Yitso 10

Maŋtsɛyeli “Ni Fiteŋ Ni”

 1, 2. (a) Jeŋ saji maa mɛɛ anɔkwale nɔ mi daa gbi, ni yɛ mɛɛ gbɛ nɔ? (b) Mɛni ji enɛ he tsabaa kometoo pɛ?

NIBII sɔrɔtoi ni baa je lɛ mli daa gbi lɛ tsɔɔ anɔkwale ni eji akɛ adesai nako miishɛɛ yɛ Yehowa nɔyeli ni amɛkwa kɛ mɔdɛŋ ni amɛbɔɔ koni amɛye amɛ diɛŋtsɛ amɛhe nɔ lɛ mli. Adesa nɔyeli gbɛjianɔtoo ko bɛ ni enyɛ ekɛ sɛɛnamɔi eba kɛha adesai fɛɛ. Eyɛ mli akɛ gbɔmɛi etee hiɛ babaoo yɛ jeŋ nilee mli moŋ, shi amɛnyɛko amɛfa esha shishi, amɛyeko hela nɔ kunim, ni amɛhako gbele sɛɛ afo aha amɛshishibii lɛ ateŋ mɔ kome po. Nɔ ni tamɔɔɔ enɛ lɛ, jeŋmaji lɛ ka he amɛmiifee tawuu nibii heei ni yɔɔ gbeyei. Awuiyeli kɛ basabasafeemɔ miiya hiɛ. Tsɔnei ahe nilee, hiɛkɔɔ kɛ nilee ni abɛ lɛ fɛɛ eha aafite shikpɔŋ lɛ, nu kɛ kɔɔyɔɔ mli. Nibii ajara ni ewa kɛ nitsumɔ ni anaaa eha shihilɛ mli ewa kɛha mɛi pii ni taoɔ shihilɛ mli hiamɔ nibii lɛ. Gbɔmɛi miipele ni amɛje enɛ mli.—Jaj. 8:9.

² Mɛni ji hetoo lɛ? Nyɔŋmɔ Maŋtsɛyeli ni Yesu tsɔɔ esɛɛnyiɛlɔi lɛ akɛ amɛsɔle amɛbi lɛ. (Mat. 6:9, 10) Kwɛ bɔ ni esa akɛ wɔda shi wɔha akɛ heyeli ni ekɛbaaba lɛ ebɛŋkɛ kpaakpa!

 3. (a) Mɛni ba yɛ ŋwɛi yɛ 1914 Ŋ.B. yɛ nɛkɛ Maŋtsɛyeli nɛɛ gbɛfaŋ? (b) Mɛni hewɔ enɛ he hiaa wɔ lɛ?

³ Nyɔŋmɔ Maŋtsɛyeli ni aŋɔha Yesu Kristo lɛ ebɔi nitsumɔ momo kɛjɛ 1914 Ŋ.B.a Nibii ni Daniel na yɛ egbalɛ ninaa lɛ mli lɛ ba mli diɛŋtsɛ yɛ ŋwɛi yɛ nakai afi lɛ mli. “Mɔ Ni Eye Gbii Pii Lɛ,” ni ji Yehowa Nyɔŋmɔ kɛ “nɔyeli kɛ anunyam kɛ maŋtsɛyeli,” ha gbɔmɔ Bi Yesu Kristo, “koni majimaji kɛ asafoi kɛ wiemɔi lɛ fɛɛ asɔmɔ lɛ.” Beni Daniel gbaa nɔ ni ena yɛ ninaa lɛ mli lɛ, eŋma akɛ: “Enɔyeli lɛ naanɔ nɔyeli ni hoŋ eyaŋ ni, ni emaŋtsɛyeli lɛ nɔ ni fiteŋ ni.” (Dan. 7:13, 14) Maŋtsɛyeli nɛɛ nɔ Nyɔŋmɔ baatsɔ aha mɛi ni sumɔɔ jalɛ lɛ ana nibii kpakpai pii ni eto eyiŋ akɛ ebaafee beni ekɛ wɔklɛŋklɛŋ fɔlɔi lɛ to Paradeiso lɛ mli ŋɔɔmɔ.

 4. Mɛɛ nibii krokomɛi ni kɔɔ Maŋtsɛyeli lɛ he hu wɔyɔɔ he miishɛɛ, ni mɛni hewɔ?

⁴ Maŋtsɛyeli nɛɛ shishibii anɔkwafoi lɛ miisumɔ waa ni amɛle bɔ ni ato nɔyeli nɛɛ he gbɛjianɔ aha kɛ enitsumɔ. Amɛmiisumɔ ni amɛle nɔ ni etsuɔ bianɛ, nɔ ni ebaatsu yɛ wɔsɛɛ be mli kɛ nɔ ni abiɔ yɛ amɛdɛŋ. Amɛpɛiɔ enɛ mli fitsofitso amɛkwɛɔ, ni beni amɛfeɔ enɛ lɛ, amɛhiɛsɔɔ kɛha enɛ lɛ yaa hiɛ ni amɛsaa amɛhe koni amɛgba mɛi krokomɛi enɛ he sane.—Lala 48:13, 14.

MLIPƐIMƆ NI KANYAA TSUI

 5. (a) Te Ŋmalɛi lɛ tsɔɔ mɔ ni enɔyeli atsɔɔ Mesia Maŋtsɛyeli lɛ nɔ ajieɔ lɛ kpo atsɔɔ lɛ mli ehaa tɛŋŋ? (b) No hewɔ lɛ nɔ ni wɔkaseɔ yɛ Maŋtsɛyeli nɛɛ he lɛ saa wɔhe yɛ mɛɛ gbɛ nɔ?

⁵ Klɛŋklɛŋ nibii ni enɛ mlipɛimɔ jieɔ lɛ kpo lɛ ateŋ ekome ji akɛ, Mesia Maŋtsɛyeli nɛɛ ji Yehowa diɛŋtsɛ nɔyeli lɛ kpojiemɔ. Lɛ ji mɔ ni kɛ “nɔyeli kɛ anunyam kɛ maŋtsɛyeli” lɛ ha e-Bi lɛ. No hewɔ lɛ, beni Maŋtsɛyeli nɛɛ bɔi nɔyeli lɛ, gbeei ni yɔɔ ŋwɛi lɛ jaje yɛ gbɛ ni ja nɔ akɛ: “Je nɛŋ maŋtsɛyeli lɛ etsɔ wɔ-Nuŋtsɔ lɛ [Yehowa Nyɔŋmɔ] kɛ e-Kristo lɛ nɔ, ni [lɛ Yehowa] eeeye maŋtsɛ kɛaatee naanɔi anaanɔ.” (Kpoj. 11:15) No hewɔ lɛ, nɔ fɛɛ nɔ ni wɔyɔseɔ yɛ Maŋtsɛyeli nɛɛ kɛ nɔ ni etsuɔ lɛ he lɛ gbalaa wɔ kɛbɛŋkɛɔ Yehowa diɛŋtsɛ he kpaakpa. Enɛ tsirɛɔ wɔ ni wɔkɛ wɔhe aha enɔyeli lɛ kɛya naanɔ.

 6. Akɛ Yesu Kristo ji Yehowa sɛɛyelɔ nɔyelɔ lɛ ŋɔɔ wɔnaa titri yɛ mɛɛ gbɛ nɔ?

⁶ Kwɛ bɔ ni eyɔɔ fɛo ha akɛ Yehowa kɛ Yesu Kristo eta sɛi nɔ akɛ E-sɛɛyelɔ nɔyelɔ! Akɛ Nitsulɔ Nukpa, mɔ ni Nyɔŋmɔ kɛ lɛ tsu nii beni ebɔɔ shikpɔŋ nɛɛ kɛ gbɔmɔ lɛ, Yesu le wɔhiamɔ nii fe bɔ ni wɔteŋ mɔ fɛɛ mɔ le. Agbɛnɛ, ejie ehe kpo kɛjɛ adesa yinɔsane shishijee mli tɔ̃ɔ akɛ ‘mɔ ni naa gbɔmɛi abii ahe miishɛɛ.’ (Abɛi 8:30, 31; Kol. 1:15-17) Nakai suɔmɔ lɛ mli wa aahu akɛ lɛ diɛŋtsɛ eba shikpɔŋ nɔ ni ekɛ ewala ha akɛ kpɔmɔ nɔ yɛ amɛhewɔ. No hewɔ lɛ, eha wɔna kpɔmɔ kɛmiijɛ esha kɛ gbele mli kɛ hegbɛ kɛha naanɔ wala.—Mat. 20:28.

 7. (a) Nɔ ni tamɔɔɔ gbɔmɔ nɔyeli lɛ, mɛni hewɔ nɔyeli nɛɛ baahi shi kɛya naanɔ lɛ? (b) Mɛɛ wekukpaa ka “tsulɔ anɔkwafo kɛ nilelɔ” lɛ kɛ ŋwɛi nɔyeli lɛ teŋ?

⁷ Nɔyeli ni ma shi shiŋŋ kɛ nɔ ni hiɔ shi kɛyaa naanɔ ji enɛ. Ama bɔ ni enɛ baanyɛ ahi shi kɛya naanɔ lɛ nɔ mi kɛtsɔ anɔkwale ni eji akɛ Yehowa jeee mɔ ni gbele yeɔ enɔ lɛ nɔ. (Hab. 1:12; Lala 146:3-5, 10) Akɛ mɔ ni tamɔɔɔ adesai maŋtsɛmɛi lɛ, Yesu Kristo ni Nyɔŋmɔ etuu emaŋtsɛyeli lɛ ewo edɛŋ lɛ hu gbooo. (Rom. 6:9; 1 Tim. 6:15, 16) Mɛi ni baafata Kristo he yɛ ŋwɛi maŋtsɛsɛii anɔ hu ji mɛi krokomɛi 144,000, ni ji Nyɔŋmɔ tsuji anɔkwafoi ni jɛ “akutso fɛɛ akutso kɛ wiemɔ fɛɛ wiemɔ kɛ maŋ fɛɛ maŋ kɛ jeŋmaŋ fɛɛ jeŋmaŋ mli.” Akɛ wala ni gbele bɛ mli eduro mɛnɛɛmɛi hu. (Kpoj 5:9, 10; 1 Kor. 15:42-44, 53) Amɛteŋ mɛi ni fa etee ŋwɛi momo, ni mɛi ni eshwɛ yɛ shikpɔŋ nɔ lɛ feɔ “tsulɔ anɔkwafo kɛ nilelɔ” kuu lɛ ni kɛ anɔkwayeli haa nakai Maŋtsɛyeli lɛ he nitsumɔi yaa hiɛ yɛ biɛ lɛ.—Mat. 24:45-47.

 8, 9. (a) Mɛɛ mligbalamɔi kɛ hewalɛi ni fiteɔ nii Maŋtsɛyeli nɛɛ baajie kɛya? (b) No hewɔ lɛ, kɛ wɔmiisumɔ ni wɔkwa Nyɔŋmɔ Maŋtsɛyeli lɛ henyɛlɔi ni wɔɔtsɔmɔ lɛ, mɛɛ gbɛjianɔtoi kɛ nifeemɔi esa akɛ wɔkwa ni wɔkɛ wɔhe akawo mli?

⁸ Etsɛŋ kwraa, yɛ Yehowa be ni eto mli lɛ, ebalafoi lɛ baatsu nii ni akɛtsuu shikpɔŋ lɛ he. Amɛbaakpata adesai ni ejɛ amɛsuɔmɔ mli amɛkwa Nyɔŋmɔ, kɛ mɛi ni ekpoo enɔyeli lɛ ni amɛbuuu gbɛjianɔ ni suɔmɔ yɔɔ mli ni eto kɛtsɔ Yesu Kristo nɔ lɛ fɛɛ hiɛ. (2 Tes. 1:6-9) Enɛ baafee Yehowa gbi, be ni ejɛ jeeŋmɔ beebe eto akɛ ekɛaabu Jeŋ Muu Fɛɛ Maŋtsɛ ni eji lɛ bem lɛ.

⁹ Abaakpata apasa jamɔi fɛɛ kɛ adesa nɔyelii fɛɛ kɛ amɛ asraafoi ni je nɛɛ nɔyelɔ yiwalɔ ni anaaa lɛ lɛ kɛ amɛ tsuɔ nii lɛ ahiɛ kɛya naanɔ. Abaafolɔ mɛi fɛɛ ni jieɔ amɛhe kpo akɛ je nɛɛ fa ni amɛdiɔ pɛsɛmkunya, anɔkwale ni ayeee, kɛ jeŋba shara sɛɛ lɛ ashwie yɛ gbele mli. Abaajie Satan kɛ edaimonioi lɛ kɛjɛ shikpɔŋ lɛ nɔ bii ateŋ ni akɛ amɛ ato he ko banee afii akpe. Mɛɛ heyeli po enɛ baaji aha mɛi fɛɛ ni sumɔɔ jalɛ nifeemɔ lɛ nɛkɛ!—Kpoj. 18:21, 24; 19:11-16, 19-21; 20:1, 2.

OTII NI MAMƆ EHIƐ—BƆ NI AFEƆ ANAA

10. (a) Te Mesia Maŋtsɛyeli lɛ baatsu Yehowa yiŋtoo kɛha shikpɔŋ nɛɛ he nii aha tɛŋŋ? (b) Mɛni enɛ baatsɔɔ aha gbɔmɛi ni yɔɔ shikpɔŋ nɔ lɛ yɛ nakai be lɛ mli?

¹⁰ Mesia Maŋtsɛyeli nɛɛ baatsu Nyɔŋmɔ shishijee yiŋtoo kɛha shikpɔŋ lɛ he nii kɛyashi naagbee. (1 Mose 2:8, 9, 15; 1:28) Gbɔmɔ nyɛko atsu nakai yiŋtoo lɛ he nii kɛbashi ŋmɛnɛ. Shi, akɛ “jeŋ ni baaba” lɛ eto gbɔmɔ Bi lɛ ni ji Yesu Kristo shishi. Mɛi fɛɛ ni baaje Yehowa kojomɔ ni akɛbaaba gbɛjianɔtoo momo nɛɛ nɔ lɛ mli lɛ baatsu nii yɛ ekomefeemɔ mli yɛ Kristo ni ji Maŋtsɛ lɛ shishi, ni amɛkɛ miishɛɛ baatsu nɔ fɛɛ nɔ ni ekudɔɔ lɛ bɔni afee ni shikpɔŋ lɛ atsɔ jeŋ muu fɛɛ Paradeiso. (Heb. 2:5-9) Adesai fɛɛ baaye amɛninenaa nitsumɔ mli ŋɔɔmɔ ni amɛbaana shikpɔŋ nɛɛ nibaa nii lɛ fɛɛ mli ŋɔɔmɔ.—Lala 72:1, 7, 8, 16-19; okɛto Yesaia 65:21, 22 he.

11. (a) Mɛɛ gbɛ nɔ abaatsɔ aha Maŋtsɛyeli lɛ shishibii aye emuu yɛ jwɛŋmɔ kɛ gbɔmɔtso mli yɛ? (b) Mɛni baafata enɛ he?

¹¹ Beni abɔ Adam kɛ Hawa lɛ, no mli lɛ amɛyeɔ emuu, ni eji Nyɔŋmɔ yiŋtoo akɛ shikpɔŋ lɛ anɔ ayi obɔ kɛ amɛshwiei, ni mɔ fɛɛ mɔ aye emuu yɛ jwɛŋmɔŋ kɛ gbɔmɔtso mli hu. Nakai yiŋtoo lɛ baaba mli anɔkwale yɛ Maŋtsɛyeli nɛɛ nɔyeli shishi. Enɛ biɔ ni ajie nɔ ni ejɛ esha mli eba lɛ fɛɛ kɛya, ni yɛ enɛ hewɔ lɛ, Kristo tsuɔ nii, jeee akɛ Maŋtsɛ pɛ kɛkɛ, shi moŋ akɛ Osɔfonukpa hu. Ebaajɛ tsuishitoo mli eye ebua eshishibii heshibalɔi lɛ ni amɛna lɛ diɛŋtsɛ ewala akɛ adesa ni ekɛsha afɔle lɛ jara ni kpataa haa esha lɛ he sɛɛ. Abaagbele shwilafoi ahiŋmɛii. Toimulɔi atoii baanu nii. Hewolo ni hiɛ ekua yɛ gbɔlɛ aloo hela hewɔ lɛ baafee trotro fe abifao nɔ. Akɛ gbɔmɔtsoŋ hewalɛ ni hi baato gbɔjɔmɔi ni eka gbɔmɔ he lɛ najiaŋ. Gbi ko baaba ni mɔ ko ekɛŋ akɛ “migbɔjɔ” ejaakɛ abaakpɔ adesai ni sheɔ Nyɔŋmɔ gbeyei lɛ kɛjɛ jatsu ni esha kɛfɔ amɛnɔ lɛ kɛ awerɛho shihilɛ ni jɛɔ mli baa lɛ shishi.—Okɛto Yesaia 33:22, 24; 35:5, 6; Hiob 33:25; Luka 13:11-13 he.

12. (a) Mɛni hu adesa emuuyeli biɔ? (b) Mɛɛ gbɛ nɔ atsɔɔ anaa enɛ, ni mɛni baajɛ mli aba?

¹² Shi, emuuyeli ni aaana lɛ biɔ babaoo fe gbɔmɔtsoŋ kɛ jwɛŋmɔŋ hewalɛnamɔ kɛkɛ. Nɔ ni fata he ji Yehowa sui ni aaajie lɛ kpo atsɔɔ, ejaakɛ abɔ gbɔmɔ ‘yɛ Nyɔŋmɔ subaŋ kɛ ehe nɔ.’ (1 Mose 1:26) Yɛ enɛ hewɔ lɛ, tsɔsemɔ babaoo he baahia. Gbɛjianɔtoo Hee ni “jalɛ hiɔ mli” nɛ, no hewɔ lɛ, taakɛ gbalɔ Yesaia gba efɔ shi lɛ, ‘je lɛŋ bii lɛ fɛɛ baakase jalɛ.’ (2 Pet. 3:13; Yes. 26:9) Subaŋ nɛɛ kɛ toiŋjɔlɛ baa—toiŋjɔlɛ yɛ jeŋmaji fɛɛ mli gbɔmɛi ateŋ, yɛ nanemɛi ateŋ, yɛ mɔ diɛŋtsɛ weku mli, kɛ agbɛnɛ, nɔ ni fe fɛɛ lɛ, yɛ ekɛ Nyɔŋmɔ teŋ. (Yes. 32:17; Lala 85:11-14) Abaatsɔse mɛi ni kaseɔ jalɛ lɛ fiofio ni amɛle nɔ ni ji Nyɔŋmɔ suɔmɔnaa nii kɛha amɛ. Beni suɔmɔ kɛha Yehowa gbɛi heɔ shi yɛ amɛtsuii amli lɛ, amɛbaanyiɛ enɛ sɛɛ yɛ amɛshihilɛ mli nifeemɔi fɛɛ mli. Yesu ni ji gbɔmɔ ni yeɔ emuu lɛ nyɛ ekɛɛ akɛ, ‘nɔ ni sa mi-Tsɛ hiɛ mifeɔ daa.’ (Yoh. 8:29) Kwɛ bɔ ni shihilɛ baaŋɔɔ aha, beni enɛ bafeɔ anɔkwale yɛ adesai fɛɛ ahe lɛ!

NITSUMƆI NI ANA MOMO

13. Okɛ sanebimɔi ni yɔɔ yiteŋgbɛ nɛɛ atsɔɔ nɔ ni Maŋtsɛyeli lɛ etsu kɛ nɔ ni esa akɛ wɔka he wɔtsu lɛ mli.

¹³ Naakpɛɛ nibii pii ni Maŋtsɛyeli lɛ etsu momo lɛ jeɔ kpo faŋŋ kɛhaa gbɔmɛi ni hiɛ hemɔkɛyeli hiŋmɛi lɛ. Sanebimɔi ni nyiɛ sɛɛ nɛɛ kɛ Ŋmalɛi ni atsɛ lɛ baakai bo nɛkɛ nibii nɛɛ ekomɛi, kɛ nibii ni Maŋtsɛyeli lɛ shishibii fɛɛ baanyɛ afee kɛ nɔ ni esa akɛ amɛhiɛ efeemɔ mli bianɛ:

Namɔ Maŋtsɛ lɛ te shi ewo klɛŋklɛŋ, ni mɛni ejɛ mli eba? (Kpoj. 12:7-10, 12)

Mɛɛ kuu mlibii anaabuamɔ ni ji naagbee nɔ agbala jwɛŋmɔ kɛba nɔ oya beni akɛ Kristo ta maŋtsɛsɛi nɔ lɛ sɛɛ? (Mat. 24:31; Kpoj. 7:1-4)

Yɛ Mateo 25:31-33 lɛ, mɛɛ nitsumɔ kroko Yesu gba fɔ shi akɛ ebaatsu beni akɛ lɛ eta sɛi nɔ lɛ, dani ekpata mɛi fɔji lɛ ahiɛ?

Mɛɛ gbɛ nɔ atsɔɔ atsuɔ nitsumɔ nɛɛ? Namɛi naa mli gbɛfaŋnɔ? (Mat. 24:14; Lala 110:3; Kpoj. 14:6, 7)

Mɛni hewɔ maŋkwramɔŋ kɛ jamɔŋ shitee-kɛ-wolɔi lɛ nyɛɛɛ atsi naa lɛ? (Bɔf. 5:38, 39; Zak. 4:6)

Yɛ tsɔsemɔ nitsumɔ ni atsuɔ nɛɛ hewɔ lɛ, mɛɛ tsakemɔi eba momo yɛ gbɔmɛi ni kɛ amɛhe haa Maŋtsɛyeli nɔyeli lɛ ashihilɛ mli? (Yes. 2:4; 1 Kor. 6:9-11)

BƆ NI MAŊTSƐYELI LƐ JI NƆ NI HIƆ SHI DAA LƐ

14. (a) Be enyiɛ Kristo kɛbaaye maŋtsɛ? (b) Mɛni abaatsu agbe naa yɛ nakai be lɛ mli?

¹⁴ Beni akɛ Satan kɛ edaimonioi lɛ ewo bu kwɔŋkwɔŋ lɛ mli sɛɛ lɛ, Yesu Kristo kɛ ehefatalɔi niyelɔi 144,000 lɛ baaye maŋtsɛ afii akpe. (Kpoj. 20:6) Akɛ adesai fɛɛ baaba emuuyeli mli yɛ nakai be lɛ mli. Abaajie nɔyelii kɛ hegbɛi kɛ hewalɛi fɛɛ ni teɔ shi shiɔ Yehowa lɛ kɛya. Beni afee enɛ agbe naa lɛ, Yesu baaku sɛɛ ekɛ Maŋtsɛyeli lɛ aha e-Tsɛ lɛ, “koni Nyɔŋmɔ afee nibii fɛɛ ayitso.”—1 Kor. 15:24, 28.

15. Yɛ mɛɛ gbɛ nɔ eji anɔkwale akɛ Maŋtsɛyeli nɛɛ ‘fiteŋ dɔŋŋ kɛaatee naanɔ’?

¹⁵ Enɛ tsɔɔ akɛ Yesu diɛŋtsɛ gbɛhe ni kɔɔ shikpɔŋ nɛɛ he lɛ baatsake. Shi, enɔyeli lɛ baafee “naanɔ nɔyeli ni hoŋ eyaŋ,” ni e-Maŋtsɛyeli lɛ “nɔ ni fiteŋ ni.” (Dan. 7:14) Yɛ mɛɛ shishinumɔ naa? Kɛ shishinumɔ akɛ ashiŋ nɔyeli hegbɛ lɛ ahaŋ mɛi krokomɛi ni hiɛ yiŋtoi sɔrɔtoi. Nɔ ni Maŋtsɛyeli lɛ baatsu lɛ ‘fiteŋ dɔŋŋ kɛaatee naanɔ.’ Nɔ ni Maŋtsɛyeli lɛ tsuɔ ekɛfaa Yehowa gbɛi kɛ eyiŋtoo kɛha shikpɔŋ nɛɛ he lɛ baadamɔ shi kɛaatee naanɔ.

[Shishigbɛ niŋmaa]

SANEGBAA NI AKƐTIƆ MLI

● Mɛni hewɔ Nyɔŋmɔ Maŋtsɛyeli lɛ ji tsabaa kometoo pɛ ni yɔɔ kɛha adesai anaagbai lɛ? Mɛɛ be enɔyeli lɛ je shishi?

● Mɛni ŋɔɔ onaa titri yɛ Nyɔŋmɔ Maŋtsɛyeli lɛ kɛ nɔ ni ebaatsu lɛ he? Mɛni hewɔ?

● Mɛɛ nibii ni Maŋtsɛyeli lɛ etsu momo wɔnaa? Mɛɛ gbɛfaŋnɔ wɔnaa yɛ enɛ mli?

[Mfoniri ni yɔɔ baafa 84, 85]

Jalɛ ji nɔ ni gbɔmɛi lɛ baakase