Ekome Ni Wɔfee Yɛ Jamɔ Mli Yɛ Wɔ-Tookwɛlɔ Kɛ Mantsɛ Lɛ Shishi
“Bɔ ni Nuŋtsɔ Yehowa kɛɛ nɛ: Naa, mayaŋɔ Israelbii Iɛ . . ., ni maŋtsɛ kome aaaye amɛ fɛɛ amɛnɔ maŋtsɛ.”—EZEKIEL 37:21, 22.
1, 2. (a) Ezekiel 37:16 tsei enyɔ lɛ damɔ shi kɛha mɛni? (b) Mɛni ba nɛkɛ “tsei” enyɔ nɛɛ anɔ?
1 MAŊTSƐYELI ekomefeemɔ, nakai wɔkɛɔ. Ni enɛ ja, ni ekɛ Ezekiel gbalɛ lɛ yitso 37 lɛ naagbee fã lɛ kpaa gbee. Jɛmɛ Yehowa kɛɔ Ezekiel, yɛ kuku 16 lɛ akɛ ekɔlɔ tsei enyɔ. Ebaaŋma yɛ ekome nɔ akɛ, “Yuda kɛ Israelbii ni fata ehe lɛ anɔ̃.” Ni ebaaŋmɛ yɛ ekroko lɛ nɔ akɛ, “Yosef nɔ̃, Efraim kɛ Israel we lɛ fɛɛ ni fata ehe lɛ tso.” Nɛkɛ tsei nɛɛ damɔ shi kɛha mɛni?
2 Amɛdamɔ shi kɛha Israel maŋtsɛyeli lɛ fai enyɔ, ni agbala mli afee lɛ Yuda ni yɔɔ wuoyigbɛ kɛ Efraim ni yɔɔ kooyigbɛ lɛ. Eko fɛɛ eko tee nomŋɔɔ mli—kooyigbɛ maŋtsɛyeli lɛ tee yɛ afi 740 D.Ŋ.B. ni wuoyigbɛ maŋtsɛyeli lɛ tee yɛ 607 D.Ŋ.B. Shi yɛ afi 537 D.Ŋ.B. lɛ, Israel akutsei 12 lɛ fɛɛ mli shwɛɛnii komɛi ku amɛsɛɛ amɛba Yerusalem, koni amɛbasaa amɛto Yehowa jamɔ ni efee ekome lɛ amɛma shi ekoŋŋ. Te atsɔɔ enɛ yɛ Ezekiel gbalɛ lɛ mli aha tɛŋŋ?
Amɛfee Ekome Yɛ Jamɔ Mli
3. Taakɛ Ezekiel 37:19 fee he nɔkwɛmɔ nɔ lɛ, mɛni esa akɛ ahi Yehowa webii ni esaa eto amɛ ekoŋŋ lɛ ateŋ?
3 Bó Yehowa wiemɔi kɛha Ezekiel lɛ toi, yɛ kuku 19 lɛ:
“Kɛɛmɔ amɛ akɛ: Bɔ ni Nuŋtsɔ Yehowa kɛɛ nɛ: Naa, mibaŋɔ Yosef tso lɛ ni yɔɔ Efraim dɛ̃ lɛ, kɛ Israel akutsei lɛ ni fata ehe lɛ, ni maŋɔ amɛ mafata Yuda tso lɛ he, ni mafee amɛ tso kome, ni amɛaafee ekome yɛ midɛŋ.”
Ani, esa akɛ ekomefeemɔ ahi Yehowa webii ni esaa eto amɛ ekoŋŋ lɛ ateŋ!
4. Mɛɛ gbɛ nɔ Ezekiel 37:21 ba mli (a) yɛ 537 D.Ŋ.B.? (b) yɛ ŋmɛnɛŋmɛnɛ beaŋ?
4 Nyɔŋmɔ webii gbalaŋ amɛmli amɛfɔŋ maji enyɔ, ni fa bii miiye kooyigbɛ maŋtsɛyeli lɛ anɔkwale ni fa hu miiye wuoyigbɛ nɔ̃ lɛ anɔkwale dɔŋŋ, shi moŋ amɛbaatsɔmɔ “maŋ kome yɛ shikpɔŋ lɛ nɔ.” Taakɛ Nyɔŋmɔ fa lɛ, Ezekiel kɛ wiemɔi ni ŋɔɔ shɛje amɛmii:
“Ni okɛɛ amɛ akɛ: Bɔ ni Nuŋtsɔ Yehowa kɛɛ nɛ: Naa, mayaŋɔ Israelbii lɛ kɛaajɛ jeŋmaji lɛ ateŋ he ni amɛtee lɛ, ni mabua amɛnaa kɛaajɛ he fɛɛ he kɛbakpe, ni mikɛ amɛ aaatee amɛ diɛŋtsɛ amɛshikpɔŋ nɔ; ni maŋtsɛ kome aaaye amɛ fɛɛ amɛnɔ maŋtsɛ.” (Ezekiel 37:21, 22)
Taakɛ bɔ ni nɛkɛ wiemɔi nɛɛ ba mli yɛ Israel shwɛɛnii ni amɛfee ekome lɛ anɔ yɛ be mli ni amɛkuɔ amɛsɛɛ kɛjɛɔ nom mli yɛ afi 537 D.Ŋ.B. kɛbaa lɛ, nakai nɔŋŋ hu ŋmɛnɛŋmɛnɛ beaŋ Odasefoi lɛ ateŋ shwɛɛnii ni afɔ amɛ mu ni ásaa ato amɛ gbɛjianɔ ekoŋŋ lɛ ena miishɛɛ yɛ ekome ni áfee amɛ yɛ amɛ mumɔŋ paradeiso shikpɔŋ ni shwereɔ lɛ nɔ lɛ mli ŋɔɔmɔ lɛ mli gbafaŋnɔ.—Kwɛmɔ Ezekiel 36:33-36 hu.
5. Átsuu Nyɔŋmɔ webii ahe kɛjɛ mujiwoo mli yɛ mɛɛ gbɛ nɔ?
5 Yɛ nakai beaŋ nɔŋŋ lɛ átsuu Nyɔŋmɔ webii lɛ ahe kɛjɛ mumɔŋ mujiwoo fɛɛ ni Satan jeŋ apasa jamɔ maŋtsɛyeli, “Babilon kpeteŋkpele” lɛ kɛba amɛnɔ lɛ mli. (Kpojiemɔ 17:5; 18:2, 4) Amɛkpɔmɔ kɛmiijɛ apasa jamɔ tsɔɔmɔi kɛ nifeemɔi amli lɛ ji gbalɛ ni ba mli yɛ blema Israel nɔ yɛ be mli ni akɛ amɛ jɛ Babilon diɛŋtsɛ ba ekoŋŋ lɛ mlibaa wulu yɛ ŋmɛnɛŋmɛnɛ beaŋ:
“Ni asaŋ amɛkɛ amɛwɔji lɛ loo amɛnihii nii lɛ loo amɛnɔtɔmɔi lɛ eko eko buleŋ amɛhe dɔŋŋ, shi moŋ mahere amɛyiwala kɛaajɛ amɛshihilɛ hei lɛ fɛɛ, hei ni amɛfee esha yɛ lɛ, ni matsuu amɛhe, ni amɛaatsɔ mimaŋ, ni amɛaato mikpɔi lɛ ni amɛye nɔ.”—Ezekiel 37:23.
6. (a) Mɛni hewɔ mumɔŋ Israel naa yitsoŋsane ni ekɛ e-Nyɔŋmɔ lɛ yeɔ lɛ mli ŋɔɔmɔ bianɛ lɛ? (b) Mɛɛ ekomefeemɔ esa akɛ wɔkɛ wɔhe akpɛtɛ he kɛ́ mɛi komɛi kpale kɛjɛ anɔkwale lɛ he po?
6 Yehowa webii ni eto amɛ gbɛjianɔ ekoŋŋ lɛ ejie Kristendom kɛ wɔŋjamɔ mli nibii ni ajaa lɛ kɛjɛ amɛhe amɛshwie. Amɛjaaa gbɔmɛi ni asaŋ amɛnyiɛɛɛ je lɛŋ jamɔi akusum nifeemɔi asɛɛ, tamɔ “gbijuji” ni gbeɔ Nyɔŋmɔ he guɔ lɛ asɛɛ dɔŋŋ. Amɛjaaa amɛjamɔ mli amɛhaaa nyɔŋmɔi etɛ ni feɔ ekome, naakpɛɛ Tiriniti ko ni akɛɛ eyɔɔ krɔŋkrɔŋ, shi moŋ amɛfee ekome akɛ gbɔmɛi kome ni jaa Nyɔŋmɔ kome, ni ji Yehowa. Amɛjieɔ Je Muu Fɛɛ Nuŋtsɔ lɛ yi yɛ ekomefeemɔ mli, ni enɛ fimɔɔ amɛ ni efeɔ amɛ ekome yɛ ekomefeemɔ ko ni gbɔmɛi ko bɛ shikpɔŋ nɔ ni le enɛ mli! (Yesaia 52:8) Kɛji akɛ wɔteŋ mɔ ko ni kɛwɔ bɔɔ tsutsu ná henilee gbonyo, ni ekpale kɛjɛ anɔkwalei babaoo ni abua naa ni Yehowa kɛha lɛ he lɛ, wɔ lɛ, wɔkɛ Nyɔŋmɔ gbɛjianɔtoo lɛ damɔɔ shi yɛ ekomefeemɔ mli yɛ enitsumɔ mli ni wɔkɛ wɔ-Nyɔŋmɔ lɛ yeɔ yitsoŋsane kɛ ŋɔɔmɔ.—Abɛi 3:32; Hebribii 10:22, 23.
Maŋtsɛ Lɛ Yɔsemɔ
7. Kɛ fata anɔkwale jamɔ he lɛ, mɛɛ hewalɛ krokro ni feɔ mɛi ekome awo shi yɛ he aha Nyɔŋmɔ webii?
7 Beni akɛ blema Israel ba ‘eshikpɔŋ’ nɔ ekoŋŋ lɛ, anɔkwale jamɔ bafee hewalɛ ko ni feɔ mɔ ekome yɛ amɛteŋ. Shi atooo maŋtsɛyeli lɛ amaaa shi ekoŋŋ. Belɛ mɛni hewɔ Yehowa wieɔ yɛ Ezekiel yitso 37, kukuji 22 kɛ 24 akɛ “maŋtsɛ” ko yeɔ amɛnɔ lɛ? Kukuji 24 kɛ 25 kaneɔ akɛ:
“Ni mitsulɔ David aaaye amɛnɔ maŋtsɛ, ni amɛ fɛɛ amɛaana tookwɛlɔ kome, ni amɛaanyiɛ mimlai lɛ amli, ni amɛaato mikpɔi lɛ ni amɛye nɔ. Ni amɛaahi shikpɔŋ ni miŋɔha mitsulɔ Yakob, ni nyɛtsɛmɛi lɛ hi nɔ lɛ nɔ, ni amɛaahi nɔ, amɛ kɛ amɛbii kɛ amɛbii abii kɛaatee naanɔ; ni mitsulɔ David aaaye amɛnɔ lumɔ kɛaatee naanɔ.”
8. (a) Mɛni hewɔ esa akɛ nɛkɛ kukuji nɛɛ akɔ mumɔŋ Israel he? (b) Te wɔfeɔ tɛŋŋ wɔleɔ emlibaa be lɛ pɔtɛɛ lɛ?
8 Nakai gbalɛ lɛ fa lɛ bako mli yɛ heloo naa Israel nɔ, ni asaŋ ebaŋ mli nakai yɛ enɔ hu. No hewɔ lɛ ekɔɔ mumɔŋ Israel he. Shi yɛ mɛɛ be? Ojogbaŋŋ, mɛɛ be mli maŋtsɛ ko ni hiɛ “mla naa gbɛnaa” ebata David maŋtsɛsɛi lɛ nɔ ekoŋŋ? Enɛ ba beni “jeŋmaji abe” lɛ ba naagbee yɛ ŋmɛnɛŋmɛnɛ beaŋ afi ni ji 1914 mli. Beni Jeŋmaji Abe lɛ fɛɛ tã lɛ, kɛkɛ ni “je nɛŋ maŋtsɛyeli lɛ . . . tsɔ wɔ-Nuŋtsɔ” Yehowa, “ni ebaaye maŋtsɛ kɛaatee naanɔi anaanɔ,” lɛ “kɛ e-Kristo lɛ,” Mɔ ni akɛ David fee ehe mfoniri lɛ “nɔ̃.”—Ezekiel 21:32, 33; Luka 21:24; Kpojiemɔ 11:15, NW.
9. Mɛni nibii enyɔ tsuɔ nii akɛ nii ni feɔ mɛi ekome ni yɔɔ diɛŋtsɛ?
9 No hewɔ lɛ, ŋmɛnɛ, jeee akɛ anɔkwale jamɔ efee wɔ Yehowa Odasefoi lɛ ekome kɛkɛ—ni jamɔ ni tamɔ nɛkɛ hu he miihia—shi áfee wɔ ekome yɛ wɔnaa ni ábua awo wɔ “Lumɔ” kɛ Maŋtsɛ lɛ shishi lɛ hewɔ! Wɔjamɔ kɛ Maŋtsɛyeli lɛ ji nibii ni yɔɔ diɛŋtsɛ kɛha wɔ. Ni enyɔ lɛ fɛɛ feɔ wɔ ekome yɛ wɔ jeŋ fɛɛ nyɛmifeemɔ lɛ mli.
10. (a) Te wɔbuɔ wɔ-Tookwɛlɔ kɛ Maŋtsɛ lɛ tɛŋŋ? (b) Te wɔtsuɔ Yehowa ‘jalɛ mlai’ lɛ ahe nii wɔhaa tɛŋŋ?
10 Kwɛ bɔ ni wɔsumɔɔ wɔ-Maŋtsɛ lɛ ha! Eji “kwɛlɔ kome” kɛha wɔ fɛɛ—Tookwɛlɔ ni mli jɔ ni nyiɛɔ wɔhiɛ kɛyaa naanɔ wala nui ahe. Ele wɔteŋ mɔ fɛɛ mɔ gbɛi ni eesumɔ ni etsɛ wɔ ni enyiɛ wɔhiɛ kɛya mumɔŋ lɛɛhei ni ŋɔɔ jogbaŋŋ lɛ amli. Shi taakɛ too ku yɔɔ lɛ, esa akɛ wɔhi shi akɛ mɛi ni afee amɛ ekome, ‘amɛnyiɛɔ yɛ Yehowa jalɛ mlai lɛ amli.’ Esa akɛ wɔtsi wɔhe kɛjɛ Satan gbɛjianɔtoo lɛ mli fai sɔrɔtoi etɛ nɛɛ ahe: emaŋkwramɔ ni ekpɔtɔ, hiɛjoomɔ jarayeli kɛ ejamɔ ni ji wɔŋjamɔ lɛ. Wɔtsɔɔ akɛ ‘wɔjɛɛɛ je lɛ mli’ yɛ ekomefeemɔ ni tamɔ Yesu kɛ emra be mli kaselɔi lɛ anɔ̃ lɛ mli ni wɔyɔɔ lɛ hewɔ. Ni nɔ ni fata enɛ he hu ji je lɛ jeŋba shara lɛ ni wɔɔtsi wɔhe kɛaajɛ he. (Yohane 17:14, 16, 20, 21; 18:36) Esaaa akɛ mligblamɔ baa wɔteŋ, yɛ be mli ni wɔtoɔ Yehowa akpɔi lɛ ni ‘wɔyeɔ nɔ’ lɛ.
11. Wɔshihilɛ gbɛ lɛ yɛ sɔrɔto yɛ je lɛŋ nyɔŋmɔjalɔi anɔ̃ he yɛ mɛɛ gbɛ nɔ?
11 Kwɛ bɔ ni shihilɛ gbɛ nɛɛ yɔɔ sɔrɔto kwraa ha yɛ je lɛŋ nyɔŋmɔi ajalɔi lɛ anɔ̃ he! Amɛ lɛ, amɛkplɛɔ nɔ̃ fɛɛ nɔ̃ nɔ. Amɛkpɛlɛɔ shihilɛ mli ni ayɔɔ ni aŋmɛɔ nɔ fɛɛ nɔfeemɔ gbɛ kɛ jeŋba shara gbɛ lɛ hu nɔ. Yɛ be babaoo mli lɛ amɛnaa mlai sɔrɔtoi amɛhaa mɛi ni hiɔ shi yɛ je lɛŋ hei sɔrɔtoi lɛ fɛɛ lɛ. Akɛ nɔkwɛmɔ nɔ lɛ, amɛkɛ amɛhe kpɛtɛɔ wu kome—kɛ ŋa kome he gbɛjianɔtoo lɛ he yɛ maji ni amɛtee hiɛ lɛ amli lɛ yɛ gbɛ ko nɔ; ni amɛkpɛlɛɔ mɛi ni yɔɔ ŋamɛi pii yɛ shikpɔŋ lɛ nɔ hei krokomɛi lɛ hu nɔ akɛ amɛ asafoŋbii (Okɛto Mateo 19:4-6; 1 Timoteo 3:2, 12 he.) Shi wɔ mɛi ni wɔfee ekome yɛ Kristo, Tookwɛlɔ kɛ Maŋtsɛ lɛ shishi lɛ nyiɛɔ Biblia mli akpɔi kɛ shishitoo mlai asɛɛ yɛ je lɛŋ he fɛɛ he. Ni kɛji akɛ maji lɛ tee ta lɛ, wɔkpooɔ akɛ wɔɔgbe wɔnyɛmimɛi ni jɛ maji kroko nɔ, ejaakɛ áwie wɔhe yɛ Yesaia wiemɔi lɛ amli akɛ: “Ni amɛkaseŋ tawuu dɔŋŋ.”—Yesaia 2:3, 4.
12. Mɛɛ gbɛ nɔ wɔjieɔ wɔhe kpo wɔtsɔɔ yɛ ákɛ wɔfee ekome “tamɔ tooi ni yɔɔ tsu mli”?
12 Ágba mumɔŋ Israel ekomefeemɔ lɛ hu he sane fɛfɛo afɔ shi, yɛ ŋmalɛ ni yɔɔ Mika 2:12 lɛ, he ni Yehowa kɛɔ yɛ akɛ: “Maŋɔ amɛ mato he kome tamɔ tooi ni yɔɔ tsu mli, loo tamɔ tooi kuu ni yɔɔ amɛlɛɛhe lɛ teŋ, ni amɛaafee hoo yɛ mɛi lɛ afalɛ hewɔ.” Enɛ ji nɔ ko ni wɔnaa yɛ Yehowa webii akpeei ashishi: Akpei abɔ ni amɛfee diŋŋ kɛmiibo sane toi, amɛfee diŋŋ ni amɛmiisumɔ ni amɛnu wiemɔ fɛɛ wiemɔ yɛ be mli ni wɔyeɔ nii yɛ Yehowa kɛ e-Tookwɛlɔ kɛ Maŋtsɛ lɛ shishi lɛ. Mɛi ni jɛ bokagbɛ, mɛidiji, mɛiyɛji—shwɛɛnii ni afɔ amɛ mu lɛ kɛ “tooi krokomɛi”—lɛ fɛɛ efee ekome yɛ too ku lɛ mli. Wɔkpeei wuji, kpeei bibii kɛ asafoŋ kpeei kɛ odaseyeli ni anyɛŋ aje he ŋwane haa akɛ Maŋtsɛyeli ekomefeemɔ lɛ ji nɔ ni anaa yɛ jeŋ muu fɛɛ ŋmɛnɛ!
13. Yɛɛ mɛɛ gbɛ nɔ tooi lɛ efee “hoo yɛ mɛi lɛ afalɛ hewɔ”?
13 Shi Mika wiemɔi, “Ni amɛaafee hoo yɛ mɛi lɛ afalɛ hewɔ” lɛ hu? Mɛni wɔnaa dani wɔ kpeei bibii kɛ kpeei wuji jeɔ shishi? Hoofeemɔ yɛ miishɛɛ naanyobɔɔ hewɔ, taakɛ wɔfeɔ yɛ wɔ sanegbaai ni ŋɔɔ mli lɛ, wɔnaa wɔ Kristofoi anaanyobɔɔ lɛ mli ŋɔɔmɔ ni wɔwieɔ wɔsɔɔmɔ kɛha wɔ-Nyɔŋmɔ lɛ he. Ni jeŋ fɛɛ asafo lɛ bafeɔ “hoo” hu, yɛ jwɛŋmɔ ni ji akɛ amɛyi miifa be fɛɛ be lɛ hewɔ; yɛ be mli ni atoɔ asafoi hee lɛ, yijiemɔ lalai ni akɛhaa Yehowa yɛ ekomefeemɔ mli lɛ jijeɔ waa yɛ shikpɔŋ lɛ fɛɛ nɔ.—Lala 96:1-3.
14. Tsɔɔmɔ bɔ ni je lɛ naa wɔ ekomefeemɔ lɛ ehaa?
14 Nɛkɛ ekomefeemɔ ni yɔɔ miishɛɛ, tamɔ tooi ni yɔɔ toi atsu mli nɛɛ, jeee nɔ ko ni je lɛ enaaa. Akɛ nɔkwɛmɔ nɔ lɛ, yɛ be mli ni “Maŋtsɛyeli Ekomefeemɔ” Kpokpaa Wuji anɔ kpeei ni Yehowa Odasefoi fee yɛ Taegu, Korea lɛ yaa nɔ lɛ, polisi nitsumɔ he ni yɔɔ Taegu lɛ tsu polisifoi 30 kɛtee kpee lɛ shishi yɛ klɛŋklɛŋ gbi lɛ nɔ, shi gbɛjianɔtoo kpakpa ni amɛna yɛ jɛmɛ kɛ bɔ ni Odasefoi lɛ kwɛɔ kar kɛ lɔlei sɔrɔtoi lɛ anɔ ni amɛkudɔɔ amɛshidaamɔ kɛ amɛtoo jogbaŋŋ nɔ haa lɛ ha amɛtsu polisifoi enyɔ pɛ kɛtee kpee lɛ shishi yɛ gbii etɛ ni eshwɛ lɛ mli. Mɔ ni kwɛɔ asa wulu ko ni afee kpee lɛ yɛ nɔ yɛ Taejon lɛ kɛɛ akɛ: “Etamɔ nɔ ni ŋwɛi hewalɛ tsirɛɔ nyɛ—enɛ yɛ naakpɛɛ.” Ewo he tsɔ̃, shi éha anu esane lɛ shishi! Yɛ Rangoon, Burma lɛ, Ghandhi Hall ajinafoi lɛ ateŋ mɔ kome kɛɛ akɛ: “Eji je lɛ fɛɛ yɛ asafo ko ni tamɔ nyɛnɔ̃ nɛɛ kulɛ, naagbai ehiŋ je lɛ mli.”
Yehowa “Hejɔlɛ Kpaŋmɔi” Lɛ
15. Mɛɛ toiŋjɔlɛ ni asumɔɔ ji nɔ ni atsɔɔ mli yɛ Ezekiel 37:26 lɛ?
15 Anɔkwale toiŋjɔlɛ ji mɛi ni wɔ-Tookwɛlɔ kɛ Maŋtsɛ, Yesu Kristo nyiɛɔ amɛhiɛ kɛyaa lɛɛhei lɛ anɔ̃. Eji toiŋjɔlɛ ni kɛ ekomefeemɔ baa, ni nakai ekomefeemɔ lɛ ji pɔtɛ̃ɛ yɛ Maŋtsɛyeli lɛ hewɔ yɛ Yehowa Odasefoi ateŋ yɛ shikpɔŋ lɛ fɛɛ nɔ ŋmɛnɛ. Yehowa tsɔɔ enɛ mli yɛ gbɛ ni yɔɔ naakpɛɛ nɔ yɛ ewiemɔi ni ekɛha Ezekiel lɛ mli yɛ yitso 37, kuku 26:
“Ni mikɛ amɛ aaakpaŋ hejɔlɛ kpaŋmɔ, eeetsɔ naanɔ kpaŋmɔ eha amɛ; ni maŋɔ amɛ mato, ni maha amɛshwere, ni mikɛ mihekrɔŋkrɔŋ lɛ aaama amɛteŋ kɛaatee naanɔ!”
Toiŋjɔlɛ kɛ Nyɔŋmɔ! Toiŋjɔlɛ ni baanyɛ ahi shi kɛya naanɔ, shidaa aha afɔle ni suɔmɔ yɔɔ mli ni wɔ-Tookwɛlɔ kɛ Maŋtsɛ lɛ shã be mli ni eyɔɔ shikpɔŋ nɛɛ nɔ yɛ biɛ lɛ!
16. Mɛni eha “tooi” lɛ ayi efa babaoo nakai lɛ?
16 Amrɔ nɛɛ ni mumɔŋ Israel ekũ ebɔ he kɛbashɛ emlibii ayibɔ ni ji 144,000 lɛ he nɛɛ, asafo babaoo ko ni ji “tooi krokomɛi” kɛ amɛhe babɔɔ mɛnɛɛmɛi ahe yɛ sɔɔmɔ krɔŋkrɔŋ mli yɛ Yehowa sɔlemɔwe lɛ. “Tooi” lɛ ayifalɛ—ni amrɔ nɛɛ amɛshɛ akpekpei abɔ nɛɛ bɛ naagbee! Nɛkɛ Maŋtsɛyeli shiɛlɔi nɛɛ yaa shia kɛ shia yɛ je lɛŋ he fɛɛ he yɛ ekomefeemɔ mli. Nɛkɛ sɔɔmɔ yɛ faŋŋ mli nɛɛ ji nɔ ko ni afeɔ diɛŋtsɛ ni yiŋtoo ko hu yɛ sɛɛ kɛha wɔ, ni ehaa ayɔseɔ wɔ akɛ gbɔmɛi kome pɛ ni yɔɔ je lɛŋ ni yɔɔ Yehowa gbɛi lɛ ni amɛaawo nɔ gojoo ni amɛjaje etoiŋjɔlɛ Maŋtsɛyeli lɛ he sane lɛ he miishɛɛ. Kwɛ miishɛɛ ni wɔna akɛ wɔmiina etoiŋjɔlɛ kpaŋmɔ lɛ mli gbɛfaŋnɔ!
17. (a) Mɛɛ hewalɛwoo Yehowa kɛhaa yɛ Ezekiel 37:27, 28? (b) Te wɔfeɔ tɛŋŋ wɔleɔ akɛ nɛkɛ suɔmɔ kɛ kwɛmɔ nɛɛ jeee mumɔŋ Israel pɛ nɔ̃?
17 Wɔkaneɔ Yehowa naagbee hewalɛwoo wiemɔi ni ekɛha etooi ni amɛfee ekome lɛ yɛ Ezekiel yitso 37, kukuji 27 kɛ 28 akɛ:
Ni mishihilɛ he aaahi amɛnɔ, ni matsɔ amɛ-Nyɔŋmɔ, ni amɛ hu amɛaatsɔ mimaŋ. Ni jeŋmaji lɛ aaana ale akɛ miji Yehowa, mɔ ni feɔ Israel krɔŋkrɔŋ lɛ, beni mihekrɔŋkrɔŋ lɛ aaama amɛteŋ kɛaatee naanɔ lɛ.”
Kwɛ miishɛɛ ni wɔyɔɔ akɛ Yehowa hebuu lɛ ha ewebii anɔ tamɔ buu! Ni asaŋ nɛkɛ suɔmɔ kɛ kwɛmɔ nɛɛ jeee mumɔŋ Israel pɛ nɔ̃, ejaakɛ wɔkaneɔ yɛ “asafo babaoo” lɛ ahe akɛ “ni mɔ ni ta maŋtsɛsɛi lɛ nɔ lɛ aaashi ebuu lɛ eto amɛnɔ.” Ni Yehowa mlifu ko ni tamɔ latsaa esaŋ amɛhe dɔŋŋ.—Kpojiemɔ 7:9-17.
18. (a) Yehowa ‘tsuuɔ Israel he’ yɛ mɛɛ gbɛ nɔ? (b) Te feɔ tɛŋŋ ni “asafo babaoo” lɛ hu banaa jalɛ shidaamɔ yɛ Nyɔŋmɔ hiɛ?
18 Kwɛ miishɛɛ hu ni wɔyɔɔ akɛ Yehowa hiɔ mumɔŋ Israel teŋ, ni ekɛ ehekrɔŋkrɔŋ lɛ ema amɛteŋ ‘kɛmiiya naanɔ’! Akɛni ejamɔ he nɛɛ yɔɔ krɔŋkrɔŋ hewɔ lɛ, nakai nɔŋŋ hu esa akɛ mɛi ni bajaa lɛ yɛ jɛmɛ lɛ hu afee krɔŋkrɔŋ, mɛi ni atsuu amɛhe, ni atu amɛ aha amɛ-Nyɔŋmɔ lɛ sɔɔmɔ. Awieɔ Kristofoi ni afɔ amɛ mu lɛ ahe akɛ “aju nyɛhe, . . . atsuu nyɛhe, . . . abunyɛ bem hu yɛ Nuŋtsɔ Yesu gbɛi kɛ wɔ-Nyɔŋmɔ lɛ mumɔ lɛ mli.” (1 Korintobii 6:11) Ni taakɛ ŋmalɛ ni yɔɔ yiteŋgbɛ ni ji Kpojiemɔ 7:9-17 NW ni atsɛ emli sane lɛ tsɔɔ lɛ, “asafo babaoo” lɛ ni yɔɔ shikpɔŋ nɔ hiɛnɔkamɔ lɛ hu “efɔ amɛtadei lɛ ahe, ni amɛha eyɛ futaa yɛ Toobi lɛ la lɛ mli,” koni amɛnyɛ amɛkɛ “sɔɔmɔ krɔŋkrɔŋ aha Nyɔŋmɔ nyɔɔŋ kɛ shwane yɛ esɔlemɔtsu lɛ mli.” Mɛɛ odaseyeli babaoo po jɛɔ nakai ekomefeemɔ yɛ jeŋ fɛɛ sɔɔmɔ mli lɛ mli baa nɛkɛ!
19. (a.) Mɛɛ gbɛ nɔ abaatsɔ ni anyɛ jeŋmaji lɛ anɔ ni amɛkpɛlɛ wiemɔi ni yɔɔ Ezekiel 38:23 lɛ anɔ? (b) Kɛyashi nakai be lɛ, esa akɛ wɔtswa wɔfai shi akɛ wɔbaafee mɛni?
19 Shi, wɔmiishɛɛ kpele ni fe fɛɛ, yɛ be mli ni wɔyaa wɔhiɛ yɛ Maŋtsɛyeli ekomefeemɔ mli lɛ ji, ni Yehowa bembuu gbi lɛ abanina wɔ. Kɛkɛ lɛ abaatse enunyam gbɛi lɛ he—abaatsumɔ ahorabɔɔ ni ehiii lɛ fɛɛ ni akɛba nɔ lɛ kɛjɛ he. Abaanyɛ jeŋmaji lɛ anɔ ni amɛna bɔ ni ahereɔ gbɔmɛi ni Yehowa gbɛi ka amɛnɔ lɛ yiwala. Shi nɔ ni he hiaa waa lɛ, taakɛ Nuŋtsɔ Maŋtsɛ lɛ diɛŋtsɛ jaje lɛ: “Amɛaana amɛle akɛ miji Yehowa.” (Ezekiel 38:23) Eba akɛ wɔɔmɔ wɔ-Maŋtsɛyeli ekomefeemɔ lɛ mli kpɛŋŋ, akɛni eji nɔ ni yɔɔ diɛŋtsɛ agbɛnɛ hewɔ, kɛyashi be mli ni aaatse Yehowa anunyam gbɛi lɛ he diɛŋtsɛ yɛ jeŋ muu fɛɛ.a
[Shishigbɛ niŋmai]
a Ajie kɛjɛ March 1, 1984 Blɔfo Buu-Mɔɔ lɛ mli.
Mɛɛ gbɛ nɔ Ezekiel 37:15-28 eba mli yɛ:
□ Yehowa webii ni aaafee amɛ “tso kome” lɛ he?
□ ‘Maŋtsɛ kɛ tookwɛlɔ kome ni aaato yɛ amɛnɔ lɛ he?
□ “Hejɔlɛ kpaŋmɔ” ni Nyɔŋmɔ kɛ ewebii lɛ fee Iɛ he?
□ Nyɔŋmɔ kpeebuu loo eshihilɛ he ni ‘aaahi amɛnɔ’ lɛ he?
[Mfoniri ni yɔɔ baafa 28]
Yehowa “hejɔlɛ kpaŋmɔ” lɛ yɛ ewebii ni amɛfee ekome bianɛ lɛ ateŋ ni emaa shweremɔ ni yaa shikpɔŋ nɔ Paradeiso lɛ mlibote mli nɔ mi