“Ajwamaŋ Kpeteŋkpele” Lɛ Hiɛkpatamɔ Ebɛŋkɛ
“Amɛaanyɛ ajwamaŋ lɛ, ni amɛaafee lɛ amaŋfo, ni amɛaaŋmɛ lɛ yayai, ni amɛaaye eheloo, ni amɛkɛ la ooosha lɛ.”—Kpoi. 17:16.a
1, 2. Mɛɛ amaniɛ Nyɔŋmɔ bɔɔ etsuji, ni mɛni hewɔ?
1 YEHOWA NYƆŊMƆ, Bɔlɔ lɛ le nɔ ni baaba yɛ wɔsɛɛ be mli lɛ pɛpɛɛpɛ. Lɛ ji ‘Mɔ ni jɛɔ shishijee ejajeɔ naagbee nii lɛ.’ (Yes. 46:10) Akɛni “ele nii kɛwula shi” hewɔ lɛ, ele nibii agbɛjianɔtoo nɛɛ “naagbee” ni baa yɛ “amanehulu kpeteŋkpele” lɛ mli lɛ he saji fɛɛ. (Hiob 37:16; Mat. 24:21) Akɛni eji Nyɔŋmɔ ni yɔɔ suɔmɔ hewɔ lɛ, ejieɔ nɛkɛ nibii nɛɛ babaoo kpo etsɔɔ mɛi ni sɔmɔɔ lɛ yɛ anɔkwale mli lɛ beni afee ni amɛle nii jogbaŋŋ, atswa amɛ ama shi ni abu amɛhe Biblia lɛ kɛɔ,akɛ: “Ejaakɛ Nuntsɔ Yehowa efeŋ nɔ ko, akɛ ja ejie eyiŋtooi lɛ akpo etsɔɔ etsuji gbalɔi lɛ da.”—Amos 3; 7.
2 No hewɔ lɛ Yehowa Nyɔŋmɔ kɛ nilee krɛdɛɛ ko ni mɛi krokomɛi leee haa etsuji ni baa amɛhe shi lɛ. Taakɛ bɔfo Paulo kɛɛ lɛ: Nɔ ni je nɛŋ onukpa lɛ ateŋ mɔ ko mɔ ko leee lɛ; . . . Shi wɔ lɛ, Nyɔŋmɔ etsɔ emumɔ lɛ nɔ ejie kpo etsɔɔ wɔ.” (1 Kor. 2:8,10) Akɛni amɛtsɔɔ hiɛ amɛnaa nilee kɛjɛɔ Yehowa Nyɔŋmɔ ŋɔɔ hewɔ lɛ, etsuji lɛ esaa amɛhe—yɛ anɔkwale mli lɛ Nyɔŋmɔ kɛ nitsumɔ ewo amɛdɛ—koni amɛjaje nibii agbɛjianɔtoo nɛɛ naagbee ni baa lɛ he kɔkɔbɔɔ lɛ yɛ jeŋ fɛɛ, kɛ gbɛjianɔtoo lɛ he sane ni shɛjeɔ mɔ mii lɛ hu.—Mat. 24:14.
3. Ani Yehowa tsuji baale be mli ni “amanehulu kpeteŋkpele” lɛ baaje shishi diɛŋtsɛ?
3 Akɛni Yehowa tsɔɔ hiɛ ekɛ gbɛjianɔtoo nɛɛ naagbee he nilee—haa etsuji anɔkwafoi lɛ hewɔ lɛ, ani adafitswaa ni baaha amɛnyɛ amɛle ni amɛyoo be mli ni “amanehulu kpeteŋkpele” lɛ baaje shishi diɛŋtsɛ hu fata he? Hɛɛ. Mɛni ji nakai odaseyeli lɛ? Ekɔɔ Nyɔŋmɔ hiɛkpatamɔ kojomɔ ni ekɛbaaba nɔ ni Biblia Iɛ tsɛɔ lɛ “Babilon kpeteŋkpele lɛ, shikpɔŋ lɛ nɔ ajwamaŋi lɛ kɛ nihiinii lɛ anyɛ” lɛ nɔ lɛ. (Kpoj. 17:5,) Ni yɛ amrɔ nɛɛ po, hɛɛ nibii etee nɔ ni amɛmiiya nɔ bianɛ kɛmiisaa gbɛ aha nɛkɛ hiɛkpatamɔ nɛɛ!
4. Mɛni hewɔ ni eyeɔ ebuaa kɛji akɛ wɔle nɔ ni ba blema Babilon nɔ lɛ?
4 “Namɔ ji nɛkɛ mfonirifeemɔ mli ajwamaŋ ni yɔɔ Ŋmalɛi lɛ amli lɛ? Te aaafee tɛɛŋ ni aaakɛɛ akɛ nibii ni yaa nɔ lɛ miisaa gbɛ kɛmiiha ehiɛkpatamɔ bianɛ? Wɔbaanyɛ wɔkase babaoo yɛ nɛkɛ nibii nɛɛ ahe kɛtsɔ Babilon kroko, nakai jeŋ hewalɛ ni hi shi fe afii akpei enyɔ ni eho nɛɛ lɛ he saji amlipɛimɔ nɔ. Nɔ ni ba blema Babilon nɔ lɛ fe yinɔsane kɛkɛ. Eji gbalɛ mli nɔkwɛmɔ nɔ ko ni yɔɔ naakpɛɛ ni etsɛŋ kwraa ebaaba ‘ajwamaŋ kpeteŋkpele’ ni yɔɔ wɔgbii nɛɛ amli lɛ nɔ.—Kpoj. 17: 1.
Blema Babel Kpeteŋkpele
5. Mɛni hewɔ Nebukadnezar susuɔ akɛ eyɛ nɔ ni ebaadamɔ nɔ ekɛ-pupuu ehe lɛ?
5 “Ani jeee Babel kpeteŋkpele lɛ ni miina ni etsɔ maŋtsɛwe yɛ mihewalɛ kpeteŋkpele lɛ naa ha minunyam lɛ yijiemɔ lɛ nɛ? (Dan. 4:30) Nɛkɛ ji bɔni Babilon Maŋtsɛ Nebukadnezar, pupuu ehe, nɔ ni fe afii ohai ekpaa dani wɔ-Ŋmɛnɛŋmɛnɛ Be nɛɛ shɛ. Etamɔ nɔ ni Nebukadnezar yɛ nɔ kpakpa ko ni ebaadamɔ nɔ ekɛpupuu ehe ejaakɛ Babilon ji maŋtiase ni he wa, nakai be lɛ mli, jeŋ hewalɛ ni he wa fe fɛɛ ni ana pɛŋ lɛ maŋtiase. Nakai maŋ kpeteŋkpele lɛ tamɔ nɔ ni anyɛŋ abote mli, ejaakɛ nɔ ni ebɔle ehe kɛkpe ji gbogboi wuji sɔrɔtoi enyɔ. Eka shi faŋŋ hu akɛ eyɛ nui babaoo ni buɔ maŋ lɛ he—Eufrate Faa lɛ—ni hoɔ yɛ maŋtiase lɛ mli lɛ. Nɔ ni yɔɔ faa lɛ toi biɛ kɛ biɛ yɛ maŋtiase lɛ mli hu ji gbogboi wuji kɛ amɛnaa agbói ni abaanyɛ aŋamɔ ni mɔ ko akabote maŋ lɛ mli.
6. Babilon hé gbɛi yɛ mɛni mli?
6 Yɛ be mli ni Babilon ehe gbɛi waa yɛ tawuu mli lɛ, akɛ nɔ̃ kroko hu le lɛ jogbaŋŋ: Lɛ ji nakai blema je lɛ apasa jamɔ maŋtiase. Akɛɔ akɛ atsa sɔlemɔtsui aaafee 53 yɛ maŋ nɛɛ amaŋfoi ni ekumɔ lɛ amli. The World Book Encyclopedia lɛ kɛɔ akɛ: “Babiloniabii kpooɔ blema nyɔŋmɔi lɛ, no hewɔ lɛ nyɔŋmɔi ni amɛjaa amɛ lɛ bafa babaoo kɛbote akpei amli. Amɛye nyɔŋmɔi kɛ nyɔŋmɔyei kɛha maŋtiase fɛɛ maŋtiase kɛ agbɛnɛ nyɔŋmɔi hu ni damɔ shi kɛha nibii tamɔ hulu, nyɔŋtsere, ŋulamii, kɔɔyɔŋ-tsakemɔ, aduawai, faai kɛ shikpɔŋ lɛ.” Bɔni Babilon jamɔ naa wa ha lɛ ha yɛ be ni sa mli lɛ ena Kristendom nɔ hewalɛ. Kɛbashi ŋmɛnɛ po lɛ, abaanyɛ ana apasa jamɔ mli hemɔkɛyelii kɛ nifeemɔi ni hi shi yɛ nu afua lɛ sɛɛ Babilon lɛ mli lɛ yɛ je lɛŋ jamɔi fɛɛ mli.—1 Mose 11:1-9.
7. (a) Mɛni ji kpa ni yɔɔ Babilon he ni kɛ lɛ baabote hiɛkpatamɔ mli lɛ? (b) Mɛni Yehowa baafee lɛ?
7 Shi kɛlɛ, Babilon ni hi shi yɛ Nebukadnezar gbii lɛ amli lɛ yɛ kpa ko ni kɛlɛ baabote hiɛkpatamɔ mli yɛ ehe: Eji anɔkwa Nyɔŋmɔ lɛ, Yehowa, kɛ ewebii lɛ ablema henyɛlɔ ni kɛ amɛ yeee kwraa. Agbɛnɛ eji mɔ ni efɔse lá ni yeɔ bem babaoo eshwie shi. Biblia lɛ kɛɔ akɛ: “Babel hu baagbee shi, nyɛ Israel mɛi ni enyɔnyɔi, tamɔ bɔni Babel ha shikpɔŋ lɛ fɛɛ nɔ mɛi ni enyɔnyɔi lɛ gbeegbee shi lɛ.” (Yer. 51:49) Yɛ enɛ hewɔ lɛ, Yehowa jaje akɛ: “Ni Babel ni ji maŋtsɛyelihei anunyam kɛ Kaldeabii ahewoo lɛ wulamɔ lɛ, aaatsɔ tamɔ Sodom kɛ Gomora beni Nyɔŋmɔ butu amɛ lɛ. . . Ní ebe lɛ eshɛ eta, egbii lɛ hu etsɛŋ dɔŋŋ.” Yesaia ŋma nakai gbalɛ lɛ efɔ Shi aaafee afi 732 D.Ŋ.B. (Yes. 13:19-22) Yɛ no sɛɛ aaafee afii oha lɛ, Yeremia kɛɛ,akɛ: “Yehowa mlihilɛ hewɔ lɛ, ahiŋ jɛi, shi —moŋ eeetsɔ amaŋfo,kwraa mɔ fɛɛ mɔ ni aaatsɔ Babel he kɛaaho lɛ enaa aaakpɛ ehe, ni eeebo tsia yɛ nii ni atswia lɛ lɛ fɛɛ hewɔ.” Hɛɛ, “Babel Kpeteŋkpele” lɛ ni tamɔ nɔ ni anyɛŋ abote mli lɛ “aaatsɔmɔ koikoi kɛ ŋaŋgbeei ahilɛhe, ni mɔ ko mɔ ko ehiŋ jɛi dɔŋŋ.’”—Yer. 50:13; 51:37.
8. Te atsɔɔ gbɛ ni Babilon baatsɔ nɔ agbee shi lɛ mli aha tɛɛŋ?
8 Shi mɛɛ gbɛ nɔ Babilon baatsɔ agbee shi yɛ? Yehowa kɛ emlitsɔɔmɔi komɛi ha Yesaia kɛ Yeremia Yesaia ŋma akɛ Yehowa ji “Mɔ ni kɛɔ bu kwɔŋkwɔŋ lɛ akɛ: Omli agbi! Ní maha ofaai lɛ hu amii lɛ!” (Yes. 44:27) Agbɛnɛ hu Yesaia jaje akɛ: “Bɔni Yehowa kɛɔ mɔ ni efɔ lɛ mu ni ji Koresh lɛ nɛ, mɔ ni mimɔ eninejurɔ mli koni maba jeŋmaji ashi yɛ ehiɛ, ni amɛfɛne maŋtsɛmɛi ahɛfiinii, ni magbele shinaai yɛ ehiɛ, ni akɛŋmɛ agbói lɛ amli lɛ.” (Yes. 45:1) Yeremia gba efɔ shi akɛ: “ Babel hii kakalɔi lɛ efɔɔ tawuu, amɛ ekãa lɛ eta, amɛtsɔmɔ yei.” (Yer. 51:30) No hewɔ lɛ Babilon faa, Eufrate lɛ ni buɔ ehe lɛ ‘baagbi’; hiɛnyiɛlɔ ko ni Yehowa tsi egbɛi ata dani afɔ lɛ, “Koresh,” ji mɔ ni baafee nɔyelɔ lɛ; ‘aŋamɔŋ’ agbói ni yɔɔ faa lɛ naa lɛ; ni Babilon asraafoi lɛ ‘baafɔɔ tawuu.’
9. Mɛni hewɔ Yehowa hiɔ Belshazar okpɔlɔŋmɛɛ lɛ waa lɛ?
9 Nɛkɛ gbalɛi nɛɛ ba mli pɛpɛɛpɛ yɛ October 5/6 yɛ afi 539 D.Ŋ.B. Nakai gbɛkɛ lɛ, Babilon Maŋtsɛ Belshazar henɔwolɔ lɛ ŋmɛ okpɔlɔ eha ebladei kɛ mɛi krokomɛi akpe. Beni etaoɔ eha nakai gbijurɔyeli lɛ afee nɔni kɔɔ jamɔ he koni ena hegbɛ ebɔ Yehowa gbɛi lɛ musu kɛ ahora hewɔ lɛ, ekɛ krɔŋkrɔŋ nii ni Nebukadnezar yaloo kɛjɛ Yerusalem sɔlemɔwe lɛ yɛ afi 607 D.Ŋ.B. lɛ ba. Belshazar kɛ mɛi krokomɛi lɛ ni maŋtsɛmɛi lɛ ŋamɛi kɛ ehemɛi lɛ fata he lɛ kɛ nɛkɛ krɔŋkrɔŋ nii nɛɛ ni tsutsu lɛ Nyɔŋmɔ webii kɛ-sɔmɔɔ Yehowa lɛ nu daai kɛ henɔwomɔ amɛkɛ wo amɛ apasa nyɔŋmɔi lɛ ahiɛ nyam.—Dan. 5:1-4.
10. Mɛni ji gbogbo he niŋmaa lɛ, ni te Belshazar fee enii yɛ he eha tɛɛŋ?
10 Shi agbɛnɛ anyɛŋ aye Yehowa he fɛo dɔŋŋ! Be eshɛ ni esa akɛ efee he nɔ ko! “Nakai ŋmlɛtswaa lɛ nɔ nɔŋŋ lɛ, gbɔmɔ nine waobii je kpo, ni ebaŋma nii yɛ maŋtsɛ mɔɔ lɛŋ gbogbo ni asha he kaaloo lɛ he; ni maŋtsɛ lɛ na nine ni ŋmaa nii lɛ.” (Dan.5:5.) Belshazar she gbeyei naakpa yɛ nɔ ni ena lɛ hewɔ, akɛ “enakutsei tswiatswia amɛhe” po. (Dan. 5:6) Daniel kɛ ekãa tsɔɔ niŋmaa ni jɛ Nyɔŋmɔ ŋɔɔ lɛ shishi etsɔɔ maŋtsɛ lɛ, ni ejaje akɛ: “Nyɔŋmɔ ekane omaŋtsɛyeli lɛ ni egbe naa. . . . aja omaŋtsɛyeli lɛ mli, ni aŋɔha Mediabii kɛ Persiabii.”—Dan. 5:26-28.
11. Mɛɛ gbɛ nɔ Biblia mli gbalɛi ni kɔɔ Babilon he lɛ ba mli nakai pɛpɛɛpɛ yɛ?
11 Yɛ Babilon gbogboi lɛ asɛɛ lɛ, Persia asraafoi ni Koresh kpeteŋkpele lɛ nyiɛ amɛhiɛ kɛ Mediabii ni yɔɔ Dario shishi lɛ efee ekome amɛkɛ-bɔle maŋtiase lɛ he. Yɛ be mli ni Babilonbii lɛ nuɔ nii ni amɛyeɔ nii yɛ amɛ musubɔɔ jamɔ gbɛ nɔ, ni amɛnuɔ he akɛ amɛyɛ shweshweeshwe yɛ amɛ nyɔŋmɔi lɛ ayibaamɔ kɛ amɛtawuu mli hewalɛ lɛ hewɔ lɛ, no mli lɛ Koresh hu kɛ nilee miito tawuu he ŋaa. No mli lɛ etsɔnei ahe nilelɔi ni yɔɔ Babilon kooyigbɛ lɛ miitsa sũ ni yɔɔ Eufrate Faa lɛ toi lɛ miishwie beni afee ni nui lɛ aho kɛtsɔ mli ni ekaho kɛmiiya wuoyigbɛ kɛmiitsɔ maŋtiase lɛ mli dɔŋŋ. Etsɛɛɛ ni nui ni yɔɔ faa ni ebɔle Babilon he kɛ-kpe lɛ bɔi shibaa. Etsɛɛɛ kwraa ni nui lɛ fɛɛ ta bɔni asraafoi ni Koresh nyiɛ amɛhiɛ lɛ baanyɛ anyiɛ faa lɛ mli kɛjɛ kooyigbɛ kɛ wuoyigbɛ ni amɛba Babilon maŋtiase lɛ teŋ diɛŋtsɛ. Nɔ ni yɔɔ naakpɛɛ ji akɛ, agbói ni yɔɔ faa lɛ toi yɛ maŋtiase lɛ mli lɛ anaa kamɔ ni aŋmɛɛɛ mli akɛni Babilonbii ni amɛtɔrɔ daa lɛ leee nɔ ni baa lɛ hewɔ. Koresh tabilɔi lɛ kɛ hewalɛ kpele ha Babilon fɛɛ nɔ. “Nakai nyɔɔŋ lɛŋ nɔŋŋ agbe Kaldeabii amaŋtsɛ Belshazar lɛ.” (Dan. 5:30) “Babel Kpeteŋkpele” lɛ egbee shi—yɛ gbɛkɛ kome pɛ mli! Mɛɛ sane ni haa mɔ jijaa enɛ ji, jeee kɛha Babilonbii lɛ pɛ kɛkɛ, shi moŋ kɛha jeŋmaji ni ebɔle lɛ lɛ! Enaagbee lɛ ba pɛpɛɛpɛ taakɛ Yehowa tsuji gba fɔ shi lɛ, Yɛ be ni sa mli lɛ, Babilon batsɔmɔ “koikoi,” “amaŋfo,” “ni mɔ ko mɔ ko ehiŋ jɛi dɔŋŋ.”
Nɔ Ni Etsɔɔ Kɛha Wɔ Ŋmɛnɛ Gbii Nɛɛ
12. Mɛni nɔ ni bɔfo Yohane kɛɔ yɛ “Babilon Kpeteŋkpele” lɛ he yɛ Kpojiemɔ yitso 17?
12 Mɛni ji shishinumɔ ni yɔɔ enɛ mli kɛha wɔgbii nɛɛ? Babaoo diɛŋtsɛ. Yɛ nɔ ni fe afii ohai ekpaa yɛ Babilon shigbeemɔ lɛ sɛɛ lɛ, akɛ mumɔ tsirɛ bɔfo Yohane ni eŋma Kpojiemɔ wolo lɛ (Apocalypse) . Ewie “Babilon Kpeteŋkpele” kroko he yɛ mli lolo, ni etsɔɔ mli akɛ eji “shikpɔŋ lɛ nɔ ajwamaŋii kɛ nihii nii lɛ anyɛ.” (Kpoj. 17:5) Yohane ŋma akɛ lɛ ji “mɔ ni shikpɔŋ lɛ nɔ maŋtsɛmɛi kɛbɔ ajwamaŋ, ni mɛi ni yɔɔ shikpɔŋ lɛ nɔ lɛ tɔrɔ daa kɛ ejwamaŋbɔɔ lɛ daa Iɛ.”—Kpoj. 17:2.
13. (a) Mɛni hewɔ ŋmɛnɛŋmɛnɛ beaŋ “Babilon Kpeteŋkpele” lɛ nyɛŋ afee maŋkramɔŋ hewalɛ krokro lɛ? (b) Mɛɛ yiŋtoo ahewɔ atsɛɔ ajwamaŋ lɛ akɛ “Babilon Kpeteŋkpele”
13 Akɛni akɛɛ maŋtsɛmɛi lɛ kɛ lɛ ebɔ ajwamaŋ hewɔ lɛ; eka shi faŋŋ akɛ nɛkɛ “Babilon Kpeteŋkpele” nɛɛ nyɛŋ afee “maŋtsɛ” kroko. Nɔ ni odamɔ shi kɛha diɛŋtsɛ ji nakai blema Babilon ni he gbɛi waa yɛ—apasa jamɔ mli lɛ. No hewɔ ni ŋmɛnɛŋmɛnɛ beaŋ ajwamaŋ lɛ hu ŋɔɔ nakai gbɛi lɛ nɔŋŋ ni blema maŋtiase lɛ hiɛ lɛ. Yɛ anɔkwale mli lɛ apasa tsɔɔmɔi kɛ nifeemɔi babaoo ni anaa yɛ ŋmɛnɛŋmɛnɛ beaŋ Babilon jamɔi amli lɛ ji nibii ni abaanyɛ apɛi mli kɛyabote blema jamɔ Babilon tɔɔ. No hewɔ lɛ, ajwamaŋ “Babilon Kpeteŋkpele” ni yɔɔ wɔgbii nɛɛ amli lɛ damɔ shi kɛha jeŋ fɛɛ apasa jamɔ maŋtsɛyeli ni ekɛ ehe eha ajwamaŋbɔɔ kɛ je lɛ yɛ afii ohai babaoo mli fe ni eeeha ehe atse ni ekɛsɔmɔ Nyɔŋmɔ lɛ. Yɛ be mli ni etsɔɔ nɔ kroko ni haa aleɔ lɛ yɛ jamɔ mli lɛ, Kpojiemɔ kɛɔ yɛ ehe akɛ: “Ejaakɛ okunyaayeli [apasa jamɔ] lɛ akɛ-shishiu jeŋmaji lɛ fɛɛ.”—Kpoj. 18:23.
14. Mɛni yɔɔ ni tsɔɔ akɛ nɛkɛ Babilon sɔrɔtoi enyɔ nɛɛ je amɛhe?
14 Kaimɔ akɛ blema Babilon ji Nyɔŋmɔ kɛ ewebii lɛ ahenyɛlɔ kpele, ni lɛ ji mɔ ni ha ashwie lá shi babaoo yɛ etawuui sɔrɔtoi lɛ amli. Nakai nɔŋŋ hu Biblia lɛ kɛɔ yɛ ŋmɛnɛŋmɛnɛ Babilon he akɛ: “Emli ana gbalɔi kɛ krɔŋkrɔŋbii kɛ mɛi fɛɛ ni agbe yɛ shikpɔŋ lɛ nɔ lɛ alá lɛ yɛ.” (Kpoj. 18:24) Nɛkɛ ajwamaŋ nɛɛ ji mɔ ni waa Yehowa webii’ ni yɔɔ ŋmɛnɛŋmɛnɛ beaŋ, edasefoi lɛ, ayi titri. Agbɛnɛ hu, akɛni efiɔ jeŋmaji lɛ atawuu lɛ sɛɛ, ni ewoɔ gbɔmɛi ni yɔɔ afai enyɔ lɛ fɛɛ hewalɛ ni amɛgbe amɛhe hewɔ lɛ, eji mɔ ni “mɛi fɛɛ ni agbe yɛ shikpɔŋ lɛ nɔ lɛ alá” lɛ jɛ lɛ.
15. Namɛi baakpata ajwamaŋ lɛ hiɛ, ni be sɛɛkɛlɛ enyiɛ enɛ baahe?
15 Akɛni “ehe eshai lɛ eshɛ ŋwɛi tɔɔ” hewɔ lɛ, hiɛkpatamɔ ni Nyɔŋmɔ kɛbaaba nɛkɛ ajwamaŋ nɛɛ nɔ lɛ baaba oya. (Kpoj. 18: 5, 21) Biblia lɛ kɛɔ akɛ, “gbi kome nɔ ehaomɔi lɛ aaaba,” yɛ anɔkwale mli lɛ, ŋmlɛtswaa kome mli”! (Kpoj. 18:8, 10) Enɛ baafee tamɔ ni nɔ ba ehenɔ, blema Babilon ni gbee shi yɛ gbɛkɛ kome lɛ nɔ lɛ! Ni nɛkɛ ajwamaŋ nɛɛ baana hiɛkpatamɔ yɛ namɔ dɛ? Yehowa baaŋmɛ gbɛ ni maŋkwramɔŋ hemɛi ni kɛ ajwamaŋ nɛɛ ebɔ ajwamaŋ lɛ afee mɛi ni baakpata ehiɛ. “Amɛaanyɛ ajwamaŋ lɛ, ni amɛaafee lɛ amaŋfo, ni amɛaaŋmɛ Iɛ yayai, ni amɛaaye eheloo, ni amɛkɛ la aaasha lɛ.”—Kpoj. 17:16.
16. Mɛni ji “nui” ni ŋmɛnɛŋmɛnɛ beaŋ Babilon ta nɔ lɛ, ni mɛni yɔɔ mli ni je blema Babilon lɛ?
16 Nɔ kroko hu yɛ ni je amɛhe ni ka blema kɛ ŋmɛnɛŋmɛnɛ Babilon teŋ, nɔ ko ni kɔɔ gbɛ ni aaatsɔ nɔ akpata amɛhiɛ lɛ he. Blema Babilon ta nui babaoo nɔ, nui diɛŋtsɛ ni ji Eufrate Faa lɛ. Taakɛ Kpojiemɔ 17:1 tsɔɔ lɛ, ŋmɛnɛŋmɛnɛ Babilon hu “ta nui babaoo nɔ.” Mɛni ji nɛkɛ nui nɛɛ? Nyɔŋmɔ Wiemɔ lɛ haa hetoo: “Nui lɛ ni ona ni yoo ajwamaŋ lɛ ta nɔ lɛ ji maji kɛ asafoi kɛ jeŋmaji kɛ majianɔwiemɔi.” (Kpoj. 17 :15) Kadimɔ akɛ nɔ ni tsɔ blema Babilon shigbeemɔ lɛ hiɛ ba amrɔ nɔŋŋ ji Eufrate Faa lɛ mli nui lɛ ni fɛɛ ta lɛ hewɔ. Ani mfoniri-feemɔ mli nui (adesai) ko yɛ ni baata kɛjɛ ŋmɛnɛŋmɛnɛ beaŋ Babilon shishi? Hɛɛ, eko yɛ, ni eeya nɔ bianɛ yɛ wɔhiŋmɛiaŋ! —Kpoj. 16:1, 12.
Bɔni “Nui Babaoo” Lɛ Baa Shi Aloo Etaa
17. Mfonirifeemɔ mli “nui” ni yɔɔ ajwamaŋ lɛ shishi lɛ miiba shi aloo eeta yɛ mɛɛ gbɛ nɔ?
17 Yɛ mɛɛ gbɛ nɔ okadi loo mfonirifeemɔ mli “nui babaoo” ni yɔɔ ŋmɛnɛŋmɛnɛ beaŋ Babilon mli lɛ baa shi aloo etaa? No ji akɛ gbɔmɛi akpekpei babaoo ni jamɔ mli osɔfoi kɛ nitsulɔi akpei nyɔŋmanyɔŋmai abɔ fata he eŋmɛɛ esɛɛ ni amɛfiɔ yɛ jamɔ mli lɛ ahe ni amɛha egbɔjɔ kwraa. Enɛ ji anɔkwale titri: yɛ Kristendom, mɔ ni eye fɔ waa akɛni ekɛɔ akɛ esɔmɔɔ Nyɔŋmɔ kɛ Kristo fɛɛ lɛ hewɔ. Yɛ be mli ni yɛ bei komɛi amli lɛ atsiɔ ta akɛ “aawaje he” yɛ jamɔi fioo ko mli lɛ, titri lɛ yɛ jamɔi bibii lɛ amli lɛ, yɛ be babaoo mli lɛ enɛ feɔ hiɛaŋhiɛaŋ nɔ ko kɛkɛ.’ Bibioo ko pɛ ajieɔ kɛjɛɔ mli, ejaakɛ bɔni shihilɛ lɛ ebatamɔ yɛ he fɛɛ he lɛ ji nɔ ko ni anaa ni awieɔ he yɛ je lɛŋ adafitswaa woji amli, tamɔ nɔ ni nyiɛ sɛɛ nɛɛ:
“Nɔ ko eba Kristendom nɔ. Nɔ fɛɛ nɔ tsɔɔ akɛ wɔbote jenamɔ kakadaŋŋ ko mli, ni wɔjeŋkpo kɛjɛŋ mli . . .
“Bɔni Kristojamɔ kɛ Roman Katolek jamɔ yɔɔ hewalɛ yɛ gbɔmɛi ateŋ lɛ elaaje. Wɔmiiye Kristojamɔ ni ato he gbɛjianɔ yɛ kwasafoŋ kɛ maŋkwramɔŋ lɛ gbele he odase.”—Katolek niŋmalɔ ni ehe gbɛi waa, Malachi Martin, yɛ Providence “Sunday Journal,” February 17, 1980 mli.
“Osɔfoi kɛ yei ni yeɔ osɔfoi ni anaaa dɔŋŋ yɛ Anaigbɛ lɛ eshɛ heko ni yɔɔ gbeyei waa yɛ maŋ fɛɛ maŋ mli.”—“Time,” August 21, 1978.
“Kristojamɔ miiya sɛɛsɛɛ kɛ foi . . . eji hemɔkɛyeli gbonyo kɛ nii ni aheee ayeee dɔŋŋ, jwɛŋmɔ ni efutu, kɛ nii ni aleee he mfoniri. . . . Efeŋ sane ni awie awo he tsɔ, kɛ́ aaakɛɛ akɛ gbekɛbii fɛɛ bɛ nɔ ni Kristojamɔ diɛŋtsɛ ji lɛ he jwɛŋmɔ ko.”—London “Times,” September 25, 1978, amaniɛ ni Church of England Bɛgwafoi ni kwɔɔ Tsɔsemɔ nɔ lɛ bɔ lɛ mli saji.
18, 19. Okɛ odaseyelii krokomɛi aha ni tsɔɔ akɛ nɛkɛ “nui” nɛɛ miita.
18 Beni Pope John Paul yasra France yɛ May 1980 lɛ, New York Times (May 31) nɔ lɛ wie akɛ: “Hewalɛ ni sɔlemɔ lɛ yɔɔ yɛ France lɛ nɔ miigbɔ kɛ foi. Nibii amli ni atao nyɛsɛɛ nɛɛ lɛ jie lɛ kpo akɛ mɛi ni tsɛɔ amɛhe Katolekbii lɛ ateŋ oha mlijaa 15 pɛ ji mɛi ni kɛ amɛhe woɔ sɔlemɔ lɛ nifeemɔi amli, eyɛ mli akɛ mɛi ni abaptisi amɛ yɛ sɔlemɔ lɛ mli akɛ Katolekbii ji oha mlijaa 85.” Osɔfonukpa Luciano Cabral Duarte kɛɛ yɛ Brazil akɛ: “Wɔ Katolekbii lɛ ahewalɛ anɔ miigbɔ, ni mumɔŋ lá ni wɔbɛ lɛ babaoo lɛ miikpata wɔhiɛ.” (Veja, January 30, 1980) Presbyteria sɔlemɔ lɛ mli osɔfo kpɛlɛ nɔ yɛ Nigeria akɛ: “Ŋmɛnɛ, sɔlemɔ lɛ tamɔ nɔ ni eleee mɔ ni eji dɔŋŋ, ni etamɔ mɔ ko ni hela ni haa hiɛ kpaa nii anɔ lɛ emɔ lɛ, ni ebi akɛ, ‘Namɔ ji mi,’ ni ‘Miyɛ biɛ kɛha mɛni’?” (Daily Star, September 11, 1978) Greece adafitswaa wolo ko wie nɔ ni nyiɛ sɛɛ nɛɛ yɛ be ko Greek Ortodɔks Church ni abuɔ lɛ waa lɛ he:
“Ŋmɛnɛ, Sɔlemɔ lɛ, ni ji akɛ osɔfoyeli lɛ, titri lɛ osɔfonukpayeli lɛ etsɔ hiɛgbejianii, buulufeemɔ kɛ jwɛŋmɔ ni bɛ jɛɛhe.
“Efee nakai aahu akɛ kɛbashi amrɔ nɛɛ, Helabii ateŋ mɛi ni fa buɔ osɔfoi lɛ ateŋ mɛi pii akɛ ŋwanejelɔi kɛ mɛi ni feɔ hiɛgbejianii! mɛi ni yɔɔ keketee yɛ nɔ fɛɛ nɔ mli kɛ mɛi ni shishiuɔ mɛi, mɛi ni kulɛ ni ‘amɛaatsɔɔ tooi lɛ agbɛ lɛ,’ amɛkɛ gbekɛbii awiemɔi ni shishinumɔ bɛ mli woɔ mɛi anaa ŋmɔlɔ moŋ fe ni amɛaatsɔmɔ mumɔŋ gbɛjianɔtoo ko ni abuɔ.”—“To Vima,” October 15, 1978.
19 Time lɛ jaje yɛ Eastern Ortodɔks Church lɛ yitso ni he hiaa ni yɔɔ Turkey lɛ he akɛ: “Osɔfonukpa lɛ nɔyelihe ni be ko, yɛ yinɔsane mli lɛ ekwɛɔ Kristofoi aje lɛ fã kpotoo nɔ lɛ miigbo.” Amerika Rabi Alvin Beines kɛɛ yɛ Yudafoi ajamɔ he akɛ: ‘Amerika Yudafoi ajamɔ lɛ yɛ oshara kpeteŋkpele mli. Naagba lɛ ji akɛ Amerika Yudafoi lɛ ekpɛlɛɛɛ blema Yudafoi ajamɔ mli tsɔɔmɔi lɛ anɔ.’ Ní yɛ Ŋleshi Ablotsiri hu lɛ, sɔlemɔi babaoo ekpa sɔlemɔ yɛ amɛmlibii ayifalɛ ni eba shi lɛ hewɔ, ni enɛ ha niŋmalɔ ko tsɛ amɛ akɛ “amɛtamɔ koolooi ni oshara eba amɛshishibulemɔ he.” Nibii amli pɛimɔ ko ni afee yɛ Germane lɛ jie lɛ ‘kpo akɛ Germanbii ni yeko afii 35 lɛ ateŋ mɛi oha mlijaa 17 pɛ heɔ yeɔ akɛ Nyɔŋmɔ yɛ. Yɛ Japan lɛ, be mli ni abi gbɔmɛi akɛ, “Ani oyɛ jamɔ ko mli lo?” lɛ, oha mlijaa 60 ha hetoo akɛ “Dabi” ni oha mlijaa 7 pɛ haa hetoo. Yɛ maji sɔrɔtoi fɛɛ mli lɛ shihilɛ ni kɔɔ je lɛŋ jamɔi lɛ ahe lɛ tamɔ nɔ ni Melbourne, Australia, The Age lɛ kɛɛ lɛ ákɛ jamɔi sɔrɔtoi lɛ fɛɛ “miina nɔ̃ yɛ amɛheyelilɔi ni tãa lɛ hewɔ.” Akɛni “heyelilɔi ni tãa,” “nui babaoo” ni ajwamaŋ lɛ ta nɔ lɛ miiba shi bianɛ yɛ gbɛ fɛɛ gbɛ nɔ hewɔ lɛ, ani hiɛkpatamɔ ni baa lɛ aaanyɛ afee nɔ ni yɔɔ shɔŋŋ lo? Dabi.
20. Mɛɛ ŋaawoo ni he hiaa Nyɔŋmɔ Wiemɔ lɛ kɛhaa gbɔmɛi ni sumɔɔ Jalɛ-nifeemɔ?
20 “Ajwamaŋ kpeteŋkpele” lɛ sɛɛfimɔ ni baa shi lɛ tamɔ sane mlitsɔɔmɔ ni Biblia mli gbalɛi ni kɔɔ “naagbee gbii” nɛɛ he lɛ kɛha lɛ pɛpɛɛpɛ, yɛ be mli ni ekɛɛ akɛ gbɔmɛi “aaatsɔmɔ mɛi ni sumɔɔ shwɛmɔ kɛ ŋɔɔmɔ fe Nyɔŋmɔ, mɛi ni hiɛ Nyɔŋmɔ jamɔ su, shi amɛkwa emli hewalɛ Iɛ” lɛ. Kɛkɛ ni nakai gbalɛ lɛ nɔŋŋ bɔ kɔkɔ akɛ: “Tsi ohe kɛjɛ nɛkɛ gbɔmɛi ahe.” (2 Tim. 3:4, 5) Nakai nɔŋŋ hu sane ni ajaje atsɔɔ gbɔmɛi ni sumɔɔ jalɛnifeemɔ ni yɔɔ ŋmɛnɛŋmɛnɛ beaŋ “Babilon Kpeteŋkpele” lɛ mli lolo lɛ ji akɛ: “Nyɛjea emli, mimaŋ, koni nyɛkɛ lɛ akafee ekome yɛ ehe eshai lɛ amli, ni nyɛkana ehaomɔi lɛ eko.”—Kpoj. 18:4.
21. Mɛɛ naagbee nifeemɔ haa Yehowa mlifu teɔ shi, ni mɛni baajɛ mli aba?
21 Etsɛŋ kwraa, ni abaakpata “ajwamaŋ kpeteŋkpele” lɛ hiɛ ákɛ kojomɔ ni Nyɔŋmɔ kɛ-shiɔ lɛ. Taakɛ eji yɛ blema Babilon he lɛ, ŋmɛnɛŋmɛnɛ Babilon butumɔ yɛ oyaiyeli mli lɛ baafee nɔ ko ni baaha je lɛ ajijaa babaoo. (Kpoj. 18:9-19) Ehiɛkpatamɔ lɛ ji nɔ ni baakadi “amanehulu kpeteŋkpele” lɛ shishijee. Agbɛnɛ hu mɛi ni teɔ shi woɔ Nyɔŋmɔ lɛ baatsɔ amɛhiɛ amɛha Yehowa tsuji ni amɛbɔ mɔdɛŋ akɛ amɛaakpata amɛhiɛ. (Ezek. 38:16) Shi Yehowa kɛɔ enɔkwafoi lɛ akɛ: “Mɔ ni taa nyɛhe lɛ, eeta ehiŋmɛiaŋ ajaŋmalaatɛ he.” (Zak. 2:12) Enɛ haa Nyɔŋmɔ feɔ he nɔ ko amrɔ nɔŋŋ. Yehowa kɛɔ akɛ: “Ni aaaba mli akɛ, nakai gbi lɛ nɔ lɛ, mimlila lɛ aaate shi kɛaaba migugɔŋ, ni mawie yɛ miwuŋayeli kɛ mimlifu la lɛŋ.” (Ezek. 38:18, 19, NW) Nyɔŋmɔ baahere etsuji anɔkwafoi lɛ ayiwala ni ekɛ hiɛkpatamɔ ni baa oya baatswa jeŋmaji lɛ nɔ̃ yɛ “Nyɔŋmɔ Ofe lɛ gbi wulu lɛ nɔ ta” lɛ mli yɛ Harmagedon Atsɔɔ enɛ nɔ akpataa Nyɔŋmɔ kɛ ewebii lɛ ahenyɛlɔi lɛ ahiɛ kwraa, ni atsumɔɔ efɔŋfeemɔ kwraa kɛjɛɔ shikpɔŋ lɛ nɔ.—Kpoj. 16:14, 16; Abɛi 2:22.
22. Mɛɛ gbɛ nɔ aaatsɔ awo mɛi ni yeɔ Yehowa anɔkwale lɛ nyɔmɔ?
22 Gbɛjianɔtoo hee ni yɔɔ naakpɛɛ lɛ baaje shishi amrɔ nɔŋŋ yɛ Harmagedon sɛɛ! Abaawo anɔkwafoi lɛ ni “jɛ amanehulu kpeteŋkpele lɛ mli” lɛ nyɔmɔ babaoo “Naa, Nyɔŋmɔ buu lɛ yɛ gbɔmɛi ateŋ, ni eeeshi ebuu lɛ yɛ amɛteŋ, ni amɛaatsɔmɔ emaŋ, ni Nyɔŋmɔ diɛŋtsɛ kɛ amɛ aaahi shi, ni eeetsɔ amɛ-Nyɔŋmɔ. Ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.”—Kpoj. 21:3, 4.
23. (a) Mɛni hewɔ esa akɛ wɔna tsui yɛ ŋmɛnɛŋmɛnɛ shihilɛ mli ni ewa lɛ fɛɛ sɛɛ? (b) Mɛni ji nɔ ni esa akɛ wɔwo mɛi ni taoɔ anɔkwale lɛ sɛɛ gbɛ lɛ ekãa ni amɛfee?
23 No hewɔ lɛ nyɛnaa tsui, nyɛ mɛi fɛɛ ni sumɔɔ jalɛsaneyeli lɛ! Nyɛnaa nyɛlea akɛ akane “ajwamaŋ kpeteŋkpele” lɛ kɛ maŋkwramɔŋ nɔyelɔi yiwalɔi ni yɔɔ nibii agbɛjianɔtoo nɛɛ mii lɛ agbii lɛ, ni etsɛŋ ni Yehowa baajie amɛ kɛjɛ gbɛ teŋ. Akɛni Nyɔŋmɔ “nyɛŋ emale” hewɔ lɛ, ná hekɛnɔfɔɔ akɛ ebaaha ohiɛnɔkamɔ akɛ ooohi shi kɛya naanɔ yɛ paradeiso nibii agbɛjianɔtoo hee mli yɛ heni gbi fɛɛ gbi lɛ oooná “miishɛɛ yɛ hejɔlɛ babaoo mli” lɛ aba mli. (Tito 1:2; Lala 37:11) Dani enɛ aaaba lɛ, okɛ ohe aha gbɛjianɔ ni Yehowa eto ni ekɛwo bo hewalɛ yɛ mumɔŋ kɛha gbii ni mliwawai ni jwere wɔhiɛ lɛ. Yɛ be mli ni ofeɔ nakai lɛ, okɛ suɔmɔ asusu mɛi krokomɛi ni “jalɛ he hɔmɔ kɛ kumai yeɔ amɛ lɛ ahe. Wo mɛi ni tamɔ nɛkɛ lɛ hewalɛ ni amɛkɛ Biblia mli ŋaawoo nɛɛ ato amɛtsui mli: “Nyɛtaoa Yehowa, be mli ni eeeha ana lɛ, nyɛtsɛa lɛ, be mli ni ebɛŋkɛ!”—Mat. 5:6; Yes. 55:6.
[Shishigbɛ niŋmai]
a Ajie kɛjɛ October 15,1980 Blɔfo Buu-Mɔɔ lɛ mli.
[Mfoniri ni yɔɔ baafa 11]
Blema Babilon ta Eufrate Faa lɛ mli nui lɛ anɔ
[Mfoniri ni yɔɔ baafa 12]
Eufrate Faa Iɛ mli nui ní ta lɛ gbele gbɛ kɛha henyɛlɔi asraafoi koni amɛbote Babilon ni amɛbutu lɛ
Mfonirifeemɔ mli nui (gbɔmɛi) ni baa shi loo etãa yɛ Babilon Kpeteŋkpele lɛ mli lɛ tsɔɔ ehiɛkpatamɔ lɛ hiɛ