“Yehowa Yiŋ Ní Eto Lɛ Efee”

 1. Yerusalem hiɛkpatamɔ lɛ sɛɛ lɛ, mɛni Yeremia wie yɛ Yehowa gbalɛi ahe?

AFEE Yerusalem maŋ lɛ amaŋfɔ̃. La ni Babilonbii lɛ je wo maŋ lɛ mli kɛkpãta maŋ lɛ hiɛ lɛ he lasu lɛ gboko. Bɔ ni mɛi ni agbegbee lɛ bolɔ musuŋshaa naa lɛ yɛ Yeremia jwɛŋmɔŋ lolo. Nyɔŋmɔ tsɔɔ lɛ nɔ̃ ni baaba, ni eba mli nyɔŋma shiishi. Gbalɔ lɛ huŋ ekɛɛ: “Yehowa yiŋ ní eto lɛ efee.” Mɛɛ oshara Yerusalem hiɛkpatamɔ lɛ ji nɛkɛ!—Nyɛkanea Yaafo 2:17.

 2. Mɛɛ gbalɛ ni atsɔ hiɛ agba afii ohai komɛi Yeremia na emlibaa?

² Hɛɛ, Yeremia na gbalɛi babaoo ni Nyɔŋmɔ ha agba aha ewebii lɛ, ni blema nɔ̃ po fata he lɛ amlibaa. Afii ohai komɛi ni tsɔ hiɛ lɛ, Mose ha Israelbii lɛ ná amɛle nɔ̃ ni baa kɛ́ abo Nyɔŋmɔ gbee toi loo abooo toi—kɛ́ jeee “jɔɔmɔ” lɛ, belɛ “loomɔ.” Yehowa shweɔ ni ewebii lɛ ahala nɔ̃ ni hi fe fɛɛ, jɔɔmɔi lɛ. Nɔ̃ ni tamɔɔɔ nakai lɛ, loomɔ ni baajɛ amɛtoigbele lɛ mli aba lɛ baafee gbeyei waa. Mose bɔ kɔkɔ—ni sɛɛ mli lɛ Yeremia hu ma nɔ aduatsɔ—akɛ mɛi ni kwaa Yehowa, ni amɛteɔ shi amɛwoɔ lɛ lɛ ‘aaaye amɛbi hii lɛ aloo, ni amɛbi yei lɛ aloo hu amɛaaye.’ (5 Mose 30:19, 20; Yer. 19:9; 3 Mose 26:29) Ekolɛ, Yudafoi lɛ ekomɛi bi amɛhe akɛ, ‘Ani nɔ̃ ko ni yɔɔ gbeyei tamɔ nɛkɛ baanyɛ aba?’ Beni Babilonbii lɛ wo Yerusalem he ka, ni niyenii he basɛ̃ lɛ, eba lɛ nakai. Yeremia bɔ amaniɛ akɛ: “Yei ní musuŋ tsɔɔ amɛ lɛ aniji hoɔ amɛ diɛŋtsɛ amɛmusuŋ bii; amɛtsɔmɔ amɛniyenii yɛ mimaŋ lɛ bi yoo lɛ hiɛkpatamɔ lɛ mli.” (Yaafo 4:10) Mɛɛ amanehulu sane po nɛ!

 3. Mɛɛ yiŋtoo hewɔ Nyɔŋmɔ tsu gbalɔi kɛtee ewebii lɛ aŋɔɔ lɛ?

³ Jeee hiɛkpatamɔ he adafitswaa kɛkɛ hewɔ Yehowa hole mɛi tamɔ Yeremia koni amɛsɔmɔ akɛ gbalɔi. Nyɔŋmɔ shwelɛ ji akɛ ewebii lɛ abɔi anɔkwayeli ekoŋŋ. Etao akɛ eshafeelɔi atsake amɛtsuii. Ezra tsɔɔ mli akɛ: ‘Yehowa, amɛtsɛmɛi a-Nyɔŋmɔ lɛ, tsuɔ ebɔfoi kɛbaa amɛŋɔɔ, eteɔ shi leebi maŋkpa etsuɔ amɛ, ejaakɛ emusuŋ tsɔɔ lɛ yɛ emaŋ lɛ kɛ eshihilɛhe lɛ hewɔ.’—2 Kron. 36:15; nyɛkanea Yeremia 26:3, 12, 13.

 4. Te Yeremia nu sane ni ejaje lɛ he eha tɛŋŋ?

⁴ Yeremia musuŋ tsɔ lɛ yɛ emaŋbii lɛ ahe, taakɛ Yehowa musuŋ tsɔɔ lɛ yɛ amɛhe lɛ. Nɔ̃ ni ewie dani akpãta Yerusalem hiɛ lɛ maa sane nɛɛ nɔ mi. Hiɛkpatamɔ ni no mli lɛ ebɛŋkɛ lɛ ha ehao waa. Eji emaŋbii lɛ bo sane ni ejaje lɛ toi ni amɛkɛtsu nii kulɛ, akpataŋ amɛmaŋ lɛ hiɛ! Feemɔ bɔ ni Yeremia nu he eha beni ejaje Nyɔŋmɔ sane lɛ he mfoniri okwɛ. Ekɛ henumɔ ko bo akɛ: “Mimusuŋ! oo, mimusuŋ! mitsui mli diɛŋtsɛ miiwa mihe! mitsui kãaa mimli! minyɛɛɛ dioo mafee! ejaakɛ misusuma enu tɛtɛrɛmantɛrɛ gbɛɛmɔ kɛ ta mli oshebɔɔ.” (Yer. 4:19) Enyɛɛɛ emua enaa yɛ amanehulu ni no mli lɛ ebɛŋkɛ lɛ he.

 5. Mɛni ha Yeremia ná nɔmimaa yɛ sane ni eshiɛ lɛ he lɛ?

⁵ Mɛni ha Yeremia ná nɔmimaa akɛ egbalɛi lɛ baaba mli lɛ? (Yer. 1:17; 7:30; 9:22) Yeremia ji mɔ ko ni yɔɔ hemɔkɛyeli ni kase Ŋmalɛi lɛ, ni ele akɛ, Yehowa Nyɔŋmɔ gbalɛi lɛ, anɔkwa gbalɛi ni. Nibii ni tee nɔ lɛ haa wɔnaa akɛ, Yehowa gbaa gbalɛi komɛi ni yɛ adesai asusumɔ naa lɛ enyɛŋ eba mli. Gbalɛ ni kɔɔ Israelbii lɛ akpɔ̃mɔ kɛmiijɛ nyɔŋyeli mli yɛ Mizraimbii lɛ ashishi lɛ ji enɛ he nɔkwɛmɔnɔ. Yeremia kane Mose Wolo ni Ji Enyɔ lɛ mli saji, kɛ wiemɔi ni mɔ ko ni na nibii ni ba lɛ ŋma lɛ. Yoshua kai enyɛmimɛi Israelbii lɛ akɛ: “Nyɛle yɛ nyɛtsui mli fɛɛ kɛ nyɛsusuma mli fɛɛ akɛ nibii kpakpai fɛɛ ni Yehowa, nyɛ-Nyɔŋmɔ lɛ, wie yɛ nyɛhewɔ lɛ, emli ekome folo ekaaa shi, fɛɛ eba mli eha nyɛ, emli ekome folo ekaaa shi.”—Yosh. 23:14.

6, 7. (a) Mɛni hewɔ esa akɛ osusu Yeremia gbalɛi lɛ ahe lɛ? (b) Mɛni baaye abua bo koni oná hekɛnɔfɔɔ yɛ sane ni oshiɛɔ lɛ mli?

⁶ Mɛni hewɔ esa akɛ oya nɔ osusu Yeremia gbalɛi lɛ ahe lɛ? Klɛŋklɛŋ lɛ, eyɛ yiŋtoo hewɔ ni ená nɔmimaa akɛ Yehowa wiemɔi lɛ baaba mli. Nɔ̃ ni ji enyɔ lɛ, gbalɛi ni Nyɔŋmɔ tsɔ Yeremia nɔ egba lɛ ekomɛi miiba mli amrɔ nɛɛ, ni ekrokomɛi hu yɛ ni kpaako obaana amɛmlibaa. Nɔ̃ ni ji etɛ lɛ, gbalɛi abɔ ni Nyɔŋmɔ tsɔ Yeremia nɔ egba, kɛ ekãa ni Yeremia kɛgba gbalɛi nɛɛ ha efee mɔ srɔto kwraa yɛ Nyɔŋmɔ tsuji ateŋ. Woloŋlelɔ ko ŋma akɛ: “Yeremia yɛ srɔto kwraa yɛ gbalɔi krokomɛi lɛ ahe.” Yeremia bafee gbalɔ ko ni he hiaa waa yɛ bɔ ni Nyɔŋmɔ kɛ ewebii lɛ ye eha lɛ mli aahu akɛ Yesu toibolɔi lɛ ateŋ mɛi komɛi yasusu akɛ eji Yeremia.—Mat. 16:13, 14.

⁷ Taakɛ eba lɛ yɛ Yeremia gbɛfaŋ lɛ, bo hu oyɛ be ko ni Biblia gbalɛi ni he hiaa waa miiba mli lɛ mli. Ni taakɛ Yeremia fee lɛ, esa akɛ oya nɔ oná hekɛnɔfɔɔ akɛ Nyɔŋmɔ yeɔ eshiwoi anɔ. (2 Pet. 3:9-14) Te ooofee tɛŋŋ ofee nakai? Esa akɛ oya nɔ owaje hekɛnɔfɔɔ ni oyɔɔ akɛ Nyɔŋmɔ gbalɛ Wiemɔ lɛ baa mli kwraa lɛ. Belɛ, wɔbaasusu gbalɛi ni atsɔ Yeremia nɔ akɛha lɛ ateŋ nɔ̃ ni ena amɛmlibaa lɛ ahe yɛ yitso nɛɛ mli. Ekrokomɛi hu ni wɔbaasusu he lɛ ba mli yɛ Yeremia gbele sɛɛ. Ni ekomɛi yɛ ni saa ohe amrɔ nɛɛ, ni ebaasa owɔsɛɛ hu he. Ha gbalɛi ni wɔbaasusu he nɛɛ awaje hekɛnɔfɔɔ ni oyɔɔ yɛ Yehowa gbalɛ Wiemɔ lɛ mli lɛ, bɔni afee ni hekɛnɔfɔɔ ni oyɔɔ akɛ ‘ebaatsu yiŋ ni eto lɛ he nii’ lɛ mli awa fe tsutsu lɛ.—Yaafo 2:17.

8, 9. Mɛni ji nɔ̃ kome ni haa esoroɔ Biblia lɛ kwraa?

⁸ Mɛi babaoo bɔɔ mɔdɛŋ akɛ amɛgba nɔ̃ ni baaba wɔsɛɛ. Amɛteŋ mɛi komɛi ji guɔyeli he nilelɔi, maŋkwralɔi, klamɔfoi, kɛ kɔɔyɔŋ tsakemɔ he nilelɔi. Ŋwanejee ko bɛ he akɛ, bo diɛŋtsɛ ona bɔ ni ebɛ mlɛo akɛ oootsɔɔ nɔ̃ ni baaba yɛ gbii loo otsii fioo komɛi po amli lɛ. Shi, nibii ni haa esoroɔ Biblia lɛ kwraa lɛ ateŋ ekome ji bɔ ni egbalɛi lɛ baa mli pɛpɛɛpɛ lɛ. (Yes. 41:26; 42:9) Nibii ni Yeremia gba lɛ, kɛji ekɔɔ nɔ̃ ko ni baaba mli yɛ ebeaŋ lɛ he jio, ekɔɔ nɔ̃ ko ni baaba mli wɔsɛɛ he jio lɛ, fɛɛ ja. Gbalɛi nɛɛ babaoo kɔɔ aŋkroaŋkroi kɛ majimaji ahe. Klɛŋklɛŋ lɛ, ha wɔsusu fioo komɛi ni ba mli yɛ Yeremia beaŋ lɛ ahe wɔkwɛ.

⁹ Ŋmɛnɛ lɛ, namɔ baanyɛ atsɔɔ bɔ ni je lɛ shihilɛ baaji eha yɛ biɛ afi kome loo afii enyɔ mli? Akɛ nɔkwɛmɔnɔ lɛ, mɛɛ majimaji ateŋ saji ahe nilelɔ ko baanyɛ agba akɛ abaatsake nɔyelɔ ko, ni nakai gbalɛ lɛ baaba mli fitsofitso? Nyɔŋmɔ kɛ mumɔ tsirɛ Yeremia ni egba bɔ ni Babilon baaná maji babaoo anɔ hewalɛ lɛ efɔ̃ shi. Yeremia gba akɛ Yehowa baaha Babilon atsɔ tamɔ “shika kpulu,” ni ebaafɔse emlifu kɛjɛ mli eshwie Yuda kɛ maji ni bɛŋkɛ jɛmɛ lɛ, kɛ mɛi ni yɔɔ maji nɛɛ amli lɛ anɔ, ni ákɛ Babilon baanyɛ amɛnɔ ni amɛsɔmɔ lɛ. (Yer. 51:7) Nakai pɛpɛɛpɛ Yeremia kɛ eyinɔbii lɛ na.—Nyɛkɛtoa Yeremia 25:15-29; 27:3-6; 46:13 lɛ he.

10. Mɛni Yehowa gba yɛ Yuda maŋtsɛmɛi ejwɛ komɛi ahe?

¹⁰ Yehowa kɛ Yeremia tsu nii kɛtsɔɔ bɔ ni Yuda maŋtsɛmɛi ejwɛ komɛi anaagbee baaji aha. Nyɔŋmɔ gba yɛ Yehoahaz, loo Shalum ni ji Maŋtsɛ Yosia bi hii lɛ ateŋ ekome lɛ he akɛ, abaaŋɔ lɛ nom ni ekuŋ esɛɛ kɛbaŋ Yuda dɔŋŋ. (Yer. 22:11, 12) Nakai pɛpɛɛpɛ eba lɛ. (2 Maŋ. 23:31-34) Nyɔŋmɔ jaje akɛ abaafu Yehoiakim, mɔ ni baye Yehoahaz sɛɛ lɛ, “tamɔ afuɔ teji” lɛ. (Yer. 22:18, 19; 36:30) Biblia lɛ etsɔɔɔ gbɛ pɔtɛɛ nɔ ni etsɔ egbo loo nɔ̃ ni akɛ egbonyo lɛ fee, shi etsɔɔ akɛ egbele sɛɛ lɛ, ebi Yehoiakin baye esɛɛ be mli ni awo Yerusalem he ka lɛ. Yeremia gba akɛ abaaŋɔ Yehoiakin (ni ale lɛ hu akɛ Konia kɛ Yekonia lɛ) nom kɛya Babilon, ni ebaagbo yɛ jɛi. (Yer. 22:24-27; 24:1) Nakai pɛpɛɛpɛ eba lɛ. Ni Zedekia, ni ji naagbee maŋtsɛ lɛ hu? Yeremia gba akɛ abaaŋɔ Zedekia awo henyɛlɔi lɛ adɛŋ, ni amɛnaŋ lɛ mɔbɔ. (Yer. 21:1-10) Mɛni ba? Henyɛlɔi lɛ mɔ lɛ. Amɛgbegbee ebi hii bibii lɛ yɛ ehiɛ, ajwara ehiŋmɛii, ni akpala lɛ kɛtee Babilon, ni eyagbo yɛ jɛi. (Yer. 52:8-11) Hɛɛ, gbalɛi nɛɛ fɛɛ ba mli.

11. Namɔ ji Hanania, ni mɛni Yehowa gba yɛ ehe?

¹¹ Wɔkaneɔ yɛ Yeremia yitso 28 lɛ mli akɛ, Zedekia nɔyeli beaŋ lɛ, apasa gbalɔ Hanania gba gbalɛ ko ni kɛ nɔ̃ ni Yeremia gba ni kɔɔ Babilonbii ni baaye Yerusalem nɔ lɛ he lɛ kpãaa. Hanania ku ehiɛ eshwie Nyɔŋmɔ wiemɔ lɛ nɔ, ni ekɛɛ akɛ abaakumɔ kɔŋtso ni Nebukadnezar kɛfɔ̃ Yuda kɛ maji krokomɛi anɔ lɛ. Kɛlɛ, Yehowa tsɔ Yeremia nɔ ekpa Hanania amale lɛ he mama, ni esaa ema nɔ mi akɛ, Babilon baaye maji babaoo anɔ, ni ekɛshi sɛɛ akɛ, eshɛŋ afi ni apasa gbalɔ lɛ baagbo. Ni eba mli nakai pɛpɛɛpɛ.—Nyɛkanea Yeremia 28:10-17.

12. Te Yeremia yinɔbii lɛ fee amɛnii yɛ nɔ̃ ni egba yɛ Yerusalem hiɛkpatamɔ lɛ he amɛha tɛŋŋ?

¹² Anɔkwa, Yerusalem hiɛkpatamɔ lɛ ji gbalɛi ni Nyɔŋmɔ tsɔ Yeremia nɔ egba lɛ ateŋ otu. Yeremia bɔ kɔkɔ shii abɔ akɛ, kɛ́ Yudafoi lɛ tsakeee kɛjɛɛɛ amɛwɔŋjamɔ, yiwalɛ, kɛ jalɛsane hiɛ ni amɛtsɔɔ amɛbuɔ shi lɛ he lɛ, no lɛ butumɔ kɛ̃ abaabutu Yerusalem. (Yer. 4:1; 16:18; 19:3-5, 15) Yeremia yinɔbii lɛ ateŋ babaoo yasusu akɛ Yehowa efeŋ nɔ̃ ko tamɔ nakai. No mli lɛ, Nyɔŋmɔ sɔlemɔwe lɛ yɛ Yerusalem. Te aaafee tɛŋŋ eha akpãta nakai he krɔŋkrɔŋ lɛ hiɛ lɛ? Amɛsusumɔ naa lɛ, ebaŋ lɛ nakai kɔkɔɔkɔ. Shi, ole akɛ Yehowa maleee. Efee nɔ̃ ni eto eyiŋ akɛ ebaafee lɛ.—Yer. 52:12-14.

13. (a) Mɛɛ gbɛ nɔ wɔbe nɛɛ tamɔ Yeremia nɔ̃ lɛ? (b) Mɛni hewɔ esa akɛ osusu shi ni Nyɔŋmɔ wo aŋkroaŋkroi pɔtɛi komɛi ni hi shi yɛ Yeremia beaŋ lɛ ahe lɛ?

¹³ Ŋmɛnɛ lɛ, shihilɛ ni Nyɔŋmɔ webii lɛ yɔɔ mli lɛ tamɔ shihilɛ ni mɛi ni ye Yehowa anɔkwa yɛ Yeremia beaŋ lɛ hi mli lɛ nɔŋŋ. Wɔle akɛ etsɛŋ Yehowa kɛ amanehulu baaba mɛi fɛɛ ni kpoɔ ekɔkɔbɔi lɛ anɔ. Fɛɛ sɛɛ lɛ, wɔbaanyɛ wɔtsɛ wɔtsui wɔŋmɛ wɔmli yɛ Nyɔŋmɔ shiwoi lɛ ahewɔ, taakɛ Yeremia beaŋ Yudafoi ni mɔ anɔkwa jamɔ mli lɛ fee lɛ. Nyɔŋmɔ kɛɛ akɛ abaabaa Rekabbii lɛ ayi yɛ Yerusalem hiɛkpatamɔ lɛ mli, ejaakɛ amɛye Yehowa kɛ amɛblematsɛ lɛ kitai lɛ anɔ. Eba mli nakai. Sɛɛ mli lɛ, atsĩ tã akɛ, beni Nehemia yeɔ lumɔ lɛ, “Malkia, Rekab bi lɛ” ye ebua ni asaa Yerusalem, ni tsɔɔ akɛ abaa Rekabbii lɛ ayi lɛɛlɛŋ. (Neh. 3:14; Yer. 35:18, 19) Akɛni Ebed-Melek kɛ ehe fɔ̃ Nyɔŋmɔ nɔ, ni eye ebua Yeremia hewɔ lɛ, Yehowa ma nɔ mi eha lɛ akɛ lɛ hu akpataŋ ehiɛ. (Yer. 38:11-13; 39:15-18) Nakai nɔŋŋ Nyɔŋmɔ wo Yeremia hefatalɔ Baruk shi akɛ, ‘ebaaŋɔ esusuma eha lɛ akɛ haanɔ̃.’ (Yer. 45:1, 5) Te omuɔ sane naa yɛ bɔ ni gbalɛi nɛɛ naa yakpa eha lɛ he ohaa tɛŋŋ? Kɛ́ oye Yehowa anɔkwa lɛ, mɛni osusuɔ akɛ ebaafee kɛha bo?—Nyɛkanea 2 Petro 2:9.

14. Mɛni hewɔ Nyɔŋmɔ gbalɛ ni kɔɔ Babilon he lɛ sa kadimɔ waa lɛ?

¹⁴ Nyɔŋmɔ gba akɛ Nebukadnezar baaye Yuda kɛ Mizraim anɔ kunim. (Yer. 25:17-19) Akɛni Mizraim ji maŋ ko ni yɔɔ hewalɛ waa, ni no mli lɛ eeye Yuda nɔ po hewɔ lɛ, efee tamɔ nɔ̃ ni gbalɛ nɛɛ nyɛŋ aba mli kwraa. (2 Maŋ. 23:29-35) Yerusalem hiɛkpatamɔ lɛ sɛɛ lɛ, Yudafoi ni shwɛ lɛ kpɛ mli akɛ amɛbaashi amɛshikpɔŋ lɛ nɔ kɛyahi Mizraim, he ni amɛsusuɔ akɛ amɛhe baajɔ amɛ ni amɛbaahi shi shweshweeshwe yɛ lɛ. Kɔkɔ ni Yehowa bɔ amɛ akɛ amɛkashi Yuda, kɛ shi ni ewo amɛ akɛ kɛ́ amɛtee nɔ amɛhi Yuda lɛ ebaajɔɔ amɛ lɛ fɛɛ sɛɛ lɛ, amɛkpɛ mli akɛ amɛbaashi. Eha amɛle hu akɛ, kɛ́ amɛtee Mizraim lɛ, klante ni amɛjoɔ naa foi lɛ baatiu amɛ yɛ jɛmɛ. (Yer. 42:10-16; 44:30) Atsĩii tã yɛ woji ni Yeremia ŋmala lɛ amli akɛ ena beni Babilon tutua Mizraim lɛ. Shi anɔkwa sane ji akɛ, Israelbii ni yabɔ abo yɛ Mizraim lɛ na Yehowa gbalɛ nɛɛ mlibaa beni Babilonbii lɛ ye Mizraim nɔ kunim yɛ afi 500 D.Ŋ.B. afii lɛ amli lɛ.—Yer. 43:8-13.

15, 16. Mɛɛ gbɛ nɔ Nyɔŋmɔ gbalɛ ni kɔɔ ewebii lɛ akpɔmɔ lɛ he lɛ ná emlibaa?

¹⁵ Yeremia saa egba akɛ abaaye Babilon ni ye Mizraim nɔ lɛ hu nɔ kunim. Yeremia gba akɛ Babilon shigbeemɔ lɛ baaba lɛ trukaa, ni afii oha sɛɛ lɛ, eba mli nakai pɛpɛɛpɛ. Te etsɔɔ akɛ ebaaba lɛ eha tɛŋŋ? Nyɔŋmɔ gbalɔ lɛ gba akɛ, ‘abaamii’ Babilon nui ni buɔ ehe lɛ, ni ehii kãkãlɔi lɛ faŋ amɛhe. (Yer. 50:38; 51:30) Sɛɛ mli lɛ, Mediabii kɛ Persiabii gba gbɛ kroko amɛha Eufrate Faa lɛ, amɛnyiɛ amɛnane nɔ kɛfo faa lɛ beni emii bɔ ni sa, no sɛɛ lɛ, amɛbote maŋ lɛ mli beni Babilonbii lɛ ahiɛ bɛ amɛhe nɔ, ni amɛkɛwo gbalɛi nɛɛ obɔ. Ekã shi faŋŋ akɛ, obaana gbalɛ ni tsɔɔ akɛ Babilon baakã shi amaŋfɔ ni ahiŋ nɔ lɛ hu akɛ, eji gbalɛ ni sa kadimɔ waa. (Yer. 50:39; 51:26) Kɛbashi ŋmɛnɛ lɛ, bɔ ni Babilon, ni tsutsu ko lɛ eji maŋ ni yɔɔ hewalɛ waa lɛ kã shi amaŋfɔ lɛ maa nɔ mi akɛ Nyɔŋmɔ gbalɛi lɛ ja kɛmɔ shi.

¹⁶ Yehowa tsɔ Yeremia nɔ ejaje akɛ Yudafoi lɛ baasɔmɔ Babilonbii lɛ afii 70 sɔŋŋ. No sɛɛ lɛ, Nyɔŋmɔ kɛ ewebii lɛ baaku sɛɛ aya amɛshikpɔŋ lɛ nɔ ekoŋŋ. (Nyɛkanea Yeremia 25:8-11; 29:10.) Daniel ná hekɛnɔfɔɔ kwraa yɛ gbalɛ nɛɛ mli, ni edamɔ nɔ ebu be ni “Yerusalem amaŋfɔ lɛ” baaba naagbee. (Dan. 9:2) Ezra kɛɛ akɛ, ‘Bɔni afee ni Yehowa wiemɔ ní ewie yɛ Yeremia naa lɛ aba mli lɛ, Yehowa tsĩɛ Koresh, Persia maŋtsɛ [ni ye Babilon nɔ kunim] lɛ, mumɔ hiɛ’ koni eha Yudafoi lɛ aku sɛɛ aya amɛshikpɔŋ lɛ nɔ ekoŋŋ. (Ezra 1:1-4) Yeremia gba akɛ, Yudafoi ni baaku amɛsɛɛ lɛ baanya waa yɛ toiŋjɔlɛ ni eba amɛshikwɛ̃ɛhe lɛ nɔ lɛ hewɔ, ni amɛbaasaa amɛto anɔkwa jamɔ shishi ekoŋŋ.—Yer. 30:8-10; 31:3, 11, 12; 32:37.

17. Tsɔɔmɔ bɔ ni Yeremia wiemɔi akɛ ‘abaafo’ yɛ Rama lɛ baanyɛ akɔ nibii srɔtoi enyɔ ni ba lɛ he lɛ mli.

¹⁷ Yeremia gba gbalɛi hu ni ba mli yɛ egbele sɛɛ kwraa. Ekɛɛ akɛ: “Bɔ ni Yehowa kɛɛ nɛ: Anu gbee ko yɛ Rama, yarawoo kɛ yaafo ní mli wa; Rahel miifo ebi hii lɛ, ni ekpɛlɛɛɛ miishɛjemɔ yɛ ebi hii lɛ ahewɔ, ejaakɛ amɛbɛ!” (Yer. 31:15) Etamɔ nɔ̃ ni beni akpata Yerusalem hiɛ yɛ afi 607 D.Ŋ.B. lɛ sɛɛ lɛ, akɛ Yudafoi ni amɔmɔ amɛ yɛ ta lɛ mli lɛ tee Rama, ni ji maŋ ni yɔɔ Yerusalem kooyigbɛ ni ekɛ lɛ teŋ jekɛmɔ aaafee kilomitai 8 lɛ. Eeenyɛ efee po akɛ agbe Yudafoi nɛɛ ateŋ mɛi komɛi yɛ Rama. Enɛ ha gbalɛ nɛɛ ba mli klɛŋklɛŋ kwraa, oookɛɛ nɔ̃ ni Rahel miifo “ebi hii” ni gboi lɛ. Shi, nɔ̃ ni fa fe afii ohai ekpaa sɛɛ lɛ, Maŋtsɛ Herode ha agbegbee abifabii ni yɔɔ Betlehem lɛ. Sanekpakpa ŋmalɔ Mateo tsɔɔ mli akɛ, Yeremia gba bɔ ni mɛi baafo waa yɛ lashishwiemɔ kpele nɛɛ he.—Mat. 2:16-18.

18. Te Nyɔŋmɔ gbalɛ ni kɔɔ Edom he lɛ ba mli eha tɛŋŋ?

¹⁸ Awo gbalɛ kroko hu obɔ yɛ klɛŋklɛŋ afii 100 Ŋ.B. Nyɔŋmɔ tsɔ Yeremia nɔ egba akɛ, Edom fata maji ni Babilon baatutua amɛ lɛ ahe. (Yer. 25:15-17, 21; 27:1-7) Shi jeee no pɛ kɛkɛ Nyɔŋmɔ wie akɛ ebaaba Edom nɔ. Egba akɛ, Edom baatsɔ tamɔ Sodom kɛ Gomora. Ni ole nɔ̃ ni no tsɔɔ—ahiŋ nɔ dɔŋŋ, Edom ehiŋ shi dɔŋŋ. (Yer. 49:7-10, 17, 18) Nakai pɛpɛɛpɛ eba lɛ. Ŋmɛnɛ lɛ, nɛgbɛ osusuɔ akɛ abaana gbɛ́i ni ji Edom kɛ Edombii lɛ yɛ? Ani abaana yɛ map srɔtoi ni akɛtsuɔ nii bianɛ lɛ eko nɔ? Dabi. Anaa gbɛ́i nɛɛ titri yɛ woji ni wieɔ blema kɛ Biblia beaŋ yinɔsaji ahe lɛ amli loo yɛ map srɔtoi ni kɔɔ blema maji ahe lɛ anɔ. Flavius Josephus bɔ amaniɛ akɛ anyɛ Edombii lɛ anɔ yɛ afi 100 D.Ŋ.B. afii lɛ amli koni amɛkpɛlɛ Yuda jamɔ nɔ. No sɛɛ beni akpata Yerusalem hiɛ yɛ afi 70 Ŋ.B. lɛ sɛɛ lɛ, amɛshishi bule.

19. Mɛɛ gbɛ nɔ Yeremia wolo lɛ haa wɔnaa akɛ kɛ́ Nyɔŋmɔ gba yɛ nɔ̃ ko he lɛ, bɔ fɛɛ bɔ ni fee lɛ ebaaba mli?

¹⁹ Taakɛ obaanyɛ ona lɛ, gbalɛi ni kɔɔ aŋkroaŋkroi kɛ maji ahe eyi Yeremia wolo lɛ mli obɔ. Gbalɛi nɛɛ ateŋ kpotoo eba mli momo. Anɔkwa sane nɛɛ pɛ kɛkɛ hewɔ lɛ, esa akɛ oná Yeremia wolo lɛ he miishɛɛ, ni okase, ejaakɛ emaa nɔ̃ ko ni kɔɔ o-Nyɔŋmɔ ni he yɔɔ naakpɛɛ lɛ he lɛ nɔ mi. Yehowa efee nɔ̃ ni eto eyiŋ akɛ ebaafee lɛ, ni ebaasaa efee nakai ekoŋŋ. (Nyɛkanea Yesaia 46:9-11.) Enɛ baanyɛ awaje hekɛnɔfɔɔ ni oyɔɔ yɛ Biblia gbalɛi amli lɛ. Anɔkwa, Yeremia gbalɛi lɛ ekomɛi amlibaa lɛ saa bo kɛ owɔsɛɛ he tɛ̃ɛ. Ha wɔpɛi gbalɛi nɛɛ ekomɛi amli yɛ yitso nɛɛ kukuji ni eshwɛ lɛ amli wɔkwɛ.

20-22. Mɛni hewɔ abaanyɛ akɛɛ akɛ Biblia gbalɛi, ni Yeremia wolo lɛ mli gbalɛi komɛi fata he lɛ, baanyɛ aba mli fe shi kome lɛ? Okɛ enɛ he nɔkwɛmɔnɔ aha.

²⁰ Biblia gbalɛ ko baanyɛ aba mli fe shi kome. Hetoo ni Yesu kɛha ekaselɔi lɛ yɛ sane ni amɛbi yɛ ‘ebaa lɛ kɛ je nɛŋ naagbee lɛ he okadi’ lɛ he lɛ ba mli fe shi kome. (Mat. 24:3) Yesu gbalɛ lɛ ba mli yɛ afi 66 kɛyashi afi 70 Ŋ.B. Kɛlɛ, gbalɛ nɛɛ mli wiemɔi lɛ haa anaa faŋŋ akɛ, ebaaná emlibaa ekoŋŋ yɛ “amanehulu babaoo” ni baaba nibii agbɛjianɔtoo fɔŋ nɛɛ nɔ lɛ mli. Ebaafee amanehulu ni “anako nɔ dã kɛjɛ je lɛŋ shishijee mli kɛbashi ŋmɛnɛŋmɛnɛ, ni asaŋ anaŋ enɔ gbi ko gbi ko dɔŋŋ.” (Mat. 24:21) Yeremia gbalɛi lɛ ekomɛi hu ba mli fe shi kome. Gbalɛi nɛɛ ateŋ ekomɛi ná amɛ-klɛŋklɛŋ mlibaa yɛ afi 607 D.Ŋ.B., shi amɛbaaba mli ekoŋŋ yɛ egbele sɛɛ kwraa taakɛ wɔna yɛ gbalɛ ni kɛɔ akɛ “Rahel miifo ebi hii lɛ” he lɛ. (Yer. 31:15) Anɔkwa, Yeremia gbalɛi lɛ ekomɛi kɔɔ be ni oyɔɔ mli nɛɛ he, ni amɛmlibaa lɛ saa ohe tɛ̃ɛ.

²¹ Obaanyɛ ona enɛ yɛ Kpojiemɔ wolo lɛ mli. Nyɔŋmɔ mumɔ lɛ tsirɛ bɔfo Yohane ni ewie Yeremia gbalɛi ni kɔɔ Babilon naagbee ni ba yɛ afi 539 D.Ŋ.B. lɛ he lɛ he. Kpojiemɔ wolo lɛ haa wɔnaa akɛ nakai gbalɛi lɛ baaba mli ekoŋŋ yɛ gbɛ ni da nɔ. Yeremia gbalɛi ni ba mli yɛ wɔbe nɛɛ mli lɛ ateŋ ekome ji nɔ̃ ni kɔɔ nɔyeli kpele—“Babilon maŋ kpeteŋkpele,” ni ji apasa jamɔi fɛɛ ni yɔɔ je lɛ mli—lɛ shigbeemɔ lɛ he lɛ. (Kpoj. 14:8; 17:1, 2, 5; Yer. 50:2; 51:8) Ehe baahia ni Nyɔŋmɔ webii lɛ ‘aje Babilon maŋ kpeteŋkpele lɛ mli’ koni amɛkaná ehaomɔi lɛ eko. (Kpoj. 18:2, 4; Yer. 51:6) Babilon maŋ lɛ mli nui lɛ, ni damɔ shi kɛha emaŋbii lɛ, loo ejamɔŋbii lɛ, ‘baatã.’—Yer. 51:36; Kpoj. 16:12.

²² Nɔ̃ ni eshwɛ ni baaba mli lɛ ji, Nyɔŋmɔ shiwoo akɛ ebaatɔ apasa jamɔ nɔ owele yɛ niseniianii ni efeɔ Nyɔŋmɔ webii lɛ hewɔ. Yehowa ‘baawo lɛ nyɔmɔ yɛ enitsumɔi lɛ anaa.’ (Yer. 50:29; 51:9; Kpoj. 18:6) Kɛfata he lɛ, mfonirifeemɔŋ shikpɔji ni apasa jamɔ yeɔ nɔ lɛ baatsɔmɔ amaŋfɔi.—Yer. 50:39, 40.

23. Mɛɛ gbalɛ ni Yeremia gba yɛ anɔkwa jamɔ he lɛ ba mli yɛ afi 1900 afii lɛ amli?

²³ Taakɛ ekolɛ okadi momo lɛ, Yeremia gbalɛi lɛ haa anáa hiɛnɔkamɔ hu. Egba akɛ abaasaa ato anɔkwa jamɔ shishi yɛ shikpɔŋ lɛ nɔ yɛ wɔbei nɛɛ amli. Taakɛ akpɔ̃ nomii, ni ji Yudafoi lɛ, kɛjɛ blema Babilon maŋ lɛ mli lɛ, nakai nɔŋŋ beni ato Maŋtsɛyeli lɛ shishi yɛ ŋwɛi lɛ sɛɛ lɛ, akpɔ̃ Nyɔŋmɔ webii ni yɔɔ ŋmɛnɛ lɛ kɛjɛ Babilon Kpeteŋkpele lɛ mli. Mumɔŋ shishinumɔ naa lɛ, Yehowa to anɔkwa jamɔ shishi ekoŋŋ kɛha ewebii lɛ, ni no ha amɛmii shɛ amɛhe ni amɛda lɛ shi. Ejɔɔ mɔdɛŋ ni amɛbɔɔ kɛyeɔ amɛbua mɛi krokomɛi koni amɛbajá lɛ, ni amɛbaye mumɔŋ niyenii kpakpa lɛ anɔ. (Nyɛkanea Yeremia 30:18, 19.) Agbɛnɛ hu, ŋmɛnɛ lɛ, bo diɛŋtsɛ oyɔse akɛ Yehowa eye eshiwoo akɛ ebaaha ewebii lɛ tookwɛlɔi, ni ji hii ni edara yɛ mumɔŋ ni kwɛɔ etooku lɛ ni amɛbuɔ amɛhe, lɛ nɔ.—Yer. 3:15; 23:3, 4.

24. Mɛɛ Yeremia wiemɔi ni yɔɔ hiɛdɔɔ baaba mli wɔsɛɛ?

²⁴ Yeremia wie Yehowa shiwoo akɛ ekɛ nibii kpakpai baajɔɔ enɔkwafoi lɛ, kɛ kɔkɔ ni ebɔ akɛ ekɛ hiɛkpatamɔ baaba mɛi ni amɛkɛ lɛ teŋ bɛ jogbaŋŋ lɛ anɔ lɛ he yɛ wiemɔi ni ekɛha Nyɔŋmɔ webii ni hi shi yɛ blema lɛ amli. Nakai nɔŋŋ eji ŋmɛnɛ. Ekã shi faŋŋ akɛ, hiɛdɔɔ ni esa akɛ wɔkɛtsu kɔkɔbɔɔ ni yɔɔ Yeremia wiemɔi ni nyiɛ sɛɛ nɛɛ mli lɛ he nii lɛ yɛ faŋŋ; ekɛɛ akɛ: “Mɛi ní Yehowa aaagbe yɛ nakai gbi lɛ nɔ lɛ aaakamɔ shi kɛaajɛ shikpɔŋ lɛ naagbeehe kome kɛaatee shikpɔŋ lɛ naagbeehe kroko lɛ; afeŋ amɛyara, abuaŋ amɛnaa, ni asaŋ afuŋ amɛ: amɛaatsɔ tumu yɛ shikpɔŋ lɛ nɔ.”—Yer. 25:33.

25. Mɛɛ sɔ̃ kã Nyɔŋmɔ webii lɛ anɔ ŋmɛnɛ?

²⁵ Hɛɛ, taakɛ eba lɛ yɛ Yeremia gbɛfaŋ lɛ, wɔyɛ jaramɔ bei amli. Mɛi anifeemɔ yɛ Yehowa wiemɔ lɛ he baanyɛ atsɔ wala loo gbele sane kɛha amɛ taakɛ eba lɛ yɛ ebeaŋ lɛ. Nyɔŋmɔ webii ni yɔɔ ŋmɛnɛ lɛ jeee gbalɔi. Akɛ mumɔ tsirɛko wɔ koni wɔkɛ nɔ̃ ko afata Yehowa anɔkwa wiemɔi ni ja kɛmɔ shi ni yɔɔ Biblia lɛ mli lɛ ahe. Kɛlɛ, afã wɔ koni wɔkãhe wɔshiɛ Maŋtsɛyeli lɛ he sanekpakpa lɛ kɛyashi nibii agbɛjianɔtoo nɛɛ naagbee. (Mat. 28:19, 20) Ŋwanejee ko bɛ he akɛ, wɔsumɔŋ ni ‘wɔju Yehowa wiemɔi lɛ,’ kɛtsɔ nɔ̃ ni baaba lɛ ni wɔhaŋ mɛi ale lɛ nɔ. (Nyɛkanea Yeremia 23:30.) Wɔtswa wɔfai shi akɛ, wɔbaŋ henumɔ kɛ hewalɛ ni yɔɔ Nyɔŋmɔ wiemɔ lɛ mli lɛ shi kɔkɔɔkɔ. Gbalɛi ni Nyɔŋmɔ tsɔ Yeremia nɔ egba lɛ ateŋ kpotoo eba mli momo. Enɛ haa wɔnáa nɔmimaa akɛ, bɔ fɛɛ bɔ ni fee lɛ gbalɛi krokomɛi ni eshwɛ lɛ hu baaba mli. Esa akɛ wɔha mɛi ale akɛ, kɛ́ klaŋ tere okpɛlɛm tete po lɛ, Nyɔŋmɔ baaha ‘yiŋ ní eto, kɛ ewiemɔ ní ewo he kita kɛjɛ blema beebe lɛ’ aba mli.—Yaafo 2:17.

26. Mɛɛ gbalɛ kroko eshwɛ ni wɔbaasusu he?

²⁶ Kɛ́ wɔsusuuu Yehowa shiwoi ni yɔɔ nyam ni kɔɔ “kpaŋmɔ hee,” ni ji mlai ni ebaaŋmala yɛ ewebii lɛ atsuii anɔ, ni ekɛ amɛ fee lɛ he lɛ, belɛ wɔnyɛŋ wɔkɛɛ akɛ wɔnyɛ wɔsusu Yeremia nitsumɔ akɛ gbalɔ kɛ sane ni eshiɛ lɛ he jogbaŋŋ kɛmɔ shi. (Yer. 31:31-33) Gbalɛ nɛɛ kɛ emlibaa lɛ, ni saa ohe tɛ̃ɛ lɛ, ji sane ni wɔbaasusu he yɛ yitso ni nyiɛ sɛɛ lɛ mli.