AKRABATSA 19B
Nu Ni Miitsere Batsɔ Faa Wulu!
Ezekiel na ni nu ko miitsere kɛmiijɛ Yehowa jamɔhe lɛ, ni aaafee maili kome kɛ fioo pɛ sɛɛ lɛ, nu lɛ batsɔ faa wulu ni mli kwɔ! Ena tsei wuji fɛfɛji komɛi yɛ faa lɛ toi biɛ kɛ biɛ, ayeɔ amɛyibii lɛ ni akɛ amɛnɔ bai lɛ hu tsaa helai. Mɛni enɛɛmɛi fɛɛ tsɔɔ?
Faa Lɛ Kɛ Jɔɔmɔi Baa
BLEMA: Be ni nomii lɛ ku amɛsɛɛ kɛtee amɛshikpɔŋ lɛ nɔ, ni amɛye amɛbua kɛto jamɔ krɔŋŋ shishi ekoŋŋ yɛ sɔlemɔ shĩa lɛ, amɛná jɔɔmɔi babaoo tamɔ faa
WƆBEI NƐƐ AMLI: Yɛ afi 1919 lɛ, ato jamɔ krɔŋŋ shishi ekoŋŋ, ni no gbele gbɛ koni Nyɔŋmɔ anɔkwa tsuji aná mumɔŋ jɔɔmɔi babaoo ni anako enɔ dã
WƆSƐƐ: Harmagedon sɛɛ lɛ, Yehowa baajɔɔ wɔ yɛ gbɛi babaoo anɔ; ekomɛi ji abaaye abua wɔ koni wɔye emuu, ni abaatsɔɔ wɔ anɔkwalei hei hu
Nu Ni Hãa Wala
BLEMA: Be ni Yudafoi ni boɔ Yehowa toi lɛ ayi bafa waa po lɛ, Yehowa jɔɔ amɛ babaoo; ehã esɔfoi lɛ tsɔɔ amɛ fɛɛ nii ni amɛná afɔlei ni ashãa yɛ sɔlemɔ shĩa lɛ he sɛɛ jogbaŋŋ, ni amɛnyɛ amɛjá lɛ yɛ gbɛ ni sa ehiɛ nɔ
WƆBEI NƐƐ AMLI: Ŋmɛnɛ lɛ, mɛi ni yɔɔ mfonirifeemɔŋ paradeiso ni yaa nɔ eshwereɔ lɛ mli lɛ ená Biblia mli anɔkwalei ni hoɔ babaoo tamɔ faa lɛ he sɛɛ, amɛkase Yehowa he nii, ni amɛbafata mɛi ni jáa lɛ yɛ gbɛ ni saa ehiɛ lɛ nɔ lɛ ahe
WƆSƐƐ: Mɛi babaoo baafo Harmagedon, ni no sɛɛ lɛ, abaatee mɛi akpekpei abɔ hu shi afata amɛhe, ni Yehowa baajɔɔ amɛ fɛɛ babaoo
Tsei Ni Ayeɔ Amɛnɔ Yibii, Ni Akɛ Amɛnɔ Bai Lɛ Tsaa Hela
BLEMA: Yehowa tsɔɔ ewebii anɔkwafoi lɛ Biblia mli anɔkwalei, ni eto gbɛjianɔ koni amɛnyɛ amɛjá lɛ yɛ gbɛ ni saa ehiɛ lɛ nɔ; eye ebua amɛ hu koni amɛtsi amɛhe kɛje nɔ fɛɛ nɔ ni kɛ amagajamɔ loo amale jamɔ yɔɔ tsakpãa lɛ he
WƆBEI NƐƐ AMLI: Biblia mli anɔkwalei babaoo ni Nyɔŋmɔ webii lɛ anine shɛɔ nɔ lɛ yeɔ ebuaa amɛ koni amɛya nɔ amɛye lɛ anɔkwa, ni amɛtsi amɛhe kɛje eshai ni yɔɔ hiɛdɔɔ kɛ susumɔi gbohii ni mɛi ni yɔɔ je lɛ mli ŋmɛnɛ lɛ hiɛ lɛ ahe
WƆSƐƐ: Kristo kɛ mɛi 144,000 ni baafata ehe kɛye nɔ lɛ baaye abua adesai anɔkwafoi koni amɛye emuu ni amɛná gbɔmɔtsoŋ hewalɛ ni amɛhi shi kɛya naanɔ!