Ani Daa Gbi Lɛ Obiɔ Akɛ, “Nɛgbɛ Yehowa Yɔɔ?”

1, 2. (a) Te Yeremia beaŋ Yudafoi lɛ amumɔŋ shidaamɔ yɔɔ tɛŋŋ? (b) Kulɛ, te esa akɛ Yudafoi lɛ afee amɛnii amɛha tɛŋŋ?

YEREMIA fó. Shihilɛ ni emaŋbii lɛ yɔɔ mli, kɛ nɔ̃ ni Nyɔŋmɔ ha egba kɛkɔ amɛwɔsɛɛ he lɛ hewɔ efó lɛ. Ená ni kulɛ eyitsoŋ lɛ nu bu ni, ni ehiŋmɛii hu lɛ nu hiŋmɛii ni, koni ekafɔ̃ɔ yaafo. Shihilɛ ni Yeremia maŋ lɛ yaje mli lɛ hewɔ lɛ, eyɛ yiŋtoo hewɔ ni ewoɔ yara. (Yer. 9:1-3; nyɛkanea Yeremia 8:20, 21.) Yudafoi lɛ tee nɔ amɛkpoo Nyɔŋmɔ mla lɛ, ni amɛbooo Yehowa gbee toi, no hewɔ lɛ, efɔŋ baaba amɛnɔ.—Yer. 6:19; 9:13.

² Yudafoi lɛ eyanuuu nii ahe taakɛ Yeremia nu he lɛ; amɛkɛ amɛjwɛŋmɔ eyaaa bɔ ni Yehowa naa amɛjeŋba ehaa lɛ nɔ, moŋ lɛ, amɛsumɔɔ ni amɛbo amɛjamɔŋ hiɛnyiɛlɔi ni kɛɔ amɛ akɛ “omanye, omanye” lɛ atoi. (Yer. 5:31; 6:14) Amɛtamɔ helatsɛmɛi ni miitao datrɛfonyo ni baaku ehiɛ eshwie okadii ni tsɔɔ akɛ amɛhe miiye lɛ anɔ, ni ekɛɛ amɛ nibii ni baaŋɔɔ amɛtoii anaa. Kɛ́ ohe miiye waa lɛ, ani osumɔŋ ni atsɔɔ bo nɔ̃ hela tuuntu ni yeɔ bo lɛ koni atsa bo dani nu afe mã? Yɛ mumɔŋ shishinumɔ naa lɛ, kulɛ esa akɛ Yudafoi ni hi shi yɛ Yeremia gbii lɛ amli lɛ ajɛ amɛtsuiiaŋ amɛtao bɔ ni Yehowa naa amɛ ehaa diɛŋtsɛ. Kulɛ, esa akɛ amɛbi akɛ: “Nɛgbɛ Yehowa yɔɔ?”—Yer. 2:6, 8.

 3. (a) Mɛni kɛ́ Yudafoi lɛ fee lɛ, no baatsɔɔ akɛ amɛmiibi akɛ, “Nɛgbɛ Yehowa yɔɔ?” (b) Mɛɛ gbɛ kome nɔ Yudafoi lɛ baanyɛ atsɔ atao Yehowa sɛɛgbɛ?

³ Kɛ́ Yudafoi lɛ miikpɛ amɛyiŋ yɛ saji wuji kɛ saji bibii ahe, ni amɛtao gbɛtsɔɔmɔ kɛjɛ Nyɔŋmɔ ŋɔɔ lɛ, no baatsɔɔ akɛ amɛmiibi akɛ, “Nɛgbɛ Yehowa yɔɔ?” Yudafoi ni hi shi yɛ Yeremia beaŋ lɛ eyafeee nakai. Shi, taakɛ nɔ̃ ni agba lɛ tsɔɔ lɛ, Yerusalem amaŋfɔfeemɔ lɛ sɛɛ lɛ, Yudafoi lɛ baaku amɛsɛɛ kɛjɛ Babilon kɛba, ni ‘amɛaatao Yehowa sɛɛgbɛ.’ Nakai ni amɛaafee lɛ baaha amɛnyɛ amɛna lɛ, ni amɛbaale egbɛi lɛ. (Nyɛkanea Yeremia 29:13, 14.) Mɛɛ gbɛ nɔ amɛbaatsɔ amɛfee nakai? Gbɛ kome ji, amɛtsuiiaŋ ni amɛaajɛ amɛtsi amɛbɛŋkɛ Nyɔŋmɔ yɛ sɔlemɔ mli kɛbi edɛŋ gbɛtsɔɔmɔ. Nakai su ji nɔ̃ ni Maŋtsɛ David jie lɛ kpo. Ekɛɛ Nyɔŋmɔ akɛ: “Yehowa, tsɔɔmɔ mi ogbɛi lɛ, ha male otempɔŋi lɛ!” (Lala 25:4) Kadimɔ ninefɔɔ ni sɔlemɔ Toibolɔ lɛ tsɔ Yeremia nɔ ekɛha yɛ Maŋtsɛ Zedekia nɔyeli afi ni ji nyɔŋma lɛ mli lɛ. “Bolɔmɔ otsɛ mi, ni mahereo nɔ, ni majaje nibii wuji matsɔɔo kɛ nii ní aŋɔtee [loo onyɛŋ onu shishi] ní oleee!” (Yer. 33:3) Kɛ́ maŋtsɛ lɛ kɛ maŋ atuatselɔ lɛ tsɛ Nyɔŋmɔ lɛ, Nyɔŋmɔ baanyɛ atsɔɔ amɛ nibii ni ‘amɛnyɛŋ amɛnu shishi’ lɛ, ni ji afii 70 ni Yerusalem kɛaahi shi amaŋfɔ, kɛ eshishi ni aaato ekoŋŋ yɛ no sɛɛ lɛ.

4, 5. Mɛɛ gbɛi krokomɛi anɔ kulɛ Nyɔŋmɔ webii lɛ baanyɛ atsɔ atao Yehowa sɛɛgbɛ?

⁴ Gbɛ kroko ni Yudafoi lɛ baanyɛ atsɔ nɔ atao Yehowa sɛɛgbɛ ji, ni amɛpɛi yinɔsaji amli, ni agbɛnɛ hu, amɛsusu bɔ ni Yehowa kɛ ewebii lɛ yeɔ ehaa lɛ he. No hewɔ lɛ, kulɛ amɛbaanyɛ amɛjwɛŋ nibii ni baaha amɛná Nyɔŋmɔ hiɛ duromɔ kɛ nibii ni baaha emli afu amɛ lɛ anɔ. No mli lɛ, amɛyɛ woji ni Mose ŋmala lɛ kɛ yinɔsaji komɛi ni ajɛ mumɔŋ aŋmala, kɛ agbɛnɛ hu, Israel kɛ Yuda maŋtsɛmɛi lɛ ayinɔsaji awoji lɛ. Eji Yudafoi ni hi shi yɛ Yeremia beaŋ lɛ jwɛŋ saji ni yɔɔ woji nɛɛ amli lɛ anɔ, ni amɛbo Nyɔŋmɔ anɔkwa gbalɔi lɛ atoi kulɛ, no baaha amɛná hetoo kɛha sanebimɔ ni ji “Nɛgbɛ Yehowa yɔɔ?” lɛ.

⁵ Gbɛ ni ji etɛ ni kulɛ Yudafoi lɛ baanyɛ atsɔ nɔ atao Yehowa sɛɛgbɛ ji, ni amɛkase nii kɛjɛ nibii ni amɛkɛkpeɔ yɛ amɛshihilɛi amli, kɛ mɛi krokomɛi anɔ̃ lɛ amli. No etsɔɔɔ akɛ esa akɛ amɛka nɔ̃ fɛɛ nɔ̃ kwraa amɛkwɛ akɛ mɛni baajɛ mli aba, shi eji amɛsusu nibii ni amɛfee be ko ni eho, kɛ bɔ ni Yehowa na nifeemɔi nɛɛ eha lɛ ahe kulɛ, amɛbaanyɛ amɛná he sɛɛ. Eji amɛkɛ amɛhiɛ fɔ̃ shi kulɛ, amɛbaanu bɔ ni Nyɔŋmɔ na amɛjeŋba eha lɛ shishi.—Abɛi 17:10.

 6. Mɛni yɔɔ Hiob nɔkwɛmɔnɔ lɛ mli ni baanyɛ ashɛje omii?

⁶ Agbɛnɛ, nyɛhaa wɔkɛ sane lɛ abaa shĩa wɔkwɛa. Kɛ́ ookpɛ oyiŋ loo oosusu gbɛ ni esa akɛ okɔ he lɛ, ani ofɔɔ ohe bimɔ akɛ, “Nɛgbɛ Yehowa yɔɔ?” Mɛi komɛi baanu he akɛ amɛfɔɔɔ amɛhe sane nɛɛ bimɔ taakɛ bɔ ni kulɛ esa akɛ amɛfee lɛ. Kɛ́ yɛ gbɛ ko nɔ lɛ, nakai ji bɔ ni ebaa lɛ yɛ ogbɛfaŋ lɛ, kaaye otsui. Blematsɛ anɔkwafo Hiob po tsɔ shihilɛ ni tamɔ nɛkɛ mli. Beni eyaje nɔnyɛɛ shishi lɛ, efó lɛ pɛ enɔ mli. Ehe bahia ni Elihu akai lɛ adesai asu ko, no hewɔ lɛ ekɛɛ lɛ akɛ: “Mɔ ko kwraa ekɛɛɛ akɛ, ‘Nɛgbɛ Nyɔŋmɔ, mibɔlɔ lɛ yɔɔ?’” (Hiob 35:10, Ga Biblia hee) Elihu wo Hiob ŋaa akɛ: ‘Jwɛŋmɔ Mawu naakpɛɛ nitsumɔi lɛ ahe!’ (Hiob 37:14) No mli lɛ, esa akɛ Hiob kɛ ejwɛŋmɔ aya adebɔɔ nibii ni ebɔle lɛ lɛ, kɛ bɔ ni Nyɔŋmɔ kɛ adesai yeɔ ehaa lɛ anɔ, ni ebaana akɛ Yehowa etsu nitsumɔi kpelei. Kɛtsɔ Hiob diɛŋtsɛ niiashikpamɔ nɔ lɛ, ebanu Yehowa gbɛi lɛ ashishi. Beni Hiob efi shi yɛ haomɔ ni ekɛkpe lɛ mli, ni ena bɔ ni Yehowa tsu saji ahe nii eha lɛ sɛɛ lɛ, ekɛɛ akɛ: ‘Miwie nibii ni minuuu shishi, nibii ni amɛhe yɔɔ naakpɛɛ tsɔ̃ hã mi bɔ ni minuuu amɛshishi. Mitoi kɛkɛ mikɛnu ohe, shi agbɛnɛ mihiŋmɛi ena bo.’—Hiob 42:3, 5, Ga Biblia hee.

 7. Taakɛ mfoniri ni yɔɔ baafã 116 lɛ tsɔɔ lɛ, mɛni he wɔbaasusu yɛ sane ni nyiɛ sɛɛ lɛ mli?

⁷ Gbalɔ Yeremia tee nɔ etao Yehowa sɛɛgbɛ ni enyɛ ena lɛ. Afii nyɔŋmai abɔ ni Yeremia kɛ anɔkwayeli sɔmɔ lɛ fɛɛ mli lɛ, efeee enii tamɔ emaŋbii lɛ, shi etee nɔ ebi akɛ: “Nɛgbɛ Yehowa yɔɔ?” Yɛ kukuji ni eshwɛ yɛ yitso nɛɛ mli lɛ amli lɛ, wɔbaana bɔ ni Yeremia nɔkwɛmɔnɔ lɛ baaye abua wɔ kɛna bɔ ni wɔɔfee wɔtsɔ sɔlemɔ, nikasemɔ, kɛ wɔ diɛŋtsɛ wɔniiashikpamɔi anɔ wɔtao Yehowa sɛɛgbɛ koni wɔna lɛ.—1 Kron. 28:9.

 8. Mɛɛ shihilɛi amli Yeremia tsi ebɛŋkɛ Nyɔŋmɔ yɛ sɔlemɔ mli?

⁸ Afii ni Yeremia kɛsɔmɔ akɛ Nyɔŋmɔ naawielɔ kɛha Yuda maŋ lɛ fɛɛ mli lɛ, etao Yehowa sɛɛgbɛ kɛtsɔ etsuiŋ ni ejɛɔ esɔleɔ lɛ nɔ. Beni ehe bahia akɛ ekɛ saji komɛi ni mɛi nyaaa he aha, beni enu he akɛ enitsumɔ lɛ eje etsine, kɛ beni enaaa nɔ̃ hewɔ ni nibii komɛi yaa nɔ lɛ, etsi ebɛŋkɛ Nyɔŋmɔ yɛ sɔlemɔ mli kɛha yelikɛbuamɔ. Nyɔŋmɔ ha esɔlemɔ lɛ hetoo, ni etsɔɔ gbɛi anɔ ni Yeremia atsɔ atsu saji ahe nii. Susumɔ enɛ he nɔkwɛmɔnii fioo komɛi ahe okwɛ.

 9. (a) Te Yeremia tsɔɔ bɔ ni enuɔ he ehaa lɛ tɛŋŋ yɛ Yeremia 15:15, 16 lɛ, ni te Yehowa ye ebua lɛ eha tɛŋŋ? (b) Mɛni hewɔ osusuɔ akɛ ehe miihia ni ojie bɔ ni onuɔ he ohaa lɛ kpo yɛ osɔlemɔ mli lɛ?

⁹ Be ko beni akɛ kojomɔ sane ko ha Yeremia koni ejaje lɛ, enu he akɛ mɔ fɛɛ mɔ miibɔ lɛ ahora. No hewɔ lɛ, gbalɔ lɛ bi ni Nyɔŋmɔ akai lɛ. Susumɔ Yeremia sɔlemɔ ni aŋma yɛ Yeremia 15:15, 16 lɛ he okwɛ. (Nyɛkanea.) Nakai sɔlemɔ lɛ mli lɛ, etsɔɔ bɔ ni ehao kɛ bɔ ni enu yelikɛbuamɔ ni Yehowa kɛha lɛ yɛ no he lɛ he eha. Shi kɛ́ wɔɔkɛɛ lɛ, beni ena Nyɔŋmɔ wiemɔ lɛ ni ekɛwo edaaŋ lɛ, emii shɛ ehe naakpa! Yehowa ye ebua lɛ ni ehiɛ asɔ hegbɛ kpele ni ená akɛ ejaje Nyɔŋmɔ sane, ni ákɛ Nyɔŋmɔ gbɛ́i kã enɔ lɛ. Ekã shi faŋŋ akɛ, Yeremia bana he ni Yehowa damɔ yɛ sane nɛɛ mli. Mɛni wɔbaanyɛ wɔkase kɛjɛ enɛ mli?

10. Beni gbalɔ lɛ kɛɛ ewieŋ yɛ Nyɔŋmɔ gbɛ́i Yehowa lɛ anɔ dɔŋŋ lɛ, te Nyɔŋmɔ here lɛ nɔ eha tɛŋŋ?

¹⁰ Be kroko beni osɔfo Pashur, ni ji Imer bi lɛ, ha agwao Yeremia lɛ sɛɛ lɛ, Yeremia kɛɛ yɛ sɔlemɔ mli akɛ, ewieŋ yɛ Nyɔŋmɔ gbɛ́i Yehowa lɛ anɔ dɔŋŋ. Te Nyɔŋmɔ here Yeremia sɔlemɔ nɛɛ nɔ eha tɛŋŋ? (Nyɛkanea Yeremia 20:8, 9.) Biblia lɛ ekɛɛɛ wɔ akɛ Nyɔŋmɔ jɛ ŋwɛi ekɛ Yeremia wie kɛha lɛ hetoo. Shi, Nyɔŋmɔ wiemɔ lɛ tsɔ tamɔ la ni tsoɔ ni aŋa yi awo Yeremia wui amli, ni enyɛɛɛ naa etsi akɛ ja ejaje. Hɛɛ, Yeremia fɔse etsuiŋ eshwie Nyɔŋmɔ hiɛ yɛ sɔlemɔ mli, ni eha nɔ̃ ni ele yɛ Yehowa suɔmɔnaa nii he lɛ kudɔ lɛ, ni no ha ená ekãa ni etee nɔ efee Nyɔŋmɔ suɔmɔnaa nii.

11, 12. Beni Yeremia hao yɛ bɔ ni etamɔ nɔ̃ ni efɔŋfeelɔi yeɔ omanye lɛ he lɛ, mɛɛ gbɛ nɔ atsɔ aye abua lɛ?

¹¹ Beni Yeremia na bɔ ni nibii yaa lɛ jogbaŋŋ ehaa efɔŋfeelɔi lɛ, ehao waa. (Nyɛkanea Yeremia 12:1, 3.) Jeee akɛ gbalɔ lɛ miitsɔɔ akɛ Yehowa yeee jalɛsane, shi moŋ eetao ele nɔ̃ hewɔ ni nibii amli kpɛɔ ehaa efɔŋfeelɔi lɛ. Bɔ ni ewie ni eshiuuu sane nɔ lɛ tsɔɔ akɛ, ekɛ Nyɔŋmɔ teŋ yɛ jogbaŋŋ tamɔ bɔ ni eyɔɔ yɛ bi kɛ etsɛ ni yɔɔ suɔmɔ lɛ teŋ lɛ. Sane lɛ kɛkɛ ji, no mli lɛ Yeremia nuuu nɔ̃ hewɔ ni yɛ efɔŋ ni Yudafoi lɛ ateŋ babaoo feɔ lɛ fɛɛ sɛɛ lɛ, amɛshwereɔ lɛ shishi. Ani Yeremia ná hetoo ni ha etsui nyɔ emli? Yehowa wo lɛ shi akɛ, ebaafã efɔŋfeelɔi ashishi. (Yer. 12:14) Beni Yeremia na bɔ ni saji ni ekɛfɔ̃ Nyɔŋmɔ hiɛ yɛ sɔlemɔ mli lɛ anaa yakpa eha lɛ, no waje hekɛnɔfɔɔ ni eyɔɔ yɛ Nyɔŋmɔ jalɛsane lɛ mli lɛ. No hewɔ lɛ, ekã shi faŋŋ akɛ ebafee Yeremia su akɛ etsi ebɛŋkɛ Nyɔŋmɔ yɛ sɔlemɔ mli, ni efɔse etsuiŋ eshwie e-Tsɛ lɛ hiɛ.

¹² Beni Zedekia nɔyeli lɛ miihe aba naagbee, ni Babilonbii lɛ ewo Yerusalem he ka lɛ, Yeremia tsɔɔ mli akɛ Yehowa ji mɔ ko ni ‘hiŋmɛii kamɔ ha gbɔmɛi abii agbɛi fɛɛ, koni eha mɔ fɛɛ mɔ bɔ ni sa egbɛi kɛ enifeemɔ nii ayibii.’ (Yer. 32:19) Yeremia na akɛ Yehowa yeɔ jalɛsane lɛɛlɛŋ, ni ákɛ Nyɔŋmɔ miina nɔ̃ fɛɛ nɔ̃ ni mɔ aŋkro fɛɛ aŋkro feɔ, ni enuɔ sɔlemɔi ni etsuji jɛɔ amɛtsuiiaŋ amɛsɔleɔ lɛ. Ni beni be shwieɔ mli lɛ, etsuji lɛ naa odaseyelii ni tsɔɔ faŋŋ akɛ ehaa ‘mɔ fɛɛ mɔ bɔ ni sa egbɛi kɛ enifeemɔ nii ayibii lɛ.’

13. Mɛni hewɔ oyɔɔ nɔmimaa akɛ Nyɔŋmɔ baaha afee esuɔmɔnaa nii lɛ?

¹³ Ekolɛ, wɔyiŋ efeee wɔ kɔshikɔshi akɛ Nyɔŋmɔ yeɔ jalɛsane, ni ákɛ nilee yɛ gbɛ ni etsɔ nɔ etsu saji ahe nii kɛ bɔ ni ebaatsu saji ahe nii wɔsɛɛ lɛ mli. Kɛlɛ, kɛ́ wɔsusu shihilɛ ni Yeremia tsɔ mli lɛ he, ni wɔfɔse wɔtsuiŋ wɔshwie Nyɔŋmɔ hiɛ yɛ wɔsɔlemɔi amli lɛ, wɔbaanyɛ wɔná he sɛɛ. Kɛ́ wɔfɔse wɔtsuiŋ yɛ nakai gbɛ nɔ lɛ, ebaaha hekɛnɔfɔɔ ni wɔyɔɔ yɛ Yehowa mli akɛ, ashi abele o, ashi akwɛ̃ o, abaafee esuɔmɔnaa nii lɛ mli awa. Kɛ́ amrɔ nɛɛ po lɛ, wɔnuuu bɔ ni nibii yaa lɛ ehaa lɛ shishi, loo wɔleee nɔ̃ hewɔ ni Nyɔŋmɔ tsuuu nibii ahe nii bɔ ni wɔkpaa gbɛ lɛ, wɔbaanyɛ wɔtsi wɔbɛŋkɛ Nyɔŋmɔ yɛ sɔlemɔ mli, ni wɔkɛɛ lɛ akɛ, wɔyɛ hekɛnɔfɔɔ akɛ nɔ̃ ko nɔ̃ ko woŋ enajiaŋ. Nyɔŋmɔ baaha afee esuɔmɔnaa nii yɛ gbɛ ni sa ehiɛ lɛ nɔ, ni enɛ baaba mli yɛ be ni ele akɛ esa jogbaŋŋ lɛ mli. Ama enɛ nɔ aduatsɔ; wɔbɛ yiŋtoo ko hewɔ ni esa akɛ wɔyiŋ afee wɔ kɔshikɔshi yɛ he. Wɔbaaya nɔ wɔtsɔ sɔlemɔ nɔ wɔbi Yehowa koni eha wɔnu esuɔmɔnaa nii lɛ shishi, ni wɔna odaseyeli ni tsɔɔ akɛ esuɔmɔnaa nii lɛ miiba mli, ni wɔkɛ no atsɔɔ akɛ wɔmiibi akɛ, “Nɛgbɛ Yehowa yɔɔ?”—Hiob 36:5-7, 26.

14. Te wɔfeɔ tɛŋŋ wɔleɔ akɛ Yeremia pɛi Nyɔŋmɔ webii lɛ ayinɔsaji amli lɛ?

¹⁴ Yeremia le jogbaŋŋ akɛ, sanebimɔ ni ji “Nɛgbɛ Yehowa yɔɔ?” lɛ gbɛfaŋ lɛ, ebiɔ ni aná Yehowa he nilee. (Yer. 9:24) Eeenyɛ efee akɛ epɛi Nyɔŋmɔ webii lɛ ayinɔsane mli dani eŋmala saji ni yɔɔ woji ni amrɔ nɛɛ wɔle amɛ akɛ Maŋtsɛmɛi a-Klɛŋklɛŋ wolo lɛ kɛ Nɔ̃ ni Ji Enyɔ lɛ amli lɛ. Etsĩ “Salomo he saji lɛ awolo lɛ,” “Israel maŋtsɛmɛi lɛ ayinɔsaji awolo lɛ,” kɛ “Yuda maŋtsɛmɛi lɛ ayinɔsaji awolo lɛ” tã. (1 Maŋ. 11:41; 14:19; 15:7) No hewɔ lɛ, ebanu bɔ ni Yehowa tsu shihilɛi srɔtoi ahe nii eha lɛ ashishi. Yeremia bana nɔ̃ ni saa Yehowa hiɛ kɛ bɔ ni Yehowa naa mɛi ayiŋkpɛi ehaa. Kɛfata he lɛ, eeenyɛ efee akɛ ekane woji tamɔ nɔ̃ ni akɛ mumɔ tsirɛ Mose, Yoshua, Samuel, David, kɛ Salomo ni amɛŋmala lɛ amli. Ŋwanejee ko bɛ he akɛ, no hewɔ ni ele gbalɔi ni tsɔ ehiɛ kɛ agbɛnɛ hu eyinɔbii lɛ ahe saji jogbaŋŋ lɛ. Mɛɛ gbɛ nɔ aŋkro nikasemɔ ni Yeremia fee lɛ ye ebua lɛ?

15. Te Yeremia ná Elia gbalɛ lɛ ni epɛi mli lɛ he sɛɛ eha tɛŋŋ?

¹⁵ Yeremia ji mɔ ni ŋma amaniɛbɔɔ ni kɔɔ Samaria maŋtsɛ Ahab ŋa Yezebel, ni yi wa lɛ he lɛ. Nɔ̃ ni fata amaniɛbɔɔ nɛɛ he ji sane ni Elia wie akɛ gbéi aaaye Yezebel yɛ Yezreel shikpɔŋ lɛ nɔ lɛ. (1 Maŋ. 21:23) Taakɛ ole momo lɛ, nɔ̃ ni Yeremia ŋma lɛ kɛ gbeekpamɔ naa lɛ, aaafee afii 14 sɛɛ lɛ, ashɛ Yezebel kɛtsɔ samfɛlɛ mli afɔ̃, Yehu okpɔŋɔi lɛ naanaa enɔ, ni gbéi ye lɛ. (2 Maŋ. 9:31-37) Ekã shi faŋŋ akɛ, bɔ ni Yeremia pɛi Elia gbalɛ lɛ, kɛ emlibaa fitsofitso lɛ mli lɛ waje hemɔkɛyeli ni eyɔɔ yɛ Nyɔŋmɔ wiemɔ lɛ mli lɛ. Anɔkwa, Yehowa blema nifeemɔi ni Yeremia kase lɛ tswa ehemɔkɛyeli lɛ ema shi jogbaŋŋ, ni no ha enyɛ efi shi akɛ gbalɔ.

16, 17. Mɛni osusuɔ akɛ no ye ebua Yeremia ni enyɛ etee nɔ ebɔ ebeaŋ maŋtsɛmɛi yiwalɔi lɛ kɔkɔ lɛ?

¹⁶ Ha wɔsusu nɔkwɛmɔnɔ kroko he wɔkwɛ. Mɛni osusuɔ akɛ no ye ebua Yeremia, ni beni awaa lɛ yi lɛ fɛɛ sɛɛ lɛ, etee nɔ ebɔ maŋtsɛmɛi ni yi wa tamɔ Yehoiakim kɛ Zedekia kɔkɔ lɛ? Yiŋtoo titri kome ji akɛ, Yehowa ha Yuda maŋtsɛmɛi lɛ na Yeremia tamɔ “maŋ ní atswa gbogbo awo he, kɛ dade akulashiŋ, kɛ akɔɔble gbogboi.” (Yer. 1:18, 19) Shi, nyɛkahaa wɔkua wɔhiɛ wɔshwiea anɔkwa sane ni ji akɛ Yeremia pɛi Yuda kɛ Israel maŋtsɛmɛi ni tsɔ hiɛ lɛ ayinɔsaji lɛ amli fitsofitso lɛ nɔ. Eŋma akɛ, Manase ‘mamɔ afɔleshaa latɛi eha ŋwɛi asafo lɛ fɛɛ yɛ Yehowa we lɛ kpoi enyɔ lɛ anɔ,’ ni ekɛ lɛ diɛŋtsɛ ebi nuu shã afɔle yɛ la mli, ni eshwie mɛi babaoo ni efeko nɔ̃ ko lɛ alá shi; saji nɛɛ fɛɛ lɛ anɔkwale ni. (2 Maŋ. 21:1-7, 16; nyɛkanea Yeremia 15:4.) Ekã shi faŋŋ akɛ, Yeremia ná ele akɛ beni Manase ba ehe shi ni ekpa Yehowa fai yɛ sɔlemɔ mli lɛ, ‘Yehowa nu esɔlemɔ lɛ,’ ni eha akɛ Manase ta maŋtsɛ sɛi lɛ nɔ ekoŋŋ.—Nyɛkanea 2 Kronika 33:12, 13.

¹⁷ Yeremia etsĩii mɔbɔ ni Yehowa na Manase lɛ tã yɛ ewoji ni eŋmala lɛ amli. Shi, Manase gbele sɛɛ aaafee afii 15 pɛ ni Yeremia bɔi sɔɔmɔ akɛ gbalɔ. No hewɔ lɛ, ekã shi faŋŋ akɛ Yeremia nu nɔ̃ ni ba beni Manase tsake etsui yɛ efɔŋ ni efee lɛ he lɛ. Ŋwanejee ko bɛ he akɛ Manase jeŋba gbonyo kɛ nɔ̃ ni jɛ mli ba lɛ, ni Yeremia pɛi mli lɛ ye ebua lɛ ni ena akɛ ehi akɛ eeewo maŋtsɛmɛi tamɔ Zedekia hewalɛ koni amɛtao Yehowa mɔbɔnalɛ kɛ esuɔmɔ ni tsakeee lɛ. Maŋtsɛ ni kɛ ehe wo wɔŋjamɔ mli vii, ni eshwie lá babaoo shi nɛɛ po nyɛ etsake ni akɛ ehe fa lɛ. Bo ji Yeremia kulɛ, ani Manase sane lɛ baawo bo hewalɛ koni ona nɔ̃ hewɔ ni esa akɛ oya nɔ ofi shi yɛ maŋtsɛmɛi gbohii krokomɛi lɛ anɔyelii lɛ amli?

18. Mɛni ekolɛ Yeremia kase kɛjɛ Uria sane lɛ mli, ni mɛni hewɔ ohaa hetoo nakai?

¹⁸ Ekã shi faŋŋ akɛ, beni Yeremia sɔmɔɔ akɛ gbalɔ lɛ, ekase nii kɛjɛ bɔ ni eyinɔbii lɛ fee amɛnii amɛha yɛ shihilɛi komɛi amli lɛ mli. Eyinɔbii lɛ ateŋ mɔ kome ji Uria ni gba eshi Yerusalem kɛ Yuda beni Yehoiakim yeɔ nɔ lɛ. Shi, akɛni Uria she Maŋtsɛ Yehoiakim gbeyei hewɔ lɛ, ejo foi etee Mizraim. No sɛɛ lɛ, maŋtsɛ lɛ tsu mɛi ni amɛyaŋɔ Uria kɛjɛ Mizraim kɛba, ni eha agbe Uria. (Yer. 26:20-23) Ani osusuɔ akɛ Yeremia kase nɔ̃ ko kɛjɛ Uria sane lɛ mli? Anɔkwa, Yeremia tee nɔ ebɔ Yudafoi lɛ kɔkɔ akɛ abaakpata amɛmaŋ lɛ hiɛ, ni nakai ni eyafee yɛ sɔlemɔwe lɛ po tsɔɔ akɛ ekase nɔ̃ ko kɛjɛ Uria sane lɛ mli. Yeremia ekãa lɛ naa baaa shi, ni Yehowa kwaaa lɛ hu. Ekã shi faŋŋ akɛ, Nyɔŋmɔ tsirɛ Ahikam, Shafan bi lɛ, ni ebaa ekãalɔ Yeremia wala yi.—Yer. 26:24.

19. Mɛni Yeremia yɔse yɛ bɔ ni Yehowa tee nɔ etsu gbalɔi kɛtee Nyɔŋmɔ webii lɛ aŋɔɔ lɛ mli?

¹⁹ Yeremia kase nii kɛjɛ nibii ni lɛ diɛŋtsɛ ekɛkpe beni Yehowa kɛlɛ tsuɔ nii kɛbɔɔ Nyɔŋmɔ webii lɛ kɔkɔ lɛ hu mli. Maŋtsɛ Yehoiakim yinɔ afi ni ji ejwɛ lɛ mli lɛ, Yehowa kɛɛ Yeremia akɛ, eŋmala wiemɔi fɛɛ ni lɛ Yehowa ewie kɛjɛ Yosia beaŋ kɛbashi nakai beaŋ lɛ eshwie shi. Mɛɛ yiŋtoo hewɔ Nyɔŋmɔ kɛ gbɛtsɔɔmɔ nɛɛ ha lɛ? Akɛ gbɛtsɔɔmɔ nɛɛ ha koni akɛwo aŋkroaŋkroi fɛɛ hewalɛ ni amɛkpale kɛjɛ amɛgbɛi fɔji lɛ anɔ koni aŋɔ amɛhe eshai lɛ afa amɛ. (Nyɛkanea Yeremia 36:1-3.) Yeremia teɔ shi leebi maŋkpa ni ekɛ Nyɔŋmɔ kɔkɔbɔɔ saji lɛ yahaa maŋbii lɛ, ni ekpaa amɛfai po ni amɛkpa amɛnihiinii lɛ. (Yer. 44:4) Ani enɛ etsɔɔɔ faŋŋ akɛ Yeremia yɔse kɛjɛ lɛ diɛŋtsɛ eniiashikpamɔ mli akɛ, Nyɔŋmɔ musuŋ ni tsɔɔ lɛ yɛ ewebii lɛ ahe lɛ hewɔ etsuɔ gbalɔi lɛ? Ani enɛ haŋ Yeremia diɛŋtsɛ hu musuŋ atsɔ lɛ? (2 Kron. 36:15) Belɛ, obaanyɛ ona nɔ̃ hewɔ ni beni Yeremia je Yerusalem hiɛkpatamɔ lɛ mli lɛ, enyɛ ekɛɛ akɛ: “Yehowa mɔbɔnalɛ [loo suɔmɔ ni tsakeee lɛ] naa ni wɔpleneeko nɛɛ, ejaakɛ emusuŋtsɔlɛi lɛ etaaa; amɛtsɔɔ ehei daa leebi.”—Yaafo 3:22, 23.

20. Te ooofee tɛŋŋ okase Yeremia kɛtao Yehowa sɛɛgbɛ?

²⁰ Ani daa gbi lɛ obiɔ ohe akɛ, “Nɛgbɛ Yehowa yɔɔ?” kɛtsɔɔ akɛ eji oti ni ma ohiɛ akɛ obaatao Nyɔŋmɔ jwɛŋmɔ yɛ odaa gbi yiŋkpɛi ahe? (Yer. 2:6-8) Akɛ mɔ ni tamɔɔɔ ebeaŋ Yudafoi lɛ, be fɛɛ be lɛ, Yeremia biɔ ni Ofe lɛ aye abua lɛ koni ena gbɛ ni esa akɛ ekɔ. Kɛ́ wɔteŋ mɔ fɛɛ mɔ miikpɛ eyiŋ daa gbi lɛ, nilee yɛ mli akɛ eeetao Yehowa jwɛŋmɔ yɛ saji ahe taakɛ Yeremia fee lɛ.

21. Mɛɛ sɔlemɔ nɛkɛ baanyɛ aye abua bo yɛ oshiɛmɔ nitsumɔ lɛ mli, ekolɛ beni mɔ ko kɛ bo ewie bɔ ni esaaa lɛ?

²¹ Jeee saji wuji loo yiŋkpɛi ni baanyɛ atsake wɔshihilɛ lɛ amli pɛ esa akɛ wɔtao Yehowa jwɛŋmɔ yɛ saji ahe. Akɛ nɔkwɛmɔnɔ lɛ, kɛ́ otsɔ hiɛ okpɛ oyiŋ akɛ obaaya shiɛmɔ yɛ gbi pɔtɛɛ ko nɔ hu? Ekolɛ, beni ote shi kɛjɛ wɔ mli lɛ, ona akɛ bɔ ni jeŋ eshi oblɔtu lɛ, shiɛmɔyaa baafee ahuntoo. Kɛfata he lɛ, ekolɛ atsu shikpɔŋkuku ni abaaya shĩa kɛ shĩa yɛ mli nakai gbi lɛ mli nii shii abɔ. Ekolɛ, obaakai akɛ mɛi ni yɔɔ nakai shikpɔŋkuku lɛ mli lɛ ekomɛi kɛ saji komɛi jie amɛnaa loo amɛtsi ohiɛ beni oyashiɛ oha amɛ lɛ. Nakai ŋmɛlɛtswaa ni ote shi yɛ wɔ mli lɛ, ani obaanyɛ obi yɛ sɔlemɔ mli akɛ, “Nɛgbɛ Yehowa yɔɔ?” Kɛ́ ofee nakai lɛ, ebaaye ebua bo ni ona akɛ sanekpakpa ji nɔ̃ ni oyaajaje lɛ, ni ebaaha efee faŋŋ kɛha bo hu akɛ Nyɔŋmɔ miisumɔ akɛ ojaje nakai sane lɛ. Ni no baanyɛ aha onu he akɛ Yehowa wiemɔ lɛ haa onáa miishɛɛ, ni ehaa omli filiɔ bo taakɛ eba lɛ yɛ Yeremia gbɛfaŋ lɛ. (Yer. 15:16, 20) Kɛ́ beni onyiɛ shiɛmɔ nɔ nakai gbi lɛ, okɛ mɔ ko kpe ni ekɛ bo wie bɔ ni esaaa loo ewo ohe gbeyei po lɛ, obaanyɛ ofɔse otsuiŋ oshwie Nyɔŋmɔ hiɛ yɛ sɔlemɔ mli ekoŋŋ. Ani obaafee nakai? Kaaha ohiɛ kpa nɔ akɛ, Nyɔŋmɔ baanyɛ aha mumɔ krɔŋkrɔŋ lɛ aye abua bo koni okpee shihilɛ lɛ naa bɔ ni sa, ni shwelɛ ni oyɔɔ akɛ ojaje Nyɔŋmɔ sane lɛ baaha oye ohe nɔ.—Luka 12:11, 12.

22. Mɛni baaha atsĩ sɔlemɔi komɛi anaa?

²² Esa akɛ oha ehi ojwɛŋmɔ mli akɛ abaanyɛ atsĩ sɔlemɔi komɛi anaa. (Nyɛkanea Yaafo 3:44.) Yehowa booo Yudafoi atuatselɔi lɛ asɔlemɔi atoi ejaakɛ ‘amɛjie amɛtoi yɛ Yehowa toiboo nɔ,’ ni amɛtee nɔ amɛgbo mla lɛ nɔ toi. (Abɛi 28:9) Ebafee faŋŋ kɛha Yeremia akɛ: Kɛ́ mɔ ko ehiii shi yɛ esɔlemɔi anaa lɛ, edɔɔ Nyɔŋmɔ, ni no baanyɛ aha Nyɔŋmɔ ajie etoi yɛ mɔ lɛ sɔlemɔi anɔ; ni esa akɛ wɔ hu wɔha anɔkwa sane nɛɛ ahi wɔjwɛŋmɔŋ. Ehe miihia waa akɛ wɔtsi wɔhe kɛjɛ nifeemɔi ni baadɔ Yehowa lɛ ahe.

23, 24. (a) Mɛni ehe hiaa ni wɔfee koni wɔna Yehowa suɔmɔnaa nii? (b) Mɛni obaanyɛ ofee koni oná aŋkro nikasemɔ ni ofeɔ lɛ he sɛɛ babaoo?

²³ Kɛfata wɔtsuiŋ ni wɔɔjɛ wɔsɔle kɛbi Yehowa gbɛtsɔɔmɔ lɛ he lɛ, esa akɛ wɔya nɔ wɔfee aŋkro nikasemɔ, ejaakɛ eji nɔ̃ ko ni he hiaa ni atsɔɔ nɔ anaa Yehowa suɔmɔnaa nii. Enɛ gbɛfaŋ lɛ, wɔnɔ̃ hi fe Yeremia nɔ̃ lɛ kwraa. Wɔyɛ Biblia tso muu lɛ fɛɛ. Taakɛ bɔ ni Yeremia pɛi nibii amli fitsofitso, ni akɛ mumɔ tsirɛ lɛ ni eŋmala yinɔsaji eshwie shi lɛ, kɛ́ bo hu opɛi Nyɔŋmɔ Wiemɔ lɛ mli kɛtao gbɛtsɔɔmɔ lɛ, belɛ oobi akɛ, “Nɛgbɛ Yehowa yɔɔ?” Kɛ́ obɔ mɔdɛŋ koni ole Nyɔŋmɔ suɔmɔnaa nii lɛ, no baaha oná hekɛnɔfɔɔ yɛ emli, ni ‘obaatamɔ tso ní atɛo yɛ nui ahe ní lɛ̀ɔ eshishifãi amli kɛyaa fai atoi.’—Nyɛkanea Yeremia 17:5-8.

²⁴ Beni okaneɔ Ŋmalɛ Krɔŋkrɔŋ lɛ, ni ojwɛŋɔ nɔ lɛ, bɔɔ mɔdɛŋ ni oyɔse nɔ̃ ni Yehowa sumɔɔ ni ofee yɛ shihilɛi srɔtoi amli lɛ. Obaanyɛ otao shishitoo mlai ni obaasumɔ ni ehi ojwɛŋmɔ mli ni okɛtsu nii yɛ oshihilɛ mli. Beni okaneɔ yinɔsaji, Nyɔŋmɔ kitai, Biblia mli shishitoo mlai, kɛ nilee wiemɔi ni yɔɔ Nyɔŋmɔ Wiemɔ lɛ mli lɛ, susumɔ bɔ ni esa akɛ okɛ enɛɛmɛi atsu nii yɛ odaa gbi yiŋkpɛi amli lɛ he. Yehowa baanyɛ atsɔ Ŋmalɛi lɛ anɔ eha ona bɔ ni ooofee okpee shihilɛi ni mli wawai ni ekolɛ okɛbaakpe lɛ po anaa, ni ekɛha sane ni obiɔ akɛ, “Nɛgbɛ Yehowa yɔɔ?” lɛ hetoo. Hɛɛ, obaanyɛ ona “nii ní aŋɔtee ní oleee!” lɛ yɛ Biblia lɛ mli loo obaanu nibii nɛɛ ashishi jogbaŋŋ!—Yer. 33:3.

25, 26. Mɛni hewɔ wɔbaanyɛ wɔná niiashikpamɔi ahe sɛɛ lɛ?

²⁵ Obaanyɛ osusu bo diɛŋtsɛ oniiashikpamɔi kɛ mɛi krokomɛi anɔ̃ hu he. Akɛ nɔkwɛmɔnɔ lɛ, taakɛ eba lɛ yɛ Uria gbɛfaŋ lɛ, ekolɛ onaa akɛ mɛi fioo komɛi ŋmɛɔ hekɛnɔfɔɔ ni amɛyɔɔ yɛ Yehowa mli lɛ he. (2 Tim. 4:10) Obaanyɛ okase nɔ̃ ko kɛjɛ gbɛ ni amɛkɔ lɛ mli koni nɔ̃ ni ba amɛnɔ lɛ akaba onɔ. Jwɛŋmɔ bɔ ni Yehowa ejie suɔmɔ ni tsakeee kpo etsɔɔ bo lɛ nɔ daa, ni okai akɛ Yeremia hu hiɛ sɔ Nyɔŋmɔ mɔbɔnalɛi kɛ emusuŋtsɔlɛ lɛ. Bɔ fɛɛ bɔ ni oshihilɛ lɛ mli wa ha lɛ, kaasusu kɔkɔɔkɔ akɛ Ŋwɛinyo lɛ susuuu ohe. Ekwaaa Yeremia, ni bo hu ekwaŋ bo kɔkɔɔkɔ.

²⁶ Beni oyaa nɔ ojwɛŋɔ bɔ ni Yehowa kɛ aŋkroaŋkroi yeɔ ehaa ŋmɛnɛ lɛ anɔ lɛ, obaayɔse akɛ daa gbi lɛ ekɛ gbɛtsɔɔmɔ haa yɛ gbɛi srɔtoi anɔ. Aki, ni eji Odasefonyo oblayoo ni yɔɔ Japan lɛ, nu he akɛ esaaa akɛ abuɔ lɛ afataa Kristofoi ahe. Gbi ko beni ekɛ kpokpaa nɔkwɛlɔ lɛ ŋa nyiɛ shiɛmɔ nɔ lɛ, ewie etsuiŋ sane akɛ: “Minuɔ he akɛ Yehowa miihe afɛ̃ mi kɛjɛ edaaŋ, shi mikpɛtɛ enaabu kpɛŋŋ miikpa lɛ fai akɛ eha mi be fioo.” Kpokpaa nɔkwɛlɔ lɛ ŋa lɛ kwɛ Aki hiɛ, ni ekɛɛ akɛ: “Minaaa bo Kristofonyo ni yɔɔ kulɔkulɔ!” Sɛɛ mli lɛ, Aki jwɛŋ sane ni woɔ mɔ hewalɛ nɛɛ nɔ. Anɔkwa, nɔ̃ ko etsɔɔɔ kwraa akɛ Yehowa naa Aki akɛ eyɛ kulɔkulɔ. No sɛɛ lɛ, Aki sɔle eha Yehowa akɛ: “Tsu mi kɛya he fɛɛ he ni osumɔɔ. Mafee nɔ̃ fɛɛ nɔ̃ ni osumɔɔ.” No sɛɛ etsɛɛɛ lɛ, efã gbɛ kɛtee maŋsɛɛ he ko ni kuu bibioo ko ni emli bii lɛ wieɔ Japan wiemɔ yɔɔ jɛi, ni no mli lɛ, kuu lɛ mli bii lɛ miitao mɔ ko ni wieɔ Japan wiemɔ ni baanyɛ ekɛ amɛ ahi shi kɛsɔmɔ. Heniianaa lɛ, maŋ ni Aki tee nɔ lɛ, jɛmɛ afɔ lɛ yɛ, ni efee mlɛo kɛha lɛ akɛ eeefã kɛya maŋ lɛ nɔ koni eyaye ebua. Shi, nɛgbɛ ebaahi? Nyɛmi yoo ko ni ebi yoo efã eyahi he kroko etsɛko lɛ ha Aki tsu. Aki mu sane lɛ naa akɛ: “Mfoniri lɛ bɔi faŋŋ feemɔ: Yehowa miigbele gbɛ kɛmiiha mi.”

27. Mɛni hewɔ esa akɛ sanebimɔ ni ji “Nɛgbɛ Yehowa yɔɔ?” lɛ aná nɔ̃ fɛɛ nɔ̃ ni ofeɔ lɛ nɔ hewalɛ lɛ?

²⁷ Nyɛmimɛi hii kɛ yei babaoo agbɛfaŋ lɛ, kɛ́ amɛmiikane Biblia loo amɛmiifee aŋkro nikasemɔ lɛ, bei komɛi lɛ amɛnuɔ he akɛ Nyɔŋmɔ miitsɔɔ amɛ gbɛ. Ekolɛ, bo hu oná niiashikpamɔi ni tamɔ nakai. Esa akɛ nakai niiashikpamɔi lɛ awaje wekukpaa ni yɔɔ okɛ Yehowa teŋ lɛ, ni etsirɛ bo ni okɛ hiɛdɔɔ afɔ lɛ bɛŋkɛmɔ yɛ sɔlemɔ mli. Nyɛhaa wɔnáa hekɛnɔfɔɔ akɛ, kɛ́ daa gbi lɛ wɔbiɔ akɛ, “Nɛgbɛ Yehowa yɔɔ?” lɛ, ebaatsɔɔ wɔ egbɛ lɛ.—Yes. 30:21.