Jeŋ Fɛɛ Hewalɛ Hepelemɔ Lɛ​—Namɔ Baaye Kunim?

“Soviet loo Russiabii ayiŋtoo titri ji ni amɛnyɛ wɔ nɔ ni wɔŋmɛɛ S.D.I. [Strategic Defense Initiative (“Ŋwɛiniiaŋ Tawuu”)] lɛ he. Misusuɔ akɛ . . . Gorbachev nuɔ shishi akɛ wɔsumɔŋ ni wɔŋmɛɛ he.” Nɛkɛ ji bɔ ni U.S. Maŋnɔkwɛlɔ Nukpa Reagan wie yɛ Geneva kpee ni afee yɛ November 1985 lɛ sɛɛ.

Taakɛ ole lɛ, kɛjɛ nakai afi lɛ nɔ kɛbaa nɛɛ bienyɛyeli ni ka jeŋ hewalɛi enyɔ nɛɛ ateŋ lɛ etee nɔ. Jeŋmaji babaoo yɛ ni amɛkɛ amɛhe ebɔ amɛhe aloo amɛnuɔ he amɛhaa amɛ, ni enɛ haa amɛfeɔ Bokagbɛ (Kɔmunist maji akuu titri) kɛ Anaigbɛ (guɔyeli maji ni bɔɔ jwetri amɛhaa amɛhe lɛ akuu titri) . Enɛ haa ebafeɔ jeŋ fɛɛ hewalɛ hepelemɔ. No hewɔ lɛ ekɔɔ ohe. Agbɛnɛ hu, tawuu nii afeemɔ he foidamɔ lɛ hu kɛ jeŋ ta he gbeyeishemɔ baa, ewoɔ owɔsɛɛ be he gbeyei​—kɛ oyɛ maji ni kɛ amɛhe wooo enɛ mli lɛ eko po mli.

No hewɔ lɛ, esa akɛ onya nɔ ni baajɛ hewalɛ hepelemɔ lɛ mli aba lɛ he. Ani toiŋjɔlɛ ji nɔ ni baajɛ mli aba? Kɛjeee nakai lɛ, namɔ baaye kunim? Enɛ ni ooole lɛ baanyɛ asa owɔsɛɛ be he.

Bɔ Ni Fee Ni Eje Shishi

Aŋmala woji pii yɛ ŋmɛnɛŋmɛnɛ beaŋ yinɔsane he ni tsɔɔ akɛ bienyɛyeli ni ka Boka kɛ Anai teŋ lɛ je shishi yɛ be mli ni Jeŋ Ta II ba naagbee nɔŋŋ. Shi, Biblia yinɔsane tsɔɔ akɛ eji jeŋ hewalɛ hepelemɔ ni je shishi aaafee afii 2,300 ni eho nɛ lɛ nɔtsamɔ.

Kɛji akɛ okane blema Hela yinɔsane lɛ, belɛ ole akɛ Alexander kpeteŋkpele lɛ ha nakai maŋ lɛ batsɔ maŋtsɛyeli Biblia mli gbalɔ Daniel gba enɛ. Beni nakai “maŋtsɛ kpeteŋkpele” lɛ gbo yɛ afi 323 D.Ŋ.B. lɛ, Biblia mli gbalɛ gba anɔkwale akɛ “aaaja mli kɛya ŋwɛi kɔɔyɔi ejwɛ lɛ mli”​—aja mli aha etatsɛmɛi ejwɛ lɛ. (Daniel 11:​2-4) Seleucus I Nicator nine shɛ Siria kɛ Mesopotamia nɔ-shikpɔŋkukuji ni yɔɔ Daniel maŋ Yuda lɛ kooyi bokagbɛ. Hela tatsɛ kroko Ptolemy Lagus ŋɔ Mizraim kɛ Palestina, ni enɛ hu ha ebaje Seleucus Nioator nɔyeli lɛ wuoyi anaigbɛ. Kɛ akɛ amɛgbɛhei nɛɛ baato he lɛ, belɛ ebafee amɛ “kooyigbɛ maŋtsɛ” kɛ “wuoyigbɛ maŋtsɛ.”​—Daniel 11:​5, 6.

“Kooyigbɛ” kɛ “wuoyigbɛ” bafee jeŋ maji ni he wa ni tsu gbalɛ nitsumɔi komɛi lɛ ahe nii.a Maji sɔrɔtoi ena hegbɛ yɛ afii ohai abɔ Iɛ amli amɛtsu nitsumɔi ni “maŋtsɛmɛi” enyɔ nɛɛ etsu lɛ; shi anaa gbalɛ mli nibii lɛ yɛ nɛkɛ maji nɛɛ fɛɛ he. Mɛi ni amɛkɛ amɛ yeɔ bienyɛ lɛ yɔse amɛ, ni amɛshikpɔŋkukuji lɛ yɛ kooyigbɛ loo wuoyigbɛ kɛ́ amɛkɛ amɛhe miito amɛhe.

Ŋmɛnɛ enɛɛmɛi damɔ shi kɛha “Boka” kɛ “Anai” lɛ. Enɛɛmɛi hu ebafee ekadi wiemɔi, ejaakɛ amɛshikpɔŋkukuji lɛ tekeɔ ekrokomɛi anɔ. Biblia mli gbɛi akɛ “kooyigbɛ” kɛ “wuoyigbɛ” lɛ ji Okadi ni sa yɛ amɛshikpɔŋkukuji ni boteɔ ekrokomɛi anɔ mli lɛ fɛɛ sɛɛ.

Kooyigbɛ Maŋtsɛ Lɛ Nyɔŋmɔ Lɛ

Yɛ be mli ni Daniel kpaa “naagbee be” lɛ gbɛ lɛ ekɛɛ akɛ: “kooyigbɛ maŋtsɛ” lɛ “eeewo ehe nɔ, eeefee ehe agbo fe nyɔŋmɔ fɛɛ nyɔŋmɔ,” ni “asaŋ ebuŋ” “etsɛmɛi a-Nyɔŋmɔ lɛ.” Shi moŋ, “eeewo mɔji anyɔŋmɔ lɛ hiɛ nyam . . . ni ekɛ shika kɛ jwiɛtɛi kɛ tɛi ni jara wa kɛ fɛo nibii aaawo nyɔŋmɔ ko ni etsɛmɛi lɛ leee hiɛ nyam. . . ni eeeshɛ enaagbee.”​—Daniel 11:35-39, 45.

Akɛni titri lɛ, eheee nyɔŋmɔ nɔ eyeee hewɔ lɛ, ŋmɛnɛŋmɛnɛ beaŋ “kooyigbɛ maŋtsɛ” lɛ kɛɔ akɛ Nyɔŋmɔ ko bɛ, ni enyɛɔ Nyɔŋmɔjamɔ nɔ yɛ be babaoo mli. Ekɛ ehe fɔɔ tawuu nifeemɔ kɛ tawuu nɔ moŋ babaoo ni etsɔɔ no nɔ ekɛ naa gbɛi yɛ majimaji ateŋ. No hewɔ lɛ, ekɛ enibii ni eyɔɔ lɛ “woɔ mɔji anyɔŋmɔ lɛ hiɛ nyam.” Kɛ akɛaato he Iɛ, yɛ be mli ni ŋmɛnɛŋmɛnɛ beaŋ “wuoyigbɛ maŋtsɛ” lɛ hu woɔ tawuu nii kɛ tawuu hiɛ nyam lɛ, eyɔseɔ nyɔŋmɔi krokomɛi, ni ewebii Iɛ ateŋ mɛi pii kɛ amɛhe woɔ Nyɔŋmɔjamɔ mli.

Ŋmɛnɛŋmɛnɛ Beaŋ Hewalɛ Hepelemɔ

Ye be mli ni ekɛ enine tsɔɔ nibii ni baaba yɛ wɔ gbii nɛɛ amli lɛ, gbalɛ lɛ kɛɔ akɛ: “Ni naagbee be lɛ mli lɛ wuoyigbɛ maŋtsɛ lɛ kɛ lɛ [kooyigbɛ maŋtsɛ lɛ] aaashi; ni kooyigbɛ maŋtsɛ lɛ aaafa kɛaaba enɔ kɛ shwiilii kɛ okpɔŋɔiatsɛmɛi kɛ lɛji [tawuu nii] babaoo, tamɔ ahum, ni [kooyigbɛ maŋtsɛ lɛ] eeeba shikpɔji lɛ anɔ, ni eeeho tamɔ nu babaoo, ni eeetsɔ nɔ kɛaaho.”​—Daniel 11:⁠40.

Ekolɛ ole akɛ kɛjɛ Jeŋ Ta II sɛɛ kɛbaa nɛɛ agbɛ nɔyeli he jwɛŋmɔ ni “kooyigbɛ maŋtsɛ” lɛ hiɛ lɛ ashwa shikpɔji babaoo nɔ, yɛ tai ni awu koni akɛtsi enɛ naa lɛ fɛɛ sɛɛ. He ni ebaaba shikpɔji lɛ anɔ kɛyashɛ ni ‘eho tamɔ nu babaoo’ lɛ, be kɛ̃ baatsɔɔ; shi ŋmɛnɛŋmɛnɛ beaŋ “wuoyigbɛ maŋtsɛ lɛ” ebɔ mɔdɛŋ ni etsĩ nɔ ni akɛɛ atsɛɔ lɛ heyeli je lɛ mli ni eboteɔ lɛ naa. No hewɔ lɛ, henyɛlɔi nɛɛ kɛ amɛhe woɔ ‘shimɔ’ mli ni nɛkɛ shimɔ nɛɛ etee hiɛ aaahu etsɔ tawuu nifeemɔ kɛ ŋwɛiniiaŋ he foidamɔ. Beni enɛ yaa nɔ lɛ, amɛwieɔ amɛshiɔ amɛhe akɛ amɛ amɛsumɔɔ ni amɛyɛ je lɛ nɔ.

Daniel tee nɔ ekɛɛ akɛ: “Ni [kooyigbɛ maŋtsɛ lɛ] eeeye shika kɛ jwɛitɛi titri kɛ Mizraim fɛo nibii lɛ fɛɛ nɔ, ni Lubbii kɛ Kushbii aaanyiɛ esɛɛ.” (Daniel 11:43) Enɛ baanyɛ adamɔ shi aha adebɔɔ mli nibii ni anaa aloo atsaa kɛjɛɔ maji amli; ni ŋmɛnɛŋmɛnɛ beaŋ “kooyigbɛ maŋtsɛ” lɛ yɛ shikpɔŋkukuji babaoo ni anaa shikpɔŋ lɛ mli nibii sɔrɔtoi babaoo, ni mu ni atsaa akɛfeɔ pɛtro lɛ hu fata he. Agbɛnɛ enyɛɔ enaa shikpɔji ni yɔɔ enɔyeli lɛ sɛɛ ni hiɛ shikpɔŋ mli nibii sɔrɔtoi babaoo lɛ anɔ hewalɛ. Wɔ fɛɛ wɔbaanyɛ ni wɔkɛ miishɛɛ akwɛ kɛji akɛ ebaana hewalɛ krokomɛi babaoo lolo yɛ enɛɛmɛi anɔ kɛ hei ni shika helɛtemɔ kɛ hewalɛ ni enaa yɛ maji krokomɛi anɔ lɛ baaya ayashɛ.

Namɔ Baaye Kunim?

Belɛ, mɛni ji nɔ ni tsiɔ nɛkɛ ‘maŋtsɛmɛi’ nɛɛ anaa kɛjɛɔ naagbee ta diɛŋtsɛ he lɛ? Saji otii lɛ ekome ji akɛ amɛsheɔ amɛ nuklea tawuu nii ni baakpata amɛ diɛŋtsɛ amɛhiɛ Iɛ gbeyei waa. Amɛsumɔɔ ni amɛtara okpɔlɔ he ni amɛkpa gbee yɛ saji ahe moŋ, eyɛ mli akɛ amɛyeee enɛɛmɛi anɔ. Taakɛ Daniel gba fɔ shi lɛ: “Ni amɛaamale yɛ okpɔlɔ kome he; ehiŋ, ejaakɛ ja be ni ato lɛ eshɛ dani naagbee lɛ aaaba.”​—Daniel 11:⁠27.

No hewɔ lɛ, eka shi faŋŋ akɛ ooosumɔ ni ole nɔ ni baaba mli yɛ naagbee? Ani yɛ naagbee lɛ, amɛbaakpã gbee kɛha toiŋjɔlɛ? Aloo mɔ kome baaye mɔ kroko nɔ? Taakɛ gbalɛ ni yɔɔ Nyɔŋmɔ Wiemɔ lɛ mli lɛ tsɔɔ lɛ, hetoo lɛ ji Dabi!, kɛha sanebimɔi enyɔ lɛ fɛɛ. Mɛni hewɔ? Ejaakɛ maŋtsɛ ko ni ji etɛ baaye amɛnɔ kunim ni eŋɔ jeŋ nɔyeli hewalɛ lɛ. No hewɔ lɛ tsakemɔ baaba nɔyeli mli​—etsɛŋ kwraa!

[Shishigbɛ niŋmai]

[Mfoniri ni yɔɔ baafa 4]

JEŊMAJI KƐ KUI LƐ ATAWUU MLI HEWALƐ

Nuklea Tawuu Nii

50,000

Asraafoi

11,913,000

Ŋshɔ Hiɛ Ta Lɛji

1,350

Ta Kɔɔyɔŋ Lɛji

20,100

Tankii

95,800