Yitso Nyɔŋma Kɛ Ekpaa

Maŋtsɛmɛi Ni Shiɔ Mple Lɛ Ebɛŋkɛ Amɛ Naagbee

1, 2. Te fee tɛŋŋ ni mɔ ni ayɔseɔ lɛ akɛ kooyigbɛ maŋtsɛ lɛ tsake yɛ jeŋ ta ni ji enyɔ lɛ sɛɛ?

BENI French jeŋ nilelɔ kɛ yinɔsaneŋmalɔ, Alexis de Tocqueville susuɔ maŋkwramɔŋ shihilɛ ni yɔɔ United States kɛ Russia he lɛ, eŋma yɛ afi 1835 mli akɛ: “Mɔ kome yɛ heyeli akɛ nɔ̃ titri ni etsɔɔ nɔ efeɔ nii; mɔ kroko lɛ yɛ nyɔŋyeli. Amɛ . . . gbɛ̀i [yɛ] srɔto; shi kɛlɛ, etamɔ nɔ ni Nyɔŋmɔ teemɔŋ nifeemɔ etsɛ amɛteŋ mɔ fɛɛ mɔ koni gbi ko lɛ ehiɛ nɔ ni ato akɛ ebaaba je lɛ fã nɔ lɛ yɛ edɛŋ.” Te nɔ ni agba afɔ̃ shi nɛɛ ba mli anɔkwale ha tɛŋŋ yɛ be mli ni Jeŋ Ta II jeɔ shishi lɛ? Yinɔsaneŋmalɔ J. M. Roberts ŋma akɛ: “Yɛ Jeŋ Ta ni ji enyɔ lɛ naagbee lɛ, yɛ anɔkwale mli lɛ, nɔ ni ato ni baaba je lɛ nɔ lɛ fee tamɔ nɔ ni hewalɛi wuji srɔtoi enyɔ ni esoro amɛ gbɛjianɔtoo, ni ekome yɛ nɔ ni fee Russia, ni ekokro lɛ yɛ United States of America, miiye je lɛ nɔ.”

² Germany bafee wuoyigbɛ maŋtsɛ lɛ​—Anglo-Amerika Jeŋ Hewalɛ lɛ​—henyɛlɔ titri yɛ jeŋ tai enyɔ lɛ mli, ni ehi kooyigbɛ maŋtsɛ lɛ gbɛhe mli. Shi yɛ Jeŋ Ta II sɛɛ lɛ, nakai maŋ lɛ mli ja enyɔ. West Germany batsɔ wuoyigbɛ maŋtsɛ lɛ hefatalɔ, ni East Germany kɛ ehe yabɔ hewalɛ kroko​—Komunist maji akuu lɛ ni Soviet Union ji yitso lɛ he. Nɛkɛ maji akuu, loo maŋkwramɔ gbɛjianɔtoo nɛɛ te shi akɛ kooyigbɛ maŋtsɛ, ákɛ mɔ ni teɔ shi ewoɔ Anglo-Amerika ekomefeemɔ lɛ waa diɛŋtsɛ. Ni akaŋshii ni kã maŋtsɛmɛi enyɔ lɛ ateŋ lɛ batsɔ Maji Ateŋ Béi ni Tawuu Bɛ Mli ni tee nɔ kɛjɛ afi 1948 kɛbashi afi 1989. Tsutsu lɛ, Germany kooyigbɛ maŋtsɛ lɛ te shi ewo “kpaŋmɔ krɔŋkrɔŋ lɛ.” (Daniel 11:​28, 30) Te Komunist maji akuu lɛ baafee enii yɛ kpaŋmɔ lɛ he eha tɛŋŋ?

ANƆKWA KRISTOFOI AAANYƆNYƆI SHI AMƐHE AAAWA

3, 4. Namɛi “feɔ efɔŋ amɛshiɔ kpaŋmɔ lɛ,” ni mɛɛ wekukpaa amɛkɛ kooyigbɛ maŋtsɛ lɛ ená?

³ Nyɔŋmɔ bɔfo lɛ kɛɛ: “Mɛi ni feɔ efɔŋ amɛshiɔ kpaŋmɔ lɛ, [kooyigbɛ maŋtsɛ lɛ] ekɛ naadɔkɔmɔ aaaha amɛya sɛɛsɛɛ.” Ŋwɛibɔfo lɛ kɛfata he akɛ: “Shi maŋ ni le amɛ-Nyɔŋmɔ lɛ, amɛhe aaawa, ni amɛaafee. Ni mɛi ni le nii yɛ maŋ lɛŋ lɛ aaatsɔɔ mɛi pii anii; shi amɛaanyɔnyɔi yɛ klante kɛ lalilɛi kɛ nomŋɔɔ kɛ nihaa naa gbii abɔ.”​—Daniel 11:​32, 33.

⁴ “Mɛi ni feɔ efɔŋ amɛshiɔ kpaŋmɔ lɛ” baanyɛ afee Kristendom hiɛnyiɛlɔi lɛ ni kɛɔ akɛ Kristofoi ji amɛ, shi amɛkɛ amɛ nifeemɔi gbeɔ Kristojamɔ gbɛi lɛ he guɔ lɛ pɛ. Walter Kolarz kɛɔ yɛ ewolo ni ji Religion in the Soviet Union lɛ mli akɛ: “[Yɛ jeŋ ta ni ji enyɔ lɛ mli lɛ], Soviet Nɔyeli lɛ bɔ mɔdɛŋ koni ebua Sɔlemɔi lɛ aheloo naa nibii kɛ jeŋba mli sɛɛfimɔ naa kɛha jakumaŋ lɛ sɛɛ fimɔ.” Yɛ tawuu lɛ sɛɛ lɛ, sɔlemɔ lɛ mli hiɛnyiɛlɔi lɛ bɔ mɔdɛŋ koni amɛhiɛ nakai naanyobɔɔ lɛ mli, yɛ Nyɔŋmɔ ni aleee su ni hewalɛ ni agbɛnɛ ebatsɔ kooyigbɛ maŋtsɛ lɛ hiɛ lɛ fɛɛ sɛɛ. No hewɔ lɛ, Kristendom batsɔ je nɛɛ fã babaoo fe bei fɛɛ ni eho​—nihii nii ni ji hemɔkɛyeli kwamɔ yɛ Yehowa hiɛ.​—Yohane 17:16; Yakobo 4:4.

5, 6. Namɛi ji ‘gbɔmɛi ni le amɛ-Nyɔŋmɔ lɛ,’ ni mɛni ba amɛnɔ yɛ kooyigbɛ maŋtsɛ lɛ shishi?

⁵ Shi anɔkwa Kristofoi,​—“maŋ ni le amɛ-Nyɔŋmɔ lɛ” kɛ “mɛi ni le nii” lɛ hu? Eyɛ mli akɛ ‘amɛbaa amɛhe shi amɛhaa hegbɛi ni yeɔ nɔ lɛ’ yɛ gbɛ ni sa nɔ moŋ, shi Kristofoi ni hiɔ shi yɛ kooyigbɛ maŋtsɛ lɛ nɔyeli shishi lɛ jeee je nɛɛ fã. (Romabii 13:1; Yohane 18:36) Amɛkɛ henɔkwɛmɔ jogbaŋŋ ŋɔɔ ‘Kaisare nii amɛhaa Kaisare,’ ni amɛŋɔɔ ‘Nyɔŋmɔ nii amɛhaa Nyɔŋmɔ’ hu. (Mateo 22:21) Yɛ enɛ hewɔ lɛ, aka emuuyeli mli ni amɛhiɛ lɛ akwɛ.​—2 Timoteo 3:12.

⁶ Yɛ enɛ hewɔ lɛ, anɔkwa Kristofoi ‘nyɔnyɔi’ ni ‘amɛhe wa’ hu. Amɛnyɔnyɔi kɛ shishinumɔ akɛ, amɛna yiwaa mli amanehulu babaoo diɛŋtsɛ, ni agbe amɛteŋ mɛi komɛi po. Shi amɛhe wa, kɛ shishinumɔ akɛ amɛteŋ mɛi ni fa ye anɔkwa. Amɛye je lɛ nɔ kunim, taakɛ Yesu fee lɛ. (Yohane 16:33) Agbɛnɛ hu, amɛkpaaa shiɛmɔ, kɛji akɛ amɛna amɛhe yɛ tsuŋwoohe loo yɛ gbokɛlɛfoi ansarai amli po. ‘Amɛtsɔɔ mɛi pii anii’ yɛ nakai feemɔ mli. Yɛ yiwaa ni tee nɔ yɛ maji pii ni kooyigbɛ maŋtsɛ lɛ yeɔ nɔ lɛ amli lɛ fɛɛ sɛɛ lɛ, Yehowa Odasefoi ayifalɛ lɛ tee hiɛ. Yɛ “mɛi ni le nii” lɛ anɔkwayeli hewɔ lɛ, “asafo babaoo” lɛ fã ko ni yi faa be fɛɛ be eje kpo yɛ nakai shikpɔji lɛ anɔ.​—Kpojiemɔ 7:​9-14.

ATSUU YEHOWA WEBII AHE

7. Mɛɛ ‘yelikɛbuamɔ fioo’ Kristofoi ni afɔ amɛ mu ni hi shi yɛ kooyigbɛ maŋtsɛ lɛ shishi lɛ anine shɛ nɔ?

⁷ Ŋwɛibɔfo lɛ kɛɛ: “Ni beni [Nyɔŋmɔ webii lɛ] aaanyɔnyɔi lɛ, aaaye abua amɛ fioo.” (Daniel 11:34a) Kunim ni wuoyigbɛ maŋtsɛ lɛ ye yɛ jeŋ ta ni ji enyɔ lɛ mli lɛ kɛ hejɔlɛ ko baha Kristofoi ni yɔɔ maŋtsɛ ni kɛ lɛ shiɔ akaŋ lɛ shishi lɛ. (Okɛto Kpojiemɔ 12:​15, 16 he.) Nakai nɔŋŋ hu mɛi ni maŋtsɛ ni baye esɛɛ lɛ wa amɛyi lɛ ná hejɔlɛ yɛ be kɛ bei amli. Beni Maji Ateŋ Béi ni Tawuu Bɛ Mli lɛ baa naagbee fiofio lɛ, hiɛnyiɛlɔi babaoo bayoo akɛ Kristofoi anɔkwafoi lɛ ahe bɛ oshara, ni no hewɔ lɛ amɛkpɛlɛ amɛnɔ yɛ mla naa. Yelikɛbuamɔ hu ba kɛjɛ asafo babaoo lɛ ni amɛyi fáa babaoo lɛ ni kpɛlɛ anɔkwafoi ni afɔ amɛ mu lɛ ashiɛmɔ lɛ nɔ, ni amɛye amɛbua amɛ lɛ aŋɔɔ.​—Mateo 25:​34-40.

8. Te fee tɛŋŋ ni mɛi komɛi kɛ amɛhe kpɛtɛ Nyɔŋmɔ webii ahe kɛtsɔ “naadɔkɔmɔ” nɔ lɛ?

⁸ Jeee mɛi fɛɛ ni kɛɛ akɛ amɛyɛ miishɛɛ akɛ amɛaasɔmɔ Nyɔŋmɔ yɛ afii ni Maji Ateŋ Béi ni Tawuu Bɛ Mli lɛ mli lɛ, hiɛ jwɛŋmɔ kpakpa. No mli lɛ ŋwɛibɔfo lɛ ebɔ kɔkɔ akɛ: “Mɛi pii kɛ amɛhe aaakpɛtɛ amɛhe kɛ naadɔkɔmɔ.” (Daniel 11:34b) Mɛi ni fa ná anɔkwale lɛ he miishɛɛ, shi amɛsumɔɔɔ ni amɛjɔɔ amɛhe nɔ amɛhaa Nyɔŋmɔ. Ni kɛlɛ, mɛi krokomɛi ni tamɔ mɛi ni kpɛlɛ sanekpakpa lɛ nɔ lɛ ji shikpálɔi diɛŋtsɛ kɛha nɔyelɔi lɛ. Amaniɛbɔɔ ni jɛ maŋ ko nɔ lɛ kaneɔ akɛ: “Gbɔmɛi ni bɛ jeŋba nɛɛ ateŋ mɛi komɛi ji Komunistbii ni yɔɔ kpɛŋŋ, ni ámɛju shi amɛbabote Nuntsɔ lɛ gbɛjianɔtoo lɛ mli lɛ jie ekãa babaoo kpo, ni ahala amɛ awo gbɛhei ni nɔ kwɔlɔ po mli.”

9. Mɛni hewɔ Yehowa ŋmɛ gbɛ ni Kristofoi anɔkwafoi komɛi ‘nyɔnyɔi’ yɛ mɛi ni ju shi amɛbote amɛteŋ lɛ hewɔ?

⁹ Ŋwɛibɔfo lɛ tee nɔ akɛ: “Ni mɛi ni le nii lɛ ateŋ mɛi komɛi hu aaanyɔnyɔi, koni akɛka amɛ akwɛ ni akɛtsuu amɛhe, ni aha amɛyɛ futafuta kɛyashi naagbee be lɛ mli; ejaakɛ ja be ni ato lɛ eshɛ dani eeeba mli.” (Daniel 11:35) Mɛi ni ju shi amɛbabote mli lɛ hã anɔkwafoi lɛ ateŋ mɛi komɛi yagbee nɔyelɔi lɛ adɛŋ. Yehowa ŋmɛ gbɛ koni nibii nɛɛ aya nɔ kɛha ewebii lɛ ahetsuumɔ kɛ hetsemɔ. Taakɛ Yesu “kase toiboo yɛ amanehului ni ena lɛ amli” lɛ, nakai nɔŋŋ anɔkwafoi nɛɛ kase tsuishiŋmɛɛ kɛjɛ amɛhemɔkɛyeli he kaa lɛ mli. (Hebribii 5:8; Yakobo 1:​2, 3; okɛto Maleaki 3:3 he.) No hewɔ lɛ ‘atsuu amɛhe, aha amɛhe tse, ni amɛyɛ futafuta.’

10. Mɛni ji wiemɔ “kɛyashi naagbee be lɛ mli” lɛ shishi?

¹⁰ Yehowa webii baanyɔnyɔi ni abaaya nɔ atsuu amɛhe “kɛyashi naagbee be lɛ mli.” Amɛkpaa gbɛ akɛ abaawa amɛyi aahu kɛyashi yiwalɛ nibii agbɛjianɔtoo nɛɛ naagbee. Shi kɛlɛ, Nyɔŋmɔ webii lɛ ahetsuumɔ kɛ hetsemɔ yɛ kooyigbɛ maŋtsɛ lɛ ni kɛ ehe bawo amɛ saji amli ekãa naa hewɔ lɛ yɛ kɛha “be ni ato lɛ.” No hewɔ lɛ, esa akɛ “naagbee be lɛ” ni yɔɔ Daniel 11:35 lɛ, akɔ be kpalaŋŋ ni he hiaa koni akɛtsuu Nyɔŋmɔ webii lɛ ahe yɛ be mli ni amɛŋmɛɔ amɛtsui shi yɛ kooyigbɛ maŋtsɛ lɛ tutuamɔ lɛ mli lɛ he. Eyɛ faŋŋ akɛ nyɔ ni amɛnyɔnyɔi lɛ ba naagbee yɛ be ni Yehowa to lɛ mli.

MAŊTSƐ LƐ WÓ EHE NƆ

11. Mɛni ŋwɛibɔfo lɛ wie yɛ su ni kooyigbɛ maŋtsɛ lɛ hiɛ yɛ Yehowa nɔyeli he lɛ he?

¹¹ Yɛ kooyigbɛ maŋtsɛ lɛ he lɛ, ŋwɛibɔfo lɛ kɛfata he akɛ: “Ni maŋtsɛ lɛ aaafee nɔ ni esumɔɔ, ni eeewó ehe nɔ, ni eeefee ehe agbo fe nyɔŋmɔ fɛɛ nyɔŋmɔ, ni [akɛni ekpɛlɛɛɛ maŋtsɛ ni Yehowa ji lɛ nɔ hewɔ lɛ] eeewie hepupuumɔ wiemɔi eshi nyɔŋmɔi a-Nyɔŋmɔ lɛ, ni eeeshwere kɛyashi beyinɔ ni mlila lɛ aaayi; shi nɔ ni ama nɔ mi lɛ, aaafee. Ni asaŋ ebuŋ etsɛmɛi anyɔŋmɔ lɛ, ni ebuŋ yei asɛɛdii loo nyɔŋmɔ ko nyɔŋmɔ ko, shi eeewó ehe nɔ yɛ mɛi fɛɛ nɔ.”​—Daniel 11:​36, 37.

12, 13. (a) Yɛ mɛɛ gbɛ nɔ kooyigbɛ maŋtsɛ lɛ kpoo “etsɛmɛi anyɔŋmɔi lɛ”? (b) Namɛi ji “yei” ni kooyigbɛ maŋtsɛ lɛ ebuuu ‘amɛ sɛɛdii nii’ lɛ? (d) Mɛɛ “nyɔŋmɔ” kooyigbɛ maŋtsɛ lɛ wo ehiɛ nyam lɛ?

¹² Beni ehaa gbalɛ wiemɔi nɛɛ baa mli lɛ, kooyigbɛ maŋtsɛ lɛ kpoo “etsɛmɛi anyɔŋmɔ lɛ,” tamɔ Kristendom Triniti krɔŋkrɔŋ lɛ nɛkɛ. Komunist maji akuu lɛ fi Nyɔŋmɔ ni bɛ tsɔɔmɔ lɛ sɛɛ diɛŋtsɛ. No hewɔ lɛ, kooyigbɛ maŋtsɛ lɛ fee lɛ diɛŋtsɛ ehe nyɔŋmɔ, ‘ewó ehe nɔ yɛ mɔ fɛɛ mɔ nɔ.’ Akɛni ebuuu “yei asɛɛdii”​—maji ni yɔɔ ehewalɛ shishi ni sɔmɔ lɛ, tamɔ North Vietman ni sɔmɔ lɛ akɛ enɔyeli lɛ mli abaawai hewɔ lɛ​—maŋtsɛ lɛ ‘fee nɔ ni esumɔɔ.’

¹³ Beni etsaa gbalɛ lɛ nɔ lɛ, ŋwɛibɔfo lɛ kɛɛ: “Ni eeewo mɔji anyɔŋmɔ lɛ hiɛ nyam yɛ enajiaŋ, ni ekɛ shika kɛ jwiɛtɛi kɛ tɛi ni jara wa kɛ fɛo nibii aaawo nyɔŋmɔ ko ni etsɛmɛi lɛ leee hiɛ nyam.” (Daniel 11:38) Yɛ anɔkwale mli lɛ, kooyigbɛ maŋtsɛ lɛ kɛ ehekɛnɔfɔɔ wo ŋmɛnɛŋmɛnɛ beaŋ tawuu mli kɛtsɔ nilee nɔ, ni ji “mɔji anyɔŋmɔ lɛ” mli. Etao yiwalaheremɔ kɛtsɔ nɛkɛ “nyɔŋmɔ” nɛɛ nɔ, ni ekɛ nii babaoo shã afɔle yɛ efɔleshãa latɛ lɛ nɔ.

14. Yɛ mɛɛ gbɛ nɔ kooyigbɛ maŋtsɛ lɛ ‘fee nii kɛmɔ shi’?

¹⁴ “Ni ekɛ mɔji ni wa fe fɛɛ lɛ aaaye yɛ maŋsɛɛ nyɔŋmɔ ko yelikɛbuamɔ naa; mɔ fɛɛ mɔ ni buɔ lɛ lɛ, eeeha enunyam afa, ni eeeha eye mɛi pii anɔ, ni eeeja shikpɔŋ lɛ mli ekɛwo nyɔmɔ.” (Daniel 11:39) Akɛni ekɛ ehe fɔ̃ɔ tawuu mli “maŋsɛɛ nyɔŋmɔ ko” nɔ hewɔ lɛ, kooyigbɛ maŋtsɛ lɛ ‘fee nii kɛmɔ shi,’ ni ekɛtsɔɔ akɛ eji tawuu mli hewalɛ ni he yɔɔ gbeyei waa yɛ “naagbee gbii” lɛ amli. (2 Timoteo 3:1) Nyɔmɔ ni ewo mɛi ni fiɔ jwɛŋmɔ ni etsɔɔ nɔ ekɛyeɔ maŋ nɔ lɛ sɛɛ lɛ ji maŋkwramɔŋ, shika gbɛfaŋ, kɛ bei komɛi amli lɛ tawuu mli sɛɛfimɔ.

‘SHIMƆ KO’ YƐ NAAGBEE BE LƐ MLI

15. Yɛ mɛɛ gbɛ nɔ wuoyigbɛ maŋtsɛ lɛ kɛ kooyigbɛ maŋtsɛ lɛ bɔi “shimɔ”?

¹⁵ Ŋwɛibɔfo lɛ kɛɛ Daniel akɛ: “Ni naagbee be lɛ mli lɛ wuoyigbɛ maŋtsɛ lɛ kɛ lɛ aaashi.” (Daniel 11:40a) Ani wuoyigbɛ maŋtsɛ lɛ ‘eshi’ kooyigbɛ maŋtsɛ lɛ yɛ “naagbee be lɛ” mli? (Daniel 12:​4, 9) Hɛɛ, efee nakai. Yɛ klɛŋklɛŋ jeŋ ta lɛ sɛɛ lɛ, toiŋjɔlɛ kpaŋmɔ ni akɛgbalaa mɔ toi ni akɛfɔ̃ no beaŋ kooyigbɛ maŋtsɛ​—Germany​—nɔ lɛ ji ‘shimɔ’ diɛŋtsɛ, kanyamɔ kɛha oweletɔɔ. Yɛ kunim ni eye yɛ jeŋ ta ni ji enyɔ lɛ mli lɛ sɛɛ lɛ, wuoyigbɛ maŋtsɛ lɛ tá nuklea tawuu nii ni yɔɔ gbeyei ekɛtsɔɔ enɔ yɛ be mli ni eku esɛɛ kɛba lɛ, ni eto ekomefeemɔ ko ni yɔɔ hewalɛ waa yɛ tawuu mli he gbɛjianɔ, ni ji North Atlantic Treaty Organization (NATO) lɛ. Britania yinɔsaneŋmalɔ ko wie NATO nitsumɔ he akɛ: “Eji dɛŋ dade titri ni ‘akɛbaaku’ USSR, ni abuɔ lɛ bianɛ akɛ nɔ titri ni woɔ Europa toiŋjɔlɛ he gbeyei lɛ ‘naa.’ Enitsumɔ lɛ hi shi afii 40, ni atsu he nii kɛ omanyeyeli ni anyɛŋ aje he ŋwane.” Beni Maji Ateŋ Béi ni Tawuu Bɛ Mli afii lɛ yaa nɔ lɛ, nɔ ni fata kooyigbɛ maŋtsɛ lɛ ‘shimɔ’ lɛ he ji tsɔnei ahe nilee ni yaa hiɛ ni atsɔɔ nɔ ajuɔ shi akɛleɔ maji krokomɛi ateemɔŋ saji kɛ agbɛnɛ majimaji ateŋ sharamɔ he ŋaa kɛ tawuu mli nifeemɔi ni akɛtsɔ̃ɔ mɔ naa.

16. Mɛni kooyigbɛ maŋtsɛ lɛ fee yɛ wuoyigbɛ maŋtsɛ lɛ shimɔ lɛ he?

¹⁶ Te kooyigbɛ maŋtsɛ lɛ fee enii yɛ enɛ he eha tɛŋŋ? “Kooyigbɛ maŋtsɛ lɛ aaafã kɛaaba enɔ kɛ shwiilii kɛ okpɔŋɔiatsɛmɛi kɛ lɛji babaoo, tamɔ ahum, ni eeeba shikpɔji lɛ anɔ, ni eeeho tamɔ nu babaoo, ni eeetsɔ nɔ kɛaaho.” (Daniel 11:40b) Naagbee gbii lɛ amli yinɔsane etsɔɔ kooyigbɛ maŋtsɛ lɛ mli ni elɛɛɔ. Yɛ jeŋ ta ni ji enyɔ lɛ mli lɛ, Nazi “maŋtsɛ” lɛ tsɔ ehusui lɛ anɔ kɛho tamɔ nu kɛbote maji ni ebɔle lɛ lɛ amli. Yɛ nakai ta lɛ naagbee lɛ, “maŋtsɛ” ni baye esɛɛ lɛ to maŋtsɛyeli ko ni he wa waa shishi ema shi. Kooyigbɛ maŋtsɛ lɛ kɛ mɔ ni kɛ lɛ shiɔ akaŋ lɛ wuu maji asɛɛfimɔ tai, kɛ atũa ni atseɔ ashiɔ nɔyelii ni afiɔ sɛɛ yɛ Afrika, Asia, kɛ Latin America, yɛ Maji Ateŋ Béi ni Tawuu Bɛ Mli bei lɛ amli. Ewa anɔkwa Kristofoi ayi, etsĩ amɛ gbɛ​—shi no haaa amɛkpa​—amɛ nitsumɔ lɛ. Ni etawuu kɛ maŋkwramɔŋ nifeemɔi ni akɛtsɔ̃ɔ mɔ naa lɛ kɛ maji babaoo bahɔ ekudɔmɔ shishi. Enɛ pɛpɛɛpɛ ŋwɛibɔfo lɛ gba fɔ̃ shi lɛ, akɛ: “Ni eeeba shikpɔŋ fɛfɛo [Yehowa webii amumɔŋ shihilɛhe] lɛ nɔ, ni mɛi pii aaanyɔnyɔi.”​—Daniel 11:41a.

17. Mɛɛ naatsii nibii yɔɔ kooyigbɛ maŋtsɛ lɛ hewalɛ ni elɛɛɔ mli lɛ he?

¹⁷ Shi kɛlɛ, kooyigbɛ maŋtsɛ lɛ nyɛɛɛ aye je lɛ nɔ kunim. Ŋwɛibɔfo lɛ gba akɛ: “Shi mɛi ni aaaje edɛŋ nɛ: Edom kɛ Moab kɛ Amonbii lɛ ateŋ abladei lɛ.” (Daniel 11:41b) Yɛ blema bei lɛ amli lɛ, Edom, Moab kɛ Amon kãmɔ Mizraim wuoyigbɛ maŋtsɛ lɛ kɛ Siria kooyigbɛ maŋtsɛ lɛ nɔyeli shikpɔji lɛ ateŋ. Yɛ ŋmɛnɛŋmɛnɛ beaŋ lɛ amɛdamɔ shi kɛha jeŋmaji kɛ gbɛjianɔtoi ni kooyigbɛ maŋtsɛ lɛ kɛ ehiɛ ka amɛ shi enyɛɛɛ ekɛ amɛ aba ehewalɛ shishi lɛ.

MIZRAIM EJEEE MLI

18, 19. Wuoyigbɛ maŋtsɛ lɛ nu hewalɛ ni ebienyɛ lɛ ená lɛ he yɛ mɛɛ gbɛ̀i anɔ?

¹⁸ Yehowa bɔfo lɛ tee nɔ akɛ: “Ni [kooyigbɛ maŋtsɛ lɛ] eeekpa enine mli yɛ shikpɔji lɛ anɔ, ni Mizraim shikpɔŋ lɛ ejeŋ mli; shi eeeye shika kɛ jwiɛtɛi jwetrii kɛ Mizraim fɛo nibii lɛ fɛɛ nɔ, ni Lubbii kɛ Kushbii aaanyiɛ esɛɛ.” (Daniel 11:​42, 43) Wuoyigbɛ maŋtsɛ lɛ, ni ji “Mizraim” po ejeee kooyigbɛ maŋtsɛ lɛ maji amlilɛɛmɔ nifeemɔ lɛ mli. Ákɛ nɔkwɛmɔnɔ lɛ, aye wuoyigbɛ maŋtsɛ lɛ nɔ kunim ko ni sa kadimɔ yɛ Vietnam. Ni “Lubbii kɛ Kushbii” lɛ hu? Blema maji ni bɛŋkɛ Mizraim nɛɛ baanyɛ afee maji ni kɛ aaawie yɛ shikpɔŋ lɛ shikamɔ naa lɛ, amɛji ŋmɛnɛŋmɛnɛ beaŋ “Mizraim” (wuoyigbɛ maŋtsɛ lɛ) akutseiaŋbii lɛ ahe mfoniri. Bei komɛi amli lɛ, amɛfee kooyigbɛ maŋtsɛ lɛ nanemaahei​—‘asɛɛnyiɛlɔi.’

¹⁹ Ani kooyigbɛ maŋtsɛ lɛ eye ‘Mizraim jwetrii ni aŋɔtee’ lɛ fɛɛ nɔ? Ená hewalɛ yɛ gbɛ ni wuoyigbɛ maŋtsɛ lɛ kɛ ejwetrii kɛ shika etsu nii lɛ anɔ. Yɛ mɔ ni ekɛ shiɔ akaŋ nɛɛ gbeyeishemɔ hewɔ lɛ, wuoyigbɛ maŋtsɛ lɛ efite shika babaoo diɛŋtsɛ yɛ asraafoi, ŋshɔ hiɛ ta lɛji, kɛ kɔɔyɔŋ tawuu lɛji ni he wa waa lɛ ahe. Yɛ enɛ hewɔ lɛ, kooyigbɛ maŋtsɛ lɛ ‘ye’ bɔ ni wuoyigbɛ maŋtsɛ lɛ kɛ ejwetrii tsuɔ nii ehaa lɛ ‘nɔ’ loo ekudɔ.

NAAGBEE TAFÃA LƐ

20. Te ŋwɛibɔfo lɛ tsɔɔ kooyigbɛ maŋtsɛ lɛ naagbee tafãa lɛ mli eha tɛŋŋ?

²⁰ Akaŋshii ni kã kooyigbɛ maŋtsɛ lɛ kɛ wuoyigbɛ maŋtsɛ lɛ teŋ lɛ​—kɛji akɛ kɛtsɔ tawuu, shika helɛtemɔ, loo gbɛ kroko nɔ lɛ​—miiba enaagbee. Beni ejieɔ tawuu ko ni baaba lolo lɛ mlitsɔɔmɔ kpo lɛ, Yehowa bɔfo lɛ kɛɛ akɛ: “Saji ni jɛ bokagbɛ kɛ kooyigbɛ lɛ aaahao [kooyigbɛ maŋtsɛ] lɛ; no hewɔ lɛ ekɛ mlila babaoo aaaje kpo, ni eyafite mɛi pii ni efee amɛ musu. Ni eeeshi emɔ̃ɔ lɛŋ buui lɛ yɛ ŋshɔi lɛ kɛ gɔŋ krɔŋkrɔŋ ni yɔɔ fɛo lɛ teŋ; ni eeeshɛ enaagbee, ni mɔ ko bɛ ni aaaye abua lɛ.”​—Daniel 11:44, 45.

21. Mɛni esa akɛ wɔkase lolo yɛ kooyigbɛ maŋtsɛ lɛ he?

²¹ Agbala kooyigbɛ maŋtsɛ lɛ sɛɛ waa beni akumɔ Soviet Union yɛ December 1991 lɛ. Namɔ baafee maŋtsɛ nɛɛ beni Daniel 11:​44, 45 baa mli lɛ? Ani eeenyɛ efee tsutsu Soviet Union maji lɛ amli bii lɛ eko? Aloo ebaatsake bɔ ni esu yɔɔ lɛ kwraa, taakɛ efee shii abɔ yɛ bei ni eho lɛ amli lɛ? Ani nɔ ni baajɛ nuklea tawuu nii ni maji krokomɛi feɔ lɛ mli aba ji tawuu nii heei afeemɔ he foidamɔ ni baaha ayoo nakai maŋtsɛ lɛ? Be pɛ kɛ nɛkɛ sanebimɔi nɛɛ ahetoo baaba. Kɛji akɛ wɔkaaa wɔyiŋ akɛ wɔɔle lɛ, belɛ nilelɔi ji wɔ. Kɛji akɛ kooyigbɛ maŋtsɛ lɛ je enaagbee tafãa lɛ shishi lɛ, gbalɛ mlibaa baafee faŋŋ aha mɛi fɛɛ ni yɔɔ sɛɛyoomɔ ni damɔ Biblia lɛ nɔ lɛ.​—Kwɛmɔ “Maŋtsɛmɛi ni Yɔɔ Daniel Yitso 11,” yɛ baafa 284.

22. Mɛɛ sanebimɔi teɔ shi yɛ kooyigbɛ maŋtsɛ lɛ naagbee tutuamɔ lɛ he?

²² Shi, wɔle nii ni etsɛŋ ni kooyigbɛ maŋtsɛ lɛ baafee. Akɛni saji “ni jɛ bokagbɛ kɛ kooyigbɛ” lɛ aaatsirɛ lɛ hewɔ lɛ, ebaafã ta ko ‘koni ekɛkpata mɛi pii ahiɛ.’ Namɛi efãa ta nɛɛ eshiɔ? Ni mɛɛ “saji” kanyãa tutuamɔ ni tamɔ nɛkɛ?

SAJI NI HAOƆ MƆ HÃ ETSUI FÃ

23. (a) Mɛɛ sane ni ekaaa esa akɛ eba dani Harmagedon aje shishi? (b) Namɛi ji “maŋtsɛmɛi ni jɛ hulushiteehe” lɛ?

²³ Susumɔ nɔ ni Kpojiemɔ wolo lɛ yɔɔ kɛɛmɔ yɛ Babilon Kpeteŋkpele, jeŋ apasa jamɔ maŋtsɛyeli lɛ naagbee lɛ he. Dani Harmagedon, ni ji “Nyɔŋmɔ Ofe lɛ gbi wulu lɛ nɔ ta” lɛ aaaba lɛ, “akɛ la aaashã” nɛkɛ anɔkwa jamɔ henyɛlɔ kpeteŋkpele nɛɛ “kwrakwra kɛmɔ shi.” (Kpojiemɔ 16:14, 16; 18:​2-8) Akɛ Nyɔŋmɔ mlifu tɔ ni ji ekpaa lɛ mli nii ni afɔse awo mfonirifeemɔŋ Eufrate faa lɛ mli lɛ fee ehiɛkpatamɔ lɛ he okadi. Ahã faa lɛ gbi koni “akɛsaa gbɛ aha maŋtsɛmɛi ni jɛ hulushiteehe lɛ.” (Kpojiemɔ 16:12) Namɛi ji nɛkɛ maŋtsɛmɛi nɛɛ? Amɛjeee mɛi komɛi ákɛ ja Yehowa Nyɔŋmɔ kɛ Yesu Kristo!​—Okɛto Yesaia 41:2; 46:​10, 11 he.

24. Mɛɛ Yehowa nifeemɔ baanyɛ ahao kooyigbɛ maŋtsɛ lɛ?

²⁴ Átsɔɔ Babilon Kpeteŋkpele lɛ hiɛkpatamɔ lɛ mli fitsofitso yɛ Kpojiemɔ wolo lɛ mli, ni ekɛɔ akɛ: “Akolontoi nyɔŋma ni ona [maŋtsɛmɛi ni yeɔ nɔ yɛ naagbee be lɛ mli] lɛ, kɛ kooloo [Jeŋmaji Ekomefeemɔ] lɛ, amɛaanyɛ ajwamaŋ lɛ, ni amɛaafee lɛ amaŋfɔ, ni amɛaaŋmɛ lɛ yayai, ni amɛaaye eheloo, ni amɛkɛ la aaashã lɛ.” (Kpojiemɔ 17:16) Mɛni hewɔ nɔyelɔi lɛ baakpata Babilon Kpeteŋkpele lɛ hiɛ lɛ? “Ejaakɛ Nyɔŋmɔ kɛwo amɛtsuiiaŋ koni amɛfee eyiŋtoo nii lɛ.” (Kpojiemɔ 17:17) Mɔ ni fata nɔyelɔi nɛɛ ahe ji kooyigbɛ maŋtsɛ lɛ. Saji ni enuɔ “ni jɛ bokagbɛ” lɛ baanyɛ afee nɔ ni kɔɔ Yehowa nifeemɔ nɛɛ he, beni ekɛwoɔ adesai hiɛnyiɛlɔi nɛɛ atsuii amli koni amɛkpata jamɔŋ ajwamaŋ kpeteŋkpele lɛ hiɛ lɛ.

25. (a) Namɛi krɛdɛɛ kooyigbɛ maŋtsɛ lɛ kɛ ehiɛ eka amɛ lɛ? (b) Nɛgbɛ kooyigbɛ maŋtsɛ lɛ ‘shĩɔ emɔ̃ɔ lɛŋ buui lɛ’ yɛ?

²⁵ Shi kooyigbɛ maŋtsɛ lɛ mlifu lɛ kɔɔ nɔ̃ krɛdɛɛ ko ni ejie ehiɛ eka lɛ he. Ŋwɛibɔfo lɛ kɛɔ akɛ “eeeshi emɔ̃ɔ lɛŋ buui lɛ yɛ ŋshɔi lɛ kɛ gɔŋ krɔŋkrɔŋ ni yɔɔ fɛo lɛ teŋ.” Yɛ Daniel be lɛ mli lɛ, ŋshɔi lɛ ji Mediterranea, ni gɔŋ krɔŋkrɔŋ lɛ ji Zion, he ni be ko lɛ Nyɔŋmɔ sɔlemɔtsu lɛ ma lɛ. No hewɔ lɛ, yɛ gbalɛ lɛ mlibaa mli lɛ, kooyigbɛ maŋtsɛ lɛ ni mli efu lɛ fãa ta eshiɔ Nyɔŋmɔ webii lɛ. Yɛ mumɔŋ shishinumɔ naa lɛ, he ni ji “ŋshɔi lɛ kɛ gɔŋ krɔŋkrɔŋ” lɛ teŋ lɛ damɔ shi kɛha Yehowa tsuji ni afɔ amɛ mu lɛ amumɔŋ shihilɛhe lɛ. Amɛ́fa kpo kɛjɛ “ŋshɔ” ni ji adesai ni etsi amɛhe kɛjɛ Nyɔŋmɔ he lɛ mli, ni amɛyɛ hiɛnɔkamɔ akɛ amɛkɛ Yesu Kristo baaye maŋtsɛ yɛ ŋwɛi Zion Gɔŋ lɛ nɔ.​—Yesaia 57:20; Hebribii 12:22; Kpojiemɔ 14:1.

26. Taakɛ Ezekiel gbalɛ lɛ tsɔɔ lɛ, saji ni jɛ “kooyigbɛ tɔ̃ɔ” lɛ baanyɛ afee nɔ ni jɛ nɛgbɛ?

²⁶ Ezekiel, ni kɛ Daniel hi shi yɛ be kome mli lɛ hu gba yɛ tutuamɔ ni akɛbaaba Nyɔŋmɔ webii anɔ yɛ “naagbee gbii lɛ amli” lɛ he. Ekɛɛ akɛ Gog ni jɛ Magog, ni ji Satan Abonsam lɛ baatee béi ashi. (Ezekiel 38:​14, 16) Nɛgbɛ Gog baa kɛjɛɔ yɛ okadi gbɛ nɔ? Yehowa tsɔ Ezekiel nɔ ekɛɛ akɛ ebaa kɛjɛɔ “kooyigbɛ tɔ̃ɔ.” (Ezekiel 38:15) Bɔ fɛɛ bɔ ni tutuamɔ ni ehiii kwraa nɛɛ naa wa ha lɛ, ekpataŋ Yehowa webii ahiɛ. Nɔ ni baajɛ nifeemɔ ni ehiii nɛɛ mli aba lɛ baaha Yehowa akanya ehe yɛ ŋaa nifeemɔ mli koni ekɛkpata Gog tai lɛ ahiɛ. No hewɔ lɛ, Yehowa kɛɔ Satan akɛ: “Mikɛ kpoji aaatsɛrɛ okadaai amli, ni magbalao kɛaaje kpo.” “Maha ojɛ kooyigbɛ tɔ̃ɔ ofã kɛba, ni maha oba Israel gɔji lɛ anɔ.” (Ezekiel 38:4; 39:2) No hewɔ lɛ, saji ‘ni jɛ kooyigbɛ’ ni baawo kooyigbɛ maŋtsɛ lɛ mlifu lɛ baanyɛ afee nɔ ni jɛ Yehowa ŋɔɔ. Nyɔŋmɔ pɛ baatsɔɔ nɔ ni saji “ni jɛ bokagbɛ kɛ kooyigbɛ” lɛ baaji yɛ naagbee, ni be baatsɔɔ.

27. (a) Mɛni hewɔ Gog baatsirɛ jeŋmaji lɛ ni kooyigbɛ maŋtsɛ lɛ fata he lɛ ayisɛɛ koni amɛtutua Yehowa webii lɛ? (b) Mɛni baajɛ Gog tutuamɔ lɛ mli aba?

²⁷ Yɛ Gog gbɛfaŋ lɛ, etoɔ enaagbee tutuamɔ ni mli wa fe fɛɛ lɛ he gbɛjianɔ yɛ “Nyɔŋmɔ Israel lɛ” kɛ “asafo babaoo” lɛ ni ji “tooi krokomɛi” lɛ ni jeee eje lɛ fã dɔŋŋ lɛ shweremɔ lɛ hewɔ. (Galatabii 6:​16; Kpojiemɔ 7:9; Yohane 10:16; 17:​15, 16; 1 Yohane 5:​19) Gog kɛ heguɔgbee hiŋmɛi kwɛɔ “maŋ ni abua naa kɛjɛ jeŋmaji lɛ amli, ni amɛná [mumɔŋ] kooloi kɛ nibii pii” lɛ. (Ezekiel 38:12) Akɛni eena Kristofoi amumɔŋ shihilɛhe lɛ ni tamɔ “shikpɔŋ ni naa kã” ni abaanyɛ aye amɛnɔ kunim yɛ gbɛ ni waaa nɔ hewɔ lɛ, Gog bɔɔ mɔdɛŋ ni fe fɛɛ koni ekpata gbɛtsii nii ni haaa eye adesai fɛɛ nɔ nɛɛ hiɛ. Shi eyeee omanye. (Ezekiel 38:​11, 18; 39:4) Kɛji akɛ shikpɔŋ lɛ nɔ maŋtsɛmɛi, ni kooyigbɛ maŋtsɛ lɛ fata he lɛ tutua Yehowa webii lɛ, ‘amɛ fɛɛ amɛbaaba amɛ naagbee.’

‘MAŊTSƐ LƐ BAABA ENAAGBEE’

28. Mɛni wɔle yɛ kooyigbɛ maŋtsɛ lɛ kɛ wuoyigbɛ maŋtsɛ lɛ awɔsɛɛ be he?

²⁸ Kooyigbɛ maŋtsɛ lɛ naagbee tafãa lɛ jeee nɔ ni ekɛtutuaa wuoyigbɛ maŋtsɛ lɛ. No hewɔ lɛ, kooyigbɛ maŋtsɛ lɛ baaa enaagbee yɛ ebienyɛ kpeteŋkpele lɛ dɛŋ. Nakai nɔŋŋ hu kooyigbɛ maŋtsɛ lɛ kpataaa wuoyigbɛ maŋtsɛ lɛ hiɛ. Nyɔŋmɔ Maŋtsɛyelia lɛ kpataa wuoyigbɛ maŋtsɛ lɛ hiɛ, “ni jeee kɛ [adesa] nine.” (Daniel 8:25) Yɛ anɔkwale mli lɛ, Nyɔŋmɔ Maŋtsɛyeli lɛ baajie shikpɔŋ nɔ maŋtsɛmɛi fɛɛ kɛya, yɛ Harmagedon ta lɛ mli, ni eyɛ faŋŋ akɛ enɛ ji nɔ ni baa kooyigbɛ maŋtsɛ lɛ nɔ. (Daniel 2:44) Daniel 11:​44, 45 tsɔɔ saji ni baa ni yagbeɔ naa yɛ nakai naagbee ta lɛ mli lɛ mli. Ebɛ naakpɛɛ akɛ “mɔ ko bɛ ni aaaye abua” beni kooyigbɛ maŋtsɛ lɛ baa enaagbee lɛ!

[Shishigbɛ niŋmai]

MƐNI OYƆSE?

• Yɛ mɛɛ gbɛ nɔ mɔ ni kooyigbɛ maŋtsɛ lɛ ji lɛ tsake yɛ jeŋ ta ni ji enyɔ lɛ sɛɛ?

• Yɛ naagbee lɛ, mɛni baaba kooyigbɛ maŋtsɛ lɛ kɛ wuoyigbɛ maŋtsɛ lɛ nɔ?

• Daniel gbalɛ ni kɔɔ akaŋshii ni kã maŋtsɛmɛi enyɔ lɛ ateŋ lɛ he lɛ toi ni obo lɛ he eba sɛɛnamɔ kɛha bo yɛ mɛɛ gbɛ nɔ?

[Akrabatsa/Mfoniri ni yɔɔ baafa 284]

MAŊTSƐMƐI NI YƆƆ DANIEL YITSO 11

Daniel 11:5 Seleucus I Nicator Ptolemy I

Daniel 11:7-9 Seleucus II Ptolemy III

Daniel 11:10-12 Antiochus III Ptolemy IV

Daniel 11:13-19 Antiochus III Ptolemy V

Daniel 11:21-24 Tiberio

[Shishigbɛ niŋmaa]

[Baafa muu mfoniri ni yɔɔ baafa 271]

[Mfonirii ni yɔɔ baafa 279]

“Nɔ ni fata wuoyigbɛ maŋtsɛ lɛ ‘shimɔ’ lɛ he ji tsɔnei ahe nilee ni akɛleɔ maji krokomɛi ateemɔŋ saji kɛ tawuu mli nifeemɔi