Okɛ Otsui AbaYehowa Ŋɔɔ Ekoŋŋ

Ani fɔlɔi ni ji Yehowa Odasefoi tsɔse bo? Shi agbɛnɛ, ani ehiɛ edɔɔɔ tsɔ yɛ anɔkwale gbɛ Iɛ mli tamɔ bɔ ni tsutsu ko Iɛ oji? Kɛ nakai eji lɛ, belɛ esa akɛ sane ni nyiɛ sɛɛ nɛɛ afee nɔ krɛdɛɛ ko ni miishɛɛ yɔɔ he kɛha bo.

HENUMƆI babaoo ni teɔ shi woɔ amɛhe jieɔ amɛhe kpo yɛ obalanyo tsui mli. Akɛ nɔkwɛmɔ nɔ lɛ, obaasumɔ heyeli ni fa. Onaa shihilɛ gbɛi komɛi ni tamɔ nɔ ni miishɛɛ yɔɔ mli ni kɛ nɔ ni átsɔɔ bo lɛ kpaaa gbee. Yɛ bei komɛi amli lɛ akpooɔ nibii ni akase yɛ gbekɛbiiashi lɛ. Ekolɛ enɛ eba onɔ dã, kɛji akɛ ofɔlɔi ji Yehowa Nyɔŋmɔ tsuji po.

Mɛi ni ji obalaŋtai ni kpalaa kɛjɛɔ Kristofoi asafo lɛ mli yɛ he fɛɛ he. Kɛ enɛ eba onɔ po lɛ, ŋwanejee ko bɛ he akɛ okaiɔ nibii komɛi ni okase yɛ Yehowa he lɛ. Yɛ be ko mli lɛ onu he akɛ okɛ Yehowa yɛ kpaakpa ni osɔleɔ ohaa lɛ daa. Ŋwanejee ko bɛ he akɛ Yehowa kwɛ onɔ taakɛ bɔ pɛ ni efee eha eblema maŋ, Israelbii lɛ. Yɛ be mli ni ekɛ maŋ Iɛ toɔ gbekɛ bibioo ko he lɛ, Yehowa kɛɛ akɛ: “Shi mifee Efraim [ni ji, Israelbii lɛ] tataa, mihole amɛ yɛ mikpɔkɔiaŋ . . . Gbɔmɛi akpãai mikɛgbalaa amɛ, kɛ suɔmɔ taŋkpei hu.”​—Hoshea 11:​3, 4.

Kwɛ bɔ ni etaa mɔ mli haa! Gbekɛ fioo ko ni najiaŋ wako ni fɔlɔ ko ni yɔɔ suɔmɔ hiɛ shwiili kɛmiiye miibua lɛ ni enyiɛ! Kɛji akɛ gbekɛ fioo lɛ hiɛ enɛ mli lɛ ebaaha edamɔ shi shiŋŋ ni egbeŋ shi. Shi agbɛnɛ, ani ohe ni Yehowa susuɔ lɛ tamɔɔɔ nakai nɔŋŋ? Yɛ anɔkwale mli lɛ, esuɔmɔ lɛ je kpo yɛ yelikɛbuamɔ ni onine shɛ nɔ kɛjɛ ofɔlɔi ni sheɔ Nyɔŋmɔ gbeyei lɛ aloo kɛjɛ mɛi krokomɛi adɛŋ yɛ Maŋtsɛyeli Asa lɛ nɔ lɛ mli. Ani anyɛŋ akɛ onɔ ni akwɛ nɛɛ ato “suɔmɔ taŋkpei” ni akɛhiɛ omli lɛ he? Eka shi faŋŋ akɛ ofɔlɔi lɛ kɛ asafo mli onukpai lɛ yasumɔ ni amɛye amɛbua bo ni okaye ohe awui yɛ henumɔŋ, gbɔmɔtsoŋ kɛ mumɔŋ. Amɛmiisumɔ ni ohi anɔkwale gbɛ lɛ nɔ.​—Okɛto 3 Yohane 2-4 he.

Shi bianɛ lɛ, enɛɛmɛi fɛɛ tamɔ nɔ ko ni okaiɔ kɛkɛ. Kɛ oojwɛŋ kɛmiiya sɛɛ lɛ, obaana yiŋtooi sɔrɔtoi babaoo ahewɔ ni okpalaŋ kɛje anɔkwale gbɛ lɛ he lɛ.

Tsui Ni Kpaa Shi

Mɛni hewɔ blema Israelbii lɛ ateŋ mɛi babaoo kpalaŋ kɛjɛ anɔkwale jamɔ he lɛ? Ejaakɛ “amɛtsui damɔɔɔ shi shiŋŋ” haaa Yehowa. (Lala 78:37) Nibii krokomɛi ahe suɔmɔ baanyɛ aha suɔmɔ ni ayɔɔ kɛha Yehowa lɛ nɔ. Taakɛ Yesu tsɔɔ lɛ, je nɛŋ henaagbamɔi kɛ ninamɔ kɛ “ŋɔɔmɔiyeli” baanyɛ agbe Nyɔŋmɔ wiemɔ lɛ ni adu be ko awo tsui lɛ mli lɛ.​—Luka 8:​14; Marko 4:⁠19.

Nanemɛi skulbii kɛ agbɛnɛ adafitswaa kɛ hiɛtserɛjiemɔ he adafi ni atswaa lɛ baaha “ŋɔɔmɔiyeli” lɛ afee nɔ ni gbalaa mɔ diɛŋtsɛ. Akɛ nɔkwɛmɔ nɔ lɛ, obalayoo ko ni efɔlɔi etsɔɔ lɛ Nyɔŋmɔ Wiemɔ lɛ kɛjɛ egbekɛbiiashi lɛ shi anɔkwale gbɛ lɛ beni eye afii nyɔŋma kɛ nɛɛhu. Ekpɛlɛ nɔ akɛ: “Miitao ni mana nɔ kwraa ni yɔɔ shihilɛ mli ni mafee nibii ni obalaŋtai krokomɛi lɛ eha efee tamɔ nɔ ni miishɛɛ yɔɔ mli waa lɛ eko. No hewɔ lɛ, mifa kɛyahi mi diɛŋtsɛ mishia ni mije shishi mikɛ obalahii bɔi nyiɛmɔ, ni mitee hiɛtserɛjiemɔi babaoo shishi bɔni afee ni mana miishɛɛ kɛkɛ. Etsɛɛɛ tsɔ ni mikpa asafoŋ kpeei yaa. Mikwa jeŋba kpakpa he mlai ni yɔɔ Biblia lɛ mli lɛ nɔ yeli yɛ be kukuoo mli.”

Shi kɛlɛ, jeee mɛi fɛɛ ni kpalãa kɛjɛɔ anɔkwale lɛ he lɛ kɛ amɛhe yawoɔ jeŋba shara mli. Ekolɛ amɛnyɛɛɛ amɛha anɔkwale lɛ afee amɛnɔ. Ekolɛ nɔkwɛmɔ nɔ gbonyo ko ni fɔlɔi lɛ fee aloo kpoomɔ fata he ni ehaaa amɛkɛ hiɛdɔɔ amɔ anɔkwale lɛ mli lɛ. Agbɛnɛ nibii tamɔ weku mli naagbai, nitsumɔ taomɔ, aloo shwe ni ashweɔ waa akɛ aye omanye yɛ nitsumɔ mli ni ma amɛhiɛ lɛ baayimɔ amɛtsuii amli.

Shi ani obaana miishɛɛ diɛŋtsɛ kɛ be fioo ko pɛ okɛsusuɔ o-Feelɔ lɛ he? Ani nibii ni otsui shweɔ lɛ asɛɛ ni ooonyiɛ lɛ kɛ anɔkwale miishɛɛ baaba?

Tsui Lɛ,​—“Nɔ Ko Bɛ Ni Shishiuɔ Mɔ Fe Lɛ”

“Tsui yɔɔ nɛɛ, eyi tɔ kɛ kutumpɔo fe nii fɛɛ, ni esane ehiii kwraa; namɔ aaanyɛ ale?” (Yeremia 17:⁠9) Hɛɛ, otsui baanyɛ alaka bo​—ni eye bo awui. Enɛ ba obalayoo ni atsi eta kɛtsɔ hiɛ lɛ nɔ. Ejaje akɛ: “Klɛŋklɛŋ be ni mije shishi mibɔi nɔ ni mi diɛŋtsɛ misumɔɔ feemɔ lɛ, mina miishɛɛ. Shi yɛ be ko sɛɛ lɛ, eyɛ mli akɛ miyɛ nibii fɛɛ ni haa mi miishɛɛ lɛ moŋ, shi efee tamɔ nɔ ni mibɛ miishɛɛ yɛ mimligbɛ. Efee tamɔ nɔ ni nɔ ko elaaje. Miishɛɛ lɛ ji hiɛaŋhiɛaŋ nɔ kɛkɛ. Minii bafee mɔbɔ.”

Mɛi babaoo hu ni ekpalaŋ lɛ ekpɛlɛ nɔ akɛ amɛyaná ‘hiɛaŋhiɛaŋ miishɛɛ.’ Yɛ mligbɛ piŋmɔ kɛ shihilɛ ni yiŋtoo bɛ mli ni jɛ amɛtsui ni edu gbɛ lɛ sɛɛnyiɛmɔ mli ba lɛ hewɔ lɛ, amɛbale agbɛnɛ akɛ “nɔ ko bɛ ni shishiuɔ mɔ fee no.”​—Today’s English Version.

Ani onuɔ he nakai nɔŋŋ kɛ okwɛ bo diɛŋtsɛ oshihilɛ lɛ? Ani nibii ni tsutsu lɛ obu amɛ akɛ otsui mlifilimɔ nii lɛ eha nibii ni okpa gbɛ lɛ eba mli? Ani oshihilɛ gbɛ lɛ kɛ jwɛŋmɔŋ toiŋjɔlɛ kɛ bulɛ ni oyɔɔ kɛha ohe eba?

Kɛ toiŋjɔlɛ bɛ bo diɛŋtsɛ omli lɛ, onyɛŋ ona anɔkwa miishɛɛ kɔkɔɔkɔ. Ŋmɔlɔ abɔ ni oooŋmɔ lɛ nyɛŋ atsa otsui ni ‘werɛ eho ehe’ lɛ. (Abɛi 14:13) Akɛ nɔkwɛmɔ nɔ lɛ, obalayoo kroko ni eye afii nyɔŋma kɛ kpaanyɔ lɛ tsi ehe kɛjɛ Biblia mli tɛi ni afolɔ ashwie shi ni akɛtsɔɔ lɛ nii ewala gbii abɔ fɛɛ lɛ he. Shi, yɛ be mli ni etiuɔ “shihilɛ ni asusuuu nɔ ko he kɛ mlifilimɔ nɔ̃” lɛ sɛɛ lɛ, ekai akɛ: “Mibabɔi wɔsɛɛ be he susumɔ. Mɛni ji nɔ ni baaba minɔ yɛ afii enumɔ mli kɛji mikã he yɛ migbɛ nɛɛ nɔ lɛ? Minyɛɛɛ matsɔ mi diɛŋtsɛ miyiŋ dɔŋŋ akɛ miyɛ miishɛɛ. Akɛni mibɛ hiɛnɔkamɔ ko kwraa hewɔ lɛ mibanu he akɛ mitamɔ je lɛŋ gbekɛyoo ko ni bɛ miishɛɛ fe fɛɛ!”

No hewɔ lɛ, kɛ oshi anɔkwale gbɛ lɛ, te ooofee tɛŋŋ ona miishɛɛ diɛŋtsɛ ekoŋŋ? Lalatsɛ David kɛ nɔ ni kɛ hetoo lɛ baa ha beni ebi Nyɔŋmɔ akɛ: “Yehowa, tsɔɔmɔ mi ogbɛ lɛ, manyiɛ anɔkwale lɛ mli; feemɔ mitsui ekome, ni mashe ogbɛi lɛ gbeyei.” (Lala 86:11) David le akɛ oshara kpele yɛ tsui ni eja esuɔmɔ mli lɛ he. No hewɔ lɛ, esa akɛ ojaje otsui lɛ bɔni afee ni ekɛ ehewalɛi fɛɛ akwɛ nɔ kome​—“sɔɔmɔ krɔŋkrɔŋ” ni akɛaaha Yehowa kɛ jamɔ kɛ bulɛ ni jɛ tsui muu fɛɛ mli ni akɛaaha wɔ-Nyɔŋmɔ lɛ. (Romabii 12:​1, 2, NW) Shi te aaafee tɛŋŋ ni aha shihilɛ ni asumɔɔ ni tsui lɛ ahi mli nɛɛ aba?

Abaanyɛ Atsake Otsui Lɛ

Klɛŋklɛŋ kwraa lɛ, esa akɛ oyɔse akɛ tsui lɛ​—otsui lɛ​—baanyɛ atsake. Yehowa kɛɛ yɛ ewebii ni edu gbɛ lɛ ahe akɛ: “Ni maha amɛ tsui kroko [nɔ ni efee ekome], ni mikɛ mumɔ hee aaawo nyɛmli, ni majie tɛ tsui lɛ kɛaajɛ amɛheloo mli, ni maha amɛ loo tsui, bɔni afee ni amɛnyiɛ yɛ mikpɔi lɛ anaa, ni amɛye mimlai lɛ anɔ ni amɛfee, ni amɛtsɔ mimaŋ, ni mi hu matsɔ amɛ-Nyɔŋmɔ.” (Ezekiel 11:​19, 20) Mɛɛ ŋwɛi mlihilɛ po enɛ ji nɛkɛ! Ni susumɔ he okwɛ​—tsuii ni nuuu nii ahe tamɔ tɛ ni miitsɔ nɔ ni naa mɔbɔ, enuɔ nii ahe, ni miisumɔ ni adu mumɔŋ nibii awo mli.

Shi ani Yehowa kɛ nɛkɛ tsakemɔ nɛɛ baa kɛtsɔɔ naakpɛɛ nifeemɔ ko nɔ? Aloo, onaa enɛ mli gbɛfaŋnɔ? Esa akɛ obɔ mɔdɛŋ ni oto nibii ni okaiɔ yɛ Yehowa he lɛ ahe gbɛjianɔ yɛ otsui mli. (Abɛi 16:⁠1) Jwɛŋmɔ saji nɛɛ ahe. Okɛ eko afata nilee nɛɛ he. Mɛɛ be mli nɛ ni okɔ Biblia loo Biblia kasemɔ he wolo ko ni Yehowa gbɛjianɔtoo lɛ kɛha? Ŋwanejee ko bɛ he akɛ oyɛ nɛkɛ woji nɛɛ ekomɛi yɛ oshia aloo ole he ni ooona ekomɛi yɛ. Mɛni hewɔ ojɛɛɛ anɔkwayeli mli ojeee amɛkanemɔ shishi? Biblia mli anɔkwale nilee ni okɛaatsu nii lɛ baanyɛ atsake otsui kɛ oshihilɛ gbɛ lɛ.​—Abɛi 2:​10-14.

Yɛ be mli ni okaneɔ Biblia lɛ diɛŋtsɛ lɛ, obaana akɛ Lala 25 shɛjeɔ mɔ mii yɛ gbɛ krɛdɛɛ nɔ. Jwɛŋmɔ fai ni akpa Yehowa akɛ, ‘kaakai mibalahiiaŋ eshai lɛ’ kɛ “ŋɔɔ minɔsha lɛ ofa mi, ejaakɛ eda” lɛ he. Ni susumɔ bɔ ni efeɔ nɔ ni shɛjeɔ mɔ mii akɛ aaale akɛ “Yehowa jieɔ eyitsoŋ sane etsɔɔ mɛi ni sheɔ lɛ lɛ” he.​—Lala 25:​7, 11, 14.

Shi kɛlɛ, esa akɛ nɛkɛ Biblia mli nikasemɔ nɛɛ aya shɔŋŋ fe nilee kɛkɛ ni aaatao awo yitsoŋ. Ehe miihia ni wɔna su ni lalatsɛ lɛ na lɛ nɔŋŋ eko, mɔ ni kɛɛ akɛ: “Mikɛ [Yehowa] owiemɔ lɛ eto mitsui mli, koni mikafee esha mishio.” (Lala 119:11) Te ooofee tɛŋŋ okɛ Yehowa wiemɔ lɛ ‘ato’ lɛ? Yɛ be mli ni okane Biblia lɛ kɛ ehe woji krokomɛi ni “tsulɔ anɔkwafo kɛ nilelɔ” lɛ fee lɛ sɛɛ lɛ, bi ohe akɛ: Mɛɛ sɛɛnamɔ yɔɔ ŋaawoo nɛɛ he? Ani ebaaye ebua mi ni masa Yehowa hiɛ ni majo tsuiŋdɔlɛ ni esaaa lɛ naa foi? Mɛɛ gbɛ nɔ matsɔ ni mikɛtsu nii? Ani nɛkɛ ŋaawoo ni anyɛɔ akɛtsuɔ nii nɛɛ etsɔɔɔ akɛ miŋwɛi Tsɛ lɛ le nɔ ni hi fe fɛɛ kɛha mi? ​—Mateo 24:​45-47.

Kɛ okɛ Nyɔŋmɔ mla lɛ wo otsui mli lɛ, no lɛ onaji famɔi lɛ eko eko “shaneŋ.” (Lala 37:31) Yɛ be babaoo mli lɛ ehe baahia ni ona yelikɛbuamɔ ni suɔmɔ yɔɔ mli kɛjɛ Yehowa odasefonyo ko ni eda dɛŋ, bɔni afee ni okɛ otsui aba Yehowa ŋɔɔ ekoŋŋ. Hɛɛ, ehe baahia ni ona mɔ ko ni eje shishi “ekoŋŋ” ni etsɔɔ bo “Nyɔŋmɔ wiemɔ lɛ mli shishijee nibii lɛ.” (Hebribii 5:12) Asafo mli onukpai lɛ yɛ he miishɛɛ akɛ amɛaaye amɛbua. Mɛni hewɔ oyanaaa amɛ mɔ?

Kwɛmɔ Mɛi Ni Okɛbɔɔ Lɛ

Ewaaa kwraa akɛ gbɔmɛi baanyɛ ‘adɔ otsui’ kɛya nɔ kpakpa aloo nɔ fɔŋ he. Okɛto 1 Maŋtsɛmɛi 11:​3, 4 he. Ekolɛ onanemɛi lɛ ahoshwibɔɔ jeŋba kɛ “wiemɔi wuji” lɛ fata he ni eha okpalaŋ kɛjɛ anɔkwale Iɛ he lɛ. Nɛkɛ gbɔmɛi nɛɛ baabolɔ akɛ: ‘Mɔ ko nyɛɛɛ akɛɛ mi nɔ ni esa akɛ mifeɔ! Mɛni hewɔ esa ni ofee kpɛŋŋ nakai? Shi ani amɛye amɛhe lɛlɛŋ? Shi agbɛnɛ, sui ni jeee Kristofoi asui ni amɛtsɔmɔ nyɔji amɛha nomɛi lɛ hu? (Okɛto 2 Petro 2:​18, 19 he.) Ani aŋkroaŋkroi nɛɛ miiye kɛmiibua bo ni ofee nibii ni kɛ naanɔ hilɛ kɛ bo hamɔ baaba? Dabi, amɛmiitsi bo gbɛ. No hewɔ lɛ, ye ohe kwraa kɛjɛ nɛkɛ nanemɛi gbohii nɛɛ ahe ni otao gbɔmɛi ni edara, mɛi ni ji “nilelɔi” yɛ Nyɔŋmɔ he!​—Abɛi 13:​20; 1 Korintobii 15:⁠33.

‘Nyɔŋmɔ Da Fe Otsui’

Obalanyo ko ni kɛ ehe wo jeŋba ni jeee Kristofoi anɔ mli beni eye afii nyɔŋma kɛ kpaanyɔ lɛ jaje akɛ: “Yiŋtoo titri ni ha misɛɛkuu kɛmiiba anɔkwale lɛ mli lɛ bawa waa ji bɔ ni minu he akɛ misaaa kwraa lɛ. Mihe miye akɛ nɔ ni mifee lɛ fɛɛ ehiii kwraa ni akɛ Yehowa kɛfaŋ mi kɔkɔɔkɔ aloo ni eeeŋɔ mi kɛba eŋɔɔ ekoŋŋ.” Eyɛ mli akɛ etsui bu lɛ fɔ moŋ, shi yɛ be ni sa mli lɛ ebana Nyɔŋmɔ mɔbɔnalɛ. Kwɛ bɔ ni ŋmalɛ, tamɔ nɔ ni yɔɔ 1 Yohane 3:​19, 20 lɛ shɛjeɔ mɔ mii yɛ shihilɛi nɛɛ amli! Wɔkaneɔ yɛ jɛmɛ akɛ: “Ni no wɔkɛaale, akɛ anɔkwale lɛ mli wɔjɛ, ni wɔɔtsɛ́ wɔtsuii wɔŋmɛ wɔmli yɛ ehiɛ, akɛ, kɛji wɔtsuii buɔ wɔ fɔ lɛ, Nyɔŋmɔ da fe wɔtsui, ni ele nii fiaa.”

Anɔkwale, wɔtsuii baanyɛ abu wɔ fɔ. Shi Yehowa kwɛɔ nɔ ni fe wɔhe eshai lɛ. Enaa “tsuiiaŋ teemɔ nii lɛ” fɛɛ. (Lala 44:22) Bɔ ni enilee lɛ mlikwɔ babaoo ha lɛ haa enyɛɔ ekɛ mɔbɔnamɔ boɔ wɔ eshaifaa he sɔlemɔ ni wɔkɛ hiɛdɔɔ feɔ lɛ toi. Kɛji wɔjaje wɔhe eshai ni wɔtsake wɔgbɛ lɛ, Nyɔŋmɔ hu miisumɔ ni etsumɔ eshai waawai po ni wɔfee lɛ yɛ Yesu kpɔmɔ afɔleshaa lɛ hewɔ. Anɔkwale ni eji akɛ mɔ ko tsui mli shaa lɛ waa lɛ tsɔɔ akɛ mɔ Iɛ efokoŋ kɛshɛko he ni enyɛŋ esɛɛ eku dɔŋŋ. Shi kɛha mumɔŋ yelikɛbuamɔ kɛ hewalɛnamɔ ekoŋŋ lɛ, ehe miihia hu ni mɔ aŋkro nɛɛ ana Ŋmalɛ mli yelikɛbuamɔ kɛjɛ asafoŋ onukpai lɛ aŋɔɔ. (Yesaia 1:​18; 1 Yohane 2:​1, 2; 3:​21; Yakobo 5:​13-16) Kɛji akɛ okpalaŋ kɛjɛ anɔkwale lɛ he lɛ, ani obaatsu nɔ ni hiaa lɛ he nii ni oku osɛɛ ekoŋŋ? Wɔmiiwo bo hewalɛ ni ofee nakai.

Yehowa Kɛ Yelikɛbuamɔ Baaha

No hewɔ lɛ, ‘nyiɛmɔ otsui lɛ hiɛ,’ fe moŋ ni oooha elaka bo. Na Yehowa he gbeyeishemɔ kpakpa Ni taakɛ Biblia lɛ tsɔɔ lɛ, “ejaakɛ lɛlɛŋ, akɛ wɔsɛɛ be ko yɛ, ni ohiɛnɔkamɔ lɛ efeŋ yaka.” (Abɛi 23:​17-19) Ni kwɛ bɔ ni eji hiɛnɔkamɔ ko ni jara wa​—wɔsɛɛ be ni bɛ naagbee yɛ shikpɔŋ hee ko ni Nyɔŋmɔ maŋtsɛyeli nɔyeli lɛ eha efee fɛo tamɔ paradeiso lɛ nɔ! Susumɔ he, ni eshafeemɔ tsui mli akɔnɔi lɛ yeee wɔnɔ dɔŋŋ. Kɛfata he lɛ, je lɛŋ shihilɛi lɛ tsɔɔ akɛ wɔbote naagbee gbii lɛ amli vii ni akɛ etsɛŋ kwraa ni hiɛnɔkamɔ nɛɛ baafee nɔ ni yɔɔ diɛŋtsɛ. Akɛ ooobɔ mɔdɛŋ ni onine ashɛ hiɛnɔkamɔ nɛɛ nɔ lɛ sa nakai diɛŋtsɛ!​—Mateo 24:​7-14, 34; 2 Timoteo 3:​1-5; 2 Petro 3:​13; Luka 23:​43; Kpojiemɔ 21:​3, 4.

Esa akɛ anɔkwale ni eji akɛ Yehowa kɛ wɔsɛɛ be ni yɔɔ nyam ema wɔhiɛ ni eewo wɔ hewalɛ ni wɔnine ashɛ nɔ lɛ agbala wɔ kɛbɛŋkɛ lɛ gbagbalii. Wekukpaa nɛɛ ni mɔ kɛ lɛ naa lɛ po ji nyɔmɔwoo babaoo. Obalayoo ni atsɔ hiɛ atsi eta lɛ kɛɛ yɛ beni ehe ewa lɛ lɛ sɛɛ akɛ: ‘Minuɔ he tamɔ nɔ ni Yehowa ji mi-Tsɛ ekoŋŋ.’ Wekukpaa ni mli wa ni akɛ Yehowa naa kɛ henilee ni mli tse, mligbɛ toiŋjɔlɛ kɛ mɔ diɛŋtsɛ he ni ebuɔ baa. Yɛ fɛɛ sɛɛ lɛ, kɛ́ okpale kɛba Yehowa kɛ egbɛjianɔtoo lɛ mli ekoŋŋ lɛ, obaana anɔkwale naanyobɔɔ mli ŋɔɔmɔ ekoŋŋ.

Yɛ anɔkwale mli lɛ, ejeee nɔ ni yɔɔ mlɛo akɛ aaatsake tsui lɛ. Shi, Yehowa baajɔɔ omɔdɛŋbɔɔi lɛ anɔ. Emumɔ lɛ baaye abua bo ni ‘ohe awa kpintiŋŋ yɛ omli gbɛ gbɔmɔ lɛ gbɛfaŋ.’ (Efesobii 3:16) Obaana akɛ yɛ be mli ni okãa he yɛ sɔlemɔ kɛ mumɔŋ nikasemɔi amli, ni okɛ Yehowa Odasefoi bɔɔ ni otsɔseɔ otsui lɛ, ebaaha mpleshii lɛ afee nɔ ni waaa tsɔ. Tsui lɛ baaje shishi ashwe nibii kpakpai. Ebaasumɔ ni eku esɛɛ kɛba Yehowa ŋɔɔ.

Yehowa kɛɛ: “Kaashe gbeyei, shi mi, mikɛo yɔɔ! Kaakwɛkwɛɛ ohe, shi miji o-Nyɔŋmɔ lɛ! Mawajeo, ni maye mabuao.” (Yesaia 41:10) Enɛ ji nɔ ni Yehowa baafee aha mɛi ni sumɔɔ lɛ diɛŋtsɛ lɛ. Kɛji akɛ óshi anɔkwale lɛ shi otsui tsirɛɔ bo ni ofee nɔ ni ja lɛ, no lɛ Nyɔŋmɔ ‘baaye abua bo diɛŋtsɛ’ kɛtsɔ emumɔ krɔŋkrɔŋ lɛ nɔ kɛ agbɛnɛ kɛtsɔ aŋkroaŋkroi ni akɛ gbɛnaa nii ewo amɛdɛŋ yɛ Kristofoi asafo lɛ mli lɛ anɔ. Yɛ enɛ hewɔ lɛ, onukpai ni ahala amɛ lɛ yɛ he miishɛɛ akɛ amɛkɛ yelikɛbuamɔ ni jɛ mumɔŋ aaaha. (1 Tesalonikabii 5:​12; Hebribii 13:⁠7) Ŋɔɔ hegbɛ ni amɛsuɔmɔ yelikɛbuamɔ lɛ kɛbaaha bo lɛ. Mɛni hewɔ eyataooo amrɔ nɛɛ nɔŋŋ?