Mikael, Lumɔ Kpeteŋkpele Lɛ Naagbee Kunimyeli Lɛ
“Nakai be lɛ mli lɛ Mikael ni ji lumɔ kpeteŋkpele ni damɔ shi ha omaŋbii lɛ aaate shi adamɔ shi.”—DANIEL 12:1.
1. Mɛɛ su je lɛŋ nɔyelɔi ejie lɛ kpo yɛ Yehowa maŋtsɛyeli lɛ he, ni yɛ mɛɛ gbɛ nɔ esorooo kooyigbɛ maŋtsɛ lɛ yɛ enɛ gbɛfaŋ?
“NAMƆ ji Yehowa lɛ ni mabo egbee toi ni maha Israel aya?” (2 Mose 5:2) Enɛ ji Farao mpoatswaa wiemɔi ni ekɛ Mose wie lɛ. Akɛni esumɔɔɔ ni ekpɛlɛɔ Yehowa Nyɔŋmɔyeli ni nɔ kwɔ fe fɛɛ lɛ nɔ hewɔ lɛ, Farao tswa efai shi akɛ ebaatsi Israel naa yɛ nyɔŋyeli mli. Nɔyelɔi krokomɛi hu etsɔɔ bulɛ ni amɛbɛ kɛha Yehowa nakai nɔŋŋ, ni maŋtsɛmɛi ni yɔɔ Daniel gbalɛ lɛ mli lɛ hu fata he. (Yesaia 36:13-20) Lɛlɛŋ, kooyigbɛ maŋtsɛ lɛ efee babaoo po fe nakai. Bɔfo lɛ wie akɛ: “Eeewo ehe nɔ, ni eeefee ehe agbo fe nyɔŋmɔ fɛɛ nyɔŋmɔ, ni eeewie hepupuumɔ wiemɔi eshi nyɔŋmɔi a-Nyɔŋmɔ lɛ. . . . Ni asaŋ ebuŋ etsɛmɛi anyɔŋmɔi lɛ, ni ebuŋ yei asɛɛdii loo nyɔŋmɔ ko nyɔŋmɔ ko, shi eeewo ehe nɔ yɛ mɛi fɛɛ nɔ.”—Daniel 11:36, 37.
2, 3. Mɛɛ gbɛ nɔ kooyigbɛ maŋtsɛ lɛ kpoo “etsɛmɛi anyɔŋmɔi lɛ” ni ena “nyɔŋmɔ” kroko jamɔ he miishɛɛ yɛ?
2 Yɛ nɛkɛ gbalɛ wiemɔi nɛɛ amlibaa mli lɛ, kooyigbɛ maŋtsɛ lɛ kpoo “etsɛmɛi anyɔŋmɔi lɛ” (aloo, “blematsɛmɛi anyɔŋmɔi lɛ,” The New English Bible) ekɔɔɔ he eko akɛ amɛji Roma wɔŋjalɔi anyɔŋmɔi lɛ aloo Kristendom Triniti nyɔŋmɔ lɛ. Hitler kɛ Kristendom tsu eyiŋtoi ahe nii, shi anaa faŋŋ akɛ ekpɛ eyiŋ akɛ ekɛ German sɔlemɔ hee ko baaye enajiaŋ. Mɔ ni baye esɛɛ akɛ kooyigbɛ maŋtsɛ lɛ kɛ Nyɔŋmɔ mli hemɔkɛyeli ni abɛ bama shi. Enɛ hewɔ lɛ, kooyigbɛ maŋtsɛ lɛ fee ehe nyɔŋmɔ, ‘ni ewo ehe nɔ yɛ mɛi fɛɛ nɔ.’
3 Gbalɛ lɛ yaa nɔ akɛ: “Ni eeewo mɔji anyɔŋmɔ lɛ hiɛ nyam yɛ enajiaŋ, ni ekɛ shika kɛ jwiɛtɛi kɛ tɛi ni jara wa kɛ fɛo nibii aaawo nyɔŋmɔ ko ni etsɛmɛi lɛ leee hiɛ nyam.” (Daniel 11:38) Yɛ anɔkwale mli lɛ, kooyigbɛ maŋtsɛ lɛ kɛ ehiɛ fɔ ŋmɛnɛŋmɛnɛ beaŋ jeŋ nilee mli tawuu nibii, “mɔji anyɔŋmɔ lɛ” nɔ. Etao yiwalaheremɔ yɛ naagbee be lɛ mli fɛɛ kɛtsɔ nɛkɛ “nyɔŋmɔ” nɛɛ nɔ, ni ekɛ shika babaoo esha afɔle yɛ efɔleshaa latɛ lɛ nɔ.
4. Mɛɛ omanye ko kooyigbɛ maŋtsɛ lɛ eye?
4 “Ekɛ mɔji ní wa fe fɛɛ lɛ aaaye yɛ maŋsɛɛ nyɔŋmɔ ko yelikɛbuamɔ naa; mɔ fɛɛ mɔ ni buɔ lɛ lɛ, eeeha enunyam afa, ni eeeha eye mɛi pii anɔ, ni eeeja shikpɔŋ lɛ mli ekɛwo nyɔmɔ.” (Daniel 11:39) Akɛni ekɛ ehiɛ fɔɔ “maŋsɛɛ nyɔŋmɔ” ni ji etawuu nii anɔ hewɔ lɛ, kooyigbɛ maŋtsɛ lɛ ‘kɛ mɛi eye’ waa diɛŋtsɛ, ni ekɛtsɔɔ akɛ eji hewalɛ kpele yɛ tawuu nii agbɛfaŋ yɛ “naagbee gbii lɛ” amli. (2 Timoteo 3:1) Ekɛ maŋkwramɔ, shika gbɛfaŋ, kɛ bei komɛi po lɛ, tawuu nibii asɛɛfimɔ ewo mɛi ni fi esusumɔi asɛɛ lɛ nyɔmɔ.
“Naagbee Be lɛ Mli”
5, 6. Wuoyigbɛ maŋtsɛ lɛ ‘eshi’ yɛ mɛɛ gbɛ nɔ, ni mɛni kooyigbɛ maŋtsɛ lɛ efee yɛ enɛ he?
5 Daniel 11:40a kaneɔ akɛ: “Naagbee be lɛ mli lɛ wuoyigbɛ maŋtsɛ lɛ kɛ lɛ aaashi.” Abuɔ wiemɔ nɛɛ kɛ kukuji ni nyiɛ sɛɛ lɛ akɛ amɛbaana amɛmlibaa yɛ wɔ wɔsɛɛ be ko mli. Shi, kɛji wiemɔ ni ji “naagbee be lɛ” ni yɔɔ biɛ lɛ kɛ nɔ ni yɔɔ Daniel 12:4, 9 lɛ fɛɛ hiɛ shishinumɔ kome lɛ, no lɛ esa akɛ wɔkpa nɛkɛ wiemɔi nɛɛ amlibaa gbɛ yɛ naagbee gbii lɛ fɛɛ mli. Ani wuoyigbɛ maŋtsɛ lɛ ‘eshi’ kooyigbɛ maŋtsɛ lɛ yɛ nɛkɛ be nɛɛ mli? Hɛɛ, eshi lɛ. Yɛ klɛŋklɛŋ jeŋ ta lɛ sɛɛ lɛ, toiŋjɔlɛ kpaŋmɔ ni akɛgbala etoi lɛ bafee ‘shimɔ’ lɛlɛŋ, ni no wo lɛ hewalɛ ni etɔ owele. Beni eye jeŋ ta ni ji enyɔ lɛ mli kunim sɛɛ lɛ, wuoyigbɛ maŋtsɛ lɛ kɛ enuklea tawuu nii ni yɔɔ gbeyei lɛ ahiɛ ka ehenyɛlɔ lɛ, ni efee tawuu nii amli kpaŋmɔ ko, ni ji NATO, ni ekɛte shi ewo lɛ. Beni afii lɛ hoɔ yaa lɛ, nɔ ni ekɛfata ‘eshimɔ’ lɛ he ji jeŋ nilee ni etee hiɛ ni ekɛju shi etao eteemɔŋ saji kɛ maji ateŋ sharamɔ kɛ tawuu mli tutuamɔi.
6 Mɛni kooyigbɛ maŋtsɛ lɛ fee yɛ enɛ he? “Kooyigbɛ maŋtsɛ lɛ aaafa kɛaaba enɔ kɛ shwiilii kɛ okpɔŋɔiatsɛmɛi kɛ lɛji babaoo, tamɔ ahum, ni eeeba shikpɔji lɛ anɔ, ni eeeho tamɔ nu babaoo, ni eeetsɔ nɔ kɛaaho.” (Daniel 11:40b) Naagbee gbii lɛ ahe yinɔsane tsɔɔ bɔ ni kooyigbɛ maŋtsɛ lɛ lɛɛ ehewalɛ mli babaoo eha. Yɛ jeŋ ta ni ji enyɔ lɛ mli lɛ, Nazi “maŋtsɛ” lɛ fã kɛteke ehusui lɛ kɛtee shikpɔji ni ebɔle ehe lɛ anɔ. Yɛ ta lɛ naagbee lɛ, “maŋtsɛ” ni baye esɛɛ lɛ tswa maŋtsɛyeli ko ni he wa waa ema shi yɛ lɛ diɛŋtsɛ ehusui lɛ asɛɛ. Beni Béi ni Tawuu Bɛ Mli lɛ yaa nɔ lɛ, kooyigbɛ maŋtsɛ lɛ kɛ ehenyɛlɔ lɛ wuu kɛtsɔ maji krokomɛi ni kɛ amɛhe wuɔ tai lɛ asɛɛfimɔ, kɛ atuatsemɔi ni ba yɛ Afrika, Asia, kɛ Latin Amerika lɛ anɔ. Ewa anɔkwa Kristofoi ayi, ni eha amɛnitsumɔ ba shi (shi enyɛɛɛ etsi naa kwraa). Ni bɔ ni etutua maji kɛtsɔ asraafoi kɛ maŋkwramɔ nɔ lɛ ha maji pii baje ehewalɛ shishi. Enɛ bafee taakɛ bɔfo lɛ gba efɔ shi lɛ pɛpɛɛpɛ, akɛ: “Eeeba shikpɔŋ fɛfɛo [ni ji Nyɔŋmɔ webii lɛ amumɔŋ shihilɛ] lɛ nɔ, ni mɛi pii aaanyɔnyɔi.”—Daniel 11:41a.
7. Mɛɛ husui kooyigbɛ maŋtsɛ lɛ hewalɛ mlilɛɛmɔ lɛ nyɛɛɛ ateke?
7 Shi yɛ fɛɛ sɛɛ lɛ, eyɛ mli akɛ—yɛ ehenyɛlɔ lɛ susumɔ naa lɛ—kooyigbɛ maŋtsɛ lɛ eje kpo akɛ mɔ ni asheɔ lɛ gbeyei waa moŋ, shi enyɛko eye je lɛ fɛɛ nɔ kunim. “Mɛi ni aaajɛ edɛŋ nɛ: Edom kɛ Moab kɛ Amonbii lɛ ateŋ abladei lɛ.” (Daniel 11:41b) Yɛ blema beaŋ lɛ, Edom, Moab, kɛ Amon maji lɛ hi shikpɔŋ ni ka Mizraim kɛ Siria teŋ lɛ nɔ he ko. Abaanyɛ aŋɔ amɛ akɛ amɛdamɔ shi kɛha jeŋmaji kɛ gbɛjianɔtoi ni yɔɔ ŋmɛnɛ ni kooyigbɛ maŋtsɛ lɛ kɛ ehiɛ ká amɛ, shi enyɛɛɛ eŋɔ amɛ ewo ehewalɛ shishi lɛ.
‘Mizraim Ejeŋ Mli’
8, 9. Mɛɛ gbɛ nɔ anu kooyigbɛ maŋtsɛ lɛ hewalɛ he waa yɛ, ni ehenyɛlɔ titri fe fɛɛ lɛ hu fata he?
8 Bɔfo lɛ tee nɔ ekɛɛ akɛ: “Ni eeekpa enine mli yɛ shikpɔji lɛ anɔ, ni Mizraim shikpɔŋ lɛ ejeŋ mli; shi eeeye shika kɛ jwiɛtɛi jwetrii kɛ Mizraim fɛo nibii lɛ fɛɛ nɔ, ni Lubbii kɛ Kushbii aaanyiɛ esɛɛ.” (Daniel 11:42, 43) Wuoyigbɛ maŋtsɛ, “Mizraim” po ejeee nibii ni jɛ kooyigbɛ maŋtsɛ lɛ hewalɛ mlilɛɛmɔ nifeemɔi lɛ amli kɛba lɛ mli. Ena amanehulu, akɛ nɔkwɛmɔ nɔ lɛ, enɔ kunim ni aye yɛ Vietnam ni ale waa lɛ. Ni “Lubbii kɛ Kushbii” lɛ hu? Nɛkɛ blema Mizraim nanemɛi nɛɛ baanyɛ afee jeŋmaji ni, yɛ hei ni amɛyɔɔ lɛ hewɔ lɛ, amɛji ŋmɛnɛŋmɛnɛ beaŋ “Mizraim” nanemɛi, ni bei komɛi po lɛ ‘amɛnyiɛɔ kooyigbɛ maŋtsɛ lɛ sɛɛ’ lɛ ahe mfoniri jogbaŋŋ.
9 Ani kooyigbɛ maŋtsɛ lɛ eye ‘Mizraim jwetrii ni aŋɔtee’ lɛ anɔ? Ojogbaŋŋ, eka shi faŋŋ akɛ eyeko wuoyigbɛ maŋtsɛ lɛ nɔ kunim, ni kɛbashi 1993 mli nɛɛ, je lɛŋ shihilɛ tsɔɔ akɛ etamɔ nɔ ni enyɛŋ eye enɔ kunim. Shi eyɛ hewalɛ ni naa wa waa yɛ bɔ ni wuoyigbɛ maŋtsɛ lɛ kɛ eshika gbɛfaŋ nibii tsuɔ nii ehaa lɛ nɔ. Ehenyɛlɔ lɛ gbeyeishemɔ hewɔ lɛ, wuoyigbɛ maŋtsɛ lɛ tuɔ shika babaoo ehaa asraafoi, ta lɛji akuu, kɛ ta kɔɔyɔŋ lɛji akuu kwɛmɔ daa afi. Yɛ enɛ gbɛfaŋ lɛ, abaanyɛ akɛɛ akɛ kooyigbɛ maŋtsɛ lɛ ‘eye nɔ,’ loo ekudɔ bɔ ni wuoyigbɛ maŋtsɛ lɛ kɛ enii ni eyɔɔ lɛ tsuɔ nii ehaa.
Kooyigbɛ Maŋtsɛ lɛ Naagbee Tutuamɔ
10. Te bɔfo lɛ tsɔɔ bɔ ni béi ni ka maŋtsɛmɛi enyɔ lɛ ateŋ lɛ baaba naagbee eha lɛ mli eha tɛŋŋ?
10 Ani bei ni ka maŋtsɛmɛi enyɔ lɛ ateŋ lɛ baaya nɔ aahu ni ebaaa naagbee? Dabi. Bɔfo lɛ kɛɛ Daniel akɛ: “Shi saji ni jɛ bokagbɛ kɛ kooyigbɛ lɛ aaahao lɛ [kooyigbɛ maŋtsɛ lɛ]; no hewɔ lɛ ekɛ mlila babaoo aaaje kpo, ni eyafite mɛi pii ni efee amɛ musu. Ni eeeshi emɔɔ lɛŋ buui lɛ yɛ ŋshɔi lɛ kɛ gɔŋ krɔŋkrɔŋ ni yɔɔ fɛo lɛ teŋ; ni eeeshɛ enaagbee, ni mɔ ko bɛ ni aaaye abua lɛ.”—Daniel 11:44, 45.
11, 12. Mɛɛ maŋkwramɔŋ nibii komɛi ni ba nyɛsɛɛ nɛɛ kɔɔ béi ni ka kooyigbɛ maŋtsɛ lɛ kɛ wuoyigbɛ maŋtsɛ lɛ teŋ lɛ he, ni mɛɛ nibii yɔɔ lolo ni wɔbaale?
11 Nibii nɛɛ baaba yɛ wɔsɛɛ be mli, no hewɔ lɛ wɔnyɛŋ wɔtsɔɔ bɔ ni gbalɛ lɛ baaba mli aha lɛ mli fitsofitso. Nyɛsɛɛ nɛɛ, maŋkwramɔŋ shihilɛ ni kɔɔ maŋtsɛmɛi enyɔ lɛ ahe lɛ etsake. Akaŋshii kpele ni ka United States, Amerika kɛ Europa Bokagbɛ maji lɛ ateŋ lɛ eba shi kwraa. Kɛfata he lɛ, agbala Soviet Union mli yɛ 1991, ni ebɛ dɔŋŋ.—Kwɛmɔ March 1, 1992 Buu-Mɔɔ ni je kpo lɛ, baafai 4, 5.
12 No hewɔ lɛ namɔ ji kooyigbɛ maŋtsɛ lɛ bianɛ? Ani esa akɛ ana lɛ akɛ maji ni feɔ tsutsu Soviet Union fã lɛ ateŋ ekome? Aloo ani eetsake kɛmiitsɔ mɔ kroko kwraa, taakɛ efee shii abɔ yɛ be ni eho lɛ amli lɛ? Wɔnyɛŋ wɔkɛɛ. Namɔ baafee kooyigbɛ maŋtsɛ lɛ yɛ be mli ni Daniel 11:44, 45 baaba mli lɛ? Ani mpleshii ni kã maŋtsɛmɛi enyɔ lɛ ateŋ lɛ baate shi ekoŋŋ? Ni nuklea tawuu nii babaoo ni abua naa, ni yɔɔ maji pii amli lolo lɛ hu? Be pɛ baaha nɛkɛ sanebimɔi nɛɛ ahetoo.
13, 14. Mɛni wɔle yɛ maŋtsɛmɛi enyɔ lɛ awɔsɛɛ be he?
13 Nɔ kome yɛ ni wɔle. Etsɛŋ ni kooyigbɛ maŋtsɛ lɛ baato tutuamɔ ko he gbɛjianɔ, ni nɔ ni kɛ enɛ baaba ji “saji ni jɛ bokagbɛ kɛ kooyigbɛ [ni] aaahao lɛ” lɛ. Nɛkɛ tutuamɔ nɛɛ sɛɛ nɔŋŋ ni “enaagbee” baaba. Kɛ wɔsusu Biblia mli gbalɛi krokomɛi ahe lɛ, wɔbaanyɛ wɔle nɛkɛ “saji” nɛɛ ahe nii babaoo.
14 Shi klɛŋklɛŋ lɛ, awie akɛ kooyigbɛ maŋtsɛ lɛ baafee nɛkɛ nibii nɛɛ kɛte shi ewo wuoyigbɛ maŋtsɛ lɛ. Jeee ehenyɛlɔ kpele nɛɛ ji mɔ ni baakpata ehiɛ. Nakai nɔŋŋ hu kooyigbɛ maŋtsɛ lɛ kpataŋ wuoyigbɛ maŋtsɛ lɛ hiɛ. Nyɔŋmɔ Maŋtsɛyeli lɛ baakpata wuoyigbɛ maŋtsɛ lɛ (ni akɛ naagbee akolonto ni kwɛ̃ɔ yɛ kooloo ko yiteŋ lɛ feɔ ehe mfoniri yɛ gbalɛi krokomɛi amli lɛ) hiɛ “ni jeee kɛ [adesa] nine tete.” (Daniel 7:26; 8:25) Yɛ anɔkwale mli lɛ, naagbee lɛ, Nyɔŋmɔ Maŋtsɛyeli lɛ baakpata shikpɔŋ nɔ maŋtsɛmɛi fɛɛ ahiɛ yɛ Harmagedon ta lɛ mli, ni eka shi faŋŋ akɛ enɛ nɔŋŋ baaba kooyigbɛ maŋtsɛ lɛ hu nɔ. (Daniel 2:44; 12:1; Kpojiemɔ 16:14, 16) Daniel 11: 44, 45 tsɔɔ nibii ni kɛ nakai naagbee ta lɛ baaba. No hewɔ lɛ ebɛ naakpɛɛ akɛ “mɔ ko bɛ ni aaaye abua lɛ” beni kooyigbɛ maŋtsɛ lɛ shɛɔ enaagbee lɛ!
15. Mɛɛ sanebimɔi ni he hiaa yɔɔ ni sa akɛ asusu he?
15 Belɛ, mɛni ji gbalɛi krokomɛi ni wieɔ “saji” ni tsirɛɔ kooyigbɛ maŋtsɛ lɛ koni eje kpo “ni eyafite mɛi pii ni efee amɛ musu” lɛ he? Ni namɛi ji “mɛi pii” ni ebaasumɔ ni ekpata amɛhiɛ lɛ?
Sane ko ni Jɛ Bokagbɛ
16. (a) Mɛɛ nifeemɔ ko ni sa kadimɔ waa esa akɛ eba dani Harmagedon aba? (b) Namɛi ji “maŋtsɛmɛi ni jɛ hulu shitee he lɛ”?
16 Dani naagbee ta ni ji Harmagedon aaaba lɛ, esa akɛ akpata anɔkwa jamɔ henyɛlɔ kpele ko hiɛ—Babilon Kpeteŋkpele ni tamɔ yoo ajwamaŋ lɛ, jeŋ muu fɛɛ apasa jamɔ maŋtsɛyeli lɛ. (Kpojiemɔ 18:3-8) Afee ehiɛkpatamɔ lɛ he mfoniri kɛtsɔ Nyɔŋmɔ mlifu tɔ ni ji ekpaa lɛ ni afɔse ashwie mfoniri-feemɔŋ Eufrate faa lɛ mli lɛ nɔ. Faa lɛ gbi “koni akɛsaa gbɛ aha maŋtsɛmɛi ni jɛ hulu shitee he lɛ.” (Kpojiemɔ 16:12) Namɛi ji nɛkɛ maŋtsɛmɛi nɛɛ? Amɛjeee mɔ ko mɔ ko fe Yehowa Nyɔŋmɔ kɛ Yesu Kristo!a
17. (a) Mɛni Biblia lɛ kɛɔ wɔ yɛ Babilon Kpeteŋkpele lɛ hiɛkpatamɔ he? (b) Mɛni ekolɛ “saji ni jɛ bokagbɛ” lɛ aaanyɛ afee?
17 Atsɔɔ Babilon Kpeteŋkpele lɛ hiɛkpatamɔ lɛ mli jogbaŋŋ yɛ Kpojiemɔ wolo lɛ mli, akɛ: “Ni akolontoi nyɔŋma ni ona [ni ji ‘maŋtsɛmɛi’ ni yeɔ nɔ yɛ naagbee be lɛ mli] lɛ, kɛ kooloo lɛ [kooloo ni tsuɔ tamɔ muneele, ni damɔ shi kɛha Jeŋmaji Ekomefeemɔ gbɛjianɔtoo lɛ], amɛaanyɛ ajwamaŋ lɛ, ni amɛaafee lɛ amaŋfɔ, ni amɛaaŋmɛ lɛ yayai, ni amɛaaye eheloo, ni amɛkɛ la aaashã lɛ.” (Kpojiemɔ 17:16) Lɛlɛŋ, jeŋmaji lɛ ‘kpataa heloo babaoo hiɛ’! (Daniel 7:5) Shi mɛni hewɔ nɔyelɔi lɛ, ni kooyigbɛ maŋtsɛ lɛ fata he lɛ, baakpata Babilon Kpeteŋkpele lɛ hiɛ lɛ? Ejaakɛ ‘Nyɔŋmɔ kɛwo amɛtsuiiaŋ koni amɛtsu eyiŋtoo he nii.’ (Kpojiemɔ 17:17) Ekolɛ sane “ni jɛ bokagbɛ” lɛ baanyɛ akɔ nɛkɛ nii ni Yehowa baafee nɛɛ he, beni ekɛwoɔ adesai ahiɛnyiɛlɔi lɛ atsuiiaŋ koni amɛkpata jamɔ mli ajwamaŋ kpeteŋkpele lɛ hiɛ kwraa lɛ.—Daniel 11:44.
Sane ko ni Jɛ Kooyigbɛ
18. Mɛɛ oti kroko hu kooyigbɛ maŋtsɛ lɛ ejie ehiɛ eka, ni nɛgbɛ enɛ haa eyajeɔ beni eeeshɛ enaagbee lɛ?
18 Shi oti kroko hu yɛ ni kooyigbɛ maŋtsɛ lɛ kɛ emlifu lɛ baaya enɔ. Bɔfo lɛ kɛɛ akɛ “eeeshi emɔɔ lɛŋ buui lɛ yɛ ŋshɔi lɛ kɛ gɔŋ krɔŋkrɔŋ ni yɔɔ fɛo lɛ teŋ.” (Daniel 11:45) Yɛ Daniel beaŋ lɛ, ŋshɔ kpeteŋkpele lɛ ji Mediteranea ŋshɔ lɛ, ni gɔŋ krɔŋkrɔŋ lɛ ji Zion, he ni be ko lɛ Nyɔŋmɔ sɔlemɔ tsu lɛ ma lɛ. No hewɔ lɛ, yɛ gbalɛ lɛ mlibaa mli lɛ, kooyigbɛ maŋtsɛ ni mli efu lɛ teeɔ asraafoi atutuamɔ shi ewoɔ Nyɔŋmɔ webii! Yɛ mumɔŋ shishinumɔ naa ŋmɛnɛ lɛ, “ŋshɔi lɛ kɛ gɔŋ krɔŋkrɔŋ ni yɔɔ fɛo lɛ teŋ” lɛ haa eyajeɔ Nyɔŋmɔ tsuji ni afɔ amɛ mu, ni eje kpo kɛjɛ “ŋshɔ” ni ji adesai ni etsi amɛhe lɛ ateŋ, ni amɛyɔɔ hiɛnɔkamɔ akɛ amɛkɛ Yesu Kristo baaye maŋtsɛ yɛ ŋwɛi Zion Gɔŋ lɛ nɔ lɛ amumɔŋ shihilɛ lɛ mli.—Yesaia 57:20; Hebribii 12:22; Kpojiemɔ 14:1.
19. Taakɛ Ezekiel gbalɛ lɛ tsɔɔ lɛ, mɛɛ gbɛ nɔ wɔɔtsɔ wɔle sane ni tee Gog tutuamɔ lɛ shi lɛ? (Kwɛmɔ shishigbɛ niŋmaa lɛ.)
19 Ezekiel, ni hi shi yɛ Daniel beaŋ lɛ hu gba tutuamɔ ko ni akɛbaaba Nyɔŋmɔ webii anɔ yɛ “naagbee gbii lɛ amli” lɛ efɔ shi. Ewie akɛ Gog ni jɛ Magog, ni feɔ Satan Abonsam he mfoniri lɛ baaje nakai tutuamɔ lɛ shishi. (Ezekiel 38:16) Mfoniri feemɔŋ nɛgbɛ Gog baajɛ aba? Yehowa wie kɛtsɔ Ezekiel nɔ akɛ: “Ni ojɛ ojɛɛhe lɛ yɛ kooyigbɛ tɔ̃ɔ oba.” (Ezekiel 38:15) No hewɔ lɛ, saji ni jɛ “kooyigbɛ” lɛ baanyɛ afee Satan lakamɔ wiemɔi ni ekɛwoɔ kooyigbɛ maŋtsɛ lɛ, kɛ maŋtsɛmɛi krokomɛi fɛɛ hu ni eshwɛ lɛ hewalɛ koni amɛtutua Yehowa webii lɛ.b—Okɛto Kpojiemɔ 16:13, 14; 17:14 he.
20, 21. (a) Mɛni hewɔ Gog baawo jeŋmaji lɛ ni kooyigbɛ maŋtsɛ lɛ hu fata he lɛ hewalɛ ni amɛtutua Nyɔŋmɔ webii lɛ? (b) Ani nɛkɛ tutuamɔ nɛɛ baaye omanye?
20 Gog to nɛkɛ naagbee tutuamɔ nɛɛ he gbɛjianɔ yɛ “Nyɔŋmɔ Israel lɛ” shweremɔ lɛ hewɔ, mɛi ni kɛ asafo babaoo ni ji tooi krokomɛi lɛ efee ekome, ni amɛjeee je lɛ fa lɛ. (Galatabii 6:16; Yohane 10:16; 17:15, 16; 1 Yohane 5:19) Gog kɛ hetsɛ kwɛɔ “maŋ ni abua naa kɛjɛ jeŋmaji lɛ amli, ni amɛna kooloi kɛ [mumɔŋ] nibii pii” lɛ. (Ezekiel 88:12; Kpojiemɔ 5:9; 7:9) Yɛ wiemɔi nɛɛ amlibaa mli lɛ, Yehowa webii miishwere waa fe bei fɛɛ ni eho. Yɛ shikpɔji pii anɔ yɛ Europa, Afrika, kɛ Asia, he ni tsutsu lɛ agu amɛ kwraa yɛ lɛ, amrɔ nɛɛ amɛjaa yɛ heyeli mli. Kɛjɛ 1987 kɛbashi 1992 lɛ, “nii ni jara wa” lɛ falɛ fe akpeiakpe kome jɛ jeŋmaji lɛ amli amɛba Yehowa we kɛha anɔkwa jamɔ lɛ mli. Yɛ mumɔŋ shishinumɔ naa lɛ, amɛyɛ nii babaoo ni amɛhe jɔ hu.—Hagai 2:7; Yesaia 2:2-4; 2 Korintobii 8:9.
21 Akɛni enaa Kristofoi amumɔŋ shihilɛ lɛ akɛ “shikpɔŋ ni naa kã” ni ewaaa haaa lɛ akɛ eeeye amɛnɔ kunim kwraa hewɔ lɛ, Gog bɔɔ mɔdɛŋ waa akɛ eeejie nɛkɛ gbɛtsii nii ni haaa enyɛ ekɛ adesai fɛɛ abawo ekudɔmɔ shishi nɛɛ kɛjɛ jɛmɛ. (Ezekiel 38:11) Shi eyeee omanye. Kɛ shikpɔŋ nɔ maŋtsɛmɛi lɛ batutua Yehowa webii lɛ, ‘amɛbaashɛ amɛnaagbee’ kwraa. Yɛ mɛɛ gbɛ nɔ?
Maŋtsɛ ni Ji Etɛ
22, 23. Kɛ Gog tutua amɛ lɛ, namɔ baadamɔ shi aha Nyɔŋmɔ webii lɛ, ni mɛni baajɛ mli aba?
22 Ezekiel kɛɔ akɛ Gog tutuamɔ lɛ ji okadi ni baaha Yehowa Nyɔŋmɔ ate shi adamɔ shi yɛ ewebii lɛ ahewɔ ni ekpata Gog tai lɛ ahiɛ “yɛ Israel gɔji lɛ anɔ.” (Ezekiel 38:18; 39:4) Enɛ haa wɔkaiɔ nɔ ni bɔfo lɛ kɛɛ Daniel lɛ, akɛ: “Nakai be lɛ mli lɛ Mikael ni ji lumɔ kpeteŋkpele ni damɔ shi ha omaŋbii lɛ aaate shi adamɔ shi; shi fimɔ be ko aaaba ni anako nɔ da kɛjɛ beyinɔ ni jeŋmaŋ yɔɔ lɛ kɛyashi nakai be lɛ mli; ni nakai be lɛ mli lɛ aaahere omaŋ lɛ mli mɔ fɛɛ mɔ ni aaana akɛ aŋma egbɛi yɛ wolo lɛ mli lɛ.”—Daniel 12:1.
23 Yɛ 1914 mli lɛ, Yesu—ni ji ŋwɛi tatsɛ Mikael lɛ—batsɔ Nyɔŋmɔ ŋwɛi Maŋtsɛyeli lɛ nɔ Maŋtsɛ. (Kpojiemɔ 11:15; 12:7-9) Kɛjɛ nakai beaŋ kɛbaa nɛɛ, edamɔ shi ‘yɛ Daniel maŋbii lɛ ahewɔ.’ Shi kɛlɛ, etsɛŋ ni eeete shi ‘edamɔ shi’ yɛ Yehowa gbɛi amli akɛ Tatsɛ kɛ-Maŋtsɛ ni anyɛɛɛ enɔ kunim aye, ni eeetɔ “owele yɛ mɛi ni leee Nyɔŋmɔ kɛ mɛi ni booo wɔ-Nuŋtsɔ Yesu Kristo sanekpakpa lɛ toi lɛ anɔ.” (2 Tesalonikabii 1:8) Shikpɔŋ lɛ nɔ jeŋmaji fɛɛ, ni Daniel gbalɛ lɛ mli maŋtsɛmɛi lɛ fata he lɛ “aaawo yara.” (Mateo 24:30) Akɛni ‘Daniel maŋbii lɛ’ ahe jwɛŋmɔ fɔŋ yɛ amɛtsuii amli lolo hewɔ lɛ, amɛhiɛ baakpata kwraa kɛya naanɔ yɛ ‘Mikael, lumɔ kpeteŋkpele lɛ’ dɛŋ.—Kpojiemɔ 19:11-21.
24. Mɛɛ hewalɛ esa akɛ nɛkɛ Daniel gbalɛ nɛɛ he nikasemɔ lɛ ana yɛ wɔnɔ?
24 Ani wɔkpaaa nakai Mikael kɛ e-Nyɔŋmɔ, ni ji Yehowa kunimyeli kpele lɛ namɔ gbɛ? Ejaakɛ nakai kunimyeli lɛ baatsɔɔ ‘yiwalaheremɔ,’ loo yibaamɔ kɛha anɔkwa Kristofoi. (Okɛto Maleaki 3:19-21 he.) Enɛ hewɔ lɛ, beni wɔkwɛɔ wɔsɛɛ be kɛ gbɛkpamɔ ni mli wa lɛ, wɔkaiɔ bɔfo Paulo wiemɔi ni ewie lɛ, akɛ: “Shiɛmɔ wiemɔ lɛ, ka he, deka yɛ jio, deka bɛ jio.” (2 Timoteo 4:2) Nyɛhaa wɔmɔa wala Wiemɔ lɛ mli ni awaa ni wɔkɛ ekaa ataoa Yehowa tooi lɛ beni be kpakpa kã he eyɔɔ lolo nɛɛ. Wɔnyiɛ wala foidamɔ lɛ naagbee gbɛ kwraa. Nyɔmɔwoo lɛ ka wɔhiɛ kpaakpa. Eba akɛ wɔ fɛɛ wɔɔtswa wɔfai shi akɛ wɔɔŋmɛ wɔtsui shi kɛyashi naagbee koni wɔfata mɛi ni abaahere amɛyiwala lɛ ahe.—Mateo 24:13; Hebribii 12:1.
[Shishigbɛ niŋmai]
a Kwɛmɔ Kpojiemɔ—Enaagbee Kwraa lɛ Ebɛŋkɛ! ni Watchtower Bible and Tract Society of New York, Inc. fee lɛ, baafai 229-30.
b Yɛ gbɛ kroko hu nɔ lɛ, saji ni jɛ “kooyigbɛ” lɛ baanyɛ afee nɔ ni jɛ Yehowa ŋɔɔ, yɛ ewiemɔi ni ekɛ Gog wie nɛɛ hewɔ, akɛ: “Ni . . . mikɛ kpoji aaatsɛre okadaai amli, ni magbalao kɛaaje kpo.” “Ni . . . maha ojɛ kooyigbɛ tɔ̃ɔ ofa kɛba, ni maha oba Israel gɔji lɛ anɔ.”—Ezekiel 38:4; 39:2; okɛto Lala 48:3 he.
Ani Onuɔ Shishi?
◻ Wuoyigbɛ maŋtsɛ lɛ etsi kooyigbɛ maŋtsɛ lɛ yɛ naagbee be lɛ mli fɛɛ yɛ mɛɛ gbɛ nɔ?
◻ Mɛni yɔɔ lolo ni wɔbaale yɛ nɔ ni jɛ béi ni ku maŋtsɛmɛi enyɔ lɛ ateŋ lɛ mli ba lɛ he?
◻ Mɛɛ nibii enyɔ kooyigbɛ maŋtsɛ lɛ baafee dani Harmagedon baaba?
◻ Mɛɛ gbɛ nɔ ‘Mikael, lumɔ kpeteŋkpele lɛ’ baabu Nyɔŋmɔ webii ahe yɛ?
◻ Te esa akɛ wɔfee wɔnii yɛ Daniel gbalɛ ni wɔkase lɛ he wɔha tɛŋŋ?
[Mfonirii ni yɔɔ baafa 19]
kooyigbɛ maŋtsɛ lɛ eja nyɔŋmɔ kroko ni esoro lɛ kwraa yɛ mɛi ni tsɔ ehiɛ lɛ anyɔŋmɔi lɛ he
[He ni Sane lɛ Jɛ]
Ŋwɛigbɛ abɛku kɛ teŋ: UPl/Bettmann: shishigbɛ abɛku: Reuters/Bettmann: shishigbɛ ninejurɔ: Jasmin/Gamma Liaison