Obaanyɛ Oná Kpaŋmɔ Hee Lɛ He Sɛɛ

 1. Mɛɛ nitsumɔ ni hiɛ fãi enyɔ Yeremia tsu he nii?

NITSUMƆ ni Yehowa kɛwo Yeremia dɛŋ lɛ hiɛ fãi enyɔ. Ekome ji ‘ní efamɔ ní ekumɔ, ní efite ní ebutu.’ Ekroko lɛ ji ‘ní emamɔ, ní etɛo.’ Gbalɔ lɛ kpa Yudafoi henɔwolɔi lɛ anɔfɔŋfeemɔ lɛ he mama, ni egba Nyɔŋmɔ kojomɔ ni baaba Babilon nɔ lɛ hu kɛtsu nitsumɔ ni akɛwo edɛŋ lɛ klɛŋklɛŋ fã lɛ. Kɛlɛ, wɔsɛɛ he hiɛnɔkamɔ yɛ Yeremia gbalɛi lɛ amli. Egba nɔ̃ ni Nyɔŋmɔ eto eyiŋ akɛ ebaama lɛ, kɛ nɔ̃ ni Nyɔŋmɔ eto eyiŋ akɛ ebaatɛo lɛ. Akɛ nɔkwɛmɔnɔ lɛ, Yeremia tsu nitsumɔ ni akɛwo edɛŋ lɛ fã ni ji enyɔ lɛ, beni ewie Yudafoi ni baaku amɛsɛɛ amɛya amɛshikwɛ̃ɛhe lɛ he lɛ.—Yer. 1:10; 30:17, 18.

 2. Mɛni hewɔ Yehowa gbala ewebii lɛ atoi lɛ, ni nɛgbɛ egbala amɛtoi kɛyashi?

² Yeremia gbalɛ ni tsɔɔ akɛ Yudafoi lɛ baaku amɛsɛɛ kɛya amɛshikwɛ̃ɛhe lɛ, etsɔɔɔ akɛ kɛ́ Nyɔŋmɔ kɛ ewebii lɛ miiye lɛ ebaahiɛ amɛ fɔfɔɔle loo ebaaku ehiɛ eshwie ejalɛsaneyeli lɛ nɔ. Dabi kwraa, ebaagbala Yudafoi toigbolɔi lɛ atoi. (Nyɛkanea Yeremia 16:17, 18.) Yeremia beaŋ lɛ, Yerusalembii fioo pɛ ‘ye jalɛ sane’ loo ‘amɛtao anɔkwale sɛɛgbɛ,’ ni Yehowa náaa amɛhe tsui dɔŋŋ. Ekɛɛ akɛ: “Etɔ mi kɛ musuŋtsɔlɛ.” (Yer. 5:1; 15:6, 7) Nakai Yudafoi lɛ ‘kpale kɛtee amɛblematsɛmɛi ní ekpɛlɛɛɛ Yehowa wiemɔi lɛ atoiboo lɛ anishaianii lɛ ahe.’ Kɛfata he lɛ, amɛkɛ apasa nyɔŋmɔi lɛ bɔ ajwamaŋ kɛwo Nyɔŋmɔ mlila. (Yer. 11:10; 34:18) Shi, Yehowa baajaje ewebii nɛɛ, ebaagbala amɛtoi “bɔ ni sa kɛkɛ.” No baaha aŋkroaŋkroi komɛi ahɛle shi akɛ amɛmiifee buulu, ni no aha amɛku amɛsɛɛ kɛba eŋɔɔ ekoŋŋ.—Yer. 30:11; 46:28.

 3. Mɛni hewɔ esa akɛ osusu kpaŋmɔ hee lɛ he gbalɛ lɛ he lɛ?

³ Nyɔŋmɔ tsɔ Yeremia nɔ egba nɔ̃ ko ni jeee Yudafoi pɛ baaná he sɛɛ, ni mɛi ni baaná he sɛɛ lɛ baaná he sɛɛ kɛya naanɔ—kpaŋmɔ hee ko. Wɔyɛ yiŋtoi babaoo ni wɔɔdamɔ nɔ wɔkɛ wɔhiɛ ama nɛkɛ hiɛnɔkamɔ nɛɛ, ni ji kpaŋmɔ hee lɛ nɔ, beni wɔsusuɔ Yeremia gbalɛi lɛ ahe lɛ. Afee kpaŋmɔ nɛɛ koni akɛye kpaŋmɔ ni Mose ji teŋdamɔlɔ ni Nyɔŋmɔ kɛ Israelbii lɛ kpaŋ beni amɛshi Mizraim lɛ sɛɛ lɛ najiaŋ. (Nyɛkanea Yeremia 31:31, 32.) Beni Yesu Kristo toɔ Nuŋtsɔ lɛ Gbɛkɛnaashi Niyeli lɛ shishi lɛ, ewie kpaŋmɔ hee nɛɛ he, ni no hewɔ wɔkuuu wɔhiɛ wɔshwieee nɔ lɛ. (Luka 22:20) Bɔfo Paulo tsĩ kpaŋmɔ nɛɛ tã yɛ wolo ni eŋma kɛha Hebribii lɛ mli. Etsɛ Yeremia gbalɛ lɛ yisɛɛ, ni ema bɔ ni kpaŋmɔ hee nɛɛ he hiaa ha lɛ nɔ mi. (Heb. 8:7-9) Shi mɛni tuuntu ji kpaŋmɔ hee lɛ? Mɛni hewɔ ehe bahia? Namɛi akɛfee kpaŋmɔ lɛ, ni te ooofee tɛŋŋ oná he sɛɛ? Ha wɔsusu he wɔkwɛ.

 4. Mɛni Mla kpaŋmɔ lɛ ha efee faŋŋ?

⁴ Bɔni afee ni wɔna nɔ̃ hewɔ ni afee kpaŋmɔ hee lɛ, klɛŋklɛŋ lɛ esa akɛ wɔna nɔ̃ hewɔ ni afee emomo lɛ, ni ji Mla kpaŋmɔ lɛ. Afee koni akɛtsu yiŋtoi kpakpai babaoo komɛi ahe nii kɛha maŋ ni miimɛ shiwoo Seshi lɛ, mɔ nɔ ni abaatsɔ ajɔɔ mɛi babaoo lɛ. (1 Mose 22:17, 18) Beni Israelbii lɛ kpɛlɛ Mla kpaŋmɔ ni akɛ amɛ fee lɛ nɔ lɛ, amɛbatsɔ ‘Nyɔŋmɔ nɔ̃.’ Yɛ Mla kpaŋmɔ lɛ mli lɛ, abaahala osɔfoi kɛjɛ Levi akutso lɛ mli kɛha Israel maŋ lɛ. Beni Yehowa kɛ Israel maŋ muu lɛ fɛɛ kpaŋɔ yɛ Sinai Gɔŋ lɛ masɛi lɛ, etsĩ “osɔfoi amaŋtsɛyeli kɛ maŋ krɔŋkrɔŋ” ko tã, shi etsɔɔɔ be kɛ gbɛ nɔ ni baatsɔ ni eba lɛ nakai. (2 Mose 19:5-8) Kɛyashi nakai maŋtsɛyeli kɛ maŋ lɛ aaaba lɛ, Mla kpaŋmɔ lɛ ha efee faŋŋ akɛ Israelbii lɛ nyɛŋ aye Mla lɛ nɔ kɛmɔ shi. Eha ana Israelbii lɛ anɔtɔmɔi lɛ. No hewɔ lɛ, aha Israelbii lɛ shã afɔle yɛ be kɛ beaŋ koni akɛ amɛhe eshai lɛ afa amɛ. Fɛɛ sɛɛ lɛ, eyɛ faŋŋ akɛ nɔ̃ kroko ni hi fe no he miihia, no ji afɔle ni eye emuu ni abaashã lɛ shi kome nyɔŋlo lɛ. Hɛɛ, ehe bahia waa ni aná naanɔ eshaifaa.—Gal. 3:19-22.

 5. Mɛni hewɔ Yehowa gba akɛ ebaafee kpaŋmɔ hee lɛ?

⁵ No hewɔ lɛ, wɔbaanyɛ wɔna nɔ̃ hewɔ ni beni Mla kpaŋmɔ lɛ bako naagbee tete po lɛ, Nyɔŋmɔ ha Yeremia gba gbalɛ ni kɔɔ kpaŋmɔ hee lɛ he lɛ. Yehowa suɔmɔ kɛ emlihilɛ lɛ tsirɛ lɛ koni eto gbɛjianɔ ni Israel kɛ maji krokomɛi fɛɛ baaná he sɛɛ kɛya naanɔ. Nyɔŋmɔ tsɔ Yeremia nɔ ewie mɛi ni akɛbaafee kpaŋmɔ hee lɛ ahe akɛ: “Maŋɔ amɛnishaianii lɛ mafa, ni amɛhe eshai lɛ mikaiŋ dɔŋŋ!” (Yer. 31:34) Eyɛ mli ákɛ akɛ nakai shiwoo lɛ ha yɛ Yeremia beaŋ moŋ, shi ehaa adesai fɛɛ náa hiɛnɔkamɔ ni haa mɔ tsui nyɔɔ emli. Mɛɛ gbɛ nɔ?

6, 7. (a) Te mɛi komɛi nuɔ he amɛhaa tɛŋŋ yɛ amɛgbɔjɔmɔi ahe? (b) Mɛni hewɔ kpaŋmɔ hee lɛ ni obaasusu he lɛ baanyɛ ashɛje omii lɛ?

⁶ Adesai kã he amɛyeee emuu, ni no hewɔ lɛ, bei pii lɛ wɔkɛ shihilɛi ni haa anɔkwa sane nɛɛ feɔ faŋŋ lɛ kpeɔ. Nyɛmi nuu ko ni miiwu eshi egbɔjɔmɔ ko ni enyɛŋ eku ehiɛ eshwie nɔ lɛ niiashikpamɔ lɛ maa enɛ nɔ mi. Ewie akɛ: “Kɛ́ miye gbɔjɔmɔ nɛɛ nɔ be kplaŋŋ, ni sɛɛ mli lɛ ejie ehiɛ kpo ekoŋŋ lɛ, egbaa minaa waa. Misusu akɛ nɔ̃ ko kwraa bɛ ni manyɛ mafee ni baaha shihilɛ lɛ ahi. Ebawa kɛha mi akɛ masɔle. Kɛ́ mije shishi akɛ masɔle lɛ, nɔ̃ ni mikɛɔ nɛ, ‘Yehowa, mileee kɛji obaabo sɔlemɔ nɛɛ toi, shi . . .’” Mɛi ni etsɔ shihilɛ tamɔ nɛkɛ mli, loo mɛi ni efee esha lɛ nuɔ he oookɛɛ “atatu” miitsĩ amɛsɔlemɔi lɛ agbɛ koni sɔlemɔi lɛ akaya Nyɔŋmɔ ŋɔɔ. (Yaafo 3:44) Mɛi krokomɛi agbɛfaŋ lɛ, esha ko ni amɛfee afii komɛi ni eho lɛ gbaa amɛnaa lolo. Bei komɛi lɛ, Kristofoi ni feɔ nɔkwɛmɔnɔ kpakpa lɛ po wieɔ nɔ̃ ko ni sɛɛ mli lɛ amɛshwaa amɛhe yɛ he.—Yak. 3:5-10.

⁷ Esaaa akɛ wɔteŋ mɔ ko nuɔ he akɛ enyɛŋ efee nɔ̃ ko ni esaaa. (1 Kor. 10:12) Bɔfo Paulo po yɔse akɛ shi yɛ ehe. (Nyɛkanea Romabii 7:21-25.) Esa akɛ enɛ aha kpaŋmɔ hee lɛ aba wɔjwɛŋmɔ mli. Nyɔŋmɔ wo shi akɛ nibii titri ni ebaatsɔ kpaŋmɔ hee lɛ nɔ etsu lɛ ateŋ ekome ji, ekaiŋ eshai dɔŋŋ. Mɛɛ sɛɛnamɔ ni nɔ bɛ po nɛ! Ekã shi faŋŋ akɛ, gbalɛ nɛɛ ná Yeremia nɔ hewalɛ waa, ni nakai nɔŋŋ kɛ́ wɔkase kpaŋmɔ hee lɛ he nii babaoo, ni wɔna bɔ ni wɔɔfee wɔná he sɛɛ lɛ, ebaaná wɔnɔ hewalɛ.

8, 9. Mɛni Yehowa kɛshã afɔle bɔni afee ni enyɛ ekɛ eshai afa?

⁸ Babaoo ni oleɔ Yehowa lɛ, babaoo ni oyɔseɔ bɔ ni ejieɔ mlihilɛ kɛ mɔbɔnalɛ kpo etsɔɔ adesai ni yeee emuu lɛ ji no. (Lala 103:13, 14) Beni Yeremia wieɔ kpaŋmɔ hee lɛ he lɛ, ema bɔ ni Yehowa ‘baaŋɔ amɛnishaianii lɛ efa’ ni ekaiŋ esha dɔŋŋ lɛ nɔ mi. (Yer. 31:34) Obaanyɛ ofee Yeremia he mfoniri ni ekolɛ, eeshwie eyiŋ yɛ bɔ ni Nyɔŋmɔ baafee ekɛ eshaifaa ni tamɔ nakai aba lɛ he. Akɛni Nyɔŋmɔ tsĩ kpaŋmɔ hee tã hewɔ lɛ, kɛ́ hooo lɛ Yeremia nu shishi akɛ Nyɔŋmɔ kɛ adesai baakpaŋ yɛ nɔ̃ ko he. Etamɔ nɔ̃ ni Yehowa baatsɔ kpaŋmɔ hee lɛ nɔ etsu nibii ni eha Yeremia jie lɛ kpo yɛ gbalɛ nɛɛ mli, ni eshaifaa hu fata he lɛ ahe nii. Nyɔŋmɔ haaa eyiŋtoo lɛ he saji krokomɛi, ní nibii ni Mesia lɛ baafee lɛ fata he lɛ, afee faŋŋ amrɔ nɔŋŋ.

⁹ Ekolɛ, ona akɛ fɔlɔi komɛi hiɛɔ amɛbii fɔfɔɔle ni amɛtsɔseee amɛbii nɛɛ. Ani okpaa gbɛ akɛ Yehowa baafee nakai? Kɔkɔɔkɔ! Anaa enɛ faŋŋ yɛ nɔ̃ ni ba dani akɛ kpaŋmɔ hee lɛ bɔi nitsumɔ lɛ mli. Nɔ̃ najiaŋ ni Nyɔŋmɔ kɛ eshai baafa kɛkɛ lɛ, efee nɔ̃ fɛɛ nɔ̃ ni lɛ diɛŋtsɛ ejalɛsaneyeli lɛ biɔ lɛ kɛto mla naa gbɛjianɔ ni ebaadamɔ nɔ ekɛ eshai afa; ekɛ nɔ̃ ko kpele po shã afɔle kɛfee nakai. Kɛ́ osusu nɔ̃ ni Paulo ŋma beni ewieɔ kpaŋmɔ hee lɛ he lɛ, obaanu enɛ shishi jogbaŋŋ. (Nyɛkanea Hebribii 9:15, 22, 28.) Paulo tsĩ ‘kpatamɔ’ loo jiemɔ kɛtsɔ kpɔmɔnɔ lɛ nɔ lɛ tã, ni ewie akɛ “kɛ́ ashwieee lá shi lɛ, aŋɔfaaa.” Kpaŋmɔ hee lɛ gbɛfaŋ lɛ, abiii ni akɛ tsinai loo abotiai alá ashã afɔle dani aŋɔfa taakɛ Mla lɛ bi ni afee lɛ. Akɛ kpaŋmɔ hee lɛ bɔi nitsumɔ yɛ Yesu lá lɛ hewɔ. Yehowa baanyɛ adamɔ nakai afɔle ni hi kɛwula shi lɛ nɔ ‘eŋɔ esha kɛ nɔtɔmɔ efa’ kwraa. (Bɔf. 2:38; 3:19) Shi, namɛi akɛbaafee kpaŋmɔ hee lɛ koni amɛná nakai eshaifaa lɛ? Jeee Yuda maŋ lɛ. Yesu wie akɛ Nyɔŋmɔ baakpoo Yudafoi ni kɛ kooloi shãa afɔlei yɛ Mla lɛ shishi lɛ, ni ekɛ ejwɛŋmɔ baaya maŋ kroko nɔ. (Mat. 21:43; Bɔf. 3:13-15) Nakai maŋ kroko lɛ bafee “Nyɔŋmɔ Israel lɛ,” ni emli bii ji Kristofoi ni akɛ mumɔ krɔŋkrɔŋ efɔ amɛ mu lɛ. Kɛ́ wɔɔtsɔɔ mli lɛ, Nyɔŋmɔ kɛ heloonaa Israelbii lɛ fee Mla kpaŋmɔ lɛ, shi Yehowa Nyɔŋmɔ kɛ mumɔŋ Israelbii lɛ fee kpaŋmɔ hee lɛ ni Teŋdamɔlɔ ji Yesu lɛ.—Gal. 6:16; Rom. 9:6.

10. (a) Namɔ ji “tso fɔ́” kɛha David lɛ? (b) Te adesai aaafee tɛŋŋ amɛná “tso fɔ́” lɛ he sɛɛ?

¹⁰ Yeremia tsɛ Mɔ ni baaba, ni ji Mesia lɛ, akɛ “tso fɔ́” kɛha David. Eji gbɛ́i ni sa jogbaŋŋ. Beni Yeremia sɔmɔɔ akɛ gbalɔ po lɛ, atoo tso ni damɔ shi kɛha David odehei aweku lɛ afɔ̃ shi. Shi, etsoku lɛ gbooo. Beni be shwie mli lɛ, ajɛ Maŋtsɛ David wekutɔkpãa lɛ mli afɔ Yesu. Abaanyɛ atsɛ lɛ akɛ, “Yehowa, wɔjalɛ lɛ,” kɛma bɔ ni ekã Nyɔŋmɔ tsui nɔ waa akɛ afee jalɛ nii lɛ nɔ mi. (Nyɛkanea Yeremia 23:5, 6.) Yehowa ŋmɛ gbɛ ni e-Bi koome lɛ ana nɔ̃ yɛ shikpɔŋ lɛ nɔ koni egbo. No hewɔ lɛ, Yehowa baanyɛ edamɔ David “tso fɔ́” lɛ kpɔmɔ afɔle lɛ nɔ ekɛ eshai afa, ni enɛ kɛ jalɛsaneyeli kpãa. (Yer. 33:15) Enɛ gbele gbɛ ni abu adesai komɛi “wala bem,” ni akɛ mumɔ krɔŋkrɔŋ lɛ fɔ amɛ mu, ni no ha amɛbatsɔmɔ kpaŋmɔ hee lɛ mli bii. Taakɛ wɔbaana yɛ kukuji ni nyiɛ sɛɛ lɛ amli lɛ, mɛi krokomɛi ni amɛjeee kpaŋmɔ nɛɛ mli bii diɛŋtsɛ lɛ baanyɛ aná he sɛɛ, ni amɛmiiná he sɛɛ hu, ni enɛ ji nɔ̃ kroko ni tsɔɔ akɛ Nyɔŋmɔ sumɔɔ jalɛ.—Rom. 5:18.

11. (a) Mɛni nɔ aŋmala kpaŋmɔ hee lɛ mla lɛ? (b) Mɛni hewɔ “tooi krokomɛi” lɛ náa kpaŋmɔ hee lɛ mla lɛ he miishɛɛ lɛ?

¹¹ Ani obaasumɔ ni ole kpaŋmɔ hee lɛ he nibii titri krokomɛi? Srɔtofeemɔ titri ni yɔɔ Mose Mla lɛ kɛ kpaŋmɔ hee lɛ teŋ ji nɔ̃ nɔ ni aŋmala yɛ. (Nyɛkanea Yeremia 31:33.) Aŋmala Mla kpaŋmɔ lɛ mli Kitai Nyɔŋma lɛ yɛ tɛi anɔ, shi yɛ naagbee lɛ anaaa tɛi nɛɛ dɔŋŋ. Nɔ̃ ni tamɔɔɔ nakai lɛ, Yeremia gba akɛ abaaŋmala kpaŋmɔ hee lɛ mla lɛ yɛ adesai atsuii anɔ, ni ebaaya nɔ ehi shi. Mɛi ni akɛfee kpaŋmɔ hee lɛ, ni ji Kristofoi ni afɔ amɛ mu lɛ, ahiɛ sɔɔ nɛkɛ mla nɛɛ jogbaŋŋ. Ni mɛi ni amɛjeee kpaŋmɔ hee lɛ mli bii diɛŋtsɛ, ni ji “tooi krokomɛi” lɛ, ni yɔɔ hiɛnɔkamɔ akɛ amɛbaahi shi kɛya naanɔ yɛ shikpɔŋ lɛ nɔ lɛ hu? (Yoh. 10:16) Amɛ hu amɛnáa Nyɔŋmɔ mla lɛ he miishɛɛ naakpa. Yɛ gbɛ ko nɔ lɛ, amɛtamɔ gbɔi ni hi Israel shikpɔŋ lɛ nɔ, ni kpɛlɛ Mose Mla lɛ nɔ ni amɛná he sɛɛ lɛ.—3 Mose 24:22; 4 Mose 15:15.

12, 13. (a) Mɛni ji kpaŋmɔ hee lɛ mla lɛ? (b) Mɛni hewɔ onuŋ he yɛ “Kristo mla lɛ” shishi akɛ aanyɛ onɔ ni osɔmɔ Nyɔŋmɔ lɛ?

¹² Kɛ́ abi bo akɛ, ‘Mɛni ji mla lɛ ni aŋmala awo Kristofoi ni afɔ amɛ mu lɛ atsuii anɔ lɛ,’ te obaaha hetoo oha tɛŋŋ? Ojogbaŋŋ, atsɛɔ mla nɛɛ hu akɛ “Kristo mla lɛ.” Mumɔŋ Israelbii lɛ, ni ji mɛi ni akɛfee kpaŋmɔ hee lɛ, ji mɛi ni akɛha klɛŋklɛŋ. (Gal. 6:2; Rom. 2:28, 29) Obaanyɛ okɛ wiemɔ kome amua “Kristo mla lɛ” naa akɛ: suɔmɔ. (Mat. 22:36-39) Mɛɛ gbɛ nɔ mɛi ni afɔ amɛ mu lɛ haa aŋmalaa mla lɛ yɛ amɛtsuii anɔ? Gbɛi titrii enyɔ ni amɛtsɔɔ nɔ amɛfeɔ nakai ji, Nyɔŋmɔ Wiemɔ lɛ ni amɛkaseɔ kɛ Yehowa ni amɛbɛŋkɛɔ lɛ yɛ sɔlemɔ mli. Belɛ, esa akɛ anɔkwa Kristofoi fɛɛ, ní mɛi ni amɛjeee kpaŋmɔ hee lɛ mli bii, shi amɛmiisumɔ ni amɛná he sɛɛ lɛ hu fata he lɛ, aha Nyɔŋmɔ Wiemɔ lɛ kasemɔ kɛ Yehowa ni amɛaabɛŋkɛ yɛ sɔlemɔ mli lɛ afee nibii ni amɛfɔɔ feemɔ yɛ amɛshihilɛ mli lɛ ateŋ ekomɛi.

¹³ Atsɛ “Kristo mla lɛ” akɛ “heyeli mla ni hi kɛwula shi lɛ” kɛ “heyeli mla.” (Yak. 1:25; 2:12) Afɔ mɛi babaoo awo Mose Mla lɛ shishi, shi afɔɔɔ mɔ ko awooo kpaŋmɔ hee lɛ mli loo Kristo mla lɛ shishi. Anyɛɛɛ mɛi ni ebatsɔmɔ Kristo mla lɛ nɔyelɔi lɛ anɔ koni amɛsɔmɔ Nyɔŋmɔ. Moŋ lɛ, le ni amɛle akɛ abaanyɛ aŋmala Nyɔŋmɔ mla lɛ yɛ tsuii anɔ, ni agbɛnɛ hu, ŋmɛnɛ lɛ adesai baanyɛ aná kpaŋmɔ ni Yeremia gba yɛ he lɛ he sɛɛ kɛya naanɔ lɛ haa amɛnáa miishɛɛ waa.

14. Namɛi ekã shi faŋŋ akɛ amɛnáa kpaŋmɔ hee lɛ he sɛɛ?

¹⁴ Mɛi komɛi yɛ ni beni amɛná amɛle akɛ mɛi 144,000 ji mɛi ni akɛfee kpaŋmɔ hee lɛ, amɛsusu akɛ mɛi nɛɛ pɛ baaná he sɛɛ. Ekolɛ, amɛsusuɔ nakai akɛni yɛ Kristo gbele lɛ he Kaimɔ ni afeɔ daa afi lɛ shishi lɛ, mɛi ni afɔ amɛ mu lɛ pɛ ji mɛi ni yeɔ okadii lɛ, ni wein lɛ damɔ shi kɛha ‘lá ni ji kpaŋmɔ hee lɛ,’ eko lɛ hewɔ. (Mar. 14:24) Shi, kaaha ohiɛ kpa nɔ akɛ, Yesu kɛ mɛi ni akɛfee kpaŋmɔ hee lɛ ji mɛi ni feɔ Abraham ‘seshi’ ni abaatsɔ enɔ ajɔɔ jeŋmaji fɛɛ lɛ. (Gal. 3:8, 9, 29; 1 Mose 12:3) Belɛ, wɔbaanyɛ wɔmu sane naa akɛ, Yehowa baatsɔ kpaŋmɔ hee lɛ nɔ eye shi ni ewo akɛ ebaatsɔ Abraham ‘seshi’ lɛ nɔ ejɔɔ adesai fɛɛ lɛ nɔ.

15. Mɛɛ nitsumɔ agba akɛ mɛi ni afɔ amɛ mu lɛ baaná mli gbɛfaŋnɔ?

¹⁵ Yesu Kristo, ni ji mɔ otu yɛ mɛi ni feɔ Abraham seshi lɛ ateŋ lɛ, sɔmɔɔ akɛ Osɔfonukpa, ni ekɛ afɔle ni eye emuu ni baaha akɛ tɔmɔi kɛ eshai afa lɛ eha. (Nyɛkanea Hebribii 2:17, 18.) Kɛlɛ, jeeŋmɔ beebe Nyɔŋmɔ wie akɛ abaaná “osɔfoi amaŋtsɛyeli kɛ maŋ krɔŋkrɔŋ” ko. (2 Mose 19:6) Yɛ blema Israel lɛ, aholeɔ osɔfoi yɛ akutso kome mli, ni aholeɔ maŋtsɛmɛi hu yɛ akutso kroko mli. Belɛ, te shiwoo akɛ abaaná maŋ ni emli bii lɛ ji maŋtsɛmɛi kɛ osɔfoi fɛɛ lɛ aaafee tɛŋŋ aba mli? Bɔfo Petro ŋma eklɛŋklɛŋ wolo lɛ kɛyaha mɛi ni no mli lɛ mumɔ lɛ etsuu amɛhe lɛ. (1 Pet. 1:1, 2) Etsɛ mɛi nɛɛ akɛ “maŋtsɛmɛi ní yeɔ osɔfoi, jeŋmaŋ krɔŋkrɔŋ, maŋ ní [Nyɔŋmɔ] eŋɔfee enɔ̃.” (1 Pet. 2:9) Belɛ, Kristofoi ni afɔ amɛ mu lɛ, ni ji mɛi ni akɛfee kpaŋmɔ hee lɛ, baasɔmɔ yɛ Kristo shishi akɛ osɔfoi. Bo lɛ, susumɔ nɔ̃ ni no tsɔɔ lɛ he okwɛ! Daa gbi lɛ, wɔpeleɔ yɛ esha ni miiya nɔ ‘eeye wɔnɔ maŋtsɛ’ lɛ hewalɛ lɛ shishi. Mɛi ni baasɔmɔ akɛ osɔfoi yɛ Kristo shishi lɛ baatsɔ shihilɛ ni tamɔ nakai mli dani amɛbaabɔi sɔɔmɔ. (Rom. 5:21) Amɛbaale bɔ ni mɔ nuɔ he ehaa kɛ́ etɔ̃ ni ehenilee miiyi lɛ. No hewɔ lɛ, beni wɔbɔɔ mɔdɛŋ koni wɔye esha sui ni yɔɔ wɔmli lɛ anɔ lɛ, amɛ kɛ Kristo fɛɛ baanu he amɛha wɔ.

16. Kɛ́ “asafo babaoo” lɛ mli bii lɛ kane Kpojiemɔ 7:9, 14 lɛ, mɛɛ hekɛnɔfɔɔ amɛbaaná?

¹⁶ Yohane wie yɛ Kpojiemɔ 7:9, 14 lɛ akɛ, ena “asafo babaoo” lɛ ni “amɛwo atadei yɛji,” ni enɛ tsɔɔ shidaamɔ kpakpa ni amɛyɔɔ yɛ Nyɔŋmɔ hiɛ. Amrɔ nɛɛ aabua asafo babaoo ko ni yɔɔ hiɛnɔkamɔ akɛ amɛbaafo “amanehulu kpeteŋkpele” lɛ anaa. No hewɔ lɛ, amrɔ nɛɛ po lɛ, yɛ gbɛ ko nɔ lɛ, Nyɔŋmɔ buɔ amɛ jalɔi. Enɛ haa amɛbatsɔmɔɔ Yehowa nanemɛi. (Rom. 4:2, 3; Yak. 2:23) Mɛɛ jɔɔmɔ po enɛ ji nɛkɛ! Kɛ́ ofata asafo babaoo lɛ he lɛ, obaanyɛ oná hekɛnɔfɔɔ akɛ shii abɔ ni obɔɔ mɔdɛŋ akɛ oya nɔ ohi shi akɛ mɔ ni he tse yɛ Nyɔŋmɔ hiɛ lɛ, Nyɔŋmɔ hu miisumɔ ni eye ebua bo.

17. Mɛɛ shishinumɔ naa Yehowa ‘kaiŋ’ eshai dɔŋŋ?

¹⁷ Mɛni Nyɔŋmɔ baafee yɛ mɛi ni ekpɛlɛɔ amɛnɔ lɛ ahe eshai lɛ ahe? Taakɛ wɔna kɛtsɔ hiɛ momo lɛ, Yehowa tsɔ Yeremia nɔ ewie akɛ: “Maŋɔ amɛnishaianii lɛ mafa, ni amɛhe eshai lɛ mikaiŋ dɔŋŋ!” (Yer. 31:34) Nyɔŋmɔ damɔɔ Yesu afɔle lɛ nɔ efeɔ nakai ehaa mɛi ni afɔ amɛ mu lɛ. Nakai nɔŋŋ Nyɔŋmɔ baanyɛ adamɔ nakai “kpaŋmɔ la” lɛ nɔ ekɛ asafo babaoo lɛ ahe eshai lɛ afa amɛ. Yeremia wiemɔ akɛ Nyɔŋmɔ ‘kaiŋ’ eshai dɔŋŋ lɛ etsɔɔɔ akɛ Nyɔŋmɔ jwɛŋmɔ baaje nɔ, ni no aha ekakai eshai lɛ dɔŋŋ. No najiaŋ lɛ, etsɔɔ akɛ shii abɔ ni Yehowa egbala mɔ ko toi bɔ ni sa yɛ efɔŋ ko ni mɔ lɛ fee lɛ he, ni ekɛ mɔ lɛ he efa lɛ lɛ, Nyɔŋmɔ shɛrɛɔ nakai esha ni eho lɛ eshwieɔ esɛɛ. Susumɔ esha ni Maŋtsɛ David fee beni ekɛ Batsheba fite gbala, ni eha agbe ewu Uria hu lɛ he okwɛ. Agbala David toi, ni ekpa ehe eshai lɛ he yibii. (2 Sam. 11:4, 15, 27; 12:9-14; Yes. 38:17) Kɛlɛ, Nyɔŋmɔ eyaaa nɔ ekɛ David yeee yɛ nakai eshai lɛ anaa. (Nyɛkanea 2 Kronika 7:17, 18.) Taakɛ atsɔɔ mli yɛ kpaŋmɔ hee lɛ mli lɛ, kɛ́ Yehowa damɔ Yesu afɔle lɛ nɔ, ekɛ mɔ ko he eshai fa lɛ lɛ, ekaiii nakai eshai lɛ dɔŋŋ.—Ezek. 18:21, 22.

18, 19. Mɛɛ nikasemɔ ni kɔɔ eshaifaa he yɔɔ kpaŋmɔ hee lɛ mli?

¹⁸ Anɔkwa, kpaŋmɔ hee lɛ haa wɔnaa gbɛ ko ni nɔ bɛ ni Yehowa tsɔɔ nɔ ekɛ mɛi ni afɔ amɛ mu ni akɛ amɛ fee kpaŋmɔ lɛ, kɛ mɛi ni yɔɔ hiɛnɔkamɔ akɛ amɛbaahi shikpɔŋ lɛ nɔ lɛ, ni ji adesai ni yeee emuu lɛ yeɔ. Obaanyɛ oná nɔmimaa akɛ, kɛ́ Yehowa kɛ ohe eshai fa bo lɛ, ewoŋ nakai eshai lɛ anɔ dɔŋŋ. No hewɔ lɛ, nikasemɔ ko yɛ Nyɔŋmɔ shiwoo ni kɔɔ kpaŋmɔ hee lɛ he lɛ mli kɛha wɔteŋ mɔ fɛɛ mɔ. Bi ohe akɛ, ‘Ani miibɔ mɔdɛŋ akɛ makase Yehowa, ni no hewɔ lɛ, kɛ́ mɛi krokomɛi tɔ̃ minɔ ni mikɛɛ mikɛfa amɛ lɛ, miwooo sane lɛ nɔ dɔŋŋ?’ (Mat. 6:14, 15) Eshaifaa nɛɛ kɔɔ tɔmɔi bibii kɛ tɔmɔi ni yɔɔ hiɛdɔɔ fɛɛ ahe, tamɔ beni Kristofonyo ko hefatalɔ efite gbala nɛkɛ lɛ. Kɛ́ hefatalɔ ni atɔ̃ enɔ lɛ kɛ gbalafitelɔ ni etsake etsui lɛ he esha lɛ fa lɛ lɛ, ani jeee nɔ̃ ni ja ji akɛ ‘ekakai esha lɛ dɔŋŋ’? Anɔkwa, ebɛ mlɛo akɛ wɔɔshɛrɛ tɔmɔi wɔfɔ̃ wɔsɛɛ moŋ, kɛlɛ eji gbɛ kome ni wɔbaanyɛ wɔtsɔ nɔ wɔkase Yehowa.a

¹⁹ Wɔbaanyɛ wɔkɛ kpaŋmɔ hee lɛ mli nikasemɔ nɛɛ atsu nii yɛ mɔ ni ashwie lɛ, shi etsake etsui ni ahé lɛ ekoŋŋ lɛ gbɛfaŋ. Kɛ́ no mli lɛ, mɔ nɛɛ ha nɔ̃ ko kpakpa ko ŋmɛɛ bo, loo efite ogbɛ́i yɛ gbɛ ko nɔ hu? Amrɔ nɛɛ ahé lɛ kɛba asafo lɛ mli ekoŋŋ. Kɛ́ wɔkane wiemɔi ni yɔɔ Yeremia 31:34 lɛ, te ebaaná wɔsusumɔi kɛ bɔ ni wɔbaafee wɔnii wɔha lɛ anɔ hewalɛ eha tɛŋŋ? Ani wɔkɛ mɔ ni tɔ̃ wɔnɔ lɛ he baafa lɛ, ni wɔyaŋ nɔ wɔwoŋ enɔfɔŋfeemɔ lɛ nɔ ekoŋŋ? (2 Kor. 2:6-8) Hɛɛ, enɛ ji nɔ̃ ko ni esa akɛ mɛi fɛɛ ni hiɛ sɔɔ kpaŋmɔ hee lɛ abɔ mɔdɛŋ amɛkɛtsu nii yɛ amɛshihilɛ mli daa gbi.

20. Mɛɛ gbɛ nɔ esoro bɔ ni ofeɔ onii ohaa lɛ yɛ Yeremia beaŋ bii lɛ ateŋ kpotoo anɔ̃ lɛ he?

²⁰ Yeremia beaŋ lɛ, Yudafoi babaoo fee amɛnii oookɛɛ amɛmiikɛɛ akɛ: “Yehowa efeŋ ekpakpa, ni esaa efeŋ efɔŋ hu!” (Zef. 1:12) Eyɛ mli akɛ Yudafoi lɛ le mɔ ni Yehowa ji kɛ bɔ ni etamɔ moŋ, shi amɛnu he akɛ efeŋ nɔ̃ ko; asaŋ ekpaŋ gbɛ akɛ amɛhi shi yɛ shishitoo mlai komɛi anaa. Shi, ole jogbaŋŋ akɛ anyɛŋ akɛ nɔ̃ ko atee Nyɔŋmɔ. Osheɔ Nyɔŋmɔ gbeyei jogbaŋŋ, ni ekã shi faŋŋ akɛ obaasumɔ ni otsi ohe kɛjɛ efɔŋ he. (Yer. 16:17) Nakai beaŋ nɔŋŋ lɛ, ole akɛ Yehowa ji Tsɛ ko ni feɔ ejurɔ. Kɛ́ mɛi na nibii kpakpai ni wɔfeɔ lɛ jio, amɛnaaa jio lɛ, enaa fɛɛ.—2 Kron. 16:9.

21, 22. Mɛni hewɔ ehe ehiaaa ni akɛɔ bo dɔŋŋ akɛ: “Le Yehowa” lɛ?

²¹ Nɔ̃ ko ni sa kadimɔ waa yɛ kpaŋmɔ hee lɛ he nɛ: “Maŋɔ mimla lɛ mawo amɛmli ni maŋma yɛ amɛtsui nɔ, ni matsɔ amɛ-Nyɔŋmɔ . . . Ni mɔ ko etsɔŋ enaanyo, ni asaŋ mɔ ko etsɔŋ enyɛmi dɔŋŋ akɛ: Le Yehowa! ejaakɛ amɛ fɛɛ kwa amɛaale mi.” (Yer. 31:33, 34) Mɛi ni afɔ amɛ mu ni yɔɔ shikpɔŋ lɛ nɔ ŋmɛnɛ lɛ eha efee faŋŋ akɛ, Nyɔŋmɔ mla lɛ yɛ amɛmli. Nɔ̃ najiaŋ ni amɛkɛ amɛhe aaafɔ̃ adesa ko tsɔɔmɔi anɔ lɛ, amɛnáa suɔmɔ amɛhaa anɔkwalei ni yɔɔ Nyɔŋmɔ mla lɛ mli lɛ. Ni amɛjɛɔ miishɛɛ mli amɛtsɔɔ asafo babaoo lɛ mli bii lɛ Biblia mli nilee. No eha mɛi ni yɔɔ hiɛnɔkamɔ akɛ amɛbaahi shikpɔŋ nɛɛ nɔ lɛ hu ebale Yehowa, ni amɛná suɔmɔ amɛha lɛ. Amɛjɛɔ amɛsuɔmɔ mli amɛboɔ Yehowa gbɛtsɔɔmɔ toi, ni amɛnáa hekɛnɔfɔɔ yɛ eshiwoi lɛ amli. Ekolɛ, ofata mɛi ni awieɔ amɛhe nɛɛ ahe. Ole Yehowa waa, ni okɛ lɛ teŋ yɛ jogbaŋŋ. Mɛɛ jɔɔmɔ po enɛ ji nɛkɛ!

²² Te owajeɔ okɛ Yehowa teŋ wekukpaa lɛ ohaa tɛŋŋ? Ŋwanejee ko bɛ he akɛ okaiɔ bei komɛi amli ni onu he akɛ eha osɔlemɔi ahetoo lɛ. Niiashikpamɔi ni tamɔ nɛkɛ lɛ haa ohiɛ sɔɔ nɔ̃ Nyɔŋmɔ ni eji lɛ babaoo. Kɛ́ ŋmalɛ ko ni ye ebua bo kɛdamɔ naagba ko naa lɛ ba ojwɛŋmɔŋ lɛ, ekolɛ obaanu he akɛ Nyɔŋmɔ eye ebua bo. Ha niiashikpamɔi ni tamɔ nakai akã otsui nɔ waa. Beni oyaa nɔ okaseɔ Nyɔŋmɔ Wiemɔ lɛ, Nyɔŋmɔ he nilee ni oyɔɔ lɛ baaya nɔ afa, hɛɛ, obaaya nɔ oná he sɛɛ.

23. Kɛ́ oná ole Yehowa lɛ, mɛɛ gbɛ nɔ no baanyɛ aha ohenilee akayi bo tuutu?

²³ Shi, jɔɔmɔ kroko ko yɛ ni wɔbaanyɛ wɔná amrɔ nɛɛ ni kɛ kpaŋmɔ hee lɛ yɛ tsakpãa. Le ni wɔle akɛ Yehowa kɛ eshai faa yɛ kpaŋmɔ hee lɛ naa lɛ baanyɛ aye abua wɔ koni wɔhenilee akaya nɔ eyi wɔ. Akɛ nɔkwɛmɔnɔ lɛ, mɛi komɛi ni kpɔ hɔ dani amɛbale Nyɔŋmɔ shishitoo mlai lɛ ahenilee baanyɛ ayi amɛ, ni amɛbaaye awerɛho akɛni amɛje gbɛ amɛfo adesa ko wala nɔ lɛ hewɔ. Mɛi krokomɛi baanyɛ anu he nakai akɛni amɛgbe mɛi yɛ ta mli lɛ hewɔ. Yesu kpɔmɔ afɔle lɛ, ni ji nɔ̃ tuuntu ni haa kpaŋmɔ hee lɛ tsuɔ nii lɛ, haa akɛ mɛi ni etsake amɛtsui lɛɛlɛŋ lɛ ahe eshai faa amɛ. Kɛ́ nakai ni lɛ, ani esaaa akɛ wɔnáa nɔmimaa akɛ kɛ́ Yehowa kɛ wɔhe eshai fa wɔ lɛ, ebuɔ sane lɛ akɛ egbo? Esaaa akɛ wɔjwɛŋɔ eshai ni Yehowa kɛfa kwraa lɛ anɔ.

24. Kɛ́ okane sane ni yɔɔ Yeremia 31:20 lɛ, mɛɛ hekɛnɔfɔɔ onáa?

²⁴ Wɔnaa bɔ ni Nyɔŋmɔ kɛ eshai faa lɛ he odaseyeli ni yɔɔ faŋŋ yɛ Yeremia 31:20 lɛ. (Nyɛkanea.) Afii nyɔŋmai komɛi dani afɔ Yeremia lɛ, Yehowa gbala Israel kooyigbɛ akutsei nyɔŋma maŋtsɛyeli lɛ (ni akɛ Efraim, ni ji akutso ni da yɛ amɛteŋ lɛ feɔ he mfoniri lɛ) toi yɛ amɛwɔŋjamɔ lɛ hewɔ. Aŋɔ amɛ nom kɛshi amɛmaŋ lɛ nɔ. Fɛɛ sɛɛ lɛ, nakai maŋ lɛ sane kã Nyɔŋmɔ tsui nɔ, ni ejie suɔmɔ kpo etsɔɔ maŋ lɛ. Etee nɔ esumɔ maŋ nɛɛ tamɔ ‘suɔmɔ bi.’ Kɛ́ esusu amɛhe lɛ, emli ‘nɔ́moɔ lɛ,’ ni tsɔɔ akɛ enuɔ he ehaa amɛ yɛ emli tɔ̃ɔ. Sane nɛɛ ni atsĩ tã beni awieɔ kpaŋmɔ hee lɛ he lɛ haa wɔnaa akɛ, Yehowa jieɔ mlihilɛ kpo etsɔɔ mɛi ni tsakeɔ amɛtsui yɛ amɛtsutsu eshai ahe lɛ, ni ekɛ amɛhe faa amɛ kwraa.

25. Mɛni hewɔ esa akɛ oda Yehowa shi yɛ kpaŋmɔ hee lɛ hewɔ lɛ?

²⁵ Yehowa shiwoo akɛ ebaatsɔ kpaŋmɔ hee lɛ nɔ ekɛ eshai afa lɛ baaba mli kɛmɔ shi kwraa yɛ Kristo Afii Akpe Nɔyeli lɛ naagbee. No mli lɛ, Yesu Kristo kɛ mɛi 144,000 ni baasɔmɔ yɛ eshishi akɛ osɔfoi lɛ eye ebua adesai anɔkwafoi lɛ kɛbote emuuyeli mli. Naagbee kaa lɛ sɛɛ lɛ, abaabu adesai afata Yehowa jeŋ muu fɛɛ weku lɛ he. (Nyɛkanea Romabii 8:19-22.) Adesai kɛ afii ohai abɔ edɔmɔ ŋtsɔi yɛ esha nyɔŋyeli shishi. Shi, Afii Akpe Nɔyeli lɛ naagbee lɛ, Yehowa bɔɔ nii ni ji adesai lɛ baaye amɛhe kɛjɛ esha kɛ gbele mli, ni amɛbaabote “Nyɔŋmɔ bii lɛ anunyam heyeli lɛ mli.” Belɛ, ná hekɛnɔfɔɔ akɛ kɛtsɔ kpaŋmɔ hee lɛ, ni ji gbɛjianɔ ni ajɛ suɔmɔ mli ato lɛ nɔ lɛ, obaanyɛ oná jɔɔmɔi babaoo. Kɛtsɔ “tso fɔ́” kɛha David lɛ nɔ lɛ, obaanyɛ oná jɔɔmɔ amrɔ nɛɛ kɛ agbɛnɛ hu kɛya naanɔ, ni ohi shi beni ayeɔ “jalɛ sane yɛ shikpɔŋ lɛ nɔ” lɛ.—Yer. 33:15.