Ani Nyɔŋmɔ Kpaŋmɔi Lɛ Ahe Baaba Sɛɛnamɔ Aha Bo?
“‘Omli aaajɔɔ jeŋmaji lɛ fɛɛ yɛ.’ Belɛ mɛi ni jɛ hemɔkɛyeli mli lɛ, ajɔɔ amɛ kɛ Abraham ni hé ye Iɛ.”—GALATABII 3:8, 9.
1. Mɛni yinɔsane tsɔɔ yɛ nɔ ni ejɛ nɔyelii pii amli eba lɛ he?
“MLIHILƆI [aloo, hiɛtɛjelɔi] nɔyelɔi yiwalɔi” ji bɔ ni atsɛɔ afii ohai 18 lɛ mli Europa nɔyelɔi lɛ ekomɛi. ‘Amɛhiɛ amɛwebii lɛ ahe jwɛŋmɔ kpakpa akɛ amɛaaye amɛ nɔ tamɔ tsɛ ni yɔɔ mlihilɛ, shi amɛ gbɛjianɔtoi lɛ fite ni amɛtsakemɔi lɛ gbee shi shwɛtɛɛ.’a (The Encyclopedia Americana) Enɛ ji nɔ titri ni ha maŋ hiɛ atuatsemɔi loo nɔyeli butumɔi kpele Europa fɛɛ lɛ.
2, 3. Yehowa yɛ sɔrɔto yɛ maŋtsɛmɛi ni ji adesai lɛ ahe yɛ mɛɛ gbɛ nɔ?
2 Kwɛ bɔ ni Yehowa yɔɔ sɔrɔto kwraa yɛ adesai nɔyelɔi ni anyɛɛɛ atsɔɔ nɔ ni baajɛ amɛnifeemɔi amli aba lɛ ahe. Wɔnyɛɔ wɔnaa bɔ ni adesai ahe hiaa amɛ akɛ amɛaana tsakemɔ ko ni yɛ naagbee lɛ ekɛ tsabaa diɛŋtsɛ kɛha jalɛsane ni ayeee kɛ piŋmɔ aaaba lɛ yɛ faŋŋ mli. Shi esaaa akɛ wɔhaoɔ akɛ Nyɔŋmɔ nifeemɔi ni kɛ enɛ aaaba lɛ damɔ taomɔ nii ko ni baaho aya yɛ be kukuoo mli pɛ nɔ. Eŋma eyiŋtoo akɛ ekɛ naanɔ jɔɔmɔi baaba abaha adesai ni heɔ yeɔ lɛ yɛ je lɛ wolo ni aja fe fɛɛ lɛ mli. Enɛ baaba mli nakai ni gbɔmɛi lɛ atsutsu maŋ, weku, tsɔsemɔ loo gbɛhe yɛ shihilɛ mli kɔɔɔ he eko. (Galatabii 3:28) Shi ani ooonyɛ okɛ ohe afɔ enɛ nɔ?
3 Bɔfo Paulo tsɛ wiemɔ kɛjɛ nɔmimaa ni Nyɔŋmɔ kɛha Abraham lɛ eko mli: “Lɛlɛŋ, jɔɔmɔ majɔɔo.” Paulo kɛfata he akɛ akɛni “Nyɔŋmɔ nyɛŋ emale” hewɔ lɛ, . . . ”wɔna miishɛjemɔ ni wa, ni wɔ mɛi ni wɔyaba abo lɛ, wɔkɛmɔ nɔhiɛkamɔ ni ka wɔhiɛ lɛ mli.” (Hebribii 6:13-18) Abaanyɛ awo hekɛnɔfɔɔ ni wɔyɔɔ yɛ nakai jɔɔmɔi lɛ amli lɛ mli hewalɛ lolo kɛtsɔ gbɛjianɔtoo kpakpa nɔ ni Nyɔŋmɔ tsɔ ekɛma nɔdaamɔ nɔ kɛha enɛ feemɔ lɛ nɔ mi lɛ.
4. Mɛɛ gbɛ nɔ Nyɔŋmɔ tsɔ ekɛ kpaŋmɔi sɔrɔtoi tsu nii koni ekɛtsu eyiŋtoo he nii yɛ?
4 Wɔtsɔ hiɛ wɔna momo akɛ Nyɔŋmɔ kɛ Abraham kpaŋ ni enɛ kɔɔ seshi ni lɛ enɔ abaatsɔ ajɔɔ “shikpɔŋ lɛ nɔ jeŋmaji fɛɛ” lɛ he. (1 Mose 22:17,18) Israelbii lɛ batsɔmɔ heloonaa seshibii, shi yɛ mumɔŋ shishinumɔ ni he hiaa babaoo lɛ naa lɛ, Yesu Kristo bafee Abraham seshi lɛ mɔ titri. Yesu hu ji Abraham Kpeteŋkpele, Yehowa Bi loo Seshi. Kristofoi ni ji “Kristo nii” lɛ feɔ Abraham seshi lɛ fa ni ji enyɔ lɛ. (Galatabii 3:16, 29) Beni eto Abraham kpaŋmɔ lɛ sɛɛ lɛ, kɛkɛ ni Nyɔŋmɔ Mla kpaŋmɔ ni ekɛ Israel maŋ lɛ fee lɛ bafata he yɛ be kukuoo mli. Etsɔɔ akɛ Israelbii lɛ ji eshafeelɔi ni naanɔ osɔfo kɛ afɔleshaa ni yeɔ emuu he miihia amɛ. Ebu Seshi lɛ wekukpaa lɛ he ni eye ebua koni ayoo lɛ. Mla kpaŋmɔ lɛ hu tsɔɔ akɛ, Nyɔŋmɔ baatsɔ gbɛ ko nɔ ni ekɛ osɔfoi amaŋtsɛyeli ni ji maŋ aba. Beni mla lɛ tsuɔ nii lolo lɛ, Nyɔŋmɔ kɛ David fee kpaŋmɔ koni ena maŋtsɛmɛi aweku yɛ Israel. David Maŋtsɛyeli kpaŋmɔ lɛ hu kɛ enine tsɔɔ mɔ ko ni baaye shikpɔŋ lɛ nɔ kwraa kɛya naanɔ.
5. Mɛɛ sanebimɔi loo naagbai ehe hiaa ni ana naa lolo?
5 Kɛlɛ, otii komɛi yɛ nɛkɛ kpaŋmɔi nɛɛ amli ni tamɔ nɔ ni yeko emuu aloo ehe miihia ni atsɔɔ mli. Akɛ nɔkwɛmɔ nɔ lɛ, kɛji akɛ Seshi ni baa lɛ baafee maŋtsɛ yɛ David wekukpaa lɛ mli lɛ, te eeefee tɛŋŋ efee naanɔ osɔfo ni baafee babaoo fe tsutsu osɔfoi lɛ? (Hebribii 5:1; 7:13,14) Ani nɛkɛ Maŋtsɛ nɛɛ baanyɛ aye nɔyeli he ni da fe shikpɔŋ nɛɛ lɛ nɔ? Te aaafee tɛŋŋ ni seshi lɛ fa ni ji enyɔ lɛ afee mɛi ni sa akɛ amɛbaa Abraham kpeteŋkpele lɛ weku lɛ mli lɛ? Ni kɛji akɛ amɛbaanyɛ po lɛ, mɛɛ nɔyeli he amɛbaana, akɛni amɛteŋ mɛi pii jeee mɛi ni jɛ David mli lɛ hewɔ? Nyɛhaa wɔkwɛa bɔ ni Nyɔŋmɔ tsɔ mla naa eto kpaŋmɔi krokomɛi ahe gbɛjianɔ efata he koni akɛha nɛkɛ sanebimɔi nɛɛ ahetoo, koni egbele gbɛ kɛha naanɔ jɔɔmɔ.
Kpaŋmɔ Kɛha Ŋwɛi Osɔfo
6, 7. (a) Taakɛ Lala 110:4 lɛ tsɔɔ lɛ, mɛɛ kpaŋmɔ kroko Nyɔŋmɔ to? (b) Mɛni yɔɔ enɛ sɛɛ ni yeɔ ebuaa wɔ koni wɔnu kpaŋmɔ ni akɛfata he nɛɛ shishi?
6 Taakɛ wɔna yɛ nɔ ni kɔɔ Mla kpaŋmɔ lɛ he lɛ mli lɛ, Nyɔŋmɔ kɛ David kpaŋ kɛha eshwiei (seshi ko) ni baaye nɔ kɛya naanɔ yɛ shikpɔŋ lɛ nɔyeli he ko nɔ. Shi Yehowa jie lɛ kpo etsɔɔ David akɛ naanɔ osɔfo ko baaba. David ŋma akɛ: “Yehowa eka kita ni eshwaŋ ehe: ‘Bo ji osɔfo kɛyashi naanɔ yɛ Melkizedek gbɛjianɔ lɛ naa.’” (Lala 110:4) Mɛni hɔ nɛkɛ kita ni Nyɔŋmɔ ka ni fee mɛi enyɔ ateŋ kpaŋmɔ ni ka Yehowa kɛ Osɔfo ni baa lɛ teŋ lɛ sɛɛ?
7 Melkizedek efee blema Salem maŋtsɛ, ni eka shi faŋŋ akɛ jɛmɛ ji he ni ama Yerusalem maŋtiase lɛ (ni gbɛi “Salem” fata he) lɛ yɛ lɛ. Bɔ ni Abraham kɛ lɛ ye ha lɛ ma nɔ mi akɛ eji maŋtsɛ ni ja “Ŋwɛi Flooflo Nyɔŋmɔ lɛ.” (1 Mose 14:17-20) Ni kɛlɛ, Nyɔŋmɔ wiemɔ ni yɔɔ Lala 110:4 lɛ tsɔɔ akɛ Melkizedek ji osɔfo, ni ehaa efeɔ gbɔmɔ sɔrɔto ko. Eji maŋtsɛ kɛ osɔfo fɛɛ, ni esɔmɔ yɛ he ni David maŋtsɛmɛi lɛ kɛ Levi osɔfoi lɛ tsu amɛ nitsumɔi ni ajɛ ŋwɛi ato he gbɛjianɔ aha amɛ lɛ he nii yɛ lɛ.
8. Namɔ akɛ lɛ fee kpaŋmɔ kɛba osɔfo ni tamɔ Melkizedek nɛɛ, ni mɛni jɛ mli ba?
8 Paulo kɛ kpaŋmɔ nɛɛ mlitsɔɔmɔ ni kɔɔ osɔfo ni tamɔ Melkizedek he lɛ ha lolo. Akɛ nɔkwɛmɔ nɔ lɛ, ekɛɔ akɛ Yesu Kristo ji mɔ ni “Nyɔŋmɔ wo lɛ osɔfonukpa yɛ Melkizedek gbɛjianɔ lɛ naa.” (Hebribii 5:4-10; 6:20; 7:17, 21, 22) Eyɛ mli akɛ eka shi faŋŋ akɛ Melkizedek yɛ fɔlɔi ni ji adesai moŋ, shi nɔ ko bɛ ni aŋma afɔ shi ni kɔɔ eyinɔsane he. No hewɔ lɛ, ni Yesu aaana gbɛhe akɛ osɔfo yɛ Melkizedek wekukpaa ni aŋma afɔ shi lɛ naa lɛ, ehalamɔ lɛ ba kɛjɛ Nyɔŋmɔ ŋɔɔ. Akɛ Yesu osɔfoyeli lɛ haŋ esɛɛyelɔ ko, ejaakɛ etsɔ “naanɔ osɔfonukpa.” Nakai enɛ ji, ejaakɛ esɔfoyeli sɔɔmɔ lɛ mli sɛɛnamɔi lɛ baahi shi kɛya naanɔ. Wɔbaanyɛ wɔna jɔɔmɔ lɛlɛŋ akɛni wɔyɔɔ osɔfo ni “enyɛɔ mɛi ni tsɔɔ enɔ kɛbaa Nyɔŋmɔ ŋɔɔ lɛ ayiwala ehereɔ kwraa” ni agbɛnɛ enyɛɔ efaa ni ekudɔɔ anɔkwafoi lɛ kɛyaa naanɔ lɛ hewɔ.—Hebribii 7:1-3, 15-17, 23-25.
9, 10. Yɛ mɛɛ gbɛ nɔ kpaŋmɔ ni ji enumɔ nɛɛ he nilee haa shishinumɔ ni wɔyɔɔ yɛ bɔ ni Nyɔŋmɔ baaha eyiŋtoo lɛ aba mli lɛ mli lɛɛɔ?
9 Anɔkwale kroko ni sa kadimɔ ji akɛ Yesu nitsumɔ akɛ Maŋtsɛ kɛ Osɔfo lɛ tekeɔ shikpɔŋ lɛ nɔ nɔyeli. Yɛ sane lɛ nɔŋŋ mli yɛ he ni etsi kpaŋmɔ kɛha osɔfo ni tamɔ Melkizedek lɛ ta lɛ, David ŋma akɛ: “Yehowa kɛɛ mi-Nuŋtsɔ lɛ akɛ: ‘Ta mininejurɔ nɔ kɛyashi beyinɔ ni maŋɔ ohenyɛlɔi lɛ mafee onajiashi maaŋoo.’” Wɔbaanyɛ wɔna akɛ Yesu—David Nuŋtsɔ lɛ—baana gbɛhe ko yɛ ŋwɛi kɛ Yehowa, ni enɛ ba mli beni ekwɔ kɛtee ŋwɛi lɛ. Kristo baanyɛ ajɛ ŋwɛi ni ekɛ e-Tsɛ lɛ aye nɔ ni eba ehenyɛlɔi lɛ ashi ni etsu kojomɔi ahe nii.—Lala 110:1, 2; Bɔfoi lɛ Asaji 2:33-36; Hebribii 1:3; 8:1; 12:2.
10 No hewɔ lɛ, kpaŋmɔ ni ji enumɔ nɛɛ he nii ni wɔleɔ hewɔ lɛ, wɔnaa gbɛjianɔtoo kpakpa ni mɔɔ shi ni Yehowa baatsɔ nɔ atsu eyiŋtoo lɛ he nii lɛ yɛ gbɛ ni mli lɛɛ nɔ. Emaa nɔ mi akɛ seshi lɛ shishijee fa lɛ hu baafee osɔfo yɛ ŋwɛi, ni akɛ ehegbɛ akɛ Maŋtsɛ kɛ Osɔfo lɛ baafee jeŋ muu fɛɛ nɔ.—1 Petro 3:22.
Kpaŋmɔ Hee Kɛ Seshi Lɛ Fa Ni Ji Enyɔ Lɛ
11. Mɛɛ naatsii nibii loo nibii ni mli wawai yɔɔ ni kɔɔ nɛkɛ seshi lɛ fa ni ji enyɔ nɛɛ he?
11 Beni wɔtsɔ hiɛ wɔsusu Abraham kpaŋmɔ lɛ he lɛ, wɔkadi akɛ Yesu batsɔ shishijee seshi lɛ mli mɔ titri kɛtsɔ heloonaa hegbɛ nɔ. Ejɛ eblematsɛ Abraham mli diɛŋtsɛ, ni akɛ adesa ni yeɔ emuu lɛ, eji Abraham Kpeteŋkpele lɛ Bi ni akpɛlɛ enɔ. Shi, adesai ni amɛna hegbɛ akɛ amɛaatsɔmɔ Abraham seshi lɛ fa ni ji enyɔ lɛ hu, “gboshiniyelɔi hu yɛ shiwoo lɛ naa” lɛ hu? (Galatabii 3:29) Akɛni amɛyeee emuu, ni amɛji Adam eshafeelɔ lɛ weku lɛ fa hewɔ lɛ, amɛbaafee mɛi ni esaaa akɛ amɛhiɔ Yehowa, Abraham kpeteŋkpele lɛ weku lɛ mli. Te aaafee tɛŋŋ ni aaaye gbɛtsii nii ni ji emuu ni ayeee nɛɛ nɔ lɛ? Adesai nyɛŋ afee nakai, shi ejeee nii ni Nyɔŋmɔ nyɛŋ afee.—Mateo 19:25, 26.
12, 13. (a) Nyɔŋmɔ gba kpaŋmɔ kroko he sane efɔ shi yɛ mɛɛ gbɛ nɔ? (b) Kpaŋmɔ nɛɛ mli mɛɛ nɔ krɛdɛɛ ko esa akɛ wɔsusu he?
12 Beni Mla lɛ yɔɔ lolo lɛ, Nyɔŋmɔ tsɔ egbalɔ nɔ egba akɛ: “Ni mikɛ Israel we lɛ kɛ Yuda we lɛ aaakpaŋ kpaŋmɔ hee: Etamɔɔɔ kpaŋmɔ ni mikɛ amɛtsɛmɛi lɛ kpaŋ . . . lɛ; nakai mikpaŋmɔ lɛ amɛku mli. . . Maŋɔ mimla lɛ mawo amɛmli ni maŋma yɛ amɛtsui nɔ, ni matsɔ amɛ-Nyɔŋmɔ, ni amɛ hu amɛaatsɔ mimaŋ! . . . Mɔ ko etsɔŋ enyɛmi dɔŋŋ akɛ: ‘Le Yehowa!’ Ejaakɛ amɛ fɛɛ kwa amɛaale mi . . . ejaakɛ maŋɔ amɛnishaianii lɛ mafa, ni amɛhe eshai lɛ mikaiŋ dɔŋŋ!”—Yeremia 31:31-34.
13 Kadimɔ akɛ kpaŋmɔ hee nɛɛ mli nɔ ko ji ni akɛ eshai ake, eka shi faŋŋ akɛ yɛ gbɛ ni ‘tamɔɔɔ’ gbɛjianɔtoo kɛha kooloi afɔleshai yɛ Mla lɛ shishi lɛ. Yesu ha enɛ mli fee faŋŋ yɛ gbi ni egbo lɛ. Yɛ be mli ni efata ekaselɔi lɛ ahe kɛye Hehoo lɛ taakɛ Mla lɛ biɔ lɛ, Kristo to Nuŋtsɔ lɛ Gbɛkɛnaashi Niyenii lɛ. Nɛkɛ daa afi gbijurɔyeli nɛɛ baakɔ kpulu ni wein yɔɔ mli ni amɛ fɛɛ amɛaanu eko lɛ he, ni Yesu wie nɛkɛ yɛ he: “Nɛkɛ kpulu nɛɛ ji kpaŋmɔ hee lɛ yɛ mila ni aŋɔshwie shi aha nyɛ lɛ mli.”—Luka 22:14-20.
14. Mɛni hewɔ kpaŋmɔ hee lɛ he hiaa yɛ seshi lɛ fa ni ji enyɔ ni akɛ amɛ aaaba lɛ mli lɛ?
14 No hewɔ lɛ, Yesu la lɛ ji nɔ ni baaha kpaŋmɔ hee lɛ abɔi nitsumɔ. Yɛ afɔleshaa ni yeɔ emuu ni tamɔ nɛkɛ hewɔ lɛ, Nyɔŋmɔ ‘kɛ tɔmɔi kɛ eshai baake’ shikome nyɔŋlo aha mɛi fɛɛ. Susumɔ nɔ ni enɛ baatsɔɔ lɛ he! Akɛ enyɛɔ ekɛ gbɔmɛi ni amɛtuu amɛhe amɛha ni yɔɔ Adam weku lɛ mli lɛ ahe eshai keɔ amɛ kwraa hewɔ lɛ, Nyɔŋmɔ baanyɛ abu amɛ akɛ mɛi ni bɛ esha, koni efɔ amɛ akɛ Abraham Kpeteŋkpele lɛ mumɔŋ bii, koni ekɛ mumɔ krɔŋkrɔŋ lɛ afɔ amɛ mu. (Romabii 8:14-17) No hewɔ lɛ, kpaŋmɔ hee lɛ ni Yesu afɔleshaa lɛ wo mli hewalɛ lɛ nyɛɔ ehaa ekaselɔi lɛ bafeɔ Abraham seshi lɛ fa ni ji enyɔ lɛ. Paulo ŋma akɛ: “[Yesu] etsɔ gbele nɔ ekpata mɔ ni yɔɔ gbele nɔ hewalɛ ni ji Abonsam lɛ hiɛ, ni ekpɔ mɛi ni gbele gbeyeishemɔ hewɔ lɛ amɛtsɔmɔ nyɔji yɛ amɛwala be fɛɛ mli lɛ. Ejaakɛ lɛlɛŋ, jeee ŋwɛibɔfoi eyeɔ ebuaa, shi moŋ Abraham seshibii eyeɔ ebuaa.”—Hebribii 2:14-16; 9:14.
15. Namɛi fee kpaŋmɔ hee lɛ?
15 Yɛ be mli ni Yesu baafee Teŋdamɔlɔ kɛ Afɔleshaa nɔ ni woɔ kpaŋmɔ hee lɛ mli hewalɛ lɛ, namɛi fata nɛkɛ kpaŋmɔ nɛɛ he lɛ? Yeremia gba akɛ Nyɔŋmɔ kɛ “Israel we” lɛ baakpaŋ kpaŋmɔ. Mɛɛ Israel? Jeee heloo naa Israel ni afo amɛ ketia yɛ Mla lɛ shishi lɛ, ejaakɛ kpaŋmɔ hee lɛ ha nakai tsutsu kpaŋmɔ lɛ fee emomo aloo ebe eho. (Hebribii 8:7,13; kwɛmɔ baafa 31.) Agbɛnɛ Nyɔŋmɔ kɛ Yudafoi kɛ Jeŋmajiaŋbii ni yɛ amɛ hemɔkɛyeli hewɔ lɛ ‘amɛfo amɛtsuiŋ ketia kɛtsɔ mumɔ nɔ’ yɛ okadi gbɛ nɔ lɛ baaye. Enɛ kɛ ewiemɔ ni tsɔɔ akɛ ‘abaaŋmala emlai lɛ’ yɛ mɛi ni yɔɔ kpaŋmɔ hee lɛ mli lɛ ‘ajwɛŋmɔi kɛ amɛtsuii amli’ lɛ kpaa gbee. (Romabii 2:28, 29; Hebribii 8:10) Paulo tsɛ nɛkɛ mumɔŋ Yudafoi nɛɛ akɛ “Nyɔŋmɔ Israel.”—Galatabii 6:16; Yakobo 1:1.
16. Yɛ mɛɛ gbɛ nɔ kpaŋmɔ hee lɛ yeɔ ebuaa ni anyɛɔ atsuɔ nɔ ni 2 Mose 19:6 tsɔɔ lɛ he nii?
16 Akɛni Nyɔŋmɔ kɛ mumɔŋ Israel miiye agbɛnɛ hewɔ lɛ, agbele hegbɛ shinaa ko. Beni Nyɔŋmɔ to Mla lɛ, ewie Israelbii ni baa eŋɔɔ lɛ ahe akɛ “osɔfoi amaŋtsɛyeli kɛ maŋ krɔŋkrɔŋ.” (2 Mose 19:6) Yɛ anɔkwale mli lɛ, heloo naa Israel nyɛŋ atsɔ maŋ ni emlibii fɛɛ ji maŋtsɛmɛi kɛ osɔfoi, ni efeee nakai hu. Shi Yudafoi kɛ Jeŋmajiaŋbii ni akpɛlɛ amɛ nɔ akɛ Abraham seshi lɛ fa ni ji enyɔ lɛ baanyɛ atsɔmɔ maŋtsɛmɛi kɛ osɔfoi.b Bɔfo Petro ma enɛ nɔ mi, ni ekɛɛ mɛi ni tamɔ nɛkɛ akɛ: “Shi nyɛ lɛ, weku ni ahala ji nyɛ, maŋtsɛmɛi ni yeɔ osɔfoi, jeŋmaŋ krɔŋkrɔŋ, maŋ ni eŋɔfee enɔ, koni nyɛjaje mɔ ni tsɛ nyɛ kɛjɛ duŋ lɛ mli kɛba lɛ diɛŋtsɛ enaakpɛɛ la lɛ he lɛ agbojee.” Agbɛnɛ hu eŋma yɛ ‘gboshinii ni fiteee ni aŋɔto yɛ ŋwɛi aha amɛ’ lɛ he.—1 Petro 1:4; 2:9, 10.
17. Mɛni hewɔ kpaŋmɔ hee lɛ “hi” fe Mla kpaŋmɔ lɛ?
17 No hewɔ lɛ, kpaŋmɔ hee lɛ kɛ Abraham kpaŋmɔ lɛ ni etsɔ hiɛ ni eyɔɔ momo lɛ tsuɔ nii koni akɛna seshi lɛ fa ni ji enyɔ lɛ. Nɛkɛ kpaŋmɔ hee ni ka Yehowa kɛ Kristofoi ni akɛ mumɔ efɔ amɛ lɛ ateŋ lɛ ŋmɛɔ gbɛ koni ato ŋwɛi maŋ ko ni feɔ maŋtsɛmɛi kɛ osɔfoi sɔŋŋ yɛ Abraham Kpeteŋkpele lɛ odehei aweku lɛ mli. Belɛ wɔbaanyɛ wɔna nɔ hewɔ ni Paulo kɛɛ akɛ enɛ ji “kpaŋmɔ ni hi fe tsutsu nɔ lɛ ni adamɔ shiwoi ni hi fe tsutsu nii lɛ anɔ akpaŋ” lɛ. (Hebribii 8:6) Nɔ ni fata nakai shiwoi lɛ ahe hu ji jɔɔmɔ ni ji Nyɔŋmɔ mla ni aaaŋmala yɛ mɛi ni amɛtuu amɛhe amɛha ni akaiii amɛhe eshai lɛ dɔŋŋ, ni ‘amɛteŋ mɔ bibioo kɛyashi mɔ wulu nɔ le Yehowa’ lɛ atsuii amli.—Hebribii 8:11.
Yesu Kpaŋmɔ Kɛha Maŋtsɛyeli
18. Kpaŋmɔi ni wɔsusu he kɛbashi bianɛ lɛ haaa Nyɔŋmɔ yiŋtoo aba mli kwraa kɛmɔ shi yɛ mɛɛ shishinumɔ naa?
18 Kɛ wɔjwɛŋ kpaŋmɔi ekpaa ni wɔsusu he lɛ ahe lɛ, etamɔ nɔ ni Yehowa etsɔ mla naa eto gbɛjianɔ kɛha nibii fɛɛ ni he hiaa ni baaha etsu eyiŋtoo he nii lɛ. Ni kɛlɛ, Biblia lɛ kɛ kpaŋmɔ kroko baa ni tsaa nɔ ni wɔsusu he lɛ nɔ, kpaŋmɔ ni muaa nibii krokomɛi anaa kɛfataa sane ni he hiaa nɛɛ he. Kristofoi ni akɛ mumɔ efɔ amɛ lɛ kpaa gbɛ yɛ gbɛ ni ja nɔ akɛ ‘Nuŋtsɔ lɛ aaajie amɛ kɛaajɛ nitsumɔi fɔji fɛɛ mli ni ebaahere amɛ yiwala kɛya eŋwɛi maŋtsɛyeli lɛ mli.’ (2 Timoteo 4:18) Amɛbaatsɔmɔ maŋtsɛmɛi kɛ osɔfoi amaŋ yɛ ŋwɛi, shi nɛgbɛ ji he ni amɛbaaye nɔ yɛ? Kɛ atee amɛ shi kɛtee ŋwɛi lɛ, Kristo yɛ jɛmɛ momo akɛ osɔfonukpa ni yeɔ emuu. Edamɔ shi hu akɛ mɔ ni yɔɔ hewalɛ akɛ maŋtsɛ kɛha jeŋ muu fɛɛ nɔyeli. (Lala 2:6-9; Kpojiemɔ 11:15) Mɛni ji nɔ ni yɔɔ ni maŋtsɛmɛi kɛ osɔfoi krokomɛi lɛ baafee?
19. Mɛɛ be ni yɛ mɛɛ gbɛ nɔ afee kpaŋmɔ ko ni ji kpawo nɔ ni he hiaa?
19 Yɛ Nisan 14, afi 33 Ŋ.B. lɛ, gbɛkɛ ni Yesu to Nuŋtsɔ lɛ Gbɛkɛnaashi Niyenii lɛ ni etsi “kpaŋmɔ hee lɛ yɛ mila . . . lɛ mli” lɛ ta lɛ, ewie kpaŋmɔ kroko he, nɔ ni ji kpawo ni wɔbaasusu he. Ekɛɛ ebɔfoi anɔkwafoi lɛ akɛ: “Nyɛ ji mɛi ni kɛ mi ehi shi yɛ mikaai lɛ amli; ni mi hu miito maŋtsɛyeli maha nyɛ taakɛ bɔ ni mi-Tsɛ eto eha mi lɛ, koni nyɛye nii ni nyɛnu yɛ mikpɔlɔ lɛ he yɛ mimaŋtsɛyeli lɛ mli, ni nyɛtara sɛii anɔ ni nyɛkojo Israel akutsei nyɔŋma kɛ enyɔ lɛ.” (Luka 22:20, 28-30) Taakɛ bɔ ni Tsɛ lɛ kɛ Yesu efee kpaŋmɔ koni efee osɔfo tamɔ Melkizedek lɛ, nakai nɔŋŋ Kristo hu kɛ esɛɛnyiɛlɔi anɔkwafoi lɛ efee kpaŋmɔ ni ka amɛkɛ lɛ teŋ.
20. Namɛi akɛ amɛ fee kpaŋmɔ kɛha Maŋtsɛyeli lɛ, ni mɛni hewɔ? (Daniel 7:18; 2 Timoteo 2:11-13)
20 Bɔfoi 11 lɛ kɛ amɛhe ekpɛtɛ Yesu he yɛ ekaai lɛ amli lɛlɛŋ, ni kpaŋmɔ lɛ tsɔɔ akɛ amɛbaatara maŋtsɛsɛii anɔ. Kɛfata he lɛ, Kpojiemɔ 3:21 tsɔɔ akɛ Kristofoi ni akɛ mumɔ efɔ amɛ lɛ fɛɛ ni yeɔ anɔkwale lɛ baatara ŋwɛi maŋtsɛsɛii anɔ. No hewɔ lɛ, nɛkɛ kpaŋmɔ nɛɛ kɔɔ 144,000 lɛ fɛɛ ni akɛ Yesu la lɛ ehe amɛ koni aŋɔ amɛ kɛya ŋwɛi akɛ osɔfoi ni amɛyɛ “maŋtsɛ yɛ shikpɔŋ lɛ nɔ” lɛ ahe. (Kpojiemɔ 1:4-6; 5:9, 10; 20:6) Kpaŋmɔ ni Yesu kɛ amɛ feɔ lɛ haa amɛbafataa ehe koni amɛna enɔyeli lɛ mli gbɛfaŋnɔ. Etamɔ ayemforo ko ni jɛ abladei aweku mli ni eyafata maŋtsɛ nɔyelɔ ko he yɛ gbalashihilɛ mli. No hewɔ lɛ eeba gbɛhe ko ni baaha ekɛ lɛ ana gbɛfaŋnɔ yɛ emaŋtsɛyeli nɔyeli lɛ mli lɛ mli.—Yohane 3:29; 2 Korintobii 11:2; Kpojiemɔ 19:7, 8.
21, 22. Mɛɛ jɔɔmɔi abaakpa gbɛ yɛ nɔ ni nɛkɛ kpaŋmɔi nɛɛ tsuɔ lɛ hewɔ?
21 Mɛɛ sɛɛnamɔi enɛ kɛbaaba abaha adesai toibolɔi? Yesu loo 144,000 lɛ efeŋ tamɔ nɔyelɔi yiwalɔi mlihilɔi lɛ ni “nyɛɛɛ amɛkɛ tsabaa diɛŋtsɛ aha” lɛ. Shi moŋ, amaa nɔ mi ahaa wɔ akɛ Yesu ji osɔfonukpa “ni aka lɛ yɛ nibii fɛɛ gbɛfaŋ tamɔ wɔ, ni kɛlɛ esha ko esha ko bɛ ehe.” Belɛ wɔbaanyɛ wɔnu nɔ hewɔ ni ‘eeenyɛ enu wɔgbedemɔi lɛ ahe eha wɔ’ akɛ adesai ni hiɛ fatɔɔi lɛ shishi, kɛ nɔ hewɔ ni “toi krokomɛi” lɛ hu baanyɛ atsɔ Kristo nɔ abɛŋkɛ Nyɔŋmɔ maŋtsɛsɛi lɛ kɛ “wiemɔ mli heyeli” tamɔ eji yɛ Kristofoi ni afɔ amɛ mu lɛ agbɛfaŋ lɛ. No hewɔ lɛ, amɛ hu ‘amɛnine baanyɛ ashɛ mɔbɔnalɛ nɔ ni amɛna duromɔ ni aaaye abua amɛ yɛ be ni sa mli.’—Hebribii 4:14-16; Yohane 10:16.
22 Mɛi ni akɛ amɛ efee kpaŋmɔ koni amɛkɛ Yesu afee maŋtsɛmɛi kɛ osɔfoi lɛ hu baana adesai ni ajɔɔ amɛ lɛ mli gbɛfaŋnɔ. Taakɛ blema Levi osɔfoi lɛ ahe baa sɛɛnamɔ kɛhaa Israel maŋ muu lɛ fɛɛ lɛ, nakai nɔŋŋ hu mɛi ni sɔmɔɔ yɛ ŋwɛi maŋtsɛsɛii anɔ kɛ Yesu lɛ baakojo mɛi fɛɛ ni yɔɔ wala mli yɛ shikpɔŋ lɛ nɔ lɛ yɛ jalɛ naa. (Luka 22:30) Be ko lɛ nakai maŋtsɛmɛi kɛ osɔfoi lɛ ji adesai, no hewɔ lɛ amɛbaanu adesai ahiamɔnii ahe. Nɛkɛ seshi lɛ fa ni ji enyɔ nɛɛ kɛ Yesu baafee ekome koni amɛkɛkwɛ koni “ajɔɔ jeŋmaji lɛ fɛɛ.”—Galatabii 3:8.
23. Te esa akɛ aŋkroaŋkroi afee amɛnii yɛ nɛkɛ kpaŋmɔi nɛɛ kɛ gbeekpamɔ mli amɛha tɛŋŋ?
23 Aafɔ nine bianɛ aatsɛ mɛi fɛɛ ni sumɔɔ ni amɛna nakai jɔɔmɔi ni baaba adesai anɔ lɛ mli gbɛfaŋnɔ koni yɛ enɛ hewɔ lɛ, amɛna Nyɔŋmɔ kpaŋmɔi lɛ ahe sɛɛ lɛ nine ni amɛfee nakai bianɛ. (Kpojiemɔ 22:17) Gbɛ kome ni hi jogbaŋŋ ji ni oba Nuŋtsɔ lɛ Gbɛkɛnaashi Niyenii ni baaba nɔ yɛ Shɔ, March 22, 1989, beni hulu enyɔ shi sɛɛ lɛ shishi. Ofainɛ too gbɛjianɔ bianɛ ni okɛ Yehowa Odasefoi asafoi lɛ ekome aya enɛ shishi. Jɛmɛ ji he ni obaakase ŋwɛi kpaŋmɔi lɛ ahe nii babaoo yɛ, ni obaanyɛ ona gbɛ ni ehe aaaba sɛɛnamɔ kɛha bo lɛ mli lolo.
[Shishigbɛ niŋmai]
a “Tsakɛmɔi ni asumɔɔ lɛ po shi gbɔmɛi lɛ akɛ ohiafoi ni bɛ nɔ ko nɔ ko, abladei ni hegbɛ fa fe nine, ni too bibioo ko pɛ amɛwoɔ, kuu ni ka teŋ ni aŋɔ amɛ awo nɔyeli lɛ kɛ gbɔmɛi ateŋ ni gbɛjianɔtoo kpakpa bɛ mli. Abaanyɛ akɛɛ akɛ yɛ be mli ni yiwalɛ nɔyeli ni yɔɔ hiɛtɛjemɔ lɛ Je shishi akɛ amɛkɛ sanebimɔi ni amɛnyɛɛɛ amɛku amɛhiɛ amɛshwie nɔ dɔŋŋ baakpe lɛ, enyɛɛɛ ekɛ tsabaa diɛŋtsɛ aha yɛ maŋkwramɔŋ kɛ shika he lɛtemɔ mli saji diɛŋtsɛ amli yɛ nakai be lɛ mli.”—Western Civilization—Its Genesis and Destiny: The Modern Heritage.
b Yesu fataaa kpaŋmɔ hee lɛ he. Lɛ ji e-Teŋdamɔlɔ ni ebɛ eshai ni esa akɛ akɛke lɛ.Kɛfata he lɛ,ehe ehiaaa ni etsɔ maŋtsɛ kɛ osɔfo yɛ no hewɔ, ejaakɛ eji maŋtsɛ yɛ David kpaŋmɔ lɛ naa kɛ agbɛnɛ hu osɔfo tamɔ Melkizedek.
Ani Okaiɔ?
◻ Mɛni hewɔ afee kpaŋmɔ ni atsi ta yɛ Lala 110:4 lɛ, ni mɛni etsu?
◻ Namɛi yɔɔ kpaŋmɔ hee Iɛ mli, ni mɛɛ gbɛ nɔ eye ebua ni ana maŋtsɛmɛi kɛ osɔfɔi amaŋ yɛ?
◻ Mɛni hewɔ Yesu diɛŋtsɛ kɛ esɛɛnyiɛlɔi lɛ fee kpaŋmɔ Iɛ?
Mɛni ji kpaŋmɔi kpawo ni wɔsusu he Iɛ?
[Nitɛŋmɔ ni akɛmiitsɔɔ nɔ ko mli ni yɔɔ baafa 17]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
Eden kpaŋmɔ 1 Mose 3:15
Abraham kpaŋmɔ
Mla kpaŋmɔ
David Maŋtsɛyeli kpaŋmɔ
Kpaŋmɔ kɛha Osɔfoyeli tamɔ Melkizedek
Seshi Iɛ mli klɛŋklɛŋ mɔ
Seshí lɛ fa ni ji enyɔ
Naanɔ jɔɔmɔi
[Nitɛŋmɔ ni akɛmiitsɔɔ nɔ ko mli ni yɔɔ baafa 19]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
Eden kpaŋmɔ 1 Mose 3:15
Abraham kpaŋmɔ
Mla Kpaŋmɔ
Kpaŋmɔ hee
David Maŋtsɛyeli Kpaŋmɔ
Kpaŋmɔ kɛha Osɔfoyeli tamɔ Melkizedek
Seshi lɛ mli klɛŋklɛŋ mɔ
Kpaŋmɔ kɛha Ŋwɛi Maŋtsɛyeli
Seshi lɛ fa ni ji enyɔ
Naanɔ jɔɔmɔi