Sanebimɔi ni Jɛ Kanelɔi Adɛŋ

Akɛni Yehowa Odasefoi bɔɔ mɔdɛŋ akɛ amɛaaye anɔkwa, ni amɛheɔ amɛhe amɛyeɔ hewɔ lɛ, mɛni hewɔ amɛnuɔ he akɛ ehe miihia ni amɛŋmala nitsumɔ mli yelikɛfuamɔi amɛshwie shi yɛ woji anɔ lɛ?

Nakai ní amɛaafee lɛ damɔ Ŋmalɛ nɔ, anyɛɔ atsuɔ he nii, ni etsɔɔ suɔmɔ hu. Yɛ mɛɛ gbɛ nɔ? Ojogbaŋŋ, nyɛhaa wɔsusua nakai nitsumɔ mli yelikɛfuamɔi lɛ ahe wɔkwɛa.

Biblia lɛ kɛ bɔ ni Nyɔŋmɔ kɛ ekpaŋmɔ webii ni ji Israelbii lɛ ye ha lɛ he saji ni aŋmala ashwie shi lɛ haa. Nɔ ni fata he ji nitsumɔ mli yelikɛfuamɔi ni kɔɔ anɔkwa jalɔi ahe. Saji lɛ ekome yɛ 1 Mose yitso 23 ni wɔbaanyɛ wɔsusu he. Beni Abraham suɔlɔ Sara gbo lɛ, etao he ni ebaaná fuuhe yɛ. Eje shishi akɛ ekɛ Kanaanbii ni bɛŋkɛ Hebron masɛi lɛ aaaye sharamɔ. Kukuji 7-9 tsɔɔ akɛ, ekɛ shika diɛŋtsɛ ha yɛ faŋŋ mli, yɛ shikpɔŋ kuku ni etaoɔ lɛ hewɔ. Kuku 10 lɛ maa nɔ mi akɛ, ekɛ shika nɛɛ ha yɛ faŋŋ mli, yɛ mɛi krokomɛi ni yɔɔ maŋ lɛ agbó lɛ mli lɛ ahiɛ. Kuku 13 lɛ tsɔɔ akɛ nɔtsɛ lɛ kpɛlɛ nɔ akɛ ekɛ shikpɔŋ lɛ baaha Abraham, shi eha hetoo akɛ ja ekɛ shika he shikpɔŋ lɛ. Ni kukuji 17, 18, kɛ 20 tsɔɔ mli akɛ nakai pɛpɛɛpɛ efee, ema nɔ mi yɛ “Hetbii lɛ fɛɛ kɛ mɛi ni tsɔɔ emaŋ lɛ agbó lɛ mli lɛ ahiɛ.”

Shi, ani ebaafee sɔrɔto kɛji akɛ mɛi enyɔ ni kɛ amɛhe ewo nitsumɔ mli yelikɛfuamɔ mli lɛ fɛɛ ji anɔkwa jalɔi? Yeremia yitso 32 lɛ kɛ hetoo haa. Wɔnaa kɛjɛɔ kuku ni ji 6 lɛ nɔ kɛyaa akɛ, Yeremia baahe shikpɔŋ ko kɛjɛ etsɛkwɛ̃ bi ko ŋɔɔ. Kuku 9 lɛ tsɔɔ akɛ akpɛlɛ ehe nyɔmɔ ni abaawo lɛ nɔ. Agbɛnɛ kanemɔ kukuji 10-12 lɛ: “Ni [Yeremia] miŋma nɔ wolo, ni misɔo naa, ni mitsɛ odasefoi baye odase, ni miŋmɛ shika lɛ yɛ nsɛni mli. Kɛkɛ ni mikɔ hemɔ-wolo ni asɔo naa, ni ji enaayeli, kɛ ehe gbɛjianɔtoi lɛ, kɛ nɔ ni naa kã lɛ, ni miŋɔ hemɔ-wolo lɛ miha Baruk, Maeseia bi Neria bi lɛ, yɛ mitsɛkwɛ̃ bi Hanamel kɛ odasefoi ni eŋma amɛgbɛi yɛ hemɔ-wolo lɛ shishi lɛ kɛ Yudafoi fɛɛ ni yɔɔ bulɔi lɛ akpo lɛ nɔ lɛ ahiɛ.”

Hɛɛ, eyɛ mli akɛ Yeremia kɛ enaanyo jálɔ miiye, wekunyo po ni moŋ, shi etsu mla naa nifeemɔi komɛi ni jwɛŋmɔ yɔɔ mli lɛ ahe nii. Aŋmala woji enyɔ—ekome naa kã koni anyɛ akwɛ mli oya, asɔo nɔ ni ji enyɔ lɛ naa koni ekɛ odaseyeli kroko aha, kɛ eeeba lɛ akɛ aaaje ja ni nɔ ni aŋma afɔ̃ shi ni naa kã lɛ ja lɛ he ŋwane. Afee enɛɛmɛi fɛɛ, “yɛ amɛhiɛ,” taakɛ kuku 13 lɛ kɛɔ lɛ. No hewɔ lɛ, eji mla naa nitsumɔ mli yelikɛfuamɔ yɛ faŋŋ mli, ni odasefoi yɛ he. No hewɔ lɛ, eyɛ faŋŋ akɛ, eji nii ni áfee eko pɛŋ yɛ Ŋmalɛ lɛ mli, ni anɔkwa jálɔi damɔɔ nɔ amɛtsuɔ saji ahe nii, yɛ gbɛ ni ama nɔ mi, ni aŋma awo wolo mli ni tamɔ nɛkɛ nɔ.

Eji nii ni anyɛɔ atsuɔ he nii hu. Wɔle bɔ ni wiemɔi nɛɛ ji anɔkwale ha, akɛ, “be kɛ nibii ni aleee ni baa trukaa ninaa amɛ fɛɛ.” (Jajelɔ 9:11, NW) Ni Kristofoi anɔkwafoi ni etu amɛhe amɛha hu fata he. Yakobo 4:13, 14 wie he yɛ nɛkɛ gbɛ nɔ akɛ: “Belɛ agbɛnɛ nyɛ hu, nyɛ mɛi ni nyɛkɛɔ akɛ: ‘Ŋmɛnɛ loo wɔ́ lɛ wɔɔtee nɛkɛ loo nɛkɛ maŋ nɛɛŋ, ni wɔyaye afi kome yɛ jɛi, ni wɔɔye jara, ni wɔɔná sɛɛ.’ Tsɛ nyɛleee wɔ́ sane.” No hewɔ lɛ, wɔbaanyɛ wɔje nitsumɔ ko shishi, ekolɛ wɔbaahe nɔ ko, wɔbaanyɛ wɔtsu nitsumɔ loo sɔɔmɔ ko ni aba gbeekpamɔ yɛ he, aloo wɔfee nɔ ko wɔha mɔ kroko. Shi mɛni wɔ́—loo nyɔŋ ni baa lɛ loo afi ni baa lɛ—kɛbaaba? Kɛji akɛ wɔ loo mɔ kroko kɛ oshara ko kpe hu? Ekolɛ no baaha yelikɛfuamɔ lɛ nɔyeli afee tamɔ nɔ ni ehiŋ. Kɛji eba lɛ akɛ wɔnyɛŋ wɔtsu nitsumɔ lɛ loo sɔɔmɔ lɛ, aloo, ekolɛ mɔ kroko lɛ na akɛ enyɛŋ ewo nyɔji lɛ kwraa loo enyɛŋ eye bɔ ni eye efua lɛ nɔ dɔŋŋ lɛ hu? Kɛ́ yelikɛfuamɔ lɛ he wolo ko bɛ ni aŋma afɔ̃ shi lɛ, naagbai diɛŋtsɛ baanyɛ ate shi, nɔ ni ekolɛ abaanyɛ atsĩ naa loo asaa, kɛtsɔ ehe wolo kuku ni mli kã shi faŋŋ ni aŋma afɔ̃ shi lɛ nɔ.

Kɛfata he lɛ, esaaa akɛ wɔhiɛ kpaa nɔ akɛ, bɔ ni shihilɛ mli saji pii bɛ shweshweeshwe hã lɛ baatsɔɔ po akɛ, ebaabi ni mɔ kroko atsu gbɛnaa nii lɛ ahe nii, loo eto wɔ (loo lɛ diɛŋtsɛ) enitsumɔ lɛ mli saji ahe gbɛjianɔ. Yakobo kɛfata he yɛ kuku 14 lɛ akɛ: “Ejaakɛ mɛni ji nyɛwala lɛ? Eji lamɔ ni pueɔ fioo ko, ni kɛ́ fee sɛɛ lɛ, elaajeɔ.” Nilee yɛ mli akɛ wɔɔkpa gbɛ akɛ wɔbaanyɛ wɔgboi trukaa. Yelikɛfuamɔ ni aŋma afɔ̃ shi, gbeekpamɔ, baanyɛ aha mɛi krokomɛi atsu saji ahe nii yɛ gbɛ̀i pɔtɛɛ diɛŋtsɛ nɔ, kɛ́ nɔ ni akpaaa gbɛ ba fãi enyɔ lɛ ateŋ mɔ ko nɔ.

Yɛ shishinumɔ ko naa lɛ, nɔ ni enɛ kɛbaa ji efã ni ji etɛ lɛ—suɔmɔ yɛ gbeekpamɔi ni aŋmala ashwie shi lɛ amli. Eyɛ faŋŋ akɛ, kɛ́ mɛi enyɔ ni ye amɛfua lɛ ateŋ mɔ kome gbo, loo oshara ni haaa enyɛ efee nɔ ko kwraa banina lɛ lɛ, ebaafee suɔmɔ kpojiemɔ kɛha Kristofonyo, akɛ ekɛ egbɛnaa nii loo shika gbɛkpamɔi ni yɔɔ wolo nɔ lɛ aaaha. Ni yɛ nɔ najiaŋ ni eeetsɔɔ he ni aheee mɔ ayeee lɛ, etsɔɔ suɔmɔ kɛha nyɛmi nuu ni wɔkɛ lɛ yeɔ lɛ, kɛ́ wɔkɛ wɔ yelikɛfuamɔi ni baatsɔɔ nɔ ni esa akɛ efee loo nɔ ni enine baashɛ nɔ lɛ wo wolo nɔ. Nifeemɔ ni suɔmɔ yɔɔ mli nɛɛ baaba henumɔi fɛɛ ni baatee mlifu shi lɛ ashi, kɛ́ mɛi ni yeee emuu nɛɛ ateŋ mɔ kome hiɛ aaakpa emlitsɔɔmɔi loo gbɛnaa nii komɛi anɔ. Ni wɔteŋ namɔ jeee mɔ ni yeee emuu, ehiɛ kpaaa nii anɔ, ejeee mɔ ni nuŋ nibii amlitsɔɔmɔi kɛ yiŋtoi ashishi?—Mateo 16:5.

Gbɛ̀i krokomɛi yɛ ni ŋmalamɔ ni aŋmalaa nitsumɔ mli yelikɛfuamɔi awoɔ wolo nɔ lɛ tsɔɔ suɔmɔ kɛhaa wɔ nyɛmi, wɔ weku, kɛ agbɛnɛ kɛha asafo muu lɛ fɛɛ. Shi esa akɛ efee faŋŋ akɛ, yɛ suɔmɔ ni yɔɔ mli lɛ sɛɛ lɛ, nɛkɛ nibii ni aŋmala ashwie shi yɛ woji amli pɛpɛɛpɛ bɔ ni sa nɛɛ ji nii ni anyɛɔ atsuɔ he nii, ni damɔ Ŋmalɛ nɔ hu.