“Ani Jeee Enɛ Ji Lee Ní Aleɔ Mi Lɛ?”

1, 2. Mɛni hewɔ nilee bɛ mli akɛ Yehoiakim aaama eshĩa lɛ?

MAŊTSƐ YEHOIAKIM miima shĩa kpele ko. Ekpɛ mli akɛ ebaama lɛ ŋwɛitsu, ni ebaaha tsũi srɔtoi ni baahi mli lɛ mli adara. Samfɛji agboi ni eeejie yɛ tsũi lɛ ahe lɛ baaha hulu akpɛ tsũi lɛ amli, ni nakai beaŋ nɔŋŋ lɛ, kɔɔyɔɔ kpakpa baaba tsũi lɛ amli koni maŋtsɛ lɛ kɛ eweku lɛ he ajɔ amɛ. Akɛ Lebanon tsenedurui ni jeɔ ŋma baakala tsũi lɛ amli. Akɛ atiifɔ tsuru (pɛnte ko) ni ashɛ kɛjɛ maŋsɛɛ lɛ baasha tsenedurui lɛ ahe koni tsũi lɛ amli atsu fɛfɛo taakɛ maji krokomɛi amli hiɛnaanɔbii lɛ sumɔɔ waa lɛ.—Yer. 22:13, 14.

² Jeee shika bibioo abaafite kɛma shĩa nɛɛ. Nakai beaŋ lɛ, shika ni maŋ lɛ fiteɔ yɛ esraafoi lɛ ahe, kɛ onia ni maŋ lɛ tsuɔ kɛhaa Mizraimbii lɛ hewɔ lɛ, shika fioo pɛ yɔɔ maŋ lɛ fotro lɛ mli. (2 Maŋ. 23:33-35) Shi, Yehoiakim na gbɛ ni ebaatsɔ nɔ ema emaŋtsɛwe hee lɛ. Ewooo tsumalɔi lɛ nyɔmɔ! Yehoiakim kɛ amɛ ye tamɔ nyɔji, eŋɔ amɛtɔlɛ kɛ deŋmegbomɔ lɛ akɛ onia ni amɛmiitsu kɛmiifi enɔyeli lɛ sɛɛ.

 3. Mɛɛ srɔtofeemɔ yɔɔ Yehoiakim kɛ etsɛ teŋ, ni mɛni hewɔ?

³ Nyɔŋmɔ tsɔ Yeremia nɔ ewie eshi Yehoiakim pɛsɛmkunya lɛ.a Ekai Yehoiakim akɛ, etsɛ Maŋtsɛ Yosia jie mlihilɛ kɛ ejurɔfeemɔ ni ekaaa kpo etsɔɔ mɛi ni bɛ nii tsɔ kɛ ohiafoi. Yosia ye amɛsane po eha amɛ yɛ saneyelihe. Yehowa gbala Yehoiakim jwɛŋmɔ kɛtee nɔ̃ ni etsɛ Yosia fee kɛha mɛi ni bɛ nɔ̃ ko tsɔ kɛ ohiafoi lɛ anɔ, ni ebi akɛ: “Ani jeee enɛ ji lee ní aleɔ mi lɛ?”—Nyɛkanea Yeremia 22:15, 16.

 4. Mɛni hewɔ esa akɛ oha lee ni ooole Yehowa lɛ akã otsui nɔ lɛ?

⁴ Beni Satan je lɛ mli shihilɛ yaa nɔ efiteɔ lɛ, ehe miihia ni wɔná yelikɛbuamɔ kɛ hebuu ni Yehowa kɛhaa mɛi ni le lɛ jogbaŋŋ lɛ eko. Belɛ, esa akɛ wɔtsi wɔbɛŋkɛ Nyɔŋmɔ kpaakpa. Ehe miihia hu ni wɔkase esui kpakpai lɛ koni no aha wɔtsu sanekpakpa shiɛmɔ nitsumɔ lɛ jogbaŋŋ. Shi ekolɛ, obaabi akɛ, ‘Te Kristofonyo ko aaafee tɛŋŋ ale Yehowa jogbaŋŋ taakɛ eba lɛ yɛ Maŋtsɛ Yosia gbɛfaŋ lɛ?’

5, 6. (a) Te tsɛ kpakpa náa ebii anɔ hewalɛ ehaa tɛŋŋ? (b) Bɔni afee ni wɔkatamɔ Yehoiakim lɛ, te esa akɛ wɔfee wɔnii wɔha tɛŋŋ koni wɔle Yehowa sui lɛ?

⁵ Susumɔ gbɛi srɔtoi anɔ ni tsɛ kpakpa tsɔɔ enáa ebii anɔ hewalɛ lɛ ahe okwɛ. Akɛ nɔkwɛmɔnɔ lɛ, kɛ́ ebii lɛ na bɔ ni efeɔ mɛi ni ehia amɛ lɛ ejurɔ lɛ, ewaaa akɛ no aaatsirɛ amɛ ni amɛ hu amɛfee mɛi ejurɔ. Kɛ́ amɛna bɔ ni ejieɔ suɔmɔ kɛ bulɛ kpo etsɔɔ amɛmami lɛ, no baanyɛ aye abua amɛ koni amɛkɛ hii loo yei aye jogbaŋŋ. Kɛ́ amɛná amɛle akɛ amɛtsɛ yeɔ anɔkwa yɛ shika saji amli, ni eshishiuuu mɛi lɛ, no tsirɛɔ amɛ ni amɛ hu amɛhi shi nakai. Hɛɛ, kɛ́ bii lɛ bale amɛtsɛ nifeemɔi kɛ esui lɛ, ewaaa akɛ amɛbaasumɔ ni kɛ́ amɛdara lɛ amɛkɛ mɛi krokomɛi aye taakɛ amɛtsɛ feɔ lɛ.

⁶ Nakai nɔŋŋ Kristofonyo ni le Yehowa taakɛ eba lɛ yɛ Yosia gbɛfaŋ lɛ, enaaa Yehowa akɛ Jeŋ Muu Fɛɛ Nɔyelɔ kɛkɛ. Biblia lɛ, ni Kristofonyo lɛ kaneɔ lɛ, haa ebaleɔ bɔ ni Nyɔŋmɔ kɛ mɛi yeɔ ehaa, ni no haa esumɔɔ akɛ ekase eŋwɛi Tsɛ lɛ. Beni eyaa nɔ ejwɛŋɔ nibii ni Nyɔŋmɔ sumɔɔ kɛ nibii ni esumɔɔɔ lɛ anɔ gbi fɛɛ gbi lɛ, suɔmɔ ni eyɔɔ kɛha Yehowa lɛ mli waa. Nɔ̃ ni tamɔɔɔ nakai lɛ, kɛ́ mɔ ko kuɔ ehiɛ eshwieɔ Nyɔŋmɔ mlai kɛ ekaimɔi anɔ, ni tsɔɔ akɛ esumɔɔɔ ni Nyɔŋmɔ náa eshihilɛ nɔ hewalɛ lɛ, enyɛŋ ele anɔkwa Nyɔŋmɔ lɛ. Ebafeɔ tamɔ Yehoiakim, mɔ ni shɛ wolokpo ni Yehowa wiemɔ ni etsɔ Yeremia nɔ ekɛha lɛ yɔɔ nɔ lɛ efɔ̃ la mli lɛ.—Nyɛkanea Yeremia 36:21-24.

 7. Mɛni hewɔ esa akɛ osumɔ akɛ ooole Yehowa taakɛ eba lɛ yɛ Maŋtsɛ Yosia gbɛfaŋ lɛ?

⁷ Ja wɔle Yehowa jogbaŋŋ dani wɔbaanyɛ wɔtsu wɔsɔɔmɔ nitsumɔ lɛ jogbaŋŋ, ni wɔná hiɛnɔkamɔ akɛ wɔbaahi jeŋ hee lɛ mli. (Yer. 9:24) Ha wɔsusu Nyɔŋmɔ sui ni awie he yɛ Yeremia woji lɛ amli lɛ ateŋ fioo komɛi ahe wɔkwɛ. Beni wɔsusuɔ Nyɔŋmɔ sui lɛ ahe lɛ, kwɛmɔ akɛ obaana gbɛi komɛi anɔ ni obaatsɔ ole Nyɔŋmɔ jogbaŋŋ ni okase esui lɛ taakɛ eba lɛ yɛ Maŋtsɛ Yosia gbɛfaŋ lɛ lo.

 8. Mɛɛ gbɛ nɔ atsɔɔ ajieɔ su ni akɛ Hebri wiemɔ che’sedh damɔ shi kɛha lɛ lɛ kpo?

⁸ Nyɔŋmɔ su ni ale yɛ Hebri wiemɔ mli akɛ che’sedh lɛ shishi ji “suɔmɔ ni tsakeee.” Wiemɔi babaoo amli lɛ, ewa akɛ aaatsɔɔ Hebri wiemɔ nɛɛ shishi jogbaŋŋ. Biblia dishinari ko tsɔɔ mli akɛ Hebri wiemɔ nɛɛ damɔ shi kɛha su ko ni ekãa, shiŋŋfeemɔ, kɛ suɔmɔ náa nɔ hewalɛ. Nakai dishinari lɛ kɛshi sɛɛ akɛ: “Kɛ́ akɛ wiemɔ ko tsu nii kɛha Hebri wiemɔ nɛɛ, ni sui etɛ nɛɛ ateŋ ekome po laaje yɛ mli lɛ, shishinumɔ ni yɔɔ sɛɛ lɛ ejeŋ kpo jogbaŋŋ.” Enɛ tsɔɔ akɛ kɛ́ mɔ ko ji gbɔmɔ kpakpa lɛ, no etsɔɔɔ doo akɛ ejieɔ suɔmɔ ni tsakeee kpo. Mɔ ni jieɔ suɔmɔ ni tsakeee kpo lɛ haa mɛi asane kãa etsui nɔ aahu akɛ, ebɔɔ mɔdɛŋ fɛɛ ni eeenyɛ kɛtsu amɛhiamɔ nii ahe nii, titri lɛ amɛmumɔŋ nɔ̃ lɛ. Shwelɛ ni eyɔɔ akɛ esa Nyɔŋmɔ Ofe lɛ hiɛ lɛ ji yiŋtoo titri hewɔ ni ejɛɔ etsui mli fɛɛ efeɔ nakai lɛ.

 9. Bɔ ni Yehowa kɛ Israel ye eha lɛ maa mɛni nɔ mi?

⁹ Gbɛ ni hi fe fɛɛ ni wɔbaanyɛ wɔtsɔ nɔ wɔnu wiemɔ ni ji “suɔmɔ ni tsakeee” ni akɛtsu nii yɛ Biblia lɛ mli lɛ shishi ji ní wɔkase bɔ ni Nyɔŋmɔ kɛ enɔkwa jalɔi lɛ ye eha yɛ afii babaoo ni eho lɛ amli. Yehowa bu Israelbii lɛ ahe ni elɛ̀ amɛ yɛ afii 40 ni amɛkɛhi ŋa lɛ nɔ lɛ mli fɛɛ. Beni amɛyɔɔ Shiwoo Shikpɔŋ lɛ nɔ lɛ, Nyɔŋmɔ hole kojolɔi koni amɛbaa Israelbii lɛ ayi kɛjɛ amɛhenyɛlɔi lɛ adɛŋ, ni agbɛnɛ hu amɛye amɛbua amɛ ni amɛku amɛsɛɛ kɛba anɔkwa jamɔ mli. Akɛni afii ohai abɔ ni Israelbii lɛ kɛhi shi akɛ maŋ lɛ mli fɛɛ lɛ, Yehowa kpɛtɛ amɛhe yɛ bei kpakpai kɛ fimɔ bei amli hewɔ lɛ, enyɛ ekɛɛ amɛ akɛ: ‘Naanɔ suɔmɔ mikɛsumɔ bo hewɔ lɛ mikɛ mlihilɛ miigbala bo.’—Yer. 31:3.b

10. Taakɛ wɔnaa yɛ Yudafoi ni yaje Babilon lɛ asane lɛ mli lɛ, mɛɛ gbɛ nɔ Yehowa tsɔɔ ejieɔ suɔmɔ ni tsakeee kpo yɛ sɔlemɔ toiboo mli?

¹⁰ Ŋmɛnɛ hu lɛ, Nyɔŋmɔ kã he eejie suɔmɔ ni tsakeee kpo yɛ gbɛi ni mɛi ni jáa lɛ lɛ náa he sɛɛ tɛ̃ɛ lɛ anɔ. Ha wɔsusu sɔlemɔ he wɔkwɛ. Yehowa boɔ mɛi fɛɛ ni yɔɔ tsui kpakpa lɛ asɔlemɔi atoi, shi etsuji ni ejɔɔ amɛhe nɔ amɛha lɛ lɛ asɔlemɔi kã etsui nɔ waa. Kɛ́ wɔtee nɔ wɔsɔle yɛ naagba ko ni miiye wɔtsui lɛ nɔŋŋ he afii abɔ po lɛ, wɔhe efeee lɛ ahuntoo; asaŋ wɔsɔlemɔ lɛ ejeee etsine. Be ko lɛ, Yehowa ha Yeremia kɛ shɛɛ ko maje Yudafoi komɛi ni yɔɔ nomŋɔɔ mli yɛ Babilon lɛ. No mli lɛ, he ni amɛyɔɔ lɛ kɛ sɔlemɔwe lɛ teŋ jekɛmɔ fe kilomitai 800, ni tsɔɔ akɛ amɛkɛ amɛwekumɛi kɛ amɛnanemɛi ni yɔɔ Yuda lɛ ateŋ ejekɛ waa. Kɛlɛ, amɛkɛ sɔlemɔwe lɛ teŋ ni ejekɛ waa lɛ fɛɛ sɛɛ lɛ, Yehowa tee nɔ ebo fai ni amɛkpa lɛ koni ekpɛlɛ amɛnɔ, kɛ eyi ni amɛjieɔ lɛ atoi. Ha bɔ ni ojɛɔ otsuiŋ osɔleɔ lɛ ahi ojwɛŋmɔŋ, ni osusu bɔ ni Yudafoi lɛ atsui nyɔ amɛmli amɛha beni amɛnu Nyɔŋmɔ wiemɔi ni yɔɔ Yeremia 29:10-12 lɛ he okwɛ.—Nyɛkanea.

11, 12. (a) Mɛɛ shiwoo Yehowa kɛha Yerusalembii lɛ? (b) Mɛɛ yelikɛbuamɔ yɔɔ kɛha mɛi ni ehe bahia ni agbala amɛtoi lɛ?

¹¹ Nɔ̃ kroko ni tsɔɔ akɛ Yehowa jieɔ suɔmɔ ni tsakeee kpo ji hekɛnɔfɔɔ ni eyɔɔ akɛ nɔ̃ ko kpakpa baanyɛ aba lɛ. Beni Yerusalem hiɛkpatamɔ lɛ bɛŋkɛɔ ni maŋbii lɛ kã he amɛmiitse atua, ni tsɔɔ akɛ amɛmiitse Nyɔŋmɔ diɛŋtsɛ hiɛ atua lɛ, mɛni baaba amɛnɔ? Hɔmɔ baagbe amɛ loo Babilonbii lɛ baakpata amɛhiɛ? Kɛ́ amɛye amɛhe aahu po lɛ, ekolɛ amɛbaayaje nomŋɔɔ mli be kplaŋŋ yɛ maŋsɛɛ, ni amɛbaagboi yɛ jɛmɛ. Shi, Yehowa yɛ “wiemɔ kpakpa” kɛha amɛteaŋ mɛi ni tsake amɛtsui, ni amɛkɔ gbɛ kpakpa lɛ. Ewo shi akɛ ‘ebaayasara’ amɛ loo ebaagbala ejwɛŋmɔ kɛya amɛnɔ. ‘Ebaaha amɛku amɛsɛɛ kɛba biɛ nɛɛ,’ ni ji amɛshikwɛ̃ɛhe ni kɛ Babilon teŋ jekɛ waa lɛ. (Yer. 27:22) No hewɔ lɛ, amɛbaawo nyamɔ lala akɛ: “Nyɛdaa Yehowa, Taiatsɛ lɛ, shi ejaakɛ Yehowa hi, ni esuɔmɔ ni tsakeee lɛ hiɔ shi kɛyaa naanɔ!”—Yer. 33:10, 11, Ga Biblia hee.

¹² Yehowa suɔmɔ ni tsakeee lɛ hewɔ lɛ, eji hewalɛwoo Jɛɛhe kɛha mɛi ni yɛ adesai asusumɔ naa lɛ anyɛŋ shihilɛ ni amɛyɔɔ mli lɛ he nɔ̃ ko afee lɛ. Ŋmɛnɛ lɛ, mɛi komɛi yɛ ni be ko ni eho lɛ amɛyɛ Kristofoi asafo lɛ mli, shi ehe bahia ni agbala amɛtoi yɛ jalɛ naa. Ekolɛ, amɛna akɛ amɛfeee ni ahi kwraa, ni no hewɔ lɛ, amrɔ nɛɛ ewaa kɛhaa amɛ akɛ amɛkɛ Nyɔŋmɔ webii lɛ baabɔ ekoŋŋ. Ekolɛ, amɛbaashwie amɛyiŋ akɛ, ‘Ani Yehowa kɛ mihe baafa mi, ni eŋɔ mi kɛba ewebii lɛ ateŋ ekoŋŋ?’ Nyɔŋmɔ Ofe lɛ yɛ “wiemɔ kpakpa” ko kɛha mɛi fɛɛ ni yɔɔ shihilɛ ni tamɔ nɛkɛ mli lɛ. Abaanyɛ ajɛ mlihilɛ mli aye abua amɛ ni amɛtsake amɛsusumɔi kɛ amɛjeŋba. Shishitoo mla ni yɔɔ sane ni wɔkane yɛ kuku 11 ni tsɔ hiɛ lɛ mli lɛ kɔɔ amɛhe—Yehowa baaku sɛɛ ekɛ amɛ aba ewebii ni yɔɔ miishɛɛ lɛ ateŋ ekoŋŋ.—Yer. 31:18-20.

13. Mɛni hewɔ esa akɛ oha bɔ ni Yehowa ye ebua Yeremia lɛ awo bo hewalɛ lɛ?

¹³ Akɛ Nyɔŋmɔ ni jieɔ suɔmɔ ni tsakeee kpo lɛ, Yehowa kwaaa enɔkwa tsuji lɛ kɔkɔɔkɔ hu. Satan je lɛ naagbee gbii nɛɛ amli lɛ, wɔyɛ yiŋtoo hewɔ ni esa akɛ wɔná hekɛnɔfɔɔ akɛ Yehowa baaha mɛi fɛɛ ni taoɔ e-Maŋtsɛyeli lɛ tsutsu lɛ ahiamɔ nii, ni ebaabu amɛhe hu. Ha ehi ojwɛŋmɔŋ akɛ, Yeremia kɛ ehiɛ fɔ̃ Yehowa nɔ kɛha edaaŋ ŋmaa kɛ hebuu yɛ Yerusalem naagbee gbii lɛ amli. Nyɔŋmɔ haaa gbalɔ lɛ nine anyɛ shi kɔkɔɔkɔ. (Yer. 15:15; nyɛkanea Yaafo 3:55-57.) Ekɔɔɔ he eko nɔnyɛɛ ni obaayaje shishi lɛ, ná hekɛnɔfɔɔ akɛ Yehowa kaiɔ nibii ni ofeɔ kɛyeɔ lɛ anɔkwa lɛ. Esuɔmɔ ni tsakeee lɛ hewɔ lɛ, eesumɔ ni eye ebua bo koni onyɛ okpee shihilɛi ni mli wawai ni okɛkpeɔ lɛ anaa.—Yaafo 3:22.

14. Mɛɛ shihilɛi ni tsɔɔ jalɛsane ni ayeee ona nyɛsɛɛ nɛɛ nɔŋŋ?

¹⁴ Awoɔ mɛi komɛi tsuŋ afii abɔ yɛ efɔŋ ko ni akɛɛ amɛfee lɛ hewɔ, tsɛbelɛ jeee amɛ amɛfee nakai efɔŋ lɛ. Shihilɛi komɛi amli po lɛ, abuɔ mɔ ko gbele fɔ ni agbeɔ lɛ, shi no sɛɛ dani anáa aleɔ akɛ jeee lɛ efee efɔŋ lɛ. Maji komɛi anɔ lɛ, fɔlɔi tsomloɔ kɛ niyenii taomɔ aahu akɛ, amɛhɔɔ amɛbii akɛ nyɔji amɛhaa mɛi bɔni afee ni weku lɛ aná nɔ̃ ko aye. Kɛ́ onu yiwalɛ saji tamɔ nɛkɛ lɛ, te onuɔ he ohaa tɛŋŋ? Te osusuɔ akɛ Yehowa nuɔ he ehaa tɛŋŋ? Biblia lɛ feɔ lɛ faŋŋ akɛ Yehowa baajie nibii fɛɛ ni kɛ nɔnaa baa lɛ kɛya. Lɛ pɛ ji mɔ ni baanyɛ afee nakai. No hewɔ lɛ, ohiafoi kɛ mɛi ni ayeɔ amɛ sane ni ejaaa ŋmɛnɛ lɛ fɛɛ, baanyɛ atsɛ amɛtsuii amɛŋmɛ amɛmli. Yehowa, Nyɔŋmɔ ni yeɔ jalɛsane lɛ miito gbɛjianɔ ni ejie amɛ kɛjɛ haomɔ ni amɛkɛkpeɔ amrɔ nɛɛ mli.—Yer. 23:5, 6.

15, 16. (a) Mɛɛ anɔkwa sane ni kɔɔ Yehowa he Yeremia ma nɔ mi? (b) Mɛni hewɔ obaanyɛ okɛ ohe afɔ̃ Nyɔŋmɔ mlai kɛ eshiwoi lɛ anɔ?

¹⁵ Yeremia beaŋ lɛ, mɛi komɛi le jogbaŋŋ akɛ Nyɔŋmɔ jalɛsane lɛ nɔ bɛ. Akɛ nɔkwɛmɔnɔ lɛ, gbalɔ lɛ tsĩ tã akɛ Israelbii lɛ baanyɛ atsake amɛtsui yɛ amɛhe eshai lɛ ahe, ni amɛfee amɛnii oookɛɛ amɛmiikã kita kɛmiima amɛtsuitsakemɔ lɛ nɔ mi akɛ: ‘Mina Yehowa kɛ minɔkwale fɛɛ, makojo yɛ jalɛ naa, ni mahi shi krɔŋŋ!’ (Yer. 4:1, 2, Ga Biblia hee) Enɛ ji anɔkwale, ejaakɛ Yehowa tsɔɔɔ jalɛsane hiɛ ebuuu shi yɛ gbɛ ko kwraa nɔ. Shi, saji krokomɛi hu yɛ ni maa nɔ mi akɛ Yehowa sumɔɔ jalɛsane.

¹⁶ Nyɔŋmɔ yeɔ ewiemɔ nɔ, ni efeee osato. Adesai babaoo kuɔ amɛshiwoi amli, shi Yehowa efeee nakai. Yehowa mlai ni kudɔɔ adebɔɔ nibii ni wɔnáa he sɛɛ lɛ po tsakeee. (Yer. 31:35, 36) Wɔbaanyɛ wɔkɛ wɔhe afɔ̃ eshiwoi kɛ emlai lɛ anɔ, ejaakɛ amɛhi kɛha wɔ be fɛɛ be.—Nyɛkanea Yaafo 3:37, 38.

17. (a) Kɛ́ Yehowa miikojo lɛ, mɛni efeɔ? (b) Mɛni hewɔ obaanyɛ oná hekɛnɔfɔɔ yɛ bɔ ni onukpai lɛ tsuɔ naagbai ni teɔ shi yɛ asafo lɛ mli lɛ ahe nii amɛhaa lɛ mli lɛ? (Kwɛmɔ akrabatsa ni ji “Amɛkojoɔ yɛ Yehowa Najiaŋ,” ni yɔɔ baafa 148 lɛ.)

¹⁷ Kɛ́ Yehowa miikojo lɛ, jeee nɔ̃ ni enaa yɛ kponɔgbɛ lɛ pɛ nɔ edamɔɔ ebuaa sane lɛ. Ekwɛɔ nii kɛyaa shɔŋŋ bɔni afee ni ena sane lɛ mli kri kɛ dɛkɛ. Kɛfata he lɛ, epɛiɔ nɔ ni haa mɛi ni ekojoɔ lɛ baa amɛjeŋ yɛ gbɛ pɔtɛɛ ko nɔ lɛ mli. Amrɔ nɛɛ, datrɛfoi yɛ gbɛi kɛ tsɔji krɛdɛi komɛi ni amɛkɛtsuɔ nii kɛkwɛɔ helatsɛ ko tsui beni eetswa lɛ, ni no haa amɛnaa bɔ ni tsui lɛ yɔɔ diɛŋtsɛ. Aloo amɛbaanyɛ amɛkwɛ kɛji sabai ni doɔ lá nɔ lɛ miitsu nii jogbaŋŋ lo. Yehowa baanyɛ afee nɔ̃ ni fe nakai. Epɛiɔ mfonirifeemɔŋ tsui lɛ kɛ nɔ̃ ni tsirɛɔ mɔ ko nifeemɔi, kɛ agbɛnɛ mfonirifeemɔŋ sabai lɛ ni damɔ shi kɛha bɔ ni mɔ lɛ nuɔ nii ahe ehaa yɛ etsuiŋ tɔ̃ɔ lɛ amli. No hewɔ lɛ, ebaanyɛ ena nɔ̃ ni tsirɛɔ mɔ ko koni efee enii yɛ gbɛ pɔtɛɛ ko nɔ, kɛ bɔ ni mɔ lɛ nuɔ enifeemɔi lɛ ahe ehaa. Ni nibii pii ni Ofe lɛ niiamlipɛimɔ lɛ haa enaa lɛ haaa eyiŋ afutu lɛ. Yehowa pɛiɔ nakai saji lɛ fɛɛ amli jogbaŋŋ dani ekojoɔ wɔ; ni efeɔ enɛ jogbaŋŋ bɔ ni adesai ateŋ kojolɔi ni hiɛ kã shi fe fɛɛ lɛ po nyɛŋ afee.—Nyɛkanea Yeremia 12:1a; 20:12.

18, 19. Mɛɛ gbɛ nɔ Nyɔŋmɔ jalɛsane ni wɔɔkase lɛ baanyɛ aná wɔnɔ hewalɛ?

¹⁸ No hewɔ lɛ, kɛ́ bei komɛi lɛ ohenilee yiɔ bo yɛ otsutsu eshai ahewɔ lɛ, oyɛ yiŋtoo kpakpa hewɔ ni esa akɛ oná hekɛnɔfɔɔ yɛ Yehowa mli. Ohiɛ akakpa nɔ akɛ, Yehowa ji Kojolɔ Musuŋtsɔlɔ ni miisumɔ ni eye ebua bo; efeee enii tamɔ mɔ ko ni eyasama mɔ ko yɛ saneyelihe, ni etswa efai shi akɛ kɛ́ mɔ lɛ tee ŋwɛi eba shi po lɛ, ebaaha agbala etoi. Kɛ́ gbɛ ni okɔ tsutsu ko loo sane ko ni yɔɔ okɛ mɔ ko teŋ lɛ haa ohaoɔ lɛ, bi Yehowa ni ‘eye osane lɛ’ eha bo loo eŋɔ ohaomɔi lɛ koni onyɛ ojie ojwɛŋmɔ yɛ nɔ.c Kɛ́ oha Nyɔŋmɔ ye ebua bo lɛ, obaana akɛ sɔɔmɔ krɔŋŋ lɛ ni oooya nɔ otsu lɛ ji nɔ̃ ko ni kã Nyɔŋmɔ tsui nɔ waa.—Nyɛkanea Yaafo 3:58, 59.

¹⁹ Nilee yɛ mli akɛ, Nyɔŋmɔ ni yeɔ jalɛsane kɛmɔɔ shi lɛ baakpa gbɛ akɛ mɛi ni taoɔ akɛ amɛná ehiɛ duromɔ lɛ diɛŋtsɛ hu baaye jalɛsane. (Yer. 7:5-7; 22:3) Gbɛ kome ni he hiaa waa ni wɔbaanyɛ wɔtsɔ nɔ wɔkase Nyɔŋmɔ jalɛsane lɛ ji ni wɔbaashiɛ sanekpakpa lɛ wɔha gbɔmɛi srɔtoi fɛɛ. Kɛ́ ofeɔ sɛɛkuukɛsaramɔi kɛ Biblia mli nikasemɔi bɔ ni atsɔɔ wɔ akɛ wɔfee lɛ lɛ, no tsɔɔ akɛ ookase Nyɔŋmɔ jalɛsane ni nɔ bɛ lɛ, ni mɛi baaná he sɛɛ jogbaŋŋ. Mɛni hewɔ? Nyɔŋmɔ miisumɔ akɛ gbɔmɛi srɔtoi fɛɛ akase ehe nii koni ahere amɛyiwala. (Yaafo 3:25, 26) Mɛɛ hegbɛ kpele po eji nɛkɛ akɛ oji Nyɔŋmɔ hefatalɔ nitsulɔ, ni tsɔɔ akɛ oojie ejalɛsane lɛ kpo yɛ nakai yiwalaheremɔ nitsumɔ lɛ mli!

20. (a) Mɛɛ gbɛ ko ni Nyɔŋmɔ tsɔɔ nɔ ekɛ mɛi yeɔ lɛ Yeremia ma nɔ mi? (b) Mɛɛ tsakpaa kã wiemɔ ni akɛtsu nii akɛ ‘Yehowa shwa ehe’ lɛ kɛ Yehowa eshaifaa lɛ teŋ? (Kwɛmɔ akrabatsa ni ji “Mɛɛ Gbɛ nɔ Yehowa ‘Shwaa Ehe’?” lɛ.)

²⁰ Mɛi babaoo susuɔ akɛ wiemɔi ni awieɔ ashiɔ efɔŋfeemɔi sɔŋŋ ji nɔ̃ ni eyi Yeremia kɛ Yeremia Yaafo woji lɛ amli. Nakai susumɔ lɛ haa akuɔ hiɛ ashwieɔ bɔ ni Yehowa sumɔɔ ni ejɛ etsui mli ekɛ ewebii lɛ ahe eshai afa amɛ taakɛ aŋmala yɛ woji nɛɛ amli lɛ nɔ. Ewo Yudafoi lɛ ŋaa akɛ: “Nyɛteŋ mɔ fɛɛ mɔ aku esɛɛ kɛjɛ egbɛ fɔŋ lɛ nɔ, ní nyɛsaa nyɛgbɛi kɛ nyɛnifeemɔ nii lɛ!” Be kroko lɛ, Yeremia wie etsɔɔ amɛ akɛ: “Nyɛsaa nyɛgbɛi kɛ nyɛnifeemɔ nii lɛ, ní nyɛboa Yehowa, nyɛ-Nyɔŋmɔ lɛ, gbee toi, ni Yehowa aaashwa ehe yɛ nɔ̃ fɔŋ ní ewie yɛ nyɛhe lɛ hewɔ!” (Yer. 18:11; 26:13) Wɔgbii nɛɛ amli hu lɛ, Yehowa kɛ mɛi fɛɛ ni jɛɔ amɛtsuiŋ tɔ̃ɔ amɛshwaa amɛhe, ni amɛkpaa efɔŋfeemɔ lɛ ahe faa amɛ tswaa.

21. Mɛɛ yiŋtoo hewɔ Yehowa kɛ mɔ ko he eshai faa lɛ?

²¹ Kɛlɛ, jeee eshaifaa he kɛkɛ Yehowa wieɔ. Ekɛ eshai faa. Yehowa tsɔ Yeremia nɔ ewie etsɔɔ Israelbii lɛ akɛ: “Kuu osɛɛ, sɛɛsɛɛyalɔ Israel! . . . Mitũŋ mihiɛ miwoŋ nyɛ dɔŋŋ . . . Mibɛ̀ŋ nyɛ miwoŋ mimli kɛyaŋ naanɔ!” (Yer. 3:12) Kɛ́ Nyɔŋmɔ kɛ ewebii lɛ ateŋ mɔ ko he esha fa lɛ lɛ, edamɔɔɔ mɔ lɛ tsutsu esha lɛ nɔ̃ ni ekɛ lɛ aye. Eyɛ mli akɛ mɔ lɛ etɔ̃ moŋ, shi Yehowa sumɔɔ ni esaa ekɛ mɔ lɛ teŋ wekukpaa ni efite lɛ. Ekɔɔɔ he eko eshai ni mɔ lɛ fee lɛ, kɛ́ mɔ lɛ jɛ etsuiŋ etsake ni ebi Nyɔŋmɔ dɛŋ eshaifaa lɛ, Yehowa ‘baaŋɔ mɔ lɛ kɛba ekoŋŋ,’ ni tsɔɔ akɛ ebaakpɛlɛ mɔ lɛ nɔ, ni ejɔɔ lɛ. (Yer. 15:19) Esa akɛ nakai shiwoo lɛ awo mɔ fɛɛ mɔ ni amrɔ nɛɛ etsi ehe kɛjɛ anɔkwa Nyɔŋmɔ lɛ he lɛ hewalɛ, ni eku esɛɛ kɛba eŋɔɔ ekoŋŋ. Ani okpɛlɛɛɛ nɔ akɛ Yehowa eshaifaa lɛ haa wɔsumɔɔ akɛ wɔtsi wɔbɛŋkɛ lɛ kpaakpa?—Nyɛkanea Yaafo 5:21.

22, 23. Beni okaseɔ bɔ ni Yehowa kɛ eshai faa lɛ, mɛni esa akɛ efee oti ni ma ohiɛ?

²² Kɛ́ mɔ ko eyasusuuu nii ahe jogbaŋŋ, ni ewie nɔ̃ ko loo efee nɔ̃ ko ni gba onaa lɛ, ani obaafee onii tamɔ Yehowa? Nyɔŋmɔ wie yɛ blema Yudafoi ni ekɛ amɛhe eshai fa amɛ lɛ ahe akɛ ‘ebaatsuu amɛhe.’ (Nyɛkanea Yeremia 33:8.) Amɛhe ni ebaatsuu lɛ tsɔɔ akɛ, ebaajie ejwɛŋmɔ kɛjɛ eshai ni mɛi ni etsake amɛtsui lɛ fee lɛ anɔ; ebaana amɛ tamɔ mɛi ni kpaako amɛje shishi amɛmiisɔmɔ lɛ. Anɔkwa, kɛ́ Nyɔŋmɔ kɛ mɔ ko he eshai fa lɛ lɛ, no etsɔɔɔ akɛ etsuu mɔ lɛ he kɛjɛ esha ni ená kɛjɛ Adam dɛŋ lɛ he, ni amrɔ nɛɛ mɔ lɛ eye emuu ni esha bɛ ehe. Fɛɛ sɛɛ lɛ, wɔbaanyɛ wɔkase nɔ̃ ko kɛjɛ wiemɔ ni Nyɔŋmɔ wie akɛ ebaatsuu adesai ahe lɛ mli. Wɔbaanyɛ wɔtsuu mɔ lɛ he susumɔ ni wɔhiɛ yɛ wɔtsuiŋ lɛ he kɛtsɔ mɔdɛŋ ni wɔɔbɔ koni wɔjie wɔjwɛŋmɔ kɛjɛ esha ni mɔ lɛ fee lɛ, loo enifeemɔ ni gba wɔnaa lɛ nɔ. Mɛɛ gbɛ nɔ?

²³ Ŋɔɔ lɛ akɛ, akɛ weku jwine ko eke bo. Kɛ́ ehe wo muji loo nɔ̃ ko ka he lɛ, ani nɔ̃ klɛŋklɛŋ ni baa ojwɛŋmɔŋ ji oshɛ ofɔ? Kɔkɔɔkɔ. Ekolɛ, obaabɔ mɔdɛŋ fɛɛ ni ooonyɛ koni ojie muji loo nibii ni ekakaa he lɛ fɛɛ. Obaasumɔ ni efee fɛo taakɛ eji tsutsu lɛ, ni kɛ́ hulu kpɛ nɔ lɛ ekpɛlɛ. Nakai nɔŋŋ, obaanyɛ obɔ mɔdɛŋ waa ni ojie nyɛmi ko ni efee nɔ̃ ko ni egba onaa lɛ he mlifu ni yɔɔ omli lolo lɛ kɛjɛ otsuiŋ. Bɔɔ mɔdɛŋ ni ojie ojwɛŋmɔ kɛjɛ wiemɔi loo nifeemɔi ni gba onaa lɛ anɔ. Kɛ́ obɔ mɔdɛŋ ojie ojwɛŋmɔ kwraa kɛjɛ nibii nɛɛ anɔ lɛ, belɛ otsuu susumɔi ni ohiɛ yɛ otsuiŋ yɛ mɔ ni okɛ ehe efa lɛ lɛ he lɛ he. Akɛni ojwɛŋmɔ ni ojie kɛjɛ nakai nibii lɛ anɔ lɛ etsuu mɔ lɛ he susumɔi ni ohiɛ lɛ he hewɔ lɛ, naanyobɔɔ kpaakpa ni yɔɔ okɛ mɔ lɛ teŋ, ni etamɔ nɔ̃ ni efite kwraa lɛ mli bawaa ekoŋŋ.

24, 25. Kɛ́ obale Yehowa jogbaŋŋ taakɛ eba lɛ yɛ Maŋtsɛ Yosia gbɛfaŋ lɛ, mɛni baajɛ mli kɛba?

²⁴ Beni wɔkaseɔ Yehowa he nii ni wɔbaleɔ lɛ jogbaŋŋ lɛ, wɔbaleɔ esui kɛ enifeemɔi komɛi, ni fioo komɛi ahe nii wɔkase yɛ yitso nɛɛ mli lɛ. Wɔna akɛ kɛ́ wɔle Yehowa jogbaŋŋ lɛ, no haa wɔshweɔ waa akɛ wɔbaasɔmɔ lɛ yɛ gbɛ ni sa nɔ. Kɛ́ wɔná wɔle Yehowa jogbaŋŋ taakɛ eba lɛ yɛ Maŋtsɛ Yosia gbɛfaŋ lɛ, wɔmii baashɛ wɔhe be fɛɛ be, ni miishɛɛ ji Nyɔŋmɔ sui lɛ eko.

²⁵ Kɛ́ wɔle Yehowa jogbaŋŋ lɛ, no baaye abua wɔ ni wɔkɛ mɛi aye jogbaŋŋ. Kɛ́ wɔbɔ mɔdɛŋ wɔjie suɔmɔ ni tsakeee kpo, wɔye jalɛsane, ni wɔkɛ mɛi ahe fa amɛ taakɛ Yehowa feɔ lɛ, wɔkɛ mɛi baabɔ naanyo jogbaŋŋ yɛ Kristofoi asafo lɛ mli, ni wɔbasumɔŋ akɛ wɔɔfee nɔ̃ ko ni baafite naanyobɔi nɛɛ. Kɛfata he lɛ, kɛ́ wɔmiifee sɛɛkuukɛsaramɔi kɛ Biblia mli nikasemɔi ni mɔɔ shi yɛ wɔshikpɔŋkuku lɛ mli lɛ, wɔbaatsɔɔ nii jogbaŋŋ. Mɛi ni yɔɔ wiemɔ lɛ he miishɛɛ lɛ baaná nɔkwɛmɔnɔ kpakpa ni wɔfeɔ akɛ Kristofoi lɛ he miishɛɛ waa. No haa wɔbafeɔ mɛi ni sa jogbaŋŋ akɛ wɔye wɔbua amɛ koni amɛnyiɛ “gbɛ kpakpa lɛ” nɔ, hɛɛ ni amɛja Yehowa jogbaŋŋ.—Yer. 6:16.