Ani Okaiɔ?

Ani okane Buu-Mɔɔ srɔtoi ni ba nyɛsɛɛ nɛɛ jogbaŋŋ? Kwɛmɔ akɛ obaanyɛ oha sanebimɔi ni nyiɛ sɛɛ nɛɛ ahetoo lo:

Ani Samson yitsɔi lɛ ha lɛ hewalɛ?

Samson yitsɔi lɛ diɛŋtsɛ haaa lɛ hewalɛ. Eyitsɔi lɛ damɔ shi kɛha wekukpaa krɛdɛɛ ni yɔɔ ekɛ Nyɔŋmɔ teŋ akɛ Nazirnyo lɛ. Beni Delila ha ashɛ Samson yi lɛ, esa nakai wekukpaa lɛ he.—4/15, baafa 9.

Mɛɛ nibii etɛ ni haa wɔtsui lɛ náa hewalɛ lɛ baanyɛ aha wɔfonirifeemɔŋ tsui lɛ hu aná hewalɛ?

(1) Niyenii. Taakɛ ehe miihia ni wɔtsui lɛ aná niyenii ni hewalɛ yɔɔ mli lɛ, esa akɛ wɔná mumɔŋ niyenii kpakpai ni fá bɔ ni sa. (2) Kpɔiaŋgbɔlemɔ. Ekãa ni wɔkɛbaatsu shiɛmɔ nitsumɔ lɛ baanyɛ aha wɔfonirifeemɔŋ tsui lɛ aná hewalɛ. (3) He ni wɔyɔɔ. Wɔbaanyɛ wɔba nɔnyɛɛ shi kɛtsɔ nanemɛi héyelilɔi ni susuɔ wɔhe ní wɔkɛaabɔ lɛ nɔ.—4/15, baafa 16.

Kɛ́ daimonioi ená onɔ hewalɛ lɛ, te ooofee tɛŋŋ oye ohe lɛ?

Tsi ohe kɛjɛ nɔ fɛɛ nɔ ni baanyɛ aha okɛ mumɔi fɔji lɛ ashara lɛ he. (Bɔf. 19:19, 20) Bɔɔ mɔdɛŋ fɛɛ ni obaanyɛ ni ‘otsi obɛŋkɛ Nyɔŋmɔ,’ ni oná nɔmimaa akɛ ebaanyɛ eye ebua bo koni oye ohe kɛjɛ daimonioi lɛ ahe, ni ebaafee hu. (Yak. 4:7, 8)—7/1, baafa 12.

Mɛni hewɔ kɛ́ mɔ ko miiha wiemɔ yɛ yara nɔ lɛ, esaaa akɛ ekɛ Lala 116:15 lɛ toɔ mɔ ni egbo lɛ he lɛ?

Nakai ŋmalɛ lɛ kɛɔ akɛ: “Yehowa mɛi krɔŋkrɔŋi lɛ agbele jara wa yɛ ehiɛ.” Enɛ tsɔɔ akɛ Nyɔŋmɔ buɔ enɔkwafoi lɛ fɛɛ agbele akɛ nɔ ko ni jara wa. Eŋmɛŋ gbɛ ni akpata enɔkwafoi lɛ ahiɛ kɛjɛ shikpɔŋ lɛ nɔ akɛ kuu.—5/15, baafa 22.

Namɛi ji colporteurs lɛ?

Dani afi 1931 baashɛ lɛ, “colporteur” ji gbɛ́i ni akɛtsɛ mɛi ni amrɔ nɛɛ atsɛɔ amɛ gbɛgbalɔi lɛ.—5/15, baafa 31.

Mɛni hewɔ gbɛ nɔ ni Yesu tsɔ egbo lɛ tsɔ pampi eha Yudafoi komɛi lɛ?

Amaniɛbɔɔ ko tsɔɔ akɛ, Yudafoi ni hi shi yɛ klɛŋklɛŋ afii 100 lɛ mli lɛ na gbɛ nɔ ni Yesu tsɔ egbo lɛ akɛ eyɛ hiɛgbele. Amɛhiɛ susumɔ akɛ gbɛ ni mɔ ko tsɔɔ nɔ egboɔ lɛ tsɔɔ esubaŋ diɛŋtsɛ. No hewɔ lɛ, amɛbu Yesu akɛ eji mɔ fɔŋ.—7/1, baafa 13.

Namɛi feɔ “maŋtsɛmɛi nɛɛ fɛɛ” ni Daniel 2:44 lɛ tsi tã lɛ?

Nakai ŋmalɛ lɛ kɔɔ maŋtsɛyelii, loo nɔyelii ni dade amaga ni Daniel wie he lɛ fãi srɔtoi lɛ feɔ amɛhe mfoniri lɛ ahe.—6/15, baafa 17.

Mɛɛ be Anglo-Amerika Jeŋ Hewalɛ lɛ batsɔ jeŋ hewalɛ ni ji kpawo ní Biblia lɛ gba he sane efɔ̃ shi lɛ?

Maji ni bɔ he enyɔ kɛmiiye nɔ akɛ jeŋ hewalɛ nɛɛ ba shihilɛ mli beni Britain kɛ United States fee ekome kɛtsu yiŋtoo krɛdɛɛ ko he nii yɛ Jeŋ Ta I lɛ mli lɛ.—6/15, baafa 19.

Mɛɛ shishitoo mlai komɛi baanyɛ aye abua mɔ ko koni ekpɛ yiŋ ni baaha eye omanye wɔsɛɛ?

Susumɔ nɔ ni baajɛ oyiŋkpɛi lɛ amli kɛba lɛ he. (Abɛi 22:3) Bo diɛŋtsɛ pɛimɔ nibii ni oyɔɔ hegbɛ akɛ ohalaa mli lɛ amli. Susumɔ bɔ ni yiŋ ni okpɛɔ amrɔ nɛɛ baasa oshihilɛ he wɔsɛɛ lɛ he. (Abɛi 21:5) Bɔɔ mɔdɛŋ ni oshɛ otii ni okɛmamɔ ohiɛ lɛ ahe. (Yoh. 17:3)—7/1, baafa 18-19.

Mɛɛ Biblia mli shishitoo mlai baanyɛ aye abua bo koni onyɛ okpee shika he naagbai anaa?

Buu naa okwɛ dã. (Luka 14:28) Ha oshihilɛ afee mlɛo. (Abɛi 22:3) Kaajie nitsumɔi amli. (Abɛi 29:25) Omii ashɛ nɔ ni oyɔɔ lɛ he. (Fil. 4:11, 12)—7/1, baafa 20-21.