“Miŋɔ Miwiemɔi Lɛ Miwo Onaa”

1, 2. Mɛni hewɔ oheɔ nɔ̃ ni okaneɔ yɛ Biblia lɛ mli lɛ oyeɔ lɛ?

“NAANYO ko yɛ ni kpɛtɛɔ mɔ gbagbalii fe nyɛmi.” (Abɛi 18:24) Ani wiemɔi ni ajɛ mumɔŋ aŋma nɛɛ eba mli yɛ ogbɛfaŋ? Obaanyɛ okɛ ohe afɔ̃ nɔ̃ ni onaanyo kpakpa ko kɛɔ bo lɛ nɔ. Kɛ́ ekɛɛ bo miishɛɛ sane ko loo egbála nɔ̃ ko ni ebaafee lɛ mli etsɔɔ bo lɛ, oheɔ oyeɔ. Kɛ́ etsɛ́ otoi sɛɛ yɛ nɔ̃ ko ni esa akɛ ofee tsakemɔ yɛ he lɛ he lɛ, okpɛlɛɔ nɔ, ni otsuɔ he nii. Be ni okɛ lɛ ebɔ lɛ fɛɛ mli lɛ, eha efee faŋŋ akɛ eesumɔ ni eye ebua bo, ni kɛ́ eewo bo ŋaa po lɛ onaa lɛ nakai. Eesumɔ ni ehi eha bo. Ni bo hu oosumɔ ni okɛ lɛ aye yɛ nakai gbɛ nɔŋŋ nɔ koni nyɛnaanyobɔɔ lɛ ahi shi daa.

² Yɛ gbɛi komɛi anɔ lɛ, hii ni Nyɔŋmɔ kɛ amɛtsu nii kɛŋmala Biblia mli woji lɛ baanyɛ atsɔmɔ nanemɛi kpakpai kɛha bo. Obaanyɛ ohe nɔ ni onuɔ kɛjɛɔ amɛnaa lɛ oye. Oyɛ nɔmimaa akɛ obaaná nɔ̃ ni amɛkɛɔ lɛ he sɛɛ. Kulɛ, esa akɛ blema Israelbii lɛ anu he nakai nɔŋŋ yɛ hii ni ‘mumɔ krɔŋkrɔŋ lɛ tsirɛ amɛ ni amɛwie wiemɔi ni Nyɔŋmɔ kɛha amɛ lɛ’ ahe. (2 Pet. 1:20, 21, Ga Biblia hee) Yeremia ji mɔ ni Nyɔŋmɔ kɛtsu nii kɛŋma gbalɛ wolo ni da fe fɛɛ lɛ, ni lɛ nɔŋŋ eŋmala Yeremia Yaafo wolo lɛ kɛ Biblia mli woji enyɔ krokomɛi hu.

3, 4. Te mɛi komɛi naa Yeremia kɛ Yeremia Yaafo woji lɛ amɛhaa tɛŋŋ, shi mɛni hewɔ amɛsusumɔ lɛ ejaaa lɛ? Okɛ enɛ he nɔkwɛmɔnɔ aha.

³ Shi ekolɛ oyɔse akɛ, Biblia kanelɔi komɛi susuɔ akɛ woji ni Yeremia ŋmala lɛ ahe ehiaaa amɛ. Ekolɛ, amɛsusuɔ akɛ kɔkɔbɔi ni yɔɔ hiɛdɔɔ kɛ gbalɛi ni yɔɔ gbeyei pɛ yɔɔ Yeremia kɛ Yeremia Yaafo woji lɛ amli.a Ani susumɔ ni amɛhiɛ yɛ Yeremia kɛ Yeremia Yaafo woji lɛ ahe lɛ ja?

⁴ Anɔkwa, kɔkɔbɔi kɛ ŋaawoi ni ashiuko nɔ yɛ woji ni Yeremia ŋmala lɛ amli moŋ, shi ole akɛ nakai ji bɔ ni bei komɛi lɛ onaanyo ko hu feɔ bo. Yesu po, beni ebɔfoi lɛ ni ji enanemɛi lɛ jie sui ni esaaa kpo lɛ, emuaaa enaa; ejaje amɛ ni eshiuuu nɔ̃ ko nɔ. (Mar. 9:33-37) Fɛɛ sɛɛ lɛ, sane tuuntu ni Yesu jaje lɛ woɔ mɔ tsui, ejaakɛ etsɔɔ nɔ ni esa akɛ wɔfee koni Nyɔŋmɔ akpɛlɛ wɔnɔ ni wɔná miishɛɛ wɔsɛɛ. (Mat. 5:3-10, 43-45) Saji ni yɔɔ woji ni Yeremia ŋmala lɛ amli lɛ hu tamɔ nakai nɔŋŋ, ni efata ‘ŋmalɛi fɛɛ’ ni hi kɛha “mɔsaamɔ” lɛ he. (2 Tim. 3:16) Yeremia gbá mli kpoo etsɔɔ susumɔ ni Yehowa hiɛ yɛ mɛi ni kɛɔ akɛ amɛsɔmɔɔ lɛ, shi nakai beaŋ nɔŋŋ lɛ amɛfeɔ nibii ni ejaaa lɛ ahe, ni etsɔɔ akɛ mɛi nɛɛ sa yibii gbohii ni baajɛ amɛgbɛi fɔji lɛ amli kɛba lɛ. Fɛɛ sɛɛ lɛ, saji ni haa mɔ náa hiɛnɔkamɔ, kɛ nɔ̃ ni tsɔɔ bɔ ni wɔɔfee wɔnine ashɛ jɔɔmɔ nɔ wɔsɛɛ lɛ yɛ Yeremia kɛ Yeremia Yaafo woji lɛ amli. Gbɛ ni Nyɔŋmɔ baatsɔ nɔ etsu eyiŋtoo lɛ he nii lɛ ahe gbalɛi yɛ Yeremia wolo lɛ mli, ni ŋmɛnɛ lɛ wɔmiiná gbalɛi nɛɛ amlibaa lɛ mli gbɛfaŋnɔ yɛ gbɛ ni yɔɔ tɛ̃ɛ nɔ. Agbɛnɛ hu, saji ni woɔ mɔ tsui ni wajeɔ mɔ yɛ woji enyɔ nɛɛ amli.—Nyɛkanea Yeremia 31:13, 33; 33:10, 11; Yaafo 3:22, 23.

 5. Te wɔɔfee tɛŋŋ wɔná saji ni yɔɔ woji ni Yeremia ŋmala lɛ amli lɛ ahe sɛɛ?

⁵ Bɔ ni wɔɔfee wɔná miishɛɛ amrɔ nɛɛ yɛ Nyɔŋmɔ webii ateŋ, kɛ nibii ni wɔbaanyɛ wɔkpa gbɛ wɔsɛɛ lɛ kɛ saji ni Yeremia ŋmala lɛ yɛ tsakpaa ko. Enɛ he nɔkwɛmɔnɔ ji ekome ni wɔfee akɛ nyɛmimɛi yɛ Kristofoi asafo lɛ mli lɛ. Saji ni yɔɔ Yeremia woji lɛ amli lɛ baaye abua wɔ koni wɔwaje ekomefeemɔ nɛɛ, ni wɔkɛ bɔfo Paulo ŋaawoo lɛ atsu nii akɛ: “Anyɛmimɛi, nyɛmii ashɛa, nyɛyea emuu [loo nyɛhaa ajajea nyɛ], nyɛhaa ashɛjea nyɛmii, nyɛjwɛŋmɔ afea ekome, nyɛhia shi yɛ hejɔlɛ mli, ni suɔmɔ kɛ hejɔlɛ Nyɔŋmɔ lɛ kɛ nyɛ aaahi shi.” (2 Kor. 13:11) Agbɛnɛ hu, woji ni Yeremia ŋmala lɛ kɛ sane ni wɔshiɛɔ lɛ yɛ tsakpaa kpaakpa. Eyɛ mli akɛ wɔgbaa mɛi krokomɛi naagbee gbii lɛ ahe saji, ni wɔbɔɔ amɛ kɔkɔ yɛ nibii agbɛjianɔtoo nɛɛ hiɛkpatamɔ ni ebɛŋkɛ kpaakpa lɛ he moŋ, shi loloolo lɛ wɔsane lɛ woɔ mɛi atsui ejaakɛ ehaa amɛnáa hiɛnɔkamɔ. Kɛfata he lɛ, saji ni Yeremia ŋmala lɛ baanyɛ aye abua wɔ yɛ nibii ni wɔfeɔ daa gbi lɛ amli. Shihilɛi ni wɔyɔɔ mli amrɔ nɛɛ ateŋ babaoo je Yeremia nɔ̃ lɛ, ni esane lɛ hu tamɔ wɔnɔ̃ lɛ. Bɔni afee ni wɔnu enɛ shishi lɛ, ha wɔsusu shihilɛ ni Yeremia hi mli, kɛ nitsumɔ ni akɛwo edɛŋ lɛ he wɔkwɛ. Nyɔŋmɔ kɛɛ gbalɔ ni feɔ nɔkwɛmɔnɔ kpakpa nɛɛ akɛ: “Naa, miŋɔ miwiemɔi lɛ miwo onaa.”—Yer. 1:9.

6, 7. Mɛni hewɔ wɔbaanyɛ wɔná nɔmimaa akɛ no mli lɛ, Nyɔŋmɔ hiɛ yɛ Yeremia nɔ lɛ, ni mɛɛ shihilɛ mli afɔ lɛ yɛ?

⁶ Kɛ́ yoo ko hiɛ musu ni ekɛ ewu miikpa bi ni abaafɔ lɛ gbɛ lɛ, bei pii lɛ amɛsusuɔ amɛbi nuu (loo amɛbi yoo) ni abaafɔ lɛ he. Te bi lɛ baatamɔ tɛŋŋ, ni te eshihilɛ baaji eha tɛŋŋ—mɛɛ nibii ebaanya he, mɛɛ nitsumɔ ebaatsu, ni mɛɛ nibii ebaafee? Ekã shi faŋŋ akɛ, ofɔlɔi hu susu nibii ni tamɔ nɛkɛ he. Yeremia fɔlɔi hu fee nakai nɔŋŋ. Shi Yeremia shihilɛ lɛ yɛ srɔto. Mɛni hewɔ? No mli lɛ, jeŋ muu fɛɛ Bɔlɔ lɛ hiɛ yɛ Yeremia shihilɛ kɛ nitsumɔi ni ebaatsu lɛ nɔ waa.—Nyɛkanea Yeremia 1:5.

⁷ Hɛɛ, dani abaafɔ Yeremia lɛ, Yehowa na akɛ ebaanyɛ ekɛ lɛ atsu nii akɛ egbalɔ. Ená gbekɛ nuu ko ni abaafɔ lɛ awo osɔfoi aweku ko ni yɔɔ Yerusalem kooyigbɛ lɛ mli lɛ he miishɛɛ ni ekaaa. Afɔ Yeremia yɛ afi 600 D.Ŋ.B. afii lɛ teŋgbɛ, ni nakai be lɛ jeee miishɛɛ be ejaakɛ no mli lɛ, Maŋtsɛ Manase ni ye Yuda nɔ yɛ gbɛ gbonyo nɔ lɛ ji mɔ ni yeɔ nɔ. (Kwɛmɔ baafa 19.) Manase kɛ afii 55 ni ekɛye nɔ lɛ mli fã kpotoo fee efɔŋ yɛ Yehowa hiɛ. No sɛɛ lɛ, ebi nuu Amon baye nɔ, ni ekɔ etsɛ Manase nane. (2 Maŋ. 21:1-9, 19-26) Maŋtsɛ ni ye Yuda nɔ yɛ Amon sɛɛ lɛ kɛ tsakemɔ wulu ko ba. Hɛɛ, Maŋtsɛ Yosia tao Yehowa sɛɛgbɛ. Yosia maŋtsɛyeli afi ni ji 18 lɛ nɔ lɛ, ejie wɔŋjamɔ kɛjɛ Yuda shikpɔŋ lɛ nɔ. Ekã shi faŋŋ akɛ, Yeremia fɔlɔi ná enɛ he miishɛɛ; beni Yosia yeɔ nɔ lɛ mli ni Nyɔŋmɔ wó amɛbi lɛ gbalɔ.—2 Kron. 34:3-8.

 8. Mɛɛ nitsumɔ akɛwo Yeremia dɛŋ ni etsu, ni te efee enii yɛ he eha tɛŋŋ?

⁸ Beni Nyɔŋmɔ kɛɛ Yeremia akɛ: “Miwoo gbalɔ miha jeŋmaji lɛ!” wɔleee afii abɔ ni no mli lɛ eye. Eeenyɛ efee akɛ no mli lɛ, eye aaafee afii 25, afi ni osɔfoi lɛ kɛjeɔ amɛsɔɔmɔ shishi lɛ. (4 Mose 8:24) Ekɔɔɔ he eko afii abɔ ni no mli lɛ Yeremia eye lɛ, ekɛɛ akɛ: “Ao, Nuŋtsɔ Yehowa! naa, mileee wiemɔ; ejaakɛ gbekɛ ji mi.” (Yer. 1:6) Eshashao shi akɛ eeekpɛlɛ nɔ, ekolɛ kɛsusumɔ akɛ edako, ni enyɛŋ ewie yɛ mɛi ahiɛ tamɔ bɔ ni gbalɔi lɛ feɔ lɛ, loo esaaa mɔ ni tsuɔ sɔ̃ ni tsii ni kã gbalɔi anɔ lɛ he nii.

9, 10. Mɛɛ shihilɛi amli Yeremia bɔi sɔɔmɔ akɛ gbalɔ, shi mɛni hewɔ beni be shwie mli lɛ enáaa nitsumɔ lɛ mlɛo lɛ?

⁹ Awó Yeremia gbalɔ beni Maŋtsɛ Yosia jieɔ apasa jamɔ ni yɔɔ nyaŋemɔ kɛjɛɔ Yuda ni etoɔ anɔkwa jamɔ shishi ekoŋŋ lɛ. Kɛ́ Yeremia kɛ Yosia shara jio, ekɛ lɛ sharaaa jio lɛ, ekã shi faŋŋ akɛ Yosia nɔyeli beaŋ bafee be ni hi jogbaŋŋ kɛha anɔkwa gbalɔi. Zefania kɛ Nahum hu sɔmɔ yɛ Yuda yɛ Yosia nɔyeli lɛ shishijee mli.b Gbalɔ yoo Hulda hu sɔmɔ yɛ Yosia nɔyeli beaŋ, shi egba akɛ maŋ lɛ kɛ jaramɔ shihilɛi baakpe. Yeremia na nakai gbalɛ lɛ mlibaa. (2 Maŋ. 22:14) Anɔkwa, bei komɛi lɛ ehe bahiaa ni Yeremia nanemɛi tamɔ Ebed-Melek kɛ Baruk akpɔ̃ lɛ kɛjɛ gbele mli loo amɛbu ehe kɛjɛ ehenyɛlɔi ni miitao amɛtɔ enɔ owele lɛ ahe.

¹⁰ Kɛ́ Nyɔŋmɔ kɛɛ bo akɛ eje gbɛ ewó bo gbalɔ koni ojaje sane ko ni naa wa lɛ, te obaanu he oha tɛŋŋ? (Nyɛkanea Yeremia 1:10.) Susumɔ saji ni esa akɛ Yeremia ajaje lɛ ateŋ ekome pɛ he okwɛ. Afi 609 D.Ŋ.B. lɛ, no mli lɛ Babilon asraafoi lɛ edɔ amɛyi kɛmiiba Yerusalem. Maŋtsɛ Zedekia tee Yeremia ŋɔɔ koni eyabi Nyɔŋmɔ nii, ni esusu akɛ ebaanu sanekpakpa ko kɛjɛ Nyɔŋmɔ ŋɔɔ. Shi Nyɔŋmɔ bɛ sanekpakpa ko kɛha maŋtsɛ nɛɛ.—Nyɛkanea Yeremia 21:4-7, 10.

11. Mɛni hewɔ Yeremia naŋ enitsumɔ lɛ mlɛo lɛ, shi mɛni hewɔ no haŋ enijiaŋ aje wui lɛ?

¹¹ Ŋɔɔ lɛ akɛ esa akɛ wɔjaje saji kɛ kojomɔi ni naa wa waa wɔshi maŋtsɛmɛi ni yitseiaŋ wala, osɔfoi ni jeŋba ekpɔtɔ kɛ apasa gbalɔi. Nakai abi ni Yeremia afee. Shi Nyɔŋmɔ fiɔ wɔsɛɛ taakɛ efi Yeremia sɛɛ lɛ. (Yer. 1:7-9) Nyɔŋmɔ tsɔɔ akɛ eyɛ hekɛnɔfɔɔ yɛ oblanyo Yeremia mli, ni ekɛ wiemɔi nɛɛ wo lɛ hewalɛ akɛ: “Ŋmɛnɛ gbi nɛɛ miŋɔo mifee maŋ ní atswa gbogbo awo he, kɛ dade akulashiŋ, kɛ akɔɔble gbogboi mishi shikpɔŋ lɛ fɛɛ kɛ Yuda maŋtsɛmɛi kɛ elumɛi kɛ esɔfoi kɛ shikpɔŋ lɛ nɔ bii lɛ; ni amɛkɛo aaawu, shi amɛnyɛŋo; ejaakɛ mikɛo yɛ, ni majieo, Yehowa kɛɛ.”—Yer. 1:18, 19.

12. Mɛɛ yiŋtoi komɛi ahewɔ wɔbaanyɛ wɔkɛɛ akɛ Yeremia nu nii ahe tamɔ wɔ nɔŋŋ lɛ?

¹² Esaaa akɛ wɔsusuɔ akɛ Yeremia ji gbɔmɔ srɔto ko. Eji gbɔmɔ tamɔ wɔ nɔŋŋ. Nɔ̃ ni sa kadimɔ hu ji akɛ, Yeremia hi shi yɛ yinɔ ko ni eho mli moŋ, shi ekɛ shihilɛi ni tamɔ nɔ̃ ni wɔkɛkpeɔ lɛ eko kpe. Taakɛ eba lɛ yɛ Yeremia gbɛfaŋ lɛ, wɔkɛ mɛi srɔtoi sharaa yɛ nibii ni wɔfeɔ yɛ wɔshihilɛ mli kɛ teokrase nifeemɔi ni wɔkɛ wɔhe woɔ mli lɛ amli. Enɛ fata nibii ni wɔbaanyɛ wɔkase kɛjɛ Yeremia ŋɔɔ lɛ ahe, ni taakɛ Elia ji lɛ, Yeremia hu ji “gbɔmɔ adesa [ni yɔɔ henumɔi] tamɔ wɔ nɔŋŋ.” (Yak. 5:17) Susumɔ nibii ni wɔbaanyɛ wɔkase kɛjɛ Yeremia ŋɔɔ lɛ ekomɛi ahe okwɛ.

13, 14. Mɛni hewɔ Kristofoi komɛi baanyɛ anu shihilɛ ni Yeremia tsɔ mli yɛ Pashur dɛŋ, ni ehe mfoniri yɔɔ baafa 10 lɛ shishi lɛ?

¹³ Afii ni eho lɛ amli lɛ, bei komɛi lɛ nibii amli kpɛ́ɔ ehaa bo, shi bei komɛi hu lɛ shihilɛ lɛ kɛ bo kwɔlɔɔ gɔji, aloo jeee nakai? Nakai eba lɛ yɛ Yeremia gbɛfaŋ. Be ko lɛ, osɔfo Pashur ni yɔɔ gbɛnaa wulu ko lɛ ha agwao Yeremia, ni eha abɔ lɛ apã. Abɔ enaji, eniji, kɛ ekuɛ apã, ni no ha edɔ emli ŋmɛlɛtswai babaoo. Beni epiŋɔ yɛ apã lɛ shishi lɛ, nakai beaŋ nɔŋŋ lɛ, ehenyɛlɔi lɛ miiye ehe fɛo ni ehiii. Bo agbe ohe guɔ, ni afee bo niseniianii tamɔ nɛkɛ kulɛ, ani obaanyɛ okpee naa?—Yer. 20:1-4.

¹⁴ Shihilɛ ni Yeremia tsɔ mli lɛ hewɔ lɛ, ebɛ naakpɛɛ mɔ akɛ ejaje akɛ: “Alomɔ gbi ní afɔ́ mi yɛ nɔ lɛ! . . . Mɛɛ hewɔ po ni mijɛ musuŋ mije kpo, ní mibana deŋmegbomɔ kɛ awerɛho, ní migbii atã kwraa kɛ hiɛgbele nɛɛ?” (Yer. 20:14-18) Eyɛ faŋŋ akɛ eniiashikpamɔ mli ejɛ ewie enɛ. Ani be ko eba pɛŋ ni ofee gblinii aahu akɛ onu he akɛ obɛ nɔ̃ ko mli, sɛɛnamɔ bɛ nɔ̃ ni otsuɔ yɛ Yehowa sɔɔmɔ lɛ mli lɛ he, loo sɛɛnamɔ bɛ he po akɛ oya nɔ osɔmɔ Yehowa? Kɛ́ mɛi fɛɛ ni ená henumɔi ni tamɔ nɛkɛ pɛŋ lɛ kase shihilɛi ni Yeremia tsɔ mli, kɛ nɔ̃ ni jɛ mli kɛba lɛ he nii jogbaŋŋ lɛ, ebaaye ebua amɛ.

15. Mɛni hewɔ kɛ́ wɔsusu bɔ ni bei komɛi lɛ Yeremia mii shɛɔ ehe kɛkɛ nɔŋŋ lɛ ewerɛ eho ehe lɛ he lɛ, wɔbaaná he sɛɛ lɛ?

¹⁵ Beni gbalɔ lɛ wie akɛ ebaalá eha Yehowa ni ejie eyi lɛ sɛɛ nɔŋŋ ni ewie wiemɔi ni wɔkaneɔ yɛ Yeremia 20:14-18 ni tsɔɔ akɛ efee gblinii lɛ. (Nyɛkanea Yeremia 20:12, 13.) Ani okadi akɛ bei komɛi lɛ, bɔ ni onuɔ nii ahe ohaa yɛ ŋmɛlɛtswaa ko mli lɛ tsakeɔ trukaa? Oyɛ miishɛɛ waa, kɛkɛ nɔŋŋ lɛ owerɛ eho ohe. Anɔkwa, kɛ́ wɔ fɛɛ wɔpɛi Yeremia niiashikpamɔ nɛɛ mli lɛ, wɔbaaná he sɛɛ. Ekã shi faŋŋ akɛ, eji gbɔmɔ ni yɔɔ henumɔi tamɔ wɔ nɔŋŋ. Belɛ, kɛ́ wɔpɛi nuu nɛɛ ni Bɔlɔ lɛ kɛ lɛ tsu nii waa akɛ enaawielɔ lɛ nifeemɔi, kɛ bɔ ni efee enii yɛ shihilɛi komɛi amli lɛ mli lɛ, wɔbaanyɛ wɔná he sɛɛ babaoo.—2 Kron. 36:12, 21, 22; Ezra 1:1.

16. Namɛi titri baaná fãmɔ ni Yehowa kɛha Yeremia lɛ he miishɛɛ?

¹⁶ Yiŋ ni ehe bahia ni Yeremia akpɛ yɛ gbalashihilɛ he lɛ ji yiŋtoo kroko hewɔ ni wɔteŋ mɛi komɛi baanyɛ akɛɛ akɛ amɛshihilɛ tamɔ enɔ̃ lɛ. Mɛɛ yiŋ ehe bahia ni ekpɛ yɛ gbalashihilɛ he? Nyɔŋmɔ kɛ fãmɔ ko ni ekaaa ni baanyɛ afee nɔ̃ ko ni wa kɛha Yeremia lɛ ha lɛ: Kaabote gbalashihilɛ mli. (Nyɛkanea Yeremia 16:2.) Mɛni hewɔ Yehowa kɛ fãmɔ nɛɛ ha Yeremia, ni te fãmɔ nɛɛ sa Yeremia he eha tɛŋŋ? Mɛni yɔɔ amaniɛbɔɔ nɛɛ mli ni nyɛmimɛi hii kɛ yei ni bɛ gbalashihilɛ mli hefatalɔi lɛ baaná he miishɛɛ—kɛji amɛ diɛŋtsɛ amɛsumɔɔ ni amɛhi shi nakai jio, shihilɛ ko hewɔ ni jio? Kɛfata he lɛ, ani nɔ̃ ko yɛ fãmɔ ni Nyɔŋmɔ kɛha Yeremia nɛɛ mli ni esa akɛ Odasefoi ni ebote gbalashihilɛ mli lɛ ajwɛŋ nɔ? Ni mɛi ni ebote gbalashihilɛ mli ni bɛ ‘bi hii kɛ bi yei’ lɛ hu? Mɛɛ gbɛ nɔ sane ni kɔɔ Yeremia he nɛɛ baanyɛ aye abua bo?

17. Gbalɔ Yeremia wiemɔi ni yɔɔ Yeremia 38:20 lɛ baanyɛ aha wɔsusu mɛni he?

¹⁷ Esa kadimɔ akɛ, be ko lɛ, Yeremia wo Yuda maŋtsɛ ko hewalɛ akɛ: “Bó Yehowa gbee toi, bɔ ni miwieɔ mitsɔɔo nɛɛ, ni aaahi ahao, ni oyi aaaná wala!” (Yer. 38:20) Nɛkɛ amaniɛbɔɔ nɛɛ tsɔɔ wɔ gbɛ ni nɔ bɛ ni wɔbaanyɛ wɔtsɔ nɔ wɔkɛ mɛi ashara. Bɔ ni wɔkɛ mɛi ni tsɔko Yehowa tsuji, shi wɔbaanyɛ wɔye wɔbua amɛ lɛ yeɔ haa lɛ hu fata he. Kɛfata he lɛ, bɔ ni Yeremia fee enii yɛ mɛi ni boɔ Nyɔŋmɔ toi lɛ ahe lɛ ji nɔkwɛmɔnɔ kpakpa kɛha wɔ ŋmɛnɛ. Hɛɛ, wɔbaanyɛ wɔkase nibii kpakpai babaoo kɛjɛ Yeremia ŋɔɔ.

18, 19. Mɛɛ gbɛi komɛi abaanyɛ atsɔ nɔ akase Yeremia kɛ Yeremia Yaafo woji lɛ?

¹⁸ Wolo nɛɛ baaye abua bo ni opɛi Biblia mli woji ni ji Yeremia kɛ Yeremia Yaafo lɛ amli, ni ebaaye ebua bo hu ni okase nii kɛjɛ woji nɛɛ amli. Mɛɛ gbɛ nɔ? Akɛ mumɔ tsirɛ bɔfo Paulo ni eŋma akɛ: “Ŋmalɛ fɛɛ ŋmalɛ ni jɛ Nyɔŋmɔ Mumɔ lɛŋ lɛ ehi ha nitsɔɔmɔ kɛ hiɛkamɔ kɛ mɔsaamɔ kɛ tsɔsemɔ ni yɔɔ jalɛ mli.” (2 Tim. 3:16) Yeremia kɛ Yeremia Yaafo woji lɛ fata Ŋmalɛi nɛɛ ahe.

¹⁹ Anɔkwa, abaanyɛ atsɔ gbɛi srɔtoi anɔ akase Yeremia kɛ Yeremia Yaafo woji lɛ koni aná amɛhe sɛɛ. Akɛ nɔkwɛmɔnɔ lɛ, mɔ ko baanyɛ akpɛ mli akɛ ebaakase kukuji ni yɔɔ woji enyɔ nɛɛ amli lɛ ekomekomei koni enu shihilɛ mli ni ajɛ aŋma lɛ shishi, loo enu kuku fɛɛ kuku ni yɔɔ woji nɛɛ amli lɛ ashishi. Aloo mɔ ko baanyɛ ekɛ ejwɛŋmɔ aya aŋkroaŋkroi kɛ nibii komɛi ni tee nɔ ni awie he yɛ Yeremia kɛ Yeremia Yaafo woji lɛ amli lɛ anɔ, ni ekɛto aŋkroaŋkroi komɛi ni yɔɔ ŋmɛnɛ loo nibii komɛi ni miiya nɔ ŋmɛnɛ lɛ ahe. (Nyɛkɛtoa Yeremia 24:6, 7; 1 Korintobii 3:6 he.) Mɔ ko hu baanyɛ akase shihilɛ mli ni nibii ni abɔ amɛhe amaniɛ yɛ woji enyɔ nɛɛ amli lɛ ba yɛ lɛ he nii. (Yer. 39:1-9) Anɔkwa, bɔni afee ni wɔnyɛ wɔkase Yeremia kɛ Yeremia Yaafo woji lɛ, ni wɔnu shishi jogbaŋŋ lɛ, ehe baahia ni wɔle shihilɛ mli ni nibii ni awie he yɛ woji nɛɛ amli lɛ ba yɛ lɛ ahe saji komɛi. Wolo nɛɛ Yitso 2 lɛ, ni saneyitso ji “Gbalɔ ko ni Sɔmɔ yɛ ‘Naagbee Gbii lɛ Amli’” lɛ, baaye abua wɔ koni wɔle nibii komɛi ni tee nɔ yɛ Yeremia beaŋ kɛ bɔ ni Nyɔŋmɔ tsu saji ahe nii eha yɛ nakai beaŋ.

20. Mɛɛ gbɛ nɔ wɔbaatsɔ wɔkase Yeremia kɛ Yeremia Yaafo woji lɛ yɛ wolo nɛɛ mli?

²⁰ Gbɛ titri ni wɔbaatsɔ nɔ wɔkase Yeremia kɛ Yeremia Yaafo woji lɛ yɛ wolo nɛɛ mli lɛ yɛ srɔto. Wɔbaasusu woji enyɔ nɛɛ ahe akɛ nikeenii ni Nyɔŋmɔ kɛha wɔ ni baaye abua wɔ koni wɔnyɛ wɔhi shi akɛ Kristofoi ŋmɛnɛ. (Tito 2:12) Wɔbaana faŋŋ akɛ saji babaoo ni ‘hi kɛha nitsɔɔmɔ’ yɛ woji enyɔ nɛɛ amli. Ŋaawoi kɛ nɔkwɛmɔnii kpakpai ni baanyɛ aye abua wɔ ni wɔfee mɛi ni sa, ni asaa wɔ koni wɔnyɛ wɔkpee shihilɛi srɔtoi ni wɔkɛkpeɔ lɛ anaa lɛ yɛ woji nɛɛ amli. Kɛ́ wɔji asafoŋ onukpai, gbɛgbalɔi, mɛi ni yaa baa dani weku lɛ mlibii lɛ anine tɛkeɔ amɛtsɛŋ, ŋamɛi ni tsuuu heloonaa nitsumɔi, skulbii, oshijafoi, loo wɔbote gbalashihilɛ mli jio lɛ, wɔbaanyɛ wɔná saji ni yɔɔ woji nɛɛ amli lɛ ahe sɛɛ. Wɔteŋ mɔ fɛɛ mɔ baana akɛ, yelikɛbuamɔ ni jɛ Nyɔŋmɔ ŋɔɔ ni ‘baasaa wɔ pɛpɛɛpɛ kɛha nitsumɔ kpakpa fɛɛ nitsumɔ kpakpa’ lɛ yɛ woji enyɔ ni ajɛ mumɔŋ aŋmala nɛɛ amli.—2 Tim. 3:17.

21. Mɛni hewɔ okɛ miishɛɛ kpaa nikasemɔi ni baanyiɛ sɛɛ lɛ agbɛ lɛ?

²¹ Beni okaseɔ wolo nɛɛ, kadimɔ otii ni yɔɔ emli yitsei lɛ ateŋ eko fɛɛ eko mli ni obaanyɛ okɛtsu nii lɛ. Ŋwanejee ko bɛ he akɛ saji ni yɔɔ Yeremia kɛ Yeremia Yaafo woji lɛ amli lɛ baama nɔ̃ ni Paulo wie lɛ nɔ mi akɛ: “Nibii abɔ ní aŋma ato momo lɛ, aŋma ni etsɔɔ wɔ nii, koni wɔkɛ hiɛmiamɔ kɛ ŋmalɛi lɛ amli miishɛjemɔ lɛ aná hiɛnɔkamɔ.”—Rom. 15:4, Ga Biblia hee.