Yitso 15
Maŋtsɛyeli lɛ Sɛɛfilɔi Anɔkwafoi
1. Mɛɛ nibii wuji komɛi Daniel gba efɔ shi?
MRA mli tɔ̃ɔ kɛtsɔ hiɛ lɛ, Daniel gbalɛ lɛ gbala jwɛŋmɔ kɛtee afi 29 Ŋ.B. nɔ akɛ afi nɔ ni Mesia lɛ baapue akɛ adesa, kɛ afi 1914 Ŋ.B. hu akɛ afi nɔ ni akɛ lɛ ta maŋtsɛsɛi nɔ yɛ ŋwɛi anunyam mli lɛ. Kɛfata he lɛ, Daniel gba bɔ ni aaafee ana naataomɔ kpele ni kɔɔ je lɛ nɔyeli he lɛ naa lɛ hu fitsofitso efɔ shi.
2. Mɛɛ sane esa akɛ akojo agbɛnɛ, ni yɛ mɛɛ kojomɔ he?
2 Agbɛnɛ esa akɛ akojo sane kpele ni kɔɔ mɔ ni sa akɛ eye shikpɔŋ lɛ nɔ lɛ he lɛ kɛyashi enaagbee kwraa. Shi yɛ mɛɛ kojomɔ he? Ojogbaŋŋ, yɛ kojomɔ he ni nɔ kwɔ fe fɛɛ yɛ jeŋ muu fɛɛ lɛ mli! Daniel kɛ nɛkɛ wiemɔi nɛɛ wieɔ he, akɛ:
“Mihiɛ kwɛmɔ aahu kɛyashi beyinɔ ni akɛ maŋtsɛsɛii bamamɔ shi, ni Mɔ ni Eye Gbii Pii lɛ ho ta shi, ni etade yɛɔ tamɔ snoo, ni eyiteŋ tsɔi tamɔ too he tsɔi ŋmiiŋmi, emaŋtsɛsɛi lɛ lalilɛii sɔŋŋ ni, ehe kokrolontoi lɛ, la ni tsoɔ grigri ni. La faa miiho kɛmiijɛ ehiɛ gbɛ; mɛi akpei akpe sɔmɔɔ lɛ, ni mɛi akpei nyɔŋma nyɔŋma toi akpei nyɔŋma damɔ ehiɛ. Kojolɔi lɛ ho tara shi, ni agbele woji anaa.”—Daniel 7:9, 10.
3. (a) Namɔ ji Kojolɔ lɛ? (b) Mɛni “woji” lɛ tsɔɔ? (d) Mɛɛ kojomɔ akɛha?
3 Enɛ tsɔɔ akɛ “naanɔ Maŋtsɛ,” Yehowa Nyɔŋmɔ ba ebata shi koni ekojo. (Kpojiemɔ 15:3) Shi mɛni ji “woji” ni agbele naa yɛ ehiɛ amrɔ nɛɛ? Nomɛi ji nɔyeli mli nifeemɔi gbohii ni jeŋmaji lɛ eshi yɛ amɛsɛɛ yɛ yinɔsane be fɛɛ mli lɛ. Akɛni Jeŋmajiaŋbii Abei lɛ ba naagbee yɛ 1914 Ŋ.B. hewɔ lɛ, “Kojomɔ He lɛ” hé “amɛ maŋtsɛyeli” hegbɛi lɛ yɛ amɛdɛŋ yɛ gbɛ ni ja nɔ, eyɛ mli akɛ “ato amɛ be kɛ ŋmɛlɛtswaa ni amɛwala sɛɛ atsɛ kɛyashi”—kɛyashi beyinɔ ni abaatsu kojomɔ he nii diɛŋtsɛ yɛ amɛnɔ yɛ Harmagedon.—Daniel 7:12; Kpojiemɔ 16:14, 16.
4, 5. (a) Namɔ akɛ nɔyeli hegbɛ ha? (b) Mɛɛ gbɛ pɛ nɔ wɔɔtsɔ wɔle ba ni Maŋtsɛ lɛ eba lɛ?
4 Belɛ, namɔ akɛ nɔyeli lɛ baaha mɔ? Daniel yaa nɔ akɛ:
“Misaa mina yɛ nyɔɔŋ ninaa lɛ mli, ni naa, mɔ ko tamɔ gbɔmɔ Bi kɛ ŋwɛi atatui miiba, ni eba Mɔ ni eye Gbii Pii lɛ ŋɔɔ, ni akɛ lɛ ba ehiɛ; ni aha lɛ nɔyeli kɛ anunyam kɛ maŋtsɛyeli, koni majimaji kɛ asafoi kɛ wiemɔi lɛ fɛɛ asɔmɔ lɛ. Enɔyeli lɛ naanɔ nɔyeli ni hoŋ eyaŋ ni, ni emaŋtsɛyeli lɛ, nɔ ni fiteŋ ni.”—Daniel 7:13, 14.
5 Namɔ ji nɛkɛ “mɔ ko tamɔ gbɔmɔ Bi” nɛɛ? Ejeee mɔ ko mɔ ko fe Nuŋtsɔ Yesu Kristo ni awo ehiɛ nyam lɛ. Akɛni “ŋwɛi atatui” lɛ feɔ na ni anaaa lɛ kɛ hiŋmɛi lɛ he mfoniri hewɔ lɛ, hemɔkɛyeli hiŋmɛi ni akɛyooɔ nii ji nɔ ni wɔkɛaana ŋwɛi “okadi” ni tsɔɔ ba ni eba lɛ, kɛfata “okadi” ni baje kpo faŋŋ yɛ nibii ni tee nɔ yɛ shikpɔŋ nɔ yɛ “kɔɔmɔi lɛ abɔimɔ” lɛ mli yɛ afi 1914 Ŋ.B. lɛ he.—Mateo 24:3, 7, 8; Kpojiemɔ 1:7.
6. (a) Namɛi hu akɛ kojomɔ ha yɛ amɛhe? (b) Mɛni mɛnɛɛmɛi anine shɛ nɔ, ni yɛ mɛɛ gbɛ nɔ?
6 Wɔnaa kɛjɛɔ Daniel gbalɛ lɛ mli akɛ nɔ ni atee nɔ afee ji kojomɔ ni “[akɛ]ha Mɔ ni Yɔɔ Ŋwɛi Shɔŋŋ lɛ mɛi krɔŋkrɔŋi lɛ,” ni mɛnɛɛmɛi hu anine shɛ “maŋtsɛyeli lɛ kɛ nɔyeli lɛ kɛ maŋtsɛyelii ni yɔɔ ŋwɛi muu lɛ fɛɛ shishi lɛ” nɔ. (Daniel 7:22, 27) Namɛi ji nɛkɛ “mɛi krɔŋkrɔŋi” nɛɛ? Eka shi faŋŋ akɛ, esoro amɛ kwraa yɛ adesai anɔyelii amli nɔyelɔi fɔji hiɛjoolɔi, ni kɛ be babaoo eye gbɔmɛi lɛ anɔ kɛ nɔnyɛɛ lɛ ahe. Amɛjeee mɛi komɛi fe “mɛi krɔŋkrɔŋi” 144,000 ni afɔ amɛ mu, ni ji adesai ni “kpa ko bɛ amɛhe” yɛ amɛ emuuyeli mlihiɛmɔ gbɛfaŋ, ni “ahe kɛjɛ gbɔmɛi ateŋ” koni amɛtsɔmɔ “gbɔmɔ Bi lɛ” hefatalɔi nɔyelɔi yɛ eŋwɛi maŋtsɛyeli lɛ mli lɛ. Ateeɔ amɛ shi kɛbaa wala mli koni amɛkɛ lɛ ayahi shi “yɛ naagbee gbi lɛ nɔ.” (Kpojiemɔ 14:3-5; Mateo 24:30; Yohane 6:40) Beni Yesu ba emaŋtsɛyeli lɛ mli lɛ, ebanina nɛkɛ “mɛi krɔŋkrɔŋi” nɛɛ ateŋ shwɛɛnii ko ni amɛyɛ wala mli lolo yɛ shikpɔŋ nɔ. Ni amɛyɛ nitsumɔ ko ni esa akɛ amɛtsu!
NYƆŊMƆ WIEMƆ LƐ SƐƐFIMƆ
7, 8. (a) Mɛɛ kuu ko je hesaamɔ nitsumɔ shishi, ni mɛɛ be? (b) Mɛni amɛshɛ amɛfɔ̃ afã? (d) Mɛni amɛkɛ ekaa babaoo fi sɛɛ? (e) Mɛɛ afi ko ni baaba amɛtsɔ hiɛ amɛwie he? (ɛ) Mɛɛ dɛŋdade ko amɛkɛtsu nii kɛtswa Nyɔŋmɔ Maŋtsɛyeli lɛ he adafi?
7 Beni be shɛɔ kɛhaa “gbɔmɔ Bi lɛ” akɛ enine aaashɛ emaŋtsɛyeli lɛ nɔ lɛ, ebafee faŋŋ akɛ eji Nyɔŋmɔ suɔmɔnaa nii akɛ atsɔ̃ hiɛ atsu hesaamɔ nitsumɔ ko yɛ shikpɔŋ nɛɛ nɔ dã. Yɛ 1870 afii lɛ amli lɛ, Charles T. Russell to Kristofoi ni ejɔɔ amɛhe nɔ lɛ akuu bibioo ko he gbɛjianɔ yɛ Pittsburg, yɛ Pennsylvania, U.S.A. Etsɛɛɛ ni mɛnɛɛmɛi bayoo akɛ Kristendom jamɔ lɛ damɔ Babilonbii atsɔɔmɔi kɛ amɛkusumii anɔ, kɛfata Plato tsɔɔmɔi ni ji susuma ni gbooo lɛ ahe, shi jeee Nyɔŋmɔ Wiemɔ lɛ nɔ. Beni amɛshɛ́ apasa jamɔ amɛfɔ afã kwraa lɛ, nɛkɛ kuu bibioo nɛɛ bafee mɛi ni fiɔ Biblia tsɔɔmɔi ni ji Yesu kpɔmɔ nɔ lɛ, kɛ gbohiiashitee lɛ, kɛ Nyɔŋmɔ Maŋtsɛyeli lɛ akɛ hiɛnɔkamɔ kɛha adesai ni naa amanehulu lɛ sɛɛ waa.
8 Kɛtsɔ Buu-Mɔɔ wolo tɛtrɛɛ, ni akala aahu kɛtsara nɔ kɛjɛ July 1879 kɛbaa nɛɛ nɔ lɛ, Russell kɛ ehefatalɔi lɛ fi Biblia tsɔɔmɔi ni kɔɔ nibɔɔ he lɛ sɛɛ yɛ faŋŋ mli, ni amɛkɛte shi amɛwo Darwin su tsakemɔ tsɔɔmɔ lɛ. ‘Amɛfo nu amɛshwie hɛl nɔ’ kɛtsɔ Biblia lɛ mli ni amɛjɛ amɛtsɔɔ akɛ he ko kwraa ehiko shi dã ní la miitso yɛ jɛmɛ ákɛ ‘susumai ni egboi’ lɛ apiŋmɔ he, shi moŋ Biblia mli “hɛl’ lɛ ji gbonyo bu lɛ nɔ. (Lala 16:10; Bɔfoi lɛ Asaji 2:29-32) Amɛtsɔ hiɛ amɛgbala jwɛŋmɔ kɛtee afi 1914 Ŋ.B. nɔ akɛ be ko ni akadi ni kɔɔ Nyɔŋmɔ Maŋtsɛyeli lɛ ‘baa’ lɛ he. Ni kɛbashi ŋmɛnɛ, Buu-Mɔɔ Eetswa Yehowa Maŋtsɛyeli He Adafi, ni akalaa yɛ wiemɔi sɔrɔtoi fe 100 mli lɛ etee nɔ ekɛ anɔkwayeli etswa Nyɔŋmɔ Maŋtsɛyeli ni Kristo yeɔ nɔ lɛ he adafi akɛ adesai ajeŋmaji lɛ ahiɛnɔkamɔ koome pɛ ni yɔɔ, yɛ emli eko fɛɛ eko akpekpei abɔ ni akalaa lɛ mli.—Mateo 12:21; Lala 145:10-12.
9. Mɛɛ gbɛ nɔ Kpojiemɔ 11:7-12 ba mli yɛ nɛkɛ “odasefoi” nɛɛ ahe yɛ?
9 Beni ekɛ anɔkwayeli esɔmɔ aahu fe afii 30 akɛ Buu Mɔɔ Asafo lɛ klɛŋklɛŋ sɛinɔtalɔ sɛɛ lɛ, C. T. Russell gbo yɛ October 31, 1916, ni J. F. Rutherford baye esɛɛ. Jamɔ mli osɔfoi kɛ tawuu shihilɛ ni yaa nɔ lɛ miitsu nii koni amɛkɛtee shitee-kɛ-woo shi amɛwo Maŋtsɛyeli shɛɛ sane lɛ. Akpa Kristofoi akpeei feemɔ. Awo Nyɔŋmɔ tsuji anɔkwafoi pii atsuŋ yɛ maji babaoo nɔ. Abu Rutherford kɛ sɔɔlɔi onukpai krokomɛi kpawo ni jɛ Buu Mɔɔ Asafo lɛ nitsumɔ he yitso yɛ Brooklyn, New York, U.S.A. lɛ fɔ ni ayawo amɛ tsuŋ afii babaoo. Shi kɛlɛ, nɛkɛ Nyɔŋmɔ tsuji nɛɛ anijiaŋ ejeee wui, ejaakɛ Biblia gbalɛ egba nɛkɛ yiwai nɛɛ efɔ shi momo. Akɛ nɔkwɛmɔ nɔ lɛ, Kpojiemɔ 11:7-12 wieɔ jeŋmaji ni yɔɔ je lɛŋ lɛ ahe, yɛ “kooloo” he okadi ko shishi, akɛ eewuu ta eeshi Nyɔŋmɔ “odasefoi” lɛ, ni “eeeye amɛnɔ kunim, ni eeegbe amɛ.” Gba ni amɛgbaa lɛ sɛɛ baafo, ni yɛ mfoniri feemɔ mli lɛ, amɛbaatsɔmɔ tamɔ gbohii ni jwere shi etsɛ aahu akɛ ebɔi fujee yɛ Kristendom “blohu lɛ mli.” Enɛɛmɛi fɛɛ ba mli, beni ayeɔ Nyɔŋmɔ tsuji ni yɔɔ je lɛŋ he fɛɛ he lɛ ahe fɛo yɛ maŋbii fɛɛ ahiɛ lɛ. Shi, beni ta lɛ mli hoofeemɔ lɛ naa ba shi, kɛ agbɛnɛ beni ajie mɛi ni awo amɛ tsuŋ lɛ—ni ajie amale naafolɔmɔi ni akɛshi amɛ lɛ kɛjɛ amɛnɔ kwraa lɛ—ni “wala mumɔ jɛ Nyɔŋmɔ ŋɔɔ ba amɛmli.” Ahole amɛnɔ kɛtee gbɛhe ni ji Nyɔŋmɔ hiɛ duromɔ mli, ni kɛjɛ 1919 kɛbaa lɛ, amɛbote be kɛha Maŋtsɛyeli nitsumɔ kɛ ekaa mli.—Yesaia 52:7, 8; Romabii 10:15.
“BABILON KPETEŊKPELE LƐ” EGBEE SHI!
10. Mɛɛ la yi sɔ Kristendom jamɔi lɛ ye, ni yɛ mɛɛ gbɛ nɔ?
10 Nakai ta afii lɛ amli lɛ, jeee akɛ Kristendom osɔfoi lɛ nyiɛ hiɛ ni akɛwa anɔkwa Kristofoi ayi kɛkɛ, shi moŋ amɛkpoo odaseyeli ni tsɔɔ akɛ Nyɔŋmɔ Maŋtsɛyeli lɛ ebɛŋkɛ lɛ hu. Amɛto amɛ diɛŋtsɛ amɛ jamɔ mli “maŋtsɛyeli,” nɔ ni ji “Babilon Kpeteŋkpele lɛ.” (Kpojiemɔ 17:5, 6, 18) Amɛtsirɛ obalaŋtai ayisɛɛ amɛwo ta bui amli, yɛ fãi enyɔ ni kɛ amɛhe wuɔ lɛ fɛɛ mli, ni amɛjɛ amɛtsui mli tɔ̃ɔ amɛfi gbɔmɔgbee ni tee nɔ babaoo lɛ sɛɛ. Yɛ nɛkɛ nifeemɔ nɛɛ hewɔ lɛ, esa akɛ Kristendom osɔfoi lɛ aya nɔ amɛtere la yi sɔyeli kpele lolo, tamɔ nakai blema Yerusalem jamɔ mli hiɛnyiɛlɔi lɛ pɛpɛɛpɛ, mɛi ni Yehowa gbalɔ lɛ kɛwie ni ekɛɛ amɛ akɛ: “Anaa ohiafoi ni efeko nɔ ko lɛ asusumai lɛ ala yɛ otade naamui lɛ amli.”—Yeremia 2:34; 19:3, 4; kwɛmɔ Mateo 23:34, 35 hu.
11. Ezekiel 22:3, 4, 16 kɔɔ Kristendom he yɛ mɛɛ gbɛ nɔ?
11 Agbɛnɛ akɛ nɛkɛ la yi sɔyeli nɛɛ hu fata Kristendom wɔŋjamɔ kɛ Babilonbii amale tsɔɔmɔi ni etsɔɔ lɛ he. No hewɔ lɛ, gbalɔ Ezekiel wiemɔi lɛ saa Kristendom hemɔkɛyeli kwalɔ lɛ hu he akɛ:
“Bɔ ni Nuŋtsɔ Yehowa kɛɛ nɛ: ‘Bo maŋ ni oshwieɔ la shi yɛ omli, koni obe ashɛ, ni ofeɔ wɔji ohaa ohe ní okɛbule ohe! Ola ni ofɔse oshwie shi lɛ hewɔ lɛ otere sɔ̃, ni owɔji ni ofee lɛ okɛbule ohe; ni oha ogbii lɛ ebɛŋkɛ, ni oshɛ ofii lɛ amli; no hewɔ lɛ miŋɔo mifee ahorabɔɔ miha jeŋmaji lɛ kɛ hefɛoyeli miha shikpɔji lɛ fɛɛ. Ni aaabuleo yɛ jeŋmaji lɛ ahiɛ, ni ooona ole akɛ mi ji Yehowa lɛ.’ ”—Ezekiel 22:3, 4, 16.
12. (a) Mɛɛ nifeemɔ ko ni sa kadimɔ waa ba yɛ 1919? (b) Enɛ he ba sɛɛnamɔ kɛha Nyɔŋmɔ webii yɛ shikpɔŋ nɔ yɛ mɛɛ gbɛ nɔ?
12 Nyɔŋmɔ, Yehowa, mɔ ni Kristendom kɛɛ ejaa lɛ, shi esumɔɔɔ ni ekɛ egbɛi tsuɔ nii dɔŋŋ lɛ nɔŋŋ shɛ́ ejamɔ ni eye la yi sɔ̃ lɛ efɔ̃. Yɛ afi 1919 Ŋ.B. lɛ, ekɛ Babilonbii ajamɔi krokomɛi ni yɔɔ je lɛŋ lɛ fɛɛ lɛ ashigbeemɔ kpeteŋkpele ko ba. Enyɛɛɛ ena shidaamɔ kpakpa yɛ Ŋwɛi Flooflonyo lɛ hiɛ dɔŋŋ. Enyɛɛɛ ena hewalɛ ko hu yɛ Yehowa anɔkwa jalɔi anɔ dɔŋŋ. Ni nakai nɔŋŋ Babilon Kpeteŋkpele, ni ji jeŋ apasa jamɔ maŋtsɛyeli lɛ fa ko hu nyɛɛɛ ana amɛnɔ hewalɛ. Ejaakɛ agbɛnɛ “Nuŋtsɔ Yehowa” kɛ tsɛmɔ nɛɛ eha “mɛi krɔŋkrɔŋi” anɔkwafoi ni yɔɔ shikpɔŋ nɔ lɛ akɛ:
“ ‘Mi ji Yehowa, o-Nyɔŋmɔ lɛ, Mɔ ni tsɔɔo nii ni hi hao, Mɔ ni tsɔɔo gbɛ ni onyiɛ nɔ lɛ.’ Nyɛjea Babel, . . . Nyɛjajea enɛ nyɛtsɔɔa [kɛ miishɛɛ gbee], nyɛgbaa.” (Yesaia 48:16, 17, 20)
Mɛni ji nɛkɛ “miishɛɛ gbee” nɛɛ, ni nɛgbɛ anu yɛ?
JEŊ FƐƐ ODASEYELI KO JE SHISHI
13. (a) Mɛɛ “miishɛɛ gbee” nɛɛ he nifeemɔ ko bahe shi jogbaŋŋ agbɛnɛ? (b) Mɛɛ ninefɔɔ ko akɛha kɛ gbee ni wa?
13 “Gbɔmɔ Bi lɛ” wie nɛkɛ “miishɛɛ gbee” nɛɛ he sane ko ni he hiaa waa he yɛ egbalɛ ni kɔɔ “nibii agbɛjianɔtoo lɛ naagbee lɛ” he lɛ mli, ni ekɛɛ:
“Ni aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase; ni no dani naagbee lɛ aaaba.” (Mateo 24:3, 14, 37)
Shi ehe miihia ni ato “mɛi krɔŋkrɔŋi” lɛ ahe gbɛjianɔ koni amɛnyɛ amɛtsu nɛkɛ nitsumɔ nɛɛ. Ni amɛnyɛŋ amɛtsu kɛ adesai ahewalɛ folo kɛkɛ. Shi miishɛɛ sane ji akɛ, Yehowa fɔse emumɔ lɛ eshwie amɛnɔ yɛ naakpɛɛ gbɛ nɔ, yɛ majimaji ateŋ kpeei wuji ni afee yɛ Cedar Point, yɛ Ohio, U.S.A., yɛ 1919, kɛ agbɛnɛ hu yɛ 1922 lɛ ashishi. Eto amɛhe gbɛjianɔ ni ewo amɛ hewalɛ hu koni ‘amɛtswa, amɛtswa, amɛtswa Maŋtsɛ lɛ kɛ emaŋtsɛyeli lɛ he adafi.’ Nitsumɔ kpele ko kã nɛkɛ “mɛi ni ahala,” ni hiɛ ŋwɛi hiɛnɔkamɔ lɛ mli kpɛŋŋ nɛɛ ahiɛ ni amɛbaatsu.—Mateo 24:31.
14. Yoel gbalɛ lɛ na emlibaa ni da agbɛnɛ yɛ mɛɛ gbɛ nɔ?
14 Taakɛ bɔ ni Yoel gbalɛ lɛ ba mli yɛ Pentekoste afi 33 Ŋ.B. yɛ Yudafoi anibii agbɛjianɔtoo lɛ “naagbee gbii” lɛ amli lɛ, amrɔ nɛɛ, nakai gbalɛ lɛ mlibaa ni da ebɔi baa yɛ Satan jeŋ gbɛjianɔtoo nɛɛ “naagbee gbii” lɛ amli. Akɛni Nyɔŋmɔ mumɔ lɛ ha amɛ sɛɛyoomɔ kɛ kanyamɔ hewɔ lɛ, Yehowa ‘bihii kɛ biyei’ ni afɔ amɛ mu, ni yɔɔ ŋmɛnɛŋmɛnɛ beaŋ lɛ ‘gba kɛ̃,’ beni amɛkɛ amɛbe fɛɛ tsuɔ nii ni amɛkɛbɔɔ adesai aje lɛ kɔkɔ yɛ “Nuŋtsɔ [Yehowa] gbi wulu ni yɔɔ nyam lɛ” baa lɛ he, kɛ bɔ ni ehe hiaa waa hu akɛ ‘abo atsɛ Yehowa gbɛi lɛ’ koni ana yiwalaheremɔ lɛ.—Bɔfoi lɛ Asaji 2:16-21; Yoel 3:1-5.
“TSULƆ” ANƆKWAFO KO
15. (a) Namɔ ji “tsulɔ anɔkwafo kɛ nilelɔ” lɛ? (b) Te afeɔ tɛŋŋ ayooɔ lɛ ekoŋŋ yɛ ŋmɛnɛŋmɛnɛ beaŋ?
15 Yesu bi sane ko yɛ egbalɛ kpeteŋkpele ni kɔɔ “okadi” lɛ he lɛ mli akɛ:
“Belɛ namɔ ji tsulɔ anɔkwafo kɛ nilelɔ, mɔ ni enuŋtsɔ ŋɔ lɛ eto ewebii lɛ anɔ, koni eha amɛ amɛŋmaa yɛ be ni sa nɔ lɛ?”
“Tsulɔ” anɔkwafo kuu ko sɔmɔ aahu yɛ mra be mli Kristofoi lɛ ateŋ kɛyashi be mli ni hemɔkɛyeli kwamɔ kpele lɛ babote mli. Ani wɔnaa “tsulɔ” gbɛjianɔtoo ni tamɔ nɛkɛ ekoŋŋ, ni eeha mumɔŋ niyenii beni Nuŋtsɔ Yesu ba emaŋtsɛyeli lɛ mli lɛ? Hɛɛ wɔnaa! Nakai “Biblia Kaselɔi,” taakɛ atsɛɔ amɛ lɛ, etsu jeŋ muu fɛɛ hesaamɔ nitsumɔ ko. Ni Yesu wie akɛ:
“Ajɔɔ nakai tsulɔ lɛ, mɔ ni beni enuŋtsɔ baa lɛ, ni eeebanina lɛ akɛ eefee nakai lɛ. Lɛlɛŋ, miikɛɛ nyɛ akɛ, eeeŋɔ lɛ eto enii fɛɛ kwa nɔ.”—Mateo 24:45-47.
16. (a) Mɛɛ gbɛ nɔ “tsulɔ” lɛ ekwɛ Nuŋtsɔ lɛ “nibii” anɔ yɛ? (b) Mɛɛ Ŋmalɛ naa gbɛi ko “tsulɔ” lɛ kɛ miishɛɛ kpɛlɛ nɔ?
16 Akɛni amɛhiɛ sɔɔ nɛkɛ halamɔ ni Nuŋtsɔ lɛ ehala amɛ nɛɛ hewɔ lɛ, “tsulɔ” ni afɔ lɛ mu ni ji kuu nɛɛ ekwɛ Maŋtsɛyeli lɛ he nibii ni yɔɔ shikpɔŋ nɛɛ nɔ lɛ anɔ jogbaŋŋ, ni ekwɛ ni aashiɛ “sanekpakpa” lɛ aatsɔɔ. Yɛ 1920 afii lɛ amli lɛ, ajaje kojomɔ shɛɛ saji ni mli wa waa ashi Satan kɛ egbɛjianɔtoo lɛ, kɛ titri lɛ, kɛshi Babilonbii ajamɔ hu. Yɛ 1931 mli lɛ, “tsulɔ” lɛ kɛ miishɛɛ kpɛlɛ gbɛi ni haa anaa akɛ esoro lɛ kwraa yɛ apasa jamɔ he—ni ji gbɛi “Yehowa Odasefoi” lɛ nɔ—kɛfata gbɛnaa nitsumɔ kɛ hegbɛ ni gbalɔ Yesaia wie kɛ nɛkɛ wiemɔi nɛɛ he, akɛ:
“Yehowa kɛɛ, ‘Nyɛ ji midasefoi, kɛ mitsulɔ ni mihala. . . . Mi ji Yehowa lɛ, ni yiwalaherelɔ ko bɛ, ja mi! . . . Nyɛ ji midasefoi,’ Yehowa kɛɛ, ‘ni mi, mi ji Mawu lɛ.’ ”—Yesaia 43:10-12.
17. Mɛɛ sanebimɔ ehe hiaa ni aha hetoo agbɛnɛ?
17 Te “tsulɔ” lɛ, kɛ emlibii ni afɔ amɛ mu ni eshwɛ ni yɔɔ, ni amrɔ nɛɛ amɛyifalɛ shɛɔ akpei fioo ko pɛ lɛ baafee tɛŋŋ ‘ashiɛ maŋtsɛyeli lɛ he sanekpakpa nɛɛ ni ekɛye jeŋmaji fɛɛ odase’? Etsɛŋ ni Yehowa kɛ hetoo lɛ baaha.
[Mfonirii ni yɔɔ baafa 148, 149]
BIBLIA MAŊTSƐYELI SANEYITSO LƐ
EDEN SHIWOO NI KƆƆ MAŊTSƐYELI “SESHI” HE
MAŊTSƐYELI “SESHI” NI AGBA AFƆ SHI KƐTSƆ ABRAHAM, DAVID NƆ
MAŊTSƐYELI SHIƐMƆ—MAŊTSƐ LƐ KPƆMƆ AFƆLESHAA
ATO MAŊTSƐYELI AMA SHI—“NAAGBEE GBII” KƐJƐ 1914
MAŊTSƐYELI LƐ ‘BAA’ NI EBAKPATA ADESA NƆYELI HIƐ
AFII 1,000 MAŊTSƐYELI KƐ PARADEISO BAABA