‘Toiŋjɔlɛ Bɛ Kɛha Mɛi Fɔji’
“Hejɔlɛ ko bɛ ha mɛi fɔji lɛ, mi-Nyɔŋmɔ Iɛ kɛɛ.”—YESAIA 57:21.
1, 2. (a) Te gbɔmɛi pii nuɔ adesai awɔsɛɛ be he amɛhaa tɛŋŋ? (b) Mɛni ejɛ mɔdɛŋ ni adesai bɔɔ koni amɛkɛha toiŋjɔlɛ aba lɛ mli eba?
“MIHIƐ YƐ mihe nɔ yɛ be fɛɛ mli akɛ je lɛ baafite yɛ mihiɛ yɛ hiŋmɛitswaa fɛɛ hiŋmɛitswaa mli.” Nɛkɛ wiemɔ ni ana kɛjɛ wolo tɛtrɛɛ Psychology Today; lɛ mli lɛ ji wiemɔ ko ni Amerika Kooyigbɛ nɔtsamɔ skul ko mli nikaselɔ jaje. Nikaselɔ nɛɛ miishe gbeyei akɛ etsɛŋ, yɛ be ko mli ni nuklea tawuu baakpata adesai fɛɛ ahiɛ. Rusia skul gbekɛ yoo ko tsɔɔ nɔ ni baajɛ nuklea tawuu mli aba lɛ mli akɛ: “Nibii ni yɔɔ wala fɛɛ hiɛ baakpata—kwɛɛ nii bɛ dɔŋŋ, tsei bɛ dɔŋŋ, baaŋmɔŋ eta.” Mɛɛ gbɛkpamɔ ni yɔɔ gbeyei nɛ! Ní kɛlɛ, gbɔmɛi nuɔ he akɛ enɛ baanyɛ aba diɛŋtsɛ. Sane mlipɛimɔ ni afee nyɛsɛɛ nɛɛ lɛ jie lɛ kpo akɛ onukpai ni amɛdara lɛ ateŋ oha mli 40 ni abi amɛ sane lɛ wie akɛ nuklea tawuu “baanyɛ aba” dani afi 2000 baashɛ.—Kwɛmɔ Luka 21:26.
2 Je lɛŋ hiɛnyiɛlɔi hu nuɔ oshara lɛ he. Beni nyɛsɛɛ jeŋ ta lɛ ba naagbee pɛ kɛkɛ ni amɛto Jeŋmaji Ekomefeemɔ gbɛjianɔtoo lɛ koni ebɔ mɔdɛŋ ni ekɛ toiŋjɔlɛ kɛ shweshweeshwe shihilɛ aba aha adesai—shi efee yaka. Nɔ ni eba moŋ yɛ ta lɛ sɛɛ afii lɛ amli ji mpleshii diɛŋtsɛ ni mli wa ni ka jeŋ hewalɛi wuji enyɔ ni kɛ nuklea ewula amɛhe lɛ ateŋ. Nɛkɛ hewalɛi nɛɛ ahiɛnyiɛlɔi lɛ kpeɔ yɛ be kɛ bei amli bɔni afee ni amɛha majimaji ateŋ bei lɛ anaa aba shi. Shi nɔkpakpa ko jɛɛɛ mli baaa. Yɛ anɔkwale ni eji akɛ jamɔ mli hiɛnyiɛlɔi miisɔle kɛmiiha toiŋjɔlɛ lɛ fɛɛ sɛɛ lɛ, shihilɛhe tamɔ bɔ pɛ ni Yesaia tsɔɔ mli lɛ: “Naa, amɛkakalɔi lɛ miibolɔ yɛ blohuiaŋ, toiŋjɔlɛ bɔfoi lɛ miifo naakpa.”—Yesaia 33:7.
3. Mɛni hewɔ gbɔmɛi nyɛ amɛyɛ omanye yɛ amɛtoiŋjɔlɛ he mɔdɛŋbɔi lɛ amli lɛ?
3 Kristofoi ni le nɔ ni yaa nɔ lɛ le nɔ hewɔ ni maŋkwralɔi nyɛŋ ni amɛkɛ naanɔ toiŋjɔlɛ aba kɔkɔɔkɔ lɛ. Amɛle akɛ bei abɔ ni pɛsɛmkunya, nyɛɛ, hiɛjoomɔ, henɔwomɔ kɛ hiɛnyamtaomɔ eyi adesai amli obɔ nɛɛ, toiŋjɔlɛ baŋ kɔkɔɔkɔ. (Okɛto Yakobo 4:1 he.) Agbɛnɛ, nibii ni baa adesai anɔ lɛ jeee nii ni adesai kudɔɔ, shi moŋ, Biblia lɛ kɛɔ wɔ akɛ: “Jeŋ muu lɛ fɛɛ ka mɔ fɔŋ lɛ hewalɛ mli.” (1 Yohane 5:19; 2 Korintobii 4:4) Yesaia tsɔɔ shihilɛ ni adesai yɔɔ mli yɛ nɛkɛ mɔ nɛɛ kudɔmɔ shishi lɛ mli akɛ: “Shi mɛi fɔji tamɔ ŋshɔ ni efee hamahama, ejaakɛ enyɛɛɛ dioo efee . . . Toiŋjɔlɛ ko bɛ ha mɛi fɔji lɛ, mi-Nyɔŋmɔ lɛ kɛɛ.”—Yesaia 57:20, 21, New World Translation.
‘Nyɔŋmɔ Ni Haa Toiŋjɔlɛ Lɛ’
4. Namɔ pɛ yɔɔ hewalɛ ni eeenyɛ ekɛ toiŋjɔlɛ aba shikpɔŋ nɔ?
4 Enɛ etsɔɔɔ akɛ adesa weku lɛ nyɛŋ ajo hiɛkpatamɔ naa foi yɛ wɔsɛɛ be mli nuklea tawuu mli. Nɔ ni etsɔɔ kɛkɛ ji akɛ, kɛ́ wɔbaana toiŋjɔlɛ lɛ, belɛ esa akɛ eba kɛjɛ jɛɛhe kroko ni jɛɛɛ adesai anɔ mli. Yɛ miishɛɛ mli lɛ, nakai Jɛɛhe lɛ ji Yehowa Nyɔŋmɔ, “hejɔlɛ Nyɔŋmɔ lɛ.” (Romabii 16:20) Eyɛ hewalɛ ni ekɛaatsi Satan hewalɛ lɛ naa ni eto eyiŋ akɛ ‘eeejɔɔ emaŋ lɛ kɛ toiŋjɔlɛ.’ (Lala 29:11) Agbɛnɛ, ekɛ shiwoo ni taa mɔ tsuiŋ eha: “Shi mɛi ni he jɔ lɛ shikpɔŋ lɛ aaatsɔ amɛnɔ, ni amɛmii aaashɛ amɛhe yɛ hejɔlɛ babaoo mli.”—Lala 37 :11.
5. (a) Mɛɛ gbɛ nɔ Yehowa tsɔ ekɛ Daniel tsu nii koni egba wɔ E-yiŋtoo kɛha toiŋjɔlɛ lɛ he sane? (b) Mɛni hewɔ esa akɛ gbalɛ ni Daniel ŋma fɔ shi nɛɛ he ahia wɔ lɛ
5 Afii pii nɛ, ni Yehowa jie yinɔsane mli nibii ni tsɔɔ bɔ ni ekɛ toiŋjɔlɛ baaba shikpɔŋ nɛɛ nɔ lɛ kpo. Etsɔ ŋwɛibɔfo ko nɔ ewie etsɔɔ egbalɔ Daniel anɔkwafo lɛ yɛ “naagbee gbii lɛ amli” ni ji wɔ diɛŋtsɛ wɔbe nɛɛ mli lɛ. (Daniel 10:14) Etsɔ hiɛ egba ŋmɛnɛŋmɛnɛ beaŋ mleshii ni yaa nɔ yɛ jeŋ hewalɛi lɛ ateŋ lɛ efɔ shi ni etsɔɔ akɛ etsɛŋ ni ebaaba naagbee yɛ gbɛ ni jeŋ hewalɛi lɛ eko kpaaa gbɛ lɛ nɔ. Ni ewo shi akɛ nii ni baaba ni akpaaa gbɛ nɛɛ kɛ toiŋjɔlɛ diɛŋtsɛ baaba. Nɛkɛ gbalɛ nɛɛ he hiaa Kristofoi babaoo. Etsɔɔ he ni wɔshɛ yɛ be mli lɛ mli faŋŋ ni ewoɔ wɔfaishitswaa akɛ wɔbaaya nɔ ni wɔhi shi akɛ mɛi ni kɛ amɛhe wooo majimaji ateŋ bei nɛɛ mli lɛ mli hewalɛ, yɛ be mli ni wɔkɛ tsuishitoo mɛɔ Nyɔŋmɔ koni etsu nii ehawɔ lɛ.—Lala 146: 3, 5.
Mpleshii Loo Bienyɛyeli Eje Shishi
6. Gbaa wɔ yinɔsane ni eho ni kɔɔ ŋmɛnɛŋmɛnɛ beaŋ hewalɛi ni fe fɛɛ lɛ mpleshii loo bienyɛyeli he lɛ he sane.
6 Anɔkwale lɛ ji akɛ ŋmɛnɛ jeŋ hewalɛ he mpleshii lɛ jeee nɔ ko hee yɛ je lɛŋ. Eji nɔko ni miitsa nɔ ko ni je shishi be kakadaŋŋ ni eho lɛ nɔ. Beni Alexander kpeteŋkpele lɛ jeŋ hewalɛ lɛ gbeɔ shi kɛmiiba afii ohai ejwɛ D.Ŋ.B. lɛ naagbee lɛ, esafoiatsɛmɛi lɛ ateŋ mɛi enyɔ bana hewalɛ yɛ Siria kɛ Mizraim. Mpleshii loo bienyɛyeli ni sɛɛ tsɛɔ kɛ amrɔ nɛɛ jɛŋ hewalɛi lɛ ateŋ mpleshii ni yaa nɔ ŋmɛnɛ lɛ te shi yɛ amɛteŋ kɛ mɛi ni nyiɛ amɛsɛɛgbɛ lɛ ateŋ—nɔ ni atsɛɔ lɛ akɛ kooyigbɛ maŋtsɛ kɛ wuoyigbɛ maŋtsɛ akɛni amɛshihilɛ hé yɛ Nyɔŋmɔ webii lɛ ashikpɔŋ lɛ kooyigbɛ kɛ wuoyigbɛ lɛ hewɔ. Atsɔ hiɛ ajie mpleshii ni baaba yɛ yinɔsane mli nɛɛ kpo atsɔɔ gbalɔ Daniel kɛtsɔ ŋwɛibɔfo ko nɔ.
7. (a) Te wɔfeɔ tɛŋŋ wɔleɔ akɛ mumɔi ni anaaa amɛ hɔlɔ adesai asaji lɛ asɛɛ? b) Shishijee kwraa lɛ, namɔ ji kooyi bɛ maŋtsɛ lɛ kɛ wuoyigbɛ maŋtsɛ lɛ, ni amɛ mpleshii loo bienyɛyeli lɛ je shishi yɛ mɛɛ gbɛ nɔ?
7 Klɛŋklɛŋ lɛ ŋwɛibɔfo lɛ tsɔɔ bɔ ni Mikael fi esɛɛ yɛ be mli ni ewuɔ eshiɔ Persia kɛ Hela ‘lumɛi’ ni ji mumɔi lɛ. (Daniel 10:13, 20–11:1) Mumɔi ashihilɛ hé lɛ mli sane ni wɔna wɔle fioo nɛɛ maa nɔ mi akɛ majimaji ateŋ mpleshii lɛ kɔɔ nibii babaoo he fe adesai kɛkɛ ahe. Daimonio hewalɔi aloo “lumɛi” lɛ yɛ adesai nɔyelɔi ni anaa amɛ lɛ asɛɛ. Shi Nyɔŋmɔ webii lɛ hu ena “lumɔ” ni ji Mikael kɛjɛ blema koni ewo amɛ hewalɛ eshi daimonioi hewalɛi lɛ. (Efesobii 6:12) Kɛkɛ ni ŋwɛibɔfo lɛ gbala amɛjwɛŋmɔ kɛtee mpleshii ni ka Siria kɛ Mizraim teŋ lɛ nɔ. Eje shishi akɛ: “Ni wuoyigbɛ maŋtsɛ lɛ he aaawa, . . . elumɛi lɛ ateŋ mɔ kome he aaawa fe lɛ.” (Daniel 11:5a) Mɔ ni ji wuoyigbɛ maŋtsɛ lɛ yɛ biɛ ji Ptoleme I, Mizraim nɔyelɔ lɛ, ní ye Yerusalem nɔ kunim aaafee afii 312 D.Ŋ.B. Kɛkɛ ni ŋwɛibɔfo lɛ wie maŋtsɛ kroko ni “eeeye nɔ, ni enɔyeli lɛ aaatsɔ kpeteŋkpele” he. (Daniel 11:5b) Mɔ nɛɛ ji kooyigbɛ maŋtsɛ lɛ ni lɛ ji Seleuko I Nikato, mɔ ni emaŋtsɛyeli ni ji Siria lɛ he bawa fe Mizraim lɛ.
8. Mɛni ji nɔ ni ŋwɛibɔfo lɛ gbalɛ lɛ klɛŋklɛŋ fa lɛ ni ba mli pɛpɛɛpɛ yɛ kooyigbɛ maŋtsɛ lɛ kɛ wuoyigbɛ maŋtsɛ lɛ he lɛ tsɔɔ kɛhaa Kristofoi ŋmɛnɛ?
8 Ŋwɛibɔfo lɛ tee nɔ egba mpleshii ni tee nɔ yɛ Siria kɛ Mizraim nɔyelɔi ni nyiɛ sɛɛ lɛ ateŋ lɛ mli saji krokomɛi efɔ shi. (Daniel 11:6-19) Bɔ ni gbalɛi nɛɛ ba mli anɔkwale pɛpɛɛpɛ ha hewɔ lɛ, mɛi komɛi nuɔ he akɛ benɛ aŋma Daniel wolo lɛ afɔ shi yɛ be mli ni emli saji lɛ eba sɛɛ.a Kɛha Kristofoi lɛ, bɔ ni gbalɛi nɛɛ ba mli anɔkwale ha lɛ wo amɛhemɔkɛyeli hewalɛ yɛ gbalɛi krokomɛi ni kpaako amɛbaaba mli yɛ “naagbee gbii” nɛɛ amli lɛ mli.
Kpaŋmɔ Lɛ Lumɔ Lɛ
9. Te fee tɛŋŋ ni kooyigbɛ maŋtsɛ lɛ nifeemɔ ha ayafɔ Yesu yɛ Betlehem?
9 Akpaaa gbɛ akɛ ŋwɛibɔfo lɛ baawie nɔyelɔ fɛɛ nɔyelɔ he kɛjɛ Ptoleme nɔ aaahu kɛbashi “naagbee gbii” lɛ amli. Shi moŋ, wɔnuɔ shishi akɛ yɛ kuku 19 Sɛɛ pɛ kɛkɛ ni gbalɛ lɛ huru kɛba afii ni tsɔ wɔ ŋmɛnɛŋmɛnɛ Be nɛɛ mli lɛ ahiɛ kpaakpa lɛ nɔ, beni wɔkaneɔ akɛ: “Ni mɔ ko aaate shi yɛ enajiaŋ [kooyigbɛ maŋtsɛ lɛ] mɔ ni aaaha oniatsulɔ ko abatsɔ maŋtsɛyeli lɛ anunyam lɛ mli kɛho.” (Daniel 11:20) No mli lɛ Siria hɔ Roma shishi, ni mɔ ni damɔ kooyigbɛ maŋtsɛ lɛ najiaŋ ji Roma maŋtsɛ Augusto. Lɛ ji mɔ ni fa akɛ akane mɛi ni ha ayafɔ Yesu yɛ Betlehem moŋ fe Nazaret lɛ.—Luka 2:1-7; Mika 5:2.
10. Mɛɛ tsakpaa kroko ni ka kooyigbɛ maŋtsɛ lɛ kɛ Mesia lɛ teŋ ŋwɛibɔfo lɛ gbala wɔjwɛŋmɔ kɛtee nɔ?
10 Yɛ Augusto sɛɛ lɛ, Tiberio ba, nuu ko ni anyaŋeɔ, ni bɔfo lɛ tsɔɔ akɛ eji “mɔ ko ni abuuu.” (Daniel 11:21) Enɔyeli be mli ni atuatsemɔ ko ni yɔɔ gbeyei fɛ yɛ Roma Maŋtsɛyeli lɛ kooyigbɛ husui lɛ anɔ ni anyɛ aye enɛ nɔ ni akpata béi lɛ yɛ jɛmɛ ni eha gbalɛ wiemɔi nɛɛ ba mli: “Ni ta ni tamɔ nu babaoo lɛ, akɛ ta ni tamɔ nu babaoo aaaloo amɛ kɛaatee yɛ ehiɛ, ni aaakumɔ amɛ.” Kɛfata he lɛ, Roma esraafoi lɛ gbe Yesu yɛ enɔyeli be lɛ mli ni enɛ ha ŋwɛibɔfo lɛ gbalɛ lɛ ba mli akɛ aaakumɔ “kpaŋmɔ lɛ lumɔ lɛ.”—Daniel 11:22; 9:27.
Yɛ “Be Ni Ato Lɛ”
11. (a) Beni shɛɔ 1914 lɛ, no mli lɛ namɛi ji kooyigbɛ maŋtsɛ lɛ kɛ wuoyigbɛ maŋtsɛ lɛ? (b) Mɛɛ gbalɛ aha ebɛ mli yɛ “be ni ato lɛ” mli?
11 Yɛ naagbee lɛ, gbalɛ lɛ kɛwɔ baa “be ni ato lɛ,” yɛ 1914. (Daniel 11:27: Luka 21:24) Amrɔ nɛɛ lɛ tsakemɔ eba mɛi ni Nyɔŋmɔ webii lɛ ji lɛ mli. Akɛni heloo naa Israel kpoo Mesia lɛ hewɔ lɛ, gbɔmɛi ni Yehowa ehala amɛ lɛ ebatsɔmɔ mumɔŋ Israel, Kristofoi ni afɔ amɛ mu lɛ asafo lɛ. (1 Petro 2:9, 10) Mɛi ni nakai maŋtsɛmɛi enyɔ lɛ ji lɛ hu etsake. Eka shi faŋŋ akɛ Britania, kɛ emaŋkwramɔŋ hefatalɔ ni ji U.S. Amerika ebatsɔ wuoyigbɛ maŋtsɛ, yɛ be mli ni kooyigbɛ maŋtsɛ lɛ ebafee Germane agbɛnɛ. Agba Jeŋ Ta I afɔ shi yɛ nɛkɛ wiemɔi nɛɛ amli: “Be ni ato lɛ mli lɛ [kooyigbɛ maŋtsɛ lɛ] eeeku esɛɛ kɛaaba wuoyigbɛ ekoŋŋ, ni sɛɛkpee nɔ lɛ tamɔŋ tsutsu nɔ lɛ.” (Daniel 11:29) Wuoyigbɛ maŋtsɛ lɛ ye kunim yɛ nakai ta lɛ mli. Shihilɛ lɛ yɛ sɔrɔto yɛ nɔ ni fee anɔkwale yɛ “tsutsu nɔ” lɛ he, ni ji akɛ yɛ be mli ni Roma yeɔ mɔ fɛɛ mɔ nɔ akɛ kooyigbɛ maŋtsɛ lɛ.
12. Tsɔɔmɔ nibii ni ebɔ je lɛŋ kɛjɛ 1914 ni ŋwɛibɔfo lɛ gba etsɔɔ Daniel.
12 Ŋwɛibɔfo lɛ tee nɔ egbe akaŋshii ni ka maŋtsɛmɛi enyɔ nɛɛ ateŋ kɛjɛ 1914 lɛ, titri lɛ beni amɛyi enyɔ lɛ fɛɛ amɛaate shi amɛwo Yehowa webii lɛ. Agbɛnɛ ogba “amaŋfɔfeemɔ nihii nii” lɛ ni baapue lɛ hu he sane efɔ shi, nɔ ni yɔɔ bianɛ akɛ Jeŋmaji Ekomefeemɔ gbɛjianɔtoo lɛ. (Daniel 11:31) Jeŋmaji Ekomefeemɔ lɛ ni akɛma shi lɛ ji maŋkwramɔŋ mɔdɛŋ ni maŋtsɛmɛi enyɔ lɛ fɛɛ fee ekome ni amɛbɔ koni amɛkɛ toiŋjɔlɛ aba. Shi eyeŋ omanye ejaakɛ eteɔ shi ewoɔ Nyɔŋmɔ Maŋtsɛyeli lɛ.b (Mateo 24:15; Kpojiemɔ 17:3, 8) Yɛ naagbee lɛ, bɔfo lɛ gbala wɔjwɛŋmɔ kɛtee “naagbee be” lɛ nɔ.—Daniel 11:40.
“Naagbee Be Lɛ”
13. (a) Mɛni ji nɔ ni wiemɔ “naagbee be lɛ” kɔɔ he yɛ gbalɛ nɛɛ fa nɛɛ mli? (b) Kɛjɛ jeŋ ta ni ji enyɔ lɛ naagbee kɛbaa nɛɛ namɛi etsu nii akɛ kooyigbɛ maŋtsɛ lɛ kɛ wuoyigbɛ maŋtsɛ lɛ?
13 Mɛni ji nɛkɛ be nɛɛ? Yɛ bei komɛi amli lɛ wiemɔ “naagbee be” kɔɔ nibii agbɛjianɔtoo nɛɛ naagbee, kɛjɛ 1914 kɛyashi Harmagedon he. (Daniel 8:17, 19; 12:4) .Shi atsɔ hiɛ agbɛ nibii ni ba yɛ 1914 lɛ, “be ni ato lɛ” afɔ shi yɛ kuku 29, ni ŋwɛibɔfo lɛ gbalɛ lɛ kɛwɔ etee shɔŋŋ kɛjɛ nakai be lɛ.”‘ No hewɔ lɛ, esa akɛ “naagbee be lɛ” ni yɔɔ kuku 40 nɛɛ akɔ afii 2,300 mpleshii ni etee nɔ yɛ kooyigbɛ maŋtsɛ lɛ kɛ wuoyigbɛ maŋtsɛ lɛ tɛŋ lɛ naagbee be lɛ ahe. Wɔkɛ miishɛɛ yaa nɔ wɔkaneɔ ejaakɛ agbɛnɛ wɔmiikase nibii ni baaba mli yɛ wɔsɛɛ be ni ebɛŋkɛ kpaakpa lɛ mli lɛ hɔ sane. Kɛkɛ ni tsakemɔi ni ba yɛ jeŋ hewalɛ mli lɛ tsake nibii lolo koni ayoo maŋtsɛmɛi enyɔ lɛ. Kɛjɛ be mli ni Nazi-Fasist hewalɛi lɛ ba naagbee yɛ Jeŋ Ta II naagbee lɛ, wɔyoo mpleshii loo bienyɛyeli yɛ jeŋ hewalɛi ni he wa waa enyɔ ko teŋ, ekome damɔ shi kɛha kooyigbɛ maŋtsɛ lɛ, ni lɛ eyeɔ kwamaŋ jeŋmaji akuu lɛ nɔ titri, ni ekroko lɛ hu damɔ shi kɛha wuoyigbɛ maŋtsɛ lɛ, ni lɛ eyeɔ maŋbii anɔyeli ni bɔɔ jwetri amɛhaa amɛhe lɛ anɔ titri.
14. Te ŋwɛibɔfo lɛ tsɔɔ bɔ ni kooyigbɛ maŋtsɛ lɛ ji lɛ mli eha tɛŋŋ?
14 Atsɔɔ subaŋ ni sɛɛkpee kooyigbɛ maŋtsɛ nɛɛ hiɛ lɛ mli yɛ kuku 37, 38, akɛ: “Ni ebuŋ etsɛmɛi anyɔŋmɔi lɛ . . . Ni eeewo mɔji anyɔŋmɔ lɛ hiɛ nyam yɛ enajiaŋ, ni ekɛ shika kɛ jwiɛtɛi kɛ tɛi ni jara wa kɛ fɛo nibii aaawo Nyɔŋmɔ ko ni etsɛmɛi lɛ leee lɛ hiɛ nyam.” Ani mɔ ko nyɛŋ anu bɔ ni atsɔɔ saji amli aha nɛɛ shishi? Ŋmɛnɛ kooyigbɛ maŋtsɛ lɛ haa nyɔŋmɔ ni aleee lɛ shwereɔ, ni ekpoɔ jamɔ mli Nyɔŋmɔi ni tsutsu kooyigbɛ maŋtsɛmɛi lɛ sɔmɔɔ amɛ lɛ fɛɛ. Eesumɔ moŋ ni ekɛ ehe afɔ tawuu nii anɔ, “mɔji anyɔŋmɔ.” Nɔ ni ejɛ enɛ mli eba ji tawuu nifeemɔ he foidamɔ ni akɛ ehe sɔ fɔɔ maŋtsɛmɛi enyɔ nɛɛ anɔ. Ŋaa afi shika ni kooyigbɛ maŋtsɛ lɛ pɛ fiteɔ ekɛfeɔ tawuu nii lɛ yashɛ dɔlai akpekpei toi akpei 300 yɛ 1985. Mɛɛ ‘shika kɛ jwiɛtɛi kɛ tɛi ni jata wa kɛ fɛo nibii” pii etɔɔɔ tawuu nyɔŋmɔ lɛ nɛkɛ!
15, 16. (a.) Te nibii baaya nɔ aha tɛŋŋ yɛ kooyigbɛ maŋtsɛ lɛ kɛ wuoyigbɛ maŋtsɛ lɛ teŋ?(b) Mɛni ji nɔ ni enɛ baatsɔɔ aha Nyɔŋmɔ webii lɛ?
15 No hewɔ Iɛ, mɛni baa yɛ naagbee yɛ nɛkɛ maŋtsɛmɛi enyɔ nɛɛ ateŋ? Ŋwɛibɔfo lɛ kɛɛ: “Ni naagbee be lɛ mli lɛ, [maŋtsɛmɛi enyɔ nɛɛ ahe yinɔsane naagbee] wuoyigbɛ maŋtsɛ lɛ kɛlɛ aaashi; ni kooyigbɛ maŋtsɛ lɛ aaafa kɛaaba enɔ kɛ shwiilii kɛ okpɔŋɔiatsɛmɛi kɛ lɛji babaoo tamɔ ahum.” (Daniel 11:40; Mateo 24:3) Eka shi faŋŋ akɛ kpee ni amɛhiɛnyiɛlɔi lɛ kpeɔ lɛ haaa ana tsabaa ko aha hewalɛi ni he wa fe fɛɛ nɛɛ mpleshii loo bienyɛyeli lɛ. Yeyeeyefeemɔ ni wuoyigbɛ maŋtsɛ lɛ ‘shimɔ’ lɛ kɛ kooyigbɛ maŋtsɛ lɛ hu nɔyeli ni elɛɛɔ mli lɛ kɛbaa lɛ baaya nɔ kɛtsɔ shihilɛi komɛi ni mli baawa loo eeeba shi fioo mli; shi yɛ naagbee lɛ, kooyigbɛ maŋtsɛ lɛ mli baawo la waa yɛ gbɛ ko nɔ kɛbote mlifu nifeemɔ ni Daniel tsɔɔ mli Iɛ mli.c
16 Nɛkɛ naagbee gbii nɛɛ amli wa titri kɛha Nyɔŋmɔ webii lɛ, mɛi ni maŋtsɛmɛi enyɔ nɛɛ fɛɛ ewa amɛyi yɛ afii oha nɛɛ mli lɛ. Ŋwɛibɔfo lɛ bɔ kɔkɔ akɛ kooyigbɛ maŋtsɛ lɛ “eeeba shikpɔŋ fɛfɛo lɛ nɔ, ni mɛi pii aaanyɔnyɔi.” “Shikpɔŋ fɛfɛo” lɛ ji Nyɔŋmɔ webii lɛ ashikpɔŋ lɛ yɛ okadi gbɛ nɔ. No hewɔ Iɛ, esa akɛ ŋwɛibɔfo lɛ wiemɔi atsɔɔ akɛ kɛfata jeŋmaji ni eyeɔ amɛnɔ kunim lɛ asɛɛ lɛ, kooyigbɛ maŋtsɛ lɛ baatutua Yehowa webii amumɔŋ shihilɛ hé lɛ hu. (Daniel 8:9; 11:41-44; Ezekiel 20:6) Gbalɛ lɛ kɛfata he yɛ kuku 45 akɛ: “Ni eeeshi emɔɔ lɛŋ bui lɛ yɛ ŋshɔ lɛ kɛ gɔŋ krɔŋkrɔŋ ni yɔɔ fɛo lɛ teŋ.” Ni tsɔɔ akɛ, eesaa ehe koni etutua amɛmumɔŋ paradeiso lɛ yɛ naagbee kwraa.
“Ni Eeeshɛ Enaagbee”
17. Mɛni ni baaba ni akpaaa gbɛ baaha kooyigbɛ maŋtsɛ lɛ mli awo la waa lɛ?
17 Shi no mli lɛ, nɔ ko etee nɔ momo ni kooyigbɛ maŋtsɛ lɛ loo wuoyigbɛ maŋtsɛ lɛ nyɛɛɛ atsɔ hiɛ ana. Ŋwɛibɔfo lɛ gba akɛ: “Shi saji ni jɛ bokagbɛ kɛ kooyigbɛ lɛ aaahao [kooyigbɛ maŋtsɛ] lɛ; no hewɔ lɛ, ekɛ mlila babaoo aaaje kpo, ni eyafite mɛi pii ni efee amɛ butuu.”—Daniel 11:44.
18. (a) Nɛgbɛ ji he ni “saji” ni ŋwɛibɔfo lɛ gba fɔ shi lɛ jɛ? (b) Mɛni baajɛ mli aba yɛ naagbee aha kooyigbɛ maŋtsɛ lɛ?
18 Mɛni ji nɔ ni nɛkɛ amaniɛbɔɔ nɛɛ baatsɔɔ? Ŋwɛibɔfo lɛ etsɔɔɔ mli, shi etsɔɔ he ni amɛjɛ. Amɛhaa kɛjɛɔ “bokagbɛ” aloo “hulushitee he,” ni Yehowa Nyɔŋmɔ kɛ Yesu Kristo ji mɛi ni awieɔ amɛhe akɛ “maŋtsɛmɛi ni jɛ hulushitee he lɛ.” (Kpojiemɔ 16:12) Nɛkɛ amaniɛbɔi nɛɛ hu baa kɛjɛɔ “kooyigbɛ,” ni Biblia lɛ wieɔ Zion Gɔŋ lɛ, maŋtsɛ kpeteŋkpele ni ji Yehowa Maŋtsɛ lɛ maŋ lɛ he yɛ Okadi gbɛ nɔ akɛ “Zion gɔŋ ni ye kooyigbɛ lɛ.” (Lala 48:3) No hewɔ lɛ “saji” ni baa kɛjɛɔ Yehowa Nyɔŋmɔ kɛ Yesu Kristo ŋɔɔ lɛ ji nɔ ni haa kooyigbɛ maŋtsɛ Iɛ faa enaagbee ta kpeteŋkpele lɛ. Shi nɔ ni baajɛ mli aba lɛ baatsɔ hiɛkpatamɔ aha lɛ. Kuku 45 lɛ naagbee kɛɔ wɔ akɛ: “Ni eeeshɛ enaagbee, ni mɔ ko bɛ ni aaaye abua lɛ.”
19. (a) Mɛni ji nibii sɔrɔtoi ni baajɛ mli abaaha nɛkɛ je nɛɛ kɛ agbɛnɛ “mɛi ni ja” lɛ? (b) Mɛɛ sanebimɔi yɔɔ lolo ni esa akɛ aha hetoo?
19 Yɛ anɔkwale mli lɛ, “hejɔlɛ ko bɛ ha mɛi fɔji lɛ.” (Yesaia, 57:21) Shi moŋ, tawuu ji nɔ ni baakadi kooyigbɛ maŋtsɛ lɛ yinɔsane kɛyashi enaagbee Shi Yehowa woɔ E-tsuji anɔkwafoi lɛ ashi akɛ: “Ejaakɛ mɛi ni ja lɛ aaahi shikpɔŋ lɛ nɔ, ni mɛi ni eye emuu lɛ aaashwɛ yɛ nɔ; shi aaafolɔ mɛi fɔji lɛ kɛaajɛ shikpɔŋ lɛ nɔ, ni aaafamɔ kutumpɔfoi lɛ kɛaajɛ nɔ.” (Abɛi 2:21, 22) Shi mɛni baaba wuoyigbɛ maŋtsɛ lɛ nɔ beni kooyigbɛ maŋtsɛ lɛ ‘baa aahu kɛbashiɔ enaagbee kwraa’ lɛ? Mɛni baaba Kristofoi anɔ yɛ be mli ni kooyigbɛ maŋtsɛ lɛ ‘shiɔ emɔɔ lɛŋ bui lɛ’ ni ekɛwoɔ amɛhe gbeyei lɛ? (Daniel 11:45) Mɛɛ gbɛ nɔ toiŋjɔlɛ aaatsɔ aba shikpɔŋ lɛ nɔ yɛ naagbee? Yehowa etsɔ eŋwɛibɔfo lɛ nɔ eha nɛkɛ sanebimɔi nɛɛ ahetoo, taakɛ wɔbaana yɛ nikasemɔ ni nyiɛ sɛɛ nɛɛ mli lɛ.d
[Shishigbɛ niŋmai]
a [Shishigbɛ niŋmai]
Ajie kɛjɛ July 1, 1987 Watchtower lɛ mli.
b Kɛha emlitsɔɔmɔ babaoo lɛ, kwɛmɔ wolo “Your Will Be Done on Earth” yitso 10, ni Watchtower Bible and Tract Society of New York Inc. ŋma yɛ 1958 lɛ mli.
c Kɛha gbalɛ nɛɛ fa nɛɛ mlitsɔɔmɔ babaoo lɛ, kwɛmɔ wolo “Your Will Be Done on Earth” yitso 11.
Kadimɔ yɛ kuku 35 hu akɛ awiɛ “naagbee be lɛ” he akɛ eyɛ wɔsɛɛ be mli lolo.
d Kwɛmɔ ‘Your Will Be Done on Earth” baafai 298-303.
Ani Obaanyɛ Otsɔɔ Mli?
◻ Mɛɛ mumɔi ni yɔɔ shihilɛ mli diɛŋtsɛ kɛ amɛhe ewo adesai amaŋkwramɔŋ saji amli?
◻ Namɛi ji kooyigbɛ maŋtsɛ lɛ kɛ wuoyigbɛ maŋtsɛ lɛ yɛ 1914
◻ Ŋmɛnɛŋmɛnɛ beaŋ kooyigbɛ maŋtsɛ lɛ jaa mɔji anyɔŋmɔ lɛ yɛ mɛɛ gbɛ nɔ?
◻ Mɛɛ nɔnyɛɛ kooyigbɛ maŋtsɛ lɛ kɛbaaba Nyɔŋmɔ webii anɔ?
◻ Mɛni baaba kooyigbɛ maŋtsɛ lɛ nɔ yɛ naagbee?
[Shikpɔŋ he mfoniri/Mfonirii ni yɔɔ baafa 12]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
Ŋshɔ Kpeteŋkpele Lɛ
Siria
Yudea
Mizriam
[He ni Mfoniri ni yɔɔ baafa 5 lɛ Jɛ]
U.S. National Archives