“Tsui” Lɛ yɛ Nyɔŋmɔ Wiemɔ Biblia Iɛ Mli

Ŋwanejee ko bɛ anɔkwale ni eji akɛ ágbala jwɛŋmɔ kɛtee adesa tsui lɛ nɔ yɛ gbɔmɛi asusumɔ mli fe gbɔmɔtso lɛ henɔ̃ fɛɛ henɔ̃ lɛ he. Awie he shii abɔ yɛ lalafoo mli. Belɛ ebɛ naakpɛɛ mɔ akɛ áwie tsui lɛ he babaoo yɛ Nyɔŋmɔ Wiemɔ lɛ mli lɛ. Yɛ anɔkwale mli lɛ átsi tã aaafee shii akpe yɛ jɛmɛ yɛ gbɛ kome loo yɛ gbɛ kroko nɔ. Belɛ mɛni esa akɛ wɔnu shishi kɛ wiemɔ “tsui” lɛ?

Ejeee nɔ ni efɔɔɔ kaa ákɛ akɛ wiemɔ ko aaatsu nii yɛ gbɛi sɔrɔtoi anɔ yɛ shishinumɔi sɔrɔtoi amli yɛ Biblia lɛ mli. Akɛ nɔkwɛmɔ nɔ lɛ, nyɛhaa wɔkadia gbɛ ni Biblia lɛ tsɔ nɔ ekɛ wiemɔ “ŋwɛi” kɛ “mumɔ” tsu nii Iɛ. Yɛ bei komɛi amli lɛ, “ŋwɛi” lɛ damɔɔ shi kɛhaa atatui loo ŋwɛiniiaŋ ni yɔɔ wɔ yiteŋgbɛ ni loofɔji filikiɔ kɛtsɔɔ mli nɛɛ. (1 Mose 1:26) Agbɛnɛ jeŋ muu fɛɛ ni anaa ni ŋulamii ni anaa kɛ nɔ ni anaaa fata he lɛ hu ji nɔ ni afɔɔ amɛ tsɛmɔ akɛ ŋwɛi. (Lala 19:⁠2) Etamɔ nɔ ni 2 Petro 3:7 damɔ shi kɛha maŋkwramɔŋ ŋwɛi lɛ. Shi, eshɛɔ be ni “ŋwɛi” lɛ damɔɔ shi kɛhaa Yehowa gbɛjianɔtoo ni ji emumɔŋ bɔɔ nii lɛ ashihilɛ he diɛŋtsɛ. (Kpojiemɔ 12:12) Abaanyɛ akɛdamɔ shi aha ŋwɛi Maŋtsɛyeli lɛ hu, taakɛ eyɔɔ 2 Petro 3:13 lɛ.

Nakai nɔŋŋ eji ‘yɛ wiemɔ “mumɔ” he. Yɛ bei komɛi amli lɛ awieɔ Yehowa Nyɔŋmɔ, Yesu Kristo kɛ bɔfoi lɛ ahe akɛ mumɔŋ gbɔmɛi. (Yohane 4:​24; 1 Korintobii 15:​45; Hebribii 1:​13, 14) Atsɛɔ wala hewalɛ ni kanyaa bɔɔ nii fɛɛ ni yɔɔ wala lɛ hu akɛ “mumɔ.” (Jajelɔ 12:⁠7) Afɔɔ hewalɛ ni kanyaa mɔ ni yɔɔ gbɔmɔ mli lɛ hu tsɛmɔ yɛ bei komɛi amli akɛ “mumɔ,” taakɛ eyɔɔ Abɛi 25:28 lɛ. Ni afɔɔ Yehowa Nyɔŋmɔ nifeemɔ hewalɛ lɛ tsɛmɔ yɛ be babaoo mli akɛ “mumɔ” aloo “mumɔ krɔŋkrɔŋ.”​—1 Mose 1:2; Zakaria 4:6; Marko 13:⁠11.

Ni “tsui” lɛ hu? Yɛ 2 Mose 28:30 lɛ, akɛ Hebri wiemɔ kɛha “tsui” lɛ damɔɔ shi kɛhaa nakai gbɔmɔtso lɛ henɔ̃ lɛ diɛŋtsɛ. Yehowa fa yɛ biɛ ákɛ akɛ kojomɔ tsitsi nɔ nii akpɛtɛ Aaron tsui nɔ. Enɛ tsɔɔ adesa gbɔmɔtso tsui lɛ diɛŋtsɛ. Ni eka shi faŋŋ akɛ Lala 45:6 ni kaneɔ nɛkɛ lɛ kɔɔ heloo tsui lɛ diɛŋtsɛ he: “Ogaimlibii lɛ anaa ba . . . amɛtsurɔɔ maŋtsɛ lɛ henyɛlɔi lɛ atsuiiaŋ!”

Agbɛnɛ akɛ tsui lɛ toɔ nii ni yɔɔ nɔ ko teŋ lɛ he. Wɔnaa yɛ Ezekiel 27:​25-27 (NW) ákɛ akɛ wiemɔ nɛɛ etsu nii shii etɛ akɛ “yɛ ŋshɔ lɛ tsui mli,” ni ŋwanejee ko kwraa bɛ he akɛ edamɔ shi kɛha ŋshɔ lɛ teŋ diɛŋtsɛ. Nakai nɔŋŋ hu Yesu gba akɛ ebaahi shikpɔŋ lɛ “tsui” mli shwaneshwane kɛ nyɔɔŋnyɔɔŋ gbii etɛ.​—Mateo 12:⁠40.

Agbɛnɛ akɛ tsui lɛ toɔ wɔ miishɛɛ loo awerɛho henumɔ loo mɔbɔ-feemɔ he. Wɔkaneɔ yɛ 1 Maŋtsɛmɛi 8:66 akɛ beni ajɔɔ Salomo sɔlemɔtsu lɛ nɔ lɛ, ‘Israel fɛɛ nya kɛ miishɛɛ kɛ tsuijurɔ yɛ nibii kpakpai ni Yehowa Nyɔŋmɔ efee kɛha etsulɔ David kɛ Israel fɛɛ lɛ hewɔ. Wɔnaa yɛ Nehemia 2:2 akɛ Maŋtsɛ Artashasta bi Nehemia nɔ hewɔ ni efee ehiɛ mɔbɔmɔbɔ nɛkɛ yɛ be mli ni ehe yeee lɛ. Kɛkɛ ni emu sane lɛ naa akɛ, “ejeee nɔ ko nɔ ko ni akɛ tsuiŋ awerɛho ni!”

Akɛ tsui lɛ toɔ subaŋ hu he kɛ eji henɔwomɔ, hepupuumɔ aloo heshibaa kɛ humifeemɔ. Abɛi 16:5 kɛɔ akɛ “Yehowa miihi mɔ fɛɛ mɔ ni woɔ ehe yɛ etsui mli.” Yɛ gbɛ kroko nɔ lɛ, Yesu kɛɛ yɛ Mateo 11:29 akɛ “Mihe jɔ ni mibaa mihe shi kɛjɛɔ mitsuɔ mli.”

Jeŋba mli sui kpakpai​—ejurɔfeemɔ, subaŋ kpakpa, efɔŋfeemɔ kɛ yiwalɛ​—fɛɛ ji nɔ ni akɛɔ akɛ eyɔɔ tsui lɛ mli. Akɛ nɔkwɛmɔ nɔ lɛ, wɔkaneɔ yɛ Yeremia 7:24 akɛ, Israelbii lɛ “booo toi . . . shi moŋ amɛ diɛŋtsɛ amɛŋaawooi kɛ amɛtsui fɔŋ lɛ walɛ sɛɛ amɛnyiɛ.” Yesu tsɔɔ yɛ Mateo 12:​34, 35 akɛ abaanyɛ ana nibii kpakpai kɛ nibii fɔji fɛɛ yɛ tsui lɛ mli.

Hemɔkɛyeli hu kɔɔ tsui lɛ he, ejaakɛ Paulo kɛɔ wɔ yɛ Romabii 10:10 akɛ: “Ejaakɛ tsui akɛheɔ ayeɔ kɛshɛɔ jalɛ he, ni naabu akɛjajeɔ kɛshɛɔ yiwalaheremɔ he.”

Tsui lɛ ji kanyamɔ jɛɛhe. Ni 2 Mose 35:21 tsɔɔ mli akɛ mɛi ni kɛ onia ba kɛha kpeebuu lɛ maa lɛ ateŋ mɔ fɛɛ mɔ ni “na he tsui lɛ” kɛ enɔwomɔ nikeenii ba. Taakɛ Hebribii 4: 12, 13 tsɔɔ lɛ, Yehowa wiemɔ lɛ tamɔ klante ni naa ba ni “eji tsuiiaŋ susumɔi kɛ jwɛŋmɔi lɛ akojolɔ.” Hɛɛ, tsui lɛ ji kanyamɔ jɛɛhe ni enyɛɔ enaa jwɛŋmɔ lɛ nɔ hewalɛ kɛhaa ekpakpa loo efɔŋ. Nɔkwɛmɔ nɔ ni tsɔɔ bɔ ni tsui lɛ kanya Nyɔŋmɔ webii ni amɛkɛ nilee tsu nii lɛ ji nɔ ni anaa yɛ 2 Mose 31:6 ni kaneɔ nɛkɛ lɛ: “Ni mɛi fɛɛ ni hiɛ ŋaa tsui lɛ miŋɔ ŋaa miwo amɛtsuiiaŋ, koni amɛfee nibii fɛɛ ni miwoɔo he kita nɛɛ.”

Nɔ ni fe fɛɛ lɛ, akɛ suɔmɔ kɛ nyɛ̃ɛ henumɔi toɔ tsui lɛ he. Afa Israelbii lɛ akɛ: “Kaanyɛ onyɛmi yɛ otsui mli.” (3 Mose 19:17) Wɔkaneɔ hu akɛ Mizraimbii lɛ nyɛɔ Israelbii lɛ kɛjɛɔ amɛtsui mli. (Lala 105:25) Shi yɛ gbɛ kroko nɔ lɛ, Paulo kɛɔ wɔ akɛ: “Shi kita lɛ naagbee ji suɔmɔ ni jɛ tsui ni mli tse . . . mli.” (1 Timoteo 1:⁠5) Ni Petro woɔ wɔ ŋaa akɛ: “Ni akɛ nɔ ni nyɛtsɔ mumɔ lɛ nɔ nyɛtsuu nyɛsusumai ahe yɛ anɔkwale lɛ toiboo mli lɛ . . . nyɛkɛ tsui krɔŋŋ asumɔa nyɛhe jogbaŋŋ.”​—1 Petro 1:⁠22.

Ŋmalɛi lɛ hu wieɔ niiashikpamɔi ni ŋɔɔ jogbaŋŋ ni akɛto tsui lɛ mli Iɛ he. No hewɔ lɛ wɔkaneɔ yɛ Luka 2:51 akɛ, Maria, ni ji Yesu nyɛ lɛ, “ŋɔ nɛkɛ wiemɔi nɛɛ fɛɛ [ni kɔɔ Yesu he lɛ] eto etsui mli.”

Kwɛ nibii sɔrɔtoi ni yɔɔ naakpɛɛ kɛ nyɛmɔi ni tsui lɛ tsuɔ ni eyɔɔ! Ani enɛɛmɛi fɛɛ yɛ heloo tsui lɛ diɛŋtsɛ mli? Enyɛŋ ebalɛ nakai, ejaakɛ anaa enɛ kɛjɛɔ wiemɔi ni haa sɔrɔtofeemɔ baa heloo tsui lɛ kɛ okadi tsui lɛ teŋ lɛ mli. Akɛ nɔkwɛmɔ nɔ lɛ, Chinabii kɛ Japanbii kɛ niŋmaa okadii ni eshishi ji “henɔ tsui” damɔɔ shi haa heloo tsui lɛ diɛŋtsɛ. Shi yɛ be mli ni etsɔɔ sui ni fãa kpo kɛjɛɔ tsui lɛ mli lɛ, amɛkɛ klɛŋklɛŋ niŋmaa okadi lɛ pɛ tsu nii, ni amɛkɛ ekrokomɛi ni haa anaa bɔ ni tsui lɛ tsuɔ nii haa lɛ tsu nii, yɛ wiemɔi tamɔ, suɔmɔ, nyɛ̃ɛ, yiŋtoo kɛ tsuishitoo mli. (Kwɛmɔ akrabatsa ni afo lɛ.) No hewɔ lɛ akɛ sɔrɔtofeemɔ ni ka shi faŋŋ baa heloo tsui lɛ kɛ mɔ̃ lɛ yiŋtooi kɛ kanyamɔi amli, eyɛ mli akɛ ahaa tsakpaa ni ka enyɔ lɛ teŋ lɛ hiɔ shi.

Wɔnyɛɔ wɔnuɔ bɔ ni akɛ gbɔmɔtso lɛ henii krokomɛi tsuɔ nii yɛ Ŋmalɛi lɛ amli lɛ hu shishi. No hewɔ lɛ wɔnaa ákɛ, akɛ heloo saba lɛ tsuɔ nii shii 20 yɛ Hebri Ŋmalɛi lɛ amli, titri lɛ yɛ Mose woji enumɔ lɛ amli. Wɔfɔɔ “sabai enyɔ lɛ, kɛ fɔ lɛ” ni kɔɔ kooloi ni akɛ amɛ shaa afɔlei yɛ Mla Iɛ shishi lɛ akanemɔ shii abɔ. (2 Mose 29:​13, 22; 3 Mose 3:​4, 10, 15; 4:9; 7:⁠4) Ŋwanejee ko bɛ he akɛ enɛ kɔɔ heloo sabai lɛ diɛŋtsɛ he. Ni eka shi faŋŋ akɛ Lalafoɔ David miiwie heloo sabai lɛ ahe beni eŋma akɛ: “Ejaakɛ bo ofee misabai lɛ, bo oshɔ mi yɛ minyɛ musuŋ” lɛ.​—Lala 139:⁠13.

Shi ani heloo sabai lɛ diɛŋtsɛ gbalɔ Yeremia wieɔ he yɛ be mli ni ejaje yɛ Yeremia 11:20 akɛ Yehowa “kaa sabai kɛ tsuii ekwɛɔ” lɛ? Agbɛnɛ, ani heloo sabai lɛ David wieɔ he beni ekɛɛ akɛ: “Misabai tete wieɔ tsɔɔ mi nyɔɔŋ” lɛ? (Lala 16:⁠7) Eji anɔkwale akɛ wɔ heloo sabai lɛ nyɛŋ awie atsɔɔ wɔ loo ejaje wɔ. Belɛ mɛni otsɔɔ lɛ? Ani Yeremia 12:2 haaa sane nɛɛ mli aka shi? Ekaneɔ akɛ: “Otɛoɔ amɛ ni amɛfai mɔmɔɔ shi; amɛdaraa, ni amɛwoɔ yibii; okɛ amɛnaabu teŋ jɛkɛɛɛ, shi okɛ amɛsabai ateŋ jɛkɛ.” Ani “sabai” ni atsɔɔ mli yɛ biɛ lɛ etsɔɔɔ gbɔmɔ lɛ henumɔi diɛŋtsɛ? Etamɔ nɔ ni nɛkɛ ŋmalɛ nɛɛ kɛ Yesaia 29:13 kpaa gbee, he ni Yesu tsɛ wiemɔ kɛjɛ, taakɛ aŋma yɛ Mateo 15:​7, 8 lɛ: Osatofoi! gbɛnaa pɛ Yesaia gba yɛ nyɛhewɔ akɛ: Maŋ nɛɛ kɛ amɛnaabu woɔ mi; shi amɛtsui etse ehe kɛjɛ mihe kɛtee shɔŋŋ.” Ŋwanejee ko bɛ he akɛ Yesu miitsɔɔ nɔ gbɔmɛi ni nɛkɛ yiwalɔi nɛɛ ji yɛ amɛmligbɛ diɛŋtsɛ.

Nɔkwɛmɔ nɔ kroko ni abaanyɛ akɛha ji Hela wiemɔ kɛha mlinii, splagkhna. Akɛtoɔ heloo nɔ̃ lɛ diɛŋtsɛ he yɛ Bɔfoi lɛ Asaji 1:​18, he ni wɔkaneɔ yɛ Yuda he akɛ: “Shi nɛkɛ nuu nɛɛ ŋɔ enɔsha ni efee lɛ mli nyɔmɔwoo lɛ ehe abɔɔ, ni eyama eyi shi, ni emli gba enyɔ ni emlinii fɛɛ tue shwie shi” lɛ. Shi eyɛ mli akɛ nɛkɛ wiemɔ nɛɛ jeɔ kpo shii 11 yɛ Kristofoi a-Hela Ŋmalɛi lɛ amli moŋ, shi biɛ nɛɛ pɛ ji he ni akɛtsu nii akɛto heloo mlinii lɛ diɛŋtsɛ he. Átsɔɔ shishi “mɔbɔnalɛ” yɛ Luka 1:78 kɛ “musuŋtsɔlɛ” yɛ 2 Korintobii 6:​12; 7:​15; Filipibii 2:1; Kolosebii 3:12 kɛ agbɛnɛ yɛ Filemon 7. Átsɔɔ Hebri wiemɔ ni baa tamɔ nakai lɛ shishi yɛ 1 Mose 43:30 kɛ 1 Maŋtsɛmɛi 3: 26 akɛ rachamim ni ji “musuŋtsɔlɛ” yɛ Authorized Version lɛ mli, eyɛ mli akɛ ekɔɔ “mligbɛ henumɔi” diɛŋtsɛ he, ni nakai ji bɔ ni New World Translation lɛ tsɔɔ shishi.

Nakai nɔŋŋ eji yɛ Hebri kɛ Hela wiemɔi ni akɛtsu nii akɛ “tsui” lɛ he yɛ wɔ Bibliai amli. Hei fioo komɛi pɛ akɛ heloo tsui lɛ diɛŋtsɛ tsuɔ nii yɛ, akɛ nɔkwɛmɔ nɔ lɛ, yɛ 2 Mose 28:30 kɛ Lala 45:⁠6. Shi akɛ “tsui” lɛ etsu nii aaafee shii akpe yɛ Biblia lɛ mli yɛ okadi gbɛ nɔ. Enɛ etsɔɔɔ akɛ tsakpaa ko bɛ heloo tsui lɛ kɛ okadi tsui lɛ teŋ. Tsakpaa yɛ mli. Akɛ nɔkwɛmɔ nɔ lɛ, henumɔŋ nɔnyɛɛ baanyɛ aye heloo tsui Iɛ awui, ekɛ hela baaba ni gbele po baanyɛ anyiɛ sɛɛ. Shi eka shi faŋŋ akɛ esa akɛ sɔrɔtofeemɔ aba heloo tsui lɛ kɛ okadi tsui lɛ teŋ. Taakɛ W. E. Vine tsɔɔ mli lɛ, “Akɛ tsui lɛ tsuɔɔ nii yɛ okadi gbɛ nɔ akɛhaa mɔ ko shihilɛ mli nibii ni aŋɔtee ni baanyɛ apue trukaa.”​—An Extpository Dictionary of New Testament Words, Volume II, baafai 206-7.

Wɔnaa kɛjɛɔ enɛɛmɛi fɛɛ mli akɛ Biblia ŋmalɔi kɛ Hebri kɛ Hela wiemɔi kɛha “tsui” lɛ tsuɔ nii amɛkɛtoɔ henumɔ kɛ jeŋba mli sui sɔrɔtoi ni haa aleɔ bɔ ni gbɔmɔ lɛ ji yɛ emligbe lɛ he. Eka shi faŋŋ akɛ, akɛni Nyɔŋmɔ Wiemɔ lɛ bɔɔ wɔ kɔkɔ yɛ bɔ ni ehe hiaa akɛ wɔkwɛ nibii ni baa wɔ tsine kɛ nibii ni wɔtaoɔ kɛ wɔhenumɔi loo kanyamɔi jogbaŋŋ hewɔ lɛ eyeɔ ebuaa wɔ koni “wɔsɔmɔ lɛ kɛ tsui ni eye emuu.” Eewula wɔ kɛmiiha nitsumɔ kpakpa. (1 Kronika 28:9; 2 Timoteo 3:17) Ŋaawooi kpakpai babaoo ni kɔɔ enɛ he yɛ Nyɔŋmɔ Wiemɔ lɛ mli.

Chart on page 6]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

Chinabii Aniŋmaa Okadi ni Tsɔɔ Tsui Lɛ

[Artwork​—Chinese character] tsui, okadi nɔ̃

[Artwork​—Chinese character] heloo tsui, gbɔmɔtsoŋ nɔ̃

Kadimɔ bɔ ni niŋmaa okadi ni akɛtoɔ sui ni kɔɔ tsui lɛ he lɛ ji:

[Artwork​—Chinese character] suɔmɔ

[Artwork​—Chinese character] nyɛ̃ɛ

[Artwork​—Chinese character] eshaifaa

[Artwork​—Chinese character] awerɛho

[Artwork​—Chinese character] haomɔ

[Artwork​—Chinese character] yiŋtoo

[Artwork​—Chinese character] mlifu

[Artwork​—Chinese character] tsuishitoo

[Mfoniri ni yɔɔ baafa 5]

Akɛ tsui lɛ toɔ adesa henumɔŋ sui, hemɔkɛyeli, kanyamɔi kɛ henumɔi ahe

[Akrabatsa ni yɔɔ baafa 7]

“Piŋmɔi babaoo pɛ ha mɔfɔŋ lɛ; shi mɔ ni hiɛ ka Yehowa nɔ lɛ, mɔbɔnalɛ aaabole lɛ kɛaakpe. Nyɛ jalɔi, nyɛmli ashɛa nyɛhe yɛ Yehowa mli, ni nyɛmli afilinyɛ, ni nyɛbɔa oshe kɛ nyamɔ.”​—Lala 32:​10-11.