Yeremia—Nyɔŋmɔ Fɔbuu Kojomɔi Ahe Gbalɔ Ni Asumɔɔɔ Esane
Ato daa otsi Biblia kanemɔ ni baajɛ Yeremia wolo lɛ mli lɛ he gbɛjianɔ kɛha Teokrase Sɔɔmɔ Skul Iɛ kɛjɛ April 17 aahu kɛyashi August 21. Nɛkɛ nikasemɔi sɔrɔtoi etɛ nɛɛ baaha wɔle babaoo yɛ gbalɔ lɛ niŋmai lɛ ashishinumɔ mli
“Dani mashɔo yɛ musu mli lɛ, no mli Iɛ mileo . . . mifeo gbalɔ miha jeŋmaji lɛ.”—YEREMIA 1:5, NEW WORLD TRANSLATION.
1. (a) Yɛ be mli ni wɔsusuɔ nihii ni eho nɛɛ ahe lɛ, te mɛi komɛi susuɔ Yeremia he amɛhaa tɛŋŋ? (b) Te lɛ hu esusuɔ lɛ diɛŋtsɛ ehe ehaa tɛŋŋ?
“YEREMIA ji obalaŋ yɛ gbalɔi lɛ ateŋ po.” Nakai wiemɔ ni jɛ Biblia he nilelɔ ko naa lɛ yɛ sɔrɔto kwraa yɛ bɔ ni Yeremia susuɔ lɛ diɛŋtsɛ ehe yɛ be mli ni Yehowa kɛ nitsumɔ wo edɛ klɛŋklɛŋ kwraa akɛ esɔmɔ akɛ gbalɔ eha Yuda kɛ jeŋmaji lɛ he. Ehetoo lɛ ji: “Ao, Nuŋtsɔ Yehowa! Naa, mileee wiemɔ; ejaakɛ gbekɛ ji mi.” Eka shi faŋŋ akɛ Yeremia hiɛ yɛ bɔ ni eji obalanyo fioo lɛ nɔ, ni sane ni mli wa ni ji jeŋmaji ni nyɛɔ lɛ lɛ ni eeedamɔ amɛhiɛ ewie eshi amɛ lɛ tamɔ nɔ ni efa tsɔ kɛha lɛ. Shi jeee nakai Yehowa susuɔ.—Yeremia 1:6.
2. Yehowa kɛ hekɛnɔfɔɔ wo Yeremia mli yɛ mɛɛ gbɛ nɔ?
2 Anaa faŋŋ kɛjɛɔ sane ni Yehowa kɛ obalanyo Yeremia gba lɛ mli akɛ eji gbɔmɛi fioo ko ni Yehowa to amɛfɔmɔ he gbɛjianɔ lɛ ateŋ mɔ kome. Ni mɛni hewɔ ejie miishɛɛ krɛdɛɛ ko kpo yɛ Yeremia mli kɛjɛ ehɔŋɔɔ mli kɛbaa lɛ? Ejaakɛ Yehowa yɛ nitsumɔ krɛdɛɛ ko yɛ ejwɛŋmɔ mli kɛha lɛ. No hewɔ lɛ, ebaanyɛ ekɛɛ akɛ: “Dani oooje kpo kɛaajɛ fɔmɔ he lɛ, mifeeo krɔŋkrɔŋ.” (Yeremia 1:5) Kɛkɛ ni efa obalanyo lɛ akɛ: “Kaakɛɛ akɛ: gbekɛ ji mi! Shi moŋ mɔ fɛɛ mɔ ŋɔɔ ni matsuo lɛ, yaa, ni nɔ fɛɛ nɔ ni mafao lɛ, feemɔ! Kaashe amɛ gbeyei, ejaakɛ mikɛo yɛ, ni majieo! Yehowa kɛɛ.” Gbɛ ko bɛ ni ekɛ tsui fa aaatsu enitsumɔ nɛɛ he nii. Nɔ ni ebiɔ moŋ ji ekaafeemɔ kɛ Yehowa mli hekɛnɔfɔɔ.—Yeremia 1:7, 8.
3. Mɛni hewɔ Yeremia nitsumɔ lɛ kaa mɔ hemɔkɛyeli ekwɛɔ waa lɛ?
3 Kwɛ bɔ ni obalanyo nɛɛ naa baakpɛ ehe ni ekolɛ ehiɛ afee lɛ yaa aha beni enine shɛ nitsumɔ ni tamɔ nɛkɛ nɔ tɛɛ kɛjɛ Nyɔŋmɔ dɛŋ lɛ! Ni kwɛ nitsumɔ ni enɛ ji! “Kwɛ, ŋmɛnɛ gbi nɛɛ mikɛo eto jeŋmaji lɛ kɛ maŋtsɛyelii lɛ anɔ, ni ofamɔ ni okumɔ, ni ofite ni obutu, ni omamɔ ni otɛo.” Eka shi faŋŋ akɛ nakai wiemɔi lɛ ni kɔɔ Yuda he aaafee afii ohai kpawo D.Ŋ.B. lɛ teŋ gbɛ lɛ kɛ gbɛnaa nii ni da waa fɔɔ gbalɔ ni kpaako ebaa nɛɛ nɔ. Esa akɛ ekɛ maŋ ni efee shikpilikpii ni woɔ ehe nɔ ní kɛ ehiɛ fɔɔ emaŋ krɔŋkrɔŋ, Yerusalem kɛ esɔlemɔwe lɛ nɔ tamɔ shade wɔŋ ko lɛ akpe. Beni eeegbe egbalɛ sɔɔmɔ nitsumɔ yɛ Yerusalem ni heɔ afii 40 lɛ naa lɛ, no mli lɛ ekɛ eshɛɛsane lɛ etsu nii yɛ maŋtsɛmɛi sɔrɔtoi enumɔ ni ji (Yosia, Yehoahaz, Yehoiakim, Yehoiakin kɛ Zedekia) nɔyeli beaŋ. Esa akɛ ejaje fɔbuu kojomɔi ni asumɔɔɔ eshwie Yudafoi lɛ kɛ Babilon maji lɛ anɔ.—Yeremia 1:10; 51:41-64.
Mɛni Hewɔ Esa Akɛ Wɔnya Yeremia He?
4, 5. (a) Mɛni hewɔ wɔyɔɔ nibii ni ba mli yɛ Yeremia gbii lɛ amli lɛ he miishɛɛ lɛ? (Romabii 15:4) (b) Te emli nɔ ni wɔyɔɔ he miishɛɛ krɛdɛɛ lɛ?
4 Shi wɔbaanyɛ wɔbi akɛ, Mɛni ji nɔ ni nakai nibii ni tee nɔ yɛ blema bei lɛ amli lɛ kɔɔ wɔhe yɛ, yɛ be mli ni wɔyɔɔ biɛ kɛmiibɛŋkɛ afii ohai 20 nɛɛ naagbee lɛ? Bɔfo Paulo kɛ hetoo lɛ haa yɛ be mli ni etiɔ Israel yinɔsaji komɛi amli yɛ wolo ni eŋma eha Korinto asafo lɛ mli lɛ. Eŋma akɛ: “Shi akɛ enɛɛmɛi eto wɔ okadi, koni wɔkaha nibii fɔji miifee wɔ akɔnɔ, tamɔ bɔ ni efee amɛ lɛ. . . . Ni akɛto okadi ahawɔ, ni aŋma ni aŋɔ-bɔwɔ kɔkɔ, wɔ mɛi ní je lɛ naagbee lɛ enina wɔ lɛ.”—1 Korintobii 10:6, 11.
5 Nibii ni tee nɔ yɛ Israel kɛ Yuda lɛ tsuɔ nii akɛ kɔkɔbɔɔ nɔkwɛmɔ nɔ kɛha anɔkwale Kristofoi asafo lɛ yɛ naagbee be nɛɛ mli. Wɔbaanyɛ wɔna nibii ni je amɛhe kɛ amɛhe mfonirii hu ni haa wɔtsɔɔ hiɛ wɔnaa wɔsɛɛ be mli nibii ni baaba. (Okɛto Yeremia 51:6-8 kɛ Kpojiemɔ 18:2, 4 he.) No hewɔ lɛ, Yeremia gbalɛ sɔɔmɔ nitsumɔ lɛ kɛ nibii ni ba Yerusalem nɔ lɛ tsɔɔ nɔ ko pɔtɛɛ kɛha Yehowa Odasefoi ŋmɛnɛ, titri lɛ yɛ amɛnitsumɔ ni yaa nɔ yɛ Kristendom teŋ lɛ he, taakɛ wɔbaana yɛ nikasemɔi ni nyiɛ sɛɛ nɛɛ amli lɛ.
Nyɔŋmɔ Fɔbuu Kojomɔi Ni Yeremia Jaje Ni Gbeyeishemɔ Bɛ Mli Lɛ
6. Mɛni ha Yeremia nitsumɔ lɛ bafee nɔ ni wa waa lɛ, ni kɛlɛ mɛɛ hewalɛwoo enine shɛ nɔ?
6 Bɔni afee ni ewaje Yeremia kɛha egbɛnaa nii ni tsii nɛɛ lɛ, Yehowa tee nɔ ema sane nɛɛ nɔ mi eha lɛ akɛ: “Miamɔ, ni ote shi ni okɛɛ amɛ nɔ fɛɛ nɔ ni mafao! Otsui akafa yɛ amɛhiɛ, . . . Ejaakɛ naa, . . . miŋɔo mifee maŋ ni atswa gbogbo awo he . . . mishi shikpɔŋ lɛ fɛɛ kɛ Yuda maŋtsɛmɛi kɛ lumɛi kɛ esɔfoi kɛ shikpɔŋ lɛ nɔ bii lɛ.” Ŋwanejee ko bɛ he, esa akɛ Yeremia afee tamɔ maŋ ni wa bɔni afee ni enyɛ edamɔ Yuda nɔyelɔi kɛ osɔfoi lɛ ahiɛ. Ni shɛɛsane ni asumɔɔɔ ni tswaa gbɔmɛi lɛ mpoa ni ekɛaaha lɛ efeŋ nitsumɔ ni yɔɔ mlɛo.—Yeremia 1:17, 18.
7. Mɛni hewɔ Yudafoi nɔyelɔi lɛ baate shi awo Yeremia lɛ?
7 Yehowa bɔ lɛ kɔkɔ akɛ, “ni amɛkɛo aaawu, shi amɛnyɛŋo.” (Yeremia 1:19) Agbɛnɛ mɛni hewɔ Yudafoi lɛ kɛ amɛ nɔyelɔi lɛ baasumɔ ni amɛwu amɛshi gbalɔ lɛ? Ejaakɛ eshɛɛsane lɛ tutuaa amɛshikpilikpiifeemɔ kɛ jamɔ su ní nɔ ko nɔ ko bɛ mli lɛ. Yeremia gbalaaa ewiemɔi lɛ asɛɛ: “Naa, Yehowa wiemɔ etsɔ ahorabɔɔ eha amɛ, ni amɛnaaa he miishɛɛ. Ejaakɛ kɛjɛ amɛteŋ bibioo nɔ kɛyashi agbo nɔ, amɛ fɛɛ kwa amɛhiɛ joɔ, ni kɛjɛ gbalɔ nɔ kɛyashi osɔfo nɔ, amɛ fɛɛ kwa amɛyeɔ kutumpɔo.”—Yeremia 6:10, 13.
8. Osɔfoi lɛ kɛ gbalɔi lɛ miilaka gbɔmɛi lɛ yɛ mɛɛ gbɛ nɔ?
8 Eji anɔkwale akɛ amɛnyiɛɔ maŋ lɛ hiɛ yɛ afɔleshai amli. Amɛfeɔ tamɔ amɛnyiɛ anɔkwale jamɔ nifeemɔi amli, shi amɛtsui bɛ nɔ ni amɛfeɔ lɛ mli. Kusum-nifeemɔi tsɔɔ babaoo kɛhaa amɛ fe subaŋ ni ja. Yɛ nakai beaŋ nɔŋŋ lɛ, Yudafoi ajamɔ mli hiɛnyiɛlɔi lɛ miigbala maŋ lɛ kɛmiiya apasa shweshweeshwe shihilɛ henumɔ mli, akɛ, “Omanye! Omanye!” yɛ be mli ni omanye aloo toiŋjɔlɛ ko bɛ. (Yeremia 6:14; 8:11) Hɛɛ, amɛmiishishiu gbɔmɛi lɛ ni amɛhe amɛye akɛ toiŋjɔlɛ yɛ amɛkɛ Nyɔŋmɔ teŋ. Amɛnu he akɛ nɔ ko nɔ ko bɛ ni esa akɛ amɛhao amɛhe yɛ he, ejaakɛ amɛji Yehowa webii ni ehere amɛyiwala, amɛyɛ maŋ krɔŋkrɔŋ lɛ kɛ esɔlemɔwe lɛ. Shi ani nakai ji bɔ ni Yehowa susu shihilɛ lɛ he eha?
9. Mɛɛ kɔkɔ Yeremia bɔ Nyɔŋmɔ jalɔi lɛ yɛ amɛsɔlemɔwe lɛ he?
9 Yehowa fa Yeremia koni eyadamɔ he ko ni maŋ muu lɛ baana lɛ yɛ sɔlemɔwe lɛ agbo lɛ naa ni ejaje E-wiemɔ lɛ etsɔɔ jalɔi ni boteɔ jɛmɛ lɛ. Esa akɛ ekɛɛ amɛ akɛ: “Nyɛkɛ nyɛhiɛ akafɔ apasa wiemɔi lɛ anɔ akɛ: Yehowa sɔlemɔwe, Yehowa sɔlemɔwe, Yehowa sɔlemɔwe lɛ nɛ! . . . Nyɛŋɔɔ nyɛhiɛ nyɛfɔɔ apasa wiemɔi ni he bɛ sɛɛnamɔ lɛ anɔ!” Ninamɔ mli Yudafoi lɛ nyiɛɔ lɛ, shi jeee hemɔkɛyeli mli, yɛ bɔ ni amɛkɛ amɛ sɔlemɔwe lɛ shwaa lɛ hewɔ. Amɛhiɛ kpa Yehowa kɔkɔbɔɔ wiemɔi lɛ anɔ momo akɛ: “Ŋwɛi lɛ, misɛi ni, ni shikpɔŋ lɛ, minaneshi maaŋoo ni: Mɛɛ tsu nyɛaama nyɛha mi mɔ”? Yehowa, Jeŋ Muu Fɛɛ Nuŋtsɔ Maŋtsɛ lɛ jeee mɔ ni atsi enaa awo sɔlemɔwe lɛ tsui lɛ amli, ni bɔ ni eyɔɔ nyam ha lɛ kɔɔɔ he eko!—Yeremia 7:1-8; Yesaia 66:1.
10, 11. Mɛni ji maŋ ni Yeremia bu amɛ fɔ lɛ amumɔŋ shihilɛ, ni ani shihilɛ ni yɔɔ Kristendom lɛ hi fe no? (2 Timoteo 3:5)
10 Yeremia tee nɔ yɛ ekamɔ ni naa wa lɛ mli akɛ: “Aso nyɛaaju, nyɛaaye awui, nyɛaafite gbala, nyɛaakamɔ apasa kitai, ni nyɛaatee nyɛyasha tsofa-kɛ-ŋma nyɛha Baal, ni nyɛyanyiɛ nyɔŋmɔi krokomɛi ni nyɛleee lɛ asɛɛ . . . ni nyɛkɛɛ akɛ: Wɔhe eje mli! Koni nyɛyafee nihii nii nɛɛ fɛɛ ekoŋŋ lo?” Akɛni Yudafoi lɛ ji Nyɔŋmɔ ‘halamɔbii’ hewɔ lɛ amɛsusuɔ akɛ Nyɔŋmɔ baakpɛlɛ subaŋ fɛɛ subaŋ nɔ, bei abɔ ni amɛkɛ amɛ afɔlei baa sɔlemɔwe lɛ. Shi, kɛ amɛsusuɔ ehe akɛ tsɛ ko ni nuɔ he haa mɔ ni hiɛɔ ebi koome lɛ fɔfɔɔle kɛ fiteɔ lɛ lɛ, belɛ be eshɛ ni nɔ ko baahoso amɛ ni baaha amɛhiɛ afee amɛ yaa.—Yeremia 7:9, 10; 2 Mose 19:5, 6.
11 Yuda jamɔ lɛ eba shi kwraa yɛ Yehowa hiɛ akɛ abaanyɛ abi sane ni kumɔɔ mɔ nɛɛ: “Aso nɛkɛ shia nɛɛ ni aŋɔ migbɛi awo lɛ lɛ etsɔ ojotswalɔi abuu yɛ nyɛhiɛ lɛ lo?” Yɛ no sɛɛ nɔ ni miihe ashɛ afii 700 lɛ, no mli lɛ shihilɛ lɛ ehiko, taakɛ Yesu, gbalɔ ni da fe Yeremia lɛ kɛ nɛkɛ wiemɔi nɛɛ nɔŋŋ tsu nii ekɛwie eshi shishiumɔ kɛ jarayeli ni yaa nɔ yɛ sɔlemɔwe ni aku sɛɛ ama yɛ ebe lɛ mli lɛ. Ni shihilɛ ni yɔɔ Kristendom ŋmɛnɛ lɛ hu jeee nɔ ni hi.—Yeremia 7:11; Mateo 16:14; Marko 11:15-17.
Aku Hiɛ Ashwie Bulɔi Anɔ, Agba Oshara Afɔ Shi
12. Te Yudafoi lɛ fee amɛnii yɛ gbalɔi ni Yehowa tsu amɛ kɛtee amɛŋɔɔ lɛ he amɛha tɛŋŋ?
12 Yeremia jeee klɛŋklɛŋ gbalɔ ni Nyɔŋmɔ kɛ lɛ tsu nii koni ebɔ Israel kɛ Yuda kɔkɔ yɛ amɛ apasa gbɛ lɛ he. Yɛ afii oha aloo nɔ ni fe nakai ni etsɔ hiɛ lɛ mli lɛ, no mli lɛ atsu gbalɔi tamɔ Yesaia, Mika, Hoshea kɛ Oded akɛ bulɔi koni amɛyabɔ maŋ lɛ kɔkɔ. (Yesaia 1:1; Mika 1:1; Hoshea 1:1; 2 Kronika 28:6-9) Te amɛteŋ mɛi ni fa fee amɛ nii amɛha tɛŋŋ? “Asaŋ mito bulɔi mihanyɛ mikɛɛ akɛ: Nyɛboa tɛtɛrɛmantɛrɛ lɛ gbɛɛmɔ toi! Shi amɛkɛɔ akɛ: Wɔbooo toi!” (Yeremia 6:17; 7:13, 25, 26) Amɛbooo Yeremia toi. Shi moŋ, amɛwalɛ yi ni amɛbɔ mɔdɛŋ ni amɛha efee dioo. No hewɔ lɛ, Yehowa kpɛ eyiŋ akɛ amɛbaawo amɛhenɔwomɔ kɛ he ni amɛheee amɛyeee lɛ he nyɔmɔ—Yeremia 20:1, 2; 26:8, 11; 37:15; 38:6.
13. Mɛni nɔ Nyɔŋmɔ damɔ ekojo nakai maŋ lɛ?
13 Akɛni maŋ lɛ kpoo etsuji lɛ hewɔ lɛ, Yehowa tsu tsɛmɔ ko kɛtee jeŋmaji lɛ amli, kɛha jeŋmaji ni yɔɔ shikpɔŋ lɛ nɔ fɛɛ lɛ akɛ: “Bo toi, shikpɔŋ! Naa, mikɛ efɔŋ ni ji amɛjwɛŋmɔi lɛ ayibii lɛ miiba nɛkɛ maŋ nɛɛ nɔ; ejaakɛ miwiemɔi lɛ, amɛboko toi, ni mimla lɛ, amɛgbe he guɔ.” Mɛni hewɔ esa akɛ maŋ lɛ ana nɔ yɛ amanehulu mli? Yɛ amɛ nifeemɔi fɔji ni damɔ amɛsusumɔi fɔji lɛ anɔ lɛ hewɔ. Amɛkpoo Yehowa wiemɔi kɛ Mla ni amɛdi amɛ diɛŋtsɛ amɛpɛsɛmkunya heloo mli akɔnɔi lɛ asɛɛ.—Yeremia 6:18, 19; Yesaia 55:8, 9; 59:7.
14. No mli lɛ amɛ apasa jamɔ lɛ etee shɔŋŋ kɛyashɛ nɛgbɛ? (Okɛto 2 Kronika 33:1-9 he.)
14 “Ni mɛni amɛfeɔ yɛ Yuda ni ebi ni Yehowa mlifu ate shi lɛ? Amɛshaa tatale ni akɛshaa afɔle amɛhaa “Ŋwɛi Maŋnyɛ” lɛ. Amɛjeɔ gbɛ amɛyeɔ ŋkpai amɛhaa nyɔŋmɔi krokomɛi koni amɛkɛwo Yehowa mlila. No hewɔ lɛ, Yehowa bi akɛ: “Ani mi ji mɔ ni amɛwoɔ emli la lɛ?. . . Ani jeee amɛ diɛŋtsɛ amɛhe awui amɛyeɔ, koni amɛ diɛŋtsɛ amɛhiɛ agboi?” (Yeremia 7:18, 19, New International Version) Ni kɛlɛ, amɛmusubɔɔ nifeemɔi gbohii lɛ ba shi kwraa—amɛmamɔ amagai ni ahiɔ yɛ shia ni Yehowa gbɛi ka nɔ lɛ. Amɛmamɔ afɔleshaa latɛi yɛ Yerusalem sɛɛ yɛ Hinom jɔɔ lɛŋ, “koni amɛsha amɛbihii kɛ amɛbiyei yɛ la mli.” Mɛɛ nyɔmɔ amɛbaawo yɛ buu ni amɛbuuu anɔkwale jamɔ kwraa lɛ hewɔ?—Yeremia 7:30, 31.
Agbala Yuda Toi
15. Mɛɛ sane fɔŋ Yeremia hiɛ kɛha Yuda?
15 Beni shɛɔ afi 632 D.Ŋ.B. lɛ, no mli lɛ Ashur egbee shi yɛ Kaldeabii kɛ Mediabii lɛ ahiɛ, ni aba Mizraim shi afee lɛ mɔ ni hewalɛ faaa dɔŋŋ yɛ Yuda wuoyigbɛ. Nɔ ni woɔ Yuda he gbeyei lɛ aaaba kɛtsɔ kooyigbɛ ni aaajɛ atutua amɛ lɛ nɔ. No hewɔ lɛ, ehe bahia ni Yeremia kɛ sane fɔŋ ko aha enanemɛi Yudafoi lɛ! “Bɔ ni Yehowa kɛɛ nɛ: Naa, maŋ ko aaajɛ kooyigbɛ shikpɔŋ lɛ nɔ aba . . . Amɛyi wa, ni amɛmusuŋ etsɔɔɔ amɛ. . . . Awo amɛ nii tamɔ tabilɔi, ni amɛkɛ bo, Zion biyoo lɛ abawu.” Jeŋ hewalɛ ni baa yɛ nakai be lɛ mli lɛ ji Babilon. Enɛ baafee Nyɔŋmɔ dɛŋdade ni ekɛbaagbala Yuda ni bɛ hemɔkɛyeli lɛ toi.—Yeremia 6:22, 23; 25:8, 9.
16. Mɛni hewɔ nɔ ko bɛ ni Yeremia baadamɔ nɔ akpa fai aha nakai maŋ lɛ?
16 Ani Yeremia baabɔ mɔdɛŋ ni ekpa fai eha emaŋbii lɛ? Ani ekolɛ aaaŋmɛɛ sane he ni akɛsaa yɛ anɔkwale jamɔ he? Ani ekolɛ Yehowa baakpɛlɛ nifeemɔ ko ni ji fa kɛ fa nɔ ni ekɛfa ewebii lɛ? Shidaamɔ ni Yehowa ekɔ lɛ mli ka shi faŋŋ. Efa Yeremia kɛ hoo lɛ shii etɛ akɛ: “Kaakpa fai oha nɛkɛ maŋ nɛɛ, . . . ejaakɛ miboŋo toi!” Yɛ emlibaa yɛ ŋmɛnɛŋmɛnɛ beaŋ lɛ, nɛkɛ kɔkɔbɔɔ nɛɛ tsɔɔ efɔŋ ni baaba Kristendom nɔ.—Yeremia 7:16; 11:14; 14:11.
17, 18. Yɛ mɛɛ gbɛ nɔ yɛ naagbee lɛ, akɛ Nyɔŋmɔ fɔbuu kojomɔ ba Yuda nɔ?
17 Mɛni jɛ mli ba ha Yuda? Nɔ ni Yehowa ‘egba kɛtsɔ Yeremia nɔ lɛ pɛpɛɛpɛ. Yuda batsɔ maŋ ni sɔmɔɔ maŋ kroko ni yi wa ni ji Babilon yɛ Maŋtsɛ Yehoiakim nɔyeli beaŋ. No sɛɛ afii etɛ lɛ, Yehoiakim tse atua. Nɛkɛ buuluianifeemɔ nɛɛ ha Babilonbii lɛ ba lɛ shi babaoo, ejaakɛ amɛwo Yerusalem he ka. Beni shɛɔ nɛkɛ be nɛɛ mli lɛ, no mli lɛ Yehoiakim egbo ni ebi Yehoiakin ebaye esɛɛ. Babilonbii lɛ ni wo ka lɛ ha Yuda ba shi, ni aŋɔ Yehoiakin kɛ odehei aweku lɛ fɛɛ kɛ emli Yudafoi abladei lɛ fɛɛ nom kɛtee Babilon.—2 Maŋtsɛmɛi 24:5-17.
18 Mɛni ba sɔlemɔwe krɔŋkrɔŋ lɛ kɛ krɔŋkrɔŋ nibii ni jara wawai lɛ fɛɛ nɔ? Yɛ anɔkwale mli lɛ, amɛyatsuuu nii akɛ shade wɔŋ ko amɛhaaa Yuda. Nebukadnezar “yaloo Yehowa we lɛ jwetrii lɛ kɛ maŋtsɛ we lɛ jwetrii lɛ fɛɛ kɛtee, ni efolɔ shika nibii fɛɛ ni Israel Maŋtsɛ Salomo efee lɛ yɛ Yehowa we lɛ mli dukuduku eshwie.” (2 Maŋtsɛmɛi 24:13) Yɛ naagbee lɛ, maŋtsɛ ni Babilon hala lɛ, Zedekia, ni ashi lɛ yɛ sɛɛ koni eye nɔ ni eshwɛ yɛ Yerusalem nɔ lɛ hu tse atua eshi enuŋtsɔmɛi lɛ. No ji naagbee nii ni Nebukadnezar baafee. Awo Yerusalem maŋ lɛ he ka ekoŋŋ, ni afi 607 D.Ŋ.B. lɛ, egbee shi yɛ Nebuzaradan hiɛ ni akumɔ lɛ kwraa.—Yeremia 34:1, 21, 22; 52:5-11.
19, 20. Mɛɛ sɔrɔtofeemɔ yɔɔ su ni Yuda kɛ Yeremia hiɛ yɛ oshara ni agba afɔ shi akɛ ebaaba lɛ mli, ni mɛni jɛ mli ba?
19 Mɛɛ oshara kpeteŋkpele enɛ ji kɛha ‘ewebii ni ehala amɛ’ lɛ! Shi kwɛ bɔ ni abu Yeremia fɔbuu kojomɔi ni ejaje lɛ bem kwraa aha. Yɛ be mli ni Yudafoi lɛ hiɔ shi yɛ yiŋfɛlɛfɛlɛ jeŋ ko mli, ni amɛheɔ amɛyeɔ akɛ oshara ko nyɛŋ aba amɛ nɔ lɛ, Yeremia ni ji ‘efɔŋ shiɛlɔ’ lɛ tee nɔ efee mɔ ni wieɔ nibii ni baaba diɛŋtsɛ he, shi jeee lalɔ ni elamɔi baaa mli. (Yeremia 38:4; kadimɔ akɛ wiemɔ ‘efɔŋ’ loo ‘amanehulu’ lɛ baa shii 64 yɛ Yeremia wolo lɛ mli.) Kwɛ bɔ ni Yehowa kojomɔi lɛ efee anɔkwale eha: “No hewɔ lɛ, kɛɛmɔ akɛ: Jeŋmaŋ ni booo Yehowa, amɛ-Nyɔŋmɔ lɛ gbee toi, ni amɛkpɛlɛɛɛ tsɔsemɔ nɛ; anɔkwale elaaje ni eta yɛ amɛdaaŋ! Ni maha nyamɔ kɛ miishɛɛ gbee . . . sɛɛ afo yɛ Yuda maji lɛ kɛ Yerusalem blohui lɛ amli; ejaakɛ shikpɔŋ lɛ baatsɔ kpataa.”—Yeremia 7:28, 34.
20 Oshara gbɛ ni tamɔ nɛkɛ nɔ Yudafoi henɔwolɔi ni efee shikpilikpii lɛ baatsɔ ni amɛyoo akɛ Nyɔŋmɔ ni amɛtsɛɔ kɛ wekukpaa krɛdɛɛ ni ka amɛkɛ lɛ teŋ lɛ kɛ amɛyiwalaheremɔ baaa. Taakɛ gbalɛ lɛ jaje lɛ: “Wɔkwɛ hejɔlɛ gbɛ, shi nɔkpakpa ko baaa, kɛ tsamɔ be hu, shi naa, gbeyei sɔŋŋ! Nikpamɔ be lɛ eho ni yibii atsemɔ be efo mli, shi ahere ko wɔyiwala!” (Yeremia 8:15, 20) Eji akɔntaabuu be kɛha Yuda agbɛnɛ. Shi abu gbalɔ Yeremia ni sheee gbeyei lɛ he kɛtsɔ enitsumɔ be lɛ fɛɛ mli ni aŋmɛ lɛ gbɛ koni egbe enitsumɔ lɛ naa. Aha eyagbe egbii lɛ anaa yɛ nom mli, jeee yɛ Babilon kɛ maŋ ni ashwie amɛhiɛ shi lɛ, shi moŋ, yɛ Mizraim. Ekɛ ekaa kɛ anɔkwayeli jaje Nyɔŋmɔ kojomɔi lɛ fe afii 65.
21. Mɛɛ sanebimɔi lolo kɔɔ wɔhe?
21 Shi agbɛnɛ wɔyɛ miishɛɛ akɛ wɔɔle bɔ ni Yeremia shihilɛ kɛ sɔɔmɔ nitsumɔ lɛ kɔɔ wɔbe nɛɛ ahe ehaa lɛ. Namɛi baanyɛ afee ŋmɛnɛŋmɛnɛ beaŋ Yeremia yɛ afii ohai 20 nɛɛ mli? Kɛ Yuda kɛ Yerusalem hu? Ni hegbeyeiwoo ni jɛɔ kooyigbɛ lɛ damɔ shi kɛha mɛni? Nikasemɔi ni nyiɛ sɛɛ nɛɛ baapɛi nɛkɛ sanebimɔi nɛɛ amli.a
[Shishigbɛ niŋmai]
a Ajie kɛjɛ April 1, 1988 Watchtower lɛ mli.
Ani Okaiɔ?
◻ Te Yeremia fee enii yɛ nitsumɔ ni akɛfɔ ehiɛ Iɛ he eha tɛŋŋ, ni mɛni ji Yehowa hetoo?
◻ Mɛni hewɔ wɔyɔɔ nibii ni ba yɛ Yeremia gbii lɛ amli lɛ he miishɛɛ Iɛ?
◻ Mɛɛ jamɔŋ shihilɛ ko ji nɔ ni Yeremia wie eshi, ni Yudafoi lɛ kɛ amɛhiɛ fɔ mɛni nɔ?
◻ Mɛni jɛ mli ba yɛ naagbee kɛha Yerusalɛm kɛ Yuda?
[Wiemɔ ni akɔ ni akɛmiitsu nii ni yɔɔ baafa 10]
Yeremia kɛ ekaa jaje Nyɔŋmɔ kojomɔi lɛ eshwie Yuda maŋ Iɛ hiɛnyiɛlɔi lɛ kɛ gbɔmɛi lɛ anɔ
[Mfoniri ni yɔɔ baafa 11]
Yei Iɛ sha aboloo amɛha “Ŋwɛi Maŋnyɛ” Iɛ