Yehowa Jɔɔmɔ Yɛ Wɔ “Shikpɔŋ” Lɛ Nɔ
“Aaatsá nɔ fɛɛ nɔ yɛ he ni nɛkɛ faa nɛɛ aaaba lɛ, ni eyi aaaná wala.”—EZEKIEL 47:9.
1, 2. (a) Te nu he hiaa ha tɛŋŋ? (b) Mɛni Ezekiel ninaa mli faa lɛ mli nu lɛ feɔ he mfoniri?
NU JI nɔ ko ŋleŋle, ní yɔɔ naakpɛɛ. Bɔɔnii fɛɛ ni yɔɔ wala mli lɛ awala damɔ nɔ. Wɔteŋ mɔ ko kwraa nyɛŋ ahi wala mli kɛ́ enaaa nu kwraa. Wɔkɛtsuɔ nii hu kɛha hetsemɔ, ejaakɛ nu baanyɛ ejie muji ní efɔ́ kɛya. No hewɔ lɛ wɔjuɔ wɔhe, wɔfɔ́ɔ wɔtadei, kɛ wɔ niyenii po he yɛ mli. Nakai feemɔ baanyɛ ahere wɔyiwala.
2 Biblia lɛ kɛ nu tsuɔ nii kɛfeɔ gbɛjianɔ ni Yehowa toɔ yɛ mumɔŋ kɛha wala lɛ he mfoniri. (Yeremia 2:13; Yohane 4:7-15) Nɔ ni fata gbɛjianɔ ni etoɔ nɛɛ he ji ewebii ahetsuumɔ kɛtsɔ Kristo kpɔmɔ afɔleshãa lɛ nɔ kɛ Nyɔŋmɔ he nilee ní anaa yɛ e-Wiemɔ lɛ mli lɛ. (Efesobii 5:25-27) Yɛ Ezekiel sɔlemɔtsu lɛ he ninaa lɛ mli lɛ, naakpɛɛ faa ni hoɔ kɛjɛɔ sɔlemɔtsu lɛ mli lɛ feɔ jɔɔmɔi ni haa mɔ wala, ni tamɔ nɛkɛ he okadi. Shi mɛɛ be nakai faa lɛ hoɔ, ni mɛni etsɔɔ kɛhaa wɔ ŋmɛnɛ?
Faa ko Miiho yɛ Shikpɔŋ ni Amɛ́ba nɔ Ekoŋŋ lɛ Nɔ
3. Mɛɛ niiashikpamɔ Ezekiel ná, taakɛ abɔ he amaniɛ yɛ Ezekiel 47:2-12 lɛ?
3 Ákɛ nomii yɛ Babilon lɛ, Yehowa gbɛjianɔtoi ahe miihia Ezekiel webii lɛ waa diɛŋtsɛ. Belɛ kwɛ bɔ ni ewoɔ mɔ hewalɛ akɛ Ezekiel aaana ni nu miitsere kɛmiijɛ he krɔŋkrɔŋ lɛ ni eeho kɛmiijɛ ninaa mli sɔlemɔtsu lɛ mli! Ŋwɛibɔfo ko susu faa lɛ ninetalɔi 1,000 teŋ kɛlɛ. Emli kwɔlɛ lɛ jɛ nanetalɔ nɔ kɛyashɛ nakutsei anaa kɛyatá hɛ, kɛyashɛ hé ni agbɛnɛ, ebatsɔ faa ni biɔ seremɔ. Faa lɛ kɛ wala kɛ yibiiwoo babaoo baa. (Ezekiel 47:2-11) Akɛɛ Ezekiel akɛ: “Yeli tsei srɔtoi fɛɛ aaakwɛ̃ yɛ faa lɛ toi biɛ kɛ biɛ.” (Ezekiel 47:12a) Beni faa lɛ bote Ŋshɔ ni Egbo—ni ji nu ni bua shi ni wala bɛ mli—lɛ mli lɛ, wala ba mli! Looi bafá babaoo yɛ mli. Wuoyaa nitsumɔ shwere babaoo.
4, 5. Yoel gbalɛ ni kɔɔ faa ko he lɛ tamɔ Ezekiel nɔ̃ lɛ yɛ mɛɛ gbɛ nɔ, ni mɛni hewɔ enɛ he hiaa lɛ?
4 Ekolɛ nɛkɛ gbalɛ ni yɔɔ miishɛɛ nɛɛ ha Yuda nomii lɛ kai gbalɛ kroko ni aŋma nɔ ni fe afii ohai enyɔ kɛtsɔ hiɛ lɛ akɛ: “Nu hiŋmɛi aaajɛ Yehowa we lɛ aje kpo, ni eeeyaha Shitim jɔɔ lɛ nu.”a (Yoel 4:18) Taakɛ Ezekiel nɔ̃ lɛ ji lɛ, Yoel gbalɛ lɛ gbaa akɛ faa ko baaho kɛjɛ Nyɔŋmɔ we lɛ, ni ji sɔlemɔtsu lɛ mli, ni ekɛ wala baaba kpokpaa ko ni nɔ egbĩ nɔ.
5 Buu-Mɔɔ lɛ kɛ afii babaoo etsɔɔ akɛ Yoel gbalɛ lɛ miiba mli yɛ wɔbe nɛɛ mli.b Belɛ, eka shi faŋŋ akɛ, nakai nɔŋŋ eji yɛ Ezekiel gbalɛ ni tamɔ no lɛ hu he. Yehowa jɔɔmɔi eho aahu lɛɛlɛŋ, yɛ Nyɔŋmɔ webii ashikpɔŋ ni akɛha amɛ ekoŋŋ lɛ nɔ ŋmɛnɛ, taakɛ eji yɛ blema Israel lɛ.
Jɔɔmɔi ní Miiho Babaoo
6. Kulɛ esa akɛ lá ní akɛshwã ninaa mli afɔleshãa latɛ lɛ nɔ lɛ akai Yudafoi lɛ yɛ mɛni he?
6 Nɛgbɛ ji jɔɔmɔi ni baa Nyɔŋmɔ webii ni akɛ amɛ eba ekoŋŋ lɛ anɔ lɛ jɛɛhe? Ojogbaŋŋ, kadimɔ akɛ nu lɛ hoɔ kɛjɛɔ Nyɔŋmɔ sɔlemɔtsu lɛ mli. Nakai nɔŋŋ ŋmɛnɛ, jɔɔmɔi jɛɔ Yehowa ŋɔɔ kɛtsɔɔ emumɔŋ sɔlemɔtsu kpeteŋkpele—ni ji gbɛjianɔtoo kɛha jamɔ krɔŋŋ lɛ nɔ. Ezekiel ninaa lɛ kɛ oti ko ni he hiaa fataa he. Yɛ mligbɛ kpo lɛ nɔ lɛ, faa lɛ hoɔ kɛtsɔɔ afɔleshãa latɛ lɛ he, yɛ ewuoyigbɛ nɔŋŋ. (Ezekiel 47:1) Afɔleshãa latɛ lɛ yɛ ninaa lɛ mli sɔlemɔtsu lɛ teŋ tuuntu. Yehowa je gbɛ etsɔɔ mli fitsofitso eha Ezekiel, ni ekɛ fãmɔ hã akɛ akɛ afɔleshãa lá lɛ ashwã nɔ. (Ezekiel 43:13-18, 20) Nakai afɔleshãa latɛ lɛ hiɛ shishinumɔ kpele diɛŋtsɛ kɛha Israelbii fɛɛ. Akpɛlɛ kpaŋmɔ ni kã amɛkɛ Yehowa teŋ lɛ nɔ be ko ní eho jeeŋmɔ, beni Mose kɛ lá shwã afɔleshãa latɛ ko nɔ yɛ Sinai Gɔŋ lɛ shishigbɛ lɛ. (2 Mose 24:4-8) Kulɛ esa akɛ lá ni akɛshwãa ninaa mli afɔleshãa latɛ lɛ nɔ lɛ akai amɛ akɛ kɛ́ amɛku amɛsɛɛ kɛtee amɛ shikpɔŋ ní akɛha amɛ ekoŋŋ lɛ nɔ lɛ, Yehowa jɔɔmɔi baaba amɛnɔ, shii abɔ ni amɛyeɔ kpaŋmɔ ni kã amɛkɛ lɛ teŋ lɛ nɔ lɛ.—5 Mose 28:1-14.
7. Mɛɛ shishinumɔ Kristofoi náa yɛ okadi afɔleshãa latɛ lɛ mli ŋmɛnɛ?
7 Nakai nɔŋŋ ajɔɔ Nyɔŋmɔ webii ŋmɛnɛ kɛtsɔ kpaŋmɔ ko nɔ—nɔ ni hi fe klɛŋklɛŋ nɔ̃ lɛ, kpaŋmɔ hee lɛ. (Yeremia 31:31-34) No hu akɛ lá, ni ji Yesu Kristo nɔ̃ ekpɛlɛ nɔ jeeŋmɔ. (Hebribii 9:15-20) Ŋmɛnɛ, kɛ́ wɔfata mɛi ni afɔ amɛ mu ní yɔɔ nakai kpaŋmɔ lɛ mli lɛ ahe jio, wɔfata “tooi krokomɛi” ni baaná he sɛɛ lɛ ahe jio, wɔnáa shishinumɔ kpele yɛ okadi afɔleshãa latɛ lɛ mli. Efeɔ Nyɔŋmɔ suɔmɔnaa nii ni kɔɔ Kristo afɔleshãa lɛ he lɛ he okadi. (Yohane 10:16; Hebribii 10:10) Taakɛ okadi afɔleshãa latɛ lɛ yɔɔ mumɔŋ sɔlemɔtsu lɛ teŋ tuuntu lɛ, nakai nɔŋŋ Kristo kpɔmɔ afɔleshãa lɛ he hiaa fe fɛɛ yɛ jamɔ krɔŋŋ gbɛfaŋ. No nɔ adamɔɔ akɛ wɔhe eshai keɔ wɔ, ni no nɔŋŋ nɔ wɔhiɛnɔkamɔi fɛɛ kɛha wɔsɛɛ lɛ damɔ. (1 Yohane 2:2) Enɛ hewɔ lɛ wɔbɔɔ mɔdɛŋ ní wɔhi shi yɛ mla ni fata kpaŋmɔ hee lɛ he, ni ji “Kristo mla lɛ” naa. (Galatabii 6:2) Shii abɔ ni wɔfeɔ nakai lɛ, Yehowa gbɛjianɔtoo kɛha wala lɛ he baaba sɛɛnamɔ kɛha wɔ.
8. (a) Mɛni anaaa yɛ ninaa mli sɔlemɔtsu lɛ mligbɛ kpo lɛ nɔ? (b) Mɛɛ gbɛ nɔ osɔfoi ni yɔɔ ninaa mli sɔlemɔtsu lɛ mli lɛ baatsɔ amɛtsuu amɛhe?
8 Sɛɛnamɔi nɛɛ ateŋ ekome ji shidaamɔ kpakpa ni aaaná yɛ Yehowa hiɛ. Yɛ ninaa mli sɔlemɔtsu lɛ mli lɛ, anaaa nɔ ko ní anaa faŋŋ diɛŋtsɛ yɛ kpeebuu lɛ kpo lɛ nɔ kɛ Salomo sɔlemɔtsu lɛ mli—ni ji lalakã agbo, ní sɛɛ mli lɛ atsɛ lɛ akɛ ŋshɔ, kɛha osɔfoi lɛ ní amɛkɛfɔflɔ amɛhe lɛ yɛ mligbɛ kpo lɛ nɔ. (2 Mose 30:18-21; 2 Kronika 4:2-6) Mɛni osɔfoi ni yɔɔ Ezekiel ninaa mli sɔlemɔtsu lɛ mli baanyɛ amɛkɛtsuu amɛhe? Eka shi faŋŋ akɛ, nakai naakpɛɛ faa ni hoɔ kɛtsɔɔ mligbɛ kpo lɛ nɔ lɛ! Hɛɛ, Yehowa baajɔɔ amɛ kɛ gbɛ ní amɛaatsɔ nɔ amɛná shidaamɔ ni he tse, loo nɔ ni yɔɔ krɔŋkrɔŋ.
9. Mɛɛ gbɛ nɔ mɛi ni afɔ amɛ mu lɛ kɛ asafo babaoo lɛ mli bii lɛ aaatsɔ amɛna shidaamɔ ni he tse ŋmɛnɛ?
9 Nakai nɔŋŋ ŋmɛnɛ, akɛ shidaamɔ ni he tse yɛ Yehowa hiɛ ejɔɔ mɛi ni afɔ amɛ mu lɛ. Yehowa buɔ amɛ akɛ amɛyɛ krɔŋkrɔŋ, ni etsɛɔ amɛ jalɔi. (Romabii 5:1, 2) Shi “asafo babaoo,” ní akutsei ni yeee osɔfoi lɛ feɔ amɛhe mfoniri lɛ hu? Amɛjáa yɛ agbó naa kpo lɛ nɔ, ni nakai faa lɛ nɔŋŋ hoɔ kɛtsɔɔ ninaa mli sɔlemɔtsu lɛ fã nɛɛ hu mli. Belɛ, kwɛ bɔ ni esa jogbaŋŋ akɛ bɔfo Yohane na asafo babaoo lɛ ní amɛwo atadei yɛji ni he tse, beni amɛjáa yɛ mumɔŋ sɔlemɔtsu lɛ kpo lɛ nɔ lɛ! (Kpojiemɔ 7:9-14) Bɔ ni akɛ amɛ eye ehã yɛ jeŋ ni efite nɛɛ mli lɛ fɛɛ sɛɛ lɛ, amɛbaanyɛ amɛná nɔmimaa akɛ shii abɔ ni amɛnáa Kristo kpɔmɔ afɔleshãa lɛ mli hemɔkɛyeli lɛ, Yehowa buɔ amɛ akɛ amɛhe tse, ni amɛyɛ krɔŋŋ. Mɛɛ gbɛ nɔ amɛtsɔɔ amɛjieɔ hemɔkɛyeli kpo? Kɛtsɔ Yesu nanemaahei lɛ asɛɛnyiɛmɔ, kɛ hekɛnɔfɔ̃ɔ kwraa ní amɛnáa yɛ kpɔmɔ afɔleshãa lɛ mli lɛ nɔ.—1 Petro 2:21.
10, 11. Mɛni ji okadi nu lɛ he nɔ ko ni he hiaa waa, ni te enɛ kɔɔ faa lɛ mlilɛɛmɔ ni yɔɔ naakpɛɛ lɛ he ehaa tɛŋŋ?
10 Taakɛ átsĩ tã momo lɛ, nɛkɛ okadi nu nɛɛ fã kroko yɛ ni he hiaa—nilee. Yehowa tsɔ osɔfoi lɛ anɔ ekɛ Ŋmalɛ naa gbɛtsɔɔmɔ jɔɔ ewebii lɛ, yɛ Israel maŋ ní akɛ amɛ eba ekoŋŋ lɛ mli. (Ezekiel 44:23) Kɛ akɛaato he lɛ, Yehowa kɛ e-Wiemɔ ni ji anɔkwale lɛ he gbɛtsɔɔmɔi babaoo ejɔɔ ewebii ŋmɛnɛ, kɛtsɔ “maŋtsɛmɛi ni yeɔ osɔfoi” lɛ anɔ. (1 Petro 2:9) Yehowa Nyɔŋmɔ, kɛ eyiŋtoi kɛha adesai, kɛ titri lɛ Yesu Kristo kɛ Mesia Maŋtsɛyeli lɛ he nilee etee nɔ eho babaoo yɛ naagbee gbii nɛɛ amli. Kwɛ bɔ ni mumɔŋ niyenii kpakpai ní wɔnine shɛɔ nɔ, ní eyaa nɔ efáa babaoo daa lɛ yɔɔ nyam hã!—Daniel 12:4.
11 Taakɛ faa ni ŋwɛibɔfo lɛ susu lɛ tee nɔ emli kwɔ fiofio lɛ, nakai nɔŋŋ jɔɔmɔi ní hãa wala, ni jɛɔ Yehowa ŋɔɔ lɛ efa yɛ naakpɛɛ gbɛ nɔ koni enyɛ etsu gbɔmɛi babaoo ni baa wɔ mumɔŋ shikpɔŋ ní ajɔ́ɔ lɛ lɛ nɔ lɛ ahe nii. Gbalɛ kroko hu ní kɔɔ sɛɛkuu kɛbaa lɛ he lɛ gba efɔ̃ shi akɛ: “Mɔ bibioo ko aaatsɔ̃ mɛi akpe, ni mɔ fioo hu aaatsɔ maŋ ni wa: Kɛ shɛ ebe lɛ, mi, Yehowa, maha afee oyá!” (Yesaia 60:22) Nɛkɛ wiemɔi nɛɛ eba mli anɔkwale—gbɔmɛi akpekpei abɔ eké yuu kɛba koni amɛbafata wɔhe yɛ jamɔ krɔŋŋ mli! Yehowa eha mɛi fɛɛ ni baa eŋɔɔ lɛ ená “nu” babaoo. (Kpojiemɔ 22:17) Ekwɛɔ koni eshikpɔŋ nɔ gbɛjianɔtoo lɛ aja Bibliai kɛ Biblia kasemɔ woji yɛ je lɛŋ fɛɛ, yɛ wiemɔi ohai abɔ mli. Nakai nɔŋŋ ato Kristofoi asafoŋ kpeei kɛ kpeei wuji ahe gbɛjianɔ yɛ je lɛŋ fɛɛ koni anyɛ akɛ anɔkwale lɛ he nui ni mli tse keŋkeŋ aha mɛi fɛɛ. Te gbɛjianɔtoi ni tamɔ nɛkɛ saa gbɔmɛi ahe ehaa tɛŋŋ?
Nu lɛ kɛ Wala Baa!
12. (a) Mɛni hewɔ tsei ni yɔɔ Ezekiel ninaa lɛ mli lɛ nyɛɔ amɛwoɔ yibii taakɛ amɛfeɔ lɛ? (b) Mɛni tsei ni woɔ yibii nɛɛ damɔ shi kɛha yɛ naagbee gbii lɛ amli?
12 Faa ni yɔɔ Ezekiel ninaa lɛ mli lɛ kɛ wala kɛ hewalɛnamɔ baa. Beni Ezekiel ná ele tsei ni baakwɛ̃ yɛ faa lɛ toi lɛ, akɛɛ lɛ akɛ: “Amɛyibaai lɛ ŋalaŋ, ni amɛyibii lɛ hu etaŋ. . . . Ni amɛyibii lɛ aaatsɔ niyenii, ni amɛyibaai lɛ aaatsɔ tsofa.” Mɛni hewɔ tsei nɛɛ woɔ yibii yɛ naakpɛɛ gbɛ ni tamɔ nɛkɛ nɔ lɛ? “Ejaakɛ amɛ nu lɛ, he krɔŋkrɔŋ lɛ ejɛɔ ehoɔ.” (Ezekiel 47:12b) Nɛkɛ okadi tsei nɛɛ feɔ gbɛjianɔi fɛɛ ní Nyɔŋmɔ eto ní ekɛ adesai baaba emuuyeli mli ekoŋŋ kɛtsɔ Yesu kpɔmɔ afɔleshãa lɛ nɔ lɛ he mfoniri. Amrɔ nɛɛ, shwɛɛnii ni afɔ amɛ mu lɛ nyiɛɔ hiɛ yɛ mumɔŋ niyenii kɛ tsamɔ ni akɛhaa lɛ mli yɛ shikpɔŋ nɔ. Beni mɛi 144,000 lɛ fɛɛ anine eshɛ amɛŋwɛi nyɔmɔwoo lɛ nɔ sɛɛ lɛ, sɛɛnamɔi ni jɛɔ amɛ osɔfoyeli nitsumɔ lɛ mli kɛbaa ákɛ Kristo hefatalɔi nɔyelɔi lɛ baaya nɔ aahu kɛbote wɔsɛɛ be mli, ni yɛ naagbee lɛ ebaaha aye Adam gbele lɛ nɔ kunim kwraa kɛmɔ shi.—Kpojiemɔ 5:9, 10; 21:2-4.
13. Mɛɛ tsamɔ anyɛ atsu he nii yɛ wɔbe nɛɛ mli?
13 Ninaa mli faa lɛ yaboteɔ Ŋshɔ ni Egbo ní wala bɛ mli lɛ mli ni etsáa nɔ fɛɛ nɔ ni eyashɛɔ he lɛ. Ŋshɔ nɛɛ feɔ mumɔŋ gbele shihilɛ he mfoniri. Shi wala baa “yɛ he fɛɛ he ni nɛkɛ faai nɛɛ aaaba lɛ.” (Ezekiel 47:9) Nakai nɔŋŋ hu, gbɔmɛi baa wala mli yɛ mumɔŋ, yɛ naagbee gbii nɛɛ amli, yɛ he fɛɛ he ni wala nu lɛ yashɛɔ. Klɛŋklɛŋ bii ni ahã amɛná hewalɛ ekoŋŋ ji shwɛɛnii ni afɔ amɛ mu lɛ, yɛ afi 1919. Amɛte shi kɛjɛ shihilɛ ni tamɔ gbele, ní amɛnyɛɛɛ nɔ ko amɛfee lɛ mli kɛba wala mli ekoŋŋ yɛ mumɔŋ. (Ezekiel 37:1-14; Kpojiemɔ 11:3, 7-12) Kɛjɛ nakai beaŋ kɛbaa nɛɛ, nakai nui ni he hiaa lɛ eyashɛ mumɔŋ gbohii krokomɛi hu anɔ, ni mɛnɛɛmɛi eba wala mli ni amɛtsɔmɔ tooi krokomɛi, ni ji asafo babaoo ní yi miifá be fɛɛ be, ni sumɔɔ Yehowa ni amɛsɔmɔɔ lɛ lɛ. Etsɛŋ ni abaakpã gbɛjianɔtoo nɛɛ mli ahã gbɔmɛi babaoo ní baaná gbohiiashitee lɛ hu.
14. Wuoyaa nitsumɔ ni shwereɔ yɛ Ŋshɔ ni Egbo lɛ naa lɛ feɔ mɛni he mfoniri jogbaŋŋ ŋmɛnɛ?
14 Mumɔŋ hewalɛnamɔ kɛ yibiiwoo babaoo baa. Wuoyaa nitsumɔ ní shwereɔ yɛ ŋshɔ ni tsutsu ko lɛ egbo lɛ naa lɛ feɔ enɛ he mfoniri. Yesu kɛɛ esɛɛnyiɛlɔi lɛ akɛ: “Mafee nyɛ gbɔmɛi ahe wolɛi.” (Mateo 4:19) Wuoyaa nitsumɔ lɛ je shishi yɛ naagbee gbii lɛ amli kɛ mɛi ni afɔ amɛ mu lɛ ateŋ shwɛɛnii lɛ anaabuamɔ, shi ebaaa naagbee yɛ jɛmɛ. Nu ni hãa wala, ni jɛɔ Yehowa mumɔŋ sɔlemɔtsu lɛ mli, ní anɔkwa nilee mli jɔɔmɔ fata he lɛ, saa gbɔmɛi ni jɛ jeŋmaji fɛɛ mli lɛ ahe. Mumɔŋ wala eba he fɛɛ he ni nakai faa lɛ eshɛ lɛ.
15. Mɛni tsɔɔ akɛ jeee mɔ fɛɛ mɔ baakpɛlɛ Nyɔŋmɔ gbɛjianɔtoi kɛha wala lɛ nɔ, ni mɛni baaba mɛnɛɛmɛi anɔ yɛ naagbee?
15 Shi kɛlɛ, jeee mɛi fɛɛ kɛ miishɛɛ hereɔ wala shɛɛ sane lɛ nɔ amrɔ nɛɛ; ni jeee mɛi ni abaatee amɛ shi yɛ Kristo Afii Akpe Nɔyeli lɛ mli lɛ hu fɛɛ baafee nakai. (Yesaia 65:20; Kpojiemɔ 21:8) Ŋwɛibɔfo lɛ jaje akɛ atsáaa ŋshɔ lɛ hei komɛi. ‘Abaahã’ hei ní efee ŋmɔtɔ, ní wala bɛ mli nɛɛ ‘anyɔ̃ ŋoo.’ (Ezekiel 47:11) Yɛ gbɔmɛi ni yɔɔ wɔgbii nɛɛ amli lɛ agbɛfaŋ lɛ, jeee mɛi fɛɛ ni akɛ Yehowa nu ní hãa wala lɛ hãa amɛ lɛ kpɛlɛɔ nɔ. (Yesaia 6:10) Abaahã mɛi fɛɛ ni ehala akɛ amɛbaaya nɔ amɛhi mumɔŋ gbele kɛ hela shihilɛ mli lɛ anyɔ̃ ŋoo yɛ Harmagedon, ni tsɔɔ akɛ, abaakpata amɛhiɛ kɛya naanɔ. (Kpojiemɔ 19:11-21) Shi kɛlɛ, mɛi ni kɛ anɔkwayeli enu nui nɛɛ aahu lɛ baanyɛ aná hiɛnɔkamɔ akɛ amɛyi baaná wala ni amɛbaana gbalɛ nɛɛ naagbee mlibaa.
Faa lɛ Hoɔ yɛ Paradeiso
16. Mɛɛ be, ni yɛ mɛɛ gbɛ nɔ Ezekiel sɔlemɔtsu he ninaa lɛ baaná enaagbee mlibaa?
16 Taakɛ sɛɛkuu lɛ he gbalɛi krokomɛi ji lɛ, Ezekiel sɔlemɔtsu he ninaa lɛ náa enaagbee mlibaa yɛ Afii Akpe lɛ mli. No mli lɛ osɔfoi akuu lɛ bɛ shikpɔŋ nɛɛ nɔ dɔŋŋ. “Amɛaatsɔmɔ Nyɔŋmɔ kɛ Kristo osɔfoi, ni amɛkɛ lɛ aaaye maŋtsɛ [yɛ ŋwɛi] afii akpe.” (Kpojiemɔ 20:6) Nɛkɛ ŋwɛi osɔfoi nɛɛ baafata Kristo he ni amɛkɛ Kristo kpɔmɔ afɔleshãa lɛ mli sɛɛnamɔi lɛ fɛɛ baatsu nii. Nɛkɛ gbɛ nɔ abaatsɔ ahere adesai ni ja lɛ ayiwala, ni akɛ amɛ baaba emuuyeli mli ekoŋŋ!—Yohane 3:17.
17, 18. (a) Te awie faa ko ni haa wala lɛ he yɛ Kpojiemɔ 22:1, 2 lɛ aha tɛŋŋ, ni mɛɛ be ji be ni he hiaa fe fɛɛ kɛha nakai ninaa lɛ he nitsumɔ? (b) Mɛni hewɔ wala nu faa lɛ baaná mlilɛɛmɔ kpele be yɛ Paradeiso lɛ?
17 Enɛ tsɔɔ akɛ, faa ni Ezekiel na lɛ kɛ wala nu ni yɔɔ hewalɛ fe fɛɛ baaho yɛ nakai beaŋ. Nɛkɛ be nɛɛ ji be ni he hiaa fe fɛɛ ní akɛ gbalɛ ni aŋma yɛ Kpojiemɔ 22:1, 2 lɛ baatsu nii, akɛ: “Etsɔɔ mi wala nu faa krɔŋŋ ni mli tse tamɔ kristalo ashwishwɛ miijɛ Nyɔŋmɔ kɛ toobi lɛ maŋtsɛsɛi lɛ mli. Ni eblohu lɛ teŋ kɛ faa lɛ toi biɛ kɛ biɛ fɛɛ lɛ wala tsei lɛ mamɔ shi, ni ewoɔ yibii shii nyɔŋma kɛ enyɔ, ni nyɔŋ fɛɛ nyɔŋ nɔ lɛ ewoɔ yibii, ni tso lɛ yibaai lɛ akɛtsáa jeŋmaji lɛ.”
18 Abaatsá—gbɔmɔtsoŋ, jwɛŋmɔŋ, kɛ henumɔŋ—helai fɛɛ, yɛ Afii Akpe lɛ mli. Nɔ ni feɔ enɛ he mfoniri jogbaŋŋ ji okadi tsei lɛ ní “akɛtsáa jeŋmaji lɛ.” Gbɛjianɔtoo ní Kristo kɛ mɛi 144,000 lɛ kɛtsuɔ nii lɛ hewɔ lɛ, “maŋbii lɛ ateŋ mɔ ko ekɛɛŋ akɛ: Migbɔjɔ!” (Yesaia 33:24) Ni faa lɛ baabote be ní ekɛbaalɛɛ fe fɛɛ lɛ mli. Esa akɛ elɛɛ ni emli akwɔ hu, bɔni afee ni adesai akpekpei abɔ, ekolɛ akpekpei toi akpei abɔ ní abaatée amɛ shi, ni baanu nɛkɛ wala nui ni mli tse nɛɛ eko lɛ fɛɛ anyɛ aná eko. Ninaa lɛ mli faa lɛ tsá Ŋshɔ ni Egbo lɛ, ni ekɛ wala baa he fɛɛ he ní emli nui lɛ hoɔ yɛ lɛ. Nakai nɔŋŋ hii kɛ yei baaba wala mli kwraa kɛmɔ shi yɛ Paradeiso, ni abaatsá amɛ kɛjɛ Adam gbele ni amɛná kɛjɛ fɔmɔ mli lɛ mli kɛ́ amɛná kpɔmɔ afɔleshãa lɛ mli sɛɛnamɔi ni akpã mli ahã amɛ lɛ mli hemɔkɛyeli. Kpojiemɔ 20:12 lɛ egba efɔ̃ shi akɛ, abaagbele “woji” anaa yɛ nakai gbii lɛ amli, ni ekɛ la-kpɛmɔ babaoo ni ji shishinumɔ ní mɛi ní atée amɛ shi lɛ baaná he sɛɛ lɛ baaha. Dɔlɛ sane ji akɛ, mɛi komɛi ekpɛlɛŋ ní atsá amɛ yɛ Paradeiso mli po. Nɛkɛ atuatselɔi nɛɛ ji mɛi ni ‘abaaha amɛnyɔ̃ ŋoo’ ni ji naanɔ hiɛkpatamɔ lɛ.—Kpojiemɔ 20:15.
19. (a) Shikpɔŋ lɛ mlijaramɔ lɛ baaba mli yɛ Paradeiso yɛ mɛɛ gbɛ nɔ? (b) Mɛɛ Paradeiso okadi ko maŋ lɛ feɔ he mfoniri? (d) Te maŋ lɛ shikãmɔhe ní kɛ sɔlemɔtsu lɛ teŋ jɛkɛ fioo lɛ he hiaa ha tɛŋŋ?
19 Agbɛnɛ hu, shikpɔŋ ni yɔɔ Ezekiel ninaa lɛ mli lɛ mlijaramɔ lɛ hu baaná enaagbee mlibaa yɛ nakai beaŋ. Ezekiel na akɛ ajara shikpɔŋ lɛ mli jogbaŋŋ; nakai nɔŋŋ anɔkwa Kristofonyo fɛɛ Kristofonyo baanyɛ aná nɔmimaa akɛ ebaaná he ko, ni ji gboshinii, yɛ Paradeiso. Ekolɛ eeeba akɛ, suɔmɔ ni mɔ ko yɔɔ akɛ ená lɛ diɛŋtsɛ eshia ní ehi mli ni ekwɛ nɔ lɛ baaba mli yɛ gbɛjianɔtoo naa. (Yesaia 65:21; 1 Korintobii 14:33) Maŋ ni Ezekiel na lɛ feɔ nɔkwɛmɔ gbɛjianɔtoo ní Yehowa eto eyiŋ yɛ he kɛha shikpɔŋ hee lɛ he mfoniri yɛ gbɛ ni sa nɔ. Osɔfoi akuu ni afɔ amɛ mu lɛ ehiŋ adesai ateŋ dɔŋŋ yɛ gbɔmɔtsoŋ. Ninaa lɛ tsɔɔ nɔ ko ni tamɔ nakai, yɛ maŋ lɛ ní efee he mfoniri akɛ eyɛ “kwasafo” shikpɔŋ nɔ, yɛ he ko ní kɛ sɔlemɔtsu lɛ teŋ jɛkɛ fioo lɛ hewɔ. (Ezekiel 48:15) Be mli ni mɛi 144,000 lɛ kɛ Kristo yeɔ maŋtsɛ yɛ ŋwɛi lɛ, no etsɔɔɔ akɛ Maŋtsɛ lɛ naŋ najiaŋdamɔlɔi yɛ shikpɔŋ nɔ. Eshishibii ni ji adesai lɛ baaná lumɛi akuu lɛ agbɛtsɔɔmɔ kɛ kudɔmɔ ni suɔmɔ yɔɔ mli lɛ he sɛɛ babaoo diɛŋtsɛ. Shi kɛlɛ, nɔyelihe lɛ diɛŋtsɛ ehiŋ shikpɔŋ lɛ nɔ, shi moŋ ebaahi ŋwɛi. Mɔ fɛɛ mɔ ni yɔɔ shikpɔŋ nɔ, ní lumɛi akuu lɛ hu fata he lɛ, baaba amɛhe shi amɛha Mesia Maŋtsɛyeli lɛ.—Daniel 2:44; 7:14, 18, 22.
20, 21. (a) Mɛni hewɔ maŋ lɛ gbɛi sa jogbaŋŋ lɛ? (b) Mɛɛ sanebimɔi esa akɛ Ezekiel ninaa lɛ he shishinumɔ ni wɔná lɛ aha wɔbi wɔ diɛŋtsɛ wɔhe?
20 Kadimɔ Ezekiel gbalɛ lɛ naagbee wiemɔi lɛ: “Kɛjɛ nakai gbi lɛ nɔ lɛ maŋ lɛ gbɛi ji: Yehowa yɛ jɛi!” (Ezekiel 48:35) Nɛkɛ maŋ nɛɛ ehiii shi kɛ yiŋtoo akɛ ekɛ nɔyeli loo mɛi anɔ hewalɛnamɔ baaha gbɔmɛi; ni ehiŋ shi kɛhaŋ adesa ko suɔmɔnaa nii ahe nitsumɔ. Eji Yehowa maŋ, ni ebaajie ejwɛŋmɔ kɛ egbɛ̀i ní suɔmɔ kɛ nilee yɔɔ mli lɛ kpo be fɛɛ be. (Yakobo 3:17) Enɛ haa wɔnáa nɔmimaa ni miishɛɛ yɔɔ mli akɛ Yehowa baajɔɔ adesai ahe gbɛjianɔ ní eto, ni ji “shikpɔŋ hee” lɛ aahu kɛtsa nɔ kɛya wɔsɛɛ be ni sɛɛ efooo mli.—2 Petro 3:13.
21 Ani wɔmli efiliii wɔ yɛ gbɛkpamɔ ni kã wɔhiɛ lɛ he? No lɛ, wɔteŋ mɔ fɛɛ mɔ baafee jogbaŋŋ akɛ eeebi ehe yɛ gbɛ ni sa nɔ akɛ: ‘Te mifeɔ minii yɛ naakpɛɛ jɔɔmɔi ni ajie lɛ kpo yɛ Ezekiel ninaa lɛ mli lɛ he mihaa tɛŋŋ? Ani mikɛ anɔkwayeli fiɔ nitsumɔ ni nɔkwɛlɔi ni yɔɔ suɔmɔ, ní shwɛɛnii ni afɔ amɛ mu lɛ kɛ mɛi ni baafee lumɛi akuu lɛ mli bii wɔsɛɛ lɛ tsuɔ lɛ sɛɛ kɛmɔɔ shi? Ani mihã jamɔ krɔŋŋ efee nɔ ni he hiaa fe fɛɛ yɛ mishihilɛ mli? Ani miihã wala nu ni hoɔ babaoo ŋmɛnɛ lɛ he miiba sɛɛnamɔ kɛha mi jogbaŋŋ?’ Eba akɛ wɔteŋ mɔ fɛɛ mɔ baaya nɔ afee nakai, ní wɔná nibii ni Yehowa eto he gbɛjianɔ lɛ amli miishɛɛ kɛya naanɔi anaanɔ!
[Shishigbɛ niŋmai]
a Ekolɛ nujɔɔ nɛɛ miitsɔɔ Kidron Jɔɔ lɛ, ní jeɔ shishi yɛ wuoyi-bokagbɛ kɛjɛ Yerusalem ní eyagbeɔ naa yɛ Ŋshɔ ni Egbo lɛ naa lɛ. Nu bɛ eshishigbɛ fã lɛ kwraa, ni jɛmɛ gbĩɔ yɛ afi muu lɛ fɛɛ mli.
b Kwɛmɔ Watchtower ni je kpo yɛ May 1, 1881, kɛ June 1, 1981 lɛ.
Te Obaaha Hetoo Tɛŋŋ?
◻ Mɛni nui ni hoɔ kɛjɛɔ sɔlemɔtsu lɛ mli lɛ feɔ he mfoniri?
◻ Mɛɛ tsamɔ Yehowa enyɛ etsu he nii kɛtsɔ okadi faa lɛ nɔ, ni mɛni hewɔ faa lɛ mli nui lɛ efa babaoo lɛ?
◻ Mɛni tsei ni mamɔ faa lɛ toi lɛ feɔ he mfoniri?
◻ Mɛni maŋ lɛ baafee he mfoniri yɛ Afii Akpe Nɔyeli lɛ mli, ni mɛni hewɔ maŋ lɛ gbɛi lɛ sa jogbaŋŋ lɛ?
[Mfoniri ni yɔɔ baafa 23]
Wala faa lɛ damɔ shi kɛha gbɛjianɔ ni Nyɔŋmɔ eto kɛha yiwalaheremɔ