Ebed-Melek​—Nuu Ko NiYɔɔ Ekaa Lɛ

EBED-MELEK jeee Israelnyo shi moŋ eji Kushnyo piafonyo ko. Esɔmɔ yɛ Zedekia ni ji naagbee Yudea maŋtsɛ ni ye nɔ yɛ Yerusalem lɛ we lɛ. Eyɛ mli akɛ lumɛi ni ekɛtsuɔ nii lɛ efite ni amɛsheee Nyɔŋmɔ gbeyei moŋ, shi Ebed-Melek tsɔɔ akɛ eji nuu ekaalɔ ni musuŋ tsɔɔlɛ ni buɔ nɔni ja.

Be mli ni Ebed-melek sui kpakpai lɛ baje kpo jogbaŋŋ lɛ, Kaldeabii lɛ ebawo Yerusalem he ka. Yehowa gbalɔ Yeremia ejaje shii abɔ akɛ maŋ lɛ hiɛ baakpata, ni ewo maŋbii lɛ ahewalɛ akɛ amɛhere amɛdiɛŋtsɛ amɛyiwala kɛtsɔ amɛhe ni amɛ aaaŋɔ amɛha amɛhekawolɔi lɛ nɔ. Sane ni ekɛha amɛ kɛjɛ Ŋwɛi Flooflonyo lɛ ŋɔɔ ji: “Mɔni aaahi ma nɛŋ lɛ, eeegbo yɛ klante kɛ hɔmɔ kɛ gbelehela naa; shi mɔni aaaje kpo kɛaatee Kaldeabii lɛ aŋɔɔ lɛ, aaahere eyiwala, ni esusuma aaatsɔ tamɔ haanɔ aha lɛ, ni eyi aaana wala.” Enɛ wo lumɛi komɛi ni sɔmɔ kɛ Maŋtsɛ Zedekia ŋaawolɔi lɛ amlila waa. Amɛtswa amɛfai shi akɛ amɛ aaafã maŋ lɛ he bɔfɛɛbɔ ni fee, ni amɛŋmɛŋ amɛhe amɛhaŋ amɛhekawolɔi lɛ kɔkɔɔkɔ. Akɛni amɛkpɛlɛɛɛ nɔ akɛ Yeremia wiemɔi lɛ jɛ Nyɔŋmɔ mumɔ mli hewɔ lɛ, amɛbu gbalɔ lɛ akɛ mɔko ni baatɔtɔ amɛnaji yɛ Yerusalem hefamɔ yɛ omanyeyeli mli lɛ mli.​—Yer. 38:​1-3.

Nohewɔ lɛ lumɛi nɛɛ tee Maŋtsɛ Zedekia ŋɔɔ ni amɛyafolɔ Yeremia naa akɛ eeha ŋmiŋmi miimɔmɔ tabilɔi kɛ maŋbii lɛ. Amɛbi koni agbe gbalɔ lɛ akɛ maŋjwalɔ ni taooo maŋbii lɛ toiŋjɔlɛ kɛ amɛhilɛ. (Yer. 38:⁠4) Zedekia ji lumɔ ko ni hiɛ waaa, ni nohewɔ lɛ ekpɛlɛ amɛnibimɔ lɛ nɔ ni ekɛɛ: “Naa, eyɛ nyɛdɛŋ! Ejaakɛ maŋtsɛ lɛ nyɛŋ aje nyɛsɛɛ afee nɔko.” (Yer. 38:⁠5) Zedekia kɛ mɛnɛɛmɛi aŋaawoo etsu nii yɛ ta ni etswaa eshiɔ Kaldeabii lɛ mli, ni nohewɔ lɛ esusu akɛ esani ebo amɛ toi ni ekpata nuu ni amɛsusuɔ akɛ eefite yiŋtoi ni amɛfee yɛ ta lɛ he lɛ hiɛ. Zedekia ejeee gbɛ ehaaa hegbɛ akɛ agbe Yeremia, shi lumɛi lɛ adɛŋ ni eŋɔ gbalɔ lɛ ewo lɛ tamɔ nɔni ekɛɛ ayagbele nɔŋŋ.

Shi ekolɛ nɛkɛ lumɛi nɛɛ yashe gbeyei fioo, ni nohewɔ lɛ ehaaa ni amɛhe abaje láyisɔyeli mli tɛ̃ɛ. Kɛlɛ amɛtswa amɛfai shi akɛ amɛ aaagbe gbalɔ lɛ yɛ gbɛ ko ni gidigidifeemɔ bɛ mli nɔ. Amɛshiulɛ amɛwo nubu ko ni ŋmɔtɔ yɔɔ mli lɛ mli koni egbo yɛ jɛi.​—Yer. 38:⁠6.

Beni akɛ Yeremia yato Bulɔi Akpo lɛ nɔ lɛ, maŋtsɛ lɛ wo akpɔ akɛ ahalɛ aboloo subɔo kome daagbi akɛ egbɛfaŋnɔ. (Yer. 37:21) Shi amrɔ nɛɛ ni eyaje nubu kɛ emli ŋmɔtɔ nɛɛ mli lɛ, akɛ nakai akpɔ lɛ tsuuu nii dɔŋŋ. Akɛni niyenii etã kwraa yɛ Yerusalem hewɔ lɛ, hiɛnɔkamɔ bɛ akɛ Yeremia aaana niyenii kɛje mɔko ŋɔɔ dɔŋŋ. Nohewɔ lɛ egbele bɛ shɔŋŋ kwraa.

Beni Ebed-melek nu nɔni bulɔi lɛ efee gbalɔ lɛ he lɛ, etsu nɔko yɛ he eya nɔŋŋ. Ekɛɛɛ akɛ eeemɛ yɛ hiɛtɛɛ mli kɛyaashi eeena hegbɛ ni ekome ekɛ Maŋtsɛ Zedekia ayawie dã. Kushnyo piafonyo lɛ ebuuu lɛdiɛŋtsɛ eshweshweeshwe-feemɔ akɛ nɔko ni he hiaa tsɔ. Nuu ko ni efeko nɔko lɛ wala eba oshra mli, ni nohewɔ lɛ Ebed-Melek jɛ esuɔmɔ mli ekɛ lɛdiɛŋtsɛ ehilɛ to sɛɛ kwraa. Etee maŋtsɛ lɛ hiɛ kpetekpelee yɛ heko ni bɛŋkɛ Benyamin agbo lɛ. Eeefee akɛ nɛkɛ agbo nɛɛ yɛ maŋ lɛ kooyigbɛ yɛ heko ni kɛji Kaldeabii ni ebawo Yerusalem he ka lɛ aaake kɛba lɛ, amɛteaŋ mɛi pii aaatsɔ kɛba.​—Yer. 38:⁠7.

Kushnyo piafonyo lɛ je ekaa ni ekpa fai yɛ Yeremia wala hewɔ. Esheee gbeyei akɛ eeewie akɛ nɔni lumɛi lɛ fee lɛ ejaaa, tsɛbelɛ ele akɛ mɔ fai ni ekpaa lɛ ebo nakai lumɛi lɛ anibimɔi atoi mra mli. Ebed-Melek fo sane lɛ kuku ni ekɛ anɔkwasaji lɛ mamɔ shi, akɛ: “Minuntsɔ Maŋtsɛ! Nɛkɛ hii nɛɛ efee efɔŋ kɛ nii fɛɛ ni amɛfee gbalɔ Yeremia ni amɛshɛlɛ amɛfɔ̃ bu lɛ mli lɛ, ni eegbo kɛ hɔmɔ yɛ heni eyɔɔ lɛ; ejaakɛ aboloo ko bɛ ma lɛŋ dɔŋŋ.”​—Yer. 38:⁠9.

Naakpɛɛsane ko ji akɛ, Zedekia tsake yiŋkpɛɛ ni efee yɛ Yeremia he lɛ, ni eha Ebed-Melek hegbɛ akɛ eyahere gbalɔ lɛ yiwala. Maŋtsɛ lɛ kɛɛ: “Ŋɔɔ hii nyɔŋmai-etɛ kɛjɛ biɛnɛɛ ofata ohe, ni oyajie gbalɔ Yeremia kɛjɛ bu lɛ mli dani egbo.” (Yer. 38:10) Efeŋ akɛ ebaabi hii 30 dani anyɛ agbala Yeremia kɛjɛ bu lɛ mli. Shi yɛ hetsɛ kpele ni mɛi yɔɔ kɛha gbalɔ lɛ kɛ ewiemɔ hewɔ lɛ, ebaafee akɛ mɛi ni taoɔ ni Yeremia agbo lɛ aaatsĩ eyiwalaheremɔ gbɛ. Nohewɔ lɛ ekolɛ kɛji mɛi fioo ko pɛ teelɛ jiemɔ lɛ, mɛnɛɛmɛi aaanyɛ aye amɛnɔ, shi hii 30 aaanyɛ adamɔ naagbai ni ekolɛ aaaba yɛ Yeremia jiemɔ nɛɛ mli lɛ naa.

Oya nɔŋŋ kɛkɛ ni Ebed-Melek tsu Zedekia famɔ lɛ he nii. Gbɛ nɔ ni etsɔ efee enɛ lɛ tsɔɔ hu akɛ emusuŋ tsɔlɛ ni eye etsui yɛ gbalɔ lɛ he. Akɛni bu lɛ mli kwɔ ni Yeremia efũ yɛ ŋmɔtɔ lɛ mli hewɔ lɛ, ebaabi hewalɛ babaoo dani anyɛ agbalalɛ kɛje kpo. Yɛ enɛ hewɔ hu lɛ, kpãi ni nɔkonɔko ehaaa he lɛ aaanyɛ afolɔ gbalɔ lɛ, Agbɛnɛ hu eeenyɛ efee akɛ be mli ni ashiu Yeremia awo bu lɛ mli klɛŋklɛŋ lɛ, ayafeeelɛ blɛoo. Nohewɔ lɛ ekolɛ ena faji yɛ eŋaashii. Anaa akɛ Ebed-Melek susu sane lɛ he jogbaŋŋ. Eyahala mamashwɛi kɛ takoi ni ekɛ taŋkpei shiu nomɛi eyaha Yeremia koni ekɛ nomɛi ahã taŋkpei lɛ ahe yɛ eŋaashii. Kɛtsɔ nɛkɛ gbɛ nɔ lɛ, mamashwɛi lɛ haaa ni taŋkpei ni akɛgbala Yeremia kɛjɛ bu lɛ mli lɛ akalɛ.​—Yer. 38:​11-13.

Mɛni hewɔ Ebed-Melek jie ekaa babaoo kpo nɛkɛ? Eyɛ mli akɛ gbɔ jilɛ ni eyɛ gbɔmɛi ni egbe Yehowa Nyɔŋmɔ gbɛi he guɔ babaoo lɛ ateŋ moŋ, shi ekɛ ehe bafɔ̃ Ŋwɛi Flooflonyo lɛ nɔ. Hɛɛ, Yehowa mli hekɛnɔfɔɔ hewɔ Ebed-Melek je ekaa ni ebaye ebua gbalɔ ni mɛi ahe tsɛ̃ɔlɛ lɛ. Kushnyo piafonyo lɛ nyɔmɔwoo eŋmɛɛɛlɛ. Yehowa wolɛ shi kɛtsɔ Yeremia nɔ akɛ: “Naa, maha miwiemɔi lɛ aba maŋ nɛɛ nɔ yɛ efɔŋ gbɛ ni jeee ekpakpa gbɛ, ni amɛ aaaba mli yɛ ohiɛ yɛ no gbi lɛ nɔ. Shi majieo yɛ nakai gbi lɛ nɔ, . . . ni aŋɔŋ bo awoŋ hii ni osheɔ lɛ adɛŋ; shi maha oje mli kɛ̃, ni onyɔŋ yɛ klante naa; shi osusuma aaatsɔ haanɔ ahao, ejaakɛ ohiɛ kã minɔ.” (Yer. 39:​16-18) Taakɛ wiemɔi nɛɛ tsɔɔ lɛ, Ebed-Melek baana Yerusalem hiɛkpatamɔ ni Yeremia gba he sane eto lɛ kɛ ehiŋmɛii. Kɛlɛ ehe ehiaŋ akɛ eeeshe no gbeyei. Shii abɔ ni Ebed-Melek bu Yeremia wala akɛ ejara wa lɛ, nakai nɔŋŋ kɛ̃ Yehowa Nyɔŋmɔ baabu Ebed-Melek hu wala akɛ ejara wa, ni eeehere eyiwala.

Kwɛ bɔni Ebed-Melek fee nɔkwɛmɔnɔ kpakpa eha wɔ, akɛ esheee gbɔmɛi gbeyei shi moŋ eje ekaa ni efi Yehowa gbalɔ lɛ sɛɛ! Ŋwɛi Flooflonyo lɛ hiɛ kpaaa jalɛnii ni Ebed-Melek fee lɛ nɔ. Nakai nɔŋŋ ehiɛ kpaŋ wɔsɔɔmɔ yɛ anɔkwayeli mli kɛ agbɛnɛ wɔnyɛmimɛi ni wɔɔye wɔbua yɛ amɛfimɔ mli lɛ nɔ. Biblia lɛ kɛɔ wɔ akɛ: “Nyɔŋmɔ jeee mɔni yeɔ sane ni ejaaa ni ehiɛ aaakpa nyɛnitsumɔ lɛ nɔ kɛ suɔmɔ deŋme ni nyɛgbo yɛ egbɛi lɛ ahewɔ, ni nyɛkɛsɔmɔ mɛikrɔŋkrɔŋi lɛ, ni nyɛsaa nyɛsɔmɔɔ amɛ lolo lɛ.” (Heb. 6:10) Nohewɔ lɛ nyɛhaa wɔjiea ekaa kpo taakɛ Ebed-Melek fee lɛ.