Maŋtsɛ Ko Bule Yehowa He Krɔŋkrɔŋ Lɛ

“Maŋ ni le amɛ-Nyɔŋmɔ lɛ, amɛhe aaawa.”​—DANIEL 11:⁠32.

 1, 2. Mɛɛ béi ko ni sa kadimɔ etee nɔ aahu yɛ adesai ayinɔsane mli fe afii 2,000?

MAŊTSƐMƐI mpleshilɔi enyɔ kɛ amɛhe miishi akaŋ kɛ amɛnyɛmɔ fɛɛ kɛha nɔyeli hegbɛ namɔ. Klɛŋklɛŋ lɛ mɔ kome, no sɛɛ lɛ mɔ kroko lɛ hu ná hewalɛ lɛ, ni nɛkɛ ta ni amɛwuɔ nɛɛ etee nɔ aahu fe afii akpei enyɔ. Nɛkɛ mpleshii nɛɛ esa mɛi pii ahe yɛ shikpɔŋ nɔ yɛ wɔgbii nɛɛ amli, ni eka emuuyeli mli ni Nyɔŋmɔ webii hiɛ lɛ hu ekwɛ. Ebaaba naagbee kɛ nifeemɔ ko ni hewalɛi enyɔ lɛ leee he nɔ ko kwraa. Ajie nɛkɛ yinɔsane ni atsɔ hiɛ akɛha nɛɛ kpo atsɔɔ blema gbalɔ Daniel.​—Daniel, yitsei 10 kɛyashi 12.

² Gbalɛ lɛ kɔɔ nyɛɛ ni yaa nɔ yɛ kooyigbɛ maŋtsɛ lɛ kɛ wuoyigbɛ maŋtsɛ lɛ teŋ, ni atsɔɔ mli fitsofitso yɛ “Your Will Be Done on Earth”a wolo lɛ mli lɛ he. Atsɔɔ yɛ nakai wolo lɛ mli akɛ kɛjɛ shishijee lɛ, kooyigbɛ maŋtsɛ lɛ ji Siria, yɛ Israel kooyigbɛ. Yɛ sɛɛ mli lɛ, Roma bahe nakai hegbɛ lɛ. Kɛjɛ shishijee lɛ, wuoyigbɛ maŋtsɛ lɛ ji Mizraim.

Nɔmɔ ko yɛ Naagbee Be lɛ Mli

 3. Taakɛ bɔfo lɛ tsɔɔ lɛ, mɛɛ be abaanu gbalɛ ni kɔɔ kooyigbɛ maŋtsɛ lɛ kɛ wuoyigbɛ maŋtsɛ lɛ he lɛ shishi, ni yɛ mɛɛ gbɛ nɔ?

³ Bɔfo ni jie nibii nɛɛ kpo etsɔɔ Daniel lɛ kɛɛ: “Shi bo, Daniel lɛ, tsiimɔ wiemɔi nɛɛ anɔ, ni osɔo wolo nɛɛ naa kɛyashi naagbee be lɛ; mɛi pii aaakane fitsofitso, ni nilee aaafa.” (Daniel 12:⁠4) Hɛɛ, gbalɛ lɛ kɔɔ naagbee be lɛ he​—be ni je shishi yɛ 1914 lɛ. Mɛi pii ‘aaakane Ŋmalɛ Krɔŋkrɔŋ lɛ fitsofitso’ yɛ nakai be ni akadi lɛ lɛ mli, ni kɛtsɔ mumɔ krɔŋkrɔŋ lɛ yelikɛbuamɔ nɔ lɛ, anɔkwa nilee, ní Biblia mli gbalɛi ashishinumɔ hu fata he lɛ baafa babaoo. (Abɛi 4:18) Beni wɔboteɔ nakai be lɛ mli vii lolo lɛ, agbala Daniel gbalɛi lɛ amli saji lɛ ateŋ babaoo mli fitsofitso. Belɛ, te esa akɛ wɔnu gbalɛ ni kɔɔ kooyigbɛ maŋtsɛ lɛ kɛ wuoyigbɛ maŋtsɛ lɛ he lɛ shishi wɔha tɛŋŋ yɛ 1993, ni ji afii 35 nɛ kɛjɛ be mli ni afee “Your Will Be Done on Earth” wolo lɛ?

 4, 5. (a) Nɛgbɛ anaa afi 1914 yɛ, yɛ Daniel gbalɛ ni kɔɔ kooyigbɛ maŋtsɛ lɛ kɛ wuoyigbɛ maŋtsɛ lɛ he lɛ mli? (b) Taakɛ bɔfo lɛ tsɔɔ lɛ, mɛni baaba yɛ afi 1914 mli?

⁴ Nɔ ni kadi naagbee be lɛ shishijee yɛ 1914 ji klɛŋklɛŋ jeŋ ta lɛ kɛ jeŋ haomɔi krokomɛi ni Yesu gba efɔ shi lɛ. (Mateo 24:​3, 7, 8) Ani wɔbaanyɛ wɔna nakai afi lɛ yɛ Daniel gbalɛ lɛ mli? Hɛɛ. Naagbee be lɛ shishijee ji “be ni ato,” ni awie he yɛ Daniel 11:29 lɛ. (Kwɛmɔ “Your Will Be Done on Earth,” baafai 269-70.) Eji be ko ni Yehowa eto momo yɛ Daniel gbii lɛ amli tɔ̃ɔ, ejaakɛ be lɛ shɛ yɛ afii 2,520 ni atsɔɔ yɛ nibii ní baaba ni he hiaa yɛ gbalɛ mli yɛ Daniel yitso 4 lɛ mli lɛ naagbee.

⁵ Atsɛɔ nakai afii 2,520, ni je shishi kɛjɛ Yerusalem hiɛkpatamɔ lɛ mli yɛ afi 607 D.Ŋ.B. yɛ Daniel obalahiaŋ, aahu kɛbashi 1914 Ŋ.B. lɛ akɛ “jeŋmaji abe lɛ.” (Luka 21:24) Mɛɛ maŋkwramɔŋ nifeemɔi baakadi enaagbee? Ŋwɛibɔfo ko jie enɛ kpo etsɔɔ Daniel. Bɔfo lɛ kɛɛ: “Be ni ato lɛ mli lɛ [kooyigbɛ maŋtsɛ lɛ aaaku] esɛɛ kɛaaba wuoyigbɛ ekoŋŋ, shi sɛɛkpee nɔ lɛ tamɔŋ tsutsu nɔ lɛ.”​—Daniel 11:⁠29.

Aye Maŋtsɛ lɛ Nɔ yɛ Ta ko Mli

 6. Yɛ 1914 mli lɛ, namɔ ji kooyigbɛ maŋtsɛ lɛ, ni namɔ ji wuoyigbɛ maŋtsɛ lɛ?

⁶ Beni shɛɔ 1914 lɛ, no mli lɛ Germany, ni hiɛnyiɛlɔ ji Kaiser Wilhelm lɛ eŋɔ kooyigbɛ maŋtsɛ lɛ gbɛhe lɛ. (“Kaiser,” jɛ Roma gbɛi sabla “Kaisare” mli.) Ta ni fɛ yɛ Europa lɛ ji mpleshii ni tee nɔ yɛ kooyigbɛ maŋtsɛ lɛ kɛ wuoyigbɛ maŋtsɛ lɛ teŋ lɛ mli ekome kɛkɛ. Nakai beaŋ lɛ Britania eŋɔ sɛɛkpee mɔ, ni ji wuoyigbɛ maŋtsɛ lɛ gbɛhe lɛ, ni eye Mizraim, ni ji shishijee wuoyigbɛ maŋtsɛ lɛ maŋtsɛyeli he lɛ nɔ oya. Beni ta lɛ yaa nɔ lɛ, Britania tsutsu shihemɔ maŋ, ni ji United States, Amerika bafata ehe. Wuoyi gbɛ maŋtsɛ lɛ batsɔ Anglo-Amerika Jeŋ Hewalɛ lɛ, jeŋ hewalɛ ni he wa fe fɛɛ yɛ yinɔsane mli.

 7, 8. (a) Nibii tamɔɔɔ “tsutsu lɛ” yɛ klɛŋklɛŋ jeŋ ta lɛ mli yɛ mɛɛ gbɛ nɔ? (b) Mɛni jɛ klɛŋklɛŋ jeŋ ta lɛ mli ba, shi taakɛ gbalɛ lɛ tsɔɔ lɛ, te kooyigbɛ maŋtsɛ lɛ fee enii yɛ he eha tɛŋŋ?

⁷ Akɛ kooyigbɛ maŋtsɛ lɛ, Roma Maŋtsɛyeli lɛ etee nɔ eye kunim aahu, yɛ tsutsu mpleshii ni eba maŋtsɛmɛi enyɔ lɛ ateŋ lɛ mli. Amrɔ nɛɛ, ‘nibii tamɔɔɔ bɔ ni amɛji tsutsu lɛ dɔŋŋ.’ Mɛni hewɔ? Ejaakɛ aye kooyigbɛ maŋtsɛ lɛ nɔ kunim yɛ ta lɛ mli. Yiŋtoo kome hewɔ ji akɛ “Kitim lɛji” lɛ batutua kooyigbɛ maŋtsɛ lɛ. (Daniel 11:30) Mɛni ji nɛkɛ lɛji nɛɛ? Yɛ Daniel beaŋ lɛ, Kitim ji Kipro, ni mra mli yɛ klɛŋklɛŋ jeŋ ta lɛ mli lɛ, Britania ye Kipro nɔ kunim. Kɛfata he lɛ, taakɛ The Zondervan Pictorial Encyclopedia of the Bible lɛ tsɔɔ lɛ, gbɛi Kitim lɛ “mli lɛɛɔ kɛyashɛɔ Anaigbɛ bii fɛɛ nɔ, shi titri lɛ Anaigbɛ bii ni ji lɛjiatsɛmɛi lɛ.” New International Version tsɔɔ wiemɔ “Kitim lɛji” lɛ shishi akɛ “anaigbɛ ŋshɔnaa maji lɛ alɛji lɛ.” Yɛ klɛŋklɛŋ jeŋ ta lɛ mli lɛ, Kitim lɛji lɛ bafee Britania lɛji ni mamɔ shi yɛ Europa anaigbɛ ŋshɔ lɛ naa lɛ. Yɛ sɛɛ mli lɛ, lɛji ni jɛ Amerika Kooyigbɛ anaigbɛ shikpɔŋ wulu lɛ nɔ lɛ bawo Britania Ta Lɛji Akuu lɛ hewalɛ.

⁸ Kooyigbɛ maŋtsɛ lɛ ‘tsui fã’ yɛ tutuamɔ nɛɛ mli, ni ekpɛlɛ nɔ akɛ aye enɔ kunim yɛ 1918. Shi jeee enaagbee ji no. “Eeeku esɛɛ, ni emli aaawo la yɛ kpaŋmɔ krɔŋkrɔŋ lɛ hewɔ; ni eeefee; ni eeeku esɛɛ ni eeetao mɛi ni kwaa kpaŋmɔ krɔŋkrɔŋ lɛ asɛɛ gbɛ.” (Daniel 11:30) Nakai ji bɔ ni ŋwɛibɔfo lɛ gba efɔ shi, ni nakai pɛpɛɛpɛ eba mli hu.

Maŋtsɛ lɛ Fee Nii Kɛmɔ Shi

 9. Mɛni ha Adolf Hitler ba hewalɛ mli lɛ, ni ‘efee nii kɛmɔ shi’ yɛ mɛɛ gbɛ nɔ?

⁹ Yɛ ta lɛ sɛɛ, yɛ 1918 lɛ, Maji ni Efee Ekome, ni ye kunim lɛ nyɛ Germany nɔ amɛwo toigbalamɔ he toiŋjɔlɛ kpaŋmɔ ko mli, eka shi faŋŋ akɛ amɛfee enɛ koni amɛkɛha hɔmɔ aye Germanbii kɛbɛŋkɛ gbele po he yɛ be kakadaŋŋ mli. Nɔ ni jɛ mli ba ji akɛ, beni amɛdidaa aahu afii abɔ yɛ haomɔ ni naa wa mli sɛɛ lɛ, Germany bafee klalo kɛha Adolf Hitler hewalɛ mli baa. Ebana hewalɛ ni fe fɛɛ yɛ afi 1933 mli, ni ekɛ tutuamɔ ni naa wa wa te shi ewo “kpaŋmɔ krɔŋkrɔŋ lɛ,” ni Yesu Kristo nyɛmimɛi ni afɔ amɛ mu lɛ damɔ shi kɛha lɛ lɛ. Yɛ enɛ mli lɛ, ete shi eshi nɛkɛ anɔkwa Kristofoi nɛɛ waa, ni ekɛ yitsoŋwalɛ wa amɛteŋ mɛi babaoo yi.

10. Namɛi Hitler kɛfee kpaŋmɔ beni etaoɔ sɛɛfimɔ lɛ, ni mɛni jɛ mli ba?

¹⁰ Hitler ye omanye yɛ shika gbɛfaŋ saji kɛ maŋ kɛ maŋ teŋ sharamɔ mli, ni etsu nii kɛmɔ shi yɛ enɛ hu mli. Afii fioo mli lɛ, eha Germany batsɔ nɔyeli hewalɛ ni abuɔ waa, ni mɛi ni ye amɛbua lɛ yɛ enɛ mli ji “mɛi ni kwaa kpaŋmɔ krɔŋkrɔŋ lɛ.” Namɛi ji mɛi nɛɛ? Eka shi faŋŋ akɛ, Kristendom hiɛnyiɛlɔi lɛ, mɛi ni kɛɔ akɛ amɛkɛ Nyɔŋmɔ yɛ kpaŋmɔ wekukpaa ko mli, shi be babaoo nɛ ni amɛjeee Yesu Kristo kaselɔi dɔŋŋ lɛ. Hitler tee eyatao “mɛi ni kwaa kpaŋmɔ krɔŋkrɔŋ lɛ” asɛɛfimɔ, ni eye omanye hu. Paapa ni yɔɔ Roma lɛ kɛ lɛ fee kpaŋmɔ ko, ni Roma Katolik Sɔlemɔ lɛ, kɛ Protestant sɔlemɔi ni yɔɔ Germany lɛ hu fɛɛ fi Hitler sɛɛ yɛ e-afii 12 yiwalɛ nɔyeli be lɛ fɛɛ mli.

11. Kooyigbɛ maŋtsɛ lɛ “bule mɔɔ ni ji he krɔŋkrɔŋ lɛ” ni ejie “daa gbi afɔle lɛ” yɛ mɛɛ gbɛ nɔ?

¹¹ Hitler ye omanye aahu akɛ no ha ewuu ta, taakɛ bɔfo lɛ gba efɔ shi yɛ gbɛ ni ja nɔ lɛ. “Ni tai aaajɛ eŋɔɔ adamɔ shi, ni amɛaabule mɔɔ ni ji he krɔŋkrɔŋ lɛ, ni amɛaajie daa gbi afɔle lɛ.” (Daniel 11:31a) Yɛ blema Israel lɛ, he krɔŋkrɔŋ lɛ feɔ sɔlemɔ tsu ni yɔɔ Yerusalem lɛ fã. Shi, beni Yudafoi lɛ kpoo Yesu lɛ, Yehowa hu kpoo amɛ kɛ amɛsɔlemɔ tsu lɛ. (Mateo 23:​37–24:⁠2) Kɛjɛ klɛŋklɛŋ afii oha lɛ mli kɛbaa nɛɛ, Yehowa sɔlemɔ tsu lɛ ehi shi diɛŋtsɛ akɛ mumɔŋ nɔ, kɛ ehe krɔŋkrɔŋ fe fɛɛ lɛ yɛ ŋwɛi, kɛ emumɔŋ kpo nɔ yɛ shikpɔŋ lɛ nɔ, he ni Yesu, mɔ ni ji Osɔfo Nukpa lɛ nyɛmimɛi ni afɔ amɛ mu lɛ sɔmɔɔ yɛ lɛ. Kɛjɛ 1930 afi lɛ amli kɛbaa nɛɛ, asafo babaoo lɛ efata shwɛɛnii ni afɔ amɛ mu lɛ ahe kɛfee ekome yɛ jamɔ mli; no hewɔ lɛ, awieɔ akɛ amɛmiisɔmɔ ‘yɛ Nyɔŋmɔ sɔlemɔ we lɛ.’ (Kpojiemɔ 7: 9, 15; 11:​1, 2; Hebribii 9:​11, 12, 24) Abule sɔlemɔ we lɛ shikpɔŋ nɔ kpo lɛ nɔ kɛtsɔ yiwaa ni naa wa waa ni akɛba shwɛɛnii ni afɔ amɛ mu lɛ kɛ amɛhefatalɔi lɛ anɔ yɛ shikpɔji ni kooyigbɛ maŋtsɛ lɛ yeɔ nɔ lɛ nɔ. Yiwaa lɛ naa wa aahu akɛ eha daa gbi afɔle​—ni ji afɔle ni ashaa yɛ maŋ akɛjieɔ Yehowa gbɛi lɛ yi lɛ​—sɛɛ fo kwraa. (Hebribii 13:15) Shi kɛlɛ, yinɔsane tsɔɔ akɛ yɛ amanehulu ni naa wa waa nɛɛ fɛɛ sɛɛ lɛ, Kristofoi anɔkwafoi ni afɔ amɛ mu lɛ, kɛ “tooi krokomɛi” lɛ tee nɔ amɛshiɛ aahu yɛ teemɔŋ.​—Yohane 10:⁠16.

“Nihiinii Lɛ”

12, 13 Mɛni ji “nihiinii lɛ,” ni​—taakɛ tsulɔ anɔkwafo kɛ nilelɔ lɛ tsɔ hiɛ ena lɛ​—mɛɛ be, ni yɛ mɛɛ gbɛ nɔ asaa akɛbama shi ekoŋŋ?

¹² Beni eshwɛ fioo ni jeŋ ta ni ji enyɔ lɛ baaba naagbee lɛ, nɔ kroko hu ba. “Ni amɛkɛ amaŋfɔ feemɔ nihiinii lɛ aaama shi.” (Daniel 11:31b) Abana ale nɛkɛ “nihiinii,” ni Yesu hu tsĩ tã nɛɛ momo akɛ Jeŋmaji Akpaŋmɔ lɛ, ni ji kooloo ni tsuɔ tamɔ muneele, ni tee bu kwɔŋkwɔŋ lɛ mli, taakɛ Kpojiemɔ wolo lɛ tsɔɔ lɛ. (Mateo 24:​15; Kpojiemɔ 17:8; kwɛmɔ Light, Book Two, baafa 94.) Enɛ ba enɔ beni Jeŋ Ta II fɛ lɛ. Shi, Nathan H. Knorr, ni ji Buu Mɔɔ Biblia kɛ Woji Bibii Asafo lɛ sɛinɔtalɔ ni ji etɛ lɛ wie gbalɛ ni yɔɔ Kpojiemɔ 17 lɛ he ni ebɔ kɔkɔ yɛ Jeŋ Hee Teokrase Kpee ni Yehowa Odasefoi fee yɛ 1942 mli lɛ shishi akɛ kooloo lɛ baaje kpo ekoŋŋ kɛjɛ bu kwɔŋkwɔŋ lɛ mli.

¹³ Yinɔsane ye anɔkwale ni ewiemɔi lɛ ji lɛ he odase. Yɛ August kɛ October 1944 teŋ lɛ, aje nitsumɔ shishi yɛ Dumbarton Oaks yɛ United States, Amerika, yɛ nɔ ni abaatsɛ lɛ akɛ Jeŋmaji Ekomefeemɔ lɛ mla gbɛjianɔtoo lɛ he. Maji 51 kpɛlɛ nɛkɛ mla gbɛjianɔtoo nɛɛ nɔ, ni tsutsu Soviet Union fata he, ni beni akɛbɔi nitsumɔ yɛ October 24, 1945 lɛ, yɛ naagbee lɛ eha Jeŋmaji Akpaŋmɔ ni egu lɛ je kpo kɛjɛ bu kwɔŋkwɔŋ lɛ mli kɛba ekoŋŋ.

14. Mɛɛ be, ni yɛ mɛɛ gbɛ nɔ mɔ ni ji kooyigbɛ maŋtsɛ lɛ tsake ekoŋŋ?

¹⁴ Germany hi shi akɛ wuoyigbɛ maŋtsɛ lɛ henyɛlɔ kpele fe fɛɛ yɛ tai enyɔ lɛ fɛɛ mli. Yɛ Jeŋ Ta II sɛɛ lɛ, Germany fã yafata fã kroko lɛ he ni ebatsɔ wuoyigbɛ maŋtsɛ lɛ hefatalɔ. Shi Germany fã kroko lɛ batsɔ jeŋ hewalɛ kpele kroko hu hefatalɔ. Komunist kuu, ni amrɔ nɛɛ Germany fã fata he lɛ, te shi waa amɛshi Anglo-Amerika ekomefeemɔ lɛ, ni mpleshii ni ka maŋtsɛmɛi enyɔ lɛ ateŋ lɛ batsɔ Béi ni Tawuu Bɛ Mli.​—Kwɛmɔ “Your Will Be Done on Earth,” baafai 264-84.

Maŋtsɛ lɛ kɛ Kpaŋmɔ Lɛ

15. Namɛi ji ‘mɛi ni feɔ efɔŋ amɛshiɔ kpaŋmɔ lɛ,’ ni mɛɛ wekukpaa mli amɛkɛ kooyigbɛ maŋtsɛ lɛ ehi.

¹⁵ Agbɛnɛ bɔfo lɛ wie akɛ: “Ni mɛi ni feɔ efɔŋ amɛshiɔ kpaŋmɔ lɛ, ekɛ naadɔkɔmɔ aaaha amɛya sɛɛsɛɛ.” (Daniel 11:32a) Namɛi ji nɛkɛ mɛi ni feɔ efɔŋ amɛshiɔ kpaŋmɔ nɛɛ? Shikome ekoŋŋ lɛ, amɛbaanyɛ amɛfee Kristendom hiɛnyiɛlɔi lɛ pɛ, mɛi ni tsɛɔ amɛhe Kristofoi, shi amɛkɛ amɛnifeemɔi gbeɔ gbɛi Kristojamɔ lɛ diɛŋtsɛ he guɔ lɛ. Yɛ jeŋ ta ni ji enyɔ lɛ mli lɛ, “Soviet Nɔyeli lɛ bɔ mɔdɛŋ akɛ eeetao Sɔlemɔi lɛ ayelikɛbuamɔ kɛtsɔ heloonaa nibii kɛ sɛɛfimɔ nɔ kɛha jakumaŋ lɛ hefamɔ.” (Religions in the Soviet Union, ni Walter Kolarz ŋma lɛ) Yɛ ta lɛ sɛɛ lɛ, sɔlemɔ lɛ hiɛnyiɛlɔi lɛ bɔ mɔdɛŋ akɛ amɛaahiɛ nakai naanyobɔɔ lɛ mli, yɛ wiemɔ ni nakai hewalɛ ni ebatsɔ kooyigbɛ maŋtsɛ lɛ wieɔ akɛ Nyɔŋmɔ bɛ lɛ fɛɛ sɛɛ.b Enɛ hewɔ lɛ, Kristendom batsɔ je nɛɛ fã waa fe bei fɛɛ ni eho​—hemɔkɛyeli kwamɔ ni yɔɔ nyaŋemɔ yɛ Yehowa hiɛ.​—Yohane 17:​14; Yakobo 4:⁠4.

16, 17. Namɛi ji “mɛi ni le nii” lɛ, ni mɛni ba amɛnɔ yɛ kooyigbɛ maŋtsɛ lɛ shishi?

¹⁶ Shi, anɔkwa Kristofoi hu? “Maŋ ni le amɛ-Nyɔŋmɔ lɛ amɛhe aaawa, ni amɛaafee. Ní mɛi ni le nii yɛ maŋ lɛŋ lɛ aaatsɔɔ mɛi pii anii; shi amɛaanyɔnyɔi yɛ klante kɛ lalilɛi kɛ nomŋɔɔ kɛ nihaa naa gbii abɔ.” (Daniel 11:32b, 33) Eyɛ mli akɛ Kristofoi ni yɔɔ kooyigbɛ maŋtsɛ lɛ shishi lɛ ‘baa amɛhe shi amɛhaa hegbɛi ni yeɔ nɔ lɛ’ yɛ gbɛ kpakpa nɔ moŋ, shi amɛtsɔko je nɛɛ fã. (Romabii 13:1; Yohane 18:36) Akɛni amɛkwɛɔ jogbaŋŋ koni amɛkɛ Kaisare nii aha Kaisare hewɔ lɛ, amɛkɛ ‘Nyɔŋmɔ nii hu haa Nyɔŋmɔ.’ (Mateo 22:21) Yɛ enɛ hewɔ lɛ, aka amɛ emuuyeli mlihiɛmɔ akwɛ.​—2 Timoteo 3:⁠12.

¹⁷ Mɛni jɛ mli ba? ‘Amɛhe wa’ ni ‘amɛnyɔnyɔi’ hu. Amɛnyɔnyɔi kɛ shishinumɔ akɛ awa amɛ yi ni amɛna amanehulu babaoo, ni agbe amɛteŋ mɛi komɛi po. Shi amɛhe wa hu, ejaakɛ amɛteŋ mɛi babaoo tee nɔ amɛye anɔkwa. Hɛɛ, amɛye je lɛ nɔ kunim, taakɛ Yesu hu ye je lɛ nɔ kunim lɛ. (Yohane 16:33) Kɛfata he lɛ, amɛkpaaa shiɛmɔ kɔkɔɔkɔ, kɛji ebalɛ akɛ amɛyaje tsuŋwoo mli aloo gbokɛlɛfoi aŋsara po mli. Yɛ nakai feemɔ mli lɛ, ‘amɛtsɔɔ mɛi pii anii.’ Yɛ yiwaa ni ba, yɛ maji pii ni kooyigbɛ maŋtsɛ lɛ yeɔ nɔ lɛ amli lɛ fɛɛ sɛɛ lɛ, Yehowa Odasefoi tee nɔ amɛyi fa babaoo. Ni kɛtsɔ “mɛi ni le nii” lɛ anɔkwayeli nɔ lɛ, “asafo babaoo” lɛ fã ko ni miiya nɔ eefa daa nɛɛ epue yɛ nakai shikpɔji lɛ anɔ.​—Kpojiemɔ 7:​9-14.

18. Mɛɛ ‘yelikɛbuamɔ fioo’ shwɛɛnii ni afɔ amɛ mu ni yɔɔ kooyigbɛ maŋtsɛ lɛ shishi lɛ anine eshɛ nɔ?

¹⁸ Beni ewieɔ yiwaa ni baaba Nyɔŋmɔ webii anɔ lɛ he lɛ, bɔfo lɛ gba efɔ shi akɛ: “Ni beni amɛaanyɔnyɔi lɛ, aaaye abua amɛ fioo.” (Daniel 11:34a) Mɛɛ gbɛ nɔ enɛ ba mli yɛ? Nɔ kome ji akɛ, nɔ ni jɛ kunim ni wuoyigbɛ maŋtsɛ lɛ ye yɛ jeŋ ta ni ji enyɔ lɛ mli ba ji heyeli kpele kɛha Kristofoi ni yɔɔ maŋtsɛ kroko ni ekɛshiɔ mple lɛ nɔyeli shishi lɛ. (Okɛto Kpojiemɔ 12:​15, 16 he.) No sɛɛ lɛ, mɛi ni kooyigbɛ maŋtsɛ ni nyiɛ sɛɛ lɛ wa amɛyi lɛ na heyeli fioo yɛ be kɛ bei amli, ni beni Béi ni Tawuu Bɛ Mli lɛ baa naagbee fiofio lɛ, maŋkwramɔŋ hiɛnyiɛlɔi pii bayoo akɛ anɔkwa Kristofoi jeee mɛi ni he yɔɔ gbeyei kwraa, ni no hewɔ lɛ amɛkpɛlɛ amɛnɔ yɛ mla naa.c Yelikɛbuamɔ babaoo hu eba, kɛtsɔ asafo babaoo ni yaa nɔ amɛyi faa lɛ nɔ, mɛi ni ekpɛlɛ mɛi ni afɔ amɛ mu lɛ ashiɛmɔ yɛ anɔkwayeli mli lɛ nɔ ni amɛye amɛbua amɛ, taakɛ atsɔɔ yɛ Mateo 25:​34-40 lɛ.

Hetsuumɔ ko Kɛha Nyɔŋmɔ Webii

19. (a) Mɛi komɛi kɛ ‘amɛhe bakpɛtɛ amɛhe kɛ naadɔkɔmɔ’ yɛ mɛɛ gbɛ nɔ? (b) Mɛni ji nɔ ni wiemɔ “kɛyashi naagbee be lɛ mli” lɛ tsɔɔ? (Kwɛmɔ shishigbɛ niŋmaa lɛ.)

¹⁹ Jeee mɛi fɛɛ ni jie miishɛɛ kpo yɛ Nyɔŋmɔ sɔɔmɔ he yɛ nɛkɛ be nɛɛ mli lɛ hiɛ jwɛŋmɔ kpakpa. Bɔfo lɛ bɔ kɔkɔ akɛ: “Mɛi pii kɛ amɛhe aaakpɛtɛ amɛhe kɛ naadɔkɔmɔ. Ni mɛi ni le nii lɛ ateŋ mɛi komɛi hu aaanyɔnyɔi, koni akɛka amɛ akwɛ ni akɛtsuu amɛhe, ni aha amɛyɛ futafuta kɛyashi naagbee be lɛ mli; ejaakɛ ja be ni ato lɛ eshɛ dani eeeba mli.”d (Daniel 11:34b, 35) Mɛi komɛi ná anɔkwale lɛ he miishɛɛ, shi amɛsumɔɔɔ ni amɛkɛ anɔkwayeli jɔɔ amɛhe nɔ akɛ amɛaasɔmɔ Nyɔŋmɔ. Mɛi krokomɛi hu fee tamɔ mɛi ni ekpɛlɛ sanekpakpa lɛ nɔ, shi shikpálɔi ji amɛ kɛha nɔyeli lɛ. Amaniɛbɔɔ ko ni jɛ shikpɔŋ ko nɔ lɛ kaneɔ akɛ: “Nɛkɛ gbɔmɛi ni yeee anɔkwa nɛɛ ateŋ mɛi komɛi ji Komunistbii ni ale amɛ waa, ni ju shi kɛbabote Nuŋtsɔ lɛ asafo lɛ mli, ni amɛjie ekaa babaoo kpo, ni ahala amɛ awo sɔɔmɔ gbɛhei ni nɔ kwɔlɔ po mli.”

20. Mɛni hewɔ Yehowa ŋmɛ gbɛ ni Kristofoi anɔkwafoi lɛ ekomɛi ‘nyɔnyɔi’ yɛ osatofoi ni ju shi amɛbabote mli lɛ ahewɔ lɛ?

²⁰ Mɛi ni ju shi kɛbabote mli nɛɛ ha anɔkwafoi lɛ ekomɛi yagbee nɔyelɔi lɛ adɛŋ. Mɛni hewɔ Yehowa ŋmɛ gbɛ ni nibii ni tamɔ nɛkɛ ba lɛ? Kɛha hetsuumɔ, krɔŋŋ-feemɔ. Taakɛ bɔ ni Yesu “kase toiboo yɛ amanehului ni ena lɛ amli” lɛ, nakai nɔŋŋ nɛkɛ susumai anɔkwafoi nɛɛ kase tsuishiŋmɛɛ kɛjɛ amɛhemɔkɛyeli he kaa lɛ mli. (Hebribii 5:8; Yakobo 1:​2, 3; okɛto Maleaki 3:3 he.) No hewɔ lɛ ‘atsuu amɛhe, amɛfee krɔŋŋ, ni amɛyɛ futaa.’ Mlifilimɔ kpele miimɛ nɛkɛ anɔkwafoi nɛɛ, yɛ be mli ni be ni ato lɛ baashɛ kɛha amɛtsuishiŋmɛɛ lɛ he nyɔmɔwoo lɛ. Wɔbaana enɛ yɛ be mli ni wɔsusuɔ Daniel gbalɛ lɛ he lolo lɛ.

[Shishigbɛ niŋmai]

Ani Okaiɔ?

◻ Mɛni hewɔ esa akɛ wɔkpa gbɛ ŋmɛnɛ akɛ wɔɔna Daniel gbalɛ lɛ he shishinumɔ ni mli ka shi faŋŋ lɛ?

◻ Kooyigbɛ maŋtsɛ lɛ ‘mli wo la ni efee nii kɛmɔ shi’ yɛ mɛɛ gbɛ nɔ?

◻ Te tsulɔ kuu lɛ tsɔ hiɛ amɛnu “nihiinii” lɛ puemɔ amɛha tɛŋŋ?

◻ Shwɛɛnii ni afɔ amɛ mu lɛ ‘nyɔnyɔi, amɛhe wa, ni amɛna yelikɛbuamɔ fioo’ yɛ mɛɛ gbɛ nɔ?

[Mfonirii ni yɔɔ baafa 15]

Kooyigbɛ maŋtsɛ lɛ bana hewalɛ ekoŋŋ kɛmɔ shi, yɛ Hitler shishi, yɛ enɔ kunim ni wuoyigbɛ maŋtsɛ lɛ ye yɛ 1918 lɛ mli

[Mfonirii ni yɔɔ baafa 16]

Kristendom hiɛnyiɛlɔi lɛ bɔ mɔdɛŋ akɛ amɛaana amɛkɛ kooyigbɛ maŋtsɛ lɛ teŋ wekukpaa ko

[He ni Sane lɛ Jɛ]

Zoran/Sipa Press