Yitso Nɛɛhu
Namɔ Baaye Je Lɛ Nɔ?
1-3. Tsɔɔmɔ lamɔ kɛ ninaai ni Daniel na yɛ Belshazar klɛŋklɛŋ nɔyeli afi lɛ mli lɛ mli.
DANIEL gbalɛ ni náa mɔ nɔ hewalɛ lɛ kɛ wɔ kuɔ sɛɛ kɛyaa Babilonia Maŋtsɛ Belshazar klɛŋklɛŋ afi lɛ nɔ agbɛnɛ. Daniel kɛ be kakadaŋŋ ehi Babilon nomŋɔɔ mli, shi emuuyeli mli ni ehiɛ kɛha Yehowa lɛ hosoko dã. Gbalɔ anɔkwafo ni eye fe afii 70 lɛ “la lamɔ ko, ni ena ninaai yɛ eyitsoŋ, beni ekã esaa lɛ nɔ lɛ.” Ni nakai ninaai lɛ wo ehe gbeyei!—Daniel 7:1, 15.
2 Daniel kɛɛ: “Ni naa, ŋwɛi kɔɔyɔi ejwɛ lɛ fã yɛ ŋshɔ kpeteŋkpele lɛ hiɛ. Ni kooloi wuji ejwɛ fã kpo kɛjɛ ŋshɔ lɛŋ, soro eko, soro eko.” Mɛɛ kooloi ni he yɔɔ naakpɛɛ nɛ! Klɛŋklɛŋ nɔ̃ lɛ ji jata ni hiɛ fiji, nɔ ni ji enyɔ lɛ tamɔ oshishibrishi. Kɛkɛ ni kootsɛ ni hiɛ fiji ejwɛ kɛ yitsei ejwɛ ba! Kooloo ni he wa waa ni ji ejwɛ lɛ yɛ nyanyɔji tamɔ dadei kɛ akolontoi nyɔŋma. Kɛkɛ ni akolonto “bibioo” ko te shi yɛ ekolontoi nyɔŋma lɛ teŋ ni “hiŋmɛii yɛ he tamɔ gbɔmɔ hiŋmɛii kɛ naabu ni wieɔ nibii wuji.”—Daniel 7:2-8.
3 No sɛɛ lɛ, Daniel ninaai lɛ tsɔ kɛtee ŋwɛigbɛ. Mɔ ni Eye Gbii Pii lɛ ho ta anunyam maŋtsɛsɛi nɔ tamɔ Kojolɔ yɛ ŋwɛi Gwabɔɔ lɛ mli. ‘Akpekpei abɔ yaa nɔ amɛsɔmɔɔ lɛ, ni akpei nyɔŋma toi akpei nyɔŋma damɔɔ ehiɛ.’ Akɛni ekɛ fɔbuu kojomɔ ba kooloi lɛ anɔ hewɔ lɛ, ehe nɔyeli kɛjɛ amɛdɛŋ ni ekpata kooloo ni ji ejwɛ lɛ hiɛ. Akɛ “majimaji kɛ asafoi kɛ wiemɔi” lɛ anɔ naanɔ nɔyeli wo “mɔ ko tamɔ gbɔmɔ bi” lɛ dɛŋ.—Daniel 7:9-14.
4. (a) Daniel tsɔ ehe kɛtee namɔ ŋɔɔ kɛha saji ni anyɛɔ akɛ he fɔ̃ɔ nɔ? (b) Mɛni hewɔ nɔ ni Daniel na ni enu yɛ nakai nyɔɔŋ lɛ mli lɛ he hiaa wɔ lɛ?
4 Daniel kɛɛ akɛ: “Mimumɔ hao yɛ migbɔmɔtso mli, ni miyitsoŋ ninaai lɛ wo mihe gbeyei.” No hewɔ lɛ ‘etao fɛɛ mli anɔkwale’ kɛjɛ ŋwɛibɔfo ko ŋɔɔ. Ni ŋwɛibɔfo lɛ ‘tsɔɔ lɛ nibii lɛ ashishi diɛŋtsɛ.’ (Daniel 7:15-28) Nɔ ni Daniel na ni enu nakai nyɔɔŋ lɛŋ lɛ yɛ miishɛɛ babaoo kɛha wɔ, ejaakɛ etsɔɔ wɔsɛɛ be mli jeŋ saji amli kɛbashiɔ wɔbei nɛɛ amli, beni akɛ “majimaji kɛ asafoi kɛ wiemɔi” anɔyeli haa “mɔ ko tamɔ gbɔmɔ bi” lɛ. Yɛ Nyɔŋmɔ Wiemɔ lɛ kɛ emumɔ lɛ yelikɛbuamɔ naa lɛ, wɔ hu wɔbaanyɛ wɔnu nɛkɛ gbalɛ mli ninaai nɛɛ ashishi.a
KOOLOI EJWƐ FÃ KPO KƐJƐ ŊSHƆ LƐŊ
5. Ŋshɔ ni kɔɔyɔɔ fã yɛ hiɛ lɛ feɔ mɛni he mfoniri?
5 Daniel kɛɛ: “Ni kooloi wuji ejwɛ fã kpo kɛjɛ ŋshɔ lɛŋ.” (Daniel 7:3) Kɔɔyɔɔ ni fã yɛ ŋshɔ lɛ hiɛ lɛ feɔ mɛni he mfoniri? Afii komɛi asɛɛ lɛ, bɔfo Yohane na kooloo ko ni yɔɔ yitsei kpawo ni fã kpo kɛjɛ “ŋshɔ” lɛŋ. Nakai ŋshɔ lɛ damɔ shi kɛha “maji kɛ asafoi kɛ jeŋmaji kɛ majianɔ wiemɔi”—adesai babaoo ni amɛtse amɛhe kɛjɛ Nyɔŋmɔ he lɛ. Belɛ ŋshɔ lɛ feɔ adesai ni amɛtsi amɛhe kɛjɛ Nyɔŋmɔ he lɛ he okadi ni sa.—Kpojiemɔ 13:1, 2; 17:15; Yesaia 57:20.
6. Kooloi ejwɛ lɛ feɔ mɛni he mfoniri?
6 Nyɔŋmɔ ŋwɛibɔfo lɛ kɛɛ akɛ: “Nɛkɛ kooloi wuji ejwɛ nɛɛ, amɛji maŋtsɛmɛi ejwɛ ni baate shi yɛ shikpɔŋ lɛ nɔ lɛ.” (Daniel 7:17) Eyɛ faŋŋ akɛ ŋwɛibɔfo lɛ yɔse kooloi ejwɛ ni Danel na akɛ “maŋtsɛmɛi ejwɛ” lɛ. No hewɔ lɛ, kooloi nɛɛ damɔ shi kɛha jeŋ hewalɛi. Shi te amɛmli nɔ ni ji lɛ?
7. (a) Mɛni mɛi ni wieɔ Biblia mli saji ahe lɛ ateŋ mɛi komɛi kɛɔ yɛ Daniel lamɔ mli ninaa ni kɔɔ kooloi ejwɛ lɛ kɛ Maŋtsɛ Nebukadnezar lamɔ mli amaga kpeteŋkpele lɛ ahe lɛ he? (b) Amaga lɛ sũ mli nibii fãi ejwɛ lɛ eko fɛɛ eko damɔ shi kɛha mɛni?
7 Mɛi ni wieɔ Biblia mli saji ahe lɛ kɛ Daniel lamɔ mli ninaa ni kɔɔ kooloi wuji ejwɛ lɛ ahe lɛ toɔ Nebukadnezar lamɔ ni kɔɔ amaga kpeteŋkpele ko he lɛ he. Ákɛ nɔkwɛmɔnɔ lɛ, The Expositor’s Bible Commentary lɛ kɛɔ akɛ: “[Daniel] yitso 7 lɛ kɛ yitso 2 lɛ yaa pɛpɛɛpɛ.” The Wycliffe Bible Commentary lɛ kɛɔ akɛ: “Akpɛlɛɔ nɔ yɛ he fɛɛ he akɛ Jeŋmaji anɔyelii ejwɛ ni tsara nɔ ba lɛ . . . nɔŋŋ yɔɔ biɛ [yɛ Daniel yitso 7] tamɔ bɔ ni ásusu he yɛ [Daniel] yitso 2 lɛ.” Jeŋ hewalɛi ejwɛ ni Nebukadnezar lamɔ lɛ mli sũ mli nii ejwɛ lɛ damɔ shi kɛha amɛ lɛ ji Babilonia Maŋtsɛyeli (shika yitso) lɛ, Media kɛ Persia (jwiɛtɛi tsitsii kɛ niji) lɛ, Hela (akɔɔble musu kɛ hɛ) lɛ, kɛ Roma Maŋtsɛyeli (dade naji) lɛ.b (Daniel 2:32, 33) Nyɛhaa wɔkwɛa bɔ ni nɛkɛ maŋtsɛyelii nɛɛ kɛ kooloi wuji ejwɛ ni Daniel na lɛ kpãa gbee amɛhaa.
EHIƐ YƐ LA TAMƆ JATA, EHE YƐ OYA TAMƆ OKROPƆŊ
8. (a) Te Daniel tsɔɔ bɔ ni klɛŋklɛŋ kooloo lɛ ji lɛ mli eha tɛŋŋ? (b) Klɛŋklɛŋ kooloo lɛ damɔ shi kɛha mɛɛ maŋtsɛyeli, ni efee enii tamɔ jata yɛ mɛɛ gbɛ nɔ?
8 Mɛɛ kooloi ni he yɔɔ naakpɛɛ Daniel na nɛkɛ! Beni etsɔɔ bɔ ni ekome ji lɛ mli lɛ, ekɛɛ akɛ: “Klɛŋklɛŋ nɔ lɛ tamɔ jata, ni ehiɛ okropɔŋ fiji; mihiɛ lɛ kwɛmɔ aahu kɛyashi beyinɔ ni akpɔlɔ efiji, ni awó enɔ kɛjɛ shikpɔŋ, ni ahã edamɔ enaji anɔ tamɔ gbɔmɔ, ni aha lɛ gbɔmɔ tsui.” (Daniel 7:4) Nɛkɛ kooloo nɛɛ fee nɔyeli ni amaga kpeteŋkpele lɛ shika yitso lɛ damɔ shi kɛha lɛ lɛ nɔŋŋ he mfoniri, Babilonia Jeŋ Hewalɛ lɛ (607-539 D.Ŋ.B.). Taakɛ “jata” ni mɔmɔɔ kooloi krokomɛi ji lɛ, Babilon kɛ hiɛdɔɔ mi jeŋmaji, ni Nyɔŋmɔ webii fata he. (Yeremia 4:5-7; 50:17) Nɛkɛ “jata” nɛɛ shá foi yɛ kunimyeli tutuamɔ mli tamɔ nɔ ni ehiɛ okropɔŋ fiji.—Yaafo 4:19; Habakuk 1:6-8.
9. Mɛɛ tsakemɔi kooloo ni tamɔ jata lɛ tsɔ̃ mli, ni enɛ ná enɔ hewalɛ yɛ mɛɛ gbɛ nɔ?
9 Yɛ be ni sa mli lɛ, akpɔlɔ jata ni yɔɔ fiji ni yɔɔ srɔto lɛ fiji lɛ kɛjɛ ehe. Kɛmiiba Maŋtsɛ Belshazar nɔyeli lɛ naagbee lɛ, Babilon laaje oyaiyeli ni ekɛyeɔ kunim lɛ kɛ bɔ ni eyeɔ jeŋmaji lɛ anɔ tamɔ jata lɛ. Ejeee mɔ ni he yɔɔ oya fe nuu ni nyiɛ enaji enyɔ nɔ. “Gbɔmɔ tsui” ni aha lɛ lɛ ha egbɔjɔ. Akɛni ebɛ “jata tsui” hewɔ lɛ, Babilon nyɛɛɛ afee enii tamɔ maŋtsɛ yɛ “kooŋ kooloi ateŋ.” (Okɛto 2 Samuel 17:10; Mika 5:7 he.) Kooloo kroko ni da ye enɔ kunim.
TAMƆ OSHISHIBRISHI NI YEƆ NII HAMAHAMA
10. Mɛɛ nɔyelɔi awekukpaa “oshishibrishi” lɛ fee amɛhe mfoniri?
10 Daniel kɛɛ: “Ni naa, kooloo kroko, ni ji enyɔ lɛ, tamɔ oshishibrishi, ni ewó ehe nɔ yɛ efã kome, ni ŋmawutsei etɛ yɛ edaaŋ yɛ enyanyɔji ateŋ, ni akɛɛ lɛ akɛ: Tee shi, ni oye loo babaoo!” (Daniel 7:5) Maŋtsɛ ni “oshishibrishi” lɛ feɔ ehe mfoniri lɛ nɔŋŋ amaga ni da naakpa lɛ jwiɛtɛi tsitsi kɛ niji lɛ damɔ shi kɛha lɛ lɛ—Media kɛ Persia nɔyelɔi awekukpaa lɛ (539-331 D.Ŋ.B.) ní je shishi kɛjɛ Dario ni ji Medianyo lɛ kɛ Koresh Kpeteŋkpele lɛ nɔ ni ba naagbee yɛ Dario III lɛ nɔ lɛ.
11. Mfonirifeemɔŋ oshishibrishi lɛ ni awo enɔ yɛ efã kome ni ŋmawutsei etɛ yɔɔ edaaŋ lɛ tsɔɔ mɛni?
11 Awó okadi “oshishibrishi” ‘lɛ nɔ yɛ efã kome,’ ekolɛ koni efee klalo ni etutua ni eba jeŋmaji ashi ni ehiɛ jeŋ hewalɛ mli. Aloo ekolɛ nɛkɛ gbɛhe nɛɛ baanyɛ afee nɔ ni akɛtsɔɔ akɛ Persia nɔyelɔi awekukpaa lɛ anɔ baakwɔ fe Media maŋtsɛ kome ni ji Dario lɛ. Ŋmawutsei etɛ ni yɔɔ oshishibrishi lɛ nyanyɔji ateŋ lɛ baanyɛ atsɔɔ hei etɛ ni eye ekunimii lɛ kɛtee lɛ. Media kɛ Persia “oshishibrishi” lɛ tee kooyigbɛ ni eyaye Babilon nɔ kunim yɛ afi 539 D.Ŋ.B. Kɛkɛ ni etee anaigbɛ kɛtsɔ Asia Bibioo lɛ kɛtee Thrace. Yɛ naagbee lɛ, “oshishibrishi” lɛ tee wuoyigbɛ ni eyaye Mizraim nɔ kunim. Akɛni yɛ be komɛi amli lɛ yibɔ okadi ni ji etɛ lɛ feɔ nɔ ko naawalɛ he mfoniri hewɔ lɛ, ŋwawutsei etɛ lɛ baanyɛ ama mfonirifeemɔŋ oshishibrishi lɛ hiɛkɔɔ kɛha kunimyeli lɛ nɔ mi.
12. Mɛni jɛ mfonirifeemɔŋ oshishibrishi lɛ toiboo ni efee eha fãmɔ akɛ: “Tee shi, ni oye loo babaoo!” lɛ mli ba?
12 “Oshishibrishi” lɛ tutua jeŋmaji lɛ yɛ wiemɔi ni ji: “Tee shi, ni oye loo babaoo” lɛ nɔkpɛlɛmɔ naa. Akɛni ekpata Babilon hiɛ yɛ ŋwɛi suɔmɔnaa nifeemɔ naa hewɔ lɛ, Media kɛ Persia ebaje gbɛhe ko ni baaha esɔmɔ Yehowa webii lɛ babaoo mli. Ni efee nakai! (Kwɛmɔ “Maŋtsɛ ni Ŋmɛɛɔ Saji Ahe” ni yɔɔ baafa 149 lɛ.) Kɛtsɔ Koresh Kpeteŋkpele lɛ, Dario I (Dario Kpeteŋkpele lɛ), kɛ Artashasta I lɛ nɔ lɛ, Media kɛ Persia ŋmɛɛ Yudafoi ni Babilon eŋɔ amɛ nom lɛ ahe, ni amɛye amɛbua amɛ ni amɛsaa amɛtswa Yehowa sɔlemɔtsu lɛ, ni amɛsaa Yerusalem gbogboi lɛ ekoŋŋ. Yɛ be ni sa mli lɛ, Media kɛ Persia baye kpokpai wuji 127 nɔ, ni Maŋnyɛ Ester wu, Ahashwerosh (Xerxes I) ye “maŋtsɛ kɛjɛ India kɛyashi Kush.” (Ester 1:1) Shi kɛlɛ, kooloo kroko ni baate shi yɛ no sɛɛ lɛ miiba.
EHE YƐ OYA TAMƆ KOOTSƐ NI HIƐ FIJI!
13. (a) Kooloo ni ji etɛ lɛ feɔ mɛni he mfoniri? (b) Mɛni abaanyɛ awie yɛ kooloo ni ji etɛ lɛ ni he yɔɔ oya lɛ kɛ shikpɔŋ ni eye nɔ lɛ he?
13 Kooloo ni ji etɛ lɛ “tamɔ kootsɛ ni hiɛ looflɔ fiji ejwɛ yɛ ekotosɛɛ; ni nɛkɛ kooloo nɛɛ yɛ yitsei hu ejwɛ, ni aŋɔ nɔyeli aha lɛ.” (Daniel 7:6) Taakɛ nɔ ni tamɔ lɛ lɛ—Nebukadnezar lamɔ mli amaga ni da naakpa lɛ akɔɔble musu kɛ hɛ lɛ ji lɛ—kootsɛ ni yɔɔ yitsei ejwɛ kɛ fiji ejwɛ lɛ fee Makedonia, loo Hela nɔyelɔi awekukpaa ni je shishi kɛjɛ Alexander Kpeteŋkpele lɛ nɔ lɛ he mfoniri. Alexander ni he yɔɔ oya kɛ klɛklɛ tamɔ kootsɛ lɛ fã kɛtsɔ Asia Bibioo lɛ, wuoyigbɛ kɛtee Mizraim, kɛtee India anaigbɛ husu lɛ naa. (Okɛto Habakuk 1:8 he.) Enɔyelihe lɛ da fe “oshishibrishi” lɛ nɔ̃, ejaakɛ Makedonia, Hela, kɛ Persia Maŋtsɛyeli lɛ fata he.—Kwɛmɔ “Maŋtsɛ ni Edako Ye Je lɛ Nɔ Kunim” ni yɔɔ baafa 153 lɛ.
14. Te fee tɛŋŋ ni “kootsɛ” lɛ baná yitsei ejwɛ?
14 “Kootsɛ” lɛ baná yitsei ejwɛ yɛ Alexander gbele sɛɛ yɛ afi 323 D.Ŋ.B. Yɛ naagbee lɛ, etatsɛmɛi lɛ ateŋ mɛi ejwɛ batsɔmɔ esɛɛyelɔi yɛ enɔyelihe lɛ fãi srɔtoi anɔ. Seleucus ye Mesopotamia kɛ Siria nɔ. Ptolemy ye Mizraim kɛ Palestina nɔ. Lysimachus ye Asia Bibioo lɛ kɛ Thrace nɔ, ni Cassander nine shɛ Makedonia kɛ Hela nɔ. (Kwɛmɔ “Ajara Maŋtsɛyeli Ni Da Waa Mli” ni yɔɔ baafa 162 lɛ.) Kɛkɛ ni nɔ̃ ko hee ko ni woɔ mɔ he gbeyei te shi.
KOOLOO KO NI HE YƆƆ GBEYEI BAFEE MƆ NI YƆƆ SRƆTO
15. (a) Tsɔɔmɔ bɔ ni kooloo ni ji ejwɛ lɛ yɔɔ ha. (b) Kooloo ni ji ejwɛ lɛ damɔ shi kɛha mɛni, ni ekumɔ ni eye nɔ fɛɛ nɔ ni yɔɔ egbɛ nɔ lɛ nɔ yɛ mɛɛ gbɛ nɔ?
15 Daniel tsɔɔ bɔ ni kooloo ni ji ejwɛ lɛ ji akɛ “ehe yɛ gbeyei kɛ naakpɛɛ, ni ehe wa naakpa.” Etee nɔ akɛ: “Ni eyɛ dade nyanyɔji kpelei, eye nii, ni ekumɔ mli dukuduku, ni nii ni shwɛ lɛ ekɛ enaji naanaa nɔ; ni soro lɛ, ni soro kooloi krokomɛi ni tsɔ ehiɛ ba lɛ, ni eyɛ akolontoi nyɔŋma.” (Daniel 7:7) Kooloo ni he yɔɔ gbeyei nɛɛ je shishi akɛ Roma maŋkwramɔŋ kɛ tawuu mli hewalɛ. Ebahé Hela Maŋtsɛyeli lɛ ni mli eja ejwɛ lɛ fiofio, ni beni shɛɔ afi 30 D.Ŋ.B. lɛ, Roma eje kpo akɛ Biblia gbalɛ mli jeŋ hewalɛ ni nyiɛ sɛɛ ba. Akɛni Roma Maŋtsɛyeli lɛ tsɔ tawuu mli hewalɛ nɔ eba nɔ fɛɛ nɔ ni yɔɔ egbɛ nɔ lɛ shi hewɔ lɛ, yɛ naagbee lɛ eda agbo kɛjɛ Britania Ŋshɔkpɔi lɛ anɔ kɛfoŋ kɛtsɔ Europa maji pii anɔ, aahu kɛbɔle Mediteranea, kɛteke Babilon kɛyashi Persia Ŋshɔnine lɛ nɔ.
16. Mɛɛ adafitswaa ŋwɛibɔfo lɛ kɛha yɛ kooloo ni ji ejwɛ lɛ he?
16 Akɛni Daniel miisumɔ ni enu kooloo ni he yɔɔ “gbeyei kɛ naakpɛɛ” nɛɛ he sane lɛ shishi jogbaŋŋ hewɔ lɛ, ebo bɔ ni ŋwɛibɔfo lɛ tsɔɔ saji amli eha lɛ toi jogbaŋŋ, akɛ: “Ni akolontoi nyɔŋma lɛ, maŋtsɛmɛi nyɔŋma aaate shi kɛaajɛ nɛkɛ maŋtsɛyeli nɛɛ mli; ni mɔ kroko aaate shi yɛ amɛsɛɛ, ni aaasoro lɛ kɛ klɛŋklɛŋbii lɛ, ni eeeba maŋtsɛmɛi etɛ shi.” (Daniel 7:19, 20, 24) Mɛni ji nɛkɛ “akolontoi nyɔŋma” loo “maŋtsɛmɛi nyɔŋma” nɛɛ?
17. Kooloo ni ji ejwɛ lɛ “akolontoi nyɔŋma” lɛ feɔ mɛni he mfoniri?
17 Beni Roma ná nii babaoo ni etee nɔ ekpɔtɔ babaoo yɛ enɔyelɔi lɛ anyenyeŋtswibɔɔ shihilɛ lɛ hewɔ lɛ, enɔ gbɔ́ akɛ tawuu mli hewalɛ. Beni be shwieɔ mli lɛ, Roma tawuu mli hewalɛ lɛ ni baa shi lɛ bafee faŋŋ. Yɛ naagbee lɛ, nakai maŋtsɛyeli kpeteŋkpele lɛ jwara efee maŋtsɛyelii babaoo. Akɛni Biblia lɛ kɛ yibɔ okadi ni ji nyɔŋma lɛ fɔɔ nitsumɔ ekɛtoɔ emuuyeli he hewɔ lɛ, kooloo ni ji ejwɛ lɛ “akolontoi nyɔŋma” lɛ damɔ shi kɛha maŋtsɛyelii fɛɛ ni jɛ Roma fitemɔ lɛ mli ba lɛ.—Okɛto 5 Mose 4:13; Luka 15:8; 19:13, 16, 17 he.
18. Te fee tɛŋŋ ni Roma tee nɔ eye Europa nɔ afii ohai babaoo yɛ be mli ni ákpa enaagbee maŋtsɛ lɛ po sɛɛ lɛ?
18 Shi Roma Jeŋ Hewalɛ lɛ baaa naagbee kɛ enaagbee maŋtsɛ ni yɔɔ Roma lɛ kpamɔ yɛ afi 476 Ŋ.B. Paapa lɛ ni yɔɔ Roma lɛ tee nɔ ekɛ maŋkwramɔŋ, kɛ titri lɛ jamɔŋ hewalɛ tsu nii afii ohai babaoo ekɛye Europa nɔ. Efee nakai kɛtsɔ abladei ni yɔɔ shikpɔji ni ohiafoi ni amɛyeɔ amɛnɔ lɛ tsuɔ nii yɛ mli amɛhaa amɛ lɛ ahe gbɛjianɔtoo, ni no mli lɛ gbɔmɛi ni yɔɔ Europa lɛ ateŋ mɛi babaoo yɔɔ nuntsɔmɛi ashishi, ni amɛ hu amɛyɔɔ maŋtsɛ ko shishi lɛ nɔ. Ni maŋtsɛmɛi lɛ fɛɛ kpɛlɛɔ hewalɛ ni paapa lɛ yɔɔ lɛ nɔ. Enɛ ha Roma Maŋtsɛyeli Krɔŋkrɔŋ lɛ, ní Roma, he ni paapa lɛ yɔɔ lɛ ji eshikwɛ̃ɛhe titri lɛ, ye jeŋ saji anɔ kɛtsɔ yinɔsane be kpalaŋŋ ni atsɛɔ lɛ akɛ Duŋ Bei lɛ amli.
19. Taakɛ yinɔsaneŋmalɔ ko tsɔɔ lɛ, kɛ akɛ Roma to maŋtsɛyelii ni tsɔ ehiɛ ba lɛ ahe lɛ mɛni anaa?
19 Namɔ baanyɛ aje ŋwane akɛ kooloo ni ji ejwɛ lɛ jeee nɔ ni ‘esoro lɛ yɛ maŋtsɛyelii krokomɛi lɛ fɛɛ he’? (Daniel 7:7, 19, 23) Yɛ enɛ gbɛfaŋ lɛ, yinɔsaneŋmalɔ H. G. Wells ŋma akɛ: “Nɛkɛ Roma hewalɛ hee nɛɛ . . . yɛ srɔto kwraa yɛ gbɛi pii anɔ yɛ maŋtsɛyelii wuji ni tsɔ hiɛ ba yɛ hiŋmɛigbelemɔ je lɛ mli lɛ ahe. . . . Shwɛ fioo kulɛ ebua Helabii ni yɔɔ je lɛŋ lɛ fɛɛ naa, ni emli gbɔmɛi lɛ tamɔɔɔ Hambii kɛ Shembii tsɔ tamɔ bɔ ni maŋtsɛyelii ni tsɔ ehiɛ lɛ ekomɛi ji lɛ . . . Eji nɔkwɛmɔnɔ hee ko kwraa yɛ yinɔsane mli . . . Roma Maŋtsɛyeli lɛ ji nɔ̃ ko ni da kɛjɛ nɔ̃ ko mli, nɔ̃ ko hee ni atooo he gbɛjianɔ ni da; Romabii lɛ na amɛhe akɛ gbɔmɛi ni kɛ amɛhe ewo maŋnɔkwɛmɔ gbɛjianɔtoo ni da waa he kaa-kɛ-kwɛmɔ mli ni amɛleee.” Ni kɛlɛ, kooloo ni ji ejwɛ lɛ baada lolo.
AKOLONTO BIBIOO KO NÁ EKROKOMƐI LƐ ANƆ HEWALƐ
20. Mɛni ŋwɛibɔfo lɛ wie yɛ akolonto bibioo ko ni kwɛ̃ kɛjɛ kooloo ni ji ejwɛ lɛ yitso he lɛ he?
20 Daniel kɛɛ: “Mihiɛ akolontoi lɛ akwɛmɔ, ni naa, akolonto kroko ni ji bibioo baje kpo yɛ amɛteŋ, ni klɛŋklɛŋ akolontoi lɛ ateŋ etɛ famɔ yɛ ehiɛ.” (Daniel 7:8) Yɛ nɔ ni fã kpo nɛɛ he lɛ, ŋwɛibɔfo lɛ kɛɛ Daniel akɛ: “Ni mɔ kroko aaate shi yɛ [maŋtsɛmɛi etɛ lɛ] asɛɛ, ni aaasoro lɛ kɛ klɛŋklɛŋbii lɛ, ni eeeba maŋtsɛmɛi etɛ shi.” (Daniel 7:24) Namɔ ji nɛkɛ maŋtsɛ nɛɛ, mɛɛ be mli ete shi, ni mɛɛ maŋtsɛmɛi etɛ eba amɛ shi lɛ?
21. Te fee tɛŋŋ ni Britania batsɔ mfonirifeemɔŋ kooloo ni ji ejwɛ lɛ akolonto bibioo lɛ?
21 Susumɔ nibii ni tee nɔ nɛɛ ahe. Afi 55 D.Ŋ.B. lɛ mli ni Roma Tatsɛ Julius Caesar yatutua Britania shi enyɛɛɛ eto shihemɔhe ni hiɔ shi daa yɛ jɛmɛ. Afi 43 Ŋ.B. lɛ mli ni Maŋtsɛ Claudius je shishi akɛ eeeye Britania wuoyigbɛ lɛ nɔ kwraa agbɛnɛ. Kɛkɛ ni yɛ afi 122 Ŋ.B. lɛ, Maŋtsɛ Hadrian je shishi akɛ eetswa gbogbo ko kɛjɛ Tyne Faa lɛ naa kɛtee Solway Firth (he ni eboteɔ ŋshɔ mli yɛ lɛ), ni ekɛkadi Roma Maŋtsɛyeli lɛ kooyigbɛ husu. Afii ohai enumɔ lɛ shishijee gbɛ ni Roma asraafoi lɛ shi ŋshɔkpɔ lɛ nɔ. Yinɔsaneŋmalɔ ko tsɔɔ mli akɛ: “Ŋleshi Ablotsiri fee hewalɛ ni he waaa tsɔ̃ yɛ afii ohai nyɔŋma kɛ ekpaa lɛ mli. Eninámɔ faaa tsɔ kɛ akɛto Netherlands nɔ̃ he. Emli gbɔmɛi lɛ ayifalɛ shɛɛɛ France nɔ̃. Esraafoi (ni ŋshɔ hiɛ lɛji ni eyɔɔ lɛ fata he lɛ) shɛɛɛ Spania nɔ̃ lɛ.” Eyɛ faŋŋ akɛ no mli lɛ Britania ji maŋtsɛyeli ko ni abuuu lɛ, ni lɛ efeɔ kooloo ni ji ejwɛ lɛ akolonto bibioo lɛ he mfoniri. Shi kɛlɛ, enɛ baatsake.
22. (a) Mɛɛ kooloo ni ji ejwɛ lɛ akolontoi krokomɛi etɛ akolonto “bibioo” lɛ ye nɔ kunim? (b) Kɛkɛ ni Britania baje kpo akɛ mɛni?
22 Philip II ni jɛ Spania kɛ Spania Ŋshɔ Hiɛ Tawuu Lɛji Babaoo batutua Britania yɛ afi 1588. Britania ŋshɔ hiɛ tawuu lɛji lɛ ye ŋshɔ hiɛ tawuu lɛji 130 nɛɛ ni hii fe 24,000 yɔɔ mli ni tsɔ̃ Ŋleshi Ŋshɔnine lɛ mli lɛ anɔ kunim, ni kɔɔyɔi kɛ Atlantik ahum ni naa wa waa ni amɛkpaaa gbɛ lɛ fee amɛ butuu. Yinɔsaneŋmalɔ ko kɛɛ akɛ, nɔ ni ba nɛɛ “kadi ŋshɔ hiɛ tawuu lɛji ahewalɛ ni je Spania dɛŋ kɛbaje Ŋleshi Ablotsiri dɛŋ.” Yɛ afii ohai 17 lɛ mli lɛ, Dutchbii baná jarayeli lɛji ni fa fe fɛɛ yɛ je lɛŋ. Shi, akɛni emaŋsɛɛ nɔyelihei miifa hewɔ lɛ, Britania ye nakai maŋtsɛyeli lɛ nɔ. Yɛ afii ohai 18 lɛ mli lɛ, Britania kɛ French kɛ amɛhe wuu ta yɛ Amerika Kooyigbɛ kɛ India, ni nɔ ni jɛ mli ba ji Paris Yelikɛfuamɔ ni amɛfee yɛ afi 1763 mli. Niŋmalɔ William B. Willcox kɛɛ akɛ, nɛkɛ yelikɛfuamɔ nɛɛ “yɔse Britania gbɛhe hee akɛ Europa hewalɛ titri ni yɔɔ jeŋ ni yɔɔ Europa sɛɛ lɛ mli.” Ama hewalɛ ni Britania ená lɛ nɔ mi kɛtsɔ Napoléon ni jɛ France lɛ nɔ kunim ni eye kɛmɔ shi yɛ afi 1815 Ŋ.B. lɛ mli lɛ nɔ. No hewɔ lɛ, “maŋtsɛmɛi etɛ” ni Britania ‘ba amɛ shi’ lɛ ji Spania, Netherlands, kɛ France. (Daniel 7:24) Nɔ ni jɛ mli ba ji akɛ, Britania baje kpo akɛ maŋsɛɛ maŋ ni yɔɔ nɔyelihei kɛ jarayeli hewalɛ ni da fe fɛɛ yɛ je lɛ mli. Hɛɛ, akolonto “bibioo” lɛ da ni ebatsɔ jeŋ hewalɛ!
23. Mɛɛ gbɛ nɔ mfonirifeemɔŋ akolonto bibioo lɛ “ye shikpɔŋ muu lɛ fɛɛ” nɔ yɛ?
23 Ŋwɛibɔfo lɛ kɛɛ Daniel akɛ kooloo ni ji ejwɛ lɛ, loo maŋtsɛyeli ni ji ejwɛ lɛ “eeeye shikpɔŋ muu lɛ fɛɛ.” (Daniel 7:23) Enɛ bafee anɔkwale yɛ Roma nɔyelihe ni be ko lɛ ale lɛ akɛ Britania lɛ he. Yɛ naagbee lɛ ebatsɔ Britania Maŋtsɛyeli lɛ, ni ‘eye shikpɔŋ lɛ fɛɛ.’ Be ko lɛ, nɛkɛ maŋtsɛyeli nɛɛ dalɛ shɛɔ shikpɔŋ lɛ fɛɛ mlijaa ejwɛ mli ekome, kɛ emli bii lɛ ayifalɛ mlijaa ejwɛ mli ekome.
24. Mɛni yinɔsaneŋmalɔ ko wie yɛ srɔto ni Britania Maŋtsɛyeli lɛ ji lɛ he?
24 Taakɛ Roma Maŋtsɛyeli lɛ yɔɔ srɔto yɛ tsutsu jeŋ hewalɛi lɛ ahe lɛ, maŋtsɛ ni akolonto “bibioo” lɛ fee ehe mfoniri lɛ hu baafee mɔ ni “aaasoro lɛ kɛ klɛŋklɛŋbii lɛ.” (Daniel 7:24) Yinɔsaneŋmalɔ H. G. Wells wie yɛ Britania Maŋtsɛyeli lɛ he akɛ: “Nɔ̃ ko ni tamɔ nakai ehiko shi dã. Klɛŋklɛŋ nii kɛ nɔ ni he hiaa gbɛjianɔtoo muu lɛ fɛɛ ji Britania Nɔyelii ni Efee Ekome lɛ ‘maŋtsɛ’ ni yeɔ nɔ lɛ. . . . Maŋnɔkwɛmɔ gbɛjianɔtoo kome bɛ, ni gbɔmɔ kome ko bɛ ni enu jwɛŋmɔ ni yɔɔ Britania Maŋtsɛyeli muu lɛ fɛɛ sɛɛ lɛ shishi. Eji nibii ni efutu ni dara kɛ nibii ni ábua naa ni soro no kwraa yɛ nɔ fɛɛ nɔ ni átsɛ lɛ pɛŋ akɛ maŋtsɛyeli lɛ he.”
25. (a) Mɛni feɔ mfonirifeemɔŋ akolonto bibioo lɛ, yɛ bɔ ni eda eha yɛ sɛɛ mli lɛ? (b) Akolonto “bibioo” lɛ yɛ “hiŋmɛii” “tamɔ gbɔmɔ hiŋmɛii kɛ naabu ni wieɔ nibii wuji” yɛ mɛɛ shishinumɔ naa?
25 Saji babaoo yɛ ni kɔɔ akolonto “bibioo” lɛ he fe Britania Maŋtsɛyeli lɛ kɛkɛ. Britania kpɛlɛ enɔyelihei 13 ni yɔɔ Amerika ni ye amɛhe lɛ nɔ yɛ afi 1783. Yɛ naagbee lɛ, United States of America, batsɔ Britania hefatalɔ, ni efa kpo kɛjɛ Jeŋ Ta II mli akɛ shikpɔŋ nɔ maŋ ni he wa titri. Ekɛ Britania yɛ tsakpaa ni mli wa lolo. Anglo Amerika jeŋ hewalɛ ni bɔ he enyɔ ni jɛ mli ba lɛ feɔ ‘akolonto ni yɔɔ hiŋmɛii’ lɛ. Yɛ anɔkwale mli lɛ, jeŋ hewalɛ nɛɛ kwɛɔ nii jogbaŋŋ, ele ŋaa! ‘Ewieɔ nibii wuji,’ ni etsɔɔ nɔ ni esa akɛ je lɛ mli mɛi ni fa afee ni efeɔ je lɛ naawielɔ, loo “apasa gbalɔ.”—Daniel 7:8, 11, 20; Kpojiemɔ 16:13; 19:20.
AKOLONTO BIBIOO LƐ TEƆ SHI EWOƆ NYƆŊMƆ KƐ EMƐI KRƆŊKRƆŊI LƐ
26. Mɛni ŋwɛibɔfo lɛ gba yɛ mfonirifeemɔŋ akolonto lɛ wiemɔ kɛ enifeemɔ yɛ Yehowa kɛ etsuji ahe lɛ he?
26 Daniel tee nɔ etsɔɔ eninaa lɛ mli akɛ: “Mihiɛ kwɛmɔ nɔŋŋ, ni nakai akolonto lɛ nɔŋŋ kɛ mɛi krɔŋkrɔŋi lɛ wuu, ni eye amɛnɔ.” (Daniel 7:21) Nyɔŋmɔ ŋwɛibɔfo lɛ gba yɛ nɛkɛ “akolonto” loo maŋtsɛ nɛɛ he akɛ: “Ni eeewie wiemɔi eshi mɔ ni yɔɔ ŋwɛi shɔŋŋ lɛ, ni eeehao mɔ ni yɔɔ ŋwɛi shɔŋŋ lɛ mɛi krɔŋkrɔŋi lɛ, ni eeeto eyiŋ akɛ eeetsake bei lɛ kɛ mla lɛ, ni aaatu amɛ awo edɛŋ kɛyashi be kɛ bei kɛ be mlijaa.” (Daniel 7:25) Mɛɛ gbɛ nɔ, ni mɛɛ be gbalɛ lɛ fã nɛɛ ba mli?
27. (a) Namɛi ji “mɛi krɔŋkrɔŋi” lɛ ni akolonto “bibioo” lɛ wa amɛyi lɛ? (b) Mfonirifeemɔŋ akolonto lɛ to eyiŋ akɛ “eeetsake bei kɛ mla lɛ” yɛ mɛɛ gbɛ nɔ?
27 “Mɛi krɔŋkrɔŋi” ni akolonto “bibioo”—Anglo Amerika Jeŋ Hewalɛ lɛ wa amɛyi lɛ—ji Yesu sɛɛnyiɛlɔi ni yɔɔ shikpɔŋ nɔ ni akɛ mumɔ efɔ amɛ mu lɛ. (Romabii 1:7; 1 Petro 2:9) Mɛi ni afɔ amɛ mu nɛɛ ateŋ shwɛɛnii lɛ bɔ kɔkɔ afii babaoo dani Jeŋ Ta I ba akɛ “jeŋmaji abe lɛ” baaba naagbee yɛ afi 1914. (Luka 21:24) Beni ta fɛ yɛ nakai afi lɛ mli lɛ, efee faŋŋ akɛ akolonto “bibioo” lɛ eku ehiɛ eshwie kɔkɔbɔɔ nɛɛ nɔ, ejaakɛ etee nɔ ehao “mɛi krɔŋkrɔŋi” ni afɔ amɛ mu lɛ. Anglo Amerika Jeŋ Hewalɛ lɛ te shi wo mɔdɛŋ ni amɛbɔɔ koni amɛtsu Yehowa taomɔ nii (loo, “mla”) akɛ edasefoi lɛ ashiɛ Maŋtsɛyeli lɛ he sanekpakpa lɛ yɛ jeŋ fɛɛ lɛ po. (Mateo 24:14) No hewɔ lɛ akolonto “bibioo” lɛ bɔ mɔdɛŋ akɛ “eeetsake bei kɛ mla lɛ.”
28. Mɛni ji “be kɛ bei kɛ be mlijaa” lɛ sɛɛkɛlɛ?
28 Yehowa bɔfo lɛ wie gbalɛ be ko ni ji “be kɛ bei kɛ be mlijaa” he. Te esɛɛ kɛlɛ yɔɔ tɛŋŋ? Mɛi ni wieɔ Biblia mli saji ahe lɛ kpɛlɛɔ nɔ akɛ wiemɔ nɛɛ tsɔɔ bei etɛ kɛ fã—be kome, bei enyɔ, kɛ be fã ni abua naa. Akɛni Nebukadnezar sɛkɛyeli “bei kpawo” lɛ feɔ afii kpawo hewɔ lɛ, bei etɛ kɛ fã lɛ ji afii etɛ kɛ fã.c (Daniel 4:16, 25) An American Translation lɛ kaneɔ akɛ: “Akɛ amɛ baawo edɛŋ afi, afii enyɔ, kɛ afi fã.” James Moffatt shishitsɔɔmɔ lɛ kɛɔ akɛ: “Kɛha afii etɛ kɛ afi fã.” Atsiɔ nakai be falɛ lɛ nɔŋŋ tã yɛ Kpojiemɔ 11:2-7, ni kɛɔ akɛ Nyɔŋmɔ odasefoi lɛ baashiɛ yɛ kpekpe mli nyɔji 42, loo gbii 1,260, ni no sɛɛ lɛ abaagbe amɛ. Mɛɛ be nɛkɛ be nɛɛ je shishi ni eba naagbee?
29. Mɛɛ be ni yɛ mɛɛ gbɛ nɔ gbalɛ afii etɛ kɛ fã lɛ je shishi?
29 Kɛha Kristofoi ni afɔ amɛ mu lɛ, Jeŋ Ta I bafee kaa be. Beni afi 1914 baa naagbee lɛ, no mli lɛ amɛmiikpa yiwaa gbɛ. Yɛ anɔkwale mli lɛ, afi ŋmalɛ ni ahala kɛha afi 1915 ji sane ni Yesu bi ekaselɔi lɛ, “Ani nyɛaanyɛ kpulu ni mibanu lɛ nyɛnu?” Edamɔ Mateo 20:22 nɔ. No hewɔ lɛ, kɛjɛ December 1914 kɛyaa lɛ, nakai odasefoi akuu bibioo lɛ shiɛ yɛ “kpekpe” mli.
30. Yɛ mɛɛ gbɛ nɔ Anglo Amerika Jeŋ Hewalɛ lɛ hao Kristofoi ni afɔ amɛ mu lɛ yɛ Jeŋ Ta I be lɛ mli?
30 Beni ta lɛ mli bawo wu lɛ, Kristofoi ni afɔ amɛ mu lɛ kɛ shitee-kɛ-woo ni fa kpe. Awo amɛteŋ mɛi komɛi atsuŋ. Nɔyelɔi yiwalɔi fee aŋkroaŋkroi tamɔ Frank Platt ni yɔɔ Ŋleshi Ablotsiri lɛ kɛ Robert Clegg ni yɔɔ Canada lɛ niseniianii ni ehiii kwraa. Yɛ February 12, 1918 lɛ, Ŋleshi Nɔyelihe ni yɔɔ Canada lɛ gu Studies in the Scriptures wolo lɛ ni egbɛi ji The Finished Mystery lɛ kpo ni ji kpawo ni aŋma lɛ ehee lɛ, kɛ dɛhiɛmɔ woji ni ji The Bible Students Monthly lɛ. Enɔ nyɔɔŋ ni nyiɛ sɛɛ lɛ nɔ lɛ, U.S. Department of Justice (U.S. Nitsumɔhe ni Kwɛɔ Kojomɔ Saji Anɔ) lɛ jaje akɛ mla eŋmɛɛɛ wolo lɛ kpo ni ji kpawo lɛ jaa gbɛ. Mɛni jɛ mli ba? Atao shiai amli fitsofitso, ahe woji yɛ mɛi adɛŋ, ni amɔmɔ Yehowa jálɔi!
31. Mɛɛ be ni yɛ mɛɛ gbɛ nɔ “be kɛ bei kɛ be mlijaa” lɛ ba naagbee yɛ?
31 Mɛi ni Nyɔŋmɔ efɔ amɛ mu ni ahaoɔ amɛ lɛ yashɛ he ni naa wa fe fɛɛ yɛ June 21, 1918, beni adamɔ apasa naafolɔmɔ wiemɔi anɔ awo sɛinɔtalɔ, J. F. Rutherford, kɛ Buu Mɔɔ Biblia kɛ Woji Bibii Asafo lɛ mli onukpai lɛ atsuŋ be kakadaŋŋ lɛ. Akɛni akolonto “bibioo” lɛ miibɔ mɔdɛŋ ni “etsake bei lɛ kɛ mla lɛ” hewɔ lɛ, egbe shiɛmɔ nitsumɔ ni ato he gbɛjianɔ lɛ kɛmɔ shi lɛ. (Kpojiemɔ 11:7) No hewɔ lɛ, “be kɛ bei kɛ be mlijaa” ni agba afɔ̃ shi lɛ ba naagbee yɛ June 1918.
32. Mɛni hewɔ obaakɛɛ akɛ akolonto “bibioo” lɛ nyɛɛɛ akpata “mɛi krɔŋkrɔŋi” lɛ ahiɛ lɛ?
32 Shi haomɔ ni akolonto “bibioo” lɛ kɛba lɛ kpataaa “mɛi krɔŋkrɔŋi” lɛ ahiɛ. Taakɛ agba afɔ̃ shi yɛ Kpojiemɔ wolo lɛ mli lɛ, beni amɛhi shi akɛ mɛi ni tsuuu nɔ ko lɛ sɛɛ fioo lɛ, Kristofoi ni afɔ amɛ mu lɛ ba wala mli ni amɛbɔi nitsumɔ ekoŋŋ. (Kpojiemɔ 11:11-13) Ajie Buu Mɔɔ Biblia kɛ Woji Bibii Asafo lɛ sɛinɔtalɔ lɛ kɛ ehefatalɔi lɛ kɛjɛ tsuŋwoo lɛ mli yɛ March 26, 1919, ni aŋmɛɛ amɛhe kwraa yɛ sɛɛ mli akɛ amɛyeee apasa naafolɔmɔi ni akɛshi amɛ lɛ eko mli fɔ. No sɛɛ nɔŋŋ ni shwɛɛnii ni afɔ amɛ mu lɛ je shishi akɛ amɛaato gbɛjianɔ kɛha nitsumɔ lɛ nɔtsamɔ. Shi kɛlɛ, mɛni yɔɔ ni mɛɔ akolonto “bibioo” lɛ?
MƆ NI EYE GBII PII LƐ TA SHI KƐHA KOJOMƆ
33. (a) Namɔ ji Mɔ ni Eye Gbii Pii lɛ? (b) Mɛni ji ‘woji ni agbele naa’ yɛ ŋwɛi Gwabɔɔ lɛ mli?
33 Beni étsɔɔ mɛi ni kooloi ejwɛ lɛ ji lɛ sɛɛ lɛ, Daniel jie ehiɛ kɛjɛ kooloo ni ji ejwɛ lɛ nɔ kɛtee nɔ ko ni yaa nɔ yɛ ŋwɛi lɛ nɔ. Ena ni Mɔ ni Eye Gbii Pii lɛ ta shi yɛ emaŋtsɛsɛi ni kpɛ́lɛɔ kaŋkaŋ fɛfɛo lɛ nɔ akɛ Kojolɔ. Mɔ ni Eye Gbii Pii lɛ jeee mɔ ko mɔ ko akɛ ja Yehowa Nyɔŋmɔ. (Lala 90:2) Beni ŋwɛi Gwabɔɔ lɛ taraa shi lɛ, Daniel na ni ‘aagbele woji anaa.’ (Daniel 7:9, 10) Akɛni Yehowa ehi shi kɛjɛ naanɔi ni aleee hewɔ lɛ, ele adesai ayinɔsane fɛɛ tamɔ nɔ ni áŋma yɛ wolo mli. Ena kooloi ejwɛ lɛ fɛɛ ni ebaanyɛ ekojo amɛ yɛ nɔ ni ele diɛŋtsɛ yɛ amɛhe lɛ naa.
34, 35. Mɛni baaba akolonto “bibioo” lɛ kɛ hewalɛi krokomɛi ni tamɔ kooloi lɛ anɔ?
34 Daniel tee nɔ akɛ: “Agbɛnɛ mihiɛ kwɛmɔ yɛ wiemɔi wuji ni akolonto lɛ wieɔ lɛ gbee lɛ hewɔ; mihiɛ kwɛmɔ aahu kɛyashi beyinɔ ni agbe kooloo lɛ, ni afite egbonyo lɛ, ni ashɛ afɔ la mli ni eshã. Ni ashɔ̃ kooloi ni shwɛ lɛ hu ahewalɛ yɛ amɛdɛŋ, ni ato amɛ be kɛ ŋmlɛtswaa ni amɛwala sɛɛ atsɛ kɛyashi.” (Daniel 7:11, 12) Ŋwɛibɔfo lɛ kɛɛ Daniel akɛ: “Shi kojolɔi lɛ aaatara shi, ni aaashɔ nɔyeli lɛ yɛ edɛŋ, ni aaafite lɛ ni aaakpata ehiɛ kɛyashi naagbee.”—Daniel 7:26.
35 Yɛ akpɔ ni Kojolɔ Kpeteŋkpele, Yehowa Nyɔŋmɔ ewo lɛ naa lɛ, nɔ ni ba Roma Maŋtsɛyeli lɛ ni wa mra be mli Kristofoi lɛ ayi lɛ nɔ lɛ nɔŋŋ eko baaba akolonto lɛ ni wie musubɔɔ wiemɔi eshi Nyɔŋmɔ ni ehao ‘emɛi krɔŋkrɔŋi’ lɛ nɔ. Enɔyeli lɛ eyaŋ nɔ. Ni nakai eji kɛha akolontoi ni ji “maŋtsɛmɛi” ni he waaa ni jɛ Roma Maŋtsɛyeli lɛ mli ba lɛ hu. Shi, nɔyelii ni aná kɛjɛ tsutsu hewalɛi ni tamɔ kooloi lɛ adɛŋ lɛ hu? Taakɛ agba afɔ̃ shi lɛ, akpã amɛwala be mli kɛha “be kɛ ŋmlɛtswaa.” Gbɔmɛi etee nɔ amɛhi amɛ shikpɔŋkukuji lɛ amli kɛbashi wɔgbii nɛɛ amli. Ákɛ nɔkwɛmɔnɔ lɛ, Iraq ji mɔ ni yeɔ blema Babilon shikpɔŋ lɛ nɔ. Persia (Iran) kɛ Hela yɛ lolo. Nɛkɛ jeŋ hewalɛi nɛɛ fãi ni eshwɛ lɛ fata Jeŋmaji Ekomefeemɔ lɛ he. Nɛkɛ maŋtsɛyelii nɛɛ hu baalaaje kɛtsɔ naagbee jeŋ hewalɛ lɛ hiɛkpatamɔ nɔ. Abaatsumɔ adesa nɔyelii fɛɛ yɛ “Nyɔŋmɔ Ofe lɛ gbi wulu lɛ nɔ ta lɛ” mli. (Kpojiemɔ 16:14, 16) Shi no sɛɛ lɛ, namɔ baaye je lɛ nɔ?
NAANƆ NƆYELI KÃ WƆHIƐ NƆŊŊ!
36, 37. (a) “Mɔ ko tamɔ gbɔmɔ bi” lɛ kɔɔ namɔ he, ni mɛɛ be ni mɛɛ yiŋtoo hewɔ epue yɛ ŋwɛi Gwabɔɔ lɛ mli lɛ? (b) Mɛni ato ama shi yɛ afi 1914 Ŋ.B.?
36 Daniel kɛɛ akɛ: “Misaa mina yɛ nyɔɔŋ ninaa lɛ mli, ni naa, mɔ ko tamɔ gbɔmɔ bi kɛ ŋwɛi atatui miiba, ni eba mɔ ni eye gbii pii lɛ ŋɔɔ, ni akɛ lɛ ba ehiɛ.” (Daniel 7:13) Beni Yesu Kristo yɔɔ shikpɔŋ nɔ lɛ, etsɛ ehe “gbɔmɔ bi” ni ekɛtsɔɔ wekukpaa ni kã ekɛ adesai ateŋ. (Mateo 16:13; 25:31) Yesu kɛɛ Akuashɔŋ lɛ loo Yudafoi akojomɔhe wulu lɛ akɛ: “Nyɛaana gbɔmɔ bi lɛ akɛ eta hewalɛ ninejurɔ nɔ, ni eeba yɛ ŋwɛi atatui lɛ amli.” (Mateo 26:64) No hewɔ lɛ, mɔ ni baa yɛ Daniel ninaa lɛ mli ni gbɔmɔ hiŋmɛi enaaa lɛ, ni akɛ lɛ ba Yehowa Nyɔŋmɔ hiɛ lɛ ji Yesu Kristo ni atee lɛ shi, ni áwo ehiɛ nyam lɛ. Mɛɛ be enɛ ba mli?
37 Nyɔŋmɔ kɛ Yesu Kristo efee kpaŋmɔ kɛha Maŋtsɛyeli, tamɔ bɔ ni ekɛ Maŋtsɛ David fee eko lɛ. (2 Samuel 7:11-16; Luka 22:28-30) Beni “jeŋmaji abe” lɛ ba naagbee yɛ afi 1914 Ŋ.B. lɛ, Yesu Kristo, ákɛ David gboshiniyelɔ odehe lɛ, nine baanyɛ ashɛ Maŋtsɛyeli nɔyeli nɔ yɛ gbɛ ni ja nɔ. Daniel gbalɛ niŋmaa lɛ kaneɔ akɛ: “Aha lɛ nɔyeli kɛ anunyam kɛ maŋtsɛyeli, koni majimaji kɛ asafoi kɛ wiemɔi lɛ fɛɛ asɔmɔ lɛ, enɔyeli lɛ naanɔ nɔyeli ni hoŋ eyaŋ ni, ni emaŋtsɛyeli lɛ nɔ ni fiteŋ ni.” (Daniel 7:14) No hewɔ lɛ, ato Mesia Maŋtsɛyeli lɛ ama shi yɛ ŋwɛi yɛ afi 1914. Shi, akɛ nɔyeli lɛ haa mɛi krokomɛi hu.
38, 39. Namɛi anine baashɛ naanɔ nɔyeli nɔ yɛ je lɛ nɔ lɛ?
38 Ŋwɛibɔfo lɛ kɛɛ akɛ: “Mɔ ni yɔɔ ŋwɛi shɔŋŋ lɛ mɛi krɔŋkrɔŋi lɛ anine aaashɛ maŋtsɛyeli lɛ nɔ.” (Daniel 7:18, 22, 27) Yesu Kristo ji mɔ titri yɛ mɛi krɔŋkrɔŋi lɛ ateŋ. (Bɔfoi lɛ Asaji 3:14; 4:27, 30) “Mɛi krɔŋkrɔŋi” krokomɛi ni náa gbɛfaŋnɔ yɛ nɔyeli lɛ mli lɛ ji Kristofoi anɔkwafoi mɛi 144,000 ni akɛ mumɔ efɔ amɛ mu, ni kɛ Kristo ji Maŋtsɛyeli gboshiniyelɔi lɛ. (Romabii 1:7; 8:17; 2 Tesalonikabii 1:5; 1 Petro 2:9) Ateeɔ amɛ shi kɛjɛɔ gbele mli akɛ mumɔi ni gbooo dɔŋŋ, koni amɛkɛ Kristo aye maŋtsɛ yɛ ŋwɛi Zion Gɔŋ lɛ nɔ. (Kpojiemɔ 2:10; 14:1; 20:6) No hewɔ lɛ, Kristo Yesu kɛ Kristofoi ni afɔ amɛ mu lɛ ni átee amɛ shi lɛ baaye adesai aje lɛ nɔ.
39 Nyɔŋmɔ ŋwɛibɔfo lɛ wie gbɔmɔ Bi lɛ kɛ “mɛi krɔŋkrɔŋi” krokomɛi ni átee amɛ shi lɛ anɔyeli lɛ he akɛ: “Maŋtsɛyeli lɛ kɛ nɔyeli lɛ kɛ maŋtsɛyelii ni yɔɔ ŋwɛi muu lɛ fɛɛ shishi lɛ amli hewalɛ lɛ aaaŋɔ ha mɔ ni yɔɔ ŋwɛi shɔŋŋ lɛ mɛi krɔŋkrɔŋi lɛ amaŋ lɛ. Emaŋtsɛyeli lɛ naanɔ maŋtsɛyeli ni, ni nɔyelii lɛ fɛɛ aaasɔmɔ lɛ, ni amɛaabo lɛ toi.” (Daniel 7:27) Mɛɛ jɔɔmɔi adesai ni feɔ toiboo lɛ anine baashɛ nɔ yɛ nakai Maŋtsɛyeli lɛ shishi nɛkɛ!
40. Mɛɛ gbɛ nɔ Daniel lamɔ kɛ ninaai lɛ ni wɔɔfee toiboo wɔha lɛ ahe aaaba sɛɛnamɔ aha wɔ yɛ?
40 Daniel leee ninaai ni Nyɔŋmɔ kɛha lɛ lɛ amlibaai fɛɛ ni yɔɔ naakpɛɛ lɛ ahe nɔ ko. Ekɛɛ akɛ: “Sane lɛ naagbee nɛ. Shi mi, Daniel lɛ, mijwɛŋmɔi hao mi naakpa, ni mihiɛ tsake, ni miŋɔ sane lɛ mito mitsuiŋ.” (Daniel 7:28) Shi wɔ lɛ, be ni wɔkɛaanu nɔ ni Daniel na lɛ mlibaa lɛ shishi lɛ mli wɔyɔɔ lɛ. Gbalɛ nɛɛ toi ni wɔɔbo lɛ baawaje wɔhemɔkɛyeli, ni ebaawo wɔhiɛnɔkamɔ akɛ Yehowa Mesia Maŋtsɛ lɛ baaye je lɛ nɔ lɛ mli hewalɛ.
[Shishigbɛ niŋmai]
a Bɔni afee ni emli afee faŋŋ ni wɔkwa emlitĩi lɛ, wɔkɛ kukuji ni anaa yɛ Daniel 7:15-28 lɛ mlitsɔɔmɔ baafata ninaai ni aŋma yɛ Daniel 7:1-14 lɛ kuku fɛɛ kuku mlitsɔɔmɔ he.
b Kwɛmɔ wolo nɛɛ Yitso 4 lɛ.
c Kwɛmɔ wolo nɛɛ Yitso 6 lɛ.
MƐNI OYƆSE?
• ‘Kooloi wuji ejwɛ ni fã kpo kɛjɛ ŋshɔ lɛ mli’ lɛ eko fɛɛ eko feɔ mɛni he mfoniri?
• Mɛni feɔ akolonto “bibioo” lɛ?
• Mfonirifeemɔŋ akolonto bibioo lɛ hao “mɛi krɔŋkrɔŋi” lɛ yɛ Jeŋ Ta I be lɛ mli yɛ mɛɛ gbɛ nɔ?
• Mɛni baaba mfonirifeemɔŋ akolonto bibioo lɛ kɛ hewalɛi krokomɛi ni tamɔ kooloi lɛ anɔ?
• Daniel lamɔ kɛ ninaai ni kɔɔ “kooloi wuji ejwɛ” lɛ ahe lɛ toi ni obo lɛ he eba sɛɛnamɔ kɛha bo yɛ mɛɛ gbɛ nɔ?
[Akrabatsa/Mfonirii ni yɔɔ baafa 149-152]
MAŊTSƐ NI ŊMƐƐƆ SAJI AHE
HELA niŋmalɔ ko ni hi shi yɛ afii ohai enumɔ D.Ŋ.B. lɛ mli lɛ kaiɔ lɛ akɛ mɔ ni ŋmɛɛɔ saji ahe kɛ maŋtsɛ kpakpa. Atsɛɔ lɛ yɛ Biblia lɛ mli akɛ, ‘mɔ ni Nyɔŋmɔ efɔ lɛ mu,’ kɛ “okropɔŋ ko” ni miiba “kɛmiijɛ maŋsɛɛ shɔŋŋ.” (Yesaia 45:1; 46:11) Maŋtsɛ ni awieɔ ehe nɛkɛ lɛ ji Koresh Kpeteŋkpele lɛ, ni jɛ Persia lɛ.
Hiɛ ni Koresh tee ekɛyaná gbɛi lɛ je shishi aaafee afi 560 loo afi 559 D.Ŋ.B., beni ebaye etsɛ Cambyses I sɛɛ yɛ Anshan, ni ji blema Persia maŋtiase loo kpokpaa lɛ maŋtsɛsɛi lɛ nɔ lɛ. No mli lɛ Anshan yɛ Media Maŋtsɛ Astyages nɔyeli shishi. Akɛni etse atua eshi Media nɔyeli lɛ hewɔ lɛ, Koresh ye kunim ko yɛ oyaiyeli mli ejaakɛ Astyages asraafoi lɛ kpa yɛ esɛɛ kɛba Koresh ŋɔɔ. Kɛkɛ ni Mediabii lɛ ba amɛhe shi amɛha Koresh. Yɛ no sɛɛ lɛ, Mediabii lɛ kɛ Persiabii lɛ fee ekome yɛ tawuu mli yɛ ehiɛnyiɛmɔ shishi. Enɛ ha Media kɛ Persia nɔyeli ni yɛ be ni sa mli lɛ ekpã enɔyeli lɛ mli kɛjɛ Aegean Ŋshɔ lɛ naa kɛyashi Indus Faa lɛ naa lɛ ba shihilɛ mli.—Kwɛmɔ shikpɔŋ he mfoniri lɛ.
Koresh kɛ Mediabii kɛ Persiabii atai ni efee ekome lɛ tsu nii, klɛŋklɛŋ lɛ koni eye he ko ni haomɔ yɔɔ lɛ nɔ kunim—Media anaigbɛ yɛ he ni Lydia Maŋtsɛ Croesus lɛɛɔ enɔyeli lɛ mli yɛ kɛyaa Media shikpɔŋkuku mli lɛ. Koresh fã kɛtee Lydia Maŋtsɛyeli lɛ bokagbɛ husu lɛ naa yɛ Asia Bibioo lɛ, ni eye Croesus nɔ kunim ni eshɔ̃ emaŋtiase, Sardis, kɛjɛ edɛŋ. Kɛkɛ ni Koresh ba Ionia maŋtiasei lɛ ashi ni ekɛ Asia Bibioo lɛ fɛɛ fata Media kɛ Persia Maŋtsɛyeli lɛ nɔyeli he. No hewɔ lɛ, ebatsɔ Babilon kɛ emaŋtsɛ, Nabonido henyɛlɔ titri.
Kɛkɛ ni Koresh saa ehe koni ekɛ Babilon ni he wa lɛ awuu ta. Ni kɛjɛ nɛkɛ be nɛɛ mli kɛyaa lɛ, ebaje kpo yɛ Biblia gbalɛ mlibaa mli. Yehowa tsɔ hiɛ etsɔ gbalɔ Yesaia nɔ ekɛ nɔ ni miihe ashɛ afii ohai enyɔ tsĩ Koresh tã akɛ nɔyelɔ ni baabutu Babilon ni eha Yudafoi lɛ aye amɛhe kɛjɛ nyɔŋyeli mli. Nɛkɛ halamɔ ni atsɔ hiɛ afee nɛɛ hewɔ ni Ŋmalɛi lɛ tsɛɔ Koresh akɛ ‘mɔ ni Yehowa efɔ lɛ mu’ lɛ.—Yesaia 44:26-28.
Beni Koresh batutua Babilon yɛ afi 539 D.Ŋ.B. lɛ, ekɛ nitsumɔ ko ni wa waa kpe. Akɛni gbogboi wuji kɛ jɔɔ kpeteŋkpele ni Eufrate Faa lɛ tsɔɔ mli lɛ ebɔle he hewɔ lɛ, maŋtiase lɛ tamɔ nɔ ni anyɛŋ abote mli. He ni Eufrate lɛ hoɔ kɛtsɔɔ Babilon hu lɛ, atswa gbogbo agbo ko ni tamɔ gɔŋ kɛ amɛnaa akɔɔble agbói wuji yɛ faa lɛ naabui. Te aaafee tɛŋŋ ni Koresh aaanyɛ aye Babilon nɔ kunim?
Yehowa etsɔ hiɛ fe afii oha egba akɛ “klante aaaba enui lɛ anɔ,” ni ékɛɛ akɛ “amɛaamii!” (Yeremia 50:38) Gbalɛ lɛ ba mli anɔkwale, Koresh gbá gbɛ kroko kɛha Eufrate Faa lɛ mli nui lɛ, kilomitai fioo yɛ Babilon kooyigbɛ. Kɛkɛ ni esraafoi lɛ tsɔ̃ faa lɛ ŋmɔtɔ lɛ mli, ni amɛkwɔ shikpelekemɔ ni yaa gbogbo lɛ he lɛ, ni amɛbote maŋ lɛ mli yɛ gbɛ ni waaa nɔ ejaakɛ áshi akɔɔble agbói lɛ anaa afɔ̃ shi. Taakɛ “okropɔŋ” ni kɛ oyaiyeli fãa kɛbaa eloo nɔ lɛ ji lɛ, nɛkɛ nɔyelɔ ni jɛ ‘hulu shiteehe’—yɛ bokagbɛ nɛɛ—ye Babilon nɔ kunim yɛ gbɛkɛ kome pɛ mli!
Kɛha Yudafoi ni yɔɔ Babilon lɛ, Koresh kunimyeli lɛ tsɔɔ akɛ be kakadaŋŋ ni amɛkɛmɛ amɛkpɔmɔ kɛmiijɛ nomŋɔɔ mli lɛ kɛ amɛmaŋ shikpɔŋ ni ekã shi amaŋfɔ afii 70 lɛ naagbee eba. Kwɛ miishɛɛ ni amɛbaaná beni Koresh wo akpɔ ni kɛ hegbɛ miiha amɛ ni amɛku amɛsɛɛ amɛya Yerusalem ni amɛyama sɔlemɔtsu lɛ ekoŋŋ lɛ! Koresh ku sɛɛ ekɛ sɔlemɔwe lɛ nibii ni jara wa waa ni Nebukadnezar loo kɛtee Babilon lɛ ha amɛ ekoŋŋ, ni ekɛ maŋtsɛ fãmɔ ha akɛ aha amɛ tsei kɛjɛ Lebanon, ni efã ni akɛ shika ni jɛ maŋtsɛ lɛ we lɛ aha amɛ ni amɛkɛwo emaa lɛ he nyɔmɔ.—Ezra 1:1-11; 6:3-5.
Koresh jie mlihilɛ kɛ saji ahe ŋmɛɛmɔ su kpo yɛ bɔ ni ekɛ gbɔmɛi ni eye amɛnɔ kunim lɛ ye ha lɛ mli. Yiŋtoo kome ni ha ejie su ni tamɔ nɛkɛ kpo lɛ baanyɛ afee ejamɔ hewɔ. Eeenyɛ eba akɛ, Koresh ye Persia gbalɔ Zoroaster tsɔɔmɔi anɔ ni ejá Ahura Mazda—nyɔŋmɔ ni asusuɔ akɛ lɛ ebɔ nɔ fɛɛ nɔ ni hi lɛ. Farhang Mehr ŋma yɛ ewolo The Zoroastrian Tradition lɛ mli akɛ: “Zoroaster kɛ Nyɔŋmɔ tsɔɔ akɛ mɔ ni yeɔ emuu yɛ jeŋba mli. Ekɛɛ mɛi akɛ Ahura Mazda jeee mɔ ni tɔɔ owele shi eja, ni yɛ enɛ hewɔ lɛ, esaaa akɛ asheɔ lɛ gbeyei shi esa akɛ asumɔ lɛ.” Ekolɛ hemɔkɛyeli ni ayɔɔ yɛ nyɔŋmɔ ko ni yɔɔ jeŋba kpakpa ni ja mli lɛ baanyɛ aná Koresh jeŋba mli sui anɔ hewalɛ, ni ewo lɛ hewalɛ yɛ mlihilɛ kɛ sane ni ja ni ayeɔ he.
Shi maŋtsɛ lɛ nyɛɛɛ adamɔ kɔɔyɔŋ tsakemɔ ni yɔɔ Babilon lɛ naa tsɔ. Hulutsoo be ni dɔɔ klakla lɛ fee nɔ ni enyɛɛɛ naa edamɔ. No hewɔ lɛ, yɛ be mli ni Babilon tee nɔ ehi shi akɛ maŋtsɛyeli lɛ odehei amaŋtiase, kɛ agbɛnɛ jamɔ kɛ hiŋmɛigbelemɔ shikwɛ̃ɛhe lɛ, fɛ̃i be mli maŋtiase pɛ ebatsɔɔ kɛhaa lɛ. Yɛ anɔkwale mli lɛ, beni eye Babilon nɔ kunim lɛ sɛɛ lɛ, etsɛɛɛ ni Koresh ku esɛɛ kɛtee elatsaa be mli maŋtiase Ecbatana, ni yɔɔ Alwand Gɔŋ lɛ shishi ni ekwɔlɛ shɛɔ mitai 1,900 fe ŋshɔ hiɛ kwɔlɛ lɛ. Esumɔɔ fɛ̃i be ni kɛ latsaa be ni ŋɔɔ lɛ ŋmɛɔ pɛpɛɛpɛ lɛ waa. Agbɛnɛ hu Koresh ma maŋtsɛwe fɛfɛo ko yɛ etsutsu maŋtiase ni ji Pasargadae (yɛ Persepolis masɛi), aaafee kilomitai 650 yɛ Ecbatana wuoyi-bokagbɛ. Shihilɛhe nɛɛ mli eyajɔɔ ehe kpoo yɛ.
No hewɔ lɛ akaiɔ Koresh akɛ ekãalɔ kunimyelɔ kɛ maŋtsɛ ni ŋmɛɛɔ saji ahe. Enɔyeli ni ye afii 30 lɛ ba naagbee beni egbo yɛ afi 530 D.Ŋ.B. beni ekɛ ehe ewo etawuu he tafãa ko mli. Ebinuu Cambyses II baye esɛɛ akɛ Persia maŋtsɛ.
MƐNI OYƆSE?
• Te fee tɛŋŋ ni Koresh Persianyo lɛ jie ehe kpo akɛ ‘mɔ ni’ Yehowa ‘efɔ lɛ mu’?
• Mɛni ni sɛɛnamɔ yɔɔ he Koresh tsu kɛha Yehowa webii lɛ?
• Te Koresh kɛ gbɔmɛi ni eye amɛnɔ kunim lɛ ye ha tɛŋŋ?
[Shikpɔŋ he mfoniri]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
MEDIA KƐ PERSIA MAŊTSƐYELI
MAKEDONIA
Memphis
MIZRAIM
ETIOPIA
Yerusalem
Babilon
Ecbatana
Shushan
Persepolis
INDIA
[Mfoniri]
Koresh saŋ, yɛ Pasargadae
[Mfoniri]
“Bas-relief” yɛ Pasargadae, ni miitsɔɔ Koresh
[Akrabatsa/Mfonirii ni yɔɔ baafa 153-161]
MAŊTSƐ NI EDAKO YE JE LƐ NƆ KUNIM
AAAFEE afii 2,300 ni eho nɛ, ni tatsɛ ko kɛ eyiteŋ tsɔi yɛŋ ni eye kɛjɛ afii 20 kɛyaa damɔ Mediteranea Ŋshɔ lɛ naa. Ekɛ ehiŋmɛi ema ŋshɔkpɔ maŋtiase ko ni kɛ lɛ teŋ jɛkɛmɔ aaafee kilomita kome lɛ nɔ. Akɛni aŋmɛɛɛ lɛ gbɛ ni eba maŋ lɛ mli hewɔ lɛ, tatsɛ ni mli ewo la lɛ etswa efai shi akɛ ebaaye maŋtiase lɛ nɔ kunim. Mɛɛ gbɛ nɔ ebaatsɔ etutua maŋ lɛ? Ebaaloo sũ ewo nu lɛ mli ni ekɛfee gbɛ kɛya ŋshɔkpɔ lɛ nɔ, koni ebua etabilɔi lɛ anaa ni amɛyatutua maŋtiase lɛ. Gbɛ lɛ feemɔ eje shishi momo.
Shi shɛɛ sane ko ni jɛ Persia Maŋtsɛyeli lɛ nɔ maŋtsɛ kpeteŋkpele lɛ dɛŋ gbá tatsɛ ni edako lɛ naa. Akɛni eesumɔ ni toiŋjɔlɛ aba ekɛ lɛ teŋ hewɔ lɛ, Persia nɔyelɔ lɛ kɛ nikeenii ko ni ekaaa ha: shika ŋmiiŋmi talentai 10,000 (efe dɔlai akpekpei toi akpei enyɔ yɛ ŋmɛnɛŋmɛnɛ jara naa), maŋtsɛ lɛ kɛ ebiyei lɛ ateŋ mɔ kome baaha lɛ gbãla, ni ebaaye Persia Maŋtsɛyeli lɛ anaigbɛ lɛ fɛɛ nɔ. Akɛ enɛɛmɛi fɛɛ ha koni maŋtsɛ lɛ nine ashɛ eweku, ni tatsɛ lɛ emɔmɔ amɛ lɛ anɔ.
Tatsɛ ni yiŋkpɛɛ kã ehiɛ akɛ ekpɛlɛ loo ekpoo nihamɔ nɛɛ nɔ lɛ ji Alexander III ni jɛ Makedonia lɛ. Ani esa akɛ ekpɛlɛ nɔ ni akɛhaa lɛ nɔ? Yinɔsaneŋmalɔ Ulrich Wilcken kɛɛ akɛ: “Eji be kɛha yiŋkpɛɛ ni hiɛdɔɔ yɔɔ mli kɛha blema je lɛ. Yɛ anɔkwale mli lɛ, nɔ ni jɛ yiŋkpɛɛ nɛɛ mli ba yɛ sɛɛ mli lɛ foŋ kɛtsɔ Teŋgbɛ Afii lɛ amli aahu kɛbashi wɔ diɛŋtsɛ wɔgbii nɛɛ amli, yɛ Bokagbɛ taakɛ eji yɛ Anaigbɛ lɛ.” Dani wɔɔsusu Alexander hetoo lɛ he lɛ, nyɛhaa wɔkwɛa saji ni ha be ni he hiaa waa nɛɛ bashɛ lɛ amli.
AAFEE KUNIMYELƆ KO
Afɔ́ Alexander yɛ Pella, yɛ Makedonia, yɛ afi 356 D.Ŋ.B. Etsɛ ji Maŋtsɛ Philip II, ni enyɛ ji Olympias. Enyɛ tsɔɔ Alexander akɛ Makedonia maŋtsɛmɛi lɛ jɛ Hercules, Hela nyɔŋmɔ Deo binuu lɛ seshi mli. Bɔ ni Olympias tsɔɔ lɛ, Alexander blematsɛ ji Achilles, mɔ ni hé gbɛi yɛ Homer lalafoo wiemɔ ni atsɛɔ lɛ Iliad lɛ mli lɛ. Akɛni efɔlɔi kudɔ lɛ yɛ nɛkɛ gbɛ nɔ kɛha kunimyeli kɛ maŋtsɛyeli anunyam hewɔ lɛ, Alexander oblanyo fioo lɛ naaa nibii krokomɛi asɛɛdii ahe miishɛɛ tsɔ. Beni abi lɛ akɛ ani ekɛ ehe baawo foidamɔ mli yɛ Olympic Shwɛmɔi lɛ amli lo lɛ, Alexander tsɔɔ akɛ, kɛ́ ekɛ maŋtsɛmɛi baada foi lɛ, no lɛ ebaafee nakai. Ehiɛnyam taomɔ ji ni efee nibii wuji fe etsɛ nɔ̃ koni ehiɛ aba nyam kɛtsɔ nibii afeemɔ nɔ.
Hela jeŋ nilelɔ Aristotle tsɔɔ Alexander nii beni eye afii 13, ni eye ebua lɛ koni enyã jeŋ nilee, tsofafeemɔ, kɛ ŋaa nifeemɔi ahe. Naataomɔ yɛ he ni Aristotle jeŋ nilee he tsɔɔmɔi lɛ ná Alexander susumɔ nɔ hewalɛ kɛyashɛ lɛ he. Bertrand Russell, afii ohai 20 lɛ mli jeŋ nilelɔ lɛ kɛɛ akɛ: “Efeŋ ŋwanejee akɛ aaakɛɛ akɛ saji babaoo yɛ ni amɛkpãaa gbee yɛ he. Aristotle susumɔi yɛ maŋkwramɔ he lɛ damɔ Hela maŋtiase maji ni fɛɛ miiba shi lɛ anɔ.” Maŋtiase maji anɔyeli he jwɛŋmɔ lɛ esaŋ maŋtsɛ bi hiɛnyamtaolɔ ni miisumɔ ni etswa maŋtsɛyeli kpeteŋkpele ni yɔɔ he kome ema shi lɛ hiɛ. Alexander yiŋ feɔ lɛ kɔshikɔshi hu yɛ Aristotle tsɔɔmɔ ni haa abuɔ mɛi ni jeee Helabii akɛ nyɔji lɛ he, ejaakɛ nɔ ni efee he mfoniri yɛ ejwɛŋmɔ mli ji maŋtsɛyeli ni kunimyelɔi kɛ mɛi ni áye amɛnɔ kunim lɛ fɛɛ efee ekome kɛmiishwere yɛ mli.
Shi ajeee nikanemɔ kɛ nikasemɔ ni Aristotle tsɔɔ Alexander lɛ he ŋwane tsɔ. Alexander hi shi akɛ mɔ ni kaneɔ nii waa yɛ ewala be fɛɛ mli, ni esumɔɔ Homer niŋmaai lɛ waa. Akɛɔ akɛ ekase Iliad lɛ—lalafoo wiemɔ lɛ mli liamɔi 15,693 lɛ fɛɛ—ewo eyitsoŋ.
Tsɔsemɔ ni Aristotle kɛhaa lɛ lɛ ba naagbee trukaa yɛ afi 340 D.Ŋ.B., beni maŋtsɛ bi ni eye afii 16 lɛ ku esɛɛ kɛtee Pella koni eyaye maŋtsɛ yɛ Makedonia beni etsɛ bɛ lɛ. Ni mɔ ni baaye maŋtsɛ nɛɛ fiteee be ko kwraa ni ekɛjie ehe kpo akɛ mɔ ni he esa waa yɛ tawuu mli. Philip ná miishɛɛ waa beni ekɛ oyaiyeli ba Thracia weku Maedi ni tseɔ atua lɛ shi, ni ekɛ oyaiyeli ye amɛmaŋtiase lɛ nɔ kunim, ni etsake jɛmɛ gbɛi etsɛ lɛ Alexandroúpolis, ekɛwo lɛ diɛŋtsɛ ehe lɛ.
ETEE NƆ EYE KUNIM
Philip ni aju shi agbe lɛ trukaa yɛ afi 336 D.Ŋ.B. lɛ ha Alexander ni eye afii 20 lɛ bata Makedonia maŋtsɛsɛi lɛ nɔ. Ebote Asia yɛ Hellespont (atsɛɔ lɛ bianɛ akɛ Dardanelles) yɛ afi 334 D.Ŋ.B. agbiɛnaa be mli, kɛkɛ ni Alexander kɛ asraafoi akuu fioo ko ni he esa ni nyiɛ shikpɔŋ ni amɛyifalɛ shɛɔ mɛi 30,000 kɛ okpɔŋɔnɔtaralɔi 5,000 je kunimyeli tafãa ko shishi. Mɛi ni fata esraafoi lɛ ahe ji tsɔnei ahe nilelɔi, shikpɔŋ susulɔi, tsũmaa he ŋaalɔi, jeŋ nilelɔi, kɛ yinɔsaneŋmalɔi.
Alexander ye eklɛŋklɛŋ kunim yɛ Persiabii lɛ anɔ, yɛ Granicus Faa ni yɔɔ Asia Bibioo (ni eji Turkey bianɛ) lɛ kooyi-anaigbɛ fã lɛ naa. Eye Asia Bibioo lɛ anaigbɛ nɔ kunim yɛ nakai fɛ̃i be lɛ mli. Enɔ gbo be mli lɛ, tawuu ni ji enyɔ ni mli wa waa ni ekɛ Persiabii lɛ wuu lɛ tee nɔ yɛ Issus, yɛ Asia Bibioo lɛ wuoyi-bokagbɛ. Persia Maŋtsɛ Dario III kpeteŋkpele lɛ kɛ asraafoi aaafee akpei ohai enumɔ ba jɛmɛ koni ekɛ Alexander abakpe. Dario ni yɔɔ lɛ diɛŋtsɛ emli hekɛnɔfɔɔ tsɔ lɛ kɛ enyɛ, eŋa, kɛ eweku lɛ mli bii krokomɛi ba jɛmɛ koni amɛbaye nɔ ni kulɛ ebaafee kunimyeli ko ni sa kadimɔ lɛ he odase. Shi Persiabii lɛ esako amɛhe kɛhako Makedoniabii lɛ atrukaa tutuamɔ kɛ hiɛdɔɔ ni naa wa waa lɛ. Alexander tabilɔi lɛ ye Persia asraafoi lɛ anɔ kunim kwraa, ni Dario jo foi, ni eshi eweku lɛ yɛ Alexander dɛŋ.
Yɛ nɔ najiaŋ ni eeetiu Persiabii ni joɔ foi lɛ, Alexander fã kɛtee wuoyigbɛ yɛ Mediteranea Ŋshɔ lɛ naa gbɛ, ni eyaye hei ni Persia tawuu lɛji ni he wa waa lɛ jɛɔ amɛyawuɔ lɛ anɔ kunim. Shi ŋshɔkpɔ maŋtiase ni ji Tiro te shi wo tutuamɔ lɛ. Akɛni Alexander etswa efai shi akɛ ebaaye nɔ kunim hewɔ lɛ, ewo he ka nyɔji kpawo. Kawoo be nɛɛ mli ni Dario kɛ nibii ni ekɛbaatao toiŋjɔlɛ ni atsĩ tã kɛtsɔ hiɛ lɛ ba lɛ. Bɔ ni nibii ni akɛhaa lɛ lɛ hi sɔŋŋ hewɔ lɛ, abɔ amaniɛ akɛ Alexander ŋaawolɔ Parmenio ni ekɛ ehe fɔ̃ɔ enɔ waa lɛ kɛɛ akɛ: ‘Mi ji Alexander kulɛ, makpɛlɛ nɔ.’ Shi oblanyo tatsɛ lɛ ha hetoo akɛ: ‘Mi hu nakai nɔŋŋ, eji Parmenio ji mi kulɛ.’ Akɛni ekpɛlɛɛɛ saamɔ lɛ nɔ hewɔ lɛ, Alexander tee nɔ yɛ kawoo lɛ mli, ni ekpata nakai ŋshɔ hiɛ awula lɛ hiɛ yɛ July afi 332 D.Ŋ.B.
Akɛni eshi Yerusalem ni ŋmɛɛ ehe eha lɛ lɛ hewɔ lɛ, Alexander tsi kɛtee wuoyigbɛ, ni eye Gaza nɔ kunim. Akɛni Persia nɔyeli lɛ eha etɔ Mizraimbii lɛ hewɔ lɛ, amɛhere lɛ akɛ kpɔ̃lɔ. Eshã afɔle ehã Apis tsina nuu lɛ yɛ Memphis, ni ekɛsa Mizraim osɔfoi lɛ ahiɛ. Eto Alexandria maŋtiase lɛ ní yɛ sɛɛ mli lɛ ekɛ Ateene shi akaŋ akɛ nikasemɔ shikwɛ̃ɛhe ni egbɛi kã nɔ lolo lɛ hu shishi.
No sɛɛ lɛ, Alexander tsɔ ehiɛ kɛtee kooyi-bokagbɛ, kɛtsɔ Palestina kɛmiiya Tigris Faa lɛ naa. Ekɛ Persiabii wuu ta kpele ko ni ji etɛ yɛ afi 331 D.Ŋ.B., yɛ Gaugamela, ni kɛ Ninive ni kumɔɔ ni etsɔɔ amaŋfɔ lɛ jɛkɛɛɛ lɛ. Alexander asraafoi 47,000 lɛ ye Persia asraafoi ni kɛ hoo lɛ amɛshɛɔ hii 250,000 ni ato amɛ gbɛjianɔ jogbaŋŋ lɛ anɔ kunim yɛ biɛ! Dario jo foi ni lɛ diɛŋtsɛ ewebii gbe lɛ yɛ sɛɛ mli.
Akɛni kunimyeli ehã eyitso efũu hewɔ lɛ, Alexander tsɔ kɛtee wuoyigbɛ ni eshɔ̃ Persia fɛ̃i be mli maŋtiase Babilon lɛ. Eyaye Susa kɛ Persepolis maŋtiasei lɛ hu nɔ kunim, ni eshɔ̃ Persia shikatoohe ni da lɛ ni ekɛ la shã Xerxes maŋtsɛwe kpeteŋkpele lɛ. Yɛ naagbee lɛ, maŋtiase ni yɔɔ Ecbatana lɛ hu gbee shi yɛ ehiɛ. Kɛkɛ ni kunimyelɔ ni he yɔɔ oya nɛɛ ba Persia nɔyeli ni eshwɛ lɛ fɛɛ shi, ni etee shɔŋŋ kɛyashɛ bokagbɛ yɛ Indus Faa lɛ ni yɔɔ he ni ŋmɛnɛŋmɛnɛ beaŋ Pakistan yɔɔ lɛ naa.
Beni efo Indus, ni yɔɔ he ni bɛŋkɛ Persia nɔyelihe ni ji Taxila lɛ husu lɛ niiaŋ lɛ, Alexander kɛ India maŋtsɛ Porus akaŋshilɔ ni he yɔɔ gbeyei waa lɛ kpe. Alexander kɛ lɛ wuu eta ni ji ejwɛ kɛ naagbee nɔ̃ ni da lɛ yɛ June afi 326 D.Ŋ.B. Asraafoi 35,000 kɛ shuɔi 200 fata Porus asraafoi lɛ ahe, ni amɛha Makedonia okpɔŋɔi lɛ she gbeyei naakpa. Ta lɛ mli wa ni ashwie lá shi babaoo, shi Alexander asraafoi lɛ ye kunim. Porus ŋmɛɛ ehe eha ni ebatsɔ ehefatalɔ.
Nɔ ni fe afii kpaanyɔ eho kɛjɛ be mli ni Makedonia asraafoi lɛ fo mli kɛbote Asia, ni etɔ asraafoi lɛ, ni amɛhiɛ miitse shia. Akɛni ta ni naa wa waa ni amɛkɛ Porus wuu lɛ ewo amɛhe gbeyei hewɔ lɛ, amɛmiisumɔ ni amɛku amɛsɛɛ amɛya shia. Eyɛ mli akɛ shishijee lɛ Alexander sumɔɔɔ tsɔ moŋ, shi ekpɛlɛ nɔ ni amɛsumɔɔ lɛ nɔ. Hela ebatsɔ jeŋ hewalɛ lɛɛlɛŋ. Akɛni amɛto Hela nɔyelihei yɛ shikpɔji ni amɛye nɔ kunim lɛ anɔ hewɔ lɛ, Hela wiemɔ kɛ hiŋmɛigbelemɔ gbɛ eshwã maŋtsɛyelihe lɛ fɛɛ mli.
NUU NI YƆƆ TSƐŊ LƐ SƐƐ
Nɔ ni ha Makedonia asraafoi lɛ kpɛtɛ amɛhe yɛ ekomefeemɔ mli kɛtsɔ kunimyeli afii lɛ amli ji Alexander su kɛ baŋ. Kɛ awuu tai agbe naa lɛ, nɔ ni Alexander fɔɔ feemɔ ji mɛi ni epila lɛ ni esaraa amɛ, ekwɛɔ amɛpilamɔi lɛ, ejieɔ asraafoi lɛ ayi yɛ amɛ ekãafeemɔ hewɔ, ni ewoɔ amɛhiɛ nyam kɛtsɔɔ shika ni ekɛhaa amɛ yɛ mɔ fɛɛ mɔ mɔdɛŋbɔɔ naa lɛ nɔ. Yɛ mɛi ni gboi yɛ tawuu mli lɛ agbɛfaŋ lɛ, Alexander to amɛfũu he gbɛjianɔ fɛfɛo kɛha amɛ. Ahaaa hii ni gboi lɛ afɔlɔi kɛ amɛbii awo too ko kwraa ni amɛye amɛhe kɛjɛ nitsumɔi komɛi amli. Bɔni afee ni amɛjie amɛjwɛŋmɔ kɛjɛ tawuui anɔ lɛ, Alexander toɔ shwɛmɔi kɛ akaŋshii ahe gbɛjianɔ. Be ko lɛ, eto nitsumɔ mli hejɔɔmɔ he gbɛjianɔ po kɛha hii ni ebote gbalashihilɛ mli ehee lɛ, koni amɛnyɛ ni amɛkɛ amɛŋamɛi lɛ ahi shi yɛ fɛ̃i be lɛ mli, yɛ Makedonia. Nifeemɔi ni tamɔ nɛkɛ ha ehii lɛ sumɔ esane ni amɛhiɛ sɔ lɛ.
Yɛ gbalashihilɛ mli ni Alexander kɛ Bactria Maŋtsɛ Biyoo Roxana bote lɛ he lɛ, Helanyo gbɔmɛi ashihilɛ he yinɔsaneŋmalɔ Plutarch ŋma akɛ: “Eji suɔmɔ sane diɛŋtsɛ, kɛlɛ, etamɔ nɔ ni yɛ nakai beaŋ nɔŋŋ lɛ ehi kɛha yiŋtoo ni ehiɛ lɛ. Ejaakɛ gbɔmɛi ni aye amɛnɔ kunim lɛ atsui nyɔ amɛmli akɛ amɛaana ni ehala ŋa kɛjɛ amɛ diɛŋtsɛ amɛteŋ, ni eha amɛná hedɔɔ ni mli wa kɛha lɛ, ákɛ amɛaana akɛ, nɔ ni ye nɛkɛ hii ateŋ hiɛshikalɔ nɛɛ nɔ kunim ji suɔmɔ ni mli wa ni ená kɛha lɛ lɛ, kɛlɛ, ekɛ lɛ náaa bɔlɛ ko kɛyashi enyɛ ekɛ lɛ bote gbalashihilɛ mli yɛ mla naa kɛ gbɛ ni yɔɔ nyam nɔ dã.”
Alexander kɛ bulɛ hu ha mɛi krokomɛi agbalashihilɛ. Eyɛ mli akɛ Maŋtsɛ Dario ŋa lɛ ebatsɔ egboklɛfonyo moŋ, shi eha akɛ lɛ ye yɛ gbɛ ni yɔɔ nyam nɔ. Nakai nɔŋŋ hu beni enu akɛ Makedonia asraafoi enyɔ kɛ gbɔi komɛi aŋamɛi ená bɔlɛ lɛ, efã akɛ kɛ ana akɛ amɛyeɔ fɔ lɛ agbe amɛ.
Taakɛ enyɛ, Olympias ji lɛ, Alexander sumɔɔ nyɔŋmɔi ajamɔ waa. Eshãa afɔlei dani eyaa ta kɛ ta lɛ sɛɛ, ni ebiɔ ekunyaayelɔi lɛ anii yɛ nɔ ni okadii komɛi tsɔɔ lɛ ahe. Eyabi Ammon okɔmfo ni yɔɔ Libya lɛ nii. Ni etsu fãmɔi ni Kaldeamɛi lɛ kɛha lɛ, titri lɛ afɔle ni ashãa ahaa Babilonia nyɔŋmɔ Bel (Marduk) lɛ he nii yɛ Babilon.
Eyɛ mli akɛ Alexander ji hiɛshikalɔ yɛ eniyeli sui amli moŋ, shi yɛ naagbee lɛ ekɛ ehe wo dãanumɔ babaoo mli. Ewieɔ babaoo yɛ wein kpulu fɛɛ kpulu he, ni eshwãa yɛ nii ni enyɛ etsu lɛ ahe. Nibii ni ehiii kwraa ni Alexander fee lɛ ateŋ ekome ji enaanyo Clitus ni egbe lɛ beni etɔ dãa ni emli efũ lɛ. Shi Alexander bu ehe fɔ aahu akɛ ehi saa mli gbii etɛ, ni eyeee nii ni enuuu dãa. Yɛ naagbee lɛ, enanemɛi lɛ nyɛ amɛtsɔ̃ eyiŋ koni eye nii.
Beni be shwieɔ mli lɛ, anunyam taomɔ he akɔnɔ ni Alexander yɔɔ lɛ tee esui krokomɛi ni ehiii lɛ ashi. Eje shishi akɛ eeehe apasa naafolɔmɔ eye amrɔ nɔŋŋ, ni eje shishi akɛ ekɛ toigbalamɔ ni naa wa waa aaaha. Ákɛ nɔkwɛmɔnɔ lɛ, beni ahã ehé eye akɛ Philotas fata mɔdɛŋ ni abɔ koni agbe lɛ lɛ he lɛ, Alexander hã agbe lɛ kɛ etsɛ, Parmenio, ni ji eŋaawolɔ ni be ko lɛ eheɔ lɛ eyeɔ waa lɛ.
ALEXANDER NƆ KUNIM NI AYE
Beni Alexander ku esɛɛ kɛtee Babilon lɛ sɛɛ etsɛɛɛ ni atridii mɔ lɛ, ni ehe waaa lɛ yɛ mli. Yɛ June 13, 323 D.Ŋ.B., beni ehi wala mli afii 32 kɛ nyɔji 8 pɛ lɛ, Alexander ŋmɛɛ ewala he eha henyɛlɔ ni fe fɛɛ lɛ, gbele.
Etamɔ bɔ pɛ ni India nilelɔi komɛi wie lɛ: “Oo Maŋtsɛ Alexander, gbɔmɔ fɛɛ gbɔmɔ yɛ shikpɔŋ ni wɔdamɔ nɔ nɛɛ mli nɔ ko fã ko kɛkɛ; ni bo nuu ni tamɔ hii krokomɛi, ja anɔkwale ni eji akɛ oyi obɔ kɛ nifeemɔ ni oŋmɛɛɛ sane he lɛ, ookpa shikpɔŋ nɛɛ fɛɛ ni kɛ omaŋ jɛkɛ lɛ nɔ, oogba ohe naa, ni oogba mɛi krokomɛi anaa. Shi etsɛŋ ni obaagbo, ni shikpɔŋ lɛ fã fioo ko ni sa kɛha ofũu pɛ obaaná.”
MƐNI OYƆSE?
• Mɛni ji Alexander Kpeteŋkpele lɛ shishijee he sane?
• Mɛɛ tafãa Alexander kɛ ehe wo mli beni ebata Makedonia maŋtsɛsɛi lɛ nɔ nɔŋŋ lɛ?
• Tsɔɔmɔ Alexander kunimyelii lɛ ekomɛi amli.
• Mɛni abaanyɛ awie yɛ Alexander su kɛ baŋ he?
[Shikpɔŋ he mfoniri]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
ALEXANDER KUNIMYELII
MAKEDONIA
MIZRAIM
Babilon
Indus Faa
[Mfoniri]
Alexander
[Mfoniri]
Aristotle kɛ ekaselɔ Alexander
[Baafa muu mfoniri]
[Mfoniri]
Kɔŋnɔŋmɛɛ okadi ni akɛɛ etsɔɔ Alexander Kpeteŋkpele
[Akrabatsa/Mfonirii ni yɔɔ baafa 162, 163]
AJA MAŊTSƐYELI KO NI DA MLI
YƐ ALEXANDER kpeteŋkpele lɛ maŋtsɛyeli lɛ he lɛ, Biblia lɛ gba fɔ̃ shi akɛ ebaajwa ni abaajara mli “shi jeee eseshibii aaaŋɔ-ha.” (Daniel 11:3, 4) No hewɔ lɛ, yɛ Alexander kpatu gbele yɛ afi 323 D.Ŋ.B. lɛ sɛɛ afii 14 pɛ lɛ, aju shi agbe emla naa binuu Alexander IV kɛ ehemɔ binuu Heracles trukaa.
Beni shɛɔ afi 301 D.Ŋ.B. lɛ, Alexander tatsɛmɛi lɛ ateŋ mɛi ejwɛ ebaná hewalɛ yɛ maŋtsɛyeli kpeteŋkpele ni amɛ tatsɛnukpa lɛ to ma shi lɛ nɔ. Tatsɛ Cassander ye Makedonia kɛ Hela nɔ. Tatsɛ Lysimachus nine shɛ Asia Bibioo lɛ kɛ Thrace nɔ. Nɔ ni Tatsɛ Seleucus I Nicator nine shɛ nɔ ji Mesopotamia kɛ Siria. Ni Ptolemy Lagus, loo Ptolemy I ye Mizraim kɛ Palestina nɔ. Nɔ ni jɛ Alexander maŋtsɛyeli kpeteŋkpele kome lɛ mli ba ji Hela loo Greek maŋtsɛyelii ejwɛ.
Cassander nɔyeli lɛ fee nɔ ni sɛɛ etsɛɛɛ kwraa yɛ Hela maŋtsɛyelii ejwɛ lɛ ateŋ. Beni Cassander baná nɔyeli hewalɛ lɛ sɛɛ be fioo ko lɛ, eseshibii ni ji hii lɛ fɛɛ gboi, ni yɛ afi 285 D.Ŋ.B. lɛ, Lysimachus ŋɔ Hela Maŋtsɛyeli lɛ fã ni ji Europa lɛ. Afii ejwɛ sɛɛ lɛ, Lysimachus gbo yɛ ta ni ba ekɛ Seleucus I Nicator teŋ lɛ mli, ni enɛ ha ebaye shikpɔŋkukuji ni yɔɔ Asia lɛ fã ni da waa nɔ. Seleucus batsɔ Seleucus maŋtsɛmɛi aweku ni yɔɔ Siria lɛ ateŋ klɛŋklɛŋ mɔ. Eto Antiokia shishi yɛ Siria ni ekɛ enɛ fee emaŋtiase hee. Aju shi agbe Seleucus yɛ afi 281 D.Ŋ.B., shi maŋtsɛmɛi awekukpaa ni eto shishi lɛ tee nɔ ehi shi aahu kɛyashi afi 64 D.Ŋ.B., beni Roma Tatsɛ Pompey fee Siria Roma nɔyelihe lɛ.
Ptolemy maŋtsɛyeli lɛ ji Alexander maŋtsɛyeli ni aja mli ejwɛ lɛ ateŋ nɔ ni sɛɛ tsɛ fe fɛɛ. Ptolemy I ŋɔ hegbɛ lɛ akɛ maŋtsɛ yɛ afi 305 D.Ŋ.B., ni ebatsɔ Makedonia maŋtsɛmɛi, loo Mizraim Faraoi lɛ ateŋ klɛŋklɛŋ mɔ. Efee Alexandria emaŋtiase, ni eje shishi amrɔ nɔŋŋ akɛ eeeto maŋ nɔyaa nitsumɔi ahe gbɛjianɔ. Etsũmaa nitsumɔi wuji lɛ ateŋ ekome ji Alexandria Wojiatoohe ni ehe gbɛi lɛ. Bɔni afee ni akwɛ nitsumɔ kpeteŋkpele nɛɛ nɔ lɛ, Ptolemy yaŋɔ Ateenenyo woloŋlelɔ ko ni ehe gbɛi, ni atsɛɔ lɛ Demetrius Phalereus kɛjɛ Hela kɛba. Abɔ amaniɛ akɛ, beni shɛɔ Ŋ.B. klɛŋklɛŋ afii oha lɛ mli lɛ, no mli lɛ ato wolokpoi akpeiakpe kome yɛ wojiatoohe lɛ. Ptolemy maŋtsɛmɛi aweku lɛ tee nɔ eye Mizraim nɔ aahu kɛyashi egbee shi kɛha Roma yɛ afi 30 D.Ŋ.B. Kɛkɛ ni Roma baye Hela najiaŋ akɛ jeŋ hewalɛ titri ni yɔɔ.
MƐNI OYƆSE?
• Te aja Alexander maŋtsɛyeli kpeteŋkpele lɛ mli aha tɛŋŋ?
• Seleucus maŋtsɛmɛi aweku lɛ tee nɔ amɛye Siria nɔ kɛyashi mɛɛ be?
• Mɛɛ be Ptolemy maŋtsɛyeli ni yɔɔ Mizraim lɛ ba naagbee?
[Shikpɔŋ he mfoniri]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
ALEXANDER MAŊTSƐYELI LƐ JWARAMƆ
Cassander
Lysimachus
Ptolemy I
Seleucus I
[Mfonirii]
Ptolemy I
Seleucus I
[Nitɛŋmɔ ni akɛmiitsɔɔ nɔ ko mli/Mfoniri ni yɔɔ baafa 139]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
JEŊ HEWALƐI NI YƆƆ DANIEL GBALƐ LƐ MLI
Amaga kpeteŋkpele lɛ (Daniel 2:31-45)
Kooloi ejwɛ fã kpo kɛjɛ ŋshɔŋ (Daniel 7:3-8, 17, 25)
BABILONIA kɛjɛ 607 D.Ŋ.B.
MEDO-PERSIA kɛjɛ 539 D.Ŋ.B.
HELA kɛjɛ 331 D.Ŋ.B.
ROMA kɛjɛ 30 D.Ŋ.B.
ANGLO-AMERIKA JEŊ HEWALƐ kɛjɛ 1763 Ŋ.B.
JEŊ NI MAŊKWRAMƆ EGBALA MLI yɛ naagbee be lɛ mli
[Baafa muu mfoniri ni yɔɔ baafa 128]
[Baafa muu mfoniri ni yɔɔ baafa 147]