Okɛ Yehowa Ŋwɛi Shwiili Lɛ Anyiɛ Pɛpɛɛpɛ
“Amɛbo toi jio, amɛbooo toi jio, wiemɔ miwiemɔi lɛ otsɔɔ amɛ.”—EZEKIEL 2:7.
1, 2. Mɛɛ maŋtsɛmɛi ashwiili Ezekiel na lɛ, ni mɛni akɛɛ lɛ?
YEHOWA ŋwɛi gbɛjianɔtoo lɛ damɔ etsuji lɛ ahiɛ bianɛ. Amɛkɛ hemɔkɛyeli hiŋmɛi miina nakai amɛ Nuŋtsɔ Maŋtsɛ lɛ maŋtsɛmɛi ashwiili lɛ. Eyɛ nyam, ni ehe yɛ gbeyei, ni eje agbo hu.
2 Nakai maŋtsɛmɛi ashwiili lɛ nɔŋŋ badamɔ Nyɔŋmɔ gbalɔ Ezekiel hiɛ yɛ ninaa mli afii 2,600 ni eho nɛ lɛ. Yehowa jɛ nɛkɛ shwiili ni maŋtsɛsɛi ma nɔ—Nyɔŋmɔ mumɔŋ bɔɔnii agbɛjianɔtoo ni yɔɔ ŋwɛi—nɛɛ nɔ ekɛ naakpɛɛ famɔ nɛɛ ha Ezekiel: “Ni bii ni hiɛ wa ni amɛwaje amɛtsui lɛ aŋɔɔ mitsuɔo, ni oyakɛɛ amɛ akɛ, ‘Bɔ ni Nuŋtsɔ Yehowa kɛɛ nɛ!’ Ni amɛ lɛ, amɛbo toi jio, amɛbooo toi jio, akɛni weku toigbolɔi ji amɛ hewɔ lɛ, amɛbaana amɛle akɛ gbalɔ diɛŋtsɛ ko hi amɛteŋ.”—Ezekiel 2:4, 5, NW.
3. Mɛɛ ŋmɛnɛŋmɛnɛ beaŋ henɔ Ezekiel yɔɔ?
3 Ezekiel kɛ faishitswaa tsu nakai nitsumɔ lɛ he nii, esɔmɔ akɛ dɛŋdade kome yɛ Nyɔŋmɔ dɛŋ. Nakai nɔŋŋ hu Nyɔŋmɔ yɔɔ gbɛjianɔtoo kome ni ji dɛŋdade yɛ ekudɔmɔ shishi. Ezekiel kuu lɛ, shwɛɛnii ni afɔ amɛ mu lɛ ji mɛi ni nyiɛ naagbee odaseyeli nitsumɔ lɛ hiɛ, ni “asafo babaoo” ko ni ji “tooi krokomɛi” ebua amɛhe naa kɛmiifi amɛsɛɛ. (Kpojiemɔ 7:9, 10; Yohane 10:16) Amɛ fɛɛ amɛfee “kuu kome,” ni Tookwɛlɔ Kpakpa, Yesu Kristo, nyiɛ amɛhiɛ, yɛ Shwiili Nɔtalɔ kpeteŋkpele, Yehowa Nyɔŋmɔ nɔyeli shishi.
4, 5. Te fee tɛŋŋ ni Nyɔŋmɔ gbɛjianɔtoo ni anaa lɛ ba shihilɛ mli, ni mɛni etsɔ mli ni kɛ Yesaia 60:22 kpaa gbee?
4 Nɛkɛ jeŋ muu fɛɛ gbɛjianɔtoo nɛɛ eda kɛjɛ eshishijee bibii amli ni ebatsɔ gbɛjianɔtoo ni he wa ni atsɔɔ nɔ ajajeɔ famɔ akɛ “nyɛshea Nyɔŋmɔ gbeyei ni nyɛkɛ anunyam ahaa lɛ, ejaakɛ ekojomɔ ŋmlɛtswaa lɛ eshɛ” lɛ yɛ Yehowa gbɛtsɔɔmɔ shishi. (Kpojiemɔ 14:7) Taakɛ Ezekiel wooo ehe loo ehalaaa lɛ diɛŋtsɛ ehe akɛ gbalɔ lɛ, nakai nɔŋŋ hu gbɛjianɔtoo ni anaa lɛ ebɔɔɔ loo ehalaaa lɛ diɛŋtsɛ ehe ewooo enitsumɔ nɛɛ mli. Efaaa kpo kɛjɛɛɛ adesa suɔmɔnaa nifeemɔ loo emɔdɛŋbɔɔ mli. Ŋwɛi Shwiili Nɔtalɔ lɛ ha gbɛjianɔtoo nɛɛ ba shihilɛ mli. Akɛni Nyɔŋmɔ mumɔ lɛ ewo amɛ hewalɛ ni ŋwɛibɔfoi krɔŋkrɔŋi fiɔ amɛsɛɛ hewɔ lɛ, Yehowa webii ena amɛnitsumɔ lɛ mli lɛɛmɔ ni yɔɔ naakpɛɛ aahu akɛ eha ‘mɔ fioo etsɔ maŋ kpeteŋkpele.’—Yesaia 60:22.
5 Yehowa Odasefoi fe 4,000,000 miijaje Maŋtsɛyeli lɛ he sane lɛ yɛ shikpɔji 212 nɔ. Abua amɛnaa awo asafoi komekomei fe 63,000 mli ni ato amɛ gbɛjianɔ awo kpokpai bibii kɛ kpokpaa wuji hu mli. Nitsumɔ he niji kɛ woji akalamɔ nitsumɔ hei babaoo miitsu nii yɛ Nɔyeli Kuu ni ji gbɛjianɔtoo muu lɛ fɛɛ yitso lɛ gbɛtsɔɔmɔ shishi. Amɛ fɛɛ amɛmiiya amɛhiɛ, amɛmiishiɛ sanekpakpa lɛ, amɛmiitsɔse mɛi ni boɔ toi lɛ, ni amɛmiimamɔ kpee hei tamɔ gbɔmɔ kome feɔ enii. Hɛɛ, Yehowa gbɛjianɔtoo ni anaa lɛ kɛ ŋwɛi shwiili lɛ kɛ e-Nɔtalɔ lɛ nyiɛ pɛpɛɛpɛ.
6. Yehowa gbɛjianɔtoo ni anaa lɛ ni akɛ lɛ aaanyiɛ pɛpɛɛpɛ lɛ tsɔɔ mɛni?
6 Kɛ oji Yehowa Odasefoi lɛ ateŋ mɔ kome lɛ, ani okɛ Nyɔŋmɔ gbɛjianɔtoo ni anaa lɛ nyiɛ pɛpɛɛpɛ? Nakai feemɔ jeee Kristofoi akpeei ni oooya kɛ be ko ni ooofite yɛ sɔɔmɔ nitsumɔ lɛ mli lɛ kɛkɛ. Klɛŋklɛŋ lɛ, nyiɛmɔ kɔɔ nɔyaa kɛ mumɔŋ dalɛ he. Ekɔɔ jwɛŋmɔ kpakpa ni aaana, nibii ni he hiaa ni akɛaaye klɛŋklɛŋ gbɛhe, kɛ shishinumɔ hee mlihiɛmɔ be fɛɛ be lɛ he. Kɛ wɔkɛ Yehowa ŋwɛi shwiili lɛ nyiɛ pɛpɛɛpɛ lɛ, wɔshihilɛ kɛ sane ni wɔjajeɔ lɛ hu kpaa gbee.
7. Mɛni hewɔ esa akɛ asusu Ezekiel subaŋ akɛ Nyɔŋmɔ gbalɔ lɛ he lɛ?
7 Yehowa ŋmɛnɛŋmɛnɛ beaŋ tsuji lɛ baanyɛ akase babaoo kɛjɛ Ezekiel nɔkwɛmɔ nɔ lɛ mli yɛ nyiɛmɔ ni akɛ asafo lɛ nyiɛɔ pɛpɛɛpɛ lɛ mli. Eyɛ mli akɛ Yehowa je gbɛ ehala Ezekiel akɛ gbalɔ moŋ, shi eyɛ ehenumɔi, nɔ ni esusuɔ he waa kɛ ehiamɔ nii. Akɛ nɔkwɛmɔ nɔ lɛ, akɛ obalanyo ni ebote gbalashihilɛ mli lɛ, eye awerɛho yɛ eŋa gbele hewɔ. Ni kɛlɛ, ehiɛ kpaaa enitsumɔ akɛ Yehowa gbalɔ lɛ nɔ. Kɛ wɔsusu bɔ ni Ezekiel ba ejeŋ eha yɛ saji krokomɛi amli lɛ he lɛ, eeeha wɔwaje wɔhe ni wɔkɛ Nyɔŋmɔ gbɛjianɔtoo ni anaa lɛ anyiɛ pɛpɛɛpɛ. Enɛ baaye ebua wɔ ni wɔkɛ egbɛjianɔtoo ni anaaa lɛ anyiɛ pɛpɛɛpɛ.
Ekpɛlɛ Nitsumɔ lɛ Nɔ ni Etsu he Nii
8. Mɛɛ nɔkwɛmɔ nɔ Ezekiel fee yɛ enitsumɔ lɛ he?
8 Ezekiel to okadi kpakpa efɔ shi kɛtsɔ enitsumɔ lɛ ni ekpɛlɛ nɔ kɛ ehe nii ni etsu lɛ nɔ. Shi toiboo kɛ tsuisalɛ he miihia dani anyɛ atsu he nii, ejaakɛ wɔkaneɔ akɛ: “Shi bo gbɔmɔ bi, kaashe amɛ gbeyei, ni kaashe amɛwiemɔi lɛ hu gbeyei, tsɛ, ŋmei kɛ kpitikpitii kɛo yɔɔ, ni nyɔŋmɔŋkrakroi ateŋ ohiɔ, kɛlɛ kaashe amɛwiemɔi lɛ agbeyei, ni otsui akafa yɛ amɛhiɛ hu; tsɛ weku toigbolɔi ji amɛ. Kɛlɛ, amɛbo toi jio, amɛbooo toi jio, wiemɔ miwiemɔi lɛ otsɔɔ amɛ, ejaakɛ toigbolɔi ji amɛ. Shi bo, gbɔmɔ bi, bo nɔ ni mikɛɔ bo nɛɛ toi; kaafee ohe toigbolɔ tamɔ weku toigbolɔi lɛ.”—Ezekiel 2:6-8.
9. Mɛni pɛ Ezekiel baafee ni no aaaha efee mɔ ni yeee la yi sɔ?
9 Esaaa akɛ Ezekiel feɔ shikpilikpii aloo esheɔ gbeyei, ni ehe miihia ni awo lɛ hewalɛ be fɛɛ be dani etsu enitsumɔ lɛ he nii. Ebaanyɛ eye ehe kɛjɛ layisɔyeli he kɛji akɛ ejɛ esuɔmɔ mli ekɛ ekãa wie Yehowa wiemɔi lɛ. Akɛɛ Ezekiel akɛ: “Shi kɛji obɔ efɔŋfeelɔ lɛ kɔkɔ, ni ekpaleee kɛjɛɛɛ enɔfɔŋfeemɔ lɛŋ kɛ egbɛ fɔŋ lɛ nɔ lɛ, eeegbo yɛ enishaianii lɛ ahewɔ, shi bo lɛ ohere osusuma yiwala.”—Ezekiel 3:19.
10. Ezekiel kuu lɛ efee tamɔ gbalɔ lɛ pɛpɛɛpɛ yɛ mɛɛ gbɛ nɔ?
10 Taakɛ eji yɛ Ezekiel sane lɛ mli lɛ, Ezekiel kuu ni afɔ amɛ mu lɛ ekpɛlɛ nitsumɔ ni Nyɔŋmɔ kɛwo amɛdɛŋ lɛ nɔ ni amɛmiitsu he nii. Kɛ wɔji Yehowa Odasefoi lɛ, esa akɛ wɔkai akɛ, wɔwala kɛ mɛi krokomɛi awala damɔ toiboo ni wɔɔfee nɔ. (1 Timoteo 4:15, 16) Ehe miihia ni Odasefonyo fɛɛ Odasefonyo kɛ Yehowa gbɛjianɔtoo lɛ anyiɛ pɛpɛɛpɛ. Nyɔŋmɔ fimɔŋ wɔ ekpɛtɛŋ eshwiili lɛ he ni egbala wɔ kɛya. Sane ni kɔɔɔ mɔ ko he nɔ ko kɛ tsui ni mli eja enyɔ baa shwiili Nɔtalɔ lɛ agbojee shi. No hewɔ lɛ Yehowa gbɛjianɔtoo ni anaa lɛ woɔ wɔ ŋaa ni wɔha nibii ni Nyɔŋmɔ nyaa he lɛ afee otii yɛ wɔshihilɛ mli. Ŋaawoo nɛɛ ni wɔɔdi sɛɛ be fɛɛ be lɛ haa wɔkɛ Nyɔŋmɔ gbɛjianɔtoo lɛ nyiɛɔ, ni ewoɔ wɔ sɔɔmɔ krɔŋkrɔŋ lɛ nɔ kɛtekeɔ nifeemɔ gbɛ, susumɔkpaa gbɛ lɛ. Eji anɔkwale akɛ, Yehowa webii fɛɛ jieɔ hetuukɛhamɔ ni sa kadimɔ kpo. Wɔ gbɛfaŋnɔ akɛ aŋkroaŋkroi ji ni wɔhiɛ wɔhiɛyaa lɛ mli.
Nyɔŋmɔ Wiemɔi ni Ahe Awo Tsui Mli
11. Mɛɛ nɔkwɛmɔ nɔ Ezekiel fee yɛ Nyɔŋmɔ wiemɔi ahe?
11 Ezekiel fee nɔkwɛmɔ nɔ kpakpa efɔ shi kɛtsɔ Nyɔŋmɔ wiemɔi lɛ ni eŋɔ ewo etsui mli lɛ nɔ. Beni afa lɛ lɛ, eye wolokpo loo wolo ni akota ni Nyɔŋmɔ kɛha lɛ lɛ. Ezekiel kɛɛ: “Ni miye ni eŋɔɔmɔ tamɔ wo yɛ midaaŋ.” Eyɛ mli akɛ wolokpo lɛ mli eyi obɔ kɛ “yaafoi kɛ ntsɔidɔɔmɔ kɛ yarafeemɔi” moŋ, shi eŋɔɔ Ezekiel naa ejaakɛ ehiɛ sɔ hegbɛ ni ena akɛ eeedamɔ Yehowa najiaŋ lɛ. Eji niiashikpamɔ ni ŋɔɔ kɛha gbalɔ lɛ akɛ eeetsu nitsumɔ ni Nyɔŋmɔ kɛwo edɛŋ lɛ he nii. Nyɔŋmɔ kɛɛ lɛ akɛ: “Gbɔmɔ bi, miwiemɔi fɛɛ ni mikɛo aaawie lɛ, hemɔ owo otsuiŋ, ni onu kɛ otoii.” (Ezekiel 2:9–3:3, 10) Nakai ninaai lɛ ha Ezekiel yoo nɔ ni Nyɔŋmɔ eŋmɛ lɛ gbɛ ni ena mli gbɛfaŋnɔ lɛ ni ewaje wekukpaa ni ka ekɛ Yehowa teŋ lɛ.
12. Mɛni Ezekiel fee yɛ egbalɛ sɔɔmɔ ni fe afii nyɔŋmai enyɔ lɛ mli?
12 Akɛ ninaai kɛ shɛɛ saji ha Ezekiel kɛha yiŋtoi kɛ gbɔmɛi ahenaabuamɔi sɔrɔtoi. Esa akɛ ebo sane lɛ toi jogbaŋŋ ni agbɛnɛ ewie ni efee enii taakɛ afa lɛ lɛ. Ajie adafitswai loo saji heei kɛ nifeemɔ gbɛi akpo aha lɛ fiofio yɛ egbalɛ sɔɔmɔ afii 22 loo nɔ̃ lɛ mli. Yɛ bei komɛi amli lɛ, Ezekiel wieɔ shɛɛ saji ni aje gbɛ akɛha. Yɛ bei krokomɛi amli hu lɛ, efeɔ nɔkwɛmɔ nɔ ko ni ewieee yɛ mli hu, tamɔ ntayai ni damɔ shi kɛha Yerusalem ni eeekã shi yɛ hiɛ lɛ nɛkɛ. (Ezekiel 4:1-8) Nɔkwɛmɔ nɔ ni efee efɔ shi yɛ lɛ diɛŋtsɛ eteemɔŋ saji amli, tamɔ bɔ ni efee enii eha yɛ eŋa gbele lɛ he lɛ hu hiɛ shɛɛ saji. (Ezekiel 24:15-19) Esa akɛ efee mɔ ni le nɔ ni yaa nɔ, ni ekɛ sane ni ja lɛ aha yɛ be fɛɛ mli, ni efee nii ni sa yɛ be ni sa mli. Ezekiel kɛ Yehowa efee ekome diɛŋtsɛ yɛ nitsumɔ ni yaa hiɛ mli.
13. Te wɔɔfee tɛŋŋ wɔtswa wɔkɛ Yehowa teŋ wekukpaa ni bɛŋkɛ kpaakpa wɔma shi?
13 Nakai nɔŋŋ hu dani wɔɔtswa wɔkɛ Yehowa teŋ wekukpaa ni bɛŋkɛ kpaakpa wɔma shi ni wɔhiɛ mli akɛ enanemɛi nitsulɔi lɛ, esa akɛ wɔhe Nyɔŋmɔ wiemɔ lɛ wɔwo wɔtsui mli. (1 Korintobii 3:9) Nyɔŋmɔ gbɛjianɔtoo ni anaa lɛ ni ekɛaanyiɛ pɛpɛɛpɛ yɛ enɛ gbɛfaŋ lɛ biɔ ni wɔkase ni wɔle mumɔŋ niyenii ni baa daa ni akɛhaa yɛ be ni sa mli lɛ mli saji. (Mateo 24:45-47) “Wiemɔ krɔŋŋ” lɛ miilɛɛ yɛ be fɛɛ mli. (Zefania 3:9) Kɛ wɔkɛ shishinumɔ hee lɛ nyiɛ pɛpɛɛpɛ lɛ, no dani wɔɔnyɛ ni wɔkɛ toiboo akpɛlɛ Shwiili Nɔtalɔ lɛ gbɛtsɔɔmɔ nɔ.
14, 15. Mɛɛ nifeemɔ gbɛ he hiaa koni wɔkɛ Nyɔŋmɔ gbɛjianɔtoo lɛ anyiɛ pɛpɛɛpɛ?
14 Yɛ enɛ hewɔ lɛ, nifeemɔ gbɛ kpakpa yɛ mɔ diɛŋtsɛ sɔlemɔ mli, teemɔŋ nikasemɔ mli kɛ sanekpakpa lɛ he sɔɔmɔ krɔŋkrɔŋ lɛ mli ni akɛ he aaawo he miihia. (Romabii 15:16) Kaimɔ Ezekiel nɔkwɛmɔ nɔ ni kɔɔ wolokpo ni Nyɔŋmɔ shɛɛ saji yɔɔ mli lɛ ni eye lɛ he lɛ. Ezekiel ye wolokpo muu lɛ fɛɛ jeee efa ko. Ehalaaa emli fai loo atrɔmai komɛi ni baaŋɔɔ elilɛi naa. Nakai nɔŋŋ hu esa akɛ wɔto Biblia lɛ kɛ asafo lɛ woji krokomɛi ni wɔ diɛŋtsɛ wɔkaseɔ lɛ naa koni ekɛ mumɔŋ niyenii ni baa lɛ anyiɛ pɛpɛɛpɛ, ni esa akɛ wɔye nɔ fɛɛ nɔ ni akɛmaa wɔ mumɔŋ okpɔlɔ lɛ nɔ lɛ, kɛ anɔkwalei ni mli kwɔlɔ lɛ hu.
15 Ani wɔtsɔɔ sɔlemɔ nɔ wɔbɔɔ mɔdɛŋ ni wɔnu mumɔŋ niyenii ni wa lɛ shishi? Ní wɔkɛ anɔkwale lɛ aaanyiɛ lɛ biɔ ni wɔnilee kɛ shishinumɔ aya hiɛ kɛteke shishijee nibii lɛ, ejaakɛ wɔkaneɔ akɛ: “Mɔ fɛɛ mɔ ni yeɔ fufɔ lɛ, ekpako jalɛ wiemɔ lɛ shi; ejaakɛ fufɔoo ji lɛ. Shi mɛi ni edara lɛ anɔ ji niyenii kpakpa, mɛi ni fɔ ni amɛfɔɔ feemɔ lɛ eha amɛhenumɔnii lɛ ele ekpakpa kɛ efɔŋ mlikpamɔ.” (Hebribii 5:13, 14) Hɛɛ, mumɔŋ nɔyaa ni aaana lɛ ji nyiɛmɔ ni akɛ gbɛjianɔtoo lɛ aaanyiɛ pɛpɛɛpɛ lɛ fa ni he hiaa.
Wiemɔ lɛ He Miishɛɛ ni Anaaa Ejeee Nijiaŋ Wui
16, 17. Te Ezekiel tsu ewiemɔ lɛ he miishɛɛ ni anaaa, ehefɛoyeli kɛ ewiemɔ lɛ toi ni abooo lɛ he nii eha tɛŋŋ?
16 Ezekiel to okadi kpakpa hu kɛtsɔ toibooni efee ni ehaaa wiemɔ lɛ he miishɛɛ ni anaaa loo hefɛoyeli aje enijiaŋ wui lɛ nɔ. Nakai nɔŋŋ hu kɛ wɔdi bɔ ni wiemɔ krɔŋŋ lɛ yaa hiɛ ha lɛ sɛɛ lɛ, wɔkɛ ŋwɛi Shwiili Nɔtalɔ lɛ nyiɛɔ kɛyaa he ni eyaa lɛ. Awulaa wɔ koni wɔbo efamɔi atoi, awoɔ wɔ hewalɛ koni mɛi ni wɔshiɛɔ Yehowa kojomɔ shɛɛ saji lɛ wɔtsɔɔ amɛ ni yeɔ wɔhe fɛo loo amɛnyaaa he lɛ akaje wɔnijiaŋ wui. Taakɛ eba yɛ Ezekiel nɔ lɛ, Nyɔŋmɔ etsɔ hiɛ ebɔ wɔ kɔkɔ akɛ mɛi komɛi baate shi awo wɔ waa, mɛi ni yi wa ni amɛtsui hu wa. Mɛi krokomɛi hu boŋ toi, ejaakɛ amɛsumɔɔɔ ni amɛboɔ Yehowa wiemɔ toi. (Ezekiel 3:7-9) Mɛi krokomɛi hu baafee osatofoi, taakɛ Ezekiel 33:31, 32 tsɔɔ lɛ: “Ni amɛbaa oŋɔɔ tamɔ maŋ baa, ni amɛbataraa shi yɛ ohiɛ tamɔ mimaŋ, ni amɛboɔ owiemɔi lɛ atoi, shi amɛyeee nɔ; ejaakɛ amɛkɛ amɛnaabu wieɔ dɔkɔbii, shi amɛtsui nyiɛɔ amɛsɛɛnamɔ sɛɛ. Ni naa, bo lɛ otamɔ lala kɛ ŋɔɔmɔ kɛ mɔ ko ni gbee ŋɔɔ ni ele saŋkutswaa jogbaŋŋ oha amɛ; ejaakɛ amɛboɔ owiemɔi lɛ atoi moŋ, shi amɛyeee nɔ.”
17 Mɛni baajɛ mli aba? Eze 33 Kuku 33 kɛfataa he akɛ: “Shi kɛ eba mli lɛ—naa, ebaaba!—no dani amɛaana amɛle akɛ gbalɔ ko ehi amɛteŋ pɛŋ.” Nakai wiemɔi lɛ tsɔɔ akɛ Ezekiel kpaaa shiɛmɔ akɛni gbɔmɛi lɛ booo toi hewɔ. Mɛi krokomɛi ashikpilikpii-feemɔ haaa lɛ hu efee shikpilikpii. Gbɔmɛi bo toi jio amɛbooo toi jio, ebo Nyɔŋmɔ toi ni etsu enitsumɔ lɛ he nii.
18. Mɛɛ saji obaanyɛ obi bo diɛŋtsɛ ohe?
18 Amrɔ nɛɛ Yehowa gbɛjianɔtoo ni anaa lɛ miiha sane jajemɔ akɛ esa akɛ mɛi fɛɛ ashe Nyɔŋmɔ gbeyei ni amɛkɛ anunyam aha lɛ lɛ naa miiwa. Ani oŋmɛɔ otsui shi yɛ be mli ni awieɔ ashiɔ bo yɛ ekaa ni okɛyeɔ Maŋtsɛyeli lɛ he odase, yɛ jeŋba kpakpa mli ni ohiɛɔ yɛ oshihilɛ mli hewɔ lɛ mli? Ani odamɔɔ shi shiŋŋ yɛ be mli ni akɛ nɔnyɛɛ baa onɔ akɛni okpɛlɛɛɛ ni agbala la awo omli, ni ojaaa maŋ okadii, ni okɛ ohe wooo je lɛŋ gbijurɔyelii amli hewɔ lɛ?—Mateo 5:11, 12; 1 Petro 4:4, 5.
19. Yɛ gbɛtsɔɔmɔ he lɛ, mɛni wɔbaafee kɛ wɔkɛ Yehowa ŋwɛi shwiili lɛ nyiɛ pɛpɛɛpɛ?
19 Gbɛ ni tamɔ nɛkɛ bɛ mlɛo, shi abaahere mɛi ni ŋmɛɔ amɛtsui shi yɛ mli kɛyashiɔ naagbee lɛ ayiwala. (Mateo 24:13) Yɛ Yehowa yelikɛbuamɔ hewɔ lɛ, esaaa akɛ wɔhaa gbɔmɛi ni yɔɔ je leŋ lɛ feɔ wɔ tamɔ amɛ koni amɛjie wɔ kɛjɛ nyiɛmɔ ni wɔkɛ Yehowa ŋwɛi shwiili lɛ nyiɛ pɛpɛɛpɛ lɛ mli. (Ezekiel 2:8; Romabii 12:21) Kɛji akɛ wɔkɛ ŋwɛibɔfoi agbɛjianɔtoo ni tamɔ shwiili lɛ nyiɛ lɛ, wɔbaaye gbɛtsɔɔmɔi kɛ famɔi ni wɔnine shɛɔ nɔ kɛjɛɔ Nyɔŋmɔ gbɛjianɔtoo ni anaa lɛ dɛŋ lɛ nɔ amrɔ nɔŋŋ. Yehowa kɛ nɔ ni he hiaa wɔ ni wɔnyɛ wɔdamɔ wɔhemɔkɛyeli ni atutuaa lɛ naa, ni wɔnyɛ wɔmɔ wala Wiemɔ lɛ mli kpɛŋŋ, ni wɔkɛ wɔhiŋmɛii amamɔ mumɔŋ nibii ni yɔɔ diɛŋtsɛ ni kɔɔ ŋwɛi shwiili lɛ nɔ Nɔtalɔ Odehe lɛ he lɛ haa wɔ.
Akanyaa Wɔ ni Wɔnyiɛ Pɛpɛɛpɛ
20. Mɛni nibii komɛi Ezekiel ŋmala eshwie shi ni esa akɛ ekanya wɔ ni wɔkɛ gbɛjianɔtoo lɛ anyiɛ pɛpɛɛpɛ?
20 Esa akɛ Ezekiel ninaai lɛ akanya wɔ ni wɔnyiɛ kɛya hiɛ. Jeee akɛ ejaje Nyɔŋmɔ kojomɔi eshwie Israel nɔ kɛkɛ, shi eŋmala gbalɛi ni kɔɔ esaamɔ ekoŋŋ he eshwie shi. Ezekiel tsɔɔ Mɔ ni yɔɔ mla naa hegbɛ akɛ eyeɔ lumɔ yɛ Yehowa maŋtsɛsɛi nɔ yɛ be ni ato lɛ mli lɛ. (Ezekiel 21:32) Nakai Tsulɔ Odehe “David” lɛ baaku sɛɛ abua Nyɔŋmɔ webii anaa ni eeekpala amɛ. (Ezekiel 34: 23, 24) Eyɛ mli akɛ Gog ni jɛ Magog lɛ baatutua amɛ moŋ, shi Nyɔŋmɔ baahere amɛyiwala, ni abaanyɛ E-henyɛlɔi lɛ anɔ koni ‘amɛle Yehowa,’ yɛ be mli ni amɛyaa hiɛkpatamɔ mli po lɛ. (Ezekiel 38:8-12; 39:4, 7) Kɛkɛ lɛ Nyɔŋmɔ tsuji baana naanɔ wala mli ŋɔɔmɔ yɛ gbɛjianɔtoo ni jamɔ krɔŋŋ yɔɔ mli ni kɔɔ mumɔŋ sɔlemɔ we he lɛ mli. Wala nui ni hoɔ kɛjɛɔ sɔlemɔ we lɛ baafee nɔ ni abaatsɔ nɔ alɛ amɛ ni atsa amɛ helai, ni abaaja shikpɔŋ lɛ mli aha amɛ akɛ amɛ gboshinii kɛha amɛjɔɔmɔ.—Ezekiel 40:2; 47:9, 12, 21.
21. Mɛni hewɔ Yehowa ŋmɛnɛŋmɛnɛ beaŋ Odasefoi lɛ anitsumɔ lɛ da kwraa fe Ezekiel nɔ lɛ?
21 Kwɛ miishɛɛ ni Ezekiel baana akɛ eeeŋmala nɛkɛ gbalɛi nɛɛ eshwie shi! Ni kɛlɛ, nitsumɔ ni ka ŋmɛnɛŋmɛnɛ beaŋ Yehowa Odasefoi anɔ lɛ da kwraa fe enɔ̃ lɛ. Be ni nakai gbalɛi lɛ ekomɛi baa mli lɛ mli wɔyɔɔ nɛɛ. Yɛ anɔkwale mli lɛ, wɔ diɛŋtsɛ wɔmiina emlibaa lɛ ekomɛi amli gbɛfaŋnɔ waa diɛŋtsɛ. Akɛ aŋkroaŋkroi lɛ, ani wɔkɛ gbɛ ni wɔtsɔɔ nɔ wɔhiɔ shi lɛ tsɔɔ akɛ wɔheɔ wɔyeɔ akɛ Yesu miiye nɔ bianɛ akɛ Mɔ ni yɔɔ hegbɛ yɛ mla naa lɛ? Ani wɔ diɛŋtsɛ lɛ wɔheɔ wɔyeɔ akɛ etsɛŋ ni Yehowa baatsuu lɛ diɛŋtsɛ ehe ni ehere mɛi ni kɛ egbɛjianɔtoo lɛ nyiɛɔ pɛpɛɛpɛ lɛ ayiwala kɛya ejeŋ hee lɛ mli? (2 Petro 3:13) Hemɔkɛyeli ni tamɔ nɛkɛ, ni nitsumɔi fata he lɛ, yeɔ odase akɛ wɔkɛ Yehowa ŋwɛi shwiili lɛ nyiɛɔ pɛpɛɛpɛ lɛlɛŋ.
Yaa Nɔ ni Okɛ Gbɛjianɔtoo lɛ Anyiɛ Pɛpɛɛpɛ
22. Mɛni abaanyɛ afee ni akwa jwɛŋmɔ ni aaagbala kɛaajɛ nibii anɔ koni ahiɛ mumɔŋ nikwɛmɔ ni mli tse keŋkeŋ mli?
22 Akɛni ‘wɔkɛ wɔnine eyamɔ tsinakɔi mli’ hewɔ lɛ, esaaa akɛ wɔkuɔ wɔkuɛ wɔkwɛɔ wɔsɛɛ ni wɔmiishwe nibii ni je lɛ yɔɔ ni ekɛaaha lɛ. (Luka 9:62; 17:32; Tito 2:11-13) No hewɔ lɛ nyɛhaa wɔtsia nɔ fɛɛ nɔ ni aaaba wɔ tsine ni eeeha wɔbua jwetrii anaa yɛ shikpɔŋ nɔ lɛ naa, ni wɔha wɔhiŋmɛi afee mlɛo, enɔ atse, ni wɔkɛma Maŋtsɛyeli lɛ nɔ. (Mateo 6:19-22, 33) Kɛ wɔha wɔshihilɛi fee mlɛo loo kuku, ni wɔshɛrɛ je lɛŋ nibii ni tamɔ jatsui ni tsii lɛ wɔshwie kɛ hegbɛ ba pɛ lɛ, eeeye ebua wɔ ni wɔkɛ Yehowa gbɛjianɔtoo lɛ anyiɛ pɛpɛɛpɛ. (Hebribii 12:1-3) Nibii ni gbalaa mɔ jwɛŋmɔ baanyɛ aha ŋwɛi shwiili lɛ kɛ e-Nɔtalɔ lɛ he ninaa lɛ hiɛ afee kusuu. Shi yɛ eyelikɛbuamɔ naa lɛ, wɔbaanyɛ wɔhiɛ mumɔŋ nikwɛmɔ ni mli tse keŋkeŋ mli, taakɛ Ezekiel fee lɛ.
23. Mɛni ehe hiaa ni Odasefoi anɔkwafoi lɛ afee yɛ mɛi heei lɛ ahe?
23 Gbɛnaa nii ni jwere wɔnɔ akɛ Yehowa Odasefoi lɛ fa ji yelikɛbuamɔ ni wɔkɛaaha mɛi heei babaoo lɛ ni amɛkɛ Nyɔŋmɔ ŋwɛi shwiili lɛ anyiɛ pɛpɛɛpɛ. Mɛi ni miihe ashɛ 10,000,000 ba Yesu Kristo gbele lɛ Kaimɔ lɛ shishi yɛ 1990. Yɛ be mli ni aŋkroaŋkroi nɛɛ ateŋ mɛi pii yaa Kristofoi akpeei fioo ko lɛ, ehe miihia ni amɛna bɔ ni ehe hiaa akɛ amɛkɛ Yehowa gbɛjianɔtoo ni anaa lɛ aaashwere kɛya hiɛ. Akɛ Odasefoi anɔkwafoi lɛ, wɔbaanyɛ wɔtsɔ su loo mumɔ ni wɔjieɔ lɛ kpo lɛ kɛ hewalɛwoo ni wɔkɛhaa amɛ lɛ nɔ wɔye wɔbua amɛ.
24. Mɛni esa akɛ wɔfee yɛ nɛkɛ naagbee bei kwraa nɛɛ amli?
24 Naagbee bei amli nɛ. Wɔkɛ hemɔkɛyeli hiŋmɛi ena bɔ ni ŋwɛi shwiili lɛ ebawa yɛ wɔhiɛ lɛ. Maŋtsɛ Shwiili Nɔtalɔ lɛ kɛ nitsumɔ ewo egbɛjianɔtoo ni anaa lɛ dɛŋ akɛ eshiɛ etsɔɔ jeŋmaji lɛ, koni yɛ naagbee kwraa lɛ, amɛna amɛle mɔ ni Yehowa ji. (Ezekiel 39:7) Okɛ hegbɛ kpeteŋkpele nɛɛ atsu nii babaoo bɔ ni ooonyɛ ni okɛna Nyɔŋmɔ maŋtsɛyeli lɛ bembuu kɛ egbɛi krɔŋkrɔŋ lɛ hetsemɔ mli gbɛfaŋnɔ kɛtsɔ Yehowa ŋwɛi shwiili lɛ ni okɛ lɛ aaanyiɛ pɛpɛɛpɛ lɛ nɔ.
Te Obaaha Hetoo oha Tɛŋŋ?
◻ Mɛɛ nɔkwɛmɔ nɔ Ezekiel fee yɛ enitsumɔ lɛ gbɛfaŋ?
◻ Ni akɛ Nyɔŋmɔ gbɛjiantoo lɛ aaanyiɛ pɛpɛɛpɛ lɛ tsɔɔ mɛni?
◻ Te Ezekiel susu Yehowa wiemɔi lɛ ahe eha tɛŋŋ?
◻ Te wɔɔfee tɛŋŋ wɔnyiɛ Ezekiel nɔkwɛmɔ nɔ lɛ sɛɛ yɛ esane lɛ ni anaaa he miishɛɛ lɛ he?
◻ Mɛni esa akɛ ekanya Yehowa tsuji koni amɛkɛ ŋwɛi shwiili lɛ anyiɛ pɛpɛɛpɛ?
[Mfonirii ni yɔɔ baafa 15]
Mɛni ebiɔ koni anyɛ akɛ Yehowa ŋwɛi shwiili lɛ anyiɛ pɛpɛɛpɛ?
[Mfoniri ni yɔɔ baafa 16]
Ezekiel hiɛ sɔ hegbɛi ni Nyɔŋmɔ kɛha lɛ lɛ. Ani nakai oji?