Yehowa kɛ Jeŋmaji lɛ Ená
“Gbɛɛmɔ aaayashɛ shikpɔŋ lɛ naagbee he tɔ̃ɔ; ejaakɛ Yehowa kɛ jeŋmaji lɛ ená.”—YEREMIA 25:31.
1, 2. (a) Mɛni ba yɛ Yuda yɛ Maŋtsɛ Yoshia gbele sɛɛ? (b) Namɔ ji Yuda naagbee maŋtsɛ, ni yɛ mɛɛ gbɛ nɔ ena amanehulu yɛ anɔkwa ni eyeee lɛ hewɔ?
JARAMƆ bei ni mli wawai ba Yuda maŋ lɛ nɔ. No mli lɛ maŋtsɛ kpakpa ko, ni ji Yosia etsi Yehowa mlifu ni naa wa lɛ naa fioo. Shi mɛni nyiɛ sɛɛ ba beni agbe Yosia yɛ afi 629 D.Ŋ.B. lɛ? Maŋtsɛmɛi ni baye esɛɛ lɛ wooo Yehowa hiɛ nyam.
2 Yuda naagbee maŋtsɛ, Zedekia, ni ji Yosia bi ni gbeɔ yi feɔ ejwɛ lɛ tee nɔ, taakɛ 2 Maŋtsɛmɛi 24:19 kɛɔ lɛ, ni “efee efɔŋ yɛ Yehowa hiɛ tamɔ bɔ ni Yehoiakim [enyɛmi nukpa lɛ] fee lɛ pɛpɛɛpɛ.” Mɛni jɛ mli ba? Nebukadnezar batutua Yerusalem, emɔ Zedekia, egbe ebii yɛ ehiɛ, eshwila ehiŋmɛi, ni eŋɔ lɛ kɛtee Babilon. Agbɛnɛ Babilonbii lɛ loo nibii ni akɛsɔmɔɔ Yehowa lɛ fɛɛ, ni amɛwo sɔlemɔtsu lɛ kɛ maŋ lɛ mli la. Mɛi ni je mli lɛ batsɔmɔ nomii yɛ Babilon.
3. Mɛɛ be kpalaŋŋ ko je shishi yɛ Yerusalem hiɛkpatamɔ yɛ afi 607 D.Ŋ.B. lɛ mli, ni mɛni ato ni baaba yɛ nakai be lɛ naagbee?
3 Jeee Yerusalem naagbee amaŋfɔ-feemɔ lɛ pɛ nakai afi ni ji 607 D.Ŋ.B. lɛ kadi, shi moŋ “jeŋmaji abe” ni awie he yɛ Luka 21:24 lɛ hu shishijee. Nɛkɛ afii 2,520 be kpalaŋŋ nɛɛ ba naagbee yɛ wɔ afii oha nɛɛ mli, yɛ afi 1914. No mli lɛ be eshɛ ni Yehowa baatsɔ e-Bi, Yesu Kristo, ni da fe Nebukadnezar, ni awo lɛ maŋtsɛ lɛ nɔ ajaje fɔbuu kojomɔ ashwie jeŋ ni ekpɔtɔ lɛ nɔ. Nɛkɛ kojomɔ nɛɛ jeɔ shishi yɛ ŋmɛnɛŋmɛnɛ beaŋ Yuda, ni kɛɔ akɛ edamɔ Nyɔŋmɔ kɛ Kristo najiaŋ yɛ shikpɔŋ nɔ lɛ nɔ.
4. Mɛɛ sanebimɔi ateɔ amɛ shi yɛ Yeremia gbalɛ lɛ he agbɛnɛ?
4 Ani wɔmiina nibii ni je amɛhe yɛ basabasa-feemɔ ni tee nɔ yɛ Yuda ni emaŋtsɛmɛi lɛ yeɔ nɔ lɛ naagbee afii lɛ amli lɛ—ni naagbai ni fiteɔ nii nɛɛ sa maji ni bɛŋkɛ amɛ lɛ ahe lɛ—kɛ basabasa-feemɔi ni yaa nɔ yɛ Kristendom ŋmɛnɛ lɛ? Hɛɛ wɔmiina! Belɛ, mɛni Yeremia gbalɛ lɛ tsɔɔ, yɛ bɔ ni Yehowa baatsu saji ahe nii eha ŋmɛnɛ lɛ he? Nyɛhaa wɔkwɛa.
5, 6. (a) Kɛjɛ 1914 kɛbaa nɛɛ, mɛɛ gbɛ nɔ shihilɛ ni yɔɔ Kristendom lɛ tamɔ nɔ ni hi Yuda dani ehiɛkpatamɔ lɛ ba lɛ? (b) Mɛɛ shɛɛ sane ŋmɛnɛŋmɛnɛ beaŋ Yeremia kɛha Kristendom?
5 Ŋleshi akɔntaabulɔ kɛ jeŋ nilelɔ kpanaa, Bertrand Russell wie wiemɔ ko aaafee afii 40 ni eho nɛ akɛ: “Kɛjɛ 1914 kɛbaa nɛɛ, mɔ fɛɛ mɔ ni hiɛ yɔɔ bɔ ni nibii yaa nɔ yɛ je lɛŋ lɛ nɔ lɛ ehao waa yɛ nɔ ni amɛnaa ni tamɔ shɛɛ-mli-sane ko kɛ gbɛ ko ni aje gbɛ agba afɔ shi ni kɛ mɔ yaa osharai wuji amli lɛ he lɛ hewɔ.” German maŋ nɔkwɛlɔ nukpa Konrad Adenauer wie akɛ: “Shweshweeshwe shihilɛ kɛ toiŋjɔlɛ elaaje kɛjɛ gbɔmɛi ashihilɛ mli kɛjɛ 1914.”
6 Ŋmɛnɛ, nɔ ni ekadi nibii agbɛjianɔtoo ko naagbee ni baa ni tamɔ Yeremia gbii lɛ amli nɔ lɛ ji mɛi ni efeko nɔ ko lɛ ala babaoo ni afɔse ashwie shi, titri lɛ yɛ afii oha nɛɛ mli jeŋ tai enyɔ lɛ mli. Mɛi ni wuu nɛkɛ ta nɛɛ titri ji Kristendom mli maji ni kɛɔ akɛ amɛjaa Biblia lɛ mli Nyɔŋmɔ lɛ. Mɛɛ osatofeemɔ wulu nɛ! Ebɛ naakpɛɛ mɔ akɛ Yehowa tsu e-Dasefoi lɛ kɛtee amɛŋɔɔ, taakɛ wiemɔi ni yɔɔ Yeremia 25:5, 6 kɛɔ lɛ, akɛ: “Nyɛteŋ mɔ fɛɛ mɔ aku esɛɛ kɛjɛ egbɛ fɔŋ lɛ nɔ . . . ni nyɛkanyiɛa nyɔŋmɔi krokomɛi asɛɛ, ní nyɛsɔmɔ amɛ ní nyɛja amɛ, ni nyɛkɛ nyɛniji anaa nitsumɔi lɛ akawoa mimli la, ni mifeŋ nyɛ efɔŋ ko!”
7. Mɛɛ odaseyeli yɔɔ ni tsɔɔ akɛ Kristendom eku ehiɛ efɔ Yehowa kɔkɔbɔi lɛ anɔ?
7 Shi Kristendom mli maji lɛ kpaleee kɛbaaa. Amɛjie enɛ kpo kɛtsɔ afɔlei krokomɛi lolo ni amɛshã amɛha tawuu nyɔŋmɔ lɛ yɛ Korea kɛ Vietnam lɛ nɔ. Ni amɛyaa nɔ amɛkɛ shika haa gbele he jarayelɔi ni feɔ tawuu nibii lɛ. Kristendom mli maji lɛ titri ji mɛi ni kɛ shika ni shɛɔ dɔlai akpekpei toi akpei akpe kome ni akɛtsuɔ tawuu nifeemɔ he nii daa afi yɛ 1980 afii lɛ amli lɛ haa. Tawuu he shika ni U.S. Amerika pɛ efite kɛjɛ 1951 kɛbashi 1991 lɛ fe Amerika jarayeli nitsumɔi wuji lɛ fɛɛ asɛɛnamɔ diɛŋtsɛ yɛ shika gbɛfaŋ ni abua naa. Kɛjɛ be mli ni akaŋshii ni ka Anaigbɛbii kɛ Bokagbɛbii ateŋ ni awie he aahu lɛ ba naagbee nɛɛ, atse nuklea tawuu nii ni be eho lɛ ayifalɛ nɔ, shi tawuu nii ni yɔɔ gbeyei kwraa fe nine ni abua naa babaoo yɛ, ni aasaa aafee ehee. Gbi ko lɛ, ekolɛ akɛ enɛɛmɛi baatsu nii.
Kojomɔ ni Akɛshiɔ Kristendom Nɔyeli he ni Ŋmɛɔ Efɔŋ Gbɛ Lɛ
8. Mɛɛ gbɛ nɔ abaaha Yeremia 25:8, 9 mli wiemɔi lɛ aba mli yɛ Kristendom nɔ yɛ?
8 Agbɛnɛ nɔ ni Yehowa wie lolo yɛ Yeremia 25:8, 9 lɛ kɔɔ Kristendom, ni ehiii shi yɛ Kristofoi ajalɛ taomɔ nii anaa lɛ he tɛɛ diɛŋtsɛ: “No hewɔ lɛ bɔ ni Yehowa Zebaot kɛɛ nɛ: ‘Akɛni nyɛbooo miwiemɔi lɛ atoi hewɔ lɛ, naa, matsu ni ayaŋɔ kooyigbɛ wekui lɛ fɛɛ kɛba,’ Yehowa kɛɛ, ‘kɛ Babel maŋtsɛ Nebukadnezar, mitsulɔ lɛ, ni mikɛ amɛ aaaba nɛkɛ shikpɔŋ nɛɛ kɛ emlibii kɛ jeŋmaji ni bɔle ehe nɛɛ fɛɛ nɔ, ni mafee amɛ musu, ni mafee amɛ amaŋfɔ kɛ nɔ ni haa aboɔ tsia kɛ naanɔ olɛŋlɛ.’ ” No hewɔ lɛ amanehulu kpeteŋkpele lɛ baaje shishi kɛaajɛ mɛi ni kɛɔ akɛ Nyɔŋmɔ webii ji amɛ, ni ji Kristendom nɔ, ni yɛ naagbee lɛ ebaakpele shikpɔŋ muu lɛ fɛɛ nɔ, kɛyashɛ ‘jeŋmaji ni ebɔle amɛhe lɛ anɔ.’
9. Mɛɛ gbɛi anɔ Kristendom mumɔŋ shihilɛ lɛ efite kwraa yɛ wɔbe nɛɛ mli yɛ?
9 Be shɛ ni abuɔ Biblia lɛ waa yɛ Kristendom, beni abuɔ gbalashihilɛ kɛ weku shihilɛ yɛ jeŋ fɛɛ akɛ miishɛɛnamɔ jɛɛhe, beni gbɔmɛi teɔ shi mra ni amɛnaa miishɛɛ yɛ amɛ daa gbi nitsumɔ mli lɛ. Mɛi pii kɛ Nyɔŋmɔ Wiemɔ lɛ kanemɔ kɛ ekasemɔ gbɛkɛ kɛ kane ni asu jɔɔ amɛhe. Shi ŋmɛnɛ, bɔlɛnamɔ jeŋba shara, gbala-mlitsemɔ, tsofai fɔji kɛ nitsumɔ kɛ daatɔɔ, efɔŋ feemɔ, hiɛjoomɔ, hejɔ-feemɔ yɛ nitsumɔ mli, mɛi ni TV kwɛmɔ eka amɛhe, kɛ efɔŋ feemɔi krokomɛi efite shihilɛ kɛyashɛ he ni efaa mɔ tsui diɛŋtsɛ. Enɛɛmɛi ji nibii ni tsɔɔ hiɛkpatamɔ ni Yehowa Nyɔŋmɔ miihe ekɛba Kristendom ni ŋmɛɔ nɔ fɛɛ nɔ feemɔ gbɛ lɛ nɔ lɛ hiɛ.
10. Tsɔɔmɔ bɔ ni Kristendom shihilɛ baafee yɛ Yehowa kojomɔi lɛ ahe nitsumɔ sɛɛ.
10 Yehowa jajeɔ, taakɛ wɔkaneɔ yɛ Yeremia yitso 25, kuku 10 kɛ 11 lɛ akɛ: “Ni asaŋ maha nyamɔ kɛ miishɛɛ gbee kɛ ayemforo wu kɛ ayemforo gbee, wiɛ gbɛɛmɔ kɛ kane kpɛmɔ alaaje yɛ amɛteŋ. Ni nɛkɛ shikpɔŋ nɛɛ fɛɛ aaatsɔ olɛŋlɛ kɛ amaŋfɔ.” Ebaafee naakpɛɛ nii lɛlɛŋ beni aaana ni Kristendom sɔlemɔtsui wuji kɛ emaŋtsɛmɛi awei fɛfɛji lɛ fɛɛ ekumɔ eshwie shi shwɛtɛɛ lɛ. Nɛkɛ hiɛkpatamɔ nɛɛ baaya shɔŋŋ kɛyashɛ nɛgbɛ? Yɛ Yeremia bei lɛ amli lɛ, Yuda kɛ maji ni ebɔle amɛhe lɛ ahiɛkpatamɔ lɛ hi shi afii 70, nɔ ni Lala 90:10 tsɔɔ akɛ eji wɔ afii amli gbii lɛ. Yehowa fɔbuu kojomɔ ni baa ŋmɛnɛ lɛ baamua nɔ fɛɛ nɔ naa, eji naanɔ nɔ̃.
Kojomɔ ni Akɛbaa Babilon Kpeteŋkpele lɛ Nɔ
11. Namɛi akɛbaatsu nii yɛ Kristendom hiɛkpatamɔ lɛ mli? Mɛni hewɔ?
11 Taakɛ agba afɔ shi yɛ Kpojiemɔ 17:12-17 lɛ, be baashɛ ni Yehowa baaje enaakpɛɛ nifeemɔi lɛ ashishi kɛtsɔ “akolontoi nyɔŋma lɛ”—Jeŋmaji Ekomefeemɔ lɛ mlibii ni kɛ tawuu nii ewula amɛhe lɛ atsuii amli ni akɛ sane baawo lɛ nɔ—“koni amɛfee eyiŋtoo nii lɛ” ni ji jeŋ apasa jamɔ maŋtsɛyeli lɛ hiɛkpatamɔ lɛ. Shi mɛɛ gbɛ nɔ enɛ aaatsɔ aba? Gbɛi sɔrɔtoi pii yɛ ni “akolontoi nyɔŋma lɛ” ni yɔɔ Kpojiemɔ yitso 17 lɛ baanyɛ atsɔ nɔ, koni yɛ kuku 16 lɛ mli wiemɔi lɛ anaa lɛ, “aaanyɛ ajwamaŋ lɛ . . . ni amɛkɛ la aaasha lɛ.” Eji anɔkwale akɛ nuklea tawuu nii egbɛ eshwa ni eegbɛ eeshwa ni aafee hu yɛ hei ni abaanyɛ akɛwuu ta yɛ, yɛ shikpɔŋ lɛ nɔ. Shi esa akɛ wɔmɛ ni wɔkwɛ bɔ ni Yehowa kɛbaawo maŋkwramɔŋ nɔyelɔi lɛ atsuiŋ aha koni amɛtsu oweletɔɔ ni ekɛbaa lɛ he nii lɛ.
12. (a) Mɛni ba Babilon nɔ beni ekpata Yerusalem hiɛ lɛ sɛɛ? (b) Mɛni baaba jeŋmaji lɛ anɔ yɛ Kristendom hiɛkpatamɔ lɛ sɛɛ?
12 Ebashɛ Babilon nɔ yɛ blema bei lɛ amli akɛ Yehowa mlifu ni naa wa lɛ aaaba enɔ. No hewɔ lɛ, kɛjɛ Yeremia yitso 25, kuku 12 kɛyaa lɛ, gbalɛ lɛ kwɛ saji yɛ sɛɛ mli shihilɛ ko ni tsake lɛ naa. Akɛni akɛ lɛ tsuuu nii akɛ Yehowa Blafo dɔŋŋ hewɔ lɛ, Nebukadnezar kɛ Babilon ebafata jeŋmaji lɛ ahe agbɛnɛ. Enɛ tamɔ shihilɛ ni yɔɔ ŋmɛnɛ lɛ pɛpɛɛpɛ. “Akolontoi nyɔŋma lɛ” ni yɔɔ Kpojiemɔ yitso 17 lɛ baafee apasa jamɔ amaŋfɔ, shi yɛ sɛɛ mli lɛ abaakpata amɛ fɛɛ amɛhiɛ kɛ “shikpɔŋ lɛ nɔ maŋtsɛmɛi” krokomɛi lɛ fɛɛ, taakɛ atsɔɔ mli yɛ Kpojiemɔ yitso 19 lɛ. Yeremia 25:13, 14 tsɔɔ bɔ ni Babilon kɛ “jeŋmaji fɛɛ” ni amɛshishiu Yehowa webii lɛ baa kojomɔ mli. Yehowa kɛ Nebukadnezar etsu nii ni ekɛgbala Yuda toi. Shi lɛ kɛ sɛɛ mli Babilon maŋtsɛmɛi fɛɛ kɛ hepupuumɔ hole amɛhe nɔ amɛshi Yehowa, akɛ nɔkwɛmɔ nɔ lɛ, taakɛ akɛ Yehowa sɔlemɔwe nibii lɛ abulemɔ fee he mfoniri lɛ. (Daniel 5:22, 23) Ni beni Babilonbii lɛ kpata Yerusalem hiɛ lɛ, jeŋmaji ni bɛŋkɛ Yuda—Moab, Amon, Tiro, Edom, kɛ maji krokomɛi lɛ—nyá kɛ mlifilimɔ ni amɛye Nyɔŋmɔ webii ahe fɛo. Amɛ hu amɛbaana amɛ nifeemɔ lɛ he nyɔmɔwoo ni sa amɛ kɛjɛ Yehowa dɛŋ.
Kojomɔ ni Akɛbaa “Jeŋmaji Fɛɛ” Nɔ
13. Mɛni wiemɔ ni ji “nɛkɛ mlifu wein kpulu nɛɛ” tsɔɔ, ni mɛni baaba mɛi ni nuɔ kpulu nɛɛ anɔ?
13 No hewɔ lɛ, Yeremia jajeɔ yɛ yitso 25, kukuji 15 kɛ 16 akɛ: “Bɔ ni Yehowa, Israel Nyɔŋmɔ lɛ kɛɛ mi nɛ: ‘Hemɔ nɛkɛ mlifu wein kpulu nɛɛ yɛ midɛ̃, ni oha jeŋmaji fɛɛ ni mitsuɔo amɛŋɔɔ lɛ anu, ni amɛnu ni amɛdidaa ni amɛye sɛkɛ yɛ klante ni mibatsu kɛba amɛteŋ lɛ hewɔ!’ ” Mɛni hewɔ eji ‘Yehowa mlifu wein kpulu’ lɛ? Yesu wie “kpulu” ko he yɛ Mateo 26:39, 42 kɛ Yohane 18:11 akɛ efeɔ nɔ ni ji Nyɔŋmɔ suɔmɔnaa nii kɛha lɛ lɛ he mfoniri. Nakai nɔŋŋ hu akɛ kpulu feɔ nɔ ni ji Yehowa suɔmɔnaa nii kɛha jeŋmaji lɛ akɛ amɛnu ŋwɛi oweletɔɔ lɛ he mfoniri. Yeremia 25:17-26 tsiɔ nɛkɛ jeŋmaji akui ni feɔ jeŋmaji ni yɔɔ ŋmɛnɛ lɛ ahe mfoniri lɛ ata.
14. Taakɛ Yeremia gbalɛ lɛ tsɔɔ lɛ, namɛi nuɔ Yehowa mlifu wein kpulu lɛ mli nii lɛ eko, ni enɛ feɔ mɛni he mfoniri kɛha wɔgbi nɛɛ?
14 Beni áfee Kristendom ‘musu, ni afee lɛ amaŋfɔ kɛ nɔ ni haa aboɔ tsia kɛ loomɔ’ tamɔ Yuda sɛɛ lɛ, agbɛnɛ hiɛkpatamɔ yɛ ni miimɛ jeŋ apasa jamɔ maŋtsɛyeli muu lɛ fɛɛ. No sɛɛ lɛ, esa akɛ jeŋ muu lɛ fɛɛ, ni akɛ Mizraim fee he mfoniri lɛ anu Yehowa mlifu wein kpulu lɛ eko! Hɛɛ, “kooyigbɛ maŋtsɛmɛi lɛ fɛɛ, mɛi ni bɛŋkɛ kɛ mɛi ni yɔɔ shɔŋŋ lɛ fɛɛ, kɛ shikpɔŋ lɛ nɔ maŋtsɛyelii fɛɛ ni yɔɔ shikpɔŋ lɛ nɔ lɛ” baanu eko. Ni yɛ naagbee lɛ, “Sheshak maŋtsɛ lɛ aaanu.” Ni namɔ ji nɛkɛ “Sheshak maŋtsɛ” nɛɛ? Sheshak ji okadi gbɛi, teemɔŋ gbɛi kɛha Babilon. Taakɛ Satan ji Babilon nɔ maŋtsɛ ni anaaa lɛ lɛ, nakai nɔŋŋ eji “je lɛŋ lumɔ” kɛbashi ŋmɛnɛ, taakɛ Yesu tsɔɔ lɛ. (Yohane 14:30) No hewɔ lɛ, Yeremia 25:17-26 kɛ Kpojiemɔ yitsei 18 kɛyashi 20 yeɔ egbɔ pɛpɛɛpɛ yɛ bɔ ni ato nibii ni baaba lɛ naa aha lɛ mlitsɔɔmɔ mli, beni akɛ Yehowa mlifu kpulu lɛ hoɔ lɛ. Klɛŋklɛŋ lɛ, esa akɛ akpata jeŋ apasa jamɔ maŋtsɛyeli lɛ hiɛ, kɛkɛ lɛ maŋkwramɔŋ hewalɛi lɛ baanyiɛ sɛɛ, kɛkɛ lɛ akɛ Satan diɛŋtsɛ ewo bu kwɔŋkwɔŋ lɛ mli.—Kpojiemɔ 18:2; 19:19-21; 20:1-3.
15. Mɛni baaba kɛji anu “toiŋjɔlɛ kɛ shweshweeshwe” shihilɛ bolɔmɔ lɛ he?
15 Kɛjɛ be mli ni akɛɛ Anaigbɛbii kɛ Bokagbɛbii ateŋ akaŋshii lɛ ba naagbee, ni jeŋ hewalɛ kome pɛ eshwɛ nɛɛ, awie toiŋjɔlɛ kɛ shweshweeshwe shihilɛ he babaoo. Ni taakɛ awie yɛ Kpojiemɔ 17:10 lɛ, ja nakai jeŋ hewalɛ lɛ, ni ji kooloo lɛ yitso ni gbeɔ yi feɔ kpawo lɛ “ehi shi fioo.” Shi nakai ‘be fioo’ lɛ miibɛŋkɛ enaagbee. Etsɛŋ ni maŋkwramɔŋ bolɔmɔi fɛɛ akɛ “hejɔlɛ yɛ ni wɔyɛ shweshweeshwe” lɛ baatsɔ ‘hiɛkpatamɔ ni baa trukaa’ aha amɛ. Nakai ji bɔ ni bɔfo Paulo wie.—1 Tesalonikabii 5:2, 3.
16, 17. (a) Kɛji mɔ ko ka akɛ eeejo Yehowa kojomɔ lɛ naa foi lɛ, mɛni baaba? (b) Mɛɛ hiɛkpatamɔ gbɛ nɔ etsɛŋ ni Yehowa suɔmɔnaa nii baaba mli, yɛ shikpɔŋ nɛɛ nɔ?
16 Esa akɛ Satan jeŋ gbɛjianɔtoo muu lɛ fɛɛ, ni jeɔ shishi kɛjɛɔ Kristendom nɔ lɛ, anu Yehowa oweletɔɔ kpulu lɛ mli nu lɛ. Efamɔ kroko ni ekɛha Yeremia, ni yɔɔ yitso 25, kukuji 27 kɛyashi 29 lɛ yeɔ enɛ he odase: “Ni okɛɛ amɛ akɛ: ‘Bɔ ni Yehowa Zebaot, Israel Nyɔŋmɔ lɛ kɛɛ nɛ: “Nyɛnua, ni nyɛtɔrɔa, ni nyɛshwea, ni nyɛgbeegbeea shi, ni nyɛkate shi dɔŋŋ yɛ klante ni mibatsu kɛba nyɛteŋ lɛ hewɔ.’ ” Ni aaaba mli akɛ, kɛ amɛkpɛlɛɛɛ akɛ amɛaahe kpulu lɛ yɛ odɛŋ amɛnu lɛ, okɛɛ amɛ akɛ: ‘Bɔ ni Yehowa Zebaot kɛɛ nɛ: “Nu kɛ̃ nyɛaanu! Ejaakɛ naa, mije shishi mifee maŋ ni aŋɔ migbɛi awo lɛ lɛ efɔŋ, ni nyɛ ni nyɛaaŋɔ nyɛhe nyɛye kwraa lo?” ’ “ ‘Nyɛŋɔŋ nyɛhe nyɛyeŋ, shi moŋ matsɛ klante kɛaaba shikpɔŋ lɛ nɔ bii fɛɛ nɔ,’ Yehowa Zebaot kɛɛ.”
17 Wiemɔi ni mli tsiitsii—diɛŋtsɛ nɛ, wiemɔi ni haa ŋmiŋmi mɔɔ mɔ, ejaakɛ Jeŋ Muu Fɛɛ Nuŋtsɔ Maŋtsɛ Yehowa Nyɔŋmɔ wie. Eto etsui shi aahu afii akpei abɔ yɛ musubɔɔ wiemɔi, ahorabɔɔ, kɛ hetsɛ ni ana aha egbɛi krɔŋkrɔŋ lɛ fɛɛ sɛɛ. Shi agbɛnɛ be eshɛ ni ebaaha sɔlemɔ ni esuɔmɔ Bi, Yesu Kristo tsɔɔ ekaselɔi lɛ beni eyɔɔ shikpɔŋ nɛɛ nɔ lɛ hetoo: “No hewɔ lɛ nyɛsɔlea nɛkɛ: ‘Wɔ-Tsɛ ni yɔɔ ŋwɛi, ha ogbɛi lɛ he atse. Ha omaŋtsɛyeli lɛ aba. Ha afee osuɔmɔnaa nii yɛ shikpɔŋ nɔ hu, taakɛ afeɔ yɛ ŋwɛi lɛ.’ ” (Mat. 6:9, 10, New World Translation) Eji Yehowa suɔmɔnaa nii akɛ Yesu aaatsu nii akɛ E-klante yɛ oweletɔɔ he nitsumɔ mli.
18, 19. (a) Namɔ ta okpɔŋɔ nɔ kɛyaaye kunim yɛ Yehowa gbɛi amli lɛ, ni mɛni emɛɔ dani egbe ekunimyeli lɛ naa? (b) Kɛ ŋwɛibɔfoi lɛ ŋmɛɛ Yehowa mlifu kɔɔyɔɔ ni naa wa lɛ ahe lɛ, mɛɛ gbeyei nibii baaba shikpɔŋ lɛ nɔ?
18 Wɔkaneɔ klɛŋklɛŋ kwraa yɛ Kpojiemɔ yitso 6, akɛ Yesu ta okpɔŋɔ yɛŋ ko nɔ ‘koni eyaye kunim ni egbe ekunimyeli lɛ naa.’ (Kuku 2) Enɛ je shishi beni akɛ lɛ ta maŋtsɛsɛi nɔ akɛ ŋwɛi Maŋtsɛ yɛ 1914 lɛ. Okpɔŋɔi kɛ okpɔŋɔ-nɔtaralɔi krokomɛi nyiɛ esɛɛ, ni enɛ tsɔɔ jeŋ muu fɛɛ ta, hɔmɔ, kɛ tsɛŋemɔ-hela ni ehao wɔshikpɔŋ nɛɛ kɛjɛ nakai be lɛ mli lɛ. Shi mɛɛ be basabasa-feemɔi nɛɛ fɛɛ baaba naagbee? Kpojiemɔ yitso 7 bɔɔ wɔ amaniɛ akɛ ŋwɛibɔfoi ejwɛ “hiɛ shikpɔŋ lɛ nɔ kɔɔyɔi ejwɛ lɛ mli” waa kɛyashi be mli ni aaagbe mumɔŋ Israel kɛ asafo babaoo ni jɛ jeŋmaji fɛɛ mli lɛ anaabuamɔ kɛha yiwalaheremɔ lɛ naa. (Kuku 1) Kɛkɛ lɛ mɛni?
19 Yeremia yitso 25, kukuji 30, kɛ 31 yaa nɔ akɛ: “ ‘Yehowa aaajɛ ŋwɛi ahũu, ni eeewo egbee kɛaajɛ eshihilɛ he krɔŋkrɔŋ lɛ, eeehũu waa ewo ekooloi alɛɛhe lɛ; eeebɔ oshe ewo shikpɔŋ lɛ nɔ bii fɛɛ tamɔ weinŋalɔi anɔ! Gbɛɛmɔ aaayashɛ shikpɔŋ lɛ naagbee he tɔɔ, ejaakɛ Yehowa kɛ jeŋmaji lɛ ena, ekɛ heloo fiaa baakojo: mɛi fɔji lɛ, eeeŋɔ amɛ eha klante,’ Yehowa kɛɛ.” Jeŋmaŋ ko ejoŋ Yehowa mlifu kpulu nɛɛ numɔ naa foi. No hewɔ lɛ ehe miihia waa ni mɛi ni hiɛ tsuijurɔ lɛ fɛɛ atsi amɛhe kɛjɛ jeŋmaji lɛ anɔ fɔŋ feemɔ lɛ he dani ŋwɛibɔfoi ejwɛ lɛ aŋmɛɛ Yehowa mlifu ni tamɔ ahum ni tswaa lɛ he. Eji ahum kpeteŋkpele diɛŋtsɛ, ejaakɛ Yeremia gbalɛ lɛ yaa nɔ yɛ kukuji 32 kɛ 33 akɛ:
20. Mɛɛ nɔ ko ni baaba maa bɔ ni Yehowa kojomɔ lɛ mli wa ha lɛ nɔ mi, shi mɛni hewɔ nifeemɔ nɛɛ he hiaa lɛ?
20 “Bɔ ni Yehowa Zebaot kɛɛ nɛ: ‘Naa, efɔŋ aaajɛ jeŋmaŋ nɔ aya jeŋmaŋ nɔ, ni ahum kpeteŋkpele aaate shi kɛaajɛ shikpɔŋ lɛ naagbee he tɔɔ. Ni mɛi ni Yehowa aaagbe yɛ nakai gbi lɛ nɔ lɛ aaakamɔ shi kɛaajɛ shikpɔŋ lɛ naagbee he kome kɛaatee shikpɔŋ lɛ naagbee he kroko lɛ; afeŋ amɛ yara, abuaŋ amɛ naa, ni asaŋ afuŋ amɛ. Amɛaatsɔ tumu yɛ shikpɔŋ lɛ nɔ.’ ” Lɛlɛŋ, eji nɔ ko ni baafee gbeyei waa, shi ehe miihia hu, bɔni afee ni akɛtsuu shikpɔŋ lɛ he kɛjɛ efɔŋ feemɔ fɛɛ he dani akɛ Paradeiso ni Nyɔŋmɔ ewo shi lɛ aba.
Tookwɛlɔi Aaawo Lele ni Amɛaabolɔ
21, 22. (a) Namɛi ji Israel “tookwɛlɔi” ni awie amɛhe yɛ Yeremia 25:34-36 lɛ, ni mɛni hewɔ anyɛ amɛnɔ ni amɛwo lele lɛ? (b) Mɛɛ ŋmɛnɛŋmɛnɛ beaŋ tookwɛlɔi sa Yehowa mlifu, ni mɛni hewɔ amɛsa nakai kɛmɔ shi lɛ?
21 Kukuji 34 kɛyashi 36 lɛ wieɔ Yehowa kojomɔ he lolo akɛ: “Nyɛwoa lele ko, nyɛ tookwɛlɔi, ni nyɛbolɔa ni nyɛkokoloa shi yɛ lamlu mli nyɛ tooi lɛ amli ekpakpai; ejaakɛ nyɛgbee gbii lɛ eshɛ, ni majwara nyɛ wɔtsɔwɔtsɔ, ni nyɛaagbeegbee shi tamɔ shɔ̃ɔ nɔ̃ ni jara wa! Ni foijee aaalaaje tookwɛlɔi lɛ, ni tooi lɛ amli ekpakpai lɛ naŋ gbɛ aje mli. Aaanu tookwɛlɔi lɛ abolɔmɔ kɛ tooi lɛ amli ekpakpai lɛ alelewomɔ! Ejaakɛ Yehowa efite amɛlɛɛhei lɛ.”
22 Namɛi ji tookwɛlɔi nɛɛ? Amɛjeee jamɔ mli hiɛnyiɛlɔi lɛ, ni Yehowa mlifu etɔ amɛ dãa momo lɛ. Amɛji tawuu mli tookwɛlɔi lɛ, ni atsɔɔ bɔ ni amɛji hu yɛ Yeremia 6:3, ni buaa amɛ asraafoi anaa kuikui amɛkɛtseɔ Yehowa hiɛ atua lɛ. Amɛji maŋkwramɔŋ nɔyelɔi lɛ, ní amɛtsɔ mɛi ni amɛyeɔ amɛnɔ lɛ anɔ amɛna nii babaoo lɛ. Mɛnɛɛmɛi ateŋ mɛi pii ji nitsumɔ mli kɛ maŋkwramɔŋ shishiulɔi, mɛi ni he esa yɛ shishiumɔ mli. Amɛyɛ shɔɔ yɛ hɔmɔ ni egbe gbɔmɛi babaoo yɛ maji ni naagbai yɔɔ nɔ lɛ ni amɛaatsu he nɔ ko lɛ mli. Amɛhaa “tooi lɛ amli ekpakpai lɛ” naa nii babaoo, tamɔ jarayelɔi kpanakui ni hɔɔ tawuu nii lɛ kɛ mɛi ni kɛ hiɛjoomɔ fiteɔ wɔshikpɔŋ lɛ kɛ nibii ni yɔɔ nɔ lɛ, yɛ be mli ni amɛsumɔɔɔ ni amɛyeɔ amɛbuaa kɛ tsofai kɛ niyenii ni haa hewalɛ ni jara waaa hu ni amɛkɛaaha koni akɛhere gbekɛbii akpekpei nyɔŋmai abɔ ni gboiɔ lɛ ayiwala lɛ.
23. Tsɔɔmɔ bɔ ni Satan nɔyeli he lɛ shihilɛ baafee yɛ Yehowa hiɛkpatamɔ nifeemɔi lɛ asɛɛ.
23 Ebɛ naakpɛɛ mɔ akɛ Yeremia yitso 25 lɛ mu sane naa yɛ kukuji 37 kɛ 38, kɛtsɔ nɔ ni ewie yɛ mɛi ni kɛ pɛsɛmkunya taoɔ toiŋjɔlɛ amɛhaa amɛ pɛ amɛhe nɛɛ nɔ, akɛ: “Ni hejɔlɛ shihilɛ hei lɛ efite yɛ Yehowa mlifu ni naa wa lɛ hewɔ. Eshi ebuu lɛ efɔ shi tamɔ jata, ni amɛshikpɔŋ lɛ etsɔ amaŋfɔ yɛ yiwalɛ klante lɛ hiɛ, kɛ emlifu ni naa wa lɛ hewɔ.” Eyɛ naakpɛɛ diɛŋtsɛ! Ni kɛlɛ, Yehowa baajie emlifu ni tsoɔ tamɔ la lɛ kpo kɛtsɔ Mɔ ni atsɔɔ bɔ ni eji yɛ Kpojiemɔ 19:15, 16 akɛ “maŋtsɛmɛi a-Maŋtsɛ kɛ nuŋtsɔmɛi a-Nuŋtsɔ” ni kɛ dadetso kpalaa jeŋmaji fɛɛ lɛ nɔ. Ni mɛni nyiɛɔ sɛɛ baa?
24. Mɛɛ jɔɔmɔi apasa jamɔ kɛ Satan jeŋ ni eshwɛ lɛ fɛɛ hiɛkpatamɔ lɛ kɛbaaba abaha adesai jalɔi?
24 Ani ohi shi kɛtsɔ ahum kpeteŋkpele loo lasuogbele mli dã? Ebaanyɛ efee niiashikpamɔ ni yɔɔ gbeyei. Shi enɔ leebi lɛ, eyɛ mli akɛ obaana bɔ ni nibii efite eha yɛ he fɛɛ he moŋ, shi efɔɔ kaa akɛ kɔɔyɔɔ mli tseɔ ni nɔ fɛɛ nɔ feɔ dioo ni ehaa mɔ he jɔɔ lɛ aahu akɛ obaanyɛ oda Yehowa shi yɛ gbi ni hi jogbaŋŋ ni ekaaa nɛɛ hewɔ. Nakai nɔŋŋ hu yɛ be mli ni amanehulu kpeteŋkpele lɛ mli ahum ni tswaa lɛ naa eba shi lɛ, obaanyɛ okwɛ shikpɔŋ lɛ kɛkpe kɛ shidaa akɛ oyɛ wala mli ni ofee klalo akɛ okɛ ohe baawo Yehowa nitsumɔ ni yɔɔ ni ji shikpɔŋ ni atsuu nɔ lɛ ni aaatsake lɛ afee lɛ anunyam paradeiso lɛ mli. No mli lɛ akɛ béi ni Yehowa kɛ jeŋmaji lɛ na lɛ eba naagbee yɛ kunimyeli mli, etsuu egbɛi lɛ he ni egbele gbɛ koni afee esuɔmɔnaa nii yɛ shikpɔŋ lɛ nɔ yɛ Mesia Maŋtsɛyeli lɛ Afii Akpe Nɔyeli lɛ shishi. Nakai Maŋtsɛyeli lɛ aba!
Mlitii kɛha nikasemɔ nɛɛ kukuji 5-24
◻ Mɛɛ Kristendom osatofeemɔ gbɛi eba kojomɔ mli bianɛ?
◻ Mɛɛ kojomɔ hesusumɔ ni mli lɛɛ akɛha yɛ Yeremia 25:12-38?
◻ Mɛɛ oweletɔɔ kpulu ko akɛhaa jeŋmaji lɛ fɛɛ ni amɛnu?
◻ Namɛi ji tookwɛlɔi ni woɔ lele ni amɛbolɔɔ lɛ, ni mɛni hewɔ amɛhao lɛ?
[Mfoniri ni yɔɔ baafa 18]
Yehowa ehala dɛŋdade kɛha Kristendom hiɛkpatamɔ
[Mfoniri ni yɔɔ baafa 23]
Yɛ amanehulu kpeteŋkpele lɛ ahum lɛ sɛɛ lɛ, shikpɔŋ ni atsuu nɔ baapue