbɔmɛi lɛlɛŋ lɛ.—1 Petro 3:1, 2.

23. Mɛɛ gbɛ nɔ oootsɔ ‘oshwe’ Nyɔŋmɔ he nilee?

²³ Biblia lɛ woɔ wɔ hewalɛ akɛ: “Nyɛshwea wiemɔ lɛ mli fufɔ krɔŋŋ lɛ tamɔ fufɔbii ni afɔ bianɛ.” (1 Petro 2:2) Fufɔoo lɛ yeɔ niyenii ni jɛɔ enyɛ ŋɔɔ kɛbaa lɛ, ni efeɔ veveeve koni atsu nakai hiamɔ lɛ he nii. Nakai nɔŋŋ hu wɔkɛ wɔhe fɔɔ nilee ni jɛ Nyɔŋmɔ ŋɔɔ lɛ nɔ. Feemɔ mɔ ni ‘shweɔ’ e-Wiemɔ lɛ kɛtsɔ onikasemɔ lɛ nɔtsamɔ nɔ. Yɛ anɔkwale mli lɛ, ha Biblia lɛ kanemɔ daa gbi afee oti ni ma ohiɛ. (Lala 1:1-3) Enɛ baaha ona jɔɔmɔi babaoo, ejaakɛ Lala 19:12 kɛɔ yɛ Nyɔŋmɔ mlai ahe akɛ: “Amɛnɔyeli lɛ, nyɔmɔwoo kpele yɛ mli.”

[Shishigbɛ niŋmai]

KAA ONILEE OKWƐ

Esoro Biblia lɛ yɛ woji fɛɛ he yɛ mɛɛ gbɛ̀i anɔ?

Mɛni hewɔ obaanyɛ okɛ ohe afɔ Biblia lɛ nɔ lɛ?

Mɛni yeɔ he odase kɛhaa bo akɛ Biblia lɛ ji Nyɔŋmɔ Wiemɔ ni jɛ mumɔŋ?

[Akrabatsa ni yɔɔ baafa 14]

OKƐ O-BIBLIA LƐ ATSU NII JOGBAŊŊ

Ehe ehiaaa ni ewa kɛha bo akɛ ooole o-Biblia lɛ jogbaŋŋ. Okɛ bɔ ni ato emli saji lɛ anaa aha lɛ atsu nii ni okɛle he ni Biblia mli woji lɛ yɔɔ.

Biblia lɛ mli woji lɛ yɛ yitsei kɛ kukuji ni ewaaa akɛ ooonyɛ otsɛ wiemɔi kɛjɛ mli. Akɛ yitsei amlijaai lɛ fata he yɛ afii ohia 13 lɛ mli, ni eka shi faŋŋ akɛ, afii ohai 16 lɛ mli French woji akalalɔ ko jara Hela Ŋmalɛi lɛ amli ewo kukuji ni akɛtsuɔ nii ŋmɛnɛ lɛ amli. Klɛŋklɛŋ Biblia muu ni na yitso kɛ kuku yibɔ okadii ji nɔ ni yɔɔ French wiemɔ mli ni afee yɛ 1553 mli lɛ.

Kɛ atsɛ ŋmalɛi yɛ wolo nɛɛ mli lɛ, klɛŋklɛŋ yibɔ okadi lɛ tsɔɔ yitso lɛ, ni nɔ ni nyiɛ sɛɛ lɛ tsɔɔ kuku lɛ. Akɛ nɔkwɛmɔ nɔ lɛ, ŋmalɛ ni atsɛ akɛ “Abɛi 2:5” lɛ, tsɔɔ Abɛi awolo lɛ, yitso 2, kuku 5. Kɛ ogbele ŋmalɛi ni atsɛ lɛ, etsɛŋ ni Biblia mli ŋmalɛi ni atsɛ lɛ anamɔ baafee mlɛo aha bo.

Gbɛ ni hi fe fɛɛ ni oootsɔ nɔ ole Biblia lɛ ji ni okane daa gbi. Klɛŋklɛŋ lɛ, enɛ baafee tamɔ kaa. Shi kɛji akɛ okane yitsei etɛ kɛyashi enumɔ daa gbi, ni damɔ amɛkɛlɛmɔ nɔ lɛ, obaagbe Biblia muu lɛ fɛɛ kanemɔ naa yɛ afi mli. Mɛni hewɔ ojeee shishi ŋmɛnɛ?

[Akrabatsa ni yɔɔ baafa 19]

BIBLIA LƐ—WOLO NI YƆƆ SƆRƆTO KWRAA

• Biblia lɛ jɛ “Nyɔŋmɔ mumɔŋ.” (2 Timoteo 3:16) Eyɛ mli akɛ gbɔmɛi ŋmala emli wiemɔi lɛ moŋ, shi Nyɔŋmɔ kudɔ amɛjwɛŋmɔi lɛ, no hewɔ lɛ Biblia lɛ ji “Nyɔŋmɔ wiemɔ” diɛŋtsɛ.—1 Tesalonikabii 2:13.

• Biblia lɛ ŋmaa he afii ohai 16, kɛtsɔ gbɔmɛi aaafee 40 ni jɛ shihilɛi sɔrɔtoi amli nɔ. Ni kɛlɛ nɔ ni amɛfee nɛɛ kɛ ehe kpaa gbee kɛjɛ shishijee kɛyashi naagbee.

• Biblia lɛ eje ŋwanejeei babaoo mli fe wolo fɛɛ wolo. Akɛ la shã mɛi pii yɛ tsei ahe, yɛ Teŋgbɛ Afii lɛ amli, yɛ Ŋmalɛi lɛ ni aaana ni mɔ ko hiɛ eko pɛ hewɔ.

• Biblia lɛ ji wolo ni ahe fe fɛɛ eko yɛ je lɛ mli. Atsɔɔ shishi loo efai komɛi ashishi kɛtee wiemɔi fe 2,000 mli. Akala akpekpei toi akpei abɔ, ni ewa akɛ aaana he ko yɛ shikpɔŋ nɛɛ nɔ ni eko bɛ jɛmɛ.

• Biblia lɛ fã ni etsɛ fe fɛɛ lɛ jɛ afii ohai 16 D.Ŋ.B. lɛ mli. Enɛ ba dani aŋma Hindu Rig-Veda (ni agbe naa aaafee 1300 D.Ŋ.B., lɛ), loo Budhafoi “Canon of the Three Baskets” lɛ (afii ohai D.Ŋ.B.), loo Islam Koran (afii ohai kpawo Ŋ.B.), kɛ Shinto Nihongi lɛ (720 Ŋ.B.).

[Baafa muu mfoniri ni yɔɔ baafa 20]