Yitso Nyɔŋma Kɛ Kpaanyɔ

Yehowa Kɛ Nyɔmɔwoo Ni Hi Naakpa Wo Daniel Shi

1, 2. (a) Mɛɛ su ni he hiaa esa akɛ foidalɔ aná bɔni afee ni eye omanye? (b) Bɔfo Paulo kɛ shihilɛ yɛ anɔkwayeli mli yɛ Yehowa sɔɔmɔ mli to foidamɔ he yɛ mɛɛ gbɛ nɔ?

FOIDALƆ kpãa enane mli kɛyaa he ni agbeɔ naa yɛ lɛ. Ehewalɛ miihe atã, shi akɛni eena oti lɛ yɛ ehiɛ hewɔ lɛ, emiaa ehiɛ ekɛ ehewalɛ fɛɛ woɔ nakai najifamɔi fioo ni eshwɛ lɛ mli. Ebuaa efajiaŋ hewalɛ ni fe fɛɛ naa ekɛtekeɔ naagbee liamɔ lɛ! Ehiɛ tsɔɔ hejɔlɛ kɛ kunimyeli. Omanyeyeli ejɛ hiɛmiamɔ kɛmiiya naagbee lɛ mli eba.

² Yɛ Daniel yitso 12 lɛ naagbee lɛ, wɔnaa ni gbalɔ ni asumɔɔ esane naakpa lɛ miibɛŋkɛ lɛ diɛŋtsɛ ‘efoidamɔ’ lɛ naagbee​—eshihilɛ ni ekɛsɔmɔ Yehowa lɛ. Beni etsĩ hemɔkɛyeli he nɔkwɛmɔnii srɔtoi babaoo ni ji Yehowa tsuji ni hi shi dani Kristofoi abe lɛ shɛ lɛ tã lɛ, bɔfo Paulo ŋma akɛ: “No hewɔ lɛ, agbɛnɛ wɔ hu, gbiiabɔ ni wɔyɔɔ odasefoi babaoo ni ebɔle wɔ tamɔ atatu nɛɛ, nyɛhaa wɔkɛ jatsu fɛɛ jatsu aŋmɛa shi, kɛ esha ni ebɔle wɔhe kpula lɛ, ni wɔkɛ tsuishitoo ada foi ni kã wɔhiɛ lɛ, ni wɔkwɛ hemɔkɛyeli shishijelɔ kɛ naagbelɔ ni ji Yesu lɛ, mɔ ni nyamɔ ni kã ehiɛ lɛ hewɔ lɛ emia ehiɛ yɛ sɛŋmɔtso lɛ he amanehulu lɛ mli, ni ebuuu hiɛgbele lɛ, ni ekɛyata shi yɛ Nyɔŋmɔ maŋtsɛsɛi lɛ ninejurɔ nɔ lɛ.”​—Hebribii 12:​1, 2.

3. (a) Mɛni kanya Daniel koni ekɛ “tsuishitoo ada foi” lɛ? (b) Mɛɛ nibii srɔtoi etɛ Yehowa bɔfo lɛ kɛɛ Daniel?

³ Mɔ ni fata nakai ‘odasefoi babaoo ni tamɔ atatu’ lɛ ahe ji Daniel. Eji anɔkwale akɛ eji mɔ ni ehe bahia ni ekɛ “tsuishitoo ada foi,” ni suɔmɔ ni mli kwɔ ni eyɔɔ kɛha Nyɔŋmɔ lɛ ji nɔ ni kanya lɛ koni efee nakai. Yehowa ejie nibii babaoo ni kɔɔ je lɛŋ nɔyelii lɛ awɔsɛɛ be he lɛ kpo etsɔɔ Daniel, shi agbɛnɛ E-kɛ lɛ diɛŋtsɛ ehewalɛwoo nɛɛ ha lɛ: “Shi bo lɛ, yaa kɛyashi naagbee lɛ aaashɛ, ni ooojɔɔ ohe, ni ooote shi oyaná ogbɛfaŋnɔ yɛ gbii lɛ anaagbee lɛ mli.” (Daniel 12:13) Yehowa bɔfo lɛ miikɛɛ Daniel nibii srɔtoi etɛ: (1) ákɛ Daniel ‘aya kɛyashi naagbee lɛ aaashɛ,’ (2) ákɛ esa akɛ ‘ejɔɔ ehe,’ ni (3) ákɛ ‘eeete shi’ ekoŋŋ yɛ wɔsɛɛ be ko mli. Te aaafee tɛŋŋ ni wiemɔi nɛɛ aaawo Kristofoi ahewalɛ ŋmɛnɛ koni amɛŋmɛ amɛtsui shi kɛyashi amɛwala he foidamɔ lɛ naagbee?

“YAA KƐYASHI NAAGBEE LƐ AAASHƐ”

4. Mɛni Yehowa bɔfo lɛ kɛ wiemɔ, “yaa kɛyashi naagbee lɛ aaashɛ” lɛ tsɔɔ, ni mɛni hewɔ ekolɛ enɛ baafee kaa kɛha Daniel lɛ?

⁴ Mɛni ŋwɛibɔfo lɛ tsɔɔ beni ekɛɛ Daniel akɛ: “Shi bo lɛ, yaa kɛyashi naagbee lɛ aaashɛ” lɛ? Mɛni naagbee? Ojogbaŋŋ, akɛni Daniel miihe aye afii 100 hewɔ lɛ, eyɛ faŋŋ akɛ enɛ kɔɔ lɛ diɛŋtsɛ ewala shihilɛ lɛ naagbee ni eeenyɛ efee akɛ ebɛŋkɛ kpaakpa lɛ he.a Ŋwɛibɔfo lɛ miiwo Daniel hewalɛ koni eŋmɛ etsui shi yɛ anɔkwayeli mli kɛyashi gbele mli. Shi nakai feemɔ efeŋ mlɛo. Daniel ehi shi ni ena Babilon shigbeemɔ kɛ bɔ ni shwɛɛnii ni ji Yudafoi nomii lɛ ku amɛsɛɛ kɛtee Yuda kɛ Yerusalem. Enɛ baaha gbalɔ ni egbɔ lɛ aná miishɛɛ babaoo. Shi nɔ ko bɛ ni aŋma afɔ̃ shi ni tsɔɔ akɛ efata gbɛfãa lɛ he. Ekolɛ egbɔ tsɔ̃ ni ebɛ gbɔmɔtsoŋ hewalɛ yɛ nakai be lɛ mli. Aloo ekolɛ eji Yehowa suɔmɔnaa nii akɛ ehi Babilon. Yɛ fɛɛ mli lɛ, nɔ ni mɔ ko baanyɛ abi ji kɛji akɛ Daniel shwe shiayaa yɛ gbɛ ko nɔ beni emaŋbii lɛ shiɔ kɛyaa Yuda lɛ.

5. Mɛni yɔɔ ni tsɔɔ akɛ Daniel ŋmɛ etsui shi kɛyashi naagbee?

⁵ Ŋwanejee ko bɛ he akɛ Daniel ná hewalɛ babaoo kɛjɛ ŋwɛibɔfo lɛ mlihilɛ wiemɔ akɛ: “Yaa kɛyashi naagbee lɛ aaashɛ” lɛ mli. Ekolɛ ekaiɔ wɔ Yesu Kristo wiemɔi ni ewie yɛ no sɛɛ afii ohai ekpaa lɛ: “Mɔ ni hiɛɔ mli kɛyawulaa shi lɛ, lɛ aaahere eyiwala.” (Mateo 24:13) Ŋwanejee ko bɛ he akɛ nakai Daniel fee. Eŋmɛ etsui shi kɛyashi naagbee, ekɛ anɔkwayeli da ewala he foi lɛ kɛyashi enaagbee kwraa. Ebaanyɛ efee akɛ no ji yiŋtoo kome hewɔ ni awie ehe ekpakpa yɛ sɛɛ mli yɛ Nyɔŋmɔ Wiemɔ lɛ mli lɛ. (Hebribii 11:​32, 33) Mɛni ye ebua Daniel ni enyɛ eŋmɛ etsui shi kɛyashi naagbee lɛ? Ewala shihilɛ he saji ni aŋma afɔ̃ shi lɛ yeɔ ebuaa wɔ kɛ hetoo.

TSUI SHI NI AŊMƐƆ AKƐ NYƆŊMƆ WIEMƆ LƐ KASELƆ

6. Te wɔfeɔ tɛŋŋ wɔleɔ akɛ Daniel ji mɔ ni kɛ hiɛdɔɔ kaseɔ Nyɔŋmɔ Wiemɔ lɛ?

⁶ Kɛha Daniel lɛ, tsuishiŋmɛɛ kɛyashi naagbee lɛ kɔɔ ya ni eeeya nɔ ekase ni ejwɛŋ Nyɔŋmɔ shiwoi ni yɔɔ miishɛɛ lɛ anɔ waa lɛ he. Wɔle akɛ Daniel ji Nyɔŋmɔ Wiemɔ lɛ kaselɔ ni etu ehe eha. Kɛ́ jeee nakai lɛ, te fee tɛŋŋ ele shiwoo ni Yehowa kɛha Yeremia akɛ nomŋɔɔ lɛ sɛɛkɛlɛ baafee afii 70 lɛ he sane? Daniel diɛŋtsɛ ŋma akɛ: ‘Mikwɛ woji lɛ amli ni mina afii lɛ.’ (Daniel 9:2; Yeremia 25:​11, 12) Sanebimɔ ko bɛ he akɛ, Daniel tao Nyɔŋmɔ Wiemɔ ni no mli lɛ eyɔɔ lɛ mli woji lɛ amli. Mose, David, Salomo, Yesaia, Yeremia, kɛ Ezekiel niŋmaai lɛ​—fɛɛ eko ni Daniel nine aaashɛ nɔ lɛ​—ekɛ ŋmɛlɛtswai babaoo kane kɛ miishɛɛ ni ejwɛŋ nɔ.

7. Kɛji akɛ wɔkɛ wɔbe lɛ to Daniel gbii lɛ ahe lɛ, mɛɛ hegbɛi wɔyɔɔ yɛ Nyɔŋmɔ Wiemɔ lɛ kasemɔ mli?

⁷ Nyɔŋmɔ Wiemɔ lɛ kasemɔ, kɛ he ni akɛwoɔ mli kwraa lɛ he hiaa bɔni afee ni wɔná tsuishiŋmɛɛ ŋmɛnɛ. (Romabii 15:​4-6; 1 Timoteo 4:15) Ni wɔyɛ Biblia muu lɛ fɛɛ, ni nɔ ni fata he ji bɔ ni fee ni Daniel gbalɛi lɛ ekomɛi ba mli yɛ sɛɛ mli afii ohai abɔ lɛ amli lɛ hu. Agbɛnɛ hu, ajɔɔ wɔ akɛ wɔyɛ wala mli yɛ “naagbee be lɛ” ni agba afɔ̃ shi yɛ Daniel 12:4 lɛ mli. Akɛ mumɔŋ sɛɛyoomɔ, ni kpɛɔ tamɔ anɔkwale lɛ okaditoo la ejɔɔ mɛi ni afɔ amɛ mu lɛ yɛ wɔ diɛŋtsɛ wɔgbii nɛɛ amli. Nɔ ni ejɛ mli eba ji akɛ, Daniel wolo lɛ mli gbalɛi ni mli kwɔlɔ waa, ni ekomɛi ha enaa kpɛ ehe lɛ ashishinumɔ tsɔɔ nibii pii kɛhaa wɔ ŋmɛnɛ. No hewɔ lɛ, nyɛhaa wɔyaa nɔ wɔkasea Nyɔŋmɔ Wiemɔ lɛ daa gbi, ni wɔkaku wɔhiɛ wɔshwie nɛkɛ nibii nɛɛ anɔ kɔkɔɔkɔ. Nakai feemɔ baaye abua wɔ ni wɔŋmɛ wɔtsui shi.

DANIEL KÃ SƆLEMƆ HE DAA

8. Mɛɛ nɔkwɛmɔnɔ Daniel fee yɛ sɔlemɔ he sane lɛ mli?

⁸ Sɔlemɔ hu ye ebua Daniel koni eŋmɛ etsui shi kɛyashi naagbee. Eyaa Yehowa Nyɔŋmɔ ŋɔɔ daa gbi, ni ekɛ tsui ni hemɔkɛyeli kɛ hekɛnɔfɔɔ eyi mli obɔ sɔleɔ yɛ faŋŋ mli ehaa lɛ. Ele Yehowa akɛ ‘sɔlemɔ Toibolɔ.’ (Lala 65:2; okɛto Hebribii 11:6 he.) Beni Daniel ye awerɛho yɛ etsui mli yɛ Israel atuatsemɔ gbɛ lɛ hewɔ lɛ, efɔse ehenumɔi eshwie Yehowa hiɛ. (Daniel 9:​4-19) Beni Dario wo akpɔ akɛ lɛ pɛ esa akɛ asɔle aha lɛ gbii 30 lɛ po lɛ, Daniel eŋmɛɛɛ gbɛ ni enɛ atsĩ enaa koni ekasɔle eha Yehowa Nyɔŋmɔ. (Daniel 6:10) Ani enɛ esaaa wɔtsuii ahe akɛ wɔɔsusu bɔ ni nakai nuumo anɔkwafo lɛ ná ekãa yɛ bu ni jatai pii yɔɔ mli lɛ naa, fe ni eeeŋmɛɛ sɔlemɔ hegbɛ ni jara wa waa lɛ he lɛ he? Ŋwanejee ko bɛ he akɛ Daniel yashɛ enaagbee yɛ anɔkwayeli mli, etee nɔ ekɛ hiɛdɔɔ sɔle eha Yehowa daa gbi.

9. Mɛni hewɔ esaaa akɛ wɔbuɔ sɔlemɔ hegbɛ lɛ akɛ nɔ ko ni yɔɔ fɛlɛfɛlɛ lɛ?

⁹ Sɔlemɔ ji nifeemɔ ko ni waaa. Wɔbaanyɛ wɔsɔle be fɛɛ be, yɛ he fɛɛ he, waa loo dioo. Ekaba kɔkɔɔkɔ akɛ wɔɔŋɔ hegbɛ ni jara wa waa nɛɛ akɛ nɔ ko ni yɔɔ fɛlɛfɛlɛ. Biblia lɛ kɛ sɔlemɔ toɔ tsuishiŋmɛɛ, mɔdɛŋbɔɔ, kɛ hiɛ ni hiɔ he nɔ yɛ mumɔŋ lɛ he. (Luka 18:1; Romabii 12:12; Efesobii 6:​18; Kolosebii 4:2) Ani ebɛ naakpɛɛ akɛ wɔkɛ mɔ ni fe fɛɛ yɛ jeŋ muu fɛɛ mli lɛ yeɔ sharamɔ yɛ heyeli mli ni nɔ ko etsiii enɛ gbɛ? Ni eboɔ toi! Kaimɔ be mli ni Daniel sɔle ní Yehowa tsu ŋwɛibɔfo ko koni ebaha lɛ hetoo lɛ. Ŋwɛibɔfo lɛ bashɛ shi beni Daniel kã he esɔleɔ lolo lɛ! (Daniel 9:​20, 21) Wɔbe nɛɛ efeŋ be ni ŋwɛibɔfoi basaraa mɛi, shi kɛlɛ Yehowa tsakeko. (Maleaki 3:6) Bɔ ni enu Daniel sɔlemɔ lɛ, nakai ebaabo wɔ nɔ̃ lɛ toi. Ni yɛ be mli ni wɔsɔleɔ lɛ, wɔbaatsi wɔbɛŋkɛ Yehowa he, ni enɛ baafee tsakpaa ko ni baaye abua wɔ ni wɔŋmɛ wɔtsui shi kɛyashi naagbee, taakɛ Daniel fee lɛ.

TSUI SHI NI AŊMƐƆ AKƐ NYƆŊMƆ WIEMƆ LƐ TSƆƆLƆ

10. Mɛni hewɔ Nyɔŋmɔ Wiemɔ lɛ mli anɔkwale lɛ ni aaatsɔɔ lɛ he hiaa Daniel lɛ?

¹⁰ Esa akɛ Daniel aya “kɛyashi naagbee lɛ aaashɛ” yɛ shishinumɔ kroko mli. Esa akɛ eŋmɛ etsui shi ákɛ anɔkwale lɛ he tsɔɔlɔ. Ehiɛ kpaaa nɔ kɔkɔɔkɔ akɛ eji gbɔmɛi ni ahala ni Ŋmalɛi lɛ ewie amɛhe akɛ: “ ‘Nyɛji midasefoi,’ Yehowa kɛɛ, ‘kɛ mitsulɔ ni mihala,’ ” lɛ ateŋ mɔ kome lɛ. (Yesaia 43:10) Daniel fee nɔ fɛɛ nɔ ni eeenyɛ koni ehi shi yɛ nakai nitsumɔ lɛ naa. Eeenyɛ eba akɛ nɔ ni fata enitsumɔ lɛ he ji lɛ diɛŋtsɛ ewebii ni aŋɔ amɛ nom yɛ Babilon lɛ anitsɔɔmɔ. Bɔ ni ekɛ enanemɛi Yudafoi lɛ ye ha lɛ he nɔ ko bibioo pɛ wɔle, ja tsakpaa ni kã mɛi etɛ ni awie amɛhe akɛ “enanemɛi”​—Hanania, Mishael, kɛ Azaria lɛ ateŋ lɛ pɛ. (Daniel 1:7; 2:​13, 17, 18) Eka shi faŋŋ akɛ amɛ naanyobɔɔ ni bɛŋkɛ kpaakpa lɛ fee babaoo kɛye ebua amɛteŋ mɔ fɛɛ mɔ koni eŋmɛ etsui shi. (Abɛi 17:17) Daniel, ni Yehowa kɛ sɛɛyoomɔ krɛdɛɛ ko ejɔɔ lɛ lɛ, yɛ babaoo ni ebaatsɔɔ enanemɛi lɛ. (Daniel 1:17) Shi eyɛ nitsɔɔmɔ kroko ni ebaafee hu.

11. (a) Mɛni yɔɔ srɔto kwraa yɛ Daniel nitsumɔ lɛ he? (b) Daniel tsu enitsumɔ ni ekaaa lɛ he nii yɛ gbɛ ni mɔɔ shi nɔ yɛ mɛɛ gbɛ nɔ?

¹¹ Daniel nitsumɔ ji ni eye Jeŋmajiaŋbii ni ji abladei lɛ odase babaoo fe gbalɔ fɛɛ gbalɔ. Eyɛ mli akɛ ehe bahiaa ni ekɛ shɛɛ saji ni eŋɔɔɔ aha moŋ, shi ebuuu nɛkɛ nɔyelɔi nɛɛ akɛ mɛi ni esa akɛ enyaŋe amɛ loo mɛi ni enɔ kwɔ fe amɛ. Ewie etsɔɔ amɛ yɛ bulɛ kɛ ŋaa mli. Mɛi komɛi yɛ​—tamɔ abladei hetsɛ̃lɔi ni tsɔɔ ŋaa fɔŋ​—ni taoɔ akɛ amɛkpata Daniel hiɛ lɛ. Kɛlɛ, abladei nɛɛ ekomɛi kɛ bulɛ ha lɛ. Akɛni Yehowa ha Daniel nyɛ etsɔɔ teemɔŋ saji ni maŋtsɛmɛi kɛ nilelɔi lɛ enaaa naa hewɔ lɛ, gbalɔ lɛ hé gbɛi waa. (Daniel 2:​47, 48; 5:29) Eji anɔkwale akɛ, yɛ egbɔlɛ hewɔ lɛ, enyɛɛɛ efee babaoo taakɛ efeɔ yɛ eblahiiaŋ lɛ. Shi etee nɔ kɛyashi enaagbee ni ekã he ekɛ anɔkwayeli miitao gbɛ fɛɛ gbɛ ni eeená ni ekɛaasɔmɔ akɛ e-Nyɔŋmɔ ni esumɔɔ lɛ lɛ odasefonyo.

12. (a) Mɛɛ nitsɔɔmɔ nitsumɔi wɔ akɛ Kristofoi lɛ wɔkɛ wɔhe woɔ mli ŋmɛnɛ? (b) Te wɔɔfee tɛŋŋ wɔnyiɛ Paulo ŋaawoo akɛ “nyɛnyiɛa yɛ nilee mli yɛ mɛi ni yɔɔ sɛɛ lɛ ahiɛ” lɛ sɛɛ?

¹² Ekolɛ wɔbaaná nanemɛi anɔkwafoi yɛ Kristofoi asafo lɛ mli ŋmɛnɛ, ni baaye abua wɔ ni wɔŋmɛ wɔtsui shi, tamɔ bɔ ni Daniel kɛ enanemɛi etɛ lɛ ye bua amɛhe lɛ. Agbɛnɛ hu wɔtsɔɔ wɔhe nii, ni ‘wɔwoɔ wɔhe hewalɛ.’ (Romabii 1:​11, 12) Taakɛ Daniel ji lɛ, wɔyɛ nitsumɔ akɛ wɔshiɛ wɔtsɔɔ mɛi ni heee yeee lɛ. (Mateo 24:14; 28:​19, 20) No hewɔ lɛ, ehe miihia ni wɔha wɔhe asa koni wɔnyɛ ‘wɔkɛ anɔkwale wiemɔ lɛ atsu nii yɛ gbɛ ni ja nɔ’ beni wɔwieɔ Yehowa he wɔtsɔɔ gbɔmɛi lɛ. (2 Timoteo 2:15) Ni ebaaye ebua kɛji wɔbo Paulo ŋaawoo lɛ toi akɛ: “Nyɛnyiɛa yɛ nilee mli, yɛ mɛi ni yɔɔ sɛɛ lɛ ahiɛ.” (Kolosebii 4:5) Nɔ ni fata nilee ni tamɔ nɛkɛ he ji mɛi ni bɛ wɔ hemɔkɛyeli lɛ eko lɛ ni wɔɔsusu amɛhe yɛ gbɛ ni ŋmɛɔ pɛpɛɛpɛ nɔ. Wɔkwɛɛɛ gbɔmɛi ni tamɔ nɛkɛ yɛ shikpɔŋ, ni wɔmiibu wɔhe akɛ wɔnɔ kwɔlɔ. (1 Petro 3:15) Shi moŋ, wɔtaoɔ akɛ wɔɔgbala amɛ kɛba anɔkwale lɛ he, ni wɔkɛ Nyɔŋmɔ Wiemɔ lɛ tsuɔ nii yɛ ŋaa kɛ hesaa mli koni wɔnine ashɛ amɛtsuii anɔ. Kɛji akɛ wɔnine shɛ mɔ ko nɔ yɛ omanyeyeli mli lɛ, kwɛ miishɛɛ ni enɛ haa wɔnáa! Miishɛɛ ni tamɔ nɛkɛ yeɔ ebuaa wɔ diɛŋtsɛ ni wɔŋmɛɔ wɔtsui shi kɛyashiɔ naagbee taakɛ Daniel fee lɛ.

“OOOJƆƆ OHE”

13, 14. Mɛni hewɔ gbele ni aaagbo lɛ woɔ Babiloniabii pii ahe gbeyei lɛ, ni esoro Daniel susumɔ yɛ mɛɛ gbɛ nɔ?

¹³ No sɛɛ lɛ ŋwɛibɔfo lɛ kɛ tsuiwoo wiemɔ nɛɛ ha Daniel, akɛ: “Ooojɔɔ ohe.” (Daniel 12:13) Mɛni nakai wiemɔi lɛ tsɔɔ? Ojogbaŋŋ, Daniel le akɛ gbele kã ehiɛ. Gbele efee naagbee ko ni adesai fɛɛ nyɛɛɛ ajo naa foi, kɛjɛ Adam gbii lɛ amli kɛbashi wɔ diɛŋtsɛ wɔbe nɛɛ mli. Biblia lɛ tsɛɔ gbele akɛ “henyɛlɔ” yɛ gbɛ ni sa jogbaŋŋ nɔ. (1 Korintobii 15:26) Shi kɛha Daniel lɛ, gbele ni baa lɛ tsɔɔ nɔ kroko ni esoro lɛ kwraa, yɛ nɔ ni etsɔɔ kɛha Babiloniabii ni ebɔle ehe kɛkpe lɛ. Kɛha amɛ lɛ, akɛni amɛkɛ amɛhe ewo apasa nyɔŋmɔi aaafee 4,000 lɛ ajamɔ ni yɔɔ hwanyaŋŋ lɛ mli vii hewɔ lɛ, gbele kɛ gbeyeishemɔi srɔtoi babaoo baa amɛnɔ. Amɛheɔ amɛyeɔ akɛ, yɛ gbele sɛɛ lɛ, mɛi ni ehiii shi yɛ miishɛɛ mli loo awuiyeli gbele baa amɛnɔ lɛ batsɔmɔɔ mumɔi ni tɔɔ owele ni haoɔ hiɛkalɔi lɛ. Babiloniabii lɛ hu heɔ gbohii ajeŋ ko, ni kooloi ní he yɔɔ gbeyei ni amɛfã gbɔmɔ kɛ fã hu kooloo yɔɔ jɛmɛ lɛ amɛyeɔ.

¹⁴ Gbele etsɔɔɔ enɛɛmɛi eko kwraa kɛhaaa Daniel. Afii ohai abɔ dani Daniel gbi lɛ aaashɛ lɛ, no mli lɛ akɛ mumɔ etsirɛ Maŋtsɛ Salomo koni ekɛɛ akɛ: “Gbohii lɛ, amɛleee nɔ ko nɔ ko.” (Jajelɔ 9:5) Ni lalatsɛ lɛ fo lala yɛ mɔ ni gboɔ lɛ he akɛ: “Kɛ́ emumɔ je emli lɛ, ekuɔ esɛɛ kɛyaa esu lɛ mli ekoŋŋ; nakai gbi lɛ nɔŋŋ eyiŋtoi lɛ laajeɔ.” (Lala 146:4) No hewɔ lɛ Daniel le akɛ wiemɔi ni ŋwɛibɔfo lɛ wie etsɔɔ lɛ lɛ baaba mli. Gbele tsɔɔ hejɔɔmɔ. Susumɔi bɛ mli, heshwamɔ kɛ dɔlɛ bɛ mli, piŋmɔ bɛ mli​—ni kooloi ni amɛhe yɔɔ gbeyei hu bɛ jɛmɛ. Yesu Kristo tsɔɔ saji amli nakai nɔŋŋ yɛ be mli ni Lazaro gbo lɛ. Ekɛɛ akɛ: “Wɔshieŋtsɛ Lazaro ewɔ.”​—Yohane 11:11.

15. Te aaafee tɛŋŋ ni gbele gbi aaanyɛ afee nɔ ni hi fe fɔmɔ gbi lɛ?

¹⁵ Susumɔ yiŋtoo kroko hewɔ ni Daniel sheee gbele ni baa lɛ gbeyei lɛ he okwɛ. Nyɔŋmɔ Wiemɔ lɛ kɛɔ akɛ: “Gbɛi kpakpa hi fe mu kpakpa, ni gbele gbi hi fe fɔmɔ gbi.” (Jajelɔ 7:1) Te aaafee tɛŋŋ ni gbele gbi, ni ji awerɛho gbi diɛŋtsɛ lɛ, aaafee nɔ ni hi fe fɔmɔ gbi ni yɔɔ miishɛɛ lɛ? Nɔ titri lɛ yɛ “gbɛi” lɛ mli. “Mu kpakpa” baanyɛ afee nɔ ni jara wa waa. Be ko lɛ Lazaro nyɛmi yoo Maria kɛ mu ni jeɔ ŋma waa ni ejara shɛɔ nɔ ni miihe ashɛ afi nyɔmɔwoo kpa Yesu naji ahe! (Yohane 12:​1-7) Te aaafee tɛŋŋ ni gbɛi folo jara aaawa nakai lɛ? Hela Septuagint shishitsɔɔmɔ lɛ kɛɔ yɛ Jajelɔ 7:1 akɛ, “gbɛi kpakpa.” Jeee gbɛi folo lɛ kɛkɛ, shi nɔ ni edamɔ shi kɛha lɛ ji nɔ ni jara wa waa lɛ. Yɛ efɔmɔ mli lɛ, gbɛi ni anáa, nitsumɔi kpakpai ni átsu, saji ni adɔɔ he ni abaakai ko fataaa mɔ ni afɔ lɛ lɛ su kɛ baŋ kɛ enyɛmɔi ahe. Shi yɛ wala naagbee lɛ, gbɛi lɛ tsɔɔ enɛɛmɛi fɛɛ. Ni kɛji akɛ eji gbɛi kpakpa yɛ Nyɔŋmɔ hiɛ lɛ, belɛ ejara wa kwraa fe heloonaa nibii fɛɛ ni abaanyɛ aná.

16. (a) Daniel bɔ mɔdɛŋ ni ená gbɛi kpakpa yɛ Nyɔŋmɔ hiɛ yɛ mɛɛ gbɛ nɔ? (b) Mɛni hewɔ Daniel baanyɛ ayajɔɔ ehe kɛ hekɛnɔfɔɔ ni yeɔ emuu akɛ eye omanye yɛ gbɛi kpakpa ni efee yɛ Yehowa hiɛ lɛ mli?

¹⁶ Daniel fee nɔ fɛɛ nɔ ni yɔɔ ehewalɛ mli yɛ ewala shihilɛ be lɛ fɛɛ mli koni ekɛná gbɛi kpakpa yɛ Nyɔŋmɔ hiɛ, ni Yehowa ekuuu ehiɛ eshwieee enɛɛmɛi eko kwraa nɔ. Ekwɛ Daniel ni eka etsui ekwɛ. No mli lɛ Nyɔŋmɔ efee babaoo kɛha Maŋtsɛ David ni la akɛ: “Yehowa, otaoɔ mimli ni ole mi. Ole mishitamɔ kɛ mishitee mli fɛɛ; oyooɔ miyiŋtoo yɛ shɔŋŋ beebe.” (Lala 139:​1, 2) Wɔkpɛlɛɔ nɔ akɛ Daniel yeee emuu. Eji eshafeelɔ Adam seshinyo, ni eji maŋ ni feɔ esha lɛ mlinyo. (Romabii 3:23) Shi Daniel tsake etsui kɛjɛ ehe esha lɛ mli, ni etee nɔ ebɔ mɔdɛŋ ni ekɛ e-Nyɔŋmɔ lɛ anyiɛ yɛ jalɛ mli. No hewɔ lɛ gbalɔ anɔkwafo lɛ baanyɛ aná hekɛnɔfɔɔ akɛ Yehowa kɛ ehe eshai lɛ baake lɛ, ni emli fuŋ lɛ yɛ nomɛi ahewɔ. (Lala 103:​10-14; Yesaia 1:18) Yehowa halaa akɛ eeekai etsuji anɔkwafoi lɛ anitsumɔi kpakpai lɛ. (Hebribii 6:10) Yɛ enɛ hewɔ lɛ, Yehowa bɔfo lɛ tsɛ Daniel shii enyɔ akɛ “nuu ni asumɔɔ osane naakpa.” (Daniel 10:​11, 19) Enɛ tsɔɔ akɛ Nyɔŋmɔ sumɔɔ Daniel. Daniel baanyɛ ni ekɛ tsui ni nyɔɔ mɔ mli ayajɔɔ ehe, ejaakɛ ele akɛ ená gbɛi kpakpa yɛ Yehowa hiɛ.

17. Mɛni hewɔ ehe hiaa ni wɔfee gbɛi kpakpa yɛ Yehowa hiɛ ŋmɛnɛ lɛ?

¹⁷ Wɔteŋ mɔ fɛɛ mɔ baanyɛ abi ehe akɛ, ‘Ani miná gbɛi kpakpa yɛ Yehowa hiɛ?’ Haomɔ bei amli wɔyɔɔ lɛ. Ejeee nii ni haa ŋmiŋmi mɔɔ mɔ shi nii ni esa akɛ wɔyoo diɛŋtsɛ akɛ gbele baanyɛ aba wɔteŋ mɔ fɛɛ mɔ nɔ be fɛɛ be. (Jajelɔ 9:11) Belɛ kwɛ bɔ ni ehe hiaa akɛ wɔteŋ mɔ fɛɛ mɔ aaatswa efai shi akɛ ebaafee gbɛi kpakpa yɛ Nyɔŋmɔ hiɛ bianɛ, ni shishashaomɔ ko bɛ mli. Kɛji akɛ wɔfee nakai lɛ, ehe ehiaŋ ni wɔshe gbele gbeyei. Eji hejɔɔmɔ kɛkɛ​—tamɔ wɔ. Ni taakɛ wɔ ji lɛ, nɔ ni nyiɛɔ sɛɛ ji shitee!

“OOOTE SHI”

18, 19. (a) Mɛni ŋwɛibɔfo lɛ tsɔɔ beni egba efɔ̃ shi akɛ Daniel ‘baate shi’ yɛ wɔsɛɛ be mli lɛ? (b) Mɛni hewɔ Daniel baanyɛ afee mɔ ni le gbohiiashitee he hiɛnɔkamɔ lɛ jogbaŋŋ lɛ?

¹⁸ Daniel wolo lɛ baa naagbee kɛ shiwoi ni ŋɔɔ fe fɛɛ ni Nyɔŋmɔ kɛha adesa ko pɛŋ lɛ ateŋ ekome. Yehowa bɔfo lɛ kɛɛ Daniel akɛ: “Ooote shi oyaná ogbɛfaŋnɔ yɛ gbii lɛ anaagbee lɛ mli.” Mɛni ŋwɛibɔfo lɛ tsɔɔ lɛ? Ojogbaŋŋ, akɛni ‘hejɔɔmɔ’ ni etsĩ tã bianɛ lɛ ji gbele hewɔ lɛ, shiwoo ni akɛha akɛ Daniel ‘baate shi’ yɛ sɛɛ mli be ko mli lɛ baanyɛ atsɔɔ nɔ kome pɛ​—gbohiiashitee!b Yɛ anɔkwale mli lɛ, woloŋlelɔi komɛi ejaje kɛ nɔmimaa akɛ anaa klɛŋklɛŋ sane ni mli kã shi faŋŋ ni kɔɔ gbohiiashitee he yɛ Hebri Ŋmalɛi lɛ amli lɛ yɛ Daniel yitso 12. (Daniel 12:2) Shi amɛ sane lɛ ejaaa yɛ enɛ mli. Daniel le gbohiiashitee he hiɛnɔkamɔ lɛ jogbaŋŋ.

¹⁹ Ákɛ nɔkwɛmɔnɔ lɛ, ŋwanejee ko bɛ he akɛ Daniel le wiemɔi ni Yesaia eŋmala eshwie shi afii ohai enyɔ kɛtsɔ hiɛ lɛ, akɛ: “Omɛi ni egboi lɛ ahiɛ aaakamɔ, migbohii lɛ aaate shi. Nyɛhiɛ atsɛa, nyɛlaa yijiemɔ lalai, nyɛ mɛi ni nyɛyɔɔ sũ mli lɛ! Shi . . . shikpɔŋ lɛ aaajie mɛi ni nyɛɛɛ nɔ ko amɛfee yɛ gbele mli lɛ ashwie shi tamɔ bii ni afɔɔ.” (Yesaia 26:​19, NW) Jeeŋmɔ dani enɛ aaaba lɛ, Yehowa kɛ hewalɛ ha Elia kɛ Elisha koni amɛtee gbohii ashi diɛŋtsɛ. (1 Maŋtsɛmɛi 17:​17-24; 2 Maŋtsɛmɛi 4:​32-37) Nɔ ni tsɔ enɛ hiɛ po lɛ, Hana, ni ji gbalɔ Samuel nyɛ lɛ kpɛlɛ nɔ akɛ Yehowa nyɛɔ eteeɔ gbɔmɛi ashi kɛjɛɔ Sheol, ni ji gbonyobu mli. (1 Samuel 2:6) Mra mli hu lɛ, anɔkwafo Hiob kɛ nɛkɛ wiemɔi nɛɛ tsɔɔ lɛ diɛŋtsɛ ehiɛnɔkamɔ akɛ: “Kɛji gbɔmɔ gbo lɛ, ani ehiɛ aaaka ekoŋŋ? kulɛ mitawuu gbii lɛ amli fɛɛ lɛ makwɛ gbɛ kɛyashi beyinɔ ni mitsakemɔ lɛ aaaba! Kulɛ oootsɛ, ni mahereo nɔ; ni oootao onine naa nitsumɔ lɛ sɛɛgbɛ.”​—Hiob 14:​14, 15.

20, 21. (a) Mɛɛ gbohiiashitee Daniel yɔɔ nɔmimaa akɛ ebaafata he lɛ? (b) Mɛɛ gbɛ nɔ ekolɛ gbohiiashitee yɛ Paradeiso lɛ baatsɔ aba?

²⁰ Taakɛ Hiob ji lɛ, Daniel yɛ nɔ ni eeedamɔ nɔ ená hekɛnɔfɔɔ akɛ Yehowa baashwe akɛ ekɛ lɛ aaaba wala mli ekoŋŋ gbi ko yɛ wɔsɛɛ be mli. Kɛlɛ, ebaafee miishɛjemɔ waa akɛ eeenu ni mumɔŋ bɔɔ nɔ ko ni he wa miima nakai hiɛnɔkamɔ lɛ nɔ mi. Hɛɛ, Daniel baate shi “yɛ jalɔi ashitee” ni baaba yɛ Kristo Afii Akpe Nɔyeli lɛ mli lɛ mli. (Luka 14:14) Mɛni enɛ baatsɔɔ kɛha Daniel? Nyɔŋmɔ Wiemɔ lɛ kɛɔ wɔ saji babaoo yɛ enɛ he.

²¹ Yehowa “jeee sakasakafeemɔ Nyɔŋmɔ, shi moŋ hejɔlɛ Nyɔŋmɔ ni.” (1 Korintobii 14:33) Belɛ eyɛ faŋŋ akɛ gbohiiashitee ni baaba yɛ Paradeiso lɛ baaya nɔ yɛ gbɛjianɔtoo naa. Ekolɛ be ko eho kɛjɛ Harmagedon. (Kpojiemɔ 16:​14, 16) Ájie nibii agbɛjianɔtoo momo lɛ he nibii ni shwɛ lɛ fɛɛ kɛtee momo, ni ŋwanejee ko bɛ he akɛ áto gbɛjianɔ koni akɛhere gbohii lɛ atuu kɛba. Yɛ gbɛjianɔ ni ato koni gbohii lɛ atsɔ nɔ aba lɛ gbɛfaŋ lɛ, Biblia lɛ kɛ kadimɔ nii nɛɛ haa: “Mɔ fɛɛ mɔ yɛ lɛ diɛŋtsɛ egbɛjianɔ.” (1 Korintobii 15:23) Ebaanyɛ efee akɛ kɛ ashɛ ‘jalɔi lɛ kɛ mɛi ni ejaaa lɛ ashitee’ lɛ nɔ lɛ, akɛ jalɔi lɛ baaba klɛŋklɛŋ. (Bɔfoi lɛ Asaji 24:15) Yɛ nɛkɛ gbɛ nɔ lɛ, belɛ blema hii anɔkwafoi, tamɔ Daniel, baanyɛ aye abua yɛ shikpɔŋ nɔ saji lɛ anɔkwɛmɔ mli, kɛfata akpekpei akpei abɔ “ni ejaaa” ni akɛ amɛ baa wala mli lɛ atsɔsemɔ he.​—Lala 45:17.

22. Ŋwanejee ko bɛ he akɛ mɛɛ sanebimɔi komɛi Daniel baasumɔ waa ni aha amɛ hetoo?

²² Dani Daniel aaafee klalo akɛ eeetsu gbɛnaa nii nɛɛ ahe nii lɛ, yɛ anɔkwale mli lɛ saji komɛi yɛ ni ebaasumɔ ni ebi. Ejaakɛ ewie gbalɛi komɛi ni mli kwɔlɔ ni akɛha lɛ lɛ ekomɛi ahe akɛ: “Minu, shi minaaa shishi.” (Daniel 12:8) Kwɛ emii ni baashɛ ehe aha akɛ yɛ naagbee lɛ eeenu nɛkɛ ŋwɛi teemɔŋ saji nɛɛ ashishi! Ŋwanejee ko bɛ he akɛ ebaasumɔ ni enu saji fɛɛ ni kɔɔ Mesia lɛ he lɛ he. Daniel kɛ enaa ni ekpɛ ehe baale bɔ ni fee ni jeŋ hewalɛi lɛ eko nyiɛ eko sɛɛ ba, kɛjɛ lɛ diɛŋtsɛ egbii lɛ amli aahu kɛbashi wɔ diɛŋtsɛ wɔgbii nɛɛ amli, ebaale mɛi ni “mɔ ni yɔɔ ŋwɛi shɔŋŋ lɛ mɛi krɔŋkrɔŋi lɛ” ji​—mɛi ni ŋmɛ amɛtsui shi yɛ yiwaa fɛɛ sɛɛ yɛ “naagbee be lɛ” mli lɛ​—kɛ adesa maŋtsɛyelii fɛɛ anaagbee hiɛkpatamɔ ni Nyɔŋmɔ Mesia Maŋtsɛyeli lɛ kɛbaaba lɛ.​—Daniel 2:​44; 7:​22; 12:4.

DANIEL GBƐFAŊNƆ YƐ PARADEISO​—KƐ BO DIƐŊTSƐ ONƆ̃!

23, 24. (a) Yɛ mɛɛ gbɛ nɔ jeŋ ni Daniel naa akɛ átee lɛ shi kɛba mli lɛ baafee nɔ ni yɔɔ srɔto yɛ nɔ ni ele lɛ he? (b) Ani Daniel baaná gbɛhe yɛ Paradeiso, ni te wɔfeɔ tɛŋŋ wɔleɔ?

²³ Daniel baasumɔ ni ele jeŋ ni ebaana ehe yɛ mli yɛ nakai be lɛ mli lɛ he saji​—jeŋ ni tamɔɔɔ egbii lɛ amli nɔ̃ lɛ kwraa. Tai kɛ nɔnyɛɛ he nibii ni fite jeŋ ni ele lɛ mli nibii fɛɛ lɛ elaaje. Awerɛho bɛ, hela bɛ, gbele bɛ. (Yesaia 25:8; 33:24) Shi niyenii babaoo baahi shi, asɛ̃ɛɛ shiai ahe, ni nitsumɔ ni haa mɔ tsui nyɔɔ emli yɛ kɛha mɔ fɛɛ mɔ. (Lala 72:16; Yesaia 65:​21, 22) Adesai baafee weku kome ni yɔɔ miishɛɛ.

²⁴ Bɔ fɛɛ bɔ ni eji lɛ, Daniel baaná gbɛfaŋnɔ kɛ̃ yɛ nakai je lɛ mli. Ŋwɛibɔfo lɛ kɛɛ lɛ akɛ: ‘Ooote shi oyaná ogbɛfaŋnɔ.’ Hebri wiemɔ ni atsɔɔ shishi yɛ biɛ akɛ “gbɛfaŋnɔ” lɛ nɔŋŋ akɛtsuɔ nii ahaa shikpɔji ni ajaa.c Ekolɛ Daniel le Ezekiel gbalɛ ni kɔɔ Israel shikpɔŋ ni amɛnine eshɛ nɔ ekoŋŋ lɛ ni ajara lɛ. (Ezekiel 47:13–48:35) Mɛni Ezekiel gbalɛ lɛ tsɔɔ yɛ emlibaa mli yɛ Paradeiso? Ákɛ, Nyɔŋmɔ webii fɛɛ baaná gbɛhe yɛ Paradeiso, ni abaaja shikpɔŋ lɛ mli yɛ gbɛjianɔtoo kpakpa ni ja naa. Shi, gbɛfaŋnɔ ni Daniel baaná yɛ Paradeiso lɛ kɔɔ nibii babaoo he fe shikpɔŋ kɛkɛ. Enitsumɔ yɛ Nyɔŋmɔ yiŋtoo mli yɛ jɛmɛ fata he. Áma Daniel nyɔmɔwoo he shiwoo lɛ nɔ mi.

25. (a) Mɛni ji Paradeiso shihilɛ mli gbɛkpamɔi komɛi ni osumɔɔ? (b) Mɛni hewɔ abaanyɛ akɛɛ akɛ Paradeiso ji adesai ashihilɛ he lɛ?

²⁵ Shi kɛlɛ, mɛni ji bo hu ogbɛfaŋnɔ? Nakai shiwoi lɛ nɔŋŋ baanyɛ akɔ ohe. Yehowa miisumɔ ni adesai toibolɔi ‘ate shi’ ni amɛyaná amɛ gbɛfaŋnɔ, ni amɛná gbɛhe yɛ Paradeiso. Bo lɛ susumɔ enɛ he okwɛ! Yɛ anɔkwale mli lɛ ebaafee miishɛɛ akɛ ooona Daniel diɛŋtsɛ akɛ gbɔmɔ, kɛ hii kɛ yei anɔkwafoi krokomɛi ni hi shi yɛ Biblia bei amli lɛ. Agbɛnɛ gbɔmɛi babaoo ni anyɛŋ akane amɛ ni kuɔ amɛsɛɛ kɛjɛɔ gbohiiaje, ni tsɔsemɔ he hiaa amɛ bɔni afee ni amɛle ni amɛsumɔ Yehowa Nyɔŋmɔ lɛ hu baahi shi. Feemɔ ohe mfoniri akɛ oosaa wɔshikpɔŋ ni ji wɔshia lɛ nɔ, ni ooye oobua koni etsɔ paradeiso ni yɔɔ srɔto kwraa kɛ fɛo ni bɛ naagbee. Susumɔ ní Yehowa miitsɔɔ bo nii, ookase bɔ ni ahiɔ shi yɛ gbɛ ni etaoɔ koni adesai ahi shi lɛ. (Yesaia 11:9; Yohane 6:45) Hɛɛ, gbɛhe yɛ Paradeiso kɛha bo. Eyɛ mli akɛ ekolɛ Paradeiso baatamɔ nɔ ko ni yɔɔ srɔto kwraa aha mɛi komɛi ŋmɛnɛ moŋ, shi kaimɔ akɛ Yehowa to kɛjɛ shishijee akɛ adesai ahi shi yɛ he ko ni tamɔ nɛkɛ. (1 Mose 2:​7-9) Yɛ shishinumɔ nɛɛ naa lɛ, Paradeiso ji shikpɔŋ nɔ gbɔmɛi akpekpei akpei abɔ lɛ ashihilɛhe yɛ adebɔɔ naa. Biɛ ji he ni amɛjɛ. Nine ni aaashɛ nɔ lɛ baafee tamɔ nɔ ni aaya shia.

26. Yɛ mɛɛ gbɛ nɔ Yehowa kpɛlɛɔ nɔ akɛ mɛ ni amɛɔ nibii agbɛjianɔtoo nɛɛ naagbee lɛ bɛ mlɛo kɛha wɔ?

²⁶ Wɔtsuii shweɔ waa kɛ hiɛsɔɔ kɛji akɛ wɔsusu enɛɛmɛi fɛɛ he, aloo jeee nakai? Ani bo diɛŋtsɛ lɛ oshweee akɛ ooohi jɛmɛ? Ebɛ naakpɛɛ mɔ akɛ no hewɔ ni Yehowa Odasefoi ahe tswaa shi akɛ amɛaale be mli ni nibii agbɛjianɔtoo nɛɛ naagbee baaba lɛ! Mɛ ni amɛɔ lɛ bɛ mlɛo. Yehowa le akɛ nakai eji, ejaakɛ ewoɔ hewalɛ koni “wɔmɛ” naagbee lɛ “kɛji akɛ eshashao shi hu jiŋŋ.” Eetsɔɔ akɛ ekolɛ yɛ wɔhiɛ lɛ ebaafee tamɔ nɔ ni eeshashao shi, ejaakɛ amaa nɔ mi ahaa wɔ yɛ nakai ŋmalɛ lɛ nɔŋŋ mli akɛ: “Ekpeŋ sɛɛ.” (Habakuk 2:3; okɛto Abɛi 13:12 he.) Hɛɛ, naagbee lɛ baaba yɛ be ni ato lɛ mli pɛpɛɛpɛ.

27. Mɛni esa akɛ ofee koni odamɔ Nyɔŋmɔ hiɛ kɛya naanɔi fɛɛ mli?

²⁷ Mɛni esa akɛ ofee beni naagbee lɛ bɛŋkɛɔ lɛ? Ŋmɛɛ otsui shi yɛ anɔkwayeli mli, tamɔ Yehowa gbalɔ Daniel ni asumɔɔ esane naakpa lɛ fee lɛ. Okɛ mɔdɛŋbɔɔ akase Nyɔŋmɔ Wiemɔ lɛ. Okɛ hiɛdɔɔ asɔle. Okɛ nanemɛi heyelilɔi abɔ yɛ suɔmɔ mli. Okɛ ekãa atsɔɔ mɛi krokomɛi anɔkwale lɛ. Akɛni yiwalɛ nibii agbɛjianɔtoo nɛɛ naagbee miibɛŋkɛ kpaakpa daa gbi hewɔ lɛ, tswaa ofai shi akɛ obaahi shi akɛ Ŋwɛinyo lɛ tsulɔ anɔkwafo kɛ e-Wiemɔ lɛ sɛɛfilɔ ni yɔɔ shiŋŋ. Bɔ fɛɛ bɔ ni eji lɛ, bó Daniel gbalɛ lɛ toi! Ni eba akɛ Nuntsɔ Maŋtsɛ Yehowa aaaha oná hegbɛ ni okɛaadamɔ ehiɛ yɛ miishɛɛ mli kɛya naanɔi anaanɔ!

[Shishigbɛ niŋmai]

[Baafa muu mfoniri ni yɔɔ baafa 307]

[Mfoniri ni yɔɔ baafa 318]

Taakɛ Daniel ji lɛ, ani oboɔ Nyɔŋmɔ gbalɛ wiemɔ lɛ toi?