Biblia Gbalɛ Mli Maŋtsɛ “Tookwɛlɔ” Lɛ
1. Mɛɛ gbɛ nɔ maŋkwramɔŋ “tookwɛlɔi” ni yɔɔ je lɛ mli lɛ ekwɛ gbɔmɛi lɛ anɔ yɛ; ni te aaafee tɛɛŋ asaa enɛ?
1 NIBII agbɛjianɔtoo nɛɛ mli “tookwɛlɔi” maŋkwralɔi lɛ gbálaa maŋbii ni tamɔ tooi lɛ amli. Maji lɛ eko fɛɛ eko yɛ kuu kome ni etse ehe ni ji jakumaŋ mli. Tooiku wulu kome ko bɛ ni abaanyɛ akɛɛ akɛ adesai fɛɛ yɛ mli. Gbɛjianɔtoo kɛha jeŋ toiŋjɔlɛ kɛ shweshweeshwe-shihilɛ ni ji Jeŋmaji Ekomefeemɔ lɛ nyɛɛɛ eha ana jeŋ muu fɛɛ tooiku kome ni tamɔ nakai, eyɛ mli akɛ amrɔ nɛɛ jeŋmaji 151a yɔɔ mli. Enyɛɛɛ eha gbɔmɛi lɛ ana nɔni he hiaa kɛha tooiku kome ni jeŋmaji lɛ fɛɛ aaatsɔ yɛ Tookwɛlɔ kome shishi lɛ. Bɔlɔ ni “lá kome eŋɔfee gbɔmɛi adesai fɛɛ, ni amɛhi shikpɔŋ lɛ fɛɛ hiɛ” lɛ pɛ baanyɛ eha ana Tookwɛlɔ Maŋnɔkwɛlɔ ni baabua gbɔmɛi adesai fɛɛ anaa et’ce amɛ tooiku kome lɛ.—Bɔf. 17:26.
2, 3. (a) Mɛni hewɔ Yehowa susu akɛ esani ekpa Maŋtsɛ David seshi lɛ mli tookwɛlɔi lɛ yɛ sɛi nɔ lɛ? (b) Mɛni hewɔ Yeremia Wolo 23:1, 2 kɛɔ akɛ kpoo ha nɛkɛ tookwɛlɔi nɛɛ?
2 Bɔlɔ lɛ tsɔ lɛdiɛŋtsɛ egbɔmɛi ni ehala ni ji Israelbii lɛ anɔ eha ana akɛ yɛ nibii agbɛjianɔtoo nɛɛ shishi lɛ, gbɔmɔ adesa ko ni yeee emuu ko bɛ ni baanyɛ ebua adesai fɛɛ anaa efee amɛ tooiku kome ni eye amɛnɔ akɛ tookwɛlɔ kome. Eba mli nakai yɛ maŋtsɛmɛi ni ye nɔ kɛjɛ Maŋtsɛ David ni yashɔ̃ Yerusalem ni efeelɛ maŋwulu yɛ afi 1070 D.Ŋ.B. mli lɛ nɔ lɛ po ashishi. Amɛ, akɛ Israel Nyɔŋmɔ lɛ najiaŋdamɔlɔi ni yɔɔ shikpɔŋ nɛɛ nɔ lɛ, amɛtara nɔni atsɛlɛ “Yehowa sɛi” lɛ nɔ. (1 Kron. 29:23; 2 Kron. 13:8) Akɛni nɔyelɔi tookwɛlɔi lɛ tee nɔ amɛfite (ja amɛteaŋ mɛi fioo pɛ hi) hewɔ lɛ, Nyɔŋmɔ na akɛ esani ekpa nakai maŋtsɛmɛi-aweku lɛ yɛ sɛi lɛ nɔ, beni amɛye nɔ afii 463 sɛɛ.
3 “Kpoo ha tookwɛlɔi ni kpataa milɛɛhe tooi lɛ ahiɛ ni amɛgbɛɔ amɛ amɛshwãa lɛ, Yehowa kɛɛ. Nohewɔ lɛ bɔni Yehowa, Israel Nyɔŋmɔ lɛ, kɛɛ yɛ kwɛlɔi ni lɛɔ mimaŋ lɛ hewɔ nɛ: Nyɛgbɛ mitooi lɛ nyɛshwã, ni nyɛshwie amɛ kɛtee, ni nyɛyataooo amɛ: Naa, mibawo nyɛ nyɛnifeemɔnii fɔji lɛ ahe nyɔmɔ, Yehowa kɛɛ.”—Yer. 23:1, 2.
4. Te Shalum (Yehoahaz) kɛ Yehoiakim asane fee tɛɛŋ, akɛ tookwɛlɔi?
4 Beni maŋtsɛ kpakpa Yosia gbo yɛ afi 628 D.Ŋ.B. mli lɛ, ebihii etɛ kɛ enabi kome ni baye nɔ lɛ fee nɔni ehiii. Enɛ ha amɛshishibii lɛ gbɛ shwã. Akɛ nɔkwɛmɔnɔ lɛ, Shalum aloo Yehoahaz baye Yosia sɛɛ klɛŋklɛŋ yɛ “Yehowa sɛi” lɛ nɔ. Beni eye nɔ nyɔji etɛ pɛ lɛ, aŋɔlɛ kɛtee nomŋɔɔ mli yɛ Mizraim. Eyagbo yɛ jɛi. (Yer. 22:10-12) Yɛ enyɛminukpa Yehoiakim gbɛfaŋ lɛ, enɔyeli afii 11 lɛ amli lɛ, apiŋ maŋbii lɛ ni ashwie lá shi yɛ mli aahu akɛ nɔ̃ nɔŋŋ ni salɛ ji akɛ ashɛ egbonyo afɔ̃ Yerusalem agboi lɛ esɛɛ ni afulɛ “tamɔ afũɔ teji.”—Yer. 22:13-19.
5. Te Konia (Yehoiakin) kɛ Zedekia asane fee tɛɛŋ akɛ tookwɛlɔi?
5 Yehoiakim binuu fioo ni atsɛɔlɛ Yehoiakin, Yekonia aloo Konia lɛ baye esɛɛ. (Mat. 1:11, 12) Akɛni eji Maŋtsɛ David seshinyo ni eta “Yehowa sɛi” nɔ hewɔ lɛ benɛ abulɛ akɛ mɔko ni jara wa tamɔ wolonaasɔomɔnɔ ni yɔɔ Yehowa ninejurɔ nɔ. Kɛlɛ yɛ enifɔjianii lɛ hewɔ lɛ, esani akpɔlɛ ni atsirɛ eyisɛɛ kɛya nomŋɔɔ mli yɛ Babilon shikpɔŋ Iɛ nɔ. Beni eye nɔ nyɔji etɛ kɛ gbii nyɔŋma pɛ sɛɛ lɛ, ebayɔse akɛ esani eŋmɛɛ ehe eha Babilon maŋtsɛ ni ebawo Yerusalem he ka lɛ. Aŋɔ Yehoiakin kɛ Israelbii ni fa fe 10,000 kɛtee nomŋɔɔ mli yɛ Babilon amɛyagboi yɛ jɛmɛ. Eshiii binuu ko yɛ esɛɛ ni baata maŋtsɛsɛi lɛ nɔ, shi moŋ etsɛkwɛ̃ Zedekia ni ji Yosia bi lɛ ji mɔni afeelɛ maŋtsɛ ni yɔɔ Maŋtsɛ Nebukadnezar shishi. (2 Maŋts. 24:5-17; Yer. 22:24-40) Zedekia ku kitã ni ekã yɛ Yehowa gbɛi mli lɛ nɔ. Nohewɔ lɛ beni ekɛ yibii ni etuatsemɔ gbɛ lɛ kɛba lɛ kpe ni eyabi gbalɔ Yeremia nii lɛ, oshra he sane pɛ akɛmaje Zedekia.
6. Te ebalɛ eha tɛɛ ni ‘amanehulu’ ni ba nakai “tookwɛlɔi” lɛ anɔ Iɛ atsɔ amanehulu eha amɛshishibii hu lɛ; ni te fɛɛ tɛɛŋ ni ebalɛ akɛ Yehowa ji mɔni ha agbɛ amɛ ashwã lɛ?
6 Nɔni ba Yuda maŋtsɛyeli lɛ nɔ “tookwɛlɔi” maŋtsɛmɛi ejwɛ lɛ kɛ lumɛi ni ji tookwɛlɔi bihii ni yɔɔ amɛshishi lɛ anɔ ji “kpoo” lɛɛlɛŋ. Enɛ tsɔɔ hu akɛ agbɛ amɛshishibii ni tamɔ tooi lɛ ashwã, ejaakɛ amɛtee nomŋɔɔ mli yɛ Mizraim kɛ Babilon. Enɛ ha Yuda shikpɔŋ lɛ kã shi amaŋfɔ. Yɛ “tookwɛlɔi” lɛ anɔfɔŋfeemɔ hewɔ lɛ amɛtereɔ “tooi” lɛ agbɛɛkɛshwamɔ lɛ he sɔ̃. Nohewɔ ni ekolɛ aaakɛɛ akɛ lsrael Nyɔŋmɔ Yehowa gbɛ amɛ eshwã ji akɛ lɛ ji mɔni yatsɛ́ eblafoi toigbalalɔi lɛ kɛba koni amɛbagbala ewebii toibolɔi lɛ atoi.—Yer. 23:1, 2; 2 Kron. 36:9-21.
MƆNI AAATSƐLƐ “YEHOWA, WƆJALƐ LƐ”
7, 8. (a) Namɔ pɛ baanyɛ eha ana “tookwɛlɔ” ni fe nakai Yerusalem naagbee maŋtsɛmɛi ejwɛ lɛ; ni mɛni hewɔ? (b) Yɛ nakai, “tookwɛlɔ” ni fe ekrokomɛi lɛ he shiwoo mli lɛ, mɛni Yehowa kɛɛ yɛ Yeremia wolo 23:3-6?
7 Biblia Nyɔŋmɔ Yehowa ji tookwɛlɔ ni sa. Ebaanyɛ eha wɔ tookwɛlɔ nɔyelɔ ni hi kwraa fe Yerusalem naagbee maŋtsɛmɛi ejwɛ ni efɔŋ ni amɛfeɔ lɛ ha amɛshishibii ni tamɔ tooi lɛ gbɛ shwã lɛ. Yɛ abele ni nɔyelɔi ni ji adesai ni yeee emuu lɛ bɔɔ amɛshishibii hewɔ lɛ, ŋwɛi Tookwɛlɔ Yehowa ewo shi akɛ ebaaha ana nakai tookwɛlɔ nɔyelɔ ni hi fe mɛikrokomɛi fɛɛ lɛ. Nohewɔ lɛ beni ejaje “kpoo” eshwie Yuda maŋtsɛyeli lɛ mli “tookwɛlɔi” abolofoi lɛ anɔ sɛɛ lɛ, Yehowa jɛ mumɔ mli etsirɛ egbalɔ Yeremia ni ekɛɛ akɛ:
8 “Ni mabua mitooi ni eshwɛ lɛ anaa kɛaajɛ shikpɔji fɛɛ ni mishwie amɛ kɛtee nɔ Iɛ anɔ, ni mikɛ amɛ aaaba amɛlɛɛhei ekoŋŋ, ni amɛ aaafɔfɔi ni amɛyi aaafa pii. Ni maŋɔ tookwɛlɔi mato amɛnɔ ni amɛlɛ amɛ, ni amɛsheŋ gbeyei, ni amɛtsui hu efaŋ dɔŋŋ, ni amɛteŋ ekoeko eshwɛŋ! Yehowa kɛɛ, Naa, gbii miiba, Yehowa kɛɛ, ni matee tsofɔ ko ni ja [nɔni kɛ David shwiei ni efeee jalɛnii lɛ kpaaa gbee lɛ] shi maha David, ni eeeye maŋtsɛ ni eeefee enii yɛ nilee mli, ni eeekojo ni eeeye jalɛ sane yɛ shikpɔŋ lɛ nɔ. Eyinɔ lɛ aaahere Yuda yiwala ni Israel aaahi shi shweshweeshwe , ni egbɛi ni akɛ aaatsɛlɛ ji: Yehowa, Wɔjalɛ Lɛ!”—Yer. 23:3-6.
9. Mɛni hewɔ gbɛi ni akɛɛ abaawo nakai “tookwɛlɔ” ni awo shi yɛ ehe lɛ akɛ “Yehowa, Wɔ-Jalɛ” lɛ etsɔɔɔ akɛ lɛ ji Yehowa diɛŋtsɛ?
9 “Abaatsɛlɛ akɛ: ‘Nuutsɔ lɛ ji wɔ-Hefalɔ.’” Nakai ji bɔni Biblia Shishitsɔɔmɔ ni Jewish Publication Society of America lɛ fee yɛ afi 1978 mli lɛ tsɔɔ Yeremia Wolo 23:6 shishi, tsɛbelɛ Moffatt shishitsɔɔmɔ lɛ kɛɔ akɛ lɛ ji “wɔtatsɛ́lɔ.” Mɔkomɔko ebahiii shikpɔŋ nɛɛ nɔ ni akɛ gbɛi nɛɛ diɛŋtsɛ tsɛlɛ. Kɛlɛ gbalɛ nɛɛ baa mli yɛ Yesu Kristo mli. Nakai gbɛi ni ebana lɛ etsɔɔɔ akɛ Yesu ji Yehowa Nyɔŋmɔ diɛŋtsɛ. Israelnyo ni atsɛlɛ Yehozadak ni egbɛi shishi ji “Yehowa Bu Bem” aloo “Yehowa Ji Jalɔ” lɛ jeee Yehowa diɛŋtsɛ. (1 Kron. 6:14, 16) Yeremia Wolo 33:16 kɛɔ wɔ akɛ abaatsɛ Yerusalem akɛ “Yehowa Wɔjalɛ Lɛ,” shi ani no tsɔɔ akɛ Yerusalem ji Yehowa diɛŋtsɛ? Dabi! naagbee maŋtsɛ ni ye nɔ yɛ Yerusalem ni atsɛɔlɛ Zedekia lɛ gbɛi Shishitsɔɔmɔ ji “Yah Jalɛ Lɛ.” Shi maŋtsɛ ni abaatsɛlɛ “Yehowa Wɔjalɛ Lɛ” ni ji Yesu Kristo lɛ yɛ sɔrɔto kwraa yɛ Maŋtsɛ Zedekia he.
10, 11. (a) Ŋamɛi anɔ shiwoo ni akɛha yɛ Yeremia Wolo 23:5, 6 lɛ ba mli yɛ? (b) Namɔ nɔ gbɛi ni ji “Yehowa, Wɔ-Jalɛ” lɛ bakã ni esa; ni te fee tɛɛŋ gbɛi lɛ bakã enɔ?
10 Gbalɛ ni yɔɔ Yeremia Wolo 23:5, 6 lɛ baaa mli yɛ Yesu gbii lɛ anɔ yɛ Yuda kɛ Israel kɛ Yerusalem diɛŋtsɛ anɔ. Nakai Yudafoi lɛ kpoo Yesu akɛ Mesia lɛ. Romabii lɛ kpata amɛhiɛ ni amɛgbɛ amɛ amɛshwã yɛ afi 70 Ŋ.B. mli. Yɛ anɔkwale mli lɛ gbalɛ lɛ baa mli yɛ mumɔŋ Israelbii ni ji Kristo kaselɔi ni afɔ amɛ mu lɛ anɔ.
11 Yɛ Jeŋ Ta l ni ba kɛjɛ afi 1914 kɛyashi 1918 mli lɛ, Kristendom osɔfoi kɛ jeŋmaji lɛ gbɛ mumɔŋ Israelbii ashwɛɛnii lɛ amɛshwã. Shi kɛjɛ afi 1919 nɔ kɛbaa lɛ Yehowa tsɔ Yesu Kristo ni awo ehiɛ nyam lɛ nɔ ebua shwɛɛnii ni agbɛ amɛ ashwã lɛ anaa ewo mumɔŋ ekomefeemɔ mli yɛ je lɛ mli fɛɛ. Atsuu nɛkɛ mumɔŋ Israelbii ashwɛɛnii ni etsake amɛtsui ni abua amɛnaa nɛɛ ahe ni aha amɛtsɔmɔ mɛi ni sa “maŋtsɛyeli lɛ he sanekpakpa” lɛ shiɛmɔ yɛ majimaji ateŋ, “yɛ je nɛŋ fɛɛ.” (Mat. 24:9-14) Yɛ nɛkɛ gbɛ nɔ lɛ abu amɛ jalɔi aloo abu amɛ bem yɛ Yehowa, duromɔ naa yɛ Kristo mli. Yehowa batsɔ amɛ-Sɛɛdamɔlɔ ‘amɛtafalɔ,’ ni amɛbatsɔmɔ edasefoi Kristofoi (Yes. 43:10) Akɛni nɛkɛ duromɔ nɛɛ baatsɔ Maŋtsɛ Tookwɛlɔ Yesu Kristo ni no mli lɛ akɛlɛ eta maŋtsɛsɛi nɔ lɛ nɔ kɛba hewɔ lɛ, gbɛi ni ji “Yehowa Wɔjalɛ Lɛ” salɛ.
12. Shwɛɛnii lɛ ahe ni aŋmɛɛ ni asaa ato amɛ yɛ Yuda shikpɔŋ nɔ lɛ gbele gbɛ eha mɛɛ fɔmɔ ko ni he hiaa waa?
12 Kɛha enɛ he mfonirifeemɔ kɛmiitsɔ hiɛ lɛ, Yehowa ŋɔ Israelbii shwɛɛnii ni tsake amɛtsui lɛ kɛjɛ “kooyigbɛ shikpɔŋ” lɛ nɔ ni esaa ekɛ amɛ ba amɛjakumaŋ yɛ afi 537 D.Ŋ.B. mli. (Yer. 23:7, 8) Nɛkɛ Israelbii ni aŋɔ kɛku sɛɛ kɛjɛ Babilon ni akɛ amɛ bato Yuda shikpɔŋ ni kã shi amaŋfɔ afii babaoo lɛ nɔ ekoŋŋ lɛ gbele gbɛ eha fɔmɔ ni je agbo fe fɛɛ ni ba yɛ shikpɔŋ nɛɛ nɔ lɛ, yɛ Betlehem yɛ Yudea. No ji Yesu Kristo fɔmɔ akɛ Maŋtsɛ David seshinyo lɛ.—Luka 2:1-38; 3:23-31.
13. (a) Yehowa teé “tsofɔ ko ni ja” shi eha David yɛ mɛni ni ba yɛ emaŋtsɛmɛi aweku lɛ he fɛɛ sɛɛ? (b) Te Yehowa kɛ shwɛɛnii lɛ ye eha tɛɛ yɛ tsofɔ lɛ gbɛi ni ji “Yehowa, Wɔ-Jalɛ” lɛ kɛ gbeekpaamɔ naa?
13 Yɛ nɛkɛ gbɛ nɔ lɛ, Yehowa teé “tsofa ko ni ja” shi eha David, yɛ amanehulu ni E-gba E-shi Maŋtsɛ Konia (aloo Yekonia; aloo Yehoiakin)b lɛ fɛɛ sɛɛ. (Yer. 22:24 kɛyashi 23:2; Mat. 1:11-16; 2 Maŋts. 25:27-30) Nɛkɛ “tsofɔ ni ja” ni ji Yesu Kristo nɛɛ kɛ adesa wala ni eye emuu ni ebana lɛ shã afɔle eha shishibii ni ebaana wɔsɛɛ ni ji adesai lɛ. Enɛ ni efee lɛ ha ana nɔni abaadamɔ nɔ ni ‘abu’ esɛɛnyiɛlɔi 144,000 ni ejɔɔ amɛhe nɔ amɛha lɛ ‘bem’ koni amɛtsɔmɔ ehefatalɔi gboshiniyelɔi yɛ eŋwɛi maŋtsɛyeli lɛ mli. (Rom. 8:14-17; 1 Kor. 1: 30, 31) Kɛjɛ afi 1919 Ŋ.B. nɔ kɛbaa nɛɛ, yɛ nɛkɛ Maŋtsɛyeli gboshiniyelɔi 144,000 nɛɛ ateŋ shwɛɛnii lɛ anaa ni Kristendom osɔfoi folɔɔ fɛɛ sɛɛ lɛ, Yehowa ekpala shwɛɛnii lɛ kɛba eduromɔ kɛ esɔɔmɔ mli ekoŋŋ. Yɛ nakai gbɛ nɔ lɛ, Yehowa etsɔ amɛtafalɔ ni efã amɛhe aloo ‘ebu amɛ jalɔi’ kɛtsɔ Kristo nɔ.—Rom. 8:31-33; Yer. 23:6, Moffatt; JPS; NW.
14. Mɛɛ tsuji ashi Yehowa eteé yɛ nɛkɛ shwɛɛnii ni afɔ amɛ mu nɛɛ atɛŋ kɛjɛ beyinɔ ni afɔ Maŋtsɛyeli lɛ yɛ afi 1914 mli nɛɛ?
14 Yehowa efamɔ onukpai aloo asafonɔkwɛlɔi anɔkwafoi yɛ nɛkɛ mumɔŋ Israelbii shwɛɛnii nɛɛ ateŋ. Akɛni akɛ Mesia maŋtsɛyeli lɛ ma shi yɛ ŋwɛi yɛ Jeŋmaji Abei lɛ naagbee yɛ afi 1914 mli hewɔ lɛ, nɛkɛ asafonɔkwɛlɔi nɛɛ sɔmɔɔ akɛ lumɛi tookwɛlɔi yɛ shikpɔŋ nɛɛ nɔ kɛyashi shwɛɛnii lɛ fɛɛ aaagbe amɛnitsumɔ yɛ shikpɔŋ nɔ lɛ naa ni amɛyafata Maŋtsɛ “Tookwɛlɔ” lɛ he yɛ eŋwɛi maŋtsɛyeli lɛ mli.—Yer. 23:3, 4;Yes. 32:1, 2.
ABOLO NI KRISTENDOM OSƆFOI LƐ EBƆ
15. Mɛɛ shihilɛ mli Kristendom yɔɔ amrɔ nɛɛ ni esoro no kwraa yɛ nɔni shwɛɛnii ni afɔ amɛ mu lɛ yɔɔ mli lɛ he?
15 Mumɔŋ Israel shwɛɛnii ni ebaje amɛgba he ekoŋŋ lɛ yɛ mumɔŋ paradeiso ko mli yɛ ŋwɛi Maŋtsɛ mɔni atsɛɔlɛ “Yehowa, Wɔ-Jalɛ” lɛ shishi. (Yer. 23:3-6) Paradeiso ko ni tamɔ enɛ ni mumɔŋ toiŋjɔlɛ kɛ shweshweeshwe shihilɛ yɔɔ mli ko bɛ Kristendom ŋmɛnɛ. Akɛ gbalafitemɔ ebulelɛ ni mumɔŋ hɔmɔ miiyelɛ. Shihilɛ mli ni eyɔɔ lɛ yɛ tsuikuumɔ shi nɔni baanyiɛ sɛɛ kɛba lɛ baakumɔ tsui po fe nɛkɛ. Ebaaha mɔ adidaa tamɔ daatɔlɔ.—Yer. 23:9, 10; Mat. 24:21, 22.
16, 17. Yɛ Yeremia Wolo 23:11-14 kɛ gbeekpamɔ naa lɛ, namɛi ha Kristendom baje nɔ shihilɛ mli ni eyɔɔ ŋmɛnɛ lɛ mli?
16 Kristendom osɔfoi lɛ ji mɛi ni eha enɛ eba. Amɛbɔ amɛsɔlemɔi lɛ amlibii abolo. Ebalɛ tamɔ bɔni Yehowa kɛɛ yɛ Yeremia gbii lɛ anɔ apasa gbalɔi kɛ sɔlemɔwe lɛ mli osɔfoi ahe lɛ nɔŋŋ:
17 “Gbalɔ kɛ osɔfo fɛɛ lɛ, gbɔmɛi fɔji ni; minaa amɛnɔfɔŋfeemɔ yɛ miwe [ni ji sɔlemɔwe] lɛ tete! Yehowa kɛɛ. Nohewɔ lɛ amɛgbɛi lɛ aaatsɔmɔ tamɔ hei ni shãmɔɔ aha amɛ yɛ duŋ mli; aaatsirɛ amɛ ni amɛyagbee mli; . . . Ni mina gbeyei nɔko yɛ Yerusalem gbalɔi lɛ ahe: amɛfiteɔ gbalã, amɛnyiɛɔ yɛ amale mli; ni amɛwajeɔ mɛifɔji anijiaŋ, koni mɔkomɔko akakpale kɛmiijɛ enɔfɔŋ lɛ he. Amɛ fɛɛ kwa amɛtsɔmɔ tamɔ Sodom amɛha mi, ni emli bii [ni ji Yerusalembii] lɛ tamɔ Gomora.”—Yer. 23:11-14.
18. Kɛjɛ mɛɛ beyinɔ Kristendom osɔfoi lɛ eye mumɔŋ gbalafitemɔ he fɔ; ni amɛye enɛ he fɔ yɛ mɛɛ gbɛ nɔ?
18 Kɛjɛ beyinɔ ni ato Kristendom shishi yɛ Konstantino Kpele ni ji Roma Maŋtsɛyeli lɛ Paapa Nukpa lɛ yinɔ kɛbaa nɛɛ, Katolik osɔfoi, kɛ fee sɛɛ lɛ, Protestante osɔfoi lɛ hu, eye mumɔŋ gbalafitemɔ he fɔ. Yɛ mɛɛ gbɛ nɔ? Amɛtsɔmɔ je nɛɛ nanemɛi ni amɛkɛ amɛhe ewo emli maŋkwramɔŋ saji kɛ tawuu mli nifeemɔi lɛ amli.—Yak. 4:4.
19. Ajwamaŋbɔɔ kɛ jeŋbasha diɛŋtsɛ ewo osɔfoi lɛ kɛ amɛsɔlemɔi amlibii lɛ ahe muji yɛ mɛɛ gbɛ nɔ?
19 Osɔfoi akuu lɛ ŋmɛɔ gbalafitelɔi kɛ hii ni kɛ hii feɔ yakayakanii lɛ diɛŋtsɛ agbɛ ni amɛyeɔ osɔfo yɛ amɛsafoi lɛ amli. Belɛ ebɛ naakpɛɛ mɔ akɛ gbɔmɛi ni tamɔ nakai nɔŋŋ ni bɛ jeŋba hu yɛ amɛsɔlemɔi lɛ amlibii ni gbɛii yɔɔ amɛwojiaŋ lɛ ateŋ. Ŋmɛnɛ jeŋba gbɛfaŋ shihilɛ mli ni Kristendom yɔɔ lɛ yɛ “gbeyei,” ni eyɛ gbeyei kwraa fe nɔni ba yɛ Sodom kɛ Gomora lɛ. Nɔni ba nakai blema maji ni amɛjeŋba ekpɔtɔ lɛ anɔ lɛ nɔŋŋ baaba Kristendom nɔ, ni eja gbɛ nakai.
20. Mɛni hewɔ osɔfoi lɛ aaanu gbele odidoo lɛ?
20 Akɛni osɔfoi kɛ jamɔ mli hiɛnyiɛlɔi lɛ tereɔ sɔ̃ fe fɛɛ yɛ Kristendombii ateŋ hewɔ lɛ, amɛbaanu gbele odidoo lɛ: “Ejaakɛ Yerusalem [ni damɔ shi kɛha Kristendom] gbalɔi lɛ aŋɔɔ efɔŋfeemɔ jɛ kɛtee shikpɔŋ lɛ nɔ fɛɛ.”—Yer. 23:15.
21. Te Yeremia kuu lɛ fee tɛɛŋ amɛgbala je lɛ jwɛŋmɔ kɛba Nyɔŋmɔ ni osɔfoi lɛ ekwa lɛ nɔ, yɛ afi 1925 Ŋ.B. mli?
21 Ŋmɛnɛbeaŋ Yeremia kuu Iɛ shashaooo shi ni esheee gbeyei kwraa akɛ eeegbala je lɛ jwɛŋmɔ kɛba Nyɔŋmɔ ni osɔfoi lɛ ekwa lɛ nɔ. Afi 1925 sa kadimɔ waa yɛ enɛ gbɛfaŋ. Yɛ kpee ni Majimaji Ateŋ Biblia kaselɔi Asafo lɛ fee yɛ Indianapolis yɛ Indiana, August 24-31 lɛ shishi lɛ, nɔ̃ titri ko ni afee lɛ ji yiŋkpɛɛ ko ni yitso ji “Hiɛnɔkamɔ Wiemɔ” lɛ nɔkpɛlɛmɔ Asafo lɛ sɛinɔtalɔ jaje yiŋkpɛɛ lɛ etsɔɔ, beni eha wiemɔ ni gbɛi ji “Tsɛmɔ Kɛha Nitsumɔ” lɛ sɛɛ, ni ekane yiŋkpɛɛ lɛ etsɔɔ. Nibii komɛi ni yɔɔ mli ji akɛ:
. . . jamɔŋ gbɔmɛi ni ji Katolikbii kɛ Protestantebii ayɔsemɔ etɔɔɔ mɔ kwraa yɛ amɛhenɔwomɔ, amɛhe ni amɛbuɔ fe nine, bulɛ ni amɛbɛ kɛha Nyɔŋmɔ kɛ gbeyei ni amɛsheeelɛ lɛ hewɔ. Nohewɔ lɛ anaa akɛ naagbai anaatsofai ni mɛnɛɛmɛi ni wɔwie amɛhe nɛɛ kɛhaa fɛɛ lɛ efolo, hewalɛ bɛ mli, ni amɛnyɛɛɛ amɛha adesa ana nɔni etaoɔ lɛ.
Katolik jamɔ lɛ shɔ̃ɔ nii ni ji Nyɔŋmɔ pɛ nɔ̃ lɛ ehaa ehe. Ŋmɛnɛbeaŋ Nyɔŋmɔjalɔi ni jaà yɛ ŋmɛnɛbeaŋ susumɔi anaa lɛ kwaa Nyɔŋmɔ, Ewiemɔ lɛ, kɛ kpɔmɔ he gbɛjianɔ ni E-to lɛ hu, ni amɛkɛɔ akɛ hewalɛ ko ni jwɛŋŋŋc lɛ baana adesa saji ni egbɛ lɛ anaa. Mɛi ni hiɔ shi yɛ Biblia lɛ shishitsɔɔmɔ ŋmiiŋmi naa ni atsɛɔ amɛ yɛ Blɔfo mli akɛ “Fundamentalists” lɛ tsɔɔ akɛ amɛkwa Biblia lɛ kɛtsɔ bɔni amɛfeɔ amɛnii amɛhaa lɛ nɔ, tsɛbelɛ amɛkɛɔ akɛ amɛheɔ Biblia lɛ amɛyeɔ. Amɛtsɔɔ apasa tsɔɔmɔi ni gbeɔ Nyɔŋmɔ he guɔ, ni amɛkɛ Katolikbii kɛ “Modernists” (Blɔfo gbɛi ni akɛtsɛɔ mɛi ni kɛɔ akɛ amɛjaa Nyɔŋmɔ yɛ ŋmɛnɛbeaŋ susumɔi anaa) lɛ eyafata je lɛ mli maŋkwramɔŋ kɛ jarayeli hewalɛi lɛ ahe ni amɛbɔɔ musu ni amɛkɛɔ akɛ amɛbaanyɛ amɛto Nyɔŋmɔ maŋtsɛyeli lɛ amɛma shi yɛ shikpɔŋ nɛɛ nɔ. Mɛnɛɛmɛi fɛɛ efee ekome yɛ amɛnuntsɔ Satan shishi ni amɛtsi Nyɔŋmɔ amɛto sɛɛ kwraa ni amɛgbeɔ egbɛi lɛ he guɔ. . . .
. . . Akɛni Abonsam le enɛ ni ele akɛ ebe faaa hewɔ lɛ, eetao ni ekɛ apasa tsɔɔmɔi ni lakaa mɔ lɛ babaoo adu gbɔmɛi lɛ koni ekɛdɔ amɛjwɛŋmɔi kɛjɛ Yehowa he kwraa. Be eshɛ ni sa akɛ Nyɔŋmɔ afee gbɛi eha ehe yɛ shikpɔŋ nɛɛ nɔ koni majimaji lɛ ale anɔkwale ni kɔɔ Nyɔŋmɔ yiŋtoo ni ji nɔ̃ pɛ ni abaanyɛ atsɔ nɔ ahere je lɛ yiwala he lɛ.—Kukuji 5, 6 kɛ 9. Kwɛmɔ October 15, 1925 Blɔfo Buu-Mɔɔ lɛ baafai 310 kɛ 311. Kadimɔ Kpojiemɔ Wolo 8:12; 16:8 kɛ 9 hu.
22. (a) Namɛi sɔmɔɔ yɛ Nyɔŋmɔ yiŋtoo akɛ ebaafee gbɛi eha ehe lɛ hewɔ? (b) Mɛɛ gbɛ nɔ osɔfoi lɛ etsɔ nɔ ni amɛgbaa yɛ lɛ nɔ amɛha ana akɛ amɛbuuu Nyɔŋmɔ gbɛi lɛ?
22 Nakai shiɛmɔ ni yitso ji “Tsɛmɔ Kɛha Nitsumɔ,” nɔni akɛjie yiŋkpɛɛ ni yɔɔ yiteŋgbɛ nɛɛ kpo lɛ kɛɛ yɛ ekuku ni ji 28 lɛ mli akɛ: “Be eshɛ ni sa akɛ Nyɔŋmɔ afee gbɛi eha ehe yɛ shikpɔŋ lɛ nɔ. Asafo lɛ yɛ gbɛfaŋnɔ ko ni ebaatsu yɛ enɛ mli, akɛ etsu nii akɛ Nuntsɔ lɛ odasefonyo.” (Baafa 326 yɛ November 1, 1925 Blɔfo Buu-Mɔɔ mli.) Nohewɔ lɛ kɛjɛ afi ni nyiɛ yiŋkpɛɛ lɛ jajemɔ kɛ no jaa akɛ dɛhiɛmɔwolo yɛ je lɛ mli fɛɛ lɛ sɛɛ (afi 1926) lɛ, Yeremia kuu lɛ bɔ mɔdɛŋ krɛdɛɛ ko koni amɛha Yehowa gbɛi lɛ afee oti yɛ adesai fɛɛ ahiɛ. Shi Kristendom osɔfoi lɛ gbe Nyɔŋmɔ gbɛi lɛ he guɔ. Amɛjie Nyɔŋmɔ gbɛi kɛjɛ eyiŋtoo ni ejaje akɛ ebaaha hiɛkpatamɔ ahum ko atswa ashwie Kristendom nɔ lɛ nɔ, ni amɛtee nɔ amɛkɛɛ “mɛi ni gbeɔ [mi Nyɔŋmɔ] mihe guɔ lɛ akɛ: Yehowa kɛɛ akɛ: Nyɛ aaana hejɔlɛ! Ni mɔfɛɛmɔ ni nyiɛɔ lɛdiɛŋtsɛ etsuiwalɛ sɛɛ lɛ, amɛkɛɔlɛ akɛ: Nɔfɔŋ komeflo baŋ nyɛnɔ.”—Yer. 23:17-20d
23. (a) Ani Yehowa tsu nakai osɔfoi lɛ; aloo namɔ tsu amɛ? (b) Taakɛ Yeremia Wolo 23:21, 22 tsɔɔ lɛ, eji osɔfoi lɛ damɔ Yehowa ajina mli kulɛ mɛni aaaba?
23 Shi namɔ tsu nakai osɔfoi lɛ akɛ amɛbashiɛ hejɔlɛ he shiwoi nɛɛ? ‘Amɛdamɔko Yehowa ajina lɛ mli’ ni amɛ aaale ewiemɔ lɛ jogbaŋŋ kɛmɔ shi. Yehowa tsuko amɛ yɛ egbɛi amli. Ekɛ amɛ ewieko bɔni amɛ aaanyɛ amɛgba nɔni ‘jɛ Yehowa naa’ lɛ. Kristendom Nyɔŋmɔjamɔ kui lɛ tsu amɛ kɛjɛ emli Nyɔŋmɔ he nikasemɔhei lɛ. Eji osɔfoi lɛ damɔ Yehowa “ajina mli” ni amɛyɛ nɔni ejie kpo etsɔɔ amɛ lɛ nɔ kulɛ mɛni baaba? Yehowa kɛɛ: “Eji amɛdamɔ mijina lɛŋ kulɛ, amɛ aaaha mimaŋ lɛ anu miwiemɔi lɛ, ni amɛ aaakpale amɛ kɛaajɛ amɛgbɛ fɔŋ lɛ kɛ amɛnifeemɔnii fɔji lɛ ahe.”—Yer. 23:21, 22.
24. Eji osɔfoi lɛ damɔ Yehowa ajina mli kulɛ mɛni anaŋ yɛ Kristendom sɔlemɔi lɛ amlibii ahe, ni mɛni mli amɛkɛ amɛhe woŋ?
24 Kulɛ Biblia lɛ mli ni sɔlemɔyalɔi leee ŋmɛnɛŋmɛnɛ lɛ baŋ. Eji osɔfoi lɛ diɛŋtsɛ nyiɛ hiɛ ni amɛye Nyɔŋmɔ Wiemɔ ni ejielɛ kpo lɛ nɔ pɛpɛɛpɛ ni amɛtsɔse amɛsɔlemɔi lɛ amlibii akpeiakpei abɔ lɛ ni amɛ hu amɛfee nakai kulɛ jeŋ tai enyɔ ni aje shishi yɛ Kristendom teŋ lɛ baŋ! Yehowa miina osɔfoi ni tereɔ sɔ̃ nɛɛ. Ejeee ‘Nyɔŋmɔ ni bɛŋkɛ’ ni nohewɔ lɛ aaakɛɛ akɛ enaaa shɔŋŋ nii.—Yer. 23:23, 24.
25. Yɛ Yeremia Wolo 23:25-28 naa lɛ, yɛ toibolɔi ni ji maŋbii lɛ agbɛfaŋ lɛ, mɛni esa akɛ mɔni yɔɔ nɔkofeemɔ lɛ afee amrɔ nɛɛ?
25 Be eshɛ ni esa akɛ gbɔmɛi lɛ akpɛ mli kɛji amɛbaabo Kristendom osɔfoi lɛ ‘alamɔi’ atoi lolo, aloo amɛbaabo Yehowa Wiemɔ ni Yeremia kuu lɛ jajeɔ lɛ toi. Be eshɛ hu ni esa akɛ mɛi ni tsɛɔ amɛhe Nyɔŋmɔ sɔɔlɔi lɛ atsu sane ni awiɛ he yɛ Yeremia Wolo 23:25-28 lɛ he nii, akɛ: “Gbalɔ ni ela lamɔ ko lɛ, ha ni egba lamɔ lɛ, ni mɔni hiɛ miwiemɔ lɛ, ha ni ewie miwiemɔ lɛ anɔkwale mli.”
26. Akɛni esa akɛ agbala lamɔi kɛ Nyɔŋmɔ Wiemɔ lɛ teŋ hewɔ lɛ, mɛni Yeremia kuu kɛ “asafo babaoo” lɛ eto amɛyi akɛ amɛ aaatee?
26 Mɛni Yehowa Wiemɔ hu kɔɔ yɛ ‘lamɔi’ ni bɛ shishitoo kpakpa ni ji nibii ni adesai kɛkɛ atsuii naa lɛ ahe? Ekɔɔɔ nomɛi ahe eko kwraa! Esa akɛ agbala nakai nibii enyɔ lɛ ateŋ tamɔ ajieɔ ŋmaa kɛjɛɔ tutuu mli lɛ. Yeremia kuu ni hiɛ Nyɔŋmɔ Wiemɔ yɛ amɛteŋ lɛ ekpɛ mli akɛ amɛ aaajaje no befɛɛbe yɛ anɔkwayeli mli. Toibolɔi “asafo babaoo” ko ni yɔɔ bulɛ kɛha Yehowa lɛ ekpɛ mli akɛ amɛ hu amɛ aaafee nakai.
27. Mɛɛbe Nyɔŋmɔ Wiemɔ lɛ tamɔ la, ni mɛɛbe etamɔ hamlɛ?
27 Yeremia kuu lɛ eshiɛ Yehowa Wiemɔ lɛ yɛ anɔkwayeli mli aaafee afii 60 sɔŋŋ nɛ. Nakai Wiemɔ lɛ diɛŋtsɛ eshãko Kristendom asafoi ni nyɛɔ shãa nɛɛ; ni ejwarako nibii agbɛjianɔtoo ni tamɔ gɔŋ nɛɛ hu. Kɛlɛ Nyɔŋmɔ Wiemɔ ni Yeremia kuu lɛ shiɛɔ lɛ efeko efolo. Beni Yehowa aaaha nakai Wiemɔ ni ashiɛ lɛ aba mli yɛ be ni eto mli yɛ “amanehulu kpeteŋkpele” lɛ mli lɛ, aaaha sane ni lɛdiɛŋtsɛ ebi akɛ “Ani miwiemɔ lɛ etamɔɔɔ la? Yehowa kɛɛ, ni etamɔɔɔ hamlɛ ni jwaraa tɛsaa wɔtsɔwɔtsɔ?” lɛ hetoo akɛ, Hɛɛ. (Yer. 23:29) Nohewɔ lɛ nyɛhaa wɔnaa nakai Wiemɔ lɛ mli hemɔkɛyeli.
28. Mɛɛ gbɛ nɔ osɔfoi lɛ ‘jujuɔ Nyɔŋmɔ Wiemɔ lɛ kɛjɛɔ amɛnanemɛi anaa’ yɛ; ni nohewɔ lɛ namɔ ete shi eshi amɛ?
28 Yeremia kuu lɛ tamɔɔɔ osɔfoi akuu lɛ, ejaakɛ Yehowa etsu Yeremia kuu lɛ akɛ amɛwie yɛ egbɛi mli. Kɛlɛ osɔfoi gbalɔi lɛ kɛɔ akɛ amɛmiiwie yɛ Yehowa gbɛi mli ni nohewɔ lɛ amɛmiijaje Biblia mli anɔkwale lɛ. Yɛ nɛkɛ gbɛ nɔ lɛ, Kristendom jamɔŋ hiɛnyiɛlɔi lɛ jɔɔ̀ hewalɛ ni yɔɔ hiɛkpatamɔ he shiɛmɔ ni Yeremia kuu lɛ shiɛɔ lɛ kɛ nɔni enyɛɔ etsuɔ, lɛ he. Lɛɛlɛŋ, Yeremia kuu lɛ tsɛ́ wiemɔi ni ji “Nɔni Yehowa kɛɛ nɛ” lɛ ni amɛkɛfi amɛshiɛmɔ lɛ sɛɛ moŋ nɛ. Shi osɔfoi lɛ kaa akɛ amɛ aaaha nɔni amɛshiɛɔ lɛ atsii ni efee tamɔ anɔkwale wiemɔ, kɛtsɔ enɛ ni amɛkɛshiɔ amɛwiemɔi lɛ asɛɛ akɛ “Lɛ ekɛɛ” lɛ nɔ. Efeɔ tamɔ nɔni Nyɔŋmɔ naawiemɔ amɛjajeɔ lɛ. Nohewɔ lɛ ekolɛ amɛ aaatsɛ Biblia mli ŋamlɛ ko ni amɛdamɔ nɔ amɛshiɛ yɛ maŋkwramɔ saji ahe aloo amɛkɛwie ta ko he ekpakpa. Kɛlɛ Yehowa kɛ osɔfoi gbalɔi ni tamɔ nakai ni etsuko amɛ ni ‘amɛjuɔ’ wiemɔi kɛjɛɔ e-Biblia lɛ mli ni amɛkɔdɔɔlɛ ni amɛkɛwieɔ nibii krokomɛi ahe, lɛ ena.—Yer. 23:30, 31.
29. Mɛɛ gbɛ nɔ Yehowa aaatsɔɔ yɛ akɛ nakai gbalɔi osɔfoi lɛ ji apasa gbalɔi?
29 Mɛɛ gbɛ nɔ Yehowa aaatsɔɔ yɛ akɛ nakai osɔfoi lɛ jeee anɔkwa gbalɔi? Belɛ ehaŋ nɔni amɛshiɛɔ akɛ ‘nɔni Yehowa ekɛɛ’ aloo nɔni amɛwoɔ amɛhe nɔ ni amɛshiɛɔ yɛ egbɛi amli lɛ aba mli. Efĩii apasa ni amɛwieɔ lɛ sɛɛ. “Naa, mikɛ gbalɔi ni gbaa amale lamɔi Iɛ ena, Yehowa kɛɛ, mɛi ni jajeɔ ni amɛkɛ amɛmale kɛ amɛyakashwãi haa mimaŋ lɛ duɔ gbɛ lɛ; shi mitsuko amɛ ni miwoko amɛ kitã ko, hewɔ lɛ amɛhe bɛ sɛɛnamɔ kwraa ha nɛkɛ maŋ nɛɛ! Yehowa kɛɛ.” (Yer. 23:32) Kpoo ha maŋbii lɛ!
30. Mɛni mli wɔɔɔha tsiimɔ aba—osɔfoi lɛ adaaŋwiemɔi, aloo Yehowa Wiemɔ lɛ?
30 Benɛ nɛɛ ni toiŋjɔlɛ bɛ Kristendom kɛ Nyɔŋmɔ teŋ nɛɛ, nyɛkahaa apasa, nɔmimaa ni osɔfoi lɛ haa akɛ toiŋjɔlɛ baaba lɛ wɔleɔ wɔ ni wɔwɔɔ yɛ mumɔŋ. Nyɛhaa wɔkɛ hiɛdɔɔ aterea “jatsu” loo sane ni tsii ni jɛ Nyɔŋmɔ Wiemɔ mli lɛ.—Yer. 23:33.
“YEHOWA JATSU LƐ”
31. Kɛji Kristendombii kɛɛ wɔgba amɛ sane ni tsii ni yɔɔ kɛha ŋmɛnɛ lɛ faŋŋ lɛ, mɛni esani wɔgba amɛ?
31 Loomɔ ni kɛ hiɛkpatamɔ baa lɛ eha wiemɔ ni Yehowa yɔɔ kɛha nɛkɛ maŋkwramɔŋ jamɔŋ kɛ jarayeli gbɛfaŋ nibii agbɛjianɔtoo nɛɛ etsii. Nohewɔ lɛ eji sɔ̃ ko ni tsii akɛ wɔɔɔjaje shɛɛwiemɔ ni Yehowa yɔɔ kɛha nɛkɛ “naagbee be” nɛɛ. Yɛ enɛ hewɔ lɛ kɛji wɔmiiha saji ni mɛi biɔ yɛ nɔni baaba nibii agbɛjianɔtoo nɛɛ nɔ wɔsɛɛ he lɛ ahetoo lɛ, nyɛhaa wɔkwɛa jogbaŋŋ ni wɔgbaa amɛ nɔni ji Yehowa “jatsu” lɛ diɛŋtsɛ. Kɛji Kristendom asafobii aloo gbalɔi loo osɔfoi lɛ bi wɔ ni wɔtsɔɔ nibii anɔ ni Yehowa Wiemɔ lɛ tsiɔ yɛ lɛ faŋŋ lɛ, eji wɔgbɛnaanii akɛ wɔkɛɛ amɛ akɛ Kristendombii lɛ diɛŋtsɛ ji “jatsu” kɛhalɛ; hɛɛ, ni ‘Mɛɛ jatsu po nɛ!’ Ni ebaawo nakai “jatsu” lɛ eshɛ efɔ̃ kɛtsɔ Kristendom he ni eeeŋmɛɛ ewo hiɛkpatamɔ mli lɛ nɔ.
32. Mɛɛ gbɛ nɔ Kristendombii lɛ kuɔ nɔni Yeremia kuu lɛ shiɛɔ akɛ no ji “Yehowa jatsu” lɛ naa yɛ; ni nohewɔ lɛ mɛni amɛtsakeɔ?
32 Mɛi ni ebuuu Yehowa lɛ sumɔɔɔ akɛ amɛkpɛlɛɔ nɔni Yeremia kuu lɛ jajeɔ akɛ no ji “Yehowa jatsu” lɛ nɔ. Nohewɔ lɛ amɛsumɔɔɔ ni amɛkaiɔ no akɛ hiɛdɔɔsane. Akɛ sane ni teɔ shi eshiɔ ekroko ni ashiɛ momo lɛ, amɛnyiɛ amɛgbalɔi kɛ osɔfoi lɛ asɛɛ ni amɛjajeɔ nɔni amɛkɛɔ doo akɛ no ji Nyɔŋmɔ Wiemɔ lɛ mli “jatsu” lɛ amɛtsɔɔ. Shi amɛshiteekɛwoo wiemɔ lɛ damɔɔɔ Ŋmalɛi Krɔŋkrɔŋi lɛ anɔ. Nɔni amɛdiɛŋtsɛ amɛtsɔɔ shishi ji no, ni nohewɔ lɛ etsɔ ‘amɛteŋ mɔfɛɛmɔ diɛŋtsɛ daaŋwiemɔ.’ Yeremia kuu lɛ kɛɔ jamɔŋ gbɔmɛi ni buɔ amɛhe fe nine nɛɛ akɛ: “Nyɛtsake Nyɔŋmɔ hiɛkaalɔ, Yehowa Zebaot, wɔ-Nyɔŋmɔ lɛ, wiemɔi lɛ ahiɛ.” (Yer. 23:33-36) Shi ani amɛbaanyɛ amɛtsake hiɛkpatamɔ ni “Yehowa jatsu” lɛ bɔɔ wɔ kɔkɔ yɛ he lɛ? Dabida!
33, 34. Esa akɛ Yeremia kuu lɛ atsɛ jamɔŋ gbɔmɛi ni kɛɔ akɛ sane ni amɛshiɛɔ lɛ ji “Yehowa jatsu” lɛ atoi sɛɛ akɛ namɔ eba?
33 Kristendom naawielɔi lɛ eshiɛ amɛ apasa wiemɔ ni kɛ nɔni Yeremia kuu lɛ ejaje kɛjɛ ta sɛɛ afi ni ji 1919 nɔ kɛbaa nɛɛ. Beni afee ni nɔni amɛkɛɔ lɛ atsii yɛ mɛikrokomɛi ahiɛ hewɔ lɛ, amɛtɛɛɔ nɔni amɛkɛɔ lɛ akɛ “Yehowa jatsu lɛ.” Yehowa tsuɔ Yeremia kuu lɛ befɛɛbe kɛyaa nɛkɛ jamɔŋ gbɔmɛi nɛɛ aŋɔɔ koni amɛyakɛɛ amɛ akɛ amɛkatsɛ amɛshiɛmɔi kɛ amɛgbalɛi lɛ akɛ “Yehowa jatsu lɛ.” Nohewɔ lɛ mɛɛ hetoo esa akɛ Yeremia kuu lɛ haa jamɔŋ gbɔmɛi nɛɛ? Enɛ:
34 “Gbiiabɔ ni nyɛkɛɔ akɛ: ‘Yehowa jatsu’ lɛ, hewɔ lɛ bɔni Yehowa kɛɛ nɛ: Akɛni nyɛwieɔ nɛkɛ wiemɔ nɛɛ akɛ ‘Yehowa jatsu’ lɛ, ni mitsu [Yeremia kuu lɛ] abakɛɛ nyɛ akɛ: Nyɛkakɛa akɛ ‘Yehowa jatsu’ lɛ [hewɔ lɛ, naa, miba].”—Yer. 23:38, 39.
35, 36. Taakɛ Yeremia Wolo 23:39, 40 tsɔɔ lɛ, mɛɛ yiŋkpɛɛ ni Yehowa efee lɛ esa akɛ Yeremia kuu lɛ ashiɛ atsɔɔ mɛi ni shiɛɔ apasa “jatsu” loo mɛi ni boɔ no toi lɛ?
35 Nakai ni! Yehowa eba akɛ Kristendom gbalɔi lɛ a-Kojolɔ. Mɛɛ kojomɔ ekɛhaa “gbalɔi” ni kɛɔ akɛ nɔni amɛshiɛɔ lɛ ji “Yehowa jatsu” lɛ kɛ mɛi ni boɔ apasa “jatsu” nɛɛ toi lɛ? Kojolɔ lɛ kɛɔ wɔ akɛ:
36 “Naa, mawo nyɛnɔ ni mashɛrɛ nyɛ kɛ maŋ lɛ ni miŋɔha nyɛ kɛ nyɛtsɛmɛi lɛ mashwie kɛaajɛ mihiɛ; ni mikɛ naanɔ ahorabɔɔ kɛ naanɔ hiɛgbele ni hiɛ ejeŋ nɔ gbikogbiko aaaŋmɛ nyɛnɔ.”—Yer. 23:39, 40.
37. (a) Te Yehowa tsu ekojomɔ lɛ he nii eha tɛɛŋ yɛ Yeremia gbii lɛ anɔ, ni mɛni jɛ mli ba? (b) Te Yeremia sane fee eha tɛɛŋ; ni te enɛ aaaba mli nakai nɔŋŋ eha tɛɛŋ yɛ Yeremia kuu lɛ gbɛfaŋ?
37 Atsu Kojolɔ Yehowa kojomɔ ni ajaje nɛɛ he nii yɛ Yeremia gbii lɛ anɔ beni Babilonbii kpata Yerusalem kɛ esɔlemɔwe ni abulelɛ lɛ hiɛ yɛ afi 607 D.Ŋ.B. mli lɛ. Nɛkɛ hiɛshishwiemɔ niiashikpamɔ ni ba Israelbii kuɛŋtilɔi ni yeee anɔkwa nɛɛ anɔ lɛ ye odase akɛ Yehowa, mɔni amɛbuuu lɛ ekwa amɛ agbɛnɛ. Eŋmɛɛ amɛhe eha nɔni ejɛ amɛnɔfɔŋ lɛ mli eba lɛ. Enɛ ku apasa gbalɔi henɔwolɔi lɛ anaa. Shi Yeremia naabu kã he egba. Yehowa kwakolɛ. Nakai nɔŋŋ Yehowa kwaŋ Yeremia kuu lɛ yɛ bei nɛɛ amli nɔŋŋ beni ekɛ ekojomɔ ni tsii lɛ aaaba Kristendom osɔfoi kɛ esafoi lɛ anɔ lɛ.—Yer. 39:11–40:4; Yaafo 1:1-22.
‘ATSƆ EYIŊ’—NI SƐƐNAMƆ BA HE
38. Mɛɛ gbɛ nɔ Yehowa tsɔ Yeremia yiŋ yɛ; ni mɛni no tsu?
38 Yɛ nɛkɛ gbɛ nɔ lɛ, Yeremia kɛ afii 40 shiɛ nɔfɛɛnɔ ni Yehowa efãlɛ akɛ eshiɛ lɛ. Eyɔse akɛ Yehowa ye enɔ. Yehowa he wa felɛ. E-Wiemɔ lɛ ná mɔyiŋtsɔmɔ hewalɛ yɛ Yeremia nɔ. (Rotherham shishitsɔɔmɔ lɛ.) Yɛ enɛ hewɔ lɛ Yeremia fi shi yɛ Nyɔŋmɔ sɔɔmɔ mli kɛyashi egbe naa. Yɛ nɛkɛ gbɛ nɔ lɛ, belɛ Yehowa ‘etsɔ eyiŋ.’ Étsɔɔ akɛ ehe wa fe Yeremia gbɔjɔmɔ lɛ. Nohewɔ lɛ Yeremia epilaaa yɛ ‘eyiŋ ni atsɔ’ lɛ hewɔ.
39, 40. Enɛ haa wɔkaiɔ mɛɛ wiemɔi ni Yeremia wie beni Pashur efɛne egboklɛi sɛɛ lɛ?
39 Biɛnɛɛ wɔkaiɔ nɔni Yeremia kɛɛ beni sɔlemɔwe lɛ lumɔ nukpa lɛ fɛne egboklɛi sɛɛ lɛ, akɛ:
40 “Yehowa, otsɔ miyiŋ, ni miyiŋ etsɔ; ohe wa fe mi [ni oha mifee nii ni midɔko feemɔ], ni oye nɔ hu: mitsɔ mɔni aŋmɔɔlɛ daa jenamɔ, mɔfɛɛmɔ yeɔ mihe fɛo po. Befɛɛbe ni miwieɔ lɛ, ja mibolɔ, mibolɔɔ akɛ: Yiwalɛ kɛ haomɔ sɔŋŋ! Ejaakɛ Yehowa wiemɔ lɛ etsɔ ahorabɔɔ kɛ hefɛoyeli eha mi daa jenamɔ. Ni kɛ́ mikɛɛ akɛ: Mitsiŋ etã, ni miwieŋ yɛ egbɛi amɔ dɔŋŋ lɛ, etsɔ tamɔ la ni tsoɔ yɛ mitsui mli, ni aŋa yi awo miwui amli; enaatsii etɔ mi, ni minyɛɛɛ. Ejaakɛ minu mɛi pii ashekuyeli, hefɛɛhe efee gbeyei, . . . Shi Yehowa kɛmi yɛ tamɔ ekaalɔ ni he wa; nohewɔ lɛ mɛi ni waami yi lɛ aaatɛrɛ, ni amɛyeŋ nɔ; amɛhiɛ aaagboi naakpa kɛ naanɔ hiɛgbele ni hiɛ ejeŋ nɔ gbikogbiko.”—Yer. 20:7-11.
41. Nohewɔ lɛ te wɔɔɔfee tɛɛŋ wɔnyɛ wɔya nɔ wɔshiɛ Maŋtsɛ Tookwɛlɔ ni atsɛɔlɛ “Yehowa, Wɔ-Jalɛ” lɛ he sane wɔtsɔɔ?
41 Yehowa baawaje wɔ yɛ wɔgbɔjɔmɔ Iɛ mli, tamɔ “ekaalɔ ni he wa.” Wɔɔɔya, nɔ wɔshiɛ e-Maŋtsɛ Tookwɛlɔ ni atsɛɔlɛ “Yehowa, Wɔ-Jalɛ” lɛ, yɛ Yehowa hewalɛ mli.e
[Shishigbɛ niŋmai]
a Daa afi Americana wolo ni aŋmaa lɛ, baafa 117.
b “Hewalɛ ko ni jwɛŋŋŋ,” belɛ aatsɔɔ sutsakemɔ taakɛ Owula Darwin tsɔɔ lɛ.
c Kwɛmɔ God’s Kingdom of a Thousand Years Has Approached wolo ni aŋma yɛ afi 1973 mli lɛ baafa 62, kuku 40, kɛ shishigbɛ niŋmaa ni yɔɔ nakai baafa lɛ hu. Kɛ agbɛnɛ Paradise Restored to Mankind—By Theocracy! ni aŋma yɛ afi 1972 mli lɛ baafa 119, kuku 31.
d Adafi ko ni United Press tswa September 26, 1971 kɛjɛ Vatikan Maŋwulu lɛ mli lɛ kɛɛ: “Paapa lɛ kɛɛ saji ni ejwɛŋɔ he be mli ni enaa efii 80 lɛ kɔɔ Roma Katolik Asafo lɛ shihilɛ kɛ esɛɛtsɛlɛ he. Ekɛɛ, ‘Asafo lɛ baahi shi, ni ebaahi shi yɛ yinɔsane mli ahum ni tswaa lɛ mli. Asafo lɛ hosooo, ni ema shi shiŋŋ yɛ saji ni yaa nɔ yɛ je lɛ mli lɛ amli, koni ekɛ sanekpakpa lɛ kɛ naanɔ yiwalaheremɔ aha mɛi fɛɛ.’”
Kwɛmɔ The Galveston Daily News ni je kpo September 26,1977 lɛ baafa 3-A, yɛ yitso ni ji “Pope Paul Looking Forward To Approaching Death” lɛ shishi.
e Ajie kɛjɛ September 1, 1979 Blɔfo Buu-Mɔɔ.