‘Nyɛkwɛa Jogbaŋŋ Ni Mɔ Ko Akaŋɔ Nyɛ Nom’!

 1. Yɛ nɔ ni awie yɛ Kolosebii 2:4, 8 lɛ naa lɛ, mɛni Satan feɔ koni ekɛfite wɔjwɛŋmɔ ni wɔtsɔmɔ enyɔji?

SATAN miitao ni wɔje Yehowa sɛɛ. Enɛ hewɔ lɛ, eebɔ mɔdɛŋ ni efite wɔjwɛŋmɔ koni wɔtsɔmɔ enyɔji ni wɔfee nɔ fɛɛ nɔ ni eesumɔ ni wɔfee. Etsɔɔ nibii ni wɔshweɔ lɛ anɔ elakaa wɔ loo ekɔneɔ wɔyiŋ koni wɔbanyiɛ esɛɛ.​—Kanemɔ Kolosebii 2:4, 8.

2-3. (a) Mɛni hewɔ esaaa akɛ wɔkuɔ wɔhiɛ wɔfɔ̃ɔ kɔkɔbɔɔ ni yɔɔ Kolosebii 2:8 lɛ nɔ? (b) Mɛni he wɔbaasusu yɛ nikasemɔ nɛɛ mli?

² Ani Satan baanyɛ alaka wɔ lɛɛlɛŋ? Hɛɛ, ebaanyɛ! Bo lɛ, susumɔ enɛ he okwɛ. Namɛi Paulo ŋma kɔkɔbɔɔ wiemɔi ni yɔɔ Kolosebii 2:8 lɛ eyahã? Eŋma eyahã Kristofoi ni akɛ mumɔ krɔŋkrɔŋ lɛ efɔ amɛ mu, jeee mɛi ni heee Kristo nɔ amɛyeee, ejaakɛ ena akɛ Satan baanyɛ alaka amɛ. (Kol. 1:2, 5; 1 Kor. 10:12) Kɛ́ nakai beiaŋ tɔ̃ɔ po lɛ, Satan bɔ mɔdɛŋ akɛ ebaalaka Kristofoi lɛ, belɛ esa akɛ wɔkwɛ wɔhe nɔ jogbaŋŋ ŋmɛnɛ. Mɛni hewɔ? Nɔ kome ji akɛ, ashwie Satan kɛje ŋwɛi kɛba shikpɔŋ lɛ nɔ, ni etswa efai shi akɛ, ebaafee nɔ fɛɛ nɔ ni ebaanyɛ koni elaka Nyɔŋmɔ tsuji anɔkwafoi lɛ. (Kpo. 12:9, 12, 17) Agbɛnɛ hu, ŋmɛnɛ lɛ, ‘gbɔmɛi fɔji kɛ shishiulɔi ewo wu yɛ efɔŋ mli.’​—2 Tim. 3:1, 13.

³ Yɛ nikasemɔ nɛɛ mli lɛ, wɔbaakwɛ bɔ ni Satan bɔɔ mɔdɛŋ ni ekɛ “tsɔɔmɔi ni sɛɛnamɔ bɛ he” afite wɔjwɛŋmɔ, ni wɔbaana ‘ŋaa’ gbɛi etɛ komɛi ni ekɛtsuɔ nii. (Efe. 6:11) Shi kɛ́ wɔna akɛ Satan ŋaatsɔi lɛ ekomɛi ebɔi wɔjwɛŋmɔ fitemɔ momo hu? Yɛ nikasemɔ ni nyiɛ sɛɛ lɛ mli lɛ, abaatsɔɔ wɔ nɔ ni wɔbaanyɛ wɔfee koni wɔjie Satan susumɔi gbohii lɛ kɛje wɔjwɛŋmɔ mli. Shi klɛŋklɛŋ kwraa lɛ, hã wɔkwɛ bɔ ni Satan fee elaka Israelbii lɛ be ni amɛyashɛ Shiwoo Shikpɔŋ lɛ nɔ lɛ kɛ nɔ ni wɔbaanyɛ wɔkase yɛ mli.

4-6. Be ni Israelbii lɛ yashɛ Shiwoo Shikpɔŋ lɛ nɔ lɛ, mɛɛ tsakemɔi 5 Mose 11:10-15 lɛ hãa wɔnaa akɛ ehe bahia ni amɛfee yɛ bɔ ni amɛyeɔ okwaa amɛhãa lɛ mli?

⁴ Satan le akɛ, niyenii he miihia Israelbii lɛ. No hewɔ lɛ, etsɔ no nɔ elaka amɛ ni amɛyajá amagai. Be ni Israelbii lɛ yɔɔ Ejipt lɛ, amɛkɛ Nilo faa lɛ mli nu lɛ ni shwieɔ amɛdumɔ nii lɛ anɔ nu. Shi be ni amɛyashɛ Shiwoo Shikpɔŋ lɛ nɔ lɛ, ehe bahia ni amɛtsake gbɛ nɔ ni amɛtsɔɔ amɛyeɔ okwaa lɛ. Mɛni hewɔ? Ejaakɛ faa agbo ko tamɔ Nilo lɛ bɛ Shiwoo Shikpɔŋ lɛ nɔ ni amɛkɛ emli nu lɛ baashwie amɛdumɔ nii anɔ nu, ni no hewɔ lɛ, esa akɛ amɛkɛ amɛhiɛ afɔ̃ nugbɔ loo bɔ́ nɔ. (Kanemɔ 5 Mose 11:10-15; Yes. 18:4, 5) Shi akɛni amɛteŋ mɛi ni ekolɛ amɛle bɔ ni ayeɔ okwaa lɛ babaoo gboi yɛ ŋa lɛ nɔ hewɔ lɛ, enɛ feemɔ bawa kɛhã amɛ waa.

⁵ Yehowa hã ewebii lɛ le akɛ, amɛshihilɛ etsake. Kɛkɛ ni ekɛ kɔkɔbɔɔ nɛɛ fata he, akɛ: “Nyɛkwɛa jogbaŋŋ koni akalaka nyɛtsui ni nyɛgbá afã, ní nyɛyajá nyɔŋmɔi krokomɛi, ní nyɛkoto amɛ hu.” (5 Mo. 11:16, 17) Ekolɛ obaabi akɛ, ‘Mɛni hewɔ Yehowa bɔ amɛ kɔkɔ ni amɛkwɛ jogbaŋŋ ni amɛkayajá amagai, tsɛbelɛ jeee jamɔ he ekɛ amɛ wieɔ shi moŋ okwaayeli?’

⁶ Kanaanbii lɛ le bɔ ni ayeɔ okwaa yɛ Shiwoo Shikpɔŋ lɛ nɔ kwraa fe Israelbii lɛ. Yehowa le akɛ, Israelbii lɛ baanu he akɛ amɛya amagajalɔi nɛɛ aŋɔɔ koni amɛyakase bɔ ni amɛfeɔ amɛyeɔ okwaa lɛ, ni kɛ́ amɛtee lɛ, ewaaa akɛ amɛbaafata amɛhe kɛjá amɛmagai lɛ. Mɛni hewɔ? Kanaanbii lɛ jáa Baal, ni enɛ sa bɔ ni amɛyeɔ okwaa amɛhãa lɛ he. Akɛ nɔkwɛmɔnɔ lɛ, amɛheɔ amɛyeɔ akɛ atatu lɛ, Baal nɔ ni, ni lɛ ji mɔ ni hãa nugbɔ nɛɔ. Enɛ hewɔ Yehowa bɔ ewebii lɛ kɔkɔ lɛ, ejaakɛ esumɔɔɔ ni amɛ hu amɛheɔ amalei nɛɛ amɛyeɔ. Shi fɛɛ sɛɛ lɛ, Israelbii lɛ gbo Yehowa nɔ toi shii abɔ, ni amɛyajá Baal. (4 Mo. 25:3, 5; Koj. 2:13; 1 Maŋ. 18:18) Ani oona bɔ ni fee ni Israelbii lɛ batsɔmɔ Satan nyɔji?

 7. Be ni Israelbii lɛ yashɛ Shiwoo Shikpɔŋ lɛ nɔ lɛ, mɛɛ hemɔkɛyeli he kaa amɛkɛkpe?

⁷ Satan tsɔ shwelɛ ko ni tɔmɔ bɛ he lɛ nɔ elaka Israelbii lɛ. Te efee lɛ ehã tɛŋŋ? Israelbii lɛ miisumɔ ni nugbɔ anɛ ashwie amɛdumɔ nii lɛ anɔ, ni tɔmɔ ko kwraa bɛ enɛ he, ejaakɛ dani amɛbaaná nɔ ko amɛye koni amɛkagboi lɛ, esa akɛ nugbɔ anɛ ashwie nibii ni amɛdu lɛ anɔ. Shi daa afi lɛ, kɛjɛ April naagbee gbɛ aahu kɛyashi September lɛ, nugbɔ enɛɛɛ ekpakpa ko yɛ Shiwoo Shikpɔŋ lɛ nɔ. Nugbɔ fɔɔ nɛmɔ kɛjɛ October mli kɛyaa. Kanaanbii lɛ he amɛye akɛ, amɛnyɔŋmɔi lɛ ni hãa nugbɔ nɛɔ, ni no hewɔ lɛ, amɛfee kusumii komɛi amɛhã amɛ koni amɛhã nugbɔ anɛ. Satan laka Israelbii lɛ ni amɛhe amɛye akɛ, ja amɛkase Kanaanbii lɛ dani amɛ hu amɛŋmɔshi nibii baashwere. Israelbii ni hemɔkɛyeli faaa lɛ nu he akɛ kɛ́ amɛfeee nakai lɛ, nuhɔmɔ baaba. No hewɔ lɛ, amɛ hu amɛfee kusumii amɛhã amale nyɔŋmɔ ni atsɛɔ lɛ Baal lɛ.

 8. Mɛɛ gbɛ kroko nɔ Satan tsɔ elaka Israelbii lɛ? Tsɔɔmɔ mli.

⁸ Israelbii lɛ ná bɔlɛnamɔ jeŋba sha he akɔnɔ, ni Satan tsɔ enɛ hu nɔ elaka amɛ. Kanaanbii lɛ tsɔ bɔlɛnamɔ jeŋba sha ni yɔɔ nyaŋemɔ nɔ amɛjá amɛnyɔŋmɔi lɛ. Akɛ nɔkwɛmɔnɔ lɛ, no mli lɛ amɛyɛ ashawoi kɛ hii ni hãa hii krokomɛi kɛ amɛ náa bɔlɛ yɛ amɛjamɔhei lɛ. Agbɛnɛ hu, amɛŋmɛ gbɛ ni yei kɛ yei loo hii kɛ hii kɛ amɛhe ná bɔlɛ, ni amɛwieee amɛshiii bɔlɛnamɔ jeŋba sha krokomɛi. Anɔkwa, amɛnaaa lɛ nɔ ko po! (5 Mo. 23:17, 18; 1 Maŋ. 14:24) Amɛhe amɛye akɛ, jeŋba sha nifeemɔi nɛɛ baahã amɛnyɔŋmɔi lɛ ajɔɔ amɛshikpɔŋ lɛ koni eba nii babaoo. Israelbii pii ná bɔlɛnamɔ jeŋba sha nifeemɔi nɛɛ ahe miishɛɛ, ni amɛ hu amɛbɔi amale nyɔŋmɔi jamɔ. Enɛ hã amɛbatsɔmɔ Satan nyɔji.

 9. Tamɔ bɔ ni atsɔɔ yɛ Hosea 2:16, 17 lɛ, mɛɛ gbɛ nɔ Satan futu Israelbii lɛ ayiŋ yɛ mɔ ni Yehowa ji lɛ he?

⁹ Gbɛ ni ji etɛ ni Satan tsɔ nɔ elaka Israelbii lɛ ji akɛ, efutu amɛyiŋ yɛ mɔ ni Yehowa ji lɛ he. Yɛ gbalɔ Yeremia beiaŋ lɛ, Yehowa wie yɛ amale gbalɔi lɛ ahe akɛ, amɛhã ewebii lɛ ahiɛ ekpa egbɛ́i lɛ nɔ “yɛ Baal hewɔ.” (Yer. 23:27) Etamɔ nɔ ni Nyɔŋmɔ webii lɛ kɛ egbɛ́i Yehowa lɛ kpa nitsumɔ, ni amɛkɛ gbɛ́i Baal, ni shishi ji “Nɔtsɛ” loo “Nuŋtsɔ” lɛ bɔi lɛ tsɛmɔ. Kɛ́ Israelbii lɛ tsɛ Yehowa akɛ Baal lɛ, ebaawa akɛ amɛbaana akɛ esoro lɛ yɛ amale nyɔŋmɔ ni atsɛɔ lɛ Baal lɛ he, ni enɛ baahã efee mlɛo kɛhã amɛ akɛ amɛkɛ Baal jamɔ mli kusumii baafutu Yehowa jamɔ lɛ.​—Kanemɔ Hosea 2:16, 17 kɛ shishigbɛ niŋmaa lɛ.

10. Mɛɛ gbɛi anɔ Satan tsɔɔ elakaa mɛi ŋmɛnɛ?

¹⁰ Ŋaa gbɛi ni Satan tsɔ nɔ elaka Israelbii lɛ, nomɛi nɔŋŋ ekɛtsuɔ nii ŋmɛnɛ. Etsɔɔ shwelɛ ni tɔmɔ bɛ he ni mɛi yɔɔ, kɛ bɔlɛnamɔ jeŋba sha nɔ ehãa mɛi tsɔmɔɔ enyɔji. Agbɛnɛ hu, efutuɔ mɛi ayiŋ yɛ mɔ ni Yehowa ji lɛ he. Nyɛhãa wɔsusua nibii etɛ nɛɛ ahe ekomekome. Wɔbaaje shishi kɛ naagbee nɔ lɛ.

11. Mɛni Satan efee kɛfutu mɛi ayiŋ yɛ mɔ ni Yehowa ji lɛ he?

¹¹ Satan efutu mɛi ayiŋ yɛ mɔ ni Yehowa ji lɛ he. Yɛ Yesu bɔfoi lɛ agbele sɛɛ lɛ, mɛi komɛi ni kɛɛ Kristofoi ji amɛ lɛ bɔi amalei tsɔɔmɔ. (Bɔf. 20:29, 30; 2 Tes. 2:3) Mɛi nɛɛ ni ekwa anɔkwa jamɔ lɛ futu mɛi ayiŋ yɛ mɔ ni anɔkwa Nyɔŋmɔ koome lɛ ji lɛ he. Akɛ nɔkwɛmɔnɔ lɛ, amɛjie Nyɔŋmɔ gbɛ́i lɛ kɛje amɛ-Bibliai lɛ amli ni amɛkɛ gbɛnaa gbɛ́i ni ji “Nuŋtsɔ” lɛ kɛ ekrokomɛi ni tamɔ nakai lɛ ye najiaŋ. Akɛni amɛjie Nyɔŋmɔ gbɛ́i lɛ ni amɛkɛ “Nuŋtsɔ” ye najiaŋ hewɔ lɛ, ebawa kɛhã mɛi ni kaneɔ Biblia lɛ akɛ amɛbaana srɔto ni yɔɔ Yehowa kɛ “nuŋtsɔmɛi” krokomɛi ni awie amɛhe yɛ Biblia lɛ mli lɛ ateŋ. (1 Kor. 8:5) Amɛhã ebawa po akɛ abaana akɛ esoro Yehowa yɛ e-Bi Yesu he, ejaakɛ amɛkɛ gbɛnaa gbɛ́i “Nuŋtsɔ” kome too nɛɛ nɔŋŋ tsu nii amɛhã amɛyi enyɔ lɛ fɛɛ. (Yoh. 17:3) Yiŋfutumɔ nɛɛ nɔ tsɔ ni aná Triniti tsɔɔmɔ lɛ, ni ji tsɔɔmɔ ko ni damɔɔɔ Biblia lɛ nɔ lɛ. Nɛkɛ tsɔɔmɔ nɛɛ hewɔ lɛ, ŋmɛnɛ lɛ mɛi heɔ amɛyeɔ akɛ mɔ ko mɔ ko nyɛŋ ale mɔ tuuntu ni Nyɔŋmɔ ji. Enɛ ji amale agbo!​—Bɔf. 17:27.

12. Mɛni amale jamɔ woɔ mɛi hewalɛ ni amɛfee? Ni yɛ nɔ ni aŋma yɛ Romabii 1:28-31 lɛ naa lɛ, mɛni ejɛ mli kɛba?

¹² Satan tsɔɔ bɔlɛnamɔ jeŋba sha he akɔnɔ nɔ elakaa amɛ. Yɛ blema Israelbii lɛ abeiaŋ lɛ, Satan tsɔ amale jamɔ nɔ ewo mɛi hewalɛ ni amɛkɛ amɛhe wo jeŋba sha mli. Ŋmɛnɛ hu lɛ, nakai pɛpɛɛpɛ efeɔ. Amale jamɔi ewieee amɛshiii jeŋba sha, ni amɛwoɔ mɛi hewalɛ po ni amɛkɛ amɛhe awo mli. Enɛ hewɔ lɛ, ŋmɛnɛ lɛ, mɛi pii kɛɛ amɛmiijá Nyɔŋmɔ, shi amɛkɛ mlai kɛ shishitoo mlai ni mli kã shi faŋŋ ni ekɛhã yɛ bɔ ni esa akɛ wɔba wɔjeŋ wɔhã lɛ he lɛ tsuuu nii. Bɔfo Paulo wie nɔ ni ejɛ enɛ mli kɛba lɛ he yɛ wolo ni eŋma eyahã Romabii lɛ mli. (Kanemɔ Romabii 1:28-31.) “Nibii ni esaaa” lɛ ekomɛi ji, bɔlɛnamɔ jeŋba sha srɔtoi fɛɛ, ni hii kɛ hii loo yei kɛ yei ni kɛ amɛhe náa bɔlɛ lɛ hu fata he. (Rom. 1:24-27, 32; Kpo. 2:20) Nɔ ni Biblia lɛ kɛɔ yɛ jeŋba sha he lɛ mli kã shi faŋŋ, ni ehe miihia waa ni wɔhi shi yɛ naa.

13. Mɛɛ gbɛ kroko hu nɔ Satan tsɔɔ elakaa mɛi?

¹³ Satan tsɔɔ shwelɛ ni tɔmɔ bɛ he ni mɛi yɔɔ lɛ nɔ elakaa amɛ. Wɔshweɔ ni wɔkase nɔ ko ni baaye abua wɔ ni wɔnyɛ wɔkwɛ wɔhe kɛ wɔwekui, ni tɔmɔ bɛ he. (1 Tim. 5:8) Bei pii lɛ, ja wɔtee skul ni wɔkase nii jogbaŋŋ dani wɔbaanyɛ wɔfee nakai. Shi ehe miihia ni wɔkwɛ jogbaŋŋ yɛ enɛ feemɔ he. Yɛ maji pii anɔ lɛ, atsɔɔ skulbii nibii ni he baaba sɛɛnamɔ ehã amɛ wɔsɛɛ, shi jeee no pɛ atsɔɔ amɛ. Atsɔɔ amɛ gbɔmɛi ahiɛshikamɔ hu. Atsɔɔ amɛ akɛ, esaaa akɛ amɛheɔ amɛyeɔ akɛ Nyɔŋmɔ yɛ, ni akɛ ehe ehiaaa ni amɛhiɔ shi yɛ tsɔɔmɔi ni yɔɔ Biblia lɛ mli lɛ anaa. Agbɛnɛ hu, atsɔɔ amɛ akɛ, mɛi fɛɛ ni hiɛ kã shi lɛ heɔ amɛyeɔ akɛ sutsakemɔ nɔ tsɔ ni wala je shishi. (Rom. 1:21-23) Tsɔɔmɔi ni tamɔ nɛkɛ lɛ kɛ “Nyɔŋmɔ hiɛshikamɔ lɛ” kpãaa gbee.​—1 Kor. 1:19-21; 3:18-20.

14. Mɛɛ sui gbɔmɛi ahiɛshikamɔ hãa mɛi jieɔ kpo?

¹⁴ Gbɔmɛi ahiɛshikamɔ lɛ damɔɔɔ Yehowa mlai kɛ shishitoo mlai lɛ anɔ. Anɔkwa, eteɔ shi ewoɔ mlai kɛ shishitoo mlai nɛɛ po. Ehãaa mɛi awo Nyɔŋmɔ mumɔ lɛ yibii lɛ, moŋ lɛ, ehãa amɛjieɔ “heloo lɛ nitsumɔi lɛ” akpo. (Gal. 5:19-23) Ehãa mɛi wóɔ amɛhe nɔ ni amɛyeɔ amɛtsuinaa sane, ni enɛ hãa amɛbatsɔmɔɔ “hesuɔlɔi.” (2 Tim. 3:2-4) Amɛjieɔ sui gbohii nɛɛ akpo, moŋ fe ni amɛbaajie sui tamɔ mlijɔlɛ kɛ heshibaa ni Nyɔŋmɔ woɔ etsuji hewalɛ ni amɛjie lɛ kpo lɛ akpo. (2 Sam. 22:28) Nyɛmimɛi komɛi etee yunivɛsiti, ni nibii ni amɛyakase yɛ jɛmɛ lɛ ehã amɛmiisusu nii ahe tamɔ je lɛ, moŋ fe ni amɛbaasusu nii ahe tamɔ Nyɔŋmɔ. Naa niiashikpamɔ ko ni tsɔɔ nɔ ni baanyɛ aba kɛ́ wɔku wɔhiɛ wɔshwie oshãrai ni yɔɔ yunivɛsiti yaa he lɛ anɔ.

15-16. Mɛni okaseɔ yɛ nyɛmi yoo lɛ niiashikpamɔ lɛ mli?

¹⁵ Nyɛmi yoo ko ni kɛ nɔ ni fe afii 15 ehi be fɛɛ sɔɔmɔ lɛ mli lɛ wie akɛ: “Akɛ Odasefonyo ni abaptisi lɛ lɛ, minu ni mikane kɔkɔbɔi ni akɛhãa wɔ yɛ yunivɛsiti yaa he lɛ, shi miku mihiɛ mishwie fɛɛ nɔ. Minu he akɛ ekɔɔɔ mihe.” Mɛɛ naagbai nyɛmi yoo nɛɛ kɛkpe? Ewie akɛ: “Nibii ni miyɔɔ kasemɔ lɛ he mibe kɛ mihewalɛ waa, aahu akɛ, mináaa dekã ni masɔle jogbaŋŋ mahã Yehowa tamɔ mifeɔ be ko ni eho lɛ. Agbɛnɛ hu, akɛni etɔɔ mi bliboo hewɔ lɛ, minyɛɛɛ mikɛ mɛi krokomɛi agba Biblia lɛ mli sane, ni minyɛɛɛ masaa mihe jogbaŋŋ kɛhã asafoŋ kpeei. Dromɔ naa lɛ, be ni miyɔse akɛ yunivɛsiti lɛ miigbala mimli waa, ni eefite mi kɛ Yehowa teŋ lɛ, mina akɛ esa akɛ makpa. Ni nakai pɛpɛɛpɛ mifee.”

¹⁶ Te yunivɛsiti ni etee lɛ ná esusumɔ nɔ hewalɛ ehã tɛŋŋ? Ewie akɛ: “Ehã mina tɔmɔ yɛ mɔ fɛɛ mɔ he, titri lɛ minyɛmimɛi Kristofoi lɛ, mikpa babaoo gbɛ yɛ amɛdɛŋ fe bɔ ni amɛbaanyɛ, ni mitsi mihe kɛje amɛhe. Kɛ́ mikai lɛ, efeɔ mi hiɛgbele waa. Ehe mi be waa dani minyɛ mijaje mijwɛŋmɔ. Niiashikpamɔ nɛɛ hã mina akɛ, eyɛ oshãra waa akɛ mɔ baaku ehiɛ eshwie kɔkɔbɔi ni wɔ-Tsɛ ni yɔɔ ŋwɛi lɛ tsɔɔ esafo lɛ nɔ ekɛhãa wɔ lɛ anɔ. Yehowa le mi jogbaŋŋ fe bɔ ni mi diɛŋtsɛ mile mihe. Kulɛ, esa akɛ mabo lɛ toi!”

17. (a) Mɛni esa akɛ wɔtswa wɔfai shi akɛ wɔbaafee? (b) Mɛni he wɔbaasusu yɛ nikasemɔ ni nyiɛ sɛɛ lɛ mli?

¹⁷ Tswaa ofai shi akɛ, ohãŋ Satan je lɛ atsɔ “jeŋ nilee kɛ tsɔɔmɔi ni sɛɛnamɔ bɛ he lɛ” anɔ eŋɔ bo nom kɔkɔɔkɔ. Hã ohiɛ ahi ohe nɔ be fɛɛ be yɛ Satan ŋaatsɔi lɛ ahe. (1 Kor. 3:18; 2 Kor. 2:11) Kaahã efutu oyiŋ yɛ mɔ ni Yehowa ji kɛ bɔ ni eesumɔ ni ajá lɛ lɛ he kɔkɔɔkɔ. Hii shi yɛ Yehowa mlai kɛ eshishitoo mlai ni nɔ bɛ lɛ anaa. Ni kaahã Satan laka bo ni oku ohiɛ ofɔ̃ Yehowa ŋaawoo nɔ. Shi kɛ́ ona akɛ je lɛ susumɔi lɛ ekomɛi ebɔi ojwɛŋmɔ fitemɔ momo hu? Nikasemɔ ni nyiɛ sɛɛ lɛ baatsɔɔ wɔ bɔ ni Nyɔŋmɔ Wiemɔ lɛ baanyɛ aye abua wɔ ni wɔfãmɔ susumɔi kɛ nifeemɔi gbohii “ni amɛshishifãi emɔmɔ shi waa” lɛ po wɔshwie.​—2 Kor. 10:4, 5.