Yitso Nyɔŋma Kɛ Etɛ
Maŋtsɛmɛi Enyɔ Kɛ Amɛhe Ewo Nɔmɔ Mli
1, 2. Mɛni hewɔ esa akɛ wɔná gbalɛ ni aŋma afɔ̃ shi yɛ Daniel yitso 11 lɛ he miishɛɛ lɛ?
MAŊTSƐMƐI akaŋshilɔi enyɔ kɛ amɛhe ewo hewalɛ fɛɛ he mpleshii mli. Beni afii lɛ hoɔ lɛ, kɛ́ klɛŋklɛŋmɔ lɛ baye nɔ lɛ, kɛkɛ lɛ mɔ kroko lɛ hu ebaye nɔ. Yɛ bei komɛi amli lɛ, maŋtsɛ kome yeɔ nɔ yɛ be mli ni mɔ kroko lɛ efeee nɔ ko, ni bei shɛɔ ni amɛkɛ amɛhe wooo nɔmɔ mli. Shi kɛkɛ lɛ tawuu kroko ete shi trukaa, kɛkɛ lɛ nɔmɔ lɛ ebɔi. Mɛi ni kɛ amɛhe woɔ nifeemɔ nɛɛ mli ji Siria Maŋtsɛ Seleucus I Nicator, Mizraim Maŋtsɛ Ptolemy Lagus, Siria Maŋtsɛ biyoo ni batsɔ Mizraim Maŋnyɛ Cleopatra I, Roma Maŋtsɛmɛi Augustus kɛ Tiberius, kɛ Palmyra Maŋnyɛ Zenobia. Beni nɔmɔ lɛ baa enaagbee lɛ, Nazi Germany, Komunist maji akuu lɛ, Anglo-Amerika Jeŋ Hewalɛ lɛ, Jeŋmaji Akpaŋmɔ lɛ, kɛ Jeŋmaji Ekomefeemɔ lɛ hu kɛ amɛhe ewo mli. Nɔ ni ba nɛɛ naagbee kwraa lɛ ji sane ko ni maŋkwramɔŋ gbɛjianɔtoi ni yɔɔ shihilɛ mli nɛɛ eko kwraa tsɔɔɔ hiɛ amɛleee. Yehowa bɔfo jaje gbalɛ ni hiɛdɔɔ yɔɔ mli nɛɛ etsɔɔ gbalɔ Daniel aaafee afii 2,500 ni eho nɛ.—Daniel, yitso 11.
2 Kwɛ miishɛɛ ni Daniel baaná akɛ eeenu ni ŋwɛibɔfo lɛ miijie akaŋshii ni kã maŋtsɛmɛi enyɔ ni baa lɛ ateŋ lɛ kpo ni eetsɔɔ mli fitsofitso kɛmiiha lɛ! Wɔ hu wɔyɛ nɔ ni yaa nɔ lɛ he miishɛɛ, ejaakɛ mpleshii ni kã maŋtsɛmɛi enyɔ lɛ ateŋ lɛ mli kpãa kɛbashɛɔ wɔgbii nɛɛ amli. Na ni wɔnaa bɔ ni yinɔsane etsɔɔ anɔkwale ni gbalɛ lɛ klɛŋklɛŋ fã lɛ ji ha lɛ baawaje wɔhemɔkɛyeli kɛ wɔhekɛnɔfɔɔ yɛ gbalɛ sane lɛ naagbee fã lɛ mlibaa ni baafee anɔkwale lɛ mli. Gbalɛ nɛɛ toi ni wɔɔbo lɛ baaha wɔna he ni wɔshɛ yɛ be mli lɛ mli faŋŋ. Ebaawaje wɔfaishitswaa akɛ wɔɔhi shi akɛ mɛi ni kɛ amɛhe wooo nɔmɔ lɛ mli lɛ hu, yɛ be mli ni wɔkɛ tsuishitoo mɛɔ Nyɔŋmɔ koni efã wɔhe lɛ. (Lala 146:3, 5) Belɛ nyɛhaa wɔkɛ miishɛɛ gbɛkpamɔ aboa toi jogbaŋŋ yɛ be mli ni Yehowa bɔfo lɛ wieɔ tsɔɔ Daniel lɛ.
ETE SHI EWO HELA MAŊTSƐYELI LƐ
3. Namɔ sɛɛ ŋwɛibɔfo lɛ fi “yɛ Dario Medianyo lɛ klɛŋklɛŋ afi lɛ nɔ”?
3 Ŋwɛibɔfo lɛ kɛɛ: “Shi mi hu, yɛ Dario Medianyo lɛ klɛŋklɛŋ afi lɛ nɔ [539 loo 538 D.Ŋ.B.] lɛ, midamɔ shi, ni mawo lɛ hewalɛ ni mafi esɛɛ.” (Daniel 11:1) Dario bɛ wala mli dɔŋŋ, shi ŋwɛibɔfo lɛ wie enɔyeli be lɛ he akɛ gbalɛ shɛɛ sane lɛ shishijee. Nɛkɛ maŋtsɛ nɛɛ ji mɔ ni fã akɛ ajie Daniel kɛjɛ jatai abu lɛ mli lɛ. Dario ewo akpɔ hu akɛ eshishibii lɛ fɛɛ ashe Daniel Nyɔŋmɔ lɛ gbeyei. (Daniel 6:21-27) Shi kɛlɛ, mɔ ni ŋwɛibɔfo lɛ damɔ shi akɛ esɛɛfilɔ lɛ jeee Dario Medianyo lɛ, shi moŋ ŋwɛibɔfo lɛ hefatalɔ ni ji Mikael—Daniel webii lɛ anɔ lumɔ lɛ. (Okɛto Daniel 10:12-14 he.) Nyɔŋmɔ bɔfo lɛ kɛ sɛɛfimɔ nɛɛ ha beni Mikael kɛ Medo-Persia daimonio lumɔ lɛ taa naa lɛ.
4, 5. Namɛi ji Persia maŋtsɛmɛi ejwɛ ni agba amɛhe sane afɔ̃ shi lɛ?
4 Nyɔŋmɔ bɔfo lɛ tee nɔ akɛ: “Naa, maŋtsɛmɛi etɛ aaasaa ate shi adamɔ shi yɛ Persia; ni mɔ ni ji ejwɛ lɛ aaaná nii babaoo fe amɛ fɛɛ; ni kɛji etsɔ enii lɛ anɔ ená hewalɛ lɛ, eeetee mɛi fɛɛ shi ewo Hela maŋtsɛyeli lɛ.” (Daniel 11:2) Namɛi kwraa ji nɛkɛ Persia nɔyelɔi nɛɛ?
5 Klɛŋklɛŋ maŋtsɛmɛi etɛ lɛ ji Koresh Kpeteŋkpele lɛ, Cambyses II, kɛ Dario I (Hystaspes). Akɛni Bardiya (aloo ekolɛ mɔ ni kwaa efeɔ ehe mɔ ko ni atsɛɔ lɛ Gaumata) ye nɔ nyɔji kpawo pɛ hewɔ lɛ, gbalɛ lɛ ebuuu amɛnɔyeli yɛ be kuku mli lɛ he akɔntaa. Yɛ afi 490 D.Ŋ.B. lɛ, maŋtsɛ ni ji etɛ, Dario I, ka Hela tutuamɔ nɔ ni ji shii enyɔ. Shi aye Persiabii lɛ anɔ kunim butuu yɛ Marathon ni amɛgbala amɛhe shi kɛtee Asia Bibioo lɛ. Eyɛ mli akɛ Dario saa ehe jogbaŋŋ kɛha ta kroko ni ebaafã eshi Hela moŋ, shi enyɛɛɛ etsu enɛ he nii dani egbele ba afii ejwɛ sɛɛ. Ashi no aha ebinuu kɛ esɛɛyelɔ, maŋtsɛ ni ji “ejwɛ” lɛ, Xerxes I. Lɛ ji Maŋtsɛ Ahashwerosh ni kɛ Ester bote gbalashihilɛ mli lɛ.—Ester 1:1; 2:15-17.
6, 7. (a) Yɛ mɛɛ gbɛ nɔ maŋtsɛ ni ji ejwɛ lɛ ‘tée mɛi fɛɛ shi ewo Hela maŋtsɛyeli lɛ’? (b) Mɛni jɛ ta ni Xerxes fã eshi Hela lɛ mli ba?
6 Xerxes I ‘tée mɛi fɛɛ shi ewo Hela maŋtsɛyeli lɛ’ lɛɛlɛŋ, ni ji akɛ, Hela maji ni yeɔ amɛhe lɛ akɛ kuu. “Akɛni jasefoi hiɛnyamtaolɔi wo lɛ hewalɛ hewɔ lɛ,” wolo ni ji The Medes and Persians—Conquerors and Diplomats lɛ kɛɛ akɛ, “Xerxes kɛ tutuamɔ lɛ tsɔ shikpɔŋ kɛ ŋshɔ hiɛ.” Hela yinɔsaneŋmalɔ Herodotus ni hi shi yɛ afii ohai enumɔ D.Ŋ.B. lɛ mli lɛ ŋma akɛ, “tawuu he gbɛfaa ko bɛ ni abaanyɛ akɛto tutuamɔ nɛɛ he.” Nɔ ni eŋma efɔ̃ shi lɛ tsɔɔ mli akɛ, ta ni tsɔ ŋshɔ hiɛ lɛ “fɛɛ feɔ hii 517,610. Asraafoi ni nyiɛ shikpɔŋ lɛ ayifalɛ ji 1,700,000; mɛi ni tara okpɔŋɔi anɔ lɛ ji 80,000; ni akɛ Arabiabii ni tara afukpɔŋɔi anɔ, kɛ Libyabii ni wuu ta yɛ ta shwiilii amli, ni mibuɔ amɛnaa akɛ amɛshɛɔ 20,000 baafata he. No hewɔ lɛ, yibɔ nɛɛ fɛɛ, kɛ akɛ mɛi ni nyiɛ shikpɔŋ kɛ ŋshɔ hiɛ lɛ fɛɛ fata he lɛ, amɛshɛɔ hii 2,317,610.”
7 Akɛni kunimyeli kwraa ji eyiŋtoo hewɔ lɛ, Xerses I fã eta kpeteŋkpele lɛ eshi Hela yɛ afi 480 D.Ŋ.B. Persiabii lɛ fee Athens butuu kɛtsɔ Helabii lɛ aŋaatsɔɔ shishashaomɔ nifeemɔ ko ni ba yɛ Thermopylae nɔ kunim ni amɛye lɛ nɔ. Shi aye amɛnɔ kunim ko ni yɔɔ gbeyei yɛ Salamis. Helabii akunimyeli kroko hu ba yɛ Plataea, yɛ afi 479 D.Ŋ.B. Maŋtsɛmɛi kpawo ni baye Xerxes sɛɛ yɛ Persia Maŋtsɛyeli lɛ maŋtsɛsɛi lɛ nɔ yɛ afii 143 ni nyiɛ sɛɛ lɛ mli lɛ ateŋ mɔ ko kwraa kɛ tawuu eyatutuaaa Hela dɔŋŋ. Shi maŋtsɛ ko ni he wa te shi yɛ Hela.
AJA MAŊTSƐYELI KPETEŊKPELE KO MLI EJWƐ
8. Mɛɛ “maŋtsɛ ekãalɔ” te shi lɛ, ni te fee tɛŋŋ ni ‘ekɛ hewalɛ kpeteŋkpele baye nɔ’?
8 Ŋwɛibɔfo lɛ kɛɛ: “Maŋtsɛ ekãalɔ ko aaate shi adamɔ shi, ni ekɛ hewalɛ kpeteŋkpele aaaye nɔ, ni eeefee nɔ ni esumɔɔ.” (Daniel 11:3) Alexander ni eye afii 20 lɛ ‘te shi edamɔ shi’ akɛ Makedonia maŋtsɛ yɛ afi 336 D.Ŋ.B. Ebafee “maŋtsɛ ekãalɔ”—Alexander Kpeteŋkpele lɛ. Akɛni etsɛ, Philip II lɛ gbɛjianɔtoo ko kanyaa lɛ hewɔ lɛ, eshɔ̃ Persia nɔyelihei ni yɔɔ Boka Teŋgbɛ lɛ. Ekɛ ehii 47,000 fo Eufrate kɛ Tigris faai lɛ, ni egbɛ Dario III asraafoi 250,000 lɛ eshwã yɛ Gaugamela. Fee sɛɛ lɛ, Dario jo foi, ni agbe lɛ, ni ekɛ Persia maŋtsɛmɛi anɔyeli lɛ ba naagbee. Hela batsɔ jeŋ hewalɛ agbɛnɛ, ni Alexander ‘kɛ hewalɛ kpeteŋkpele ye nɔ ni efee nɔ ni esumɔɔ.’
9, 10. Te fee tɛŋŋ ni gbalɛ lɛ ba mli anɔkwale akɛ Alexander maŋtsɛyeli lɛ eyaŋ eseshibii adɛŋ?
9 Alexander nɔyeli yɛ je lɛ nɔ lɛ baafee kuku, ejaakɛ Nyɔŋmɔ bɔfo lɛ kɛfata he akɛ: “Shi kɛ́ ete shi edamɔ shi lɛ, emaŋtsɛyeli lɛ aaajwa, ni aaaja mli kɛya ŋwɛi kɔɔyɔi ejwɛ lɛ mli gbɛ, shi jeee eseshibii aaaŋɔ ha, ni asaŋ jeee ehewalɛ ni ekɛye nɔ lɛ naa aaaye nɔ, ni emaŋtsɛyeli lɛ aaashɔ̃ aha mɛi krokomɛi, shi jeee mɛnɛɛmɛi.” (Daniel 11:4) Alexander nako aye afii 33 diɛŋtsɛ beni hela ko ni mɔ lɛ trukaa lɛ gbe lɛ yɛ Babilon yɛ afi 323 D.Ŋ.B. lɛ.
10 Alexander “seshibii” lɛ anine shɛɛɛ emaŋtsɛyeli kpeteŋkpele lɛ nɔ. Enyɛmi nuu Philip III Arrhidaeus ye maŋtsɛ nɔ ni shɛɛɛ afii kpawo, ni agbe lɛ yɛ Olympias, yɛ Alexander nyɛ famɔ naa yɛ afi 317 D.Ŋ.B. Alexander binuu Alexander IV ye maŋtsɛ kɛyashi afi 311 D.Ŋ.B., beni Cassander, etsɛ tatsɛmɛi lɛ ateŋ mɔ kome gbe lɛ. Alexander ajwamaŋbi Heracles tao akɛ eeeye maŋtsɛ yɛ etsɛ gbɛi amli, shi agbe lɛ yɛ afi 309 D.Ŋ.B. Enɛ kɛ Alexander wekukpaa lɛ ba naagbee, ‘ehewalɛ kpeteŋkpele’ lɛ je eweku lɛ dɛŋ.
11. Mɛɛ gbɛ nɔ atsɔ ‘aja’ Alexander maŋtsɛyeli ‘lɛ mli kɛtee ŋwɛi kɔɔyɔi ejwɛ lɛ mli gbɛ’ lɛ yɛ?
11 Yɛ Alexander gbele sɛɛ lɛ, ‘aja emaŋtsɛyeli lɛ mli kɛtee ŋwɛi kɔɔyɔi ejwɛ lɛ mli gbɛ.’ Béi te shi yɛ etatsɛmɛi babaoo lɛ ateŋ beni amɛkɔlɔɔ shikpɔŋkukuji lɛ amɛhaa amɛhe lɛ. Tatsɛ Antigonus I, ni ehiŋmɛi kome ejwa lɛ bɔ mɔdɛŋ ni ekɛ Alexander maŋtsɛyeli lɛ fɛɛ aba ehewalɛ shishi. Shi agbe lɛ yɛ tawuu mli yɛ Ipsus yɛ Phrygia. Beni shɛɔ afi 301 D.Ŋ.B. lɛ, Alexander tatsɛmɛi ejwɛ ebaná hewalɛ yɛ shikpɔŋkuku ni da agbo ni amɛ tatsɛnukpa lɛ ye nɔ kunim lɛ nɔ. Cassander ye Makedonia kɛ Hela nɔ. Lysimachus ná hewalɛ yɛ Asia Bibioo lɛ kɛ Thrace nɔ. Seleucus I Nicator nine shɛ Mesopotamia kɛ Siria nɔ. Ni Ptolemy Lagus ye Mizraim kɛ Palestina nɔ. Gbalɛ wiemɔ lɛ ba mli anɔkwale, aja Alexander maŋtsɛyeli kpeteŋkpele lɛ mli afee lɛ Hela maŋtsɛyelii ejwɛ.
MAŊTSƐMƐI ENYƆ NI KƐ AMƐHE SHIƆ AKAŊ FÃ KPO
12, 13. (a) Te fee tɛŋŋ ni aba Hela maŋtsɛyelii ejwɛ lɛ shi kɛbashɛ enyɔ lɛ? (b) Mɛɛ maŋtsɛmɛi anɔyeli Seleucus to shishi yɛ Siria?
12 Beni Cassander baná maŋtsɛyeli hewalɛ lɛ sɛɛ afii fioo pɛ ni egbo, ni Lysimachus ŋɔ Hela Maŋtsɛyeli lɛ fã ni ji Europa lɛ yɛ afi 285 D.Ŋ.B. Yɛ afi 281 D.Ŋ.B. lɛ, Seleucus I Nicator gbe Lysimacus yɛ tawuu mli, ni eha Seleucus ye Asia shikpɔŋkukuji lɛ babaoo nɔ. Antigonus II Gonatas, ni ji Alexander tatsɛmɛi lɛ ateŋ mɔ kome nabi lɛ bata Makedonia maŋtsɛsɛi lɛ nɔ yɛ afi 276 D.Ŋ.B. Beni be shwieɔ mli lɛ Makedonia kɛ ehe fɔ̃ Roma nɔ ni ebatsɔ Roma nɔyelihe yɛ afi 146 D.Ŋ.B.
13 Hela maŋtsɛyelii ejwɛ lɛ ateŋ enyɔ pɛ eshwɛ ni ale waa agbɛnɛ—ekome yɛ Seleucus I Nicator shishi ni ekroko lɛ yɛ Ptolemy Lagus shishi. Seleucus to Seleucid maŋtsɛmɛi awekukpaa lɛ shishi yɛ Siria. Maŋtiasei ni eto shishi lɛ ekomɛi ji Antiokia—Siria maŋtiase hee lɛ—kɛ Seleucia ŋshɔnaa maŋ lɛ. Yɛ sɛɛ mli lɛ bɔfo Paulo tsɔɔ nii yɛ Antiokia, he ni abatsɛ Yesu sɛɛnyiɛlɔi lɛ klɛŋklɛŋ yɛ akɛ Kristofoi lɛ. (Bɔfoi lɛ Asaji 11:25, 26; 13:1-4) Aju shi agbe Seleucus yɛ afi 281 D.Ŋ.B., shi emaŋtsɛmɛi aweku lɛ ye nɔ aahu kɛyashi afi 64 D.Ŋ.B., beni Roma Tatsɛ Gnaeus Pompey fee Siria Roma nɔyelihe lɛ.
14. Mɛɛ be mli ato Ptolemy maŋtsɛmɛi anɔyeli lɛ shishi yɛ Mizraim?
14 Hela maŋtsɛyelii ejwɛ lɛ mli nɔ ni sɛɛ tsɛ fe fɛɛ ji Ptolemy Lagus, loo Ptolemy I, ni ŋɔ sabala akɛ maŋtsɛ yɛ afi 305 D.Ŋ.B. lɛ nɔ lɛ. Ptolemy maŋtsɛmɛi aweku ni eto shishi lɛ tee nɔ eye Mizraim nɔ kɛyashi Roma ye nɔ kunim yɛ afi 30 D.Ŋ.B.
15. Mɛɛ maŋtsɛmɛi enyɔ ni he wa fã kpo kɛjɛ Hela maŋtsɛyelii ejwɛ lɛ amli, ni mɛɛ mpleshii amɛje shishi?
15 No hewɔ lɛ, maŋtsɛmɛi enyɔ ni he wa fã kpo kɛjɛ Hela maŋtsɛyelii ejwɛ lɛ mli—Seleucus I Nicator ye Siria nɔ ni Ptolemy I ye Mizraim nɔ. Nɛkɛ maŋtsɛmɛi enyɔ nɛɛ anɔ mpleshii kakadaŋŋ ni bakã “kooyigbɛ maŋtsɛ lɛ” kɛ “wuoyigbɛ maŋtsɛ lɛ” teŋ ni atsɔɔ mli yɛ Daniel yitso 11 lɛ je shishi kɛjɛ. Yehowa bɔfo lɛ shi maŋtsɛmɛi lɛ agbɛi ni etsĩii tã, ejaakɛ mɛi ni maŋtsɛmɛi enyɔ nɛɛ ji kɛ maji ni amɛjɛ mli lɛ baatsake yɛ afii ohai abɔ lɛ fɛɛ mli. Ŋwɛibɔfo lɛ shi emlitsɔɔmɔi ni he ehiaaa lɛ, ni etsĩ nɔyelɔi kɛ saji ni kɔɔ nɔmɔ lɛ he lɛ pɛ tã.
NƆMƆ LƐ JE SHISHI
16. (a) Maŋtsɛmɛi enyɔ lɛ yɛ namɔ kooyigbɛ kɛ ewuoyigbɛ? (b) Mɛɛ maŋtsɛmɛi batsɔmɔ “kooyigbɛ maŋtsɛ” kɛ “wuoyigbɛ maŋtsɛ” klɛŋklɛŋ?
16 Bó toi! Beni etsɔɔ nɔmɔ ni sa kadimɔ nɛɛ mli lɛ, Yehowa bɔfo lɛ kɛɛ: “Ni wuoyigbɛ maŋtsɛ lɛ [Alexander lumɛi lɛ ateŋ mɔ kome] he aaawa, shi [kooyigbɛ maŋtsɛ lɛ] lumɛi lɛ ateŋ mɔ kome he aaawa fe lɛ, ni eeeye nɔ, ni enɔyeli lɛ aaatsɔ nɔyeli kpeteŋkpele.” (Daniel 11:5) Gbɛhei akɛ “kooyigbɛ maŋtsɛ lɛ” kɛ “wuoyigbɛ maŋtsɛ lɛ” kɔɔ maŋtsɛmɛi ni yɔɔ Daniel webii ni no mli lɛ áŋmɛɛ amɛhe kɛjɛ Babilonia nomŋɔɔ mli ni amɛ́ba Yuda shikpɔŋ lɛ nɔ ekoŋŋ lɛ kooyigbɛ kɛ wuoyigbɛ lɛ ahe. Shishijee “wuoyigbɛ maŋtsɛ lɛ” ji Ptolemy I ni jɛ Mizraim lɛ. Alexander tatsɛmɛi lɛ ateŋ mɔ kome ni ye Ptolemy I nɔ kunim ni enɔyeli lɛ tsɔ “nɔyeli kpeteŋkpele” lɛ ji Siria Maŋtsɛ Seleucus I Nicator. Ebaŋɔ gbɛhe akɛ “kooyigbɛ maŋtsɛ lɛ.”
17. Namɔ nɔyeli shishi Yuda shikpɔŋ lɛ yɔɔ yɛ be mli ni kooyigbɛ maŋtsɛ lɛ kɛ wuoyigbɛ maŋtsɛ lɛ nɔmɔ lɛ je shishi lɛ?
17 Beni nɔmɔ lɛ je shishi lɛ, no mli lɛ Yuda shikpɔŋ lɛ yɛ wuoyigbɛ maŋtsɛ lɛ nɔyeli shishi. Kɛjɛ aaafee afi 320 D.Ŋ.B. kɛyaa lɛ, Ptolemy I tsɔ Yudafoi lɛ ayiŋ koni amɛba Mizraim akɛ shihelɔi. Yudafoi ashihemɔhe ko shwere yɛ Alexandria, he ni Ptolemy I to wojiatoohe ko ni he gbɛi yɛ lɛ. Yudafoi ni yɔɔ Yuda lɛ hi Mizraim, wuoyigbɛ maŋtsɛ lɛ ní Ptolemy yeɔ nɔ lɛ nɔyeli shishi kɛyashi afi 198 D.Ŋ.B.
18, 19. Beni be shwieɔ mli lɛ, mɛɛ gbɛ nɔ maŋtsɛmɛi enyɔ ni kɛ amɛhe shiɔ akaŋ lɛ bote ‘kpaŋmɔ ko mli’?
18 Ŋwɛibɔfo lɛ gba yɛ maŋtsɛmɛi enyɔ nɛɛ ahe akɛ: “Shi afii komɛi asɛɛ lɛ amɛaabɔbɔɔ naanyo; ni wuoyigbɛ maŋtsɛ lɛ biyoo lɛ aaaba kooyigbɛ maŋtsɛ lɛ ŋɔɔ, ni ekɛ lɛ abakpaŋ; shi ehiɛŋ enijiaŋwalɛ lɛ, ni lɛ hu edamɔŋ shi kɛ enijiaŋwalɛ lɛ; shi aaajie yoo lɛ kɛ mɛi ni kɛ lɛ ba lɛ kɛ mɔ ni fɔ́ lɛ lɛ kɛ mɔ ni wo lɛ hewalɛ yɛ bei nɛɛ amli lɛ aha.” (Daniel 11:6) Te enɛ ba mli nakai eha tɛŋŋ?
19 Gbalɛ lɛ ewieee Seleucus I Nicator binuu kɛ esɛɛyelɔ Antiochus I he, ejaakɛ ewuuu ta titri ko eshiii wuoyigbɛ maŋtsɛ lɛ. Shi esɛɛyelɔ Antiochus II wuu ta kakadaŋŋ eshi Ptolemy II, ni ji Ptolemy I binuu lɛ. Antiochus II kɛ Ptolemy II fɛɛ fee kooyigbɛ maŋtsɛ lɛ kɛ wuoyigbɛ maŋtsɛ lɛ. Antiochus II kɛ Laodice ebote gbalashihilɛ mli, ni amɛyɛ binuu ni atsɛɔ lɛ Seleucus II, ni Ptolemy II hu yɛ biyoo ko ni atsɛɔ lɛ Berenice. Nɛkɛ maŋtsɛmɛi enyɔ nɛɛ bote ‘kpaŋmɔ’ ko mli yɛ afi 250 D.Ŋ.B. Bɔni afee ni ewo nɛkɛ kpaŋmɔ nɛɛ he nyɔmɔ lɛ, Antiochus II shwie eŋa Laodice ni ekɛ Berenice, “wuoyigbɛ maŋtsɛ lɛ biyoo” bote gbalashihilɛ mli. Ekɛ Berenice fɔ́ binuu, ni ebafee gboshiniyelɔ ni bata Siria maŋtsɛsɛi lɛ nɔ shi jeee Laodice bihii lɛ.
20. (a) Te fee tɛŋŋ ni Berenice ‘nijiaŋwalɛ lɛ’ damɔɔɔ shi lɛ? (b) Yɛ mɛɛ gbɛ nɔ ajie Berenice ‘mɛi ni kɛ lɛ ba lɛ’ kɛ ‘mɔ ni wo lɛ hewalɛ lɛ’ aha yɛ? (d) Namɔ batsɔ Siria maŋtsɛ beni Antiochus II laaje ‘enijiaŋwalɛ’ loo ehewalɛ lɛ?
20 Berenice ‘nijiaŋwalɛ’ loo sɛɛfimɔ hewalɛ ji etsɛ, Ptolemy II. Beni etsɛ egbo yɛ afi 246 D.Ŋ.B. lɛ, yoo lɛ ‘damɔɔɔ shi’ akɛ ewu lɛ ‘nijiaŋwalɛ lɛ.’ Antiochus II kpoo lɛ, eku sɛɛ ekɛ Laodice bote gbalashihilɛ mli ekoŋŋ, ni etsĩ tã akɛ amɛbinuu lɛ ji mɔ ni baafee esɛɛyelɔ. Laodice to gbɛjianɔ, ni agbe Berenice kɛ ebinuu lɛ. Eyɛ faŋŋ akɛ, suɔlɔi ni kɛ Berenice jɛ Mizraim ba Siria lɛ—“mɛi ni kɛ lɛ ba lɛ”—na amanehulu ni tamɔ nakai nɔŋŋ. Laodice kɛ ebɔɔ gbe Antiochus II po, no hewɔ lɛ ‘enijiaŋwalɛ lɛ’ loo ehewalɛ lɛ hu ‘damɔɔɔ shi.’ No hewɔ lɛ, Berenice tsɛ—“mɔ ni fɔ lɛ lɛ”—kɛ ewu Sirianyo lɛ—ni ‘wo enijiaŋwalɛ’ yɛ be kuku ko mli lɛ—fɛɛ gboi. Enɛ shĩ Seleucus II, Laodice binuu lɛ akɛ Siria maŋtsɛ. Mɛni Ptolemy weku lɛ mli maŋtsɛ ni nyiɛ sɛɛ lɛ baafee yɛ enɛɛmɛi fɛɛ he?
MAŊTSƐ KO TƆ ENYƐMI YOO NI AGBE LƐ LƐ HE OWELE
21. (a) Namɔ ji ‘mɔ ni jɛ Berenice fɔlɔi ashishifai’ lɛ mli ni ‘kwɛ̃’ lɛ, ni ‘ete shi’ yɛ mɛɛ gbɛ nɔ? (b) Te fee tɛŋŋ ni Ptolemy III “bote kooyigbɛ maŋtsɛ lɛ mɔɔ ni wa lɛ mli” ni eye enɔ kunim lɛ?
21 Ŋwɛibɔfo lɛ kɛɛ: “Shi yoo lɛ shishifai lɛ amli nine ko aaate shi yɛ enajiaŋ, ni eeeba ta lɛ ŋɔɔ, ni eeeyabote kooyigbɛ maŋtsɛ lɛ mɔ̃ɔ ni wa lɛ mli, ni ekɛ amɛ aaaná ni eeeye nɔ.” (Daniel 11:7) ‘Mɔ ni jɛ Berenice fɔlɔi ashishifai’ loo “nine” lɛ mli lɛ ji enyɛmi nuu. ‘Ete shi’ yɛ etsɛ gbele sɛɛ akɛ wuoyigbɛ maŋtsɛ, Mizraim Farao Ptolemy III. Amrɔ nɔŋŋ ni eje shishi akɛ eeetɔ enyɛmi yoo lɛ gbele he owele. Efã ta eshi Siria Maŋtsɛ Seleucus II, ní Laodice kɛ lɛ tsu nii ni eha egbe Berenice kɛ ebinuu lɛ, ni ete shi ewo “kooyigbɛ maŋtsɛ lɛ mɔ̃ɔ ni wa lɛ.” Ptolemy III shɔ̃ Antiokia mɔ̃ji ni wa lɛ, ni egbe Laodice. Efã kɛtee bokagbɛ kɛtsɔ kooyigbɛ maŋtsɛ lɛ nɔyelihe lɛ mli, ni ehà Babilonia mli nibii ni etsa nɔ kɛtee India.
22. Mɛni Ptolemy III kɛku sɛɛ kɛba Mizraim, ni mɛni hewɔ ‘eeetsi ehe kɛaajɛ kooyigbɛ maŋtsɛ lɛ hiɛ afii komɛi’ lɛ?
22 Mɛni ba yɛ no sɛɛ? Nyɔŋmɔ bɔfo lɛ kɛɔ wɔ akɛ: “Ni eeeŋɔ amɛnyɔŋmɔi lɛ kɛ amɛmagai lɛ kɛ amɛjwiɛtɛi kɛ shika nibii ni yɔɔ fɛo lɛ anom kɛaatee Mizraim; ni eeedamɔ kooyigbɛ maŋtsɛ lɛ hiɛ afii komɛi.” (Daniel 11:8) Nɔ ni fe afii 200 ni tsɔ hiɛ lɛ mli lɛ, Persia Maŋtsɛ Cambyses II ye Mizraim nɔ kunim ni eloo Mizraim nyɔŋmɔi lɛ, “amɛmagai” lɛ kɛtee. Ptolemy III hà Persia tsutsu odehei amaŋtiase Susa mli nibii, ni eloo nɛkɛ nyɔŋmɔi nɛɛ ni eŋɔ amɛ ‘nom’ kɛtee Mizraim. Agbɛnɛ hu ekɛ “amɛjwiɛtɛi kɛ shika nibii ni yɔɔ fɛo” babaoo tee akɛ nomŋɔɔ nii. Akɛni esa akɛ eku esɛɛ eya emaŋ ni eyaba atuatsemɔ ko ni ete shi yɛ jɛmɛ lɛ shi hewɔ lɛ, Ptolemy III ‘gbala ehe shi kɛjɛ kooyigbɛ maŋtsɛ lɛ hiɛ’ ni eyeee lɛ awui ko dɔŋŋ.
SIRIA MAŊTSƐ LƐ TO NAJIAŊ
23. Mɛni hewɔ kooyigbɛ maŋtsɛ lɛ “ku esɛɛ kɛtee lɛ diɛŋtsɛ eshikpɔŋ lɛ nɔ ekoŋŋ” beni eba wuoyigbɛ maŋtsɛ lɛ maŋtsɛyeli lɛ mli lɛ?
23 Te kooyigbɛ maŋtsɛ lɛ fee enii yɛ he eha tɛŋŋ? Akɛɛ Daniel akɛ: “Ni eeeba wuoyigbɛ maŋtsɛ lɛ maŋtsɛyelihe lɛ moŋ; shi eeeku esɛɛ kɛaatee lɛ diɛŋtsɛ eshikpɔŋ lɛ nɔ ekoŋŋ.” (Daniel 11:9) Kooyigbɛ maŋtsɛ lɛ—Siria Maŋtsɛ Seleucus II—tee eyatutua amɛ. Ebote Mizraim wuoyigbɛ maŋtsɛ lɛ “maŋtsɛyelihe” loo nɔyelihe lɛ moŋ, shi aye enɔ kunim. Seleucus II kɛ esraafoi lɛ ateŋ mɛi fioo ni eshwɛ lɛ ‘ku esɛɛ kɛtee lɛ diɛŋtsɛ eshikpɔŋ nɔ,’ egbala ehe shi kɛtee Siria maŋtiase Antiokia mli aaafee afi 242 D.Ŋ.B. Yɛ egbele sɛɛ lɛ, ebinuu Seleucus III baye esɛɛ.
24. (a) Mɛni ba Seleucus III nɔ? (b) Te fee tɛŋŋ ni Siria Maŋtsɛ Antiochus III ‘baho tamɔ nu babaoo, ni etsɔ’ wuoyigbɛ maŋtsɛ lɛ nɔyelihe lɛ kɛho lɛ?
24 Mɛni agba afɔ̃ shi yɛ Siria Maŋtsɛ Seleucus II seshinyo lɛ he? Ŋwɛibɔfo lɛ kɛɛ Daniel akɛ: “Shi ebii lɛ aaafee ta, ni amɛaabua tai wuji asafo babaoo naa, shi eeeba, ni eeebaho tamɔ nu babaoo, ni eeetsɔ nɔ kɛaaho; ni eeeku esɛɛ, ni amɛaawuu ta kɛyashi emɔɔ ni wa lɛ he.” (Daniel 11:10) Aju shi agbe Seleucus III yɛ nɔ ni shɛɛɛ afii etɛ mli, ni enɛ kɛ enɔyeli lɛ ba naagbee. Enyɛmi nuu Antiochus III baye esɛɛ yɛ Siria maŋtsɛsɛi lɛ nɔ. Nɛkɛ Seleucus II binuu nɛɛ bua tai wuji babaoo naa koni amɛyatutua wuoyigbɛ maŋtsɛ lɛ, ni no mli lɛ eji Ptolemy IV lɛ. Siria kooyigbɛ maŋtsɛ hee lɛ wuu ta eshi Mizraim yɛ omanyeyeli mli ni enine shɛ Seleucia ŋshɔnaa maŋ lɛ, Coele-Siria nɔyelihe lɛ, kɛ Tiro kɛ Ptolemaïs maŋtiasei lɛ kɛ maji ni bɛŋkɛ lɛ anɔ ekoŋŋ. Eye Maŋtsɛ Ptolemy IV asraafoi komɛi anɔ kunim, ni eŋɔ Yuda maji babaoo. Yɛ afi 217 D.Ŋ.B. lɛ agbiɛnaa be mli lɛ, Antiochus III shĩ Ptolemaïs ni etee kooyigbɛ, ‘kɛtee emɔ̃ɔ ni wa lɛ mli’ yɛ Siria. Shi tsakemɔ ko miibɛŋkɛ.
SHIHILƐ LƐ TSAKE
25. Nɛgbɛ Ptolemy IV kɛ Antiochus III kpe yɛ, yɛ tawuu mli, ni mɛni ‘akɛwo’ Mizraim wuoyigbɛ maŋtsɛ lɛ dɛŋ?
25 Taakɛ Daniel ji lɛ, wɔkɛ gbɛkpamɔ boɔ toi beni Yehowa bɔfo lɛ gbaa nɔ ni nyiɛ sɛɛ lɛ: “Ni wuoyigbɛ maŋtsɛ lɛ mli aaawo la, ni eeeje kpo ekɛ lɛ, ni ji kooyigbɛ maŋtsɛ lɛ abawuu; ni eeetee asafo babaoo shi edamɔ shi, shi aaaŋɔ asafo lɛ awo edɛŋ.” (Daniel 11:11) Wuoyigbɛ maŋtsɛ, Ptolemy IV, kɛ asraafoi 75,000 fã ta kɛtee kooyigbɛ amɛshi henyɛlɔ lɛ. No mli lɛ Siria kooyigbɛ maŋtsɛ lɛ, Antiochus III, etee “asafo babaoo” ni shɛɔ 68,000 shi koni amɛkɛ lɛ awuu. Shi akɛ “asafo lɛ” “wo” wuoyigbɛ maŋtsɛ lɛ “dɛŋ” yɛ tawuu mli yɛ ŋshɔnaa maŋtiase ni ji Raphia, ni kɛ Mizraim husu lɛ naa jɛkɛɛɛ lɛ mli.
26. (a) Mɛɛ “asafo babaoo” wuoyigbɛ maŋtsɛ lɛ loo kɛtee yɛ ta ni awuu yɛ Raphia lɛ mli, ni mɛni yɔɔ toiŋjɔlɛ kpaŋmɔ ni afee yɛ jɛmɛ lɛ mli? (b) Mɛni hewɔ Ptolemy IV ‘kɛ egbɛhe ni hewalɛ yɔɔ mli’ lɛ tsuuu nii lɛ? (d) Namɔ bafee wuoyigbɛ maŋtsɛ ni nyiɛ sɛɛ ba?
26 Gbalɛ lɛ tee nɔ akɛ: “Ni eeeŋɔ asafo lɛ nom, ni etsui aaawo ehe nɔ, ni eeetsirɛ mɛi akpei nyɔŋmai abɔ etswia shi; shi kɛlɛ enáŋ hewalɛ.” (Daniel 11:12) Ptolemy IV, wuoyigbɛ maŋtsɛ lɛ gbe Siria asraafoi 10,000 ni nyiɛ shikpɔŋ kɛ mɛi ni tara okpɔŋɔi anɔ 300, ni eŋɔ 4,000 gboklɛfoi. Kɛkɛ ni maŋtsɛmɛi lɛ fee kpaŋmɔ akɛ, Siria ŋshɔnaa maŋ ni ji Seleucia baahi Antiochus III dɛŋ, shi Phoenicia kɛ Coele-Siria baaje edɛŋ. Mizraim wuoyigbɛ maŋtsɛ lɛ ‘tsui wo ehe nɔ,’ titri lɛ kɛshi Yehowa, yɛ kunimyeli nɛɛ hewɔ. Yuda tee nɔ ehi Ptolemy IV hewalɛ shishi. Shi ekɛ ‘ehewalɛ ni ená lɛ tsuŋ nii’ ni ekɛdi kunim ni eye yɛ Siria kooyigbɛ maŋtsɛ lɛ nɔ lɛ sɛɛ. Yɛ no najiaŋ lɛ, Ptolemy IV kɛ ehe wo nyenyeŋtswibɔɔ shihilɛ mli, ni ebinuu ni eye afii enumɔ, Ptolemy V, batsɔ wuoyigbɛ maŋtsɛ ni nyiɛ sɛɛ ba afii babaoo dani Antiochus III gbo.
AMIMYELƆ LƐ KU ESƐƐ
27. Te fee tɛŋŋ ni kooyigbɛ maŋtsɛ lɛ ku esɛɛ eba “yɛ afii komɛi asɛɛ” koni ebahe shikpɔŋ kɛjɛ Mizraim dɛŋ lɛ?
27 Yɛ emimyelii lɛ fɛɛ hewɔ lɛ, abatsɛ́ Antiochus III gbɛi akɛ Antiochus Kpeteŋkpele lɛ. Lɛ ehe ŋwɛibɔfo lɛ wie akɛ: “Kooyigbɛ maŋtsɛ lɛ aaaku sɛɛ aba, ni eeetee asafo babaoo ni fe tsutsu nɔ̃ lɛ shi edamɔ shi, ni afii komɛi asɛɛ lɛ eeeba kɛ ta babaoo kɛ nii pii.” (Daniel 11:13) Nɛkɛ “afii” [‘bei’] nɛɛ ji afii 16 loo nɔ ni fa fe nakai, yɛ be mli ni Mizraimbii lɛ ye Siriabii lɛ anɔ kunim yɛ Raphia lɛ sɛɛ. Beni Ptolemy V ni edako lɛ batsɔ wuoyigbɛ maŋtsɛ lɛ, kɛkɛ ni Antiochus III tée “asafo babaoo ni fe tsutsu nɔ̃ lɛ” shi edamɔ shi koni ekɛhé shikpɔŋkukuji ni Mizraim wuoyigbɛ maŋtsɛ lɛ shɔ̃ yɛ edɛŋ lɛ ekoŋŋ. Yɛ enɛ hewɔ lɛ, ekɛ ehe yabɔ Makedonia Maŋtsɛ Philip V asraafoi lɛ ahe.
28. Mɛɛ haomɔi oblanyo wuoyigbɛ maŋtsɛ lɛ kɛkpe?
28 Wuoyigbɛ maŋtsɛ lɛ hu yɛ naagbai yɛ emaŋtsɛyeli lɛ mli. Ŋwɛibɔfo lɛ kɛɛ: “Ni nakai bei lɛ amli lɛ mɛi pii aaate shi awo wuoyigbɛ maŋtsɛ lɛ.” (Daniel 11:14a) Mɛi pii ‘te shi wo wuoyigbɛ maŋtsɛ lɛ.’ Yɛ Antiochus III kɛ ehefatalɔ ni jɛ Makedonia lɛ atai ni ekɛ amɛ aaakpe lɛ sɛɛ lɛ, wuoyigbɛ maŋtsɛ ni edako lɛ kɛ naagbai kpe yɛ shia yɛ Mizraim. Akɛni ekwɛlɔ Agathocles ni ye nɔ yɛ egbɛi amli lɛ kɛ Mizraimbii lɛ ye yɛ henɔwomɔ mli hewɔ lɛ, amɛteŋ mɛi pii tse atua. Ŋwɛibɔfo lɛ kɛfata he akɛ: “Ni omaŋbii lɛ amli atuatselɔi komɛi hu aaate shi, ni amɛha ninaa lɛ aba mli, shi amɛaanyɔnyɔi.” (Daniel 11:14b) Daniel maŋbii lɛ ekomɛi po batsɔmɔ ‘atuatselɔi abii,’ loo maŋ hiɛ atuatselɔi. Shi “ninaa” fɛɛ “ninaa” ni Yuda hii ni tamɔ nɛkɛ lɛ yɔɔ akɛ amɛaaha Jeŋmajiaŋbii ni yeɔ amɛmaŋ lɛ nɔ lɛ aba naagbee lɛ ji amale, amɛnine baanyɛ shi, loo ‘amɛaanyɔnyɔi.’
29, 30. (a) Te fee tɛŋŋ ni ‘wuoyigbɛ maŋtsɛ lɛ nijiaŋwalɛ lɛ’ ba shi yɛ tutuamɔ ni jɛ kooyigbɛ lɛ hiɛ lɛ? (b) Te fee tɛŋŋ ni kooyigbɛ maŋtsɛ lɛ ‘badamɔ’ “shikpɔŋ fɛfɛo lɛ nɔ” lɛ?
29 Yehowa bɔfo lɛ tee nɔ egba akɛ: “Ni kooyigbɛ maŋtsɛ lɛ aaaba, ni eeetswa kpoku, ni eeeŋɔ maŋ ni atswa gbogbo awo he lɛ, ni wuoyigbɛ niji lɛ nyɛŋ naa adamɔ, ni eta ni hi fe fɛɛ lɛ tete náŋ hewalɛ ni ekɛaadamɔ shi. Shi mɔ ni baa enɔ lɛ aaafee bɔ ni esumɔɔ, ni mɔ ko bɛ ni aaadamɔ ehiɛ, ni eeedamɔ shikpɔŋ fɛfɛo lɛ nɔ, ni hiɛkpatamɔ aaahi edɛŋ.”—Daniel 11:15, 16.
30 Asraafoi atai ni yɔɔ Ptolemy V loo “wuoyigbɛ niji” lɛ shishi lɛ gbee shi yɛ tutuamɔ ni jɛ kooyigbɛ lɛ hiɛ. Yɛ Paneas (Kaisarea Filipi) lɛ, Antiochus III shwie Mizraim Tatsɛ Scopas kɛ hii 10,000 ni áhala, loo “eta ni hi fe fɛɛ” lɛ kɛtee Sidon, “maŋ ni atswa gbogbo awo he lɛ” mli. Antiochus III ‘tswa kpoku yɛ he,’ ni eŋɔ nakai Foenike ŋshɔnaa maŋ lɛ yɛ afi 198 D.Ŋ.B. Efee “bɔ ni esumɔɔ,” ejaakɛ Mizraim wuoyigbɛ maŋtsɛ lɛ tai lɛ nyɛɛɛ adamɔ ehiɛ. Kɛkɛ ni Antiochus III fã ni eyatutua Yerusalem, Yuda maŋtiase, “shikpɔŋ fɛfɛo lɛ.” Yɛ afi 198 D.Ŋ.B. lɛ, Yerusalem kɛ Yuda shĩ Mizraim wuoyigbɛ maŋtsɛ lɛ nɔyeli shishi kɛbaje Siria kooyigbɛ maŋtsɛ lɛ shishi. Ni Antiochus III, kooyigbɛ maŋtsɛ lɛ, je shishi akɛ “eedamɔ shikpɔŋ fɛfɛo lɛ nɔ.” ‘Hiɛkpatamɔ’ kɛha Yudafoi kɛ Mizraimbii ni teɔ shi woɔ lɛ lɛ fɛɛ ‘hi edɛŋ.’ Mɛɛ be sɛɛkɛlɛ nɛkɛ kooyigbɛ maŋtsɛ nɛɛ baanyɛ afee nɔ ni esumɔɔ lɛ kɛyashi?
ROMA TSĨ AMIMYELƆ LƐ GBƐ
31, 32. Mɛni hewɔ yɛ naagbee lɛ kooyigbɛ maŋtsɛ lɛ kɛ wuoyigbɛ maŋtsɛ lɛ bote toiŋjɔlɛ ‘kpaŋmɔ’ mli lɛ?
31 Yehowa bɔfo lɛ kɛ hetoo nɛɛ haa wɔ: “Ni [kooyigbɛ maŋtsɛ lɛ] eeeto eyiŋ akɛ ekɛ emaŋtsɛyeli muu lɛ fɛɛ hewalɛ aaaba, ni ekɛ lɛ aaakpaŋ, ni eeeŋɔ yei lɛ abiyoo lɛ eha lɛ gbãla, ni efite lɛ; shi edamɔŋ shi, ni etsɔŋ enɔ̃.”—Daniel 11:17.
32 Kooyigbɛ maŋtsɛ, Antiochus III, ‘to eyiŋ’ akɛ ebaaye Mizraim nɔ “kɛ emaŋtsɛyeli muu lɛ fɛɛ hewalɛ.” Shi eyaba naagbee kɛ toiŋjɔlɛ ‘kpaŋmɔ’ ni ekɛ Ptolemy V, wuoyigbɛ maŋtsɛ lɛ fee. Nɔ ni Roma biɔ lɛ ha Antiochus III tsake gbɛjianɔ ni eto lɛ. Beni lɛ kɛ Maŋtsɛ Philip V ni jɛ Makedonia lɛ fee ekome kɛte shi wo Mizraim maŋtsɛ ni edako lɛ koni amɛshɔ̃ eshikpɔŋkuku lɛ kɛjɛ edɛŋ lɛ, mɛi ni kwɛɔ Ptolemy V nɔ lɛ tsɔ̃ amɛhe kɛtee Roma kɛha hebuu. Akɛni Roma ŋɔ hegbɛ lɛ koni ekɛlɛɛ gbɛi ni ená yɛ enɛ feemɔ mli lɛ mli hewɔ lɛ, ebɔi ehewalɛ kpojiemɔ.
33. (a) Mɛni ji toiŋjɔlɛ kpaŋmɔ ni bakã Antiochus III kɛ Ptolemy V teŋ lɛ mli saji? (b) Mɛni ji yiŋtoo ni yɔɔ gbalashihilɛ ni kã Cleopatra I kɛ Ptolemy V teŋ lɛ sɛɛ, ni mɛni hewɔ ŋaa ni atsɔ̃ nɛɛ yeee omanye lɛ?
33 Yɛ Roma nɔnyɛɛ shishi hewɔ lɛ, Antiochus III kɛ wuoyigbɛ maŋtsɛ lɛ fee toiŋjɔlɛ kpaŋmɔ. Yɛ nɔ najiaŋ ni eeeŋmɛɛ shikpɔŋkukuji ni eye nɔ kunim lɛ ahe, taakɛ Roma bi ni efee lɛ, Antiochus III to gbɛjianɔ koni ekɛ enaabu folo aŋmɛɛ he kɛtsɔ ebiyoo Cleopatra I—“yei lɛ abiyoo”—ni ekɛ lɛ ha Ptolemy V gbãla lɛ nɔ. Akɛ nɔyelihei ni Yuda, “shikpɔŋ fɛfɛo lɛ” fata he lɛ baaha lɛ akɛ egbãla nii. Shi beni gbalashihilɛ lɛ baa nɔ yɛ afi 193 D.Ŋ.B. lɛ, Siria maŋtsɛ lɛ kɛ nɛkɛ nɔyelihei nɛɛ haaa Ptolemy V. Eji maŋkwramɔŋ gbalashihilɛ, ni ato he gbɛjianɔ koni aha Mizraim abaje Siria shishi. Shi gbɛjianɔtoo lɛ fite, ejaakɛ Cleopatra I ‘eyaaa nɔ etsɔɔɔ enɔ̃,’ ejaakɛ yɛ sɛɛ mli lɛ ayafi ewu lɛ sɛɛ. Beni ta te shi yɛ Antiochus III kɛ Romabii lɛ ateŋ lɛ, Mizraim yafi Roma sɛɛ.
34, 35. (a) Mɛɛ “ŋshɔkpɔi” kooyigbɛ maŋtsɛ lɛ tsɔ ehiɛ eha? (b) Te fee tɛŋŋ ni Roma kɛ “ahorabɔɔ” ni jɛ kooyigbɛ maŋtsɛ lɛ ŋɔɔ lɛ ba naagbee? (d) Te fee tɛŋŋ ni Antiochus III gbo, ni namɔ batsɔ kooyigbɛ maŋtsɛ ni nyiɛ sɛɛ ba?
34 Beni ŋwɛibɔfo lɛ wieɔ kooyigbɛ maŋtsɛ lɛ nibii ni baafite lɛ ahe lɛ, ekɛfata he akɛ: “Ni [Antiochus III] eeetsɔ ehiɛ eha ŋshɔkpɔi lɛ, ni eeeŋɔ pii; shi asafoiatsɛ ko [Roma] aaaha efɔ̃ɔ ahorabɔɔ, ni jeee no kɛkɛ, shi [Roma] eeeha ahorabɔɔ lɛ aku sɛɛ abua eyiteŋ. Kɛkɛ ni [Antiochus III] eeetsɔ ehiɛ eha lɛ diɛŋtsɛ eshikpɔŋ nɔ mɔ̃ji ni wa lɛ, ni eeetɛ ni eeegbee shi, ni anaŋ lɛ dɔŋŋ.”—Daniel 11:18, 19.
35 “Ŋshɔkpɔi” [ŋshɔnaa shikpɔji] lɛ ji Makedonia, Hela, kɛ Asia Bibioo lɛ nɔ̃ lɛ. Ta te shi yɛ Hela yɛ afi 192 D.Ŋ.B., ni atsɔ̃ Antiochus III yiŋ koni eba Hela. Akɛni mɔdɛŋ ni Siria maŋtsɛ lɛ bɔ koni ehé shikpɔŋkukuji komɛi efata he lɛ eŋɔɔɔ enaa hewɔ lɛ, Roma jaje akɛ ekɛ lɛ baawuu ta. Romabii lɛ ye enɔ kunim yɛ Thermopylae. Beni aye enɔ kunim yɛ Magnesia tawuu lɛ mli yɛ afi 190 D.Ŋ.B. lɛ sɛɛ aaafee afi lɛ, ehe bahia ni eŋmɛɛ nɔ fɛɛ nɔ ni yɔɔ Hela, Asia Bibioo lɛ, kɛ hei ni kamɔ Taurus Gɔji lɛ anaigbɛ lɛ ahe. Roma bi ni etsu onia ko ni da, ni eto enɔyeli yɛ Siria kooyigbɛ maŋtsɛ lɛ nɔ. Akɛni áshwie lɛ kɛjɛ Hela kɛ Asia Bibioo lɛ, ni elaaje nɔ ni miihe ashɛ etawuu lɛji lɛ fɛɛ hewɔ lɛ, Antiochus III ‘tsɔ ehiɛ eha lɛ diɛŋtsɛ eshikpɔŋ nɔ mɔji ni wa lɛ’ yɛ Siria. Romabii lɛ ‘ha ahora ni ebɔ amɛ lɛ babua lɛ diɛŋtsɛ eyiteŋ.’ Antiochus III gbo beni ebɔɔ mɔdɛŋ ni eju nibii kɛjɛ gbatsu ko mli yɛ Elymaïs, yɛ Persia, yɛ afi 187 D.Ŋ.B. lɛ. Nɛkɛ gbɛ nɔ etsɔ ‘egbee shi’ yɛ gbele mli ni ebinuu Seleucus IV baye esɛɛ akɛ kooyigbɛ maŋtsɛ ni nyiɛ sɛɛ.
NƆMƆ LƐ TEE NƆ
36. (a) Mɛɛ gbɛ nɔ wuoyigbɛ maŋtsɛ lɛ bɔ mɔdɛŋ yɛ akɛ eeetsa mpleshii lɛ nɔ, shi mɛni ba enɔ? (b) Te fee tɛŋŋ ni Seleucus IV gbo, ni namɔ baye esɛɛ?
36 Ákɛ wuoyigbɛ maŋtsɛ lɛ, Ptolemy V bɔ mɔdɛŋ ni enine ashɛ nɔyelihei ni kulɛ esa akɛ amɛtsɔ enɔ̃ akɛ Cleopatra gbãla nii lɛ nɔ, shi akɛ ebɔɔ wo nii amli aha lɛ ni egbo. Mɔ ni ye esɛɛ ji Ptolemy VI. Ni Seleucus IV hu? Akɛni shika he miihia lɛ koni ekɛwo nyɔmɔ babaoo ni ehiɛ Roma lɛ hewɔ lɛ, etsu eshikatolɔ Heliodorus koni eyashɔ̃ jwetrii ni akɛɛ akɛto Yerusalem sɔlemɔtsu lɛ mli lɛ kɛba. Akɛni eesumɔ ni eta maŋtsɛsɛi lɛ nɔ hewɔ lɛ, Heliodorus gbe Seleucus IV. Shi kɛlɛ, Maŋtsɛ Eumenes ni jɛ Pergamum lɛ kɛ enyɛmi nuu Attalus ha awo maŋtsɛ ni agbe lɛ lɛ nyɛmi nuu Antiochus IV ata maŋtsɛsɛi lɛ nɔ.
37. (a) Mɛɛ gbɛ nɔ Antiochus IV ka akɛ eeejie ehe kpo akɛ mɔ ni he wa fe Yehowa Nyɔŋmɔ? (b) Mɛni jɛ sɔlemɔtsu ni yɔɔ Yerusalem lɛ ni Antiochus IV bule lɛ lɛ mli ba?
37 Antiochus IV ni ji kooyigbɛ maŋtsɛ hee lɛ tao akɛ eeetsɔɔ akɛ ehe wa fe Nyɔŋmɔ, kɛtsɔ mɔdɛŋ ni ebɔ koni ejie Yehowa jamɔ gbɛjianɔtoo lɛ kɛya lɛ nɔ. Etse Yehowa hiɛ atua, ni ejɔɔ Yerusalem sɔlemɔtsu lɛ nɔ eha Dio, loo Jupiter. Yɛ December afi 167 D.Ŋ.B. lɛ, ama wɔŋjalɔi afɔleshaa latɛ yɛ afɔleshaa latɛ kpeteŋkpele ni yɔɔ sɔlemɔtsu lɛ kpo lɛ nɔ, yɛ he ni ashãa afɔle yɛ daa gbi ahaa Yehowa yɛ lɛ yiteŋ. Gbii nyɔŋma sɛɛ lɛ, ashã afɔle aha Dio yɛ wɔŋjalɔi afɔleshaa latɛ lɛ nɔ. Nɛkɛ bulemɔ nɛɛ ha Yudafoi lɛ tse atua yɛ Maccabeebii lɛ ashishi. Antiochus IV kɛ amɛ wuu ta afii etɛ. Yɛ afi 164 D.Ŋ.B., beni ayeɔ bulemɔ lɛ gbi jurɔ lɛ, Judas Maccabaeus ku sɛɛ ejɔɔ sɔlemɔtsu lɛ nɔ eha Yehowa, ni ato nɔjɔɔmɔ gbi jurɔ—Hanukkah—shishi.—Yohane 10:22.
38. Te fee tɛŋŋ ni Maccabeebii anɔyeli lɛ ba naagbee?
38 Ekolɛ Maccabeebii lɛ kɛ Roma fee kpaŋmɔ yɛ afi 161 D.Ŋ.B., ni amɛto maŋtsɛyeli yɛ afi 104 D.Ŋ.B. Shi béi ni kã amɛ kɛ Siria kooyigbɛ maŋtsɛ lɛ teŋ lɛ tee nɔ. Naagbee lɛ, abi ni Roma kɛ ehe awo mli. Roma Tatsɛ Gnaeus Pompey ye Yerusalem nɔ kunim yɛ afi 63 D.Ŋ.B., beni awo he ka nyɔji etɛ sɛɛ. Yɛ afi 39 D.Ŋ.B. lɛ, Roma Bɛgwafoi lɛ hala Herode—Edomnyo ko—akɛ eye maŋtsɛ yɛ Yudea. Eye Yerusalem nɔ kunim yɛ afi 37 D.Ŋ.B., ni ekɛ Maccabeebii anɔyeli lɛ ba naagbee.
39. Daniel 11:1-19 he ni wɔsusu lɛ he eba sɛɛnamɔ kɛha bo yɛ mɛɛ gbɛ nɔ?
39 Kwɛ miishɛɛ ni eji akɛ aaana gbalɛ ni kɔɔ maŋtsɛmɛi enyɔ ni kɛ amɛhe nɔɔ nɛɛ ahe lɛ klɛŋklɛŋ fã lɛ mlibaa fitsofitso! Yɛ anɔkwale mli lɛ, kwɛ bɔ ni etaa mɔ tsuiŋ ehaa akɛ aaapɛi afii 500 yinɔsane mli, yɛ be mli ni akɛ gbalɛ ha Daniel lɛ sɛɛ, ni wɔyoo nɔyelɔi ni baje gbɛhei ni ji kooyigbɛ maŋtsɛ lɛ kɛ wuoyigbɛ maŋtsɛ lɛ mli lɛ! Shi kɛlɛ, nɛkɛ maŋtsɛmɛi enyɔ nɛɛ ayɔsemɔ yɛ maŋkwramɔŋ lɛ tsakeɔ yɛ be mli ni nɔmɔ ni kã amɛteŋ lɛ yaa nɔ kɛtsɔɔ be mli ni Yesu Kristo yɔɔ shikpɔŋ lɛ nɔ aahu kɛbashi wɔgbii nɛɛ amli lɛ. Kɛji akɛ wɔkɛ yinɔsane mli nibii ni tee nɔ lɛ to saji amlitsɔɔmɔ ni teeɔ miishɛɛ shi ni ájie lɛ kpo yɛ gbalɛ nɛɛ mli lɛ he lɛ, wɔbaanyɛ wɔyoo maŋtsɛmɛi enyɔ ni kɛ amɛhe nɔɔ nɛɛ.
MƐNI OYƆSE?
• Mɛɛ maŋtsɛmɛi awekukpaai enyɔ ni he wa fã kpo kɛjɛ Hela maŋtsɛyelii lɛ amli, ni mɛɛ mpleshii maŋtsɛmɛi nɛɛ je shishi?
• Taakɛ agba afɔ̃ shi yɛ Daniel 11:6 lɛ, te fee tɛŋŋ ni maŋtsɛmɛi enyɔ lɛ kɛ amɛhe wo ‘kpaŋmɔ’ mli?
• Nɔmɔ ni kã amɛteŋ lɛ tee nɔ yɛ mɛɛ gbɛ nɔ yɛ
Seleucus II kɛ Ptolemy III teŋ (Daniel 11:7-9)?
Antiochus III kɛ Ptolemy IV teŋ (Daniel 11:10-12)?
Antiochus III kɛ Ptolemy V teŋ (Daniel 11:13-16)?
• Mɛni ji yiŋtoo ni yɔɔ Cleopatra I kɛ Ptolemy V gbalashihilɛ lɛ sɛɛ, ni mɛni hewɔ ni gbɛjianɔtoo nɛɛ yeee omanye lɛ (Daniel 11:17-19)?
• Toiboo ni ooofee oha Daniel 11:1-19 lɛ he baaba sɛɛnamɔ aha bo yɛ mɛɛ gbɛ nɔ?
[Akrabatsa/Mfonirii ni yɔɔ baafa 228]
MAŊTSƐMƐI NI YƆƆ DANIEL 11:5-19
Kooyigbɛ Maŋtsɛ Wuoyigbɛ Maŋtsɛ
Daniel 11:5 Seleucus I Nicator Ptolemy I
Daniel 11:6 Antiochus II Ptolemy II
(eŋa Laodice) (ebiyoo Berenice)
Daniel 11:7-9 Seleucus II Ptolemy III
Daniel 11:10-12 Antiochus III Ptolemy IV
Daniel 11:13-19 Antiochus III Ptolemy V
(ebiyoo Cleopatra I) Sɛɛyelɔ:
Sɛɛyelɔi Ptolemy VI
Seleucus IV kɛ
Antiochus IV
[Mfoniri]
Shika ni ashwie ni tsɔɔ Ptolemy II kɛ eŋa
[Mfoniri]
Seleucus I Nicator
[Mfoniri]
Antiochus III
[Mfoniri]
Ptolemy VI
[Mfoniri]
Ptolemy III kɛ esɛɛyelɔi ma nɛkɛ Horus gbatsũ nɛɛ yɛ Idfu, Mizraim Yiteŋgbɛ
[Shikpɔŋ he mfoniri/Mfonirii ni yɔɔ baafa 216, 217]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
Wiemɔi “kooyigbɛ maŋtsɛ” kɛ “wuoyigbɛ maŋtsɛ” lɛ kɔɔ maŋtsɛmɛi ni yɔɔ Daniel webii lɛ ashikpɔŋ lɛ kooyigbɛ kɛ wuoyigbɛ lɛ ahe
MAKEDONIA
HELA
ASIA BIBIOO
ISRAEL
LIBYA
MIZRAIM
ETIOPIA
SIRIA
Babilon
ARABIA
[Mfoniri]
Ptolemy II
[Mfoniri]
Antiochus Kpeteŋkpele lɛ
[Mfoniri]
Tɛ saŋ ni akpɔi ni Antiochus Kpeteŋkpele lɛ wo yɔɔ nɔ
[Mfoniri]
Shika ni ashwie ni tsɔɔ Ptolemy V
Ptolemy III agbó, yɛ Karnak, Mizraim
[Baafa muu mfoniri ni yɔɔ baafa 210]
[Mfoniri ni yɔɔ baafa 215]
Seleucus I Nicator
[Mfoniri ni yɔɔ baafa 218]
Ptolemy I