Jeŋ Nɔyeli Miitsake

EJI OOONYƐ ohala kulɛ, mɛɛ nɔyeli shishi ooosumɔ ni ohi? Wɔteŋ mɛi pii baasumɔ ni wɔhala nɔyeli ni haa mɔ heyeli bɔ ni sa. Wɔbaasumɔ nɔyeli ni baanyɛ aku awuiyeli naa, eha toiŋjɔlɛ kɛ shihilɛ mli jalɛsaneyeli afa, ni haa anaa nii bɔ ni sa hu. Eji anɔkwale akɛ wɔbaasumɔ nɔyeli ni waaa mɔ yi ni ejuuu hu.

Nɔ ni yɔɔ awerɛho ji akɛ, nɔyelii babaoo tamɔɔɔ nɛkɛ. Kɛ wɔsusu bɔ ni je lɛ yɔɔ yɛ afii ohai 20 nɛɛ naagbee fa nɛɛ he lɛ, mɛni wɔnaa? Ohia, juu, nii ni atsuuu jogbaŋŋ, yiwaa, shihilɛ mli jalɛsaneyeli ni bɛ, awuiyeli kɛ jeŋmaji ateŋ gbeyeishemɔ. Nɔ ni ejɛ adesa nɔyeli yɛ afii akpei abɔ lɛ mli eba nɛ.

Eji anɔkwale akɛ nɔyelɔi aŋkroaŋkroi komɛi kɛ jwɛŋmɔ ni ŋmɛɔ pɛpɛɛpɛ etsu nii ni amɛbɔ mɔdɛŋ hu. Ni nɔyeli gbɛjianɔtoi komɛi enyɛ ehi shi shiŋŋ ni amɛ nɔyelii lɛ emɔ shi yɛ bei komɛi amli. Shi nyɛ ni adesa nɔyeli nyɛɛɛ afee nɔ ni wɔnuɔ he akɛ efee eha adesa lɛ maa Biblia mli wiemɔ nɛɛ nɔ mi akɛ: “Mile, akɛ gbɔmɔ gbɛ bɛ lɛ diɛŋtsɛ edɛŋ, ni adesa ni nyiɛ nɛɛ, bɔ ni eeetsɔ ejaje enajifaamɔi eha lɛ, ebɛ edɛŋ.” (Yeremia 10:23) Yɛ gbɛ kroko nɔ lɛ, abɔɔɔ gbɔmɔ ni eye ehe nɔ ni yelikɛbuamɔ ni jɛ he kroko bɛ mli.

No hewɔ ehi akɛ wɔɔɔle akɛ jeŋ nɔyeli miitsake lɛ. Mɛni nɛkɛ wiemɔ nɛɛ tsɔɔ? Wɔmiitsɔɔ akɛ etsɛŋ ni adesai adaa gbi shihilɛ mli nɔyeli lɛ baaya ayaje nɔyeli hee ko kwraa, ni baaye omanye kɛmɔ shi lɛ dɛŋ. Nyɔŋmɔ gba nɛkɛ nɔyeli tsakemɔ trukaa nɛɛ he sane efɔ shi. Yɛ anɔkwale mli lɛ enɛ ji Biblia lɛ saneyitso.

Bɔ Ni Nyɔŋmɔ Susuɔ Nɔyeli He

Nyɔŋmɔ susuɔ adesa nɔyeli he yɛ be fɛɛ mli. Ekwɛɔ bɔ ni adesai anɔyelii tsuɔ gbɛnaa nii ni jwere amɛnɔ lɛ ahe nii amɛhaa lɛ jogbaŋŋ, ni bei komɛi lɛ, ehaa amɛbuɔ enɛ he akɔntaa. Lɛlɛŋ, agba nɔyeli gbɛjianɔtoi ni he gbɛi yɛ blema yɛ afii 2,500 ni eho nɛ lɛ ahe yinɔsane afɔ shi yɛ Biblia lɛ mli. Aŋmala gbalɛi ni wieɔ blema Babilon shigbeemɔ, Media kɛ Persia hewalɛ kɛ amɛshigbeemɔ kɛ Hela kɛ Roma he saji ashwie shi yɛ Daniel wolo ni aŋma afɔ shi fe afi 500 sɛɛ dani afɔ Kristo lɛ mli. Agba bɔ ni Anglo-Amerika Jeŋ Hewalɛ lɛ baate shi yɛ wɔbei nɛɛ amli lɛ he sane. Nɛkɛ gbalɛi nɛɛ ahesusumɔ fioo lɛ baaye ebua wɔ ni wɔnu wiemɔ akɛ jeŋ nɔyeli miitsake lɛ shishi.

Nɛkɛ naakpɛɛ gbalɛi nɛɛ ateŋ klɛŋklɛŋ nɔ lɛ ji mumɔ naa lamɔ ko ni akɛ maŋkwramɔŋ jeŋ hewalɛi ni yɔɔ kɛjɛ Daniel gbii lɛ amli kɛbashi wɔgbii nɛɛ amli lɛ to amaga kpeteŋkpele ko he yɛ mli lɛ. Kɛkɛ ni tɛ ko, ni jeee nine sa he, tse ni ebatswa amaga lɛ ni ekumɔ lɛ. Tɛ lɛ jwara jeŋ hewalɛi nɛɛ tamɔ mulu, “ni amɛtsɔmɔ tamɔ abelenaashaji “ni jwere gbo abeleshaa he, ni kɔɔyɔɔ loo amɛ kɛtee ni anaaa amɛ yɛ he ko he ko dɔŋŋ.”​—Daniel 2:​31-43.

Nakai Daniel wolo lɛ yitso lɛ nɔŋŋ tsɔɔ nɔ ni enɛ ji lɛ mli. Etsɔɔ akɛ nɔ ni hi kɛmɔ shi kwraa baaye adesai anɔyelii ni nine nyɛɔ shi lɛ anajiaŋ. Ekɛɔ wɔ akɛ: “Ni nɛkɛ maŋtsɛmɛi nɛɛ ayinɔ lɛ Nyɔŋmɔ ni yɔɔ ŋwɛi lɛ aaatee maŋtsɛyeli ko shi ama shi ni efiteŋ dɔŋŋ kɛaatee naanɔ, ni ashiŋ maŋtsɛyeli nɛɛ ahaŋ maŋ kroko; eeejwara maŋtsɛyelii nɛɛ fɛɛ wɔtsɔwɔtsɔ, ni eeekpata amɛhiɛ, shi lɛ diɛŋtsɛ lɛ eeedamɔ shi kɛaatee naanɔ . . . ni lamɔ lɛ yɛ mli, ni eshishitsɔɔmɔ lɛ ma shi shiŋŋ.”​—Daniel 2:​44, 45.

Shi jeee sane lɛ naagbee ji no. Yɛ ninaa ni ji enyɔ mli lɛ, akɛ kooloi wuji ni yɔɔ hewalɛ damɔ shi aha jeŋ hewalɛi ni baahiɛ nakai hewalɛi lɛ. No hewɔ lɛ aŋmɛ Daniel gbɛ ni ena aahu kɛyashi “Mɔ ni Eye Gbii Pii lɛ,” ŋwɛi maŋtsɛsɛi ni yɔɔ naakpɛɛ lɛ, ni atsɔɔ lɛ nɔ ko ni baaba, jeee yɛ egbii lɛ amli shi yɛ Anglo-Amerika Jeŋ Hewalɛ lɛ nɔyeli bei amli yɛ wɔbei nɛɛ amli. Ena Yehowa ŋwɛi anunyam Kojolɔi lɛ ni amɛho amɛtara shi koni amɛkojo jeŋ hewalɛi nɛɛ. (Daniel 7:​2-12) Taakɛ kukuji ni tsara nɔ lɛ tsɔɔ lɛ, akɛ ŋwɛi akpɔ lɛ ha koni atsake nɔyeli lɛ. Namɔ akɛ nɛkɛ nɔyeli nɛɛ baaha?

Mɔ Ko Tamɔ Gbɔmɔ Bi

Daniel ha hetoo ni taa mɔ tsuiŋ nɛɛ, akɛ:

“Misaa mina yɛ nyɔɔŋ ninaa lɛ mli, ni naa, mɔ ko tamɔ gbɔmɔ bi kɛ ŋwɛi atatui miiba, ni eba Mɔ ni Eye Gbii Pii lɛ ŋɔɔ, ni akɛ lɛ ba ehiɛ; ni aha lɛ nɔyeli kɛ anunyam kɛ maŋtsɛyeli koni majimaji kɛ asafoi kɛ wiemɔi lɛ fɛɛ asɔmɔ lɛ, enɔyeli lɛ naanɔ nɔyeli ni hoŋ eyaŋ ni, ni emaŋtsɛyeli lɛ nɔ ni fiteŋ ni.”​—Daniel 7:​13, 14.

No hewɔ lɛ, akɛ Daniel tsu nii ni egba akɛ “Mɔ ni Eye Gbii Pii lɛ,” ni ji Yehowa Nyɔŋmɔ diɛŋtsɛ baajie adesai ayiwalɛ nɔyelii ni ehii nɛɛ kɛjɛ jɛmɛ. Ekɛ nɔyeli ni hi fe no ni adesai baanyɛ asusu he​—Maŋtsɛyeli ni hiŋmɛi enaaa ni kɛ ŋwɛi hewalɛ kɛ hegbɛ baaye nɔ baato najiaŋ. Shi namɔ ji nɛkɛ “mɔ ko tamɔ gbɔmɔ bi” ni baaŋɔ Maŋtsɛyeli lɛ?

Ashiii wɔ ni wɔyiŋ afee wɔ kɔshikɔshi. Yesu jie ehe shi akɛ “gbɔmɔ bi lɛ,” Ewie ebaa lɛ he akɛ “be ni gbɔmɔ bi lɛ aaaba yɛ enunyam lɛ mli, ni bɔfoi krɔŋkrɔŋi lɛ fɛɛ aaafata ehe.” (Mateo 25:31) Beni Yudafoia osɔfonukpa lɛ bi ni Yesu akɛɛ gwabɔɔ lɛ kɛji lɛ ji “Kristo, Nyɔŋmɔ bi lɛ,” Yesu ha hetoo akɛ: “Okɛɛ; shi miikɛɛ nyɛ akɛ: Kɛjɛ be nɛɛ nɔ kɛyaa lɛ nyɛaana gbɔmɔ bi lɛ akɛ eta hewalɛ ninejurɔ nɔ, ni eeba yɛ ŋwɛi atatui lɛ amli.​—Mateo 26:​63, 64.a

Adesai Anaagbee Jeŋ Hewalɛ

Daniel be lɛ sɛɛ aaafee afii 600 lɛ, bɔfo Yohane ŋma Biblia mli Kpojiemɔ wolo lɛ yɛ mumɔ lɛ kudɔmɔ naa. Nakai wolo lɛ wieɔ nɛkɛ jeŋ hewalɛi nɛɛ ahe akɛ “maŋtsɛmɛi” kpelei akɛ: “Ni maŋtsɛmɛi kpawo ni; mɛi enumɔ egbee shi, ni mɔ kome yɛ, ni mɔ kroko lɛ nako aba, ni kɛ eba lɛ ja ehi shi fioo.”​—Kpojiemɔ 17:⁠10.

Mɛi enumɔ ni egbee shi beni Yohane ŋma enɛ lɛ ji Mizraim, Ashur, Babilon, Medo-Persia kɛ Hela. Roma Jeŋ Hewalɛ lɛ “yɛ.” Eka shi faŋŋ akɛ wɔbe nɛɛ mli Anglo-Amerika Jeŋ Hewalɛ ni ji kpawo lɛ bako. Kpojiemɔ lɛ wieɔ akɛ jeŋ hewalɛ ko yeŋ kpawo lɛ nɔ​—nɔ ni yɔɔ ŋmɛnɛ lɛ sɛɛ. Enɛ ji naagbee nɔ. Eko baŋ dɔŋŋ.

Shi kɛlɛ, esaaa akɛ enɛ feɔ yiŋsusumɔ ko ni woɔ mɔ he gbeyei​—eji nɔ ni taa mɔ tsuiŋ. Etsɔɔ akɛ adesa nɔyeli ni kɛ ehe wuɔ ta, ni yeee jalɛsane ebɛŋkɛ enaagbee. Gbalɛi lɛ feɔ ekome ni amɛwieɔ bɔ ni abaatsake jeŋ nɔyeli trukaa lɛ he​—tsakemɔ kɛmiijɛ adesa pɛsɛmkunya nɔyeli mli kɛmiiya ŋwɛi jalɛ nɔ, Nyɔŋmɔ Maŋtsɛyeli mli.

Maŋtsɛyeli Nɔyeli Lɛ

Shi mɛni ji nakai Maŋtsɛyeli lɛ? Efe hewalɛ ko ni naa ekpakpafeemɔ nɔ hewalɛ yɛ mɛi atsuiiaŋ kɛ amɛshihilɛ mli kɛkɛ. Efe nɔ ni akɛɔ akɛ eji Kristofoi asɔlemɔ lɛ shihilɛ hu. Nyɔŋmɔ Maŋtsɛyeli lɛ ji nɔyeli diɛŋtsɛ. Eyɛ maŋtsɛ, hefatalɔi nɔyelɔi, shikpɔŋkuku kɛ eshishibii. Ni ekɛ naakpɛɛ jɔɔmɔi ni wɔtsɔ hiɛ wɔtsi ta lɛ baaba.

Ayɔse Yesu akɛ Maŋtsɛyeli lɛ nɔ Maŋtsɛ. Ekɛ ehe to ablade ko ni “dom etee maŋsɛɛ shɔŋŋ, ni eyaŋɔ maŋtsɛyeli, ni eku esɛɛ eba” lɛ he. Ewie nakai wɔsɛɛ be lɛ he akɛ: “Shi beni gbɔmɔ bi lɛ aaaba yɛ enunyam lɛ mli, ni ebɔfoi krɔŋkrɔŋi lɛ fɛɛ aaafata ehe lɛ, no mli eeeta enunyam sɛi lɛ nɔ.”​—Luka 19:​12; Mateo 25:⁠31.

Mɛɛ be “gbɔmɔ bi” lɛ aaaba? Ehe ehiaaa ni wɔka wɔyiŋ wɔha hetoo. Yesu wiemɔi nɛɛ fata hetoo ni eha yɛ sanebimɔ akɛ: “Shi mɛni ji beni eba lɛ kɛ je nɛŋ naagbee lɛ he okadi?” lɛ he. (Mateo 24:​3, 30, New World Translation) Taakɛ bɔ ni afɔɔ emlitsɔɔmɔ yɛ nɛkɛ wolo tɛtrɛɛ nɛɛ mli lɛ, nakai ‘beni eba’ lɛ je shishi yɛ ŋwɛi ni hiŋmɛi enaaa yɛ “jeŋmaji abe lɛ” naagbee yɛ 1914.​—Luka 21:​24.b

Taakɛ Kpojiemɔ yitso 12 lɛ kɛɛ ebaaba lɛ, Yesu ŋɔ ehewalɛ lɛ ni eshɛ Satan efɔ kɛjɛ ŋwɛi kɛba shikpɔŋ lɛ niiaŋ. Ni gbee ko bo yɛ ŋwɛi akɛ: “Agbɛnɛ yiwalaheremɔ lɛ kɛ hewalɛ lɛ kɛ maŋtsɛyeli lɛ etsɔ wɔ-Nyɔŋmɔ lɛ nɔ, ni ekɛ hegbɛ lɛ eha e-Kristo (mɔ ni afɔ lɛ mu) lɛ, ejaakɛ ashɛ wɔnyɛmimɛi lɛ anaafolɔlɔ lɛ ni folɔɔ amɛnaa yɛ wɔ-Nyɔŋmɔ lɛ hiɛ nyɔɔŋ kɛ shwane lɛ afɔ.” Enɛ tsɔɔ jeŋ shihilɛ ni yaa nɔ fiteɔ waa kɛjɛ nakai be lɛ mli kɛbaa nɛɛ lɛ mli. No hewɔ lɛ gbee ni jɛ ŋwɛi lɛ tsa nɔ akɛ: “Kpoo ha mɛi ni yɔɔ shikpɔŋ lɛ nɔ kɛ ŋshɔ hiɛ lɛ, ejaakɛ Abonsam lɛ ekpleke shi kɛba nyɛŋɔɔ, egri naakpa ni ele akɛ be fioo kɛkɛ eyɔɔ.”​—Kpojiemɔ 12:​9-12.

Etsɛŋ ni nakai be fioo lɛ baaho aya. Yitsei fioo komɛi asɛɛ lɛ, ana Yesu ni awo ehiɛ nyam lɛ ni eta okpɔŋɔ yɛŋ nɔ. Atsɛɔ lɛ “Nyɔŋmɔ Wiemɔ,” ni “ebaatswia jeŋmaji lɛ anii” ni “akɛ dadetso akpala amɛ”​—tamɔ bɔ ni Daniel etsɔɔ akɛ Nyɔŋmɔ Maŋtsɛyeli ni tamɔ tɛ ni baakpele shikpɔŋ muu lɛ nɔ fɛɛ lɛ baajwara jeŋmaji lɛ.​—Kpojiemɔ 19:​11-16; Daniel 2:​34, 35, 44, 45.

Adesai amaŋkwramɔŋ hewalɛi ni tamɔ kooloi lɛ waŋ adesai ayi dɔŋŋ.

Hefatalɔi Nɔyelɔi

Shi babaoo fata he. Ajɛ mumɔ mli aha Daniel wie akɛ jeee “mɔ ko tamɔ gbɔmɔ bi” lɛ kɛkɛ aŋɔ Maŋtsɛyeli lɛ aha, shi moŋ “kɛha mɔ ni yɔɔ ŋwɛi shɔŋŋ lɛ mɛi krɔŋkrɔŋi lɛ amaŋ lɛ.”​—Daniel 7:⁠27.

Namɛi ji mɛnɛɛmɛi? Kpojiemɔ lɛ wieɔ Toobi lɛ, Kristo Yesu he akɛ: “Okɛ ola lɛ ekpɔ wɔ oha Nyɔŋmɔ kɛjɛ akutso fɛɛ akutso kɛ wiemɔ fɛɛ wiemɔ kɛ maŋ fɛɛ maŋ kɛ jeŋmaŋ fɛɛ jeŋmaŋ mli, ni oŋɔ wɔ ofee maŋtsɛmɛi kɛ osɔfoi oha wɔ-Nyɔŋmɔ lɛ, ni wɔɔye maŋtsɛmɛi yɛ shikpɔŋ lɛ nɔ.” Etee nɔ ewie akɛ amɛaatsɔmɔ “Nyɔŋmɔ kɛ Kristo osɔfoi, ni amɛkɛ lɛ aaaye maŋtsɛ afii akpe.” Aha amɛyibɔ lɛ akɛ 144,000.​—Kpojiemɔ 5:​9, 10; 14:1; 20:⁠6.

Mɛnɛɛmɛi ji mɛi ni Ŋwɛi Floflo Nyɔŋmɔ lɛ ehala ni amɛkɛ e-Bi, Yesu Kristo ana jeŋ fɛɛ nɔyeli lɛ mli gbɛfaŋnɔ. Ani wɔ wɔsɛɛ be baanyɛ afee shweshweeshwe yɛ mɛi krokomɛi adɛŋ fe mɛi ni Nyɔŋmɔ ehala nɛɛ? Dabi, nɛkɛ maŋtsɛyeli nɛɛ baafee nɔyeli ni hi fe fɛɛ​—enɔ kwɔ fe eko fɛɛ eko ni adesa ena da. Yɛ enɔyeli nɛɛ shishi lɛ abaafee shikpɔŋ nɛɛ Paradeiso taakɛ eji Nyɔŋmɔ yiŋtoo kɛjɛ shishijee lɛ.

Kanemɔ sane ni nyiɛ sɛɛ lɛ ni okwɛ kɛji akɛ nɔyeli nɛɛ shishi obaasumɔ ni ohi.

[Shishigbɛ niŋmai]

[Akrabatsa ni yɔɔ baafa 4]

“Yesu Tsɔɔmɔ lɛ Saneyitso Titri”

“Nyɔŋmɔ Maŋtsɛmɛi lɛ saneyitso titri ji Yesu shiɛmɔ lɛ mli sane oti.”​—New Catholic encyclopedia.

“Abuɔ (Nyɔŋmɔ Maŋtsɛyeli Iɛ) akɛ Yesu tsɔɔmɔ Iɛ saneyitso titri.”​—Encyclopaedia Britannica.

Shi mɛɛ be ji be ni okaiɔ ni atsi nakai “Yesu tsɔɔmɔ lɛ mli saneyitso titri” nɛɛ ta yɛ sɔlemɔ ko mli?

[Akrabatsa ni yɔɔ baafa 5]

Yiŋfutumɔ Ni Kɔɔ Nyɔŋmɔ Maŋtsɛyeli Iɛ He

Mɛi komɛi esusu akɛ “sɔlemɔ lɛ ni yɔɔ shikpɔŋ nɔ” Iɛ ji Nyɔŋmɔ Maŋtsɛyeli Iɛ, be mli ni mɛi krokomɛi hu ehe eye akɛ ŋmɛnɛŋmɛnɛ je nɛɛ “baatsake yɛ Kristofoi Iɛ ahewalɛ shishi kɛyashi eeetsɔ Maŋtsɛyeli Iɛ.” Kɛlɛ, mɛi krokomɛi kɛɔ akɛ Nyɔŋmɔ Maŋtsɛyeli lɛ ji “Nyɔŋmɔ nɔyeli yɛ mɔ aŋkro Iɛ tsui kɛ eshihilɛ mli.”

Shi ani nɔ ni kɔɔ Nyɔŋmɔ Maŋtsɛyeli Iɛ he Iɛ fɛɛ nɛ​—jamɔ mli gbɛjianɔtoo ko, maŋkwramɔŋ tsakemɔ ko ni baa fiofio, aloo mumɔ tsakemɔ ko ni baa mɛi atsuii amli ni?