“Sɔlemɔtsu Lɛ” Kɛ “Lumɔ Lɛ” Ŋmɛnɛ

“Ni lumɔ lɛ, kɛ́ amɛmiiba lɛ, ekɛ amɛ aba, ni kɛ́ amɛmiije kpo lɛ, ekɛ amɛ aje kpo.”—EZEKIEL 46:10.

1, 2. Mɛɛ anɔkwale krɛdɛɛ ko yeɔ buaa wɔ ni wɔnuɔ Ezekiel ninaa ní kɔɔ sɔlemɔtsu lɛ he lɛ mli saji babaoo ashishi?

BLEMA rabifoi lɛ ateŋ mɛi komɛi náaa Ezekiel wolo lɛ he miishɛɛ kɛmɔɔɔ shi. Taakɛ Talmud lɛ tsɔɔ lɛ, amɛteŋ mɛi komɛi po susu akɛ esaaa akɛ akɛ wolo lɛ fataa Ŋmalɛi Krɔŋkrɔŋi lɛ ahe. Sɔlemɔtsu lɛ he ninaa lɛ shishinumɔ titri wa waa kɛha amɛ aahu akɛ, amɛwie akɛ adesa nyɛŋ anu shishi. Biblia he nilelɔi krokomɛi hu nuuu Ezekiel ninaa ni kɔɔ Yehowa sɔlemɔtsu lɛ he lɛ shishi. Shi wɔ hu?

² Kɛjɛ be mli ni asaa ato jamɔ krɔŋŋ ama shi kɛbaa nɛɛ, Yehowa kɛ mumɔŋ nibii ashishinumɔ he la kpɛmɔi babaoo ejɔɔ ewebii, ni nɔ ni fata enɛɛmɛi ahe ji nɔ ni Nyɔŋmɔ mumɔŋ sɔlemɔtsu lɛ ji lɛ he nilee—Yehowa gbɛjianɔtoo ní tamɔ sɔlemɔtsu kɛha jamɔ krɔŋŋ lɛ.a Nɛkɛ anɔkwale krɛdɛɛ nɛɛ yeɔ ebuaa wɔ ni wɔnuɔ Ezekiel ninaa ní kɔɔ sɔlemɔtsu lɛ he lɛ mli saji babaoo ashishi. Nyɛhaa wɔsusua ninaa nɛɛ fãi ejwɛ lɛ ahe jogbaŋŋ—sɔlemɔtsu lɛ, osɔfoyeli lɛ, lumɔ lɛ, kɛ shikpɔŋ lɛ. Mɛni enɛɛmɛi tsɔɔ ŋmɛnɛ?

Sɔlemɔtsu lɛ kɛ Bo

 3. Mɛni wɔkaseɔ kɛjɛɔ sɛndo ni nɔ kwɔ kɛ gbogbo he nitɛŋmɔi ni yɔɔ hei ní atsɔɔ kɛboteɔ sɔlemɔtsu lɛ mli lɛ amli?

³ Ŋɔɔ lɛ akɛ wɔmiishara shi yɛ ninaa mli sɔlemɔtsu nɛɛ mli. Wɔbɛŋkɛ ni wɔkwɔ atrakpoi kpawo kɛyashɛ agbói wuji lɛ ateŋ ekome naa. Beni wɔtsɔ agbó nɛɛ mli kɛbote mli lɛ, wɔkwɛ ŋwɛigbɛ ni wɔnaa kpɛ wɔhe waa. Sɛndo lɛ nɔ kwɔ fe mitai 30! Enɛ haa wɔkaiɔ akɛ, nibii ni ataoɔ kɛha Yehowa jamɔ gbɛjianɔtoo lɛ mlibotemɔ lɛ anɔ kwɔlɔ. La ni kpɛɔ kɛtsɔɔ samfɛji lɛ amli lɛ kpɛɔ kɛshwieɔ gbogbo ni atɛŋ tɛŋ tsei yɛ he, ní akɛtsuɔ nii yɛ Ŋmalɛi lɛ amli kɛfeɔ jalɛ shidaamɔ he mfonirii lɛ anɔ. (Lala 92:13; Ezekiel 40:14, 16, 22) Gbɔmɛi ni ja yɛ jeŋba kɛ mumɔ mli pɛ yaa nɛkɛ he krɔŋkrɔŋ nɛɛ. Yɛ enɛ kɛ gbeekpãmɔ naa lɛ, wɔmiisumɔ ní wɔhi shi yɛ gbɛ ni ja nɔ koni wɔjamɔ lɛ asa Yehowa hiɛ.—Lala 11:7.

 4. Namɛi aŋmɛɛɛ amɛ gbɛ ní amɛbote sɔlemɔtsu lɛ mli lɛ, ni mɛni enɛ tsɔɔ wɔ?

⁴ Bulɔi atsũi etɛ yɛ he ni atsɔɔ kɛboteɔ mli lɛ afã biɛ kɛ biɛ. Ani bulɔi lɛ baaŋmɛ wɔ gbɛ ní wɔbote sɔlemɔtsu lɛ mli? Yehowa kɛɛ Ezekiel akɛ gbɔ, ni ji “tsui mli foolɔ” ko, akabote mli. (Ezekiel 40:10; 44:9) Mɛni no tsɔɔ? Etsɔɔ akɛ, Nyɔŋmɔ kpɛlɛɔ gbɔmɛi ni sumɔɔ emlai, ní amɛhiɔ shi yɛ naa lɛ pɛ anɔ ákɛ ejálɔi. (Yeremia 4:4; Romabii 2:29) Efɔ̃ɔ gbɔmɛi ni tamɔ nɛkɛ nine kɛbaa emumɔŋ buu, ni ji eshia kɛha jamɔ lɛ mli. (Lala 15:1-5) Kɛjɛ be mli ni ato jamɔ krɔŋŋ shishi yɛ afi 1919 kɛbaa nɛɛ, Yehowa shikpɔŋ nɔ gbɛjianɔtoo lɛ efĩ emlai ni kɔɔ jeŋba he lɛ asɛɛ ni etsɔɔ mli jogbaŋŋ fiofio. Afɔ̃ɔɔ gbɔmɛi ni jeɔ gbɛ amɛgboɔ toi lɛ nine kɛbafataaa ewebii ahe dɔŋŋ. Ŋmɛnɛ, nifeemɔ ni damɔ Biblia nɔ, ni ji efɔŋfeelɔi ni tsakeee amɛtsui ní ashwieɔ amɛ lɛ eha wɔjamɔ lɛ he etse, ni efee krɔŋŋ.—1 Korintobii 5:13.

 5. (a) Mɛɛ nibii je amɛhe yɛ Ezekiel ninaa lɛ kɛ Yohane ninaa ní aŋma yɛ Kpojiemɔ 7:9-15 lɛ mli? (b) Yɛ Ezekiel ninaa lɛ mli lɛ, namɛi akutsei 12 ní jáa yɛ agbó naa kpo lɛ nɔ lɛ feɔ amɛhe mfoniri?

⁵ Gbɛ ni atsɔɔ nɔ kɛboteɔ mli lɛ kã shi kɛyaa agbó naa kpo lɛ nɔ, he ni gbɔmɛi lɛ jáa Yehowa ní amɛjieɔ eyi yɛ lɛ. Enɛ kaiɔ wɔ bɔfo Yohane ninaa ní kɔɔ “asafo babaoo” ní jáa Yehowa “nyɔɔŋ kɛ shwane yɛ esɔlemɔtsu lɛ mli lɛ” he lɛ. Afee tɛŋ ahe mfoniri yɛ ninaai enyɔ lɛ fɛɛ mli. Yɛ Ezekiel ninaa lɛ mli lɛ, amɛhaa gbogboi ni yɔɔ hei ni atsɔɔ kɛboteɔ mli lɛ ahe feɔ fɛo. Yɛ Yohane ninaa lɛ mli lɛ, jálɔi lɛ hiɛ blɛoi yɛ amɛdɛŋ, ni enɛ feɔ miishɛɛ ni amɛyɔɔ yɛ Yehowa yijiemɔ mli kɛ kpeemɔ ni amɛkpeeɔ Yesu kɛbaa akɛ amɛ-Maŋtsɛ lɛ ahe mfoniri. (Kpojiemɔ 7:9-15) Yɛ Ezekiel ninaa lɛ mli saji agbɛfaŋ lɛ, Israel akutsei 12 lɛ feɔ “tooi krokomɛi” lɛ ahe mfoniri. (Yohane 10:16; okɛto Luka 22:28-30 he.) Ani bo hu ofata mɛi ni náa miishɛɛ yɛ Yehowa yijiemɔ mli, kɛtsɔ e-Maŋtsɛyeli lɛ shiɛmɔ nɔ lɛ ahe?

 6. Mɛɛ yiŋtoo yɔɔ niyelihei ni yɔɔ agbó naa kpo lɛ nɔ lɛ sɛɛ, ni enɛ baanyɛ akai mɛi ni ji tooi krokomɛi lɛ yɛ mɛɛ hegbɛ he?

⁶ Beni wɔsharaa shi yɛ agbó naa kpo lɛ nɔ lɛ, wɔnaa niyelihe tsũi 30 lɛ, he ni gbɔmɛi lɛ yeɔ nii ní amɛkɛbaha yɛ tsuijurɔ naa lɛ eko yɛ lɛ. (Ezekiel 40:17) Ŋmɛnɛ, mɛi ni fata tooi krokomɛi lɛ ahe lɛ kɛ kooloi eshãaa afɔle moŋ, shi amɛkɛ amɛdɛ folo baaa mumɔŋ sɔlemɔtsu lɛ mli. (Okɛto 2 Mose 23:15 he.) Bɔfo Paulo ŋma akɛ: “Belɛ nyɛhaa wɔtsɔa [Yesu] nɔ ní wɔkɛ yijiemɔ afɔle abahaa Nyɔŋmɔ daa; no ji naabui ni jajeɔ egbɛi lɛ ayibii lɛ. Shi ejurɔfeemɔ kɛ nikee lɛ, nyɛhiɛ akakpaa nɔ; ejaakɛ nakai afɔlei saa Nyɔŋmɔ hiɛ jogbaŋŋ.” (Hebribii 13:15, 16; Hoshea 14:3) Eji hegbɛ kpele ákɛ akɛ afɔlei ni tamɔ nakai aaaha Yehowa.—Abɛi 3:9, 27.

 7. Sɔlemɔtsu lɛ susumɔ lɛ maa mɛni nɔ mi kɛhaa wɔ?

⁷ Ezekiel miikwɛ beni ŋwɛibɔfo ko susuɔ nɛkɛ ninaa mli sɔlemɔtsu nɛɛ. (Ezekiel 40:3) Nakai nɔŋŋ akɛɛ bɔfo Yohane akɛ: “Tee shi ní osusu Nyɔŋmɔ sɔlemɔtsu lɛ kɛ afɔleshãa latɛ lɛ kɛ mɛi ni jáa Nyɔŋmɔ yɛ mli lɛ.” (Kpojiemɔ 11:1) Mɛni nibii asusumɔ nɛɛ tsɔɔ? Yɛ saji enyɔ lɛ fɛɛ mli lɛ, eka shi faŋŋ akɛ enɛ tsu nii ákɛ nɔmimaa nɔ̃, ni ji okadi ni tsɔɔ akɛ nɔ ko nɔ ko nyɛŋ atsĩ Yehowa naa yɛ eyiŋtoi ni kɔɔ jamɔ krɔŋŋ he lɛ ahe nitsumɔ mli. Nakai nɔŋŋ ŋmɛnɛ, wɔbaanyɛ wɔná nɔmimaa akɛ nɔ ko nɔ ko bɛ—nɔyelii ni yɔɔ hewalɛ lɛ ashitee-kɛ-woo ni naa wa po—nyɛŋ atsĩ jamɔ krɔŋŋ ni aaaku sɛɛ akɛba ekoŋŋ lɛ naa.

 8. Namɛi tsɔ̃ agbói lɛ amli kɛbote mligbɛ kpo lɛ nɔ lɛ, ni mɛni agbói nɛɛ haa wɔkaiɔ?

⁸ Yɛ be mli ni wɔnyiɛɔ kɛtsɔɔ agbó naa kpo lɛ nɔ lɛ, wɔnaa akɛ ayɛ agbói etɛ ni atsɔɔ mli kɛyaa mligbɛ kpo lɛ nɔ; mligbɛ agbói lɛ yɛ agbó naa agbói lɛ aŋɛlɛ nɔ, ni agbói lɛ fɛɛ daramɔ kome. (Ezekiel 40:6, 20, 23, 24, 27) Osɔfoi pɛ nyɛɔ amɛboteɔ mligbɛ kpo lɛ nɔ. Mligbɛ agbói lɛ kaiɔ wɔ akɛ, esa akɛ mɛi ni afɔ amɛ mu lɛ ashɛ ŋwɛi taomɔ nii kɛ mlai ahe, shi nakai taomɔ nii kɛ mlai lɛ nɔŋŋ kudɔɔ anɔkwa Kristofoi fɛɛ. Shi mɛni ji osɔfoi lɛ anitsumɔ, ni mɛɛ shishinumɔ ehiɛ ŋmɛnɛ?

Osɔfoi ni Yeɔ Anɔkwa

 9, 10. “Maŋtsɛmɛi ni yeɔ osɔfoi,” taakɛ akɛ osɔfoi akuu ni yɔɔ Ezekiel ninaa lɛ mli lɛ fee he mfoniri lɛ, kɛ mumɔŋ gbɛtsɔɔmɔ eha yɛ mɛɛ gbɛ nɔ?

⁹ Dani Kristofoi abe lɛ aaashɛ lɛ, no mli lɛ osɔfoi lɛ tsuɔ nii waa yɛ sɔlemɔtsu lɛ mli. Kooloi ni akɛbashãa afɔle lɛ agbee, amɛkɛ afɔleshãa latɛ lɛ nɔ shwiemɔ, kɛ nanemɛi osɔfoi kɛ gbɔmɛi lɛ asɔɔmɔ ji nitsumɔ ni biɔ hewalɛ diɛŋtsɛ. Shi amɛyɛ nitsumɔ kroko ni he hiaa. Yehowa kɛ fãmɔ hã yɛ osɔfoi lɛ ahe akɛ: “Amɛtsɔɔ mimaŋ lɛ srɔto ni yɔɔ nɔ̃ krɔŋkrɔŋ kɛ nɔ ni abule teŋ, ni amɛha amɛle srɔto ni yɔɔ nii ni he tseee kɛ nii ni he tse lɛ ateŋ.”—Ezekiel 44:23; Maleaki 2:7.

¹⁰ Ani ohiɛ sɔɔ nitsumɔ ni wa ni mɛi ni afɔ amɛ mu lɛ etsu akɛ kuu, ni ji “maŋtsɛmɛi ni yeɔ osɔfoi,” kɛ sɔɔmɔ ni amɛkɛha yɛ heshibaa mli yɛ jamɔ krɔŋŋ gbɛfaŋ lɛ? (1 Petro 2:9) Taakɛ Levi akutso lɛ mli osɔfoi ni hi shi yɛ blema lɛ ji lɛ, amɛnyiɛɔ hiɛ ni amɛkɛ mumɔŋ gbɛtsɔɔmɔ hãa, ni amɛyeɔ amɛbuaa gbɔmɛi koni amɛnu nɔ ni he tse ni saa Nyɔŋmɔ hiɛ, kɛ nɔ ni he tseee ni esaaa ehiɛ lɛ shishi. (Mateo 24:45) Gbɛtsɔɔmɔ ni tamɔ nɛkɛ, ní akɛhaa kɛtsɔɔ Biblia he woji kɛ Kristofoi asafoŋ kpeei kɛ kpeei wuji anɔ lɛ eye ebua gbɔmɛi akpekpei abɔ ni akpata amɛkɛ Nyɔŋmɔ teŋ.—2 Korintobii 5:20.

11. (a) Ezekiel ninaa lɛ ma bɔ ni hetsemɔ he hiaa yɛ osɔfoi lɛ agbɛfaŋ lɛ nɔ mi yɛ mɛɛ gbɛ nɔ? (b) Átsuu mɛi ní afɔ amɛ mu lɛ ahe yɛ mumɔŋ shishinumɔ naa yɛ naagbee gbii lɛ amli yɛ mɛɛ gbɛ nɔ?

¹¹ Shi kɛlɛ, esa akɛ osɔfoi lɛ atsu babaoo fe ní amɛaatsɔɔ mɛi krokomɛi ní amɛhe atse kɛkɛ; esa akɛ amɛ diɛŋtsɛ hu amɛhe atse. Enɛ hewɔ lɛ, Ezekiel tsɔ hiɛ ena hetsuumɔ nifeemɔ ko kɛha Israel osɔfoi lɛ. (Ezekiel 44:10-16) Nakai nɔŋŋ, yinɔsane tsɔɔ akɛ yɛ afi 1918 lɛ, Yehowa ta shi, ‘tamɔ niiahetsuulɔ’ yɛ emumɔŋ sɔlemɔtsu mli, ni ebakwɛ bɔ ni osɔfoi ni afɔ amɛ mu lɛ akuu lɛ yɔɔ. (Maleaki 3:1-5) Aŋmɛ mɛi ni ana akɛ amɛhe tse yɛ mumɔŋ, loo amɛtsake amɛtsui yɛ amɛtsutsu wɔŋjamɔ lɛ mli lɛ gbɛ koni amɛtsa sɔɔmɔ hegbɛ ní amɛyɔɔ yɛ emumɔŋ sɔlemɔtsu lɛ mli lɛ nɔ. Shi kɛlɛ, taakɛ mɔ fɛɛ mɔ ji lɛ, aŋkroaŋkroi ni afɔ amɛ mu lɛ baanyɛ atsɔmɔ mɛi ni he tseee—yɛ mumɔŋ kɛ jeŋba mli. (Ezekiel 44:22, 25-27) Ehe miihia ní amɛtsu nii waa bɔni afee ni amɛkã he amɛhi shi akɛ mɛi ni ‘je nɛɛ woko amɛhe muji.’—Yakobo 1:27; okɛto Marko 7:20-23 he.

12. Mɛni hewɔ esa akɛ wɔhiɛ asɔ mɛi ni afɔ amɛ mu lɛ anitsumɔ lɛ?

¹² Wɔteŋ mɔ fɛɛ mɔ baanyɛ abi akɛ, ‘Ani mihiɛ sɔɔ nɔkwɛmɔnɔ ni mɛi ni afɔ amɛ mu lɛ efee efɔ̃ shi yɛ afii abɔ ni amɛkɛsɔmɔ yɛ anɔkwayeli mli lɛ? Ani mikaseɔ amɛhemɔkɛyeli lɛ?’ Ehi akɛ asafo babaoo lɛ mli bii lɛ aaakai akɛ mɛi ni afɔ amɛ mu lɛ kɛ amɛ ehiŋ shi daa yɛ shikpɔŋ nɛɛ nɔ. Yehowa kɛɛ yɛ osɔfoi ni yɔɔ Ezekiel ninaa lɛ mli lɛ ahe akɛ: “Nyɛkahaa amɛ gbɛfaŋnɔ [ni ji shikpɔŋ] ko yɛ Israel; mi ji amɛ gbɛfaŋnɔ!” (Ezekiel 44:28) Nakai nɔŋŋ, mɛi ni afɔ amɛ mu lɛ bɛ naanɔ shihilɛhe yɛ shikpɔŋ nɔ. Amɛyɛ ŋwɛi gboshinii, ni asafo babaoo lɛ mli bii lɛ naa akɛ eji hegbɛ ni amɛná akɛ amɛaafi amɛsɛɛ, ni amɛwo amɛ hewalɛ beni amɛyɔɔ shikpɔŋ nɛɛ nɔ lolo lɛ.—Mateo 25:34-40; 1 Petro 1:3, 4.

Lumɔ Lɛ—Namɔ Ji Lɛ?

13, 14. (a) Mɛni hewɔ esa akɛ lumɔ lɛ ajɛ tooi krokomɛi lɛ ateŋ lɛ? (b) Namɔ lumɔ lɛ feɔ ehe mfoniri?

¹³ Agbɛnɛ sanebimɔ ko ni yɔɔ miishɛɛ teɔ shi. Belɛ, namɔ lumɔ lɛ damɔ shi kɛha? Akɛni awieɔ ehe ákɛ mɔ aŋkro kɛ agbɛnɛ, ákɛ kuu hewɔ lɛ, wɔbaanyɛ wɔsusu akɛ edamɔɔ shi kɛhaa gbɔmɛi akuu ko. (Ezekiel 44:3; 45:8, 9) Shi namɛi? Eka shi faŋŋ akɛ, jeee mɛi ni afɔ amɛ mu lɛ. Yɛ ninaa lɛ mli lɛ, ebɛŋkɛɔ osɔfoi lɛ kɛtsuɔ nii, shi ejeee amɛteŋ mɔ ko. Ákɛ mɔ ni tamɔɔɔ osɔfoi akuu lɛ, aha lɛ gboshinii yɛ shikpɔŋ lɛ nɔ, ni no hewɔ lɛ, eyɛ wɔsɛɛ shihilɛ yɛ shikpɔŋ nɛɛ nɔ, jeee ŋwɛi. (Ezekiel 48:21) Kɛfata he lɛ, Ezekiel 46:10 kɛɔ akɛ: “Ni lumɔ lɛ, kɛ́ amɛ [akutsei ni yeee osɔfo lɛ] miiba [sɔlemɔtsu lɛ agbó naa kpo lɛ nɔ] lɛ, ekɛ amɛ aba, ni kɛ́ amɛmiije kpo lɛ, ekɛ amɛ aje kpo.” Eboteee mligbɛ kpo lɛ nɔ, shi moŋ, ejáa yɛ agbó naa kpo lɛ nɔ, ni ekɛ gbɔmɛi lɛ yaa sɔlemɔtsu lɛ mli, ni ekɛ amɛ jeɔ kpo. Nɛkɛ otii nɛɛ kɛ nɔmimaa tsɔɔ akɛ lumɔ lɛ fata asafo babaoo ni ji tooi krokomɛi lɛ ahe.

¹⁴ Eyɛ faŋŋ akɛ, lumɔ lɛ yɛ gbɛnaa nii ko yɛ Nyɔŋmɔ webii ateŋ. Etáa shi yɛ agbó naa kpo lɛ nɔ, yɛ Bokagbɛ Agbó lɛ koi lɛ shi. (Ezekiel 44:2, 3) Enɛ tsɔɔ nɔkwɛmɔ gbɛhe, ní tamɔ hii onukpai ni hi shi yɛ Israel, ní taraa maŋ lɛ agbói lɛ anaa ní amɛkojoɔ lɛ anɔ̃ lɛ pɛpɛɛpɛ. (Rut 4:1-12; Abɛi 22:22) Namɛi yɔɔ tooi krokomɛi lɛ ateŋ ní amɛtsuɔ nɔkwɛmɔ nitsumɔi ŋmɛnɛ? Amɛji onukpai ni yɔɔ shikpɔŋ nɔ hiɛnɔkamɔ, ní akɛ mumɔ krɔŋkrɔŋ lɛ ehala amɛ lɛ. (Bɔfoi lɛ Asaji 20:28) No hewɔ lɛ aasaa lumɔ kuu lɛ bianɛ kɛ gbɛkpamɔ akɛ, sɛɛ mli lɛ, amɛbaasɔmɔ yɛ nitsumɔ nɔkwɛmɔ gbɛhe mli yɛ jeŋ hee lɛ mli.

15. (a) Ezekiel ninaa lɛ tsɔɔ wekukpaa ni kã onukpai ni fata asafo babaoo lɛ he lɛ, kɛ osɔfoi akuu ní afɔ amɛ mu lɛ ateŋ yɛ mɛɛ gbɛ nɔ? (b) Onukpai ni afɔ amɛ mu lɛ enyiɛ hiɛ yɛ mɛni mli yɛ Nyɔŋmɔ shikpɔŋ nɔ gbɛjianɔtoo lɛ mli?

¹⁵ Shi kɛlɛ, mɛɛ wekukpaa kã osɔfoi ní afɔ amɛ mu lɛ akuu lɛ kɛ nɛkɛ onukpai ni ji asafo babaoo lɛ mli bii, ní sɔmɔɔ bianɛ akɛ nɔkwɛlɔi lɛ ateŋ ŋmɛnɛ? Ezekiel ninaa lɛ tsɔɔ akɛ onukpai lɛ, ni ji asafo babaoo lɛ mli bii lɛ tsuɔ sɛɛfimɔ gbɛhe ni baa shi he nii, ni mɛi ni afɔ amɛ mu lɛ nyiɛɔ hiɛ yɛ mumɔŋ. Yɛ mɛɛ gbɛ nɔ? Kaimɔ akɛ, gbɛnaa nii kã osɔfoi ni yɔɔ ninaa lɛ mli lɛ anɔ akɛ amɛtsɔɔ gbɔmɛi lɛ anii yɛ mumɔŋ nibii agbɛfaŋ. Akɛɛ amɛ hu akɛ amɛsɔmɔ akɛ kojolɔi yɛ mla saji amli. Kɛfata he lɛ, akɛ nitsumɔ wo Levibii lɛ adɛŋ akɛ ‘amɛbu’ yɛ sɔlemɔtsu lɛ agbói lɛ anaa. (Ezekiel 44:11, 23, 24) Eka shi faŋŋ akɛ, esa akɛ lumɔ lɛ aba ehe shi eha mumɔŋ sɔɔmɔi kɛ hiɛnyiɛmɔ ni osɔfoi lɛ kɛhaa lɛ. Belɛ esa jogbaŋŋ akɛ mɛi ni afɔ amɛ mu lɛ nyiɛɔ hiɛ yɛ jamɔ krɔŋŋ mli yɛ ŋmɛnɛŋmɛnɛ beaŋ. Ákɛ nɔkwɛmɔnɔ lɛ, ahala Yehowa Odasefoi a-Nɔyeli Kuu lɛ mli bii lɛ kɛjɛ amɛteŋ. Onukpai anɔkwafoi ni afɔ amɛ mu nɛɛ etee nɔ amɛtsɔse lumɔ kuu ni daa fiofio lɛ aahu afii nyɔŋmai abɔ, ni amɛmiisaa mɛi ni baatsɔmɔ kuu nɛɛ mli bii wɔsɛɛ lɛ kɛha gbi ni akɛ nɔkwɛmɔ hegbɛ baawo amɛdɛŋ kwraa kɛmɔ shi yɛ Nyɔŋmɔ jeŋ hee ni baa lɛ mli lɛ.

16. Taakɛ Yesaia 32:1, 2 lɛ tsɔɔ lɛ, te esa akɛ onukpai fɛɛ afee amɛnii amɛha tɛŋŋ?

¹⁶ Mɛɛ nɔkwɛlɔi mɛi ni baatsɔmɔ emli bii wɔsɛɛ, ní amɛbaaná gbɛnaa nii babaoo ákɛ lumɔ kuu lɛ ji? Gbalɛ ni anaa yɛ Yesaia 32:1, 2 lɛ kɛɔ akɛ: “Naa, maŋtsɛ ko baaye maŋtsɛ yɛ jalɛ naa, ni lumɛi hu, baaye lumɛi yɛ kojomɔ naa; ni mɔ fɛɛ mɔ aaatsɔ tamɔ abobaahe yɛ kɔɔyɔɔ naa kɛ teemɔhe yɛ nugbɔnɛmɔ naa, tamɔ faai yɛ ŋa kpataa nɔ loo tɛsaa kpele ko ni haa hɔɔŋ yɛ shikpɔŋ gbiŋ nɔ.” Gbalɛ nɛɛ miiba mli ŋmɛnɛ yɛ be mli ni Kristofoi onukpai—mɛi ni afɔ amɛ mu lɛ kɛ tooi krokomɛi lɛ—fɛɛ tsuɔ nii kɛbuɔ tooku lɛ he kɛjɛɔ ‘nugbɔnɛmɔi’ tamɔ yiwaa kɛ nijiaŋwujee he lɛ.

17. Te esa akɛ Kristofoi nɔkwɛlɔi ana amɛhe amɛha tɛŋŋ, ni te esa akɛ asafoku lɛ ana amɛ amɛha tɛŋŋ?

¹⁷ Akɛ wiemɔi ni ji “lumɔ” kɛ ‘maŋtsɛ,’ ní hiɛ shishinumɔ kome yɛ Hebri mli lɛ, tsuuu nii akɛ sablã ni akɛwoɔ hii ahiɛ nyam. Shi moŋ, amɛtsɔɔ gbɛnaa nii ni kã hii nɛɛ anɔ ákɛ amɛkwɛ Nyɔŋmɔ tooku lɛ. Yehowa kɛ kɔkɔbɔɔ ni mli wa hã akɛ: “Bɔ ni nyɛfee lɛ, efá, nyɛ Israel lumɛi: nyɛjiea amimyeli kɛ nihaa, ni nyɛyea jalɛ sane ni nyɛfea nɔ ni ja.” (Ezekiel 45:9) Ehi akɛ onukpai fɛɛ ni yɔɔ ŋmɛnɛ lɛ kɛ ŋaawoo nɛɛ atsu nii. (1 Petro 5:2, 3) Nakai nɔŋŋ, tooku lɛ hu kpɛlɛɔ nɔ akɛ Yesu kɛ nɔkwɛlɔi ehã ákɛ “gbɔmɛi ateŋ nikeenii.” (Efesobii 4:8, NW) Atsɔɔ nibii ni ataoɔ yɛ amɛhe lɛ yɛ Nyɔŋmɔ Wiemɔ ni jɛ mumɔŋ lɛ mli. (1 Timoteo 3:1-7; Tito 1:5-9) Enɛ hewɔ lɛ Kristofoi nyiɛɔ onukpai lɛ ahiɛnyiɛmɔ sɛɛ.—Hebribii 13:7.

18. Mɛni ji mɛi ní baatsɔ lumɔ kuu wɔsɛɛ lɛ agbɛnaa nii lɛ ekomɛi bianɛ, ni mɛni baafee egbɛnaa nii wɔsɛɛ?

¹⁸ Yɛ Biblia beaŋ lɛ, lumɛi lɛ ekomɛi yɛ hegbɛi babaoo, ni mɛi krokomɛi anɔ faaa. Ŋmɛnɛ, onukpai ni ji asafo babaoo lɛ mli bii lɛ miitsu gbɛnaa nii srɔtoi ahe nii. Amɛteŋ mɛi komɛi sɔmɔɔ yɛ asafo kome mli; mɛi krokomɛi sɔmɔɔ asafoi babaoo ákɛ nɔkwɛlɔi gbɛfalɔi; mɛi krokomɛi sɔmɔɔ maŋ muu fɛɛ ákɛ Nitsumɔhe Nine Ajinafoi Akuu mli bii; mɛi krokomɛi yeɔ buaa Nɔyeli Kuu lɛ mli ajinafoi srɔtoi lɛ tɛ̃ɛ. Jeŋ hee lɛ mli lɛ, Yesu baahala “lumɛi yɛ shikpɔŋ lɛ nɔ fɛɛ” koni amɛnyiɛ hiɛ yɛ Yehowa jálɔi ateŋ yɛ shikpɔŋ lɛ nɔ. (Lala 45:17) Ŋwanejee ko bɛ he akɛ ebaahala mɛnɛɛmɛi ateŋ mɛi babaoo kɛbaajɛ onukpai anɔkwafoi ni yɔɔ ŋmɛnɛ lɛ ateŋ. Akɛni hii nɛɛ miitsɔɔ amrɔ nɛɛ akɛ amɛshɛ hewɔ lɛ, ebaasumɔ ní ekɛ hegbɛi wuji awo amɛteŋ mɛi pii adɛŋ wɔsɛɛ beni ejieɔ lumɔ kuu lɛ nitsumɔ kpo yɛ jeŋ hee lɛ mli lɛ.

Nyɔŋmɔ Webii Ashikpɔŋ lɛ Ŋmɛnɛ

19. Mɛni shikpɔŋ ni yɔɔ Ezekiel ninaa lɛ mli damɔ shi kɛha?

¹⁹ Ezekiel ninaa lɛ hu feɔ Israel shikpɔŋ ní aku sɛɛ akɛha amɛ ekoŋŋ lɛ he mfoniri. Mɛni ninaa lɛ fã nɛɛ damɔ shi kɛha? Gbalɛi krokomɛi ni kɔɔ sɛɛkuu lɛ he lɛ gba fɔ̃ shi akɛ shikpɔŋ lɛ, ni ji Israel, baafee paradeiso tamɔ Eden. (Ezekiel 36:34, 35) Ŋmɛnɛ, wɔmiiná “shikpɔŋ” ko ni akɛha ekoŋŋ mli ŋɔɔmɔ, ni yɛ shishinumɔ ko naa lɛ, no hu tamɔ Eden. Nakai nɔŋŋ hu wɔfɔɔ wɔ mumɔŋ paradeiso lɛ he wiemɔ. Buu-Mɔɔ lɛ tsɔɔ ‘wɔshikpɔŋ’ lɛ shishi akɛ eji Nyɔŋmɔ webii ni ehala amɛ lɛ “ahegbɛ ní ahã amɛ akɛ amɛkɛtsu nii.”b He fɛɛ he ni Yehowa tsulɔ ko yɔɔ lɛ, eyɛ nakai shikpɔŋ ni akɛha ekoŋŋ lɛ nɔ, shii abɔ ni ebɔɔ mɔdɛŋ akɛ eeefi anɔkwa jamɔ sɛɛ kɛtsɔ Kristo Yesu nanemaahei lɛ asɛɛnyiɛmɔ nɔ lɛ.—1 Petro 2:21.

20. Mɛɛ shishitoo mla wɔbaanyɛ wɔkase kɛjɛ “nɔwómɔ nɔkeenɔ krɔŋkrɔŋ” ni yɔɔ Ezekiel ninaa lɛ mli lɛ mli, ni wɔbaanyɛ wɔkɛ shishitoo mla nɛɛ atsu nii yɛ mɛɛ gbɛ nɔ?

²⁰ Ni shikpɔŋ lɛ fã ni atsɛɔ lɛ “nɔwómɔ nɔkeenɔ krɔŋkrɔŋ lɛ” hu? Gbɔmɛi lɛ kɛ enɛ hãa kɛha osɔfoyeli lɛ kɛ maŋ lɛ sɛɛfimɔ. Nakai nɔŋŋ esa akɛ “shikpɔŋ lɛ nɔ maŋ muu lɛ fɛɛ” kɛ shikpɔŋ lɛ fã ko ahã kɛha lumɔ lɛ. Mɛni enɛ tsɔɔ ŋmɛnɛ? Yɛ anɔkwale mli lɛ, etsɔɔɔ akɛ esa akɛ akɛ osɔfoyeli kuu ko nyɔmɔwoo he jatsu ko afɔ̃ Nyɔŋmɔ tsuji anɔ. (2 Tesalonikabii 3:8) Shi moŋ, sɛɛfimɔ ni akɛhaa onukpai lɛ ŋmɛnɛ lɛ ji mumɔŋ nɔ̃ titri. Nɔ ni fata he ji yelikɛbuamɔ ni akɛhaa amɛ yɛ nitsumɔ ni kã shi amrɔ nɛɛ mli, kɛ ekomefeemɔ, kɛ heshibaa mumɔ ni ajieɔ lɛ kpo hu. Ni kɛlɛ, taakɛ eji yɛ Ezekiel beaŋ lɛ, akɛ nɔwómɔ nɔkeenɔ nɛɛ ‘haa Yehowa,’ jeee gbɔmɔ ko.—Ezekiel 45:1, 7, 16.

21. Mɛni wɔbaanyɛ wɔkase kɛjɛ shikpɔŋ ni yɔɔ Ezekiel ninaa lɛ mli lɛ mlijaramɔ lɛ mli?

²¹ Jeee lumɔ lɛ kɛ osɔfoyeli lɛ pɛ ahã amɛ gbɛhei yɛ shikpɔŋ ní akɛha ekoŋŋ nɛɛ nɔ. Shikpɔŋ lɛ mlijaramɔ lɛ tsɔɔ akɛ akutsei 12 lɛ ateŋ mɔ fɛɛ mɔ yɛ egboshinii ni ji lɛ diɛŋtsɛ enɔ̃. (Ezekiel 47:13, 22, 23) No hewɔ lɛ jeee mumɔŋ paradeiso lɛ pɛ mli asafo babaoo lɛ mli bii lɛ yɔɔ gbɛhe yɛ ŋmɛnɛ, shi moŋ amɛnine baashɛ shikpɔŋ ko nɔ ákɛ amɛnɔ̃, beni amɛnáa gbɛhe ákɛ gboshinii yɛ Nyɔŋmɔ Maŋtsɛyeli lɛ nɔyelihe ni yɔɔ shikpɔŋ nɔ lɛ mli lɛ.

22. (a) Maŋ ni yɔɔ Ezekiel ninaa lɛ mli lɛ damɔ shi kɛha mɛni? (b) Mɛni wɔbaanyɛ wɔkase kɛjɛ agbói ní maŋ lɛ yɔɔ yɛ ekoji lɛ eko fɛɛ eko lɛ mli?

²² Yɛ naagbee lɛ, mɛni maŋ ni yɔɔ ninaa lɛ mli lɛ damɔ shi kɛha? Ejeee maŋ ko ni yɔɔ ŋwɛi, ejaakɛ ekã “kwasafo” shikpɔŋ (ní bɛ krɔŋkrɔŋ) lɛ teŋ. (Ezekiel 48:15-17) No hewɔ lɛ, esa akɛ efee nɔ ko ni yɔɔ shikpɔŋ lɛ nɔ. Ojogbaŋŋ, mɛni ji maŋ? Ani ehiɛɛɛ shishinumɔ ni tsɔɔ gbɔmɛi ní efee ekome ákɛ kuu, ní amɛbatsɔmɔ mɛi ní ato amɛhe gbɛjianɔ? Hɛɛ. Enɛ hewɔ lɛ, etamɔ nɔ ni maŋ lɛ feɔ shikpɔŋ nɔkwɛmɔ gbɛjianɔtoo ní mɛi fɛɛ ni baafee jalɛ shikpɔŋ lɛ nɔ bii lɛ baaná he sɛɛ lɛ he mfoniri. Ebaatsu nii jogbaŋŋ kɛmɔ shi yɛ “shikpɔŋ hee” ni baa lɛ nɔ. (2 Petro 3:13) Maŋ lɛ naa agbói ni yɔɔ koji lɛ fɛɛ, ekome kɛha akutso fɛɛ akutso lɛ, tsɔɔ jogbaŋŋ akɛ nɔ fɛɛ nɔ mli kã shi faŋŋ. Ŋmɛnɛ, nitsumɔ nɔkwɛmɔ gbɛjianɔtoo ní kwɛɔ Nyɔŋmɔ webii anɔ lɛ jeee nɔ ni tsuɔ nii yɛ teemɔŋ, loo yɛ dujiaŋ. Esa akɛ nyɛmimɛi hii ní akɛ nitsumɔ ewo amɛdɛŋ lɛ afee mɛi ní anyɛɔ abɛŋkɛɔ amɛ; mɔ fɛɛ mɔ le shishitoo mlai ní kudɔɔ amɛ. Anɔkwale ni eji akɛ gbɔmɛi ni jɛ akutsei fɛɛ mli hũɔ shikpɔŋ ní hãa maŋ lɛ niyenii lɛ nɔ lɛ kaiɔ wɔ akɛ tooi krokomɛi lɛ kɛ heloonaa nibii po fiɔ nɔkwɛmɔ gbɛjianɔi srɔtoi ní ato kɛha Nyɔŋmɔ webii yɛ je lɛŋ fɛɛ lɛ sɛɛ.—Ezekiel 48:19, 30-34.

23. Mɛni wɔbaasusu he yɛ nikasemɔ ni nyiɛ sɛɛ lɛ mli?

²³ Shi, faa ni hoɔ kɛjɛɔ sɔlemɔtsu lɛ mli he krɔŋkrɔŋ lɛ hu? Nɔ ni no tsɔɔ ŋmɛnɛ, aahu kɛtsáa nɔ kɛyaa wɔsɛɛ be mli lɛ baafee nikasemɔi ní tsara nɔ nɛɛ ateŋ nɔ ni ji etɛ kɛ naagbee nɔ lɛ saneyitso.

[Shishigbɛ niŋmai]

Otii Kɛha Emlitii

◻ Sɔlemɔtsu ni yɔɔ Ezekiel ninaa lɛ mli lɛ feɔ mɛni he mfoniri?

◻ Osɔfoi ni sɔmɔɔ yɛ sɔlemɔtsu lɛ mli lɛ feɔ namɛi ahe mfoniri?

◻ Mɛni ji lumɛi akuu lɛ, ni mɛni ji egbɛnaa nii lɛ ekomɛi?

◻ Mɛni ji shikpɔŋ ni yɔɔ Ezekiel ninaa lɛ mli lɛ, ni ajara ahã akutsei 12 lɛ yɛ mɛɛ shishinumɔ naa?

◻ Maŋ lɛ feɔ mɛni he mfoniri?

[Nitɛŋmɔ ni akɛmiitsɔɔ nɔ ko mli/Shikpɔŋ he mfoniri ni yɔɔ baafa 15]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

Shikpɔŋ lɛ mlijaramɔ taakɛ afee he mfoniri yɛ Ezekiel ninaa lɛ mli

AKUTSEI NYƆŊMA KƐ ENYƆ LƐ

Ŋshɔ Kpeteŋkpele Lɛ

Galilea Ŋshɔ

Yordan Faa

Ŋoo Ŋshɔ

DAN

ASHER

NAFTALI

MANASE

EFRAIM

RUBEN

YUDA

LUMƆ LƐ

BENYAMIN

SIMEON

ISAKAR

ZEBULON

GAD

[Diagram]

NƆWOMƆ NƆKEENƆ KRƆŊKRƆŊ LƐ MLILƐƐMƆ

A. “Yehowa Diɛŋtsɛ Yɛ Jɛmɛ” (Yehowa-Shama); B. maŋ lɛ shikpɔŋ ni baa nii

Levibii Agbɛfaŋnɔ

Yehowa He Krɔŋkrɔŋ

Osɔfoi Agbɛfaŋnɔ

B A B