“Bó Yehowa Gbee Toi”

1, 2. Bei pii lɛ, te mɛi ni kɔɔ “gbɛ ni mɛi babaoo nyiɛ nɔ” lɛ feɔ amɛnii amɛhaa tɛŋŋ, ni mɛni hewɔ esa akɛ oha esoro bo lɛ?

ŊMƐNƐ lɛ, mɛi babaoo sumɔɔɔ ni amɛfeɔ toi. Mɛi babaoo ebɔɔɔ mɔdɛŋ akɛ amɛbaadamɔ nibii ni abuɔ akɛ amɛja kɛ nibii ni abuuu akɛ amɛja lɛ anɔ amɛkpɛ amɛyiŋ. Moŋ lɛ, abaanyɛ afo amɛsusumɔ lɛ kuku akɛ ‘Feemɔ nɔ̃ ni osumɔɔ’ loo ‘Feemɔ, shi kaaha amɔ bo.’ Tsɔne kudɔlɔi kuɔ trafiki mlai amli, jarayelɔi kuɔ jarayeli mlai amli, ni maŋ hiɛnyiɛlɔi kuɔ mlai ni ekolɛ amɛfata he ni awo lɛ amli, ni amɛkɛmaa sane nɛɛ nɔ mi. Eyɛ mli akɛ “gbɛ ni mɛi babaoo nyiɛ nɔ” nɛɛ esaaa, ni oshara yɛ he moŋ, shi nakai ji bɔ ni mɛi babaoo fee amɛ nii yɛ Yeremia beaŋ hu.—Yer. 8:6, NW.

² Ole akɛ esaaa akɛ mɛi ni miisumɔ ni amɛná Nyɔŋmɔ Ofe lɛ hiɛ duromɔ lɛ akɔ “gbɛ ni mɛi babaoo nyiɛ nɔ” lɛ. Nɔ̃ ni sa kadimɔ ji akɛ, Yeremia ha ana srɔtofeemɔ ni yɔɔ mɛi ni ‘boko Yehowa gbee toi’ lɛ kɛ mɛi ni miisumɔ ni amɛfee toi amɛha lɛ lɛ ateŋ. (Yer. 3:25; 7:28; 26:13; 38:20; 43:4, 7) Esa akɛ wɔteŋ mɔ fɛɛ mɔ apɛi emli koni ena he ni edamɔ yɛ nɛkɛ sane nɛɛ he. Mɛni hewɔ? Nyɛsɛɛ nɛɛ, anɔkwayeli he kai ni Satan kɛbaa anɔkwa jálɔi anɔ lɛ anaa ewa fe bei fɛɛ ni eho. Efeɔ enii tamɔ onufu ko ni ewo antɛo kɛmiimɛ kooloo ko, etutuaa lɛ trukaa ni ekɔ̃ɔ lɛ. Kɛ́ wɔtswa wɔfai shi akɛ wɔbaabo Yehowa gbee toi lɛ, no baaye abua wɔ koni onufu nɛɛ akakɔ̃ wɔ. Shi, te wɔɔfee tɛŋŋ wɔwaje wɔhe koni wɔbo Yehowa toi jogbaŋŋ kɛmɔ shi lɛ? Woji ni Yeremia ŋmala lɛ baanyɛ aye abua wɔ.

 3. Mɛni hewɔ esa akɛ wɔbo Yehowa toi lɛ?

³ Mɛni hewɔ esa akɛ wɔbo Yehowa toi yɛ nɔ̃ fɛɛ nɔ̃ mli lɛ? Yeremia ha ana yiŋtoo kome ko hewɔ ni esa akɛ wɔbo Yehowa toi yɛ nɔ̃ fɛɛ nɔ̃ mli beni ekɛɛ akɛ, Yehowa ji mɔ ni ‘fee shikpɔŋ lɛ yɛ ehewalɛ naa, ni lɛ nɔŋŋ eŋɔ je lɛ ema shi yɛ eŋaa naa’ lɛ. (Yer. 10:12) Yehowa ji jeŋ muu lɛ fɛɛ Nɔyelɔ. Esa akɛ wɔshe lɛ gbeyei fe nɔyelɔi krokomɛi lɛ fɛɛ. Eyɛ hegbɛ kwraa akɛ ebiɔ wɔ ni wɔye ekitai ni nilee yɔɔ mli lɛ anɔ; anɔkwa, kɛ́ wɔye ekitai lɛ anɔ lɛ, wɔbaaná he sɛɛ kɛya naanɔ.—Yer. 10:6, 7.

4, 5. (a) Beni Yudafoi lɛ ye nu hɔmɔ lɛ, mɛɛ anɔkwa sane amɛyɔse? (b) Mɛɛ gbɛ nɔ mɛi ni yɔɔ Yuda shikpɔŋ lɛ nɔ lɛ ha “wala nu” ni jɛɔ Yehowa ŋɔɔ lɛ fee yaka? (d) Mɛni kɛ́ wɔfee lɛ, ebaatsɔɔ akɛ wɔmiinu “wala nu” ni Nyɔŋmɔ kɛhaa lɛ?

⁴ Jeee Jeŋ Muu lɛ Fɛɛ Nɔyelɔ kɛkɛ Yehowa ji, eji wala Yibaalɔ hu—ebaa wɔwala yi. Aha Yudafoi ni hi shi yɛ Yeremia beaŋ lɛ yɔse enɛ yɛ gbɛ ni sa kadimɔ waa nɔ. Nilo Faa lɛ yeɔ ebuaa mɛi ni yɔɔ Mizraim shikpɔŋ lɛ nɔ lɛ babaoo, shi shihilɛ ni yɔɔ Shiwoo Shikpɔŋ lɛ nɔ lɛ yɛ srɔto yɛ Mizraim shikpɔŋ lɛ nɔ̃ lɛ he. Nu titri ni Nyɔŋmɔ webii lɛ kɛfeɔ amɛnibii ji nugbɔnɛmɔ nu ni nɛɔ yɛ agbiɛnaa kɛ gbo beaŋ lɛ, ni bei pii lɛ amɛkɛ nu nɛɛ ni hoɔ lɛ toɔ bui ni atsatsaa yɛ shikpɔŋ shishi lɛ amli. (5 Mose 11:13-17) Yehowa pɛ ji mɔ ni baanyɛ aha nugbɔ anɛ koni eha shikpɔŋ lɛ nu, ni shikpɔŋ lɛ aba nii. Ebaanyɛ eha nugbɔ akanɛ hu. No hewɔ lɛ, Yeremia beaŋ lɛ akɛni Yudafoi lɛ gbo Nyɔŋmɔ nɔ toi hewɔ lɛ, atsĩ nugbɔnɛmɔ naa shii abɔ, ni no ha amɛŋmɔji kɛ amɛweintromii lɛ amli gbigbii keketee, ni nu ta yɛ amɛnubui kɛ amɛnutoohei lɛ amli.—Yer. 3:3; 5:24; 12:4; 14:1-4, 22; 23:10.

⁵ Eyɛ mli akɛ Yudafoi lɛ ahiɛ sɔ nu diɛŋtsɛ moŋ, shi amɛhiɛ eyasɔɔɔ “wala nu” babaoo ni Yehowa kɛha amɛ lɛ. Amɛfee nakai kɛtsɔ Nyɔŋmɔ Mla lɛ ni amɛje gbɛ amɛku mli, kɛ amɛhiɛ ni amɛkɛfɔ̃ kpaŋmɔi ni amɛkɛ maji ni ebɔle amɛ lɛ fee lɛ anɔ lɛ nɔ. Yudafoi lɛ fee amɛnii tamɔ mɛi ni yɛ nu hɔmɔ beaŋ lɛ amɛkɛ nu toɔ nu bui ni ejwara, ni nyɛɛɛ nu ato lɛ amli, ni no hewɔ lɛ Yudafoi lɛ na nɔ̃. (Nyɛkanea Yeremia 2:13; 17:13.) Eyɛ faŋŋ akɛ, wɔyɛ yiŋtoo hewɔ ni esaaa akɛ wɔkɔɔ gbɛ ni tamɔ nɛkɛ koni haomɔ kpele akaba wɔnɔ. No ji akɛ, Yehowa kɛ gbɛtsɔɔmɔi babaoo ni damɔ e-Wiemɔ ni ajɛ mumɔŋ aŋma lɛ nɔ haa wɔ be fɛɛ be. Shi ekã shi faŋŋ akɛ, ja wɔkaseɔ e-Wiemɔ lɛ daa, ni wɔbɔɔ mɔdɛŋ akɛ wɔbaahi shi yɛ naa dani wɔbaaná “wala nu” nɛɛ he sɛɛ.

 6. (a) Tsɔɔmɔ bɔ ni Maŋtsɛ Zedekia fee enii eha yɛ Yehowa toiboo he. (b) Mɛni hewɔ osusuɔ akɛ maŋtsɛ lɛ efeee enii yɛ nilee mli lɛ?

⁶ Beni eshwɛ fioo ni Nyɔŋmɔ baakojo Yuda lɛ, toiboo he bahia waa diɛŋtsɛ. Ja aŋkroaŋkroi ni ji Yudafoi lɛ etsake amɛtsui ni amɛbɔi Yehowa toiboo dani Yehowa baaná amɛhe miishɛɛ ni ebu amɛhe. Ehe bahia ni Maŋtsɛ Zedekia akpɛ eyiŋ yɛ shihilɛ ni tamɔ nɛkɛ he. Ekɛ enane emaaa shi yɛ jalɛ nii ahe. Beni eshishibii lɛ kɛɛ lɛ akɛ amɛmiitao ni agbe Yeremia lɛ, enáaa ekãa ni ekɛwie eshi amɛ. Taakɛ wɔkadi yɛ yitso ni tsɔ hiɛ lɛ mli lɛ, Ebed-Melek baa gbalɔ lɛ yi, ni sɛɛ mli lɛ gbalɔ lɛ wo Zedekia hewalɛ akɛ: “Bó Yehowa gbee toi.” (Nyɛkanea Yeremia 38:4-6, 20.) Ekã shi faŋŋ akɛ, maŋtsɛ lɛ diɛŋtsɛ hilɛkɛhamɔ hewɔ lɛ esa akɛ ekpɛ eyiŋ yɛ sane nɛɛ he: Ani ebaabo Nyɔŋmɔ toi?

 7. Mɛɛ shihilɛi komɛi baanyɛ aka otoiboo?

⁷ Ŋmɛnɛ lɛ, toiboo he miihia waa taakɛ ehe bahia yɛ Yeremia beaŋ lɛ. Te ofai shi ni otswa akɛ obaabo Yehowa toi lɛ mli wa ha tɛŋŋ? Kɛ́ oyɛ Intanɛt lɛ nɔ, ni trukaa lɛ oyaje he ko ni mfonirii ni teɔ bɔlɛnamɔ akɔnɔ shi yɔɔ jɛmɛ lɛ, ani obaaya nɔ okwɛ, loo obaawuu oshi shwelɛ gbonyo ko ni baate shi yɛ ojwɛŋmɔ mli lɛ koni otsake kɛya he kroko? Ni kɛ́ mɔ ko ni ejeee Odasefonyo ni yɔɔ onitsumɔhe loo oskul lɛ bi ni nyɛje kpo hu? Ani obaaná ekãa kɛkpoo? Ani obaaná woji ni hemɔkɛyelikwalɔi ŋmalaa loo amɛhe saji ni yɔɔ Intanɛt lɛ nɔ lɛ ahe miishɛɛ loo obaanyaŋe nibii nɛɛ? Yɛ shihilɛi nɛɛ loo ekrokomɛi amli lɛ, esa akɛ oha wiemɔi ni yɔɔ Yeremia 38:20 lɛ ahi ojwɛŋmɔŋ.

8, 9. (a) Kɛ́ asafoŋ onukpai bɔ mɔdɛŋ akɛ amɛbaaye amɛbua bo lɛ, mɛni hewɔ nilee yɔɔ mli akɛ obó amɛ toi lɛ? (b) Te esa akɛ ona ŋaa ni asafoŋ onukpai lɛ woɔ bo shii abɔ lɛ oha tɛŋŋ?

⁸ Bei pii lɛ, Yehowa tsuɔ Yeremia koni eyawo Nyɔŋmɔ webii lɛ ŋaa kɛ wiemɔi ni tamɔ nɛkɛ akɛ: “Nyɛteŋ mɔ fɛɛ mɔ aku esɛɛ kɛjɛ egbɛ fɔŋ lɛ nɔ, ní nyɛsaa nyɛgbɛi kɛ nyɛnifeemɔ nii lɛ!” (Yer. 7:3; 18:11; 25:5; nyɛkanea Yeremia 35:15.) Nakai nɔŋŋ ŋmɛnɛ lɛ, asafoŋ onukpai jɛɔ amɛtsui fɛɛ mli amɛyeɔ amɛbuaa asafoŋbii ni miihe akɔ gbɛ fɔŋ ko lɛ. Kɛ́ amɛwo bo ŋaa koni okakɔ gbɛ ni nilee bɛ mli loo gbɛ fɔŋ ko lɛ, bó amɛ toi. Oti ni ma amɛhiɛ lɛ tamɔ Yeremia nɔ lɛ nɔŋŋ.

⁹ Ekolɛ, asafoŋ onukpai lɛ baakai bo Ŋmalɛ mli shishitoo mlai ni amɛkɛtsɔɔ bo momo lɛ. Ná ole akɛ ebɛ mlɛo akɛ aaawo mɔ ŋaa shii abɔ, shi kɛ́ mɔ ni yelikɛbuamɔ he ehia lɛ lɛ fee enii tamɔ bɔ ni Yudafoi ni Yeremia kɛ amɛ wie lɛ ateŋ babaoo fee amɛnii lɛ, nakai feemɔ bafeɔ nɔ̃ ni wa waa. Bɔɔ mɔdɛŋ ni ona yelikɛbuamɔ ni onukpai lɛ kɛhaa bo shii abɔ lɛ akɛ eji Yehowa suɔmɔ kpojiemɔ. Agbɛnɛ hu, kadimɔ akɛ, eji Yudafoi lɛ bó Yeremia kɔkɔbɔi lɛ atoi kulɛ, ehe ebahiaŋ ni etĩ mli shii abɔ. Hɛɛ, kɛ́ osumɔɔɔ ni awo bo ŋaa shii abɔ lɛ, belɛ okɛ ŋaawoo ni akɛhaa bo lɛ atsu nii amrɔ nɔŋŋ.

10. Mɛni hewɔ Yehowa kɛ eshai efaaa kɛkɛ lɛ?

¹⁰ Ekɔɔɔ he eko mɔdɛŋ fɛɛ ni wɔɔbɔ lɛ, wɔnyɛŋ wɔbo Yehowa toi yɛ gbɛ ni yeɔ emuu nɔ yɛ nibii agbɛjianɔtoo nɛɛ mli. Akɛni Yehowa haa wɔnaa akɛ eesumɔ ni ekɛ wɔhe eshai afa wɔ hewɔ lɛ, wɔdaa lɛ shi. Fɛɛ sɛɛ lɛ, ekɛ wɔhe eshai lɛ efaaa wɔ kɛkɛ. Mɛni hewɔ? Ejaakɛ esha ji Yehowa nihiinii. (Yes. 59:2) Belɛ, eesumɔ ni ená nɔmimaa akɛ wɔsa mɛi ni esa akɛ ekɛ amɛhe eshai afa amɛ.

11. Mɛni hewɔ mɔ ko nyɛŋ aye ehe kɛjɛ eshai ni efeɔ yɛ teemɔŋ lɛ ahe lɛ?

¹¹ Taakɛ wɔkadi lɛ, Yeremia beaŋ Yudafoi lɛ ateŋ babaoo kɛfee amɛsu akɛ amɛbaagbo Nyɔŋmɔ nɔ toi, ni no tsɔɔ akɛ amɛkɛ etsuishitoo kɛ emɔbɔnalɛ lɛ shwɛ. Ŋmɛnɛ lɛ, ani Nyɔŋmɔ tsuji lɛ ateŋ mɔ ko baanyɛ akɔ gbɛ ni tamɔ nɛkɛ? Kɛji mɔ lɛ kpoo Yehowa kaimɔi lɛ ni ebɔi eshafeemɔ lɛ, ebaanyɛ eba lɛ nakai. Yɛ shihilɛi komɛi amli lɛ, enɛ baa yɛ faŋŋ mli, tamɔ beni mɔ ko boteɔ gbalashihilɛ mli beni ebɛ hegbɛ akɛ efeɔ nakai yɛ ŋmalɛ naa, loo lɛ kɛ mɔ ni ekɛfeɔ nakai lɛ fɛɛ bɛ hegbɛ yɛ ŋmalɛ naa akɛ amɛboteɔ gbalashihilɛ mli (ajwamaŋ gbala). Shi, kɛ́ adesai krokomɛi enáaa esha lɛ po lɛ, mɔ ni gboɔ Yehowa nɔ toi lɛ ekɔ gbɛ ni oshara yɔɔ nɔ. Ekolɛ, mɔ ni hiɛ jeŋba enyɔ lɛ baasusu akɛ, ‘Miyi ejeŋ.’ Shi, anɔkwa sane ji akɛ, Nyɔŋmɔ kwɛɔ wɔjwɛŋmɔi kɛ wɔtsuii amli, ni ebaanyɛ ena nibii ni yaa nɔ yɛ piaiaŋ. (Nyɛkanea Yeremia 32:19.) Shi, mɛni esa akɛ afee, kɛ́ yɛ anɔkwale mli lɛ, mɔ ko egbo Nyɔŋmɔ nɔ toi lɛɛlɛŋ lɛ?

12. Mɛni bei komɛi lɛ esa akɛ asafoŋ onukpai lɛ afee kɛbu asafo lɛ he?

¹² Yudafoi lɛ ateŋ babaoo gbe yelikɛbuamɔ ni Yehowa kɛha amɛ shii abɔ kɛtsɔ Yeremia nɔ lɛ he guɔ. Nakai nɔŋŋ ŋmɛnɛ lɛ, eeenyɛ eba lɛ akɛ mɔ ko ni efee esha ni yɔɔ hiɛdɔɔ lɛ tsakeŋ etsui, ni ekpɛlɛŋ yelikɛbuamɔ ni asafoŋ onukpai lɛ kɛhaa lɛ lɛ. Kɛ́ eba lɛ nakai lɛ, esa akɛ asafoŋ onukpai lɛ kɛ Ŋmalɛ naa gbɛtsɔɔmɔ ákɛ abu asafo lɛ he lɛ atsu nii koni amɛshwie efɔŋfeelɔ ni tsakeee etsui lɛ kɛjɛ asafo lɛ mli. (1 Kor. 5:11-13; kwɛmɔ akrabatsa ni ji “Shihilɛ yɛ He ni Mla Bɛ” lɛ ni yɔɔ baafa 73 lɛ.) Ani no baatsɔɔ akɛ hiɛnɔkamɔ ko kwraa bɛ kɛha mɔ nɛɛ, ni tsɔɔ akɛ enyɛŋ ená Yehowa hiɛ duromɔ ekoŋŋ? Dabi. Israelbii lɛ tse atua be kplaŋŋ; fɛɛ sɛɛ lɛ, Nyɔŋmɔ kɛɛ amɛ akɛ: “Nyɛkua nyɛsɛɛ, nyɛ bii sɛɛsɛɛyalɔi, matsá nyɛ sɛɛsɛɛyaa lɛ!” (Yer. 3:22)a Yehowa fɔ̃ efɔŋfeelɔi lɛ nine koni amɛku amɛsɛɛ kɛba eŋɔɔ ekoŋŋ. Hɛɛ, efã amɛ ni amɛfee nakai.

13. Kɛ́ mɔ ko miisumɔ ni eku esɛɛ kɛba Yehowa ŋɔɔ ekoŋŋ lɛ, mɛni esa akɛ ekpɛlɛ nɔ?

¹³ Taakɛ Yeremia fee lɛ faŋŋ lɛ, dani mɔ ko aaanyɛ aku esɛɛ kɛba Nyɔŋmɔ ŋɔɔ ekoŋŋ lɛ, esa akɛ ebi ehe akɛ, ‘Mɛni mifee nɛɛ?’ No sɛɛ lɛ, esa akɛ ekɛ Ŋmalɛ mli shishitoo mlai lɛ apɛi emli, ni ekpɛlɛ nɔ̃ ni Biblia lɛ haa efeɔ faŋŋ yɛ egbɛfaŋ lɛ nɔ. Yeremia beaŋ Yudafoi ni tsakeee amɛtsui lɛ kpoo akɛ amɛaabi amɛhe sane nɛɛ kɛpɛi amɛmli. Amɛkpoo akɛ amɛaakpɛlɛ nɔ akɛ amɛtɔ̃ Yehowa nɔ waa, ni no hewɔ lɛ Yehowa kɛ amɛhe efaaa amɛ ejaakɛ enyɛŋ efee nakai yɛ amɛgbɛfaŋ. (Nyɛkanea Yeremia 8:6.) Nɔ̃ ni tamɔɔɔ nakai lɛ, eshafeelɔ ni etsake etsui lɛ kpɛlɛɔ nɔ akɛ, Yehowa nɔ toi ni egbo lɛ kɛ ahorabɔɔ eba Nyɔŋmɔ gbɛ́i lɛ kɛ Kristofoi asafo lɛ nɔ. Kɛfata he lɛ, edɔɔ mɔ ni etsake etsui lɛɛlɛŋ lɛ waa yɛ awui ni ekolɛ gbɛ fɔŋ ni ekɔ lɛ eye mɛi ni he bɛ sane lɛ hewɔ. Esa akɛ eyɔse akɛ, ja ekpɛlɛ yibii gbohii ni gbɛ fɔŋ ni ekɔ lɛ ewo lɛ fɛɛ anɔ dani fai ni ekpaa Yehowa kɛha eshaifaa lɛ baafee nɔ̃ ni sa. Fɛɛ sɛɛ lɛ, nibii krokomɛi yɛ ni esa akɛ efee dani Nyɔŋmɔ baakpɛlɛ enɔ ekoŋŋ.

14. Mɛni kɛ́ mɔ ko fee lɛ, no tsɔɔ akɛ ‘ekpale kɛba Yehowa ŋɔɔ ekoŋŋ’? (Okɛ akrabatsa ni ji “Mɛni ji Tsuitsakemɔ?” lɛ afata he.)

¹⁴ Mɔ ni etsake etsui lɛɛlɛŋ lɛ pɛiɔ eyiŋtoi, eshwelɛi, kɛ esui amli. (Nyɛkanea Yaafo 3:40, 41.) Ebaapɛi eshihilɛ mli hei ni etɔɔ fã yɛ lɛ mli, tamɔ bɔ ni ekɛ hii loo yei bɔɔ ehaa, bɔ ni ekɛ daa loo tawa tsuɔ nii ehaa, bɔ ni ekɛ Intanɛt lɛ tsuɔ nii ehaa, loo enitsumɔ mli saji nɛkɛ. Taakɛ yoogbayoo baashá ekpata shi hei ni nine efɔɔɔ yaa lɛ po koni eha eshĩa lɛ atse ni efee falefale lɛ, nakai nɔŋŋ esa akɛ mɔ ni etsake etsui lɛ abɔ mɔdɛŋ waa ni etsuu esusumɔi kɛ nibii ni efeɔ yɛ teemɔŋ lɛ ahe. Ja mɔ ni etsake etsui lɛ etsu Nyɔŋmɔ taomɔ nii lɛ ahe nii, ni ehi shi yɛ Nyɔŋmɔ shishitoo mlai lɛ anaa dani abaanyɛ akɛɛ akɛ ‘ekpale kɛba Yehowa ŋɔɔ ekoŋŋ.’ Yudafoi ni hi shi yɛ Yeremia beaŋ lɛ ekomɛi kpale kɛba Yehowa ŋɔɔ yɛ “apasa mli.” Amɛkwa amɛfee tamɔ amɛshwa amɛhe, shi yɛ anɔkwale mli lɛ, amɛtsakeko amɛtsui loo amɛjeŋba. (Yer. 3:10) Nɔ̃ ni tamɔɔɔ nakai lɛ, mɔ ni jɛɔ tsui krɔŋŋ mli ebiɔ ni akɛ ehe eshai afa lɛ lɛ, ebɔɔɔ mɔdɛŋ akɛ ebaalaka Yehowa kɛ esafo lɛ. Nɔ̃ najiaŋ ni ebaasumɔ kɛkɛ akɛ ená hiɛ yɛ ewekumɛi kɛ mɛi krokomɛi ni yɔɔ anɔkwale lɛ mli lɛ ahiɛ loo enyɛ ekɛ amɛ abɔ ekoŋŋ lɛ, eesumɔ ni etsɔ esɛɛ kwraa eha gbɛ fɔŋ ni ekɔ lɛ koni no aha efee mɔ ni sa akɛ Nyɔŋmɔ kɛ ehe eshai faa lɛ ni ekpɛlɛɔ enɔ.

15. Te mɔ ni etsake etsui lɛɛlɛŋ lɛ sɔleɔ ehaa Nyɔŋmɔ ehaa tɛŋŋ?

¹⁵ Nibii ni he hiaa ni esa akɛ mɔ afee kɛtsɔɔ akɛ etsake etsui lɛ eko ji sɔlemɔ. Blema beaŋ lɛ, mɛi fɔɔ amɛniji anɔ holemɔ kɛ ŋwɛi yaa kɛ́ amɛmiisɔle. Ŋmɛnɛ lɛ, taakɛ Yeremia tsɔɔ mli lɛ, kɛ́ mɔ ni etsake etsui lɛɛlɛŋ lɛ miisɔle lɛ, ‘eholeɔ etsui kɛ eniji anɔ ehaa Nyɔŋmɔ.’ (Yaafo 3:41, 42) Akɛni eshafeelɔ ni etsake etsui lɛ eshwa ehe hewɔ lɛ, no tsirɛɔ lɛ koni eba ejeŋ bɔ ni kɛ enibimɔ akɛ, akɛ ehe eshai afa lɛ lɛ baakpã gbee. Ejɛɔ tsui krɔŋŋ mli esɔleɔ.

16. Mɛni hewɔ esa jogbaŋŋ akɛ aaaku sɛɛ kɛba Nyɔŋmɔ ŋɔɔ ekoŋŋ lɛ?

¹⁶ Ŋwanejee ko bɛ he akɛ, oyɔseɔ akɛ ehe baahia ni eshafeelɔ ni etsake etsui lɛɛlɛŋ lɛ akana ehe tsɔ bɔni afee ni enyɛ ekpale kɛba Nyɔŋmɔ ŋɔɔ ekoŋŋ. Shi, naa anɔkwa sane ko ni he hiaa waa: Yehowa miisumɔ ni eshafeelɔi aku amɛsɛɛ kɛba eŋɔɔ ekoŋŋ. Kɛ́ Nyɔŋmɔ na akɛ adesa ko etsake etsui lɛɛlɛŋ lɛ, no kanyaa Nyɔŋmɔ diɛŋtsɛ hu tsui koni efee nɔ̃ ko yɛ he. ‘Emli nɔ́moɔ lɛ’ loo emli lotaa lɛ kɛ suɔmɔ ejaakɛ eesumɔ ni ekɛ mɛi fɛɛ ni tsakeɔ amɛtsui yɛ amɛhe eshai ahe lɛ ahe afa amɛ taakɛ efee kɛha Israelbii ni ku amɛsɛɛ kɛjɛ nomŋɔɔ mli lɛ po. (Yer. 31:20) Kwɛ bɔ ni wɔtsui nyɔɔ wɔmli akɛ Nyɔŋmɔ ewo shi akɛ ebaaha mɛi ni boɔ lɛ toi lɛ toiŋjɔlɛ kɛ hiɛnɔkamɔ! (Yer. 29:11-14) Abaabu amɛ ashi Nyɔŋmɔ anɔkwa tsuji lɛ anɔ ekoŋŋ.

17, 18. (a) Namɛi ji Rekabbii lɛ? (b) Taakɛ mfoniri ni yɔɔ baafa 77 lɛ tsɔɔ lɛ, mɛni akɛle amɛ?

¹⁷ Yehowa toiboo yɛ nɔ̃ fɛɛ nɔ̃ mli lɛ ji nilee gbɛ. Wɔbaanyɛ wɔna enɛ yɛ Rekabbii ni hi shi yɛ Yeremia beaŋ lɛ anɔkwɛmɔnɔ lɛ mli. Nɔ̃ ni fa fe afii ohai enyɔ ni tsɔ Yeremia beaŋ lɛ hiɛ lɛ, amɛblematsɛ Yehonadab ni ji Kennyo ni jɛ anɔkwayeli mli efĩ Yehu sɛɛ lɛ, gu amɛ nibii komɛi afeemɔ. Nibii nɛɛ ateŋ eko ji weinnumɔ. No mli lɛ, Yehonadab egbo jeeŋmɔ, shi Rekabbii lɛ tee nɔ amɛye efãmɔ lɛ nɔ. Yeremia kɛ amɛtee sɔlemɔwe lɛ piai lɛ eko mli, ni ekɛ wein mamɔ amɛhiɛ koni ekɛka amɛ akɛ amɛbaanu lo. Amɛkɛɛ lɛ akɛ: “Wɔnuuu wein!”—Yer. 35:1-10.

¹⁸ Rekabbii lɛ susuɔ akɛ ehe miihia ni amɛbo fãmɔ ni amɛblematsɛ ni egbo jeeŋmɔ lɛ kɛha dani egbo lɛ toi. Belɛ, esa akɛ anɔkwa jálɔi aye Nyɔŋmɔ hiɛkalɔ lɛ kitai lɛ anɔ jogbaŋŋ diɛŋtsɛ. Yehowa ná Rekabbii lɛ fai shi ni amɛtswa akɛ amɛbaafee toi lɛ he miishɛɛ, ni no ha esoro amɛ kwraa yɛ Yudafoi toigbolɔi lɛ ahe. Nyɔŋmɔ wo Rekabbii lɛ shi akɛ ebaabu amɛhe kɛjɛ hiɛkpatamɔ ni baa lɛ mli. Nɔ̃ ni wɔkaseɔ kɛjɛɔ Rekabbii lɛ anɔkwɛmɔnɔ lɛ mli ji akɛ, Yehowa woɔ wɔ shi akɛ, akɛ ewebii lɛ, kɛ́ wɔbó lɛ toi yɛ nɔ̃ fɛɛ nɔ̃ mli lɛ, ebaabu wɔhe yɛ amanehulu babaoo lɛ mli.—Nyɛkanea Yeremia 35:19.

19. Kɛ́ obó Nyɔŋmɔ toi lɛ, mɛɛ hebuu ekɛbaaha bo?

¹⁹ Esaaa akɛ wɔsusuɔ akɛ hebuu ni Nyɔŋmɔ kɛhaa ewebii lɛ ji blema sane. Amrɔ nɛɛ po lɛ, Yehowa buɔ mɛi ni boɔ lɛ toi lɛ ahe kɛjɛɔ nibii ni baanyɛ afite amɛmumɔŋ shidaamɔ lɛ ahe. Taakɛ gbogboi ni kwɔlɔ waa bu blema maji lɛ ahe kɛjɛ tutuamɔi ahe lɛ, nakai nɔŋŋ Nyɔŋmɔ mla lɛ kasemɔ kɛ ekɛnitsumɔ be fɛɛ be lɛ buɔ mɔ he. Ani obaaya nɔ ohi shi yɛ Nyɔŋmɔ jeŋba he shishitoo mlai ni buɔ wɔhe tamɔ gbogbo lɛ anaa? Obaanyɛ oná nɔmimaa akɛ kɛ́ ofee nakai lɛ ebaahi eha bo. (Yer. 7:23) Niiashikpamɔi babaoo maa anɔkwa sane nɛɛ nɔ mi.—Kwɛmɔ akrabatsa ni ji “Yehowa Toiboo Buɔ Mɔ He” lɛ.

20, 21. (a) Beni osɔmɔɔ Yehowa lɛ, mɛni obaanyɛ oná nɔmimaa akɛ ebaafee? (b) Te Maŋtsɛ Yehoiakim fee enii yɛ sane ni Nyɔŋmɔ tsɔ Yeremia nɔ ekɛha lɛ lɛ he eha tɛŋŋ?

²⁰ Kɛji mɛi ni teɔ shi woɔ anɔkwale lɛ yɛ oweku lɛ mli jio, onitsumɔhe lɛ jio, oskul jio, loo omaŋ nɔyelɔi lɛ ateŋ jio lɛ, amɛhaa ewaa kɛhaa bo akɛ ooosɔmɔ Nyɔŋmɔ. Shi, obaanyɛ oná nɔmimaa akɛ, kɛ́ obó Yehowa toi kɛmɔ shi yɛ shihilɛi nɛɛ ateŋ eko fɛɛ eko mli lɛ, ebaaye ebua bo ni ofi shi shiŋŋ yɛ shihilɛi ni mli wa fe fɛɛ lɛ po amli. Ohiɛ akakpa nɔ akɛ Nyɔŋmɔ wo Yeremia shi akɛ abaate shi awo lɛ waa shi ebaabu ehe, ni Yehowa fee nakai pɛpɛɛpɛ. (Nyɛkanea Yeremia 1:17-19.) Bei ni Nyɔŋmɔ tsɔɔ akɛ efiɔ Yeremia sɛɛ lɛ ateŋ ekome ji beni Maŋtsɛ Yehoiakim yeɔ nɔ lɛ.

²¹ Israel nɔyelɔi lɛ ateŋ fioo ko pɛ te shi wo Nyɔŋmɔ naawielɔi lɛ waa taakɛ Yehoiakim fee lɛ. Gbalɔ Uria ni sɔmɔ yɛ Yeremia beaŋ lɛ sane lɛ feɔ enɛ faŋŋ. Maŋtsɛ Yehoiakim ni yi wa lɛ ha atiu Uria kɛtɛke Israel husui lɛ. Beni ayakpala Yehowa gbalɔ Uria kɛba lɛ, maŋtsɛ lɛ ha agbe lɛ. (Yer. 26:20-23) Yehoiakim nɔyeli afi ni ji ejwɛ lɛ nɔ lɛ, Yehowa fã Yeremia koni eŋmala wiemɔi fɛɛ ni ewie etsɔɔ lɛ kɛbashi nakai beaŋ lɛ, ni akane awo maŋbii lɛ atoiiaŋ yɛ sɔlemɔwe lɛ. Yehoiakim ha ayakɔ Yeremia wolokpo lɛ kɛba, ni eha piafonyo ko kane wo etoiiaŋ. Kɛ́ akane wolokpo lɛ kɛshɛ he ko lɛ, maŋtsɛ lɛ heɔ baafai ni akane lɛ ni etserɛɔ mli kɛwoɔ la mli, tsɛ lumɛi lɛ ekomɛi kpa lɛ fai ni ekashã wolokpo lɛ. No sɛɛ lɛ, etsu hii komɛi ni amɛyamɔmɔ Yeremia kɛ Baruk kɛba. Mɛni ba? “Yehowa ŋɔ amɛ etee.” (Yer. 36:1-6; nyɛkanea Yeremia 36:21-26.) Yehowa eŋmɛɛɛ Yehoiakim gbɛ koni eye hii anɔkwafoi enyɔ nɛɛ awui.

22, 23. Mɛni Odasefonyo ko ni yɔɔ Asia teŋgbɛ he ko lɛ niiashikpamɔ lɛ haa onaa yɛ yelikɛbuamɔ ni Nyɔŋmɔ kɛhaa lɛ he?

²² Kɛ́ Yehowa na akɛ esa akɛ eŋɔ etsuji ni yɔɔ ŋmɛnɛ lɛ ekomɛi etee koni akaye amɛ awui lɛ, ebaanyɛ efee nakai. Shi bei pii lɛ, ehaa amɛ ekãa kɛ nilee koni amɛnyɛ amɛbó lɛ toi ni amɛya nɔ amɛshiɛ sanekpakpa lɛ. Yoo ko ni ji fɔlɔ ni ekome etsɔseɔ ebii, ni wɔbaatsɛ lɛ akɛ Gulistan lɛ yɛ bii ejwɛ. Yehowa miiye eebua lɛ. No mli lɛ, lɛ pɛ ji Odasefonyo ni yɔɔ Asia teŋgbɛ shikpɔŋkuku ko ni da waa, ni maŋ nɔyelɔi ni yɔɔ jɛmɛ lɛ teɔ shi amɛwoɔ Maŋtsɛyeli shiɛmɔ nitsumɔ lɛ. Asafo ni bɛŋkɛ he ni eyɔɔ lɛ kɛ lɛ teŋ jekɛmɔ aaafee kilomitai 400, no hewɔ lɛ ekpakpa ko dani enyɛɔ ekɛ Kristofoi ni edara yɛ mumɔŋ bɔɔ. Ekɛ shiteekɛwoo kɛ naagbai krokomɛi kpeɔ, shi fɛɛ sɛɛ lɛ, eshiɛɔ yɛ shĩa kɛ shĩa, ni enine shɛɔ mɛi babaoo ni yɔɔ wiemɔ lɛ he miishɛɛ anɔ. Amaniɛbɔɔ ni nine shɛ nɔ nyɛsɛɛ nɛɛ nɔŋŋ lɛ tsɔɔ akɛ ekɛ mɛi aaafee 20 miikase Biblia lɛ, ni eeye eebua kuu ko ni eshiɛmɔ nitsumɔ lɛ eha ato lɛ, ni amɛmiishwere.

²³ Taakɛ Nyɔŋmɔ ye ebua Yeremia kɛ Odasefoi tamɔ Gulistan lɛ, efee klalo akɛ ebaaye ebua etsuji krokomɛi ni boɔ lɛ toi lɛ. Tswaa ofai shi akɛ obaabó lɛ toi akɛ Nɔyelɔ shi jeee adesai. Kɛ́ ofee nakai lɛ, shiteekɛwoo kɛ gbɛtsii nii krokomɛi haŋ okpa anɔkwa Nyɔŋmɔ koome lɛ yijiemɔ yɛ faŋŋ mli yɛ oshikpɔŋkuku lɛ mli.—Yer. 15:20, 21.

24. Kɛ́ ohi shi yɛ Yehowa mlai lɛ anaa lɛ, mɛɛ sɛɛ obaaná amrɔ nɛɛ?

²⁴ Kɛ́ wɔtsi wɔhe kɛjɛ wɔ-Bɔlɔ lɛ he lɛ, wɔnaŋ miishɛɛ diɛŋtsɛ ni wɔtsui enyɔŋ wɔmli hu yɛ shihilɛ mli. (Yer. 10:23) Beni okase nɔ̃ ni Yeremia ŋma yɛ toiboo he lɛ sɛɛ lɛ, ani oona hei komɛi ni obaanyɛ oŋmɛ Yehowa gbɛ ni ejaje onajifaamɔi lɛ jogbaŋŋ kɛmɔ shi? Emlai lɛ pɛ ji nɔ̃ ni baanyɛ atsɔɔ wɔ gbɛ ni kɛji wɔhi shi yɛ naa lɛ, wɔbaaná miishɛɛ jogbaŋŋ ni wɔye omanye. Yehowa kɛɛ, ‘Nyɛboa migbee toi bɔni afee ní ahi aha nyɛ.’—Yer. 7:23.