Wala Gbɛ Aloo Gbele Gbɛ—Te Nɔni Obaakɔ Hu?
‘Ni nɛkɛ maŋ nɛɛ hu okɛɛ amɛ akɛ: Bɔni Yehowa kɛɛ nɛ: Naa, mihiɛ wala gbɛ kɛ gbele gbɛ [mikɛ] miishwie nyɛhiɛ.”—Yer. 21:8
1. Mɛɛ sanebimɔi teɔ shi yɛ halamɔ ni ebalɛ akɛ wɔhala “wala gbɛ” kɛ “gbele gbɛ” mli ekome amrɔ nɛɛ gbɛfaŋ?
1 ANI hiɛdɔɔ eba sane lɛ he waa nakai? Ani wɔ fɛɛ wɔkɛ enɛ ekpe? Ani amrɔ nɛɛ ebalɛ akɛ je muu lɛ fɛɛ ahala “wala gbɛ kɛ gbele gbɛ” mli ekome? Ani nakai eji lɛɛlɛŋ? Ani gbele jeee nii ni kã shi ni baa daa? Kɛ́ nakai ni lɛ mɛni hewɔ adesai asane lɛ yɔɔ sɔrɔto amrɔ nɛɛ fe be ko ni eho lɛ? Yɛ afii akpei abɔ ni eho lɛ fɛɛ amli lɛ, hii, yei, gbekɛbii kɛ abifabii nyɛko ajo gbele naa foi. Amɛnyɛɛɛ nɔko amɛfee yɛ he. No lɛ mɛni hewɔ esani akɛɛ akɛ naagbee nɛɛ esa akɛ wɔkɔɔ “wala gbɛ” aloo “gbele gbɛ” mɔ? Mɛɛ hegbɛ wɔyɔɔ akɛ ekolɛ wɔɔɔnyɛ wɔjo wɔhenyɛlɔ ni kɛ wɔ yɔɔ kɛjɛ blema beebe ni atsɛɔlɛ GBELE lɛ naa foi hu?
2, 3. (a) Taakɛ blema yinɔsane tsɔɔ lɛ, mɛɛbe ebalɛ akɛ je muu fɛɛ kɛ kpatu gbele ni mɛi fɛɛ aaagboi kutuu yɛ be kome mli lɛ kpe? (b) Mɛni ba ebalɛ yɛ nakai be lɛ mli akɛ mɔ baanyɛ ekɔ wala gbɛ aloo gbele gbɛ?
2 Jeee enɛ ji klɛŋklɛŋ ni gbɔmɛi aje muu fɛɛ kɛ gbele ni ji trukaa gbele ni amɛ aaagboi kutuu, ekpe pɛŋ. Yinɔsaneŋmalɔi wieɔ nɔko ni tamɔ enɛ nɔŋŋ ni ba yɛ blema be ko mli lɛ he. Amɛteŋ mɔkome kɛɛ: “Ŋwɛi yɛ kɛjɛ blema beebe, ni shikpɔŋ hu jɛ nu mli, ni etsɔ nu mli ebama shi yɛ Nyɔŋmɔ wiemɔ naa; nomɛi nɔŋŋ nɔ etsɔ ni nu ŋɔ no be lɛŋ je lɛ ni ehiɛ kpata lɛ.”—2 Pet. 3:5, 6.
3 Nakai yinɔsaneŋmalɔ ni ji bɔfo Petro Kristofonyo lɛ miiŋma Noa gbii lɛ anɔ nu afua ni ba je muu lɛ fɛɛ nɔ lɛ he sane. Ani akɛ wala gbɛ kɛ gbele gbɛ shwie nakai be lɛ mli je lɛ hiɛ? Hɛɛ, kɛ nɔmimaa. No be lɛ mli lɛ, nibii enyɔ ni mɔ yɔɔ feemɔ ji akɛ ekabote adeka ni Noa kɛ eweku lɛ kpɛ lɛ mli yɛ hé ni eheee eyeee hewɔ ni yɛ nohewɔ lɛ eyi akana wala kɛtsɔ nu afua lɛ mli; aloo mɔ lɛ aaabote adeka lɛ mli ni eyafata Noa kɛ eweku lɛ he ni kɛtsɔ nakai feemɔ nɔ lɛ ejo kpatu gbele ni ekɛ nakai je ni leee Nyɔŋmɔ lɛ aaagbo lɛ naa foi.
4, 5. (a) Mɛni hewɔ wɔ fɛɛ wɔhiɛ kã ŋmɛnɛ yɛ Noa gbii lɛ anɔ nu atua lɛ tɛɛ sɛɛ? (b) Mɛni hewɔ esaani wɔhiɛ kpaa nii ni Noa kɛ eweku lɛ haa akaseɔ lɛ nɔ ŋmɛnɛ?
4 Mra mli yɛ nakai wolo lɛ nɔŋŋ mli lɛ, bɔfo Petro ŋma akɛ: “Ni asaŋ [Nyɔŋmɔ] eŋɔɔɔ blema je lɛ he ekeeelɛ, shi moŋ Noa ni ji jalɛ shiɛlɔ lɛ, mɔni gbe yi fee mɛi kpaanyɔ lɛ kɛkɛ yi ebaa, ni ekɛ nu afua lɛ ba mɛi ni kwa Nyɔŋmɔ lɛ aje lɛ nɔ.”—2 Pet. 2:5.
5 Akɛni Noa kɛ eweku lɛ kɔ wala gbɛ dani nu afua lɛ ba hewɔ lɛ, ŋmɛnɛ, yɛ nakai sane lɛ sɛɛ afii ni fe akpei ejwɛ kɛ ohai etɛ nɛɛ, wɔyɛ wala mli yɛ biɛnɛɛ. Esaaani wɔhiɛ jeɔ nikasemɔ ni Noa kɛ eweku lɛ kɛhaa wɔ lɛ nɔ. Mɛni hewɔ? Ejaakɛ Ŋmalɛ Krɔŋkrɔŋ lɛ, gbaa etoɔ akɛ gbɔmɛi ni leee Nyɔŋmɔ ni eyi shikpɔŋ nɛɛ nɔ obɔ nɛɛ hu anaagbee baaba yɛ gbɛ ko ni tamɔ nakai nɔ.
6. Mɛni hewɔ amrɔ nɛɛ nɔko nyɛɔ wɔ nɔ akɛ wɔkɔ “wala gbɛ” lɛ ni wɔkpoo”gbele gbɛ” Iɛ?
6 Belɛ jwɛŋmɔ yɛ mli akɛ esani wɔkɛ nihalamɔ ni Noa kɛ eweku lɛ kɛkpe lɛ eko nɔŋŋ akpe be ko kɛ̃, yɛ be mli ni naagbee ni agba he sane ato lɛ bɛŋkɛɔ lɛ. Bɔni Biblia gbalɛ baa mli anɔkwale kɛjɛ Jeŋ Ta I,ni kadi afi 1914 akɛ afi nɔ ni Jeŋmaji Abei afii 2,520 lɛ ba naagbee lɛ nɔ kɛbaa nɛɛ, eha Biblia kaselɔi ni kɛ amɛhe dɔmɔɔɔ Nyɔŋmɔjamɔ kui sɔrɔtoi lɛ eko eko lɛ ena amɛle akɛ wɔyɛ “nibii agbɛjianɔtoo nɛɛ naagbee” lɛ mli. (Mat. 24:3, NW) Afi 1979 nɛɛ mli lɛ wɔna akɛ wɔbote nibii agbɛjianɔtoo lɛ naagbee mli kɛtee shɔŋŋ. Nohewɔ lɛ amrɔ nɛɛ eefĩ wɔnɔ fe bei fɛɛ ni eho akɛ wɔkɔ “wala gbɛ” lɛ ni wɔkpoo “gbele gbɛ” lɛ. Mɛi fɛɛ ni muɔ kɔɔyɔɔ lɛ a-Walahalɔ lɛ ejɛ mlihilɛ mli ekɛ nihalamɔ nɛɛ efɔ̃ wɔhiɛ.
7, 8. (a) Afee shihilɛ ko ni tamɔ enɛ nɔŋŋ he mfoniri yɛ yinɔsane mli yɛ namɔ gbii anɔ yɛ blema bei amli (b) Te Yehowa sumɔ akɛ gbalɔ lɛ atsɔ mɛi pii ahiɛ gbɔmɔ eha tɛɛŋ?
7 Yɛ Noa gbii lɛ anɔ nu afua lɛ sɛɛ lɛ, wɔyɛ nɔkwɛmɔnɔ kroko yɛ adesa yinɔsane mli be mli ni ebiɔ ni akɔ wala kɛ wala hegbɛ, lɛ sɛɛfoo kpatukpatu mli ekome lɛ mli. Enɛ ba yɛ Israel maŋ lɛ gbɛfaŋ yɛ osɔfo kɛ gbalɔ Yeremia ni ji Hilkia binuu lɛ gbii lɛ anɔ. (Yer. 1:1-5) Yehowa Nyɔŋmɔ feelɛ ‘gbalɔ eha jeŋmaji lɛ.’ Nohewɔ lɛ kɛji wɔjeee Yeremia maŋbii ateŋ mɛikomɛi po, nɔni nɛkɛ majimaji ateŋ gbalɔ nɛɛ kɛɛ ni efee lɛ saa wɔhe.
8 Nyɔŋmɔ ni wo Yeremia nitsumɔ akɛ enaawielɔ lɛ sumɔ akɛ etsɔ mɔko ni mɛi pii ajwɛŋmɔ yɔɔ enɔ; mɔko ni yɔɔ maŋtsɛmɛi, lumɛi, osɔfoi, maŋbii lɛ, kɛ lumɔwulu Nebukadnezar ni ji Babilon maŋtsɛ lɛ po jwɛŋmɔ mli. Yeremia gbalaa je lɛ jwɛŋmɔ ŋmɛnɛ hu kɛtsɔɔ egbalɛi ni aŋmala ashwie shi ni abaa yi beni afee ni wɔ fɛɛ wɔsusu he yɛ jaramɔ gbii ni sa jogbaŋŋ nɛɛ amli lɛ anɔ.—Yer. 1:18, 19; 39:11-14; kɛto Romabii Awolo 15:4 he okwɛ.
9. Yɛ maŋkwramɔŋ tsakemɔi yɛ shikpɔŋ nɔ gbɛfaŋ lɛ, mɛɛ gbɛ nɔ Yeremia be lɛ kɛ be ni eho yɛ wɔyinɔ nɛɛ mli kɛjɛ afi 1914 nɔ kɛbaa nɛɛ kpaa gbee yɛ?
9 Nɛkɛ yinɔ ni fɔ̃ɔ nɔ yɛ afii amli ni ena saji ni eba je lɛ mli kɛjɛ afi 1914 Ŋ.B. nɔ kɛbaa nɛɛ ena tsakemɔi babaoo yɛ jeŋmaji lɛ anɔ lumɛi ateŋ. Beni maŋtsɛ kpakpa Yosia gbo yɛ afi 628 D.Ŋ.B. mli sɛɛ lɛ, Yosia bihii etɛ kɛ enabinuu kome batara Yuda maŋtsɛyeli lɛ sɛi nɔ kɛtsara nɔ, yɛ Yeremia hiɛ. Beni Yosia binuu Yehoahaz eye nɔ nyɔji etɛ pɛ yɛ Yerusalem lɛ, akpalɛ ni enyɛminuu Yehoiakim baye esɛɛ. Beni Yosia binuu nɛɛ gbo kpatukpatu yɛ afi 618 D.Ŋ.B. mli lɛ, ebinuu fioo ni atsɛɔlɛ Yehoiakin baye nɔ nyɔji etɛ, kɛkɛ ni eŋmɛɛ nɔyeli lɛ he eha Babilon maŋtsɛ Nebukadnezar. Nebukadnezar wó Yosia binuu ni shwɛ ni atsɛɔ lɛ Zedekia lɛ nɔ akɛ maŋtsɛ hee yɛ Yuda. Zedekia nɔyeli fɔŋ lɛ afi ni ji nyɔŋma kɛ ekome lɛ mli lɛ, Babilonbii ye Yerusalem nɔ kunim, ni atswa Zedekia nane shi tu kɛtee Babilon, ni eshwɛ Yerusalem kɛ esɔlemɔwe lɛ koikoi.—2 Kron. 35:23–36:21.
10. Mɛni haaa sane ni Yehowa kɛɛ Yeremia ayashiɛ lɛ afee nitsumɔ ko ni yɔɔ flɛflɛ lɛ: ni Yeremia to hewalɛwoo okadi eha namɛi yɛ ŋmɛnɛbeaŋ?
10 Yeremia na ni jeŋba kɛ Nyɔŋmɔjamɔ gbɛfaŋ fitemɔ mli wo wu yɛ Yuda naagbee maŋtsɛmɛi ejwɛ lɛ ateŋ. Ani wɔna nɔko ni yɔɔ awerɛhoo nakai nɔŋŋ yɛ jeŋmaji ni tsɛɔ amɛhe Kristofoi lɛ anɔ maŋkwramɔŋ lumɛi lɛ ateŋ? Nitsumɔ ni awo Yeremia akɛ ekã he eshiɛ Yerusalem hiɛkpatamɔ kɛ David maŋtsɛyeli lɛ butumɔ lɛ jeee nitsumɔ ko ni yɔɔ flɛflɛ. Yɛ ŋmɛnɛbeaŋ Yeremia kuu lɛ gbɛfaŋ hu, ejeee nitsumɔ ni yɔɔ mɛlɛɔ akɛ amɛshiɛ Yehowa gbalɛi ni kɛɔ akɛ abaakpata Kristendom kɛ esɔlemɔtsui wuji kɛ ekomɛi ni awula amɛ haŋtsii ni amɛtsɔmɔ nibii ni gbɛfaa-shishɛralɔi sumɔɔ akɛ amɛyakwɛ lɛ, fɛɛ hiɛ lɛ amɛtsɔɔ. Enɛ haa Yeremia kuu lɛ feɔ sɔrɔto kwraa yɛ Kristendom osɔfoi lɛ ahe ni amɛhe feɔ mɛi taŋ. Shi blema Yeremia etsɔ nɔkwɛmɔnɔ ko ni kanyaa mɔ eha mɛi ni damɔ enajiaŋ yɛ ŋmɛnɛbeaŋ lɛ.
11. Kɛha hiɛkpatamɔ ni Yeremia shiɛ lɛ he mfonirifeemɔ lɛ, mɛni Yehowa kɛɛlɛ akɛ efee; ni mɛni akɛɛ ekɛɛ?
11 Gbi ko beni Nyɔŋmɔ feɔ hiɛkpatamɔ ni Yeremia shiɛɔ lɛ he nɔkwɛmɔnɔ lɛ, ekɛɛ:
“Yaa ni oyahe gbɛshɔlɔ sũ kpulu ko, ni oŋɔ maŋ lɛ mli onukpai lɛ kɛ osɔfoi lɛ ateŋ onukpai lɛ ekomɛi ofata ohe [akɛ odasefoi], ni oje kpo kɛya Hinom bi lɛ jɔɔ lɛ ni yɔɔ gbɛshɔlɔi lɛ agbo lɛ naa lɛ mli, ni eyashiɛ wiemɔi ni makɛɛo lɛ yɛ jɛi, ni okɛɛ: Nyɛboa Yehowa wiemɔ toi, nyɛ Yuda maŋtsɛmɛi kɛ Yerusalembii! Bɔni Yehowa Zebaot, Israel Nyɔŋmɔ lɛ, kɛɛ nɛ:
“Naa, mikɛ efɔŋ baaba biɛnɛɛ nɔ, ni mɔfɛɛmɔ ni aaanu he lɛ etoii amli aaafeelɛ heŋŋ; ejaakɛ amɛkwa mi, ni amɛtsake biɛnɛɛ, ni amɛshã tsofakɛŋma yɛ mli amɛha nyɔŋmɔi krokomɛi, ni amɛ kɛ amɛtsɛmɛi lɛ kɛ Yuda maŋtsɛmɛi lɛ leee, ni amɛwo biɛnɛɛ obɔ kɛ mɛi ni efeko nɔko lɛ alá; ni amɛmamɔ Baal hei grɔŋŋi lɛ, ni amɛkɛ la shãa amɛbii lɛ amɛŋɔfeɔ shaa-afɔlei amɛhaa Baal, nɔni mifako, ni miwieko he hu, ni esaa ebako mijwɛŋmɔ mli lɛ.”—Yer. 19:1-5.
12. Beni Yeremia ejwara kpulu lɛ wɔtsɔwɔtsɔ sɛɛ Iɛ, mɛni okɛɛ yɛ Tofet ni yɔɔ Hinom jɔɔ lɛ mli lɛ he?
12 Mɛni aaafee nakai “efɔŋ” ni kɛji anu he ni ebaaha mɛi atoiiaŋ afee amɛ heŋŋ lɛ? Nakai “biɛnɛɛ” ni afeelɛ krɔŋkrɔŋ aha apasa nyɔŋmɔi lɛ baatsɔ heko ni abule kɛtsɔ amagajalɔi ni ‘aaagbe’ ashwie jɛi lɛ nɔ. (Yer. 19: 6) Beni Yeremia ejaje enɛ sɛɛ lɛ, yɛ maŋ lɛ mli onukpai kɛ osɔfoi onukpai lɛ ahiŋmɛii amli nɔŋŋ ni ejwa kpulu lɛ ni ekɛɛ:
“Bɔni Yehowa Zebaot kɛɛ nɛ: Nɛkɛ nɔŋŋ majwa nɛkɛ maŋbii nɛɛ kɛ nɛkɛ maŋ nɛɛ, taakɛ bɔni ajwaa gbɛshɔlɔ gbɛ́ ni ehiii tsaramɔ dɔŋŋ lɛ; ni aaafu amɛ yɛ Tofet, ejaakɛ gbɛ bɛ hekoheko dɔŋŋ.”—Yer. 19:10, 11.
13. No sɛɛ lɛ, mɛni Yeremia shiɛ yɛ Yerusalem sɔlemɔwe lɛ kpo lɛ nɔ?
13 Yɛ nii ni afee yɛ onukpai lɛ ahiɛ sɛɛ lɛ, ebafee nii ni sa agbɛnɛ akɛ ajaje sane ni tamɔ nakai nɔŋŋ atsɔɔ Yerusalembii lɛ. Nohewɔ lɛ Yeremia shi kpulu ni ejwara lɛ eshwie shi yɛ Gbɛshɔlɔi Agbó lɛ masɛi ni eyiŋ kɛtee kooyigbɛ kɛtsɔ maŋ lɛ mli kɛtee sɔlemɔwe lɛ kpo lɛ nɔ. Kɛkɛ ni ekɛɛ yɛ etoibolɔi lɛ fɛɛ atoiiaŋ akɛ:
“Bɔni Yehowa Zebaot, Israel Nyɔŋmɔ lɛ, kɛɛ nɛ: Naa, mikɛ efɔŋ fɛɛ ni miwie yɛ nɛkɛ maŋ nɛɛ kɛ ehe majimaji lɛ fɛɛ he lɛ baaba amɛnɔ, ejaakɛ amɛfee amɛhe kuɛŋtilɔi, koni amɛkabo miwiemɔi lɛ atoi.”—Yer. 19:14, 15.
NYƆMƆJAMƆ YIWAA KƐ NII NI JƐ MLI KƐBAGBEE YIWALƆI LƐ NƆŊŊ ANƆ
14. Mɛni Pashur fee Yeremia; ni mɛɛba efee nakai?
14 Onukpai ni na ni Yeremia jwa kpulu lɛ yɛ Hinom Jɔɔ lɛ mli ni amɛnu ehiɛkpatamɔ wiemɔi lɛ susuuu akɛ amɛyɛ hegbɛ ni amɛfeɔlɛ nɔko. Shi Pashur ni ji osɔfo Imer bi, ni yeɔ lumɔ yɛ sɔlemɔwe lɛ susu akɛ eyɛ hegbɛ ni efeɔ nɔko. Yeremia emaaa amale ni Pashur gba lɛ nɔ mi akɛ anɔkwale. Kɛkɛ ni Pashur kɛ mlifu gba ehiɛ ma ni ebɔlɛ apã yɛ Benyamin Agbó lɛ naa yɛ kooyigbɛ gbogbo lɛ mli. Ekolɛ mɛi pii ni na nɔni tee nɔ lɛ aaasusu akɛ, Mɛɛ maŋsuɔmɔ nifeemɔ po nɛ! ejaakɛ Pashur fĩɔ Mizraim sɛɛ, ni ekɛ ehe efɔ̃ Mizraim tawuu yelikɛbuamɔ nɔ akɛ no baaku nɔni Yehowa ewie kɛtsɔ Yeremia nɔ lɛ naa koni ekɛ oshra akaba Yuda nɔ kɛtsɔ Babilonbii lɛ anɔ. Shi Yehowa ejieee maŋsuɔmɔ nii ni Pashur fee Iɛ yi. Nyɔŋmɔ moŋ ewuɔ eshiɔ lɛ!
15. Yehowa tsake Pashur gbɛi ni efeelɛ mɛni: ni mɛni no tsɔɔ yɛ gbalɛ gbɛfaŋ?
15 Enɔ jetsɛremɔ beni Pashur eŋmɛɛ Yeremia he sɛɛ lɛ, Yehowa kɛ shɛɛ ko maje Pashur. Egbɛi lɛ ji Hebri wiemɔi enyɔ Pash kɛ Hhur ni atsa. Wiemɔi nɛɛ kutuu lɛ, amɛshishitsɔɔmɔ ji “Nɔni Eshwɛ Yɛ Ehewɔŋ Fɛɛ.” Nohewɔ lɛ Yehowa kɛ gbɛi Pashur lɛ kɛɛ nɔko ni ejɛ mumɔ mli eha Yeremia tsake gbɛi lɛ, ni ekɛɛ:
“Jeee Pashur Yehowa woo, shi moŋ ‘hefɛɛhe efee gbeyei [Magormissabib, yɛ Hebri mli]!’ Ejaakɛ bɔni Yehowa kɛɛ nɛ: Naa, maha otsɔ gbeyeinɔ oha bodiɛŋtsɛ ohe kɛ onanemɛi lɛ fɛɛ, ni amɛ aaanyɔnyɔi yɛ amɛhenyɛlɔi lɛ aklante naa, ni ooona kɛ ohiŋmɛii; ni maŋɔ Yuda fi mawo Babel maŋtsɛ lɛ dɛŋ, ni eeeŋɔ amɛ nom kɛaatee Babel, ni eeegbe amɛ kɛ klante. Ni asaŋ maŋɔ maŋ nɛɛ nii lɛ kɛ nii ni egbo he deŋme lɛ kɛ enii ni jara wa lɛ kɛ Yuda maŋtsɛmɛi lɛ ajwetrii lɛ fɛɛ mawo amɛhenyɛlɔi lɛ adɛŋ, ni amɛhà ni amɛloo ni amɛtere kɛya Babel. Ni bo, Pashur, kɛ oshiabii fɛɛ aaatee nomŋɔɔ mli, ni oootee Babel, ni jɛi ooogbo yi, ni jɛi nɔŋŋ aaafuo yɛ, bo kɛ onanemɛi lɛ fɛɛ ni ogba amale gbalɛ otsɔɔ amɛ lɛ!”—Yer. 20:3-6.
16. Pashur kpala mɛikrokomɛi kɛtsɔ gbɛ ko nɔ yɛ mɛɛ gbɛ nɔ; ni mɛni kɛ enɛ nyiɛ yɛ ŋmɛnɛbeaŋ?
16 Yehowa wiemɔi nɛɛ tsɔɔ akɛ Pashur ekɔ “gbele gbɛ” eha ehe. Agbɛnɛ kɛtsɔ amale ni egbaa nɔ lɛ, eekpala e-Nyɔŋmɔjamɔŋ nanemɛi aloo suɔlɔi lɛ kɛmiitsɔ nakai gbɛ nɔŋŋ nɔ. Yɛ gbɛ ko ni tamɔ nakai nɔ lɛ, aakpala Kristendom sɔlemɔyalɔi akpeiakpei ohai abɔ kɛnyiɛ “gbele gbɛ” lɛ nɔ yɛ ŋmɛnɛbeaŋ. Shi jeee Yeremia kuu lɛ tɔmɔ hewɔ ebalɛ nakai.
17. Nɔni afee yɛ Cedar Point, Ohio, yɛ afi 1919 mli lɛ fe kpulu ni Yeremia jwara yɛ Hinom jɔɔ lɛ mli yɛ mɛɛ gbɛ nɔ?
17 Yɛ mfonirifeemɔ gbɛ ko nɔ; lɛ, Yeremia fee Yehowa gbalɛ lɛ he nɔkwɛmɔnɔ ko kɛtsɔ sũ kpulu lɛ jwaramɔ nɔ yɛ Hinom Jɔɔ lɛ mli. Yeremia kuu lɛ etsɔ maŋteŋ nifeemɔi ni dara fe Yeremia nɔ lɛ anɔ eha Kristendom enu ehiɛkpatamɔ ni baa lɛ he sane. Kwɛmɔ nɔni amɛfee yɛ Cedar Point, Ohio kpee yɛ September, afi 1919 mli lɛ shishi lɛ nɛkɛ. Jɛmɛ, yɛ toibolɔi aaafee 10,000 ahiɛ lɛ, Buu Mɔɔ, Biblia kɛ Wojitɛtrɛbii Asafo lɛ sɛinɔtalɔ lɛ ha wiemɔ ko, nɔ̃ mli ni etsɔɔ yɛ akɛ jɔɔmɔ ni osɔfoi baa amɛshwieɔ no be lɛ mli Jeŋmaji Akpaŋmɔ ni atoɔ yiŋ akɛ abaafee lɛ nɔ lɛ baafee efolo. Nakai majimaji ateŋ gbɛjianɔtoo kɛha jeŋ toiŋjɔlɛ kɛ shweshweeshwe shihilɛ lɛ yeŋ omanye. Ebɔ Kristendom abolo lɛɛlɛŋ yɛ afi 1939 mli beni Germane nɔyelɔ yiwalɔ Adɔlf Hitra tsirɛ Kristendom yisɛɛ kɛbote Jeŋ Ta II mli lɛ.
18. Te Yeremia kuu lɛ to okadi kroko amɛha tɛɛŋ yɛ afi 1933 mli?
18 Akɛ nɔkwɛmɔnɔ kroko lɛ, kwɛmɔ afi 1933 nɛkɛ. Abu afi nɛɛ akɛ Afi Krɔŋkrɔŋ ejaakɛ no fee Yesu Kristo afɔleshaa gbele lɛ sɛɛ afi ni ji 1900. Yɛ wiemɔ ni paapa lɛ kɛha yɛ gbijurɔ nɛɛ yeli he lɛ mli lɛ, ewo shi akɛ abaana nibii kpakpai komɛi yɛ Kristendom teŋ toiŋjɔlɛ kɛ shweremɔ gbɛfaŋ titri, kɛ agbɛnɛ yɛ je lɛ fɛɛ hu gbɛfaŋ, yɛ nɔyelɔ yiwalɔ ni Hitra etsɔ yɛ Germane Ripɔblik lɛ nɔ fɛɛ sɛɛ. Shi Yeremia kuu lɛ je ekaa ni ebi sane yɛ shiwoi ni paapa lɛ kɛha nɛɛ ahe. Hɔgbaa, April 23 lɛ, amɛtsɔ WBBR, redio nitsumɔhe ni yɔɔ New York maŋ lɛ mli lɛ nɔ ni Buu Mɔɔ Asafo lɛ sɛinɔtalɔ lɛ ha ŋmlɛtswaa kome wiemɔ ko ni yitso ji “Hewalɛ ni Afi Krɔŋkrɔŋ lɛ Aaana yɛ Toiŋjɔlɛ kɛ Shweremɔ Nɔ,” ni aha redio nitsumɔhei krokomɛi mɔ wiemɔ nɛɛ ni amɛ hu amɛkɛwo kɔɔyɔŋ. Aha anu wiemɔ ni haa mɔ toiŋ fɛlɛɔlɛ nɛɛ he yɛ je lɛ mli fɛɛ ejaakɛ aŋma awo daa-otsii-onyɔ wolotɛtrɛɛ ni gbɛi ni The Golden Age ni je kpo May 10, 1933 lɛ mli. Amrɔnɔŋŋ ni Kristendom osɔfoi lɛ wie amɛshi enɛ nyanyaanya, ni amɛtsɔ maŋkwramɔŋ gbɛ̀i anɔ amɛhao Yeremia kuu lɛ ni amɛwa amɛyi. Shi enɛ nyɛɛɛ abu jeŋ toiŋjɔlɛ kɛ shweremɔ he tamɔ bɔ nɔŋŋ ni Afii Krɔŋkrɔŋi ni ba yɛ no sɛɛ ni ji afi 1950 kɛ 1975 hu nyɛɛɛ afee lɛ. Hiɛkpatamɔ kã shi ha Kristendom lolo yɛ “amanehulu kpeteŋkpele” ni baa lɛ mli.
19. Pashur gbɛi ni atsake kɛ oshra he gbalɛ ni akɛfata he lɛ ena amɛmlibaa ŋmɛnɛ yɛ Kristendom osɔfoi Iɛ ateŋ afo mɛɛ bɛ nɔ?
19 Yɛ nɛkɛ gbɛ nɔ lɛ Yeremia hiɛ ma ni sɔlemɔwe lɛ nɔ lumɔ otu lɛ gbá lɛ eba mli yɛ ŋmɛnɛbeaŋ hu yɛ afii oha ni ji 20 nɛɛ mli. Taakɛ nakai blema Nyɔŋmɔjamɔŋ hiɛnyiɛlɔ maŋsuɔlɔ lɛ fee lɛ, Kristendom osɔfoi lɛ eshwie Yeremia kuu lɛ hiɛ shi yɛ mɛi ahiɛ. Mɛɛba? Belɛ koni akɛgbe amɛhe guɔ ni akɛ gba shiɛmɔ ni ashiɛɔ akɛ Yehowa eto eyiŋ eshi nii ni hiɛ gbɛi kɛkɛ akɛ Kristojamɔ ni osatofeemɔ eyilɛ tɔ kɛ agbɛnɛ apasa jamɔ fɛɛ kɛ esɛɛfilɔi kɛ sapatei maŋkwralɔi fɛɛ, lɛ naa. Subaŋ ni tamɔ enɛ lɛ naa eyakpaaa yɛ ekpakpa mli ehaaa Pashur ni hi shi yɛ blema bei amli lɛ, ni nakai nɔŋŋ eji yɛ Kristendom osɔfoi lɛ hu agbɛfaŋ Yehowa tsake Pashur gbɛi ni efeelɛ Magormissabib ni shishi ji “Hefɛɛhe Efee Gbeyei.” Nakai gbeyeishemɔ lɛ kɔɔ hiɛkpatamɔ ni yɔɔ tsuifaa ni ba yɛ afi 607 D.Ŋ.B. mli lɛ he. Alomɔ Pashur akɛ ebaagbo yɛ nomŋɔɔ mli yɛ Babilon. Yɛ ŋmɛnɛbeaŋ mɛi ni kaseɔ Pashur ni ji osɔfoi lɛ agbɛfaŋ lɛ, akpa amɛhe mama ni akɛ naanɔ hiɛkpatamɔ kojo amɛ.
20. Yɛ afi 1951 mli lɛ, mɛɛ gbɛ nɔ akpa Kristendom osɔfoi lɛ ahe mama yɛ akɛ kuu ko ni hiɛ baakpata?
20 Kɛjɛ klɛŋklɛŋ afii oha lɛ nɔ kɛbaa fɛɛ lɛ, Kristofoi enaaa nɔ̃ krɛdɛɛ ni nɔni bɔfo Paulo tsɛlɛ “laajemɔ bi” aloo “hiɛkpatamɔ bi” lɛ ji. Shi yɛ Yehowa diɛŋtsɛ be ni sa mli lɛ, ato akɛ abaaha “efɔŋfeemɔ teemɔsane” aloo “mlakwamɔ teemɔsane” lɛ afee faŋŋ. (2 Tes. 2:3, 7, Authorized Version; NW) Nohewɔ lɛ yɛ afi 1951 mli lɛ, Yeremia kuu lɛ ŋma wolo ni gbɛi, ji What Has Religion Done for Mankind? lɛ. Yɛ nakai afi lɛ mli lɛ, ajie nakai wolo lɛ kpo yɛ majimaji ateŋ kpee ni Yehowa Odasefoi fee yɛ Lɔndɔn, Ablotsiri lɛ shishi. Awie “Nyɔŋmɔjamɔ Tsuru kɛ ‘Mlakwamo Bi’” lɛ ahe yɛ yitso ni ji 25 lɛ mli. Wɔkaneɔ yɛ baafai 320 kɛ 321 yɛ “Nyɔŋmɔkwamɔ” lɛ he akɛ:
Nohewɔ lɛ kwa ni hiɛnyiɛlɔi Kristofoi kwa anɔkwa Kristojamɔ ni amɛtsɔ “mlakwamɔ bi” kuu aloo gbɛjianɔtoo ko lɛ je shishi yɛ bɔfoi nyɔŋma kɛ enyɔ lɛ agbele sɛɛ nɔŋŋ. Akɛni agbɛnɛ bɔfoi lɛ bɛ dɔŋŋ hewɔ lɛ, nakai kuu ni ji mlakwamɔ bi lɛ jie ehe kpo agbɛnɛ ni eba ejeŋ yɛ henɔwomɔ kɛ mlakwamɔ gbɛ nɔ. Ewó ehe nɔ akɛ osɔfoi ni ekwa Nyɔŋmɔ akuu ni yɔɔ hegbɛ yɛ mɛi ni tsɛɔ amɛhe Kristofoi lɛ anɔ. Osɔfoi lɛ awiemɔ moŋ ná hewalɛ kɛ tsiimɔ fe Nyɔŋmɔ Wiemɔ lɛ. Osɔfoi lɛ wó gbɔmɛi ablemasaji kɛ kitãi anɔ kɛteke Nyɔŋmɔ mlai, ni amɛha Nyɔŋmɔ mlai lɛ fee efolo. Amɛwowoo amɛhe sablai tamɔ “Reverend,” “Right Reverend,” “Most Right Reverend,” “Divine,” ni akɛ “vicegod” po ha paapa lɛ, ni enɛɛmɛi hole amɛnɔ yɛ amɛsɔlemɔtsui wuji kɛ bibii lɛ amli akɛ mɛi ni akɛ jamɔ kɛ Nyɔŋmɔjamɔŋ woo haa, ni amɛshɔ̃ Nyɔŋmɔjamɔŋ woo kɛ gbeyeishemɔ ni sa Yehowa Nyɔŋmɔ kɛ e-Bi Yesu Kristo lɛ amɛha amɛhe. Amɛtsɛ amɛhe Nyɔŋmɔ bii shi amɛfee amɛhe nyɔŋmɔi aloo mumɔŋ gbɔmɛi wuji amɛha amɛsɔfobii kɛ amɛsafokui lɛ.
21. Beni Kristendom “hiɛkpɛtɔmɔ bi” lɛ aaaya lɛ, mɛni baafata ehe kɛya; ni mɛɛ shihilɛ mli ni mɛi ni tseɔ amɛhe Kristofoi lɛ yɔɔ lɛ mli enɛ aaaba ye?
21 Nakai wolo ni wɔtsĩ tã lɛ je ekaa ni ejaje akɛ nakai “mlakwamɔ bi” ni ekwa Nyɔŋmɔjamɔ lɛ hiɛ baakpata taakɛ agba ato lɛ, yɛ “amanehulu kpeteŋkpele” ni baa lɛ mli, afata Babilon apasa jamɔi krokomɛi fɛɛ ahe. Kɛji Kristendom “mlakwamɔ bi” ni ji “hiɛkpatamɔ bi” lɛ tee lɛ, Kristendom diɛŋtsɛ hu baaya. Kɛ́ nɛkɛ nii ni haa Nyɔŋmɔjamɔŋ henumɔi fɛɛ jijaa nɛɛ ba lɛ, ‘hefɛɛhe aaafee gbeyei’ eha mɛi ni tsɛɔ amɛhe Kristofoi shi gbɛi lɛ kɛkɛ amɛhiɛ lɛ, kɛ agbɛnɛ mɛikrokomɛi fɛɛ ni hiɛ jamɔi ni damɔɔɔ ŋmalɛ nɔ ni ekɛ Biblia kpaaa gbee lɛ.—2 Tes. 2:8-12; kwɛmɔ “Babylon the Great Has Fallen!”—God’s Kingdom Rules! wolo ni aŋma yɛ afi 1963 mli lɛ yitso 26 ni wieɔ Kpojiemɔ Wolo yitso 17 he lɛ mli.
FOI NI AAAJE KƐYADAMƆ NYƆŊMƆ BLAFOI LƐ AMASƐI
22. Te wɔɔɔfee tɛɛŋ wɔjo wɔhiɛ ni aaakpata afata Kristendom “hiɛkpɔtamɔ bi” lɛ he lɛ naa foi, taakɛ afee he nɔkwɛmɔnɔ yɛ Yeremia gbii lɛ anɔ aha lɛ?
22 Kristendom ekɔ “gbele gbɛ” lɛ. Nyɛkahaa wɔkãa he wɔnyiɛa nakai gbɛ lɛ nɔ dɔŋŋ. Be yɛ lolo ni mɔko baanyɛ ejo Kristendom kɛ ‘hiɛkpatamɔ bi’ lɛ agbele naa foi ni ekasa ehe. Kwɛmɔ Yeremia akɛ nɔkwɛmɔnɔ nɛkɛ. Eyɛ mli akɛ awolɛ gboklɛi yɛ Maŋtsɛ Zedekia Bulɔi Akpo lɛ nɔ yɛ be mli ni hɔmɔ, gbelehela kɛ ta gbeɔ mɛi shwieɔ shi yɛ ehewɔŋ kɛkpeɔ moŋ nɛ, shi eyi ná wala yɛ Yerusalem hiɛkpatamɔ lɛ mli, ni eyaaa nomŋɔɔ mli yɛ Babilon. Yehowa gbeyeishelɔi ni kɛ Yeremia fee naanyo lɛ hu ayi ná wala kɛfata ehe. Ŋmɛnɛ hegbɛ yɛ akɛ wɔ hu wɔyi aaana wala.
23. Mɛni hewɔ yɛ nakai be mli lɛ nɔko kwraa bɛ ni baatsɔɔ akɛ esani wiemɔ kpakpa ko ajɛ Yehowa ŋɔɔ kɛha Maŋtsɛ Zedekia kɛtsɔ Yeremia nɔ lɛ?
23 Afi 609 D.Ŋ.B. mli lɛ, Babilon tabilɔi lɛ miiba abatua Yerusalem. (Yer. 21:13) Akɛni Maŋtsɛ Zedekia le nɔni baa hewɔ lɛ etsu mɛi enyɔoo komɛi kɛtee koni amɛyabi nii yɛ Yeremia ŋɔɔ akɛ aleenɔ wiemɔ kpakpa aaajɛ Yehowa ŋɔɔ aba lo. Shi mɛni hewɔ kwraa esani Maŋtsɛ Zedekia akpa gbɛ akɛ akɛ wiemɔ kpakpa ko aaatsɔ Yeremia nɔ ahalɛ? Nibii gbohii ni afeɔ yɛ Yerusalem kɛ Yuda maŋtsɛyeli lɛ mli fɛɛ ni Yehowa gbala mɛi ajwɛŋmɔ kɛba nɔ lɛ nɛ: aaku kpaŋmɔ ni ekɛ Israel fee lɛ mli, aaja nyɔŋmɔi krokomɛi, aatsɔmɔ saji ahiɛ aabamɔ shi yɛ saneyelihei, shishiulɔi miitswa mɛi ni bɛ yelikɛbualɔi lɛ ojo, aaye okulafoi kɛ awusãi amim, aashwie mɛi ni efeko nɔko lɛ alá shi, ni aagba apasa gbalɛi hu. (Yer. 21:12; 22:3, 13-16; 23:14, 16) Nohewɔ lɛ ehe bahia akɛ Yeremia aje ekaa ni eshiɛ Yehowa hiɛkpatamɔ wiemɔ lɛ etsɔɔ mɛi ni kuɔ Nyɔŋmɔ kpaŋmɔ mli lɛ, ni ekatsake nɔko kwraa yɛ mli.—Yer. 21:1-7; 1:7, 8, 17.
24. Mɛɛ gbɛ nɔ Yeremia fee nɔkwɛmɔnɔ kpakpa ko eha wɔ yɛ, yɛ Yehowa wiemɔ lɛ shiɛmɔ kɛ Kristendom hamɔ ŋmɛnɛ lɛ mli?
24 Mɛɛ nɔkwɛmɔnɔ kpakpa Yeremia fee eha ŋmɛnɛbeaŋ Yehowa Odasefoi nɛɛ! Nibii efite yɛ Kristendom fɛɛ ŋmɛnɛ, yɛ Nyɔŋmɔjamɔ, jeŋba, mɔ kɛ enaanyogbɔmɔ teŋ saji amli kɛ saneyeli amli hu, ni hiɛnɔkamɔ ko bɛ akɛ ebaahi. Taakɛ Yehowa fee yɛ Yeremia sane lɛ mli lɛ, esɛŋŋŋ wiemɔi ahe beni ejajeɔ ekojomɔ eshiɔ Kristendom lɛ. Éwo e-Yeremia kuu lɛ nitsumɔ akɛ amɛshiɛ hiɛkpatamɔ he sane ko ni tamɔ nakai nɔŋŋ ni mli kã shi faŋŋ lɛ amɛtsɔɔ nɔni damɔ shi kɛha blema Yerusalem kɛ Yuda yɛ ŋmɛnɛbeaŋ lɛ. Esa akɛ Yeremia kuu lɛ aye nɔfɛɛnɔ ni Yehowa efã amɛ yɛ E-Wiemɔ lɛ mli Iɛ nɔ ni amɛkashi eko ni amɛkakpa yɛ eko eko sɛɛ.
25. Mɛni mli jeŋmaji lɛ shiɔ akoŋ kɛboteɔ amrɔ nɛɛ; ni te wolo ni aŋma yɛ afi 1926 mli ni gbɛi ji Deliverance! lɛ tsɔɔ nɔni baaba yɛ jɛi Iɛ mli eha tɛɛŋ?
25 Jeŋmaji lɛ fɛɛ, kɛ amɛteaŋ mɛi ni yɔɔ Kristendom lɛ hu miishi akoŋ kɛmiiya Harmagedon. Nakai gbɛi lɛ etsɔɔɔ asafo atswɛrɛ ni niiatsɛmɛi ni atsuɔ nii ahaa lɛ kɛ nitsulɔi ni gboɔ deŋme lɛ aaawuu ni baaha sakasaka shihilɛ aba jeŋ fɛɛ lɛ. Ejeee ta ni adesa baawuu ashi enyɛmi adesa, shi moŋ eji nɔko ni hiɛdɔɔ yɔɔ he ni yɔɔ oshra kwraa fe nakai. Afi 1926 mli tɔ̃ɔ lɛ, aha anɔkwasane nɛɛ mli bɔi faŋŋ feemɔ. Wolo ni gbɛi ji Deliverance! ni ajielɛ kpo aha maŋbii lɛ yɛ kpee ni Majimaji Ateŋ Biblia Kaselɔi Asafo lɛ fee yɛ Lɔndɔn, Alblotsiri, May, yɛ afi 1926 mli lɛ shishi lɛ kɛɛ:
Krɔŋkrɔŋbii lɛ kɛ amɛhe wooo ta lɛ diɛŋtsɛ mli. Nyɔŋmɔ Ofe lɛ ta ni; ni esuɔmɔ Bi ni ji Osɔfo ni Melkizedek fee ehe mfoniri lɛ ji mɔni nyiɛɔ ta lɛ hiɛ. Blema beebe ni Yehowa gbalɔ lɛ ŋma yɛ ŋmlɛtswaa nɛɛ he ni ekɛɛ: “[Yehowa] ni yɔɔ oninejurɔ nɔ lɛ aaatswia maŋtsɛmɛi anii yɛ emlifu gbi lɛ nɔ. Eeekojo yɛ jeŋmaji lɛ ateŋ, eeewo jɛmɛi obɔ kɛ gbohii sɔŋŋ; eeetswa shikpɔŋ kpeteŋkpele yitso nɔ̃.” (Lala 110:5, 6) Eeewuu kɛha gbɔmɛi lɛ ayiwalaheremɔ hu, beni afee ni ahere amɛ kɛjɛ amimyelɔ lɛ dɛŋ; eewuu kɛha Nyɔŋmɔ webii ni afɔ amɛ mu lɛ, beni afee ni afã amɛgbɛi he yɛ Yehowa gbɛi lɛ he odase ni amɛyeɔ yɛ anɔkwayeli mli lɛ hewɔ. . . .
Yɛ nɛkɛ gbɛ nɔ lɛ awóɔ Satan maŋtsɛyeli lɛ ashɛɔ afɔ̃ɔ laajemɔ mli. Afãa Yehowa Nyɔŋmɔ gbɛi lɛ he. Shi adesai awiemɔi sɔrɔtoi fɛɛ ni aaaka akɛ atsɔ nɔ atsɔɔ bɔni Nuntsɔ lɛ gbi wulu ni yɔɔ gbeyei nɛɛ yɔɔ eha lɛ nyɛɛɛ atsu no kwraa.—Baafa 280, yɛ klɛŋklɛŋnɔ ni afee lɛ mli.
Mɔkomɔko akalaka ehe akɛ Armagedon ta lɛ ji gbɔmɛi ateŋ nɔmɔ ko kɛkɛ, aloo eji mfoniri ko kɛkɛ. Ŋmalɛi lɛ feɔlɛ faŋŋ akɛ eji ta krɛdɛɛ ko. Eji Nyɔŋmɔ Ofe lɛ ta, nɔ̃ mli ni ebaabɛɛ gbɛjianɔtoo fɔŋ ni Satan etsɔ nɔ eshwila mɛi afii ohai abɔ ni eho nɛɛ fɛɛ lɛ, kɛya.—Baafai 282 kɛ 283; kwɛmɔ baafa 261, kuku 2 hu.
26. Taakɛ Yeremia efeee lɛ, mɛni ŋmɛnɛbeaŋ Yeremia kuu lɛ efeŋ koni amɛkɛsa je lɛ mli nɔyelɔi lɛ ahiɛ kɛkɛ?
26 Nakai “Armagedon ta” lɛ kɛ “amanehulu kpeteŋkpele” nɔ̃ mli ni abaakpata jeŋ apasa jamɔ maŋtsɛyeli ni Kristendom fata he lɛ hiɛ yɛ lɛ baaba naagbee. (Kpoj. 16:13-16; 17:1-18, AV) Yeremia kuu lɛ nyɛŋ ajɔɔ anɔkwasane nɛɛ he ni amɛkɛsa Kristendom maŋkwramɔŋ nɔyelɔi ni hiɛ Zedekia su lɛ ahiɛ, aloo je lɛ mli nɔyelɔi fɛɛ po ahiɛ. Esani amɛye kitã ni awo amɛ lɛ nɔ kɛwula shi taakɛ Yeremia fee yɛ Maŋtsɛ Zedekia gbɛfaŋ yɛ nitsumɔ ni Yehowa wolɛ lɛ nɔyeli mli lɛ.
27. Mɛɛ blafoi gbɔmɛi lɛ kɛbaakpe yɛ ta ni abaawuu yɛ Harmagedon lɛ mli?
27 Nyɔŋmɔ Ofe lɛ ji mɔni nibii agbɛjianɔtoo nɛɛ mli lumɛi lɛ kɛbaakpe yɛ “gbi wulu lɛ nɔ ta” yɛ Harmagedon lɛ mli, shi jeee amɛnanemɛi adesai kɛkɛ. Mɛi ni kɛ maŋsuɔmɔ su fĩɔ maŋkwralɔi ni tsuɔ nibii agbɛjianɔtoo nɛɛ he nii Iɛ asɛɛ lɛ kɛ blafoi ni Yehowa fãa amɛ lɛ baakpe. Yɛ Yeremia gbii lɛ anɔ Iɛ blafoi lɛ ji Babilon asraafoi ni Maŋtsɛ Nebukadnezar fãa amɛ lɛ. Yɛ Harmagedon ta ni baa lɛ mli lɛ, blafoi lɛ baafee Yehowa bɔfoi krɔŋkrɔŋi ni e-Bi Yesu Kristo nyiɛ amɛhiɛ lɛ.—Kpoj. 16:12; 19:11-21.
28, 29. Mɛɛ halamɔ esa akɛ wɔ mɛikpɔji lɛ wɔfee koni kɛtsɔ no nɔ lɛ wɔye Yehowa wiemɔi ni yɔɔ Yeremia Wolo 21:8-10 lɛ anɔ?
28 Kristendom lumɛi lɛ ekase Maŋtsɛ Zedekia ni ye nɔ yɛ Yerusalem lɛ, ni amɛkpɛlɛɛɛ akɛ amɛtsakeɔ amɛtsui ni amɛkɛ Nyɔŋmɔ kpataa. Nohewɔ lɛ mɛni sa akɛ wɔ mɛikpɔji lɛ wɔfeɔ yɛ jeŋ hiɛkpatamɔ ni ebɛŋkɛ lɛ hewɔ? (Yer. 21:11, 12; 22:3-5) Esani wɔteŋ mɔfɛɛmɔ atsu nɔko aŋkroaŋkro. Esa akɛ wɔdiɛŋtsɛ wɔkɔ “wala gbɛ lɛ.” Esani wɔteŋ mɔfɛɛmɔ abo nɔni Nyɔŋmɔ kɛɛ kɛtsɔ Yeremia nɔ lɛ toi, akɛ:
29 “Ni nɛkɛ maŋ nɛɛ hu okɛɛ amɛ akɛ: Bɔni Yehowa kɛɛ nɛ: Naa, mihiɛ wala gbɛ kɛ gbele gbɛ [mikɛ] miishwie nyɛhiɛ. Mɔni aaahi ma nɛŋ lɛ, eeegbo yɛ klante kɛ hɔmɔ kɛ gbelehela naa; shi mɔ moŋ ni aaaje kpo, ni eyagbee Kaldeabii ni obɔ ŋsra ewo nyɛhe lɛ adɛŋ lɛ, eyi aaana wala, ni esusuma aaatsɔ haanɔ ahalɛ. Ejaakɛ mijie mihiɛ mika maŋ nɛɛ yɛ efɔŋ gbɛ ni jeee ekpakpa gbɛ, Yehowa kɛɛ; aaatuulɛ awo Babel maŋtsɛ lɛ dɛŋ, ni ekɛ la aaashãlɛ.”—Yer. 21:8-10.
30. Mɛni hewɔ no be lɛ mli kɛji Yudafonyo ko ‘je kpo eyagbee Babilonbii adɛŋ’ lɛ ejeee nifeemɔ ni tsɔɔ akɛ esumɔɔɔ emaŋ aloo ekwa emaŋbii lɛ?
30 Kɛji Yudafonyo ko ‘je kpo ni eyagbee Kaldeabii’ ni ebawo Yuda maŋtsɛyeli lɛ he ka lɛ adɛŋ lɛ, no etsɔɔɔ akɛ esumɔɔɔ emaŋ aloo ekwa emaŋbii. No moŋ ji gbɛ ni tsɔɔ akɛ eefee toiboo eeha Yehowa Nyɔŋmɔ, mɔni ji lsrael maŋtsɛ ni anaaa ni yɔɔ ŋwɛi lɛ. No moŋ ji “wala gbɛ lɛ,” yɛ be mli ni toigbele gbɛ ni Yudafoi maŋsuɔlɔi kɔ lɛ ji “gbele gbɛ” lɛ.
31. Nakai sane lɛ tamɔ namɛi anɔ yɛ Klɛŋklɛŋ afi oha Ŋ.B. lɛ mli?
31 Sane lɛ tamɔ nɔni wɔ-Ŋmɛnɛŋmɛnɛ Beaŋ klɛŋklɛŋ afii oha lɛ mli Yudafoi komɛi ni tsɔmɔ Kristofoi fee lɛ. Yesu Kristo gba Yerusalem maŋ ni asaa ama ekoŋŋ lɛ hiɛ ni Roma asraafoi ni etsɛ́ amɛ “amaŋfɔ nihiinii” lɛ baaba amɛbakpata, lɛ he sane eto.—Mat. 24:15.
32. Nohewɔ lɛ mɛɛ kitãi Yesu wo esɛɛnyiɛlɔi ni etuu amɛhe amɛha lɛ?
32 Nohewɔ lɛ Yesu wo esɛɛnyiɛlɔi ni etuu amɛhe amɛha lɛ kitã akɛ: “Ni no dani naagbee lɛ aaaba. Nohewɔ lɛ, kɛ́ nyɛna amaŋfɔ nihiinii lɛ ni gbalɔ Daniel wie he lɛ akɛ ema hekrɔŋkrɔŋ lɛ (mɔni kaneɔ lɛ, ha ni eyoo sɛɛ!) : No lɛ mɛi ni yɔɔ Yudea lɛ ajo foi aya gɔji lɛ anɔ; mɔni yɔɔ tsuyiteŋ lɛ, ekakpeleke shi eyakɔ nɔko kɛjɛ eshia; ni mɔni yɔɔ ŋmɔshi lɛ, ekaku esɛɛ eyakɔlɔ etadei. Ejaakɛ no be lɛ mli lɛ amanehulu babaoo aaaba, ni anako nɔ dã kɛjɛ je lɛŋ shishijee mli kɛbashi ŋmɛnɛŋmɛnɛ, ni asaŋ anaŋ enɔ gbikogbiko dɔŋŋ. Ni kɛ́ efooo no gbii lɛ anɔ kpitioo lɛ, kulɛ ahereŋ heloo ko heloo ko yiwala: shi mɛi ni ahala lɛ ahewɔ lɛ aaafo no gbii lɛ anɔ kpitioo.”—Mat. 24:14-22.
33. Yɛ be ni ho kɛjɛ afi 66 kɛyashi 70 Ŋ.B, lɛ mli Iɛ, mɛni ji nɔni Yesu kitã lɛ toiboo kɛba, ni mɛni no nɔ toigbele kɛba?
33 Yudafoi ni etsɔmɔ Kristofoi ni heɔ yeɔ lɛ ye amɛ-Nuntsɔ lɛ kitã nɛɛ nɔ. Beni Roma asraafoi lɛ ku amɛsɛɛ yɛ kunim ni amɛyeee yɛ Yerusalem kɛ esɔlemɔwe, lɛ tuamɔ, yɛ afi 66 Ŋ.B. mli hewɔ lɛ, Kristofoi ni amɛwala eba oshra mli nɛɛ jo foi amɛshi Yudea kpokpaa lɛ fɛɛ nɔ. Amɛjeee gbɔmɛi ni ekwa nii ni Yudafoi lɛ peleɔ he lɛ. Amɛbo amɛ-Hiɛnyiɛlɔ Yesu Kristo moŋ toi, ni nohewɔ, lɛ amɛkɔ “wala gbɛ lɛ.” Yudafoi maŋsuɔlɔi lɛ kɔ “gbele gbɛ” ni amɛyi 1,100,000 ahiɛ kpata ‘beni Roma asraafoi ni Tatsɛnukpa Tito nyiɛ amɛhiɛ lɛ kpata Yerusalem hiɛ yɛ afi 70 Ŋ.B. mli lɛ.
34. Nɛgbɛ mɛi ni sumɔɔ wala yɛ gbɛjianɔtoo hee ko mli lɛ aaajo foi kɛaaya ni amɛshashaoŋ shi kwraa?
34 Yɛ nɛkɛ yinɔsane mli nɔkwɛmɔnii ni wɔna nɛɛ ahewɔ lɛ, mɛni wɔbaafee ŋmɛnɛ mɔ? Wɔyɛ be ni Kristo kaselɔi tsɛlɛ “nibii agbɛjianɔtoo lɛ naagbee” lɛ mli. “Amanehulu kpeteŋkpele” ni anako nɔ dã ni Yerusalem hiɛkpatamɔ lɛ fee he mfoniri lɛ kã shi ha “nɛkɛ yinɔ nɛɛ.” Amrɔ nɛɛ ebalɛ akɛ akɔ “wala gbɛ” lɛ aloo “gbele gbɛ.” Yeremia kuu lɛ ekɔ “wala gbɛ” lɛ. Kuu nɛɛ kɛɔ mɛikrokomɛi akɛ amɛ hu amɛbaanyɛ amɛfee nakai nɔŋŋ. Mɛi fɛɛ ni sumɔɔ naanɔ wala yɛ jalɛ gbɛjianɔtoo hee mli lɛ akashashao shi kwraa shi moŋ amɛtsu hegbɛ ni Nyɔŋmɔ kɛha amɛ akɛ amɛkɔ “wala gbɛ” lɛ he nii. Amɛjo foi kɛya Yehowa blafoi lɛ amasɛi.—Mat. 24:3, 34.a
[Shishigbɛ niŋmai]
a Ajie kɛjɛ September 1, 1979 Blɔfo Buu-Mɔɔ mli.
[Akrabatsa ni yɔɔ baafa 15]
“Gbɛɛmɔ aaayashɛ shikpɔŋ lɛ naagbeehe tɔ̃ɔ; ejaakɛ Yehowa kɛ jeŋmaji Iɛ ena, ekɛ heloo fiaa baakojo; mɛifɔji lɛ, eeeŋɔ amɛ eha klante! Yehowa kɛɛ. Bɔni Yehowa Zebaot kɛɛ nɛ: Naa, efɔŋ aaajɛ jeŋmaŋ nɔ aya jeŋmaŋ nɔ, ni ahum kpeteŋkpele aaate shi kɛaajɛ shikpɔŋ lɛ naagbeehe tɔ̃ɔ; ni mɛi ni Yehowa aaagbe yɛ nakai gbi Iɛ nɔ Iɛ aaakamɔ shi kɛaajɛ shikpɔŋ lɛ naagbeehe kome kɛaatee shikpɔŋ lɛ naagbeehe kroko lɛ; afeŋ amɛyara, abuaŋ amɛnaa, ni asaŋ afuŋ amɛ: amɛ aaatsɔ tumu yɛ shikpɔŋ lɛ nɔ.”—Yer. 25:31-33.
WBBR, Staten Island, N.Y.