Beni Akpata Jamɔ Ni Ato He Gbɛjianɔ Hiɛ Sɛɛ Lɛ, Nɛɛgbɛ Abaatsɔ?
Kanelɔ lɛ baana he sɛɛ kɛji ekane Yeremia yitsei 40 kɛyashi 49 dani ekase enɛ kɛ nɔni nyiɛ sɛɛ lɛ.
“Alomɔ mɔni tsuɔ Yehowa nitsumɔ jabejabe, ni alomɔ mɔni tsiɔ eklante lɛ lɛ kɛjɛɔ lá he!”—Yer. 48:9
1. Mɛɛ naagba Jamɔ ni Ato Be Gbɛjianɔ lɛ hiɛkpatamɔ kɛbaaba mɛi ni baaje mli lɛ anɔ?
1 “JE NƐŊ jamɔ ni ato he gbɛjianɔ lɛ egbee shi!” Enɛ ji wiemɔi ni wɔbaakpa gbɛ yɛ mɛi ni sumɔɔɔ jamɔi fɛɛ ni ehe gbɛi lɛ anaa beni jamɔi ni ato he gbɛjianɔ ŋmɛnɛ lɛ aaagbee shi yɛ hiɛkpatamɔ mli lɛ. Nɛɛgbɛ mɛi ni baaje nɔ ko ni tamɔ nɔni anyɛŋ ahe aye nɛɛ mli lɛ baaya? Mɛni amɛbaana ni amɛtsɔ amɛhiɛ kɛha yɛ nakai be mli? Hiɛdɔɔ saji diɛŋtsɛ wɔbiɔ nɛɛ.
2. Mɛni sane abi yɛ Yeremia gbalɛ lɛ he, ni yɛ egbalɛ afii 40 sɛɛ lɛ, nɛɛgbɛ ena ehe yɛ?
2 Ekolɛ mɛi ni heee yeee yɛ jamɔ ni ehe gbɛi mli ni amɛyɔɔ hewɔ lɛ baabi akɛ, ‘Ani ŋwɛi kɛ shikpɔŋ Bɔlɔ lɛ baaŋmɛ enɛ gbɛ?’ Sanebimɔ nɛɛ tamɔ sane ko ni abi aaafee afii 2,625 ni eho nɛɛ yɛ Yudanyo osɔfo ko ni atsɛɔlɛ gbalɔ Yeremia ni jɛ Anatot yɛ Teŋgbɛ Bokagbɛ lɛ he lɛ. Lɛ ji mɔni gba eshi jamɔ ni lɛ diɛŋtsɛ emaŋbii hiɛ yɛ nakai be mli lɛ. Yeremia tsɔɔ akɛ, abaasha amɛsɔlemɔwe ni no pɛ ji nɔni jamɔŋ mla ŋmɛɔ he gbɛ lɛ ashwie shi butuu. Abaajwara amɛmaŋtiase ni ji Yerusalem, heni sɔlemɔwe lɛ ma lɛ, ni eeetsɔ tumu. Abaaŋɔ mɛi ni hiɛ nakai jamɔ ni ehe gbɛi lɛ mli lɛ nom kɛya amɛhenyɛlɔi ashikpɔŋ nɔ ni amɛyahi jɛmɛ afi 70. Amanehulu nɛɛ ahe gbalɛ ni Yeremia gba lɛ ha ate shi awolɛ. Yɛ egbalɛ afi 40 lɛ naagbee mli lɛ, awo Yeremia tsuŋ yɛ Yerusalem, yɛ Zedekia ni ji naagbee maŋtsɛ ni jɛ David odehei akutso lɛ mli lɛ nɔyeli be mli.
3. Nakai jamɔŋ hiɛkpatamɔ ni Yehowa ŋmɛ gbɛ hewɔ lɛ, ani eekpata lɛ diɛŋtsɛ ejamɔ hiɛ, aloo mɛni?
3 Nyɔŋmɔ, mɔni gbɛi kã Yerusalem sɔlemɔwe lɛ nɔ lɛ ŋmɛ nakai jamɔ hiɛkpatamɔ lɛ gbɛ. Yɛ anɔkwale mli lɛ, Yehowa Nyɔŋmɔ diɛŋtsɛ ji mɔni kɛ nakai hiɛkpatamɔ wiemɔ lɛ ha Yerusalem. Mɛɛba? Ani ebaakpata lɛ diɛŋtsɛ ejamɔ ni akɛjaalɛ akɛ anɔkwa Nyɔŋmɔ lɛ hiɛ? Dabida! Eto eyiŋ akɛ ebaakpata ejamɔ ni afite kɛ nɔni akɛ apasa efutu mli yɛ sɔlemɔwe ni egbɛi kã nɔ lɛ hiɛ akɛni abule egbɛi krɔŋkrɔŋ lɛ hewɔ. Yehowa wiemɔ ni ekɛwo Yeremia naa lɛ ye kunim! Mɛi ni kɛ tsuisalɛ te shi wolɛ lɛ anine nyɛ shi. Yɛ Ab ni ji amɛ afi lɛ nyɔɔŋ ni ji enumɔ lɛ latsaabe lɛ gbi kpawo kɛyashi 10 lɛ nɔ lɛ, akumɔ sɔlemɔwe lɛ ashwie shi, ni abutu Yerusalem maŋtiase ni ta kɛ hɔmɔ egbele lɛ. Dani enɛ aaaba lɛ, amɔmɔ maŋtsɛ Zedekia ni joɔ foi lɛ kɛ Yudabii pii ni je maŋ lɛ hiɛkpatamɔ mli lɛ kɛtee deŋmegbomɔ nomŋɔɔ mli akɛ gboklɛfoi yɛ Babilon ni ji je lɛŋ maŋnyɛ yɛ nakai be mli lɛ.
4. Ani nakai blema yinɔsaji lɛ he hiaa wɔ ŋmɛnɛ?
4 Shi ani nɛkɛ blemasaji nɛɛ fɛɛ kɔɔ wɔhe ŋmɛnɛ? Hɛɛ! Mɛni hewɔ? Ejaakɛ gbalɛ ni, ni esa akɛ aŋmala ashwie shi koni abaa eyi yɛ Biblia Krɔŋkrɔŋ lɛ ni atsɔɔ shishi kɛtee majianɔwiemɔi pii amli kɛbashi ŋmɛnɛ gbi nɛɛ lɛ mli. Blema yinɔsane he nikaselɔ ko ni ji Yudanyo, mɔni maŋbii ná nakai hiɛdɔɔ yinɔsane lɛ tsɔɔ hiamɔ ni nakai blema yinɔsane lɛ he hiaa lɛ kɛtsɔ nɔni eŋmala lɛ nɔ yɛ wɔ-Ŋmɛnɛ Be lɛ klɛŋklɛŋ afii oha lɛ mli akɛ: “Shi afee amɛ enɛɛmɛi fɛɛ ni akɛto okadi aha wɔ, ni aŋma ni aŋɔbɔ wɔ kɔkɔ, wɔ mɛi ni je lɛ naagbei lɛ enina wɔ lɛ.”—1 Kor. 10:11.
5. Paulo ŋma 1 Korintobii 10:11 dani mɛɛ jamɔŋ hiɛkpatamɔ ba, ni mɛni hewɔ afeee nakai dɔŋŋ lɛ?
5 Kristofonyo bɔfo Paulo ji mɔni ŋma nɛkɛ okadi wiemɔi nɛɛ aaafee afii 15 dani Roma asraafoi lɛ bakpata Yerusalem maŋtiase ni asaa atswa ama shi kɛ esɔlemɔwe lɛ hiɛ yɛ afi 70 Ŋ.B. Enɛ baaa nɔni ji shi etɛ nɔ̃ dɔŋŋ ejaakɛ Yudafoi lɛ bɛ sɔlemɔwe ko dɔŋŋ yɛ Yerusalem ŋmɛnɛ. Amrɔ nɛɛ, jamɔi wuji etɛ, Kristendom, Islam kɛ Yuda jamɔi miipele nakai blema maŋtiase lɛ he.
6. Mɛni baafee Jamɔ ni Ato he Gbɛjianɔ lɛ klɛŋklɛŋ fã ni abaakpata hiɛ, ni Jamɔ ni Ato he Gbɛjianɔ lɛ fãi krokomɛi amli ni amɛbaaku sɛɛ kɛya lɛ tsɔɔ mɛni?
6 Jamɔi komɛi yɛ ni etsɛ fe Kristendom. Shi taakɛ Yeremia ni hi shi yɛ klɛŋklɛŋ Yerusalem lɛ tsɔɔ lɛ, Kristendom baafee klɛŋklɛŋ fã ni abaakpata hiɛ yɛ Jamɔi ni Ato He Gbɛjianɔ lɛ ateŋ. Ɛhɛ̃, belɛ Yerusalem ji Kristendom he mfoniri yɛ gbalɛ mli, ejaakɛ eshiɔ etsitsi akɛ ehiɛ jamɔ ni aje shishi yɛ Yerusalem ni ji enyɔ yɛ afi 33 Ŋ.B. mli lɛ mli. Kɛ afã Yeremia beaŋ Yerusalem ni abulɛ fɔ lɛ henɔ ni yɔɔ ŋmɛnɛ lɛ shishi sɛɛ lɛ, nɛɛgbɛ esɛɛnyiɛlɔi ni baaje mli lɛ baaya? Ahi amɛbaaya jamɔi ni jeee Kristojamɔ lɛ eko ŋɔɔ? Enɛ feemɔ baatsɔɔ akɛ amɛyaba mɛi ni abu amɛ fɔ kɛha naanɔ hiɛkpatamɔ ni ji Jamɔi ni Ato he Gbɛjianɔ lɛ abo.
7. Beni Yerusalem gbee shi sɛɛ lɛ, nɛɛgbɛ Babilonbii lɛ ŋmɛ Yeremia kɛ ewoloŋmalɔ lɛ gbɛ akɛ amɛhi ni no mli lɛ, mɛɛ gbijurɔyeli bɛŋkɛɔ!
7 Nyɛhaa wɔkadia bɔni afee enɛ he mfoniri aha yɛ Yeremia gbii amli beni akpata klɛŋklɛŋ Yerusalem hiɛ yɛ afi 607 D.Ŋ.B. mli lɛ. Aŋmɛ Yudabii nɔnalɔi lɛ ekomɛi agbɛ akɛ amɛhi Yuda shikpɔŋ ni aye enɔ kunim lɛ nɔ yɛ Gedalia, mɔni Maŋtsɛ Nebukadnezar kunimyelɔ lɛ wolɛ amralo yɛ shikpɔŋ lɛ nɔ lɛ shishi. Enɛ ba mli yɛ afi 607 D.Ŋ.B. nyɔɔŋtsere nyɔɔŋ ni ji enumɔ (Ab) lɛ nɔ. Abaa Yeremia kɛ ewoloŋmalɔ Baruk yi, ni Babilon tatsɛnukpa lɛ ŋmɛ Yeremia gbɛ koni ekɛ Yuda nɔnalɔi ni eshwɛ lɛ ahi shikpɔŋ lɛ nɔ yɛ Amralo Gedalia shishi tamɔ bɔni lɛ diɛŋtsɛ esumɔɔ lɛ. Mɛni eshwɛ agbɛnɛ? Nyɔɔŋ ni ji kpawo (Etanim, aloo Tishri) lɛ gbobe ŋmaakpamɔ lɛ miibɛŋkɛ. Belɛ be ni akɛyeɔ asesei aloo henaabuamɔ gbijurɔ gbii kpawo (Tishri 15-21) lɛ bɛŋkɛɔ nɛɛ. Shi naa, sɔlemɔwe ko bɛ Yerusalem ni akɛ mlifilimɔ baaye gbijurɔ lɛ yɛ mli.—5 Mose 16:13-16.
8. Ani Yudafoi abobalɔi lɛ ku amɛsɛɛ kɛba Yuda koni amɛbaye henaabuamɔ gbijurɔ lɛ?
8 Yɛ asrafoi fioo ni eshwɛ kɛha nitsumɔi komɛi asɛɛ lɛ, Babilon asraafoi lɛ fɛɛ eshi kɛtee ni amɛloo Yudabii pii ni je hiɛkpatamɔ lɛ mli lɛ kɛtee akɛ nomii. Nohewɔ lɛ, Yudafoi ni eyaba abo yɛ shikpɔji ni ebɔle amɛ anɔ lɛ ebɔi sɛɛkuu kɛmiiba Yuda shikpɔŋ nɔ. Ani amɛmiiku sɛɛ kɛmiiba amɛshikpɔŋ lɛ nɔ koni amɛbatee toiboo amɛha Yehowa ni ji amɛMlahalɔ lɛ kɛtsɔ asesei aloo henaabuamɔ gbijurɔyeli nɔ beni Yerusalem kɛ esɔlemɔwe bɛ dɔŋŋ lɛ?
9. Mɛni hewɔ sanebimɔ ko te shi yɛ heni sɛɛkulɔi kɛ Yuda shikpɔŋ lɛ nɔ nɔnalɔi baaya lɛ he?
9 Nɛɛgbɛ sɛɛkulɔi kɛ shikpɔŋ lɛ nɔ nɔnalɔi nɛɛ tee? Anyɛɛɛ amɛnɔ akɛ amɛshi shikpɔŋ lɛ. Shi Yeremia egba akɛ, shikpɔŋ lɛ baaka shi amaŋfɔ butuu afi 70, ní gbɔmɔ aloo shia koolo ko kwraa ehiŋ nɔ. Yeremia kɛɛ shikpɔŋ lɛ nɔ bii nɛɛ akɛ amɛhi shi yɛ toiŋjɔlɛ mli, ni amɛkashe Babilonbii ni eshi kɛtee lɛ agbeyei. Amɛ-amralo, Gedalia, ji Yudanyo tamɔ amɛ nɔŋŋ, shi agbɛnɛ lɛ, Babilon Maŋtsɛ Nebukadnezar shishi kɛkɛ eyɔɔ. Enɛ tsɔɔ akɛ Yehowa, amɛ-Nyɔŋmɔ lɛ eshwieee amɛ kɛjɛɛɛ shikpɔŋ ni eŋɔha amɛ lɛ nɔ, tsɛbelɛ ekɛ mumɔ tsirɛ Yeremia akɛ egba Yuda shikpɔŋ lɛ amaŋfɔfeemɔ lɛ moŋ.
Ágbe Mɔ Ko!
10. Mɛni hewɔ jamɔŋ shihilɛ mli ni ‘shikpɔŋ lɛ nɔ awusai’ ebaje yɛ Yuda shikpɔŋ nɔ lɛ yɔɔ awerɛhoo?
10 Mɛɛ jamɔ mli awerɛhoo kɛ mɔbɔ shihilɛ ‘shikpɔŋ lɛ nɔ awusai’ ni eshwɛ yɛ Yuda kpokpai anɔ lɛ ashihilɛ ebafee nɛkɛ! Sɔlemɔtsu ko bɛ Yerusalem ni abaasɔle yɛ jɛmɛ kɛha Yehowa! Yɛ Yeremia sɛɛ lɛ, osɔfo aloo Levinyo ko kwraa bɛ! Afɔleshaalatɛ ko hu bɛ ni abaasha afɔle yɛ nɔ! Hɛɛ, shika “kpaŋmɔ adeka” ni kerubim enyɔ mamɔ yiteŋ, heni osɔfonukpa lɛ kɛ Tishri 10 Kpatamɔgbi lɛ afɔleshaa lá ‘lɛ shwaa lɛ hu bɛ dɔŋŋ. Elaaje kwraa ni mɔ ko mɔ ko leee heni eyɔɔ kɛbashi ŋmɛnɛ!—Hos. 3:4.
11. Mɛni hewɔ Amon Maŋtsɛ Baalis na akɛ Ishmael, Netania bi lɛ baafee dɛŋdade ni sa kɛha Gedalia ni ji Yudea Amralo lɛ gbee?
11 Naa, gbɔmɔgbelɔ ko ejie ehe kpo ebaye awui! Mɔ lɛ ji Ishmael, Netania bi lɛ. Baalis ni ji Amonbii lɛ amaŋtsɛ, mɔni Ishmael yabalɛ abo beni ejɔɔ Babilonbii anaa foi lɛ na akɛ Ishmael ji mɔni ebaanyɛ etsu ni eyagbe Gedalia, mɔni Maŋtsɛ Nebukadnezar wolɛ kpokpaanɔ amralo yɛ Yuda nɔ lɛ. Mɛni hewɔ? Ejaakɛ Ishmael jɛ ‘maŋtsɛ seshibii lɛ ateŋ.’ Nohewɔ lɛ, kɛtsɔ enii Elishama nɔ lɛ, Ishmael ná odehei agbɛnaa, ni eji “maŋtsɛ lɛ he onukpai lɛ ateŋ” mɔ kome. (Yer. 41:1) Nohewɔ lɛ, Maŋtsɛ Zedekia ni akpalɛ nɛɛ he gbɔmɔ ni tamɔ nɛkɛ lɛ nyɛ ena hetsɛ kɛha Gedalia mɔni afeelɛ amralo tsɛbelɛ jeee ‘maŋtsɛ seshinyo’ jilɛ lɛ. Enɛ hewɔ lɛ, Amonbii a-Maŋtsɛ Baalis, mɔni nya Yerusalem hiɛkpatamɔ he lɛ kɛ Ishmael fee edɛŋdade koni ejie Gedalia kɛjɛ jɛmɛ.—Lala 83:8, 9; Yer. 40:14.
12. Mɛɛ gbɛ nɔ Ishmael tsɔ etsu enyaŋemɔ nitsumɔ lɛ, shi mɛni hewɔ naagbee kwraa lɛ, esani ejo foi lɛ?
12 Yɛ Yohanan, Karea bi lɛ kɔkɔbɔɔ fɛɛ sɛɛ lɛ, Gedalia ŋmɛ Ishmael kɛ enanemɛi 10 lɛ okpɔlɔ yɛ nɔyeli hee lɛ maŋ ni ji Mizpa ni yɔɔ Yerusalem ni etsɔ amaŋfɔ lɛ kooyigbɛ heko lɛ mli. Eyɛ mli akɛ Babilon asraafoi komɛi ba jɛmɛ moŋ, shi Ishmael kɛ emɛi lɛ ti amɛshi trukaa ni amɛgbe mɛi fɛɛ ni yɔɔ niyeli lɛ shishi kɛ jɛmɛ lɛ fɛɛ. (Yer. 41:2, 3) Mɛikrokomɛi hu gboi yɛ Ishmael kɛ emɛi lɛ adɛ. Enɛ ba yɛ nyɔɔŋtsere nyɔɔŋ ni ji kpawo, Tishri, nyɔɔŋ nɔ ni ayeɔ asesei gbijurɔ gbii kpawo lɛ. Mizpabii lɛ loo amɛhe yuu kɛnyiɛ ekãalɔ shitekɛwolɔ nɛɛ sɛɛ tamɔ enomii. Shi beni Yohanan ni ji Karea bi lɛ jie ehe kpo ni ete shi eshi Ishmael lɛ, kɛkɛ ni Ishmael kɛ ehii lɛ ateŋ mɛi kpaanyɔ jo foi kɛtee Amon shikpɔŋ ni Babel Maŋtsɛ Nebukadnezar eŋɔko jɛmɛ lɛ nɔ.—Yer. 41:10-15; 49:1-5.
13. Yɛ nɔni Yohanan kɛ esɛɛnyiɛlɔi lɛ yabi lɛ hetoohamɔ mli lɛ, mɛni Yehowa mumɔ tsirɛ Yeremia ni ekɛɛ amɛ? Ni mɛni amɛfee?
13 Yɛ nɔni ba kpokpaanɔ nɔyeli ni Babilonbii lɛ to lɛ nɔ hewɔ lɛ, Yohanan kɛ gbɔmɛi lɛ nu he akɛ esani amɛshe jeŋ hewalɛ hee ni ji Babilon nɔyeli ni Yehowa Nyɔŋmɔ kɛtsuɔ nii akɛ hiɛkpatalɔ yɛ Teŋgbɛ Bokagbɛ lɛ gbeyei. Nɛɛgbɛ amɛbaaya agbɛnɛ? Yohanan kɛ emaŋtsɛmɛi lɛ ba Yeremia, mɔni gbalɛ baa mli anɔkwale yɛ Yerusalem fitemɔ he lɛ ŋɔɔ. Amɛkã kita akɛ bɔfɛɛbɔ ni Yehowa wiemɔ ni ekɛwo Yeremia naa lɛ aaaji lɛ, amɛbaaye nɔ. Gbi nɔ ni amɛtee Yeremia ŋɔɔ lɛ, nakai gbi lɛ nɔ nɔŋŋ Yehowa wiemɔ ba Yeremia ŋɔɔ. Esaaani amɛsheɔ gbeyei, shi esani amɛhi shi yɛ shikpɔŋ lɛ nɔ yɛ Babilon nɔyeli lɛ shishi. Shi kɛ amɛhemɔkɛyeli tã ni amɛtse kɛtee wuoyigbɛ yɛ Mizraim lɛ, no lɛ, Babilon maŋtsɛ kunimyeli klante lɛ kɛ hɔmɔ kɛ gbelehela baaŋɔ amɛ fɛɛ. Amɛhiɛ baakpata jɛ Mizraim shikpɔŋ ni abulɛ fɔ lɛ nɔ, ni shwɛɛnii fioo pɛ baashwɛ. Yɛ Babilon Nɔyeli lɛ butumɔ sɛɛ po lɛ, amɛkuuu sɛɛ kɛyaaa Yuda kpokpai anɔ yɛ toiŋjɔlɛ mli. Ani Yohanan kɛ esɛɛnyiɛlɔi lɛ bo shɛɛ ni jɛ Nyɔŋmɔ nɛɛ toi? Dabida! Amɛbulɛ amale. Amɛtsɛ Yeremia amalelɔ.—Yer. 42:1–43:3.
14. Namɛi tsɔɔ amɛhe akɛ amɛyeee amɛwiemɔ nɔ, ni mɛni hewɔ anyɛɛɛ aye henaabuamɔ gbijurɔ Iɛ yɛ afi 607 D.Ŋ.B.
14 Shi namɔ ji amalelɔ lɛ akɛni amɛ fɛɛ amɛkã kita akɛ amɛsumɔɔ jio, amɛsumɔɔɔ jio, amɛbaabo wiemɔ ni Yeremia wie etsɔɔ amɛ lɛ toi lɛ? Amɛyi gbɛ momo kɛmiiya wuoyigbɛ yɛ Mizraim, ni agbɛnɛ amɛtswa amɛfai shi akɛ amɛbaaya amɛhiɛ aahu kɛyashi Nilo faa lɛ shikpɔji anɔ. Amɛsumɔɔɔ ni amɛba amɛhe shi amɛha Jeŋ Hewalɛ ni ji Etɛ ni ji Babilon Nɔyeli lɛ. Tsutsu lɛ, Mizraim ji amɛsɛɛfilɔi ni teɔ shi shiɔ Babilon jeŋ hewalɛ ni shwereɔ lɛ. Nohewɔ lɛ, ní Yuda shikpɔŋ lɛ ebaje Babilon nɔyeli shishi agbɛnɛ lɛ, amɛto amɛyiŋ akɛ akashi mɔ ko mɔ ko yɛ shikpɔŋ lɛ nɔ ni esɔmɔ Babilon. Esaaani ashiɔ Yeremia kɛ ewoloŋmalɔ Baruk, mɛi ni kpɛlɛɔ nɔ akɛ amɛba amɛhe shi amɛha Babilon nɔyeli lɛ yɛ sɛɛ. Nohewɔ lɛ, amɛgbala Yehowa tsuji nɛɛ kɛfata amɛhe kɛtee. Eyɛ mli akɛ jeee gbɛ amɛje amɛkadi be lɛ moŋ, shi beni be bashɛ ni Yuda shikpɔŋ lɛ aye asesei kɛ mlifilimɔ aloo henaabuamɔ gbijurɔ yɛ Tishri 15-21, 607 D.Ŋ.B. lɛ, nakai mɛi ni tse Yehowa hiɛ atua lɛ shi shikpɔŋ lɛ ni eka shi amaŋfɔ ní gbɔmɔ kɛ shia koolo ko kwraa bɛ nɔ taakɛ bɔni agba ato lɛ.—Yer. 43:4-7.
15. Mɛni hewɔ nibii ni ba yɛ Yeremia gbii amli lɛ kɔɔ nibii ni yaa nɔ yɛ wɔgbii nɛɛ amli lɛ kɛ wɔ hu he?
15 Anyɛŋ atsĩ Nyɔŋmɔ Ofe lɛ suɔmɔnaanii gbɛ yɛ omanyeyeli mli. Anyɛŋ ana tɔmɔ ko kwraa yɛ egbalɛ wiemɔ lɛ he. Afii 70 ni Yuda shikpɔŋ lɛ baka shi amaŋfɔ ni gbɔmɔ kɛ shia koolo ko bɛ nɔ lɛ je shishi yɛ be mli ni Yuda atuatselɔi lɛ shi kɛtee lɛ. Nakai be lɛ mli okadi gbɛ nɔ “be kpawo” ko ni Yehowa ha Maŋtsɛ Nebukadnezar la yɛ he ni eha gbalɔ Daniel tsɔɔ shishi lɛ je afii 2,520 Iɛ shishi. (Dan. 4:13-27; Luka 21:24) Nohewɔ lɛ, Jeŋ Ta I ni fɛ́ shwie jeŋ toiŋjɔlɛ nɔ ni kadiɔ “be kpawo” lɛ naagbee yɛ afi 1914 Ŋ.B. mli yɛ nyɔɔŋtsere nyɔɔŋ Tishri lɛ nɔ lɛ jeee nɔ ko ni ba trukaa kɛkɛ. Belɛ eji anɔkwale akɛ nibii ni ba yɛ Yeremia gbii amli lɛ kɔɔ wɔ be nɛɛ he. Shishinumɔ ni yɔɔ nakai nibii ni ba lɛ he lɛ kɔɔ wɔ fɛɛ he ŋmɛnɛ!
16. Mɛni hewɔ Mizraim ni Yudabii ni heee yeee lɛ jo foi kɛtee lɛ ebafeee gbɛ kpakpa lɛ, ni gbɛ ni Yudabii nɛɛ hala lɛ haa wɔkwɛɔ mɛni gbɛ?
16 Beni jamɔ ni Yudabii mla mlikulɔi lɛ to yɛ Yerusalem lɛ gbɛɛ shi yɛ 607 D.Ŋ.B. sɛɛ lɛ, ani Yudabii ni jo foi kɛtee Mizraim lɛ kpa amɛnihiinii lɛ? Ani amɛhala gbɛ ni hi fe fɛɛ ni ji gbɛ ni ja lɛ? Dabi, yɛ gbeyei nibii ni ba jamɔŋ bii ni booo Yehowa Wiemɔ toi lɛ anɔ ni amɛna lɛ fɛɛ sɛɛ. Eyɛ mli akɛ atsi Yeremia naa yɛ Mizraim moŋ, shi ekpaaa gbalɛi ni egbaa lɛ yɛ jɛmɛ. Yehowa mumɔ lɛ ka he etsirɛ Yeremia koni egba, hɛɛ, egba kɛshi Yuda abobalɔi ni bɛ hemɔkɛyeli lɛ kɛ maŋ ni amɛhala akɛ amɛshihilɛhe lɛ. Nibii ni aŋmala yɛ mumɔ mli lɛ ehi shi kɛbashi jaramɔ be nɛɛ mli. Amɛji kɔkɔbɔɔ kɛha Yeremia gbii amli Yudafoi atuatselɔi ahenɔ ni yɔɔ ŋmɛnɛbeaŋ lɛ. Yɛ enɛ hewɔ lɛ, mɛni esa akɛ wɔkpa gbɛ yɛ gbii ni kamɔ wɔhiɛ kpaakpa lɛ amli”?
17. Mɛni esaaa akɛ wɔkpaa gbɛ yɛ mɛi ni baaje Kristendom hiɛkpatamɔ lɛ mli lɛ ahe, ni mɛni hewɔ?
17 Wɔbaakpa Jamɔi ni ato he Gbɛjianɔ lɛ fã ni náa mɛi anɔ hewalɛ ni ji Kristendom kɛ ekui sɔrɔtoi fɛɛ ni efutu lɛ hiɛkpatamɔ gbɛ. Enɛ baaba yɛ Yehowa be ni tsakeee lɛ mli. Nohewɔ lɛ, sanebimɔ lɛ baa akɛ, Kɛji nakai nibii lɛ eba sɛɛ lɛ, nɛɛgbɛ mɛi fɛɛ ni na nakai naakpɛɛ nii lɛ baatsɔ amɛhiɛ kɛya? Yɛ nɔni Ishmael kɛ Yohanan kɛ amɛsɛɛnyiɛlɔi ni booo Yehowa gbee toi lɛ fee yɛ afi 607 D.Ŋ.B. naa lɛ, ekolɛ wɔkpaaa gbɛ akɛ gbɔmɛi asafo babaoo ni aleee amɛyibɔ ni na gbeyei nibii lɛ baatsɔ amɛhiɛ kɛya anɔkwa Kristo jamɔ ni ŋmɛnɛbeaŋ Yeremia kuu lɛ kɛ amɛhefatalɔi anɔkwafoi hiɛ mli lɛ he. Anɔkwa Kristojamɔ lɛ kɔɔ Yeremia Nyɔŋmɔ ni ji Yehowa, Yesu Kristo ŋwɛi-Tsɛ lɛ jamɔ he. Yesu Kristo wie Yehowa jamɔ he etsɔɔ yoo ko yɛ Samaria nu bu ko he akɛ: “Ŋmɛlɛtswaa lɛ miiba ni eshɛ agbɛnɛ, beni anɔkwa jalɔi lɛ aaaja Tsɛ lɛ yɛ mumɔ kɛ anɔkwale mli, ejaakɛ mɛi ni jaalɛ nɛkɛ, Tsɛ lɛ hu taoɔ. Nyɔŋmɔ lɛ mumɔ ni, ni mɛi ni jaalɛ lɛ, ja amɛjalɛ yɛ mumɔ kɛ anɔkwale mli.”—Yoh. 4:23, 24.
18. Beni Kristo yɔɔ shikpɔŋ anɔ lɛ, namɔ Odasefonyo eji, ni namɛi yɔɔ bianɛ ni sa akɛ amɛfee odasefoi tamɔlɛ?
18 Kristofonyo nyɛŋ eku ehiɛ eshwie Yehowa jamɔ, akɛ Nyɔŋmɔ, lɛ nɔ. Yɛ Kpojiemɔ 1:5 lɛ, Nyɔŋmɔ Bi lɛ diɛŋtsɛ tsɛ ehe akɛ: “Yesu Kristo, ni ji Odasefonyo anɔkwafo” lɛ. Beni eyɔɔ shikpɔŋ nɔ akɛ gbɔmɔ adesa lɛ, eji Yudanyo aloo Israelnyo, mɔni Yesaia 43:10 wie yɛ emaŋ lɛ he akɛ: “Yehowa kɛɛ, nyɛ ji midasefoi, kɛ mitsulɔ ni mihala.” Yesu jie ehe kpo akɛ lɛ ji Yehowa Nyɔŋmɔ odasefonyo anɔkwafo. Esani ekaselɔi anɔkwafoi ni yɔɔ ŋmɛnɛ lɛ afee Yehowa odasefoi ni tamɔ nɛkɛ.
19. Yɛ Kristendom shigbeemɔ sɛɛ lɛ, ani mɛi ni baaje mli lɛ baake yuu kɛya Yehowa Odasefoi aŋɔɔ, ni mɛɛ hiɛnɔkamɔ jamɔŋ gbɛjianɔtoi krokomɛi lɛ kɛhaa mɛi ni baaje mli lɛ?
19 Biblia gbalɛ mli ŋmalɛ ko bɛ ni wɔbaanyɛ wɔjɛ mli wɔtsɔɔ akɛ beni blema Yerusalem henɔ ni yɔɔ ŋmɛnɛ lɛ egbee shi yɛ “amanehulu kpeteŋkpele” ni baa lɛ mli sɛɛ lɛ, tsutsu Kristendom mlibii babaoo ni aleee amɛyibɔ lɛ baatsake amɛtsui koni amɛfata Kristofoi ni awaa amɛyi ni atsɛɔ amɛ Yehowa Odasefoi lɛ ahe. Mɛi pii baawo yara yɛ nibii ni baabɔ amɛ beni akpata Kristendom ni taoɔ jeŋnii pii lɛ hiɛ lɛ tamɔ jarayelɔi ni Kpojiemɔ yitso 18 fee amɛhe mfoniri akɛ amɛfeɔ Babilon kpeteŋkpele lɛ hiɛkpatamɔ lɛ. Jara ni amɛkɛlɛ yeɔ kɛha amɛhe ninamɔ lɛ baabɔ amɛ. Eeenyɛ eba mli akɛ mɛi ni jamɔ eye amɛ sɛkɛ lɛ baake yuu kɛya ni amɛkɛ amɛhe ayakpɛtɛ jamɔi ni jeee Kristofoi ni etsɛ fe Kristendom be kukuoo lɛ ahe. Mɛnɛɛmɛi kɛ amɛhe baawo jamɔ gbɛjianɔtoo kroko ni abulɛ fɔ lɛ mli, ejaakɛ amɛ fɛɛ amɛji Babilon kpeteŋkpele ni ji jeŋ amale jamɔ nɔyeli lɛ mlibii. Ato efãi krokomɛi lɛ fɛɛ aha hiɛkpatamɔ!
20. Te wɔbaafee tɛɛŋ wɔle heni mɛi ni baaje Babilon Kpeteŋkpele Iɛ hiɛkpatamɔ mli lɛ baaya?
20 Belɛ nɛɛgbɛ mɛi ni baaje Babilon Kpeteŋkpele lɛ hiɛkpatamɔ mli lɛ baatsɔ? Mɛni gbalɛ mli Ŋmalɛi ni jɛ mumɔ mli lɛ tsɔɔ? Ani amɛbaaya aloo amɛbaanyɛ amɛya mɛi ni akɛ Yeremia kɛ ewoloŋmalɔ Baruk fee amɛhe mfoniri lɛ aŋɔɔ? Gbalɛ mli saji ni ba yɛ Yehowa jalɔi nɛɛ anaagbee gbi amli lɛ haa enɛ hetoo.a
[Shishigbɛ niŋmai]
a Ajie kɛjɛ March 1, 1980 Blɔfo Buu-Mɔɔ lɛ mli.
[Mfoniri ni yɔɔ baafa 18]
Nyɛkahaa wɔfea wɔnii tamɔ Yeremia gbii amli Yudabii mlakulɔi lɛ