Yitso 14

Nyɔŋmɔ Maŋtsɛyeli Lɛ Shishibii Ni Yɔɔ Shikpɔŋ Nɔ

 1, 2. (a) Abu naa akɛ jeŋ gbɔmɛi ayifalɛ lɛ baafee enyiɛ yɛ 1914 Ŋ.B., ni ajara mli awo mɛni mli? (b) Kɛ akwɛ nakai Jeŋmaji kɛ maŋtsɛyelii ni yɔɔ je lɛ mli lɛ te anaa tɛŋŋ, shi te Bɔlɔ lɛ naa amɛ tɛŋŋ?

¹ ABU gbɔmɛi ayifalɛ ni yɔɔ je lɛ mli lɛ anaa akɛ efe gbɔmɛi akpekpei akpea yɛ afi 1914 Ŋ.B. ni akadi lɛ mli. No mli lɛ yifalɛ lɛ miiya nɔ ni eyashɛ 1,859,892,000 beni aaashɛ afi 1920, yɛ gbɔmɛi akpekpei abɔ ni Jeŋ Ta I kɛ Spania Influenza lɛ folɔ amɛ shwie lɛ fɛɛ sɛɛ. Ajara nɛkɛ jeŋ gbɔmɛi ayifalɛ nɛɛ mli awo maji kɛ maŋtsɛyelii amli, ni maŋtsɛyeli ni da fe fɛɛ yɛ 1914 ji Ŋleshi Maŋtsɛyeli, ni edalɛ shɛɔ shikpɔŋ lɛ mlijaa ejwɛ mli ekome kɛ jeŋ gbɔmɛi ayifalɛ mlijaa ejwɛ mli ekome lɛ. Shi maŋtsɛyelii komɛi yɛ nakai be lɛ mli, tamɔ Turkey Maŋtsɛyeli, China Maŋtsɛyeli, Dutch Maŋtsɛyeli, French Maŋtsɛyeli, German Maŋtsɛyeli, Austro-Hungary Maŋtsɛyeli, Portuguese Maŋtsɛyeli. Nɛkɛ jeŋmaji kɛ maŋtsɛyelii nɛɛ baa bɔ ni jeŋ shihilɛ yɔɔ lɛ feɔ fɛo, shi te shikpɔŋ lɛ Nɔtsɛ, Bɔlɔ kpeteŋkpele Ŋwɛi Flooflo Nyɔŋmɔ lɛ naa amɛ ehaa tɛŋŋ? Ani ebaanyɛ ekɛ amɛ kwɛmɔ kome pɛ ana bɔ ni amɛyɔɔ? Beni gbalɔ Yesaia jieɔ Bɔlɔ lɛ hewalɛ kɛ nyɛmɔ ni fe adesa nɔ lɛ yi lɛ ekɛɛ akɛ:

² “Namɔ kaa Yehowa mumɔ lɛ ekwɛɔ, ni mɛɛ ŋaawolɔ tsɔɔ lɛ nii? Namɔ ekɛtoɔ ajina, ni etsɔɔ lɛ nii, ni etsɔɔ lɛ kojomɔ gbɛ, ni etsɔɔ lɛ nilee, ni ehaa eleɔ sanesɛɛkɔmɔ gbɛ? Naa, jeŋmaji lɛ tamɔ nukuli yɛ blagee he, ni abuɔ amɛ tamɔ mulu kuli ni kpɛtɛ nseni he. . . . Lɛ eta shikpɔŋ lɛ yiteŋ ati lɛ nɔ, ni enɔ bii lɛ tamɔ agai.”​—Yes. 40:​13-15, 22.

 3, 4. (a) Ani jeŋmaji fɛɛ anaabuamɔ yɛ ehiɛ lɛ ji nɔ ko ni wa kɛha Nyɔŋmɔ Kojolɔ Sɛɛyelɔ, Yesu Kristo lo, ni agba enɛ yɛ mɛɛ abɛbua mli? (b) Nɛkɛ abɛbua nɛɛ tsɔɔ akɛ mɛni ataoɔ yɛ gbɔmɛi ni kpaa mɛni gbɛ lɛ ateŋ?

³ Belɛ shishinumɔ yɛ mli akɛ ewaaa kwraa akɛ Nyɔŋmɔ ni ji Bɔlɔ lɛ aaanyɛ abua jeŋmaji fɛɛ anaa yɛ ehiɛ ni ekojo amɛ ni etsu kojomɔ lɛ he nii eshi amɛ. Nakai nɔŋŋ hu ewaaa akɛ Nyɔŋmɔ Bi, Yesu Kristo ni he wa ni Yehowa Nyɔŋmɔ ehala lɛ akɛ etsu nii akɛ Kojolɔ Sɛɛyelɔ lɛ aaafee enɛ. (Bɔf. 17:31) Ákɛ ebaafee nɛkɛ nii nɛɛ nɔŋŋ kɛ be lɛ shɛ lɛ, Nyɔŋmɔ Bi lɛ diɛŋtsɛ gba enɛ efɔ shi yɛ ebɛbua ni kɔɔ gwantɛŋi lɛ kɛ abotiai lɛ ahe lɛ mli. Abɛbua nɛɛ ji nɔ ni kɛ Nuŋtsɔ Yesu Kristo gbalɛ ni ekɛha yɛ Mugɔŋ lɛ nɔ ni bɔfo Mateo ŋma ni kɔɔ ba ni eba (parousia) lɛ kɛ “nibii agbɛjianɔtoo lɛ naagbee” he “okadi” lɛ he lɛ ba naagbee. (Mat. 24:​3, NW) Nuŋtsɔ Yesu Kristo fee nɔkwɛmɔ nɔ yɛ abɛbua ni tsɔ enɛ hiɛ, ni ji “talentai” lɛ ahe abɛbua lɛ mli akɛ esa akɛ kaselɔi anɔkwafoi ni kɛ lɛ baaye maŋtsɛ yɛ eŋwɛi maŋtsɛyeli lɛ mli lɛ atsu nii waa yɛ be mli ni amɛyɔɔ shikpɔŋ nɛɛ nɔ lɛ, bɔni afee ni “enibii” lɛ afa. Belɛ yɛ gbɛ ni ja nɔ abɛbua ni nyiɛ sɛɛ lɛ fee nɔ ni ataoɔ yɛ mɛi ni ŋmɛnɛ amɛbaahi wala mli akɛ eŋwɛi maŋtsɛyeli lɛ shishibii lɛ adɛŋ lɛ he nɔkwɛmɔ nɔ lɛ. Eje abɛbua lɛ shishi akɛ:

⁴ “Shi beni gbɔmɔbi lɛ aaaba yɛ enunyam lɛ mli, ni bɔfoi krɔŋkrɔŋi lɛ fɛɛ aaafata ehe lɛ, no mli lɛ eeeta enunyam sɛi lɛ nɔ; ni aaabua jeŋmaji lɛ fɛɛ naa yɛ ehiɛ, ni eeegbala amɛmli, taakɛ bɔ ni tookwɛlɔ gbalaa gwantɛŋi kɛ abotiai amli lɛ. Ni eeeŋɔ gwantɛŋi lɛ edamɔ eninejurɔ nɔ, shi abotiai lɛ, eeeŋɔ amɛ edamɔ ebɛku nɔ.”​—Mat. 25:​31-33.

 5, 6. (a) Te Yesu tsɛ ehe tɛŋŋ yɛ egbalɛ lɛ mli? (b) Mɛni ji nɔ ni enɛ kaiɔ wɔ yɛ Daniel gbalɛ lɛ mli, yɛ yitso kpawo?

⁵ Dani ekɛ nɛkɛ abɛbua nɛɛ aaaha lɛ, no mli lɛ Yesu ewie lɛ diɛŋtsɛ ehe shii kpawo akɛ “gbɔmɔbi.” (Mat. 24:​27, 30, 37, 39, 44; 25:13) Akɛni ekɛ nɛkɛ gbɛi nɛɛ tsu nii ekɛto Mesia maŋtsɛyeli lɛ he hewɔ lɛ, bɔ ni akɛtsu nii yɛ biɛ lɛ sa jogbaŋŋ. Ekɛ nitsumɔ yɛ biɛ lɛ kaiɔ wɔ gbalɛ ni yɔɔ Daniel 7:​9, 10, 13, 14, heni wɔkaneɔ yɛ akɛ:

⁶ “Akɛ maŋtsɛsɛii bamamɔ shi, ni mɔ ni eye gbii pii lɛ ho ta shi. . . . Mɛi akpeiakpei sɔmɔɔ lɛ, ni mɛi akpei nyɔŋma-nyɔŋma toi akpei nyɔŋma damɔ ehiɛ. Kojolɔi lɛ ho tara shi, ni agbele woji anaa. Misaa mina yɛ nyɔɔŋ ninaa lɛ mli, ni naa, mɔ ko tamɔ gbɔmɔbi kɛ ŋwɛi atatui miiba, ni eba Mɔ Ni Eye Gbii Pii lɛ ŋɔɔ, ni akɛ lɛ ba ehiɛ; ni aha lɛ nɔyeli kɛ anunyam kɛ maŋtsɛyeli, koni majimaji kɛ asafoi kɛ wiemɔi lɛ fɛɛ asɔmɔ lɛ, enɔyeli lɛ naanɔ nɔyeli ni hoŋ eyaŋ ni, ni emaŋtsɛyeli lɛ nɔ ni fiteŋ ni.”

 7. Mɛɛ be mli Yesu Kristo ni ebɔfoi lɛ fata ehe lɛ bata shi yɛ “enunyam maŋtsɛsɛi lɛ nɔ,” ni mɛni aku sɛɛ ato ama shi ekoŋŋ?

⁷ Eyɛ mli akɛ enɛ ba yɛ ŋwɛi ni adesai ahiŋmɛii enaa moŋ, shi kɛ̃ lɛ afi 1914, yɛ “Jeŋmaji Abei” (aloo “majimaji abe ni ato”) lɛ naagbee dani “gbɔmɔbi” lɛ na hegbɛ etee Mɔ Ni Eye Gbii Pii, Yehowa Nyɔŋmɔ ŋɔɔ, ni nɔ ni akɛha “gbɔmɔbi” lɛ yɛ jɛmɛ ji “nɔyeli kɛ anunyam kɛ maŋtsɛyeli.” No hewɔ lɛ, Jeŋmaji Abe lɛ naagbee yɛ 1914 ji be ni Nuŋtsɔ Yesu, ákɛ gbɔmɔ-Bi lɛ ba ni ebɔfoi lɛ fɛɛ fata ehe ni eta shi yɛ “enunyam maŋtsɛsɛi lɛ nɔ.” No hewɔ lɛ nɛkɛ be mli afɔ Nyɔŋmɔ Mesia maŋtsɛyeli lɛ yɛ ŋwɛi. (Kpoj. 12:​5, 10) Eji David maŋtsɛyeli lɛ, ni ye nɔ yɛ Yerusalem ni Babilon maŋtsɛ Nebukadnezar butu lɛ yɛ afi 607 D.Ŋ.B. lɛ ni aku sɛɛ ato ama shi ekoŋŋ. No hewɔ lɛ nɔ ni ba yɛ afi 1914 Ŋ.B. lɛ ji nɔ ni ba yɛ afi 607 D.Ŋ.B. lɛ tsakemɔ. Amrɔ nɛɛ, David seshinyo miiye maŋtsɛ ekoŋŋ.

 8. Yɛ nɔ ni ba yɛ afi 607 D.Ŋ.B, lɛ hewɔ lɛ, mɛni hewɔ eji nii ni ja akɛ aaabua Jeŋmaji lɛ fɛɛ anaa yɛ gbɔmɔ Bi ni ta maŋtsɛsɛi nɔ lɛ hiɛ yɛ afi 1914 Ŋ.B.?

⁸ Nakai be lɛ mli Nuŋtsɔ Yesu Kristo “ba ni eba” loo parousia lɛ je shishi. No hewɔ lɛ, nɔ ni atsɔɔ mli yɛ gwantɛŋi lɛ kɛ abotiai lɛ ahe abɛbua lɛ mli lɛ baa mli yɛ eparousia be lɛ mli. Nɔ ni fata enɛ he ji jeŋmaji lɛ fɛɛ anaabuamɔ yɛ lɛ ni ji Maŋtsɛ ni ta emaŋtsɛsɛi lɛ nɔ lɛ hiɛ. Nii ni sa akɛ aba yɛ gbɛ ni ja nɔ nɛ. Mɛni hewɔ? Ejaakɛ ‘Jeŋmaji Abe ni ato lɛ’ lɛ eba naagbee. (Luka 21:24) Nakai jeŋmaji lɛ ye shikpɔŋ muu lɛ fɛɛ nɔ ni Nyɔŋmɔ Mesia maŋtsɛyeli ko kɛ ehe wooo amɛsaji amli. Gbalɛ “bei” kpawo sɔŋŋ. Yɛ Biblia naa lɛ, gbalɛ be tsɔɔ gbii 360 aloo yɛ okadi gbɛ nɔ lɛ afii. Agbɛnɛ nɛkɛ gbalɛ “bei” kpawo nɛɛ ji nɔ ni yɔɔ. Enɛ tsɔɔ afii 2,520 (7 × afii 360) . Nɛkɛ be kakadaŋŋ nɛɛ mli jeŋmaji lɛ kɛye shikpɔŋ muu lɛ fɛɛ nɔ. Amɛnaanaa hegbɛ ni Nyɔŋmɔ Mesia Maŋtsɛyeli lɛ yɔɔ akɛ eye Jeŋ muu fɛɛ nɔ lɛ nɔ yɛ nakai be lɛ mli. Kɛji akɛ akane afii 2,520, kɛjɛ 1914 Ŋ.B. kɛtee sɛɛ lɛ, ekɛwɔ baa afi 607 D.Ŋ.B. No ji be mli ni Babilon maŋtsɛ Nebukadnezar batsɔ jeŋ nɔyelɔ kɛtsɔ Maŋtsɛ David nɔyeli ni yeɔ nɔ yɛ Yerusalem lɛ butumɔ nɔ.​—Ezek. 21:⁠32.

 9. (a) Akɛni Nebukadnezar “bei kpawo” he lamɔ lɛ ba beni ena jeŋ hewale lɛ sɛɛ nɔ ni fe afi hewɔ lɛ, ani enɛ tsɔɔ akɛ Jeŋmaji Abei lɛ nyɛŋ aje shishi kɛyashi be mli ni lamɔ lɛ aaaba mli diɛŋtsɛ yɛ enɔ? (b) Kɛji akɛ akane “bei kpawo” lɛ kɛjɛ beni Babilon gbee shi yɛ Mediabii lɛ kɛ Persiabii lɛ ahiɛ lɛ sɛɛ kɛyaa lɛ, mɛɛ be ebaaba naagbee, ni mɛni ji nɔ ni esa akɛ eba yɛ nakai be lɛ mli?

⁹ No hewɔ lɛ Jeŋmaji anɔyeli ni ji “bei kpawo” lɛ je shishi yɛ 607 D.Ŋ.B. shi kɛ̃ lɛ, yɛ afi kwraa sɛɛ dani Maŋtsɛ Nebukadnezar ni jɛ Babilon la lamɔ ni kɔɔ “bei kpawo” lɛ he. (Dan. 4:​16, 23, 25, 32) Nɔ kroko nɛ: nɛkɛ lamɔ nɛɛ ba mli diɛŋtsɛ yɛ Nebukadnezar nɔ yɛ be mli ni eye sɛkɛ (afii) “bei kpawo” diɛŋtsɛ lɛ ni ekpe jwɛi tamɔ tsina yɛ ŋa nɔ lɛ. Ani enɛ tsɔɔ akɛ Jeŋmaji anɔyeli ni he “bei kpawo” lɛ nyɛŋ aje shishi yɛ afi 607 D.Ŋ.B., dani gbalɛ lamɔ lɛ aje shishi? Ani esa akɛ nakai Jeŋmaji Abei lɛ aje shishi yɛ be mli ni maŋtsɛ lɛ jwɛŋmɔ eba enɔ ekoŋŋ kɛjɛ nakai afii kpawo sɛkɛyeli lɛ mli? Dabi! No hewɔ lɛ akɛni aleee be mli ni ena hewalɛ ekoŋŋ hewɔ lɛ enɛ biii ni nakai Jeŋmaji anɔyeli “bei kpawo” lɛ aje shishi yɛ Nebukadnezar nɔyeli lɛ shigbeemɔ yɛ afi 539 D.Ŋ.B. Kɛji akɛ wɔkane gbalɛ “bei kpawo” (afii 2,520) lɛ kɛjɛ beni Babilon gbee shi yɛ Mediabii kɛ Persaibii lɛ ahiɛ yɛ 539 D.Ŋ.B. lɛ, belɛ nakai “bei kpawo” lɛ baaba naagbee yɛ afi 1982 Ŋ.B. lɛ naagbee mli. Kɛ asusu he yɛ nɛkɛ gbɛ nɔ lɛ, belɛ mɛni ji nɔ ni esa akɛ akpa gbɛ akɛ ebaaba yɛ nakai afi lɛ mli? Nɔ ni teɔ shi woɔ loo ekɛ nɔ ni ba yɛ afi 539 D.Ŋ.B. kpaaa gbee, ni ji Maŋtsɛ Nebukadnezar odehei amaŋtsɛyeli lɛ ni aku sɛɛ ato ama shi ekoŋŋ, Babilonia maŋtsɛyeli lɛ kɛ Nebukadnezar seshinyo ni eku sɛɛ ebata maŋtsɛsɛi nɔ ekoŋŋ!

10. (a) Mɛni Biblia lɛ kɛɔ yɛ blema Babilon, Nebukadnezar odehei amaŋtsɛyeli lɛ kɛ Babilonia Maŋtsɛyeli lɛ ni aaaku sɛɛ ato ama shi ekoŋŋ he? (b) No hewɔ lɛ, mɛɛ be “bei kpawo” lɛ je shishi, ni mɛni abaato ama shi lɛ?

¹⁰ Shi kɛ̃ lɛ, enɛ kɛ nɔ ni Nyɔŋmɔ Wiemɔ ni jɛ mumɔŋ lɛ gba fɔ shi lɛ kpaaa gbee kwraa. Blema Babilon ni yɔɔ Eufrate Faa lɛ naa hiɛ ekpata kɛmiiya naanɔ! Abutu Maŋtsɛ Nebukadnezar odehei aweku lɛ kɛmiiya naanɔ. Babilonia Maŋtsɛyeli lɛ bɛ dɔŋŋ akɛ Jeŋ Hewalɛ ni ji Etɛ. Shi mɛni ji nɔ ni Yehowa Nyɔŋmɔ, ni mɛi ni yeɔ maŋtsɛ yɛ enajiaŋ lɛ maŋtsɛsɛi yɔɔ Yerusalem lɛ wo shi akɛ ebaaku sɛɛ ekɛba? No ji Mesia maŋtsɛyeli lɛ ni yɔɔ David seshinyo lɛ dɛŋ ni Nyɔŋmɔ ni yɔɔ ŋwɛi lɛ ewo shi akɛ ebaaku sɛɛ eto ema shi ekoŋŋ lɛ. (Ezek. 21:​32; Luka 1:​30-33) Yerusalem kɛ Yuda shikpɔŋ lɛ amaŋfo ni Babiloniabii lɛ kɛba yɛ afi 607 D.Ŋ.B. lɛ kadi David Mesia maŋtsɛyeli lɛ butumɔ, no hewɔ lɛ enɛ ji nɔ ni kadi “bei kpawo” ni Jeŋmaji lɛ kɛyeɔ adesai aje lɛ nɔ lɛ shishijee. No hewɔ lɛ Jeŋmaji Abei afii 2,520 ni anyɛŋ atsake lɛ je shishi yɛ nakai be lɛ mli, ni akɛni eje shishi yɛ jɛmɛ hewɔ lɛ, amɛba naagbee yɛ gbo shishijee mli yɛ afi 1914 Ŋ.B.

11. Nebukadnezar sɛkɛyeli afii kpawo yɛ be mli ni ebutu David maŋtsɛyeli lɛ sɛɛ lɛ tsɔɔ mɛni yɛ Jeŋmaji Abei lɛ he?

¹¹ No hewɔ lɛ, yɛ anɔkwale ni eji akɛ Maŋtsɛ Nebukadnezar sɛkɛyeli afii kpawo lɛ ba yɛ sɛɛ mli beni ebutu David maŋtsɛsɛi lɛ yɛ Yerusalem yɛ afi 607 D.Ŋ.B. hewɔ lɛ, ehaa wɔleɔ nakai Jeŋmaji Abei ni eje shishi momo lɛ sɛɛ jɛkɛmɔ kɛ be ni ebaaba naagbee. Jeŋ saji lɛ yeɔ odase akɛ fɛɛ ba naagbee yɛ 1914.

12. Beni “bei kpawo” lɛ ba naagbee yɛ 1914 lɛ, no mli lɛ be eshɛ ni Yesu Kristo baatsu mɛɛ ŋwɛi tsɛmɔ he nii?

¹² Beni yɛ nakai afi lɛ mli lɛ, “hei kpawo” ni Jeŋmaji lɛ kɛyeɔ je lɛ nɔ ni afooo amɛdaaŋ lɛ ba naagbee, ni akɛ “gbɔmɔbi” lɛ ba Mɔ ni Eye Gbii Pii lɛ hiɛ lɛ, no mli lɛ be eshɛ kɛha gbɔmɔ Bi ni yɔɔ ŋwɛi lɛ akɛ etsu gbalɛ ni akɛha yɛ Lala Enyɔ, kukuji kpawo kɛyashi nɛɛhu lɛ he nii: “Mashiɛ akpɔ ko ni awo akɛ: Yehowa ekɛɛ mi akɛ: mibi jio, ni mi mifɔo ŋmɛnɛ gbi nɛɛ! Bi mi, ni maŋɔ jeŋmaji lɛ mahao akɛ ogboshinii kɛ shikpɔŋ lɛ naagbeehei lɛ akɛ ogbɛfaŋnɔ! Oookumɔ amɛ kɛ dadetso, ooojwara amɛ tamɔ gbɛshɔlɔ gbɛ!”​—Kwɛmɔ Kpojiemɔ 12:5 hu.

[Shishigbɛ niŋmai]

April Daa Gbi Ŋmalɛ

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)