Kpɔ̃mɔ Kɛ Kristendom Shigbeemɔ Lɛ Mlijee Shweshweeshwe
1, 2. Mɛɛ be, ni namɔ gbalɛ nitsumɔ mli esani kulɛ Yudafoi lɛ naagbe Nyamɔ afi lɛ aba? (b) Mɛni mla ni Yehowa wo kɛtsɔ Mose nɔ lɛ wo Yudafoi lɛ kitã akɛ amɛfee yɛ Nyamɔ afi lɛ he?
1 YƐ YEREMIA gbii lɛ amli lɛ, esani hejɔɔmɔ afi lɛ afee kpɔ̃mɔbe kɛha Yudafoi nyɔji lɛ. Nakai hejɔɔmɔ afi lɛ naagbeenɔ̃ lɛ gbe naa yɛ afi 609 D.Ŋ.B. yɛ Tishri 9, gbi ni tsɔ Yudafoi a-Kpatamɔgbi lɛ hiɛ lɛ nɔ. Abi kɛjɛ Yeremia webii lɛ adɛ akɛ amɛye hejɔɔmɔ afii kɛjɛ beni amɛbote Kanaan shikpɔŋ lɛ nɔ yɛ afi 1473 D.Ŋ.B. mli lɛ. Kɛjɛ nakai be mli lɛ, esani aye afii 50 fɛɛ akɛ Nyamɔ afi; ni Nyamɔ afi lɛ eko fɛɛ eko jeɔ shishi kɛjɛɔ Kpatamɔgbi lɛ nɔ. Nyamɔ afi ni ji 17 nɔ̃ lɛ baafee naagbeenɔ̃. Egbe naa yɛ afi 623 D.Ŋ.B. yɛ Yeremia gbalɛ nitsumɔ lɛ be mli. Ákɛ osɔfo ni yɔɔ sɔlemɔtsu lɛ mli lɛ, ekolɛ Yeremia nu tɛtɛrɛmantɛrɛ ni tswaa nakai Nyamɔ afi ni ji kpɔ̃mɔ afi krɛdɛɛ ko lɛ he adafi lɛ gbɛɛmɔ. Yehowa mla ni ekɛtsɔ gbalɔ Mose nɔ lɛ wo kitã akɛ:
2 “Ni afi ni ji nyɔŋmai-enumɔ lɛ nyɛfealɛ krɔŋkrɔŋ, ni nyɛshiɛa heyeli yɛ shikpɔŋ lɛ nɔ nyɛhaa enɔbii fɛɛ; etsɔ Nyamɔ afi ehanyɛ, ni nyɛteŋ mɔfɛɛmɔ ayaŋɔ enii, ni nyɛtseŋ mɔfɛɛmɔ aku esɛɛ aya ewekumɛi ateŋ ekoŋŋ. Nɛkɛ afi ni ji afi nyɔŋmai-enumɔ nɛɛ atsɔ Nyamɔ afi ahanyɛ.”—3 Mose 25:10, 11.
3. Mɛni ji Nyɔŋmɔ mla ni kɔɔ afii kpawo fɛɛ ni yɔɔ Nyamɔ afii lɛ ateŋ lɛ he, ni be enyiɛ esani Hebribii ni heɔ Hebri tsulɔi lɛ ahiɛ amɛ kɛyashi?
3 Tamɔ bɔni daa otsi hejɔɔmɔgbi lɛ ji lɛ, esani afii kpawo fɛɛ afii kpawo ni yɔɔ Nyamɔ afii lɛ ateŋ lɛ afee hejɔɔmɔ afi. (3 Mose 25:1-9) Yɛ nakai gbɛjianɔtoo lɛ nɔŋŋ naa lɛ, Yehowa mla lɛ kɛɛ akɛ: “Kɛji ohe tsulɔ ni ji Hebrinyo lɛ, afii ekpaa esɔmɔ; ni afi nɔni ji kpawo lɛ nɔ lɛ eyaye ehe yaka.” (2 Mose 21:2) “Kɛji ahɔɔ onyɛmi Hebrinyo loo Hebriyoo ahao lɛ, esɔmɔo afii ekpaa, ni afi ni ji kpawo lɛ nɔ lɛ oŋmɛlɛ gbɛ ni eye ehe.”—5 Mose 15:12.
4. Nohewɔ lɛ, yɛ hejɔɔmɔ afi ni ji 610-609 D.Ŋ.B. mli lɛ, mɛni ji nɔni hi ni sa akɛ Hebribii ni yɔɔ tsulɔi lɛ afee, shi mɛni amɛfee hewɔ ni Nyɔŋmɔ gbala amɛtoi lɛ?
4 Nohewɔ lɛ yɛ Yeremia gbii lɛ amli yɛ nakai nyɔɔŋtsere hejɔɔmɔ afi ni ji 610-609 D.Ŋ. B. mli lɛ, eji nɔni sa Yehowa hiɛ akɛ Yudafoi ni yɔɔ tsulɔi lɛ kɛlɛ afee kpaŋmɔ yɛ ehiɛ yɛ Yerusalem sɔlemɔtsu lɛ mli akɛ amɛbaaŋmɛɛ amɛ-Hebri tsulɔi lɛ ahe ni amɛya yaka. Eyɛ mli akɛ jeŋmaji lɛ fɛɛ miiwo Yerusalem he gbeyei moŋ, shi enɛ ji toiboo gbɛ ni sa akɛ Yeremia webii lɛ akɔ. Shi dani nakai kpɔ̃mɔ afi lɛ aaaba enaagbee lɛ, nakai nyɔji anuŋtsɔmɛi lɛ kumɔ amɛkpaŋmɔ lɛ mli ni amɛnyɛɔ amɛtsulɔhii kɛ tsulɔyei anɔ kɛwoɔ nyɔŋyeli mli ekoŋŋ. Enɛ esaaa Yehowa, mɔni yeɔ ekpaŋmɔ nɔ lɛ hiɛ ni enɛ bafee jwɛŋmɔ kroko hewɔ ni esa akɛ egbala amɛ toi.—Yer. 34:8-16.
5. (a) Mɛɛ gbɔi ni yɔɔ Yerusalem yɛ nakai be mli lɛ ahe enɛ kɔɔɔ shi kɛlɛ amɛyɛ oshara mli lɛ? (b) Te ŋmɛnɛŋmɛnɛ Yerusalem henɔ lɛ ebaje oshara mli nakai nɔŋŋ tɛɛŋ, ni kɛjɛ nɛɛgbɛ?
5 Eyɛ miishɛɛ akɛ mɛikomɛi ni yɔɔ Yerusalem nakai be mli ni atsɛɔ amɛ Rekab-bii ni ji Rekab bi Yonadab seshibii lɛ kɛ amɛhe wooo kpaŋmɔ ni afee yɛ Nyɔŋmɔ hiɛ lɛ mlikuu mli. (Yer. 35:6-11) Kɛ̃ lɛ, akɛ amɛ wo oshra mli yɛ toigbalamɔ hiɛkpatamɔ ni sa ni baa Yudafoi ni yɔɔ Yerusalem anɔ lɛ hewɔ. Shi abaanyɛ abaa amɛ yi kɛjɛ nɔni Yehowa Nyɔŋmɔ tee nɔ egba efɔ shi yɛ anɔkwale ni Yudafoi lɛ yeee yɛ amɛpɛsɛmkunya hewɔ lɛ mli. Tamɔ bɔni eji yɛ Yeremia gbii amli Yerusalem sane lɛ mli lɛ, esani Kristendom ni yɔɔ ŋmɛnɛŋmɛnɛ lɛ asusu Yehowa wiemɔi ni etee nɔ ewie lɛ he jogbaŋŋ. Tamɔ Yerusalem ni hi shi yɛ nakai be mli lɛ, Kristendom yɛ eshihilɛ ni etsɛ lɛ naagbeegbii lɛ amli. Naagbee jeŋ hewalɛ ni agba he sane afɔ shi yɛ Biblia gbalɛ mli ni ji jeŋ hewalɛ ni ji kpaanyɔ lɛ mli wɔyɔɔ ŋmɛnɛ. No ji Jeŋmaji Ekomefeemɔ lɛ. Eyɛ gbɛnaa ko ni ebaatsu, no ji ni ekɛ gbele aba Kristendom ni ji ŋmɛnɛŋmɛnɛ Yerusalem lɛ nɔ. Jeŋmaji Ekomefeemɔ kɛ ehiɛnyiɛlɔ ni ji Jeŋmaji Akpaŋmɔ lɛ fɛɛ ehi shi afii 60. (Kpoj. 17:7-11) Ebaatsu nii kɛ́ dani ehiɛ akpata!
6. Eyɛ mli akɛ Kristendom shiɔ etsitsi akɛ edamɔ shi kɛha heyeli moŋ shi te ekɛ esɔlemɔyalɔi lɛ eba nyɔŋyeli shishi tɛɛŋ?
6 Akɛni Kristendom shiɔ etsitsi akɛ Kristofonyo jilɛ hewɔ lɛ, esani eye ehe kɛjɛ jeŋ nɛɛ ni yeɔ esha nyɔŋ lɛ nyɔŋyeli shishi. Shi yɛ anɔkwale mli lɛ, ekɛ ejamɔ lɛ mlibii ewo jeŋ nɛɛ nyɔŋyeli shishi yɛ lɛ diɛŋtsɛ esɛɛnamɔi ahewɔ. Enɛ jɛ ehe ni ekɛfee jeŋ nɛɛ naanyo kɛ Nyɔŋmɔ henyɛlɔ lɛ hewɔ.—Yak. 4:4.
7. (a) Akpala Kristendom sɔlemɔyalɔi lɛ kɛtee mɛɛ nyɔŋyeli shishi, ni aha amɛte shi amɛwo namɛi? (b) Mɛɛ wiemɔi ni atee nɔ awie yɛ Yeremia gbalɛ lɛ mli atsɛlɛ akɛ ebabo toi?
7 Jeee Nyɔŋmɔ maŋtsɛyeli ni yɔɔ Kristo dɛ lɛ Kristendom mumɔŋ nyɔji lɛ yeɔ nyɔŋ amɛhaa, shi moŋ kɛha je lɛ nɔyelɔ kɛ e-nyɔŋmɔ Satan Abonsam ni abu amɛ fɔ lɛ. (1 Yoh. 2:15-17; Efe. 2:2) Kristendom nyiɛ sɔlemɔyalɔi ahiɛ ni amɛteɔ shi amɛwoɔ Yehowa Kristofoi Odasefoi ni Yeremia fee amɛhe mifoniri lɛ. Nohewɔ lɛ ha ni ebo nɔni etee nɔ ekɛɛ lɛ toi:
“Nohewɔ lɛ bɔni Yehowa kɛɛ nɛ: Nyɛ lɛ nyɛboko mi toi, ni nyɛteŋ mɔfɛɛmɔ aaashiɛ heyeli aha enyɛmi, ni mɔfɛɛmɔ aaashiɛ aha enaanyo. Naa, mi lɛ miishiɛ heyeli mahanyɛ, Yehowa kɛɛ, kɛha klante kɛ hɔmɔ kɛ gbelehela, ni maha agbɛnyɛ ashwa shikpɔŋ lɛ nɔ maŋtsɛyelihei lɛ fɛɛ. Ni maŋɔ hii lɛ ni etɔ̃ mikpanmɔ lɛ ni amɛyeee kpaŋmɔ ni amɛkpaŋ yɛ mihiɛ, beni amɛgba tsinabi mli enyɔ ni amɛtsɔ efãfãi lɛ ateŋ lɛ, wiemɔi lɛ anɔ maha: Yuda lumɛi lɛ kɛ Yerusalem lumɛi lɛ kɛ piafoi lɛ kɛ osɔfoi lɛ kɛ shikpɔŋ lɛ nɔ bii lɛ fɛɛ ni tsɔ tsinabi lɛ fãfãi lɛ ateŋ kɛ o lɛ, maŋɔamɛ mawo amɛhenyɛlɔi lɛ kɛ mɛi ni taoɔ amɛsusuma sɛɛgbɛ lɛ adɛ, ni amɛgbohii lɛ aaatsɔmɔ ŋwɛi loofɔji kɛ shikpɔŋ nɔ kooloi aniyenii. Ni Zedekia, Yuda mantsɛ lɛ hu, kɛ elumɛi lɛ hu, manɔamɛ mawo amɛhenyɛlɔi lɛ kɛ mɛi ni toaɔ amɛsusuma sɛɛgbɛ lɛ adɛ, kɛ Babel maŋtsɛ lɛ ta lɛ ni eje nyɛhe kɛtee lɛ dɛ.”
“Naa, mafã, Yehowa kɛɛ, ni maha amɛku amɛsɛɛ kɛba nɛkɛ maŋ nɛɛ he, ni amɛkɛlɛ aaabawu, ni amɛaaŋɔlɛ ni amɛkɛ la aaasha; ni maha Yuda maji lɛ atsɔmɔ amaŋfɔi, ni mɔkomɔko akahi mli dɔŋŋ!”—Yer. 34:17-22; kɛto 1 Mose 15:10-18 he.
8. Yɛ nakai Yeremia gbalɛ lɛ shishinumɔ naa lɛ, mɛni he mfoniri atsɔ hiɛ afee kɛha ŋmɛnɛŋmɛnɛ Kristendom?
8 Ani nakai gbalɛ lɛ gba Kristendom shigbeemɔ ni baatsɔ jeŋ hewalɛi ni Yehowa baaha amɛwo ehe ka shigbeemɔ hiɛ efɔ shi? Mɛni hu he mfoniri ebaanyɛ efee kɛ akɛto nɔni ba Yerusalem nɔ he? Maŋtsɛ Zedekia ni amɔlɛ ni atswa enaneshi tu kɛtee Babilon ni eyagbo yɛ jɛmɛ lɛ ji nɔko ni Yeremia kɛ toiboo gba lɛ diɛŋtsɛ kɛtsɔ hiɛ. (Yer. 34:1-7) Nohewɔ lɛ, yɛ anɔkwale mli lɛ, yɛ Biblia bei amli gbalɛ mli nibii ni ba lɛ mlibaa yɛ gbɛ ni da nɔ mli lɛ, omanye ko bɛ kɛha Kristendom nɔyelɔi lɛ!
9. Yɛ hejɔɔmɔ afi lɛ sɛɛ lɛ, mɛɛ be abɔ̃i Yerusalem hekawoo, be enyiɛ enɛ ye, ni te maŋ lɛ bafee gbeyeiwoonɔ̃ ni haa mɔ he kpokpoɔ yɛ nakai oshara lɛ nɔŋŋ he gbeyeishemɔ hewɔ tɛɛŋ?
9 Yɛ afi 609 D.Ŋ.B. mli lɛ, hejɔɔmɔ afi lɛ gbe naa yɛ nyɔɔŋtsere nyɔɔŋ ni ji 7 (Tishri) lɛ gbi 9 ni tsɔ Kpatamɔgbi lɛ hiɛ lɛ nɔ. Yɛ no sɛɛ nyɔɔŋtsere nyɔɔŋ ni ji 10 (Tibet) lɛ gbi 10 lɛ nɔ yɛ nakai afi lɛ nɔŋŋ mli lɛ, Maŋtsɛ Nebukadnezar kɛ e-Babilon tai lɛ yawo Yerusalem he ka. (2 Maŋts. 25:1, 2) Enɛ tsɛ aahu nyɔji nyɔŋma-kɛ-kpaanyɔ kɛyashi be mli ni Yerusalem gbee shi yɛ nyɔɔŋtsere nyɔɔŋ ni ji 4 (Tamuz) lɛ gbi 9 lɛ nɔ yɛ afi 607 D.Ŋ.B. Yɛ Maŋtsɛ Zedekia mɔdɛŋbɔɔ akɛ eeejo foi ni eha Yehowa gbalɛ lɛ afee amale lɛ mli lɛ, enyɛɛɛ eshɛ heko akɛ Yeriko maŋ lɛ mli pɛ, ni Babilonbii ni tiuɔlɛ lɛ yamɔlɛ. No sɛɛ lɛ amɛgbalalɛ kɛba Nebukadnezar hiɛ ni amɛkɛlɛ tee nomŋɔɔ mli ni hiɛnɔkamɔ ko kwraa bɛ ehe yɛ Babilon, wɔŋjalɔi amaŋ lɛ mli. (Yer. 34: 2, 3) Yɛ nyɔɔŋtsere nyɔɔŋ ni nyiɛ sɛɛ aloo yɛ Ab 7, afi 607 D.Ŋ.B. mli lɛ, ayaha Yerusalem ni ashalɛ. Yehowa sɔlemɔtsu ni yɔɔ emli ni abulelɛ lɛ hereee eyiwala. (2 Maŋts. 25:3-17) Yɛ anɔkwale mli lɛ, Yerusalem hiɛkpatamɔ ni yɔɔ gbeyei lɛ ji nɔko ni baaha maji krokomɛi lɛ he akpokpo yɛ nɔni Babilon kɛbaaba enɔ lɛ gbeyeishemɔ hewɔ.
10. Ani Kristendom he kpokpolɛ yɛ nakai blema oshara lɛ hewɔ, ni mɛni baatsɔ lɛ diɛŋtsɛ ehiɛkpatamɔ lɛ hiɛ?
10 Yɛ afii ohai komɛi asɛɛ lɛ, Kristendom hiɛ ekpa gbeyei ni yɔɔ nɔni ba Yerusalem ni etsɔ amaŋfɔ nɔ mli lɛ nɔ. Ehe kpokpooo. Enaaa gbalɛ mli nɔkwɛmɔnɔ ko yɛ blema oshra ni ba lɛ mli akɛ eji kɔkɔbɔɔ kɛhalɛ yɛ lɛ diɛŋtsɛ ehiɛkpatamɔ ni baa oyayai ni baakpele jeŋ muu fɛɛ lɛ mli. Enɛ baafee amale jamɔi lɛ fɛɛ ahiɛkpatamɔ lɛ shishijee yɛ amanehulu ni da fe fɛɛ ni baaba jeŋ nɛɛ ni ete shi ewo Yehowa nɔ lɛ mli. Ebaatamɔ bɔni agba afɔ shi yɛ Mateo 24:15-22 lɛ.
11. Mɛɛ be mli ashi Yerusalem shikpɔŋ lɛ amaŋfɔ ni gbɔmɔ aloo shia koolo ko bɛ nɔ lɛ, ni ani Yeremia kɛ Baruk pɛ ji mɛi ni je mli yɛ Yehowa duromɔ shishi?
11 Belɛ te adesa ko baanyɛ eje nakai amanehulu lɛ mli aha tɛɛŋ? Ebaaba tamɔ bɔni Yeremia kɛ ewoloŋmalɔ Baruk je klante, hɔmɔ, gbelehela kɛ la oshra ni ba Yerusalem nɔ mli lɛ! Sɛɛ mli yɛ nyɔɔŋtsere nyɔɔŋ ni ji kpawo lɛ nɔ yɛ nakai oshra afi lɛ mli lɛ, mɛi ni gbeyei emɔmɔ amɛ ni amɛte shi amɛwo Babilon nɔyeli lɛ mɔ Yeremia kɛtee Mizraim. Nohewɔ lɛ Yuda maŋtsɛyeli shikpɔŋ muu lɛ fɛɛ batsɔ amaŋfɔ ni gbɔmɔ aloo shia koolo ko kwraa bɛ nɔ. (2 Maŋts. 25:22-26) Enɛ hewɔ lɛ, shikpɔŋ lɛ na hejɔɔmɔ afii 70 sɔŋŋ. (2 Kron. 36:20, 21) Shi yɛ Yeremia kɛ ewoloŋmalɔ Baruk sɛɛ lɛ, mɛikrokomɛi ni na Yehowa hiɛ duromɔ lɛ hu je Yerusalem hiɛkpatamɔ kɛ Yuda shikpɔŋ lɛ amaŋfɔfeemɔ lɛ mli. Atsɔ Yeremia nɔ ama enɛ nɔ mi aha amɛ. Esani wɔ mɛi ni wɔyɔɔ ŋmɛnɛ lɛ asusu nakai mɛi ni je mli lɛ he kɛji wɔmiitao ni wɔje amanehulu ni baa lɛ mli lɛ.
Afee Mɛi Ni Baaje Kristendom Shigbeemɔ Mli Lɛ He Mfoniri Kɛtsɔ Hiɛ
12. Namɛi ji gbɔi shikpalɔi ni fee mɛi ni baaje amanehulu ni baa lɛ he mfoniri ni te Yeremia fee tɛŋŋ ena amɛ yɛ Yerusalem?
12 Namɛi anɔ Mɔ Kpele ni baa adesai awala yi lɛ hiŋmɛi baakã yɛ amanehulu ni baa, nɔ̃ mli ni nibii agbɛjianɔtoo ni abulɛ fɔ lɛ hiɛ baakpata yɛ Iɛ mli? Ehiŋmɛi baakã nakai Kristofoi lɛ ni ejɔɔ amɛhe nɔ ni abaptisi amɛ ni ekɛ gbɔi akuu ko ni jo ta lɛ naa foi yɛ Yerusalem fee amɛhe mfoniri lɛ anɔ. Yudafoi ananemɛi nɛɛ nu he akɛ esani amɛshi amɛshihilɛ akɛ shikpalɔi ni amɛyahi shi be kukuoo ko yɛ Yerusalem, ejaakɛ amɛsumɔɔɔ ni amɛyafata henyɛlɔ lɛ ŋsara ni baa Yerusalem hekawoo yɛ Babilon maŋtsɛ Nebukadnezar shishi lɛ he. Amɛhii ji Yonadab aloo Yehonadab, Rekab bi lɛ. Shi atsɛɛɛ amɛ Yonadabbii, ejaakɛ maŋtsɛ David yɛ wɔfaase ko ni gbɛi ji Yonadab. Shi atsɛ amɛ Rekab-bii, ni nɛkɛ gbɛi nɛɛ kadi amɛ akɛ amɛjeee Israelbii. Yeremia le amɛ jogbaŋŋ.
13. Mɛɛ sɔrɔto yɔɔ bɔni Israelbii yeɔ kpaŋmɔ nɔ kɛ bɔni Rekab-bii yeɔ kitã nɔ Iɛ mli, ni mɛni akɛɛ Yeremia akɛ efee Rekab-bii lɛ?
13 Afii ni fe 250 sɔŋŋ mli lɛ, amɛye anɔkwa yɛ kitã ni amɛblematsɛ Yonadab ni alelɛ waa wo amɛ lɛ mli. Israelbii lɛ nyɛɛɛ aye anɔkwale tamɔ amɛ yɛ Mla kpaŋmɔ ni amɛtsɛmɛi lɛ tsɔ Mose nɔ akɛ teŋdamɔlɔ amɛkɛ Yehowa Nyɔŋmɔ fee yɛ sɛɛ mli afi 1513 D.Ŋ.B. lɛ mli. Nohewɔ lɛ, agbɛnɛ Nyɔŋmɔ ni amɛku ekitã mli lɛ eto eyiŋ akɛ ebaatsɔɔ sɔrɔto ni yɔɔ Israelbii lɛ kɛ Rekab-bii ni yeɔ kitã nɔ lɛ ateŋ Yɛ enɛ hewɔ lɛ, abaaka Rekab-bii lɛ akwɛ yɛ Yehowa hekrɔŋkrɔŋ ni ji esɔlemɔtsu ni yɔɔ Yerusalem lɛ mli. Nohewɔ lɛ, ekɛɛ Yeremia akɛ: “Yaa Rekab-bii lɛ awe lɛ, ni okɛ amɛ ayawie, ni okɛ amɛ aba Yehowa we lɛ yɛ piai lɛ eko mli, ni oha amɛ wein ni amɛnu!” (Yer. 35:1, 2) Nɛkɛ eji, tsɛbelɛ ale jogbaŋŋ akɛ Rekab-bii lɛ ji “dãahilɔi.”
14. Te Rekab-bii lɛ tsɔɔ Yeremia wein ni amɛkɛɛ amɛnuuu lɛ kɛ maŋ Iɛ mli ni amɛyɔɔ lɛ mli tɛɛŋ?
14 Yeremia fee tamɔ bɔni afalɛ lɛ. (Yer. 35:3-5) Kɛ̃ lɛ, Rekab-bii lɛ kpoo wein ni gbalɔ lɛ ha amɛ lɛ po. Amɛtsɔɔ mli akɛ:
“Wɔnuuu wein! ejaakɛ wɔtsɛ Yonadab, Rekab bi lɛ, wowɔ kitã akɛ: Nyɛkanua wein gbikogbiko, nyɛ kɛ nyɛbii fɛɛ, ni nyɛkamamɔa tsui, ni nyɛkadua nii, ni nyɛkafea weintorom, in eko hu akatsɔ nyɛnɔ; shi moŋ, nyɛgbii fɛɛ mli lɛ nyɛhia bui amli, koni nyɛye gbii pii yɛ shikpɔŋ ni nyɛbato gbɔ yɛ nɔ lɛ nɔ!
“Ni wɔbo wɔtsɛ Yonadab, Rekab bi lɛ, gbee toi yɛ nibii fɛɛ ni ewowɔ kitã lɛ mli, ni wɔ gbii fɛɛ mli lɛ wɔnuuu wein, wɔ kɛ wɔŋamɛi kɛ wɔbihii kɛ wɔbiyei fɛɛ; ni asaŋ wɔmamɔɔɔ tsui wɔhiii mli, ni wɔbɛ weintorom loo abɔɔ loo nidumɔnii ko; hewɔ lɛ bui amli wɔhiɔ, ni wɔboɔ toi ni wɔfeɔ bɔni wɔtsɛ Yonadab wowɔ kitã lɛ pɛpɛɛpɛ. Shi eba mli akɛ, beni Nebukadnezar, Babel maŋtsɛ lɛ, fã kɛba shikpɔŋ lɛ nɔ lɛ, wɔkɛɛ akɛ: Nyɛbaa ni wɔjea Kaldeabii ata lɛ kɛ Arambii ata lɛ hiɛ wɔyaa Yerusalem! no ji Yerusalem ni wɔyɔɔ nɛɛ.”—Yer. 35:6-11.
15. Mɛɛ gbɛ nɔ kitã ni awo Rekab-bii lɛ ji yibaamɔ kɛha amɛ, ni mɛɛ gbɛnaa aha amɛ yɛ Mose Mla kpaŋmɔ lɛ mli?
15 Kitã ni awo Rekab-bii lɛ ji nɔni baabaa amɛ yi. Eha amɛhi shihilɛ ni fimɔ bɛ mli lɛ mli tamɔ gbɔi yɛ shikpɔŋ lɛ nɔ ni amɛye amɛhe kɛjɛ maji lɛ nifeemɔi gbohii ahe. Akɛni amɛjeee Israelbii ni yɔɔ Mose Mla kpaŋmɔ lɛ shishi hewɔ lɛ, amɛtamɔ gbɔi yɛ Israelbii agbói lɛ amli ni amɛkɛ naagba ko baaa Israelbii ni amɛyato amɛ gbɔ lɛ anɔ. Amɛwooo Israelbii lɛ anaji ateŋ yɛ amɛkpaŋmɔ ni amɛkɛ Yehowa fee lɛ nɔyeli mli, shi moŋ amɛye Mla kpaŋmɔ lɛ mli nɔni kɔɔ amɛhe lɛ nɔ. Shi beni ebalɛ akɛ anu dãai ni naa wa lɛ, amɛfee amɛnii tamɔ lsraelbii Nazirbii lɛ. Akɛni dãa ko bɛ amɛhiɛ hewɔ lɛ, amɛhiɛ kã shi. Yuda shikpɔŋ ni Maŋtsɛ Nebukadnezar asraafoi lɛ batua lɛ miihe agba amɛshikpaa shihilɛ lɛ naa. Nohewɔ lɛ, Rekab-bii lɛ jo foi kɛtee Yerusalem heni Kaldeabii tualɔi lɛ baa lɛ.
16. Te Rekab-bii ni yeɔ kitã nɔ lɛ fee tɛɛŋ ni Yehowa kɛna nɔkwɛmɔnɔ ekɛshi lsraelbii ni kuɔ kpaŋmɔ mli Iɛ, ni mɛni ena akɛ esa akɛ ekɛba amɛnɔ?
16 Amɛfaishi ni amɛtswa akɛ amɛbaaye kitã ni guɔ amɛ wein numɔ lɛ nɔ tsɛbelɛ gbalɔ kɛ Osɔfo Yeremia efɔ amɛ nine po lɛ ji nifeemɔ ko ni Yehowa kɛfee nɔkwɛmɔnɔ kɛshi Israelbii ni kuɔ kpaŋmɔ mli lɛ. Eyɛ mli akɛ gbɔmɔ kɛkɛ ni ji amɛnii lɛ ji mɔni wo amɛ kitã moŋ, shi Rekab-bii lɛ ye amɛkitã lɛ nɔ. lsraelbii lɛ ku amɛ-Mla kpaŋmɔ lɛ mli tsɛbelɛ jeee gbɔmɔ amɛkɛlɛ fee shi moŋ amɛkɛ Ŋwɛi Flooflo Nyɔŋmɔ lɛ fee. Agbɛnɛ lɛ, Yehowa na hegbɛ ekɛɛ Yeremia akɛ:
“Yaa ni oyakɛɛ Yudabii lɛ kɛ Yerusalembii lɛ akɛ: Aso nyɛkpɛlɛŋ tsɔsemɔ ni nyɛbo miwiemɔi lɛ atoi? Yehowa kɛɛ. Aye Yonadab, Rekab bi lɛ, wiemɔi ni ekɛwo ebii lɛ akita akɛ amɛkanu wein lɛ nɔ, ni amɛnuuu eko kɛbashi ŋmɛnɛ, ejaakɛ amɛbo amɛtsɛ kitã lɛ toi: shi mi lɛ miwieɔ mitsɔɔ nyɛ, miteɔ shi leebi maŋkpa ni miwieɔ mitsɔɔ nyɛ, shi nyɛbooo mi toi. Ni mitsuɔ mitsuji ni ji gbalɔi lɛ fɛɛ kɛbaa nyɛŋɔɔ, miteɔ shi leebi maŋkpa mitsuɔ amɛ akɛ: Agbɛnɛ nyɛteŋ mɔfɛɛmɔ akpale kɛjɛ egbɛ fɔŋ lɛ nɔ ni nyɛsaa nyɛnifeemɔnii lɛ, ni nyɛkanyiɛa nyɔŋmɔi krokomɛi asɛɛ, ni nyɛsɔmɔ amɛ, ni nyɛaaahi shikpɔŋ ni miŋɔha nyɛ kɛ nyɛtsɛmɛi lɛ nɔ! shi nyɛhaaa nyɛtoi aba nɔ ni nyɛbooo mi toi. Shi Yonadab, Rekab bi lɛ, bii lɛ eye amɛtsɛ kitã ni ewoamɛ lɛ nɔ; shi nɛkɛ maŋ nɛɛ booo mi toi.”
“Nohewɔ lɛ bɔni Yehowa, Zebaot Nyɔŋmɔ, ni ji Israel Nyɔŋmɔ lɛ, kɛɛ nɛ: Naa, mikɛ efɔŋ fɛɛ ni miwie yɛ Yuda kɛ Yerusalembii lɛ fɛɛ he lɛ aaaba amɛnɔ, ejaakɛ miwie mitsɔɔ amɛ, ni amɛbooo toi, ni mitsɛ amɛ ni amɛhereee nɔ.”—Yer. 35:13-17.
17. Mɛni hewɔ esani akɛɛ akɛ Nyɔŋmɔ ni Israelbii lɛ ekwa lɛ ji nɔko ni amɛje gbɛ amɛfee lɛ, nohewɔ lɛ, mɛni naa foi amɛnyɛɛɛ amɛjo?
17 Eka shi faŋŋ yɛ Rekab-bii ni akɛto Israelbii ahe nɛɛ mli akɛ Israelbii ni aduro amɛ waa nɛɛ baanyɛ aye amɛ kɛ Yehowa amɛnyɔŋmɔ lɛ kpaŋmɔ lɛ nɔ kɛtsɔ Nyɔŋmɔ gbalɔi lɛ yelikɛbuamɔ nɔ. Eha amɛ esɔlemɔtsu lɛ kɛ emli osɔfoyeli lɛ bɔni afee ni amɛsha afɔlei ni amɛkɛkpata amɛ-eshai ni jeee amɛsuɔmɔ mli amɛjɛ amɛfee shi yɛ amɛheloo mli gbɔjɔmɔi ahewɔ lɛ. Yɛ enɛ fɛɛ sɛɛ lɛ, amɛhala nyɔŋmɔi krokomɛi, titri lɛ Baal, ni amɛkɛ nishaianii sɔrɔtoi fɛɛ ni Yehowa mla ni ekɛtsɔ Mose nɔ lɛ teɔ shi ewoɔ lɛ wo amɛjamɔ lɛ mli. Nohewɔ lɛ, Nyɔŋmɔ Mla kpaŋmɔ ni biɔ jamɔ krɔŋŋ ni amɛkwa lɛ ji nɔ ko ni amɛje gbɛ amɛfee. Enɛ etsɔɔɔ bulɛ ko kɛha anɔkwa Nyɔŋmɔ kome lɛ aloo kɛha amɛkitãi ni amɛkã lɛ. Nɔni enɛ kɛbaaba mɛi ni ekwa Nyɔŋmɔ nɛɛ nɔ pɛ ji oshara. Yɛ enɛɛmɛi nɔŋŋ hewɔ lɛ, oshara ni anyɛɛɛ naa foi ajo lɛ miimɛ Kristendom fɛɛ!
Hiɛkpatamɔ Ni Baa Amale Jamɔi Fɛɛ Nɔ Lɛ Naa Foi Ni Aaajo
18. Mɛɛ wiemɔi ni Yeremia wie etsɔɔ Rekab-bii lɛ mli “asafo babaoo” lɛ naa nɔmimaa yɛ akɛ amɛbaaje Kristendom kɛ enaanyo ni ji je lɛ hiɛkpatamɔ lɛ mli?
18 Ŋmɛnɛ lɛ, namɔ baasumɔ ni eje hiɛkpatamɔ ni baa Kristendom kɛ enaanyo ni ji nibii agbɛjianɔtoo nɛɛ ni gbeɔ Nyɔŋmɔ he guɔ nɔ lɛ mli? “Asafo babaoo” ni awie amɛhe yɛ Kpojiemɔ 7:9-17 lɛ ekɛɛ akɛ, “Wɔmiisumɔ!” Amɛnaa nɔmimaa yɛ shi ni Yehowa wo Rekab-bii ni yeɔ amɛkitã nɔ lɛ he tamɔ bɔni aŋma yɛ Yeremia 35:18, 19, heni wɔkaneɔ yɛ akɛ: “Shi Rekab-bii lɛ awe lɛ, Yeremia kɛɛ amɛ akɛ: Bɔni Yehowa Zebaot, Israel Nyɔŋmɔ lɛ, kɛɛ nɛ: Akɛni nyɛbo nyɛtsɛ Yonadab kitã lɛ toi ni nyɛye ekpɔi lɛ fɛɛ nɔ ni nyɛfee bɔni ewonyɛ kitã lɛ pɛpɛɛpɛ hewɔ lɛ, bɔni Yehowa Zebaot, Israel Nyɔŋmɔ lɛ, kɛɛ nɛ: Nuu ni aaadamɔ mihiɛ ebɔŋ Yonadab, Rekab hi lɛ gbi ko gbi ko.”
19. Mɛni ji Yonadab su yɛ Baal Jamɔ he? (b) Gbɛi ni ji Yonadab (Yehonadab) kɛ Yaazania lɛ haa akaiɔ namɔ, ni mɛɛ shidaamɔ amɛkɔ yɛ wein he?
19 Nohewɔ lɛ, eyɛ mli akɛ Rekab bi Yonadab jeee Israelnyo moŋ, shi eseshinyo ni baadamɔ Yehowa hiɛ yɛ shikpɔŋ nɛɛ nɔ kɛya naanɔ akɛ mɔni sa lɛ ebɔŋlɛ gbi ko gbi ko. Nyɛhaa wɔkaia akɛ nɛkɛ Yonadab nɛɛ kɛ Maŋtsɛ Yehu fee ekome kɛkpata Baal jamɔ hiɛ yɛ Israel maŋtsɛyeli ni ekwa Nyɔŋmɔ lɛ mli. (2 Maŋts. 10:15-28) Nɛkɛ Rekab bi ni egbɛi ji Yonadab aloo Yehonadab lɛ ji kaimɔgbɛi kɛha anɔkwa Nyɔŋmɔ hiɛkalɔ kome lɛ, ejaakɛ eshishi ji “Yehowa Mli Hi.” Rekabnyo, mɔni Yeremia kɛ Nyɔŋmɔ shiiwoo lɛ ha ji Yaazania, ni egbɛi lɛ shishi ji “Yah [ni tsɔɔ akɛ, Yehowa] Boɔ Toi.” (Yer. 35:3-5) Yɛ amɛkitã lɛ mli anɔkwayeli naa lɛ, Yaazania kɛ enyɛmimɛihii lɛ kpoo wein ni Yeremia kɛha amɛ yɛ Yehowa sɔlemɔtsu lɛ mli lɛ numɔ. Yɛ jɛmɛ lɛ, amɛjie anɔkwale ni amɛyeɔ yɛ amɛkitã lɛ mli lɛ kpo amɛtsɔɔ yɛ Yehowa hiɛ.
20. Eyɛ mli akɛ wɔbɛ Biblia mli odaseyeli krɛdɛɛ ko moŋ, shi mɛni he nɔmimaa wɔbaanyɛ wɔna yɛ Rekabbii lɛ ahe yɛ Yerusalem hiɛkpatamɔ kɛ esɛɛ mli?
20 Yehowa kai nakai Rekab-bii lɛ anɔkwayeli lɛ ni ewo shi akɛ akpataŋ amɛhiɛ yɛ Yerusalem hiɛkpatamɔ ni baa yɛ afi 607 D.Ŋ.B. mli lɛ mli. Wɔbaanyɛ wɔna nɔmimaa akɛ afoko Rekab-bii lɛ kɛjɛko Yehowa hiɛ ejaakɛ eye e-shiiwoo lɛ nɔ tamɔ bɔni nakai Rekab-bii lɛ hu ye amɛkitã ni kɔɔ wein he lɛ nɔ lɛ. Ekolɛ, yinɔsane mli odase ko yɛ ni tsɔɔ akɛ amɛje hiɛkpatamɔ lɛ mli, ni Rekab bi Malkia, mɔni saa Yerusalem agbó lɛ yɛ Amralo Nehemia gbii amli lɛ ji enɛ he odase. (Neh. 3:14) Aŋmako yɛ Yehowa wiemɔ lɛ mli akɛ Rekab-bii lɛ ateŋ mɛikomɛi hi wala mli aahu kɛbashi Yesu Kristo gbii lɛ amli ni amɛbatsɔ ekaselɔi. Kulɛ ebaahi jogbaŋŋ!
21. Mɛɛ osharai ni ba maŋ muu lɛ fɛɛ nɔ mli Rekab-bii lɛ je, ni nohewɔ lɛ mɛni mli esa akɛ amɛhenɔi ni yɔɔ ŋmɛnɛ lɛ aje?
21 Anyɛɛɛ akadi Rekab fɔmɔbii diɛŋtsɛ ŋmɛnɛ, shi amɛhenɔi ni yɔɔ ŋmɛnɛŋmɛnɛ lɛ yɛ. Amɛji mumɔŋ lsraelbii ni akɛ Yeremia fee amɛhe mfoniri lɛ hefatalɔi kpaakpa. Blema Rekab-bii lɛ je Yerusalem ni ekwa Nyɔŋmɔ lɛ hiɛkpatamɔ lɛ mli. Akɛni amɛji Kristo “toi krokomɛi” lɛ sɛɛ “asafo babaoo” lɛ he mfoniri hewɔ lɛ, esa akɛ Rekab-bii lɛ ahenɔi nɛɛmɛi ajo je lɛ “amanehulu kpeteŋkpele” ni baaje shishi kɛjɛ Kristendom ni ji Yerusalem henɔ lɛ hiɛkpatamɔ lɛ mli.
22. (a) Mɛɛ be mli atsɔɔ klɛŋklɛŋ akɛ Yonadab feɔ kuu ko ni tamɔ toi ni baaje “amanehulu kpeteŋkpele” mli lɛ he mfoniri? (b) Mɛni shishi April 15, 1935 Blɔfo Buu-Mɔɔ lɛ fɔ amɛ nine krɛdɛɛ akɛ amɛba?
22 Vindication, Kpo III ni ajie kpo Ju, July 18, 1932 yɛ Brooklyn, N.Y. lɛ ji klɛŋklɛŋnɔ̃ ni aŋma (yɛ baafai 77-83) akɛ, blema Yonadab fee Nyɔŋmɔ gbeyeishelɔi akuu ko ni baana wala kɛtsɔ “amanehulu kpeteŋkpele” lɛ mli kɛbote Gbɛjianɔtoo Hee lɛ mli yɛ Kristo maŋtsɛyeli lɛ shishi yɛ Nyɔŋmɔ yibaamɔ shishi. (August 1, 1932 Blɔfo Buu-Mɔɔ, bf. 230-233) Anu shishi akɛ miishɛɛ wiemɔyitso ni ji “Mɛi Akpeakpei Ni Yɔɔ Wala Mli Amrɔ Nɛɛ Gboo Kɔkɔɔkɔ” lɛ kɔɔ amɛhe. Nohewɔ lɛ, eja gbɛ akɛ April 15, 1935 Blɔfo Buu-Mɔɔ lɛ tswa adafi nɛɛ akɛ:
Buu-Mɔɔ lɛ miikai ekanelɔi lɛ ekoŋŋ akɛ abaafee Yehowa Odasefoi kɛ Yonadab-bii lɛ akpee yɛ Washington, D.C., abaaje shishi kɛjɛ May 30 ni agbe naa June 3, 1935. Aheɔ ayeɔ akɛ shwɛɛnii lɛ kɛ Yonadab-bii lɛ ateŋ mɛi babaoo baana hegbɛ amɛba nɛkɛ kpee nɛɛ shishi. Kɛbashi amrɔ nɛɛ lɛ, Yonadab-bii lɛ ateŋ mɛi babaoo nako hegbɛ amɛya kpee; ni nohewɔ lɛ kpee ni abaafee yɛ Washington lɛ baaha amɛna miishɛɛ kɛ sɛɛnamɔi pii.—Bf. 114.
23. Mɛni ajie kpo atsɔɔ nakai Yonadab-bii lɛ yɛ nakai Washington (D.C.) kpee lɛ shishi, ni nohewɔ lɛ namɛi ateŋ mɛi babaoo fata mɛi ni abaptisi amɛ yɛ nu mli yɛ enɔ jetsɛremɔ lɛ ahe?
23 Eba mli nakai pɛpɛɛpɛ, ejaakɛ ajie kpo atsɔɔ amɛ yɛ jɛmɛ yɛ Sohaa, May 31 akɛ Yonadab kuu lɛ nɔŋŋ ji “asafo babaoo” ni ana kɛtsɔ hiɛ yɛ Kpojiemɔ 7:9-17 mli lɛ. Nohewɔ lɛ eji anɔkwale akɛ kpee lɛ yalɔi 840 ni abaptisi amɛ yɛ no mli yɛ enɔ jetsɛremɔ lɛ ateŋ mɛi babaoo ji Yonadab-bii aloo ŋmɛnɛbe mli Rekab-bii
24. Yɛ Yerusalem hiɛkpatamɔ ni ba yɛ afi 607 D.Ŋ.B. mli ni amɛje hewɔ lɛ, namɛi ahe mfoniri Yonadab seshibii lɛ fee ŋmɛnɛ?
24 Blema Yonadab hi shi yɛ afi ohai 10 D.Ŋ.B. lɛ mli ni enaaa Yerusalem hiɛkpatamɔ ni ba yɛ afi 607 D.Ŋ.B. mli lɛ. Shi eseshibii Rekab-bii ni Yeremia ka amɛ ekwɛ yɛ kitã mli anɔkwayeli he lɛ na Yerusalem shigbeemɔ lɛ ni amɛje mli kwraa. Akɛni amɛji Yonadab seshibii hewɔ lɛ amɛ hu amɛfeɔ “asafo babaoo” ni agba ato akɛ amɛbaaje Kristendom mli lɛ he mfoniri.—Kwɛmɔ You May Survive Armageddon into God’s New World, baafai 64-67.
25 Ahã, belɛ nyɛ Kristofoi ni nyɛjɔɔ nyɛhe nɔ ni abaptisi nyɛ lɛ he mfoniri nakai blema Rekab-bii lɛ fee lɛ! Tamɔ bɔni amɛfee lɛ, esani nyɛ hu nyɛtsi nyɛhe kɛjɛ dãanumɔ tuutuu, kɛ amale jamɔ he koni nyɛkɛ nyɛhe akafutu jeŋ nɛɛ ni nyɛkɛlɛ fee nyɛshieŋtsɛ. (Yak. 4:4; 1 Yoh. 2:15-17) Nyɛyaa nɔ nyɛkasea Rekab bi Yonadab ni nyɛfea ekãa nyɛhaa Yehowa, ni nyɛtea shi nyɛwoa ŋmɛnɛŋmɛnɛ Baal jamɔ lɛ koni nyɛtsɔ Yehu Kpeteŋkpele ni ji Yesu Kristo nɔ nyɛye hiɛkpatamɔ ni Yehowa kɛbaaba Kristendom kɛ amale jamɔ krokomɛi fɛɛ nɔ lɛ he odase. Nyɛkɛ anɔkwayeli ni tamɔ Rekab-bii anɔ lɛ ayaa nɔ ni nyɛye nyɛhe nɔ ni nyɛjɔɔ nyɛha Nuŋtsɔ Maŋtsɛ Yehowa lɛ nɔ koni nyɛtsu nyɛgbɛfaŋnɔ kɛtsi enunyam maŋtsɛyeli ni yɔɔ Kristo dɛ lɛ nitsumɔi lɛ ayisɛɛ. Enɛ baaye abua nyɛ koni nyɛhiɛ kpɔ̃mɔ ni nyɛna kɛjɛ jeŋ nɛɛ ni abulɛ fɔ mli lɛ mli kpɛŋŋ kɛyashi be mli ni ehiŋ shi dɔŋŋ. Kɛji nyɛkɛ nyɛheyeli ni jɔɔmɔ yɔɔ he lɛ tsu nii yɛ Nyɔŋmɔ suɔmɔ naa lɛ, ‘afooo nyɛ ashɛɛɛ afɔɔɔ’ yɛ be mli ni ebaatɔ jeŋ fɔŋ nɛɛ kɛ enanemɛi fɛɛ he owele lɛ, shi moŋ nyɛbaadamɔ shi akɛ mɛi ni sa ehiɛ ni akɛ wala baawo nyɛ nyɔmɔ yɛ paradeiso shikpɔŋ nɔ yɛ e-Bi lɛ maŋtsɛyeli lɛ shishi. Miishɛɛ ni Yeremia kuu lɛ shwɛɛnii lɛ kɛ baanya nyɛhe lɛ baafee miishɛɛ kpele! a
[Shishigbɛ niŋmai]
a Ajie kɛjɛ December 1, 1979 Blɔfo Buu-Mɔɔ Iɛ mli
25. Yɛ kadimɔ nibii krɛdɛi ni yɔɔ Yonadab kɛ Rekab-bii lɛ ahe hewɔ lɛ, mɛɛ nyamɔ akɛhaa amɛhenɔi ni yɔɔ ŋmɛnɛ lɛ?
[Mfoniri ni yɔɔ baafa 17]
Kristendom shigbeemɔ lɛ mlijee