Yehowa Ji, Wɔhiɛnɔkamɔ Kɛha Gbɛjianɔtoo Hee Ko Mlibotemɔ
1. Mɛni hewɔ mɛi pii bɛ hiɛnɔkamɔ ko kwraa akɛ gbɛjianɔtoo hee ko aaanyɛ aba lɛ?
1 NAMƆ sumɔŋ ni ana nibii agbɛjianɔtoo hee ko yɛ shikpɔŋ nɛɛ nɔ? Mɛi pii baasumɔ ni ana jalɛ nibii agbɛjianɔtoo ni hi fe nɔni yɔɔ nɛɛ, shi amrɔ nɛɛ amɛbɛ hiɛnɔkamɔ kpakpa ko akɛ nɔko ni tamɔ nakai aaanyɛ aba. Adesa shihilɛ ni mli woɔ wu lɛ haaa ana nɔko ni adamɔ ni hiɛ akã nɔ akɛ nibii baahi. Gbɔmɛi ahiɛnɔkamɔ elaaje ejaakɛ ahako amɛle anɔkwa hiɛnɔkamɔ ko ni amɛbaanyɛ amɛkɛ amɛhe afɔ̃ nɔ. Amɛleko lolo akɛ nɛkɛ gbɛjianɔtoo ni ataoɔ nɛɛ ji nɔko ni mɔko ni yɔɔ hesaa lɛ ewo shi akɛ ekɛbaaba, ni amɛleko hu akɛ eshwɛ fioo kɛkɛ ni enɛ baaba. Mɔni he saa ni wɔtsɔ hiɛ wɔwie ehe lɛ nɔ wɔhiɛ kã. Lɛ ji mɛi fɛɛ ni kɛ tsui krɔŋŋ shweɔ akɛ amɛ aaabote jalɛ gbɛjianɔtoo hee ko mli lɛ a-Hiɛnɔkamɔ.
2. Taakɛ Yeremia Wolo 14: 8, 9 tsɔɔ lɛ, mɛni Yehowa ji eha Israel maŋ lɛ; shi ebafee tamɔ nɔni mɛni moŋ yaa nɔ?
2 Amrɔ nɛɛ, yɛ jeŋ fɛɛ awerɛhoo shihilɛ ni mli woɔ wu nɛɛ mli esa jogbaŋŋ akɛ wɔkpaleɔ kɛyaa Hiɛnɔkamɔ kometoo ni wɔyɔɔ lɛ ŋɔɔ taakɛ gbalɔ Yeremia fee beni nibii amli ehiii haaa lɛdiɛŋtsɛ emaŋ lɛ. Yeremia kɛɛ yɛ ebolɔmɔ kɛha yelikɛbuamɔ lɛ mli akɛ: “Bo Israel hiɛnɔkamɔ, eyiwalaherelɔ yɛ fimɔ be mli, mɛɛba otsɔ tamɔ gbɔ yɛ shikpɔŋ lɛ nɔ, loo tamɔ gbɛnyiɛlɔ ni egba kɛba ebato shi nyɔɔŋ nɛɛ? Mɛɛba otsɔ tamɔ nuu ni he ejɔ̃ ehe; loo tamɔ ekaalɔ ni nyɛɛɛ mɔ yiwala ahere nɛɛ? Tsɛ oyɛ wɔteŋ nɔŋŋ, Yehowa, ni ogbɛi akɛtsɛɔ wɔ; kaakwa wɔ.”—Yer. 14:8, 9.
3. Taakɛ Yeremia Wolo 14:22 tsɔɔ lɛ, mɛni hewɔ jwɛŋmɔ yɔɔ mli jogbaŋŋ akɛ wɔɔya Yehowa ŋɔɔ akɛ Hiɛnɔkamɔ kome pɛ ni wɔyɔɔ?
3 Yiŋtoo kpakpa yɛ ni tsɔɔ akɛ esani wɔ hu wɔkɛ nɛkɛ Nyɔŋmɔ nɛɛ afee wɔ-Hiɛnɔkamɔ ŋmɛnɛ. Mɛni hewɔ lɛ moŋ, shi jeee mɔkroko eloo nɔkroko? Nɔhewɔ ji akɛ lɛ ji Bɔlɔ, ni eyɛ hewalɛ yɛ nibɔɔ mli hewalɛ ni tsuɔ nii kɛ nitsumɔi ni yaa nɔ yɛ shikpɔŋ nɛɛ nɔ kɛ ehewɔŋ fɛɛ lɛ anɔ. Taakɛ Yeremia ha ana beni ekɛ Nyɔŋmɔ wie lɛ, ekɛɛ: “Ani wɔŋjalɔi lɛ ayakayakawɔji lɛ eko yɛ ni nyɛɔ haa nyɔŋmɔ nɛɔ? Aloo ŋwɛi [nɔ̃ nɔ ni ŋulamiiaŋkwɛlɔi kɛ amɛhe fɔ̃ɔ lɛ] aaanyɛ aha nu atue? Ani jeee bo, Yehowa, wɔ-Nyɔŋmɔ lɛ, nɔŋŋ ni? Nohewɔ lɛ bo gbɛ wɔkwɛɔ; ejaakɛ bo ofeɔ enɛɛmɛi fɛɛ.”—Yer. 14:22.
4. Akɛni akɛ Nyɔŋmɔ gbɛi tsɛ Israel maŋ Iɛ hewɔ lɛ, te nibii fee amɛha tɛɛŋ ni ha ni Yeremia bi saji babaoo lɛ?
4 Akɛ Nyɔŋmɔ diɛŋtsɛ gbɛi tsɛ́ blema Israelbii lɛ, ni nohewɔ lɛ esani wɔsusu akɛ ekɛ amɛ aaahi shi. Belɛ mɛɛba mɔ ni ebatsɔ tamɔ mɔko ni nyɛŋ afee ‘Israel hiɛnɔkamɔ’ shi moŋ etsɔ tamɔ gbɔ yɛ shikpɔŋ lɛ nɔ aloo gbɛnyiɛlɔ ko ni miiho yɛ shikpɔŋ lɛ nɔ kɛkɛ, ni ŋmɛnɛ ebato shi ni wɔ́ kɛkɛ lɛ etee lɛ? Mɛni hewɔ etsɔ tamɔ nuu ko ni he ejɔ̃ ehe yɛ naagba ni ekɛkpe lɛ hewɔ ni enyɛɛɛ he nɔko efee lɛ? Aloo tamɔ ekaalɔ moŋ nɛ, shi enyɛɛɛ eye ebua gbɔmɛi ni esa akɛ ahere amɛ kɛjɛ nibii ni ejɛ gbɛ ni amɛdiɛŋtsɛ amɛkɔ lɛ mli kɛba lɛ amli lɛ? Mɛni Yehowa kɛɛ Yeremia akɛ no hewɔ ni ebalɛ nakai lɛ?
5. Mɛɛ yiŋtoi Yehowa ha akɛ nomɛi ahewɔ efee tamɔ nɔni ekwa Israel lɛ; ni mɛni hewɔ ekɛ mɔdiŋ kɛ kootsɛ niiahekɛtoo lɛ wo sane nɛɛ mli lɛ?
5 Nɔni Israelbii anaagba lɛ jɛ lɛ jeee hiɛaŋhiɛaŋnii. Amɛhiɛ ni amɛku amɛshwie kpaŋmɔ ni amɛkɛ Nyɔŋmɔnɛlɔ Yehowa efee lɛ nɔ kɛ egbɛi lɛ he guɔ ni amɛgbeɔ kɛ jeŋmaji wɔŋjalɔi Iɛ ajamɔ ni amɛkɛfutuɔ jamɔ krɔŋŋ mli lɛ fɛɛ éhé shi waa. Belɛ ebɛ naakpɛɛ mɔ akɛ akɛɛ amɛ akɛ: “Ani mɔdiŋ [Kushnyo, Etiopianyo aloo Nubianyo] aaanyɛ ehewolo atsake, aloo kootsɛ aaanyɛ ehe ŋwataŋwata lɛ atsake? No lɛ nyɛ hu nyɛ aaanyɛ ekpakpa nyɛfee, nyɛ mɛi ni efɔŋfeemɔ eka nyɛnɔ lɛ. Nohewɔ lɛ magbɛ amɛ mashwã tamɔ tutuu ani ŋanɔ kɔɔyɔɔ loɔ kɛyaa. Enɛ ji ogbɛnaa ni obaana, ogbɛfaŋnɔ ni misusu mihao, Yehowa kɛɛ; ejaakɛ ohiɛ ekpa minɔ, ni oŋɔ ohiɛ ofɔ̃ amale nɔ. . . . Mina onihiinii kɛ ogbalafitemɔ kɛ onyenyeŋtswibɔɔ kɛ ojwamaŋbɔɔ ni yɔɔ nyaŋemɔ lɛ, yɛ ŋanɔ gɔŋkpɔi lɛ anɔ. Kpoo hao, Yerusalem! Atsuuŋ ohe; mɛɛ beyinɔ nɔŋŋ ebaakã he kɛyashi?”—Yer. 13:23-27.
6. Te anɔkwasaji ni ajaje lɛ tsɔɔ akɛ Yehowa kɛ Israel kɛ agbɛnɛ hu Kristendom ateŋ yɔɔ eha tɛɛŋ?
6 Ani nɛkɛ jajemɔ nɛɛ tsɔɔ akɛ Yehowa kɛ Israel yɛ sane ko? Ani etsɔɔ hu akɛ ekɛ Kristendom ni kɛɔ akɛ eji Biblia Krɔŋkrɔŋ Nyɔŋmɔ lɛ webii lɛ hu yɛ sane? Hɛɛ! Nohewɔ lɛ ekɛɛ ebaaye sane lɛ kɛgbe naa, ejaakɛ lɛ ji Jalɛsaneyelɔ Ofe lɛ.
7. Yɛ Yeremia Wolo 17:1-4 kɛ gbeekpamɔ naa lɛ, te Kristendom Nyɔŋmɔkwamɔ kɛ jeŋbii anifeemɔ lɛ ehe shi eha tɛɛŋ; ni mɛni baajɛ enɛ mli aba?
7 Akɛni Kristendom tsɛɔ ehe Kristofonyo hewɔ lɛ, esani eto okadi kpakpa eha je lɛ fɛɛ. Shi eha aŋma ehe sane moŋ afɔ̃ shi akɛ Nyɔŋmɔkwalɔ kpanaa ni jeŋbii anifeemɔ eka ehe. Nɔni ale yɛ ehe lɛ tamɔ nɔni ahe yɛ blema Yerusalem kɛ Yuda shikpɔŋ lɛ ahe lɛ nɔŋŋ, akɛ:
“Yuda he esha lɛ aŋma kɛ dade pɛŋ kɛ diamente naa piopio, akpɛ yɛ amɛtsuiiaŋ taao lɛ nɔ kɛ nyɛfɔleshaalatɛ [ni ji apasa jamɔ afɔleshaalatɛ] lɛ aklontoi lɛ anɔ, bɔni amɛbii lɛ kaiɔ amɛfɔleshaalatɛi lɛ kɛ amɛ [amagajamɔ] akrabatsai lɛ yɛ tsei kusukusui lɛ ashishi yɛ gɔŋkpɔi grɔŋŋi lɛ anɔ lɛ. Migɔŋ ni yɔɔ ŋanɔ, maŋɔ onii kɛ ojwetrii lɛ fɛɛ kɛ ohei grɔŋŋi lɛ maha [mikojomɔ he blafoi] ni ahà, yɛ esha ni ofee yɛ okpokpai fɛɛ nɔ lɛ hewɔ. Ni bodiɛŋtsɛ oooŋmɛɛ onɔyelinɔ ni miŋɔhao [yɛ Shiwoo Shikpɔŋ lɛ nɔ] lɛ he ofɔ̃ shi, ni maha osɔmɔ ohenyɛlɔi yɛ shikpɔŋ ko ni oleee [ni ji Babilon lɛ] nɔ; ejaakɛ nyɛshɛre la yɛ mimlifu lɛ mli, ni eeetso kɛaatee naanɔ.”—Yer. 17:1-4.
AKPAŊ FAI AHAŊ KRISTENDOM OSATOFONYO LƐ
8, 9. Eyɛ mli akɛ Kristendom tere Kristo gbɛi lɛ moŋ, shi mɛni hewɔ Kristo nyɛŋ akpa fai abale tamɔ bɔni eji yɛ blema Israel gbɛfaŋ lɛ?
8 Kristendom kɛ Kristo gbɛi lɛ ekpɛtɛ ehe kɛmiifo shi. Shi ani Kristo baakpa fai eha Nyɔŋmɔjamɔ gbɛjianɔtoo ko ni ekã he ekɛ wɔŋjamɔ efutu Biblia mli tsɔɔmɔi fe afii ohai 16 sɔŋŋ nɛ lɛ? Efeŋ nakai kɔkɔɔkɔ, ejaakɛ ekɛ e-Ŋwɛi Tsɛ Yehowa Nyɔŋmɔ kpaa gbee kɛwulaa shi. Kristo kɛɛ: “Midiɛŋtsɛ minyɛŋ miyiŋ mato mafee nɔko; bɔni minuɔ lɛ, nakai mikojoɔ, ni mikojomɔ lɛ jalɛ kojomɔ ni, ejaakɛ mitaooo nɔni midiɛŋtsɛ misumɔɔ, shi moŋ nɔni Tsɛ lɛ ni tsumi lɛ sumɔɔ.” (Yoh. 5:30) Afii ohai ekpaa dani Kristo aaaba, yɛ Yeremia gbii anɔ lɛ, Yehowa kɛɛ enɛ yɛ nɔni fee Kristendom he mfoniri lɛ he akɛ:
9 “Kɛ́ Mose kɛ Samuel damɔ mihiɛ tete po lɛ, mitsui bɛ nɛkɛ maŋ [Israel] nɛɛ he; shwiemɔ amɛ kɛjɛ mihiɛ, ni amɛya.”—Yer. 15:1.
10. Kulɛ mɛni hewɔ eeenyɛ ebalɛ akɛ Nyɔŋmɔ aaabu fai ni Mose kɛ Samuel aaakpa lɛ akɛ nɔni baanyɛ atsu nɔko lɛ; shi amrɔ nɛɛ mɛni ji Yehowa subaŋ yɛ Israel ni tsakeee etsui lɛ he?
10 Mose, mɔni atsɔ enɔ akɛ Kitai Nyɔŋmɔ lɛ ha Israel lɛ nyɛ́ ekpa fai eha amɛ. Agbɛnɛ hu Samuel ni hi shi yɛ enɛ sɛɛ aaafee afii ohai ejwɛ lɛ je gbalɔi aseshi ko ni Yeremia fata he ni tsa nɔ aahu kɛyashi gbalɔ Maleaki nɔ, lɛ shishi. (Bɔf. 3:22-24) Samuel hu kpa fai eha Israel maŋ lɛ, titri beni amɛbi ni aha amɛ maŋtsɛ ni ji adesa lɛ. Shi agbɛnɛ yɛ enɛ sɛɛ fe afii ohai ejwɛ nɛɛ, kɛji Samuel jio Mose jio, aaakpa fai kwraa, Yehowa efoŋ mli kpɛ. Nohewɔ lɛ esani ajie nakai Israel ni tsakeee etsui lɛ kɛya!
11. Israelbii ni tsakee amɛtsui lɛ aaaje Yehowa hiɛ kɛya ni amɛkɛ mɛɛ nibii ni gbeɔ mɔ ayakpe?
11 Ajielɛ kɛya nɛgbɛ?—enɛ ji sane ko ni mɔni musuŋ shãalɛ ehaa Kristendom lɛ baasumɔ ni ebi. Agba heni abaajielɛ kɛya lɛ he sane ato yɛ nɔni Yehowa kɛɛ Yeremia lɛ mli, akɛ: “Ni aaaba mli akɛ kɛ́ amɛkɛɛo akɛ: Nɛgbɛ wɔyaa? lɛ, okɛɛ amɛ akɛ: Bɔni Yehowa kɛɛ nɛ: Mɔni sa gbele lɛ, aya gbele mli; mɔni sa klante lɛ, aya klante mli, ni mɔni sa hɔmɔ lɛ, aya hɔmɔ mli ni mɔni sa nomŋɔɔ lɛ, aya nomŋɔɔ mli! Ni maha nibii [aloo henɔi] sɔrɔtoi ejwɛ aba amɛnɔ, Yehowa kɛɛ [1] Klante ni akɛ aaagbe amɛ, kɛ [2] gbeei ni aaashata amɛ kɛ [3] ŋwɛi loofɔji kɛ [4] shikpɔŋ nɔ kooloi ni aaaye amɛ ni amɛkpata amɛhiɛ. Ni maha agbɛ amɛ ashwã shikpɔŋ lɛ nɔ maŋtsɛyelihei lɛ fɛɛ yɛ Manase, Hezekia bi, ni ji Yuda maŋtsɛ lɛ, kɛ nibii ni efee yɛ Yerusalem lɛ ahewɔ. Ejaakɛ namɔ aaanao mɔbɔ, Yerusalem? Ni namɔ aaayeo ŋkɔmɔ? Ni namɔ aaagba ababi ohejɔlɛ shi? Oshɛ mi ofɔ̃, Yehowa kɛɛ, oku osɛɛ [kɛjɛ miŋɔɔ] kɛtee sɛɛsɛɛ.”—Yer. 15:2-6; kɛ 16:4 hu.
12. Mɛɛbe awie nibii ni tamɔ nakai ni gbeɔ mɔ lɛ ahe yɛ klɛŋklɛŋ afii oha lɛ mli Yerusalem kɛ ŋmɛnɛbeaŋ nibii agbɛjianɔtoo lɛ he; ni namɔ wie nakai nibii lɛ ahe lɛ?
12 Gbele (aloo gbelehela) , klante (aloo ta) , hɔmɔ (aloo niyenii ni aaatã) kɛ nomŋɔɔ! Nɛkɛ wiemɔi ni awie atsɔɔ Yeremia yɛ Yerusalem he yɛ enaagbee be mli (afi 647-607 D.Ŋ.B.) yɛ Yeremia gbii anɔ lɛ ji wiemɔi ni Yesu Kristo hu wie yɛ egbalɛ ni kɔɔ wɔ-Ŋmɛnɛŋmɛnɛ Beaŋ klɛŋklɛŋ afii oha lɛ mli Yerusalem naagbee be lɛ he lɛ mli. (Mat. 24:3-7, 21, 22; Luka 21:10, 11, 20-24) Agbɛnɛ hu yɛ egbalɛ ni yɔɔ Biblia mli naagbee wolo lɛ mli lɛ, atsɔ mfonirifeemɔi ni ekomɛi ji ŋanɔ kooloi, lɛ anɔ agbala wɔjwɛŋmɔ kɛba enɛɛmɛi nɔŋŋ anɔ. (Kpoj. 6:1-8) Nakai naagbee gbalɛ lɛ haa nakai oshra ni agba ato lɛ mlibaa tekeɔ afi 96 Ŋ.B. beni aŋma Kpojiemɔ lɛ, kɛbayiɔ wɔdiɛŋtsɛ wɔbe nɛɛ mli “naagbee be” ni je shishi kɛjɛ afi 1914 Ŋ.B. nɔ kɛbaa nɛɛ mli tɔ̃ɔ. (Dan. 12:4) Nohewɔ lɛ gbalɛ lɛ naagbee mlibaa lɛ kɔɔ ŋmɛnɛbeaŋ nibii agbɛjianɔtoo ni alomɔlɛ ni Kristendom ni ekwa Nyɔŋmɔ lɛ hu fata he lɛ he.
13. Kɛjɛ mɛɛbe wɔna nibii ni tamɔ nakai lɛ babaoo kɛteke nɔ?
13 Ani esa akɛ wɔteŋ mɔko aŋamɔ ehiŋmɛii koni ekana akɛ kɛjɛ Jeŋmaji Abei Iɛ naagbee yɛ afi 1914 mli kɛbaa nɛɛ, wɔna ta (klante) , hɔmɔ, gbelehela kɛ shikpɔŋhosomɔi hu babaoo? Ébalɛ taakɛ agba ato lɛ pɛpɛɛpɛ, tamɔ bɔni eba mli yɛ Yeremia gbii lɛ anɔ Yerusalem kɛ Yesu bɔfoi lɛ agbii anɔ Yerusalem hu gbɛfaŋ lɛ.
14. Mɛni hewɔ Kristendom he ejeko nakai nibii ni kɛ oshra baa lɛ anámɔ mli lɛ?
14 Kristendom ni ji ŋmɛnɛbeaŋ nii ni damɔ shi kɛha Yerusalem kɛ Yuda ni kwa Nyɔŋmɔ lɛ he ejeko nibii ni kɛ oshra baaba nɛɛ amli. Esɔfoi lɛ asɔlemɔi nyɛɛɛ atsu nɔko ahalɛ. Nɔhewɔ ni ebalɛ nakai lɛ tamɔ nɔni ha nɔko tamɔ nakai nɔŋŋ ba yɛ Yeremia gbii lɛ anɔ Israelbii agbɛfaŋ lɛ pɛpɛɛpɛ: “Mijie mihejɔlɛ lɛ kɛ mlihilɛ kɛ musuŋtsɔlɛ lɛ kɛjɛ nɛkɛ maŋ nɛɛ nɔ, Yehowa kɛɛ. Ejaakɛ bɔni Yehowa Zebaot, Israel Nyɔŋmɔ lɛ, kɛɛ nɛ: Naa, maha nyamɔ kɛ miishɛɛ gbee kɛ ayemforowu kɛ ayemforo gbee sɛɛ afo yɛ biɛ nɛɛ, yɛ nyɛhiɛ kɛ nyɛyinɔ nɛɛ.”—Yer. 16:5, 9.
AKWƐ HEJƆLƐ GBƐ YAKATSWAA!
15. Mɛni gbɛ akwɛ aha Israel yɛ Yeremia gbii lɛ anɔ; ni mɛni nɔ mi gbalɔi krokomɛi lɛ ma amɛha Israelbii lɛ?
15 Yɛ Kristendom gbɛfaŋ yɛ nɛkɛ “naagbee be” nɛɛ mli lɛ, esane lɛ efee tamɔ bɔni Israelbii lɛ anɔ̃ ji yɛ gbii anɔ ni Yeremia jaje Yehowa kojomɔ sane lɛ etsɔɔ amɛ lɛ: “Wɔkwɛ hejɔlɛ gbɛ, shi nɔkpakpa ko baaa, kɛ tsamɔ be hu, shi naa, gbeyei sɔŋŋ!” (Yer. 14:19) Kɛlɛ Kristendom osɔfoi lɛ yaa nɔ amɛkuɔ nɔni Yeremia kuu ni ji “tsulɔ anɔkwafo kɛ nilelɔ” kuu lɛ jajeɔ amɛkɛbɔɔ gbɔmɛi kɔkɔ lɛ naa. Nɛkɛ Yehowa Odasefoi ni afɔ amɛ mu nɛɛ kɛ sane ni Yeremia kɛkpe ni etsɔɔ bɔni eyɔɔ lɛ nɔŋŋ eko kpeɔ; ni Yeremia kɛɛ: “Ei, Nuntsɔ Yehowa! Naa, gbalɔi lɛ kɛɔ amɛ akɛ: Nyɛnaŋ klante [yɛ Yehowa blafo lɛ dɛŋ], ni hɔmɔ hu yeŋ nyɛ, shi moŋ maha nyɛ hejɔlɛ lɛɛlɛŋ yɛ biɛ nɛɛ.”—Yer. 14:13; Mat. 24:45-47.
16. Mɛni osɔfoi lɛ kɛɔ ni mɛni amɛfeɔ ni haaa ni Kristendom sɔlemɔi amlibii lɛ abo kɔkɔ ni Yehowa Odasefoi bɔɔ lɛ toi lɛ?
16 Aagba akɛ efeŋ akɛ Nyɔŋmɔ kɛ hiɛkpatamɔ ko baaba beni afee ni akɛjɔɔ gbɔmɛi lɛ agbeyeishemɔi ahe. Enɛ eha Kristendom sɔlemɔi amlibii lɛ ena hiɛnɔkamɔi ni baafee efolo wɔsɛɛ lɛ amɛwo amɛmiinaa. Ehaa amɛhiɛ jeɔ amɛhe nɔ yɛ “amanehulu kpeteŋkpele” ni baaba trukaa lɛ gbɛfaŋ. Nohewɔ lɛ ebaaba amɛnɔ trukaa tamɔ julɔ baa, ni nii aaaŋmɛɛ amɛ kɛaatee naanɔ. Yeremia kuu lɛ he guɔ ni osɔfoi lɛ gbeɔ kɛ amɛsane lɛ hiɛ shi ni amɛshwieɔ lɛ haaa sɔlemɔi lɛ amlibii hejɔfeelɔi lɛ abo kɔkɔ ni Yehowa tsɔɔ edasefoi lɛ anɔ ebɔɔ lɛ toi.
17, 18. (a) Yɛ Kristendom osɔfoi ahewɔ lɛ, mɛni ebatsɔ tamɔ hela fɔŋ ko ni ehiii tsamɔ yɛ Yeremia kuu lɛ he? (b) Mɛɛ subaŋ ebalɛ akɛ Yeremia kuu lɛ ana yɛ amɛkɛ osɔfoi lɛ ateŋ naanyobɔɔ gbagbalii gbɛfaŋ?
17 Beni afee ni nɔmimaa ni Nyɔŋmɔjamɔŋ hiɛnyiɛlɔi lɛ eha mɛi ena akɛ hejɔlɛ yɛ lɛ aka mɛi ajwɛŋmɔ mli waa hewɔ lɛ, amɛwaa Yeremia kuu kɛ amɛsɛɛfilɔi lɛ ayi. Amɛtsirɛɔ maŋkwramɔŋ hegbɛi lɛ ayisɛɛ amɛwoɔ Yeremia kuu lɛ. Yiwaa kɛ hiɛshishwiemɔ ni Yeremia kuu lɛ yaa nɔ amɛdamɔɔ naa lɛ ebatsɔ tamɔ nii ni eka amɛhe, tamɔ hela ko ni Yehowa eŋmɛ gbɛ ni eba amɛnɔ ni ehiii tsamɔ, tamɔ nɔni eegbe amɛhe guɔ. Amɛnyɛŋ amɛ ŋmɛɛ amɛhe amɛha osɔfoi akuu lɛ ni amɛtsɔmɔ osɔfoi nɛɛ ahegbɔmɛi. Yehowa ji Mɔ pɛ ni amɛkɛ amɛsane lɛ baafɔ̃ ehiɛ koni eye eha amɛ, ni amɛnyaa yɛ eduromɔ lɛ mli, taakɛ Yeremia kɛɛ lɛ:
18 “Bo, Yehowa, ole! Kaimɔ mi ni osara mi, ni otɔ mihe owele yɛ mɛi ni waami yi lɛ anɔ; okɛ otsui shi ni oŋmɛɔ ohaa amɛ lɛ akaŋɔ mi kɛmiiya; ná ole akɛ ohewɔ minaà ahorabɔɔ! Kɛ́ mina owiemɔi lɛ miyeɔ; owiemɔi lɛ ji mimiishɛɛ kɛ mitsui mlifilimɔ; ejaakɛ aŋɔ ogbɛi awo mi, Yehowa, Zebaot Nyɔŋmɔ. Mitaaa fɛoyelɔi agwabɔɔ mli [yɛ fɛoyelɔi ni susuɔ akɛ hejɔlɛ baaba bɔfɛɛbɔ ni fee lɛ amasɛi] mimli efiiii mi; onine hewɔ lɛ mikometoo mitaaa shi; ejaakɛ owo mi obɔ kɛ mlila [awerɛhooyeli, LXX; ŋkɔmɔyeli, JP].”—Yer. 15:15-17; kwɛmɔ NW; Septuagint Version, nɔni Bagster fee lɛ, kɛ nɔni Charles Thomson fee lɛ amli; kɛ The Jewish Publication Society of America shishitsɔɔmɔ ni afee yɛ afi 1973 lɛ mli hu.
19. Yɛ Yeremia kuu lɛ yi ni awaa fɛɛ sɛɛ lɛ, mɛni hewɔ mɛi ni awaa amɛ yi lɛ aaanyɛ ana miishɛɛ ni amɛshwã lɛ?
19 Yiwaa ni ekpɛtɛ Yeremia kuu lɛ he gbagbalii hela ko ni ehiii tsamɔ ni enɛ jeee nɔko ni yɔɔ miishɛɛ. (Yer. 15:18) Shi mɛi ni awaa amɛyi lɛ baanyɛ ana miishɛɛ yɛ Yehowa Wiemɔ ni ji Ŋmalɛi Krɔŋkrɔŋi ni abaa yi kɛha wɔmiishɛjemɔ lɛ amli. (Rom. 15:4) ”Wɔbaanyɛ wɔna miishɛɛ ejaakɛ gbalɛ wiemɔi ni tsɔɔ jaramɔ bei nɛɛ ashishi ni amɛhaa wɔnaa hiɛnɔkamɔ kpakpa ko kɛhaa gbɛjianɔtoo hee ko ni baaba yɛ Harmagedon sɛɛ, lɛ yɛ nakai Ŋmalɛi lɛ amli. Yɛ enɛ hewɔ lɛ wɔbaanyɛ wɔshwã yɛ Yehowa mli.—Yer. 9:23, 24.
20, 21. (a) Mɛni hewɔ ŋmɛnɛ adesa tsui “eyi tɔ kɛ kutumpɔo” ni “esane ehiii kwraa” lɛ? (b) Taakɛ Yeremia Wolo 17:5-8 tsɔɔ lɛ, mɛɛ gbɛ nɔ kɛji mɔ fee enii yɛ ni ebaana Nyɔŋmɔ loomɔ; ni te nɔni baaha mɔ ana ejɔɔmɔ hu?
20 Yɛ nɛkɛ “nibii agbɛjianɔtoo nɛɛ naagbee,” be mli ni mlakwamɔ faa ni Yehowa hu miimɛ ni be ashɛ koni ekojo efɔŋfeemɔ ni egbɛ eshwã babaoo nɛɛ, adesa tsui kã he “eyi tɔ kɛ kutumpɔo” ni “esane ehiii kwraa,” yɛ be mli ni adesai ahe jaraa amɛ lɛ. Kɛji wɔka akɛ wɔɔɔfee tsui lɛ suɔmɔnaanii wɔhala yɛ gbɛ̀i ni kɛ Nyɔŋmɔ ŋaawoo kɛ jalɛ he tɛi ni efolɔ lɛ kpaaa gbee anɔ lɛ, ebaaha Nyɔŋmɔ kojomɔ ni naa wa aba wɔ nɔ. (Yer. 17:9-11) Yɛ ŋmɛnɛbeaŋ hewalɛi ni nyɛɔ wɔ nɔ akɛ wɔfee nɔko ni ejaaa lɛ anaa nɛɛ, nyɛkahaa wɔŋmɛa gbɛ ni wɔtsuii lakaa wɔ ni amɛhaa wɔfea nibii ni kɛ ŋmalɛi kpaaa gbee. Kaimɔ akɛ: nɔni wɔɔɔfee lɛ baatsɔɔ kɛji wɔsa loomɔ aloo jɔɔmɔ. Yehowa etsɔɔ gbɛ ni baaha wɔna loomɔ kɛ gbɛ ni baaha wɔna jɔɔmɔ lɛ, ni ekɛɛ:
21 “Alomɔ gbɔmɔ ni ŋɔɔ ehiɛ efɔ̃ɔ adesa nɔ, ni eŋɔɔ heloo efeɔ enine, ni etsui eje Yehowa he lɛ. Eeetamɔ tso ni baai bɛ yi yɛ ŋa kpataa nɔ, ni enaŋ ekpakpa ko ni aaaba; shi eeehi shi yɛ ŋanɔ hei ni egbi keketee kɛ ŋoo shikpɔŋ nɔ heni ahiii. Ajɔɔ gbɔmɔ ni ŋɔɔ ehiɛ efɔ̃ɔ Yehowa nɔ, ni Yehowa ji ehiɛnɔkamɔ lɛ. Ejaakɛ eeetamɔ tso ni atɛo yɛ nui ahe ni lɛɔ eshishifai amli kɛyaa faai atoi; ni kɛ́ latsaa ba lɛ, esheŋ gbeyei, shi eyibaai lɛ aaahi frɔfrɔ; nuhɔmɔ afi mli hu ehaoŋ, ni asaŋ efɔ̃ŋ yibiiwoo.”—Yer. 17:5-8.
22. Mɛɛ gbɛ nɔ Yeremia gbii lɛ anɔ Israelbii lɛ tsɔɔ yɛ akɛ amɛkɛ ‘heloo efee amɛnine’ lɛ?
22 Efɔɔ kaa akɛ mɛi ni yɔɔ gbɔmɔtsoŋ hewalɛ lɛ sumɔɔ akɛ amɛkɛ amɛhe afɔ̃ heloo nine ko nɔ akɛ ehere amɛyiwala. Belɛ ebɛ naakpɛɛ mɔ akɛ amɛtsɔɔ tamɔ tso ganee ko ni yɔɔ ŋoo shikpɔŋ ni egbi keketee nɔ. Amɛfeɔ nɔni Yeremia gbii lɛ anɔ Israelbii fee lɛ eko, akɛ: Kɛji amɛhenyɛlɔi ni huɔ tamɔ jatai lɛ wo Israelbii nɛɛ ahe gbeyei lɛ, amɛkpaaa Nuntsɔ Maŋtsɛ Yehowa fai koni eye ebua amɛ. Amɛyabi yelikɛbuamɔ kɛjɛ adesai kakalɔi ni le tawuu mli lɛ adɛŋ koni amɛbafata amɛhe kɛwuu ta. Nohewɔ lɛ amɛtsiii amɛbɛŋkɛɛɛ Yehowa ni amɛbanu yiwalaheremɔ nu kɛjɛ edɛŋ akɛ kpɔmɔ Jɛɛhe. Amɛjo foi kɛtee Mizraim moŋ koni amɛyanu yiwalaheremɔ nu kɛjɛ Nilo Faa lɛ mli. Beikomɛi hu amɛjo foi kɛtee Ashur koni amɛyanu yiwalaheremɔ nu kɛjɛ Efrata Faa ni be ko lɛ Ashur ji mɔni yɔɔ nɔ hewalɛ, lɛ mli.
23. Mɛɛ gbɛ nɔ Israelbii lɛ ‘kpɛkpɛɛ nubui ni nyɛɛɛ nu ato’ amɛha amɛhe yɛ; ni mɛni jɛ mli ba?
23 Yɛ nakai gbɛ nɔ lɛ Israelbii ni bɛ hemɔkɛyeli lɛ “yakpɛ́kpɛɛ bui ni ejwara ni nyɛɛɛ nu ato amɛha amɛhe” yɛ mfonirifeemɔ gbɛ nɔ. Amɛkwa Yehowa ni ji “wala nubu” lɛ. Nohewɔ lɛ yiwalaheremɔ ko jɛɛɛ eŋɔɔ kɛbaaa amɛnɔ. Mizraim kɛ Ashur jeŋ hewalɛi ni he wa waa lɛ bɔ emɛ abolo ejaakɛ amɛkɛ nu ni baahere Israelbii Iɛ ayiwala kɛjɛ amɛmaŋkwramɔŋ henyɛlɔi adɛŋ lɛ eko wooo ‘amɛbui ni ejwara’ lɛ amli amɛhaaa amɛ. Nohewɔ lɛ amɛnaaa walanu kɛjɛɛɛ Shihor Faa, Nilo Faa, aloo Efrata Faa beni no yɔɔ Ashur hewalɛ shishi, Iɛ amli. Akɛni amɛkwa Yehowa amɛNyɔŋmɔ lɛ laka yiwalaheremɔ Jɛɛhe hewɔ lɛ, Israelbii sɛɛsɛɛyalɔi lɛ baje loomɔ ni gbĩɔ susumɔ lɛ shishi.—Yer. 2:13-18.
24. Shi nɛgbɛ Yeremia kuu lɛ kɛ “asafo babaoo” lɛ kɛ amɛbulɛ kɛ amɛhiɛnɔkamɔ yaa; ni nɛgbɛ amɛjaa walanu jɛɛhe krɔŋŋ lɛ yɛ?
24 Yeremia kuu ni yɔɔ ŋmɛnɛ lɛ mlibii efeee amɛnii tamɔ nakai Israelbii lɛ, shi moŋ amɛkɛ Yehowa, efee amɛ-Hiɛnɔkamɔ. Amɛkɛ bulɛ haa ejeŋ muu fɛɛ maŋtsɛyeli lɛ he sɛi lɛ. Amɛjaàlɛ akɛ amɛ-Nyɔŋmɔ yɛ emumɔŋ sɔlemɔwe loo krɔŋkrɔŋhe lɛ. Amɛhiɛ kã lɛ enɔ, shi jeee gbɔmɔ adesa aloo adesai ajeŋ hewalɛ ko ni yɔɔ nuklia tawuunii. Amɛnyiɛɔ “asafo babaoo” ni yɔɔ ŋmɛnɛ lɛ ahiɛ ni amɛkɛ amɛhe fɔ̃ɔ Yehowa nɔ. Amɛtsiɔ amɛhe kɛjɛɔ gbɛ ni Kristendom Nyɔŋmɔkwalɔ lɛ ekɔ lɛ he, ni amɛkɛ nilee kɛɔ akɛ: “Bo anunyam maŋtsɛsɛi ni ma shi gojoo kɛjɛ teteete, wɔhekrɔŋkrɔŋ lɛ maahe: Yehowa, Israel hiɛnɔkamɔ! Mɛi fɛɛ ni shiɔo lɛ ahiɛ aaagboi [amɛnijiaŋ aaaje wui]! Mɛi ni kpaleɔ yɛ misɛɛ lɛ, aaaŋma amɛgbɛi yɛ shikpɔŋ, ejaakɛ amɛshi Yehowa ni ji wala nubu lɛ.”—Yer. 17:12, 13.
25. Belɛ mɛɛ gbɛ kɛji wɔkɔ ni wɔɔɔbote Gbɛjianɔtoo Hee ni Yesu ni ji Mesia lɛ kwɛɔ nɔ lɛ mli?
25 Belɛ nyɛhaa wɔshia “nubui ni ejwara” ni gbɔmɛi efee ni nyɛɛɛ nu ni hereɔ mɔ yiwala kɛjɛɔ jeŋ hiɛkpatamɔ mli lɛ eko ato lɛ mɔ. Nyɛhaa wɔyaa Yehowa ŋɔɔ. Ebaanyɛ ebu wɔhe yɛ “amanehulu kpeteŋkpele” lɛ mli ni ekpala, wɔ kɛbote egbɛjianɔtoo hee ni Yesu ni ji Mesia lɛ baakwɛ nɔ lɛ mli shweshweeshwe.a
[Shishigbɛ niŋmaa]
a Ajie kɛjɛ August 15, 1979 Blɔfo Buu-Mɔɔ mli.