Belshazar​—Mɔ ni Baaye Maŋtsɛ aloo Maŋtsɛ Ni?

BIBLIA mli saji ahe nilelɔi eje ŋwane yɛ Belshazar he afii pii. Taakɛ Biblia mli wolo ni ji Daniel tsɔɔ lɛ, “Maŋtsɛ Belshazar” ji Babilon nɔyelɔ, ni beni Koresh, Persianyo lɛ butu emaŋtsɛyeli lɛ yɛ afi 539 D.Ŋ.B. gbɛkɛ ko lɛ, no mli lɛ eŋmɛ okpɔlɔ kpeteŋkpele ko. (Daniel 5:⁠1) Naagba lɛ ji akɛ, Biblia lɛ pɛ tsiɔ Belshazar gbɛi ata. Mra be mli yinɔsane etsiii egbɛi ata shi moŋ amaniɛ ni amɛbɔɔ ji akɛ mɔ ni ji Babilon nɔyelɔ yɛ nakai be lɛ mli ji Nabonido. Mɛi pii bu enɛ akɛ odaseyeli ni tsɔɔ akɛ Daniel wolo lɛ he bɛ sɛɛnamɔ ko yɛ yinɔsane mli ni ekolɛ aŋma yɛ be mli ni Babilon egbee shi lɛ sɛɛ afii ohai babaoo.

Shi amɛtsɔ hiɛ amɛkojo mra tsɔ. Sane ko ni Alan Millard ŋma yɛ Biblical Archaeology Review (May/June 1985) lɛ mli lɛ tsɔɔ akɛ, shitsaa jie niŋmaa ko yɛ 1985 yɛ Iraq ni nɔ ni aŋmala yɛ nɔ ji sɔlemɔ kɛha wala sɛɛtsɛlɛ kɛ gbɔmɔtsoŋ hewalɛnamɔ kɛha Nabonido kɛ ebinuu nukpa. Ni mɛni ji ebinuu nɛɛ gbɛi? Belshazar! No hewɔ lɛ Belshazar ko hi shi yɛ Babilon! Kɛjɛ 1854 kɛbaa nɛɛ ana niŋmaai pii ni maa enɛ nɔ mi. Shi nakai niŋmaai lɛ eko kwraa tsɛɛɛ Belshazar akɛ maŋtsɛ. Niŋmaai lɛ tsɛɔ lɛ maŋtsɛ lɛ binuu aloo mɔ ni baaye maŋtsɛ yɛ etsɛ sɛɛ. No hewɔ lɛ mɛi ni wieɔ shiɔ lɛ kɛɔ akɛ mɔ ni ŋma Daniel wolo lɛ tɔ̃ akɛ ewie ehe akɛ “maŋtsɛ Belshazar.”

Shi amɛtɔ̃ po yɛ enɛ mli. Te wɔfeɔ tɛŋŋ wɔleɔ? Nɔ kome ji akɛ, taakɛ Alan Millard tsɔɔ lɛ, mla naa woji ni atsa shi ana ni jɛ nakai be lɛ mli yɛ ni tsɔɔ akɛ mɛi enyɔ ni sane kɔɔ amɛhe kãa Nabonido kɛ Belshazar kita aloo amɛkɛ amɛ kãa kita. Mɛni hewɔ enɛ sa kadimɔ jogbaŋŋ lɛ? Ejaakɛ nɔ ni ka shi ni afɔɔ feemɔ ji ni mɛi enyɔ ni sane ka amɛteŋ lɛ kɛ nyɔŋmɔi lɛ aka kita ni amɛkɛ maŋtsɛ lɛ hu aka kita. Belshazar ni akɛ lɛ kãa kita lɛ ji nɔ ni yɔɔ sɔrɔto lɛ, no hewɔ lɛ Belshazar hiɛ gbɛnaa ko yɛ biɛ. Yɛ anɔkwale mli lɛ, etamɔ nɔ ni Belshazar kome toɔ ye nɔ yɛ Babilon afii babaoo yɛ be mli ni etsɛ yɔɔ Arabia kooyigbɛ shikpɔŋ kpakpa, Teima, ni shia ŋa ebɔle lɛ lɛ nɔ lɛ. Taakɛ tao ni atsa shi ana ni abaa yi yɛ British Museum bianɛ (blema nibii atoohe ni yɔɔ Ŋleshi Ablotsiri) lɛ tsɔɔ lɛ, Nabonido “kɛ maŋtsɛyeli lɛ wo” Belshazar “edɛŋ.”

Belɛ mɛni yinɔsane he niŋmalɔi tsɛɔ lɛ “mɔ ni baaye maŋtsɛ” yɛ be mli ni Daniel wolo lɛ kɛ gbɛi “maŋtsɛ” tsɛɔ lɛ lɛ? Nii ni atsa shi ana yɛ Siria kooyigbɛ lɛ kɛ hetoo haa wɔ. Atsa shi ana blema Gozan maŋtsɛ lɛ he amaga ko ni edalɛ tamɔ gbɔmɔ yɛ 1979. Nɔ ni aŋma yɛ etade naamuu lɛ naa ji niŋmaai enyɔ, ekome yɛ Asiria wiemɔ mli ni ekroko lɛ hu yɛ Aramaik wiemɔ mli. Yɛ be mli ni niŋmaai enyɔ lɛ je amɛhe lɛ, kɛ hoo lɛ sɔrɔto ko yɛ mli. Nɔ ni aŋma yɛ Asiria lumɛi lɛ awiemɔ mli lɛ tsɔɔ akɛ nɔyelɔ ni amaga lɛ damɔ shi kɛha lɛ lɛ ji “Gozan amralo.” Ni nɔ ni aŋma yɛ Aramaik, ni ji gbɔmɛi foji lɛ awiemɔ mli lɛ tsɔɔ akɛ “maŋtsɛ” ni.

Nɔ ni kɛ enɛ kpaa gbee lɛ Alan Millard mu sane naa akɛ, yɛ be mli ni yinɔsane mli niŋmaai wieɔ Belshazar he akɛ mɔ ni baaye maŋtsɛ lɛ, “ebaafee nɔ ni ja gbɛ akɛ Daniel wolo lɛ aaatsɛ Belshazar akɛ ‘maŋtsɛ.’ Eye nɔ eha etsɛ, akɛ mɔ ni yeɔ etsɛ najiaŋ, eyɛ mli akɛ no mli lɛ awoko lɛ maŋtsɛ yɛ mla naa. Taakɛ atsɔɔ mli yɛ Daniel lɛ, mɔ ni eji diɛŋtsɛ lɛ kɔɔɔ he eko ni eeenyɛ efutu mɛi ayiŋ po.”

Enɛɛmɛi fɛɛ teɔ sanebimɔ nɛɛ shi akɛ: Kɛji akɛ aŋma Daniel wolo lɛ yɛ Babilon shigbeemɔ sɛɛ afii ohai babaoo lɛ, te fee tɛŋŋ ni mɔ ni ŋma lɛ bale Belshazar ni yinɔsane ŋmalɔi krokomɛi eku amɛhiɛ amɛshwie enɔ lɛ? Ni mɛni hewɔ etsɛ́ lɛ “maŋtsɛ,” ekɛnyiɛ kusum nifeemɔ ni no ale yɛ be mli ni Belshazar yɔɔ shihilɛ mli lɛ sɛɛ, shi hiɛ bakpa nɔ yɛ sɛɛ mli afii ohai abɔ lɛ amli lɛ? Yɛ anɔkwale mli lɛ, bɔ ni awie ehe yɛ Daniel wolo lɛ mli akɛ “Maŋtsɛ Belshazar” lɛ ji odaseyeli ni ma shi shiŋŋ akɛ, yɛ anɔkwale mli lɛ, mɔ ni hi shi yɛ Babilon yɛ afii ohai ekpaa D.Ŋ.B. lɛ ji mɔ ni ŋma wolo lɛ.

November Daa Gbi Ŋmalɛ

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)