Yitso 37
Yaafo kɛ Mlifilimɔ yɛ Babilon Naagbee lɛ Hewɔ
1. Te “shikpɔŋ lɛ nɔ maŋtsɛmɛi” lɛ baafee amɛnii amɛha tɛŋŋ yɛ Babilon Kpeteŋkpele lɛ hiɛkpatamɔ trukaa lɛ he?
BABILON naagbee lɛ ji sanekpakpa kɛha Yehowa webii, shi te jeŋmaji lɛ buɔ enɛ tɛŋŋ? Yohane kɛɔ wɔ akɛ: “Ni shikpɔŋ lɛ nɔ maŋtsɛmɛi lɛ ni kɛ lɛ bɔ ajwamaŋ ni amɛkɛ lɛ ho la lɛ aaafo lɛ, ni amɛaawo yara yɛ ehewɔ, beni amɛaana eshãa lɛ lasu lɛ; ni amɛaadamɔ sɛɛ flɛŋŋ yɛ epiŋmɔ lɛ gbeyeishemɔ hewɔ amɛaakɛɛ: Kpoo, kpoo, maŋ kpeteŋkpele lɛ, Babilon, maŋ ni he wa lɛ! Ejaakɛ ŋmɛlɛtswaa kome mli ni okojomɔ eba nɛɛ.”—Kpojiemɔ 18:9, 10.
2. (a) Akɛni kooloo ni tsuɔ tamɔ muneele lɛ okadi akoloŋtoi nyɔŋma lɛ baakpata Babilon Kpeteŋkpele lɛ hiɛ hewɔ lɛ, mɛni hewɔ “shikpɔŋ lɛ nɔ maŋtsɛmɛi” lɛ yeɔ awerɛho yɛ enaagbee lɛ he lɛ? (b) Mɛni hewɔ maŋtsɛmɛi ni yeɔ awerɛho lɛ damɔɔ sɛɛ flɛŋŋ kɛjɛɔ maŋ lɛ hiɛkpatamɔ lɛ he lɛ?
2 Jeŋmaji lɛ anifeemɔ yɛ enɛ he lɛ baafee nɔ ni yɔɔ naakpɛɛ yɛ okadi kooloo ni tsuɔ tamɔ muneele lɛ akoloŋtoi nyɔŋma lɛ ni kpata Babilon hiɛ lɛ hewɔ. (Kpojiemɔ 17:16) Shi beni Babilon etee lɛ, eka shi faŋŋ akɛ “shikpɔŋ lɛ nɔ maŋtsɛmɛi” lɛ baayoo bɔ ni ehe yɔɔ sɛɛnamɔ kɛha amɛ lɛ akɛni ejɔɔ gbɔmɛi lɛ ahe ni eba amɛ shi lɛ hewɔ. Osɔfoi lɛ ejaje akɛ tawuu yɛ krɔŋkrɔŋ, ni amɛtsu nii akɛ najiaŋdamɔlɔi ni halaa asraafoi, ni amɛshiɛ koni obalaŋtai kɛ amɛhe awo tawuu mli. Jamɔ efee hiɛhaa nɔ ko ni yɔɔ krɔŋkrɔŋ ni nɔyelɔi ni ekpɔtɔ lɛ ehɔlɔ sɛɛ amɛtsu nii ni amɛkɛnyɛ gbɔmɛi lɛ anɔ. (Okɛto Yeremia 5:30, 31; Mateo 23:27, 28 he.) Shi kadimɔ akɛ, nɛkɛ maŋtsɛmɛi ni yeɔ awerɛho nɛɛ damɔ sɛɛ flɛŋŋ ni amɛtsi amɛhe agbɛnɛ kɛjɛ maŋ ni abu lɛ fɔ lɛ he. Amɛtsiii amɛbɛŋkɛɛɛ lɛ po koni amɛbaye amɛbua lɛ. Amɛmiiye awerɛho akɛ ebɛ dɔŋŋ. Shi jeee awerɛho ni fa ni aaaha amɛkɛ amɛwala afɔ shi amɛha lɛ.
Jarayelɔi Fo ni Amɛye Ŋkɔmɔ
3. Namɛi hu Babilon Kpeteŋkpele lɛ gbele lɛ dɔɔ amɛ lɛ, ni mɛni ji yiŋtoi ni Yohane kɛha yɛ enɛ hewɔ?
3 Shikpɔŋ lɛ nɔ maŋtsɛmɛi lɛ jeee mɛi pɛ ni edɔɔ amɛ akɛ Babilon Kpeteŋkpele lɛ eho etee. “Ni shikpɔŋ lɛ nɔ jarayelɔi lɛ aaafo lɛ ni amɛaaye lɛ ŋkɔmɔ, ejaakɛ mɔ ko mɔ ko heee amɛ jarayeli nibii lɛ dɔŋŋ: shika kɛ jwiɛtɛi, kɛ tɛi ni jara wa kɛ adiagbai, kɛ klala fɛfɛo kɛ mama ni tamɔ afaseo diŋ, kɛ seda kɛ mama ni tsuɔ tamɔ muneele aguɔ nii lɛ, kɛ tso fɛɛ tso ni jeɔ ŋma, kɛ shuɔwu nibii fɛɛ, kɛ tso ni jara wa naakpa kɛ akɔɔble kɛ dade kɛ marmara tɛ nibii fɛɛ, kɛ sinamon kɛ amomon kɛ tsofai-kɛ-ŋmai, kɛ miro kɛ ohɛ ni jeɔ ŋma, kɛ daa kɛ mu, kɛ shikishaŋ kɛ ŋmaa, kɛ tsinai kɛ tooi, kɛ okpɔŋɔi kɛ shwiilii, kɛ gbɔmɔtsei kɛ gbɔmɛi asusumai. Ni yibii ni baa [Babilon Kpeteŋkpele lɛ] otsine lɛ eje odaaŋ, ni nibii ni ŋɔɔ dɔkɔdɔkɔ kɛ nibii ni kpɛɔ nyɛramnyɛram lɛ ebɔo, ni onaŋ amɛ kwraa dɔŋŋ.”—Kpojiemɔ 18:11-14.
4. Mɛni hewɔ “shikpɔŋ lɛ nɔ jarayelɔi” foɔ Babilon Kpeteŋkpele lɛ naagbee ni amɛyeɔ lɛ ŋkɔmɔ lɛ?
4 Hɛɛ, Babilon Kpeteŋkpele lɛ ji jarayelɔi ni yɔɔ nii babaoo lɛ ashieŋtsɛ kpakpa kɛ nihelɔ kpakpa. Akɛ nɔkwɛmɔnɔ lɛ, Nyɔŋmɔ jamɔ nikasemɔ hei ni yei kɛ hii osɔfoi kaseɔ nii yɛ mli ni yɔɔ Kristendom sɔlemɔi lɛ amli lɛ ebua shika, jwiɛtɛi, kɛ ojarawa tɛi, tsei kpakpai, kɛ heloo gbɛfaŋ nibii babaoo naa yɛ afii ohai abɔ lɛ amli. Kɛfata he lɛ, jamɔ ejɔɔ nihemɔ babaoo kɛ daatɔɔ ni fata Blonya gbijurɔyeli ni akɛgbeɔ Kristo gbɛi lɛ he guɔ kɛ gbijuji krokomɛi he lɛ nɔ. Kristendom maŋsɛɛ sanekpakpashiɛlɔi lɛ egbu shi kɛbote shikpɔji ni yɔɔ shɔŋŋ lɛ anɔ, amɛgbele jarai heei amɛha “shikpɔŋ lɛ nɔ jarayelɔi” ni yɔɔ je nɛŋ lɛ. Katolik jamɔ ni fata jarayelɔi lɛ ahe kɛbote Japan yɛ afii ohai 17 lɛ mli lɛ kɛ amɛhe wo maŋbii nɛɛ atawuu mli. Yɛ be mli ni egbaa tawuu ni mli wa nɛɛ ekome ni tee nɔ yɛ Osaka mɔɔ lɛ yiteŋ lɛ he sane lɛ, The Encyclopædia Britannica lɛ jaje akɛ: “Tokugawa asraafoi lɛ naa amɛhe akɛ amɛmiiwuu amɛshi henyɛlɔ ko ni nɔ ni yɔɔ eflaŋai lɛ amli ji krɔs loo sɛŋmɔtso lɛ kɛ Yiwalaherelɔ lɛ kɛ St James ni ji Spania hetselɔ lɛ mfonirii.” Fa ni ye kunim lɛ wa Katolik jamɔ yi ni amɛgbe amɛ fɛɛ yɛ nakai shikpɔŋ lɛ nɔ. Bɔ ni sɔlemɔ lɛ kɛ ehe woɔ jeŋ saji amli ŋmɛnɛ lɛ hu kɛ jɔɔmɔ ko baŋ enɔ nakai nɔŋŋ.
5. (a) Te gbee ni jɛ ŋwɛi lɛ tsɔɔ “shikpɔŋ lɛ nɔ jarayelɔi” lɛ ayaafo lɛ mli lolo eha tɛŋŋ? (b) Mɛni hewɔ jarayelɔi lɛ hu damɔɔ “sɛɛ flɛŋŋ” lɛ?
5 Gbee ni jɛ ŋwɛi lɛ tee nɔ ekɛɛ lolo akɛ: “Nɛkɛ nibii nɛɛ aguɔyelɔi ni etsɔmɔ niiatsɛmɛi yɛ emli lɛ aaadamɔ sɛɛ flɛŋŋ yɛ epiŋmɔ lɛ gbeyeishemɔ lɛ hewɔ, ni amɛaafo ni amɛaaye ŋkɔmɔ ni amɛaakɛɛ: Kpoo, kpoo, maŋ kpeteŋkpele lɛ ni woɔ klala fɛfɛo kɛ mama ni tamɔ afaseo diŋ kɛ mama ni tsuɔ tamɔ muneele ni ewulaa kɛ shika kɛ tɛi ni jara wa kɛ adiagbai lɛ! Ejaakɛ ŋmɛlɛtswaa kome pɛ mli lɛ nɛkɛ nii afalɛ babaoo nɛɛ fɛɛ etsɔ amaŋfɔ.” (Kpojiemɔ 18:15, 16) Akɛni akpata Babilon Kpeteŋkpele lɛ hiɛ hewɔ lɛ, “jarayelɔi” lɛ woɔ yara yɛ amɛ jarayeli mli hefatalɔ lɛ ni amɛlaaje lɛ lɛ hewɔ. Lɛlɛŋ, eji “kpoo, kpoo” kɛha amɛ. Shi kadimɔ akɛ, yiŋtoo hewɔ ni amɛwoɔ yara yɛ ehewɔ lɛ ji pɛsɛmkunya nɔ ni akɛ—taakɛ maŋtsɛmɛi lɛ ji lɛ—“amɛaadamɔ sɛɛ flɛŋŋ.” Amɛbɛŋkɛɛɛ lɛ tsɔ bɔ ni amɛhe aaaba sɛɛnamɔ ko amɛha Babilon Kpeteŋkpele lɛ.
6. Te gbee ni jɛ ŋwɛi lɛ tsɔɔ lɛlɛ kudɔlɔi kɛ mɛi ni nyiɛɔ lɛlɛ mli lɛ ayaafo lɛ mli eha tɛŋŋ, ni mɛni hewɔ amɛwoɔ yara yɛ ehewɔ lɛ?
6 Sane lɛ yaa nɔ akɛ: “Ni lɛlɛ kudɔɔtsɛ fɛɛ kudɔɔtsɛ kɛ mɔ fɛɛ mɔ ni nyiɛɔ lɛlɛ mli kɛyaa he ko, kɛ lɛlɛŋbii kɛ mɛi abɔ ni tsuɔ ŋshɔ hiɛ nii lɛ damɔ flooflo, ni beni amɛna eshãa lɛ lasu lɛ, amɛbolɔ amɛkɛɛ: Mɛɛ maŋ tamɔ maŋ kpeteŋkpele nɛɛ? Ni amɛkɛ mulu wo amɛyiteaŋ, ni amɛkɛ yaafo kɛ ŋkɔmɔyeli bo amɛkɛɛ: Kpoo, kpoo, maŋ kpeteŋkpele lɛ, ní mɛi fɛɛ ni yɔɔ lɛji yɛ ŋshɔ hiɛ lɛ tsɔmɔ niiatsɛmɛi yɛ emli jarayeli nii ni jara wa lɛ hewɔ lɛ! Ejaakɛ ŋmɛlɛtswaa kome pɛ mli ni etsɔ amaŋfɔ nɛɛ.” (Kpojiemɔ 18:17-19) Blema Babilon ji jarayeli maŋtiase ni eyɛ lɛji babaoo. Nakai nɔŋŋ hu Babilon Kpeteŋkpele lɛ tsɔɔ “nui babaoo” ni ji emli bii lɛ anɔ eyeɔ jara babaoo. Enɛ kɛ nitsumɔ haa mɛi ni ji ejamɔ lɛ mli bii lɛ ateŋ mɛi pii. Mɛɛ shika helɛtemɔ mli shigbeemɔ Babilon Kpeteŋkpele lɛ hiɛkpatamɔ baaji aha gbɔmɛi nɛɛ nɛkɛ! Jɛɛhe ko kwraa bɛ ni aaatsɔ nɔ ana daaŋ ŋmaa tamɔ lɛ.
Mlifilimɔ yɛ Ehiɛkpatamɔ lɛ Hewɔ
7, 8. Te gbee ni jɛ ŋwɛi lɛ mu esane ni kɔɔ Babilon Kpeteŋkpele lɛ he lɛ naa eha tɛŋŋ, ni namɛi baahere nakai wiemɔi lɛ anɔ?
7 Beni Mediabii kɛ Persiabii butu blema Babilon lɛ, Yeremia gba ni ekɛɛ: “Ni ŋwɛi kɛ shikpɔŋ kɛ amɛmli nii fɛɛ aaala nyamɔ lala yɛ Babel hewɔ.” (Yeremia 51:48) Kɛ akpata Babilon Kpeteŋkpele lɛ hiɛ lɛ, gbee ni jɛ ŋwɛi lɛ kɛ shɛɛ sane lɛ baaba naagbee, ni ekɛɛ yɛ Babilon Kpeteŋkpele lɛ he akɛ: “Bo ŋwɛi, kɛ nyɛ krɔŋkrɔŋbii kɛ bɔfoi kɛ gbalɔi, nyɛnyaa yɛ ehewɔ, ejaakɛ Nyɔŋmɔ ekojo lɛ eha nyɛ.” (Kpojiemɔ 18:20) Yehowa kɛ ŋwɛibɔfoi lɛ baanya akɛ amɛaana Nyɔŋmɔ blema henyɛlɔ lɛ hiɛkpatamɔ, taakɛ Kristo bɔfoi lɛ kɛ mra be mli gbalɔi ni ji Kristofoi lɛ, ni no mli lɛ atee amɛ shi ni amɛŋɔ amɛ gbɛhe yɛ ŋwɛi yɛ onukpai 24 agbɛjianɔtoo lɛ mli lɛ hu baafee lɛ.—Okɛto Lala 97:8-12 he.
8 Lɛlɛŋ, “krɔŋkrɔŋbii” lɛ fɛɛ—kɛji akɛ atee amɛ shi kɛtee ŋwɛi loo amɛyɛ shikpɔŋ nɔ lolo lɛ—baabolɔ kɛ nyamɔ, taakɛ bɔ ni asafo babaoo ni ji tooi krokomɛi lɛ hu baafee lɛ. Yɛ be ni sa mli lɛ, abaatee hii anɔkwafoi ni hi shi yɛ blema lɛ fɛɛ hu ashi kɛba nibii agbɛjianɔtoo hee lɛ mli, ni amɛ hu amɛbaafata mlifilimɔ lɛ he. Nyɔŋmɔ webii lɛ ebɔko mɔdɛŋ akɛ amɛaatɔ amɛhe owele yɛ apasa jalɔi ni waa amɛyi lɛ anɔ. Amɛkai Yehowa wiemɔi lɛ: “Minɔ ji oweletɔɔ, mi mato najiaŋ, Nuŋtsɔ [Yehowa] lɛ kɛɛ.” (Romabii 12:19; 5 Mose 32:35, 41-43) Ojogbaŋŋ, agbɛnɛ Yehowa eto najiaŋ. Etɔ la ni Babilon Kpeteŋkpele lɛ fɔse eshwie shi lɛ fɛɛ he owele.
Tɛ ko ni Tamɔ Wiɛ Wulu ni Ashɛ Afɔ
9, 10. (a) Mɛni bɔfo ni he wa lɛ feɔ ni ekɛɔ agbɛnɛ? (b) Mɛɛ nifeemɔ ni tamɔ nɔ ni bɔfo ni he wa ni yɔɔ Kpojiemɔ 18:21 lɛ fee lɛ tee nɔ yɛ Yeremia gbii lɛ amli, ni mɛni nɔ mi emaa? (d) Nii ni bɔfo ni he wa lɛ fee ni Yohane na lɛ maa mɛni nɔ mi?
9 Nɔ ni Yohane na kɛnyiɛ sɛɛ lɛ maa nɔ mi akɛ Yehowa kojomɔ ni ekɛbaa Babilon Kpeteŋkpele lɛ nɔ lɛ ji naagbee nɔ: “Ni bɔfo ko ni he wa wo tɛ ko ni tamɔ wiɛ wulu, ni eshɛ efɔ ŋshɔŋ ekɛɛ: Nɛkɛ aaashɛ Babilon maŋ kpeteŋkpele lɛ afɔ trukaa, ni anaŋ lɛ kwraa dɔŋŋ.” (Kpojiemɔ 18:21) Nifeemɔ ko ni tamɔ nɛkɛ ni hiɛ gbalɛ shishinumɔ ko ni mli wa tee nɔ yɛ Yeremia be lɛ mli. Akɛ mumɔ tsirɛ Yeremia koni eŋma “efɔŋ fɛɛ ni baaba Babel nɔ lɛ” ewo wolo mli. Ekɛ wolo lɛ ha Seraia ni ekɛɛ lɛ akɛ efa gbɛ kɛya Babilon. Ni jɛmɛ ji he ni eyakane saji ni ajajeɔ ashiɔ maŋtiase lɛ fɛɛ yɛ, yɛ Yeremia famɔ naa: “Yehowa! Bo owie yɛ biɛnɛɛ he, akɛ oooplenee lɛ, ni mɔ ko mɔ ko akahi mli dɔŋŋ, gbɔmɔ jio, shia kooloo jio, shi moŋ etsɔ naanɔ amaŋfɔ!” Kɛkɛ ni Seraia fi wolo lɛ ekpɛtɛ tɛ he ni efɔ ewo Eufrate faa lɛ mli, akɛ: “Nɛkɛ Babel baashiu, ni eteŋ shi dɔŋŋ, yɛ efɔŋ fɛɛ ni mikɛaaba enɔ lɛ hewɔ.”—Yeremia 51:59-64.
10 Wolo lɛ ni akɛ tɛ efata he afi lɛ ni ashɛ afɔ faa lɛ mli lɛ maa nɔ aduatsɔ akɛ Babilon baalaaje ni anaŋ lɛ kwraa dɔŋŋ, ekuŋ esɛɛ ebaŋ dɔŋŋ. Bɔfo Yohane ni na bɔfo ko ni he wa ni miifee nɔ ko ni tamɔ nakai nɔŋŋ lɛ hu maa nɔ aduatsɔ kɛ hewalɛ akɛ Yehowa yiŋtoo yɛ Babilon Kpeteŋkpele lɛ he lɛ baaba mli. Bɔ ni blema Babilon etsɔ amaŋfɔ koikoi ŋmɛnɛ lɛ kɛ odaseyeli ni hewalɛ yɔɔ mli ni tsɔɔ nɔ ni baaba apasa jamɔ nɔ yɛ wɔsɛɛ be ni ebɛŋkɛ kpaakpa nɛɛ mli lɛ haa.
11, 12. (a) Agbɛnɛ te bɔfo ni he wa lɛ wie etsɔɔ Babilon Kpeteŋkpele lɛ eha tɛŋŋ? (b) Mɛni Yeremia gba yɛ hemɔkɛyeli kwalɔ Yerusalem he, ni mɛni etsɔɔ kɛhaa wɔgbi nɛɛ?
11 Agbɛnɛ bɔfo ni he wa lɛ wie etsɔɔ Babilon Kpeteŋkpele lɛ akɛ: “Ni anuŋ saŋkutswalɔi kɛ lalatsɛmɛi kɛ blɛkpalɔi kɛ tɛtrɛmaŋtɛrɛ kpalɔi lɛ agbee kwraa dɔŋŋ yɛ omli, ni anaŋ ŋaalɔ ko ŋaalɔ ko ni le ŋaa ko kwraa dɔŋŋ yɛ omli, ni anuŋ wiɛ gbɛɛmɔ he hu kwraa dɔŋŋ yɛ omli, ni kane la etsoŋ kwraa dɔŋŋ yɛ omli, ni anuŋ ayemforowu kɛ ayemforo gbee kwraa dɔŋŋ yɛ omli; ejaakɛ ojarayelɔi lɛ ji shikpɔŋ lɛ nɔ gbɔmɛi wuji, ejaakɛ okunyaayeli lɛ akɛshishiu jeŋmaji lɛ fɛɛ.”—Kpojiemɔ 18:22, 23.
12 Kɛ akɛaato he lɛ, Yeremia gba yɛ hemɔkɛyeli kwalɔ Yerusalem he akɛ: “Ni asaŋ maha nyamɔ kɛ miishɛɛ gbee kɛ ayemforowu kɛ ayemforo gbee, wiɛ gbɛɛmɔ kɛ kane kpɛmɔ alaaje yɛ amɛteŋ. Ni nɛkɛ shikpɔŋ nɛɛ fɛɛ aaatsɔ olɛŋlɛ kɛ amaŋfɔ.” (Yeremia 25:10, 11) Akɛ Babilon Kpeteŋkpele lɛ fa titri lɛ, Kristendom baatsɔ amaŋfɔ koikoi ni wala bɛ nɔ, taakɛ bɔ ni Yerusalem amaŋfɔfeemɔ shihilɛ yɛ afi 607 D.Ŋ.B. sɛɛ lɛ fee he mfoniri yɛ faŋŋ mli lɛ. Kristendom ni be ko lɛ emli fili lɛ kɛ tsuijurɔ ni anuɔ hoofeemɔ he daa gbi yɛ emli lɛ diɛŋtsɛ baafee mɔ ni aye enɔ kunim ni akpoo lɛ.
13. Mɛɛ tsakemɔ ni baa trukaa banina Babilon Kpeteŋkpele lɛ, ni mɛni jɛ mli ba “ejarayelɔi” lɛ anɔ?
13 Yɛ anɔkwale mli lɛ, taakɛ bɔfo lɛ kɛɔ Yohane yɛ biɛ lɛ, Babilon Kpeteŋkpele lɛ he nɔ fɛɛ nɔ baatsake kɛjɛ majimaji ateŋ maŋtsɛyeli ni yɔɔ hewalɛ ni tsutsu lɛ eji ni agbɛnɛ etsɔ shia ŋa kpataa ni nɔ ko bɛ nɔ. ‘Ejarayelɔi,’ ni ji niiatsɛmɛi wuji ni yɔɔ shikai akpekpei abɔ lɛ kɛ ejamɔ lɛ tsu nii koni amɛkɛna amɛ diɛŋtsɛ amɛsɛɛnamɔ aloo ákɛ nɔ ko ni amɛteeɔ yɛ sɛɛ, ni osɔfoi lɛ hu ena akɛ sɛɛnamɔ yɛ he akɛ amɛaana amɛsɛɛnamɔ kɛ miishɛɛ lɛ mli gbɛfaŋnɔ. Shi Babilon Kpeteŋkpele lɛ fataŋ nakai jarayelɔi lɛ ahe akɛ mɔ ni amɛkɛ lɛ feɔ nii dɔŋŋ. Ekɛ ekunyaayeli kɛ jamɔ nifeemɔi lɛ eshishiuŋ shikpɔŋ lɛ nɔ jeŋmaji lɛ dɔŋŋ.
La Yi Sɔyeli ni Yɔɔ Gbeyei
14. Mɛni ji yiŋtoo ni bɔfo ni he wa lɛ kɛha yɛ Yehowa kojomɔ ni naa wa lɛ hewɔ, ni mɛni ni tamɔ nakai Yesu kɛɛ beni eyɔɔ shikpɔŋ nɔ lɛ?
14 Beni emuɔ naa lɛ, bɔfo ni he wa lɛ kɛɔ nɔ hewɔ ni Yehowa kojoɔ Babilon Kpeteŋkpele lɛ waa nakai lɛ. Bɔfo lɛ kɛɛ: “Ni emli ana gbalɔi kɛ krɔŋkrɔŋbii kɛ mɛi fɛɛ ni agbe yɛ shikpɔŋ nɔ lɛ ala lɛ yɛ.” (Kpojiemɔ 18:24) Beni Yesu yɔɔ shikpɔŋ nɔ lɛ, ekɛɛ Yerusalem jamɔ mli hiɛnyiɛlɔi lɛ akɛ amɛbaabu amɛhe akɔntaa yɛ “la fɛɛ ni ashwie shi yɛ shikpɔŋ lɛ nɔ kɛjɛ Habel, jalɔ lɛ” nɔ kɛbaa lɛ. No hewɔ lɛ akpata nakai yinɔ ni ekɔdɔ lɛ hiɛ yɛ afii 70 Ŋ.B. (Mateo 23:35-38) Ŋmɛnɛ, jamɔ yinɔ kroko eye la yi sɔ yɛ Nyɔŋmɔ tsuji ni ewaa amɛ yi lɛ hewɔ.
15. Yɛ mɛɛ gbɛ nɔ Katolek Sɔlemɔ lɛ ni yɔɔ Nazi Germany lɛ ye la yi sɔ yɛ gbɛi sɔrɔtoi enyɔ nɔ?
15 Guenter Lewy ŋma yɛ ewolo, The Catholic Church and Nazi Germany lɛ mli akɛ: “Beni anyɛ Yehowa Odasefoi anɔ yɛ Bavaria yɛ April 13 [1933] lɛ, Sɔlemɔ lɛ po kpɛlɛ nitsumɔ ni Maŋ Sɔɔmɔ ni Kwɛɔ Tsɔsemɔ kɛ Jamɔ Nɔ lɛ kɛwo amɛdɛŋ akɛ kɛ amɛna jamɔ ni agu nɛɛ mli nyo ko akɛ eeshiɛ lɛ, ebɔ amaniɛ lɛ nɔ.” No hewɔ lɛ sɔ ka Katolik Sɔlemɔ lɛ nɔ yɛ Odasefoi nɛɛ akpei abɔ ni amɛloo amɛ amɛwo gbokɛlɛfoi aŋsraiaŋ lɛ hewɔ; Odasefoi nɛɛ ohai abɔ ni agbe amɛ lɛ ala ekpa amɛdɛŋ fɛɛ. Beni Odasefoi obalaŋtai, tamɔ Wilhelm Kusserow tsɔɔ akɛ amɛbaanyɛ ni amɛkɛ ekaa adamɔ tu ni aaatswa amɛ lɛ naa lɛ, Hitler kpɛ eyiŋ akɛ tu ni atswaa mɛi ni jɛɔ amɛhenilee mli amɛkpooɔ tawuu lɛ hi tsɔ kɛha amɛ; no hewɔ lɛ afo Wilhelm nyɛminuu Wolfgang, ni no mli lɛ eye afii 20 lɛ yitso. Yɛ nakai beaŋ nɔŋŋ lɛ, Katolik Sɔlemɔ lɛ miiwo German Katolik obalaŋtai lɛ ahewalɛ ni amɛgboi akɛ asraafoi amɛha amɛjakumaŋ lɛ. Sɔlemɔ lɛ la yi sɔ ni eye lɛ yɛ faŋŋ ni aana!
16, 17. (a) Mɛɛ la yi sɔyeli esa akɛ akɛfɔ Babilon Kpeteŋkpele lɛ nɔ, ni te fee tɛŋŋ ni Vatican bafee mɔ ni eye la yi sɔ yɛ Yudafoi ni gboi yɛ Nazi seshibulemɔ lɛ mli lɛ hewɔ? (b) Mɛni ji gbɛ kome ni abaatsɔ nɔ ashwa apasa jamɔ yɛ gbɔmɛi akpekpei abɔ ni agbe yɛ ŋmɛnɛŋmɛnɛ beaŋ tai ohai abɔ lɛ mli lɛ hewɔ?
16 Shi kɛlɛ, gbalɛ lɛ kɛɔ ákɛ akɛ “mɛi fɛɛ ni agbe yɛ shikpɔŋ lɛ nɔ lɛ ala” lɛ he sɔ fɔɔ Babilon Kpeteŋkpele lɛ nɔ. Enɛ efee anɔkwale diɛŋtsɛ yɛ ŋmɛnɛŋmɛnɛ beaŋ. Akɛ nɔkwɛmɔnɔ lɛ, akɛni Katolik ŋaatsɔɔ ye bua ni akɛ Hitler ba hewalɛ mli yɛ Germany hewɔ lɛ, Vatican lɛ yeɔ la yi sɔ babaoo ni aye yɛ Yudafoi akpekpei ekpaa ni gboi yɛ seshi bulemɔ ni Nazibii lɛ kɛba lɛ he fɔ. Kɛfata he lɛ, yɛ wɔbe nɛɛ mli lɛ, agbe gbɔmɛi fe akpekpei oha yɛ tai ohai abɔ mli. Ani ashwaa apasa jamɔ yɛ enɛ hu mli? Hɛɛ, yɛ gbɛi sɔrɔtoi enyɔ nɔ.
17 Gbɛ lɛ ekome ji akɛ, tai pii yɛ ni Nyɔŋmɔ jamɔ mli bei kɛbaa. Akɛ nɔkwɛmɔ nɔ lɛ, awuiyeli ni tee nɔ yɛ India yɛ Muslimbii kɛ Hindubii ateŋ yɛ 1946-48 lɛ ji nɔ ni jamɔ kanya loo ekɛba. Agbe gbɔmɛi akpei ohai abɔ. Bei ni baka Iraq kɛ Iran teŋ yɛ 1980 afii lɛ amli lɛ hu kɔ jamɔ mli sɔrɔtofeemɔi ahe, ni no hu agbe gbɔmɛi akpei ohai abɔ. Awuiyeli ni yaa nɔ yɛ Katolikbii kɛ Protestantbii ateŋ yɛ Northern Ireland lɛ hu ekpata gbɔmɛi akpei abɔ awala hiɛ. Beni esusu enɛɛmɛi fɛɛ he lɛ, niŋmalɔ C. L. Sulzberger kɛɛ yɛ 1976 mli akɛ: “Eji anɔkwale ni miishɛɛ bɛ mli akɛ ekolɛ tai ni awuɔ bianɛ yɛ jeŋ muu fɛɛ lɛ fa aloo nɔ ni fe fa ji nɔ ni jɛ Nyɔŋmɔ jamɔ mli bei aloo ekɔɔ Nyɔŋmɔ jamɔ naataomɔi ahe.” Yɛ anɔkwale mli lɛ, nakai eji yɛ Babilon Kpeteŋkpele lɛ yinɔsane be fɛɛ ni yɔɔ basabasa lɛ mli.
18. Mɛni ji gbɛ ni ji enyɔ ni je lɛŋ jamɔi lɛ eye la yi sɔ yɛ mli lɛ?
18 Mɛni ji gbɛ ni ji enyɔ lɛ? Yɛ Yehowa hiɛ lɛ, je lɛŋ jamɔi lɛ eye la yi sɔ ejaakɛ amɛtsɔɔɔ amɛsɛɛnyiɛlɔi lɛ anɔkwale ni kɔɔ Yehowa taomɔ nii kɛha etsuji lɛ he lɛ he nɔ ko yɛ yiŋtsɔmɔ mli. Amɛkɛ yiŋtsɔmɔ etsɔɔɔ gbɔmɛi lɛ akɛ esa akɛ Nyɔŋmɔ anɔkwa jalɔi lɛ akase Yesu Kristo ni amɛjie suɔmɔ kpo amɛtsɔɔ amɛhe ni maŋ nɔ ni amɛjɛ lɛ kɔɔɔ he eko. (Mika 4:3, 5; Yohane 13:34, 35; Bɔfoi lɛ Asaji 10:34, 35; 1 Yohane 3:10-12) Akɛni jamɔi ni feɔ Babilon Kpeteŋkpele lɛ etsɔɔɔ nɛkɛ nibii nɛɛ hewɔ lɛ, agbala amɛsɛɛnyiɛlɔi lɛ kɛbote majimaji ateŋ tawuu ni tamɔ lasuogbele ko mli. Kwɛ bɔ ni enɛ jeɔ kpo faŋŋ yɛ jeŋ tai enyɔ ni ba yɛ afi oha 20 lɛ klɛŋklɛŋ fa lɛ mli lɛ, ni fɛɛ je shishi yɛ Kristendom, ni nɔ ni jɛ mli ba ji nanemɛi Nyɔŋmɔ jalɔi ni miigbe amɛhe lɛ! Eji mɛi fɛɛ ni kɛɔ akɛ amɛji Kristofoi lɛ kɛ amɛhe kpɛtɛ Biblia mli shishitoo mlai ahe kulɛ, nakai tai sɔrɔtoi lɛ eteŋ shi kɔkɔɔkɔ.
19. Mɛɛ la yi sɔyeli ni tsii waa Babilon Kpeteŋkpele lɛ tere?
19 Yehowa kɛ la ni afɔse ashwie shi nɛɛ fɛɛ he shwamɔ fɔɔ Babilon Kpeteŋkpele lɛ najiashi. Eji jamɔ mli hiɛnyiɛlɔi lɛ, ni titri lɛ, mɛi ni yɔɔ Kristendom lɛ, tsɔɔ amɛ webii lɛ Biblia mli anɔkwale kulɛ, lashishwiemɔ babaoo ni tamɔ nɛkɛ baŋ. No hewɔ lɛ eji anɔkwale akɛ, esa akɛ Babilon Kpeteŋkpele lɛ—ajwamaŋ kpeteŋkpele lɛ kɛ jeŋ apasa jamɔ maŋtsɛyeli lɛ—abu ehe akɔntaa eha Yehowa, ni jeee yɛ “gbalɔi lɛ kɛ krɔŋkrɔŋbii lɛ” ni ewa amɛ yi ni egbe amɛ lɛ ala he kɛkɛ, shi moŋ “mɛi fɛɛ ni agbe yɛ shikpɔŋ lɛ nɔ lɛ ala” yɛ gbɛ nɛɛ loo gbɛ kroko nɔ lɛ hewɔ. Babilon Kpeteŋkpele lɛ tere la yi sɔyeli ni tsii babaoo diɛŋtsɛ. Jiemɔ ni aaajie lɛ kɛaaya yɛ be mli ni enaagbee hiɛkpatamɔ lɛ baa lɛ ji nɔ ko ni sa diɛŋtsɛ!
[Akrabatsa ni yɔɔ baafa 270]
Nɔ ni Alaajeɔ yɛ Sane ni Ja ni Aŋmɛɔ he Akɛsaa lɛ Mli
Guenter Lewy ŋma yɛ ewolo The Catholic Church and Nazi Germany lɛ mli akɛ: “Eji German Katolikbii kɛ amɛhe kpɛtɛ yiŋkpɛɛ ni yɔɔ shiŋŋ ni akɛteɔ shi awoɔ Nazi nɔyeli lɛ he kɛjɛ shishijee kulɛ, jeŋ yinɔsane baatsɔ gbɛ kroko nɔ. Kɛji akɛ nɛkɛ mpleshii nɛɛ po nyɛɛɛ aye Hitler nɔ kunim ni etsi awui ni eye lɛ babaoo naa po lɛ, nɔ ni ebaafee yɛ enɛ mli ji Sɔlemɔ lɛ jeŋba nɔwomɔ ni yaa shɔŋŋ. Lɛlɛŋ, adesai babaoo baalaaje amɛwala yɛ shi ni amɛaate amɛshi enɛ lɛ mli, shi ebaafee afɔlei ni ashaa yɛ nibii ni hi fe fɛɛ lɛ ahewɔ. Kɛ ena akɛ enyɛɛɛ ekɛ ehe afɔ gbɔmɛi ni eyaaa ta lɛ anɔ lɛ, Hitler naŋ ekaa ni ekɛ ehe awo ta lɛ mli, ni enɛ hu tsɔɔ akɛ kulɛ amɛbaahere gbɔmɛi akpekpei abɔ ayiwala. . . . Beni afee Germanbii ni teɔ shi woɔ Nazi nɔyeli lɛ akpei abɔ niseniianii kɛbote gbele mli yɛ Hitler gbokɛlɛfoi aŋsraiaŋ, beni agbeɔ Poland nilelɔi lɛ, beni Russiabii akpei ohai abɔ gboi akɛni abuɔ amɛ akɛ Slavic Untermenschen [mɛi ni shɛɛɛ adesai] lɛ, ni beni agbe gbɔmɛi 6,000,000 akɛni ‘amɛjeee Aryan loo Germanbii lɛ,’ Katolik Sɔlemɔ ni yɔɔ Germany lɛ mli onukpai lɛ fi nɔyeli lɛ sɛɛ amɛkɛfee efɔŋ ni tamɔ nɛkɛ. Paapa ni yɔɔ Roma lɛ, Roma Katolik Sɔlemɔ lɛ mumɔŋ yitso kɛ jeŋba kpakpa tsɔɔlɔ ni fe fɛɛ lɛ, fee dioo ni ewieee.”—Baafai 320, 341.
[Mfoniri ni yɔɔ baafa 268]
Nɔ ni nɔyelɔi lɛ kɛɔ ji, “Kpoo, kpoo”
[Mfoniri ni yɔɔ baafa 268]
Nɔ ni jarayelɔi lɛ kɛɔ ji, “Kpoo, kpoo”