Yitso Ekpaa
Teemɔŋ Sane Ni Kɔɔ Tso Agbo Lɛ He Lɛ Shishinumɔ
1. Mɛni ba Maŋtsɛ Nebukadnezar nɔ, ni enɛ tée mɛɛ sanebimɔi ashi?
YEHOWA ŋmɛ Maŋtsɛ Nebukadnezar gbɛ koni etsɔ jeŋ nɔyelɔ. Ákɛ Babilon maŋtsɛ lɛ, eyɛ shika babaoo, ekpɔlɔ nɔ niyenii fa babaoo, eyɛ maŋtsɛwe ni yɔɔ fɛo—kɛ nɔ fɛɛ nɔ ni etaoɔ yɛ heloo naa. Shi trukaa kɛkɛ ni aba lɛ shi. Akɛni ebaye sɛkɛ hewɔ lɛ, Nebukadnezar fee enii tamɔ kooloo! Akɛni ashwie lɛ kɛjɛ odehei okpɔlɔ lɛ he kɛ maŋtsɛwe lɛ hewɔ lɛ, eyahi ŋa nɔ ni ekpe jwɛi tamɔ tsina. Mɛni kɛ amanehulu nɛɛ ba? Ni mɛni hewɔ esa akɛ ekɔ wɔhe?—Okɛto Hiob 12:17-19; Jajelɔ 6:1, 2 he.
MAŊTSƐ LƐ JIE MƆ NI YƆƆ ŊWƐI SHƆŊŊ LƐ YI
2, 3. Mɛni Babilon maŋtsɛ lɛ taoɔ aha emaŋbii lɛ, ni te ebu Nyɔŋmɔ ni Yɔɔ Ŋwɛi Shɔŋŋ lɛ eha tɛŋŋ?
2 Beni atsa lɛ kɛjɛ sɛkɛ ni eye kwraa lɛ mli lɛ sɛɛ etsɛɛɛ lɛ, Nebukadnezar tsu ni akɛ nɔ ni tee nɔ lɛ he amaniɛbɔɔ ni sa kadimɔ waa tee enɔyelihe lɛ mli fɛɛ. Yehowa kɛ emumɔ tsirɛ gbalɔ Daniel koni ebaa saji ni tee nɔ lɛ ni aŋmala fɛɛ pɛpɛɛpɛ lɛ yi. Ejeɔ shishi kɛ nɛkɛ wiemɔi nɛɛ: “Maŋtsɛ Nebukadnezar ŋma yaha majimaji kɛ asafoi kɛ wiemɔi fɛɛ ni hiɔ shikpɔŋ lɛ fɛɛ nɔ lɛ akɛ: Hejɔlɛ afa aha nyɛ! Okadii kɛ naakpɛɛ nii ni Nyɔŋmɔ ni yɔɔ ŋwɛi shɔŋŋ lɛ efee yɛ mihe lɛ, esa mihiɛ akɛ majaje matsɔɔ. Kwɛ bɔ ni ekadii lɛ dara ha kɛ bɔ ni enaakpɛɛ nii lɛ wa ha! Emaŋtsɛyeli lɛ naanɔ maŋtsɛyeli ni, ni enɔyeli lɛ jɛɔ yinɔ kɛyaa yinɔ!”—Daniel 4:1-3.
3 Nebukadnezar shishibii lɛ “hiɔ shikpɔŋ lɛ fɛɛ nɔ”—emaŋtsɛyeli lɛ kpeleɔ jeŋ ni Biblia lɛ eŋma he sane efɔ̃ shi lɛ fã titri nɔ. Maŋtsɛ lɛ wie Daniel Nyɔŋmɔ lɛ he akɛ: “Emaŋtsɛyeli lɛ naanɔ maŋtsɛyeli ni.” Kwɛ bɔ ni nakai wiemɔi lɛ jie Yehowa yi ha yɛ Babilonia Maŋtsɛyeli lɛ fɛɛ mli! Agbɛnɛ hu, enɛ ji shii enyɔ nɔ ni ajie lɛ kpo atsɔɔ Nebukadnezar akɛ Nyɔŋmɔ Maŋtsɛyeli lɛ pɛ ji nɔ ni hiɔ shi daa, ebaadamɔ shi “kɛaatee naanɔ.”—Daniel 2:44.
4. Te Yehowa “okadii kɛ naakpɛɛ nii” lɛ je shishi yɛ Nebukadnezar he eha tɛŋŋ?
4 Mɛɛ “okadii kɛ naakpɛɛ nii” “Nyɔŋmɔ ni yɔɔ ŋwɛi shɔŋŋ” lɛ fee? Enɛɛmɛi je shishi kɛ maŋtsɛ lɛ diɛŋtsɛ niiashikpamɔ ni ejaje yɛ nɛkɛ wiemɔi nɛɛ amli lɛ: “Mi Nebukadnezar miyɛ hejɔlɛ yɛ miwe nɛɛ, ni miishwere yɛ mimɔɔ nɛɛ mli; ni mina lamɔ ko ni wo mihe gbeyei, ni jwɛŋmɔi ni mijwɛŋ yɛ misaa lɛ nɔ kɛ miyitsoŋ ninaai lɛ hao mi.” (Daniel 4:4, 5) Mɛni Babilonia maŋtsɛ lɛ fee yɛ lamɔ ni haoɔ mɔ nɛɛ he?
5. Te Nebukadnezar bu Daniel eha tɛŋŋ, ni mɛni hewɔ?
5 Nebukadnezar tsɛ Babilon nilelɔi fɛɛ ni egba amɛ lamɔ lɛ. Shi kwɛ bɔ ni amɛnine nyɛ shi ha! Amɛnyɛɛɛ ni amɛkɛ shishitsɔɔmɔ ko kwraa aha. Nɔ ni aŋma afɔ̃ shi lɛ kɛfata he akɛ: “Shi beni yi yawula shi lɛ, Daniel, mɔ ni atsɛɔ lɛ Belteshazar, taakɛ bɔ ni atsɛɔ minyɔŋmɔ lɛ gbɛi lɛ, mɔ ni nyɔŋmɔi krɔŋkrɔŋi lɛ amumɔ yɔɔ emli lɛ, ba mihiɛ, ni migba lamɔ lɛ yɛ ehiɛ.” (Daniel 4:6-8) Daniel gbɛi yɛ maŋtsɛwe lɛ ji Belteshazar, ni apasa nyɔŋmɔ ni maŋtsɛ lɛ tsɛ́ lɛ “minyɔŋmɔ” lɛ baanyɛ afee Bel loo Nebo loo Marduk. Akɛni Nebukadnezar ji nyɔŋmɔi pii ajálɔ hewɔ lɛ, esusu Daniel he akɛ mɔ ni “nyɔŋmɔi krɔŋkrɔŋi lɛ amumɔ yɔɔ emli.” Ni yɛ Daniel gbɛhe akɛ Babilon nilelɔi lɛ fɛɛ anɔ onukpa lɛ hewɔ lɛ, maŋtsɛ lɛ wie ehe akɛ “woloŋlelɔi lɛ anukpa.” (Daniel 2:48; 4:9; okɛto Daniel 1:20 he.) Kɛlɛ, Daniel anɔkwafo lɛ shĩii Yehowa jamɔ kɔkɔɔkɔ koni ekɛ ehe ayawo ŋkunyaayeli mli.—3 Mose 19:26; 5 Mose 18:10-12.
TSO KO NI KWƆ NAAKPA
6, 7. Te obaatsɔɔ nɔ ni Nebukadnezar na yɛ elamɔ lɛ mli lɛ mli oha tɛŋŋ?
6 Mɛni ji sane ni yɔɔ Babilonia maŋtsɛ lɛ lamɔ ni wo ehe gbeyei lɛ mli? Nebukadnezar kɛɛ: “Miyitsoŋ ninaai ni mina, beni mika misaa lɛ nɔ lɛ nɛ: Mikwɛ, ni naa, tso ko ma shikpɔŋ lɛ teŋ, ni ekwɔ naakpa. Tso lɛ da, ni ewa, ni ekwɔ aahu kɛyashi ŋwɛi, ni anaa lɛ yɛ shikpɔŋ lɛ fɛɛ naagbeehe. Eyibaai yɛ fɛo, ni eyibii fá, ni ŋmaa yɛ mli ha mɛi fɛɛ; ŋaŋ kooloi hiɔ ehɔ̃ɔŋ lɛ shishi, ni ŋwɛi loofɔji sɔ̃mɔ̃ɔ eniji lɛ anɔ, ni no heloo fɛɛ yeɔ.” (Daniel 4:10-12) Abɔ amaniɛ akɛ, Nebukadnezar nyãa Lebanon tsenedru tsei wuji lɛ ahe, etee jɛmɛ eyakwɛ amɛ, ni eha afolɔ ekomɛi ni agbála kɛba Babilon akɛ tsei. Shi enako nɔ ko ni tamɔ tso ni ena yɛ elamɔ lɛ mli lɛ dã. Ema he ko ni he hiaa yɛ “shikpɔŋ lɛ teŋ,” ni anaa yɛ shikpɔŋ lɛ fɛɛ nɔ, ni ewoɔ yibii babaoo akɛ ekɛ niyenii haa heloo fɛɛ.
7 Saji babaoo yɛ ni kɔɔ lamɔ lɛ he, ejaakɛ Nebukadnezar kɛfata he akɛ: “Ni mina yɛ miyitsoŋ ninaai lɛ amli, beni mika misaa lɛ nɔ lɛ, ni naa, saralɔ kɛ mɔ krɔŋkrɔŋ jɛ ŋwɛi kpeleke shi; ebo waa ni ekɛɛ akɛ: Nyɛtooa tso lɛ nyɛgbeea shi, ni nyɛfolɔa eniji lɛ, nyɛkpɔlɔa ebaai lɛ nyɛshwiea shi, ni nyɛgbɛa eyibii lɛ nyɛshwãa, ni kooloi lɛ aje shishi ajo foi, ni loofɔji lɛ hu aje eniji lɛ anɔ aya! Shi kɛlɛ nyɛshia etsoku lɛ yɛ shikpɔŋ, ni nyɛkɛ dade kɛ akɔɔble kɔsɔŋkɔsɔ afia lɛ yɛ ŋa nɔ jwɛifɔ lɛ mli, ni ŋwɛi bɔ́ afɔ lɛ, ni ená egbɛfaŋnɔ yɛ kooloi ateŋ yɛ shikpɔŋ lɛ nɔ jwɛi lɛ amli.”—Daniel 4:13-15.
8. Namɔ ji “saralɔ” lɛ?
8 Babiloniabii lɛ yɛ amɛ diɛŋtsɛ amɛjamɔŋ shishinumɔ ni kɔɔ mumɔŋ bɔɔnii kpakpai kɛ efɔji lɛ ahe. Shi namɔ ji nɛkɛ “saralɔ” loo bulɔ ni jɛ ŋwɛi nɛɛ? Atsɛ́ lɛ “mɔ krɔŋkrɔŋ,” ni eji ŋwɛibɔfo ko ni ja ni damɔ Nyɔŋmɔ najiaŋ. (Okɛto Lala 103:20, 21 he.) Susumɔ sanebimɔi ni hao Nebukadnezar lɛ ahe okwɛ! Mɛni hewɔ esa akɛ afo tso nɛɛ afɔ̃ shi? Mɛɛ sɛɛnamɔ yɔɔ etsoku lɛ ni akɛ dade kɛ akɔɔble kɔsɔŋkɔsɔ fimɔ lɛ koni ekakwɛ̃ lɛ he? Yɛ anɔkwale mli lɛ, mɛɛ yiŋtoo he nii tsoku kɛkɛ ko tsuɔ?
9. Titri lɛ, mɛni saralɔ lɛ kɛɛ, ni enɛ téeɔ mɛɛ sanebimɔi ashi?
9 Nebukadnezar naa baanyɛ akpɛ ehe aahu beni enu saralɔ lɛ wiemɔi krokomɛi lɛ, akɛ: “Ni aaatsake egbɔmɔ tsui lɛ, ni aaaha lɛ kooloo tsui, ni bei kpawo aaaho eyi! Nɛkɛ sane nɛɛ jɛ saralɔi lɛ ajina mli, ni nɔ ni abiɔ nɛɛ hu jɛ mɛi krɔŋkrɔŋi lɛ awiemɔ lɛ mli, bɔni afee ni hiɛkalɔi ale akɛ mɔ ni yɔɔ ŋwɛi shɔŋŋ lɛ yɛ hewalɛ yɛ gbɔmɛi amaŋtsɛyeli nɔ, ni eŋɔ-haa mɔ fɛɛ nɔ ni esumɔɔ, ni eŋɔɔ mɛi ni ji gbɔmɛi amliwoo etáa nɔ.” (Daniel 4:16, 17) Tso ko tsoku bɛ gbɔmɔ tsui ni miitswa yɛ emli. Yɛ enɛ hewɔ lɛ, te aaafee tɛŋŋ ni akɛ kooloo tsui aaaha tso ko tsoku hu? Mɛni ji “bei kpawo” lɛ? Ni mɛɛ gbɛ nɔ enɛɛmɛi fɛɛ kɔɔ nɔyeli yɛ “gbɔmɛi amaŋtsɛyeli” nɔ lɛ he? Yɛ anɔkwale mli lɛ Nebukadnezar miisumɔ ni ele.
SANE FƆŊ KƐHA MAŊTSƐ LƐ
10. (a) Kɛ́ aaawie yɛ Ŋmalɛ naa lɛ, tsei baanyɛ afee mɛni he mfoniri? (b) Tso ni da naakpa lɛ damɔ shi kɛha mɛni?
10 Beni Daniel nu lamɔ lɛ, enaa kpɛ ehe fioo, kɛkɛ ni eshe gbeyei. Beni Nebukadnezar woɔ lɛ hewalɛ koni etsɔɔ mli lɛ, gbalɔ lɛ kɛɛ: “Minuntsɔ, kulɛ lamɔ nɛɛ afee mɛi ni he tsɛ̃ɔo lɛ anɔ̃, ni eshishitsɔɔmɔ lɛ hu afee ohenyɛlɔi lɛ anɔ̃! Tso lɛ ni ona ni eda ni ewa . . . lɛ ji bo, maŋtsɛ, ni oda, ni ohe wa, ni odalɛ lɛ eda aahu kɛyashɛ ŋwɛi, ni onɔyeli lɛ hu eshɛ shikpɔŋ lɛ naagbeehe lɛ.” (Daniel 4:18-22) Tsei baanyɛ adamɔ shi yɛ Ŋmalɛi lɛ amli aha aŋkroaŋkroi, nɔyelɔi, kɛ maŋtsɛyelii. (Lala 1:3; Yeremia 17:7, 8; Ezekiel, yitso 31) Taakɛ tso ni kwɔ ni yɔɔ elamɔ lɛ mli lɛ ji lɛ, Nebukadnezar ‘eda ni ehe ewa’ akɛ jeŋ hewalɛ ko yitso. Shi tso kpeteŋkpele lɛ damɔ shi kɛha ‘nɔyeli ni yashɛɔ shikpɔŋ lɛ naagbeehe,’ ni ekɔɔ gbɔmɛi amaŋtsɛyeli fɛɛ he lɛ. No hewɔ lɛ, efeɔ Yehowa jeŋ muu fɛɛ nɔyeli lɛ he mfoniri, titri lɛ yɛ bɔ ni ekɔɔ shikpɔŋ lɛ he ehaa lɛ hewɔ.—Daniel 4:17.
11. Mɛɛ gbɛ nɔ maŋtsɛ lɛ lamɔ lɛ tsɔɔ yɛ akɛ abaaba lɛ shi kɛtsɔ tsakemɔ nɔ?
11 Tsakemɔ ko ni baa mɔ shi miimɛ Nebukadnezar. Beni etsɔɔ nii ni baaba nɛɛ mli lɛ, Daniel kɛfata he akɛ: “Ni nɔ ni maŋtsɛ lɛ na saralɔ kɛ mɔ krɔŋkrɔŋ kpeleke shi kɛjɛ ŋwɛi, ni ekɛɛ akɛ: Nyɛtooa tso lɛ nyɛgbeea shi, ni nyɛfitea lɛ; shi kɛlɛ nyɛshia etsoku lɛ yɛ shikpɔŋ, ni nyɛkɛ dade kɛ akɔɔble kɔsɔŋkɔsɔ afia lɛ yɛ ŋa nɔ jwɛifɔ lɛ mli, ni nyɛhaa ŋwɛi bɔ́ afɔa lɛ, ni ená egbɛfaŋnɔ yɛ ŋaŋ kooloi lɛ ateŋ kɛyashi beyinɔ ni bei kpawo aaaho eyi lɛ:—eshishi nɛ, maŋtsɛ, ni mɔ ni yɔɔ ŋwɛi shɔŋŋ lɛ ajina ni baa minuntsɔ maŋtsɛ nɔ nɛ.” (Daniel 4:23, 24) Eji anɔkwale akɛ, ekãafeemɔ he miihia dani akɛ nakai shɛɛ sane lɛ aha maŋtsɛ ni yɔɔ hewalɛ waa lɛ!
12. Mɛni baaba Nebukadnezar nɔ?
12 Mɛni baaba Nebukadnezar nɔ? Susumɔ bɔ ni ebaafee enii eha beni Daniel kɛfata he akɛ: “Aaashwieo yɛ gbɔmɛi ateŋ, ni oooyahi ŋaŋ kooloi ateŋ, ni aaaha oye jwɛi tamɔ tsinai, ni ŋwɛi bɔ́ aaafɔo, ni bei kpawo aaaho oyi, kɛyashi beyinɔ ni ooole akɛ mɔ ni yɔɔ ŋwɛi shɔŋŋ lɛ yɛ hewalɛ yɛ gbɔmɛi amaŋtsɛyeli nɔ, ni eŋɔhaa mɔ fɛɛ mɔ ni esumɔɔ.” (Daniel 4:25) Eyɛ faŋŋ akɛ Nebukadnezar mɔ̃ɔ lɛ mli onukpai lɛ po ‘baashwie lɛ kɛjɛ gbɔmɛi ateŋ.’ Shi ani kooloi loo tookwɛlɔi ni yɔɔ musuŋtsɔlɛ baakwɛ enɔ? Dabi, ejaakɛ Nyɔŋmɔ efã akɛ Nebukadnezar kɛ “ŋaŋ kooloi” baahi shi ni ebaaye jwɛifɔ.
13. Lamɔ mli tso lɛ tsɔɔ nɔ ni baaba Nebukadnezar gbɛhe ákɛ jeŋ nɔyelɔ lɛ nɔ yɛ mɛɛ gbɛ nɔ?
13 Taakɛ bɔ ni afo tso lɛ afɔ̃ shi lɛ, nakai nɔŋŋ abaabutu Nebukadnezar kɛjɛ jeŋ nɔyeli nɔ—shi kɛyashi be ko pɛ. Daniel tsɔɔ mli akɛ: “Ni bɔ ni afã akɛ ashĩ tsoku lɛ, nakai omaŋtsɛyeli lɛ aaadamɔ ahao, beni oná ole akɛ ŋwɛi yɔɔ hewalɛ lɛ.” (Daniel 4:26) Yɛ Nebukadnezar lamɔ lɛ mli lɛ, aha tso ni afo afɔ̃ shi lɛ shishifã loo etsoku lɛ hi shi, eyɛ mli akɛ afimɔ lɛ koni ekakwɛ̃. Nakai nɔŋŋ hu Babilon maŋtsɛ lɛ “tsoku” lɛ baahi shi, eyɛ mli akɛ afimɔ lɛ koni ekakwɛ̃ kɛyashi “bei kpawo.” Egbɛhe akɛ jeŋ nɔyelɔ lɛ baatamɔ tsoku ni afimɔ lɛ lɛ. Abaabaa yi kɛyashi be mli ni bei kpawo aaaho eyi. Yehowa baakwɛ koni mɔ ko mɔ ko akabaye Nebukadnezar sɛɛ akɛ Babilon nɔyelɔ pɛ ni yɔɔ yɛ nakai be lɛ mli, eyɛ mli akɛ ebinuu ni atsɛɔ lɛ Evil-merodach baanyɛ atsu nii aha lɛ akɛ mɔ ni yeɔ esɛɛ dã.
14. Mɛni Daniel wo Nebukadnezar hewalɛ koni efee?
14 Yɛ nɔ ni agba afɔ̃ shi yɛ Nebukadnezar he lɛ hewɔ lɛ, Daniel kɛ ekãa wo lɛ hewalɛ akɛ: “No hewɔ lɛ, maŋtsɛ, ha miŋaawoo lɛ asa ohiɛ, ni okɛ jalɛ akumɔ ohe eshai lɛ ashwie, ni okɛ ohiafoi amɔbɔnalɛ akumɔ onishaianii lɛ, akɛ aleenɔ̃ no aaaha ohejɔlɛ lɛ sɛɛ atsɛ ahao lo.” (Daniel 4:27) Kɛji akɛ Nebukadnezar aaakpale kɛaajɛ eshafeemɔ gbɛ ni ji yiwaa kɛ henɔwomɔ gbɛ lɛ he lɛ, ekolɛ enɛ baaha saji atsake kɛha lɛ. Ejaakɛ, aaafee afii ohai enyɔ ni etsɔ hiɛ lɛ mli lɛ, Yehowa kpɛ eyiŋ akɛ ebaakpata Ashur maŋtiase Ninive lɛ mli bii lɛ ahiɛ, shi efeee nakai ejaakɛ emaŋtsɛ lɛ kɛ ewebii lɛ tsake amɛtsui. (Yona 3:4, 10; Luka 11:32) Shi Nebukadnezar henɔwolɔ lɛ hu? Ani ebaatsake eshihilɛ gbɛ̀i?
LAMƆ LƐ KLƐŊKLƐŊ MLIBAA
15. (a) Mɛɛ su Nebukadnezar tee nɔ ejie lɛ kpo? (b) Mɛni niŋmaai jieɔ lɛ kpo yɛ Nebukadnezar nifeemɔi ahe?
15 Nebukadnezar tee nɔ ehi shi akɛ henɔwolɔ. Eeshara shi yɛ mɔ̃ɔ lɛ yiteŋ yɛ elamɔ ni kɔɔ tso lɛ he lɛ sɛɛ nyɔji 12, ni eshwã akɛ: “Ani jeee Babel kpeteŋkpele lɛ ni mima ni etsɔ maŋtsɛwe yɛ mihewalɛ kpeteŋkpele lɛ naa ha minunyam lɛ yijiemɔ lɛ nɛ?” (Daniel 4:28-30) Nimrod to Babilon (Babel) shishi, shi Nebukadnezar ha ehiɛ ba nyam. (1 Mose 10:8-10) Epupuu ehe yɛ etɛ-tao nɔ niŋmaai lɛ ekome nɔ akɛ: “Nebukadrezar, Babilon Maŋtsɛ, mɔ ni saa ema Esagila kɛ Ezida, Nabopolasar binuu ji mi. . . . Miwaje Esagila kɛ Babilon mɔji lɛ ni mito minɔyeli lɛ gbɛi akɛ nɔ ni baahi shi kɛya naanɔ.” (Archaeology and the Bible, ni George A. Barton ŋma yɛ 1949, baafai 478-479) Niŋmaa kroko wieɔ gbatsũi aaafee 20 ni esaa loo eku sɛɛ emamɔ ekoŋŋ lɛ ahe. “Yɛ Nebukadnezar nɔyeli shishi lɛ,” The World Book Encyclopedia lɛ kɛɔ akɛ “Babilon batsɔ maŋtiasei ni yɔɔ fɛo fe fɛɛ yɛ blema je lɛ mli lɛ ateŋ ekome. Efɔɔɔ etawuu mli nifeemɔi atãtsii tsɔ yɛ lɛ diɛŋtsɛ eniŋmaai amli, shi eŋmala etsũmaai ahe nitsumɔi lɛ kɛ bɔ ni egbala ejwɛŋmɔ kɛtee Babilonia nyɔŋmɔi lɛ anɔ lɛ ahe saji. Ekolɛ Nebukadnezar ma Babilon Abɔɔi ni Tsotsoro Shi, ni ji Blema Je lɛ Naakpɛɛ Nibii Kpawo lɛ ateŋ ekome lɛ.”
16. Aahe aba Nebukadnezar shi yɛ mɛɛ gbɛ nɔ?
16 Eyɛ mli akɛ epupuu ehe moŋ, shi etsɛŋ ni abaaba Nebukadnezar ni woɔ ehe nɔ lɛ shi. Saji ni ajɛ mumɔŋ aŋma lɛ kɛɔ akɛ: “Maŋtsɛ lɛ naa enyɔɔɔ shi, ni gbee jɛ ŋwɛi kɛɛ: Maŋtsɛ Nebukadnezar, aakɛɛo akɛ: Áshɔ̃ omaŋtsɛyeli lɛ yɛ odɛŋ; ni aashwieo yɛ gbɔmɛi ateŋ, ni oooyahi ŋaŋ kooloi ateŋ, ni aaaha oye jwɛi tamɔ tsinai, ni bei kpawo aaaho oyi, kɛyashi beyinɔ ni oooná ole akɛ mɔ ni yɔɔ ŋwɛi shɔŋŋ lɛ yɛ hewalɛ yɛ gbɔmɛi amaŋtsɛyeli nɔ, ni eŋɔ-haa mɔ fɛɛ mɔ ni esumɔɔ!”—Daniel 4:31, 32.
17. Mɛni ba Nebukadnezar henɔwolɔ lɛ nɔ, ni mɛɛ shihilɛi amli etsɛɛɛ ni ena ehe yɛ?
17 Nebukadnezar ye sɛkɛ amrɔ nɔŋŋ. Akɛni ashwie lɛ kɛjɛ gbɔmɛi ateŋ hewɔ lɛ, eye jwɛi “tamɔ tsinai.” Beni eyaje ŋa nɔ kooloi ateŋ lɛ, eyɛ faŋŋ akɛ etaaa shi kɛkɛ yɛ paradeiso jwɛifɔ mli ni eená kɔɔyɔɔ kpakpa mli ŋɔɔmɔ daa gbi. Yɛ ŋmɛnɛŋmɛnɛ beaŋ Iraq, he ni Babilon amaŋfɔi lɛ yɔɔ lɛ, jeŋ dɔɔ waa yɛ jɛmɛ kɛyashɛɔ 50°Celcius yɛ latsaa be mli nyɔji lɛ amli, ni ebaa shi kwraa ni jeŋ jɔɔ ŋanii fe ais yɛ fɛibe mli. Akɛni mɔ ko kwɛɛɛ enɔ ni kɔɔyɔŋ tsakemɔi lɛ náa enɔ hewalɛ hewɔ lɛ, Nebukadnezar yiteŋ tsɔi kakadaji ni alo lɛ tsɔ tamɔ okropɔŋ tsɛji, ni ewaonaa lamii ni ajieee lɛ batsɔ tamɔ loofɔji awaobii anaa. (Daniel 4:33) Mɛɛ shi po ába jeŋ nɔyelɔ henɔwolɔ lɛ nɛkɛ!
18. Mɛni tee nɔ yɛ Babilon maŋtsɛsɛi lɛ he yɛ bei kpawo lɛ mli?
18 Yɛ Nebukadnezar lamɔ lɛ mli lɛ, afo tso ni da naakpa lɛ ni afimɔ etsoku lɛ koni ekakwɛ̃ kɛmiiya ŋwɛi kɛyashi bei kpawo. Nakai nɔŋŋ Nebukadnezar hu “akpa lɛ yɛ emaŋtsɛsɛi lɛ nɔ” beni Yehowa ha eye sɛkɛ lɛ. (Daniel 5:20) Enɛ tsake maŋtsɛ lɛ tsui kɛjɛ gbɔmɔ nɔ̃ kɛtee tsina nɔ̃. Ni kɛlɛ, Nyɔŋmɔ baa Nebukadnezar maŋtsɛsɛi lɛ yi eha lɛ kɛyashi be mli ni bei kpawo lɛ ba naagbee. Yɛ be mli ni eeenyɛ efee akɛ Evil-merodach tsu nii akɛ nɔyeli yitso yɛ be kuku mli lɛ, Daniel sɔmɔ akɛ “nɔyelɔ yɛ Babel shikpɔŋ lɛ fɛɛ nɔ, kɛ Babel nilelɔi lɛ fɛɛ nɔ onukpa.” Enanemɛi Hebribii etɛ lɛ tee nɔ amɛná kpokpai lɛ asaji anɔkwɛmɔ mli gbɛfaŋnɔ. (Daniel 1:11-19; 2:48, 49; 3:30) Mɛi ejwɛ ni aŋɔ amɛ nom lɛ mɛ be mli ni abaaku sɛɛ akɛ Nebukadnezar ata emaŋtsɛsɛi nɔ ekoŋŋ akɛ maŋtsɛ ni ejwɛŋmɔ eba enɔ ni ekase akɛ “mɔ ni yɔɔ ŋwɛi shɔŋŋ lɛ yɛ hewalɛ yɛ gbɔmɛi amaŋtsɛyeli nɔ, ni eŋɔ-haa mɔ fɛɛ mɔ ni esumɔɔ” lɛ.
NEBUKADNEZAR BATA EMAŊTSƐSƐI NƆ EKOŊŊ
19. Beni Yehowa ha Nebukadnezar jwɛŋmɔ ba enɔ ekoŋŋ lɛ sɛɛ lɛ, mɛni Babilonia maŋtsɛ lɛ bayɔse?
19 Yehowa ha Nebukadnezar jwɛŋmɔ ba enɔ ekoŋŋ yɛ bei kpawo lɛ naagbee. Ni yɛ be mli ni ekpɛlɛɔ Nyɔŋmɔ ni Yɔɔ Ŋwɛi Shɔŋŋ lɛ nɔ lɛ, maŋtsɛ lɛ kɛɛ akɛ: “Ni gbii lɛ asɛɛ lɛ mi, Nebukadnezar, mihole mihiŋmɛii anɔ mikwɛ ŋwɛi, ni mijwɛŋmɔ ku sɛɛ ba mimli ekoŋŋ, ni mijie mɔ ni yɔɔ ŋwɛi shɔŋŋ lɛ yi, ni mikafo ni miwo mɔ ni hiɔ shi kɛyashiɔ naanɔ lɛ hiɛ nyam; ejaakɛ enɔyeli lɛ naanɔ nɔyeli ni, ni emaŋtsɛyeli lɛ yɛ kɛjɛ yinɔ kɛyaa yinɔ. Ni shikpɔŋ lɛ nɔ bii fɛɛ lɛ, abuɔ amɛ akɛ amɛjeee fɛifɛi, ni efeɔ nɔ ni esumɔɔ yɛ ŋwɛi ta lɛ kɛ shikpɔŋ lɛ nɔ bii lɛ ateŋ, ni mɔ ko bɛ ni aaatswa enine afɔ̃ loo ni eeekɛɛ lɛ akɛ: Mɛni ofeɔ nɛɛ?” (Daniel 4:34, 35) Hɛɛ, Nebukadnezar bayɔse akɛ Mɔ ni Yɔɔ Ŋwɛi Shɔŋŋ lɛ ji Maŋtsɛ kɛ Nɔyelɔ yɛ gbɔmɛi amaŋtsɛyeli nɔ lɛɛlɛŋ.
20, 21. (a) Yɛ mɛɛ gbɛ nɔ dade kɔsɔŋkɔsɔ ni akɛfimɔ lamɔ mli tso lɛ tsoku lɛ jiemɔ tamɔ nɔ ni ba Nebukadnezar nɔ lɛ pɛpɛɛpɛ? (b) Mɛni Nebukadnezar kpɛlɛ nɔ, ni ani enɛ ha ebatsɔ Yehowa jálɔ?
20 Beni Nebukadnezar ku sɛɛ ebata emaŋtsɛsɛi lɛ nɔ lɛ, ebafee tamɔ nɔ ni ájie dade kɛ akɔɔble kɔsɔŋkɔsɔ ni akɛfimɔ lamɔ lɛ mli tso lɛ tsoku lɛ. Ewie esɛɛkuu lɛ he akɛ: “Nakai be lɛ mli nɔŋŋ lɛ mijwɛŋmɔ ku sɛɛ ba mimli ekoŋŋ, ni bɔni afee ni mimaŋtsɛyeli lɛ hiɛ aba nyam ekoŋŋ hewɔ lɛ, miwoo kɛ mihiɛŋtso nɔ kpɛmɔ lɛ ku sɛɛ ba miŋɔɔ ekoŋŋ, ni mijinafoi kɛ minukpai lɛ tao mi, ni aŋɔ mi ato mimaŋtsɛyeli lɛ nɔ ekoŋŋ, ni aŋɔ hewalɛ ni fe tsutsu nɔ lɛ afata he aha mi.” (Daniel 4:36) Kɛji akɛ maŋtsɛwe lɛ onukpai lɛ eko kpoo maŋtsɛ ni eye sɛkɛ lɛ po lɛ, amrɔ nɛɛ ‘amɛkɛ hehiamɔ miitao’ lɛ yɛ heshibaa kwraa mli.
21 Mɛɛ “okadii kɛ naakpɛɛ nii” Nyɔŋmɔ ni Yɔɔ Ŋwɛi Shɔŋŋ lɛ efee nɛkɛ! Esaaa akɛ efeɔ wɔ naakpɛɛ akɛ Babilonia maŋtsɛ ni akɛ lɛ ebata sɛi nɔ ekoŋŋ lɛ kɛɛ akɛ: “No hewɔ lɛ agbɛnɛ mi, Nebukadnezar, miijie ŋwɛi maŋtsɛ lɛ yi, ni miiwó enɔ, ni miiwo ehiɛ nyam; ejaakɛ enitsumɔi fɛɛ lɛ anɔkwale ni, ni egbɛ̀i hu ja, ni mɛi ni yɔɔ hewoo jeŋ lɛ, enyɛɔ amɛ shi ebaa.” (Daniel 4:2, 37) Shi kɛlɛ, sane nɔkpɛlɛmɔ ni tamɔ nɛkɛ haaa Nebukadnezar afee Yehowa jálɔ Jeŋmaŋnyo.
ANI ODASEYELI KO YƐ NI JƐ JE LƐŊ?
22. Mɛɛ hela mɛi komɛi kɛtoɔ Nebukadnezar sɛkɛyeli lɛ he, shi mɛni esa akɛ wɔyoo yɛ nɔ ni kɛ esɛkɛyeli shihilɛ lɛ ba lɛ he?
22 Mɛi komɛi kɛ Nebukadnezar sɛkɛyeli lɛ toɔ lycanthropy he. Tsofafeemɔ mli wiemɔi komekomei ashishitsɔɔmɔ wolo ko kɛɔ akɛ: “LYCANTHROPY . . . jɛ [lyʹkos], lupus, klaŋ; kɛ [anʹthro·pos], homo, gbɔmɔ, mli. Akɛ nɛkɛ gbɛi nɛɛ hã helai ni yeɔ gbɔmɛi ni hãa amɛsusuɔ akɛ amɛtsake amɛtsɔmɔ kooloi, ni kaseɔ nakai kooloo lɛ gbee loo eyaafoi, esui loo enifeemɔi komɛi lɛ. Nɛkɛ aŋkroaŋkroi nɛɛ susuɔ akɛ amɛtsake amɛtsɔmɔ klaŋ, gbée loo alɔnte; yɛ bei komɛi amli hu lɛ amɛtsɔmɔ tsina, taakɛ eji yɛ Nebukadnezar gbɛfaŋ lɛ.” (Dictionnaire des sciences médicales, par une société de médicins et de chirurgiens, Paris, afi 1818, Kpo 29, baafa 246) Lycanthropy hela lɛ he okadii tamɔ Nebukadnezar sɛkɛyeli shihilɛ lɛ nɔŋŋ. Shi, akɛni ajɛ ŋwɛi afã akɛ ebaaye jwɛŋmɔŋ hela hewɔ lɛ, anyɛŋ akɛto hela pɔtɛɛ ko ni ale he.
23. Mɛɛ je lɛŋ odaseyeli ko yɔɔ ni kɔɔ Nebukadnezar sɛkɛyeli lɛ he?
23 Woloŋlelɔ John E. Goldingay tsĩ helai pii ni tamɔ Nebukadnezar sɛkɛyeli lɛ kɛ etsamɔ lɛ tã. Ákɛ nɔkwɛmɔnɔ lɛ, ekɛɛ akɛ: “Eyɛ faŋŋ akɛ tɛ-tao nɔ niŋmaa ko ni ekumɔ wie jwɛŋmɔŋ basabasafeemɔ ko ni ba Nebukadnezar nɔ, kɛ agbɛnɛ Babilon ni ejie ejwɛŋmɔ kɛjɛ nɔ kɛ jɛmɛ ni eshi lɛ he.” Goldingay tsĩ wolo ko ni atsɛɔ lɛ “The Babylonian Job” lɛ tã ni ekɛɛ akɛ, “eyeɔ kãmɔ ni Nyɔŋmɔ kã lɛ, ehela, shi ni aba lɛ, lamɔ ni yɔɔ gbeyei ko shishitsɔɔmɔ ni etao, shɛ́ ni ashɛ lɛ afɔ̃ tamɔ tso, maŋ lɛ sɛɛ ni eyaje, jwɛifɔ ni eye, shishinumɔ ni ebɛ dɔŋŋ, bɔ ni etsɔ tamɔ tsina, bɔ ni Marduk nɛ nu eshwie enɔ, ewaobii anaa lamii ni fite, eyitsɔi ni tsa kusuu, kɔsɔŋkɔsɔ ni awo lɛ, kɛ etsamɔ ni ha ejie nyɔŋmɔ yi lɛ he odase.”
BEI KPAWO NI SAA WƆ HE
24. (a) Lamɔ mli tso ni da naakpa lɛ feɔ mɛni he mfoniri? (b) Mɛni atsĩ naa bei kpawo lɛ, ni te enɛ ba lɛ nakai eha tɛŋŋ?
24 Taakɛ bɔ ni tso ni da naakpa lɛ damɔ shi kɛha lɛ lɛ, Nebukadnezar fee jeŋ nɔyeli he mfoniri. Shi kaimɔ akɛ tso lɛ damɔ shi kɛha nɔyeli kɛ maŋtsɛyeli ni yɔɔ nyam babaoo fe Babilon maŋtsɛ lɛ nɔ̃ lɛ. Efeɔ Yehowa, “ŋwɛi maŋtsɛ” lɛ jeŋ muu fɛɛ nɔyeli, titri lɛ nɔ ni kɔɔ shikpɔŋ lɛ he lɛ he mfoniri. Dani Babiloniabii lɛ aaakpata Yerusalem hiɛ lɛ, no mli lɛ maŋtsɛyeli lɛ yɛ nakai maŋ lɛ mli, ni David kɛ eseshibii ni tara “Yehowa sɛi” nɔ lɛ damɔ Nyɔŋmɔ nɔyeli ni kɔɔ shikpɔŋ lɛ he lɛ najiaŋ. (1 Kronika 29:23) Nyɔŋmɔ diɛŋtsɛ ha afo nɛkɛ maŋtsɛyeli nɛɛ afɔ̃ shi ni afimɔ lɛ yɛ afi 607 D.Ŋ.B., beni ekɛ Nebukadnezar tsu nii koni ekpata Yerusalem hiɛ lɛ. Atsĩ ŋwɛi nɔyeli ni baaye shikpɔŋ lɛ nɔ kɛtsɔ maŋtsɛyeli ni yɔɔ David wekukpaa lɛ mli lɛ nɔ lɛ naa bei kpawo. Be sɛɛkɛlɛ enyiɛ bei kpawo nɛɛ feɔ? Mɛɛ be amɛje shishi, ni mɛni kadi amɛ naagbee?
25, 26. (a) Yɛ Nebukadnezar sane lɛ mli lɛ, be sɛɛkɛlɛ enyiɛ “bei kpawo” lɛ feɔ, ni mɛni hewɔ ohaa hetoo nakai? (b) Yɛ emlibaa wulu mli lɛ, mɛɛ be “bei kpawo” lɛ je shishi ni yɛ mɛɛ gbɛ nɔ?
25 Yɛ Nebukadnezar sɛkɛyeli be lɛ mli lɛ, “eyitsɔi tsa tamɔ okropɔŋ tsɛji, ni elamii hu tamɔ loofɔji awaobii anaa.” (Daniel 4:33) Enɛ sɛɛ tsɛ fe gbii kpawo loo otsii kpawo. Shishitsɔɔmɔi srɔtoi kaneɔ akɛ “bei kpawo,” ni wiemɔi ni abaanyɛ akɛto najiaŋ ji “bei (pɔtɛɛ) ni ato” loo “be kpalaŋi.” (Daniel 4:16, 23, 25, 32) Hela (Septuagint) Momo ko ni yɔɔ srɔto lɛ kaneɔ akɛ, “afii kpawo.” Klɛŋklɛŋ afii oha lɛ mli Yudanyo yinɔsaneŋmalɔ Josephus bu “bei kpawo” lɛ akɛ “afii kpawo.” (Antiquities of the Jews, Wolo 10, Yitso 10, kuku 6) Ni Hebri woloŋlelɔi komɛi ebu nɛkɛ “bei” nɛɛ akɛ “afii.” “Afii kpawo” ji bɔ ni An American Translation, Today’s English Version, kɛ shishitsɔɔmɔ ni James Moffatt fee lɛ wie he.
26 Eyɛ faŋŋ akɛ Nebukadnezar “bei kpawo” lɛ kɔɔ afii kpawo he. Yɛ gbalɛ naa lɛ, afi feɔ gbii 360, loo nyɔji 12 ni eko fɛɛ eko feɔ gbii 30 kɛ́ aja mli. (Okɛto Kpojiemɔ 12:6, 14 he.) No hewɔ lɛ, maŋtsɛ lɛ “bei kpawo,” loo afii kpawo lɛ feɔ gbii 360 ni akɛbɔ he toi 7, loo gbii 2,520. Shi elamɔ nɛɛ mlibaa wulu lɛ hu? Gbalɛ “bei kpawo” lɛ sɛɛ tsɛ fe gbii 2,520. Yesu wiemɔi nɛɛ tsɔɔ nakai: “Jeŋmaji lɛ aaanaanaa Yerusalem nɔ kɛyashi beyinɔ ni jeŋmaji abe lɛ aaashɛ.” (Luka 21:24) Nakai ‘nɔnaamɔ’ lɛ je shishi yɛ afi 607 D.Ŋ.B., beni akpata Yerusalem hiɛ, ni Nyɔŋmɔ maŋtsɛyeli diɛŋtsɛ lɛ sɛɛ fo yɛ Yuda lɛ. Mɛɛ be nɔnaamɔ lɛ baaba naagbee? Yɛ “nibii fɛɛ agbɛjianɔtoo be lɛ” mli, beni abaajie ŋwɛi nɔyeli kpo ekoŋŋ yɛ shikpɔŋ lɛ he kɛtsɔ mfonirifeemɔŋ Yerusalem, ni ji Nyɔŋmɔ Maŋtsɛyeli lɛ nɔ lɛ.—Bɔfoi lɛ Asaji 3:21.
27. Mɛni hewɔ obaakɛɛ akɛ “bei kpawo” lɛ ni je shishi yɛ afi 607 D.Ŋ.B. lɛ baaa naagbee yɛ gbii 2,520 diɛŋtsɛ sɛɛ?
27 Kɛji akɛ wɔkane gbii 2,520 diɛŋtsɛ kɛjɛ Yerusalem hiɛkpatamɔ yɛ afi 607 D.Ŋ.B. lɛ, ekɛ wɔ baaba afi 600 D.Ŋ.B. pɛ, afi ni etsɔɔɔ nɔ ko nɔ ko yɛ Ŋmalɛ naa. Yɛ afi 537 D.Ŋ.B. po, ni no mli lɛ Yudafoi ni aŋmɛɛ amɛhe lɛ ebashɛ Yuda lɛ, ajieee Yehowa maŋtsɛyeli lɛ kpo yɛ shikpɔŋ nɔ. Nakai eji, ejaakɛ afeee Zerubabel, ni baanyɛ ata David maŋtsɛsɛi lɛ nɔ lɛ maŋtsɛ, shi moŋ afee lɛ amralo kɛkɛ yɛ Yuda ní ebatsɔ Persia nɔyelihe lɛ nɔ.
28. (a) Mɛɛ mla esa akɛ akɛtsu nii yɛ gbalɛ “bei kpawo” lɛ gbii 2,520 lɛ he? (b) Be sɛɛkɛlɛ enyiɛ gbalɛ “bei kpawo” lɛ feɔ, ni mɛɛ bei kadiɔ amɛ shishijee kɛ amɛ naagbee?
28 Akɛni “bei kpawo” lɛ ji gbalɛ hewɔ lɛ, esa akɛ wɔkɛ Ŋmalɛ naa mla lɛ ato gbii 2,520 lɛ he: ‘Gbi kome kɛha afi.’ Akɛ mla nɛɛ ewo gbalɛ ni kɔɔ Yerusalem he ka ni Babiloniabii lɛ wo lɛ he lɛ mli. (Ezekiel 4:6, 7; okɛto 4 Mose 14:34 he.) No hewɔ lɛ, “bei kpawo” ni Jeŋmaji lɛ kɛyeɔ shikpɔŋ lɛ nɔ ni Nyɔŋmɔ Maŋtsɛyeli lɛ kɛ ehe wooo mli lɛ sɛɛkɛlɛ feɔ afii 2,520. Amɛje shishi beni afee Yuda kɛ Yerusalem amaŋfɔ yɛ nyɔɔŋtsere nyɔɔŋ ni ji kpawo (Tishri 15) lɛ nɔ yɛ afi 607 D.Ŋ.B. lɛ mli. (2 Maŋtsɛmɛi 25:8, 9, 25, 26) Kɛjɛ nakai be lɛ kɛyashi afi 1 D.Ŋ.B. feɔ afii 606. Afii 1,914 ni eshwɛ lɛ mli kpãa kɛjɛɔ nakai be lɛ mli kɛyashiɔ afi 1914 Ŋ.B. No hewɔ lɛ, “bei kpawo” loo afii 2,520 lɛ baa naagbee yɛ Tishri 15, loo October 4 loo 5, 1914 Ŋ.B.
29. Namɔ ji “gbɔmɛi amliwoo” lɛ, ni mɛni Yehowa fee koni ekɛ lɛ ata maŋtsɛsɛi nɔ?
29 Nakai afi lɛ mli “jeŋmaji abe” lɛ ba naagbee, ni Nyɔŋmɔ kɛ nɔyeli ha “gbɔmɛi amliwoo”—Yesu Kristo—mɔ ni ehenyɛlɔi lɛ ebuuu lɛ kwraa akɛ amɛha asɛŋ lɛ po lɛ. (Daniel 4:17) Bɔni afee ni Yehowa kɛ Mesia Maŋtsɛ lɛ ata maŋtsɛsɛi nɔ lɛ, efɛne okadi dade kɛ akɔɔble kɔsɔŋkɔsɔi lɛ kɛjɛ lɛ diɛŋtsɛ emaŋtsɛyeli “tsoku” lɛ he. Yɛ enɛ hewɔ lɛ, Nyɔŋmɔ ni Yɔɔ Ŋwɛi Shɔŋŋ lɛ ŋmɛ gbɛ koni odehe ko “akwɛ̃” koni eda kɛjɛ mli akɛ ŋwɛi nɔyeli lɛ kpojiemɔ yɛ shikpɔŋ lɛ he kɛtsɔ ŋwɛi Maŋtsɛyeli ni yɔɔ David Gboshiniyelɔ ni da fe fɛɛ, Yesu Kristo dɛŋ lɛ nɔ. (Yesaia 11:1, 2; Hiob 14:7-9; Ezekiel 21:32) Kwɛ bɔ ni wɔdaa Yehowa shi wɔhãa yɛ bɔ ni saji nɛɛ etsɔ miishɛɛ, kɛ tso ni da naakpa lɛ he teemɔŋ sane lɛ ni ajie lɛ kpo lɛ hewɔ!
MƐNI OYƆSE?
• Nebukadnezar lamɔ lɛ mli tso ni da naakpa lɛ damɔ shi kɛha mɛni?
• Mɛni ba Nebukadnezar nɔ yɛ etso he lamɔ lɛ klɛŋklɛŋ mlibaa lɛ mli?
• Beni elamɔ lɛ ba mli yɛ enɔ lɛ sɛɛ lɛ, mɛni Nebukadnezar kpɛlɛ nɔ?
• Yɛ lamɔ mli tso lɛ mlibaa wulu mli lɛ, be sɛɛkɛlɛ enyiɛ “bei kpawo” lɛ feɔ, ni mɛɛ be amɛje shishi ni amɛba naagbee?
[Baafa muu mfoniri ni yɔɔ baafa 83]
[Baafa muu mfoniri ni yɔɔ baafa 91]