Hewalɛ He Mpleshii​—Mɛni Baajɛ Mli Aba?

“BOKA LƐ BOKA NI, ni Anai lɛ Anai ni, ni enyɔ lɛ ekpeŋ gbi ko gbi ko, Kɛyashi be mli ni Shikpɔŋ akɛ Atatu aaakpe be ko yɛ Nyɔŋmɔ Kojomɔ Sɛi kpeteŋkpele lɛ hiɛ.” Hewalɛ he mpleshii ni etee nɔ nyɛsɛɛ nɛɛ yɛ Bokagbɛ kɛ Anaigbɛ kui enyɔ lɛ ateŋ lɛ haa Rudyard Kipling lalafoo wiemɔi lɛ feɔ nɔ ni eba yɛ ebe mli pɛpɛɛpɛ yɛ gbɛ ni yɔɔ naakpɛɛ nɔ.

Shi kɛ wɔsusu he lɛ, kɛ mɔ ko miiwie Boka kɛ Anai mpleshii lɛ he lɛ, wiemɔ “Boka” lɛ damɔɔɔ shi kɛhaaa boka diɛŋtsɛ taakɛ “Anai” hu damɔɔɔ shi kɛhaaa maji fɛɛ ni amɛbua amɛhe naa yɛ shikpɔŋ lɛ anaigbɛ he ko lɛ. Mɛi ni feɔ Komunist kuu lɛ ŋmɛnɛ jeee Soviet Union loo Rusia kɛ Europa Bokagbɛ maji lɛ pɛ, shi moŋ Afrika maji komɛi kɛ Cuba hu. Maji nɛ nyɛŋ afee maji ni yɔɔ bokagbɛ he ko. Nakai nɔŋŋ hu maji ni fata “Anaigbɛ” kuu lɛ ahe lɛ ji maji tamɔ Kanada, Denmark (kɛ Greenland) , Iceland, Norway, Anstralia, New Zealand kɛ Japan. Maji nɛɛ ekomɛi bɛ Anaigbɛ kwraa. No hewɔ lɛ mɛni hewɔ gbɔmɛi wieɔ “Boka kɛ Anai mpleshii” he lɛ? Ejaakɛ kɛjɛ shishijee lɛ “Bei” ji nɔ ni ka jeŋ hewalɛi enyɔ lɛ ateŋ​—Soviet Union loo Rusia kɛ United States, Amerika​—amɛteŋ mɔ kome ka Europa bokagbɛ titri, ni mɔ kroko lɛ hu ka anaigbɛ. No hewɔ lɛ taakɛ nibii etee nɔ lɛ, “Boka” kɛ “Anai” ebana shishinumɔ kroko yɛ okadi gbɛ nɔ.

“Maŋtsɛyeli” Enyɔ Ni Yeɔ Bienyɛ

Nakai nɔŋŋ hu yɛ Daniel yitso 11 lɛ mli lɛ Biblia lɛ kɛ wiemɔi “kooyigbɛ maŋtsɛ” kɛ “wuoyigbɛ maŋtsɛ” tsuɔ nii yɛ gbɛ ni hi nɔ akɛtsɔɔ maŋkwramɔŋ hewalɛi ni yeɔ bienyɛ ni tsara nɔ kɛba. Yɛ shishijee mli lɛ, nɛkɛ “maŋtsɛmɛi” nɛɛ yɛ Daniel webii​—ni ji Yehowa blema webii​—lɛ shikpɔŋ lɛ kooyigbɛ kɛ wuoyigbɛ yɛ Boka Teŋgbɛ.

Gbalɛ lɛ mlibaa je shishi yɛ Aleksanda kpeteŋkpele lɛ gbele sɛɛ kɛ Makedonia Maŋtsɛyeli lɛ mli ni ajara aha esɛɛyelɔi ejwɛ lɛ. Amɛteŋ mɛi enyɔ Seleucus I kɛ Ptolemy I batsɔmɔ “kooyigbɛ maŋtsɛ” kɛ “wuoyigbɛ maŋtsɛ.” Hii nɛɛ ateŋ mɔ kome to Seleucid Maŋtsɛyeli ni yɔɔ kooyigbɛ lɛ, ni mɔ kroko lɛ batsɔ klɛŋklɛŋ Ptolemaic Faraoi ni ye Mizraim nɔ yɛ wuoyigbɛ lɛ. Afii ohai babaoo tee nɔ ni mɛi ni ji Yehowa webii yɛ nakai be lɛ mli lɛ ashikpɔŋ lɛ ebatsɔ nɔ ni hewalɛi enyɔ nɛɛ beɔ yɛ he, ejaakɛ amɛwu koni amɛye nɔ.

No hewɔ lɛ, taakɛ esa akɛ eba lɛ, hewalɛi ni “kooyigbɛ maŋtsɛ” lɛ kɛ “wuoyigbɛ maŋtsɛ” lɛ yɔɔ lɛ tsake yɛ be mli ni be hoɔ lɛ. Shi bei kɛha nɔyeli lɛ tee nɔ kɛtsɔ afii ohai abɔ lɛ amli. Nɛkɛ gbalɛ nɛɛ hu tsɔɔ akɛ mpleshii ni ka “maŋtsɛmɛi enyɔ” nɛɛ ateŋ lɛ baaya nɔ aahu kɛyashi “naagbee be lɛ mli.” (Daniel 11:​27, 35, 40)a Ŋmɛnɛ wɔmiina ni mpleshii kɛha jeŋ hewalɛ lɛ miiya nɔ waa fe be fɛɛ yɛ Komunist kɛ mɛi ni jeee Komunist bii lɛ aje lɛ mli. Ani abaanyɛ ayoo nɛkɛ kui enyɔ ni yeɔ bienyɛ ni ji “maŋtsɛmɛi enyɔ” nɛɛ? Nyɛhaa wɔkwɛa.

“Mɔji Anyɔŋmɔ”

Yɛ be mli ni ewie “naagbee be” lɛ he lɛ sɛɛ pɛ kɛkɛ ni Daniel gbalɛ lɛ tee nɔ ekɛɛ akɛ:

“Ni [kooyigbɛ] maŋtsɛ lɛ aaafee nɔ ni esumɔɔ, ni eeewo ehe nɔ, ni eeefee ehe agbo fe nyɔŋmɔ fɛɛ nyɔŋmɔ, ni eeewie hepupuumɔ wiemɔi eshi nyɔŋmɔi a-Nyɔŋmɔ lɛ. . . . Ni ebuŋ etsɛmɛi anyɔŋmɔ lɛ . . . Ni eeewo mɔji anyɔŋmɔ lɛ hiɛ nyam yɛ enajiaŋ, ni ekɛ shika kɛ jwiɛtɛi kɛ tɛi ni jara wa kɛ fɛonibii aaawo nyɔŋmɔ ko ni etsɛmɛi lɛ leee hiɛ nyam.”​—Daniel 11:​36-38.

Hewalɛi enyɔ ni fe fɛɛ nɛɛ ateŋ namɔ ewie eshi “nyɔŋmɔi a-Nyɔŋmɔ lɛ” ni ji Yehowa yɛ faŋŋ mli ni ehiɛ gbooo, ni etsɛɔ jamɔ akɛ “ebɔɔ ni gbeɔ gbɔmɛi ajwɛŋmɔ?” Amɛteŋ namɔ kɛ afii pii ebua shika fɛɛ ni eyɔɔ lɛ naa koni ekɛ hehiamɔ afee tawuu nii moŋ fe daaŋ ŋmaa, kɔɔyɔŋ lɛji ni akɛwuɔ ta kɛ tawuu nii sɔrɔtoi fe niyenii, hehaanɔ̃ kɛ nibii ni he hiaa gbɔmɛi lɛ, ni yɛ no hewɔ lɛ eewo “mɔji anyɔŋmɔ” lɛ moŋ hiɛ nyam? Mɛɛ “maŋtsɛ” eja “nyɔŋmɔ ko ni etsɛmɛi lɛ leee”​—jeŋnilee ni akɛwuɔ ta​—ni ewo ehiɛ nyam kɛtsɔ “shika kɛ jwiɛtɛi” nɔ, ni oshashaooo shi kwraa akɛ ekɛ ehewɔ nibii ni fa aaawo tawuu he nilee mli ni ekɛha asraafoi? Ŋwanejee ko kwraa bɛ he akɛ ŋmɛnɛŋmɛnɛ beaŋ “kooyigbɛ maŋtsɛ” lɛ ji Komunist kuu lɛ ni Soviet Union loo Rusia ji amɛyitso lɛ.

Afi 1977 mli tɔ̃ɔ Amerika Maŋ Hebuu he Nilee Nitsumɔhe lɛ kpɛlɛ nɔ akɛ Rusia asraafoi lɛ “he wa fe fɛɛ yɛ je lɛ mli, ni amɛyɛ tawuu nii kɛ asraafoi babaoo ni abua amɛnaa kɛha amrɔ tawuu.” Nɔ ni akɛfiɔ enɛ sɛɛ ji tsɔsemɔ ni akɛwoɔ skul gbekɛbii ajwɛŋmɔ mli. Ahaa nuu fɛɛ nuu ni eye afii 18 lɛ kaseɔ tawuu, ekɛ asraafoi ni nyiɛ shikpɔŋ lɛ hiɔ shi afii enyɔ aloo yɛ kɔɔyɔŋ lɛji kɛ tawuu mli, aloo afii etɛ yɛ ŋshɔ hiɛ ta lɛji atsɔsemɔ mli. Ni amɛhiɔ shi akɛ mɛi ni ásaa amɛ ato kɛha tawuu aahu kɛyashi be mli ni amɛaaye afii 50, ni tsɔɔ akɛ amrɔ nɛɛ atsɔse Rusiabii akpekpei nyɔŋmai abɔ yɛ tawuu mli ni abaanyɛ atsɛ amɛ kɛha tawuu oya.

‘Shimɔ’ Ni “Wuoyigbɛ Maŋtsɛ” Lɛ ‘Shiɔ’

Akɛni ŋmɛnɛŋmɛnɛ beaŋ “kooyigbɛ maŋtsɛ” lɛ ji Komunist kuu lɛ ni Soviet Union loo Rusia nyiɛ hiɛ lɛ hewɔ lɛ, “wuoyigbɛ maŋtsɛ” lɛ nyɛŋ afee mɔ ko fe ebienyɛ ni jeee Komunist kuu lɛ mlinyo ni yɔɔ Amerika hiɛnyiɛmɔ shishi lɛ. Daniel gbalɛ lɛ tee nɔ ewie nɛkɛ “maŋtsɛmɛi” nɛɛ ahe akɛ: “Ni naagbee be lɛ mli lɛ wuoyigbɛ maŋtsɛ lɛ kɛ [kooyigbɛ maŋtsɛ] lɛ aaashi.”​—Daniel 11:⁠40.

Ta lɛ sɛɛ ‘shimɔ’ ni “wuoyigbɛ maŋtsɛ” lɛ kɛba lɛ je shishi fiofio, yɛ afi 1947, kɛ nɔ ni atsɛɔ lɛ “Truman Doctrine” (Truman Tsɔɔmɔ) ni ji “nɔyeli hewalɛ gbɛɛ-kɛ-shwamɔ naatsii” lɛ. Nɔ ni nyiɛ enɛ sɛɛ ji NATO (majimaji ateŋ tawuu he kpaŋmɔ ko) ni ato ama shi yɛ 1949, kɛ sɛɛ mli kpokpaa wuji anɔ maŋ hebuu gbɛjianɔtooi ni ato ama shi. ‘Shimɔ’ nɛɛ mli bawa waa, yɛ Vietnam ta ni ji enyɔ lɛ mli. Shi nɛkɛ ta nɛɛ kɛ nɔ ni jɛ mli ba ni ehiii kɛhaaa Anaigbɛ lɛ bafee tamɔ nɔ ni eefi “okpoi”​—mɛi ni yɔɔ U.S. Amerika kɛ mɛi ni fiɔ esɛɛ ni sumɔɔ ni akɛ Soviet Union loo Rusia kuu lɛ ahi shi yɛ toiŋjɔlɛ mli lɛ asɛɛ.

Shi maŋkwramɔŋ saji ni etee nɔ nyɛsɛɛ nɛɛ lɛ tsɔɔ akɛ mɛi ni tamɔ “laalɔi”​—mɛi ni sumɔɔ ni akɛ Komunist kuu lɛ aye dɛŋdɛŋ lɛ ayi miifa fe “okpoi” lɛ. ‘Shi’ ni “wuoyigbɛ maŋtsɛ” lɛ ‘shiɔ’ “kooyigbɛ maŋtsɛ” lɛ lɛ mli ewa agbɛnɛ. Nɔ ni yɔɔ miishɛɛ ji akɛ, amaniɛbɔɔ nɛɛ ma Anglo-Amerika ekomefeemɔ yɛ ‘shimɔ’ nɛɛ mli lɛ nɔ mi: “Britania Maŋsɔɔlɔ Nukpa Margaret Thatcher ni kɛ Mr. Reagan fɛɛ heee Kremlin (Rusia Gwabɔɔ) lɛ amɛyeee lɛ pɛ ji NATO maji lɛ amli hiɛnyiɛlɔ ni fee eshidaamɔ lɛ faŋŋ. Ewie yɛ Soo gbɛkɛ, [January 29, 1981] akɛ nɔ ko bɛ ni tsɔɔ akɛ Rusia yɛ miishɛɛ diɛŋtsɛ akɛ toiŋjɔlɛ aaahi majimaji ateŋ.” (International Herald Tribune, January 31, 1981) Heni “wuoyigbɛ maŋtsɛ” lɛ kɛ ‘shimɔ’ nɛɛ baaya ayashɛ lɛ ji miishɛɛ sane ni wɔbaakwɛ yɛ gbii ni yɔɔ wɔhiɛ lɛ amli.

Taakɛ abaakpa gbɛ lɛ, “kooyigbɛ maŋtsɛ” lɛ ni amrɔ nɛɛ amɛdamɔ shi kɛya Komunist kuu lɛ fee nɛkɛ ‘shimɔ’ nɛɛ he nɔ ko. Agba enɛ hu afɔ shi yɛ Daniel gbalɛ lɛ mli, yitso 11. Nyɛhaa wɔkanea:

“Ni kooyigbɛ maŋtsɛ lɛ aaafa kɛaaba [wuoyigbɛ maŋtsɛ lɛ] enɔ kɛ shwiilii kɛ okpɔŋɔiatsɛmɛi kɛ lɛji babaoo, . . . ni eeeba shikpɔji lɛ anɔ, ni eeeho tamɔ nu babaoo, ni eeetsɔ nɔ kɛaaho . . . Ni eeekpa enine mli yɛ shikpɔji lɛ anɔ, Ni eeeye shika kɛ jwiɛtɛi jwetrii . . . lɛ fɛɛ nɔ.”​—Daniel 11:​40-43.

Nɔ Ni “Kooyigbɛ Maŋtsɛ” Lɛ Feɔ Yɛ Enɛ He

Rusia nifeemɔ yɛ nɛkɛ “wuoyigbɛ maŋtsɛ” lɛ keketeefeemɔ nɛɛ he lɛ tsɔɔ akɛ “kooyigbɛ maŋtsɛ” lɛ sumɔŋ ni anaanaa enɔ aya kɛkɛ. Kɛjɛ Jeŋ Ta II kɛbaa nɛɛ Rusia “miikpa enine mli yɛ shikpɔji lɛ anɔ,” koni eye “shikpɔji” sɔrɔtoi anɔ kɛ ‘jwetrii ni aŋɔtee’ ni pɛtro fata he.

Mpoa ni enɛ tswaa Anaigbɛ lɛ hu kɔɔ jwɛŋmɔ ni atsɔɔ nɔ ayeɔ maŋ nɔ lɛ hu he, ejaakɛ Jeŋ Kuu ni ji Etɛ ni kɛɛ amɛkɛ amɛhe ebɔɔɔ jeŋ hewalɛi enyɔ lɛ eko he lɛ babaoo ni amɛye amɛhe kɛjɛ maŋsɛɛ nɔyelii ahe lɛ ekpɛlɛ Marxist ni tamɔ Rusia nɔyeli gbɛjianɔtoo lɛ nɔ. Nibii ni yaa nɔ lɛ eha Russiabii ena Asia, Boka Teŋgbɛ, Afrika kɛ Amerika Wuoyigbɛ maji po nɔ hewalɛ. Nɔ ni fata he lɛ “kooyigbɛ maŋtsɛ lɛ” eye omanye yɛ shitee-kɛ-wooi ni Komunistbii nyiɛɔ hiɛ lɛ amli ni enɛ eha enyɛ “ekpa enine mli yɛ shikpɔji lɛ anɔ,” shikpɔji ni ekɛ enɔyeli he gbɛjianɔtoo, tawuu nii kɛ tsɔnei ahe nilee eye ebua amɛ lɛ.

Akɛni eyɔɔ asraafoi fe akpekpei ejwɛ yɛ Rusia kɛ Europa Bokagbɛ kɛ ta dade shwiilii 50,000, ta kɔɔyɔŋ lɛji 5,775, ŋshɔ hiɛ ta lɛji 289 kɛ agbɛnɛ kɛ hoo kwraa lɛ ŋshɔ shishi ta lɛji 257 hewɔ lɛ, “kooyigbɛ maŋtsɛ” lɛ yɛ nɔ ni ebaatsɔ nɔ efa kɛba kɛ “shwiilii kɛ okpɔŋɔiatsɛmɛi kɛ lɛji babaoo . . . ni eeeho tamɔ nu babaoo, ni eeetsɔ nɔ kɛaaho.”

Taakɛ amaniɛbɔɔi tsɔɔ lɛ, Rusia asraafoi yɛ Afghanistan, Cuba, Ethiopia, Iraq, Libya, Mali, Mauritania, Vietnam, Syria kɛ South Yemen, kɛ taawuu mli ŋaawolɔi babaoo ni yɔɔ shikpɔji krokomɛi anɔ. Rusia ŋshɔ hiɛ ta lɛji yɛ ŋshɔi wuji kɛ bibii lɛ fɛɛ hiɛ ni Mediteranea hu fata he. He ni Komunist “kooyigbɛ maŋtsɛ” lɛ aaaŋmɛɛ ehewalɛi nɛɛ ahe kɛyashɛ ni “ekpa enine mli yɛ shikpɔji” krokomɛi “anɔ” kɛyashɛ lɛ ji nɔ ko ni wɔsɛɛ be pɛ baanyɛ atsɔɔ.

“Maŋtsɛmɛi” Enyɔ Lɛ Fɛɛ Baa Amɛnaagbee

He fɛɛ he ni “wuoyigbɛ maŋtsɛ” lɛ “aaashi” kɛyashɛ, ni kɛji akɛ “kooyigbɛ maŋtsɛ” lɛ hu ‘aaaho tamɔ nui babaoo’ kɛtao maji krokomɛi ni eeetutua amɛ lɛ nɔ, aloo efeŋ nakai hu lɛ, nɔ kome ko yɛ ni eji anɔkwale: Taakɛ Daniel gbalɛ lɛ tsɔɔ lɛ, “maŋtsɛmɛi” nɛɛ eko yeŋ eko nɔ kunim kwraa. Gbalɛ lɛ wieɔ “kooyigbɛ maŋtsɛ” lɛ he akɛ: “Ni eeeshɛ enaagbee, ni mɔ ko bɛ ni baaye abua lɛ.” (Daniel 11:45) Ni gbalɛ ko ni tamɔ nakai nɔŋŋ hu wieɔ Anglo-Amerika Jeŋ Hewalɛ ni “wuoyigbɛ maŋtsɛ” lɛ feɔ ehe mfoniri lɛ he akɛ “shi aaakumɔ lɛ, ni jeee kɛ nine tete.”​—Daniel 8:⁠25.

Mɛɛ gbɛ nɛkɛ “maŋtsɛmɛi” nɛɛ baatsɔ nɔ amɛba amɛnaagbee “ni jeee kɛ nine tete” ni “nɔ ko bɛ ni baaye abua lɛ”? Amɛnaagbee lɛ baŋ kɛtsɔŋ adesa nifeemɔ ko nɔ. Daniel gbalɛ lɛ yaa nɔ akɛ: “Ni nakai be lɛ mli lɛ Mikael ni ji lumɔ kpeteŋkpele ni damɔ shi ha [Daniel, no hewɔ Iɛ Yehowa] omaŋbii lɛ aaate shi adamɔ shi; shi fimɔ be ko aaaba ni anako nɔ da kɛjɛ beyinɔ ni jeŋ maŋ ko yɔɔ lɛ kɛyashi nakai be lɛ mli.” (Daniel 12:⁠1) Mikael nɛɛ jeee mɔ ko akɛ Maŋtsɛ Yesu Kristo ni Yehowa ehala lɛ lɛ. (Okɛto Kpojiemɔ 12:​7-10 he.) “Fimɔ be” lɛ ji “amanehulu kpeteŋkpele” lɛ ni atsi ta yɛ Yesu diɛŋtsɛ gbalɛ ni kɔɔ “nibii agbɛjianɔtoo lɛ naagbee” he lɛ kɛ “ba ni eba” yɛ emaŋtsɛyeli lɛ mli lɛ.​—Mateo 24:​3, 21; Luka yitso 21.

Gbalɛ nɛɛ amlibaa yɛ ŋmɛnɛŋmɛnɛ beaŋ lɛ tsɔɔ akɛ “naagbee be” lɛ mli wɔyɔɔ nɛɛ. Etsɛŋ ni Kristo kɛ Komunist “kooyigbɛ maŋtsɛ” lɛ kɛ “wuoyigbɛ maŋtsɛ” lɛ ni jeee Komunistnyo lɛ baaba amɛnaagbee. Yɛ anɔkwale mli lɛ Maŋtsɛ Yesu Kristo ni ta sɛi nɔ lɛ kɛ “tsi ni naa ba” ‘baatswia amɛ’ kɛ maŋ kwramɔŋ maji krokomɛi fɛɛ ‘nii’ ni “ekɛ dadetso aaakpala amɛ.” (Kpojiemɔ 19:​11-21) Nɛkɛ gbɛ nɔ gbalɛ mfoniri kroko ni yɔɔ Daniel wolo lɛ mli lɛ baatsɔ aba mli kwraa, ejaakɛ wɔkaneɔ akɛ: “Ni nɛkɛ maŋtsɛmɛi [maŋkwramɔŋ hewalɛi] nɛɛ ayinɔ lɛ, Nyɔŋmɔ ni yɔɔ ŋwɛi lɛ aaatee maŋtsɛyeli ko shi ama shi ni efiteŋ dɔŋŋ kɛaatee naanɔ, ni ashiŋ maŋtsɛyeli nɛɛ ahaŋ maŋ kroko; eeejwara maŋtsɛyelii nɛɛ fɛɛ wɔtsɔwɔtsɔ, ni eeekpata amɛhiɛ, shi lɛ diɛŋtsɛ lɛ eeedamɔ shi kɛaatee naanɔ.”​—Daniel 2:​34, 35, 44.

Nakai maŋtsɛyeli lɛ kɛ naanɔ toiŋjɔlɛ baaba shikpɔŋ nɔ yɛ jalɛ gbɛjianɔtoo hee mli. (2 Petro 3:​13; Kpojiemɔ 21:​1-5) Maŋkwramɔŋ “maŋtsɛmɛi” ni waa mɛi ayi ehiŋ mli dɔŋŋ. Enɛ ji “maŋtsɛyeli” ni osɔle yɛ he, kɛji akɛ okɛɔ “Nuŋtsɔ lɛ Sɔlemɔ” lɛ. (Mateo 6:​9, 10) No ji adesai ahiɛnɔkamɔ kome pɛ. Yehowa Odasefoi baasumɔ ni amɛye amɛbuao ni okɛ hiɛnɔkamɔ nɛɛ afee bo diɛŋtsɛ onɔ̃.

[Shishigbɛ niŋmai]

[Wiemɔ ni akɔ ni akɛmiitsu nii ni yɔɔ baafa 5]

“Ni nɛkɛ maŋtsɛmɛi nɛɛ ayinɔ lɛ, Nyɔŋmɔ ni yɔɔ ŋwɛi lɛ aaatee maŋtsɛyeli ko shi ama shi ni efiteŋ dɔŋŋ kɛaatee naanɔ, ni ashiŋ maŋtsɛyeli nɛɛ ahaŋ maŋ kroko; eeejwara maŋtsɛyelii nɛɛ fɛɛ wɔtsɔwɔtsɔ, ni eeekpata amɛhiɛ, shi lɛ diɛŋtsɛ lɛ eeedamɔ shi kɛaatee naanɔ.”​—Daniel 2:⁠44.