Beni Yehowa Ha Maŋtsɛmɛi Kase Nɔ Ko

“Enitsumɔi fɛɛ lɛ anɔkwale ni, ni egbɛi hu ja, ni mɛi ni yɔɔ hewoo jeŋ lɛ enyɛɔ amɛ shi ebaa.”​—DANIEL 4:⁠37.

 1. Mɛni ji Yehowa su ko ni Elihu gbalaa jwɛŋmɔ kɛbaa nɔ lɛ?

“Naa, Mawuu je agbo yɛ ehewalɛ lɛ mli; namɔ ji tsɔɔlɔ tamɔ lɛ?” Nɛkɛ wiemɔi ni Elihu kɛ Hiob wie be mli ni enaa amanehulu lɛ tsɛɔ wɔjwɛŋmɔ yisɛɛ kɛyaa Yehowa Nyɔŋmɔ, Bɔlɔ lɛ sui ni ekaaa lɛ ekome nɔ. Mɔ ko mɔ ko kɛ Lɛ yeee egbɔ kɛ eba akɛ atsɔɔ mɛi krokomɛi anii lɛ.​—Hiob 36:⁠22.

 2, 3. (a) Mɛni ji nii ni Yehowa na akɛ ehe miihia ni etsɔɔ amɛ lɛ ateŋ ekome? (b) Namɔ ni hi shi yɛ Mose gbii lɛ amli lɛ ji nɔyelɔ ko ni ebaabi ni Yehowa atsɔɔ lɛ enɛ, ni kɛtsɔ mɛni nɔ? (d) Shii enyiɛ Nyɔŋmɔ wie yɛ e-Wiemɔ lɛ mli akɛ eji eyiŋtoo akɛ etsɔɔ adesai nɛkɛ nikasemɔ nɛɛ?

² Nibii ni ehe bahia ni Nyɔŋmɔ atsɔɔ gbɔmɛi kɛ jeŋmaji lɛ ateŋ ekome ji wekumɛi kpakpa ni baaka amɛ kɛ Lɛ teŋ lɛ. Lalatsɛ David fee enɛ faŋŋ yɛ ewiemɔ ni yɔɔ Lala 9:​20, 21 lɛ mli: “Wo ohe nɔ Yehowa! koni jeŋmaji lɛ ana ale akɛ gbɔmɛi adesai kɛkɛ ji amɛ.”

³ Farao ni hi shi yɛ Mose gbii lɛ amli lɛ fata shikpɔŋ lɛ nɔ nɔyelɔi ni Yehowa Nyɔŋmɔ na akɛ ehe miihia ni etsɔɔ amɛ enɛ lɛ he. Nyɔŋmɔ fee enɛ kɛtsɔ haomɔi ni etsu kɛba Mizraimbii lɛ anɔ lɛ nɔ. Kɛfata he lɛ, Yehowa kɛɛ Farao ni woɔ ehe nɔ lɛ akɛ: “Shi kɛlɛ enɛ hewɔ miha odamɔ shi, koni majie mihewalɛ kpo matsɔɔo, ni atsi migbɛi ata yɛ jeŋ fɛɛ.” (2 Mose 9:16) Jeee enɛ pɛ kɛkɛ, shi yɛ nɔ ni fe shii 70, kɛjɛ 2 Mose 6:7 kɛyashi Yoel 3:17 lɛ, Yehowa kɛɔ yɛ e-Wiemɔ lɛ mli akɛ ebaatsu nitsumɔi kplei ni tamɔ enɛ, koni maŋtsɛmɛi, gbɔmɛi, kɛ jeŋmaji lɛ fɛɛ ana ale akɛ Lɛ ji Yehowa, Mɔ Ni Kwɔ Fe Fɛɛ yɛ shikpɔŋ lɛ nɔ fɛɛ lɛ.

 4. Yɛ Daniel gbii lɛ amli lɛ mɛɛ nɔyelɔi etɛ komɛi Yehowa tsɔɔ amɛ nɔ ko, ni kɛtsɔ mɛni nɔ?

⁴ Aŋmala nibii ni Yehowa ha maŋtsɛmɛi kase lɛ ateŋ babaoo ahe nɔkwɛmɔ nii yɛ Daniel wolo lɛ mli. Nɛkɛ nɔyelɔi nɛɛ ji Nebukadnezar, Belshazar, kɛ Dario. Mɛɛ be etsɔɔ amɛ nii lɛ? Eka shi faŋŋ akɛ yɛ afi 617 D.Ŋ.B. kɛ 535 D.Ŋ.B. lɛ teŋ gbɛ. Ni yɛ mɛɛ gbɛ nɔ? Kɛtsɔ lamɔi kɛ amɛshishitsɔɔmɔi anɔ kɛ agbɛnɛ kɛtsɔ ehewalɛ lɛ kpojiemɔi anɔ. Yehowa tsɔɔ nɛkɛ adesai nɔyelɔi nɛɛ akɛ Lɛ ji Jeŋ Muu Fɛɛ Nɔyelɔ ni amɛ lɛ amɛji gbɔmɛi wudɔɔi komɛi kɛkɛ​—nii ni esa akɛ ŋmɛnɛŋmɛnɛ beaŋ jeŋ nɔyelɔi lɛ hu akase lɛ.

 5. Mɛɛ odaseyeli yɔɔ ni abaanyɛ akɛtsi mɛi ni wieɔ shiɔ ja ni Daniel wolo lɛ ja lɛ anaa?

⁵ Shi ani ŋmɛnɛŋmɛnɛ beaŋ wiemɔ-kɛ-shilɔi eteee shi amɛwooo anɔkwale ni Daniel wolo lɛ ji lɛ? Biblia he nilelɔ ko wie nɛkɛ ni ekɛha shitee-kɛ-wolɔi nɛɛ hetoo akɛ: “Emaa naakpɛɛ nibii lɛ anɔ mi, ni gbalɛi lɛ hu ejieɔ amɛ shi, akɛ Daniel ni hi shi yɛ nakai bei amli lɛ ŋma. No hewɔ lɛ wɔyɛ anɔkwale gbalɛi kɛ naakpɛɛ nibii, aloo kɛ jeee nakai lɛ nibii ni wɔyɔɔ lɛ jeee anɔkwale.” (Daniel the Prophet, Pusey, bf. 76) Hɛɛ, yɛ be kɛ bei amli lɛ mɔ ni ŋma wolo lɛ jieɔ ehe shi faŋŋ, tamɔ ewiemɔi nɛɛ akɛ “Mi, Daniel” lɛ tsɔɔ lɛ diɛŋtsɛ! (Daniel 8:​15; 9:2; 10:⁠2) Ani enɛ fɛɛ miitsɔɔ sane hewoo? Anɔkwale lɛ ji akɛ, dani aaashɛ afii ohai 18 lɛ shishijee be mli tɔɔ lɛ, Yudafoi lɛ loo Kristofoi lɛ ejeee mɔ ni ŋma Daniel wolo lɛ he ŋwane. Shi kɛlɛ, Biblia lɛ mli odaseyeli ni kɔɔ Daniel wolo lɛ he lɛ tsɔɔ babaoo fe ŋmɛnɛŋmɛnɛ beaŋ Biblia he nilelɔ fɛɛ nilelɔ jwɛŋmɔ yɛ enɛ he. Yɛ enɛ hewɔ lɛ, wɔnaa akɛ atsiɔ Daniel gbɛi ata shii etɛ yɛ Ezekiel wolo lɛ mli. (Ezekiel 14:​14, 20; 28:⁠3) Ni nɔ ni muɔ sane lɛ naa fe fɛɛ ji Yesu, Nyɔŋmɔ Bi lɛ wiemɔi ni aŋmala yɛ Mateo 24:​15, 16 lɛ: “No hewɔ lɛ, kɛ nyɛna amaŋfɔ nihii nii lɛ ni gbalɔ Daniel wie he lɛ akɛ ema he krɔŋkrɔŋ lɛ, (mɔ ni kaneɔ lɛ ha ni eyoo sɛɛ) , no lɛ mɛi ni yɔɔ Yudea lɛ ajo foi aya gɔji lɛ anɔ.”a

Nebukadnezar na Ele Mɔ ni Anɔkwa Nyɔŋmɔ lɛ Ji

 6. Mɛni ha Babilon maŋtsɛ lɛ henɔwomɔ lɛ tee hiɛ, ni mɛni ji nɔ ni ekɛɛ yɛ lɛ diɛŋtsɛ ehe yɛ eniŋmaai lɛ amli?

⁶ Taakɛ gbalɔ Yesaia tsɔɔ lɛ, Babilon maŋtsɛmɛi lɛ woɔ amɛhe nɔ waa. (Yesaia 14:​4-23) Nebukadnezar hu ji mɔ ko ni sumɔɔ nyɔŋmɔ jamɔ waa. Ewie “etsumaa nitsumɔi lɛ kɛ ejwɛŋmɔ ni ka Babilon nyɔŋmɔi lɛ anɔ” lɛ he yɛ eniŋmaai lɛ amli. Ŋwanejee ko bɛ he akɛ enɛ bote eyitsoŋ aahu akɛ enyɛ eye Yerusalem kɛ Yudea fɛɛ nɔ kunim yɛ be mli ni Sanherib nine nyɛ shi kɛ hiɛshishwiemɔ ni enyɛɛɛ efee enɛ lɛ sɛɛ.

 7. Mɛɛ niiashikpamɔ ko ni aŋma yɛ Daniel 1 lɛ kulɛ esa akɛ no aha Nebukadnezar abu Hebribii lɛ a-Nyɔŋmɔ lɛ?

⁷ Eka shi faŋŋ akɛ Nebukadnezar yɛ yiŋtoo kpakpa nɔ ni eeedamɔ ni ekɛ bulɛ aha Daniel kɛ ehefatalɔi Hebribii etɛ lɛ a-Nyɔŋmɔ lɛ, yɛ be mli ni akɛ amɛ ba ehiɛ lɛ sɛɛ, ejaakɛ “ŋaa kɛ nilee saji fɛɛ ni maŋtsɛ lɛ bi amɛ lɛ ena yɛ mli akɛ amɛfe woloŋlelɔi kɛ okɔmfoi fɛɛ ni yɔɔ emaŋtsɛyeli hei lɛ fɛɛ lɛ shii nyɔŋma.” Hɛɛ, hii nilelɔi lɛ ni Yehowa ji amɛ Nyɔŋmɔ lɛ le nii kwraa fe mɛi fɛɛ ni jaa nyɔŋmɔi krokomɛi lɛ. Nebukadnezar nyɛŋ aku ehiɛ efɔ nɛkɛ anɔkwale nɛɛ nɔ.​—Daniel 1:⁠20.

 8. Mɛɛ gbɛ nɔ Yehowa tsɔ ni eha ale Babilon nilelɔi lɛ akɛ amɛbɛ nilee sɔrɔto ko?

⁸ Babaoo yɛ lolo ni Yehowa baaha Nebukadnezar akase. Aŋma nɔ ni ekase kɛnyiɛ sɛɛ lɛ yɛ Daniel yitso 2 lɛ mli. Nyɔŋmɔ ha maŋtsɛ lɛ la lamɔ ko ni yɔɔ gbeyei, ni eha ehiɛ kpa lamɔ lɛ nɔ. Nɛkɛ lamɔ nɛɛ hao Babilon maŋtsɛ lɛ waa, ni etsu ayatsɛ enilelɔi lɛ fɛɛ kɛba koni amɛbatsɔɔ lɛ lamɔ lɛ kɛ eshishi. Yɛ anɔkwale mli lɛ, amɛnyɛɛɛ amɛtsɔɔ lamɔ lɛ, aahu po ni amɛaatsɔɔ eshishi, ni yɛ enɛ hewɔ lɛ amɛkɛ ŋaa kpɛlɛ nɔ akɛ amɛbɛ nilee sɔrɔto ko. Enɛ ha maŋtsɛ lɛ mli fu waa ni efa akɛ agbe amɛ fɛɛ. Beni Daniel kɛ ehefatalɔi lɛ nu maŋtsɛ lɛ akpɔ lɛ, Daniel bi ni aha lɛ be, ni afee nakai. No sɛɛ lɛ, lɛ kɛ ehefatalɔi etɛ lɛ kɛfee sane oti yɛ sɔlemɔ mli amɛha Yehowa ni Yehowa jie lamɔ lɛ kɛ eshishitsɔɔmɔ lɛ kpo eha Daniel.​—Daniel 2:​16-20.

 9. (a) Namɔ ji mɔ pɛ ni nyɛ etsɔɔ Nebukadnezar lamɔ lɛ shishi, ni mɛni ji eshishitsɔɔmɔ ni nakai Mɔ lɛ kɛha? (b) Yɛ no hewɔ lɛ, te maŋtsɛ lɛ mu sane lɛ naa eha tɛŋŋ?

⁹ Beni akɛ Daniel ba maŋtsɛ lɛ hiɛ lɛ, Nebukadnezar bi lɛ akɛ: “Ani ooonyɛ ojaje lamɔ ni mina lɛ kɛ eshishi otsɔɔ mi?” Yɛ be mli ni ekai maŋtsɛ ni woɔ ehe nɔ lɛ akɛ enilelɔi lɛ nyɛɛɛ atsɔɔ lɛ lamɔ lɛ mli teemɔŋ sane lɛ kɛ eshishi lɛ sɛɛ lɛ, Daniel kɛɛ: “Shi Nyɔŋmɔ ko yɛ ŋwɛi ni jieɔ teemɔŋ saji ashi, ni etsɔɔ Maŋtsɛ Nebukadnezar nɔ ni baaba wɔsɛɛ.” Daniel je shishi ni egba maŋtsɛ lɛ amaga kpeteŋkpele ko ni ena yɛ elamɔ lɛ mli lɛ, kɛ nɔ ni fɛɛ damɔ shi kɛha. Enɛ ŋɔɔ maŋtsɛ lɛ naa waa kɛkɛ ni ehere nɔ akɛ: “Lɛlɛŋ akɛ nyɛ Nyɔŋmɔ lɛ ji nyɔŋmɔi a-Nyɔŋmɔ kɛ maŋtsɛmɛi anuŋtsɔ kɛ teemɔŋ saji akpojielɔ, akɛ nɔ ni onyɛ ojie teemɔŋ sane nɛɛ kpo nɛɛ.” No hewɔ lɛ, Yehowa tsɔɔ Maŋtsɛ Nebukadnezar akɛ Lɛ ji anɔkwale Nyɔŋmɔ kome lɛ.​—Daniel 2:​26, 28, 47.

10, 11. (a) Mɛni ji nɔ ni Maŋtsɛ Nebukadnezar fee yɛ ehenɔwomɔ lɛ mli, ni mɛɛ akpɔ ji nɔ ni nyiɛ enɛ sɛɛ? (b) Mɛɛ sane ji nɔ ni Hebribii etɛ lɛ tee lɛ shi yɛ maŋtsɛ lɛ akpɔ lɛ ni amɛyeee nɔ lɛ hewɔ, ni mɛni jɛ mli ba?

¹⁰ Eyɛ mli akɛ ŋwanejee ko bɛ he akɛ Maŋtsɛ Nebukadnezar yoo Hebribii lɛ a-Nyɔŋmɔ lɛ nilee lɛ moŋ, shi babaoo yɛ lolo ni ebaakase. Ekɛ henɔwomɔ ha ashɔ shika amaga kpeteŋkpele ko ama shi yɛ Dura ŋa kplanaa lɛ nɔ. Amaga lɛ kwɔlɛ ji ninetalɔi nyɔŋmai ekpaa ni elɛɛmɔ ji ninetalɔi ekpaa, ni enɛ tsɛɔ wɔjwɛŋmɔ yisɛɛ kɛyaa yibɔ okadi ni ji 666 lɛ ni ji Satan, “kooloo ni hiɛ yɔɔ la” ni awie ehe yɛ Kpojiemɔ 13:18 lɛ kadimɔ lɛ nɔ. Maŋtsɛ lɛ fa ni enɔyeli lɛ mli amraloi lɛ fɛɛ aba, “ni amɛba amaga ni maŋtsɛ Nebukadnezar kɛma shi lɛ naa gbelemɔ” ni efa akɛ kɛ anu saŋku gbɛɛmɔ lɛ ni mɔ fɛɛ mɔ akula shi ni eja amaga lɛ. Be mli ni Kaldeabii awuŋayelɔi komɛi na akɛ Hebribii etɛ lɛ kɛ amɛhe wooo amaga lɛ jamɔ mli lɛ, amɛyafolɔ amɛnaa amɛha maŋtsɛ lɛ.​—Daniel 3:​1, 2, New World Translation.

¹¹ Enɛ bafee hiɛdɔɔ sane yɛ Nebukadnezar hiɛ, ejaakɛ eshwã be ko akɛ lɛ ji “mɔ ni haa gbɔmɛi abii kɛ amɛnaabui jieɔ nyɔŋmɔi kpeteŋkpelei lɛ ayi lɛ.” No hewɔ lɛ, enɛ bafee maŋtsɛ kpele ni Nebukadnezar ji lɛ kɛ ejamɔ mli anunyam lɛ fɛɛ nɔ tɔmɔ. Kɛkɛ ni maŋtsɛ ni woɔ ehe nɔ nɛɛ kɛ mlifu kɛ mlila saa ha amɛ hegbɛ ekoŋŋ, shi kɛ nɛkɛ akpɔ nɛɛ akɛ: “Shi kɛji nyɛjaaa lɛ, nakai ŋmɛlɛtswaa lɛ nɔ nɔŋŋ lɛ, aaashɛrɛ nyɛ ashwie la kɛ flɔnɔɔ ni tsoɔ grigri lɛ mli! Ni namɔ ji Nyɔŋmɔ ni aaajie nyɛ yɛ midɛŋ lɛ?” Hɛɛ, esa akɛ Nebukadnezar ale akɛ amɛ Nyɔŋmɔ lɛ baanyɛ ajie E-sɔɔlɔi kɛjɛ maŋtsɛ wudɔɔ nɛɛ dɛŋ, ni akɛ nyɔŋmɔ ko bɛ ni baanyɛ ahere mɔ yiwala tamɔ Hebribii lɛ a-Nyɔŋmɔ lɛ.​—Daniel 3:⁠15.

Tso lɛ he Lamɔ Lɛ

12, 13. (a) Mɛɛ shishitsɔɔmɔ Daniel kɛha Nebukadnezar yɛ elamɔ ni kɔɔ tso lɛ he lɛ he? (b) Mɛɛ gbɛ nɔ Nebukadnezar tsɔɔ yɛ akɛ lamɔ lɛ shishitsɔɔmɔ lɛ naaa hewalɛ yɛ enɔ ni eha eba ehe shi?

¹² Mɛɛ gbɛ nɔ nii nɛɛ akasemɔ baasa ohe aha yɛ? Etamɔ nɔ ni nɛkɛ nikasemɔi etɛ nɛɛ faaa haaa Maŋtsɛ Nebukadnezar ni ekɛaale egbɛhe. No hewɔ lɛ ehe bahia ni Yehowa atsɔɔ lɛ nɔ kroko hu. Lamɔ baje sane lɛ mli ekoŋŋ, ni nakai nɔŋŋ hu Babilon nilelɔi lɛ ateŋ mɔ ko mɔ ko nyɛɛɛ eshishi atsɔɔ. Yɛ naagbee mli lɛ, atsu ni ayaŋɔ Daniel kɛba, ni enyɛ etsɔɔ maŋtsɛ lɛ lamɔ lɛ shishi.​—Daniel 4:​1-3

¹³ Ejeɔ kpo faŋŋ yɛ nɔ ni nyiɛ sɛɛ ba lɛ mli akɛ nakai lamɔ lɛ naaa Nebukadnezar nɔ hewalɛ ni eba ehe shi. No hewɔ lɛ, baafee no sɛɛ afi kome lɛ, yɛ be mli ni eshɛraa shi yɛ emɔɔ lɛ mli lɛ, ekɛ henɔwomɔ wo enaa nɔ akɛ: “Ani jeee Babel kpeteŋkpele lɛ ni mima ni etsɔ maŋtsɛ we yɛ mihewalɛ kpeteŋkpele lɛ naa ha minunyam lɛ yijiemɔ lɛ nɛ?” Mɛɛ henɔwomɔ nɛ! Nakai ebalɛ, no hewɔ lɛ nakai be lɛ mli nɔŋŋ ni anu gbee ko kɛjɛ ŋwɛi ni kɛɛ maŋtsɛ henɔwolɔ nɛɛ akɛ abaashɔ emaŋtsɛyeli lɛ yɛ edɛŋ, ni eeeyahi ŋaŋ kooloi ateŋ, ni bei kpawo baaho eyi, “kɛyashi beyinɔ ni ooona ole akɛ Mɔ Ni Yɔɔ Ŋwɛi Shɔŋŋ lɛ yɛ hewalɛ yɛ gbɔmɛi abii amaŋtsɛyeli nɔ.”​—Daniel 4:​30-32.

14. Mɛɛ gbɛ nɔ tso lɛ he lamɔ lɛ ba mli yɛ, ni mɛɛ hewalɛ ena yɛ Nebukadnezar nɔ?

¹⁴ Yɛ be mli ni Nebukadnezar eyahi shi akɛ kooloo bei kpawo, aloo afii kpawo sɛɛ lɛ, Yehowa ha ejwɛŋmɔ ku sɛɛ ba emli ekoŋŋ ni ekpɛlɛ nɔ akɛ ‘mɔ ko bɛ ni baatswa mɔ ni yɔɔ ŋwɛi shɔŋŋ lɛ nine afɔ loo ni ekɛɛ lɛ akɛ: Mɛni ofeɔ nɛɛ?’ Yɛ nɔ ni fe nakai mli lɛ, Babilon nɔyelɔ lɛ tsɔɔ akɛ ekase nɔ ko yɛ enɛ mli, ni ekɛɛ akɛ: “No hewɔ lɛ, agbɛnɛ mi, Nebukadnezar, miijie ŋwɛi maŋtsɛ lɛ yi, ni miiwo enɔ, ni miiwo ehiɛ nyam; ejaakɛ enitsumɔi fɛɛ lɛ anɔkwale ni, ni egbɛi hu ja, ni mɛi ni yɔɔ hewoo jeŋ lɛ”​—tamɔ maŋtsɛ lɛ fee lɛ​—“enyɛɔ amɛ shi ebaa.” Ani nɛkɛ odaseyelii nɛɛ fɛɛ ni tsɔɔ gbɛ ni Yehowa tsɔ nɔ shii abɔ eha ana jeŋ muu fɛɛ maŋtsɛyeli sane lɛ naa lɛ jeee odaseyeli ni mli wa akɛ nɛkɛ saji nɛɛ jeee mɔ folo ko kɛkɛ niiahesusumɔ, shi moŋ niŋmalɔ ko ni Nyɔŋmɔ kɛ emumɔ lɛ duro lɛ koni eŋma yinɔsane diɛŋtsɛ lɛ niŋmaa?​—Daniel 4:​35, 37.

Belshazar na Ninenaa Niŋmaa lɛ yɛ Gbogbo lɛ He

15. Mɛɛ gbɛ nɔ Belshazar tsɔ etsɔɔ akɛ ebuuu Yehowa ni ji anɔkwale Nyɔŋmɔ lɛ?

¹⁵ Maŋtsɛ kroko ni Yehowa na hegbɛ akɛ eha ekase nɔ ko hu ji Belshazar. Eji Nebukadnezar bi Maŋtsɛ Nabonido binuu kɛ enajiaŋyelɔ. Yɛ okpɔlɔŋmɛɛ kpeteŋkpele ko ni etsɛ be ko lɛ shishi lɛ, Belshazar kɛ mlifu fa ni akɛ shika nibii ni enii yaloo kɛjɛ Yehowa sɔlemɔ we lɛŋ yɛ Yerusalem lɛ aba, koni lɛ kɛ enukpai lɛ kɛ eŋamɛi lɛ kɛ ehemɛi lɛ anu daa yɛ mli. Ni “amɛnu wein ni amɛjie shika kɛ jwiɛtɛi kɛ akɔɔble kɛ dade kɛ tso kɛ tɛ nyɔŋmɔi lɛ ayi.”​—Daniel 5:​3, 4.

16, 17. (a) Mɛɛ gbɛ nɔ Yehowa tsɔ ni edu gbeyeishemɔ mumɔ ewo Belshazar mli? (b) Mɛɛ shishitsɔɔmɔ Daniel kɛha yɛ ninenaa niŋmaa lɛ ni yɔɔ gbogbo lɛ he lɛ he, ni yɛ mɛɛ gbɛ nɔ ama nɔ mi akɛ eji anɔkwale?

¹⁶ Nyɔŋmɔ be eshɛ ni ekɛbaafo Babilon nɔyeli sɛɛ. Yɛ no hewɔ lɛ eha naakpɛɛ ninenaa niŋmaa ko je kpo yɛ gbogbo lɛ he. Nɛkɛ naakpɛɛ nii nɛɛ ha ŋmiŋmi mɔ maŋtsɛ lɛ ni amrɔ lɛ nɔŋŋ lɛ eha atsɛ enilelɔi lɛ koni amɛbatsɔɔ niŋmaa lɛ shishi. Amɛteŋ mɔ ko mɔ ko nyɛɛɛ. Kɛkɛ ni enyɛ kai lɛ akɛ Daniel, ni tsɔɔ lamɔi ashishi eha Nebukadnezar lɛ baanyɛ atsɔɔ niŋmaai lɛ ashishi. (Daniel 5:​10-12) Yɛ be mli ni atsɛ lɛ kɛba ni abi lɛ kɛji ebaanyɛ etsɔɔ lɛ, Daniel kai maŋtsɛ lɛ bɔ ni Nyɔŋmɔ ba enii ni woɔ ehe nɔ lɛ shi ni ena ele akɛ Mɔ ni yɔɔ Ŋwɛi Shɔŋŋ lɛ ji Nɔyelɔ yɛ gbɔmɛi amaŋtsɛyeli nɔ lɛ.​—Daniel 5:​20, 21.

¹⁷ Daniel tsa nɔ ni ekɛɛ Belshazar akɛ: “Shi Nyɔŋmɔ ni omumɔ yɔɔ edɛŋ ni ogbɛi fɛɛ ji enɔ lɛ, lɛ lɛ owooo ehiɛ nyam.” (Daniel 5:23) No hewɔ lɛ ninenaa niŋmaa lɛ fee kɔkɔbɔɔ kɛha Babilon maŋtsɛ lɛ akɛ emaŋtsɛyeli gbii lɛ eba enaagbee, ni akɛ aŋmɛ lɛ ni ana akɛ eshɛɛɛ, ni akɛ akɛ emaŋtsɛyeli lɛ baaha Mediabii lɛ kɛ Pershiabii lɛ. Ni yɛ nakai nyɔɔŋ lɛŋ nɔŋŋ lɛ, yɛ be mli ni Yehowa etsɔɔ nakai maŋtsɛ ni woɔ ehe nɔ lɛ nɛkɛ nii ni he hiaa waa nɛɛ sɛɛ lɛ, agbe Kaldeabii amaŋtsɛ Belshazar.​—Daniel 4:​23.

18. Mɛɛ gbɛi anɔ Yehowa baatsɔ etsɔɔ je lɛŋ nɔyelɔi ni yɔɔ ŋmɛnɛ lɛ nibii ni tamɔ enɛɛmɛi ni kɔɔ ejeŋ muu fɛɛ nɔyeli hewalɛ lɛ kɛ ehewalɛ ni ekɛhereɔ mɔ yiwala lɛ he nii?

¹⁸ Taakɛ Yehowa tsɔɔ maŋtsɛmɛi henɔwolɔi ni ji Nebukadnezar kɛ Belshazar nibii ni kɔɔ ejeŋ muu fɛɛ nɔyeli kɛ ehewalɛ ni ekɛhereɔ mɔ yiwala lɛ he nii lɛ, ‘nakai nɔŋŋ Nyɔŋmɔ baaha shikpɔŋ lɛ nɔ nɔyelɔi lɛ hu ale akɛ lɛ ji Jeŋ Muu Fɛɛ Maŋtsɛ Ofe, Nɔyelɔ Ni Nɔ Kwɔ Fe Fɛɛ yɛ Harmagedon. Ebaasa owala he. Yɛ mɛɛ gbɛ nɔ? Ejaakɛ yɛ nakai be lɛ mli lɛ Yehowa baahere enɔkwa sɔɔlɔi lɛ ayiwala taakɛ ejie Hebribii etɛ lɛ kɛjɛ flɔnɔɔ la ni tsoɔ grigri lɛ mli lɛ.​—Daniel 3:​26-30.

Dario Kase Yehowa Hewalɛ ni Ekɛhereɔ mɔ Yiwala lɛ he Nii

19, 20. Mɛɛ nɔ ko ni ba yɛ Daniel gbii lɛ amli tsɔɔ Dario nɔ ko yɛ Yehowa hewalɛ ni ekɛhereɔ mɔ yiwala lɛ he?

¹⁹ Daniel yitso 6 lɛ hu tsɔɔ bɔ ni Yehowa ha maŋtsɛ kroko, Dario, hu kase nɔ ko​—Nyɔŋmɔ hewalɛ ni ekɛhereɔ mɔ yiwala lɛ. Akpaŋ Daniel yinɔ ni maŋtsɛ lɛ ha ashɛ lɛ afɔ jatai abu mli ni jeee maŋtsɛ lɛ suɔmɔ naa nii ji nakai. Ejeee mɔ ko ni kɛ henɔwomɔ te shi eshi anɔkwale Nyɔŋmɔ lɛ. Nɔ ni yɔɔ miishɛɛ ji akɛ, eyɛ mli akɛ Dario ma nɔ mi eha Daniel akɛ e-Nyɔŋmɔ lɛ baahere eyiwala moŋ nɛ, shi etamɔ nɔ ni eheee enɛ eyeee kɛmɔɔɔ shi. Kɛ jeee nakai lɛ, mɛni hewɔ ebaashi kpe nyɔɔŋnyɔɔŋ ni ewɔɔɔ, ni eeye etsui kɛyashi jetsɛremɔ be mli ni ekɛ oyaiyeli tee jatai abu lɛ naa lɛ? Kɛkɛ ni ewo enaa nɔ akɛ: “Daniel, Nyɔŋmɔ hiɛkalɔ lɛ tsulɔ, ani o-Nyɔŋmɔ lɛ ni osɔmɔɔ lɛ daa lɛ, enyɛo ejie kɛjɛ jatai Iɛ adɛŋ lo?”​—Daniel 6:​18-20.

²⁰ Hɛɛ, Nyɔŋmɔ enyɛ ebu Daniel he. Maŋtsɛ Dario na miishɛɛ waa ni ewo kita akɛ: “Mimaŋtsɛyeli mli nɔyeli he fɛɛ nɔyeli he lɛ mɛi ahe akpokpo ni amɛshe gbeyei yɛ Daniel Nyɔŋmɔ lɛ hiɛ. Ejaakɛ lɛ ji Nyɔŋmɔ hiɛkalɔ lɛ, ni ehiɔ shi kɛyaa naanɔ, ni emaŋtsɛyeli lɛ hiɛ kpataŋ, . . . Efeɔ okadii kɛ naakpɛɛ nii yɛ ŋwɛi kɛ shikpɔŋ lɛ nɔ; ejaakɛ ejie Daniel yɛ jatai lɛ adɛŋ.”​—Daniel 6:​26, 27.

21. (a) Mɛni he nɔkwɛmɔ nii ni jeɔ shi faŋŋ Daniel wolo lɛ klɛŋklɛŋ yitsei ekpaa lɛ kɛhaa? (b) Mɛɛ hewalɛ esa akɛ nɛkɛ nibii ni aŋmala nɛɛ ana yɛ wɔnɔ?

²¹ Yɛ anɔkwale mli lɛ Daniel wolo lɛ klɛŋklɛŋ yitsei ekpaa lɛ haa wɔ nɔkwɛmɔ nii ni jeɔ shi faŋŋ yɛ bɔ ni Yehowa, kɛ ekaa​—hɛɛ, ekaa kɛha egbɛi lɛ​—tsɔɔ je nɛɛŋ maŋtsɛmɛi hewalɔi lɛ akɛ lɛlɛŋ Lɛ ji Mɔ ni nyɛɔ nɔ fɛɛ nɔ efeɔ, Jeŋ Muu Fɛɛ Nɔyelɔ lɛ, ni enyɛɔ ebaa nɔyelɔi henɔwolɔi ashi ni ehereɔ enɔkwa sɔɔlɔi ayiwala. Esa akɛ nɛkɛ saji nɛɛ aha wɔna Nyɔŋmɔ he gbeyeishemɔ ni yeɔ emuu kɛ bulɛ kɛha Yehowa hewalɛ ni anyɛɛɛ naa atsi lɛ kɛ ejeŋ muu fɛɛ nɔyeli hewalɛ lɛ. Yɛ nakai beaŋ nɔŋŋ lɛ, nɛkɛ yinɔsane ni ajɛ mumɔ mli aŋma nɛɛ wajeɔ mɔ hemɔkɛyeli ejaakɛ ekɛ nɔkwɛmɔ nii haa ni tsɔɔ bɔni Yehowa sɔɔlɔi jie hemɔkɛyeli kpele kɛ ekaa kpo, taakɛ nikasemɔ ni tsa enɛ nɔ lɛ baatsɔɔ yɛ faŋŋ mli lɛ.b

[Shishigbɛ niŋmai]

Te Obaaha Hetoo Tɛŋŋ?

◻ Mɛni ehe ebahia ni Yehowa aha jeŋ nɔyelɔi lɛ akase?

◻ Mɛni abaanyɛ akɛɛ yɛ anɔkwale ni Daniel wolo Iɛ ji lɛ he?

◻ Mɛni ji nɔ ni Maŋtsɛ Nebukadnezar kase ni ha eba ehe shi kwraa?

◻ Mɛɛ hewalɛ esa akɛ nii ni Yehowa ha maŋtsɛmɛi lɛ kase lɛ ana yɛ wɔnɔ?