Yitso 5
Fa 5: Nyɔŋmɔ Afii Akpe Maŋtsɛyeli Lɛ Ebɛŋkɛ
Bɔni Akɛ Hefatalɔi Maŋtsɛmɛi Lɛ Woɔ Amɛ Gbɛhe
1. Mɛni hewɔ mɔ ko bɛ ni sa akɛ efeɔ maŋtsɛ yɛ adesai anɔ fe Yesu Kristo lɛ?
1 MƐƐ maŋtsɛ ni hi fe Kristo Yesu Nyɔŋmɔ Bi lɛ adesai baanyɛ ana akɛ amɛmaŋtsɛ? Mɛɛ adesa maŋtsɛ ko yɔɔ ni sumɔɔ ewebii lɛ babaoo akɛ eeeshi enunyam lɛ yɛ sɛɛ ni ekɛ ewala abafɔ shi akɛ mɔ ni esha ko bɛ ehe aha lɛ diɛŋtsɛ ewebii? Kɛji akɛ ekɛ ewala fɔ shi yɛ gbɛ ni pɛsɛmkunya bɛ mli nɔ po eha ewebii lɛ, mɛɛ naanɔ sɛɛnamɔ aaajɛ mli aba aha amɛ? Shi yɛ Yesu Kristo, Nyɔŋmɔ Bi lɛ gbɛfaŋ lɛ, eshi eŋwɛi anunyam ni eyɔɔ yɛ e-Tsɛ lɛ ŋɔɔ lɛ ni ebatsɔ gbɔmɔ ko kɛkɛ, mɔ ni eye emuu moŋ, shi kɛ̃lɛ “shwɛ fioo ni ekɛ mɛi ni tamɔ nyɔŋmɔi lɛ aye egbɔ,” “shwɛ fioo kɛkɛ ni ekɛ ŋwɛibɔfoi aye egbɔ.” (Lala 8:6; Heb. 2:9, NW) Agbɛnɛ taakɛ bɔni Nyɔŋmɔ suɔmɔnaa nii ji lɛ, eba ehe shi lolo kɛyashi be mli ni gbɔmɛi tsɔ awuyeli nɔ amɛgbe lɛ yɛ be mli ni Nyɔŋmɔ efɔ lɛ mu ni ebafee Mesia Maŋtsɛ lɛ sɛɛ. Jeee akɛ enɛ ji suɔmɔ ni eyɔɔ kɛha adesai lɛ kpojiemɔ ni nɔ ko kɛ lɛ yeee egbɔ kɛkɛ, shi moŋ egbele lɛ hu kɛ adesa afɔleshaa ni yeɔ emuu ni Nyɔŋmɔ kpɛlɛɔ nɔ ha kɛha adesai fɛɛ anaanɔ sɛɛnamɔ. Namɔ ni fe mɔ nɛɛ baanyɛ ajie lɛ diɛŋtsɛ eyi eha adesai akɛ mɔ ni sa akɛ efeɔ amɛmaŋtsɛ?
2. (a) Yɛ mɛɛ gbɛ nɔ gbɔmɛi ni yɔɔ ŋmɛnɛ lɛ tamɔ mɛi ni hi shi yɛ klɛŋklɛŋ afii oha lɛ mli lɛ nɔŋŋ yɛ Yesu Kristo ni amɛaasumɔ lɛ akɛ maŋtsɛ lɛ gbɛfaŋ? (b) Mɛni he hiaa titri yɛ mɔ ni adesai aaana lɛ akɛ maŋtsɛ lɛ he?
2 Afii ohai nyɔŋma kɛ nɛɛhu ni eho nɛ lɛ, no mli lɛ gbɔmɛi ni heɔ adesa maŋkwramɔ nɔyeli kɛkɛ amɛyeɔ lɛ sumɔɔɔ ni ebafeɔ amɛmaŋtsɛ; no hewɔ ni amɛbo amɛtsɛ́ Roma amralo lɛ koni egbe lɛ tamɔ mɔ ko ni ji apasa Kristo, epasa Mesia lɛ. Ŋmɛnɛ, adesai ateŋ mɛi ni fa, yɛ Kristendom po sumɔɔɔ Iɛ akɛ amɛmaŋtsɛ diɛŋtsɛ, shi moŋ nɔ ni amɛfeɔ ji maŋkwramɔŋ saji ni amɛkɛ amɛhe woɔ mli koni amɛkɛtao adesa nɔyelɔ ni amɛgbɛɔ Kristofoi ni kaseɔ amɛ Hiɛnyiɛlɔ, Yesu diɛŋtsɛ lɛ he guɔ, ni amɛteɔ shi amɛwoɔ amɛ ni amɛwaa amɛyi. Shi kɛji akɛ adesai ateŋ mɛi ni fa ŋmɛnɛ sumɔɔɔ Yesu Kristo akɛ amɛŋwɛi Maŋtsɛ diɛŋtsɛ lɛ mɛni? Ani no kɛ saji woɔ adesai ni yɔɔ wala mli kɛ mɛi ni egboi lɛ adɛŋ ni amɛto yiŋ amɛha amɛdiɛŋtsɛ amɛhe? Nɔ ni he hiaa lɛ ji Nyɔŋmɔ Ofe lɛ yiŋtoo. Ekpɛlɛ e-Bi Yesu nɔ yɛ be mli ni Yohane Baptisilɔ lɛ baptisi lɛ yɛ Yordan Faa lɛ mli lɛ. Ekpɛlɛ e-Bi lɛ nɔ yɛ be mli ‘ni etsake yɛ anunyam mli yɛ odasefoi etɛ ahiɛ yɛ gɔŋ ko ni kwɔ gojoo ko nɔ yɛ Palestina kooyigbɛ lɛ. (Mat. 3:17; 17:5) Nyɔŋmɔ kpɛlɛ e-Bi ni bɛ esha lɛ nɔ, yɛ be mli ni egboɔ yɛ sɛŋmɔtso nɔ yɛ Kalvary lɛ, ebo kɛ gbee waa akɛ: “Ataa, odɛŋ mituɔ mimumɔ miwoɔ nɛɛ.”—Luka 23: 46.
3. (a) Mɛɛ wiemɔi ni tsɔɔ nɔkpɛlɛmɔ ni fe fɛɛ Nyɔŋmɔ kɛha e-Bi Yesu Kristo la Odasefonyo lɛ? (b) Nyɔŋmɔ tee lɛ shi kɛba mɛɛ shihilɛ ni kwɔ mli?
3 Beni afee ni ekɛtsɔɔ yɛ gbɛ ni fe fɛɛ nɔ akɛ ekpɛlɛ e-Bi ni agbe lɛ akɛ la Odasefonyo lɛ nɔ lɛ, Nyɔŋmɔ ni tsuɔ nitsumɔi ni gbɔmɛi ni yɔɔ wudɔɔ lɛ tsɛɔ no mɛi akɛ nibii ni anyɛŋ afee lɛ tee Yesu Kristo shi kɛjɛ gbohii ateŋ yɛ gbi ni ji etɛ lɛ nɔ. Kɛba mɛɛ shihilɛ mli? Akɛ adesa ko kɛkɛ ni hiɛ heloo kɛ la, mɔ ni “shwɛ fioo ni ekɛ bɔfoi lɛ aye egbɔ”? Dabi! Shi moŋ kɛtee ŋɛlɛ ko ni kwɔ kwraa fe bɔfoi lɛ anɔ̃ mli, yɛ ŋwɛi shihilɛ ko ni kwɔ fe nɔ ni eyɔɔ mli tsutsu yɛ bɛ mli ni eshi ŋwɛi ni ekɛ ehe ha koni ajie ewala kɛbawo Yudayoo oblayoo fro Maria fɔmɔ kotoku mli lɛ. (Fil. 2:5-11) Bɔfo Petro ni ji klɛŋklɛŋbii ni na lɛ yɛ gbɔmɔtso ni atsake lɛ mli yɛ eshitee lɛ sɛɛ lɛ kɛɛ akɛ: “No nɔŋŋ agbɛnɛ ehereɔ wɔhu wɔyiwala . . . kɛtsɔ Yesu Kristo shitee lɛ nɔ, mɔ ni yɔɔ Nyɔŋmɔ ninejurɔ nɔ, akɛni etee ŋwɛi, ni aŋɔ ŋwɛi bɔfoi kɛ hegbɛi kɛ hewalɛi awo eshishi lɛ.”—1 Pet. 3:21, 23; Heb. 1:1-4; Luka 24:34; 1 Kor. 15:5.
4, 5. Te fee tɛɛŋ ni Yesu Kristo “David bi” lɛ batsɔ David “Nuntsɔ” ni namɔ ji klɛŋklɛŋmɔ ni jie enɛ kpo?
4 No hewɔ lɛ Nyɔŋmɔ Bi kunimyelɔ lɛ ni afee lɛ “David bi” kɛtsɔ oblayoo fro ko ni fɔ lɛ yɛ David wekukpaa lɛ mli lɛ bafee mɔ ni nɔ kwɔ kwraa fe Maŋtsɛ David. Bɔfo Petro tsɔɔ enɛ yɛ ewiemɔ ni jɛ mumɔ mli ni ekɛha Yudafoi akpei abɔ lɛ yɛ Otsii Agbijurɔ, ni ji Yesu Kristo shitee lɛ sɛɛ gbii nyɔŋmai enumɔ nɔ lɛ. Petro ni mumɔ krɔŋkrɔŋ eyi lɛ obɔ lɛ kɛɛ amɛ akɛ:
5 “Nɛkɛ Yesu nɛɛ Nyɔŋmɔ tee lɛ shi; no he Odasefoi ji wɔfɛɛ. Agbɛnɛ akɛ nɔ ni awo enɔ kɛtee Nyɔŋmɔ ninejurɔ nɔ ni ena mumɔ krɔŋkrɔŋ lɛ he shiwoo lɛ kɛjɛ tsɛ lɛ dɛ hewɔ lɛ, efɔse nɔ ni nyɛnaa ni nyɛnuɔ nɛɛ eshwie shi. Ejaakɛ David eyaaa ŋwɛi, shi lɛ nɔŋŋ ekɛɛ: Nuntsɔ [Yehowa] lɛ kɛɛ mi-Nuntsɔ lɛ akɛ: Ta mininejurɔ nɔ kɛyashi beyinɔ ni maŋɔ ohenyɛlɔi lɛ mafee onajiashi maaŋoo. No hewɔ lɛ ha ni Israel we lɛ fɛɛ ale krɛdɛɛ akɛ Nyɔŋmɔ eŋɔ nɛkɛ Yesu ni nyɛsɛŋ lɛ nɛɛ efee Nuntsɔ kɛ Kristo fɛɛ.”—Bɔf. 2:32-36.
6. (a) Kɛ etee David shi lɛ mɛni ji nɔ ni ebaakpɛlɛ nɔ yɛ Yesu he? (b) Mɛɛ weku shishitsɔɔmɔ wolo Yesu yɔɔ akɛ gbɔmɔ?
6 Ehe baahia ni David akpɛlɛ Yesu Kristo ni awo ehiɛ nyam lɛ nɔ akɛ ‘e-Nuntsɔ’ yɛ be mli ni aaatee lɛ shi kɛaajɛ gbohii ateŋ aba yɛ Mesia lɛ maŋtsɛyeli shishi. (Lala 110:1) Ehe baahia ni ekpɛlɛ Nuntsɔ Yesu Kristo ni awo enɔ kɛjɛ shikpɔŋ nɔ kɛtee ŋwɛi shɔŋŋ lɛ nɔ akɛ eseshibii Iɛ ateŋ mɔ ni he hiaa fe fɛɛ, “David shishifaa” lɛ. “Jata lɛ ni jɛ Yuda akutso lɛ mli lɛ, mɔ ni ji David shishifaa lɛ.” (Kpoj. 22:16; 5:5) Enɛ hewɔ ni David seshibii aweku shishitsɔɔmɔ wolo yɛ wekukpaai enyɔ mli lɛ fɛɛ bagbeɔ naa yɛ Yesu, Maria Yudayoo oblayoo fro lɛ binuu lɛ nɔ lɛ. Yɛ anɔkwale mli lɛ, Yesu Kristo fɔmɔ shishitsɔɔmɔ wolo lɛ yaa sɛɛ aahu, ni jeee kɛmiiya Maŋtsɛ David nɔ, jeee kɛmiiya blematsɛ Abraham pɛ nɔ, shi moŋ aahu kɛyashiɔ klɛŋklɛŋ Adam, mɔ ni yɛ gbi ni abɔ lɛ yɛ Eden Abɔɔ lɛ mli lɛ atsɛ lɛ akɛ “Nyɔŋmɔ bi” lɛ nɔ. (Mat. 1:1-18; Luka 3:23-38) Yesu Kristo pɛ ji mɔ ni abaa eseshibii lɛ agbɛi ayi aahu kɛyashi klɛŋklɛŋ adesa ni ji “Nyɔŋmɔ bi” lɛ nɔ ni afooo mli aloo mɔ ko elaajeee yɛ kpaa lɛ mli.
7. (a) Be enyiɛ Maŋtsɛ David odehei aweku lɛ ye nɔ yɛ Israel? (b) Be enyiɛ Yesu Kristo baaye nɔ ni ebɛ mɔ ko yɛ shikpɔŋ mɔ ni kɛ lɛ baapele he, ni mɛni hewɔ nakai eji?
7 Maŋtsɛ David ye Israel nɔ afii nyɔŋmai ejwɛ pɛ. (1 Maŋts. 2:10, 11; 1 Kron. 29:26, 27) Kɛ abua fɛɛ naa lɛ, Maŋtsɛ David odehei aweku lɛ mli hii ni ye esɛɛ yɛ Israel afii 470 lɛ ji hii nyɔŋmai enyɔ, aloo kɛjɛ afi 1077 kɛbashi 607 D.Ŋ.B. Mɛɛ maŋtsɛmɛi awekukpaa ni yɔɔ weku kome mli yɛ maŋ ko mli baanyɛ ekɛ enɛ aye egbɔ? Shi kɛ lɛ, Yesu Kristo, David ŋwɛi Nuntsɔ lɛ baaye nɔ ni shikpɔŋ nɔ maŋtsɛ ko kɛ lɛ epeleee he afii akpe yɛ adesai fɛɛ nɔ. Sɛɛyelɔi ko taŋ eŋwɛi maŋtsɛsɛi Iɛ nɔ, ejaakɛ eyɛ wala ni gbele bɛ mli, Eyɛ “wala ni fiteee”; no hewɔ lɛ akɛni “ehiɔ shi kɛyaa naanɔ hewɔ Iɛ, ebaanyɛ ena emaŋtsɛyeli lɛ ni ‘sɛɛyelɔi ko bɛ mli.’ (Heb. 7 :16, 24) Taakɛ bɔfo Gabriel kɛɛ Maria yɛ Nazaret lɛ, “emaŋtsɛyeli lɛ sɛɛ efoŋ.” (Luka 1:83) No hewɔ lɛ lɛ ji Maŋtsɛ David Naanɔ Niyelɔ.
HEFATALƆI, JEEE SƐƐYELƆI
8, 9. (a) Ani 144,000 lɛ baafee Yesu Kristo sɛɛyelɔi, ni yɛ mɛɛ gbɛ nɔ ewie hegbɛi ni amɛbaana yɛ Maŋtsɛyeli lɛ mli lɛ he yɛ be mli ni eto Nuntsɔ lɛ Gbɛkɛnaashi Niyenii lɛ sɛɛ? (b) Mɛɛ gbɛ nɔ Daniel wie nakai gbɛfaŋnɔ ni amɛfɛɛ amɛbaana lɛ he yɛ?
8 Yesu Kristo hefatalɔi niyelɔi 144,000 lɛ jeee esɛɛyelɔi yɛ Maŋtsɛyeli lɛ mli, Amɛji hefatalɔi maŋtsɛmɛi kɛkɛ, ni Lɛ ji amɛ Yitso ni Nyɔŋmɔ ehala lɛ. No hewɔ lɛ bɔni Kpojiemɔ 20:4 tsɔɔ sane lɛ mli ji: “Ni amɛhiɛ kamɔ, ni amɛkɛ Kristo ye maŋtsɛ [ jeee yɛ Kristo sɛɛ] afii akpe.” Etamɔ bɔ pɛ ni Yesu Kristo kɛɛ ebɔfoi anɔkwafoi lɛ yɛ Hehoo gbɛkɛ lɛ, yɛ be mli ni eto gbijurɔyeli hee ko shishi lɛ, nɔ ni abatsɛ lɛ akɛ Nuntsɔ lɛ Gbɛkɛnaashi Niyenii lɛ: “Nyɛji mɛi ni kɛ mi ehi shi yɛ mikaai lɛ amli; ni mi hu miito maŋtsɛyeli mahanyɛ taakɛ bɔni mi-Tsɛ eto eha mi lɛ, koni nyɛye nii ni nyɛnu yɛ mikpɔlɔ lɛ he yɛ mimaŋtsɛyeli lɛ mli, ni nyɛtara sɛii anɔ ni nyɛkojo Israel akutsei nyɔŋma kɛ enyɔ lɛ.” (Luka 22:28-30) Afii ohai abɔ dani Kristo aaaba lɛ, gbalɔ Daniel wie nakai nifeemɔ ni mɛi sɔrɔtoi baana mli gbɛfaŋ nɔ lɛ nɔŋŋ he akɛ:
9 “Shi mɔ ni yɔɔ ŋwɛi shɔŋŋ lɛ mɛi krɔŋkrɔŋi lɛ anine aaashɛ maŋtsɛyeli lɛ nɔ, ni amɛaaye maŋtsɛyeli lɛ nɔ kɛya naanɔ, kɛya naanɔi anaanɔ.” “Mɔ ni eye gbii pii lɛ ba, ni aŋɔ kojomɔ aha mɔ ni yɔɔ ŋwɛi shɔŋŋ lɛ mɛi krɔŋkrɔŋi lɛ, ni be bashɛ ni mɛi krɔŋkrɔŋi lɛ ye maŋtsɛyeli lɛ nɔ. Shi maŋtsɛyeli lɛ kɛ nɔyeli lɛ kɛ maŋtsɛyelii ni yɔɔ ŋwɛi muu lɛ fɛɛ shishi lɛ amli hewalɛ lɛ aaaŋɔha mɔ ni yɔɔ ŋwɛi shɔŋŋ lɛ mɛi krɔŋkrɔŋi lɛ amaŋ lɛ. Emaŋtsɛyeli lɛ naanɔ maŋtsɛyeli ni, ni nɔyelii lɛ fɛɛ aaasɔmɔ lɛ, ni amɛaabo lɛ toi.”—Dan. 7:18, 22, 27.
10, 11. Mɛni esa akɛ awie ye sɛɛyelɔi ni 144, 000 lɛ yɔɔ lɛ he kɛ klɛŋklɛŋ yibii ni amɛji kɛba Nyɔŋmɔ kɛ toobi lɛ he? (b) Mɛɛ jwɛŋmɔ ni yɔɔ hewɔ esaaa akɛ asheɔ maŋtsɛmɛi ni 144 000 lɛ baafee lɛ gbeyei lɛ?
10 Nɔ ni enɛ tsɔɔ ji akɛ Nyɔŋmɔ ni Yɔɔ Ŋwɛi Shɔŋŋ lɛ mɛi krɔŋkrɔŋi 144,000 lɛ kɛ Kristo baaye maŋtsɛ afii akpɛ ni sɛɛyelɔi bɛ mli. Akɛɔ yɛ mɛnɛɛmɛi ahe akɛ: “Ni amɛnyiɛɔ toobi lɛ sɛɛ kɛyaa he fɛɛ he ni eyaa lɛ. Mɛnɛɛmɛi ji mɛi ni ahe kɛjɛ gbɔmɛi ateŋ ni amɛtsɔmɔ klɛŋklɛŋ yibii amɛha Nyɔŋmɔ kɛ toobi (Kpoj. 14:4) Akɛni ahe amɛ kɛjɛ adesai ateŋ hewɔ lɛ, tsutsu lɛ kulɛ gbɔmɛi ni ji hii kɛ yei kɛkɛ ji amɛ tamɔ adesai ni eshwɛ lɛ, ni yɛ anɔkwasane nɛɛ hewɔ lɛ, esaaa akɛ shikpɔŋ nɔ bii ni nɛkɛ 144,000 nɛɛ baaye amɛnɔ maŋtsɛ lɛ sheɔ gbeyei. Amɛbatsɔmɔ “mɛi krɔŋkrɔŋi,” taakɛ esa akɛ mɛi ni ji “klɛŋklɛŋ yibii [kɛha] Nyɔŋmɔ kɛ toobi lɛ” afee “krɔŋkrɔŋ” yɛ gbɛ fɛɛ gbɛ nɔ lɛ. Ani nɔ ko yɛ ni esa akɛ amɛshe no gbeyei yɛ Yesu Kristo nɔyeli lɛ he? Dabi! Nakai nɔŋŋ hu nɔ ko ni esa akɛ amɛhao yɛ he yɛ 144,000 lɛ “ni ahe kɛjɛ gbɔmɛi ateŋ” lɛ nɔyeli lɛ he bɛ. Amɛbo bɔfo Paulo ŋaawoo nɛɛ toi: “Nɔ ni Kristo Yesu hu jwɛŋ lɛ, no nɔŋŋ nyɛjwɛŋa yɛ nyɛmli.” (Fil. 2:5) Kɛ agbɛnɛ bɔfo Petro ŋaawoo ni yɔɔ 1 Petro 4:1 lɛ hu:
11 “Agbɛnɛ akɛ nɔ ni Kristo na amanehulu ahewɔ yɛ heloo mli hewɔ lɛ, nyɛhu nyɛkɛ nakai jwɛŋmɔ lɛ nɔŋŋ amiaa akɛ tawuunii, ejaakɛ mɔ ni na amanehulu yɛ heloo mli lɛ, efɔɔɔ eshafeemɔ.”
12. (a) Mɛni Nyɔŋmɔ jie eto aloo etsɔ hiɛ ele yɛ Kristofoi hefatalɔi maŋtsɛmɛi lɛ ahe? (b) Mɛɛ be ni yɛ mɛɛ gbɛ nɔ Yehowa Nyɔŋmɔ kpɛlɛ nɛkɛ nɔyeli kuu nɛɛ nɔ klɛŋklɛŋ kwraa?
12 Eka shi faŋŋ akɛ esa ni 144,000 lɛ ana amɛ Hiɛnyiɛlɔ kɛ Tsɔɔlɔ Kristo jwɛŋmɔ, jeŋba kɛ mumɔŋ subaŋ lɛ yɛ amɛmli. Enɛ ji taomɔnii ni Yehowa Nyɔŋmɔ wie he efɔ shi lɛ ekome. Eyɛ mli akɛ E-tsɔɔɔ hiɛ ejieee adesai aŋkroaŋkroi ni jɛ adesai ateŋ ni baana Kristo su nɛɛ yɛ amɛmli ‘lɛ etooo moŋ, shi etsɔ hiɛ ewie bɔni amɛyibɔ lɛ baaji lɛ he—144,000. Etsɔ hiɛ ewie gbɛ ni ebaatsɔ nɔ ekɛ amɛ aye kɛ nɔ̃ ŋwɛi anunyam ni ekɛ amɛ baaba mli lɛ he. Ejaakɛ kɛjɛ be mli ni gbɔmɔ tse atua yɛ Eden Abɔɔ lɛ mli tɔɔ Yehowa Nyɔŋmɔ susu nɔyeli kɛha adesai anibii agbɛjianɔtoo hee lɛ he, ni etsɔ hiɛ ekpɛlɛ nɛkɛ nɔyeli kuu nɛɛ nɔ. Nɛkɛ nɔkpɛlɛmɔ nɛɛ ji nɔ ni ejie lɛ kpo yɛ ŋwɛi yiŋtoo ni eha Satan Abonsam, “shishijee onufu” lɛ le lɛ mli, akɛ: “Ni mikɛ nyɛɛ aaaŋmɛ okɛ yoo lɛ teŋ, kɛ oseshi kɛ eseshi teŋ; eeetswa eyitso nɔ̃, ni bo hu oootswa enanetsitsi nɔ̃.—1 Mose 3:15.
13, 14. (a) Mɛni ji Yesu Kristo yɛ Nyɔŋmɔ yoo lɛ shiwoo “seshi” lɛ mli? (b) Mɛɛ hewalɛwoo wiemɔi bɔfo Paulo ŋma eyaha Kristofoi ni miibɔ mɔdɛŋ ni amɛha amɛtsɔmɔ lɛ ama shi shiŋŋ lɛ?
13 Yesu Kristo ji nakai Nyɔŋmɔ yoo lɛ “seshi” ni awo shi yɛ ehe lɛ mli otu. Ni nakai kaselɔi anɔkwafoi lɛ ni baafata Kristo he ni amɛtswa Onufu lɛ yitso nɔ̃ lɛ hu fata he. (Rom. 16:20) No hewɔ lɛ beni ewieɔ etsɔɔ mɛi ni atsɛ amɛ ni amɛmiibɔ mɔdɛŋ ni amɛha nɛkɛ tsɛmɔ nɛɛ afee anɔkwale ni ma shi Shiŋŋ ni anyɛŋ atsake lɛ asafo lɛ, bɔfo Paulo ŋma hewalɛwoo wiemɔi eha amɛ yɛ Romabii 8:28-32 akɛ:
14 “Shi wɔle akɛ mɛi ni sumɔɔ Nyɔŋmɔ lɛ, nibii fiaa yeɔ buaa amɛ ni ahi aha amɛ, amɛ mɛi ni atsɛ amɛ yɛ yiŋtoo naa lɛ. Ejaakɛ mɛi ni ele amɛ momo lɛ, amɛ ejie eto ni amɛsubaŋ atamɔ egbele lɛ nɔ̃ lɛ, koni efee nyɛmimɛi pii ateŋ kromɔbi; shi mɛi ni ejie eto lɛ, amɛ nɔŋŋ etsɛ; ni mɛi ni etsɛ lɛ, amɛ nɔŋŋ ebu amɛ bem; ni mɛi ni ebu amɛ bem lɛ, amɛnɔŋŋ amɛhiɛ nyam ewo. Belɛ te wɔɔkɛɛ tɛɛŋ yɛ nii nɛɛ ahewɔŋ? Kɛ́ Nyɔŋmɔ yɛ wɔsɛɛ lɛ, namɔ aaate shi awo wɔ? Mɔ nɔŋŋ hu ni kamaaa wɔ lɛ diɛŋtsɛ ebi lɛ, shi moŋ eŋɔ lɛ eha yɛ wɔfee wɔnajiaŋ lɛ; ani eŋɔŋ nibii fiaa efataŋ ehe ekeŋ wɔ?”
15. (a) Yɛ nibii ni Nyɔŋmɔ tsɔɔ hiɛ eleɔ hewɔ lɛ, mɛɛ gbɛ nɔ gbeekpamɔ aaahi E-gbɛjianɔtoo hee lɛ nɔyeli lɛ mli? (b) Nyɔŋmɔ nifeemɔ hewɔ lɛ mɛɛ gbɛ nɔ mɛi ni yɔɔ enɔyeli lɛ mli lɛ bafeɔ “jalɔi”?
15 Kadimɔ akɛ mɛi ni atsɛ amɛ lɛ ji mɛi ni “ejie eto ni amɛsubaŋ atamɔ e-Bi lɛ nɔ lɛ, koni efee nyɛmimɛi pii ateŋ kromɔbi” ni nɔ̃ gbɔmɛi aŋkroaŋkroi ni amɛji kɔɔɔ he eko. Enɛ biɔ ni amɛnifeemɔ atamɔ Kristo nɔ lɛ nɔŋŋ, ákɛ Nyɔŋmɔ bii. No hewɔ lɛ Nyɔŋmɔ tsɔ hiɛ ejie eto akɛ esa akɛ E-gbɛjianɔtoo hee ni baa lɛ mli nɔyeli lɛ afee nɔyeli ko ni gbeekpamɔ yɔɔ mli, nɔ ni eteee shi ewooo ehe. Esa akɛ mɛi ni ji nakai nɔyeli lɛ mlibii lɛ ateŋ mɔ fɛɛ mɔ afee “jalɔ.” Enɛ hewɔ ni esa akɛ Nyɔŋmɔ ato jalɛ gbɛjianɔtoo krɛdɛɛ ko lɛ, koni ekɛbu mɛi ni atsɛ amɛ lɛ “jalɔi,” ni E-feɔ enɛ kɛtsɔɔ Toobi Yesu Kristo la lɛ nɔ. Be mli ni eteee amɛ shi kɛjɛɔ gbohii ateŋ lɛ, ofeɔ amɛ jalɔi, akɛ mumɔŋ bɔɔnii ni eye emuu yɛ amɛjalɛ gbɔmɔtsei lɛ kɛ gbeekpamɔ naa. (Rom. 5:1, 9; 8:1) Nyɔŋmɔ kɛ bulɛ kɛ woo haa mɛi ni ebuɔ amɛ jalɔi bianɛ yɛ amɛhemɔkɛyeli yɛ Yesu Kristo la lɛ mli lɛ hewɔ lɛ, yɛ E-shikpɔŋ nɔ sɔɔmɔ hegbɛi ni yɔɔ nyam ni ekɛwoɔ amɛdɛŋ lɛ hewɔ. Ekɛ Maŋtsɛyeli lɛ mli hegbɛ ni yɔɔ nyam yɛ wɔsɛɛ be mli fɔɔ amɛhiɛ.
16. Te Kristo tsɔɔ ekaselɔi lɛ tɛɛŋ kɛji akɛ je lɛŋ maŋkwralɔi lɛ ji mɛi ni esa akɛ amɛkase amɛ?
16 Adesai fɛɛ baanyɛ ana nɔmimaa akɛ mɛi ni Nyɔŋmɔ kpɛlɛɔ amɛnɔ ni eteeɔ amɛshi kɛboteɔ Maŋtsɛyeli anunyam mli lɛ efeŋ amɛnii tamɔ ŋmɛnɛŋmɛnɛ jeŋ nɔyelii amli maŋkwralɔi lɛ yɛ be mli ni amɛtsuɔ nii lɛ. Yesu kɛ je nɛŋ maŋkwralɔi lɛ etooo ekaselɔi lɛ ahiɛ akɛ nɔkwɛmɔnii ni amɛkase amɛ. Maŋkwramɔŋ akaŋshii ko ebakaŋ hefatalɔi 144,000 lɛ ateŋ yɛ ŋwɛi maŋtsɛyeli lɛ mli. Ebatamɔŋ nɔ ni wɔkaneɔ he sane yɛ Luka 22:24-27 lɛ: “Shi naataamɔ hu bate shi yɛ amɛteŋ akɛ, amɛteŋ hamɔ abaabu agbo fe fɛɛ. Ni ekɛɛ amɛ akɛ: ‘Jeŋmaji lɛ anɔ maŋtsɛmɛi lɛ yeɔ amɛnɔ odehei asane, ni mɛi ni yɔɔ amɛnɔ hewalɛ lɛ, atsɛɔ amɛ ejurɔfeelɔi. Shi nyɛ lɛ, ebɛnyɛ nakai; shi moŋ mɔ ni ji agbo yɛ nyɛteŋ lɛ, ha etsɔ tamɔ gbekɛ, ni mɔ ni ji onukpa hu tamɔ mɔ ni sɔmɔɔ. Ejaakɛ te mɔ ni fe mɔ lɛ mɔ ni taa okpɔlɔ he lɛ, aloo mɔ ni sɔmɔɔ lɛ? Ani jeee mɔ ni taa okpɔlɔ he lɛ? Shi mi lɛ miyɛ nyɛteŋ akɛ mɔ ni sɔmɔɔ’”
17. Mɛni hewɔ ni Yesu ji Nyɔŋmɔ Bɔfo kɛha adesai yɛ gbe ni ja nɔ yɛ be mli ni atsu lɛ kɛba je nɛɛ mli lɛ?
17 Aaafee afii akpei enyɔ ni eho nɛ ni atsu Nyɔŋmɔ Bi lɛ kɛba je lɛ mli, jeee ni ebatsɔ maŋkwralɔ ni miitao sɛɛfilɔi kɛha oshikifɔɔ kɛ lɛ hamɔ aloo ni ewu eshi maŋkwramɔŋ akaŋshilɔi yɛ Israel mã lɛŋ po. Eba koni ebakpata gbɔmɛi awekui, maji kɛ majianɔwiemɔi ni kɛ Nyɔŋmɔ yeee lɛ teŋ, nɔ ko ni shikpɔŋ nɔ maŋkwralɔ ko kwraa nyɛŋ afee. Eba beni afee ni ebakpale adesai kɛya toiŋjɔlɛ kɛ naanyobɔɔ shihilɛ ni ka amɛkɛ Wala-Halɔ Kpeteŋkpele, Yehowa Nyɔŋmɔ teŋ lɛ he. Enɛ bi ni Nyɔŋmɔ ‘Bi lɛ kɛ ehe asha afɔle. Atsɛɔ lɛ yɛ gbɛ ni ja nɔ akɛ Bɔfo ni jɛ Nyɔŋmɔ ŋɔɔ, mɔ ni atsu kɛtee henyɛlɔi komɛi aŋɔɔ koni eyakpa fai eha amɛ kɛ Nyɔŋmɔ teŋ kpatamɔ, beni afee ni amɛjo amɛhiɛ ni eeekpata lɛ naa foi.
18. Te mɛi ni batsɔmɔ Kristo kaselɔi lɛ fee amɛnii yɛ Bɔfo ni je Nyɔŋmɔ ŋɔɔ nɛɛ he amɛha tɛɛŋ? Mɛni yɛ mli ba?
18 Kaselɔi Kristofoi lɛ ji mɛi ni kpɛlɛ nakai Bɔfo ni jɛ Nyɔŋmɔ ŋɔɔ lɛ kɛ ebɔfonitsumɔ yɛ amɛgbɛfaŋ lɛ nɔ. Bɔfo Paulo ŋma eyaha nakai kaselɔi lɛ ni yɔɔ Roma lɛ akɛ: ‘Nyɔŋmɔ jieɔ lɛ diɛŋtsɛ esuɔmɔ ni ekɛsumɔɔ wɔ lɛ shi etsɔɔ, akɛ be mli ni wɔji eshafeelɔi lɛ beebe ni Kristo bagbo yɛ wɔnajiaŋ. No hewɔ lɛ agbɛnɛ ni abuwɔ bem [jalɔi] yɛ ela lɛ hewɔ lɛ, aaatsɔ enɔ ahere wɔyiwala kɛjɛ mlifu lɛ mli aahu. Ejaakɛ be mli ni wɔji henyɛlɔi lɛ ni akɛ Nyɔŋmɔ Bi lɛ gbele lɛ bakpata wɔkɛ Nyɔŋmɔ teŋ, agbɛnɛ ni akpata nɛɛ, aaahere wɔyiwala yɛ wala lɛ mli aahu, shi jeee no kɛkɛ, shi moŋ wɔshwaa wɔfɔɔ Nyɔŋmɔ nɔ hu yɛ wɔ-Nuŋtsɔ Yesu Kristo hewɔ, mɔ nɔ ni wɔtsɔ ni agbɛnɛ wɔna kpatamɔ lɛ.”—Rom. 5:8-11.
“BƆFOI YƐ KRISTO NAJIAŊ”
19. (a) Kɛje pɛ mli m Kristo kwɔ kɛtee ŋwɛi nɛɛ, tɛ atsuɔ bɔfoyeli nitsumɔ yɛ adesai ahe nɛɛ ahaa tɛɛŋ? (b) Te Jɛ lɛŋ maŋkwramɔŋ nɔyelɔi lɛ buɔ bɔfoi ni jɛ Kristo ŋɔɔ lɛ amɛbaa tɛɛŋ, ni mɛni hewɔ?
19 Kɛjɛ be mli ni ekwɔ kɛtee ŋwɛi yɛ afi 88 Ŋ.B. gbo be mli lɛ, Yesu Kristo bɛ shikpɔŋ lɛ nɔ dɔŋŋ ni eeetsu bɔfoyeli nitsumɔ nɛɛ lɛ diɛŋtsɛ. No hewɔ lɛ ebiɔ ni ekaselɔi ni amɛna kpatamɔ lɛ adamɔ enajiaŋ kɛtsu bɔfoyeli nitsumɔ lɛ. Je nɛɛ mli maŋkwramɔŋ nɔyelɔi lɛ kɛ nɔyelii ni yɔɔ lɛ yooo nɛkɛ kaselɔi nɛɛ akɛ amɛji bɔfoi ni jɛ Nɔyeli ni Fe Fɛɛ yɛ jeŋ muu fɛɛ lɛ ŋɔɔ. Nɛkɛ bɔfoi ni ji Kristofoi nɛɛ kɛ jeŋmaji lɛ amli maŋkwramɔŋ bɔf‘oi lɛ naaa susumɔ ko koni amɛto gbɛjianɔ ni atsɔ yelikɛfuamɔ kome nɔ akpata aha maŋ muu lɛ kɛtsɔ nɛkɛ bɔfoi ni le maŋsaneyeli mli ŋaa nɛɛ anɔ. Maŋkwramɔŋ nɔyelɔi kɛ nɔyelii lɛ buɔ kaselɔi ni akɛ nitsumɔ ewo amɛdɛŋ nɛɛ yɛ heloo naa, yɛ blema susumɔ lɛ naa, ni amɛtsuuu najiaŋdamɔlɔi ni ji bɔfoi ni le naŋsaneyeli he ŋaa nɛɛ kɛyaaa amɛŋɔɔ taakɛ amɛkɛ Roma Katolek Sɔlemɔ lɛ ni yɔɔ Yatikan lɛ efeeafii ohai babaoo lɛ. Amɛbuɔ nɛkɛ kaselɔi ni bɛ sabalai, maŋkwramɔŋ hewulamɔ nii kɛ yijiemɔkadimɔ nii lɛ akɛ adesai foji. Amɛyɔseee mɛnɛɛmɛi akɛ mumɔŋ nibɔɔ hee ni hiɛ nɔ hee ko ni amɛkɛbaaha
20. Eyɛ mli akɛ Roma yɔseee lɛ akɛ eji bɔfo moŋ, shi te bɔfo Paulo wie lɛ diɛŋtsɛ ehe eha tsɛŋ beni eŋmaa wolo eyaha Efesobii Iɛ?
20 Akɛni Roma Maŋtsɛyeli lɛ yɔseee bɔfo Paulo ni damɔɔɔ Yudafoi anɔyeli ni yɔɔ Yerusalem lɛ najiaŋ akɛni eji Kristofonyo bɔfo hewɔ lɛ, ani no haaa etsɔ Ŋwɛi Floflo Nyɔŋmɔ lɛ Nɔyeli lɛ bɔfo diɛŋtsɛ‘? Tsɛ, Roma Nɔyeli lɛ yɔseee lɛ kɛ hiɛnyamwoo moŋ, shi kɛlɛ Paulo wie lɛ diɛŋtsɛ ehe akɛ nakai eji, yɛ be mli ni amɔ lɛ yɛ Roma lɛ, ni ekɛɛ asafo lɛ ni yɔɔ Efeso yɛ Asia Bibioo lɛ akɛ: “Nyɛsraa, ni nyɛkãa he daa nyɛkpaa fai nyɛhaa krɔŋkrɔŋbii lɛ fɛɛ kɛ mi hu koni kɛ migbele minaa lɛ, aŋɔ wiemɔ awo minaa ni mikɛ ekaa ajaje sanekpakpa lɛŋ teemɔsane nɛɛ, koni mawie kɛ ekãa yɛ mimli, bɔni sa akɛ miwieɔ lɛ.”—Efe. 6:18-20.
21. Namɛi aŋɔɔ bɔfoi ni ji Kristofoi nɛɛ yaa yɛ be mli ni amɛtsuɔ gbɛnaanii ni ka amɛnɔ lɛ he nii lɛ?
21 Esaaa akɛ Kristofonyo ni akɛ nitsumɔ ewo edɛŋ lɛ naa jwɛŋmɔ ni je nɛɛ mli maŋkwramɔŋ nɔyelii ni kɛ Yehowa Nyɔŋmɔ yeee lɛ hiɛ lɛ eko. Kristofonyo lɛ nine shɛ ebɔfoyeli nitsumɔ lɛ nɔ kɛjɛ Nyɔŋmɔ ŋɔɔ kɛtsɔ Kristo nɔ ni esani eyɔse gbɛnaanii ni hegbɛ hee ni aŋɔha lɛ nɛɛ kɛfɔɔ enɔ lɛ. Akɛni ejeee bɔfo ni jɛ je nɛɛ mli hewɔ lɛ, eyaaa maŋkwramɔŋ nɔyelii lɛ aŋɔɔ yɛ gbɛhe hee ni ebote mli lɛ mli. Yɛ sane ni kɔɔ Nyɔŋmɔ ni akɛ lɛ kpataa nɛɛ he lɛ, nɔyelii lɛ nyɛŋ atsu nɔ ko aha maŋ muu lɛ ni amɛkɛtsake wekukpaa ni ka amɛshishibii lɛ kɛ Nyɔŋmɔ teŋ lɛ. Eji mɔ aŋkro sane; esa akɛ mɔ fɛɛ mɔ akpɛ eyiŋ ni etsu he nii eha lɛ diɛŋtsɛ ehe. No hewɔ ni mumɔŋ bɔfoi ni ji Kristofoi nɛɛ yaa gbɔmɛi lɛ aŋɔɔ tɛɛ lɛ, ni jeee kɛtsɔ amɛmaŋkwramɔ nɔyelii lɛ anɔ lɛ. Beni etsɔɔ yaka ni blema shidaamɔ lɛ ebaji ni etsɔɔ bɔni gbɛnaa hee nɛɛ he hiaa waa ha lɛ, bɔfo Paulo fee sane lɛ faŋŋ akɛ:
22. Mɛɛ sɔɔmɔ he nii Kristofoi ni ji bɔfoi nɛɛ tsuɔ, amɛdamɔ nɔmɔ najiaŋ, ni mɛɛ fai amɛkpaa mɛi ni akpata amɛkɛ Nyɔŋmɔ teŋ lɛ ni amɛkafee mɛni?
22 “Hewɔ lɛ kɛ mɔ ko yɛ Kristo mli lɛ, bɔɔnɔ hee ji lɛ; blema nii Iɛ eho; naa, nibii fɛɛ etsɔmɔ ehee. Shi nibii fɛɛ yɛ Nyɔŋmɔ dɛŋ, mɔ ni tsɔ Yesu Kristo nɔ ekpata lɛ diɛŋtsɛ ekɛwɔ teŋ, ni ekɛ kpatamɔnɔ lɛ hawɔ lɛ; no ji akɛ Nyɔŋmɔ tsɔ Kristo nɔ ekpata lɛ diɛŋtsɛ ekɛ je lɛ teŋ, ni ebuuu amɛnɔtɔmɔi lɛ ehaaa amɛ, ni etu kpatamɔ wiemɔ lɛ ewo wɔdɛŋ. No hewɔ lɛ wɔji bɔfoi yɛ Kristo najiaŋ, tamɔ akɛ Nyɔŋmɔ etsɔ wɔnɔ ekɛ mɛi miiwie: Wɔdamɔɔ Kristo najiaŋ wɔkpaanyɛ fai akɛ: Nyɛhaa ekpataa nyɛkɛ Nyɔŋmɔ teŋ. Ejaakɛ mɔ ni leee esha lɛ, wɔhewɔ lɛ eha etsɔ esha, koni wɔ lɛ wɔtsɔmɔ Nyɔŋmɔ jalɛ yɛ emli. Shi akɛ nɔ ni hefatalɔi ji wɔ hewɔ lɛ, wɔwieɔ wɔtsɔɔ nyɛ hu ni nyɛkahe Nyɔŋmɔ duromɔ lɛ yakatswaa.”—2 Kor. 5:17 kɛyashi 6:1.
23. Ákɛ “bɔfoi yɛ Kristo najiaŋ” lɛ kɛ mɛɛ naatsii ni hiɛdɔɔ yɔɔ mli fɔɔ Nyɔŋmɔ najiaŋdamɔlɔi lɛ anɔ?
23 Ákɛ “bɔfoi yɛ Kristo najiaŋ” lɛ kɛ naatsii ni hiɛdɔɔ yɔɔ mli fɔɔ Nyɔŋmɔ najiaŋdamɔlɔi ni ji nibɔɔ hee yɛ Kristo mli lɛ anɔ. Mɛɛ naatsii? Nɔ ni tamɔ naatsii lɛ nɔŋŋ ni kamɔ majimaji lɛ amli maŋkwramɔŋ bɔfoi lɛ anɔ lɛ. Jeee ŋmɛnɛŋmɛnɛ beaŋ pɛ, shi yɛ Biblia beaŋ hu lɛ, bɔfoi ni atsuɔ amɛ kɛyaa maŋsɛɛ lɛ bɛ hegbɛ ni amɛkɛ amɛhe woɔ maji ni atsu amɛ kɛtee jɛmɛ lɛ amaŋkwramɔ saji amli. (Luka 19:12-15, 27) Amɛbaanyɛ ni amɛkɛ faikpamɔ ko ashwie nakai maŋsɛɛ nɔyelii lɛ ahiɛ aloo amɛte shi amɛwo nɔ̃ ko, shi esa ni amɛtsi amɛhe kwraa kɛjɛ nakai maŋsɛɛ maji lɛ amli maŋkwramɔ saji ahe. Ebiɔ ni amɛye amɛdiɛŋtsɛ amɛmaji lɛ amli nɔyelii lɛ anɔkwale ni amɛyɛ enɔyaa he awuŋa, yɛ be mli ni amɛkɛ maŋsɛɛ nɔyelii nɛɛ yeɔ lɛ. Kɛji amɛfeee enɛ lɛ, belɛ abakpɛlɛŋ hegbɛi ni amɛyɔɔ kɛha nakai shikpɔŋ lɛ nɔ hilɛ lɛ nɔ, aloo abaashwie amɛ kɛjɛ maŋ lɛ mli.
24. Nɛkɛ mumɔŋ bɔfoi nɛɛ ji mɛɛ maŋ nɔ bii, mɛɛ nɔyeli amɛdamɔɔ enajiaŋ, ni mɛɛ jeŋ nifeemɔ ko amɛtsiɔ amɛhe kɛjɛɔ he koni amɛkɛwo amɛhe muji?
24 Kristo nanemɛi niyelɔi 144,000 lɛ yɔseɔ akɛ amɛji “bɔfoi yɛ Kristo najiaŋ” yɛ be mli ni ayɔɔ shikpɔŋ nɔ lɛ. Amɛtsɔɔ ŋmalɛ lɛ nɔ amɛnaa nɔ ni bɔfoi diɛŋtsɛ ni amɛji lɛ tsɔɔ yɛ tsakpaa ni ka amɛkɛ je lɛ ni kɛ Nyɔŋmɔ yeee lɛ teŋ lɛ hewɔ. (Rom. 5:10) Amɛkɛ bɔfo Paulo jajeɔ akɛ: “Wɔmaŋ lɛ, ŋwɛi eyɔɔ, heni wɔkwɛɔ wɔyiwalaherelɔ ni ji Nuntsɔ Yesu Kristo lɛ gbɛ kɛjɛɔ lɛ.” (Fil. 3:20) Esani amɛkɛ anɔkwayeli adamɔ ŋwɛi maŋtsɛyeli ni Nuntsɔ Yesu Kristo fa amɛ akɛ amɛshiɛ yɛ jeŋ muu fɛɛ lɛ najiaŋ yɛ nɛkɛ yiwalɛ jeŋ nɛɛ mli. (Mat. 24:14) Mumɔŋ bɔfoi ni amɛji kɛha henyɛlɔi ajeŋ ko lɛ eŋmɛɛɛ amɛ gbɛ ni amɛkɛ amɛhe awo je nɛŋ maŋkwramɔ saji amli. Amɛnyɛŋ ni amɛkɛ amɛhe awo maŋkwramɔŋ oshikifɔɔ he gbɛjianɔtoo ko mli, aloo amɛhiɛ jeŋ nɔyeli mli maŋsɔɔmɔ gbɛhe ko mli taakɛ bɔni je lɛŋ bɔfo ko nyɛŋ aja anɔkwa ni eyeɔ lɛ mli ni eyahiɛ maŋkwramɔŋ gbɛhe ko mli yɛ maŋsɛɛ lɛ. Yɛ nɛkɛ gbɛ nɔ amɛtsiɔ amɛhe kɛjɛɔ kuuŋ heni amɛyɔɔ lɛ gbɛnaanii komɛi ni kɛ basabasafeemɔ kɛ lashishwiemɔ baa ni shikpɔŋ lɛ nɔ maŋ ko kɛ ehe woɔ mli lɛ he.
25. Te feɔ tɛɛŋ ni Maŋtsɛyeli niyelɔi 144,000 lɛ tsiɔ amɛhe kɛjɛɔ “kooloo ni hiɛ yɔɔ la” Iɛ kɛ “amaga” lɛ jamɔ he ni amɛheee ekadi lɛ yɛ amɛhiɛtsei anɔ kɛ amɛniji ahe lɛ?
25 Yɛ enɛ hewɔ lɛ wɔbaanyɛ wɔyɔse nɔ ni bɔfo Yohane wie yɛ anɔkwafoi 144,000 ni batsɔmɔ Maŋtsɛyeli lɛ mli Kristo hefatalɔi lɛ ahe lɛ jogbaŋŋ. “Mina mɛi ni afolɔ amɛyii [kɛ lema] lɛ yɛ Yesu odaseyeli lɛ kɛ Nyɔŋmɔ Wiemɔ lɛ hewɔ lɛ asusumai lɛ, kɛ mɛi ni jako kooloo ni hiɛ yɔɔ la lɛ loo emaga lɛ ni amɛheko ekadi lɛ yɛ amɛhiɛŋtsei anɔ loo amɛdɛŋ lɛ. Ni amɛba wala mli ni amɛkɛ Kristo ye maŋtsɛ afii akpe.” (Kpoj. 20:4, NW) Yɛ Nyɔŋmɔ mumɔ lɛ hewalɛ ni kɛ shishinumɔ haa hewɔ lɛ, amɛnaa “kooloo ni hiɛ yɔɔ la,” lɛ kadimɔ yibɔ ni feɔ 666 lɛ akɛ no ji Abonsam jeŋ fɛɛ maŋkwramɔ gbɛjianɔtoo, nɔ ni etsɔɔ nɔ ebafeɔ “je nɛɛ lumɔ” lɛ. Amɛmiina ŋmɛnɛ akɛ nakai maŋkwramɔŋ kooloo ni hiɛ yɔɔ la lɛ “amaga” lɛ ji maŋkwramɔ gbɛjianɔtoo kroko, ni ji Jeŋmaji Ekomefeemɔ lɛ, adesa gbɛjianɔtoo kɛha toiŋjɔlɛ kɛ shweshweeshwe shihilɛ kɛha jeŋ ni kɛ Nyɔŋmɔ yeee nɛɛ. Kɛji akɛ amɛhiɛ amɛhetsemɔ mli ni amɛkɛ amɛhe wooo nɛkɛ okaditoo “kooloo ni hiɛ yɔɔ la” nɛɛ maŋkwramɔ kɛ tawuu saji amli lɛ, no dani amɛbaafee mɛi ni heko “kooloo ni hiɛ yɔɔ la” lɛ okadi lɛ yɛ amɛhiɛŋtsei anɔ loo amɛdɛŋ
26. Tsɛ, amɛtsiɔ amɛhe kɛjɛɔ “kooloo ni hiɛ yɔɔ la” lɛ kɛ ‘ekadi’ lɛ jamɔ he moŋ, shi mɛni ji nɔ ni 144,000 lɛ feɔ kɛhaa je nɛɛ mli “hegbɛi ni yeɔ nɔ” lɛ, kɛyashiɔ nɛgbɛ?
26 Anɔkwafoi 144,000 lɛ jeee “kooloo ni hiɛ yɔɔ la” lɛ kɛ amaŋkwramɔŋ “amaga” lɛ nyɔji aloo ejalɔi. Amɛjieee amɛhe kpo amɛtsɔɔɔ yɛ faŋŋ tamɔ ekadi ko ni yɔɔ hiɛŋtso nɔ kpetekpelee akɛ amɛji adesai anɔyelii ni hɔ Satan Abonsam shishi lɛ he “kooloo ni hiɛ yɔɔ la” lɛ nyɔji. Amɛjieee amaŋkwramɔŋ “okadi” lɛ kpo yɛ amɛdɛŋ amɛtsɔɔɔ yɛ “kooloo ni hiɛ yɔɔ la” lɛ sɛɛ ni amɛaafi kɛ hiɛdɔɔ kɛ eshieŋtsɛmɛi ni amɛaaji kɛ ja ni amɛaaja lɛ lɛ gbɛfaŋ. Amɛboɔ ŋaawoo ni bɔfo Paulo kɛha yɛ Romabii 13:1-7 lɛ toi ni amɛkɛ hiɛdɔɔ ‘baa amɛhe shi amɛhaa hegbɛi ni yeɔ nɔ’ yɛ je nɛɛ mli lɛ, ni amɛtsuɔ too kɛ nibii ni sa lɛ fɛɛ. Heshibaa nɛɛ kɔɔɔ nɔ fɛɛ nɔ he; husu yɛ mli, yɛ yiŋtoo ko ni hiɛdɔɔ yɔɔ mli lɛ hewɔ. Mɛni ji no? No nɛ: Kɛji ákɛ hegbɛi ni yeɔ nɔ yɛ shikpɔŋ nɔ lɛ mlai kɛ amɛkpɔi lɛ te shi wo Ŋwɛi Floflo Nyɔŋmɔ lɛ mlai kɛ ekpɔi lɛ, belɛ esa ni amɛkɛ hiɛdɔɔ akɔ gbɛ ni Kristo bɔfoi lɛ je fɔ shi yɛ Saneyelihe Wulu lɛ ni yɔɔ Yerusalem lɛ: “Esa akɛ aboɔ Nyɔŋmɔ moŋ toi akɛ nɔyelɔ fe gbɔmɛi.” (Bɔf. 5:29, NW) Kɛji amɛfee enɛ lɛ, no dani amɛbaanyɛ amɛtsi amɛhe kɛjɛ “kooloo ni hiɛ yɔɔ la” lɛ “okadi” lɛ he ni amɛbafee mɛi ni kɛ Kristo ni yɔɔ ŋwɛi lɛ sa maŋtsɛyeli
27. Taakɛ Kpojiemɔ 22:4 tsɔɔ lɛ, mɛɛ kadimɔnii 144,000 lɛ jieɔ lɛ kpo yɛ amɛhiɛŋtsei anɔ?
27 No hewɔ lɛ anɔkwafoi 144,000 lɛ kɛ jeŋ ni sumɔɔ lɛ pɛ ehe nɛɛ mli maŋkwramɔŋ muji nitsumɔi lɛ ateŋ eko eko eyaŋ Kristo ŋwɛi maŋtsɛyeli lɛ mli. Yɛ kadimɔnii ko ni eeeba akɛ aaana yɛ amɛhiɛŋtsei anɔ lɛ gbɛfaŋ lɛ, Kpojiemɔ 22:3-5 kɛɔ yɛ Nyɔŋmɔ tsuji anɔkwafoi nɛɛ ahe akɛ: “Ni etsuji lɛ aaasɔmɔ lɛ; ni amɛaana ehiɛ, ni egbɛi lɛ aaahi amɛhiɛŋtsei anɔ. . . . Nuntsɔ [Yehowa] Nyɔŋmɔ lɛ aaakpɛ aha amɛ, ni amɛaaye maŋtsɛ kɛaatee naanɔi anaanɔ.”
GBƐHE MLI NI AHIƆ AFII AKPE LƐ MLI SƐƐNAMƆ
28. (a) Mɛɛ sɛɛnamɔ 144,000 lɛ nine aashɛ nɔ yɛ amɛ afii akpɛ nɔyeli ni sɛɛyelɔi bɛ mli lɛ hewɔ? (b Mɛni Satan kɛ edaimonioi lɛ baafee yɛ beni afɛne amɛ lɛ, yɛ ŋwɛi nɔyeli he, ni mɛni baaba mɛi ni abaashishiu amɛ lɛ anɔ?
28 Mɛɛ hegbɛ ni yɔɔ nyam po enɛ baaji aha amɛ nɛkɛ, akɛ amɛkɛ Kristo aaaye nɔ akɛ maŋtsɛmɛi afii akpe yɛ Satan kɛ edaimonioi lɛ amɔmɔ kɛ bukwɔŋkwɔŋ, lɛ mliwoo sɛɛ! Enɛ baaŋmɛ amɛ gbɛ ni amɛkɛ be ni sa atsu nitsumɔ ni Yehowa Nyɔŋmɔ eto akɛ atsu he nii yɛ E-gbɛjianɔtoo hee lɛ mli klɛŋklɛŋ afii akpe lɛ mli lɛ kɛyawula shi kɛ omanye. Sɛɛyelɔi komɛi ni baabɔ mɔdɛŋ ni amɛtsake nibii ni amɛfee lɛ ahiɛ aloo ni amɛfa ni ato nibii ahe gbɛjianɔ yɛ gbɛ kroko nɔ ehiŋ shi kwraa yɛ amɛkɛ Kristo sɛɛ. Taakɛ Kpojiemɔ 20:7-10, tsɔɔ lɛ, Satan kɛ edaimonioi lɛ baabɔ mɔdɛŋ atsake saji ahiɛ yɛ be mli ni afɛne lɛ yɛ afii akpe lɛ naagbee mli lɛ. Amɛbaabɔ mɔdɛŋ fɛɛ ni amɛaanyɛ ni amɛkɛfite nɔ ni afii akpe nɔyeli lɛ etsu kɛha Nyɔŋmɔ hiɛnyamwoo kɛ adesai ajɔɔmɔ lɛ, shi amɛyeŋ omanye Gbɔmɛi fɛɛ ni Satan shishiuɔ amɛ lɛ baayoo akɛ atua ni amɛtse amɛshi ŋwɛi nɔyeli lɛ efee efolo ni amɛnine enyɛ shi. Kɛkɛ lɛ, abaakpata Satan kɛ edaimonioi lɛ kɛ nakai shikpɔŋ lɛ nɔ atuatselɔi lɛ fɛɛ ahiɛ kwraa kɛjɛ hiɛkalɔi fɛɛ ateŋ.
29. Yɛ afii akpe lɛ naagbee lɛ, te nibii aaaje kpo aha tɛɛŋ ni tsɔɔ akɛ Nyɔŋmɔ tsuuu E-Bi lɛ yakatswaa ni E-Bi lɛ hu gbooo efolo? (b) Mɛɛ gbɛ nɔ Kristo kɛ 144,000 lɛ baanyɛ anya kɛ miishɛɛ akɛ amɛyeee nɔ yakatswaa afii akpe?
29 Yesu Kristo kɛ enanemɛi 144,000 maŋtsɛyeli niyelɔi lɛ afii akpɛ nɔyeli lɛ efeŋ efolo. Adesai ni aaaha amɛbote emuuyeli mli yɛ jeŋ fɛɛ paradeiso lɛ mli lɛ baafee anɔkwasane ko ni ŋwanejee ko kwraa bɛ he. Hɛɛ, Yesu Kristo ni ji Nyɔŋmɔ Bi lɛ gbele lɛ efeŋ yaka, ni yiŋtoo hewɔ ni Nyɔŋmɔ jɛ esuɔmɔ mli etsu lɛ kɛba je nɛɛ mli lɛ hu efeŋ efolo. Abaatsɔ mɛi ni kɛ anɔkwayeli fiɔ Yehowa jeŋ muu fɛɛ nɔyeli lɛ sɛɛ ni amɛdamɔɔ Satan fɛnemɔ yɛ be fioo mli lɛ kaa lɛ naa yɛ anɔkwayeli mli lɛ nɔ ayoo yɛ faŋŋ mli akɛ Nyɔŋmɔ Ofe lɛ ni ji Bɔlɔ lɛ baanyɛ ekɛ hii kɛ yei ni hiɛɔ amɛ emuuyeli mli amɛhaa Lɛ ni amɛkuuu mli kɔkɔɔkɔ lɛ awo shikpɔŋ nɛɛ nɔ. Yɛ enɛ hewɔ lɛ, amɛbaafee mɛi ni sa akɛ Yehowa Nyɔŋmɔ ni ji Kojolɔ Kpele lɛ buɔ amɛ jalɔi, ni ekɛ sɔɔmɔ hegbɛ ni anyɛŋ mli aku duroɔ amɛ ni amɛsɔmɔ Lɛ yɛ toiŋjɔlɛ kɛ miishɛɛ mli yɛ Paradeiso shikpɔŋ lɛ nɔ kɛya naanɔ. (Kpoj. 20:5) Yɛ nɔ ni ejɛ adesai akojomɔ ni jɛ ŋwɛi eba nɛɛ mli lɛ hewɔ lɛ, Yesu Kristo kɛ ehefatalɔi maŋtsɛmɛi 144,000 lɛ baanya ni amɛaale akɛ amɛ afii akpe nɔyeli lɛ ewo yibii kpakpai yɛ omanyeyeli mli.
30. Mɛɛ gbɛhe kroko ni fata maŋtsɛmɛi anɔ lɛ he esa akɛ 144,000 lɛ kɛ Kristo atsu he nii afii akpe, ni enɛ teeɔ mɛɛ sanebimɔi ashi?
30 Shi kɛlɛ, anunyam ninaa ni bɔfo Yohane na lɛ jieɔ lɛ kpo etsɔɔ wɔ akɛ maŋtsɛyeli lɛ mli hefatalɔi niyelɔi 144,000 lɛ feɔ nɔ ni fe maŋtsɛmɛi pɛ kɛkɛ ni amɛkɛ Kristo aaaye afii akpe. Kpojiemɔ 20:6 kɛɔ yɛ nɛkɛ 144,000 ni naa “klɛŋklɛŋ shitee” lɛ mli gbɛfaŋnɔ lɛ he akɛ “amɛaatsɔmɔ Nyɔŋmɔ kɛ Kristo osɔfoi.” Mɛni hewɔ esa akɛ amɛfee “osɔfoi” hu afii akpe? Mɛni no kɛaaba ni maŋtsɛyeli folo ko nyɛŋ atsu? Wɔtsui enyɔŋ wɔmli yɛ afii akpe ni baa lɛ he akɛ ja wɔtao enɛ mli da.