Yehowa Kojomɔ ni Ekɛshiɔ Amale Tsɔɔlɔi
“Mina gbeyei nɔ ko yɛ Yerusalem gbalɔi lɛ ahe: amɛfiteɔ gbala, amɛnyiɛɔ yɛ amale mli . . . Amɛ fɛɛ kwa amɛtsɔmɔ tamɔ Sodom amɛha mi, ni emlibii lɛ tamɔ Gomora.”—YEREMIA 23:14.
1. Mɛni hewɔ mɔ ni kɛ ehe ewo ŋwɛi nitsɔɔmɔ mli lɛ eŋɔ gbɛnaa nii ni tsii efɔ enɔ lɛ?
MƆ FƐƐ mɔ ni kɛ ehe woɔ ŋwɛi nitsɔɔmɔ mli lɛ ŋɔɔ gbɛnaa nii ko ni tsii efɔɔ ehe nɔ. Yakobo 3:1 bɔɔ kɔkɔ akɛ: “Nyɛkafea nyɛhe tsɔɔlɔi babaoo, minyɛmimɛi, ejaakɛ nyɛle akɛ wɔbaana kojomɔ kpele.” Hɛɛ, gbɛnaa nii ni hiɛdɔɔ yɔɔ mli ka Nyɔŋmɔ Wiemɔ lɛ he tsɔɔlɔi lɛ anɔ akɛ amɛaabu amɛhe akɔntaa ni sa amɛtsɔɔ fe Kristofoi fɛɛ ni eshwɛ. Mɛni enɛ baatsɔɔ aha mɛi ni anaa amɛ akɛ apasa tsɔɔlɔi lɛ? Nyɛhaa wɔkwɛa bɔ ni shihilɛ lɛ yɔɔ yɛ Yeremia gbii lɛ amli. Wɔbaana bɔ ni efeɔ nɔ ni yaa nɔ ŋmɛnɛ lɛ he mfoniri ehaa.
2, 3. Mɛɛ kojomɔ Yehowa kɛha kɛtsɔ Yeremia nɔ yɛ Yerusalem amale tsɔɔlɔi lɛ ahe?
2 Yɛ afi 647 D.Ŋ.B., yɛ Maŋtsɛ Yosia nɔyeli afi ni ji 13 lɛ mli ni akɛ nitsumɔ wo Yeremia dɛŋ akɛ Yehowa gbalɔ. Yehowa yɛ wiemɔ ko ni ekɛshiɔ Yuda, no hewɔ lɛ etsu Yeremia koni eyajaje enɛ etsɔɔ. Yerusalem apasa gbalɔi loo tsɔɔlɔi lɛ miifee ‘nibii ni yɔɔ gbeyei’ yɛ Nyɔŋmɔ hiɛ. Bɔ ni amɛ nɔ fɔŋ feemɔ lɛ da ha sɔŋŋ hewɔ lɛ, Nyɔŋmɔ kɛ Yerusalem kɛ Yuda to Sodom kɛ Gomora he. Yeremia yitso 23 gbaa wɔ enɛ he sane. Kuku 14 kɛɔ akɛ:
3 “Ni mina gbeyei nɔ ko yɛ Yerusalem gbalɔi lɛ ahe: amɛfiteɔ gbala, amɛnyiɛɔ yɛ amale mli, ni amɛwajeɔ mɛi fɔji anijiaŋ, koni mɔ ko mɔ ko akakpale kɛmiijɛ enɔ fɔŋ lɛ he. Amɛ fɛɛ kwa amɛtsɔmɔ tamɔ Sodom amɛha mi, ni emlibii lɛ tamɔ Gomora.”
4. Yerusalem tsɔɔlɔi lɛ ajeŋba he nɔkwɛmɔ nɔ gbonyo lɛ tamɔ Kristendom nɔ ŋmɛnɛ yɛ mɛɛ gbɛ nɔ?
4 Hɛɛ, nɛkɛ gbalɔi loo tsɔɔlɔi nɛɛ to jeŋba gbonyo he okadi fɔŋ diɛŋtsɛ amɛha amɛhe, ni amɛkɛ nakai feemɔ wo mɛi krokomɛi hewalɛ ni amɛfee nakai nɔŋŋ. Kwɛ shihilɛ ni yɔɔ Kristendom bianɛ! Ani amɛtamɔɔɔ bɔ ni eji yɛ Yeremia gbii lɛ amli lɛ? Ŋmɛnɛ, osɔfoi lɛ ŋmɛɔ gbalafitelɔi kɛ hii ni kɛ amɛhe feɔ yakayaka nii lɛ agbɛ ni amɛhi amɛteŋ ni amɛŋmɛɔ amɛ gbɛ ni amɛkwɛ sɔlemɔi anɔ po. Ani eyɛ naakpɛɛ akɛ mɛi ni tsɛɔ amɛhe sɔlemɔ lɛ mlibii lɛ ateŋ mɛi pii hu bɛ jeŋba nakai nɔŋŋ?
5. Mɛni hewɔ Kristendom jeŋba shihilɛ lɛ mli wa kwraa fe Sodom kɛ Gomora nɔ lɛ?
5 Yehowa kɛ Yerusalembii to Sodom kɛ Gomora mlibii lɛ ahe. Shi Kristendom jeŋba shara lɛ fa ni eyɛ gbeyei fe Sodom kɛ Gomora nɔ lɛ. Hɛɛ Yehowa miihi lɛ babaoo. Etsɔɔlɔi lɛ kuɔ Kristofoi ajeŋba he mlai lɛ amli. Ni nɔ ni enɛ kɛbaa ji jeŋba ni egbee shi kwraa kɛ lakamɔi babaoo koni afee nibii ni ehiii sɔrɔtoi fɛɛ. Bɔ ni jeŋba he shihilɛ nɛɛ efa pii eha ŋmɛnɛ hewɔ lɛ abuuu efɔŋ akɛ eji nɔ ko kwraa.
“Amɛnyiɛɔ yɛ Amale Mli”
6. Mɛni Yeremia wie yɛ Yerusalem gbalɔi lɛ anɔ fɔŋ lɛ he?
6 Agbɛnɛ kadimɔ nɔ ni kuku 14 lɛ wieɔ yɛ Yerusalem gbalɔi lɛ ahe. “Amɛnyiɛɔ yɛ amale mli.” Ni kuku 15 lɛ naagbee fa lɛ kɛɔ akɛ: “Ejaakɛ Yerusalem gbalɔi lɛ aŋɔɔ efɔŋ feemɔ jɛ kɛtee shikpɔŋ lɛ nɔ fɛɛ.” Ni kuku 16 lɛ kɛfataa he akɛ: “Bɔ ni Yehowa Zebaot kɛɛ nɛ: ‘Nyɛkaboa gbalɔi ni gbaa tsɔɔ nyɛ lɛ awiemɔi lɛ atoi! Ejaakɛ amɛhaa nyɛduɔ gbɛ kɛyaa yakayaka nii ahe; amɛtsuiiaŋ ninaa amɛwieɔ, jeee nɔ ni jɛ Yehowa daaŋ.’ ”
7, 8. Mɛni hewɔ Kristendom osɔfoi lɛ tamɔ Yerusalem amale gbalɔi lɛ, ni enɛ esa sɔlemɔyalɔi ahe yɛ mɛɛ gbɛ nɔ?
7 Taakɛ Yerusalem apasa gbalɔi lɛ ji lɛ, Kristendom osɔfoi lɛ hu nyiɛɔ yɛ apasa mli, amɛgbɛɔ apasa hemɔkɛyeli kwamɔ tsɔɔmɔi amɛshwaa, tsɔɔmɔi ni anaaa yɛ Nyɔŋmɔ Wiemɔ lɛ mli. Mɛni ji apasa tsɔɔmɔi nɛɛ ekomɛi? Adesa susuma ni gbooo, Triniti, hetsuumɔ he, kɛ hɛl-la ni baapiŋ gbɔmɛi kɛya naanɔ. Amɛtaa amɛtoibolɔi lɛ atoiŋ hu kɛtsɔɔ nɔ ni amɛtoibolɔi lɛ taoɔ ni amɛnu lɛ ni amɛkɛɔ amɛ nakai lɛ nɔ. Amɛlaa akɛ oshara ko kãaa Kristendom hiɛ, ejaakɛ eyɛ Nyɔŋmɔ toiŋjɔlɛ lɛ. Shi osɔfoi lɛ miiwie “amɛtsuiiaŋ ninaa” he. Apasa ni. Akɛ mumɔŋ ebɔɔ miiha mɛi ni heɔ apasa ni tamɔ nɛkɛ amɛyeɔ lɛ. Aalaka amɛ kɛmiiya amɛhiɛkpatamɔ mli!
8 Susumɔ nɔ ni Yehowa wieɔ yɛ nɛkɛ apasa tsɔɔlɔi nɛɛ ahe yɛ kuku 21 lɛ he okwɛ: “Mitsuko gbalɔi nɛɛ, shi amɛ diɛŋtsɛ amɛhiɛ foi; mikɛ amɛ ewieko hu, shi amɛmiigba kɛ̃.” No hewɔ lɛ Nyɔŋmɔ tsuko osɔfoi lɛ ŋmɛnɛ, ni asaŋ amɛtsɔɔɔ enɔkwalei lɛ hu. Mɛni ejɛ mli eba? Sɔlemɔyalɔi lɛ leee Biblia lɛ he nɔ ko nɔ ko kwraa ejaakɛ jeŋ nilee ji nɔ ni amɛsɔɔlɔi lɛ kɛlɛɔ amɛ.
9, 10. (a) Mɛɛ lamɔi Yerusalem amale tsɔɔlɔi la? (b) Kristendom osɔfoi lɛ hu etsɔɔ “amale lamɔi” yɛ mɛɛ gbɛ nɔ?
9 Agbɛnɛ hu, osɔfoi lɛ haa apasa hiɛnɔkamɔi shwereɔ ŋmɛnɛ. Kadimɔ kuku 25 lɛ: “Minu nɔ ni gbalɔi ni gbaa amale gbalɛ yɛ migbɛi amli lɛ kɛɔ akɛ: ‘Mila lamɔ ko, mila lamɔ ko!’ lɛ” Mɛɛ lamɔi nɛ? Kuku 32 kɛɔ wɔ: “ ‘Naa, mikɛ gbalɔi ni gbaa amale lamɔi lɛ ena,’ Yehowa kɛɛ, ‘mɛi ni jajeɔ ni amɛkɛ amɛmale kɛ amɛyaka ashwai haa mimaŋ lɛ duɔ gbɛ lɛ; shi mitsuko amɛ ni miwoko amɛ kita ko, hewɔ lɛ amɛhe bɛ sɛɛnamɔ kwraa ha nɛkɛ maŋ nɛɛ!’ Yehowa kɛɛ.”
10 Mɛɛ apasa lamɔi loo hiɛnɔkamɔi osɔfoi lɛ etsɔɔ? No ji akɛ, gbɔmɔ hiɛnɔkamɔ kome pɛ kɛha toiŋjɔlɛ kɛ shweshweeshwe shihilɛ ji Jeŋmaji Ekomefeemɔ lɛ. Atsɛ Jeŋmaji Ekomefeemɔ lɛ yɛ nyɛsɛɛ afii nɛɛ amli akɛ “naagbee hiɛnɔkamɔ kɛha gbeekpamɔ kɛ toiŋjɔlɛ,” “toiŋjɔlɛ kɛ jalɛsaneyeli kpeehe ni fe fɛɛ,” “jeŋ toiŋjɔlɛ he hiɛnɔkamɔ titri ni yɔɔ shikpɔŋ nɛɛ nɔ.” Mɛɛ lakamɔ nɛ! Adesai ahiɛnɔkamɔ kome pɛ ji Nyɔŋmɔ Maŋtsɛyeli lɛ. Shi osɔfoi lɛ eshiɛɛɛ ni amɛtsɔɔɔ anɔkwale ni kɔɔ nakai ŋwɛi nɔyeli, ni ji Yesu shiɛmɔ lɛ saneyitso lɛ he lɛ.
11. (a) Mɛɛ hewalɛ fɔŋ Yerusalem amale tsɔɔlɔi lɛ ná yɛ Nyɔŋmɔ diɛŋtsɛ gbɛi nɔ? (b) Ákɛ mɛi ni tamɔɔɔ Yeremia kuu lɛ, mɛni jamɔ mli amale tsɔɔlɔi ni yɔɔ ŋmɛnɛ lɛ efee yɛ Nyɔŋmɔ gbɛi he?
11 Kuku 27 kɛɔ wɔ babaoo. “Amɛtaoɔ ni amɛkɛ amɛlamɔi ni amɛteŋ mɔ fɛɛ mɔ gbaa enaanyo lɛ aha mimaŋ lɛ hiɛ akpa migbɛi lɛ anɔ, taakɛ bɔ ni amɛtsɛmɛi lɛ ahiɛ kpa migbɛi lɛ anɔ yɛ Baal hewɔ lɛ.” Yerusalem apasa gbalɔi lɛ ha gbɔmɛi lɛ ahiɛ kpa Nyɔŋmɔ gbɛi lɛ nɔ. Ani ŋmɛnɛŋmɛnɛ apasa jamɔ mli tsɔɔlɔi lɛ efeko nakai nɔŋŋ? Nɔ ni ehiii fe fɛɛ lɛ, amɛkɛ Nyɔŋmɔ gbɛi ni ji Yehowa lɛ teeɔ. Amɛtsɔɔ mɛi akɛ ehe ehiaaa ni akɛtsu nii, ni amɛjieɔ kɛjɛɔ amɛ Biblia shishitsɔɔmɔi amli. Ni amɛteɔ shi amɛwoɔ mɔ fɛɛ mɔ ni tsɔɔ gbɔmɛi lɛ anii akɛ Nyɔŋmɔ gbɛi ji Yehowa lɛ waa. Shi Yeremia kuu lɛ, shwɛɛnii ni ji Kristofoi ni akɛ mumɔ efɔ amɛ lɛ akuu lɛ, kɛ amɛnanemɛi lɛ efee taakɛ bɔ pɛ ni Yesu fee lɛ. Amɛtsɔɔ gbɔmɛi akpekpei abɔ Nyɔŋmɔ gbɛi lɛ he nii.—Yohane 17:6.
Bɔ ni Anyaŋeɔ Amɛ Kwraa lɛ Kpojiemɔ
12. (a) Mɛni hewɔ ni la yi sɔyeli kpele kã jamɔ mli amale tsɔɔlɔi lɛ anɔ lɛ? (b) Mɛɛ gbɛfaŋnɔ osɔfoi lɛ ná yɛ jeŋ tai enyɔ mli?
12 Yeremia kuu lɛ etee nɔ amɛkpa osɔfoi lɛ ahe mama shii abɔ akɛ amɛji apasa tsɔɔlɔi ni nyiɛ amɛ sɛɛnyiɛlɔi lɛ ahiɛ yɛ gbɛ tɛtrɛɛ lɛ nɔ kɛmiiya hiɛkpatamɔ mli. Hɛɛ, shwɛɛnii lɛ efee lɛ faŋŋ akɛ Yehowa fɔbuu kojomɔ sa mɛi ni laa lamɔi lɛ. Akɛ nɔkwɛmɔ nɔ lɛ, Yehowa tsuji fɔɔ Kpojiemɔ 18:24, ni kɛɔ akɛ Babilon Kpeteŋkpele lɛ mli ni ana “mɛi fɛɛ ni agbe yɛ shikpɔŋ lɛ nɔ lɛ ala lɛ yɛ” lɛ he wiemɔ. Susumɔ tai sɔrɔtoi fɛɛ ni awuu yɛ jamɔi amligbalamɔ hewɔ lɛ he okwɛ. Kwɛ bɔ ni la yi sɔ ni apasa jamɔ mli tsɔɔlɔi lɛ eye lɛ fa ha! Amɛ tsɔɔmɔi lɛ kɛ mligbalamɔ eba, ni etee mɛi ni yɔɔ hemɔkɛyelii kɛ maji akui sɔrɔtoi lɛ amli lɛ ahetsɛ̃ shi. Preachers Present Arms wolo lɛ wieɔ Jeŋ Ta I he akɛ: “Osɔfoi lɛ kɛ mumɔŋ kanyamɔ kɛ hewalɛwoo ha ta lɛ. . . . No hewɔ lɛ sɔlemɔ lɛ kɛ ehe bawo tawuu he gbɛjianɔtoo lɛ mli vii.” Nakai nɔŋŋ eji anɔkwale yɛ Jeŋ Ta II be lɛ mli. Osɔfoi lɛ kɛ amɛhewalɛ fɛɛ fi jeŋmaji ni kɛ amɛhe wuɔ ta lɛ asɛɛ ni amɛjɔɔ amɛ asraafoi lɛ. Jeŋ Tai enyɔ ní nanemɛi Nyɔŋmɔ jalɔi gbegbee amɛhe yɛ mli lɛ je shishi yɛ Kristendom mli. Je lɛŋ kɛ jamɔŋ kui ni yɔɔ Kristendom lɛ yaa nɔ amɛfɔseɔ la amɛshwieɔ shi kɛbashi ŋmɛnɛ. Mɛni ni yɔɔ gbeyei ejɛ amɛ apasa tsɔɔmɔi lɛ amli eba nɛkɛ!
13. Mɛɛ gbɛ nɔ Yeremia 23:22 maa nɔ mi yɛ akɛ Kristendom osɔfoi lɛ kɛ Yehowa bɛ wekukpaa ko kwraa?
13 Ofainɛ kadimɔ Yeremia yitso 23, kuku 22: “Eji amɛdamɔ mijina lɛŋ kulɛ, amɛaaha mimaŋ lɛ anu miwiemɔi lɛ, ni amɛaakpale amɛ kɛaajɛ amɛgbɛ fɔŋ lɛ kɛ amɛnifeemɔ nii fɔji lɛ ahe.” Eji Kristendom jamɔ mli gbalɔi lɛ damɔ Yehowa ajina mli, ni amɛkɛ lɛ yɛ wekukpaa ni bɛŋkɛ kpaakpa mli tamɔ tsulɔ anɔkwafo kɛ nilelɔ lɛ kulɛ, amɛ hu amɛbaahi shi yɛ Nyɔŋmɔ taomɔ nii anaa. Kulɛ amɛ hu amɛbaaha Kristendom mli gbɔmɛi lɛ anu Nyɔŋmɔ diɛŋtsɛ wiemɔi lɛ. Nɔ ni tamɔɔɔ nakai lɛ, ŋmɛnɛŋmɛnɛ beaŋ apasa tsɔɔlɔi lɛ eha amɛsɛɛnyiɛlɔi lɛ etsɔmɔ Nyɔŋmɔ Henyɛlɔ, Satan Abonsam tsuji ni ashwila amɛhiŋmɛii.
14. Mɛɛ sane ko ni kɔɔ Kristendom osɔfoi lɛ ahe ajie lɛ kpo yɛ gbɛ ni mli wa nɔ yɛ 1958 mli?
14 Anɔkwalei ni kɔɔ osɔfoi ahe ni Yeremia kuu lɛ jieɔ lɛ kpo lɛ efee nɔ ni mli wa waa. Akɛ nɔkwɛmɔ nɔ lɛ, yɛ 1958 Yehowa Odasefoi a-Majimaji Ateŋ Ŋwɛi Suɔmɔnaa Nifeemɔ Kpee ni tee nɔ yɛ New York lɛ shishi lɛ, Buu Mɔɔ Asafo lɛ sɛinɔtalɔ lɛ sɛɛkwɛlɔ lɛ kɛ wiemɔ ko ha ni efa ko kɛɛ: “Wɔmiiwie yɛ faŋŋ ni wɔshashaooo shi kwraa kɛmiijaje akɛ awuyeli, efɔŋ feemɔ, hetsɛ̃, bei, gbɔmɛi ahe jwɛŋmɔ fɔŋ namɔ, . . . kɛ yiŋfutumɔ ni tamɔ sɛkɛyeli nɛɛ fɛɛ shishifa jɛ jamɔ ni ejaaa, apasa jamɔ; ni mɔ ni hɔ sɛɛ ji adesa henyɛlɔ ni anaaa lɛ lɛ, Satan Abonsam. Gbɔmɛi ni je lɛŋ shihilɛ nɛɛ jɛ amɛ titri ji jamɔ mli tsɔɔlɔi kɛ hiɛnyiɛlɔi lɛ; ni mɛi ni ahiɔ ni anyaŋeɔ fe fɛɛ yɛ mɛnɛɛmɛi ateŋ ji Kristendom jamɔ mli osɔfoi lɛ. . . . Kɛjɛ Jeŋ Ta I sɛɛ afii nɛɛ fɛɛ mli lɛ, wekukpaa ni ka Kristendom kɛ Nyɔŋmɔ teŋ lɛ tamɔ Israel nɔ lɛ yɛ Yeremia gbii lɛ amli. Hɛɛ, hiɛkpatamɔ ni yɔɔ gbeyei ni yaa shɔŋŋ ka Kristendom hiɛ fe nɔ ni Yeremia na ni ba Yerusalem nɔ lɛ.”
Amale Tsɔɔlɔi lɛ Akojomɔ
15. Mɛɛ toiŋjɔlɛ he gbalɛi komɛi osɔfoi lɛ kɛha? Ani amɛbaaba mli?
15 Yɛ kɔkɔbɔɔ nɛɛ fɛɛ sɛɛ lɛ, te osɔfoi lɛ efee amɛnii kɛjɛ nakai be lɛ mli kɛbaa nɛɛ amɛha tɛŋŋ? Tamɔ bɔ pɛ ni kuku 17 bɔ amaniɛ lɛ: “Daa nɛɛ amɛkɛɔ mɛi ni gbeɔ mihe guɔ lɛ akɛ, ‘Yehowa kɛɛ akɛ, “Nyɛaana hejɔlɛ!” ’ Ni mɔ fɛɛ mɔ ni nyiɛɔ lɛ diɛŋtsɛ etsuiwalɛ sɛɛ lɛ, amɛkɛɔ lɛ akɛ, ‘Nɔ fɔŋ kome folo baŋ nyɛnɔ!’ ” Ani eji anɔkwale? Dabi! Yehowa baakpa osɔfoi lɛ apasa gbalɛi nɛɛ ahe mama. Ehaŋ nɔ ni amɛkɛɔ yɛ egbɛi amli lɛ aba mli. Ejaakɛ osɔfoi lɛ apasa nɔmimaa akɛ toiŋjɔlɛ ka amɛkɛ Nyɔŋmɔ teŋ lɛ ji shishiumɔ sane!
16. (a) Mɛɛ shihilɛ mli je lɛ yɔɔ yɛ jeŋba gbɛfaŋ, ni enɛ he sɔ̃ ka namɛi anɔ? (b) Mɛni Yeremia kuu lɛ feɔ yɛ jeŋba he susumɔi gbohii ni je lɛ hiɛ ŋmɛnɛ lɛ ahe?
16 Ani oosusu akɛ, ‘Mɛni, ani osɔfoi lɛ apasa tsɔɔmɔi lɛ baanyɛ alaka mi? Kɔkɔɔkɔ!’ Ojogbaŋŋ, kaahe ohe oye tsɔ! Kaimɔ akɛ osɔfoi lɛ apasa tsɔɔmɔi lɛ eha jeŋba gbonyo ni yɔɔ gbeyei ni tsuɔ nii be fɛɛ be yɛ teemɔŋ etee nɔ. Amɛtsɔɔmɔi ni ŋmɛɔ nɔ fɛɛ nɔ feemɔ gbɛ lɛ buɔ nɔ fɛɛ nɔ feemɔ hu bem, ni bɔ ni eji jeŋba gbonyo ha lɛ kɔɔɔ he eko. Ni anaa nɛkɛ jeŋba ni eba shi nɛɛ yɛ hiɛtserɛjiemɔi fɛɛ, sinii, TV, woji tɛtrɛbii kɛ lalai fɛɛ mli. Belɛ esa akɛ wɔkwɛ wɔhe nɔ jogbaŋŋ, koni wɔkagbee jeŋba ni eba shi ni tsuɔ nii yɛ gbɛ ni yɔɔ nigii nɔ lɛ hewalɛ mli. Video kɛ lalai ni ehiii baanyɛ atsɔ obalaŋtai atsɔne ni ebaadu amɛ. Kaimɔ akɛ nɛkɛ aŋmɛɔ-nɔ-fɛɛ-nɔ-feemɔ-gbɛ ni etsɔ ŋmɛnɛŋmɛnɛ gbii nɛɛ amli gbɔmɛi asubaŋ lɛ jɛ osɔfoi apasa tsɔɔmɔi kɛ bɔ ni amɛfiii Nyɔŋmɔ jalɛ taomɔ nii asɛɛ lɛ hewɔ. Yeremia kuu lɛ miiwuu kɛmiishi nɛkɛ jeŋba shara mli susumɔi gbohii nɛɛ ni eeye eebua Yehowa tsuji koni amɛkpoo jeŋba shara shihilɛ ni Kristendom ebote mli kwraa lɛ.
17. (a) Taakɛ Yeremia tsɔɔ lɛ, mɛɛ kojomɔ ato ni baaba Yerusalem nɔ fɔŋ feelɔ lɛ nɔ? (b) Mɛni etsɛŋ ni ebaaba Kristendom nɔ?
17 Mɛɛ kojomɔ Kristendom apasa tsɔɔlɔi lɛ anine baashɛ nɔ kɛjɛ Yehowa, Kojolɔ kpeteŋkpele, lɛ dɛŋ? Kukuji 19, 20, 39, kɛ 40 haa hetoo: “Naa, Yehowa lasuogbele lɛ ni ji emlifu lɛ eje kpo, lasuogbele ni tsɔmɔɔ ni, ni eeebɔle mɛi fɔji ayitsei ahe. Yehowa mlifu lɛ kpaleŋ kɛyashi beyinɔ ni eeefee egbe naa, ni eeeha etsui mli yiŋtoi lɛ aba mli. . . . No hewɔ lɛ naa, mawo nyɛnɔ ni mashɛrɛ nyɛ kɛ maŋ lɛ ni miŋɔha nyɛ kɛ nyɛtsɛmɛi lɛ mashwie kɛaajɛ mihiɛ; ni mikɛ naanɔ ahorabɔɔ kɛ naanɔ hiɛgbele ni hiɛ ejeŋ nɔ gbi ko gbi ko aaaŋmɛ nyɛnɔ.” Enɛɛmɛi fɛɛ ba Yerusalem kɛ esɔlemɔtsu lɛ nɔ, ni agbɛnɛ etsɛŋ ni amanehulu ni tamɔ nakai nɔŋŋ baaba Kristendom, nɔ fɔŋ feelɔ lɛ nɔ!
“Yehowa Jatsu Lɛ” Jajemɔ
18, 19. Mɛɛ “Yehowa jatsu” ko Yeremia tswa he adafi etsɔɔ Yuda, ni mɛni enɛ tsɔɔ?
18 No hewɔ lɛ, mɛɛ gbɛnaa nii ka Yeremia kuu lɛ kɛ amɛnanemɛi lɛ anɔ? Kuku 33 kɛɔ wɔ akɛ: “Ni kɛji nɛkɛ maŋ nɛɛ loo gbalɔ lɛ aloo osɔfo ko bio akɛ, ‘Mɛni ji Yehowa jatsu lɛ?’ No lɛ kɛɛmɔ amɛ akɛ, “ ‘Nyɛ nɔŋŋ nyɛji jatsu lɛ, ni mashɛ nyɛ mafɔ,” Yehowa kɛɛ.’ ”
19 Hebri wiemɔ kɛha “jatsu” hiɛ shishinumɔi sɔrɔtoi enyɔ. Ebaanyɛ ekɔ ŋwɛi sanejajemɔ ni tsii loo nɔ ko ni nyɛɔ mɔ nɔ ni haa etɔɔ mɔ lɛ he. Wiemɔ ni ji “Yehowa jatsu” ni yɔɔ biɛ lɛ kɔɔ gbalɛ ni tsii—sanejajemɔ akɛ abu Yerusalem fɔ aha hiɛkpatamɔ lɛ he. Shi ani gbɔmɛi lɛ sumɔɔ ni amɛnu gbalɛ mli wiemɔi ni tsii nɛkɛ ni jɛ Yehowa ŋɔɔ ni Yeremia jaje etsɔɔ amɛ shii abɔ lɛ? Dabi, gbɔmɛi lɛ ye Yeremia he fɛo akɛ: ‘Mɛɛ Yehowa (jatsu) gbalɛ oyɔɔ bianɛ? Wɔyɛ nɔmimaa akɛ ogbalɛ lɛ baafee jatsu kroko ni haa etɔɔ mɔ!’ Shi mɛni Yehowa kɛɛ amɛ? Enɛ: “Nyɛ nɔŋŋ nyɛji jatsu lɛ, ni mashɛ nyɛ mafɔ.” Hɛɛ, nɛkɛ gbɔmɛi nɛɛ ji jatsu kɛha Yehowa, ni ebaashɛ amɛ efɔ koni amɛkatsɔ jatsu kɛmiiha lɛ dɔŋŋ.
20. Mɛni ji “Yehowa jatsu lɛ” ŋmɛnɛ?
20 Mɛni ji “Yehowa jatsu” lɛ ŋmɛnɛ? Eji gbalɛ shɛɛ sane ni tsii ni jɛ Nyɔŋmɔ Wiemɔ lɛ mli lɛ. Nɔ ni eyi mli obɔ ji fitemɔ, eetswa Kristendom hiɛkpatamɔ ni baa lɛ he adafi. Shi wɔ lɛ, wɔyɛ gbɛnaa nii ko ni hiɛdɔɔ yɔɔ mli akɛ wɔjaje nɛkɛ “Yehowa jatsu” nɛɛ wɔtsɔɔ. Yɛ be mli ni naagbee lɛ bɛŋkɛɔ lɛ, esa akɛ wɔkɛɛ mɛi fɛɛ akɛ Kristendom mli bii sɛɛsɛɛyalɔi lɛ ji “jatsu,” hɛɛ, “O mɛɛ jatsu” enɛ ji kɛha Yehowa Nyɔŋmɔ nɛkɛ, ni etsɛŋ ni ebaashɛ nɛkɛ “jatsu” nɛɛ efɔ kwraa kɛtsɔ Kristendom ni eeeshi lɛ yɛ amanehulu mli lɛ nɔ.
21. (a) Mɛni hewɔ akpata Yerusalem hiɛ yɛ afi 607 D.Ŋ.B. lɛ? (b) Yɛ Yerusalem hiɛkpatamɔ lɛ sɛɛ lɛ, mɛni ba amale gbalɔi lɛ kɛ agbɛnɛ Yehowa anɔkwa gbalɔ lɛ nɔ, ni mɛɛ nɔmimaa ehaa wɔ ŋmɛnɛ?
21 Atsu Yehowa fɔbuu kojomɔ he nii yɛ Yeremia gbii lɛ amli beni Babilonbii kpata Yerusalem hiɛ yɛ afi 607 D.Ŋ.B lɛ. Taakɛ agba afɔ shi lɛ, enɛ fee ‘ahorabɔɔ kɛ hiɛgbele’ ni ba nakai Israelbii henɔwolɔi ni yeee anɔkwa lɛ anɔ. (Yeremia 23:39, 40) Eha amɛna akɛ, Yehowa, ni amɛwooo ehiɛ nyam lɛ ekpoo amɛ kwraa yɛ naagbee kɛha nɔ ni baajɛ amɛgbɛ fɔŋ lɛ mli aba amɛnɔ lɛ. Amua amɛ apasa gbalɔi henɔwolɔi lɛ anaabui lɛ shikome yɛ naagbee. Shi Yeremia naabu tee nɔ egba saji. Yehowa shiii lɛ. Ni taakɛ nɔkwɛmɔ nɔ nɛɛ ji lɛ, Yehowa shiŋ Yeremia kuu lɛ beni eyiŋkpɛɛ ni tsii lɛ jwaraa Kristendom osɔfoi lɛ kɛ mɛi ni heɔ amɛ amalei lɛ amɛyeɔ lɛ awala kɛjɛɔ amɛmli lɛ.
22. Mɛɛ shihilɛ Yehowa kojomɔi lɛ kɛbaaba Kristendom nɔ?
22 Hɛɛ, bɔ ni Yerusalem tsɔ amaŋfɔ ni mɔ ko mɔ ko ehiii jɛmɛ yɛ 607 D.Ŋ.B. sɛɛ lɛ, nakai nɔŋŋ Kristendom Nyɔŋmɔ jalɔ lɛ baatamɔ, beni ashɔ eninamɔ lɛ fɛɛ kɛjɛ edɛŋ ni abɔ lɛ ahora atsɔɔ lɛ. Enɛ ji kojomɔ ni sa ni Yehowa efa akɛ ebaaba apasa tsɔɔlɔi lɛ anɔ. Nakai kojomɔ lɛ efeŋ efolo. Taakɛ bɔ ni Yeremia kɔkɔbɔɔ shɛɛ saji ni jɛ mumɔŋ lɛ fɛɛ ba mli anɔkwale yɛ tsutsu lɛ, nakai nɔŋŋ amɛbaaba mli anɔkwale yɛ amɛ ŋmɛnɛŋmɛnɛ beaŋ mlibaa lɛ mli. No hewɔ lɛ, nyɛhaa wɔtamɔa Yeremia. Nyɛhaa wɔkɛ ekãa ajajea Yehowa gbalɛ jatsu lɛ wɔtsɔɔa gbɔmɛi lɛ ni gbeyeishemɔ ko kwraa bɛ mli, koni no aha amɛle nɔ hewɔ ni ejalɛ kojomɔ lɛ tsiimɔ lɛ fɛɛ baa jamɔ mli apasa tsɔɔlɔi fɛɛ anɔ lɛ!
Sanebimɔi ni Akɛtiɔ Mli
◻ Te blema Yerusalem fee efɔŋ yɛ Yehowa hiɛ amɛha tɛŋŋ?
◻ Kristendom ‘enyiɛ yɛ amale mli’ yɛ mɛɛ gbɛ nɔ?
◻ Mɛɛ gbɛ nɔ ajie bɔ ni anyaŋeɔ ŋmɛnɛŋmɛnɛ beaŋ osɔfoi lɛ ahaa lɛ kpo yɛ?
◻ Mɛɛ “Yehowa jatsu” ajajeɔ atsɔɔ bianɛ?
[Mfoniri ni yɔɔ baafa 8]
Yerusalem gbalɔi lɛ fee ‘nibii ni yɔɔ gbeyei’
[Mfoniri ni yɔɔ baafa 9]
“Amɛtsuiiaŋ ninaa amɛwieɔ”
[Mfoniri ni yɔɔ baafa 10]
Yerusalem yɛ ehiɛkpatamɔ lɛ sɛɛ lɛ feɔ nɔ ni baaba Kristendom nɔ yɛ naagbee kwraa lɛ he mfoniri