Kunim Ni Ayeɔ “Yɛ Naagbee Gbii lɛ Amli”
“Nyɔŋmɔ ko yɛ ŋwɛi ni jieɔ teemɔŋ saji ashi, ni eeetsɔɔ nɔ ni baaba wɔsɛɛ.”—DANIEL 2:28.
YEREMIA, EZEKIEL, DANIEL—mɛɛ gbalɛi ni yɔɔ miishɛɛ nakai gbɛi lɛ kaiɔ wɔ nɛkɛ! Nɔ ni fe afii 2,600 ni eho nɛ ni nakai Nuŋtsɔ Maŋtsɛ Yehowa tsuji etɛ ni yɔɔ ekaa nɛɛ hi shi kɛtsɔ nakai hemɔkɛyeli kwalɔ Yerusalem naagbee gbii lɛ amli, eyɛ mli akɛ amɛsɔmɔ yɛ shihilɛ sɔrɔtoi ashishi yɛ hei sɔrɔtoi. Shi amɛteŋ mɔ fɛɛ mɔ jɛ egbɛhe lɛ egba nibii ni baaba ni aaaya ayagbe naa yɛ “nɔ ni baaba wɔsɛɛ” lɛ naagbee kwraa lɛ amli. Abaa nakai ŋmalɛi ni jɛ mumɔŋ lɛ ayi kɛha mɛi fɛɛ ni sumɔɔ Nyɔŋmɔ kɛ jalɛ nifeemɔ ni sumɔɔ akɛ amɛaaje “amanehulu kpeteŋkpele” lɛ ni baa yɛ wɔgbii nɛɛ amli lɛ mli lɛ ahewalɛwoo.—Mateo 24:3-22; Romabii 12:4.
2 Yeremia gba yɛ Yerusalem. Yɛ be mli ni amanehulu lɛ bɛŋkɛɔ lɛ, no mli lɛ nɔyelɔi lɛ kɛ mɛi ni ayeɔ amɛnɔ lɛ fɛɛ ebote mlakwamɔ kɛ fitemɔ mli. No hewɔ Iɛ, Yehowa waje egbalɔ lɛ tamɔ “akɔɔbele gbogbo ni wa” koni edamɔ shi shiŋŋ yɛ amɛnɔfɔŋfeemɔ lɛ mli.—Yeremia 15:11, 20; 23:13, 14.
Toiŋjɔlɛ He Gbalɔi
3. Mɛɛ apasa wiemɔi gbalɔi lɛ wieɔ?
3 Yehowa jaje kɛtsɔ Yeremia nɔ yɛ Yerusalem jamɔ mli hiɛnyiɛlɔi nɔfɔŋfeelɔi lɛ ahe akɛ: “Nyɛkaboa gbalɔi ni gbaa tsɔɔ nyɛ lɛ awiemɔi atoi! Ejaakɛ amɛhaa nyɛduɔ gbɛ kɛyaa yakayaka nii ahe; amɛtsuiiaŋ ninaa amɛwieɔ, jeee nɔ ni jɛ Yehowa daaŋ. Daa nɛɛ amɛkɛɔ mɛi ni gbeɔ mihe guɔ lɛ akɛ: Yehowa kɛɛ akɛ: Nyɛaana hejɔlɛ; Nakai amale gbalɔi lɛ miikɛɛ akɛ, “Toiŋjɔlɛ yɛ! Toiŋjɔlɛ yɛ!” yɛ be mli ni toiŋjɔlɛ ko bɛ.—Yeremia 23:16, 17; 6:14.
4. Mɛɛ hiɛnɔkamɔ ji nɔ ni mɛi ni yɔɔ Kristendom lɛ ateŋ mɛi pii kɛ amɛhe kpɛtɛɔ he?
4 Nakai nɔŋŋ hu ŋmɛnɛ, amale gbalɔi yɛ Kristendom ni ekwa hemɔkɛyeli lɛ mli. Amɛteŋ mɛi pii kɛ amɛhe kpɛtɛɔ nɔ ni Paapa Paul VI tsɔɔ mli akɛ “naagbee hiɛnɔkamɔ kɛha gbeekpamɔ kɛ toiŋjɔlɛ,” ni ji Jeŋmaji Ekomefeemɔ lɛ he. Nakai kuu lɛ ejaje 1986 akɛ eji Majimaji Ateŋ Toiŋjɔlɛ Afi. Yɛ be mli ni etswaa eyiŋtoo akɛ ekɛ ehe baawo Afi lɛ mli nifeemɔi amli lɛ he adafi lɛ, Paapa lɛ Nɔyeli He lɛ jaje akɛ eyɛ “hiɛnɔkamɔ akɛ Afi nɛɛ kɛ nɔ ni ashweɔ akɛ ebaaba lɛ baaba ni akɛ ebaakadi be krɛdɛɛ ko ni kɛ toiŋjɔlɛ wekukpaa baaba gbɔmɛi kɛ jeŋmaji ateŋ.” Shi ani jwɛŋmɔ yɛ mli akɛ aaakpa gbɛ akɛ jeŋmaji lɛ kɛ anɔkwale toiŋjɔlɛ baaba?
5. Mɛni Yehowa gba fɔ shi, ni ebaaba mli yɛ “naagbee gbii lɛ amli” yɛ mɛɛ gbɛ nɔ?
5 Nyɔŋmɔ diɛŋtsɛ tsɔɔ nɔ ni baaba lɛ mli: “Naa, Yehowa lasuogbele lɛ ni ji emlifu lɛ eje kpo, lasuogbele ni tsɔmɔɔ ni, ni eebɔle mɛi fɔji ayitsei ahe. Yehowa mlifu lɛ kpaleŋ kɛyashi beyinɔ ni eeefee egbe naa, ni eeeha etsui mli yiŋtoi lɛ aba mli; ni naagbee gbii lɛ amli lɛ nyɛaana shishi pɛpɛɛpɛ!” (Yeremia 23:19, 20; kwɛmɔ 30:23, 24 hu.) Hɛɛ, apasa jamɔ mli hiɛnyiɛlɔi lɛ baanu nɔ ni “naagbee gbii lɛ, tsɔɔ nɛɛ shishi pɛpɛɛpɛ. Shi nɔ fɛɛ nɔ ni amɛaasusu yɛ he lɛ baafee nɔ ni ekpe sɛɛ tsɔ!—Okɛto Kpojiemɔ 18:10, 16; 19:11- 16; Mateo 24:30 he.
6. Mɛni ni yɔɔ miishɛɛ baajɛ mli aba aha mɛi pii?
6 Shi yɛ miishɛɛ mli lɛ, aŋkroaŋkroi babaoo ni tsutsu lɛ amɛji nyɔji kɛha apasa jamɔ lɛ ‘miina shishi pɛpɛɛpɛ.’ Amɛboɔ tsɛmɔ akɛ: “Nyɛjea [apasa jamɔ] emli, mimaŋ” lɛ toi, ejaakɛ amɛsumɔɔɔ ni amɛnaa ehe eshai Iɛ eko aloo kojomɔ ni Nyɔŋmɔ kɛshiɔ lɛ lɛ eko baa amɛnɔ. Kɛ́ oji mɛnɛɛmɛi ateŋ mɔ kome lɛ, eba akɛ ooobo nɔ ni Nyɔŋmɔ Wiemɔ lɛ kɛɔ yɛ “naagbee gbii lɛ amli” lɛ kɛ anunyam toiŋjɔlɛ be ni baanyiɛ sɛɛ aba lɛ toi.—Kpojiemɔ 18:2, 4, 5; 21:3, 4.
Tutuamɔ Ni Gog Kɛaaba
7. Mɛɛ shihilɛi amli nɛkɛ Ezekiel gba yɛ?
7 Shi mɛni baa Nyɔŋmɔ webii anɔ yɛ “naagbee gbii lɛ amli” lɛ? Ha gbalɔ Ezekiel agba wɔ. Akɛ obalanyo lɛ, ŋwanejee ko bɛ he akɛ ele Yeremia, shi akɛ Ezekiel tee Babilonia. Ni jɛmɛ faa ni ji Keba lɛ naa eta ni akɛ nitsumɔ wo edɛŋ yɛ afi 613 D.Ŋ.B. koni esɔmɔ akɛ Yehowa gbalɔ kɛ bulɔ eha Yudafoi ni yɔɔ nomŋɔɔ mli lɛ, sɔɔmɔ ni kɛ hooo lɛ ekɛ afii 22 tsu yɛ anɔkwayeli mli. Shi egbalɛ lɛ tekeɔ lɛ diɛŋtsɛ ebe lɛ kwraa. Ekɛɔ wɔ Gog ni jɛ Magog’ lɛ he sane yɛ yitsei 38 kɛ 39 lɛ.
8, 9. (a) Mɛɛ sane oti ko esa akɛ ana naa, ni yɛ mɛɛ be? (b) Namɔ ji Gog, namɛi nyiɛ esɛɛ, ni mɛɛ yiŋtoo he nii etsuɔ lɛ? (d) Mɛni Yehowa baafee Gog?
8 Namɔ ji ‘Gog ni jɛ Magog’ nɛɛ? Ojogbaŋŋ, namɔ ji Yehowa henyɛlɔ ni fe fɛɛ ni esa akɛ ekɛ lɛ atao je muu fɛɛ sane ni fe fɛɛ lɛ naa yɛ “naagbee gbii lɛ amli,” ni kɔɔ je muu fɛɛ nɔyeli he lɛ! Lɛ ji Satan Abonsam, ni Tookwɛlɔ kɛ Maŋtsɛ Yesu Kristo shɛ́ lɛ kɛjɛ ŋwɛi efɔ shikpɔŋ nɔ yɛ be mli ni akɛ Lɛ ta maŋtsɛsɛi nɔ yɛ 1914 lɛ. Gog ni aba lɛ shi ni emli efu nɛɛ etsɔ mɔ ni atsi enaa awo mumɔi ashihilɛ he ko, “Magog shikpɔŋ lɛ nɔ,” ni ebɛŋkɛ shikpɔŋ nɛɛ. Enɛ tsɔɔ “kpoo ha shikpɔŋ lɛ” ejaakɛ Gog le akɛ be ni eyɔɔ ni ekɛaatsu eyiŋtoo fɔji ni ji ‘aye nɔ loo akpata hiɛ’ lɛ he nii lɛ faaa.—Ezekiel 37:24-28; 38:1, 2; Kpojiemɔ 11:18; 12:9-17.
9 Ezekiel tsɛ wiemɔ kɛjɛ Nuŋtsɔ Maŋtsɛ Yehowa diɛŋtsɛ’wiemɔi amli akɛ: “Naa, mikɛo ena, bo Gog ni ji lumɔ [jeŋ nɔyelɔ] lɛ! Ni malakao, ni mikɛ kpoji aaatsɛrɛ okadaai amli, ni magbalao kɛaaje kpo kɛ ota lɛ fɛɛ, . . . majimaji babaoo fata ohe!” (Ezekiel 38:3-6; Yohane 12:31) Hɛɛ, gbɔmɛi babaoo yɛ Gog masɛi, ejaakɛ “jeŋ muu lɛ fɛɛ ka mɔfɔŋ lɛ mli.” (Yohane 5:19) Shi kɛlɛ, Yehowa baanyɛ ekɛ okadi kpoji atsɛrɛ Gog kadai amli koni ekɛgbala lɛ. Shi mɛni hewɔ, ni yɛ mɛɛ gbɛ nɔ?
10. (a) Namɔ nɔ Yehowa Odasefoi kɛ amɛhiɛ fɔɔ ni tamɔɔɔ jeŋmaji lɛ? (b) Mɛni hewɔ Gog kɛ esafo yuu lɛ amli woɔ la lɛ? (d) Mɛni esa akɛ wɔfee koni wɔje mli?
10 Akɛni amɛyɔɔ Gog hewalɛ shishi hewɔ lɛ, jeŋ hewalɛi ni fe fɛɛ lɛ miiwie ŋmɛnɛ akɛ jeŋ toiŋjɔlɛ damɔ nuklea tawuu nii ni yɔɔ gbeyei lɛ anaabuamɔ babaoo nɔ. Ni jeŋmaji krokomɛi hu fiɔ amɛsɛɛ. Shi, Nyɔŋmɔ webii ni “abua amɛnaa kɛjɛ jeŋmaji fɛɛ mli” lɛ kpoɔ tawuu nii ni akɛyeɔ awui. Yehowa Odasefoi ji “maŋ” kome pɛ ni yɔɔ shikpɔŋ nɔ ni baanyɛ akɛɛ yɛ anɔkwayeli mli akɛ, “Nyɔŋmɔ nɔ wɔhiɛ ka.” (Yesaia 2:4; 31:1; Abɛi 3:5) Nɛkɛ Yehowa Odasefoi ni sumɔɔ toiŋjɔlɛ nɛɛ hiɔ shi “shweshweeshwe, ni amɛ fɛɛ amɛhiɔ shi ni amɛbɛ gbogbo, ni amɛbɛ agbo sɛɛ adabaŋi loo agboi hu.” “Amɛhiɔ shikpɔŋ laŋmɔ lɛ nɔ,” ejaakɛ amɛji mɛi ni jeŋmaji fɛɛ egbala amɛjwɛŋmɔ kɛtee amɛnɔ akɛ gbɔmɛi kome ni Gog yeko amɛnɔ kunim. (Ezekiel 38:11, 12) No hewɔ lɛ, Gog ni jɛ Magog ni mli efu lɛ kɛ edaimonioi agbɛjianɔtoo lɛ fɛɛ baa tawuu he lɛ. Ákɛ jata ni miihu lɛ, nɛkɛ Satan ni aba lɛ shi nɛɛ saa ehe kɛhaa enaagbee tutuamɔ. Bɔni afee ni wɔje mli lɛ, esa akɛ ‘wɔdamɔ shi shiŋŋ yɛ hemɔkɛyeli lɛ mli wɔshi lɛ.’—1 Petro 5:8, 9.
11. Mɛɛ gbɛ nɔ Yehowa tsɔɔ ekɛ ‘Gog baa eshikpɔŋ nɔ,’ ni kɛha mɛɛ yiŋtoo?
11 Yehowa fa Ezekiel akɛ: “No hewɔ lɛ gbaa, gbɔmɔ bi, ni okɛɛ Gog akɛ, bɔ ni Nuŋtsɔ Yehowa kɛɛ nɛ: Ani gbi ni mimaŋ [mumɔŋ] Israel aaahi shi shweshweeshwe lɛ, oteŋ shi . . . ?” Gog kɛ etai lɛ hiɛ kɔɔ shweshweeshwe shihilɛ kɛ shweremɔ ni amɛnaa yɛ Yehowa Odasefoi ahe ŋmɛnɛ lɛ nɔ. Amɛmli ewo la akɛ mɛnɛɛmɛi efee amɛhe mɛi ni “jɛɛɛ [Satan] je nɛŋ.” No hewɔ lɛ, Yehowa liɔ Gog, ekanyaa lɛ koni etutua Odasefoi ni bɛ gbogbo ko lɛ. Yehowa kɛɔ Gog akɛ: “Ni ooofa kɛaaba mimaŋ Israel nɔ, tamɔ atatu ni haa shikpɔŋ lɛ nɔ Naagbee gbii lɛ amli lɛ ni eeeba mli akɛ maha obatua shikpɔŋ lɛ, koni jeŋmaji lɛ ana ale mi, beni aaafee mi krɔŋkrɔŋ yɛ omli yɛ amɛhiɛ lɛ oo Gog.”—Ezekiel 38:14, 16; Yohane 17:14, 16.
12. Taakɛ Ezekiel 38:18-23 tsɔɔ lɛ, mɛni baajɛ Gog tutuamɔ lɛ mli aba?
12 Gog ni mli ewo la lɛ efa koni eyatutua Yehowa webii lɛ ‘ashikpɔŋ’ ni shwereɔ lɛ. Shi ani Gog nɛɛ ji mɔ ni esa akɛ emli awo la? Ni Nuŋtsɔ Maŋtsɛ Yehowa hu mli ni efu Gog kɛ mɛi ni elaka amɛ lɛ hu? Yehowa tsɔɔ bɔ ni ‘efeɔ lɛ diɛŋtsɛ ehe krɔŋkrɔŋ yɛ jeŋmaji lɛ ahiɛ’ yɛ Ezekiel 38:18-23 ekɛtsɔɔ bɔ ni ekɛ Gog baa hiɛkpatamɔ mli kɛ tsuji anɔkwafoi ni ehereɔ amɛyiwala lɛ nɔ. Shi yɛ be mli ni ekɛ kunim ni eyeɔ yɛ Gog kɛ esafo lɛ nɔ lɛ he amaniɛbɔɔ baa naagbee lɛ, Nuŋtsɔ Maŋtsɛ lɛ diɛŋtsɛ jaje akɛ: “Ni amɛaana amɛle akɛ Mi ji Yehowa.” Abu enunyam gbɛi Iɛ bem!
‘Ajie Teemɔŋ Saji Ashi’
13. Daniel to okadi fɛfɛo efɔ shi eha obalaŋtai Odasefoi yɛ mɛɛ gbɛ nɔ?
13 Yɛ be mli ni Ezekiel gbaa yɛ Yudafoi ni atswa amɛnaneshi tu ni yɔɔ he ni bɛŋkɛ Babilon lɛ ateŋ lɛ, no mli lɛ Daniel obalanyo lɛ ni jɛ Yudafoi odehei aweku mli lɛ miiná tsɔsemɔ yɛ Nebukadnezar maŋtsɛwe lɛ. Eto okadi kpakpa yɛ jɛmɛ eha ŋmɛnɛŋmɛnɛ Yehowa tsuji obalaŋtai fɛɛ akɛ emuuyeli mli hiɛlɔ.—Daniel 1:8, 9.
14. Mɛɛ sane mli ni obalanyo Daniel kɛ yijiemɔ fɛɛ ha Nyɔŋmɔ yɛ lɛ?
14 Yerusalem shigbeemɔ lɛ sɛɛ afi ni ji enyɔ lɛ mli lɛ, Nebukadnezar hao yɛ lamɔ ko hewɔ. Beni ete shi lɛ, enyɛɛɛ ekai lamɔ lɛ. Shi Daniel ni sheɔ Nyɔŋmɔ gbeyei lɛ ha maŋtsɛ lɛ le lamɔ lɛ kɛ eshishitsɔɔmɔ lɛ fɛɛ. Yɛ nakai feemɔ mli lɛ, ekɛ yijiemɔ lɛ fɛɛ ha Nyɔŋmɔ ni ekɛɛ maŋtsɛ lɛ akɛ: “Shi Nyɔŋmɔ ko yɛ ŋwɛi ni jieɔ teemɔŋsaji ashi, ni eeetsɔɔ Maŋtsɛ Nebukadnezar nɔ ni baaba wɔsɛɛ (yɛ naagbee gbii lɛ amli) .” (Daniel 2:28) Mɛni wɔkaseɔ kɛjɛɔ lamɔ lɛ kɛ bɔ ni akɛto “wɔsɛɛ be” aloo naagbee gbii lɛ amli lɛ he lɛ mli?
15, 16. Mɛni ji Nebukadnezar lamɔ lɛ shishitsɔɔmɔ lɛ?
15 Wɔnaa amaga kpeteŋkpele ko ni su mli nibii sɔrɔtoi ni tsara nɔ akɛfee. Daniel tsɔɔ mli akɛ enɛɛmɛi damɔ shi kɛha maŋtsɛyelii sɔrɔtoi ni ekɛɛ Nebukadnezar akɛ, “Bo ji shika yitso Iɛ,” ni eka shi faŋŋ akɛ eetsɔɔ Babilonia maŋtsɛyeli lɛ. Jeŋ hewalɛi krokomɛi nyiɛ sɛɛ, jwiɛtɛi tsitsi kɛ niji lɛ damɔ shi kɛha Media kɛ Persia, akɔɔble musu kɛ hɛ lɛ damɔ shi kɛha Hela, ni dade shuɔji lɛ damɔ shi kɛha Roma kɛ sɛɛ mli lɛ, Ŋleshi kɛ Amerika jeŋ hewalɛ lɛ. (Daniel 2:31-40) Nɛkɛ jeŋ hewalɛi nɛɛ eye nɔ yɛ ‘je nɛŋ nyɔmɔ’ lɛ maŋtsɛyeli lɛ mli kɛjɛ “jeŋmaji abe ni ato” lɛ fɛɛ mli kɛjɛ 607 D.Ŋ.B. kɛbashi 1914 Ŋ.B.—Luka 21:24; 4:5, 6; 2 Korintobii 4:4.
16 Shi, “naagbee gbii lɛ amli” ni “gbɔmɛi aseshibii” ni ji gbɔmɛi foji lɛ jeɔ kpo ni anaa amɛ faŋŋ. Shikpɔji pii yɛ ni maŋ hiɛ atuatsemɔ kɛ kwamaŋ jeŋ nɔyelɔi ebaye maŋtsɛmɛi, kaisaremɛi kɛ Rusia zarmɛi lɛ anajiaŋ. Adesa nɔyeli ni yɔɔ basabasa yɛ shikpɔŋ lɛ nɔ lɛ kɛ yiwalɛ nɔyelii ni yɔɔ veveeve kɛ kwamaŋ nɔyelii sɔrɔtoi ni etsɛɛɛ ni amɛyiŋ tsɔɔ ni kɛ yiŋfutumɔ babaoo baa eba. Taakɛ dade kɛ su nyɛɛɛ afutu lɛ nakai nɔŋŋ mɛnɛɛmɛi hu nyɛŋ akpɛtɛ. Amɛnyɛŋ amɛfee ekome po yɛ Jeŋmaji Ekomefeemɔ lɛ mli, shi nɔ ni amɛfeɔ moŋ ji naataomɔ kɛ ŋwanejee babaoo kɛ mlifu kɛ hegbeyeiwoo ni amɛkɛbaa. Yɛ anɔkwale mli lɛ, ‘maŋtsɛyeli lɛ efee nɔ ni mli egbala.’—Daniel 2:41-43.
17. Gbalɛ Iɛ baa mli yɛ “naagbee gbii lɛ amIi” yɛ mɛɛ gbɛ nɔ?
17 No hewɔ lɛ, jeŋ nɔyeli he sane lɛ baa enaagbee yɛ “naagbee gbii lɛ mli.” Ni mɛni ji tsabaa lɛ? Ŋaa! Nɔ ni aha eje nitsumɔ shishi momo yɛ 1914 ji Nyɔŋmɔ Mesia Maŋtsɛyeli lɛ. No ji “tɛ” ni tse kɛjɛ Yehowa je muu fɛɛ nɔyeli “gɔŋ” lɛ nɔ lɛ. Adesa maŋkwralɔ ko naŋ gbɛfaŋnɔ yɛ mli! No baa lɛ, enyiɛ egbɛ ni ja lɛ nɔ pɛpɛɛpɛ, ni ebaatsu nii yɛ be ni ato aha lɛ lɛ naa pɛpɛɛpɛ. Kɛ Nyɔŋmɔ be ni sa lɛ shɛ lɛ, ebaajwara amaga lɛ naji lɛ ni ebaawiɛ amaga muu lɛ fɛɛ tamɔ mlu. Abaabɛɛ adesa nɔyeli lɛ kɛya tamɔ abele naashaji ni kɔɔyɔɔ looɔ amɛ kɛyaa ni anaaa amɛ yɛ he ko he ko. Shi “tɛ” lɛ—Nyɔŋmɔ kpeteŋkpele lɛ kɛ e-Kristo lɛ Maŋtsɛyeli lɛ—batsɔɔ gɔŋ kpeteŋkpele ko ni ekpeleɔ shikpɔŋ muu lɛ fɛɛ nɔ. ‘Nɔ ko nɔ ko fiteŋ nakai maŋtsɛyeli lɛ ni akɛwoŋ gbɔmɛi komɛi adɛŋ.’ Ebaadamɔ shi kɛya naanɔ. Kwɛ bɔ ni wɔdaa Yehowa shi yɛ teemɔŋ saji ni tamɔ nɛkɛ ni etsɔ hiɛ ‘ejie shishi etsɔɔ’ wɔ lɛ hewɔ!—Daniel 2:29, 44, 45.
Ŋmɛnɛŋmɛnɛ Beaŋ ‘Shimɔ’
18. (a) Mɛɛ sɛɛ mli ninaa ko akɛha Daniel? (b) Mɛni yɔɔ naakpɛɛ ni sa kadimɔ yɛ nɛkɛ ninaa nɛɛ he?
18 Shi Daniel yɛ babaoo kɛɛmɔ yɛ adesa nɔyeli kɛ “naagbee gbii lɛ” he. Beni eha ale Nebukadnezar lamɔ lɛ shishi lɛ sɛɛ aaafee afii 70 lɛ, no mli lɛ Daniel ni egbɔ lɛ yɛ Babilon lolo shi eesɔmɔ yɛ Koresh, Persia maŋtsɛ lɛ shishi. Beni eyɔɔ Hidekel faa lɛ naa lɛ, ŋwɛibɔfo ko jie ehe kpo etsɔɔ lɛ, ni ekɛɛ lɛ akɛ: “Ni agbɛnɛ miba ni mibatsɔɔo nɔ ni baaba omaŋ lɛ nɔ yɛ naagbee gbii lɛ amli; ejaakɛ gbii ni baaba lɛ ahe ninaa kroko yɛ lolo.” (Daniel 10:14) Ŋwɛibɔfo lɛ tee nɔ etsɔɔ nɔyelɔi kɛ nibii babaoo ni baapue yɛ Persia, Hela, Mizraim, Roma, Germane, Ŋleshi kɛ Amerika kɛ kwasafoŋ nɔyelii sɔrɔtoi lɛ ayinɔsane mli. Kwɛ naakpɛɛ ni eji akɛ aaanyɛ atsɔ hiɛ aŋma nɛkɛ yinɔsane nɛɛ fɛɛ ni heɔ nɔ ni fe afii 2,500 lɛ afɔ shi! Ebaa wɔnaa hekɛnɔfɔɔ babaoo yɛ Yehowa Nyɔŋmɔ Gbalɛ Wiemɔ ni jɛ mumɔŋ lɛ mli!a
19. Mɛɛ ŋmɛnɛŋmɛnɛ beaŋ saji gbalɛ lɛ tsɔ hiɛ egba efɔ shi?
19 Nɛkɛ gbalɛ nɛɛ tee nɔ etsɔɔ akɛ, yɛ be ni sa mli lɛ, jeŋ hewalɛi enyɔ ni fe fɛɛ ni baapue ji “wuoyigbɛ maŋtsɛ” kɛ “kooyigbɛ maŋtsɛ.” Yɛ naagbee lɛ, ŋwɛibɔfo lɛ kɛɛ akɛ kooyigbɛ maŋtsɛ lɛ “eeefee ehe agbo fe nyɔŋmɔ fɛɛ nyɔŋmɔ, ni eeewie hepupuumɔ wiemɔi eshi nyɔŋmɔi a-Nyɔŋmɔ lɛ”—jeee saji ni hi nɛ, ejaakɛ ‘mɔji anyɔŋmɔ lɛ hiɛ nyam ewoɔ.’ “Wuoyigbɛ maŋtsɛ” lɛ ni lɛ hu ehe wa yɛ tawuu mli lɛ ji mɔ ni teɔ shi ewoɔ nɛkɛ “maŋtsɛ” hepupuulɔ nɛɛ. Taakɛ agba afɔ shi lɛ, nɛkɛ maŋtsɛmɛi enyɔ nɛɛ “aaashi.” Enɛ feɔ ŋmɛnɛŋmɛnɛ beaŋ béi ni ka jeŋ hewalɛi ni fe fɛɛ nɛɛ ateŋ lɛ he mfoniri. Yɛ bei komɛi amli lɛ, ‘amɛshiɔ’ waa yɛ be mli ni amɛjeɔ ŋwane ni amɛbéɔ yɛ nuklea tawuu nii ni amɛ fɛɛ amɛaana pɛpɛɛpɛ lɛ he lɛ, yɛ be mli ni yɛ nakai bei amli nɔŋŋ lɛ, amɛhesaamɔ kɛha amɛtawuu lɛ hiɛɔ foi kɛyaa nɔ lɛ.—Daniel 11:36-45.
20. Mɛni baatsɔɔ nɔ ni baajɛ mli aba lɛ, ni enɛ kɔɔ “Mikael” he yɛ mɛɛ gbɛ nɔ?
20 Eyɛ mli akɛ gbalɛ lɛ gbaa akɛ “kooyigbɛ maŋtsɛ” lɛ aaafa tamɔ ahum ni eeeho tamɔ nu afua babaoo kɛbote maji pii amli moŋ, shi no etsɔɔɔ nɔ ni baajɛ mli aba. Atsɔɔ nɔ ni baajɛ mli aba lɛ yɛ Daniel 12:1: “Yɛ nakai be lɛ mli lɛ Mikael ni ji lumɔ kpeteŋkpele ni damɔ shi ha omaŋbii lɛ aaate shi adamɔ shi. Nɛkɛ Mikael nɛɛ ji Yesu Kristo ni ‘te shi edamɔ shi’ yɛ e-Maŋtsɛyeli lɛ mli yɛ 1914, koni eshwie Satan kɛjɛ ŋwɛi nɔŋŋ lɛ.” Ni nɛkɛ “maŋtsɛmɛi amaŋtsɛ” nɛɛ nɔŋŋ ji mɔ ni wuɔ yɛ Harmagedon koni ekpata “shikpɔŋ lɛ nɔ maŋtsɛmɛi” ni “kooyigbɛ” kɛ “wuoyigbɛ” maŋtsɛmɛi lɛ fata he lɛ fɛɛ ahiɛ lɛ.—Kpojiemɔ 12:7-10; 19:11-19.
21. Belɛ mɛni jɛɔ mli baa yɛ “naagbee gbii lɛ amli” lɛ?
21 Jɛmɛ, yɛ “naagbee gbii lɛ amli,” yɛ naagbee kwraa lɛ, nɔ ni baajɛ mli aba lɛ baafee faŋŋ, Nyɔŋmɔ Maŋtsɛyeli lɛ baaye kunim. Ŋwɛibɔfo lɛ tsɔɔ mli lolo yɛ nɛkɛ wiemɔi nɛɛ amli: “Shi fimɔ be ko baaba ni anako nɔ da kɛjɛ beyinɔ ni jeŋ maŋ yɔɔ lɛ kɛyashi nakai be lɛ mli.”—Daniel 12:1; okɛto Yeremia 25:31-33; Marko 13:19 he.
22. Akɛ Nyɔŋmɔ webii lɛ, te esa akɛ wɔfee wɔnii yɛ nɛkɛ gbalɛi nɛɛ ahe wɔha tɛŋŋ, ni kɛ mɛɛ gbɛkpamɔ?
22 Ani esa akɛ wɔshe nakai amanehulu kɛ fimɔ be lɛ gbeyei? Kɛji wɔyɛ Yehowa masɛi lɛ, no lɛ wɔsheŋ gbeyei, ejaakɛ ŋwɛibɔfo lɛ tee nɔ ekɛɛ akɛ: “Ni nakai be lɛ mli lɛ aaahere omaŋ lɛ mli mɔ fɛɛ mɔ ni aaana akɛ aŋma egbɛi yɛ wolo lɛ mli lɛ” yiwala. (Daniel 12:1) Belɛ nyɛhaa wɔ fɛɛ wɔkɛ wɔhe ahaa Biblia lɛ kasemɔ jogbaŋŋ ni wɔwaje wɔhe yɛ Yehowa sɔɔmɔ mli. Kɛkɛ lɛ, yɛ “naagbee gbii lɛ mli lɛ,” ana wɔ akɛ aŋma wɔgbɛi yɛ Nyɔŋmɔ “kaimɔ wolo” ni “aŋmaa . . . yɛ ehiɛ ahaa mɛi ni sheɔ Yehowa gbeyei lɛ, kɛ mɛi ni jwɛŋɔ egbɛi lɛ he lɛ” mli. (Maleaki 3:16) Yɛ nakai feemɔ mli lɛ, wɔbaana hegbɛ ni wɔna ekunimyeli lɛ mli gbɛfaŋnɔ “yɛ naagbee gbii lɛ amli.”b
[Shishigbɛ niŋmai]
a Kɛha enɛ mlitsɔɔmɔ fitsofitso lɛ, kwɛmɔ wolo, “Your Will Be Done on Earth” ni Watchtower Bible and Tract Society of New York, Inc. fee yɛ 1958 lɛ baafai 220-323.
b Ajie kɛjɛ July 1, 1985 Watchtower lɛ mli.
Yɛ “naagbee gbii lɛ amii lɛ”—
◻ Mɛni Yeremia gba akɛ ebaaba yɛ jeŋ toiŋjɔlɛ he?
◻ Mɛɛ sane baa naagbee yɛ Gog tutuamɔ lɛ mii, ni yɛ mɛɛ gbɛ nɔ?
◻ Nebukadnezar lamɔ Iɛ tsɔɔ mɛɛ naagbee kwraa ni yɔɔ nyam?
◻ Mɛɛ gbɛ nɔ hewalɛ he mpleshii ni ka “maŋtsɛmɛi” enyɔ lɛ ateŋ lɛ baatsɔ aba naagbee?
1. (a) Yeremia, Ezekiel kɛ Daniel gbalɛi lɛ ahe hiaa wɔ jogbaŋŋ ŋmɛnɛ yɛ mɛɛ gbɛ nɔ?(b) Mɛni hewɔ abaa nakai niŋmaai ni jɛ mumɔŋ lɛ ayi lɛ?
2. Mɛni hewɔ hewalɛ ni jɛ Yehowa ŋɔɔ he hiaa Yeremia lɛ?
[Akrabatsa ni yɔɔ baafa 14]
LOGO ni Jeŋmaji Ekomefeemɔ lɛ kpɛlɛ nɔ kɛha e-Majimaji toiŋjɔlɛ Afi (1986) lɛ tsɔɔ mutso baa akekre, okpo kɛ adesa nine. Atsɔɔ enɛɛmɛi amaji akɛ: “Okpo lɛ damɔ shi kɛha toiŋjɔlɛ he okadi kɛ mutso baa akekre ni eji okadi kɛha Jeŋmaji Ekomefeemɔ lɛ kɛ gbeekpamɔ. Adesa ni tiɔ okpo ni efee klalo ni ebaafiliki lɛ sɛɛ lɛ tsɔɔ nii ni adesai abii tsuɔ yɛ toiŋjɔlɛ namɔ mli.”
Ebi waa ni ehe miihia ni ato toiŋjɔlɛ ama shi yɛ nɛkɛ nuklea yinɔ nɛɛ mli. Shi ani adesai aniji baanyɛ atsu enɛ? Yeremia kai wɔ akɛ: “Yehowa mile akɛ gbɔmɔ gbɛ bɛ lɛ diɛŋtsɛ edɛŋ, ni adesa ni nyiɛ nɛɛ, bɔ ni eeetsɔ ejaje enajifamɔi eha lɛ, ebɛ edɛŋ.” Kɛkɛ ni gbalɔ lɛ kɛ nɛkɛ faikpamɔ nɛɛ fata he: “Yehowa . . . fɔsemɔ omlila oshwie jeŋmaji ni leee bo lɛ kɛ wekui ni tseee ogbɛi lɛ anɔ.”—Yeremia 10:23-25.
Ama okpo lɛ kɛ mutso baa lɛ kɛjɛ Biblia mli sane ni aŋma afɔ shi ni kɔɔ Noa abii lɛ amli lɛ he lɛ mli. (1 Mose 8:11) Mɛɛ gbɛ nɔ atsɔ akɛ toiŋjɔlɛ ba yɛ nakai be lɛ mli? Atsɔ Nyɔŋmɔ nifeemɔ nɔ, je muu fɛɛ nu afua lɛ kpata nakai adesa yinɔ lɛ hiɛ. Yesu kɛɛ akɛ: “Noa gbii lɛ” ni awuyeli kɛ efɔŋfeemɔ yɔɔ mli babaoo lɛ feɔ “beni eba” ni ji bianɛ lɛ he mfoniri yɛ gbalɛ naa.—Mateo 24:37-39; 1 Mose 6:5-12.
Esa akɛ “toiŋjɔlɛ Nyɔŋmɔ” lɛ akpata Satan nibii agbɛjianɔtoo lɛ hiɛ ekoŋŋ, ni yɛ no sɛɛ lɛ, “Hejɔlɛ Lumɔ,” Yesu Kristo, kɛ naanɔ toiŋjɔlɛ baaba.—Romabii 16:20; Yesaia 9:6, 7; 33:7.
[Mfoniri ni yɔɔ baafa 14]
Yeremia kɛ enine tsɔɔ anɔkwale toiŋjɔlɛ he hiɛnɔkamɔ lɛ
[Mfoniri ni yɔɔ baafa 15]
Ezekiel bɔɔ wɔ kɔkɔ ni wɔsaa wɔhe bianɛ wɔha Gog tutuamɔ lɛ
[Mfoniri ni yɔɔ baafa 17]
Daniel tsɔɔ nɔ ni baajɛ “naagbee gbii lɛ amli” aba lɛ