Sɛɛnamɔ Ni Baajɛ “Nyɔŋmɔ Kɛ Gbɔmɛi Ateŋdamɔlɔ Kome” Lɛ Ŋɔɔ Aba
1. (a) Mɛni hewɔ Yudafoi ni yɔɔ ŋmɛnɛ lɛ sumɔɔɔ kpaŋmɔ hee ko lɛ? (b) Namɔ pɛ baanyɛ eto kpaŋmɔ hee kɛ emlidamɔlɔ he gbɛjianɔ?
1 ŊMƐNƐ lɛ, maji 152 ni yɔɔ Jeŋmaji Ekomefeemɔ lɛ mli lɛ ateŋ eko eko kwraa sumɔɔɔ ni ekɛ Yehowa, Abraham, Isak kɛ Yakob Nyɔŋmɔ lɛ afee kpaŋmɔ. Yudafoi 15,000,000 ni egbɛ eshwa shikpɔŋ lɛ nɔ fɛɛ ŋmɛnɛ lɛ tete po sumɔɔɔ. Yɛ Yeremia 31:31-34 gbalɛ lɛ fɛɛ sɛɛ lɛ, amɛmiisumɔ ni amɛhiɛ hemɔkɛyeli nɛɛ mli akɛ amɛyɛ Mla kpaŋmɔ momo lɛ ni mlidamɔlɔ ji Mose lɛ shishi lolo. “Ejaakɛ ni amɛleee Nyɔŋmɔ jalɛ lɛ, shi amɛdiɛŋtsɛ amɛjalɛ moŋ amɛtaoɔ amɛŋɔ ma shi [yɛ mɔdɛŋ ni amɛbɔɔ ni amɛye Mla kpaŋmɔ lɛ nɔ] hewɔ lɛ, amɛbaaa amɛhe shi amɛhaaa Nyɔŋmɔ jalɛ” hegbɛ ni aha amɛ kɛtsɔ kpaŋmɔ hee lɛ anɔ lɛ. (Rom. 10:1-3) Yehowa, anɔkwa jalɛ Nyɔŋmɔ lɛ ji mɔni to kpaŋmɔ hee lɛ. Lɛ pɛ ji mɔni nyɛ ekɛma shi ni ehala emlidamɔlɔ ni salɛ lɛ.
2. Namɛi Yehowa kɛɛ ekɛ amɛ baafee kpaŋmɔ hee lɛ, ni mɛni ekɛ enɛ baafee yɛ amɛtɔmɔ kɛ esha kɛ ehe nilee ni amɛbaana lɛ he?
2 “Naa, gbii miiba Yehowa kɛɛ, ni mikɛ Israel we lɛ kɛ Yuda we lɛ aaakpaŋ kpaŋmɔ hee: etamɔɔɔ kpaŋmɔ ni mikɛ amɛtsɛmɛi lɛ kpaŋ gbi ni mimɔ amɛnine mli ni mijieamɛ kɛjɛ Mizraim shikpɔŋ lɛ nɔ lɛ; nakai mikpaŋmɔ lɛ amɛku mli, tsɛ miji amɛwu! Yehowa kɛɛ. Shi kpaŋmɔ ni mikɛ Israel we lɛ baakpaŋ yɛ nakai gbii lɛ asɛɛ lɛ nɛ, Yehowa kɛɛ: Maŋɔ mimla lɛ mawo amɛmli ni maŋma yɛ amɛtsui nɔ, ni matsɔ amɛ-Nyɔŋmɔ, ni amɛ hu amɛaaatsɔ mimaŋ! Ni mɔ ko etsɔŋ enaanyo, ni asaŋ mɔ ko etsɔŋ enyɛmi dɔŋŋ akɛ: Le Yehowa! ejaakɛ amɛfɛɛ kwa amɛaaale mi, kɛaaajɛ amɛteŋ mɔ bibioo nɔ kɛyashi amɛteŋ mɔ wulu nɔ, Yehowa, kɛɛ; ejaakɛ maŋɔ amɛnishaianii lɛ mafa, ni amɛhe eshai lɛ mikaiŋ dɔŋŋ”—Yer. 31:31-34.
3. Namɔ puemɔ nɔ adamɔ akɛbu kpaŋmɔ hee lɛ be lɛ, ni ani enɛ kɔ Mose he?
3 Mɛɛ be Yehowa kɛ “Israel we lɛ kɛ Yuda we lɛ” fee nakai kpaŋmɔ hee lɛ? Enɛ he be akɔntaabuu lɛ damɔ mlidamɔlɔ ni Yehowa hala kɛha kpaŋmɔ lɛ nɔ. Jeee akɛ abaatee Mose shi kɛjɛ gbohii ateŋ koni ebafee mlidamɔlɔ kɛha kpaŋmɔ hee lɛ. Ehe baŋ sɛɛnamɔ kroko ko kɛhaŋ mɛi ni yɔɔ kpaŋmɔ hee lɛ mli lɛ tamɔ bɔni ehe baaa sɛɛnamɔ kɛha Israel lɛ.
4. Yɛ Farisii tsɔɔlɔ Gamaliel Hebrinyo nikaselɔ ko wiemɔ naa lɛ, namɔ ji kpaŋmɔ hee lɛ mlidamɔlɔ kɛha Nyɔŋmɔ?
4 Ashiii wɔ efolo ni wɔyi afeewɔ kɔshikɔshi yɛ mɔni bafee mlidamɔlɔ ni ataoɔ ni wɔleee lɛ hewɔ. Yɛ biɛ lɛ, wɔbaakwɛ wolo ko ni Hebrinyo ko ŋma kɛjɛ mumɔ mli eyaha Hebribii lɛ, mɔni ji nikaselɔ ko ni fɔɔ Farisii tsɔɔlɔ ko ni ehe gbɛi wala yɛ Wɔ-Ŋmɛnɛŋmɛnɛ Be mli klɛŋklɛŋ afi oha lɛ mli ni atsɛɔ lɛ Gamaliel lɛ naneshi tamɔ lɛ mli. Beni etsɔɔ sɔrɔto ni yɔɔ Mose kɛ mlidamɔlɔ hee lɛ teŋ lɛ, etee nɔ ekɛɛ akɛ: “Taakɛ bɔni awie atsɔɔ Mose, beni ebafee buu lɛ, ejaakɛ ekɛɛ: ‘Kwɛmɔ ni ahi; koni ofee nibii lɛ fɛɛ yɛ henɔ ni atsɔɔɔ yɛ [Sinai] gɔŋ lɛ nɔ lɛ naa.’ Shi agbɛnɛ lɛ [Yesu] ena osɔfoyeli ni hi fe tsutsunɔ lɛ, ejaakɛ kpaŋmɔ ni hi fe tsutsunɔ lɛ ni edamɔ shiwooi ni hi fe tsutsunii lɛ anɔ eŋma lɛ mlidamɔlɔ jilɛ.” (Heb. 8:5, 6) “Kɛ kpaŋmɔ heɔ mlidamɔlɔ Yesu lɛ, kɛ lá ni atsɔɔ ashwaa ni wieɔ wiemɔ kpakpa fe Habel nɔ̃ lɛ, anɔ.”—Heb. 12:24.
5. Dani esu baagbo lɛ, te etsɔɔ akɛ ele akɛ be eshɛ ni Mla kpaŋmɔ momo lɛ aho aya ni kpaŋmɔ hee lɛ aye enajiaŋ tɛɛŋ?
5 Yesu yɔse akɛ be eshɛ ni Yehowa kɛ kpaŋmɔ hee lɛ ato Mose mla kpaŋmɔ momo lɛ najiaŋ. Nohewɔ lɛ, yɛ Hehoo nyɔɔŋ ni tsɔ egbele lɛ hiɛ yɛ Sohaa, Nisan 14, 33 Ŋ.B. lɛ nɔ lɛ, eje efɔleshaa gbele kaimɔ lɛ shishi. Beni ewó Kaimɔ wein kpulu lɛ, ekɛɛ ebɔfoi anɔkwafoi nyɔŋma-kɛ-ekome lɛ akɛ: “Nyɛ fɛɛ nyɛnua eko! ejaakɛ enɛ ji milá ni ji kpaŋmɔ hee lɛ nɔ̃ lɛ, ni afɔse ashwie shi yɛ mɛi pii ahewɔ ha eshaifaa lɛ.” (Mat. 26:27, 28) Aloo tamɔ bɔni bɔfo Paulo wie Yesu wiemɔi lɛ: “Nɛkɛ kpulu nɛɛ ji kpaŋmɔ hee lɛ yɛ milá lɛ mli; nyɛfea enɛ, shiiabɔ ni nyɛaanu lɛ, ni nyɛŋɔkaimi.” (1 Kor. 11:25) Gbii etɛ sɔŋŋ lɛ ekã kaimɔ gbonyobu mli akɛ gbonyo, ni no mli lɛ ebɔ̃iko nitsumɔ akɛ nakai kpaŋmɔ hee lɛ mlidamɔlɔ.
6. Bɔni afee ni eye Nyɔŋmɔ wiemɔi ni kɔɔ tɔmɔi kɛfaa kɛ eshai ni ekaiŋ dɔŋŋ he yɛ kpaŋmɔ hee Iɛ mli anɔ lɛ, mɛni he bahia?
6 Eyɛ mli akɛ Yeremia 31:31-34 etsiii eta moŋ, shi afɔleshaa he ehia koni akɛha kpaŋmɔ hee lɛ abɔ̃i nitsumɔ. Afɔleshaa he bahia ejaakɛ beni Nyɔŋmɔ wieɔ kpaŋmɔ hee lɛ he lɛ, ekɛɛ akɛ: “Maŋɔ amɛnishaianii lɛ mafa, ni amɛhe eshai lɛ mikaiŋ dɔŋŋ!” (Yer. 31:34) Afɔleshaa kooloi alá ji nɔni akɛtsu nii yɛ Mose mla kpaŋmɔ momo lɛ kɛ hetsuu nitsumɔi amli. Enɛ kɛ hegbɔyeli naa lɛ, teŋdamɔlɔ Mose ‘kɛ lá lɛ shwa buu lɛ hu kɛ Nyɔŋmɔ jamɔ he nii lɛ fɛɛ nɔ nakai nɔŋŋ. Ni shwɛ fioo ni lá aŋɔtsuɔ nii fɛɛ he yɛ mla lɛ naa; ni kɛ ashwieee lá shi lɛ, aŋɔfaaa.’ (Heb. 9:21, 22) Yesu hiɛ elá lɛ jara lolo beni ateelɛ shi kɛjɛ gbohii ateŋ yɛ Hɔgbaa, Nisan 16, 33 Ŋ.B. lɛ. Enɛ ji nɔni Hebribii 13:20 tsɔɔ beni ekɛɛ akɛ: “Hejɔlɛ Nyɔŋmɔ lɛ, jie toi lɛ akwɛlɔ kpeteŋkpele ni ji wɔ-Nuŋtsɔ Yesu kɛjɛ gbohii ateŋ yɛ naanɔ kpaŋmɔ lɛ lá lɛ mli.”—Yoh. 10:11.
7. Akɛni Kristo kɛ afɔleshaa ni hi fe klɛŋklɛŋnɔ lɛ ha yɛ kpaŋmɔ hee lɛ hewɔ lɛ, mɛni ela Iɛ fee yɛ henilee Iɛ kɛ Nyɔŋmɔ ‘mɛi ni etsɛ’ amɛ lɛ gbɛfaŋ?
7 Akɛni akɛ afɔleshaa ni hi fe klɛŋklɛŋnɔ̃ lɛ ewo kpaŋmɔ hee lɛ hewalɛ ni ebɔ̃i nitsumɔ hewɔ lɛ, abi Hebribii ni etsɔmɔ Kristofoi lɛ akɛ: “Enyiɛ nɔŋŋ ni Kristo ni tsɔ naanɔ mumɔ lɛ nɔ eŋɔ ehe ni kpa ko bɛ he lɛ eha Nyɔŋmɔ lɛ, lɛ́ lɛ tsumɔŋ wɔhenilee lɛ he kɛjɛŋ nitsumɔi gbohii amli, koni wɔsɔmɔ Nyɔŋmɔ hiɛkãlɔ lɛ?” Akɛni Kristo lá lɛ yɛ nakai hewalɛ lɛ ni ebaanyɛ etsuu wɔ he kɛjɛ esha ni buɔ wɔ fɔ lɛ mli hewɔ lɛ, wɔyaa nɔ wɔkaneɔ akɛ: “Enɛ nɔŋŋ hewɔ ni eji kpaŋmɔ hee mlidamɔlɔ lɛ, beni afee ni ekɛ gbele akpata klɛŋklɛŋ kpaŋmɔ lɛ nɔ tɔmɔi lɛ, ni mɛi ni [Nyɔŋmɔ] etsɛ amɛ lɛ anine ashɛ naanɔ gboshinii lɛ ahe shiiwoo lɛ nɔ.” (Heb. 9:14, 15) Shi mɛɛ be ji beni Kristo lá lɛ je shishi etsuu nakai Hebribii ni etsɔmɔ Kristofoi ni sã lɛ amɛyɔɔ “kpaŋmɔ momo” ni ji mla kpaŋmɔ ni Mose ji emlidamɔlɔ yɛ Sinai gɔŋ lɛ shishi lɛ ahenilei ahe?
8. Mɛɛ be ji beni Kristo lá lɛ je shishi etsuu Hebribii ni etsɔmɔ Kristofoi lɛ ni kulɛ amɛyɔɔ Mla kpaŋmɔ momo lɛ shishi lɛ ahenilee ahe?
8 Jeee beni Kristo te shi kɛjɛ gbohii ateŋ lɛ, shi yɛ no sɛɛ gbi ni ji 50 lɛ nɔ. No ji Pentekoste gbi lɛ beni ekwɔ kɛtee ŋwɛi ni eyapue yɛ Nyɔŋmɔ hiɛ yɛ “ŋwɛi diɛŋtsɛ . . . koni agbɛnɛ eyapue yɛ Nyɔŋmɔ hiɛ ehawɔ” lɛ sɛɛ.—Heb. 9:24.
9. Yɛ Pentekoste gbi lɛ nɔ beni Petro kɛɛ Yudafoi ni amɛhenilee gba amɛ naa lɛ akɛ kɛji abaptisi amɛ yɛ Yesu Kristo gbɛi mli akɛ amɛhe eshai baafa amɛ lɛ mɛni enɛ tsɔɔ yɛ kpaŋmɔi ahe?
9 Yɛ nakai Pentekoste gbi lɛ nɔ lɛ, bɔfo Petro ha Yudafoi kɛ wɔŋjalɔi ni ebatsɔmɔ Yudafoi ni afo amɛ ketia lɛ wiemɔ ko ni gba amɛhenilee naa. Amɛbi akɛ: “Te wɔɔɔfee tɛɛŋ? Petro ha hetoo akɛ: “Nyɛtsakea nyɛtsuii amli ni nyɛteŋ mɔ fɛɛ mɔ aha abaptisilɛ awo Yesu Kristo gbɛi amli, koni aŋɔ nyɛhe eshai lɛ afanyɛ, ni nyɛaaana mumɔ krɔŋkrɔŋ nɔkeenɔ lɛ.” (Bɔf. 2:37, 38) Amɛ-eshai ni amɛtsake amɛtsuii kɛjɛ he ni awo shi akɛ akɛbaafa amɛ lɛ tsɔɔ nɔko. Mɛni? Etsɔɔ akɛ Nyɔŋmɔ kpaŋmɔ hee kɛ eshaifaa gbɛjianɔtoo ni fata he lɛ ebɔ̃i nitsumɔ nakai gbi lɛ. Ni nakai nɔŋŋ hu akala Mose mla kpaŋmɔ momo lɛ akpɛtɛ Yesu Kristo gbeletso lɛ!—Efe. 2:15, 16; Kol 2:14; Heb. 8:8-13; Yer. 31:34.
10. Yɛ gbii komɛi asɛɛ beni Petro kɛ Yudafoi ni eye láyisɔ̃ lɛ wieɔ yɛ Yerusalem sɔlemɔtsu lɛ mli lɛ, te ema enɔkwasane ni kɔɔ kpaŋmɔi ahe nɛɛ nɔ mi tɛɛŋ?
10 Gbii komɛi asɛɛ lɛ, ama nɛkɛ anɔkwasane nɛɛ nɔ mi ekoŋŋ. No mli lɛ Petro kɛɛ Yudafoi lɛ ni eye láyisɔ̃ ni ebua amɛhe naa yɛ sɔlemɔtsu lɛ mli lɛ akɛ: “Nohewɔ lɛ nyɛtsakea nyɛtsuiiaŋ, ni nyɛkua, nyɛsɛɛ, koni agbe nyɛhe eshai lɛ, beni afee ni hejɔɔmɔ yinɔ ajɛ Nuŋtsɔ lɛ hiɛ aba, ni etsu Yesu Kristo mɔni ejie etonyɛ momo lɛ; mɔni sa akɛ eyahi ŋwɛi kɛyashi nibii fɛɛ agbɛjianɔtoo be lɛ ni Nyɔŋmɔ ewie he yɛ egbalɔi krɔŋkrɔŋi lɛ anaa kɛjɛ teteete lɛ.” Naagbee lɛ, Petro mu ewiemɔ lɛ naa ekɛɛ akɛ: “Nyɛ tsutsu nyɛŋɔɔ etsulɛ ni ebajɔɔ nyɛ ni ekpale nyɛteŋ mɔ fɛɛ mɔ kɛjɛ enifɔjianii lɛ amli.”—Bɔf. 3:19-21, 26.
Teŋdamɔlɔ” Kɛha Mɛi Enyiɛ?
11. Mɛɛ anɔkwasaji yɔɔ ni tsɔɔ kɛji helonaa Israel kɛ Yuda mɔji lɛ Nyɔŋmɔ kɛfee kpaŋmɔ hee Iɛ?
11 Shi ani heloonaa “Israel we lɛ” kɛ heloonaa “Yuda we lɛ” Nyɔŋmɔ kɛfeɔ kpaŋmɔ hee lɛ! Te enɛ baanyɛ aba mli tɛɛŋ akɛni nakai maji enyɔ lɛ amli heloonaa Yudafoi lɛ kɛ atuatsemɔ ekpoo mɔni baafee nakai kpaŋmɔ hee lɛ mlidamɔlɔ lɛ, ni akɛ maŋ lɛ, amɛyeɔ Pentekoste gbijurɔ lɛ yɛ gbi ni ato nɔ yɛ Yerusalem sɔlemɔtsu lɛ mli lɛ? Nyɔŋmɔ nyɛŋ efee nakai. Eto eyiŋ akɛ ekɛ Kristofoi a-Israel ni afɔle ehee ni ji mumɔŋ Israel ni afɔle yɛ nakai Pentekoste gbi ni “mumɔ krɔŋkrɔŋ lɛ bayi amɛnɔ,” ni ji Yesu Kristo kaselɔi ni abaptisi amɛ ni naa shɛɔ 120 lɛ nɔ lɛ afee kpaŋmɔ hee lɛ. (Bɔf. 11:15) Jeee sɔlemɔtsu lɛ mli mɛnɛɛmɛi mɛ yɛ, shi yɛ ŋwɛitsu ko mli yɛ Yerusalem. Jɛmɛ ji heni akɛ Nyɔŋmɔ mumɔ lɛ fɔ́ nakai kaselɔi ni amii amɛ nu lɛ yɛ koni amɛbatsɔmɔ emumɔŋbii, “Nyɔŋmɔ Israel” lɛ. Yɛ nakai feemɔ mli lɛ, akɛ amɛ wo kpaŋ mɔ hee lɛ mli kɛtsɔ ŋwɛi teŋdamɔlɔ ni ji Yesu Kristo, Gbalɔ ni da fe Mose lɛ nɔ.—“Bɔf. 2:1-36; Yoel 2:28, 29; Yoh. 3:3, 5; Gal. 6:16.
12. Yɛ Nyɔŋmɔ gbɛjianɔtoo ni ekɛtsuɔ nii lɛ naa lɛ, te alɛɛ Yesu Kristo mlidamɔlɔ ni eji lɛ mli yɛ afi ni nyiɛ nakai Pentekoste gbi lɛ sɛɛ Iɛ mli tɛɛŋ?
12 Nohewɔ lɛ Yesu Kristo ni yɔɔ ŋwɛi lɛ ji Nyɔŋmɔ kɛ Israelbii lɛ teŋdamɔlɔ be mli ni nɛkɛ gbɔmɛi nɛɛ yɔɔ heloo mli lolo akɛ hii kɛ yei lɛ. Yɛ “maŋ krɔŋkrɔŋ” bibioo nɛɛ mlibii ni amɛji kɛshɛɔ heko nɛɛ mli po lɛ, akpã Yesu Kristo teŋdamɔlɔ ni eji nɛɛ mli, ejaakɛ Nyɔŋmɔ kɛ gbɛjianɔtoo krɛdɛɛ ko tsu nii yɛ mɛi akui sɔrɔtoi ni eŋɔɔ kɛwoɔ kpaŋmɔ hee lɛ mli lɛ mli. Nohewɔ lɛ kɛjɛ Pentekoste gbi lɛ nɔ, 33 Ŋ.B. sɛɛ afi lɛ, Yesu ji nakai mumɔŋ Israelbii ni sa lɛ amɛji heloonaa Yudafoi aloo wɔŋjalɔi ni ebatsɔmɔ Yudafoi ni afo amɛ ketia lɛ Teŋdamɔlɔ. Akɛ mɛnɛɛmɛi ateŋ mɛi ni naa shɛɔ 3,000 lɛ fata mumɔŋ Israel lɛ he yɛ nakai Pentekoste gbi, 38 Ŋ.B. lɛ inɔ. (Bɔf. 2:10, 37-41) Belɛ eeefee tamɔ yɛ afi ni nyiɛ sɛɛ (34 Ŋ.B.) lɛ mli lɛ, ashiɛ Kristo he “sanekpakpa” lɛ yɛ Samaria yɛ Saul ni jɛ Tarso yiwaa ni ekɛba lɛ hewɔ, ni mumɔ krɔŋkrɔŋ lɛ ‘ba’ heyelilɔi ni abaptisi amɛ yɛ jɛmɛ lɛ anɔ. (Bɔf. 8:15-17) Kɛje no sɛɛ lɛ, akpã Yesu teŋdamɔlɔ ni eji lɛ mli koni ehe aba sɛɛnamɔ aha mumɔŋ Israelbii ni sa lɛ amɛji Samaria hii kɛ yei aloo Samariabii lɛ.
13. Beni aŋɔ Samariabii lɛ afii enyɔ sɛɛ lɛ, te Yesu bafee mlidamɔlɔ eha mumɔŋ Isrealbii akuu ni ji etɛ nɔ̃ lɛ tɛɛŋ?
13 Afii enyɔ ebaho agbɛnɛ. Naagbee kwraa lɛ, yɛ afi 36 Ŋ.B. gbobe aloo Yesu gbele kɛ shitee sɛɛ afii etɛ kɛ fã lɛ, eje shishi efee teŋdamɔlɔ eha mumɔŋ Israelbii akuu ni ji etɛ nɔ̃ ni ajie kɛjɛ Jeŋmajiabii foolɔi amli lɛ; ni aje enɛ shishi kɛjɛ Italia tatsɛnukpa Kornelio nɔ. Beni bɔfo Petro gbaa Yudafoi ni ebatsɔmɔ Kristofoi nɛkɛ naakpɛɛ nibii ni eba lɛ yɛ Yerusalem lɛ, amɛkɛɛ akɛ: “Belɛ Jeŋmaji [foolɔi] lɛ hu Nyɔŋmɔ eha amɛ tsuitsakemɔ ni akɛaahere amɛ yiwala!”—Bɔfoi 8:1 kɛyashi 11:18.
14. Mɛni Paulo kɛɛ Efeso onukpai Iɛ yɛ eshiɛmɔ ni kɔɔ Nyɔŋmɔ he tsuitsakemɔ he lɛ he, ni mɛɛ kpaŋmɔ he sɔɔlɔ eji amrɔ nɛɛ?
14 Yɛ no sɛɛ afii ni fe 20 lɛ, Paulo miitsu nii lolo akɛ bɔfo kɛha jeŋmaji lɛ ni eeya emaŋsɛɛ sanekpakpa shiɛmɔ gbɛfaa ni ji etɛ lɛ naagbee. Beni ekuɔ esɛɛ eyaa Yerusalem lɛ, eyawa yɛ Mileto ni ekɛ Efeso asafo ni yɔɔ Asia Bibioo lɛ mli onukpai lɛ wie. Egba amɛ nitsumɔi ni etsu lɛ akɛ: “Ni miye tsuitsakemɔ kɛ Nyɔŋmɔ hamɔ kɛ wɔ-Nuŋtsɔ Yesu Kristo nɔ hemɔkɛyeli lɛ he odase mitsɔɔ Yudafoi kɛ Helabii lɛ fɛɛ lɛ. Ni agbɛnɛ lɛ, naa, efimi yɛ mumɔ mli hewɔ lɛ miiya Yerusalem.” (Bɔf. 20:21, 22) No mli lɛ esɔmɔɔɔ akɛ Farisiinyo kɛha Mose mla kpaŋmɔ momo lɛ dɔŋŋ. Shi moŋ tamɔ bɔni eŋma yɛ Korintobii awolo ni ji enyɔ, 3:5, 6 lɛ, “Wɔsalɛ lɛ Nyɔŋmɔ mli ejɛ; lɛ nɔŋŋ eha wɔsa ni wɔtsɔmɔ kpaŋmɔ hee lɛ he sɔɔlɔi, jeee ŋmalɛ okadi nɔ̃, shi moŋ mumɔ nɔ̃; ejaakɛ ŋmalɛ okadi lɛ gbeɔ mɔ; shi mumɔ lɛ haa mɔ yi naa wala.”
15. Beni Paulo wieɔ “kpaŋmɔ hee lɛ he sɔɔlɔi” ahe lɛ, namɛi ahe ewieɔ beni ekɛɛ “wɔ” lɛ, ni ani nɛkɛ gbɔmɛi nɛɛ ji Teŋdaamɔ Kuu yɛ Nyɔŋmɔ kɛ gbɔmɛi ateŋ?
15 Namɛi ahe bɔfo lɛ wie yɛ biɛnɛɛ akɛ “wɔ” lɛ? Yɛ ewolo lɛ hiɛkpamɔ mli lɛ, eha wɔyɔse mɛi ni ji “wɔ” lɛ beni ekɛɛ akɛ: “Paulo, ni ji Yesu Kristo bɔfo yɛ Nyɔŋmɔ suɔmɔ naa lɛ, kɛ wɔnyɛmi Timoteo lɛ ŋma yaha Nyɔŋmɔ asafo ni yɔɔ Korinto lɛ.” (2 Kor. 1:1) Nohewɔ lɛ, Paulo kɛ Timoteo fɛɛ ji ‘kpaŋmɔ hee lɛ sɔɔlɔi yɛ mumɔ mli.’ Paulo kɛ nɛkɛ wiemɔ nɛɛ etsɔɔɔ akɛ lɛ kɛ Timoteo ji Teŋdaamɔ Kuu ni fata Yesu he akɛ teŋdamɔlɔi. Dabida, ejaakɛ amɛdiɛŋtsɛ lɛ, mumɔŋ Israelbii ni Yesu ji Nyɔŋmɔ Teŋdamɔlɔ kɛha amɛ lɛ kɛkɛ ji amɛ. Yesu pɛ ji “kpaŋmɔ hee mlidamɔlɔ” lɛ.—Heb. 12:24.
16, 17. Yɛ 1 Timoteo 1:20 kɛyashi 2:7 lɛ, mɛɛ shishinumɔ he Paulo wie ni ekɛtsi Kristo Yesu tã akɛ teŋdamɔlɔ lɛ?
16 Beni Paulo ŋmaa wolo eyaha Timoteo lɛ, etee nɔ ewie mlidamɔlɔ ni Yesu ji Iɛ he ni ekɛɛ akɛ: “Amɛteŋ mɛikomɛi ji Himeneo kɛ Aleksandro, mɛi ni mitu miwo Satan dɛ, koni agbala amɛtoi ni amɛkawie musubɔɔwiemɔi dɔŋŋ lɛ. Agbɛnɛ nɔ̃ klɛŋklɛŋ ni miwoɔ he ŋaa ji akɛ ahiɛ faikpamɔi, sɔlemɔi, mlidaamɔi, shidaai amli aha gbɔmɛi fɛɛ [shi Himeneo kɛ Aleksandro musubɔlɔi lɛ fataaa he], aha maŋtsɛmɛi kɛ mɛi fɛɛ ni yeɔ onukpai lɛ, koni wɔhi shi kpoo yɛ hejɔlɛ mli, yɛ Nyɔŋmɔ jamɔ kɛ jeŋba ni hiɛ sɔɔ fɛɛ mli.
17 “Ejaakɛ enɛ hi ni eŋɔɔ wɔ-Nyɔŋmɔ ni ji wɔyiwalaherelɔ lɛ naa, mɔni sumɔɔ akɛ ehere gbɔmɛi fɛɛ yiwala, koni amɛshɛ anɔkwale lɛ lee mli. Ejaakɛ Nyɔŋmɔ kome yɔɔ, kɛ Nyɔŋmɔ kɛ gbɔmɛi ateŋdamɔlɔ kome hu ni ji gbɔmɔ Kristo Yesu lɛ, mɔni ŋɔ ehe eha akɛ kpɔ̃mɔnɔ eha mɛi fɛɛ [aloo kɛha gbɔmɛi sɔrɔtoi fɛɛ], ni ji odase ni ayeɔ yɛ be ni sa mli lɛ, nɔ̃ he ni awomi shiɛlɔ kɛ bɔfo (anɔkwale miwieɔ yɛ Kristo mli, mimaleee!) , jeŋmaji [foolɔi] atsɔɔlɔ yɛ hemɔkɛyeli kɛ anɔkwale mli lɛ.”—1 Tim, 1:20 kɛyashi 2:7.
18. (a) Ani Paulo kɛ enɛ miiwo Timoteo ŋaa akɛ efee Nyɔŋmɔ kɛ nakai nɔyelɔi lɛ ateŋdamɔlɔ? (b) Namɛi baana nakai faikpamɔi ni akɛhaa Nyɔŋmɔ yɛ nakai nɔyelɔi lɛ ahewɔ lɛ he sɛɛ?
18 Nohewɔ lɛ Paulo wo ŋaa akɛ ahiɛ “faikpamɔi, sɔlemɔi, mlidaamɔi” amli “aha maŋtsɛmɛi kɛ mɛi fɛɛ ni yeɔ onukpai lɛ.” Shi ewooo Timoteo ŋaa akɛ efee mlidamɔlɔ yɛ Nyɔŋmɔ kɛ nakai mɛi ni hiɛ nɔyeli gbɛhei lɛ ateŋ. Jeee nakai nɔyelɔi lɛ ni aaatsake amɛ ni amɛbafee Kristofoi lɛ ji yiŋtoo ni hɔ nakai “faikpamɔi, sɔlemɔi, mlidaamɔi” lɛ asɛɛ. Belɛ namɛi krɛdɛɛ ji mɛi ni baaná nakai fai ni akpaa Nyɔŋmɔ lɛ he sɛɛ? Mɛni ji yiŋtoi ni hɔ nakai sɔlemɔi ni asɔleɔ ahaa Nyɔŋmɔ lɛ sɛɛ? “Koni [wɔ Kristofoi ni tamɔ Paulo kɛ Timoteo] wɔhi shi kpoo yɛ hejɔlɛ mli, yɛ Nyɔŋmɔ jamɔ kɛ jeŋba ni hiɛ sɔɔ fɛɛ mli.”—1 Tim. 2:12.
19. Mɛni nakai Nyɔŋmɔ jamɔ jeŋba shihilɛ lɛ baatsu, ni namɔ hiɛ enɛ sa?
19 Wɔshihilɛ yɛ kpoofemɔ kɛ hejɔlɛ ni hiɛ sɔɔ fɛɛ mli lɛ baaha Kristofoi ni kpa fai yɛ maŋkwramɔŋ nɔyelii ahewɔ lɛ ana yiwalaheremɔ. Nakai Kristofoi ni yeko fɔ lɛ ayiwalaheremɔ lɛ “hi ni eŋɔɔ Nyɔŋmɔ ni ji wɔyiwalaherelɔ lɛ naa.” Mɛni hewɔ? Ejaakɛ eji Nyɔŋmɔ suɔmɔnaa akɛ “ehere gbɔmɛi fɛɛ yiwala, koni amɛshɛ anɔkwale lɛ lee mli.” Yɛ enɛ kɛ gbeekpamɔ naa lɛ, mɔni atsɛ yɛ biɛnɛɛ akɛ “wɔyiwalaherelɔ” lɛ jeee Yesu Kristo, shi moŋ Nyɔŋmɔ.”
20. Yɛ 1 Timoteo 2:5, 6 wiemɔ naa lɛ, mɛni ji Kristo Yesu gbɛhe yɛ Nyɔŋmɔ yiwalaheremɔ gbɛjianɔtoo lɛ mli?
20 Belɛ mɛni ji Kristo gbɛhe mɔ yɛ nɛkɛ yiwalaheremɔ gbɛjianɔtoo nɛɛ mli? Paulo tee nɔ ekɛɛ akɛ: “Nyɔŋmɔ kome yɔɔ, kɛ Nyɔŋmɔ kɛ gbɔmɛi [jeee gbɔmɛi fɛɛ] ateŋdamɔlɔ kome hu ni ji gbɔmɔ Kristo Yesu lɛ, mɔni ŋɔ ehe eha akɛ kpɔmɔnɔ eha mɛi fɛɛ.”—1 Tim. 2:5, 6.
21. (a) Paulo wolo ni eŋma eyaha Timoteo lɛ ji mɛɛ sɔɔlɔ ni ŋmaa mɛɛ sɔɔlɔ kroko wolo he sane? (b) Be enyiɛ nakai kpaŋmɔ lɛ baahi shi kɛyashi, ni mɛni ‘mɛi fɛɛ kpɔmɔnɔ’ lɛ tsuɔ yɛ enɛ mli?
21 Nɔni Paulo ŋma lɛ damɔ Kristojamɔ klɛŋklɛŋ afi oha lɛ mli anɔkwalei anɔ, be mli ni akɛ kpaŋmɔ lɛ bɔ̃i nitsumɔ lɛ. Aŋɔ majimaji fɛɛ mli “gbɔmɛi,” Yudabii, Samariabii, Jeŋmaji foolɔi awo mli momo yɛ beni afee amɛ mumɔŋ Israel fã lɛ sɛɛ. Kristo Yesu ji nakai kpaŋmɔ hee lɛ mlidamɔlɔ. Paulo wolo ni eŋma eyaha Timoteo ni kɔɔ enɛ he lɛ ji ‘kpaŋmɔ hee lɛ sɔɔlɔ’ kome ni miiŋma ‘kpaŋmɔ hee lɛ sɔɔlɔ’ kroko wolo lɛ he sane. Kpaŋmɔ hee lɛ ni yɔɔ “Nyɔŋmɔ ni ji wɔyiwalaherelɔ” kɛ mumɔŋ Israel teŋ lɛ baakahe ahi shi gbiiabɔ ni mumɔŋ Israelbii yɔɔ heloo mli akɛ “gbɔmɛi” yɛ shikpɔŋ nɛɛ nɔ lɛ. Nohewɔ lɛ, kpaŋmɔ lɛ miitsu nii ŋmɛnɛ. Yesu ni ji ‘kpɔmɔnɔ̃ kɛha mɛi fɛɛ’ lɛ egbele hegbɛ eha hii kɛ yei sɔrɔtoi fɛɛ ni amɛbafee mumɔŋ Israelbii koni ahe amɛ awo kpaŋmɔ hee ni Kristo Yesu ji ‘eteŋdamɔlɔ kome’ lɛ mli.
22. (a) Mɛni tsɔɔ akɛ kpaŋmɔ hee lɛ miibɛŋkɛ enaagbee, ni mɛɛ be Kristo mlidamɔlɔ ni eji lɛ lɛ baaba naagbee? (b) Mɛni hewɔ ni mlidamɔlɔ ko he ehiaaa mumɔŋ Isrealbii ni ewo amɛhiɛ nyam lɛ, ni no mli, mɛɛ gbɛhei ahe amɛbaatsu?
22 Mɛi ni fa fe 9,000 ni jieɔ amɛhe kpo akɛ amɛji mumɔŋ Israelbii yɛ kpaŋmɔ hee lɛ mli lɛ yɛ lolo. Mɛnɛɛmɛi ji “kpaŋmɔ hee lɛ he sɔɔlɔi” tamɔ Paulo kɛ Timoteo. (2 Kor. 3:6; 1:1) Eka shi faŋŋ akɛ kpaŋmɔ hee lɛ nitsumɔ lɛ miiba enaagbee kɛ yiŋtoo akɛ ebua mumɔŋ Israelbii 144,000 ni baana Nyɔŋmɔ hiɛsɔɔ lɛ anaa, koni amɛkɛ Yesu Kristo afee ekome yɛ ŋwɛi maŋtsɛyeli ni ji nɔyeli ni yeɔ emuu kɛha adesa weku lɛ mli. Kɛji nɛkɛ mumɔŋ Israelbii ni akpɛlɛ amɛnɔ nɛɛ ateŋ naagbeemɔ lɛ kɛ “gbɔmɛi” ni amɛji lɛ ba naagbee kɛtsɔ gbele ni ebaagbo yɛ shikpɔŋ nɔ kɛ egbohiiashitee koni eyaná gbɛfaŋnɔ yɛ ŋwɛi maŋtsɛyeli lɛ mli lɛ nɔ lɛ, belɛ no mli lɛ Yesu Kristo mlidamɔlɔ ni eji lɛ hu baaba naagbee. Amɛbaashi amɛshihilɛ mli ni amɛyɔɔ akɛ eshafeelɔi yɛ heloo mli hewɔ ni ebiɔ teŋdamɔlɔ yɛ amɛ kɛ Nyɔŋmɔ ni ji krɔŋkrɔŋ teŋ lɛ yɛ shikpɔŋ nɔ. Tamɔ bɔni bɔfoi krɔŋkrɔŋi ni yɔɔ ŋwɛi lɛ yɔɔ lɛ, amɛ kɛ Yehowa Nyɔŋmɔ teŋdamɔlɔ ko ehiaŋ mumɔŋ Israelbii (Kpoj. 22:3, 4) Amɛbaasɔmɔ akɛ maŋtsɛmɛi, osɔfoi kɛ kojolɔ hefatalɔi yɛ adesa weku lɛ fɛɛ nɔ yɛ Yesu Kristo shishi.—Kpoj. 7:4-8; 14:1-3; 20:4, 6; Luka 22:28-30.
“Asafo Babaoo” Ni Baana He Sɛɛ Yɛ Shikpɔŋ Nɔ
23, 24. (a) Namɛi kɛ ekãa waa mumɔŋ Israelbii shwɛɛnii lɛ, ni mɛni afɔ amɛ nine akɛ amɛfee yɛ Nuŋtsɔ lɛ Gbɛkɛnaashi Niyenii lɛ he? (b) Amɛdiɛŋtsɛ amɛle akɛ amajeee namɛi, kɛ lɛ te amɛnaa kpaŋmɔ hee lɛ nitsumɔ lɛ he sɛɛ amrɔ nɛɛ tɛɛŋ?
23 Ŋmɛnɛ lɛ, yɛ nibii ni aŋmala aŋmɛ shi ni tɔmɔ ko bɛ amɛhe lɛ naa lɛ, Kristofoi ni ejɔɔ amɛhe nɔ ni abaptisi amɛ ni ji “asafo babaoo” lɛ yɛ; mɛnɛɛmɛi kɛ ekãa yeɔ buaa mumɔŋ Israelbii shwɛɛnii fioo lɛ. Kɛjɛ afi 1938 agbiɛnaabe mli lɛ, afɔ̃ amɛ nine akɛ amɛba daa afi Kristo gbele lɛ kaimɔ gbijurɔ lɛ shishi, jeee akɛ amɛbaye akpiti aboloo ni amɛnu wein tsuru lɛ eko, shi moŋ akɛ nikwɛlɔi ni kɛ woo haa.a Kɛjɛ be ni Jeŋmaji Abe lɛ ba naagbee yɛ afi 1914 mli lɛ, amɛle akɛ Yesu Kristo ji amɛŋwɛi maŋtsɛ lɛ. Amɛkɛ ekãa yeɔ buaa mumɔŋ Israelbii shwɛɛnii lɛ yɛ “maŋtsɛyeli lɛ he sanekpakpa nɛɛ” shiɛmɔ mli yɛ shikpɔŋ muu lɛ fɛɛ nɔ “ni akɛye jeŋmaji lɛ fɛɛ odase” dani nibii agbɛjianɔtoo nɛɛ aba naagbee yɛ “amanehulu kpeteŋkpele” ni baa lɛ mli. (Mat. 24:14, 21) Amɛle akɛ amɛjee mumɔŋ Israelbii ni yɔɔ kpaŋmɔ hee ni mlidamɔlɔ ji Yesu Kristo lɛ mli, ni amɛjee “weku ni ahala maŋtsɛmɛi ni yeɔ osɔfoi, jeŋmaŋ krɔŋkrɔŋ” lɛ fã.—1 Pet. 2:9.
24 Kɛ̃ lɛ, amɛnaa kpaŋmɔ hee lɛ nitsumɔi lɛ he sɛɛ. Amɛnaa enɛ he sɛɛ tamɔ bɔni yɛ blema Israel lɛ “gbɔ” na he sɛɛ yɛ Israelbii ni yɔɔ Mla kpaŋmɔ lɛ mli lɛ ateŋ lɛ.—2 Mose 20:10; 3 Mose 19:10, 33, 34; Kpoj. 7:9-16.
25. Bɔni afee ni “asafo babaoo” lɛ kɛ Yehowa Nyɔŋmɔ ahiɛ wekukpaa mli lɛ, esani amɛya nɔ amɛkɛ namɛi afee ekome, ni mɛni hewɔ?
25 Bɔni afee ni “asafo babaoo” lɛ kɛ “Nyɔŋmɔ ni ji wɔyiwalaherelɔ” lɛ ahiɛ wekukpaa mli lɛ, belɛ ebiɔ ni amɛkɛ mumɔŋ Israelbii shwɛɛnii lɛ afee ekome daa. Mɛni hewɔ? Ejaakɛ nɛkɛ mumɔŋ Israelbii nɛɛ ji “jeŋmaŋ krɔŋkrɔŋ” ni wɔkaneɔ yɛ ehe yɛ Yeremia 31:35, 36 yɛ Nyɔŋmɔ shiiwoo ni kɔɔ kpaŋmɔ hee lɛ he sɛɛ akɛ: “Bɔni Yehowa, mɔni fee hulu ni ekpɛ shwane, ni ewo nyɔɔŋtsere kɛ ŋulamii akpɔi ni amɛkpɛ nyɔɔŋ, ni etaa ŋshɔ mli ni emli ŋshɔkei lɛ huɔ [eshiɔ Mizraimbii ni tiuɔ Israelbii lɛ], ni egbɛi ji Yehowa Zebaot lɛ, kɛɛ nɛ: Kɛji nɛkɛ akpɔi nɛɛ aaalaaje yɛ mihiɛ lɛ, Yehowa kɛɛ, no dani Israel seshi lɛ aaatã, ni amɛfeŋ maŋ yɛ mihiɛ gbikogbiko dɔŋŋ!”
26. Nohewɔ lɛ, esani mumɔŋ Israel Iɛ, ahi shi daa yɛ Nyɔŋmɔ jeŋ fɛɛ asafo Iɛ mli tamɔ mɛni, ni nɛɛgbɛ Yesu Kristo baajɛ aye mɛi ni baahi paradeiso shikpɔŋ nɔ lɛ nɔ maŋtsɛ?
26 Kɛji Yehowa aaaha mumɔŋ Israel atã kwraa yɛ ejeŋ fɛɛ asafo lɛ mli lɛ, belɛ ebaaha ŋwɛi kpɛmɔnii ni kpɛɔ yɛ wɔshikpɔŋ lɛ nɔ lɛ hu afɔɔ nitsumɔ. Yɛ ŋwɛi lɛ, mumɔŋ Israel lɛ baafee Yerusalem hee, nɔ̃ mli ni Yesu Kristo baajɛ aye maŋtsɛ yɛ “asafo babaoo” ni baaje hiɛkpatamɔ mli kɛ adesai fɛɛ ni egboi ni abaatee amɛ shi kɛba wala mli yɛ paradeiso shikpɔŋ nɔ lɛ anɔ.—Kpoj. 21:2-24. b
[Shishigbɛ niŋmai]
a Kwɛmɔ adafitswaa ni ji “Kaimɔ” yɛ February 15, 1938 Blɔfo Buu-Mɔɔ. bf. 50; kɛ Blɔfo Buu-Mɔɔ, March 1. 1938, bf. 15, mlijaai 51, 52. Kadimɔ adafitswaa ni ji “Kaimɔ” ni yɔɔ February 15, 1937 Blɔfo Buu-Mɔɔ, 50 lɛ mli,
b Ajie kɛjɛ November 15, 1979 Blɔfo Buu-Mɔɔ Iɛ mli.
[Box of page 8]
“Bɔni Nuŋtsɔ Yehowa kɛɛ nɛ: Gbi ni matsuu nyɛhe kɛaajɛ nyɛnishaianii lɛ fɛɛ mli Iɛ, maha mɛi ahi maji lɛ amli, ni amɛsaa tsukoi lɛ. Ni aaaku shikpɔŋ ni ka shi efolo lɛ, yɛ shi ni ekã efolo yɛ mɛi fɛɛ ni hoɔ yɛ ehiɛ lɛ najiaŋ. Ni aaakɛɛ akɛ: Shikpɔŋ nɛɛ ni ka shi efolo lɛ, no etsɔ tamɔ Eden torom nɛɛ! ni maji ni tsɔmɔ amaŋfɔi ni kamɔ efoji lɛ, nomɛi ahe atswa gbogboi awo ni ahiɔ mli nɛɛ! No dani jeŋmaji ni eshwɛ ni bɔle nyɛ kɛkpe lɛ aaana ale akɛ mi, Yehowa, misaa tsukoi lɛ, ni mitɛoɔ nii yɛ heni ka shi efolo lɛ. Mi, Yehowa miwie ni mafee! Bɔni Nuŋtsɔ Yehowa kɛɛ nɛ: Enɛ hu maha Israel we lɛ abimi, ni mafee maha amɛ: Maha amɛyi afa kɛ gbɔmɛi tamɔ toiku. Tamɔ toiku krɔŋkrɔŋ, tamɔ bɔni Yerusalem toiku lɛ yɔɔ yɛ egbii juji lɛ anɔ lɛ, nakai maji koikoi lɛ aaayimɔ obɔ̃bɔ̃ kɛ gbɔmɛi kuikui, ni amɛaaanɔ amɛle akɛ miji Yehowa lɛ.”—Eze. 36:33-38.
[Mfonirii ni yɔɔ baafa 4]
Akala Mla Kpaŋmɔ momo lɛ akpɛtɛ piimɔtso
Kpaŋmɔ hee lɛ bɔ̃i nitsumɔ yɛ Pentekoste gbi lɛ nɔ