“Jeŋmaji A-Maŋtsɛ” Lɛ Ji Yelikɛbuamɔ Pɛ Ni Wɔyɔɔ
“Namɔ po sheŋo gbeyei, bo jeŋmaji a-Maŋtsɛ? Ejaakɛ bo nɔŋŋ esa; ejaakɛ jeŋmaji lɛ anilelɔi lɛ fɛɛ ateŋ kɛ amɛmaŋtsɛyelihei lɛ fɛɛ mli lɛ, mɔkomɔko bɛ ni tamɔo!”—Yer. 10:7.
1. Namɛi bolɔɔ yɛ je lɛ mli fɛɛ akɛ abahere amɛ lɛ? Ni mɛni hewɔ amɛbolɔɔ nakai?
1 “MƆKO ABAHERE WƆ EE EI!” Anuɔ bolɔmɔ nɛɛ he kɛjɛɔ shikpɔŋ nɛɛ koji sɔrɔtoi fɛɛ. Ejɛɔ mɛi ni naa gbɛ ni je lɛ kɔɔ befɛɛbe kɛ oshra ni etsɛŋ kwraa ni enɛ kɛbaaba yɛ enaagbee, lɛ anaa. Gbɛkwɛmɔ nɛɛ haa amɛtsui fãa ni ewoɔ amɛ awerɛhoo. Ehaa amɛkɛɔ taakɛ gbalɔ Yeremia kɛɛ beni eshwɛ fioo abaakpata Yerusalem hiɛ lɛ, ni egba eto yɛ nakai wiemɔi hiɛ amli akɛ: “Miná ni kulɛ nu yɛ miyitsoŋ, ni mihiŋmɛii tsɔmɔ yaafonu nubui, ni mikɛfo mimaŋ [Israel] lɛ biyoo lɛ mɛi ni enyɔnyɔi lɛ shwane kɛ nyɔɔŋ.”—Yer. 9:1.
2. Yɛ mɛni ni baa hewɔ mɔni musuŋ shãalɛ lɛ aaawo yara ŋmɛnɛ?
2 Mɛni hewɔ ŋmɛnɛ esaaani mɔko ni musuŋ shãilɛ lɛ fóɔ mɔ? Ejaakɛ amrɔ nɛɛ nɔni blema maŋ muu fɛɛ oshra ko fee he mfoniri eto lɛ miihe aba adesai anɔ; ni aha Yeremia kɛɛ yɛ no he akɛ: “[Nyɛtsɔɔa] nyɛbiyei lɛ yarawoo, ni nyɛteŋ mɔfɛɛmɔ atsɔɔ enaanyo yaafo lala! Ejaakɛ gbele ekwɔ kɛtsɔ wɔsamfɛji amli [kɛbote wɔtsũi amli tete], ni ebabote wɔmɔji lɛ amli, ni ebapelene gbekɛbii yɛ agbói anaa, kɛ oblahii hu yɛ blohui amli. . . . Gbɔmɛi agbohii aaashwie shi tamɔ ŋmɔ mli tumu [tamɔ bɔni akɛ tsofa ni baa nii shwãa shi yɛ ŋmɔ mli lɛ], loo tamɔ ŋmaa nyaŋkui yɛ ŋmaakpalɔi asɛɛ, ni mɔkomɔko bɛ ni aaabua naa!”—Yer. 9:20-22.
3. Yɛ haomɔ ni anaa faŋŋ akɛ ebaaba je lɛ mli hewɔ lɛ, mɛni aloo namɛi aŋɔɔ mɛi yaa kɛhaa gbɛtsɔɔmɔ?
3 Namɔ kwraa yɔɔ ni enaaa akɛ jeŋ fɛɛ haomɔ ni naa wa fe fɛɛ eko yɛ adesa yinɔsane mli lɛ miiba? Ehe ehiaaa ni wɔna Yeremia ni hi shi yɛ blema bei amli lɛ gbalɛ hiŋmɛi ni naa shɔŋŋ nii lɛ eko dani wɔnyɛ wɔna enɛ. Belɛ te mɔko aaafee tɛɛŋ efo nɔni mɛi ni kwɛɔ nibii ni yaa nɔ yɛ je lɛ mli ŋmɛnɛ ni Nyɔŋmɔ mumɔ tsirɛɛɛ amɛ lɛ kɛɔ akɛ ebaaba lɛ mɔ? Yɛ nɛkɛ sane ni fãa mɔ tsui nɛɛ hewɔ lɛ, mɛi ni Nyɔŋmɔjamɔ bɛ amɛmli lɛ po nuɔ he akɛ esani amɛtao nɔko ni nɔ kwɔ ni efe adesa lɛ sɛɛgbɛ kɛba adesai aweku lɛ yiwalaheremɔ. Maŋkwramɔŋ nɔyelɔi kɛ mɛi ni yɔɔ Kristendom maji amli lɛ hu yaa okɔmfoi kɛ niiamlikwɛlɔi aŋɔɔ kɛ tsuiyeli. Akɛni kɛji amɛbaafee nɔko ni he hiaa lɛ, amɛyiŋ feɔ amɛ kɔshikɔshi hewɔ lɛ, amɛtaoɔ ŋulamiiaŋkwɛlɔi asɛɛgbɛ koni mɛnɛɛmɛi akwɛ ŋwɛiniiaŋ shikãmɔ ni kɔɔ amɛhe lɛ amli koni amɛkane nɔni ŋwɛi okadii tsɔɔ lɛ. Mɛikrokomɛi kpaà amɛnyɔŋmɔi kɛ tsei amagai ni amɛkɛ jwiɛtɛi kɛ shika ekpa he ni amɛwula nomɛi kɛ atadei haŋtsii ni akɛ nine loo tsɔne fee, lɛ afai. Ani nɛkɛ nibii ni mɛi babaoo feɔ nɛɛ amli wɔɔɔkpa yelikɛbuamɔ gbɛ kɛaajɛ amrɔ nɛɛ be mli ni jeŋ shihilɛ mli woɔ wu ni etoɔ okadi fɔŋ ko akɛ etsɛŋ kwraa ni oshra baaba nɛɛ? Dabida.1—Yer. 10:1-5.
4. Mɛni hewɔ amrɔ nɛɛ, jee “duromɔnɔ ko” ni enaaa nii ni ejwɛŋŋŋ lɛ ji wɔyelikɛbuamɔ kome pɛ ni yɔɔ; ni nɛgbɛ anɔkwa yelikɛbuamɔ lɛ yɔɔ?
4 Nɛgbɛ yelikɛbuamɔ krɔŋŋ yɔɔ? Mɛni aloo namɔ ji yelikɛbuamɔ pɛ ni wɔyɔɔ? No jeee “duromɔ” ko ni tsuɔ nii kɛkɛ ni jwɛŋŋŋ. Esa akɛ efee mɔ krɛdɛɛ ko ni naa oshrai ni yɔɔ wɔshihilɛ lɛ mli tamɔ bɔ nɔŋŋ ni wɔmankwramɔŋ nilelɔi ni tsɔɔ nɔni amɛsusuɔ akɛ ebaaba lɛ feɔ lɛ nɔŋŋ, aloo enyɛ efee fe nakai hii ni yɔɔ jwɛŋmɔ lɛ po. Ejaakɛ nii ni jwɛŋŋŋ lɛ nyɛŋ aye abua mɛi tamɔ wɔ ni wɔjwɛŋɔ lɛ. Yelikɛbuamɔ pɛ ni wɔyɔɔ ji Mɔ ni yɔɔ jwɛŋmɔ bɔni sa ni enyɛ efee jeŋ muu ni jwere shi nɛɛ kɛ emli bɔɔnii ni yɔɔ jwɛŋmɔ ni ji wɔ lɛ. ‘Etá’ sane lɛ fɛɛ yiteŋ. Lɛ ji Mɔ ni gbalɔ lɛ tsɛɔlɛ “jeŋmaji a-Maŋtsɛ” lɛ.
5. Yɛ Yeremia 10:6-8 lɛ te gbalɔ lɛ wie wɔyelikɛbuamɔ kome pɛ ni yɔɔ lɛ he eha tɛɛŋ?
5 Ani wɔmiibi akɛ Namɔ ji nakai Mɔ lɛ? Lɛ ji Mɔ ni anyɛŋ akɛ mɔkomɔko ato E-he lɛ, ejaakɛ Yeremia kɛɛ: “Yehowa, mɔkomɔko bɛ ni tamɔo! Bo lɛ oje agbo, ni ogbɛi hu je agbo kɛ hewalɛ. Namɔ po sheŋo gbeyei, bo jeŋmaji a-Maŋtsɛ? Ejaakɛ bo nɔŋŋ [gbeyeishemɔ ni tamɔ nakai lɛ sa] . . . ejaakɛ jeŋmaji lɛ anilelɔi lɛ fɛɛ ateŋ kɛ amɛmaŋtsɛyelihei lɛ fɛɛ mli lɛ, mɔkomɔko bɛ ni tamɔo! Amɛ fɛɛ [belɛ jeŋmaji lɛ kɛ amɛmaŋtsɛyelihei lɛ fɛɛ lɛ] buului kɛ kwashiai sɔŋŋ ni: yakayakanii atsɔsemɔ, tso [ni ji amaga ni akɛ jwiɛtɛi kɛ shika ekpa he ni awolɛ atadei tamɔ nyɔŋmɔ ko] ni.”—Yer. 10:6-8.
6. Mɛɛ jeŋmaji enyɔ atsĩ amɛtã klɛŋklɛŋ yɛ Noa gbii lɛ anɔ nu afua lɛ sɛɛ; ni mɛni Biblia lɛ kɛɔ ni tsɔɔ akɛ Yehowa ji amɛ-Maŋtsɛ aloo jeeelɛ?
6 Yehowa Nyɔŋmɔ ji “jeŋmaji a-Maŋtsɛ” yɛ Yeremia gbii lɛ anɔ yɛ mɛɛ gbɛ nɔ? Ani jeŋmaji aloo maji ni jeee Yudafoi lɛ kpɛlɛ enɔ akɛ lɛ ji amɛ-Maŋtsɛ? Ani lɛ ji mɔni to amɛmaŋtsɛyelii aloo amɛmaŋtsɛyelihei lɛ? Ani lɛ eha amɛ nɔ̃ nɔyeli kɛ mlai ni amɛhiɛ lɛ, aloo ekɛ amɛ fee kpaŋmɔ ni eha wekukpaa ko ni fĩɔ amɛ baje amɛteŋ? Jeŋmaji ni Biblia Iɛ wie amɛhe klɛŋklɛŋ yɛ Noa gbii lɛ anɔ nu afua lɛ sɛɛ ji Babilon (Babel) kɛ Ashur. Ani esa akɛ wɔsusuɔ akɛ Yehowa ji mɛnɛɛmɛi a-Maŋtsɛ? Te aaafee tɛɛŋ ni eeebalɛ nakai hu? Ejaakɛ 1 Mose Wolo 10:8-12 kɛɔ wɔ akɛ:
“Ni Kush [Noa nabi lɛ] fɔ Nimrod. Lɛ eje shishi efee ehe kakalɔ yɛ shikpɔŋ lɛ nɔ. Lɛ nɔŋŋ ji gbɔbilɔ kpanaa yɛ Yehowa hiɛ; nohewɔ lɛ akɛɔ akɛ: Gbɔbilɔ kpanaa nɛ yɛ Yehowa hiɛ tamɔ Nimrod. Ni emaŋtsɛyeli shishijee ji Babel [Babilon] kɛ Erek kɛ Akad kɛ Kalne yɛ Shinear shikpɔŋ lɛ nɔ. Ni ejɛ nɛkɛ shikpɔŋ nɛɛ nɔ ni eyiŋ etee Ashur, ni eyato Ninive kɛ Rehobot-Ir kɛ Kala, kɛ Resen yɛ Ninive kɛ Kala teŋ. Maŋ kpeteŋkpele ji no.”—Kadimɔ 1 Mose Wolo 2:14 kɛ 1 Kronika 1:10.
7. Mɛɛ blema bei amli sane ko baatsɔɔ akɛ Yehowa ji Yeremia gbii lɛ anɔ Babilon Maŋtsɛyeli hee lɛ nɔ Maŋtsɛ aloo jeeelɛ?
7 Beni mɛi ni maa Babilon (Babel) lɛ maa ‘Babel mɔɔ’ aloo nɔko ni amɛmalɛ tamɔ gɔŋ atarakpoiatarakpoi ni afɔleshaalatɛ yɔɔ eyiteŋ, kɛha jamɔ lɛ, mɛni ba ni tsĩ amɛ gbɛ ni amɛnyɛɛɛ naa amɛgbe lɛ? Yehowa fee nɔni ekɛɛ ebaafee lɛ: ‘Ha wɔkpeleke shi ni wɔyatɔtɔ amɛnaa yɛ jɛi, koni mɔko akanu enaanyo wiemɔ [shishi] dɔŋŋ.’ Mɛni ba agbɛnɛ? Agbɛnɛ abaná jeŋmaji ni wieɔ wiemɔi sɔrɔtoisɔrɔtoi; ejaakɛ wɔkaneɔ akɛ: “Kɛkɛ ni Yehowa gbɛ amɛ eshwã kɛjɛ jɛi [belɛ aatsɔɔ Babel] kɛtee shikpɔŋ lɛ fɛɛ nɔ, ni amɛfɔ̃ɔ maŋ lɛ too. Nohewɔ lɛ atsɛɔ egbɛi akɛ Babel [Futumɔ], ejaakɛ jɛi Yehowa tɔtɔ shikpɔŋ lɛ fɛɛ naa yɛ.” (1 Mose 11:7-9) Belɛ anaa akɛ Yehowa jeee nakai klɛŋklɛŋ Babilon Maŋtsɛyeli lɛ nɔ Maŋtsɛ tamɔ bɔ nɔŋŋ ni ejeee Yeremia gbii lɛ anɔ Babilon Maŋtsɛyeli hee lɛ nɔ Maŋtsɛ lɛ. Nakai Babilon Maŋtsɛyeli hee lɛ nɔ nyɔŋmɔ ji Bel aloo Merodak (Marduk) , mɔni Maŋtsɛ Nebukadnezar já lɛ. (Yer. 50:1, 2) Yehowa jeee Babilon nyɔŋmɔ ko.
8, 9. (a) Namɛi Jeŋmaji krokomɛi lɛ já akɛ amɛlumɛi ni he wa fe adesai? (b) Mɛɛ gbɛ nɔ Satan ha Yesu na akɛ eji “je nɛŋ lumɔ” taakɛ Yesu kɛɛ Iɛ nɔŋŋ yɛ?
8 Jeŋmaji krokomɛi lɛ hu yɛ amɛdiɛŋtsɛ amɛmaji anɔ nyɔŋmɔi, ni amɛbuɔ nomɛi akɛ lumɛi ni yeɔ amɛnɔ ni amɛfee wɔŋjamɔŋ amagai amɛkɛdamɔ shi amɛha nomɛi. Akɛ nɔkwɛmɔnɔ lɛ, Amonbii Iɛ já apasa nyɔŋmɔ ko ni amɛtsɛɔlɛ Molek, gbɛi ko ni shishi ji “Mɔni Yeɔ Nɔ,” aloo “Maŋtsɛ.” (3 Mose 18:21; 20:2-5; 1 Maŋts. 11:7; Bɔf. 7:43) Nakai maji lɛ já mumɔŋ daimonioi aloo abonsamii. (1 Kor. 10:20) Satan Abonsam tá nɛkɛ daimonioi ni anaaa nɛɛ fɛɛ anɔ. Atsɛɔlɛ yɛ 2 Korintobii Awolo 4:4 (NW) akɛ “nibii agbɛjianɔtoo nɛɛ nyɔŋmɔ.”
9 Satan Abonsam shi etsitsi akɛ lɛ eyeɔ je lɛ mli maji lɛ fɛɛ anɔ maŋtsɛ, ni eka akɛ elaka Yesu Kristo, akɛ: “Bo maŋɔ nɛkɛ hegbɛ [ni ji shikpɔŋ nɛɛ nɔ maŋtsɛyelii] nɛɛ fɛɛ kɛ amɛnunyam lɛ maha; ejaakɛ mi aŋɔha, ni mɔfɛɛmɔ ni misumɔɔ lɛ, lɛ miŋɔhaa; nohewɔ lɛ bo lɛ, kɛji oookula shi oja mi lɛ, fiaa kwa aaatsɔ onɔ̃.” (Luka 4:5-7) Shi Yesu ekpɛlɛɛɛ nɔ akɛ etsɔ maŋtsɛ ni ji adesa, yɛ Nyɔŋmɔ henyɛlɔ kpele lɛ shishi. Nohewɔ lɛ beni eshwɛ fioo Yesu baagbo lɛ, ekɛɛ Satan Abonsam ji “je nɛŋ lumɔ.” (Yoh. 12:31; 14:30; 16: 11) Biblia lɛ naagbee wolo ni aŋma yɛ Yeremia gbii lɛ asɛɛ afii ohai kpawo lɛ kɛɛ “shikpɔŋ muu lɛ fɛɛ” miijá Satan Abonsam kɛ emaŋkwramɔ gbɛjianɔtoo ni anaa ni akɛ kooloo ko ni hiɛ yitsei kpawo damɔ shi ahalɛ lɛ.—Kpoj. 13:3, 4.
10. (a) Israel maŋ lɛ nɔ Maŋtsɛ ni Yehowa ji kɛyashi amɛkpoo Mesia Iɛ damɔ mɛni nɔ? (b) Eyɛ mli akɛ “je nɛŋ maŋtsɛyeli” lɛ tsɔ Yehowa kɛ e-Kristo lɛ nɔ̃ yɛ afi 1914 mli moŋ, shi mɛni jeŋmaji lɛ ekpɛlɛɛɛ akɛ amɛfeɔ?
10 Yɛ blema bei amli lɛ, Israelbii lɛ kpɛlɛ Yehowa Nyɔŋmɔ nɔ akɛ amɛ-Nuntsɔ kɛ Maŋtsɛ. Yɛ enɛ kɛ gbeekpamɔ mli lɛ, lalatsɛ lɛ jɛ Nyɔŋmɔ mumɔ mli etee nɔ ekɛɛ akɛ: “Ejajeɔ ewiemɔ lɛ etsɔɔ Yakob, egbɛnai kɛ ekojomɔi lɛ etsɔɔ Israel. Efeko nakai ehako maŋ ko maŋ ko dã, ni ekojomɔi lɛ hu, amɛleee. Haleluya!” (Lala 147:5, 19, 20; 145:1, 12, 13) Nohewɔ lɛ je lɛ mli jeŋmaji lɛ jeee Yehowa Nyɔŋmɔ maŋtsɛyelii. Teokrase nɔyeli ni eto yɛ blema Israel nɔ yɛ gbalɔ Mose yinɔ lɛ ji Nyɔŋmɔ shikpɔŋnɔ maŋtsɛyeli pɛ ni yɔɔ, kɛyashi Israel maŋ lɛ kpoo Nyɔŋmɔ Bi Yesu Kristo akɛ Mesia ni jɛ Nyɔŋmɔ ŋɔɔ lɛ. (2 Mose 15:18-21; 5 Mose 33:2-5; 1 Kron. 29:11, 12, 23; Mat. 21:43) Klɛŋklɛŋ kwraa lɛ, kɛjɛ Jeŋmaji Abɛi lɛ naagbee yɛ afi 1914 Ŋ.B. mli kɛbaa lɛ, “je nɛŋ maŋtsɛyeli lɛ etsɔ wɔ-Nuntsɔ lɛ kɛ e-Kristo (mɔni efɔlɛ mu) lɛ nɔ̃”; shi jeŋmaji lɛ ekpɛlɛɛɛ lolo akɛ amɛŋmɛɔ gbɛ ni Yehowa yeɔ amɛnɔ Maŋtsɛ.—Kpoj. 11:15-18.
EJI “JEŊMAJI A-MAŊTSƐ” YƐ MƐƐ GBƐ NƆ?
11. Mɛɛ jwɛŋmɔ naa Yeremia tsɛ Yehowa akɛ “jeŋmaji a-Maŋtsɛ” lɛ yɛ?
11 Belɛ yɛ mɛɛ jwɛŋmɔ naa mɔ Yeremia tsɛ́ Yehowa akɛ “jeŋmaji a-Maŋtsɛ” lɛ? Jwɛŋmɔ ni ehiɛ ji akɛ yɛ jeŋmaji lɛ fɛɛ anɔ lumɛi ni yeɔ maŋtsɛ lɛ ateŋ lɛ, Lɛ ji Maŋtsɛ ni sa kadimɔ waa. Eye nɔ akɛ maŋtsɛmɛi a-Maŋtsɛ aloo Maŋtsɛ Ni Fe Fɛɛ, Mɔni ta maŋtsɛmɛi krokomɛi fɛɛ anɔ. Mose kɛɛ Israelbii lɛ yɛ afi 1473 D.Ŋ.B. mli tɔ̃ɔ akɛ: “Ejaakɛ Yehowa, o-Nyɔŋmɔ lɛ, lɛ ji nyɔŋmɔi a-Nyɔŋmɔ kɛ nuntsɔmɛi a-Nuntsɔ, Mawu ni da ni he wa ni ehe yɔɔ gbeyei.” (5 Mose 10:17) Fee sɛɛ lɛ, lalatsɛ lɛ jɛ Nyɔŋmɔ mumɔ mli ekɛɛ Yehowa webii Iɛ akɛ: “Nyɛdaa nyɔŋmɔi a-Nyɔŋmɔ lɛ shi; ejaakɛ naanɔ emɔbɔnalɛ hiɔ shi kɛyaa! Nyɛdaa nuntsɔmɛi a-Nuntsɔ lɛ shi, . . . Lɛ ni etswiaa maŋtsɛmɛi agboi anii lɛ; . . . ni egbegbee maŋtsɛmɛi ni yɔɔ gbɛii lɛ: . . . Sihon, Amorbii amaŋtsɛ lɛ, kɛ Og ni ji Bashan maŋtsɛ lɛ hu; . . . ni eŋɔ amɛshikpɔŋ lɛ eha akɛ gboshinii . . . etsulɔ Israel gboshinii lɛ.” (Lala 136:2, 3, 17-22) Yɛ nɛkɛ gbɛ nɔ lɛ, eta “jeŋmaji lɛ fɛɛ” anɔ, yɛ amɛdiɛŋtsɛ amɛdaimonioi kɛ adesai amaŋtsɛyelii lɛ fɛɛ sɛɛ.—Yer. 9:25, 26.
12. Mɛɛ gbɛ nɔ Yehowa fee “jemaji a-Maŋtsɛ” ni eji lɛ he mfoniri etsɔɔ Yeremia ni etsɔɔ no mli ehalɛ yɛ?
12 Belɛ Yehowa baanyɛ ekɛɛ Yeremia akɛ: “Kwɛ, ŋmɛnɛ gbi nɛɛ mikɛo eto jeŋmaji lɛ kɛ maŋtsɛyelii lɛ anɔ.” (Yer. 1:10) Yehowa, fee nɔkwɛmɔnɔ ko etsɔɔ Yeremia ni ekɛtsɔɔlɛ akɛ gbɛi ni Yeremia kɛtsɛlɛ akɛ “Jeŋmaji a-Maŋtsɛ” lɛ ja. Yehowa fãlɛ akɛ eya gbɛshɔlɔ lɛ we. Beni gbɛshɔlɔ lɛ eshɔ̃ gbɛ́ ko ni ehiii ni efitelɛ ni ekɛ sũ lɛ shɔ̃ gbɛ́ kroko ni sa ehiɛ sɛɛ lɛ, Yehowa kɛɛ:
“Israel we, aso minyɛŋ mafee nyɛ, tamɔ bɔni gbɛshɔlɔ nɛɛ fee lɛ? . . . Naa, bɔni sũ lɛ yɔɔ yɛ gbɛshɔlɔ lɛ dɛŋ lɛ, nakai nyɛ hu nyɛyɔɔ yɛ midɛŋ, Israel we! Amrɔ ni mawie yɛ jeŋmaŋ ko loo maŋtsɛyelihe ko he, akɛ mibafalɛ ni majwalɛ ni mafitelɛ lɛ; kɛji nakai jeŋmaŋ ni miwie ehe lɛ kpale kɛjɛ amɛnɔfɔŋ lɛ he lɛ, mashwa mihe yɛ nɔfɔŋ ni misusu akɛ mafee amɛ lɛ he. Ni asaŋ amrɔ ni mawie yɛ jeŋmaŋ ko loo maŋtsɛyelihe ko he, akɛ matswalɛ mama shi ni mateolɛ lɛ; kɛji efee efɔŋ yɛ mihiɛ ni ebooo migbee toi lɛ, no lɛ mashwa mihe yɛ nɔkpakpa ni mikɛɛ mikɛ aaafee amɛ ejurɔ lɛ he!”—Yer. 18:1-10; kadimɔ Yeremia Wolo 1:10 hu.
13. Mɛɛ gbɛ nɔ Gbɛshɔlɔ Kpele Yehowa kɛ blema Mizraim kɛ Israel fɛɛ ye yɛ, yɛ nakai nifeemɔ he mla ni ewie lɛ nɔŋŋ naa?
13 Afii ohai komɛi dani aaawie wiemɔ nɛɛ, Yehowa na Mizraim shikpɔŋ lɛ mɔbɔ beyinɔ ni Yakob bi Yosef tsɔ Mizraim niyenii nɔkwɛlɔ lɛ. Shi yɛ Yosef gbele sɛɛ beni Mizraim Faraomɛi lɛ bɔ̃i Yosef webii ni ji Yakob (loo Israel) bii lɛ amimyeli ni amɛka amɛhiɛkpatamɔ tete po lɛ, Yehowa kɔ ehe ewo mli. Ehao Mizraim shikpɔŋ lɛ ni ekpata Farao kɛ etabilɔi ahiɛ ni eha ehalamɔbii ni ji Israelbii lɛ ye amɛhe. (Lala 136:10-16; Rom. 9:17, 18, 21-24) Yɛ nakai nifeemɔ lɛ kɛ gbeekpamɔ naa lɛ, beni Yuda maŋtsɛyeli lɛ tse ekpaŋmɔ Nyɔŋmɔ lɛ hiɛ atua ni ehiɛ kpata yɛ egbɛ̀i fɔji lɛ anɔ lɛ, Yehowa ni ji Gbɛshɔlɔ Kpele lɛ to eyiŋ akɛ ebaawo Israel maŋtsɛyeli lɛ eshɛ efɔ̃. (Yer. 18:11-17) Nakai atuatselɔi lɛ kɛ efɔŋ to ekpakpa ni Yeremia tao akɛ efee amɛ lɛ najiaŋ. Amɛto amɛyiŋ akɛ amɛ aaagbelɛ po. (Yer. 18:18-20, 23) Nohewɔ lɛ naagbee mli lɛ, Yeremia diɛŋtsɛ bana akɛ esani Yehowa kojomɔi ni naa wa aba nakai atuatselɔi lɛ anɔ.—Yer. 18:21, 22.
14. Mɛni hewɔ ŋmɛnɛ esani wɔ aŋkroaŋkroi lɛ, wɔjwɛŋ nakai yinɔsane mli nɔkwɛmɔnii ni tsɔɔ bɔni Gbɛshɔlɔ Kpele lɛ kɛ mɛi ye eha lɛ anɔ waa lɛ?
14 Esa akɛ jeŋmaji fɛɛ, titri nɔni yɔɔ Kristendom lɛ akwɛ yinɔsane mli nɔkwɛmɔnii nɛɛ jogbaŋŋ. Kɛ́ hooo kwraa lɛ, wɔ mɛikpɔji lɛ, esani wɔfeɔ nakai aŋkroaŋkroi. Gbɛshɔlɔ Kpele ni ji Yehowa lɛ ji Ofe lolo, ni eshwɛ fioo ebaaha adesai fɛɛ ana ale akɛ eji “jeŋmaji a-Maŋtsɛ” lolo. Ŋmɛnɛ, Yeremia wiemɔi lɛ ji anɔkwale waa fe bei fɛɛ ni eho, akɛ:
“Shi [kɛ́ akɛ Yehowa to apasa nyɔŋmɔi ni awie amɛhe kɛtsɔ hiɛ nɔŋŋ nɛɛ ahe lɛ,] Yehowa ji anɔkwa Nyɔŋmɔ lɛ, Nyɔŋmɔ hiɛkaalɔ kɛ naanɔ Maŋtsɛ ni; emlifu haa shikpɔŋ lɛ hosoɔ, ni jeŋmaji lɛ nyɛɛɛ emlila lɛ naa adamɔ. Bɔni nyɛkɛɛ . . . [jeŋmaji lɛ] nɛ: Nyɔŋmɔi ni jeee amɛ amɛfee ŋwɛi kɛ shikpɔŋ lɛ, amɛhiɛ aaakpata kɛaajɛ shikpɔŋ lɛ nɔ kɛ ŋwɛi shishi nɛɛ!a Lɛ efee shikpɔŋ lɛ yɛ ehewalɛ naa, lɛ nɔŋŋ eŋɔ je lɛ ema shi yɛ eŋaa naa, ni elɛɛ ŋwɛi mli yɛ enilee naa.”—Yer. 10:10-12.
15. Mɛni hewɔ esa jogbaŋŋ akɛ Yehowa mli woɔ jeŋmaji lɛ ala lɛ; ni mɛɛ gbɛ nɔ eeetsɔɔ no yɛ?
15 Ani yiŋtoo kpakpa ko yɛ ŋmɛnɛ ni baaha Bɔlɔ Yehowa Nyɔŋmɔ mli afu? Nyɛhaa wɔsusua bulɛ ni mɛi babaoo bɛ kɛha emlai, egbɛi lɛ he guɔ ni agbeɔ, efɔŋfeemɔ, ŋɔɔmɔyelii ni asumɔɔ moŋ fe Nyɔŋmɔ, jeŋbasha, Nyɔŋmɔjamɔŋ osatofeemɔ, ŋmɛnɛbeaŋ Yeremia kuu lɛ mlibii ayiwaa, kɛ kpɛlɛmɔ ni jeŋmaji lɛ ekpɛlɛɛɛ akɛ amɛbaa amɛhe shi amɛhaa Yehowa maŋtsɛyeli ni Kristo kwɛɔ nɔ lɛ, ahe wɔkwɛa. Ekã shi faŋŋ akɛ yɛ enɛɛmɛi fɛɛ ahewɔ lɛ, esa jogbaŋŋ akɛ Gbɛshɔlɔ Kpele ni ji Yehowa Nyɔŋmɔ mli afu. Etsɛŋ kwraa ni ebaajie no kpo, tamɔ bɔ nɔŋŋ ni efee yɛ Yeremia gbii lɛ anɔ ni ekpata Yerusalem kɛ Yuda maŋtsɛyeli lɛ hiɛ lɛ.
16. Mɛni hewɔ jeŋmaji fɔji lɛ ‘nyɛŋ Yehowa kojomɔ lɛ naa amɛdamɔ’ lɛ?
16 Yehowa ewie eshi efɔŋfeemɔ fɛɛ, yɛ e-Wiemɔ ni aŋma ni ji Biblia lɛ mli. Etsɛŋ kwraa ni ebaakpata nibii ni ewie eshi lɛ ahiɛ. Be mli ni eeete shi eshi nibii nɛɛ, ‘jeŋmaŋ ko jeŋmaŋ ko nyɛŋ naa adamɔ.’ ‘Amɛnyɔŋmɔi’ ni ji nibii ni amɛhole amɛnɔ gojoo ni amɛjaa amɛ lɛ nyɛŋ nɔkonɔko afee, shi moŋ amɛhiɛ aaakpata. Mɛi ni jaà amɛ lɛ hu ahiɛ aaakpata afata amɛhe.
17. Namɛi foɔ amɛtsɛɔ wɔ-Yelikɛbuamɔ kometoo ni wɔyɔɔ lɛ; ni mɛni hewɔ amɛfoɔ amɛtsɛɔlɛ?
17 Belɛ jwɛŋmɔ yɛ mli akɛ aaasusu akɛ yelikɛbuamɔ pɛ ni wɔyɔɔ ji anɔkwa Nyɔŋmɔ hiɛkaalɔ kome ni ji “jeŋmaji a-Maŋtsɛ” lɛ. Mɛi ni nyageɔ amrɔ nɛɛ shihilɛ ni Nyɔŋmɔ gbeyeishemɔ bɛ mli ni amɛdamɔɔ “ŋtsɔi ni amɛyeɔ ŋkɔmɔ yɛ nihiinii fɛɛ ni afeɔ” titri yɛ Kristendom ni feɔ osato babaoo lɛ teŋ he lɛ fóɔ amɛtsɛɔ Nyɔŋmɔ kɛhaa yelikɛbuamɔ kɛjɛɔ hefɛɛhe yɛ shikpɔŋ nɛɛ nɔ. (Ezek. 9:4) Amɛtsuii ehoo yɛ amɛmli ejaakɛ eshwɛ fioo ni ‘kuumɔ’ ni tamɔ nɔni Yeremia wie he lɛ baaba jeŋmaji lɛ fɛɛ anɔ akɛni amɛlumɛi lɛ taoko Yehowa ni ji yelikɛbuamɔ kome pɛ ni wɔyɔɔ lɛ sɛɛgbɛ hewɔ lɛ. (Yer. 10:19-22) Amɛ-Jeŋmaji Ekomefeemɔ gbɛjianɔtoo lɛ baabɔ amɛ abolo akɛ nii ni baaha hejɔlɛ kɛ shweshweeshwe shihilɛ aba lɛ. Ŋaai fɛɛ ni adesai eto kɛha gbɛ ni adesai ayinɔsane aaakɔ lɛ kudɔmɔ kɛ hiɛkpatamɔ ni aaajɛ Gbɛshɔlɔ Kpele lɛ dɛŋ aba lɛ naatsii fɛɛ aaafee efolo.
18, 19. Mɛɛ gbɛ nɔ maŋkwramɔŋ nɔyelɔi lɛ kaa yɛ akɛ amɛ aaajaje amɛnajifaamɔi yɛ maŋnɔkwɛmɔ gbɛfaŋ; ni te aaafee tɛɛŋ aha amɛyɔse akɛ nakai feemɔ bɛ amɛdɛŋ hu?
18 Beni wɔsusu yinɔsane mli nɔkwɛmɔnii ni bɔɔ mɔ kɔkɔ lɛ ahe sɛɛ lɛ, wɔnaa akɛ esani wɔkɛ Yeremia akpa gbee yɛ nɔni ekɛɛ nɛɛ naa, akɛ: “Yehowa, mile akɛ gbɔmɔ gbɛ bɛ lɛdiɛŋtsɛ edɛŋ, ni adesa ni nyiɛ nɛɛ, bɔni eeetsɔ ejaje enajifaamɔi eha lɛ, ebɛ edɛŋ.”—Yer. 10:23.
19 Mɔko aaanyɛ asusu akɛ akɛni enyɛɔ enyiɛɔ hewɔ lɛ ebaanyɛ enyiɛ kɛtsɔ hefɛɛhe ni esumɔɔ ni ebaashɛ heni eyaa lɛ pɛpɛɛpɛ. Ekolɛ eeesusu akɛ Yehowa Nyɔŋmɔ he baaa sane lɛ mli kwraa. Nohewɔ lɛ maŋkwramɔŋ nɔyelɔi lɛ bɔɔ mɔdɛŋ akɛ amɛ aaakudɔ amɛmaji lɛ amli saji yɛ be mli ni amɛjieɔ amɛhiɛ kɛjɛɔ kasemɔnii ni yɔɔ Biblia mli yinɔsane mli anɔ lɛ. Amɛyeɔ ŋmɛnɛbeaŋ Yeremia kuu lɛ he fɛo yɛ oshra ni amɛgbaa amɛtoɔ akɛ ebaatsɔ “amanehulu kpeteŋkpele” ko nɔ aba je lɛ fɛɛ nɔ lɛ hewɔ. (Mat. 24:3, 21, 22) Jeee amɛhe sane ji Biblia mli gbalɛ; ni amɛsusuɔ hu akɛ amɛbaanyɛ amɛtsɔɔ nɔni baaba, ni amɛkudɔ amɛdiɛŋtsɛ amɛnajifaamɔi kɛbote hejɔlɛ kɛ shweremɔ ni hiɔ shi daa mli. Amɛnyiɛ bɔni amɛsumɔɔ yɛ maŋkwramɔ mli, shika helɛtemɔ gbɛfaŋ kɛ jamɔ mli moŋ nɛ, shi Yehowa, akɛ “jeŋmaji a-Maŋtsɛ” lɛ, eeeha amɛnaji atɔtɔ kɛyagbee hiɛkpatamɔ ni agba he sane ato ni baatsɔ “amanehulu kpeteŋkpele” ni baaba kɛ̃ lɛ nɔ kɛba lɛ mli.
20. Taakɛ Yeremia hu sɔle lɛ, te wɔsɔleɔ wɔkpaa Yehowa fai akɛ esaa wɔ eha tɛɛŋ; ni mɛni hewɔ?
20 Saamɔ ni jɛɔ Nyɔŋmɔ ŋɔɔ ji nɔko ni he hiaa wɔ fɛɛ. Nohewɔ lɛ esani wɔsɔle taakɛ Yeremia sɔle lɛ, yɛ wɔhiɛ ni wɔsumɔŋ akɛ akpata afata adesai krokomɛi ahe lɛ hewɔ; ejaakɛ ekɛɛ: “Yehowa, kãmi, shi bɔni sa kɛkɛ [yɛ bɔni mihiamɔnii yɔɔ ha lɛ naa] jeee yɛ omlifu [yɛ amanehulu kpeteŋkpele lɛ mli lɛ] mli, koni okapelene mi! Fɔsemɔ omlila oshwie jeŋmaji ni leeeo [aloo amɛjie amɛhiɛ kɛjɛ onɔ] lɛ kɛ wekui ni tsɛɛɛ ogbɛi lɛ anɔ; ejaakɛ [Babilonbii kɛ amɛhefatalɔi lɛ] amɛtsɛrɛ Yakob, ni amɛyelɛ amɛgbe naa kwraa, ni amɛfee ashihilɛhe lɛ amaŋfɔ.”—Yer. 10:24, 25, naabugbɛ niŋmaa lɛ; Lala 79:6, 7.
21. Namɔ wɔɔɔshi jalɛ kojomɔ ni akɛ aaaba mɛi ni kaa akɛ amɛ aaakpata wɔhiɛ yɛ gbɛ ni wɔkɔ lɛ hewɔ lɛ anɔ lɛ wɔha?
21 “Jeŋmaji a-Maŋtsɛ” lɛ fai akpaa yɛ sɔlemɔ nɛɛ mli lɛ. Wɔbaanyɛ wɔshi ejalɛ kojomɔ ni ekɛ aaaba mɛi ni jieɔ amɛhiɛ yɛ enɔ ni amɛkɛ yiwalɛ kaa akɛ amɛ aaakpata mɛi fɛɛ ni kpɛlɛɔ Nyɔŋmɔ jeŋ muu fɛɛ nɔ maŋtsɛ ni amɛkɛ yiwalɛ kaa akɛ amɛ aaakpata mɛi lɛ, ahiɛ lɛ anɔ lɛ wɔhalɛ. Lɛ mɔni ji wɔyelikɛbuamɔ kome pɛ lɛ wɔfoɔ wɔtsɛɔ akɛ ebaye ebua wɔ.b
(Abaatsa Yeremia gbalɛ lɛ he nikasemɔi lɛ anɔ yɛ Buu-Mɔɔ krokomɛi ni baanyiɛ enɛ sɛɛ lɛ amli.)
[Shishigbɛ niŋmai]
a Ajie kɛjɛ August 15, 1979 Blɔfo Buu-Mɔɔ mli.
b Nɛkɛ kuku ni ji Yeremia Wolo 10:11 nɛɛ kɛ emli wiemɔi lɛ yɛ sɔrɔto ejaakɛ aŋma no yɛ Arameik wiemɔ mli, tsɛbelɛ aŋma Yeremia gbalɛ lɛ fã ni shwɛɔ lɛ fɛɛ yɛ Hebri wiemɔ mli.
JUNE Daa Gbi Ŋmalɛ
(for fully formatted text, see publication)