Yitso Kpaanyɔ
Ajie Lɛ Kɛjɛ Jatai Adaaŋ!
1, 2. (a) Mɛɛ gbɛ nɔ Dario Medianyo lɛ tsɔ eto emaŋtsɛyeli ni mli elɛɛ lɛ he gbɛjianɔ? (b) Tsɔɔmɔ amraloi lɛ anitsumɔi kɛ hegbɛi lɛ amli.
BABILON egbee shi! Átsumɔ enunyam ni ená mli ŋɔɔmɔ afii oha ákɛ jeŋ hewalɛ lɛ yɛ ŋmɛlɛtswaa fioo pɛ mli. Be hee miije shishi—Mediabii kɛ Persiabii anɔ̃ lɛ. Ákɛ mɔ ni baye nɔ yɛ Belshazar sɛɛ ni bata emaŋtsɛsɛi lɛ nɔ lɛ, Dario, ni ji Medianyo lɛ kɛ nitsumɔ ni wa ni ji emaŋtsɛyeli ni mli elɛɛ lɛ he gbɛjianɔtoo kpe.
2 Klɛŋklɛŋ nitsumɔi ni Dario kɛ ehe wo mli ji amraloi 120 ni ehala amɛ. Ahe aye akɛ yɛ bei komɛi amli lɛ, ahalaa mɛi ni sɔmɔ yɛ gbɛhe ni tamɔ nɛkɛ mli lɛ kɛjɛɔ maŋtsɛ lɛ wekumɛi ateŋ. Fɛɛ sɛɛ lɛ, amralo fɛɛ amralo yeɔ kpokpaa wulu ko loo maŋtsɛyeli lɛ fãi komɛi ni ajara mli lɛ anɔ. (Daniel 6:2) Enitsumɔi ji ni ehe tooi ni ekɛ shika ni ebua naa lɛ amaje kɛba maŋtsɛwe lɛ. Eyɛ mli akɛ maŋtsɛ lɛ najiaŋdamɔlɔ bapɛiɔ enitsumɔi lɛ amli ekwɛɔ yɛ be kɛ bei amli moŋ, shi amralo lɛ yɛ nɔyeli hegbɛ ni da saŋŋ. Esabala lɛ shishi ji “Maŋtsɛyeli lɛ hebulɔ.” Abuɔ amralo lɛ akɛ maŋtsɛ lɛ sɔɔlɔ, ní miihe atamɔ maŋtsɛ ni yɔɔ hewalɛ.
3, 4. Mɛni hewɔ Dario sumɔɔ Daniel sane lɛ, ni mɛɛ gbɛhe mli maŋtsɛ lɛ hala lɛ ewo?
3 Mɛni Daniel baatsu yɛ gbɛjianɔtoo hee nɛɛ mli? Ani Dario, ni ji Medianyo lɛ baaha Yudanyo gbalɔ ni egbɔ ni ená afii nyɔŋmai nɛɛhu kɛmiiya lɛ aba hejɔɔmɔ? Dabida! Ŋwanejee ko bɛ he akɛ Dario yɔse akɛ Daniel gba Babilon shigbeemɔ lɛ pɛpɛɛpɛ, ni ákɛ gbalɛ ni tamɔ nɛkɛ biɔ sɛɛyoomɔ ni kwɔ fe adesa nɔ̃. Kɛfata he lɛ, Daniel kɛ afii babaoo ená bɔ ni akɛ nomii akui srɔtoi ni yɔɔ Babilon lɛ yeɔ haa lɛ he niiashikpamɔ. Dario jwɛŋmɔ ji ni eha toiŋjɔlɛ wekukpaa aba lɛ kɛ eshishibii ni ebaye amɛnɔ ehee lɛ ateŋ. No hewɔ lɛ, eyɛ faŋŋ akɛ ebaasumɔ mɔ ko ni yɔɔ Daniel nilee kɛ eniiashikpamɔ lɛ eko koni ebɛŋkɛ emaŋtsɛsɛi lɛ. Yɛ mɛɛ gbɛhe mli?
4 Eji Dario hala Yudanyo Daniel ni yɔɔ nomŋɔɔ mli lɛ akɛ amralo kulɛ, ebaafee naakpɛɛ sane diɛŋtsɛ. Shi susumɔ hoofeemɔ ni ba beni Dario tsĩ eyiŋkpɛɛ akɛ ebaafee Daniel onukpai etɛ ni baakwɛ amraloi lɛ anɔ lɛ ateŋ mɔ kome lɛ tã lɛ he okwɛ! Jeee no pɛ kɛkɛ, shi Daniel ‘miijie ehe kpo akɛ mɔ ni esoro lɛ,’ eejie ehe kpo akɛ mɔ ni nɔ kwɔ fe enanemɛi onukpai lɛ. Yɛ anɔkwale mli lɛ, ana “mumɔ ni teke nɔ” yɛ emli. Dario susu po akɛ eeefee lɛ maŋsɔɔlɔ nukpa.—Daniel 6:3, 4.
5. Te onukpai krokomɛi lɛ kɛ amraloi lɛ fee amɛnii yɛ Daniel gbɛhe lɛ he amɛha tɛŋŋ, ni mɛni hewɔ?
5 Onukpai krokomɛi lɛ kɛ amraloi lɛ amli baafũ waa. Ejaakɛ amɛnyɛɛɛ amɛdamɔ susumɔ ni ji Daniel—ni jeee Medianyo loo Persianyo ni asaŋ ejeee odehei aweku lɛ mlinyo lɛ—ni aaaná nɔyeli gbɛhe yɛ amɛnɔ lɛ naa! Te aaafee tɛŋŋ ni Dario aaawó gbɔ nɔ grɔŋŋ nɛkɛ, ni eshi lɛ diɛŋtsɛ emaŋbii, lɛ diɛŋtsɛ eweku po? Nifeemɔ ni tamɔ nɛkɛ baanyɛ atamɔ nɔ ni ejaaa. Agbɛnɛ hu, amraloi lɛ buɔ emuuyeli mli ni Daniel hiɛ lɛ akɛ nɔ ko ni amɛsumɔɔɔ, ni teɔ shi woɔ mɛi ahe nii ni amɛyeɔ kɛ amɛ diɛŋtsɛ amɛ kpɔtɔmɔ gbɛ lɛ. Ni kɛlɛ, onukpai lɛ kɛ amraloi lɛ bɛ ekãa ni fa bɔ ni no aaaha amɛkɛ sane nɛɛ aya Dario hiɛ. Ejaakɛ, Dario buɔ Daniel waa diɛŋtsɛ.
6. Mɛɛ mɔdɛŋ onukpai lɛ kɛ amraloi lɛ bɔ koni amɛkɛgbe Daniel he guɔ, ni mɛni hewɔ mɔdɛŋbɔɔ nɛɛ fee efolo lɛ?
6 No hewɔ lɛ, nɛkɛ maŋkwralɔi awuŋayelɔi nɛɛ kpaŋ yɛ amɛ diɛŋtsɛ amɛteŋ. Amɛtao bɔ ni amɛaafee “ni amɛná Daniel he sane ko yɛ enɔyeli nitsumɔ lɛ mli.” Ani tɔ̃mɔ ko yɛ gbɛ ni etsɔɔ nɔ etsuɔ nii lɛ he? Ani eyeee anɔkwa? Onukpai lɛ kɛ amraloi lɛ enaaa nɔ ko ni tsɔɔ ehiɛ ni ekuɔ eshwieɔ nitsumɔ nɔ loo fitemɔ ko kwraa yɛ gbɛ ni Daniel tsɔɔ nɔ etsuɔ enitsumɔi lɛ amli. Amɛsusu akɛ: “Wɔnaŋ nɛkɛ Daniel nɛɛ he sane ko sane ko, akɛ ja e-Nyɔŋmɔ lɛ mla lɛ hewɔ kɛkɛ wɔɔná eko yɛ.” Ni nakai ji bɔ ni eba lɛ akɛ, nɛkɛ gbɔmɛi gbohii nɛɛ kpaŋ eyinɔ. Amɛsusu akɛ, no kɛ Daniel gbele baaba amrɔ nɔŋŋ.—Daniel 6:5, 6.
ATO GBƆMƆGBEE HE GBƐJIANƆ
7. Mɛɛ susumɔ onukpai lɛ kɛ amraloi lɛ kɛbafɔ̃ maŋtsɛ lɛ hiɛ, ni amɛfee nakai yɛ mɛɛ gbɛ nɔ?
7 Onukpai lɛ kɛ amraloi lɛ ‘bua amɛhe naa yuu’ kɛba Dario ŋɔɔ. Aramaik wiemɔ ni yɔɔ biɛ lɛ hiɛ shishinumɔ ni tsɔɔ hoofeemɔ. Eyɛ faŋŋ akɛ nɛkɛ hii nɛɛ ha efee tamɔ nɔ ni amɛhiɛ sane ko ni he hiaa waa ni esa akɛ amɛkɛfɔ̃ Dario hiɛ. Ekolɛ amɛsusu akɛ ebiŋ sane yɛ nɔ ni amɛkɛɔ lɛ he kɛ amɛkɛfɔ̃ ehiɛ kɛ yiŋtsɔmɔ, ni ákɛ, eji nɔ̃ ko ni esa akɛ atsu he nii amrɔ nɔŋŋ. No hewɔ lɛ, amɛkɛ sane lɛ fɔ̃ shi kpoo, akɛ: “Maŋtsɛyeli lɛ mli onukpai lɛ kɛ lumɛi lɛ kɛ amraloi lɛ kɛ ajinafoi lɛ kɛ akutsei anukpai lɛ etee ajina, ákɛ maŋtsɛ awo kita kɛ akpɔ akɛ mɔ fɛɛ mɔ ni aaabi nyɔŋmɔ loo gbɔmɔ ko nɔ ko, ni jeee bo maŋtsɛ okome kɛkɛ, kɛyashi biɛ gbii nyɔŋmai etɛ lɛ, aaashɛ lɛ afɔ̃ jatai abu lɛ mli.”a—Daniel 6:7, 8.
8. (a) Mɛni hewɔ Dario baanya mla ni asusu he lɛ he lɛ? (b) Mɛni ji onukpai lɛ kɛ amraloi lɛ ajwɛŋmɔ diɛŋtsɛ?
8 Yinɔsane mli niŋmaai maa nɔ mi akɛ, nɔ ni afɔɔ feemɔ ji Mesopotamia maŋtsɛmɛi ni abuɔ amɛ akɛ amɛji nyɔŋmɔi ni ajáa amɛ. No hewɔ lɛ ŋwanejee ko bɛ he akɛ, nɛkɛ susumɔ nɛɛ ŋɔɔ Dario naa. Ekolɛ ena sɛɛnamɔ ni yɔɔ ekɛ nitsumɔ hu he. Kaimɔ akɛ, Dario ji gbɔ kɛ mɔ hee kɛha mɛi ni hiɔ Babilon lɛ. Nɛkɛ mla hee nɛɛ baaha ale lɛ akɛ maŋtsɛ, ni ebaawo gbɔmɛi babaoo ni yɔɔ Babilon lɛ hewalɛ koni amɛkã amɛ anɔkwayeli kɛ sɛɛfimɔ ni amɛkɛhaa nɔyeli hee lɛ he kita. Shi onukpai lɛ kɛ amraloi lɛ susuuu maŋtsɛ lɛ hilɛ-kɛhamɔ he kwraa yɛ akpɔ ni amɛkpɛ yiŋ yɛ he nɛɛ mli. Amɛyiŋtoo diɛŋtsɛ ji ni amɛtsɔ̃ Daniel tsɔne, ejaakɛ amɛle akɛ nɔ ni efɔɔ feemɔ ji sɔlemɔ ni esɔleɔ ehaa Nyɔŋmɔ shii etɛ yɛ gbi kome mli beni egbele etsũ yiteŋ samfɛji lɛ.
9. Mɛni hewɔ mla hee lɛ kɛ naagba ko baŋ mɛi ni jeee Yudafoi lɛ ateŋ mɛi pii anɔ lɛ?
9 Ani naatsii yɛ sɔlemɔ he nɛɛ kɛ naagba ko baaba jamɔ kui fɛɛ ni yɔɔ Babilon lɛ anɔ? Ebaŋ lɛ nakai tsɔ̃, titri lɛ akɛni naatsii lɛ baahi shi nyɔɔŋ kome pɛ lɛ hewɔ. Agbɛnɛ hu, mɛi ni jeee Yudafoi lɛ ateŋ mɛi fioo ko pɛ baasusu akɛ amɛjamɔ ni amɛkɛaaha adesa yɛ be ko mli lɛ baafee sane he ni aŋmɛɔ akɛsaa. Biblia he nilelɔ ko wie akɛ: “Maŋtsɛ-jamɔ biii nɔ ko srɔto kɛjɛɛɛ jeŋmaji ni jáa amagai lɛ adɛŋ; no hewɔ lɛ, Babilonianyo ni abiɔ ni ekɛ woo ni ekɛhaa nyɔŋmɔ ko lɛ ahã kunimyelɔ lɛ—Dario Medianyo lɛ—kpɛlɛɔ nibimɔ lɛ nɔ amrɔ nɔŋŋ. Yudanyo pɛ baate shi awo nibimɔ ni tamɔ nɛkɛ.”
10. Te Mediabii lɛ kɛ Persiabii lɛ buɔ mla ni maŋtsɛ lɛ efee lɛ amɛhaa tɛŋŋ?
10 Yɛ fɛɛ mli lɛ, Dario saralɔi lɛ wo lɛ hewalɛ koni ewo akpɔ ní eha “aŋma wolo, ni atsakeee yɛ Mediabii kɛ Persiabii amla ni atsakeee lɛ naa.” (Daniel 6:9) Abuɔ maŋtsɛ lɛ suɔmɔnaa nii be fɛɛ be akɛ nɔ ni ta nɔ fɛɛ nɔ nɔ, yɛ blema Bokagbɛ. Enɛ ha susumɔ akɛ etɔ̃ɔɔ lɛ shwere. Abaaha mla ni baaha agbe mɛi ni sane fɔŋ ko po bɛ amɛhe lɛ ahi shi nakai nɔŋŋ!
11. Te akpɔ ni Dario wo nɛɛ baasa Daniel he aha tɛŋŋ?
11 Dario kɛ ewaonaa gbɛi wo akpɔ lɛ shishi ni esusuuu Daniel he. (Daniel 6:10) Yɛ nakai feemɔ mli lɛ, ekɛ ewaonaa gbɛi wo enukpa ni ebuɔ lɛ fe fɛɛ lɛ gbele wolo shishi ni eleee. Hɛɛ, mla nɛɛ baasa Daniel he kɛ̃.
ANYƐ DARIO NƆ KONI EKƐ KOJOMƆ NI EHIII AHA
12. (a) Mɛni Daniel fee amrɔ nɔŋŋ beni ená ele mla hee ni awo lɛ? (b) Namɛi kwɛɔ Daniel, ni mɛni hewɔ?
12 Etsɛɛɛ ni Daniel bale mla ni kɔɔ sɔlemɔ ni atsĩ naa lɛ he lɛ. Amrɔ nɔŋŋ ni etee ewe ni etee eŋwɛi tsũ yiteŋ pia lɛ mli, he ni samfɛji ni kwɛɔ Yerusalem lɛ kamɔ yɛ lɛ.b Jɛmɛ Daniel je shishi esɔle eha Nyɔŋmɔ yɛ, “taakɛ bɔ ni efeɔ sa lɛ.” Ekolɛ Daniel susu akɛ ekome pɛ eyɔɔ jɛmɛ, shi mɛi ni ekpaŋ eyinɔ lɛ miikwɛ lɛ. Trukaa kɛkɛ ni “nɛkɛ gbɔmɛi nɛɛ bua amɛhe naa kɛba,” ŋwanejee ko bɛ he akɛ yɛ hoofeemɔ gbɛ ni amɛkɛtee Dario ŋɔɔ lɛ nɔ nɔŋŋ. Agbɛnɛ amɛmiina kɛ amɛ diɛŋtsɛ amɛhiŋmɛi—Daniel “ni eesɔle ni eekpa fai yɛ e-Nyɔŋmɔ lɛ hiɛ.” (Daniel 6:11, 12) Onukpai lɛ kɛ amraloi lɛ yɛ odaseyelii ni he hiaa amɛ lɛ fɛɛ ni amɛkɛaafolɔ Daniel naa yɛ maŋtsɛ lɛ hiɛ.
13. Mɛɛ amaniɛ Daniel henyɛlɔi lɛ bɔ maŋtsɛ lɛ?
13 Daniel henyɛlɔi lɛ bi Dario nigii akɛ: “Ani oŋmako akpɔ ko akɛ mɔ fɛɛ mɔ ni aaabi nyɔŋmɔ loo gbɔmɔ ko nɔ ko, ni jeee bo maŋtsɛ okome kɛkɛ, kɛyashi biɛ gbii nyɔŋmai etɛ lɛ, aaashɛ lɛ afɔ̃ jatai abu lɛ mli lo?” Dario ha hetoo akɛ: “Sane lɛ yɛ mli yɛ Mediabii kɛ Persiabii amla ni atsakeee lɛ naa.” Kɛkɛ ni mɛi ni ekpaŋ eyinɔ lɛ kɛ sane lɛ ma shi kpoo. “Daniel ni jɛ Yuda nomŋɔɔ gbɔmɛi lɛ ateŋ lɛ, ebuuuo, maŋtsɛ, kɛ akpɔ ni oha aŋma lɛ, shi esɔleɔ shii etɛ daa gbi.”—Daniel 6:13, 14.
14. Yɛ nɔ ni amɛle lɛ hewɔ lɛ, mɛni hewɔ onukpai lɛ kɛ amraloi lɛ wie Daniel he akɛ ejɛ “Yuda nomŋɔɔ gbɔmɛi lɛ ateŋ” lɛ?
14 Esa akɛ akadi akɛ onukpai lɛ kɛ amraloi lɛ wie Daniel he akɛ ejɛ “Yuda nomŋɔɔ gbɔmɛi lɛ ateŋ.” Eyɛ faŋŋ akɛ, amɛmiisumɔ ni amɛma nɔ mi akɛ, yɛ anɔkwale mli lɛ, Daniel nɛɛ ni Dario ewo enɔ gojoo nɛɛ ji nyɔ̃ŋ Yudanyo ko kɛkɛ. Amɛhe amɛye akɛ, yɛ bɔ ni eji nɛɛ hewɔ lɛ, ejeee mɔ ni nɔ kwɔ fe mla lɛ—yɛ bɔ ni maŋtsɛ lɛ buɔ lɛ ehaa lɛ fɛɛ sɛɛ!
15. (a) Te Dario fee enii yɛ amaniɛbɔɔ ni onukpai lɛ kɛ amraloi lɛ kɛbaha lɛ lɛ he eha tɛŋŋ? (b) Te onukpai lɛ kɛ amraloi lɛ tsɔɔ bulɛ ni amɛbɛ kɛha Daniel lɛ ekoŋŋ amɛha tɛŋŋ?
15 Ekolɛ onukpai lɛ kɛ amraloi lɛ kpa gbɛ akɛ maŋtsɛ lɛ baawo amɛ nyɔmɔ yɛ teemɔŋ nitsumɔ ni amɛkɛ ŋaa tsu nɛɛ hewɔ. Kɛji nakai ni lɛ, no lɛ etsɛŋ ni amɛnaa baakpɛ amɛhe. Dario hao waa yɛ sane ni amɛkɛbafɔ̃ ehiɛ lɛ hewɔ. Yɛ nɔ najiaŋ ni emli aaawo la awo Daniel ni eha akɛ lɛ awo jatai abu lɛ mli amrɔ nɔŋŋ lɛ, Dario ye gbi muu fɛɛ ni eebɔ mɔdɛŋ koni ehere eyiwala. Shi emɔdɛŋbɔɔ lɛ fee efolo. Etsɛɛɛ ni mɛi ni ekpaŋ eyinɔ lɛ ku amɛsɛɛ, yɛ su ni tsɔɔ amɛhiɛ ni gbooo nii lɛ mli, amɛbabi Daniel lá.—Daniel 6:15, 16.
16. (a) Mɛni hewɔ Dario kɛ bulɛ haa Daniel Nyɔŋmɔ lɛ? (b) Mɛɛ hiɛnɔkamɔ Dario yɔɔ yɛ Daniel he?
16 Dario nu he akɛ ebɛ nɔ ni ebaahala yɛ sane lɛ mli. Anyɛŋ atsake mla lɛ, ni asaŋ anyɛŋ akpa Daniel “tɔ̃mɔ” lɛ he fai. Fɛɛ ni Dario nyɛ ekɛɛ Daniel ji akɛ, “O-Nyɔŋmɔ lɛ ni osɔmɔɔ lɛ daa nɛɛ lɛ, lɛ eeejieo!” Etamɔ nɔ ni Dario kɛ bulɛ haa Daniel Nyɔŋmɔ lɛ. Yehowa ji mɔ ni kɛ nyɛmɔ ha Daniel koni egba Babilon shigbeemɔ lɛ efɔ̃ shi. Nyɔŋmɔ eha Daniel “mumɔ ni teke nɔ” hu ni ha ebasoro lɛ yɛ onukpai krokomɛi lɛ ahe. Ekolɛ Dario le akɛ, nɛkɛ Nyɔŋmɔ nɛɛ nɔŋŋ jie Hebri oblahii etɛ lɛ kɛjɛ flɔnɔɔ ni tsoɔ grigri kɛ la lɛ mli afii nyɔŋmai komɛi ni tsɔ hiɛ lɛ mli lɛ. Eeenyɛ eba akɛ, maŋtsɛ lɛ hiɛ kã nɔ akɛ Yehowa baajie Daniel agbɛnɛ, akɛni Dario nyɛɛɛ atsake mla ni ekɛ ewaonaa gbɛi ewo shishi lɛ. No hewɔ lɛ ashɛ Daniel afɔ̃ jatai abu lɛ mli.c No sɛɛ lɛ, “akɛ tɛ ba ni akɛbafɔ̃ bu lɛ naabu, ni maŋtsɛ lɛ kɛ lɛ diɛŋtsɛ enaasɔomɔ nɔ̃ kɛ enukpai lɛ anaasɔomɔ nii sɔo naa, koni yiŋ ni ato yɛ Daniel hewɔ lɛ akatsake.”—Daniel 6:17, 18.
SAJI NI TSAKE TRUKAA
17, 18. (a) Mɛni tsɔɔ akɛ Dario hao yɛ Daniel shihilɛ lɛ hewɔ? (b) Mɛni ba beni maŋtsɛ lɛ ku esɛɛ kɛtee jatai abu lɛ naa enɔ jetsɛremɔ leebi lɛ?
17 Dario ni nijiaŋ eje wui lɛ ku esɛɛ kɛtee emaŋtsɛwe lɛ. Akɛ lalɔi komɛi baaa ehiɛ, ejaakɛ ebɛ hiɛtserɛjiemɔ ko he miishɛɛ. Yɛ no najiaŋ lɛ, Dario wɔɔɔ jenamɔ fɛɛ, ni ehi ŋmãa. “Ewɔ tserɛ yɛ ehiɛ.” Dario he fee oya kɛtee jatai abu lɛ naa leebi maŋkpa. Ekɛ awerɛho gbee bo akɛ: “Daniel, Nyɔŋmɔ hiɛkalɔ lɛ tsulɔ, ani o-Nyɔŋmɔ lɛ ni osɔmɔɔ lɛ daa lɛ, enyɛo ejie yɛ jatai lɛ adɛŋ lo?” (Daniel 6:19-21) Enaa ni kpɛ ehe—kɛ hejɔ̃mɔ lɛ—aha hetoo!
18 “Maŋtsɛ, oyi ana wala kɛya naanɔ!” Yɛ ŋamɔ ni bulɛ yɔɔ mli nɛɛ hewɔ lɛ, Daniel tsɔɔ akɛ ebɛko maŋtsɛ lɛ ewoko emli. Eyɔse akɛ eyiwaa lɛ jɛɛhe jeee Dario, shi onukpai kɛ amraloi ni hiɛ kɔ̃ɔ enɔ lɛ. (Okɛto Mateo 5:44; Bɔfoi lɛ Asaji 7:60 he.) Daniel tee nɔ ewie akɛ: “Mi-Nyɔŋmɔ lɛ etsu ebɔfo, ni ebaŋamɔ jatai lɛ anaabui, ni amɛyeko mi awui ko, ejaakɛ ehiɛ lɛ ana akɛ miye bem, ni bo maŋtsɛ hu ohiɛ lɛ mifeko efɔŋ ko.”—Daniel 6:22, 23.
19. Onukpai lɛ kɛ amraloi lɛ shishiu ni amɛkudɔ Dario yɛ mɛɛ gbɛ nɔ?
19 Kwɛ bɔ ni nakai wiemɔi lɛ baanyɛ atsurɔ Dario henilee aha! Ele yɛ be lɛ fɛɛ mli akɛ Daniel efeko nɔ ko ni esa akɛ ashɛ lɛ afɔ̃ jatai abu lɛ mli. Dario le jogbaŋŋ akɛ onukpai lɛ kɛ amraloi lɛ kpaŋ koni agbe Daniel, ni ákɛ amɛkɛ maŋtsɛ lɛ tsu nii koni amɛnine ashɛ amɛ pɛsɛmkunya yiŋtoi lɛ anɔ. Bɔ ni amɛma nɔ mi doo akɛ ‘maŋtsɛyeli lɛ mli onukpai lɛ fɛɛ’ ekpɛlɛ nɔ akɛ awo akpɔ lɛ tsɔɔ akɛ amɛmiikɛɛ akɛ ábɔ Daniel hu amaniɛ yɛ sane lɛ he. Dario kɛ nɛkɛ gbɔmɛi gbohii nɛɛ baaye yɛ sɛɛ mli. Shi klɛŋklɛŋ lɛ, efã ni ajie Daniel kɛjɛ jatai abu lɛ mli. Nɔ ni yɔɔ naakpɛɛ lɛ, nɔ kome folo etĩko Daniel he!—Daniel 6:24.
20. Mɛni ba Daniel henyɛlɔi ni he tsɛ̃ɔ lɛ lɛ anɔ?
20 Agbɛnɛ Daniel efee shweshweeshwe, Dario yɛ nitsumɔ kroko ni ebaatsu. “Ni maŋtsɛ lɛ fã, ni akɛ nakai gbɔmɛi lɛ ni bafolɔ Daniel naa lɛ ba, ni ashɛrɛ amɛ ashwie jatai abu lɛ mli, amɛ kɛ amɛbii kɛ amɛŋamɛi, ni amɛshɛɛɛ bu lɛ shishi tete, ni jatai lɛ mɔmɔ amɛ, ni amɛjwara amɛwui fɛɛ.”d—Daniel 6:25.
21. Yɛ efɔŋfeelɔi aweku mli bii ni akɛ amɛ yeɔ lɛ agbɛfaŋ lɛ, mɛɛ srɔtofeemɔ yɔɔ Mose Mla lɛ kɛ blema hiŋmɛigbelemɔi komɛi amlai ateŋ?
21 Etamɔ nɔ ni shishinumɔ bɛ mɛi ni kpaŋ eyinɔ lɛ ni jeee amɛ pɛ agbe shi agbe amɛŋamɛi kɛ amɛbii afata he lɛ mli, ni enaa wa tsɔ̃. Nɔ ni tamɔɔɔ nakai lɛ, Mla ni Nyɔŋmɔ tsɔ Mose nɔ ekɛha lɛ kɛɛ akɛ: “Akagbe tsɛmɛi yɛ bii ahewɔ, ni bii hu, akagbe amɛ yɛ amɛtsɛmɛi ahewɔ; mɔ fɛɛ mɔ lɛ, lɛ diɛŋtsɛ ehe esha hewɔ agbe lɛ.” (5 Mose 24:16) Kɛlɛ, yɛ blema hiŋmɛigbelemɔi komɛi amli lɛ, ejeee nɔ ni efɔɔɔ kaa akɛ aaagbe weku lɛ mli bii afata efɔŋfeelɔ lɛ he yɛ efɔŋ ni hiɛdɔɔ yɔɔ mli lɛ hewɔ. Ekolɛ afee enɛ koni weku lɛ mli bii akanyɛ amɛtɔ owele yɛ sɛɛ mli. Shi, ekã shi faŋŋ akɛ, nii ni afee onukpai lɛ kɛ amraloi lɛ awekumɛi nɛɛ jɛɛɛ Daniel. Eeenyɛ efee akɛ ehao yɛ oshara ni nɛkɛ gbɔmɛi fɔ̃ji nɛɛ kɛba amɛwekumɛi anɔ lɛ he.
22. Mɛɛ akpɔ hee Dario wo?
22 Onukpai kɛ amraloi ni kpaŋ lɛ egboi. Dario wo akpɔ ko ni kɛɛ akɛ: “Miiwo kita akɛ, mimaŋtsɛyeli lɛ mli nɔyelihe fɛɛ nɔyelihe lɛ mɛi ahe akpokpo ni amɛshe gbeyei yɛ Daniel Nyɔŋmɔ lɛ hiɛ. Ejaakɛ lɛ ji Nyɔŋmɔ hiɛkalɔ lɛ, ni ehiɔ shi kɛyaa naanɔ, ni emaŋtsɛyeli lɛ hiɛ kpataŋ, ni enɔyeli lɛ aaahi shi kɛaatee naagbee. Jielɔ kɛ herelɔ ji lɛ, efeɔ okadii kɛ naakpɛɛ nii yɛ ŋwɛi kɛ shikpɔŋ lɛ nɔ; ejaakɛ ejie Daniel yɛ jatai lɛ adɛŋ.”—Daniel 6:26-28.
SƆƆMƆ NYƆŊMƆ DAA
23. Mɛɛ nɔkwɛmɔnɔ Daniel fee yɛ eheloo gbɛfaŋ nitsumɔ mli, ni te wɔɔfee tɛŋŋ wɔtamɔ lɛ?
23 Daniel to okadi kpakpa efɔ̃ shi eha ŋmɛnɛŋmɛnɛ beaŋ Nyɔŋmɔ tsuji fɛɛ. Ejeŋba hi be fɛɛ be. Daniel “yeɔ anɔkwa, ni anaaa efɔŋ loo tɔ̃mɔ ko yɛ ehe” yɛ eheloo gbɛfaŋ nitsumɔ mli. (Daniel 6:5) Yɛ nakai gbɛ nɔ nɔŋŋ hu esa akɛ Kristofonyo afee mɔ ni kɛ ekãa tsuɔ nii yɛ eheloo gbɛfaŋ nitsumɔ mli. Enɛ etsɔɔɔ akɛ esa akɛ ofee nitsumɔtsɛ ni yi wa, ni kɛ ekãa diɔ heloo gbɛfaŋ ninámɔ sɛɛ, aloo mɔ ni kuɔ ehiɛ eshwieɔ mɛi krokomɛi ahilɛ-kɛhamɔ nɔ, koni ekɛha enitsumɔ aya hiɛ. (1 Timoteo 6:10) Ŋmalɛi lɛ biɔ ni Kristofonyo lɛ atsu eheloo gbɛfaŋ gbɛnaa nii ahe nii yɛ anɔkwayeli mli, yɛ susuma muu fɛɛ mli, ‘taakɛ Yehowa atsuɔ ahaa.’—Kolosebii 3:22, 23; Tito 2:7, 8; Hebribii 13:18.
24. Yɛ mɛɛ gbɛ nɔ Daniel jie ehe kpo akɛ mɔ ni eŋmɛɛɛ saji ahe ekɛsaaa yɛ jamɔ sane he?
24 Daniel eŋmɛɛɛ saji ahe ni ekɛsaa yɛ ejamɔ mli. Sɔlemɔ ni efɔɔ feemɔ lɛ ji nii ni gbɔmɛi le yɛ faŋŋ. Agbɛnɛ hu, onukpai lɛ kɛ amraloi lɛ le jogbaŋŋ akɛ Daniel kɛ hiɛdɔɔ tsuɔ ejamɔ lɛ he nii. Yɛ anɔkwale mli lɛ, amɛle akɛ ebaakã nɔ ni efɔɔ feemɔ lɛ he kɛ́ awo mla akɛ akpa feemɔ po. Mɛɛ nɔkwɛmɔnɔ kpakpa eji kɛha ŋmɛnɛŋmɛnɛ beaŋ Kristofoi nɛkɛ! Amɛ hu amɛná gbɛi akɛ mɛi ni kɛ Nyɔŋmɔ jamɔ yeɔ klɛŋklɛŋ gbɛhe. (Mateo 6:33) Esa akɛ mɛi ni kwɛɔ lɛ ana enɛ amrɔ nɔŋŋ, ejaakɛ Yesu fã esɛɛnyiɛlɔi lɛ akɛ: “Nyɛhaa nyɛla atsoa yɛ gbɔmɛi ahiɛ, koni amɛna nyɛnifeemɔ nii kpakpai lɛ, ni amɛwo nyɛtsɛ ni yɔɔ ŋwɛi lɛ hiɛ nyam.”—Mateo 5:16.
25, 26. (a) Mɛni mɛi komɛi baanyɛ awie yɛ Daniel nifeemɔ gbɛ lɛ he? (b) Mɛni hewɔ Daniel bu tsakemɔ ni aaaba nɔ ni efɔɔ feemɔ lɛ mli lɛ akɛ etamɔ sane he ni aŋmɛɛɔ koni akɛsaa pɛpɛɛpɛ lɛ?
25 Ekolɛ mɛi komɛi baakɛɛ akɛ Daniel baanyɛ ajo yiwaa naa foi kɛtsɔ sɔlemɔ ni eeesɔle yɛ teemɔŋ eha Yehowa yɛ gbii 30 be lɛ mli lɛ nɔ. Fɛɛ sɛɛ lɛ, abiii ni afee gbɔmɔtso lɛ nɔ ko loo ato gbɛjianɔ ko bɔni afee ni Nyɔŋmɔ abo mɔ ko toi. Ebaanyɛ eyoo tsui mli jwɛŋmɔi lɛ po. (Lala 19:15) Yɛ fɛɛ sɛɛ lɛ, Daniel buɔ tsakemɔ fɛɛ tsakemɔ ni eeefee yɛ nɔ ni efɔɔ feemɔ nɛɛ mli lɛ he akɛ, etamɔ nɔ ni eeŋmɛɛ saji ahe ni ekɛsaa pɛpɛɛpɛ. Mɛni hewɔ?
26 Akɛni ale Daniel nifeemɔ ni ji sɔlemɔ lɛ jogbaŋŋ hewɔ lɛ, te abaanu shishi aha tɛŋŋ kɛ́ ekpa enɛ feemɔ trukaa? Gbɔmɛi baamu sane naa akɛ Daniel miishe gbɔmɔ gbeyei, ni ákɛ akpɔ ni maŋtsɛ lɛ wo lɛ nɔ kwɔ fe Yehowa mla lɛ. (Lala 118:6) Shi Daniel tsɔ enifeemɔi anɔ etsɔɔ akɛ Yehowa nine shɛ ehetuu-kɛhamɔ ni ekɛhaa lɛ pɛ lɛ nɔ. (5 Mose 6:14, 15; Yesaia 42:8) Shi, yɛ enɛ feemɔ mli lɛ, Daniel ekuuu maŋtsɛ lɛ mla mli yɛ gbɛ ni bulɛ bɛ mli nɔ. Ni ehe kpokpooo hu kɛtsɔ sane he ni eeeŋmɛɛ nɔ. Daniel tee nɔ esɔle yɛ eŋwɛi pia lɛ mli, “taakɛ bɔ ni efeɔ sá” dani maŋtsɛ lɛ wo akpɔ lɛ.
27. Mɛɛ gbɛ nɔ Nyɔŋmɔ tsuji ni yɔɔ ŋmɛnɛ lɛ aaatsɔ atamɔ Daniel yɛ (a) heshibaa ni afeɔ ahaa hegbɛi ni yeɔ nɔ lɛ mli? (b) Nyɔŋmɔ ni aboɔ lɛ toi akɛ nɔyelɔ fe gbɔmɛi lɛ mli? (d) mɔdɛŋ ni abɔɔ koni akɛ gbɔmɛi fɛɛ ahi shi yɛ toiŋjɔlɛ mli lɛ mli?
27 Nyɔŋmɔ tsuji ni yɔɔ ŋmɛnɛ lɛ baanyɛ akase nii kɛjɛ Daniel nɔkwɛmɔnɔ lɛ mli. Amɛyaa nɔ ‘amɛbaa amɛhe shi amɛhaa hegbɛi ni yeɔ nɔ’ lɛ, amɛboɔ maŋ ni amɛhiɔ mli lɛ amlai atoi. (Romabii 13:1) Shi kɛji akɛ gbɔmɔ mlai te shi wo Nyɔŋmɔ mlai lɛ, Yehowa webii kɔɔ gbɛhe ni Yesu kɛ bɔfoi lɛ ni kɛ ekãa jaje akɛ: “Esa akɛ aboɔ Nyɔŋmɔ moŋ toi fe gbɔmɛi” lɛ kɔ lɛ. (Bɔfoi lɛ Asaji 5:29) Kristofoi wooo maŋsɔ̃tsɔɔ loo atuatsemɔ he hewalɛ yɛ nakai feemɔ mli. Shi moŋ, oti ni ma amɛhiɛ ji ni amɛkɛ gbɔmɛi fɛɛ ahi shi yɛ toiŋjɔlɛ mli “koni wɔhi shi kpoo yɛ hejɔlɛ mli, yɛ Nyɔŋmɔ jamɔ kɛ jeŋba ni hiɛ sɔɔ fɛɛ mli.”—1 Timoteo 2:1, 2; Romabii 12:18.
28. Mɛɛ gbɛ nɔ Daniel sɔmɔ Yehowa “daa” yɛ?
28 Dario wie shii enyɔ akɛ Daniel sɔmɔɔ Nyɔŋmɔ “daa.” (Daniel 6:17, 21) Aramaik wiemɔ shishifãa kɛha wiemɔ ni atsɔɔ shishi akɛ “daa” lɛ shishi ji “bɔleɔ shi kokroo.” Jwɛŋmɔ ni yɔɔ sɛɛ ji nɔ ko ni yaa nɔ kɛbɔleɔ shi, loo nɔ ko ni yaa nɔ daa. Daniel emuuyeli tamɔ nakai. Enyiɛ nɔkwɛmɔnɔ ko ni ágba afɔ̃ shi lɛ sɛɛ. Sanebimɔ ko bɛ nɔ ni Daniel baafee lɛ he kɛ ekɛ kaai miikpe, ni amɛdara loo amɛdaraaa. Ebaanyiɛ gbɛ ni etsɔ hiɛ eto efɔ̃ shi afii nyɔŋmai abɔ—ni ji anɔkwa ni ayeɔ Yehowa lɛ sɛɛ.
29. Mɛɛ gbɛ nɔ Daniel anɔkwayeli gbɛ lɛ he baaba sɛɛnamɔ aha Yehowa tsuji ni yɔɔ ŋmɛnɛ lɛ?
29 Ŋmɛnɛŋmɛnɛ beaŋ Nyɔŋmɔ tsuji miisumɔ ni amɛnyiɛ Daniel gbɛ lɛ sɛɛ. Yɛ anɔkwale mli lɛ, bɔfo Paulo wo Kristofoi fɛɛ ŋaa ni amɛsusu blema hii ni she Nyɔŋmɔ gbeyei lɛ anɔkwɛmɔnɔ lɛ he. Amɛtsɔ hemɔkɛyeli nɔ “amɛtsu jalɛ nii, amɛnine shɛ shiwoi anɔ,” ni—nɔ ni yɔɔ faŋŋ akɛ Daniel he awieɔ lɛ—“amɛtsimɔ jatai anaa.” Ákɛ Yehowa tsuji ni yɔɔ ŋmɛnɛ lɛ, nyɛhaa wɔjiea Daniel hemɔkɛyeli kɛ enifeemɔ daa lɛ kpo, ni “wɔkɛ tsuishitoo ada foi ni kã wɔhiɛ lɛ.”—Hebribii 11:32, 33; 12:1.
[Shishigbɛ niŋmai]
a Blema niŋmaai ni tsɔɔ akɛ Bokagbɛ nɔyelɔi kɛ kooloi awuiyelɔi toɔ amɛ abɔɔi amli lɛ fiɔ “jatai abu” ni yɔɔ Babilon lɛ sɛɛ.
b Ŋwɛi-pia lɛ ji mɔ kome tsũ ni mɔ ko baanyɛ ayajɔɔ ehe yɛ jɛmɛ kɛ́ esumɔɔɔ ni agba enaa.
c Ekolɛ jatai abu lɛ ji shikpɔŋ shishi gbɛ loo bu ni enaa gbɛ kã yiteŋ gbɛ. Ekolɛ eyɛ shinaai hu loo dadei loo tsei ni akɛfee shinaai ni agbalaa kɛyaa ŋwɛi koni akɛha kooloi lɛ abote mli.
d Atsɔɔ wiemɔ ‘folɔ naa’ lɛ shishi kɛjɛ Aramaik wiemɔ ni abaanyɛ atsɔɔ shishi hu akɛ “gbe he guɔ.” Enɛ maa hetsɛ̃ ni yɔɔ Daniel henyɛlɔi lɛ amli lɛ nɔ mi.
MƐNI OYƆSE?
• Mɛni hewɔ Dario Medianyo lɛ kpɛ eyiŋ akɛ ekɛ Daniel baatsu nii yɛ gbɛhe ni nɔ kwɔ mli nakai lɛ?
• Mɛɛ ŋaa fɔŋ ko onukpai lɛ kɛ amraloi lɛ tsɔ̃? Mɛɛ gbɛ nɔ Yehowa tsɔ ejie Daniel?
• Mɛni okase kɛjɛ Daniel anɔkwayeli he nɔkwɛmɔnɔ lɛ toi ni obo lɛ mli?
[Baafa muu mfoniri ni yɔɔ baafa 114]
[Baafa muu mfoniri ni yɔɔ baafa 121]
[Mfoniri ni yɔɔ baafa 127]
Daniel sɔmɔ Yehowa “daa.” Ani ofeɔ nakai?